بعد عدة أيام وفليلة مالليالي
كانت لابسة طالون بوتيو واصل حد الركب وتحت منو جوارب سودا شفافة كتبين ركبها وتنورة دجين قصيرة حد الفخاذ وفوق منها قميص فاللون الأزرق غامق مفتوح من جهة الصدر بقفافل وفوق هاد القميص جاكيطا جلدية سودا وشعرها مرولياه وطالقاه بعشوائية ودايرة مايكاب مثير كحل بزاااف فعينيها و احمر شفاه فاقع وعطرها كيفوح كانت مغرية وتهبل بالزين ، نزلت من سيارتها وتقدمت نحو الفيلا وهي هازة حقيبتها وفيدها التانية هازة قرعة ويسكي وصونات الباب بعد مدة تفتح وهي انحنت براسها بإثارة وبمسكة ففمها كتتلاعب بيها وبنظرة منحلة شافت فيه ..
قبل ساعات
وليد(حاط يدو على جبهتو بنفاذ صبر):- واش باغية تجلطيني أنا مُصر باش تمشي حسب الخطة اللي رسمتهالك وأوياك يصورلك بالك تخرجي عليها أناديا
ناديا(دايرة رجل على رجل وكتشوف فيه بسكون):- هففف مفهمتكش دبا علاش مكبر الأمور غادي تكون قريب مالفيلا ويلا حسيت بالخطر غادي تعرف وتدخل وقتها
وليد(كلس حداها على الكنبة بجدية):- مع ذلك غادي تسمعي كلامي وغادي تحطي جهاز الإتصال ثم منيش فاهم هو مجرد سنسلة علاش مقادراش ديريها ؟؟؟؟
ناديا(ابتلعت ريقها وحطت يدها على عنقها بالضبط على العقد):- أ... اففف صافي صافي موافقة غير هنيني أوليد راك وليت كتلصق فالحاجة اوووو
وليد(عاد تنفس الصعداء وفهم علاش الفيلم وابتسم):- هههههه كنتي قولي مساخياش تحيدي عقدي يا ستي ماعليك غير نساليو المهمة ترجعيه
ناديا(وقفت باعتزاز):- هي هي نتا حمق وقيلة أشمن عقد اللي غاندير عليه أنا كاع هاكدة إنما هي حساسيات وصافي أنا أنا مجانيش فتصوري كاع هاد الهدرة اللي كتقول
وليد(وقف وجا موراها):- يس يس صدقتك
ناديا(دارت عندو بعصبية مصطنعة):- توقف متقلدش ساريتا
وليد:- ههههههه هفففف يا ناديا وراسك القاسح .. مملاحظاش معايا شي حاجة ؟
ناديا(باستغراب):- شنوو ؟
وليد:- لين غطست مبانتش من مور موصيتها تجيبلك ملابس
ناديا(تفكرتها وشدتها وجعة من هبالها):- اممممم وحياتك غير خليها غاطسة بمجرد مكتجي كيصيبني وجع معوي
وليد(انحنى بسرعة عندها وبعد بمجرد مكمل كلمتو):- لاباس عليك
ناديا(التفت تشوف فيه وراقباتو وهو يبعد وتنفست بغضب):- صبرا يا رب فهاد الليلة
وليد(هز تليفونو):- شنو قلتي ...؟
ناديا(ابتسمت بدعابة):- لا والو والو
وليد(فاهمها لكن مبينش وبابتسامة):- امممممم راني سمعتك ... تت ألووو وي جاد فين وصلت آه وصافي مزيان شوف متخليش بلال يتحرك قبل منعطي إشارتي تفاهمنا حنا منا لجوج سوايع نتحركو .. أوكي مزيان كيوصل كمال للفيلا بلغني فورا.. نتلاقاو ... تيت تيت .. إذن سنيورة ناديا غادي تجي معايا لفوق باش نعطيك السنسلة ونجربوها بيما جات الست لين
ناديا(تمشات قدامو):- أوكي يالاه
وليد(سبقها وفتح باب المكتب):-ياريتك تبقاي ع طول عاقلة كيما هاكدة
ناديا(بصرامة):- متحلمش
وليد:- عارف يا مصيبتي عارف
ناديا(خرجت قبلو وبقات تتمشى خلفيا):- شنو قلت؟
وليد(مدعي البراءة وكيقلدها):- لا والو والووووو
هيلين(نازلة معا الدروج وشافتهم خارجين يضحكو وتنرفزت):- إيوا اللي ضحككم يضحكنا ؟
وليد(صرط ضحكو وبحزم):- نعست سارة ؟
هيلين:- آه نعست
وليد:-إيوا نعسي حتى نتي ؟
هيلين(شافت فناديا بعصبية):- مفياش أون بليس مغاديش تشاركوني بتخطيطاتكم مصباح ونتوما فالمكتب عالم الله علامن ناويين؟
وليد(ريش براسو لناديا باش تسبقو واللي طلعت وهي تخنزر فهيلين):- هيلين حنا عندنا خدمة وماشي وقت تدخلاتك التافهة دبا شوفي تلفزيون ولا قراي شي مجلة تسليك
هيلين:- يووووه نتا محاسش بيا واش غانبقا نهدر معا الحيطان تاشي حد مكيفهمني
وليد(كان ماشي وولا خطوة عندها وباستهزاء):- سمحيلنا اليوم حجزنالك السي جاد لكن للضرورة أحكام
هيلين(حمرت فيه بعينها بصدمة):- أش شنووو وجاد واش دخله أنا أنا بغيتك نتا ؟
وليد(حيد يديها اللي حاوطتهم على عنقه):- مكاتمليش من محاولاتك التافهة وعاي شوية وكبري عقلك
هيلين(وجهها ترسمت فيه عاصفة):-كيفااااش ؟؟؟
وليد:- اللي سمعتيه ورجاء تديري فيا بليزيغ غير هاد الليلة وتبعدي من وجهي محيت منيش فمودي وخايف نغلط معاك أكثر
خلاها كتاكل فجنابها مالعصبية وطلع قدام عينيها المصدومين وهزت تليفونها
هيلين(بصوت باكي):- همممممم جاااااد اهئ اهئ فين مشيت وخليتني الليلة بوحدي ؟
جاد(بعد على بلال شوية):- حبيبتي عندي ظروف مغاديش نقدر نجي حتى نساليو الخدمة اللي عندنا آم سوري بيبي مغانقدرش نكون معاك
هيلين:- اففف شنو هي هاد الخدمة اللي تخليكم كاملين تخرجو وتخليوني بوحدي ؟
جاد:- بيبي سمعيني خصني نقطع دبا ونواعدك غدا غاناخدك لمكان زوين نتي وساريتا هااااه وضحكي
هيلين:- منضحكش صافي مودي تضرب بسلامة عليك
قطعت وهي منرفزة من كلشي وهو فيساع دخل لسيارتو وشاف سيارة كمال وصلت للفيلا ودار مساج لوليد خبرو بذلك وهنا وليد هز مسدسو دارو فجيبو وسمع طرق على الباب ودخلت هيا طبعا لغرفتو اللي كان فيها من الحنين رجعها لأول ليلة ليها فديك الفيلا نهار جات ونعست فبيتو وهي معارفاش غير شافتها حست بلمحة داك اليوم وضحكت فسرها لكن تنحنت وتقدمت عندو كان واقف كيسد جاكيطو وبابتسامة فتح الدرج ديال مكتبتو وجبد ديك السنسلة اللي فيها جهاز الإتصال
وليد:- قربي نوريك كيفاش تخدميه أناديا
ناديا(قربت بشوية وبهدوء وهي حاسة برعشة):- راني نعرف كيفاش نخدمهم (شافتو شاف فيها بعصبية وعرفت أنه فكر فخدمتها معا ياسر واستدركت كلامها )... يعني قصدت زعما ماشي أول مرة هادي ... اللي نستخدمهم فهمتني ..
وليد(زفر بهدوء ومبغاش يبنيلها):- مكان مشكل فالإعادة إفادة أجي ... (قربت منو وهو مدلها السنسلة وبقا يوجهها) شوفي ببساطة غير تدخلي من الفيلا غادي تضغطي على هاد البوطونة باش نقدر نلتقط الإرسال مهم جدا أناديا..
ناديا(هززتلو راسها وعينيها فعينيه):- اممم فهمت
وليد(بخوف شدلها ذراعها):- لآخر مرة كنسولك أناديا إيلا مقادراش علا هاد العملية أنا ممكن نكنسلها فالحال المهم نتي تكوني مرتاحة
ناديا(بطمأنينة):- مكان تاشي داعي أوليد أنا وافقت عليها ماللول ويستحيل نوقفها فهاد اللحظة هادي وزايدون واعدت جميلة بأنني نجيبلهم الملفات و غير ذلك غادي تكون معايا نتا فعلاش غانخاف ؟
وليد(عينيه لمعو من جملتها وحس بالسرور وشدد على يدها):- أكيد غانكون معاك و... ادخل
لين(فتحت وطلت براسها):- بعتذر منكم مستر وليد بس صار وقت تجهيز المس ناديا أنا خلصت كلشي
وليد(نزل راسو كيسب فلين اللي كتجي فالوقت الغير مناسب):- تفضلي أنادياااا
ناديا(نزلت راسها بأدب):- عن إذنك
وليد(غمض عينيه مين فاتت حداه ورجع فتحهم):- ناديا
ناديا(التفتت بشوية):- نعم
وليد:- نسيتي هادي ؟
ناديا(ابتسمت اللي نساتها ورجعت تاخدها من يدو):- اففف نسيتها
وليد(كيجات تهزها من يدو حط يدو التانية على يدها):-أنا واثق فيك بزاااااف وكوني مطمنة أنا معاك
ناديا(عينيها عمرو دموع لكن مبينتش):- عارفة
مشات لبيتها أخيرا وبقات كتوجدها لين ومين كملت خرجت ولقاتو واقف فالكولوار متكي على الحيط كيستنا ويفكر بشرود غير شافها طلع عينيه فيها من لفوق لتحت وابتسم وهي شعلت بالعصبية أصلا مكانتش راضية على داك اللوك وحاسة بشعور خايب
ناديا(تقدمت قبلو باش تنزل):- يووووه متضحكش عليا أوليد أنا الراسي محاملاش راسي
وليد(لحقها وشدلها يدها وجبدها لعندو غي بشوية):- على بالك أنك فكل حالاتك كتحمقي ؟
ناديا(صعقت من جملتو):- أ.. هاه ؟؟
وليد(عض شفتو):- يا ربي عاوني كيغاندير نفوت هاد الساعتين ونتي معا داك لل .....
ناديا(حست بيه وبانفاسو اللي كتصوط فوجهها بعصبية):- وليد وليد ماشي تاوصلنا هاد الخطوة غانخسروها نتا عارف ملقينا هاد الفرصة باش خدينا دور البنت اللي كان طالبها هاد الليلة من ديك المصلحة راه بصعوبة تامة مغانضيعوهاش دبا والفرصة مكاتجيش مية مرة همممم
وليد(استغرب انها كتبرد عليه وعقد حواجبو):- هاكدة كنتي تقنعي ياسر بوجودك معايا ؟؟؟؟؟؟
ناديا(تصدمت وحست بطعنة وجعتها فخاطرها وخلات كرشها تألمها ونتفضت بعيد عليه وهي كتهزز فراسها مقادراش تصدق شنو قال وعينيها فيساع بقاو يدمعو ومقدرتش تنطق):- نتا نتا .. افف
وليد(عاد استوعب أن اللي قالو كان جارح ليها بزااااف):- ناديا متفهميش كلامي ..
ناديا(بعصبية ريشتلو بيدها باش يسكت):- يكفي ما باغية نسمع والو تمشى خلينا نمشيو تعطلنا
بصمت وقسوة وعصبية وجرح وقلب مكسور كانت راكبة حداه وهي كتشوف فنقطة فارغة أمامها ومتململتش نهائيا عكسو هو اللي كان كيصوك وعينو عليها بالدرجة الأولى ومعارفش كيفاش يسحب داك الكلام من تفكيرها دباااا وحس بالغضب اللي نطق بمثل ديك الجملة كاع وفداك الظرف الحساس لكن ميقدرش يزيد يضغط عليها باش متنفجرش خصوصا أنهم على وشك ميدخلو فمعمعة كبيرة غير الله يسلكها على خير ... وصلو لنقطة اللقاء معا جاد والرجال
جاد لاحظ الجو المشحون بيناتهم واللي كان باين على وجوهاتهم وغمز لوليد بعبارة شنو كاين لكن وليد لهاه وخلاه يغض النظر وخلا ناديا تركب سيارتها بوحدها اللي كان جابها راجل من رجالهم لعين المكان باش تسبقهم للفيلا لكن مين ركبت انحنى لنافذتها وبقلق مرسوم على وجهه
وليد(تنفس بتعب):- ناديا الهدرة اللي قتهالك مم...
ناديا(حطت يديها على الفولة وعينيها مركزين فيه بدون حياة):- ميهمش .. نقدر نمشي دبا ؟
وليد حتار فجوابها ليه وفنظرتها الجليدية لكنو بعد على نافذتها وريش بيدو ليها وهي حكت جراير اللوطو ومشات على مرأى من عينيه وعينيهم كاملين
جاد(قرب منو):- نتا متأكد أنه مكاين والو ؟
وليد(بشرود متبع العجاجة اللي نوضتها وكيشوف فالطريق اللي مشات منها):- نكدب عليك لاقلت نو
عموما خذو مواقعكم وانا غادي نتبعها باش نكون فنقطة الوجود ديالي تفاهمنا خليونا على اتصال وأوياكم شي حد يغلط شي غلط راه غانعرضو حياتها للخطر تفاهمنا
جاد(حط يدو على سلاحو بطمأنينة):- متخممش موراك رجال غي توكل ع الله
ركب وليد سيارتو وتبعها ووقف بعيد على الفيلا غير بشوية وبقا كيراقب هي منزلتش فورا بقات كالسة شوية تاشافتو وصل وزمرت بسيارتها للباب باش يفتحوها وخرج عندها الكاردكول وانحنت بمياعة براسها وابتسملها وفتحلها البوابة ودخلت بسيارتها ، نزلت وهي حاسة بالرعب فداخلها لكن دبا لا مجال للتراجع فتحولها الباب ولقاتو واقف أونفاص ليها بكرشه اللي كتجيبلها الغثيان
كمال(بقا كيشوف فيها وعرفها):- شكوون اللي جا ناديااااا ميمكنش ؟
ناديا(دخلت دافعة صدرها وبإثارة وإغراء هزت قرعتها وريشتلو بيها):- أناااا جيت نعتذر منك إذا أمكن
كمال حل فموو وشهق بصدمة فاللول خاف ليكون شي ملعوب لكن مين طمن مكان حد معاها فرح بزاااااااف وكان كي الهبيل كينقز قدامهاااا ومزال ممصدقش راسو باللي هي فعلا بشحمها ولحمها قدام عينيه دخلها بسرعة وقفل الباب وبقا غير كيجري وينتر فالخدامة باش تكلس هي و فرحتو ملاقيش لمن يعطيها ... شد عليها القرعة وحطها على الطابلة وكلس حداها على الكنبة وهو معارف ميقول
كمال(بسذاجة):- لكن لكن كيدرتي وصلتي للمكتب الخاص اللي كنطلب منو البنات ؟
ناديا(بمياعة مصطنعة كتمضغ مسكتها):- واللي باغي يوصلك يدير أي حاجة السي كمال
كمال:- ناديا منساش ديك الليلة مين ...
ناديا(ابتلعت ريقها مين فكرها بيها ومدت يدها حطتها بفراغ على كتفو):- السي كمال نطويو الماضي خلينا حنا ولاد اليوم وبصراحة أنا مكنتش عارفة مصلحتي مزيان
كمال(بشيطنة):- ودبا عرفتيها"؟
ناديا(بعيون ملوعة):- أكيد وإلا مكنتش جيت
كمال:- شوفي راه أنا ولد الناس وكاع اللي قتلك عليه داك النهار غادي نديرولك لكن إلى كنتي معايا مرضية وو فهمك كفاية هههههههه
ناديا(ضحكت بسيف عليها):- ههههههه الله ياودي السي كمال اليوم جيت وانا ناوية نبداو صفحة جديدة
كمال(شاف فقرعة الشراب وفرح):- لا عااااارفك ماللي دخلتي معا ديك الباب بصح كيديرتي هربتي من دوك الجوج قنافح وليد وجاد ؟
ناديا:- معلمتهمش كاع هزيت سيارتي وجيتك تاشي حد ميقدر يوقف قدام السي كمال بجلالة قدرووو شكون هوما هادو اللي يوقفو قدام الرغبة ديالوو وبيني وبينك أنا مليت منهم مكرهتش نستقل وو نتا غاتعاوني ياك كيف قلتي قبل ؟
كمال(شافها قربت منو وابتلع ريقو مقادرش يتحمل):- أهااه اكيييد نتي غير آمري والسي كمال كلو ديالك يلااه يالاه نطلعو هاد القريعة للشومبرا لفوق وعندنا حديث طوووويل ههههههه الحبيبة ديالي
ناديا(قلبها بدا يشطح بالخوف):- ههههههه يالاه الزين يالاه
حطت يدها على سنسلتها ودارت راسها كتلعب بيها وهو شادلها يدها التانية ومطلعها كيضحك وضغطت على ديك البوطونة وهنا هو كان يتحرق ويستناها فوقاش تشعلها وكان غادي يتهور يفرع عليهم البيبان ويخرجها من ديك الفيلا ويوقع اللي يوقع المهم يطمن عليها لكن رحماتو من هاد الفكرة المجنونة مين شعلت الإتصال بيناتهم ... وصلها كمال لجناحو الفاخر ومد يدو باش يكلعلها جاكيطها وهي تنحنحت ولكن سايراتو وهي كتبتسم ولكن فيساع طيرتلو القرعة من يديه ومشات حطت جوج كيسان من اللي كانو فوق المنضدة وكبت كاس واحد وجابتولو وعينيها فاضحين مياعتها وهو حل قمجتو وتكا على سريرو وريشلها باش تجي تكلس حداه وهي كلست على الحافة ومدتلو الكاس لكنو فاجئها مين شد الكاس وحطو قدام الأباجورة وشدلها يدها وجبدها عندو وهي تهزت ووقفت كتتمايل
ناديا(بتهرب رجعت هزت الكاس ومداتولو):- السي كمال الليلة غادي تكون ولا فالأحلام غادي نسيك سميتك فيها لكن بشرط
كمال(قرب منها وهو كالس على ركابيه):- اللي هو ؟
ناديا(دفعاتو بطرف صبعها وجا ناعس على الناموسية):- تسمع لكلامي واللي نقولهالك ديرها
كمال(بقا يضحك بخلاعة خلاتها تشمئز):- طبعا طبعا أنا ملكك الليلة الحبيبة ديالي
ناديا(بسيف عليها ضحكت):- ههههه وهاكدة نبغيك ايوا هاك شد شرب هاد الكاس هو اللول وموراها نبديو العرض الخاص بيك بوحدك ههه هههههه
كمال شد داك الكاس شربه وهي جابت القرعة وزادت كبتلو كاس تاني وشرباتولو بسيف وهو تكا على سريرو وهي مشات سدت باب الغرفة بالمفتاح عليهم وقفت فالوسط وبدات تتمايل كتحل أزرار قميصها وعينيها عليه وهو ملهوف ريوكو كيسيلو بطريقة مقززة خلاتها تكره راسها وموقفها هادا اللي تحطت فيه لكن فتحت غير قفالة وحدة وجبدت من صاكها مينوط مدلدل بسناسل ووراتهملو وهو حل عينيه مصدوم بفرح من اللي ناوية ديرو وتقدمت لعندو كتتمايل
كمال(كيلهت):- ولايني نتي خطيرة معا راسك
ناديا(مضطرة تشم ريحتو المقززة):- هممممم قتلك غادي تكون ليلة عمرك منسيتها فحياتك
كمال بقا يصفق بفرح لكنها شدتلو يد وحدة وقيدتها معا جنب السرير وطلعت فوقو ونزلت برجليها بجوج على حواف السرير وهو فالوسط بجرأة خلاتو يتحمس أكثر بجنوووون منها وشدت يدو الثانية وهو مصدوم فيها ومتعطش ليها مين كملت ربطو معا داك السرير رجعت كبتلو كاس ثالثة وبقات تشربهالو وهي قربو وهو كيزرب فيها باش تبدي قبل ميهبل وهو مربوط ، استأذناتو غير لحظات ودارت روحها تخرب فصاكها اللي جبدت منو روب قصير وردي وريشتلو بباي باي زعما تدخل تلبس وتجي وهو بقا يتلاتخ فالسرير من الحماس ودخلت للدوش ودارت جهاز الإرسال فودنها
ناديا(بهمس خافت):- وليد
وليد(مغمض عينيه وشاد على قبضة يديه حتى بيضت مفاصلو من العصبية وفتحهم مين سمع صوتها):- غادي دبا حالا تخرجي من ديك الغرفة سمعتيني ولا قسما يا ناديا حتى نطلع ندير اللي ميندار
ناديا(عرفاتو غار وغادي يهبل):- وليد شتتت راني قربت بغيت غير نبلغك أنني ربطتو وو
وليد(قاطعها بعصبية):- راني سمعت داك الحديث المنحل وأنفاسو الحقيرة اففففف ناديا سمعي مني وخرجي من تما فوراا
ناديا(بنفاذ صبر):- إيلا ستحقيت شي حاجة غانكلمك سلام ....
رجعت سنسلتها لبلاصتها وخرجت ورجعت داك الروب لصاكها وهو تصدم مين ملقاهاش لبست
كمال:- واشنو الزين مالك ملبستيليش الوردي الحبيبة ؟
ناديا:- ا هههه بغيت نحيد حداك مكان لاش نتخبى شنو رايك ؟
كمال:- ياميمتي جريئة جريئة نتي هي النوع اللي كنبغي ويلاه الحبيبة راه ريوكي سالو من كترة مكنستنا فيك واش بغيتي تهبلي فيااا كتر من هاكااا هههه
ناديا:-حالا العمر حالا ... بصح باقي عندي شرط أخير بغيتك تنفذولي ممكن أكمولتي (بدلع)
كمال(بلهث):- الله الله على كمولتي خارجة من فمك كي العسل آمريني وانا خدام تحت رجليك نجوم الليل نجيبهملك لا بغيتيهم
ناديا(فكرت ولقات باللي هاد الكائن غادي تترتكب فيه شي جريمة خير الله تخلي الخطة فمنحى تاني وهزت واحد الشال نتاع الستائر اللي فبيتو ومشات عندو بنظرة خليعة):- بغيت نسدلك عينيك وتخلي غير ودنيك اللي معايا وخا ؟؟
كمال(مبغاش):- وانا كيفاش غادي نشوف اللوز اندوشتي ؟
ناديا(بنظرة إغراْْْْْْْْْْْْْء وإثارة):- عفاااااك أكمولتي عشان خاطري ؟
كمال(حل فمووو فدلعها ومقدرش يقاوم):- وخا الحبيبة اللي بغيتيها نديرهالك غير سربيني راني على نار على نار متلهف ليييييك بزاااف
ناديا صافي مقدرتش تزيد تسمع كلامو المقزز اللي جابلها التقية طلعت حاجب ونزلت حاجب وفيساع حطت على عينيه داك الشال وبقات تشوف فيه وهو مربوط بداك الشكل المضحك بصوفيطما وشورط فقط وفمو اللي كيتحرك بكلام بذيئ منحل وعلى نواياه شنو باغي يدير معاها هي مبقاتش قادرة تسمع داكشي ومشات بجدية ديريكت تقلب فدرج مكتبو وهو كيعيطلها لكنها صافي غاتنفذ مهمتها دبا وبقات مرة مرة ترد عليه وتقولو كتوجد راسها غي باش يسكت المهم بقات كتقلب ملقات والو فالمكتب وبقات تشوف فجنبات بيتو بتركيز لاربما لقات شي حاجة لكن والو مبان والووو وخافت لتكون مهمتهم فاشلة وتكبدو هاد العناء على والو هزت سنسلتها ورجعت هدرت
ناديا(بخفوت):- وليد ملقيت والو فمكتبو كيف بلغتني
وليد(كان شاد على راسو حاس بصداع ومقادرش يتحمل):- علاش مكتسمعيش الهدرة قتلك خرجي من تما يعني تخرجي من تما ؟
ناديا(زفرت بغضب):- هففف دبا أنا هنا قولي شنو ندير ؟\
وليد(بعد صمت تكلم):- شوفي مور شي صورة راه أكيد عندو شي خزنة واحد منحل بتفكيرو غايكون هادو حدود الأفكار عندو سربي راسك ...
ناديا رجعت سنسلتها بعصبية بلاما ترد عليه وبقات تقلب مور الصور حتى فعلا لقات خزنة والحلو أنها لقات فيها أرقام سرية وقالتها لوليد
وليد:- ناديا آنيلي العملية كلها وخرجي من عندك
ناديا(بنرفزة):- ممكن تتوقف على إصدار الأوامر
كمال(سمعها تهدر غي بوحدها):- حبيبتي فينك فينك معامن كتهدري ؟
ناديا(التفتت بعصبية عند كمال):- سكت نتااااا
وليد(مصدوم):- شنووو ؟
ناديا(تكاكات):- ماشي معاك نتا
كمال:- شنو قتلي
نادي(بصراخ):- يووووووووه صافي
طفات ديك البوطونة وقطعت الإتصال كامل بوليد و بقات تقلب فديك الغرفة والو ملقات حل وهزت شال من دوك الستائر وتقدمت عندو تربطلو فمو وهو كيهزز فراسو مفاهم تاحاجة جبدت سكين من جيبها
ناديا(دارت سكين على عنقو وهو بقا يرجف):- السي كمال غادي دبا تعطيني الأرقام السرية نتاع الخزنة ديالك بلا شوشرة وإلا غادي نغرقك فدموياتك
كمال(بقا يتمتم وهو مربوط الفم وحمار وجهه وهي زيرت السكين على عنقو بتهديد):- اممم اممم
ناديا(تنفست بعصبية):- غادي نحيدلك هاد الشال ولكن ياويلك وترفع صوتك قسما بالله غير موسي اللي غادي يكون آخر حاجة تشوفها فحياتك .. واش مفاهمين ؟؟؟؟
كمال هزز راسو مسكين كيرجف وهي حلتلو فمو
كمال:- والله والله حتى ندمك كتضحكي عليا يا .... (كلمات خايبة)
ناديا(زادت ضغطت على عنقو وهي شاداه من شعرو):- أظن كلامي كان واضح عطيني الأرقام ؟
كمال(جاه البكا وحس باللي وقع راسو فمصيدة):- مستحيل متحلميش
ناديا(دفعاتو على حيط السرير):- إيوا شهد على روحك الزين
كمال(كيرجف بالخوف):-سناي سناي سناي... قمممم غادي نقولك غادي نقولك
ناديا(طلقت شعره):- هاكدة نتفاهمو
عطاها الأرقام ومشات حلت الخزنة وجبدت الملفات اللي تما وكانو هوما المطلوبين حطتهم فصاكها ولبست جاكيطها وتقدمت عندو كديرلو من جديد الشال على فمو
ناديا:- هادي باش متنساش معامن كتلعب وتغامر السي كمال
خلاتو مربوط اليدين وعينيه مغمضين وفمو مبلع وهو كيلتخ برجليه القصار على ناموسيتو وكيأمأم وخرجت من بيتو مبعد مقفلتها عليه بالساروت لكن قبل متنزل لقات الكاردكول واقف فالكولوار وغي شافها استغرب لكن هي تحركت بمياعة وتململت بشعرها حداه
ناديا:- السي كمال مباغيش شي حد يزعجووو حتى لغدا الصباح آه راني عطيتو دروس خاصة و ياريت متزعجوهش عفاكم
الكاردكول:- وشنو هاد الصوت ؟؟
ناديا(سمعت صوت أمأمة كمال وقربت من ودن الكاردكول وهمست):- هادا الدرس الأول ههههه سلام
الكاردكول بقا يبتسم وفهمها شنو قصدت وبقا كيطلع فيها وينزل ومتعجب باستهزاء فمعلمو ونزل تاهوااا مخلي السي كمال عايش الدور الوهمي ههههههه
وليد(بعصبية كيهدر معا جاد):- سمعني راني مغاديش نستنى ناديا قطعت الإتصال وماشي بعيد تكون فخطر دبااااا دير اللي قتلك متهبلنيش حتى نتاااااااااااااا
جاد:- وانا مغاديش نخليك تغامر براسك ناديا قدها وغادي تنجح
وليد(خرج من سيارتو بنرفزة):- جاد دير اللي قتلك صافييييي
قبل ميوصل لباب الفيلا شاف البوابة كتتفتح ولقاها هي خارجة بسيارتها غي شافها اطمن وتنهد بعمق هي حركت سيارتها وسبقاتو بدون توقف وهو تبعها وصونا لجاد فورا باش يخويو المكان كلهم ويرجعو للفيلا ، كانت كتصوك وكترجف وعاطياها مية وستين ودموعها مبغاووش يسكتووو وهو موراها حاس بيها وبحالتها وصلت للفيلا ونزلت من اللوطو بهستيريا ودخلت للصالون وهو موراها ورمات الملفات بعصبية قبل ميوصل لعندها وصفحات منهم قاسو وجهه
ناديا(مسحت دموعها بيدها وريشت للأرض):- هاهوما ملفاتكم القذرة
وليد(باغي يكبت داك الغضب):- ناديا تهدني ومتعصبيش نتي راكي هنا دبا
ناديا(كتبكي وكترجف وكتتحرك من كل جهة):- أبشع مايمكن يتعرضلو الإنسان عشتو اليوم أنااااا اففف من أي نوع من البشر نتومااا آه ؟
وليد(قرب منها بعصبية):- علاش مخرجتيش مين طلبت منك ؟ وعلاش تقطعي اتصالك بياااااا جاوبي؟
ناديا(بسخرية مريرة):- صافي كي دخلت مكانش يليق نرجع نخرج وبلا فايدة عاد
وليد(مسح على وجهه بعصبية):- ناديا متغلطيش فكلامك
ناديا(بنرفزة تقدمت عندو وهي كتصوط):- مقادراش نتيق مقادراش نتيق لهاد الدرجة عندكم أعراض الناس لعبة مقادراش نستوعب قذارة الوسط اللي نتوما فيه تعرف باش حسيت وانا تما حسيت بالإشمئزاززززز بالتقزز يععع كان موقف آذاني بزاااااف وجرحني فالصميم افففف
بعدت من قدامو بتأفف ودموعها كيسيلو وفتحت باب الجردة الزجاجي وخرجت وهي كتمسح بكم جاكيطها حمرة شفاهها بقسوة وكحلها سال معا دموعها المتورمتين وكتتنفس بصعوبة باش تخرج داك الإختناق ، هو بقا يشوف فدوك الأوراق المنثورة هزهم ورجعهم للملف وحطو على الطابلة وتقدم لعندها بهدوء وقف بجنبها فين كانت واقفة كتشوف فالفراغ رابطة يديها وساكتة ..
وليد(معرف ميقول بصراحة هي عندها الحق):- آنا آسف اللي كنت يد فهاد الموضوع
ناديا(ضحكت بمرارة وشافت فيه بتعب):- همممم وفاش غادي ينفعني ندمك ولا اعتذارك دبا
وليد(التفت عندها بجدية):-طلبت منك تخرجي وقطعتي اتصالك بيا متصوريش كيفاش كانت حالتي مين درتي ديك الخدمة وانا معارفش شنو واقعلك الفوق ومعا داك المريض ورجالو محاوطين كل مكان كان ممكن لا سمح الله تنكشفي
ناديا(بوجع):- كتنسى فين تعرفت عليا أوليد أنا أصلا من داك العالم خرجت فمنضحكوش على راسنا
وليد:- لكن أنا عارفك ماشي هاكدك
ناديا(بلمحة حزن التفتت عندو تاهيا):- وفنظرك غادي يعنيلي الأمر ياك أنا غير كنقضي المصالح والمهمات الصعبة لسيادة البوس وجميلة وجعفر وفقط
وليد(شاف أمامو):- نتي جبانة
ناديا(بشر قربت منو وجرت يديه ودوراتو عندها):- شنو تفضلت ؟
وليد:- آه جبانة وبزااااف علاش مرفضتيش ببساطة
ناديا(عوجت شنافتها كتقلدو وبعدت):- علاش نتا باقي خدام معاهم مين كاع فيك هاد الشجاعة
وليد(جبدها من يدها لعندو وعينيه فعينيها تقريبا):- أنا عندي أسبابي
ناديا(نترت يدها):- وانا مكان عندي حتى سبب هوما خلقولي الأسباب مرض جدي ومساعدتهم مكانت إلا وسيلة باش يجبدو رجلي ومننكرش لوكان ما جميلة وجعفر لوكان راني نترحم عليه الآن
وليد:- وعلاش كملتي ؟؟؟
ناديا(تفكرت ياسر):- دبا واش نتا كتحاسبني حاسب نفسك اللول اللي مدخل راسك فهاد العالم القذر ووليت منو وفيه مقادرش تبعد مهما حاولت
وليد:- ماشي كلنا أقدارنا متشابهة
ناديا:- إيوا قولي أسبابك
وليد(قرب من وجهها وكيشوف باصرار فعينيها):- ممضطرش لذلك دبا يجي يوم وتعرفي كلشي
ناديا:- ههههه قتلتلوني بهاد الوعود الكاذبة تعرف شنو أوليد بعد مني عطيني التيساع
وليد(اعترض طريق دخولها):-ماشي قبل منسويو الأمور بيناتنا
جاد(دخل ولقاهم متشاحنين فالجردة وجا فايت):- أتصبحووو على خيرر
وليد وناديا فمرة:- بون نوي
شهقو بجوج وشافو فبعضياتهم هو تنهد بهدوء لكن هي هزت حاجبها رافضة لذلك طلع جاد وهو كيدندن وضارب الدنيا بركلة
ناديا(تجاوزاتو باش تفوت وتدخل):- يومنا كان مشحون خليني نطلع نبدل هادشي علياااا و هااااك سنسلتك قبل مننسى
وليد(حطتلو السنسلة فيدو):- اممممم كاع مين مرميتيهاش فوجهي باقي فيك أمل
ناديا(بابتسامة مستفزة):- ياريت نكون في مثل تفاؤلك والله لكن مقدرتش
وليد(شافها مشات):- ونتي من أهلووو
مالتافتتش عندو ووقفت شافت فداك الملف بحزن على اللي ضطرت تعيشه مقابلو و طلعت وهو بقا ملاحقها بعينيه ومسح على فمو بتعب وغضب لكن حمد الله أنها رجعتلو بسلام ، ويوجدو راسهم لبطش السي كمال مبعد لكن هادا غايتكلف بيه البوس ، هز تليفونو وصونا لجميلة وبلغها بنجاح العملية والأمور كلها تمام وهي حسب أوامر البوس طلبت منو يجيب ناديا ويجيو لعندهم للفيلا غدا على أكمل تقدير.. كلس بتعب على كنبة الصالون وتنفس بعنف فوقاش يتهناو من هاد الصراعات كلها فوقاش يستقر معاها كيف بغااا فوقاااش ودبا هاد البوس بمجيتو زادلهم غير المشاكل زفر بغضب وفتح أزرار جاكيطو ورماها بجنبو هز داك الملف ودخل بيه للمكتب ودارو فالخزنة ديالو وقفلها وطلع .. مباشرة دخل خدا دوش ولبس بينوار ديال الحمام رجالي فاللون البني فاتح وخرج كلس على كنبتو وهز واحد الكتاب وبقا يجرب يلهي نفسو فعالم تاني ولكن اشمن قراية كان يقرا السطور وهو عقلو غايب معااااهاا وخا كان مشتاق يقرا داك الكتاب اللي كان رفيقو لسنواااات حتى تفاجئ بيها دخلت لعندو بدون سابق إنذار وقفلت الباب موراها ...
قبل دقائق
طلعت لبييتها وقفلتها عليها بالساروت وبقات تحس براسها ثقيلة بزاااف من ديك الكسوة القبيحة حيدتها قطعة قطعة بكره فوسط البيت ودخلت جرية للدوش شعلت الما الساخن ودخلت تحتو وهي على ذات الهيئة بقات كتبكي وتبكي بحرقة وكحلها كيسيل معا كل دمعة وكانت كتمسح على جسمها اللي ضطرت تعرضو كنوع من التلهية لأبشع كائن فالأرض مخصو غير السيرك باش تكمل قذارتو حاولت تطرد ديك الساعة اللي عاشتها تما واللي عاشت فيها أقذر المشاعر وسمعت أقبح الكلمات البذيئة من داك بوكرش اللي مكرهتش تحشي فيه داك الموس ماشي غير تهددو بيه وحست بانها انتقمت منو لكنها مرتاحتش انما زادت تعذبت وحست بوجع قاتل بقات كتبكي وهي كتتفكر وفلحظة نزلت راسها وحلت عينيها ولقات دم كيسيل منها حست بالرعب وشهقت وشدت على فمها من الصدمة ولدها ولدهااااااا محست باش تبلات فيساع استدركت نفسها ولبست لباس نوم كرتوني كان معلق فالعلاقة وخرجت بشعرها مبلل وجسمها اللي تلصق عليه شوية داك اللباس من البلل وبقات تخرب فكرشها وتبكي بمرااارة لالالا إلا ولدها شنو دير شنووو دير دباااا بقات كترجف بالخوووف وشافت فالباب وخرجت دخلت ديريكت لبيتو وهنا هو تصدم ووقف عندها كيجري
وليد(شافها فحالة مرعبة):- ناديا ناديا مالكيييي ؟
ناديا(بقات كترجف وقربت منو غي نص الطريق وهو جرا عندها وبقات كترمش بعينها):- عفاك عفااااك أوليد ... وليد ع... عتق.... ديني للمشفى حالا حاااالا
وليد(كيحاول يفهم منها مخلوع):- ناديا مالكي جاوبيني شنو واجعك؟
ناديا(نزلت راسها شافت ففستانها اللي بانت منو بقعة دم وبقات ترجف بين يديه):- ولييييد اهئ خذني للمشفى عفاااااك دباااا اهئ اهئئئ
انتبه لبقعة الدم اللي على فستانها وشهق بصدمة وخوووووف فيساع دخل كيجري للدوش ولبس سروالو وخرج نصف عاري بدون تفكير ولا وعي وهي شافت فيه وزادت دموعها خوفااااا من اللي جاي وهو فيساع لبس تريكوه ومشا يجري لبيتها بخطى متسارعة بقا يشوف ولقا معلق تريكوها الكاشمير الرمادي اللي بالقب وهزو فيساع وجابولها لبسهلها وهي كترجف مقادراش تتحرك ولا تدير شي حاجة وجا يوقفها لكن كانت فاشلة تماما بالخلعة وبانهيار بالبكا وقفت بصعوبة وحط يدو تحت رجليها وهزها بين يديه فحضنو وهو كيطمن فيها باش متخافش
وليد(نازل بيها الدروج):- ناديا سمعيني غاتكوني مزيااااانة عفاااك متفقديش وعيك وركزي معاياااا صافي صافي هانا غاناخدك فورا للمشفىىىى انادياااا بقاي معايا..
نزل بيها من الدروج بهدوء تام وفتح باب الفيلا بيد ولقا العساس اللي غوت عليه فيساع باش يفتحلو باب السيارة ويحلو البوابة وهاداك محسش باش تبلا تاهوا فيساع فتحلو باب اللوطو وكلسها بجنون ومشا يجري ركب حداااااهاا
وليد(خرج فيه عينيه):- متجيب لحد خبر بخروجنا تفاهمنااااااااا ؟؟
العساس(برجفة) :- أمرك أمرك
حرك سيارتو بسرعة جنونية خايف عليها وخايف من أنها تتألم إلى وقعت شي حاجة لولدها هي مقاتلو والو لكنو كان عارف وفهم خوفها بقات كترجف وتترعد وكتغيب عن الوعي لكنو كان كيهزز فيها مرة مرة وهو كيكسيري ويعاود واتصل بمصعب باش يطير بدورو لعيادتو لاحقاش غايجيبهالو فورااا استجابلو مصعب اللي نزل فنص الليل تاهوا ومشا بدورو باش يتلاقاو فالعيادة .. كان كيصوك بيد وشاد بيد على يدهاااااا مزير عليها ومكرهش يحيدلها خوفها اللي كتحس بيه ووجعهااااا بينو وبين نفسوووو حس بزاااف باالألم من اللي كتتعرضلو وكلو بسبب طمعهم وجشعهم هي راها تتأذى وهاهيا اليوم غتفقد ولدها ولا بنتها وهادا اللي غادي يخليها تهبل ولا تدير فراسها شي عجب، طرد من بالو دوك الأفكار السوداوية وبقا يحك فجرايرووو باش يوصل بأسرع وقت وينقذهااااا .... من بعد مدة وصل بيها للعيادة ولقا الممرض كيستانهم برا بكرسي متحرك وليد طار وهزها حطها عليه و وخلا بيبان اللوطو محلولين مكانش فوعيو نهائيا دخلها كيجري معا داك الممرض و غير شافها مصعب من فوره أمرهم يجهزو غرفة المعاينة دخلها الممرض وجا تابعو وليد ووقفه مصعب
مصعب:- بقا هنا أوليد متقدرش تدخل
ناديا(كانت شادة يد وليد وبرجاء وخوف كانت تشوف فيه وهو شاد يدها كذلك بخوف):- متخلينش أوليد
وليد(مقدرش يتحمل):- مصعب عفاك خليني نكون معاها
مصعب:- وليد وليد نتا واعي تماما وعفاك بقا هنا أي تأخير فيه خطورة عليها
ناديا (بتعب وحالة إغماء):- ولييييد
وليد(قلبو تقطع عليها وانحنى باسلها يدها وبقا شادهم بطمأنينة):- غانكون هنا نستناك وخااا متخافيش
مصعب هزز براسو للممرض اللي دخلها وجا تابعه
وليد(شد مصعب من طابليتو):- الله يخليك دير كلشي ونقذ البيبي أمصعب
مصعب(هزز راسو بضعف):- ربي يعاون
ناديا إيلا خسرت البيبي مصيبة كبيررررة وأزمة نفسية غادي تخليها تعيش فصراع طويل المدى معا ذاتها هادا إيلا مستعملتش أكثر الطرق جبنا ودارت شي عجب فراسها من بعد ولدها فنظرها مبقالها والو ،كانت كترجف و كتدعي فسرها ربي يوقف معاها وللحظات ولات الصورة عندها مضببة وفقدت الوعي أخيراااا ، أما هو كان كالس فالكولوار نتاع العيادة على الجمر حاط يدو المجموعين على فكو بقلق وندم وخووووف عليهااا بقا كيدعي تاهوا ربي يوقف معاها وينقذو البيبي دقائق من الجحيم وهو كيستنا ومرة يوقف مرة يدور مرة يحك فراسو مرة يتكا على الحيط مرة يشوف فالساعة وتاشي حد مخرج من ديك الغرفة أما هما فكانت شبكة عامرة قدامهم بقطن معمر بالدم ومصعب داير على فمو كمامة وكيخدم بيديه اللي فيهم ليكويات لربما قدر يوقف داك النزيف من بعد مدة فاتت طوييييلة وقاتلة لوليد خرج أخيرا مصعب كيحيد كمامتو وليكوياته وطار عندو وليد
وليد(خايف يسول):- هممم أمدرا ؟
مصعب(تنهد بصعوبة وشاف فيه بتعب):- بقاء الجنين للآن حي راه معجزة مع أنها نزفت بزااااف جبتها فالوقت المناسب أوليد لوكان تأخرت غي شوية كنا غانخسروووه
وليد(بفرح شدو من يديه):- قل والله يعني الجنين بخير اطمنت عليه بصح؟ وناديا ناديااااا كيراها؟
مصعب:- طمن أوليد الجنين بصحة جيدة ودرتلو اللازم باش نطمن ونبشرك عندكم ولد الله يسخر
وليد(بشرود):- ولد ؟؟
مصعب:- آه ولد تبارك الله عليه نموه ممتاز الحمد لله ونبضاتو منتظمة لكن هي اللي صحتها دبا محتاجة لدعم وفيتامينات باش تسترجع كمية الدم اللي فقدتها وتوقف من جديد على رجليها
وليد(عينيه دمعو بحزن وبفرح نفس الوقت من اللي سمعو):- مصعب نقدر ندخل عندها دبااا ؟
مصعب:- آه أكيد شوية وغاتفيق
وليد:- المهم هي بخيررر دبااا شكرا أمصعب معارفش كيفاش نشكرك
مصعب:- راحنا خوت أصاحبي وفرحك هو فرحي الله يسخر وايلا بغيت تبقى بجوارها فالغرفة مكان مشكل أصلا معنديش دوام غدا ومكاينش المرضى بزاف لذلك غانكون هنا فمكتبي إيلا ستحقيت شي حاجة علمني
وليد:- لا مصعب راه جبتك من دارك فهاد الوقت غير سير نتا وانا غانبقى معاها وزايدون الممرضين موجودين هنا
مصعب:- واش متأكد ؟
وليد:- آه أصاحبي متأكد غي سير رتاح ولهلا يخطيك
مصعب :- طيب أنا غدا صباح بكري غانجي عندكم باش نطمن على صحتها وتقدر تخرجها مبعد
وليد:- شكرا أمصعب تصبح على خير
مشا مصعب وخلا وليد متردد واش يدخل وكيغايدير يشوف فيها أو يواجهها بهادشي لأنه دبا صافي غاتعرف بأنه عارف كان خصووو يفكر مية تفكير قبل ديك الخطوة ولقا الحل أنه يتصل بجميلة وهي تخبرو شنو يدير فديك الحالة خصوصا وهي عارفة بالموضوع لكن هي معارفاش باللي ولد ياسر وهنا المصيبة واش غايصارحها بكلشي يخاف شي حد يعرف وتنوض مشكلة هو فغنى عنها لكن داهمو الوقت وبدات كرشها تبان صافي خصو يتحرك وهادا الوقت المناسب وخصوصا أن البوس قرر تزويجهم إذن كلشي محلول من غير قضية ياسر اللي غايلقاولها حل تاهيا .. غمض عينيه وحط تليفونو فجيبو وفتح الباب ورجع سدها واتجه لعندها كانت على داك السرير الأبيض بملامح شاحبة ناعسة بسكون ومعلقيلها السيروم من يدها ، جر كرسي وكلس حداها جبد يدها وحطها بين يديه وبقا يمسحلها على شعرها بهدوء متمتع بسكونها وروعتهاااا ومتألم من اللي تعرضتلو وفرحان اللي هي بخير والجنين كذلك ومقهور أنه تمنى لوكان كانت ملكووو فديك اللحظة وخايف من اللي جاي.. المهم مشاعرو كانت مشتتة مرتبكة لكن أهمها أنه اطمن عليها وهادا اللي كان مبرد على خاطرووو ... مبعد شي ساعة ونص تقريبا بقات تحرك صباع يديها وهو حس بيها واعتدل فجلستو باهتمام كيشوف فيها وهي كتحرك حجبانها وعينيها باش تفيق كانت حاسة براسها ثقيل بزاف عليها والدنيا كدور بيها بصعوبة فتحت عينيها والضو ضارب فيها بقات كتحقق وتشوف هي فين والتفتت لعندو كان كالس قربهاااا
ناديا(بثقل):- و.. وليد
وليد(قرب منها شادلها يدها كيطمنها):- أنا معاك أنادياااا نتي بخير دبا ؟
ناديا(بدات توعى وبهلع حطت يدها على كرشها وبدات ترجف وتبكي):- وليد ولييد ال...
وليد(ابتلع ريقو وعرفها مقدرتش تنطق لكن خصو يحسم الأمر وهادي فرصتو):- طمني الجنين بخير
ناديا(تضرب فودنها الرعد وتزلزلت النظرة وشافت فيه بعدم تصديق وفشل فلسانها نطقت):- ش...شنو؟
وليد(ابتلع ريقو وخصو دبا يكمل الكذبة وإلا غادي يخسرها):- علاش خبيتي عليا موضوع حملك أنادياااا كان منحقي نعرف بيه
ناديا(ببكاء فرحانة اللي ولدها بخير):- أنا أنا ... اففف الحمد لله اللي حفظتولي ياربي ياااا الله
وليد:- الحمد لله الدكتور طمني على صحتو و قالي خصك ترتاحي هاد الفترة باش ترجعي أحسن و قالي
باللي غايجينا ولد رائع
ناديا(بعيون لامعة تحسست كرشها):- ولد ياااااه
وليد(بمزاح):- أهااااه نتمناو غير ميخرجش عاصي وراسو قاسح بحال ماماه
ناديا(بابتسامة شافت فيه):- شكرا أوليد دائما كتوقف معايا
وليد(باهتمام وجدية):- شتتتت دبا متقولي والو من غير أنك ترتاحي باش يكون بطلنا على خير مايرام
ناديا:- بصراحة فاجأتني أنا كنت خايفة من أنك تعرف خصوصا بسبب الحملة الدعائية ومنكدبش عليك مكنتش واثقة فيك ولا فجميلة أو جعفر لا عرفو غادي يحرموني من ولدي وانا منقدرش نتحمل وليد غادي تساعدني ياااااك متخليهمش ياخدوه مني ؟؟؟؟
وليد(مسحلها على شعرها):- مغادي نخلي حد يقرب منك أو منو متخافيش أناديا نتوما فحمايتي دبا
ناديا(ارتاحت بصدق):- غادي تبلغهم؟
وليد:- افف حاليا لا لكن قريبا ضروري مغايعرفو
ناديا(شدت يدو وحست بالنعاس):- تواعدني ؟
وليد(وقف وانحنى على راسها وباس جبهتها):- نواعدك أناديا نعسي دبا ورتاحي
نعست وهي فرحانة بولدها اللي فأحشائها كيتربى يوم عن يوم وموقعلو والو وخا مسكين شاف معاها المرار لكنو قوي بحالها وتحمل كاع الصعاب معاها وكأنه كيساندها ويدعمها ، أما وليد كانت فرصة ذهبية جاتو هو عارف تماما أن البوس غادي يقوم الدنيا لاعرفها حاملة دبا وفهاد الوقت وغادي يعرف أنه من ياسر لذلك قرر يعجل بموضوع الزواج باش يربح الوقت و مين تكون على ذمتو مكانش اللي يهدر ويقدر يحميها منهم .. لكن المصيبة الكبرى هي زواجها من ياسر وكيفاش غادي يديرلو ..
كان كالس فالشرفة ديال البيت ديالو وكيشوف فداك الحي الشعبي اللي ولا مألوف بالنسبة ليه ديك الفترة كان كيشوف فالسما مرة مرة اللي كانت متلألئة بمئات النجوم كان داير قب على راسو ويديه فجيوبو وكيفكر فيها و فآخر مرة شافها نهار خرجتلو من الفيلا وكيفاش كانت تترجاه باش ياخذها معاه زفر بعدم صبر وهو مضطر لداكشي ومستحيل يتخلى على انتقامو لا من جهة جعفر ولا ابراهيم اللي كان متابع الأمور من بعيد ياسر مبعد معرف البوس جا سهالت عليه باش يقدر ينال منهم كاملين .. تنهد بصعوبة وشوق وفهاد اللقطة خرج جعفر وكلس حداه على الكرسي
جعفر:- شحال من نجمة ؟
ياسر(بعدم فهم):- شنو ؟
جعفر(دار رجل على رجل وشعل كارو):- ومقبيلة ونتا تحسب النجوم قلت نعرف شحال خرج معاك
ياسر:- يا لطافتك
جعفر:- هي هي والله فرحت اللي رحمت ديك المجلة اللي كليت جنابها مسكينة من كترة مشديتها بين يديك لكن بجدية شنو كدير هنا فهاد الجو ؟
ياسر:- غير مجانيش النعاس وقلت نتأمل مكان ميتشاف فهاد الحي اصلا غير راني نتلف
جعفر:- عيييب يا ولد هاد الحي هو اللي راه ساترك
ياسر(هزلو يديه بدون اعتراض):- ومقلنا والو
جعفر:- هاكدك
ياسر:- ايوا وونتا واش نوضك من فراشك فهاد الليل وهاد الجو؟
جعفر:- مجانيش نعاس تانا
ياسر:- ههههه كاع أنا وباين كنفكر فمرتي حبيبتي ناديا ونتا راك كتفكر فجميلة يالعفريت؟
جعفر(حيد الكارو من فمو وبجدية شاف فيه):- كون تحشم أهاد الولد راني قد باك احترمني
ياسر:- اممممم متلفش الهدرة
جعفر:- وسكت سكت شحال فيك يجي بنادم يفوج معاك تندمه
ياسر:- لاحقاش كنطيحلك فالبوان فيبل
جعفر(ناض):- وشبع تأمل فالحومة غادي نمشيو منها عما قريب؟
ياسر(باستغراب):- علاش؟
جعفر:- البوس هادا أول مكان غايقلب علينا فيه ووجودنا خطر
ياسر:- وفين نمشيو ؟
جعفر:- لواحد المكان دبرولنا جوليو متخممش غانكونو فأمان
ياسر:- أوك اللي تشوفه
جعفر:- احياني على العقل والصواب اللي كيطيحو عليك فجأة كتجبلي ميبقاش بيهم
ياسر:- وحرنا معاك تربينا مشكلة تمردنا مشكلتين
جعفر:- أنا راه في بالي غير سؤال كيدور
ياسر:- واللي هو؟
جعفر:- بنت البوشتاوي شنو غايصرالها مين تعرف
ياسر(كاره الحديث وضربو بيدو):- الله يعطيك متاكل توقعتك كاع غاتقول شي حاجة
جعفر:- هههههههه ونوض نوض مالبرد
دخلو وسدو باب الشرفة وهي فالشرفة التحتانية لوات على كتافها الشال ودموع حارقة كتنزل كي الشلال من عينيها سمعت كلشي مالحديث اللي دار دخلت بوهن وبقات تشوف فالمجلة وفصورة ناديا اللي عرفتها هي مرتو هي اللي فحياتو وبقات تلوم راسها كيفاش مكشفتش الأمر اللي كان واضح خصوصا نهار جابوه مريض كان كيهذي بسمية ناديا ، بنظرة حارقة ومؤلمة لعنت غبائها وتفكيرها وخيالها اللي عاشتو معاه وهزت ديك المجلة وضربتها معا الحيط وطاحت على سريرها كتبكي من حرقة ماسمعت منهم لفوق وصدرها باغي يخرج من مكانو من الألم اللي فيه ...
غداليه الصباح فتحت باب بيت باباها ملقاتوش وفتحت بيت ناديا ملقاتهاش ومشات تجري لبيت جاد فتحتها ودخلت تجري نقزت عندو فالسرير
سارة:- أونكل جاد أونكل جاد ويكاب .. فيييق أونكل جاااااد
جاد(منزعج وكيتململ):- هممم سارررررة بيبي خليني نعس راني مشبعتش نعاس اليوم
سارة:- يوووه مامي مكايناش ودادي مكاينش والخالة ناديا مكايناش
جاد(كان دار يدو على وجهه وحل غي عين شاف فيها):- يكونو فالجردة كيفطرو
سارة(هزت راسها بنفي):- نووو العم عماد قالي مشافهمش ومزال موجد الفطور
جاد(حس بشوية قلق):- طب شفتي فالجردة أو لابيسين ؟
سارة(بتذمر):- اففف غادي تصرعني أسئلة فييييق
جاد(بعصبية مرحة):- أنا عااارف عارف نتي ومك غادي تجيبو آخرتي
سارة(بتساؤل):- مفهمتش
جاد(رما الغطا وناض):- أحسن يختي معندك متفهمي غي سكتي
سارة:- ههههههههه
جاد:- سااااارة اجي لهنااا نوريك ضحكي على عمك جاد اجي
هزها وبقا يهرهرها تاسخفت بضحك ونزلها دخل للدوش غسل وجهه ولبس تونيه وشدها من يدها ونزلوو لتحت
جاد:- عماااااد وا عماااد
عماد:- نعم سيد جاد الفطور دقائق ويكون جاهز
جاد:- خليني مالفطور دبا قولي فين الجميع؟
عماد:- صراحة معارفش
جاد:- ونتا شنو شغلتك اسيدي إيلا معارفش شكون باغي يعرف أنااا ؟؟ صافي سير كمل شغلك
سارة:- بغيت مامي
جاد(هز تليفونو وكلس على الكنبة وجر سارة فحجرو):- شتت بيبي دقيقة غادي نعرفو فين هيا ماماك
تتت ألووو هيلين فينك؟
هيلين:- أنا فمركز التجميل جيت معا لين عندي شغل ساعة ونرجع للفيلا .. فاقت سارة ؟
جاد:- آه فاقت وهبلتني لكن احم قوليلي شنو كديري فالصالون وعلاش معندي علم؟
هيلين(بمياعة):- هششش راك تهدر هاد الهدرة وسارة حداك ولايني مجنوووون
جاد:- علاش مجنون عندي فضول ؟
هيلين:- وسكت دبا تانجي وتعرف بنفسك
جاد:-ينفع نتحسس ؟
هيلين(بضحك):- تبا لك هههه
جاد:- هههههههه طيب طيب سكتنا مي قوليلي واش ناديا معاكم ؟
هيلين(ضربها البرق وتعصبت):- وعلاش غادي تكون هاديك معانا ؟
جاد:- محيت مكايناش فالفيلا وتاشي حد معارف فين هياااا
هيلين(بنرفزة):- سول عليها المستر راه هو اللي عارف حتى عدد نبضاتها فالدقيقة
جاد:- ههههه عليك شي حوايج مين تنفاعلي عموما هاحنا نستناوك متعطليش
هيلين:- اوك سي يو
سارة:- اونكل جاد بغيت كونفليكس
جاد:- اهااااا وسبقيني للكوزينة غانجي فوراااا
مشات تجري قبلو وهو هز تليفونو يصوني لوليد مكايجاوبش استغرب عدم تواجدهم بجوجهم وعوج شنايفو بحيرة وقرر يستنى لربما جاو مشا فطر هو وسارة تحت جو مرح وهو كيقشب على عماد وسارة مفكوعة بضحك .. أما فالمشفى كان هو واقف معا مصعب
مصعب:- باينة فيك منعستش ؟
وليد(زم شنايفو):- اممم مقدرتش قلت وقيلة تفيق وتبغي شي حاجة
مصعب:- سعداتها بهاد الحب كامل
وليد:- هشش مهاد الكلام وطمني على صحتها ؟
مصعب:- مبعد معاينتها نقدر نقولك تقدر تخرجها لكن خصها الراحة وتبع الدوا اللي غادي نعطيهلها
وليد:- تمام فرحتني بزاااف غانمشي نخبرهااااا
مصعب(شد وليد من يدو):-وليد
وليد(بتساؤل):- امممم نعم أمصعب ؟
مصعب:- شوف بلاما تقلق مني ولا تاشي حاجة أنا باغيك بما أنك هنا ومتعتارضش عفااااك
وليد(برفض قاطع):- مصعب الله يخليك واش هادا وقت تحاليلك دباااااا خليني عليك
مصعب(مزير على يد وليد):-مغاديش نخليك فحالك وغادي تدير التحليل اليوووووم
وليد شاف إصرار مصعب اللي كان فوق طاقتو هاد المرة لكن اللي فراسو فراسو مبعد مدة دخل لبيتها وبابتسامة مرسومة على وجهه كلس حداها على الكرسي
وليد:- عندي خبر سعيد نقدرو نخرجوو هاد الصباح
ناديا(ببسمة خفيفة):- بصح رائع
مصعب(دخل كيكتب فواحد التقرير):- نادياااا بغيتك تهلايلي فراسك وممنوع الإنفعال الزايد ويلا عصبك هاد الأخ ديريلي رنة نجي نتفاهم معاه
وليد(كيحمر فيه باش يسكت):- ا هههه مصعب كيموت على المزاح
مصعب:- شكون قالك كنموت على المزاح انا بعدا كيعجبني البوعويد ههههههه
وليد عض شنافتو لمصعب باش يسكت وهي بقات كتضحك على داك المنظر
مصعب:- عموما مترهقيش نفسك كيف قتلك راه قلب مولاي السلطان هشيش ولبارح كان خايف عليك بزاااف وعلى البيبي
ناديا:- سمحولي عذبتكم معايا
مصعب:- مكان تاشي مشكل مي انا عارف صاحبي خصوصا إلى تعلق الأمر بالوليدات صغار كيحماق فين عاد ولدووو فطبيعي ميتقلق ايوااا شنو غادي نقوول غانستناو شي عراسية دايرها الكلام
وليد(ضرب على وجهه بعصبية مضحكة من كلشي اللي قالو مصعب مكان غي الفضايح):- شكرا شكرا أمصعب سيررر دبا وخلينا باش نمشيو
مصعب(همسلو):- قلت شي حاجة وا امم ؟؟
وليد(كيضحك بين سنيه باغي يقتلو):- لالالالا مقلت والوو غير الخيرر ههههه
ناديا حشمت بزااااف وسخانة طلعت معاهااااا من كلام مصعب وقلبها بقا يضرب بشدة بخوف وقلق اخيرا خرج مصعب وتبعو وليد للباب قفلها وتقدم بتردد لعندهااا وهي تحركت وكلست أفقيا على السرير باش تنوض لكنو استوقفها وبقات كالسة وهو واقف أونفاص ليها
وليد(حك راسو بحرج):- مديريش على كلام مصعب راه غير ...نتي فاهمة
ناديا(بحرج أيضا):- نننن مكان مشكل
وليد(تنفس بعمق وانحنى لعندها وحط يديه على سطح السرير وحدة على اليمين والتانية على اليسار وهي فالوسط استغربت لكن متحركتش وهو قرب من وجهها):- نهدرو بصراحة أنا مكرهتش لوكان كان داك الكلام اللي قالو صحيح
ناديا(بغات تتحرك لكن مد يدو وشدها من كتفها غير بشوية وهي بقات تشوف فيه):- وليد ..
وليد:- عارف اللي كانتمناه صعب إيلا مكانش مستحيل لكن بغيتك تعرفي بأمنيتي
ابتسملها بحسرة وهز بونطوفاتها القططية وانحنى على الأرض لبسهوملها وهي كانت كتشوف فيه ومتبعة حركاتووو وفقلبها غصة وحسرة فنفس الوقت وفكرة حدة ضربتلها فالراس أنه منى لوكان كان ولده مبعد اللي وقع فاليخت مقدرتش تستوعب أمنيتو وهي مندهشة فملامحو الجدية.. وقف وجرلها الكرسي وساندها كلست عليه غير بشوية وخرجو مالمشفى ، ركبها فسيارتو ومشاو
ناديا(قطعت الصمت):- وليد .. نتا ضامن الدكتور مصعب .. يعني ميتكلمش فهاد الظروف
وليد:- أكيد عتابري الأمر منسي بالنسبة ليه
ناديا:- شنو غادي نقولولهم فالفيلا ؟
وليد:- امممم وجعاتك المصرانة فالليل ومشينا لوبيطال ومكان تاشي حد يعرف
ناديا(براحة وطمئنان وبامتنان شافت فيه):- وليد
وليد(كيحاول يركز فالصوك باش ميفقدش اعصابو معاها):- نعم
ناديا:- نتا كنت عارف ؟
وليد(تنفس بتعب):- اممم المهم نتي بخير
ناديا:- عرفت الجواب اصلا تصرفاتك واهتمامك بصحتي و أكلي الفترة اللي فاتت كانو كيدلو على أنك عارف لكني مستغربة علاش مقتلي والووو ؟؟
وليد(اصطنع الكدبة):- أي واحد فحالتي كيستنا الخبر منك يجي
ناديا(تصدمت وحلت فمها بتشكيك):- وليد ياكماااا فبالك أنه يعني .......
وليد(كسيرا اللوطو بعنف ووقف ودار عندها):- اطمني أناديا منيش بداك الغباء باش نتوقع أنه ولدي عارف شنو كيدور فراسك مبعد اللي وقع بيناتنا
ناديا(عضت شفتيها ببكاء):- أنا خفت تكون ...
وليد(مسح شعرو بقوة):- هو عارف ؟
ناديا(فاجأها سؤالو وهززت راسها نفيا):- نننن
وليد(رتاح ولو قليلا):- وغادي تخبريه؟
ناديا(نزلت راسها بدموع فعينيها وتفكرت أنه مبغاش يهربها):- تتت
وليد(شاف فيها بعمق):- طيب غادي نتافقو على حاجة قبل، منهنا لفترة الولد غايكون ولدي معندنا كينديرو أصلا كرشك راها كتبان ومنا لفترة بسيطة غاتبان أكثر وعليها غادي نتصرفو قبل
ناديا(مسحت دموعها بكلينيكس نتراتو من قابصة اللي فاللوطو):- علاش كدير هاكدة ؟
وليد(باستغراب متألم):- كيفاش يعني ؟
ناديا(شافت فعينه بعمق):- علاش كتوقف معايا وباغي تحميني وتحميه ونتا عارفو أنه ماشي ولدك
وليد(قتلاتو بهاد الجملة ماشي ولدك ومكرهش يرميها من السيارة ولعن فكرتو الهبيلة):-تقدري متستفزينيش لو سمحتي محيت منيش بخير هاد الوقت هاداااااا رجاءاااا تطوي الموضوع
ناديا(غادي تزيد تكمل مصايبها مكتحشمش):- لا انا مصرة باش نعرف ؟
وليد(صاك اللوطو بنرفزة وعصبية):- ناديا سمعي كلامي وطوي الموضوع
ناديا(التفتت عندو بتركيز واستفزاز):- من فترة بسيطة فقدت الثقة فكلشي فمتخلينيش نتصدم حتى فيك نتا أوليد
وليد(شاف فيها بعدم تصديق وعقد حواجبووو وملامحو متصلبة):- أنا ماشي بحال ناس خرين
ناديا(فهمت مقصدو):- اففففف ياخوفي تكون عندك مصلحة من هادشي كامل وفالتالي نصدق واقفة ففراغ فقط
وليد(تصدم وهنا جابتلو ميبقاش حك جراير ديك اللوطو بعنف غادي يتقلبو والتفت عندها):- باغية تعرفي علاش كندير هادشي وخا ألالة ناديا ميكون غير خاطرك غادي نوصلو للفيلا وترتاحي اليوم وغدا وعد مني حتى نديك باش تسمعي بودنيك أسبابي تافقنا ؟؟؟
ناديا(بعدم فهم):- فين تديني ؟
وليد(كمل الصوك بجمود):- عند جميلة
ناديا(بتساؤل):- أو واش دخل جميلة فكلامنا؟
وليد(بجدية ممزوجة بالعصبية):- تقدري ترحميني وترحمي راسك وتخلينا نوصلو بخير وسلامة للفيلا لأنك إلى ستمريتي غادي نضطرو نوليو عند مصعب محملين فسيارة إسعاااااف
ناديا شافت فيه مكانش كيضحك كان كيهدر بصح وبعصبية عقدت حواجبها وعدلت كلستها وهي حاسة بوجع فكرشها يختي يختي وسقري ونتي قالبة الراس لداك الراجل مسكين يالطيف منك وصافي ^^
شاف فيها سكتت وتنفس الصعداء كان كاره فالحقيقة وحاس براسو ضايع مشتت كان فاللول مرتاح ولو شوية مين مكانتش عارفاه عارف أما دبا تقول جبل وتحط فوق كتافو .. وصلو للفيلا وفتحلها الباب وهي نزلت تتمشى غير بشوية وتوازنها مختل مخلاتوش يهزها لكن حاوطها بذراعو وياويلها وتنطق وخلاها تسند عليه تادخلوو ، كان كالس جاد وهيلين كيشربو القهوة وسارة حداهم تتفرج وانتابهولم واستغربووو بزاف منظرهم الغريب ، هي كمشت تريكوها عليها أما هو بعدها غير شوية عليه وطبعا لأنها هي دفعت راسها.. وقف جاد باستغراب عندهم كيشوف فوجههم بجوج صفر وهي باينة فيها مريضة من حالتها
جاد:- ياك لاباس فين كنتووو ؟
وليد(نطق قبلها وهي سكتت):- وجعتها المصرانة لبارح فالليل وديتها للمشفى
جاد(مخلوع):- بصصصح وعلاش مفيقتنيش أصاحبي نمشي معاكم ؟
وليد:-مفكرتش المهم هي دبا مزيانة خصها ترتاح
هيلين(وقفت كطلع فيها وتنزل وهي مكمشة عينيها):- علا سلامتك ومزيان عندنا بطل خارق كيتصرف فالوقت المناسب ههههه (كضحك باستفزاز)
ناديا(بدون حياة):- الله يسلمك
سارة:- ناديا لونك شاحب جدااااا ؟
ناديا(ابتسمتلها بحب):- غانكون بخير احبيبتي
جاد(طلع حاجب ونزل لاخور ممقتنعش كاع):- الله يشافيك
وليد(قاطعهم كاملين ومشاها رغما عنها باش تطلع):- شكراااا ليكم
زفر بحنق و تمشى بيها للدروج وبقات تطلع غير بشوية وهو مساندها مطلقهاش وخا كانت كتبعد يديه قدامهم لكن كان مصر فاستسلمت لعنادو طبعااا ...
هيلين(باستغراب شافت فجاد):- جاد هاد الفيلم دخل لعقلك ؟
جاد:- ولا فات مخي أصلا
هيلين:- كاين شي حاجة غريبة واقعة هما مكايقولوش الحقيقة
جاد(بتساؤل):- وفنظرك شنو يكون الأمر؟
هيلين(بتشكيك ونظرة تفكير):- منيش عارفة بالضبط لكن كاين شي حاجة غلط
جاد(وجعه راسه وبعد هاد الأفكار):- ياستي بكرة يدوب الثلج ويبان المرج
هيلين:- على قولتك دبا يبان المخبي
كانت حاسة بتوجس منهم بجوج كلست على الكنبة وهي مزال كتفكر وشاردة وحتى جاد كان مداخلش لراسو هاد الكلام لكنو مشاه معندو ميدير ...هنا كان وصلها لبيتها وكلسها على السرير
وليد(انحنى لمستواها):- نعاونك فشي حاجة ؟
ناديا(هزت راسها نفيا):- تتت غانكون بخير
وليد(وقف بعدم استماع ليها طبعا وفتح دولابها وبقا يقلب قدام عينيها المستغربة):- امممم
ناديا(ممصدقاش):- ممكن نعرف بالضبط نتا شنو كدير ؟
وليد(بدون ميلتفت ليها):- كيما كتشوفي كنحاول نقلبلك علا ماتلبسي
ناديا(بتأفف السيطرة):- متزيدش فيه قتلك غانكون بخير \
وليد:- مكانقتانعش بكلامك للأسف خصني نشوف بعيني ... آه لقيتهم هاد البيجامة غاتكون مريحة
ناديا(شافت فبيجامتها الرمادية بين يديه وابتسمت رغما عنها):- أتمنى غير متحماقش ...
وليد(بدون شعور فهم قصدها):- مع أني مكرهتش
ناديا(نحرجت وحست باللي غلطت ولكن بقات مبتسمة):- طيب غاندخل للدوش نبدل ونرجع
وليد(مدهالها بصمت وهو يحك فجبهتو):- تفضلي
وقفت غير بشوية وتوجهت نحو الدوش وهزت عليه البيجامة كانت حاسة بالدوخة لكنها كابرت دخلت وشافت فبلاصة الشرشارة نتاع الما فين لبارح شافت الدم وحطت يدها بلا شعور على كرشها تتحسسها وابتسمت قدام المراية اللي ربي حفظلها ولدها حبيبها اللي فرحت بيه فوق القياس واللي أكيد غايشبه لباباه ياسر وغي تفكراتو تنهدت بعمق وهي تفكر فينو دبا وهي كتعاني من كل جهة وطريق وهو ولا على بالو مهامو غير الإنتقام والخدمة أما هي تتحرق ، بقات كتسكت دوك الأفكار اللعينة بإشارة الصمت وبدلت ديك الكسوة ولبست بيجامتها بصعوووبة ووجع ، وحست بالشوق لياسر فداك الوقت تمناتو لوكان كان بجنبها ويدير اللي دارو وليد أكيد كان غادي يهبل عليها وعلى البيبي نزلت راسها ورفعاتو تشوف فملامحها الباهتة فالمراية غسلت وجهها وجمعت شعرها اللي كان مفرود ومشعت شوية من اللي تعرضتلو وشداتو بخيط وبقاو شي خصلات طايرين من الجانبين ، شافت فبيجامتها وابتسمت لاختيارو العجيب كيفه تنفست وخرجت لقاتو كالس القرفصاء على كرسي منضدتها اللي كتشوف لناموسيتها وداير يديه على فكو وكيهزز فرجليه انتظارا ليها حست بالراحة فداخلها
ناديا(شافت فيه ووقفت حداه):- وليد نتا منعستش مالبارح ولا رتاحيت انا غانكون مزيانة دبااا
وليد(وقف باعتراض):- حتى نشوفك نعستي عاد نرتاح أناديا أجي نوصلك لسريرك
ناديا(ضحكت بهدوء):- سريري على بعد خطوتين أوليد!!!!
وليد(بنظرة حب وطمأنينة):- ولوو متعارضينيش
ناديا(مبتسمة):- ههه طيب ... آآآآه
وليد شدها قبل ميختل توازنهااا كانت ضعيفة وحس بيها كي الريشة وساندها تالسريرها
حيدلها الغطا وكلست واستلقات بشوية وهو غطاهااا باهتمام بحال شي بنتو كيرعاها وهي كانت متبعة ملامحو المهتمة والمركزة فاللي كيديرو وكأنه كينجز شي صفقة مهمة ، صراحة كانت ممتنة لوقفتو معاها وموقفو كلووو اللي خلاها متحسش راسها بوحدهاااا ، فعلا قدر يساندها فأزمتها مبعد معدلها الغطا انتبه لعينيها اللي كانو ملاحقينو وضاع فسحرهم مجددا وبقا يقول يالطيف ساحرة حتى فوقت مرضك وتعبك اه ياقلبي ااااه .... انحنى لعندها وحط يدو على جبهتها
وليد(بنظرة طيبة وقلق عليها):- اممم الحمد لله مفيكش السخانة نبهني مصعب لهاد النقطة والدوا عندك مرة فالصباح مرة فالليل غادي نخليك تنعسي دبا وفالليل نجيبلك العشا وموراها تشربي دواك وخااا ؟؟
ناديا(بنظرة امتنان):- وخا
وليد(بعد نفسو عليها بسيييف):- مخصك والو ؟
ناديا(هززت راسها باعتراض):- تتء والو
وليد(تنفس بصعوبة غادي يبعد عليها):- طيب أنا غانطل عليك مرة مرة صافي رتاحي دبااا
ناديا بحال طفلة صغيرة حاوطت نفسها فداك الغطا وهي كتشوف فيه وحست باطمئنان وراحة وهي كتعنق فالغطا وتخلي عينيها يتغمضو بوحدهم هو حس بالأمان أنها بخير وسحب نفسو بستة وسبعين كشفة من بيتها وخرج لقا جاد متكي على الحيط كيستناه شاف فيه ودخل بيتو وتبعو جاد مبعد مقفل الباب عليهم
جاد:- هيييه مغاديش تتجاهلني
وليد(حط تليفونو وسوارت اللوطو والتفت عند جاد رابط يديه):- امممم هات أسئلتك هات أنا عارفك مغاديش تسكت اليوم
جاد:- ياعيني كتريحني بعدا مين فاهمني وخبرني نتا فين كنتو ومالها ناديا لأن اللي قلتوه مكيدخلش الراس نهائيا
وليد(كيحاول يخبي):- علاش حرام الواحد توجعو مصرانتو ؟
جاد:- محرامش إنما مجاتش معاكم هاد الكدبة
وليد(كلس على الكنبة بتعب):- وهادا اللي وقع اخويا
جاد:- اممممم متجبرنيش نعيط لمصعب
وليد:- عيط نتا حر ويلا زاد شي حرف علا كلامي نعطيك اللي بغيت
جاد:- مالني كامبو راني عارفك غادي توصيه اففف اجيني نيشان شنو كاين؟
وليد:- اللي كاين هو غادي تخرج من باب هاد البيت وتجبدو موراك وتخليني نرتاح إيلا جات على خاطرك راني عيان باغي غير ننعس
جاد:- يعني مغاديش تقولي؟
وليد(حط يدو على راسو حاس بصداع):- خرج أجاد
جاد:-هاوا خارج لكنك غادي تحكيلي دبا تشوف
وليد:- وغي سير دبا مبعد يمكن
جاد:- غانشوفو
وليد:- مكان خبر على كمال ؟
جاد:- تتت ولا صوت
وليد:- ههه يكون مات
جاد:- أو يوجدلنا شي مصيبة فراسك غانخلصو منو بسهولة
وليد(وقف باش ينعس):- ياسيدي يدير اللي عجبو رقبتو فيدينا دبا
جاد:- إمتا تمشيو عند البوس؟
وليد(تفكر وحس بالتذمر):- غدا
جاد:- أوك
وليد:- متخليش سارة وهيلين يديرو الضجيج ناديا مريضة
جاد:- حاضر جناب الباشا حااااضر هههه
وليد هززلو راسو بدون فايدة فيه وحط راسو على وسادتو أخيرا مبعد مخرج جاد وخلاه حبيس أفكارو وحبيس ليلة كاملة من القلق والتوتر والضياع لكن ابتسامة على وجهه مقدرش يخبيها وهو ضامم يديه لصدرو كيستنشق ريحتها اللي كتسحرو وتخليه طاير فعالم مفيه غير هو وهي ، كان يتمنى داك الولد يكون من صلبو فعلا ماشي غير ادعاء لكن يكفيه هي تكون بجنبو وكلشي ربي يديرلو طريق ...
جاد رجع لعند هيلين بخفي حنين بمعنى بدون جديد يذكر محيت وليد كان مستحيل يخبرو بالحقيقة وفداك الظرف ، طبعا بجوج بيهم مقتانعوش وقررو يسكتو حتى يبان المستور ..
كانت كالسة فحوش الدار وشاردة الذهن وباين فيها الحزن والتعاسة ومرة مرة تغدرها دمعتها وتمسحها بدون وعي وهي مركزة نظرها على واحد النقطة فارغة فالشجرة اللي عندهم وسط الدار ، عيشة مبعد مشافتها مشات جرت ربيعة وبقاو بجوج كيطلو عليها من سرجم الكوزينة
عيشة:- لالة هانتي شوفي مكنكدبش راها على هاد الحالة من فوقاش
ربيعة(فارشة سبب حزن بنتها وبألم):- يومين وتولي مليحة نتي ديها فشغلك اليوم جايينا ضياف ربي
عيشة:- لالة زكية محال لا تقبل شوفيها على هاد الحال
ربيعة:- بسيف عليها توافق ولا غادي تاكل وتفرق
عيشة:- والله إيلا راها شافاني لالة زكية حالتها مبقاتش هيا ياحسراه الضحك واللعب دركا ولات هي وديك الشجرة كيف كيف ميفرق بيناتهم غير الدموع هححح
ربيعة(دارت يدها على جنابها وشافت فيها بتهديد):- غادي دركي عليا كمارتك ولا كيفاش ؟
عيشة(حاسة بالخوف):- هانا غادية هااااه
ربيعة(شافتها مشات): وهاكك ونتي ما مقابلة ليا غير القيل والقال اففف ..(بنظرة انكسار) وتانتي يابنتي واش قلب حالك كنتي في راحة ووليتي كالسة على الشوك هاااح .. (مشات عندها وكلست حداها) بنتي زكية ...زكية ... وا زكية
زكية(انتبهتلها وقاطعت شرودها):- هاااه مَّاا عيطتيلي ؟
ربيعة(مخلوعة وكتتحسس سخانة بنتها):- الله يا بنيتي ساعة وانا نهدر فين عقلك ؟
زكية(كتحاول تعدل روحها قدام مها):-لا والو والو أمَّا غي راني عيانة شوية هادا مكان
ربيعة:- عيااااانة أنا مك إلى مفهمتكش شكون غادي يفهمك الولد اللي لفوق هو السباب وراه غادي نتهناو منو والجلا الما والشطابة موراه مجابولنا غي وجع الراس
زكية(بخوف وهلع شدت يد مها بلاما تحس):- لاباس عليه أمَّا متدعيش عليه هاد الدعاوي
ربيعة:- أيهاي هاي هااااي ولايني قلال فيك الحيا ومبقيتيش تحشمي
زكية(بدموع فعينيها):- قولي اللي عجبك هاادا ماعطا الله
ربيعة:- ونوضي نوضي تكعدي من هاد الكلسة نتاع الشوارف ودوري براسك شوية اليوم جايين عندنا شي ضياف الله
زكي(حلت فيها عينيها بصدمة):-علاش متقلتيليش و شكوووون هادووو ياكما خطاب راه قسما عظما غير إلى صورتلكم هنا شي ميت وبعدووووني انا مباغياش نتزوووووج غير بعدو مني
ربيعة (وقفت وشدتها من ذراعها بعنف جبدتها عندها):- سمعيني مليح غادي بسيف عليك تشوفي هاد الناس هادو صحاب باك ونساوينهم جايين يشوفوك وبربي العزيز متسكدي روحك حتى نوشمك
زكية(بانهيار ودموع كتغوت وسط الحوش):- والله منتزوجهااااا والله منتزووجهاااااااا يالاه
ربيعة(هزت نعالتها):- إيوا غادي نشوفو يا بنت بَّاك والله غير إيلا دخلتي عند الناس وهاد النعالة مصورة فوجهك وقولي مَّا مقالتش .. نوريك الغوات كيداير كبرررر راسك بزاااف وخرجو رجليك الشواري وقيلة خنتناك بزااااف ولكن دواك عندي غي صبريييييييييي
هاد المعيور كامل كانت كتسمعو زكية وهي فطريقها لبيتها اللي قفلتها وهي حاسة بالإختناق هاد المرة كي غادي دير تسلك راسها وشنو غادي تجاوب بَّاها على هاد العريس تاني من كترة مرفضت اللي قبل غايشكو فيها ، كاع وقبل مكانوش يعجبوها وكانت شايفة راسها عليهم أما دبا ومين دخل ياسر لحياتها وبقا كيجريلها فالدم كيدير تكون معا شخص آخر من غيروووو تغبنت وحست بروحها تايهة وكيدير تسلك ومها ناويالها على الغدر محيت مستحيل تخليها فالدار مبعد معرفت بمشاعرها تجاه ياسر خوفها طبيعي كأي أم خايفة على بنتها وفنظرها بالزواج غادي تخرجها من داك الوضع وتخرج ياسر من عقلها أراكي غي كتحلمي يا لالة ربيعة وغي تكايسيلنا على زكية الله يجازيك بالخير ^^
جا البوشتاوي مزنطر ومنرفز مالدخلة نتاع الباب وهو كيسب ويلعن ومشات كتجري عندو ربيعة تكسر الشر اللي راه طالع من جبهتو قبل عينيه
البوشتاوي(بالغوات):- ربييييعة ربيييعة
ربيعة:- هاني السي البوشتاوي مالك على هاد التعصيبة خير شنو كاين ؟
البوشتاوي:- والو باس غي جعفر بغا يخرجلي عقلي كنقولو خليكم هنا عندنا مستورين مابيكم معليكم إلا وهو قالك لا باغيين يمشيو فحالهم
ربيعة(كتكلعلو الصباط مبعد مكلس):- ولاواه السي البوشتاوي إيلا بغاو يمشيو فحالهم طريق السلامة علاش نتا باقي تبزز عليهم كل واحد عقلو فراسو
البوشتاوي :- نتي مفاهمة والو جيبيلي ندعز شي لقيمات باغي نورك شوية قبل ميجي المغرب و يجيو دار الفيلالي...
ربيعة(منزلة راسها بتردد):- السي البوشتاوي وغي بغيت نسولك فواحد الشوار
البوشتاوي:- هاتي هاتي نتي شواراتك يديو للعاقبة
ربيعة:- علاش مانشوفوش معا دار الفيلالي و يعني نخليو هاد الزيارة تايمشيو الناس اللي راهم ضياف عندنا كنضن باللي هاكا حسن ولا واش بانلك؟
البوشتاوي:- وعلاش واش دخل ضيافي فدار الفيلالي بالعكس غادي يفرحو معانااااا نوضي نوضي جيبيلي ناكل وقولي لبنتك توجد راسها راه غايجيو كاع دار العريس يشوفوهاااا ولبسيلها شي حاجة مدوك القفاطن اللي فصلتلها وخليها تلبس كاع ذهبها باش يعرفو بنتمن غادي يناسبو هييييه
ربيعة ناضت وهي دافعة رجل لقدام رجل اللور وملقات جهد ، أما عيشة كانت تصنط لكاع الحديث وطارت جابتها فبيت زكية اللي كانت ناعسة على سريرها وعايشة ألمها
عيشة(داخلة بلهفة وسدت موراها الباب):- لالة لالة ؟؟؟
زكية(على وضعها):- عيشة خرجي منا عليا راني باغية نبقى بوحدي
عيشة:- وسمعت بَّا سيدي كيقول لللالة ربيعة دار الفيلالي هما اللي جايين يخطبووووك
زكية(انتفضت من مكانها كتشوف فيها مصدومة):- لالالالالا أعيشة ميمكنش دار الفيلالي لا وقيلة سمعتي غلاط ميمكنش ؟؟
عيشة(بفرح):- لا والله تاسمعت بصح بهاد الودنين اللي غادي يخرج منهم الدود وعاد قالها بَّا سيدي خلي بنتي تلبس وتتزوز وتتصيغ باش يعرفو معامنش غادي يتناسبووو هههههه والله فرحتلك أللالة ربي جابلك السعد الزين والعائلة اللي سمييتها ضاربة كاع الحومات
زكية(بألم وحسرة):- السعد الزين قولي المصيبة الكحلة دار الفيلالي معروف عليهم لا شيرو على شي وحدة مكيخرجو إلا وهي مرت واحد من ولادهم وعلى ماقاتلي نهيلة باقي الولد الصغير اللي بلا زواج وهادا اللي خارج على كارهم وخدام فشي وظيفة تتت ياااربي على مصيبة هادي
عيشة(بدون فهم):- معرفتش علاش كتقولي مصيبة راه كاع البنات كيحلمو يديو من دار الفيلالي وزيدي عليها ولد قاري وفاهم وموظف وببلاصتو وقيمتوو شنو بغيتي كتر ؟
زكية(بداو الدموع ينزلو مين تفكرت ياسر):- أنا مبغيتش اعيشة نتزوج مبغيتش نتزوج اهئ اهئ
عيشة معرفت ماديرلها محيت مفاهمهاش أصلا لكن فعلا مصيبة كيما سماتها زكية وديك العائلة مكايتنازلوش نهائيا ومدام نيشو على بنت البوشتاوي المتميزة بالزين والأصل والمال والجاه فأكيد غادي ياخدوها وخا تلاقا السما معا الأرض ، هي مبغاتش تسبق العيد قبل رمضان وقالت تجرب معا مها مجددا لربما قدرت تقنعها باش يوقفو هاد الشي قبل متوقع الفاس فالراس ...
خرج من البيت عاد بالشورط والصوفيطما وهو هاز حزامة فيدو وكيضرب بيها اللي جا فطريقو وسلخ رجالو كل واحد فين جاتو الضربة وهو كيلهت
كمال:- أنا مخدم معايا الحميييييييييير الحميييييييييييييييييييير ليلة كاملة وانا كنازع ونعيط تاشي حد مقدر يدخل يفكني يا ولاد الكلب يا الشمايت تفوووو عليكم واحد واحد
الكاردكول(كيرجف):- أسمحلنا أسيدي بصح ديك البنت قاتلنا نتا عطيت أوامر باش تاشي حد ميزعجك
كمال(عطاه بالحزامة بضربة):- هاديك سرقتلي ملفاتي وقدام عينيا وااااانا اللي عطيتها الرقم نتاع الخزنة بصح والله متبقاها فيهاااا إيلا مجبتهاش وخليتها تبوس صباع رجلي منتسماش كمال
جا داخل لبيتو من تاني وهوما كيشوفو فيه كيتنيقز بداك الوضع ومسكين داك اللي فكووو كانو دموياتو يشرشرو من جبهتو لاحقاش غير فك كمال بالجنون ضربو بفاز ههههههههههه
كمال(كيقلب على تليفونو):- أنا أنااا تلعب معايا بزة مزال مخرجتش من اللرض أنا تلعب عليا أنااا السي كمال اللي مكايديرها بيه حد تلعب عليااا قذرة منحلة بحالها بصح وخاااا أناديا وخاااا .. تيييت تيييييت تييييي تتتيييت ألوووو ألوو فيديريكو أنا كمال باغي نكلم البوس وحالا ..كيفاش منقدرش قتلك باغي نكلم البوس سير ديلو التيليفون وبلا كترة هدرة .. وهاكدك هاني نستنا .....أ.. ألو سيدنااا
البوس(ببرودة):- كمال
كمال(بلهفة وخوف كيرجف):- سيدنا بغيت نشكيلك من وليد وجماعتو ديك ناديا اللي خدامة معاه جات لبارح عندي للفيلا وسرقتلي الملفات الخاصة بعملياتنا وعليهم كلشي توقيعي وسميتي والتواريخ ديالها وزيد وزيد المهم مصيبة إيلا طاحو فيد البوليس ...
البوس:- كيفاااااش سرقتهم واش نتا حمق وفين الحرس الشخصي ديالك كيفاش تسمح بهاد المهزلة
كمال(كيعرق):- أ سيدنا سيدنا هي غفلتني أ.. معرفتش .. سمحلي سمحلي لكن خصكم تدخلو سيادكم باش تعتقونا من هاد المصيبة ..
البوس:- بنت قدرت تضحك على كيان معتبر فالمجتمع وذراعي فالخدمة
كمال(حاس بالشمتة):- أ سمحلي لكنها قدرت تضحك عليااااا ..
البوس:- إيوا سمع شغايجيك مليح ماليوم مباغي نسمع عليك ولا منك تاحاجة وغادي نصفيو الخدمة اللي بيناتنا وكل واحد من طريق معندي مندير ببونسيوات بحالك
كمال(مخلوع):- كيفاش لا اسيدنا منقدرش منقدرش كيفاش كتعزلوووني من خدمتي لالالا أسيدي
البوس:- آخر مرة نشوف رقمك انتهى
قطع عليه وخلاه كياكل فجنونو مالأعصاب وهرس كلشي فبيتو من كترة الجنووون اللي ناضو فيه ..أما هو غير قطع ابتسم بخبث
البوس:- غبي معارفش أنه تاحاجة مكتوقع بلا إذن مني خليه دبا يشرب من البحر
جميلة:- معرفتش علاش تعطلو وليد وناديا؟
البوس(التفت وهو كيشرب فنجان قهوتو ببرودة):- غادي يجيو ويجيبو الملفات فعلا طلعت بنتك تستاهل وسام شرف على إنجازاتها معندي منسال فيها وهادا كيخليني نزيد نعجب بيها ونعول عليها فما هو أكثر
جميلة(ارتجفت وشافت فيه):- مفهمتش شنو تقصد؟
البوس(بلمعة خبث وحماس):- بنتك جوهرة خصنا نستغلوها كما يجب
جميلة(بتأفف):- واش نتا كاع مغاديش تخليها فحالها ؟؟
البوس(ضحك بخبث):- هههه عمرك شفتي شي حد كيرفس النعمة برجليه
جميلة(مقادراش تتحمل ناضت من قدامو):- عن إذنك غادي نجرب نتصل بيهم
البوس(شاف من النافذة):- مكان تاشي داعي لأنهم وصلو فعلا ..
شافت فين كان كيشوف ولمحت وليد وناديا متجهين لعندهم وعاد حست بالراحة لكن بقات كتحقق فناديا اللي وجهها كان شاحب وباينة فيها مامزياناش عقدت حواجبها وهي كتفكر وأجلت تساؤلاتها لمبعد
وليد:- مرحبا
البوس(حط فنجانو ووقف بأدب):- وليد عزيزي يا أهلا وسهلا
وليد:- أهلا بيك سيدنا
البوس(تحرك ووقف أونفاص لناديا وبقا يتأملها ومد يدو جبدلها يدها بين يديه):- الجميلة ناديا سعيد برؤيتك مرة تانية
ناديا(بسيف وبتعب):- شكرا ليك
جميلة(لمحت تعب ناديا وبغات تعدل الأمر):- أ.. تفضلو بالجلوس تفضلوو
ناديا(بامتنان هززت راسها لجميلة):- كلك ذوق أجميلة ميرسي
البوس(مبعد مكلسو جميع فالصالون):-أنا فخور بيك أناديا بالإنجاز اللي حققتيه أنقذتينا من يدين داك القذر كمال
ناديا(بدون نفس):- درت غير واجبي
البوس:- أكيد لاء إنجازك ماشي ساهل وبيني وبينك مشكيتش فقدرتك ولو لثانية عكس وليد
وليد(تلعثم بهدوء):- قلت نتعامل شخصيا معاه لكن ناديا أثبتت أنها كفؤ لذلك
البوس:-وهادا اللي كنهدر عليه
وليد:- اتصل بيك؟
البوس:- من دقايق وأنهيت الأمر
وليد:- تمام تهنينا منو
البوس(شاف ناديا شاردة وصفرا):- مال الجمال اليوم شاحب وحزين ؟
ناديا(ابتلعت ريقها قلقا وشافت فجميلة ووليد اللي كذلك تهزو من جملتو):- أ غير بداية نزلة برد غاتمشي بالدوا أكيد
البوس:- وليد علاش مكاتعتانيش بعميلتنا الجميلة ؟
وليد(بحرج):- أ.. جاري ذلك أسيدنا بالطبع
البوس:- عال عال فين الملفات ؟
ناديا(جبدتهم من حقيبتها وعطاتهملو):- تفضل
البوس(شدهم وبقا كيتصفح فيهم):- اممممم رائع جداااا رائع الملفات كلها ولات دبا بين يديا
جميلة خذي ناديا فجولة باغي وليد فحديث مهم
جميلة(وقفت بسرعة وهي كتسنا هاد الفرصة):- تفضلي أنادييا معايااا
ناديا شافت فوليد اللي هززلها راسو باش تمشي معاها وهي تحركت تابعدو ونطق البوس
البوس:-باغي حفلة تأسيس المنتج اللي غادي تديرها شركتك الرئيسية لهيه تندار هنا فالمغرب ويكون هنا الملتقى وباغيها تكون مختلفة شوية وفيها غادي نعلنو للصحافة على خبر ارتباطكم نتا وناديا
وليد(ممستوعبش):- سيدنا أنا مكنتش ناوي نحضر الحفلة فالمقر الرئيسي فالخاريج غير باش منخليكمش يعني بوحدكم لكن أنك تطلب ننقل الحفل لهنا وفالفرع ديالنا سمحلي مقادرش نفهم علاش ؟
البوس:- عندي أسباب عدة لذلك المهم تنفذ المطلوب منك أوليد
وليد:- الحفل باقيلو يالاه شهر وفنظرك غادي يقدنا الوقت باش نديرو كاع هادشي ؟؟؟
البوس:- ههه مستر وليد قادر يطوع الحجر ماشي غير حفلة
وليد:- لكنها حفلة غاتكون أقل شيء من أرقى الحفلات اللي غاتندار على أرض الوطن
البوس:- ولذلك باغيك تهتم بيها شخصيا .. خبرت ناديا بالقرار ديالي.؟
وليد(سكت وابتلع ريقو):- يعني ...
البوس(شاف فيه متأملا):- يعني مزال مخبرتهاش كنت متوقع لذلك خليت لجميلة المهمة الصعبة
وليد(مفزوع):- لكن علاش أنا كنت باغي نمهدلها الموضوع وو عاد ن..
البوس:- وانا سرعتلك الأمر علاش التأجيل
وليد(حط راسو منفعل وكيخبي):- اللي تشوفو أسيدنا
البوس:- وليد كاين شي حاجة أنا معارفهاش؟
وليد:- حاجة تتت لا مكاين والو
البوس:- إذن خلينا نفرحووو بهاد المناسبة
وليد:- عندي سؤال ومعارفش كيفاش غادي يجيك واش نتا ممقلقش يتعرف عليك شي حد أو صورك تنزل فالجرائد مبعد كاع هاد السنين ؟
البوس:- ههه لا ممهتمش بصغائر الأمور محيت تاشي حد ميقدر يثبت عليا ولو شعرة
وليد:- تمام
جميلة(كتحاول توصل معا ناديا لشي كلام):- يا الله أناديااا واش غادي تخبريني بشنو كتفكري؟
ناديا(كتمسح دموعها اللي خرجو رغما عنها ):- مكنفكر فوالو أجميلة غير راني عيانة شي شوية هاد اليومين هادا مكان
جميلة(كتمص غضبها):- آه هادي عرفتها محيت باينة من وجهك لكن باغية نعرف أكثر
ناديا:- مكان متعرفي أجميلة قوليلي نتي وليد قالي عندك شي خبر باغية تبلغيني بيه
جميلة:- هو قرار البوس أناديا وغادي يكون كي الرعد بالنسبة لينا كاملين واش مستعدة تسمعيه؟
ناديا(بقلق):- ياك لاباس أشمن قرار؟
جميلة صرطت ريقها باش تنطق بالزلزال بمجرد مكملت جملتها ناديا وقفت ودارت بيها الدنيا وكانت غادي تفقد وعيها بعدت يد جميلة اللي كانت مقربة باش تهديها وخرجت بلا شعور للصالون شافت بضياع فوليد وبتشكيك فالبوس لايكون إنسان ، بجوج عينيهم كانو مسمرين عليها وهي جامدة غي الدموع اللي مكومين فعينيها مرة ينزلو مرة ينحبسوو شهقت بعنف وضربات قلبها تسارعو ررجعت شافت فجميلة اللي كانت كتهزز فيها و تقدمت لا إراديا وبشرود هزت حقيبتها و خرجت بدون استئذان وليد اعتذر منهم ووقف مصدوم من الشي اللي دارتو وخايف لاتفقد وعيها وهي مزال عيانة ولحق بيها للعتبة وتمشا حداها وهو عينو عليها أما هيا مكانتش كاع حاسة بوجودو بجنبها كانت كتبانلها ديك السيارة هي المنفذ الوحيد من عالم الغوال فتحت الباب وركبتها بصمت وحطت راسها على راس الكرسي ورخات رجليها بتعب ويدها على كرشها .. هو ركب بصمت حاول يكلمها لكنها مردتش عليه سمعاتو أو مسمعاتوش الله أعلم
جميلة(كتبكي وتضرب فصدر البوس):- بنتي إيلا وقعتلها شي حاجة فراه نتا غاتكون السبب منك لله منك لله كيف باغي دمرلها حياتها كيما دمرتلي انا حياتي
البوس(شدلها يديها بهدوء ووبقوة):- لزمي حدودك وعرفي شنو راكي تقولي وانا لمصلحتي أنها تتزوج بوليد ومدامني قررت فقراري لازم يتنفذ
جميلة:- الولد قالك مستعد يضمنا بدون زواج
البوس(بعدلها يديها ونفضها):- أنا اللي كنقول ونآمر هنا أنا اللي كنتحكم فمصائركم كاملين أوياك وتنساي هاد الشي أجميلة
جميلة(كتستجدي عطفه):- هاديك بنتك
البوس:-علاش محسساني أنني راميها للنار أي وحدة مكانها كانت تبوس يديها وجه وظهر ، عريس بحال مستر وليد شكون ترفضه وسامة وإسم وجاه ومال ومنصب فين اللي يمنع ؟
جميلة:- اففففف معمرك غادي تفهم
البوس(بعد عليها وكلس دار رجل على رجل بأريحية):- ولا باغي نفهم سيري لبيتك دبا باغي نراجع هاد الملفات متزعجينيش
جميلة ابتلعت غصتها منو وملقات متقول طلعت لبيتها ورسلت مساج لوليد تطلب منو يتصل بيها إيلا وقع شي جديد وهو قرا مساجها ورجعو لجيبو أما هيا كانت عاد على نفس الكلسة فوق واحد الكرسي خشبي مطل على البحر حاطة يديها على جناب الكرسي وكتشوف فالفراغ وعينيها مسكتوش من البكا
وليد:- ناديا أنا مكنتش باغيك تعرفي بهاد الطريقة لكن لكن ...
ناديا(بلاما تشوف فيه):- نتا كنت عارف من أول زيارة ليهم ياك؟
وليد(تنهد بتعب):- آه كنت عارف لكن دبا ميهمش
ناديا:- عارفة أن اللي كيهم دبا هو استعدادي لزواجنا اللي تقرر مبعد شهر ياك أوليد ؟؟؟؟
وليد(عرفها غادي تنهار وشفاتو ومعرف مايقولها):- أنا آخر شخص ممكن نفكر بأنانية فهاد الموقف لذلك أنا مخليلك القرار ليك
ناديا:- ههههه كتضحك معايا مسمعتش أنه مقرر ماللي كانو لهيه وماعلينا حنا إلا السمع والطاعة
وليد:- خصك تتقبلي الموضوع
ناديا(حلت فيه عينيها):- أنا مزوجة أصلالالالا أشمن موضوع باغيني نتقبلو إيلا نتا كنت ناسي فأنا كل دقيقة كنعيشها كنتفكر كلشي فات
وليد(حس بانقباض فصدره ووقف مقابل البحر):- وغادي تطلقي
ناديا(باستهزاء وألم):- ببساطة ببساطة محيت حضرتكم الآمر الناهي لحياتي ههههه متحلمش بزاف
وليد:- ناديا متنسايش ولدك وحنا أصلا متافقين باش يكون ولدي قدام الجميع كيغاديري تواجهيهم بكرشك إيلا ماتماشيتيش معا هاد القرار؟؟
ناديا(وقفت بعصبية):- منسمحلكش تستغل ولدي لا نتا ولا داك البوس نتاعك فمصالحكم القذرة
وليد(مصدوم التفت عندها):- مصالح قذرة كتسمي زواجنا مصالح قذرة ؟؟؟؟؟
ناديا(بصوت عالي مواجهة ليه):- زواااااجنا أي زواج كتهدر عليه واش كدبت الكدبة وتيقتهااااا ؟؟؟
وليد(ماقادرش يتيق مدى فظاعة كلامها وتبخ ع الآخر):- متقتهاش وميحتاجش تفكريني بالأمر كل لحظةةةةة ويكفي تجريح فعباد الله نتي مجبرة باش تمتاثلي للقرار سواء برضاك أو من غيرو
ناديا:- هههههه والله حتى حماقيتووو أنا بنفسي غادي نواجه داك البوس نتاعكم ونقولو أنني مزوجة ومن العميل اللي كيقلب عليه وباغي يصفيه وحامل بإبنه ، عجبك هاكدة؟
وليد(بنرفزة):- ناديااااااااا نتي بسيف عليك غادي توافقي محيت خصك تحافظي على ولدك وهادا مغايكون إلا بهاد الطريقة
ناديا(كلست بانهيار على الأرض وهي كتبكي):- واش أنا مكتوب عليا إبلا بغيت شي حاجة خصني نضحي عليها بحوايج تانيييييين علاش ياربي تعذبني هاكدة علاش
وليد تألم بزااااااااف من داك الشي اللي كتقولو ناديا لهاد الدرجة هي معتبرة زواجها منو عذاب وليه شنو صحابلك أوليد غادي طير لحضنك وتقولك امتا غي يجي داك اليوم فيق فيق من أوهامك هي لحد الآن مزال على عهد ياسر ومعمرها غاتكون ليك حتى لو امتثلت لأوامرك ولا لمشاعرك في بعض الأحيان لكن كيبقى الأصل أن ياسر هو اللي واخذ كلشي ، بقا كيشوف فيها بتأثر ومقادرش يقرب منها آلماتو بزااااااف بهاد الموقف وجرحاتو عمداااا تحرك كيحاول يبعد عنها قدر الإمكان لكنو تراجع ولعن نفسه وحط يدو بتردد على كتفها باش تنوض مالأرض هي بقات دافنة وجهها بين يديها وكتبكي بحرقة وهو مد يديه وحركها ووقفها باش تتمشى معاه للسيارة وينطلقو من جديد لكنها دفعت يده ووقفت بوهن وهي كتفكر بأسف أنه أمامها مواجهة ضارية فالأيام الجاية ..
تأزمت نفسيتها بزااااف مبقاش قادر يكلمها أو يجي مجيهتها بمجرد مكانت تشوفو تنفعل وتبقا تغوت عليه وتنهار بجنون على مرأى من عينيه هو خاف عليها خصوصا أنها مزال خارجة من حالة إجهاض قدر الله أنهم نقذوها فآخر وقت ودبا هي على شفا شعرة وحدة وتخسر كلشي ، لذلك كان كيتحاشى يحتك بيها ولا يقرب منها برغم شوقو وعذابو أنه يكون معاها لكن قرر يمتثل لرغبتها في حين يفكر فحل لأزمتو معا ياسر وفين غادي يلقاه باش يخليه يطلقها وماشي بعيد ينسفو من هاد الدنيا انتقاما لكل الآلام والأوجاع اللي كيسببهالو ، هيلين وسارة مكانو جايبين للدنيا خبر لكن جاد كان عارف المصيبة اللي غاتوقع على راسهم لأن لاهيلين غادي تسكت ولا ياسر غادي يخليهم فحالهم إيلا نتشر الخبر وهي مزال على ذمتو فملقا حل إلا أنه يتوجه بنفسه لعند البوس ويخبره بالمستخبي كلو .. طبعا بلا خبر وليد لأنه غادي يقتله إيلا عرف
البوس(استقبلو فمكتبو):- أتمنى اللي يكون جايبك مهم ومضيعليش وقتي ؟
جاد(ابتلع ريقو وحس بالندم لكن ضروري ميعاون وليد):- سيدنا أنا عندي خبر غادي ينرفزكم ولكن مكانش مغيركم اللي غايقدر يحله
البوس(بنظرة تركيز):- كمل كلامك شنو كاين؟
جاد:- معارفش مين نبديلك لكن لمصلحة وليد وناديا ضروري ميكون عند حضرتك علم باللي كيوقع من موراك
تنهد جاد وبدا يسرسر للبوس كلشي مخبيينو عليه وهاداك كان كيشوف فيه بملامح جامدة وعاقد حواجبو لأول مرة شي حد يستغفله بهاد الشكل والأدهى من ذلك أن كلشي عندهم الخبر إلا هو وهو اللي حاسب روحو نزق وتاشي حد ميقدر يفلت من بين يديه لكن لاء خرج هو البهلوان اللي مستغفلو الجميع ، شكر جاد اللي مشا وهو داي وعد من البوس أنه يتدخل لكن بدون ميعلم تاشي حد أنه هو اللي بلغه بهاد الشي ، كلس مايقارب الساعة وهو جامد فمكانو حتى نتفض فجأة فتح باب المكتب مالوسط وطلع الدروج وتمشى فالرواق تاوصل لبيتها وفتحها بجهد لاتخها معا الحيط هي تخلعت بمنظرو اللي كان كيخوف وتقدم لعندها شدها من شعرها بدون تفكير
صفوان:- أنا تستغفليني يا الحشرة طراااااق
جميلة(كتبكي مخلوعة وكتقيس فخدودها):- ص.. صفوان مالك ياك لاباس اهئئ ..؟؟؟؟
صفوا(شدها مجددا من شعرها وجرجرها حتى للسرير ولتخها عليه):- نتي حثالة نكرة كان خصني نقتلك هادي شحااااال معمرك ماتولي إنسانة محترمة يا الحشرة
جميلة(كتبكي ومعارفة باش تبلات):- علاش علاش راك تقولي هاكدة شنو كاين؟
صفوان(بعدم تصديق وقف مبعد عليها كيريش بيديه):- و كتتمهبلي كتستغبيني عاد متحشميش فعلا اليوم صدمتي فيك أكبر صدمة خديتها منك فحياتي
جميلة(تكعدت كتبكي وكتحاول تفهم منو):- صفوان هئ قولي شنو كاين؟
صفوان:- بنتك حاملة من وليد و مزوجة من ياسر وحضرتك عندك علم بكاع هادشي ومقايلاليش المضحك أن الكل عارف إلا أناااااااا
جميلة(تصعقت وجمدت بلاصتها وبخوف وهلع):- ش.. شكون قالك هاد الشي أكيد راك غالط
صفوان(كيشوف فيها بألم):- آه غالط مين كنرجع نتيق فقذرة بحالك لكن غادي نديرلك حد عييت منفوتلك وتالهنا ويكفي
جميلة:- ش... شنو قصدك؟
صفوان:- من مور عرس بنتك غاتعرفي
جميلة(بدون فهم وببكاء):- ولكن هانتا عرفت بشنو كاين فعلاش متخليهاش معا ...
صفوان:- آآآآه هادا اللي باغية حتى نتي وكتعارضيه من هادي شحال لكن لا نتي ولا غيرك غايبدل قراري اللي تاخذتو وناديا غادي تتزوج وليد وبسيف عليها يكفي أنها هازة ولدو فأحشائها ودرت مزيان مين سرعت موعد إعلان الخبر
جميلة(نزلت على ركابيها لصقت فرجله كتترجاه):- عفاك أصفوان كنترجاك كنترجاك تخليها و...
صفوان(شدلها فكها بقبضة قاسية):- إيلا خرجتي حرف من باب هاد الغرفة بالله العلي العظيم غادي نقطعلك لسانك ونرميه للحوت ياكله
جميلة(ابتلعت ريقها):- صفوان عفاااااك ؟
صفوان (دفعها من على رجلو جات طايحة الأرض):- بعدي لهيه
خلاها كتبكي وترجف بالخوف من اللي غادي يوقع من بعد واشمن قيامة غادي تنوض مبعد معرفة البوس بكلشي ، ووهاد الأخير مشا كيسب فخاطرو ويلعن دخل لمكتبو مبعد مزلزل الفيلا بتعييطة لفيديريكو اللي جا كيهرول موراه
صفوان:-فيديريكو بغيتك تجمعلي كاع الرجال
فيديريكو:- أمرك لكن علاش وسمحلي على التجاوز أسيدنا؟
صفوان(بنظرة شريرة):- دير اللي قتلك وبلا فهامات
فيديريكو(انسحب حاني الراس وكيترعد):- أمرك أمرك ..
كلس على الكرسي وحط يدو على فكو وغاص فتفكير عميق ومريب ...
فاطمة(كتبكي):- اهئ اهئئ الله يا ولدي الله
رشيدة(كتصبرها):- الله يهديك يا فاطمة راكي مسكتيش مالبكا منهار جاو البوليس هنا للدار
فاطمة(كضرب فصدرها):-الله ياحنيني وفين تكووون واش حي ولا ميت غي نشوفك أولدي ويرتاح قلبي
رشيدة:- قولي اعوذ بالله مالك تفولي على الولد راه راجل ويكون مدبر على راسو
فاطمة:- شتي يا رشيدة شتي بنت الحرام فين وصلت ولدي خرجاتو من خدمتو وعلى دارو وشكات بيه وبغات ترميه فالحباسات لهلا يمسحلها ويبركلها الخبز والملح فالركابي إن شاء الله
رشيدة(كتهزز راسها بدون فايدة ففاطمة اللي كتنوح):- الله يسترك متسكتي وتنعلي الشيطان راه توفيق ولدي كيجري فالقضية ويلا وصلو لشي حاجة غادي يبلغنا
فاطمة:- وياميموني ويا سعدي لا بنت لا ولد وليت وحدانية الله ياربي الله اهئ اهئ
رشيدة(باستسلام):- لا حول ولا قوة الا بالله أنا نوض نوجدلك شي حاجة تاكليها
فاطمة(مبعد مناضت رشيدة للكوزينة بقات شادة فصدرها):- لا ماكلة ولا شراب يبردو نار جوفي على وليداتي اهئ اهئ شكيتك لله يا ليلى شكيتك لله اللي خرجتيلي على ولدي حبيبي اهئ
إيه يا خالتي فاطمة نتي معارفاش شنو دار ولدك وكالسة تدعي على بنات الناس مي الله يهديك راكي أم وطبيعي متحرقي على فلذة كبدك اللي كاع ممسوقلكش غي هني روحك ، كان داير على رجل ولابس توني فاللون الأسود ومتكي كيتفرج وفاتي كتحط الماكلة بدون نفس وطايرالها ولتخت الطبسي
جواد(شاف فيها):- غير بشوية عليك مالك على هاد اللتيخ ؟
فاتي(كتعاوج بفمها):- مالني كنحط كي العادة
جواد:- ديريلي براد أتاي جا على بالي
فاتي(بتأفف):- وكترتي واش صحابلك أنا هنا خدامتك ديريلي العشا ديريلي الغدا ديريلي تاي جيبيلي نشرب قاديلي فراشي حمميني كيسيني لبسيني حدديلي لنكون مرتك وانا لاخبر شوووف جوج كلمات منزيدهمش إيلا بغيتني نخدم عليك تحطلي فلوس الشهر مدوبلين منبقاش أنا نصرف من جيبي راه كملو الفلوووس قلب على راسك
جواد(علا راسو شاف فيها وهي دايرة يد على جنب وكترايش وزفر زفرة):- عرفي شنو راكي تقولي؟
فاتي:- كنقول للي لازم يندار ويلا معجبك حال كتعرف الباب فين جاية أنا عيييييت
جواد(غمض عينيه وفتحهم بشر ووقف شدها من شعرها وضربها بالصقول ودفعها طاحت على الأرض ودار رجلو على صدرها):- سمعي أديك الحقيرة يا بنت الليل غادي تجمعي فمك وديري اللي نقولك عليهااااا بلا هدرة بلا كلام سمعتيني انا فمخي بزاف الحوايج اللي خصني نفكر فيهم ماشي فيك نتي يا الناقصة ومرة تانية إلى عليتي صوتك عليا غادي ندمك سمعتيني وزايدون الفلوس اللي قلتي كملو يا الكذابة كانو هادوك المانضات ديالي اللي كنت نصيفطهملك كل شهر جاية يا بنت الحرام دبا تجملي عليا لعنة الله عليك تفووووووو ...(ضربها بركلة لكرشها وهي كتلوى بالبكا والوجع) تكعدي ديريلي تاي تكعدي يا الحمارة تفووو تاكلو وتنكرو الخير كنس راشي ...
ناضت كتجرجر فراسها وهي كتبكي ومقهورة أما هو رجع لبلاصتو كينهت وكيشوف بتركيز فالتلفزة بدون نفس ، وقفت عند البوطاجي نتاع الكوزينة وهي كتمسح دموعها
فاتي:- هادي مبقاتش عيشة هادي حابسني فالدار لاخدمة لا زطمة وزايدهالي بالأوامر وكيمد عليا يدو الحقير والله لا بقاتها فيك يانا يانتا السي جواد ..
عزيزة:- واش بصح أولدي ابراهيم المحكمة قبلت بطلب الخلع ديال ليلى؟
ابراهيم(بفرح):- آه قبلوه وغايشوفو فالقضية بالمنظور ديال الأمور الجديدة اللي طرآت وكلشي حطو محامينا فالمستندات اللازمة وقدمهم للمحكمة وعلى ربي ميتعطلوش علينا وناخذوه من أول جلسة
عزيزة(بدموع الفرحة):- الله ياربي صبرتي يا بنيتي وهاوا مولانا غادي يفرج عليك
ليلى(كتمسح دمعتها):- الحمد لله أربي حمدتك وشكرتك
ابراهيم:- مبقالنا غير نشدوه نرميوه فالحبس ونتهناو أختي
مريم:- والو مقدرتوش توصلولو يا ابراهيم زعما كنتو صحاب فكر شي شوية فين ممكن يكون
ابراهيم:- ياودي وخا كنا صحاب تقولي معمرني عرفتو فآخر فترة بان على حقيقتو أنا قبل مختي كنت مخدوع فيه ومصاب يطيح بين يديااااا على ربي
مريم:-ياربي آمين
عيسى(كيكح وباينة فحالتو عيان):- أنا داخل نرتاح فبيتي شي شوية
جر كروستو وتوجه بصمت لبيتو وكلشي بقا يشوف فيه
مريم:- ماما مالو جدي ؟
عزيزة:- والله معرفت هادي يومين وهو على هاد الحال
ابراهيم(بقلق):- ياكما يكون مريض ومبغاش يقولنا
ليلى:- عمي عيسى من النوع اللي ميبغيش يشطن الناس عليه وقيلة كيما راك تقول أبراهيم
ابراهيم(وقف بخوف):- إيوا نجيبولو طبيب لهناااا علاش نتفرجو فيه وهو مغاديش يقولنا وخا ضاراه شي حاجة
مريم(جاها الرعب عليه):- واه ابراهيم دخل عندو حاول معاه راه ماللي جينا ماكلا والوو
عزيزة(بقلق تاهيا):- ياربي تستر دخل أولدي وطمنا معاك
دخل ابراهيم لبيت عيسى ولقاه كيحاول ينوض من كرسيه ويتكا على السرير وطار عندو ابراهيم اللي عاونه وخا عيسى كان كيقولو معليش معليش
ابراهيم(كلس حداه على السرير):- عمي عيسى نتا مريض حاسس بشي حاجة واجعاك قولي راني بحال ولدك ونتا بحال الواليد
عيسى(تنفس بتعب):- لا ياولدي يكتر خيرك غير وشا هيا عمك كبر فالعمر ووليت فيساع نعيا
ابراهيم(كيحاول يشجعه):- أيهاي نتا مزال شباب وتقولي كبرت فالعمر ههههه
عيسى:- ههه أح أوه ...
ابراهيم:- شوف أعمي عيسى بغيتك تصارحني إيلا ضاراك شي حاجة نجيبلك دبا الطبيب
عيسى(كيحاول يكابر):- لالا متشقيش راسك أولدي هادا ميكون غي برد وغادي يمشي فحالو
ابراهيم:- واخا أسيدي المهم لا ستحقيت شي حاجة تقولي ياك ؟
عيسى:- الله ياولدي ربي يكتر خيرك
ابراهيم:- نخليك ترتاح أنا دباااا
عيسى:- الله يعاونك أولدي .. أكح اه اوح...
خرج براهيم عاض على شنايفه وشاف فيهم بقلق مرسوم على وجهه
مريم:- ياك لاباس أبراهيم؟
ابراهيم:- باينة فيه مريض بصح كيكابر مبغاش يقولي
مريم(جايها البكا):- هادا طبعو ديما كيخبي علينا إلا ناديا اللي كتقدر تجبرو يمشي للطبيب و ياخذ الدوا تتتت أنا غاندخل عنده نحاول معاه
ابراهيم:- لا صبري أنا بانلي نعيطو على مصطفى يجي يشوفو وهو يقولنا إيلا محتاج للمشفى ناخذوه
عزيزة:- صونيلو أولدي صونيلو فالحال ... ياربي تطمنا ياربي
ليلى حست بالخجل والإرتباك من مجرد مجابو سيرة مصطفى اللي طبعا كتلحقها سيرة علاء لكن قلقها الفعلي على عيسى غطا على شعورها ديك اللحظة .. اتصل ابراهيم بمصطفى اللي واعدو يمر مبعد خروجو مالمشفى وفعلا جا عندهم لكن ماشي بوحدو جا رفقة علاء اللي كان باقي كيستعمل الدبابيات لكن بتحسن أفضل هاد المرة
عزيزة:- علا سلامتك أولدي علاء الله يشافيك
مريم:- علاش شقيت راسك أخويا علاء
علاء(كيسرق نظرات من ليلى مقادرش يبعد عينو عليها وفنفس الوقت حشمان):- ربي يخليكم أنا عمي عيسى كيعنيلي بزاف ومستحيل نسمع أنه عيان ومنجيش
مصطفى:- أصر باش يرافقني وباش نتهنا من النكير ديالو قلت نجيبه ههههه
رياض:- عمي علاء علاش كتحني على هاد العصا ؟
ليلى:- عيييب ولد حشم عمك عل .. أ دكتور علاء عيان شوية علاش كيحتاجها
علاء:- ههه صاحبي رياض غانحيدها عما قريب ومنبقاش محتاجها
ليلى(شافت فيه بحرج وببتسامة):- على سلامتك
علاء(بادلها نفس النظرة):- الله يسلمك
مصطفى(بغا يقطع الكونطاكت ولا غادي كاملين يمشيو فيها هههه):- أ... فين بيت العم عيسى ؟؟
ابراهيم:- زيدو معايا مناااا تفضلوو .. مريم ليلى وجدولنا شي شهيوات بيما سالينا
مريم:- وخا هاحنا غاديين زيدي ياختي زيدي
ليلى:- الولاد بقاو هنا ومديروش صداااع مفهووم .. زيدي أمدام من بعدك ههههه
مريم(كتهمسلها):- شفت الضحك غي مزلع كيباصا فالقضية؟
ليلى(كتعدل شالها بحرج):- تي كوني تحشمي أشمن ضحك
مريم(غمزتلها):- امممم على ماما يا بابا
ليلى:- خالتي عزيزة خالتي عزيزة شدي عليا بنتك
عزيزة:- مريم هداي على ليلى مالك ناض فيك هبالك
مريم:- هههههههه شريتيهالي ياكي ياكي
ليلى(كتهززلها فحاجبها باستفزاز):- تستاهلي ههههه
مصطفى(تابع ابراهيم وتقل فالمشية وهمس لعلاء اللي كان تابعهم بشوية بالدبابيات):- امممم شايف من دابا الدعوة كتسطر ههههه
علاء:- لوكان تسكت ميكونش حسن
مصطفى(غمزلو):- هحححح حياني القلب هشيششش
ابراهيم:- عمي عيسى راه جا الدكتور علاء وصاحبو الدكتور مصطفى يطلو عليك
عيسى(كيحاول يصاوب كلستو بصعوبة):- مرحبا بيهم أولدي
علاء(كلس قدامو):- عمي عيسى كيراك ؟
عيسى:- نحمدو الله أولدي وعلى سلامتك فرحت للي شفتك
علاء:- وانا فرحت عمي عيسى بصح غادي نفرح أكثر لا خليت مصطفى يفوت عليك
عيسى(بحرج):- لالالا مكان تاشي داعي أنا مزيان
ابراهيم:- عمي عيسى متكابرش صحتك كتهمنا وخصنا نتأكدو
مصطفى:- سمحلي الشريف راه غانفوت غي الصناطات على قلبك مكان لا يبرة ولا يحزنون باش تخاف هههههههه
عيسى:- ههه الله يعطيك الخير وخا أولدي وخا غاتشقيو روحكم
مصطفى(كيحل حقيبتو الطبية):- مكان لا شقا ولا والو راك بحال الواليد هات هات ديك اليد نشووفو لاطونسيون اللول
عيسى(كيطلع تريكوه):- هاهيا ...
مبعد مفوت عليه مصطفى رجع معداتو للحقيبة
مصطفى:- عمي عيسى مافيه والو الحمد لله غير شوية إرهاق
عيسى(كينزل كم تريكوه):- وشفتو قتلكم أنا بخير غير خصني نرتاح شي شوية
مصطفى:- فعلا هادا ماخاصك ولكن مفيها باس إيلا جابك ابراهيم عندنا زيارة للمشفى تما معدات كتر ونقدر نفوت عليك مزيان وغير باش نطمنو أكثر ماشي شي حاجة
عيسى(اختفت ابتسامتو):- علاش أولدي ياك غي دبا قلت انا بخير ؟
ابراهيم(بتساؤل):- خير أمصطفى ؟
مصطفى(كيضحك بلاما يبين):- ههه مالكم مالكم راه مقلت شي حاجة كتخلع بالعكس أنا باغي نفوت على عمي عيسى كما يجب باش نطمنو أكثر هادا مكان ...
علاء:- فعلا التفويتة فالمشفى غاتفيدك أكثر منها نتبعو حالتك الطبية ومنها نطمنو أعمي عيسى
عيسى(بقلق وخوف):- لا أولدي ميحتاجش نمشي السبيطار
علاء:- ياك أعمي عيسى باغي تحرجنا ؟
عيسى:- حاشا أولدي بصح انا عارف راسي مليح خليوني على راحتي
مصطفى(لاحظ خوفو ومبغاش يزيد يضغط عليه باش ميتخلعش اكثر):- وا السي ابراهيم مكانش شي كويس ديال أتاي راه جوعنا الحاج عيسى
هعيسى:- الله ياولدي أمنيتي غير نحج بيت الله وموراها لا بغا مول الأمانة يدي أمانتو لكن مصبت جهد
علاء:- لاباس عليك اعمي عيسى الله يخليك لينا بركة تنور حياتنا
عيسى:- الله ياولدي مبقا فالعمر قد مافات نطلبو الستر تانتغطاو تحت القبر
مصطفى(بقلق):- مالنا على هاد الفال ميكون غير الخير إن شاء الله
ابراهيم:- هانا جبتلكم كاس ديال أتاي مشحر ديال خالتي عزيزة
علاء بقا يشوف فالباب وليلى كتستنى ابراهيم باش تعطيه بلاطو اللي فيه الماكلة ومحرجة حس بدقات قلبو باغيين يخرجووو مقادرش يتحمل باغي يطير عندها وميهمو حد لكن الأصول أصول ومدامو صبر فما فيها باس إيلا صبر كذلك شي شوية مي الشوق كيحرق الله الله ^^
شربو تاي ومشاو فحالهم مبعد مودعوهم وعاد دخل عندهم ابراهيم مبعد ماتكلم شوية فالباب معا مصطفى وعلاء وتبدل لون وجهو بالقلق والتوتر
مريم(فالكوزينة وبصوت خافت):- ابراهيم وقول شنو كاين راك خلعتنا؟
عزيزة(تاهيا بشوية):- آه أولدي شنو قال الطبيب ؟
ابراهيم(كيشوف فيهم بجدية):- عمي عيسى خصو يمشي للمشفى باش يفوتو عليه مصطفى ممتأكدش من صحتو وقال الأعراض مكطمنش ولكن المشكل أن عمي عيسى رافض يمشي
مريم(شهقت بفزع ودموعها بقاو ينزلو):- جدي جدي مسكين كان مريض وتاشي حد محس عليه اففف ياربي مسكين تشافيه ياربي
ابراهيم(قرب منها):- مريم مريم متنهاريش قدامو راه مفخبرو والو وحنا مزال ممتأكدينش
عزيزة(كلست بفشل وشدت على صدرها):- ناديا ..ناديا هي اللي تقدر تقنعو باش يمشي للمشفى خص ناديا تجي فوراااا
مريم(كتمسح دموعها):- أنا غانعيطلها
ابراهيم(غمض عينيه بتشتت):- مكان تاشي داعي حنا نقنعووه باش يمشي ناديا فين اللي باغية تجيبيها
مريم:- ابراهيم متمنعنيش ناديا خصها تجي تشوف جدها من حقها تعرف
ابراهيم:- ولكن علاش غادي تخلعوها وحنا باقي معارفين والو
عزيزة:- ولدي ابراهيم ناديا هي اللي كتعرف تفاهم معاه ياما فوتها علينا وهي الوحيدة اللي كانت تجبرو وكيسمعلها الكلام
ليلى:- خويا ابراهيم متعرف إلى شاف حفيدتو غادي يتحسن
ابراهيم(نزل راسو بقلق):- خليونا نجربو معاه ويلا منفعش تما تاصلو
مريم:-وخا أبراهيم غادي نشوفو وع الله يوافق وميعاندش كيف كل مرة ..
فاليوم التالي فدار مريم وابراهيم
مريم(والشر كينقز من عينيها جات تفيق ابراهيم):- ابراهيم ابراهيم فيييق فييييق
ابراهيم:- امممم خليني نعس شوية أمريم مزال الحال
مريم:-ياودي فيق راه نخوي عليك سطل ديال الما فيق شوف المصيبة اللي جاية كتسول عليك
ابراهيم:- شنووو شكون هادي ؟
مريم:- قولي نتا شكون هيا راها فالصالون ومرتاحيتلهاش
ابراهيم:- ونتي كيفاش دخلي شي حد مكنعرفوووهش هبلتي ؟
مريم:- لا غي تهنا مهاد الناحية هادي كتعرفك ومزيان عاد
ابراهيم:- شكوووون؟
مريم(ربعت يديها وبقات تلاوز):- نوض ونتا تعرف
ابراهيم مكانش عارف كاع علامن كتهدر مريم ولا شكون هيا هاد الزائرة لكن مريم وكونها امرأة فأكيد غادي ينوض فيها جنون الدنيا كلها خصوصا بلبس هاديك خيتي الغريب وتدميغة اللي فعينيها كتخوف ..
ابراهيم(صاوب حالتو وخرج للصالون وشاف ديك المرة الغريبة):-السلام عليكم
فاتي(بحالة يرثى عليها):- وعليكم السلام السي ابراهيم وسمحولي جيتكم بلا موعد
مريم(كتمتم تحت فمها):- دبا جيتي
فاتي(فهمتها):- نتا مكتعرفنيش السي ابراهيم لكن أنا كنعرفك عز المعرفة
ابراهيم:- فعلا حاولت نتذكر لكني معمرني شفتك .. شنو سر إصابة عينك ؟
فاتي جايها البكا مين تفكرت كيفاش رفضاتو لبارح ومبغاتش تتستسلملو وهو ضربها بونية لعينها وبكل وحشية امتلكهاااا وهادا خلاها تكفر بكلشي جا منووو وتزعم باش تنتقم منو وتخرجو من حياتها اللي حولها لجحيم وخلاها تبكي الدم من الألم اللي كيعيشها فيه
فاتي:- أنا غادي نحكيلكم كلشي بصح طالبة منكم الأمان لأن حياتي فخطر وهادشي اللي غادي نديرو غادي نغامر بحياتي فيه
ابراهيم(ابتلع ريقو وشاف فمريم اللي كلست باهتمام حداه كتشوف فيها):- عاطيك الأمان غي قولي
فاتي :- أنا نكووون .. (ابتلعت ريقها)... صاحبة جواد من هادي عامين تقريبا
مريم(شهقت):- شنوووو ؟
ابراهيم(بعدم تصديق)):- صبري أمريم خلينا نفهمووو كملي
فاتي:- تعرفنا على بعضياتنا فواحد الليلة جا للبار اللي كنشطح فيه ووقع مشكل معا واحد الزبون وهو تدخل وتما كان التعارف وكان يتردد بين فترة وفترة باش يتفرج فلوحاتي حتى لواحد الليلة وفاجأني مين قالي مقادرش يبعد تفكيرو عليا وعرضت عليه يجي عندي للدار ومن داك اليوم بدات علاقتنا ..
ابراهيم:- طيب هادشي فهمناه اختاصري شنو مبعد
فاتي:- أنا مستعدة ندير اللي بغيتو بصح بصح اهئ اهئ تحميوني منو راه إلى عرفني أنا غادي يقتلني
ابراهيم:- قتلك عليك الأمان غي قولي شنو عندك
فاتي:- جواد هو اللي قتل داك العساس سمعتو بودني و هو كيكلم شي حد معرفتو ويقولو تاشي حد مغادي يفرشنا وهو منهار اللي هرب عندي فالدار حول حياتي لجحيم وبغيت نتخلص منووو فأقرب وقت علاش لجأتلك السي ابراهيم محيت عارفاك كدور عليه وانا بغيت نتفك
ابراهيم(عينيه لمعو بفرح):- دقيقة نكون عندك
دخل كيجري لبس كسوتو نيشان وهز مسدسو وخرج معاها تحت دعوات مريم اللي طارت للتليفون تزف الخبر لليلى وعزيزة وعيسى وهادو فرحتهم ودعاويهم باش يشدوه مقلتش على فرحة ابراهيم وهو كيحك اللوطو ومعاه فاتي اتجاها لدارها لكن منساش يدير اتصال للدوريات باش يسبقوه للعنوان وميخليوش داك جواد يهربلهم هاد المرة .. وصلو وطلب ابراهيم من فاتي تطلع عادي لدارها وتفتحها وغي تردها متقفلهاش باش هو ميشكش ويهرب منهم خصهم يداهموه على غفلة ، دخلت وهي كترجف بالخوف لايعيق بيها جواد تما يفصلها تفصال المهم حطت صاكها وخلات الباب كيف قال ابراهيم غير مردودة وبقات تقلب بعينيها عليه ملقاتوش فالصالون ومشات لبيت النعاس وسمعت صوت الشرشارة نتاع الدوش وفتحت غي شوية باب الدوش وشافتو تما واطمنت وهو خلعها بصوتو
جواد:- فاتييي هادي نتي ؟
فاتي:- واه أنا راني جيت مشيت وجبتلك الفلوس اللي طلبتي
جواد:- وحطيهم تما نسالي الدوش ونجي
فاتي(بمكر وخبث كتهدر من مور الباب معاه):- خذ راحتك راهم هنا يستناوك معندهم فين يمشيو
ابتسمت ابتسامة انتصار وهو سالا دوشو على راحة راحتو ولوا فوطة على جسمو وخرج وهنا كانت الصاعقة لقا ابراهيم مربع يديه وكيستناه أونفاص والدار عامرة بوليس
ابراهيم: عاش من شافك يا رفيق الروح
جواد(مخلووووع):- فاتي يا بنت الكلب والله حت..
ابراهيم(هززلو المينوط):- شتتتت متزيدش عليك شي تهمة تانية أنا محلك نفكر مزيان لأنه عندك مشكل أهم من ذلك وهو امممم كيغادير تدخل للكوميسيرية بهاد المنظر هههههههههه
جواد(عينيه كحالو بالحمورية وبغا يطير عليه لكن البوليس فيساع شدوه من يدو ودارولو المينوط):- ابراهيم خليني نلبس كسوتي متهبلش أكيد مغاديش تدي عميد شرطة للكوميسرية بهاد المنظر
ابراهيم:- ديزولي أنا الأوامر عندي كتقول نجيبك فالحين واللحظة ومتلبس مع أنه كاين تشكيك فكلمة مُتلبس ههههههههه
جواد(بقا يتنتر لدوك الجوج اللي شادينو):- والله حتى نتقم منكم كاملين غادي تشوفووو
ابراهيم:- القانون فوق الجميع يا رجل القانون هههههه
جواد:- والله تاندمكم والله تانخرج عليكم واحد واحد دبا تشوفووو
ابراهيم(سبقه وهو كيضحك باستفزاز):- جيبووووه مورايا
جواد(حمار وجهه وغادي يخرج قلبه بالغوات):- يا الكلب يا الحقير خليني نلبس كسوتي هادشي غير لائق فحق عميد شرطة غادي ندعيكم غادي نقاضيكم كاملين هادشي مسيء ليا ومنقبلش بيه ... ابراهيييييييييييييم ابراهيييييييييم ..
طبعا ابراهيم كان أخذو لجواد بداك المنظر أقل أقل انتقاما ليه والمفاجأة الزوينة أنه اتصل بواحد الصحفي يستناهم عند الكوميسرية باش يصوره كي يخرجوه من الصطافيط وياعيني على المنظر وجواد بقا كيحاول يدور وجهه باش ميصوروهش الصحافة اللي تما لكن تفضح تفضح بداك المنظر ربي جابهالو وهادشي عاد والو ، روحي يا فاتي يرضي عليك كيهنيتينا منو .. خليه يستاهل ^^
تاهيا جابوها معاه باش تعطي إفادتها وواعدها ابراهيم باش يوقف معاها وميكون عليها والو خصوصا أنها شاهد إثبات وهي اللي بلغت عن جواد ، الفرحة كانت عند ليلى كتتزوع فصنادق على الحومة لبست كسوتها فورا وخرجت معا مريم للكوميسرية كانت باغية تشوفو مشدود ومذلول لعل وعسى تبرد نارها وصلو وكان صعب باش يشوفوه لأنهم كانو كيحققو معاه وهو وقع وحس براسو صافي كملولو كاع المحاولات الفاشلة فالهرب من العدالة وبعد ترجي منو عاد تكرم واحد من معارفو وجابلو توني لبسه ،دخلو لمكتب ابراهيم اللي خبرهم باش يرجعو للدار لأنه صعب يشوفوه درك وخا كان فاهم رغبة ليلى وترجيها ليه خلاها تستنى لكن خروج فاتي من إحدى الغرف وقفها باش تتكلم معاها
ليلى(بمرارة شافت فوجه فاتي المدمغ):- نتي مزيانة ؟
فاتي(حست بيها):- غادي نكون بخير مين تهنيت منو وحتى نتي غادي تكوني بخير
ليلى:- أكيد
فاتي(بعد صمت):- طول الوقت كان يبغيك وخا كان معايا
ليلى(ضحكت باستهزاء ودموعها كيسيلو):- همم انتبهي لنفسك
فاتي(تنفست بعمق):- حتى نتي
مشات فاتي ومريم وقفت وربتت على كتاف ليلى اللي مسحت دموعها وقبل متكلس كانو مخرجين جواد وغي شافها بقا يغوت ويتنتر بين يديهم
جواد:- غادي نكون كيف الكابوس فحياتك معمرك غادي ترتاحي سمعتينيييييي يا الحقيررررة
ليلى(بقوة):- ههههه مبقيتش كتخلع السي جواد وبعد فترة بسيطة يتحكم فقضية الخلع وتما غادي نرميك باش تتعفن فالحباسات اللي كيليقو بيك سمعتني مغادي يبقالك حد غاتعيش وحيد طول عمرك وهادا ما تستحقه ..
جواد(بغا يهبل وهوما جارينو يديوه):- والله منخليك تعيشي يوم فراحتك غادي نسودلك معيشتك وهادا وعد يا الحقيرة القذرة الخاينة طلقوووووني طلقوووووني بعدوووو مني ....
مريم(شافت ليلى كتنهت بسرعة وعلى وشك تنهار):- ليلى ليلى نتي مزيانة ؟
ليلى(ضحكت برغم بكائها):- عااد دبا وليت بخير يا الله .. مريم مريم خلينا نمشيو فورا عند المحامي بغيتو يجي يتابع هنا وفأقصى سرعة نتطلق منوو
مريم(كتبكي لفرحها):- إن شاء الله ياربي إن شاء الله
امممممم السي علاء بمجرد مسمع الخبر الدنيا مساعتووش بالفرح ودبا مبقا إلا يتحكم بالخلع لصالح ليلى وغادي يتقدملها رسمي وأخيرا قرب الوقت اللي كيستناه من هادي شحال قرب يحقق حلمه المنتظر من سنوات ..
مزال كانت كتتفكر داك اليوم اللي جاو دار الفيلالي وجبرتها مها تلبس وتتزين بدون نفس ولا خاطر وقابلتهم بتعالي ووجه مقلوب والمصيبة أنها عجبتهم وهبلو عليها تا العريس طب فيها مالوهلة الأولى ومبقا إلا يتممو الهدرة ويتافقو على الصداق وداكشي وموراها يقراو الفاتحة ، البوشتاوي كان طاير بالفرحة واللرض مسايعاهش نسب ديال دار الفيلالي غادي يزيدلو همة ورنة كتر ماللي كيسعاها وهما عندهم وزنهم فالحومات كاملين وكلشي كيتخاطف يناسبهم والحظ طرق بابهم هاد المرة شكون كان يتوقع ، أما ربيعة كانت حاسة بوجع بنتها وحرقتها لكن كانت كتمسح دموعها وتتمنى ربي يسخر باش تنقذها مالهاوية السودة اللي وقعت روحها فيها ، لذلك كان من الصعب شي حد يفهم وجعها وألمها وتنهيداتها الحارقة اللي مكتطلع غير بسيف اما عيونها المبوقلين بالبكا كانت كتتحاشى بيهم تشوف فباها اللي ضربا بصقلة مين عارضت الزواج ورفضاتو وبززو عليها وقالها بسيف عليك تتزوجي ولد الفيلالي ولا غادي يكونلي حساب معاك ، ترجي ربيعة ومزاوكتها خلاو زكية تسكت ديك الفترة كلها لكنها مقدرتش تتحمل هادشي هي مستحيل تكون معا شي حد غير فارس احلامها اللي كتحلم بيه ليل ونهار ولا ساكننلها فالدم وبلا بيه متقدرش تعيش ... مسحت دمعتها وبقات تتلصص تاسمعت جعفر خرج واستغلت عدم وجود ربيعة والبوشتاوي فقط عيشة وهادي غاطسة فالكوزينة متنتبهش .. تسحبت بشوية بفستانها البني الغامق اللي فيه خطوط طولية فالبني بارد وكان طويل وفيه فتحات على جانبي الركب ودايرة شدة مزوقة فاللون البني على راسها كذلك وباينة فعينها ووجهها أنها مداقتش النوم من فترة ..لذلك اعتبرت أن هاد الخطوة ضرورية إلى بغات تنقذ حياتهاا وتلغي هاد الزواج اللي تكتب عليها رغما عنهااا ، طلعت الدروج درجة درجة وخلخالها فرجلها كتحاول ما أمكن متخليهش يدير صوت وهو استلغالو ووقف بانتباه كيشوف مجيهت الباب تنهد بصعوبة وغمض عينيه بعصبية ومشا بخطى متسارعة حل الباب بجهد وهي نتفضت وحطت يدها على صدرها بالخلعة وهو مكلمهاش وجا يقفل الباب فوجهها لكنها مدت يديها بقوة وحبست الباب وشافت فيه بتحدي يقفلها
زكية(تنفست بتعب وقلبها كيدق مليون دقة):- بغيت نكلمك فموضوع مهم
ياسر(جاي يبلعو مجددا):-مكان مواضيع بيناتنا أبنت الناس فرجاء نزلي لتحت بلاما تجيبي مشكلة ليك وليااا الله يخليك
زكية(متألمة من كلامو):- عفااااك مغاديش نعطلك غير جوج كلمات ونزل فحالي
ياسر(زفر بتأفف):- طيب اختصري شنو باغية تقولي ؟
زكية(شافت فديك الوقفة وبتعجب):- هنااا ؟؟
ياسر(باستغراب اكثر):- وفين بغيتي ؟
زكية ابتلعت ريقها ودفعت جسدها داخلة للشقة بلاما تسناه يجاوب وهو بقا غي يشوف فيها بتعجب وكيهزز فراسو جا يقفل الباب لكن تفكر أنه لا يليق وحلها على مصراعيها وتقدم لوسط الصالون على بعد 10 خطوات منها تقريبا
ياسر(رابط يديه):- تفضلي كنسمعك
زكية(قربت غي شوية وبتلعثم):- معارفة مين نبديلك بصح أكيد سمعت بخبر خطوبتي الفترة اللي فاتت
ياسر:- وي سمعت والله يسخرلك ويباركلك فزواجك
زكية(بوجع مخنوق):- أنا مباغياش نتزوج هاد الشخص وبَّا ومَّا مبززينو عليا بسيف نديه وانا إيلا تزوجت بيه غادي نمووووت
ياسر(بتعجب):- طيب كنتي ترفضي ؟
زكية(ضحكت بمرارة وعينيها كيدمعو):- عييت منغوت ونقولهم مباغياهش فالتالي كليت العصا ومكان عليا إلا نرضخ للأمر الواقع وحاولت والله حاولت نتعايش معا الموضوع بصح تخنقت مقدرتش مقدرتش نتخيل راسي معا شخص آخر مغير..
ياسر(حل عينيه بصدمة):- آنسة زكية كنضن باللي المكتوب ممنو مهرب ويلا عائلتك سيفوه عليك إذن راهم عارفينو هو الشخص المناسب ليك
زكية(قربت منو أكثر كتبكي):- نتا مفاااااهمش مفاااهمنيش أنا أنا ... كنبغيك نتا ومنقدرش نعيش حياتي معا شي حد تاني من غيرك أيااااسر والله ايلا كنبغيك
ياسر(مفزوع وبعد منها شوية):- ووووه وواو حدك تماااا أآنسة شنو هادشي اللي كتقوليه نتي أكيد حمقة وجاية ترمي بلاك علياااا
زكية(قربت بإصرار):- لكني تعلقت بيك وحبيتك كتر مأي حاجة فالدنيا ولذلك خصك توقف معايا وتعاوني
ياسر(ريشلها بيدو):- سمعيني مزيان الدروج اللي طلعتي منو غاتنزلي منو ومنحبش نشوفك هنا ع الأقل حتى لموعد رحيلنا اللي الحمد لله قرب بزااااف فرجاء كنتمنالك كل السعادة مقلبي تفضلي ..
زكية(بألم):- علاش واش أنا ماشي قد مقامك عارفة باللي أنا بنت حومة بسيطة لكني قارية وفاهمة صحيح ماشي تالشي درجة تخليني ناخد شهادة بصح نقدر نفهم شنو كيدور من حولي
ياسر(بغضب):- نتي مفاهمة والو رجاء تنزلي دباااا
زكية:- آه ولا أنا ماشي زوينة كيف مراتك اللي عايشة معا راجل غيرك فالحرام
ياسر(حل فمو بلاما يحس وهز يدو باغي يضربها بصقلة وهي غمضت عينيها بجهد وبخوف وبكا):- عندك دقيقة منشوفش وجهك هنا مرة أخرى ولا غادي نشكيك لبَّاك
زكية(انتفضت قدامو):- لا مغاديش ننزل قبل مندي منك وعد غادي تعاوني ولا غادي ندير شي حاجة فراسي وذنبي غايكون فرقبتك
ياسر(دون تصديق شدها من ذراعها بقوة):- لا نتي وقيلة جاية ترمي بلاك عليا معمدة سمعيني مزيان غادي تنزلي ولا ميعجبك حال
زكية:-إذن غانقول لبَّا أنك حاولت تتحرش بياااا وتما شوف شنو غايوقعلك
ياسر(جرها لعندو بجوج يديه بعنف وعينيه كيطلقو الشرار):- سمعيني آ بنت الناس أنا مباغيش نمد يدي عليك ف باللتي هي أحسن بعدي من وجهي أرحملك من غضبي
زكية(بحالة هستيرية وانفعال):-أنا كنبغيك كتر منها هي لوكان كانت تبغيك متقبل تعيش فدار راجل غريب ونتا شايف شنو كيقولو فالجرائد والمجلات عليهم وزايدون أنا سمعت كاع كلامك عليها هي خانتك معاه ولا دارتلك اعتب ... طراااااق
ياسر(ضربها بصقلة وبقا يتنهد بتسارع):- أوياك وتغلطي فيهااااا منسمحلكش وآه هيا مراتي وانا كنبغيها قنعي راسك بيها ولا شوفي كيديري المهم بعدي مني هاد الساعة مقادرش نزيد نتحملك
زكية(كتبكي بالقهر ومصدومة اللي ضربها وطارت شداتو من تريكوه):- عفااااك عاوني عفاااك أنا مستعدة نكون خدامة تحت رجليك طول حياتي غير خذني ومتخليش بَّا يزوجني أا أنا قابلة نتزوج بيك وخا مزوج وووو ..
ياسر(نزل يديها بعنف وجرها تالباب):- مباغيش نشوووفك الله يهنيك
زكية(بنظرة شريرة تنفست وصدرها كيعلو ويهبط بانفعال وغضب):- غادي تندم
ياسر:- ههه وصافي بقا غير البز دباااا يهدد فيا نزلي نزلي .... (طااااق قفل الباب لاتخها)
ومصيبة هادي بقيتيلي غي نتي م الوالي نهز همك اففف على لصقة يالطيف
نزلت وهي كتتوعد ياسر بالشر ومشات لبيتها كلست حدا مرايتها وبقات تشوف فراسها بدون نفس
زكية:- هي زينة بصح أنا أجمل منها وأحلى وغادي تتزوجني يا ياسر ونتا كتترجاني غاتشوف ..
ابتسمت بمكر لمرايتها ديك الابتسامة مباينلي موراها شي خير أحضي راسك أعمي ياسر لايهزك الما ويصفق عليك الحوووت ^^
الآنسة زكية طبعا طاحت عليها فكرة جهنمية وقررت تنفدها فداك اليوم بعدااا واللي ليها ليها مشات ياسيدي سيلت الكحل من عينيها اللي اصلا كان نزل من البكااا مي بالغت وحطت ملمع شفاه ومسحاتو بطريقة لامست شوية خدها و قطعت كم لباسها وشوية من فتحة الصدر وهزت عمود ديال الحديد وضربت بيه يدها وفخدها اللي قطعت الفستان من جهتو وبقا يبان ،كانت باغية تدير كدمات على جسمها وفعلا نجحت دغيا بانو وهزت مساك ديال الشعر وفوتاتو تحت شفتيها وجرحتها غي شوية ومسحت داك الدم اللي خرج من تما وشعبشت شعرهااا وقرصت حنوكها بزاااف وغي سمعت صوت مها وبَّاها جاو نزلت من الدروج اللي كانت كالسة فيه كتستنا بلاما يعيق بيها حد ودارت روحها كتبكي وغي شافتهم تخلعت وبقات تحاول تستر راسها بخجل وكأنها دارت شي ذنب أما مها وبَّاها شهقو ومقدروش يتصورو المنظر اللي العمى يفهمه ....
ناضت القيامة ومتقولو مناضتش طلع البوشتاوي هاز عصاه وموراه رجالو وبقا يدقدق فباب الشقة لفوق وهو كيغوت وموراه ربيعة تسكتو وتقولو متفضحناااش متفضحناش خلينا نسترو القضية بيناتنا لكن شكون يسمعها دفعها غادي يطيحها لولا واحد مرجالو سندها وفتحلو جعفر مخلوووع ، دفعه البوشتاوي ودخل وموراه كلشي
البوشتاوي:- فيرااااه فيراه عديم الأخلاق أنا أنا يندار معايا هاكدة دخلتكم داري وسترتكم أجعفر وفالتالي تغدرووو بياااا فيراااه داك الشماتة اللي مسلي عرضي وشرفي والله هاد النهار نتحي عليه وربي كبير
جعفر(ماقادرش يفهم):- البوشتاوي الله يهديك متفهمني بالعقل شنو كاين ؟؟؟
البوشتاوي:- ربيعة ربيييييييييييعة جيبيهالو جيبيهالو يشوفهااا بنت الحرام حسابها معايا هو التالي بيما قتلت هاد عديم الشرف والنخوة
ربيعة(جرتها موراها وهي كتبكي ودفعتها للصالون وهي كتحاول تجمع كسوتها وحشمانة):- هاهيا
البوشتاوي:- واش شفتها ولا مشفتهاش فهمت ولا نفهمك شنو دار داك اللي جبتولي وكلتو من أكلي وشرابي وفالتالي عضلي يديا
جعفر:- راه واقع سوء تفاهم ياسر مستحيل يك....
ياسر(خرج مالبيت مفاهم والو):- شنو كاين ؟؟
البوشتاوي(طار عليه شدو بقجة وجعفر كيحاول يفك):- أجي لهنا كتقتل القتيل وتمشي فجنازتو أجي لهنا وكتسولنا عاد شنو كاين ضيعتلي مستقبل بنتي يا الحمار يا الشماتة
ياسر(شاف فيها مخلووووع وكيحاول ينتر يد البوشتاوي):- أسيدي بعد مني نتا وبنتك أنا مفاهمش أصلا علامن كتهدر
البوشتاوي:- وتنكر تنكر أنك ضحكت عليها وتعديت عليهااااا شهد على روحك شهد اليوم ميصبحش عليك الحال يالناقص
جعفر(كيحاول يهدي الموقف):- غير بالعقل البوشتاوي غير بالعقل ويلا الولد غلط نصلحوه وبلاما نفضحو راسناااااا
البوشتاوي(فكر فكلام جعفر وطلق ياسر):- أويلي كينقول لدار الفيلالي فضحتيني وجبتيلي العاااار
مشالها عطاها جوج صقلات ومها شدتها من الشعر مفكوعة بالبكا وتندب وتحندب أما هي كانت تبكي مي كتشوف فياسر بتحدي واستفزاز
ياسر:- هادشي ملعوووب أنا مقربتش منها ولا جيت مجيتها بنتك اللي كتطلع عندي وكانت ترمي روحها عليا ولكن أنا مقربتش منها باش تجيو دبا تتهموني فيها
البوشتاوي (واقف جعفر حاجز بينو وبين ياسر وباغي يطير عليه مجددا):- والله إيلا ما قطعتكش ياهاد الشماتة على طولة اللسان اللي فيك والكدوووب بااغي تفلت منها، لكن وشرفي وعرضي اللي مسيتو يا تكتب عليها هاد الليلة يا تشهد على روحك
ياسر(غادي يجيه انهيار مهاد الشي):- واش غادي تطيحو عليا الباطل أسيدي شوف بنتك وانا راني قتلك مقربتها مامستيها
جعفر(كيدفعو باش يسكت):- سكت سكت متزيدش النار أياسر ويلا غلطت ودرتها معليش نصلحو غلطنا وزيتنا فدقيقنا
ياسر:- واش باغيين تبليوني بيها جعفررر متهبلنيش نتا عاود كاع هادو ومتخلفين وعروبية بصح متجيش نتا وتمشي فهواهم
البوشتاوي(باغي يقجه تاني وكيتنيقز بعبايتو):- أبلعه ولزم حدودك باش تطلب السماح زايد كتعاير فعلا نتا ناقص وخصك التربية ماللول وجديد لانتا لا هاد قليلة الحيا اللي غادي ندبحها ونشرب من دمها
ربيعة(عنقتها وخا غبنتها):- إلابنتي يا البوشتاوي إلا بنتي هو يصلح غلاطو ويتزوجهاااا ويادار مدخلك شر هو يتزوجها وربي كبير
البوشتاوي:- جعفر قسما بالله وميكتب عليها هاد الليلة حتى نحرقه هو وياها بليصونص
ياسر(كيتنهد بصعوبة مقادرش يتيق شاف فرجاء فجعفر اللي الواضح كان فصفهم):- جعفر الله يهديك واش غادي تيق هادشي ... ونتي نطقي قوليلهم الحقيقة علاش كتبلاي عليااا والله مكتحشمي
زكية(حاطة راسها وبدموع):- اهئ ياسر دبا اللي عطا الله عطاه وهما عرفو اهئ خصك تستر عليااااا
ياسر(كيريش برفض وغلب عليه الضحك):- عهههه واش كتضحكو معااااايا .جعفرررررررر
جعفر(قرب منو):- ياسر ياسر تهدن اياسر وكلشي ليه حل والبوشتاوي ماطلب غير الأصووول نتا لازم تسترتها (بقا يعض شنايفو ويغمزلو باش يسكت).. أ البوشتاوي عيط للعدول غادي نزلو عندكم لتحت بيماااا عدلتو البنت وسكدتوها
البوشتاوي(ضرب بالعصا فاللرض بعصبية):- منزل تانسمعها منوووو
ياسر(هزز راسو رفضا):- شنو يسمع شنو يسمع واش باغيييين تهبلوووني ولا جعفرررر شنو هادشي
جعفر(كيغمزلو):- اممم امممم ويالالاه اياسر حنا راحنا مأصلين وغادي نصححو غلطنا يالاه بوس يد عمك البوشتاوي وطلب السماح
ياسر:- مستحييل واش باغييين..
جعفر(طار عليه بلعلو فموو وبقا يضحك ويهدر للبوشتاوي):- راك عارف طيش الشباب ولاموووغ يا البوشتاوي بصح أنا نكفلولك هاد الليلة نكتبو كتابنا على بنتكم ليه فين لينا نلقاو بحاااالها
البوشتاوي(مزنطر عاد):- غادي نشووف السي جعفر لكن والله وتخرجو الهدرة غير ايلا وريتكم وجهي التاني وتما عليا وعلى اعدائي ورجالي غادي يبقاو فم الباب يستناو إشارة مني ويلا فكرتو تلعبو سبسبوت معايا تجيبوها فراسكم... يالاه نزلوو (شد زكية مشعرها)نزلي نزلي يا بنت الحرام
نزلها مجرجرها مشعرها ولتخها وسط الحوش ديالهم وطاح فيها بالضرب والعصا وربيعة وعيشة كيحاولو يسلكوها وهي كاع مهمها لا ضرب ولا سبان ولا والو بقدر فرحها اللي كينقز فداخلها غادي تتزوج بيه شكون كان مصدق والله ونجحت خطتها هههه خرجتي مالجنب يا زكية معرفتكش ^^
أما هو كلس فشلان صافي على الكنبة
ياسر:- جعفر جعفر واش نتا تيق انني ندير هاد الشي اللي مكايدخلش للعقل ؟
جعفر(كلس حداه):- ياودي كلعت شنافتي وانا نعضلك ونغمزلك باش تسايرهم وتسكت
ياسر:- علامن نسكت هادشي راه باطل وطيحاتو عليا ديك اللعينة
جعفر:- هوما ناس تفكيرهم سطحي مستحيل مغادي يتيقو بنتهم أنا عارفك ممسيتهاش لكن هوما صافي وصمة العار ودخلت لدارهم ودبا عندك خيارين اللول فيهم أنك تتزوجها وتسترها هاد النهار ومبعد فترة مؤقتة تطلقها تما تاشي حد ميكون عندو معاك شي حاجة وتخليها فدارهم وتقول للبوشتاوي تفضي مشاكلك وتجي تاخدها راه مغايعارضش المهم يتم الزواج والخيار الثاني نهربو هاد الليلة ونخليوهم يقتلوها ويديرو فيها شرع يديهم ..
ياسر:- ههه يعني دبا مصيرها مرهون بيا هاكدة باغي تقولي ياك ؟
جعفر:-للأسف هادا اللي كاين ونتا مجبر باش تنقذها
ياسر(وقف بعصبية):- لا ماشي مجبر شكون قالهالك أنا مضربتهاش على يدها باش دير هاد المسرحية إذن تتحمل النتيجة اللي غاتجي فراسها هيا بعيد عليا وكاع بلا هادشي دبا نجيبو ديك نهيلة طبيبتهم وتفوت عليها ونفضحها قدامهم
جعفر:- ولووو دبا وخا تايحلفولهم كاع الطبة نتاع المغرب أنها عاد بنت وملمسها حد راه مغاديش يرجعو يتيقو فيها وهاد العار لابسها وخا بريئة
ياسر(بانفعال):- يعني شنو لبستني لبستني هاد المصيبة هادي ؟؟؟
جعفر(وقف):- ياسر حنا ولاد ناس صحيح يدينا ملوثين لكن تبقى فينا ذرة إنسانية ودبا حكم ضميرك\
ياسر:- واش نسيت أنا أصلا مزوج بحبيبتي ؟
جعفر:- ومضطر تتزوج هادي حتى هيا وإلا غادي يكون ذنبها فرقبتك ليوم الدين
ياسر:- وناديا إيلا عرفت شنو غادي دير ؟
جعفر(كيحاول يقنعه):- شكون غادي يقولها حتى جميلة مغاديش يكون فعلمها
ياسر(ريشلو وجاي داخل لبيتو):- سمع سمع هادشي ميخرجنيش السي جعفر و ميهمنيش هي سطاش تعوم بحرها هي اللي دارت هادشي وتفكه
جعفر(تكا على الباب بقا كيشوف فيه وهو كيجمع حوايجو):- ياسر البنت سمع غواتها راهم كيضربو فيها ماللي نزلت واش مشفاتكش خلي فقلبك درة رحمة
ياسر(كاع مهتمش وبقا كيجمع):- صراحة متسال عليا إلا ندعي معااها فمصابها أما باش تحصلني فبزاف عليها
جعفر:- هادا مكتوب و قدر خصك تمشي عليه
ياسر:- الله يخليك متشد فلسفتك عندك أبَّا أفلاطون مانيش ناقصك
جعفر:- صافي قررت ؟
ياسر(هز كارطابو وخرج):- نشوفك مبعد
جعفر بقا مسمر بلاصتو كيشوف فالباب اللي لتخها ياسر موراه وخرج وبقا كيفكر وجامع يديه كيغاديرو فهاد المصيبة فاتت شي 4 دقايق ودخل من الباب رما كارطابو على الكنبة واتجه مريش صبعه لجعفر بتهديد واضح وشر كيطاير موجهه
ياسر:- فترة مؤقتة ؟؟
جعفر(بابتسامة):- مؤقتة
ياسر:- ونطلقها؟
جعفر:- وطلقها
ياسر:- وتاشي حد ميعرف ؟
جعفر(دار حركة قفل الفم):- بيني بينك مع أنه تعرف شنووو كان بودي تعرف ناديااا ع الاقل باش تحس ناديا بالنار اللي كتحسها نتا وهي معا وليد
ياسر(فكر للحظة بأنانية وحس باللي فعلا هاد الخطوة غادي تبرد نارو إلى شعلها فقلب ناديا لكن يستحيل يكسرهااا مغاديش يسمح لشيطان يلعبلو هو غايدير الواجب ديالو ويهني السوق):- اففففففففف ياربيييييي تعاوني وتسهل باش نديرو هاد الخير ونتفكو منو على خيرررر وهي والله والله غير إيلا خرجت منها هادشي كامل بنت الذين بغات تخرج عليا
جعفر(كيضحك):- مي اعترف دارتها بيك ههههه
ياسر(بعصبية):- واش فبالك مغاديش نعترف لا نعترف ونص دارتها بيها ولعبت عليا العشرة كاع
جعفر:- هههه شكون بحالك يا الجن غادي تزوج جوج مرات وانا خوك هادي 30 عام تقريبا كنحاول نتزوج غي بوحدة مقديتش ههههههههه
ياسر:- والله مافيا خاطر لضحكك الباسل دبا خليني نفكر فمصيبتي اللي غادي نوحل راسي فيها لكن حاس براسي كنخون ناديا وخا أنا غير فيكتيم فهاد اللعبة هادي
جعفر:- ماتخونها ما والو نتا غادي دير واجب إنساني وياخويا نتا خليتها تطب فيك إذن تحمل ادونجوان
ياسر(صاط باستسلام):- افففففففففففففففففففففففف
جعفر:- نتا غادي تنقذها فما عليك إلا تدير الخير وترميه للبحر
ياسر:- تخاف هو يرميني للبحر غي سكت سكت
جعفر:-هههههه هاوا ساكت أمولاي السلطان
ياسر(بنرفزة):- جعفرررررررررررر
جعفر:- هههههههههههههه والله الموقف كلو مضحك لوكان ملحقتكش كان غادي يقتلك باها
ياسر:- غي سكت وكلو بسببك نتا اللي جبتني لهاد المكان
جعفر:- ولاواه متردهاش فيا نتا ماللي جيت طيحت بنتو فشباكك
ياسر:- وانا كاع قربت منها الله يبعد علينا شي باطل
جعفر:- وا وليدي شنو نقولك راه طاح عليك ونتا مضطر تهز الحمل ويالاه يالاه دخل ضربها بتدويشة راه الليل عندك تزويجة عهههكخخخخ
ياسر(كاره راسو):- لوكان متسكتش غادي نقتلك بيدي نتا وياهم ونهرب
جعفر:- ههههههههه
جعفر كان كيضحك من قلبه أما ياسر بخخ وقع فهاد المشكلة وعند بالو غادي تفضى مبعد فترة بسيطة كيما واعده جعفر خصوصا أن موعد عمليتهم قرب إذن خصو يكون فضا كاع أمورو و للأسف كان مجبر كيما قالو جعفر باش يقوم بديك المهمة وإلا غايقتلها بَّاها المسعووور ، مبعد عدة ساعات كانت كالسة أونفاص لمرايتها وعيشة كتصاوبلها شعرها ومها كالسة كتبكي ونهيلة كتحاول ديرلها شوية ماكياج لوجهها وهي عينيها كانو يفرفرو بالفرح وكيلمعو وخا حاولت تخبي قدامهم لكن قلبها كان طاير وفداخلها كلشي كيترعد ويخفق بقوة وصلت لمرادها وغادي تكون هي وفارس أحلامهااا يااااه ، بقات ربيعة تتحسر وتاكل فجنابها اللي صيفطو اعتذار لدار الفيلالي ولفلفو القصة أن الولد كان باغيها وغادي تمشي معاه للخاريج وخا غادي يجيهم صداع فالحومة أنهم خرجو على هدرتهم وبزاف الحوايج لكن اللهم دوك صداعات ولا العاااار اللي كان غادي يتوصم بيه البوشتاوي اللي كان كالس فالصالون لابس جلابتو وداير يديه على عصاه ومتكي عليها غارق فتفكيرو حتى جاتو ربيعة مبعد ملبست تاهيا قفطان بيتي وكلست حداه كتمسح دموعها
ربيعة:- مكنتش باغية نزوج بنتي بهاد الشكل
البوشتاوي(هدر بلاما يهزز راسه):- ولا أنا .. كنت باغي نديرلها عرس مطرطح تهدر عليه المدينة كلها
ربيعة:- قدر الله وماشاء فعل الحمد لله قبل يسترها
البوشتاوي(ناض بعينيه حومر):- بسيف عليه يسترها ولا غادي يخرج مهاد العتبة محمل
ربيعة:- دخل عند بنتك شوية راه ...
البوشتاوي:- بنتك ماليوم معزتها ماتت فقلبي غير تكتب كتابها على الراجل ويديها معاه مباغيش نشوفها ليوم الدين
ربيعة(شهقت بهلع وخوف):- حرام عليك هادي بنتك الوحيدة سامحها نبوسلك يديك
البوشتاوي:- ربيعة هدرت هدرة منعاودش جوج خلي هاد الليلة تفوت على خير ويحلها مولانا
ربيعة:- فوقاش يجي العدول؟
البوشتاوي:- منبعد صلاة العشا وباغي كيكملو تخلي عيشة تزغرت مناقسناش فضايح بركة غي الناس شاكين فالموضوع
ربيعة:- البوشتاوي الله يخليك متدخل عندها غي شوية
البوشتاوي(شاف فيها بتأثر وحنان لبنتو لكنها جرحاتو ودبحت كرامتو فالأرض):- نوضي عليا منا
ناضت وهي مطأطأة راسها ومخلياه مزنزن بالقهر والوجع وحرقة القلب بنتو جرحاتوو جرح عمرو مايبراا بنتو اللي كان كيحلم يديرلها عرس همة وشان ويزوجها أحسن تزويجة يحسدوها عليها بنات جيلها ويديرلها اللي مايندار ويفرح بيها وهو هاز راسو أما دبا حطتلو راسو فاللرض ووسخت علاقتها بيه ومستحيل يقدر يسامحها على الشي اللي دارتووو ولا يسمح لياسر ولا جعفر تاهوا .. كان الغضب باين عليه بصح كان بسيف عليه يفوت ديك الليلة بسلام .. جاو العدول وصيفط البوشتاوي شي حد يعيط لجعفر وياسر اللي نزل مجرور مسكين كيحس بوجع عميق فقلبو وكأنه كيخون حبيبتو وهو فعلا كيخونها بصح مجبر بسيف عليه يتزوج بنت البوشتاوي ولا غادي توقع مجزرة ، نزل راسو وكلس فبلاصتو والدنيا مضيقة عليه وحاس بالخنقة أما البوشتاوي كان غير كيخنزر فيهم وطلب مالعدول يستعجل وهادا اللي بدا فالمراسم وطلب استدعاء البنت وجابتها مها وعيشة ونهيلة كانت رقيقة بفستان وردي اللون بارد وتسريحة شعر على الجنب ومايكاب خفيف ياسر غي شاف فيها حس بالضيق وبقا يتنفس بغضب أما هيا فكانت كتشوف فيه وعينيها طايرين معاه ودفعتها مها باش تكلس حدا باها اللي كحز عليها ومبغاهاش تقرب منو هي ستشعرت ديك الحركة لكن مهتمتش كان معمي على قلبها وعيونها اصلا سولهاا العدول وجاوبت بموافقة وسنياو وطلقت لالة عيشة تزغريتة زلزلت الحومة وتبعتها نهيلة وربيعة اللي مكملت تزغريتها تانطلقت بالبكا والنواح وكان غادي يضربها البوشتاوي لولا تدخل جعفر ، مشاو العدول ونهيلة وبقاو غير هما فالصالون
البوشتاوي (بعد صمت):- جعفر كنضن للآن ودرت معاكم الواجب لكنكم طعنتوني فظهري وجاب الله صححتو غلطكم ودبا كنطلب منكم تخويو الدار الفوق ودبرو على راسكم والبنت هايا ملككم من اللحظة ديرو فيها اللي عجبكم أنا بنتي ماتت بالنسبة لي
زكية(شهقت مخلوعة وطارت عندو تبوسلو يديه):- بَّا بَّا لا مديرهاش أبَّا نتا عارفني شحال كنبغيك وو
البوشتاوي(دفعها بيده جات طايحة الأرض):- بعديني لهيه لانتي بنتي ولانا نعرفك ماليوم منحبش نشوفك ونتا دي مرتك وخرج من داري
زكية(حست بالندم والوجع وطارت عند مها تبوسلها يديها):- مَّا مَّا قولي شي حاجة عفاااك بَّا راه غي يضحك ياكي أمَّا ...
ربيعة(انفجرت بالبكا):- الله يابنتي الله وشنو درتي اهئئ اهئ
ياسر(مقدرش يتحمل هادشي):- جعفر نطق !!!
جعفر(همسلو):- شنو ننطق البوشتاوي ضيعلنا كاع الفكرة ضروري مخصنا نديوها معانا
ياسر(بقا يتناقز):- مستحيل فين نديوها جعفر نتا حصلتني دبا و حلهااااا ؟
جعفر:- مراكش شايف الوضع متوتر طلب زهرك نخرجو منا سالمين وعاد أحياء
ياسر(كيشوف فيها بعدم تصديق):- يعني شنوووو حصلت فيهااا ؟؟؟؟؟؟
جعفر(شاف فنفس الشوفة نتاع ياسر):- واهادا الواااضح
البوشتاوي:- كاين شي مشكل ؟؟؟
جعفر :- لا والو والو ألبوشتاوي غادي نخويو الدار نطلعو نجمعو حوايجنا ونتوكلو ع الله
البوشتاوي(بدون ميشوف فيها):- ونتي سيري جمعي اللي تيسرلك من حوايجك وخوذي كاع دهبك معاك و الحوايج اللي كانت مخبياهملك مك و ربيعة عطيها شي بركة باش غدا مغدا متقوليش بَّا رماني
زكية(ركعت تحت رجليه):- مبغيت والو مبغيت والو أبَّا غير تسمحلي ياك أنا بنتك حبيبتك؟
البوشتاوي(قلبو واجعو وغادي يضعف):- بنتي حبيبتي اللي ربيتها وسهرت عليها الليالي متطعنيش فظهري وتحط راسي تحت التراب متحرمنيش نفرح بيها وانا رافع راسي نوضي نوضي روحي معا راجلك مبقيتش قادر نشوف فيك ..
ربيعة(مبعد مشافت البوشتاوي دخل لواحد البيت وقفلها عليه):- درك يهدا وينسى كاع هادشي نوضي معايا أبنتي نوضي اهئ اهئ
ياسر(بعصبية طالع):- تبعني أجعفر تبعني
ربيعة كانت كتحطلها فواحد الصندوق جهازها ونقدتها اللي كانت كتجمعهالها كأي أم وحطتلها صامصونيط عامرة دهوبات أما عيشة كانت تبكي وتحط ففاليزة ثانية كسوتها وحوايجها الشخصية أما هي فكانت كالسة فكرسي ومتبعاهم وحاسة بالإنكسار اللي حطتهم فهاد الموقف مفكرتش فهاد النتيجة وأن الأمر غادي ياخد هاد المنحى صحابلها غادي يفرحو معاها سعا كسرتهم وجابتلهم العار بغات تنطق وتقول لمها الحقيقة لكن تحبست الهدرة فجوفها دبا فات الفوت واللي تكسر مستحيل يتصلح ، تنهدت بعمق وهي كتبع حركاتهم ، في حين هو كان لفوق يتشارع معا جعفر
ياسر:- دبا حلهالي أجعفر على أساس نخليوها فدارهم
جعفر:- بَّاها غضبان عليها ويلا خليناها غادي غير نأزمو الوضع خصنا نديوها معانا حاليا ومبعد يحلها الله اياسر دبا معلينا إلا نسايروهم تانشوفو فين غايوصل هادشي
ياسر:- سمعني أجعفر الوضع بدا يخوف وانا مغاديش نتحمل مسؤوليتو
جعفر:- اففف خليني نتاصل بجوليو نشوف فين وصل موضوع الدار ويلا كانت واجدة يعني نحلت
ياسر:- غانشوفو أجعفر
الدعوة مبقاتش تعجب ياسر حس راسو حصل فهاد المشكلة وصعب يخلص راسو منها من حسن حظهم جوليو كان مجهز الدار وعطاهم العنوان باش يمشيولها وداكشي اللي كان خرج ياسر ركب بلا هدرة ولا كلام وجعفر بوحدو اللي كان هز جوج فاليزاتها حطهم فالخلف نتاع اللوطو وهي لوات شال بعشوائية على راسها ووقفت فعتبتهم مبعد معنقت عيشة ومها وبقات تشوف فدارهم ودموعها كينزلووو شافت بألم فسرجم البيت اللي كان فيها بَّاها ولمحت الحجاب تهزز نزلت راسها الأرض وركبت الخلف وجعفر ودعهم وصاك بيهم لمكان مكايعرفو حد ... ياسر بقا ساكت منطقش ولا حرف وهي بحال المش كلالها لسانها قفوزيتها كلها مشات حست بالألم ماشي هاكدة كانت راسمة ولا متخيلة كلشي تقلب ضدها لكن وجودها معا ياسر غادي يمسح داك الألم اللي حست بيه وهادا اللي كان راسم الأمل فعينيها وفقلبها ..
بعد قيادة طويلة وصلو لواحد الدار على البحر نزل ياسر هو اللول لاتخ الباب بعصبية و لقا واحد الراجل كيستناهم وفيدو المفتاح شدو عليه وشكره هاداك مشا وياسر فتح الباب بعنف ودخل أما جعفر نزل وهز دوك جوج فاليزات ودخلهم للدار ولمح أنها متزحزحتش ومشا فتحلها الباب وبتسملها بطيبة هي حست بالإمتنان مع أنها كانت باينة فيها مكسورة ونزلت بكل خجل ودخلت موراه بقات كتشوف فجنبات البيت حالها حال جعفر لكن هي كانت تقلب على أثرو اللي تلاشى حتى انتبهت أن باب الجردة اللي خارجة مالكوزينة مفتوح ورمات عينها لقاتو كالس فواحد الكرسي تما و مورَّك على يديه بشرود لمحها جعفر وبغا يكسر الإحراج ويحسسها بالطمأنينة ولو شوية ..
جعفر:- أ زكية طلعي لفوق شوفي البيت اللي عجباتك وخوديها باش نجيبلك فاليزاتك تعدلي حوايجك
زكية(بدون متحس شافت بعيد فين كان ياسر):- أ...
جعفر(فهمها):- هو عصبي مبعد وغادي يكون هادي لكن نتي ديري اللي قتلك
زكية:- وخاا السي جعفر
طلعت وموراها كان جعفر هاز حقائبها وشافت بيت مطلة على ديك الجردة بعدا وأمامها البحر مباشرة كان المنظر رائع ونجوم الليل والقمر منعكسين على البحر لكن شكون يستطعمو فداك الموقف حطلها جعفر حقائبها وخرج كيشوف فالدار وفمداخلها ومخارجها وشنو فيها كاع أما هيا بقات تشكر ديك اللامبة اللي شعلها ياسر قبل دخولو للجردة واللي خلاها تشوفو وخا كانت شوية الدعوة مضلمة لكن بعداااا ، بعدت على ديك النافذة مين شافتو وقف وحمر فيها مباشرة ودخل حست بالخوف والقلق لكن صبرت روحها دبا رمات راسها وسط النار فخاصها تتحمل بقات تشوف فغرفتها الجديدة واللي كانت غريبة على اللي تعودت عليهااا طول حياتها كلست وجبدت من صاكها صورة ليها كالسة وسط ربيعة والبوشتاوي وحطتها فوق المنضدة وبقات تصاوب حوايجها بكل أريحية، عكسو هو اللي كان كياكل فجنابو فالصالون وجعفر مربع يديه كيحاول يهديه ...
ياسر:- وجودها بحد ذاتو كيخنقني يا جعفر وافهمني متمعصنيش
جعفر:- يووووه وهنينا مهاد الصداع دبا البنت هنا ومعندنا منديرووو من واجبنا نحميوها ونوقفو معاها
ياسر:- علاش كل مانقول تتسكد كتعواااج من جديد
جعفر:- كل عثرة فيها خير
ياسر:- ههه خير لا نتا متفائل بزاف مشاء الله عليك
جعفر:- كنحاول ناخد الموضوع من جهة إيجابية باش منجلطش أعصابي
ياسر(بعصبية ربع يديه):- اهاه تفضل تفضل وخبرني على جهتك الإيجابية وعظني لعلك ترضى
جعفر:- حاليا البنت فذمتنا حنا خصنا نوجبو معاها ونحافظو عليها غير ذلك هي فترة وغادي تمر وكلها ويمشي فطريقو
ياسر:- أنا خايف مهادشي والله لوكان غير خليتني نحكي لباها الحقيقة ونخرج راسي مهاد الدوامة هادي أنا مالني بيهااااا أنا مزوج وعندي حبيبتي اللي غادي نرجعها فأقرب فرصة وتما كيندير إيلا كان مشكل هادي مزال متحل غادي نحصل فيهااااا ؟
زكية(بألم ودموع سمعت كاع حديثو ونزلت مالدروج بثقة):- سي ياسر أنا معمرني فكرت نأذيك وكيما قال السي جعفر يمكنلك فترة وطلقني نرجع لدارنا لكن منا لتما نتا مضطر تحتارمني ولو قليلا وكن على يقين مستحيل نوقف فطريق سعادتك
ياسر(تمشا حداها كي النار):- نتي غادي دمريها أآنسة زكية
طلع كيجري فدوك الدرجات وسمعو لتيخ الباب وهي دموعها نزلو معينيها
جعفر(وقف عندها):- زكية الوضع متوتر بزاااف وطبيعي يوقع هاكدة الموضوع عاد جديد عليه ومستحيل يستوعبو لذلك عطيه وقت ، ياسر كيبغي مرتو فوق متصوري لذا حاولي تكسبيه كصديق غير ذلك غادي غير تصعبي عليك المعيشة أنا بحال عمك وكنصحك لمصلحتك لاحقاش مكانش اللي غادي يتألم بقدرك نتي
زكية(مسحت دمعتها):- طالما كيبغيو بعضياتهم علاش مخليها بعيدة عليه وعايشة معا رجل غريب وكتصور هنا ولهيه شنو تسمي هادشي عييت نفهم مقدرتش ؟
جعفر:- سمعيني كاين شي حوايج صعيب تفهميهم لذلك خليها للوقت وصافي
زكية(عرفاتو مغادي يقول والو):-تصبح على خير
جعفر:- ونتي من أهله أزكية
طلعت كتجرجر رجليها ودخلت لبيتها اللي لقاتها فارغة كيف خلاتها وعرفت أنه خدا غرفة بجنبها بقات تشوف بألم فدوك الحيطان وكتبكي لكن عزمت باش ترجع الأمور لمجاريها مهما يكن هي مستعدة تضحي وتصبر ويكفي أنه بقربها دبا ومعاها فنفس المكان شنو بغات أكثر ..
تقريبا تاشي حد منعس ديك الليلة هو بقا يتقلب فالفراش وحاس بالخنقة ومكرهش يسمع صوت ناديا فديك اللحظة لكن مكانش قادر يتصل قلبو كان واجعه أما جعفر كان كيشرب وطلع يتمايل حتى دخل لبيت اخر الكولوار وترما على السرير بدون ميحيد صباطو وهي كانت معنقة وسادتها وتتخيل روحها فحضن ياسر وهكذااااا .. فاق الصباح ولقا راسو واجعه وحاس بصداع من صوت المعصرة مولينيكس اللي كتضرب هادي 10 دقايق ولا سكتت بقا يزمجر ويربب وضرب الوسايد وفاق خدا دوش خفيف ولبس كسوتو ونزل لقا جعفر كالس على مائدة الأكل وزكية كتحط الفطور وعصير برتقال طحناتو شاف بحقد فداك العصير اللي حرمو النعاس
زكية(بلطافة وهي واقفة فالبوطاجي اللي كيشوف فطاولة الأكل):- صباح الخير
ياسر(مردش عليها وكلس أونفاص لجعفر):- نوض نخرجو
جعفر(راسو مقسوم):- عندي صداع رهيب لبارح تقلت شوية وراني نستنا اتصال مهم
ياسر:- إيوا أنا خارج
جعفر:- معندك فين تمشي أنا محتاجك الإتصال مهم لينا بجوج
زكية(حست بالخنقة مين مردش عليها لكن رجعت ابتسمت):- كيتبغي قهوتك السي ياسر ؟
ياسر(شاف فيها بشر):- جعفر قولها تتحاشاني وإلا غادي السي ياسر ميكونش مليح
جعفر(شرك وبقا يكح):- اه وحح مكيشربش القهوة أبنتي نهائيا بلاما تعذبي راسك راه اليوم أقلع عنها
زكية:- أنا كنت غير...
ياسر:- جعفر قلها تسكت محيت صوتها كيجيبلي رغبة فالقتل افففففففففففففف
وقف وصاط فوجهها وتجاوزها وخرج للجردة أما هي ارتبكت ورتعش جسمها وحست بحنوكها حومر والدموع بقاو يسيلو بوحدهم
جعفر(يحاول يطيب خاطرها):- طيب عمك جعفر ميستاهلش قهيوة قاسحة من يديك ؟
زكية(بأمل وفرح):- حالا تكون عندك
مبعد مشرب قهوتو خلاها تهز الفطور وخرج لعندو وكلس حداه وبقاو يشوفو بجوج فالبحر
جعفر:- تحاول عليها متبقاش كالس تقهر فيها كل لحظة
ياسر:- هادا اللي باقي تزوجهالي بسيف ودبا قولي كيفاش نتعامل معاها وزايدون هاديك لحمها مر مهما قلت عديمة الإحساس اللي دير هاد الخدمة شنو فبالك عندها عقل أو إحساس هه
جعفر:- مع ذلك حاول متجرحهاش
ياسر:- جعفر الله يخليك متدخلش يكفي أنني متحملها معايا تحت سقف بيت واحد
جعفر:- ولايني راسك قاصح آه آه
ياسر:- خليني منها ومن سيريتها اللي كتجيب الغمة قولي شكون اللي غادي يتصل بيك ؟
جعفر:- جوليو وصيتو على واحد الموضوع وراني نستنا اتصالو
ياسر:- آشمن موضوع وعلاش مقتلي والو ؟
جعفر:- هاوا غادي يعيط وتفهم بوحدك ...
صفوان:- فيديريكو شنو معناة كلامك قتلك تجبدهملي ولو كانو فسابع أرض لكنك فاشل لانتا لارجالك
فيديريكو:- سيدنا راه مخلينا فين قلبنا وللأسف مقدرناش نعثرو فيهم
صفوان:- لاحقاش غير الأغبياء افففف فين يكونو هادو فين ؟
فيديريكو:- معرفتش لكن جعفر داهية أكيد مغاديش يكون بعيد والسيدة جميلة معندهاش شي معلومات على مكانهم هي على اتصال بيهم هاتفيا فقط ومقدرناش نتبعو الإشارات
صفوان:- جميلة معارفاش مكانهم سولتها
فيديريكو:- شنو تأمر أسيدي ؟
صفوان:- لوكان كنت بلاصة جعفر أفيديريكو فين كنت غادي تتخبا ؟
فيديريكو(حك فراسو):- بصراحة مطاحش فبالي هاد السؤال لكن كنت غادي نتخبى عند أقرب ناس ليا
صفوان:- امممم والمعروف أن جعفر معندو تاشي عائلة هنا
فيديريكو:- إذن يكون عند شي صديق
صفوان:- صديق امممم جعفر معندوش أصدقاء عندو غير الأعداء
فيديريكو:- وحيرتني أسيدنا معرفتش فين ممكن يكون
صفوان:- فتح الباب على جميلة وخليها تنزل عندي حالا
فيديريكو:- أمرك أسيدي
جميلة(مبعد مفتحلها الباب نزلت كتزعف):- هادي مبقاتش عيشة ونتا حابسني بين 4 حيطان أصفوان
صفوان:- سؤال محدد جعفر فين ؟
جميلة:- ههه هاد سؤال سولتوني شي 20 مرة وقتلك منعرف
صفوان:- جعفر معندو لا عائلة ولا صحاب هنا باش يلجألهم
جميلة:- الله أعلم
صفوان(بعدم صبر):- جميلة جميلة فينو جعفر.؟؟
جميلة:- قتلك منعرف
صفوان:- اففف جميلة راكي كتزيدي وكتقلي فالحساب ديالك خلي شوية رحمة فقلبي باش منحطمكش
جميلة(بثقة):- وانا قتلك اللي كنعرف
صفوان:- نتي كنتي تعرفي جعفر مزيان خبريني عندو شي حد هنا فالبلاد يكون عندو ؟
جميلة:- جعفر مقطوع مشجرة ونتا عارفة
صفوان:- والحومة القديمة ؟؟؟
جميلة(حمار وجهها وتلعثمت):- هااااه الحومة القديمة؟
صفوان(بقا مركز عينيه فعينيها المرتبكتين وابتسم):- فيديريكووووووووو فيديريكو
جميلة:- مالك مالك تعيطلو شنو كاين ؟؟؟؟
صفوان:- هههه علاش تاه من بالي هادشي جعفر أكيد فالحومة القديمة ... فيديريكوووووو
فيديريكو:- نعام نعام أسيدي
صفوان:- جمعلي الرجال فورااااااااااااا غادي نعطيكم عنوان تمشيو تجيبولي جعفر وياسر مجرجرين ونتي هاتي داك التليفون وغادي تبقاي تحت أنظاري تايرجعو باش متلعبيش بذيلك وتمشي تحذريهم
جميلة(حاسة بالخوف وبداو الدموع ينزلو معينها):- صفوان نتا راك غالط هوما مستحيل يكونو تما
صفوان(وقف بابتسامة خبيثة):- خلينا نشوفووو ونتأكدو مخاسرين والو
جميلة تحطت فموقف خايب كيدير تحذر جعفر دباااا كيدير وهو حابسها قدامووو عطا العنوان لفيديريكو اللي نطلق هو ومجموعة من اللواطا عامرين رجال ومشاو البوشتاوي غير حل الباب شهق محيت كيعرف هاد الدخلات غير ديال البوس
فيديريكو:- سيد بوشتاوي باغي جعفر وياسر ؟
البوشتاوي(عاقد حواجبه):- شكووون جعفرر هادي سنين بيني وبينه مشفتو مشافني
فيديريكو:- البوس عارف أنهم هنااااا وغادي رجالي يفتشو الدار
البوشتاوي(معارضهم ودخلو رجالو وقفو موراه وريشلهم باش يريضو):- عندي نسا فالداااار كيفاش تفتش خليني نعطيهم خبر يخرجو بعدا
فيديريكو:- فالحال خليهم يخرجووو فيساع
البوشتاوي(مشا عند ربيعة وعيشة اللي لواو على ريسانهم شيلان وخرجو):- تفضل فتش فين بغيت
فيديريكو(ريش براسه للرجال اللي نتاشرو فالدار شي لفوق شي لتحت لكن ملقاو والو):- سيد بوشتاوي معلوماتنا أكيدة جعفر وياسر كانو هنا عندك فالدار لذلك تعاون معانا أحسنلك
البوشتاوي:- وانا قتلك مشفتهمش
فيديريكو:- طيب كيما بغيت جيبوووه ...
البوشتاوي(بقا يتنتر وبغاو رجالو يضاربو معاهم لكن مقدولهمش):- بعدووو مني بعدووو مني ...
ربيعة(كتغوت):- طلقو راجلي شنو بغيتو بيه طلقوووه
البوشتاوي:- أدخلي للدار أنا غادي نولي دخلي ومتحلو لحد ..حمودة خليك معاهم
ربيعة:- اهئ اهئ الله ياربي شنو واقعلنا
عيشة:- لالة هادي شي عين خصنا نبخرووو شوية بالعرعار
ربيعة(بألم دفعتها):- بعدي مني تانتي هادا وقت عرعارك افففف
ياسر(مكالمي فمنظر البحر الأزرق):- هادشي وقع بحال الحلم أجعفر لالا كابووس شمن حلم
جعفر(التف وشافها كتجفف بالجفاف أرضية الدار وشاف فوق البوطة الأكل كيطيب):- وبصراحة كان خصنا وحدة دور بينا ههههههه تبارك الله عليها مالصباح مكلست من النفيض والطياب
ياسر(علا شنافتو باشمئزاز وشاف من باب الجردة للكوزينة):- وناري عليك انا بعدا مقديتلكش
جعفر:- عموما ربي كتب عليك هاد الشي لذلك تعايش معاه باش تهني بالك
ياسر:- تتتت قولي واش جوليو متأكد مهاد المعلومة ؟؟
جعفر:-آه متأكد و راك سمعتني مين سولت جاسوسي الأخرق وأكدهالي هما فراس الشهر غادي يديرو ديك الحفلة السنوية لكن هاد المرة هنا والبوس هو اللي أمر بهاد الخطوة
ياسر:- امممم لكن علاش العام اللي فات حضرنالها لهيه وكانت هاديك أول مرة ناديا تشوف فيها داك المتعجرف وليد وحتى أنا كنت كنعرفو غير بسمية
جعفر:- خلينا مهاد الديباجة وقولي شنو بانلك نديروها ولا نستناو عاد شوية ؟
ياسر:- شنو نستناو طبعا نديروها لكن أجعفر هاد المصيبة اللي لداخل منا لوقتها نكونو تفكينا منها ياك؟
جعفر(بتساؤل تاهوا كيشوف فيها):- وماااااااانعرف
ياسر تاهوا كان يشوف فيها وهي شافتهم ودارتلهم باي باي بابتسامة وبجوجهم رجعو لتفو للبحر بسرعة ، كان منضرهم مضحك عكس البوشتاوي اللي كان كيترعد زمااااان على هاد الإحساس وقبل ميدخلوه بلغهم فيديريكو أنهم ملقاوش ياسر وجعفر عندو فالدار زفر بعنف وأمرهم يدخلوه وكان كذلك دخلوه وهو كلو كيرجف لمكتبو اللي كانت كالسة فيه جميلة والبوس
البوشتاوي:- جميلة .. سيدناااا ؟؟؟
البوس(بصوت مريب):- البوشتاوووي
البوشتاوي:- عاش من شافكم أسيدي 23 عام وغيبة هادي
البوس:- ههه وقيلة توحشتنا زيادة ع اللزوم ولا لا أجميلة ؟
جميلة(ابتلعت ريقها كتشوف فالبوشتاوي باش يسكت):- امممم فعلا
البوشتاوي(مفهمهاش):- سيدي أنا جاو رجالك جروني من الدار قدام ناس الحومة وانا مفاهم والو
فيديريكو:- ملقينا والو عندو فالدار لكنو كيكدب
البوس:- هششش فيديريكو عيب تقول على السي البوشتاوي كذاب هو رجل خدوم وأكيد غادي يعاونا
جميلة(قاطعت الحديث فرحانة مين ملقاوهمش):- لكن ملقاو والو فدارو إذن مكاينينش عندو
البوس(بنظرة شريرة):- سكتي نتي .. البوشتاوي قرب لعندي
البوشتاوي(كيتلعثم):- سيدنا أنا قتلك اللي عارف
البوس(جبد لقاط حديدي وحطو على سطح المكتب):- وانا مصدقك
البوشتاوي(غير شاف اللقاط جمدلو الما فالركابي بالخوف):- سيدنا أنااااا ...
فيديريكو(شد يدين البوشتاوي مالخلف وزير عليه):- شتتت متقاومش
البوشتاوي(بقا يتنتر بعبايتو):- طلق مني طلق مني
البوس:- البوشتاوي حنا عشرة سنين وبيناتنا بزااااف الأمور وياما دقت على ريسانا طبول لذلك أجيني نيشان وقولي فين راه جعفر وياسر ؟
البوشتاوي(كيتهزز):- معارفش معارفش
البوس:- البوشتاوي نتا كتستفز صبري وانا صبري ضئيل بزاف فبحال هاد المواضيع لذلك رحمني ورحم راسك باش ترجع سالم غانم لدارك
البوشتاوي(شاف فجميلة بحيرة وهي بقات تهززلو عينيها باش يسكت):- اممم
البوس(انتبهلهم وضرب فسطح المكتب):- جمييييييييييلة كنتي عارفة أنهم عندووووو ؟؟؟؟
جميلة(قفزت وبقات ترجف):- أنا لالالا معارفاش
البوس(وقف بعصبية ومشا شد الفك نتاع البوشتاوي وهز فيدو لقاط ودارو فودنه):- غادي تنطق ولا اليوم تفقد عضو من أعضاء جسمك
البوشتاوي(كيرجف بالخوف):- ننطق ننطق أسيدنا وانا طالب السماح لكن جعفر هو اللي أجبرني
جميلة:-لالا ألبوشتاوي لالالا
البوس(شاف فيها باحتقار):- فين راه جعفر وياسر؟
البوشتاوي:- سمحيلي أجميلة
البوس(شدلو ودنو باللقاط وبدا يزير عليه):- نطق فين راهم؟
البوشتاوي:-آىه يآآآآي آي غادي نقوول غادي نقووول
البوس(مطلقهش):- قول دباااا فين هما ؟
البوشتاوي:- دبا والله معارف كانو عندي وداك الحمار ديال ياسر تعدا على بنتي وتزوجها لبارح فالليل ومشاو لكني والله معارف فين مشاو والله معارف مقالوليش أنا اللي طردتهم من داري مبعد ديك الفضيحة اللي دارها داك الولد معا بنتي
جميلة(كتبكي وغير مصدقة):- شنو كتقوووووول ياسر مستحيل يتعدا على نملة كيفاش تعدا على بنتك وكيفاش تزوجهاااااااا لبارح نتا شنو كتخربق
البوشتاوي:- والله أجميلة هادشي اللي وقع والله أسيدنا هادشي اللي كاين
البوس(بقا يشوف فعينيه مطول وطلق ودنه):- حسابك غادي يكون معاااايا يا البوشتاوي كتآمر نتا وجعفر ضدي ومبعد هاد السنين غير بلاتي عليكم المهم عندي دبا نعتر فيهم البوشتاوي
البوشتاوي(كيحك فودنه اللي حمارت بالألم):- معارفش بصح اللي عليا إيلا اتاصلت البنت بمها نخليها تعرف هوما فين وتقولنا ونجي نخبركم
البوس:- وانا غادي عاد نستنى بنتك المصون باش تتاصل بمها فعلا تفكيرك غبي كيفك
فيديريكو:- ممكن تقولنا فوقاش مشاو وفاش ؟
البوشتاوي:- مشاو فلوطو ديالهم و هاداك ياسر كان عندو موطور كبير بصح خلاه فالكاراج مداهش
فيديريكو:- اللوطو نتاعمن ؟
البوشتاوي:- قتلك نتاعهم
البوس:- جيبلي الرقم ديال السيارة فورا البوشتاوي ضروري ميكون شي حد انتابه لهاد النقطة
البوشتاوي(كيحك فراسو بغباء):- بصراحة لا انا معارفش الرقم وتاشي حد مرجالي مخداه بصح أنا عارف مواصفاتها كيما حافظ حروف سميتي
البوس:- يا ذكائك أسمعني مزيان أنا ميهمني لا بنتك ولا غيرو بغيتهم يكونو عندي فأقرب وقت استغل بنتك ولا شوف كيدير تصرف
البوشتاوي(ميقدرش وبغا يعترض):-لكن كيندير ...
البوس(قاطعه بالغوات):- ملكنش انا ماشي شغلي دبر روحك نتا خبيتهم بلا خبري إذن تجيبهملي ولا غادي طير ريوووس حمد الله أن زواجو من بنتك غادي يفيدني وإلا كنت دفنتك ونتا حي ..
االبوشتاوي(ابتلع ريقه):- بأمرك
جميلة(فرحانة بصح مبينتش):- انا غادية لبيتي
البوس(شاف فيها بصمت):- نتي غادي نتحاسب معاك غير صبري علياااا
جميلة مشات بتعالي كاع مداياهاش فيه وفرحانة فقلبها أنهم مشدوهمش لكن مصدوووومة فنفس الوقت من اللي سمعاتو أووو ياسر تعدا على بنت البوشتاوي وتزوجها وهادا اللي مكان لا على بال ولا على خاطر طارت الفوق وجبدت التليفون اللي سرقاتو من مكتب البوس مين كان شاد ودن البوشتاوي بلاما يحس وصونات فورا لجعفر
جعفر(بعد شوية على ياسر مبعد محمار وجهه وابتسم):- جمييييلة عاش من سمع صوتك فينك؟
جميلة:- غي سكت أجعفر راه نايض هنا الزلزال
جعفر:- شنو كاين قلقتيني ياك لاباس؟
جميلة:- قولي اللول واش الخبر اللي سمعناه حقيقي ياسر تزوج بنت البوشتاوي ؟
جعفر(مخلوع):- ونتي شكون قالهالك؟؟؟
جميلة:- أويلي يعني بصصح تعدا على البنت اووو هادا هبل ولالالالا ونادياااا ايلا عرفت؟؟؟
جعفر:- جميلة تهدني وفهميني شكون قالك هاد الهدرة ومبعد نحكيلك شنو وقع؟
جميلة:- البوشتاوي بلسانو قالنا هاد الهدرة مبعد ما البوس صيفط الرجال يجيبوكم معندو معرفت كيدار فكر فالحومة لقديمة نتا عارف البوس المهم مين ملقاوكمش جابو البوشتاوي ونتا عارفو جبان فيساع نطق المهم مخصكمش تبانووو نهائيا وأوياكم تخليو بنتو تتصل بيهم أجعفر إيه والبوس راه عرف بقصة زواج ياسر وناديا وراه منوض القيامة وناوي يخليه يطلقها
جعفر(ضرب بقبضة يدو فالفراغ):- باش تتزوج بوليد
جميلة:- اففففف ترونت من كل جهة وطريق وزادت هاد زكية كملت الزين
جعفر:- افففف هاد بنتو كانت أساس المشكل بصح بهاد المشكل خرجنا مالدار مالوكان شدونا وسمعي راه ياسر مضلوووم وهاشنو وقع ......
بقا كيحكيلها كلشي اللي وقع معاهم وهي كتسمع مصدوومة ومخلوعة من ديك زكية وماخرج منها وكتفكر كيفاش غادير ناديا إيلا عرفت بحال هاد الخبر بقات غير تشهق وتعاود حتى دخل عليها وحيدلها التليفون مبعد مشاف فيها شوفة خطيرة وخرج وقفل عليها الباب بالساروت
البوس:- جعفررررر مبغيتش تحشم ياك ؟
جعفر:- جميلة معندها دخل وحتى البوشتاوي أنا اللي أصريت علا هادشي
البوس:- وسمعني مزيان غادي تجي وتجيب داك الولد وهادي آخر فرصة كنعطيهالك أجعفر
جعفر:- أنا مغاديش نرجع أصفوااااااان
البوس(سمع سميتو منو حافية وكمش عينيه بشر):- غادي ندمك وندم داك النكرة اللي معاك وقولو حسابو غادي يوصله فراس الشهر .. تييييت تييييت
جميلة بقات تضرب فالباب وتترجاه شاف فالباب باحتقار ونزل ....
ياسر:- شنو بغات جميلة؟
جعفر(شاف فيه مطولا مين يبديلو ومين يكملو):- سمع ...
طبعا حكالو كلشي إلا نقطة زواج ناديا من وليد باش ميشدهش هباله ويخرج على الخطة اللي أسابيع وهوماا كيحضرو فيها وهما فخضم الحديث قاطعتهم زكية بصوتها اللي كيستفز ياسر ويهبله باش يدخلو يتغداااااو فالحال
جعفر:-صراحة عصافير بطني تزقزق منفلتش هاد الوجبة
ياسر:- غير كول بصحتك
جعفر:- ونتا متجيش؟
ياسر:- أنااا ناكل من ماكلة هاديك وخا نموت بالجوع منقربش منها
جعفر(شافها سمعاتو ونزلت راسها بألم):- وبقا بالجوع أجي أبنتي نتغداو أنا وياك
زكية:- تانا مافخاطريش غادي نعمرلك السي جعفر تفضل
كلس جعفر فالطابلة وهو كيستنى الوجبة المنتظرة وعلى علا يديه وبقا هاتك يا أكل لكن هي كانت كترد الماعن وعينيها فالجردة عند ياسر اللي كان على كلستوو وتمنات لوكان تدخل لعقله وتعرف فشنو كيفكر ، فاتت ديك العشية وجعفر خرج يتلاقا بجوليو على شي أمور وبقا هو حبيس غرفته وقرصه الجوع ونزل يدبر يشوف شي ينتكل ولقاها كالسة فالكوزينة وحاطة طبسي نتاع الروز كتنقيه ، كانت مستفزة فكل حركاتها ولبساتها وطريقة حديثها وصوتها كلشي كان فيها كينوض فيه الأعصاب ويبغي يقتلها هي كاع محستش بيه وهو شاف باشمئزاز ففستانها الأخضر بارد البيتوتي واللي كان على نفس ستيل لباساتها كلهم وملوية على مقدمة راسها شال فالأخضر عاكس لون سواد شعرها المدلي مالخلف بحرية كانت حاطة يد على خدها بتلقائية واليد التانية كتنقي بيها الروز بشرووود هو غمض عينو وجا منسحب طالع وهي قشعاتو وشافتو قلبها فرفر وعيطتلو
زكية:- سي ياسر محتاج شي حاجة نوجدهالك؟
ياسر:- .. لارد
زكية:- سي ياسر
ياسر(بقا كيحسب تالعشرة فخاطرو قبل مينفجر فيها):- مباغي تاحاجة منك
زكية(وقفت وجات عندو بجرأة):- قلت إيلا بغيت ...
ياسر(بقا كيشوف فيها بصمت وانفجر):- سمعيني مزيان هادشي اللي درتيه والمصيبة اللي حصلتيني فيهااا مغاديش تفوتلي من حلقي ولا نهضمها فيوم لذلك يا بنت الناس نتي فترة بقائك هنا معانا محدودة وغادي نرجعك لداركم وربي يسهل عليك فما تعيش الدور بزاف تفاهمنا ...؟؟؟
زكية(حطمها وتكومو دموع فعينيها):- أمرك السي ياسر
ياسر:- متبقايش تعيطيلي بسمييتي الله يخليك متجيش مجيتي عتابريني ماشي موجود وتعايشي على أساس ذلك لاحقااااش وجودك وكلشي متعلق فيك كينوضلي لينير وكيستفزني فرجاء تاقي شري
زكية(بتلعت ريقها):- سمحلي على اللي وقع لكن حبي ليك هو اللي مخليني قادرة نصبر طول عمري
ياسر(مقادرش يستوعب):- واش مكتفهميش العربية
زكية:- باركة ما تجرح فيااااااا أنا عارفة معمرني غادي نوصل لشي مكانة عندك وما قابلة بهاد الوضع إلا لأني ختاريتو ومعنديش خيار تاني باش نريحك مني نهائيا
ياسر(كيشد فودنو):- سكتي سكتيييييييي مباغيش نسمع صوووووتك
زكية(شهقت بألم ودموعها اللي كانت حابساهم نزلو):- اهئ
ياسر(متأفف وجا خارج):- انا خارج فحالي
زكية:- وتخليني بوحدي فهاد الداررررر عفااااك متمشيش تايجي سي جعفر
ياسر(التفت كيشوف جرأتها اللي فاقت تخيلاتو):- ولايني مكتحشميش عاد عندك عين مبعد اللي درتيه تطلبي وترغبي أنا بحالك ندفن راسي فبلاصة منباش ع الأقل حتى نستوعب مصيبتي اللي صبتيني بيها منك لله هادا منقولك
خرج لاتخ الباب موراه وهي كلست على الدرجة وبقات تبكي بحرقة دبا معندها مدير ضروري متتحمل هاد المعاملة منو خصوصا أنها فرضت نفسها عليه فرضا وقالهالها بصريح العبارة لكن هي مغاديش تستسلم مسحت دموعها وناضت تكمل شنو كانت دير .... أما هو كان كالس فالعتبة ديال الدار وحاطط راسو بين يديه وكيفكر فحالتهم اللي وصلولها حتى صونالو جعفر وخبرو باللي غادي يتعطل معا جوليو تالليل ويرجع وهنا حلوووت بقا يسب ويلعن مضطر يبقى دبااا بسيف عليه معا ديك الكائنة المستفزة ..دخل للدار ولتخ الباب وتوجه ديريكت الفوق بلاما يكلمها ولا يعبرها بنظرة وهي انتفض جسمها معا لتيخو كي الرعد وشدت على صدرها ونزلت راسها تكمل شغلها ، حتى نزل من تاني مفاجئها..
ياسر:- واش نتي غادي تسكني فهاد الكوزينة شوفي شي حاجة تانية ديريها باغي نصاوب كاس قهوة راسي غادي يتفركع
زكية(بلهفة وحماس):- أنا نوجدهاااالك
ياسر(بنظرة احتقار):- طبعا لا متشكرين غي خويلي البلاصة هادا مامطلوب منك
زكية(نزلت راسها بحرقة وهزت طبسيها وكلست بيه فوق طاولة الأكل):- تفضل
ياسر شاف فيها شوفة الشر هو طلب منها تغادر إلا وهي كلست قدامو فالطابلة واش دركا ماشي حلال فيها القتيلة وهي كتستفز فيه وتزيد تشعل فيه النار ، مالقا مايدير تقدم رغما عنو و دار الما فالتيرمو نتاع القهوة وبقا يستنا العصارة تعصر بقا كيشتت بنظرو فكل مكان باش ميشوفش فيها ويمشي يدبحها هاد المرة مافيهاش الضحك إلا وهو يسمع ابتسامة خافتة ضحكتها والتفت وزعابيب أبشير فوجهه وهي حمارت وسرطت ضحكتها
ياسر(بدون صبر):- مالكي ؟
زكية:- أحم ... غير راك مدرتش القهوة فبلاصتها
ياسر(حس بالغباءء كيفاش نسا القهوة وهو باقي كيستناها تعصر البرد):- ديها فشغلك ونتي حاضياني
بقا كيقلب فالبلاكارات على قوطي القهوة وفوق البوطاجي مبانلوش وهي تهزت بخفة ودفعتهالو قدام يديه وهو شاف فيه وصاط بعصبية والتقط القوطي بلا تاشي كلمة وهي رجعت مكانها ، بعد مدة كان فنجانو فيدو وخرج بيه للجردة وحطه فوق الطابلة وسرح رجليه كيشووف غروب الشمس وتفكر نهار راقبوه هو وناديا فأيام عسلهم بجوووج وفنفس المنظر الغروب والبحر حس بغصة فقلبووو والحنين لدوك الأيام وغمض عينيه يسترجع ملامحها فخاطرووو وفخيالو وابتسم ابتسامة شوووق وهو مغمض عينيه كيحاول يشم عطرها اللي ساكن جوارحووو .. حتى قاطعاتو مسمومة الصوت
زكية(جابتلو غطا وحطاتو على ظهره):- الجو بارد
ياسر(شاف فيها وهي ملوية على كتفها شال وبعصبية انتفض ولوالها يدها):- أوياك وتقربي مني
زكية(بقات تتألم من اللوية وعينيها سالو بدمعتين حارقتين وهي كتشوفو داخل):- علاش كتعذبني هاكدة مكفاكش حبك اللي حارق قلبي وانا عارفة قلبك مع غيري اهئ اهئ
جملتها قالتها بينها وبين راسها مكانش اللي سمعها من غير الصدى ديالها بقات تتحسر على حالها وطاطات راسها الأرض ودخلت تاهيااا لقاتو كيلبس جاكيطو باش يخرج
زكية(بتلعثم وصوت خافت خايفة من ردة فعلو):- خارج
ياسر(بنظرة مستعجبة):- إلا إيلا كان عندك مانع أختي ؟؟؟؟؟؟؟؟
زكية(بنظرة خوف):- لالا...
ياسر:- مديريش حسابي أنا وجعفر لعشا ولا عرفتي شنو يجيك مليح تعشاي غي نتي وانبسطي ياك هادي هي العيشة اللي درتي عليها داك المسلسل هندي إيوا شبعي بيها
زكية(مسحت دمعتها):-متعطلوش راني نخاف بوحدي فالليل
ياسر(غير مصدق جنونها هو فين كيهدر وهي فاش كتفكر):- الصبر ياربي الصبرررر
زكية شافت فيه بعينيها البريئتين وهو عقد حواجبووو وزفر زفرة تقولي غادي ينوض موراها الزوابع وحيد جاكيطو وطلع لفوق يعني مخارجش وشبع فجعفر سبان اللي حطو فهاد الموقف ، أما هي فابتسمت أنه مخرجش وبقا ورجعت تكمل شغلها بكل حب وفرح ...
لعبلها الشيطان فالمخ وقالت بيما مكاينش جعفر تستغل الفرصة وتغوي ياسر طلعت كتجري لبيتها وجبدت فستان أحمر زوين وطويل بلدي يعني وسرحت شعرها على جهة وحدة من كتافها ونساب بطلاقة واصل لخصرها وتعطرت ودارت مايكاب وملمع أحمر وتنفست بعمق وتجرأت وفتحت باب بيتو بدون متطرقها وكان ناعس غي شافتو تفكرت نهار شافتو أول مرة فدارهم ، تقدمت بخطوات قليلة وخلخالها كيرن معاها ومشات مجيهتو وكلست على شوية مالسرير وبقات تشوف فملامحو الساكنة وشحال عجبها وجاها وسيييم بزااااف وجاتها رغبة تتلمس شعرو الكثيف بحركة سريعة ومدت يدها غير بشوية وحطتها على شعره وهو فلحظة حل عينيه وشدلها يدها و قلبها على السرير وجا مقابلها
زكية(قلبها غادي يخرج من قربو منها بداك الشكل اللي معمرها حلمت بيه):- أنا .. كن
ياسر(كيهدر بين سنيه):- ياكما صورلك بالك أنني ممكن نشوف فيك هاد النقطة خصك ديريها فودنك شنو هاد المهزلة اللي لابساها كتجيبلي الإشمئزاز ..(كيعوج شنايفو)
ناض عليها وهو جار يدها بكل اعتراض ودفعها لوسط البيت
ياسر:- هادي آخر مرة تعتبي فيها بلاصة أنا كالس فيهااااا سمعتيني وسيري منا ولا غادي نسمعك اللي معمرك سمعتيه ويلا كان خيالك المريض مصورلك أنك ممكن تهزيني بهاد عرض الأزياء ديالك فكاتحلمي أنا قلبي وعيني عامريييين بمولاتهم كنضن كتر من هاكدة غادي تحطي راسك فمكانة منحطة متافقة معايا امممم تفضلي من قدامي ..
زكية نطعنت وحست بالألم والجرح من كلامو المسموم ومشات تجري لبيتها دفنت راسها وهي كتبكي وتمسح فداك الماكياج بإحساس فظيع ووجع عميق وبقات تندب فروحها اللي حطت راسها فهاد المكانة الحقيرة قدامو وهو قاسي القلب احتقرها بطريقة خايبة صراحة ... من داك اليوم وهي كتتحاشاه كاع والى شافتو نزل كتكمل شغلها وتطلع لبيتها اللي ولات ملاذها ومهربها تامعا جعفر قليل ماتهدر وهادشي ريحه شوية مع أنه كان منوضله السكر ...
جعفر:- مملاحظش معايا شي حاجة زكية مبقاتش كتكلس كيما اللول وليت نشوفها غي تجي نتا طير لبيتهاااا شنو وقع ديك الليلة ؟
ياسر:- موقع والو غير فهمتها مكانتها وسبب وجودها ووضحتلها أنها فترة مؤقتة وكلها يمشي فطريق
جعفر:- باينة تكون قسحت الكلام لأنه من داك اليوم وهي مبدلة
ياسر:- عفاك الله يخليك متخليها علياااا راها جايبالي الكوليك فمعدتي متزعجنيش بسيرتها تاهيا بركة غي وجودها معانا
جعفر:- ولايني قاسي نتا مكانش فبالي قلبك كودرون كاع هاكدة
ياسر:- خليتلك ليك القلب الحنون
جعفر:- هممممح لوكان غي مشايفكش معا ناديا كيف كتولي كي الحلوة الدايبة هههههه
ياسر(بغصة فحلقو):- ونااااديااااا حبيبتي حكاية تانية ضحكتهاااا كتسلب روحي وتخلي كلشي فيا كيضحك أما نظراتها فيهم ألف حكاية وحكاية ولا شعرهااا وريحتو اللي لاصقة فخياشيم نيفي كل يوم كنستحضرهااا ولا صوتها الحنون اللي كيخليني غايب عن الوجود ولا نبضها اللي كيدفيني ، نادياااا هي كياني كلشي فياااا متعلق بيها هيااااا ياريت نقدر نضمها لصدري غي نشعر بيهاااا
جعفر(مأثر وحاس بكل كلمة كيقولها لأنه نفس اللي كيحسو معا جميلة):- فعلا نسائنا كيتحكمو حتى فمزاجناااا ياريت كنا نقدرو نضموهم العمر كلووو ... ياريت
تنهدت فوق الدروج وهي كتسمعلهم وكبتت شهقتها وتمناتو يبغيها شي يوم كيف كيبغي ناديا غمضت عينيها بألم ورجعت لبيتها كتجر فأحلامها المحطمة خلفهاااا و حاسة بالخوف من اللي جاي هادشي مكانش فبالها ولا توقعاتو فعلا ماشي كاع اللي كنحلمو بيه كيصدق كيف بغيناااا ::(( ..
كانت كالسة فشرفتها لاوية شال على كتافها وكتشوف فالسما ونجومها وعيونها متورمين من الدموع كانت كتفكر فراسها وفاللي قالب حياتها رأسا على عقب كانت إنسانة طبيعية وهي دبا ولات شخص آخر بنفسها مكتعرفوش نزلت عينيها كتشوف فكرشها اللي بدا يتوضح انتفاخها وحطت يدها عليها وهي كتناجي طفلها لربما عاونها وعطاها القوة اللازمة باش تقاوم ديك الموجة اللي كتحاول تغرقها لأعمق مدى تغرقها فنقطة بعيدة هي معندها جهد ليهااا ، متكلمتش معا ياسر من فترة ولا هيا قادرة تكلمو مبعد ما جد من مصايب وحتى هو مراسلهاش بمرة ولا حاول يتصل بيها يكفيه اللي فيه ، أما وليد فكان كيوصل حتى لباب بيتها كيحاول يدق لكنو يتراجع وينسحب باش ميزعجهاش أو تجرحو كيف كانت تجرحو الفترة الأخيرة بالكثير من الهدرة اللي كانت تقولها بعصبية ، خبراتو لين أنها ولات طول الوقت ساكتة ومكتتفاعلش ويلا جاوبتها كتهززلها غير راسها أو تريشلها باش تسكت وهادا اللي خلا لين تستغرب وتلجأ لوليد وتخبرو باللي واقع وهنا قرر يقتحم عزلتها مافيدو ميدير خصو يطمن عليها ويحاول يتواصل معاها ولو بالغصب ...
وليد(طرق الباب مجاوبتش وفتحها شاف فالسرير مكانتش وانتبه للشرفة مفتوحة تقدم مباشرة ولقاها كالسة بهدوء تما وشاعلة أغنية ساموان لايك يو وضغط على زر وطفاها وكلس أونفاص ليها فالكرسي):- مساء الخير
ناديا(هزت عينيها شافت فيه بسكون):- ... لارد
وليد:- يمكنلي نعرف حتى لفوقاش هاد الإضراب ؟؟
ناديا(تنهدت):- لا ......لارد
وليد(زفر بتعب):- ناديا فاتتشي 20 يوم تجاوزي الأمر يكفي
ناديا(بعدت عينيها عليه وبقات تشوف فالجانب الثاني بصمت):- .... لارد
وليد(عيا ميحاول وتعصب):- يعني مغاديش تردي علياااا ..؟؟
ناديا:- ....لارد
وليد(وقف جا ماشي):- على راحتك
خرج وخلاها موراه زفرت تنهيدة عميقة خرجتها من صدرها وموراها انفجرت بالبكا أما هو دخل لبيتو لاتخها موراه ومسح على شعره بيده بعصبية وشد فكو ورجع جمع يديه فقبضة تابيضت مفاصيلو وكلس على حافة سريرو مقادرش يتحمل هاد الوضع كلو ، حالتها مألماه فخاطرو بزاااف ومعارف شنو يدير الشي اللي كان ملهيه شوية أنه كان هو وجاد مهتمين بالحفلة اللي غادي يديرها فمقر الشركة وغادي تكون على مستوى لكن صراخ هيلين قاطع تفكيرو وتفزع وخرج كيجري في اتجاه الصراخ ولقاه من بيت سارة حتى هي سمعت نفس الصراخ مسحت دموعها وباستغراب وقفت ومشات ولقات جاد جاي يجري فالرواق ومتجه لبيت سارة
وليد(لقا هيلين كتهزز فسارة اللي مبغاتش تفيق):- هيلين هيلين مالها سارة ؟؟؟؟
هيلين(كتبكي بانهيار):- معرفت جيت نعطيها الدوا لقيتها فهاد الحال
وليد:- بعدي لهيه (بقا كيتحسس نبضها وتنفسها)
ناديا(مخلوعة عليها):- أوووف ياك لاباس؟
هيلين:- معرفت لقيتها فاقدة وعيها اهئ اهئ بنتي
ناديا:- طب ديرولها الحقنة اللي كتعطيوهالها الصباح
هيلين(ناضتلها بشر وهستيريا):- ليه نتي دكتوووورة باش تفتي علينا شنو نديرو وشنو منديروش غير بعدي لهيه وغادي تكون بنتي فأحسن حال
وليد(كيغوت):- هييييييييييييلين ماشي وقت هبالك دبا ... جاد وجدلي يبرتها فيسسسساع
هيلين(كتبكي):- بنتي اهئ أوليد خلينا نديوها للمشفى بلاما تعطيها الحقنة دبا حنا معارفينش واش غادي تفيدها ولا تأثر عليهاااااا
وليد:- سكتي شوية غادي نعطيها يبرتها وتولي مزيانة
جاد(عمرلو الحقنة وهو كيرجف بدورو ومدهالو):- هااااك
وليد زيرلها يدها وضربهالها وبقاو يستناوها تفيق لكن مفاقتش وهنا هيلين انهارت وطاحت بهستيريا كتبكي وتغوووت عليهاااا
وليد(بصراخ هز سارة بين يديه):- جاد خذها لبيتها غادي ندي سارة للمشفى حالا
جاد(انحنى كيحاول يهدي هيلين اللي بغات تهبل):- هيلينا هيلينا غاتكون مزيانة
وليد(فايت عليهم وفيدو سارة اللي كانت كيف الريشة مسكينة):- عفاك أجاد أهتم هاني غادي
ناديا:- نمشي معاك
وليد(شاف فيها باستغراب وهدر بشوية):- نتي وضعك ميسمحش غي بقاي هنا مرتاحة
ناديا(بعناد):-قتلك نجي معاك
وليد:- أوكي فيساع وكان
ناديا جابت جاكيطها وتليفونها وتبعاتو بشوية لتحت وركبت فالخلف وحطلها سارة فحجرها وبقات كتمسحلها على شعرهااا وهو طار بالسيارة طيرااااان ، لاحظت ملامحو الخائفة فالمراية وابتلعت ريقها
ناديا:- هي كتجيها هاد الحالة دايما ؟
وليد:- هادي 3 سنين تقريبا وهي تجيها
ناديا:- شنو نوع مرضها بالضبط ؟
وليد:- حمى روماتزمية
ناديا(بدون فهم):- مفهمتش كيفاش؟
وليد:- هادي 3 سنين التهبو اللوز ديالها مما سببلها بكتيريا خلاها تتحول لأعراض بهاد المرض اللي كيأثر على مفاصلها وقلبها بشكل كبير وفالغالب كتبات ليالي كتتألم فمناطق فجسمها لذلك خصها ديما مضادات حيوية وحقن لكن ماعرفتش علاش اليوم تعرضت للإغماء من فترة طويلة هادي متعرضت لنفس الحالة افففف يارب تستر
ناديا(حست بألمو وخوفوو وبقات تشوف فسارة بقلق تاهيا):- غادي تكون بخير إن شاء الله ...
كان كيصوك ومرة مرة كيضرب فالمقود بالأعصاب والقلق وكيلتف يتلمس شعر سارة وفلحظة قاس يد ناديا اللي نتفضت بشهقة وهو رجع يصوك بتركيز حتى وصلو للمشفى ودخلها وهو كيغوت ويطلب المساعدة وعينيه كيقلبو على مصعب اللي كان كيستناهم
مصعب(جار النقالة اللي فوقها سارة):- وليد خليك هنا اطمن غادي تكون بخير
وليد:- عفاك أمصعب نتا عارف بمرضها
مصعب(بحزم مطمأنو):- ستنا هنا ...
دخل بيها مصعب لغرفة المعاينة و هو بقا كيشوف فيها من دوك النوافذ الزجاجية حتى اختفوا بيها فدوك الغرف حس بالألم وعينيه تغرغرو بالدموع
وليد(مأثر):- هي صحتها هشيشة بزاف ومتتحملش هادشي كلووو
ناديا(وقفت حداه):- دعيلها تفيق وتولي أحسن ماللول
وليد(التف عندها بضياع):- إيلا وقعتلها شي حاجة معمرني نسامح نفسي
ناديا(كتبكي بخوف وشدتلو يدو):- شتت متقولش هاكدة هي قوية وغادي تفيق منهاااا
وليد(زير على يدها بقلق وتمني):- يااااربي تحفظهالي
بقاو كيستناو هي كلست على الكرسي أما هو بقا كيدور من كل الجوانب ومرة مرة يشوف فالساعة والو مبان حد ومرة كيصوط مرة كيتأفف وهي كانت تشوف فيه وملقات جهد باش تريح بالو فديك اللحظة لأنها تاهيا خايفة عليهاااا ، مبعد العذاب أخيرا خرج مصعب
وليد(جرا عندو):- هاااه طمني كيفها بنتي ؟
مصعب:- للأسف وضعها مكانش يطمن مين جبتوها لكن الحمد لله وضعها استقر خصها يومين تحت العناية المشددة وترجع بألف خير
وليد:- نتا متأكد يعني متأزمش قلبها ولا شي حاجة؟؟
مصعب:- وليد منكدبوش على بعضياتنا حنا عارفين مدى ضعف قلبها ويقدر يتعرض فأي لحظة لانتكاسة لكن ربي كيلطف وراني درتلها اللازم وتنفسها انتظم أخيرا ومزية حقنتوها بدواها اللي كتحتاجو قبل متجيبوها وإلا كنا عانينا
وليد:- طب نقدر نشوفها ؟
مصعب:- هي باقية مغمى عليها مزال متفيق حتى لعدة ساعات
وليد:- محتاج نشوفها رجاءا أمصعب منتعطلش 5 دقايق ونخرج
مصعب:- طيب أجي معايا تلبس .. آنسة ناديا أتمنى تكون صحتك بخير ؟
ناديا:- شكرا أدكتور أنا الحمد لله
وليد(كان تابع مصعب ورجع لعندها):- ناديا شكراااا بزاف ليك
بفرح حط يدو على راسها بكل مودة وعاد دخل وخلاها مستغربة شكرو الغريب لكنها ابتاسمت وحمدت الله نجالهم سارة مسيكينة .. كانت عاد مبتسمة تاختفت ابتسامتها مين شافت هيلين جاية قالبة الكولوار بطالوها وجاد موراها
هيلين:0 فين بنتي اهئ نطقي فين ؟
ناديا(وقفت بتعب):- هي بخير دبا وحالتها مستقرة والطبيب قال خصها ش....
هيلين(تجاوزتها ودخلت فداك الممر اللي كيدي للعيانات المركزة):-بعدي مطريقي باغية ندخل نشوف بنتي منرتاح تانشوفها
تجاوزتها كي العجاجة وهي بقات تشوف فجاد بصدمة مرحة وهو تنهد الصعداء مين طمن على سارة وفنفس الدقيقة جات خارجة هيلين وتابعها وليد كيزعف علاش تدخل بلاما تلبس اللباس الخاص بالعناية المركزة خصوصا أن الوضع حساس وزيادة على ذلك بلا إذن ، لكن حسن عونها محيت تبقى أم خايفة على بنتها ورغب مصعب اللي داها باش تطمن عليها وعاد خرجت وهي تمسح دموعها ..
جاد:- دبا علاش كتبكي ياك طمنونا عليها
هيلين(عنقت وليد بدون استئذان):- كنت خايفة على بنتنا اهئ اهئ
وليد(تلعثم وتفاجئ بيها معنقاه وشاف فناديا اللي خضارت ماشي حمارت وبقات ترجف رجلها وهي جامدة وربت على كتف هيلين):- الحمد لله على سلامتها
جاد(غادي يرتكب شي جريمة):- امممم طمنونا عليها فعلاش مترجعيش نتي وناديا للفيلا غانبقا هنا معا وليد لا لزمت شي حاجة
وليد:- نو أجاد أنا غانبقى ونتا سير خد ناديا وهيلين معاك باش يرتاحو تالغدا صباح وجيبهم
هيلين:- ننن مستحيل نتزحزح منا أنا غانبقى معا بنتي
جاد:- بقائك مغادي يزيد ولا ينقص خلينا نمشيو وهاوا وليد هنا إيلا كان شي حاجة غادي يتصل بينا
هيلين(مطت شنايفها بدلع):- هممممم
وليد(قرب من ناديا):- ناديا تانتي نوضي رتاحي فالفيلا تالغدا صباح ويجيبك بلال ولا جاد تشوفيها
ناديا(عارفاه مغايخليهاش تبقى):- طيب ويلا ستحقيت شي حاجة اتصل
وليد(بابتسامة):- أكيد تهلاي فراسك
ناديا(شافت فيه ونزلت راسها وناضت):- تصبح على خير
هيلين(قربت من وليد وحطت يدها على كتفو):- بليز هاني إيلا وقع أي حاجة اتصل بينا
وليد(زفر بحنق):- ان شاء الله تهلاو
جاد:-سي يو بيناتنا
وليد:-اممم باي
مشاو وهو كلس على داك الكرسي وتنفس براحة مين طمن على بنتو حبيبتو الحمد لله لكن ضرباتو الشاهدة اللي صيفط ناديا معا جاد وهيليييييييييين ناري هادوك ماشي بعيد يقتلوها ولا يرميوها فالطريق ومشا يجري تابعهم كيدخل فالناس ويتجاوزهم مرعوب عليها، أما هيا ركبت وهي حاسة باللي بجوج بيهم مكرهوش يرميوها من الباب لكن قبل ميقلع جاد استوقفهم وليد وخلعهم بديك الوقفة
جاد(باستغراب):- ولييييييييد ياك لاباس؟
هيلين:- بنتي مالها؟
وليد:- أ ... لا والوو الموضوع مكيخصش سارة مي تفكرت واحد الحاجة خاصة بناديا أ... ناديا نزلي بغيتك فواحد الأمر ونتا أجاد كيتوصل صيفطلي بلال معاك باغيه تاهوا
جاد(فرش الفيلم):- وليد أنا كنت دايهم للفيلا ماشي لشي قنت آخر الله يهديك
هيلين(شافت ابتسامة ناديا وراحتها):- نزلي أحبيبة راه صحابلو غادي نختاطفوووك مساليينلك حنا
ناديا(نزلت وهي ممتيقاش وبلاما تنطق):- اممم
وليد(حس براحة مين نزلت وهما حكو جرارتهم ومشاو):- افففف
ناديا(كتضحك):- ههههه شنو لزوم هاد الشي كلووو ؟
وليد(حك فجبهتو وهو كيبتسم):- سولي راسك هههه
ناديا(عضت شنافتها وهي حاسة بفرح):- بيني بينك تانا كنت مرعوبة وانا معاهم حسيتهم غايرميوني فشي غار ههههه
وليد(بضحك قلبو لجدية وبنظرة ارتياح فيها):- وراه نفس الشي خفت عليك
ناديا(نزلت عينيها بخجل):- طيب دبا خصنا نستناو بلال يعني ..؟
وليد:- أجي ندخلو للكافيتيريا بيما جاااا عارفة شنو هيا مشكلتي ؟؟؟
ناديا(كتمشا حداه متاجهين للكافيتيريا):- نننن خبرني
وليد:- امممم مشكلتي مكانئمنش شي حد غيري يحميك صراحة مبقيتش قادر نغامر بيك
ناديا(تنفست بعمق):-بالمناسبة كنشوف أنك غير زدت حقدهم ليا
وليد(عوج شنايفو بغرور):- آخر همي
ناديا بشبح ابتسامة شافت فيه أما هو تنهد بفرح اللي هي مزيانة وبنتو مزيانة وكلو على مايرااام ..
مبعد ساعة تقريبا اللي فاتت طايرة وصل بلال ووصلها وليد لعندو ودعاته ومشاات وهو رجع للمشفى فين كان كالس لكن هاد المرة بارتياح كبير وبوجه مليئ بالتعابير العشقية معرفش علاش حس بداك الشعور نتاع الأمان الداخلي لكن صراحة ديك الليلة كانت من أروع لياليه خصوصا أنه رسلها رسالة نصية كيطمن واش وصلت ولا ختاطفها بلال ، هي ضحكت وردت عليه كنضن باللي مسألة خطفي رهينة بيك ، و رد عليها صدقيني إيلا جيت خطفتك غادي تنهار مخططات هيلين وجاد ، وهي جاوباتو اممم ع أساس آخر همك ، هو ابتسم ورد عليها لأن أول همي ... صيفطلها 3 نقط حذف بلاما يكمل رسالتو وبقا يستنا الرد اللي جاه مبعد دقائق نشوفك غدااا ... مردش عليها إنما خلا اللحظة الجميلة اللي فاتت معلقة بيناتهم بشكل زوين هي مبعد صراع ديال اليامات اللي فاتت حست أن مرض ساريتا حسن مزاجها ونفسيتها وخرجها من القوقعة اللي كانت فيها حتى موقفها معا وليد طمنها شوية وأول ليلة غادي تنعس بأمان وخا مدخلت بيتها تاقفلتها عليها بالساروت هي ناعسة معا عقرب ولفعة تحت سقف واحد وضروري الإحتياط لاحقاش سوبرمان كاين معا الأميرة النائمة فالسبيطار دبا هههههه ^^
على أنغام أغنية القديرة أم كلثوم [ بعيد عنك ] وكنتمنى كلكم تشعلوها وتستلغاو معايا الفن الأصيل ههه كنضحك معاكم المهم متلهيونيش خليوني نكمل ^^ فاش كنت إيه ... على هاد الأنغام اللي كتدخل لأعماق الروح وتتغلغل فالقلب كانت شاعلاها ناديا فالراديو وهي حاضنة نونوسها اللي حاطة عليه راسها ويدها كتتلمس بطنها وغارقة فتفكيرها وعينيها كيلمعووو بحب ، أما صدى الأغنية وصل لهيلين اللي دخلت لبيت بنتها وهي كتبكي ولقات جاد كالس ومعنق دمية بنتها وحست بالأمان ومشات عنقاتو بقا كالس وهي فحضنو كتبكي ، حتى وليد كان كذلك كيسمعها محيت كان طالقها مول الكافيتيريا اللي نزل يجيب معندو كاس قهوة باش يكمل سهرتو سعا خدا كرسي كيستلغا لدوك الكلمات وسافر معاهم لبعيد بعيد لوحدو معا أميرتو ، كانت زكية فاتحة الراديو وهي واقفة عند البالكون من غير متفتحو ويديها على الزاج ودموعها كينزلو وهي كتشوف فالمدى البعيد ، كانت واصلة لياسر أصداء الأغنية اللي رجعاتو لأيام حلوة عاشها معا حبيبتو وخلاتو يغوص فتفكيرو فيها وهو متكي فسريرو ، حتى جعفر كان طالع لبيتو وتوقف فالكولوار وبقا يتصنت ومشا بأحلامو عند جميلة اللي كانت حبيسة غرفتها وماعندها إلا داك الراديو اللي أذاع هاد الأغنية وخلا دموعها تسيل وهي تفكر فالدوامة اللي عايشة فيها ، وصفوان كان فمكتبو ديك الساعة وداير يدو على فكو وكيتصنت لأنغام الأغنية بعمق وكيفكر فقرارتو اللي لازم يتاخدها مبعد ، كانت ليلى كتمشط شعرها وعلى كتافها شالها اللي حطاتو على المنضدة عضت على شفتيها بحرج وهي تتفكر نهار جا زارهم معا مصطفى وكان هو بذاتو موسق معا الأغنية وكيحلم بيهاااا ، وهاد الجوج كانو فوق الروعة كان واخدها فحضنو وكيلعبلها فشعرها سعيد معا حبيبتو مريم أما هي كانت فعلا عايشة معا الأغنية لكن خاطرها واجعها بزاااف وباللي مألمها ومامخبراش ابراهيم بيه .. تاتوفيق كان شاعل الراديو من بورطابلو وحاطو عند راسها لربما سمعتها ورجعت للحياة ولقلبو بالذات ، حتى ربيعة تسحبت بشوية وهي كتسمع هاد الأنغام جاية من شي دار قريبالهم ودخلت لبيت زكية بدموع حارقين وبقات تتفحص أشيائها وكتكتم دمعتها وشهقاتها الحارقة ، و البوشتاوي عاق بيها ووصل لنص البهو وقشعها معنقة لباس ملباسات زكية وكتبكي وحس بالشوق تاهوا لبنتو وبالخوف من البوس اللي ناوي يدخلها فاللعبة الخبيثة ديالهم .. إيوا وحتى أنا كنت كنسمعها وكنوصفلكم كل واحد من أبطالنا شنو كان كيدير وشنو دار وقع الأغنية عليه إيه كلشي مَّحن ...
جا الصباح وانطلقت هيلين وجاد للمشفى أما هيا فاقت على خاطرها ولبست فستان مفضفض شوية باش تخبي انتفاخ كرشها ونزلت تفطر على راحتها بوحدها ميزعجها حد عاد طلبت من عماد يخلي بلال يجهز السيارة باش يديها للمشفى تاهيا بدورها تطمن على سارة ..
يا الله شحال زوين المضلوم مين ينصرو الله وياخذ بحقو موعد المحكمة جا وليلى وعائلتها كاع كانو كالسين كيستناو القاضي يحكم لصالحهم ، وبعد مرافعة المحامي اللي مد فيها الدلائل الجديدة وبرأ التهمة المنسوبة إليها واللي خلاتهم يحكمو بالحضانة لجواد وبعد مصارعة بين المحاميين القاضي حكملها بالخلع وخدات طلاقها لأن معها الحق ويا ليل الليل الفرحة مكانتش سايعاهم كلهم كانو ممصدقينش راسهم وليلى كانت تحمد الله وتشكرو وفرحتها معاطياها لحد يكفيهم مالعذاب اللي شافوه ومن الجحيم اللي عيشهم فيه واللي للآن كيعانيو منو هي وولادها واللي مزال كتشوف كوابيس كل ليلة أن جواد جا باش يقتلها وتفيق مفزوعة وولدها رياض اللي ولالو داك الخوف فأزمة نفسية كتخليه يبلل فراشو كل يوم تقريباااا وضطرت تاخدو هو وزياد اللي ولا عصبي وكيغوت بسبب وبدون سبب لطبيب نفسي باش تعالجهم وترجع هي وياهم كيف كانو قبل ميعيشو دوك الأيام معا داك الوحش البشري اللي سميتو باهم ، خرجو لبرا المحكمة وبقاو يتسالمو حتى وقفت عليهم فاطمة جاراها رشيدة
فاطمة(وهي تبكي):- شكيتك لله يا الخاينة دعيتك لربي ينتقم منك حبستيلي ولدي روحي لهلا يسمحلك
عزيزة:- أسمعي الشريفة روحي دعي لولدك يفك مصايبو على خير ويغفرلو الله
ليلى(تقدمت عندها):- يشهد عليا الله عمرني مغدرت بولدك بقدر مغدر بيا هو وآذاني وخاني و مخلا مدار فحقي ويشهد الله شحال كنت كنقدرك بحال الواليدة وكتر بصح تالهنا ووقفت العشرة ، ولادي هوما ولادك فنهاية الأمر وقتما بغيتي تشوفيهم مرحبا بيك
فاطمة(وهي تبكي بمرارة):- مباغية لانشوفك ولا نشوفهم منكم لله منكم لله أهئ اهئ
مريم(ربتت على كتف ليلى):- راها مقهورة على ولدها مديش عليها
ليلى(كتبكي):- الحمد لله ياربي الحمد لله تفكيت منووو
ابراهيم(عنق ليلى):- ختي حبيبتي ربي نصفك وجابلك حقك ودبا هو راه يتجرجر مزال غادي يدي حكم على كاع جرائمو اللي رتكبها فحقك وفحق الناس كاملين
ليلى:- إن شاء الله
ليلى شافت ابراهيم كيشوف فنقطة معينة وكلشي كانو يشوفو موراها والتفتت بشوية ولقاتو واقف بدبابيتو كيشوف فيهم
ابراهيم(قرصاتو مريم وطبعا بسيف عليه):- الدكتور علاء جا باش يطمن روحي عندو أليلى وشكريه
ليلى(مترددة وكتشوف بتشكيك فابراهيم):- هااااه
مريم(كتغمزلها باش تمشي):- هاااه شنووو احم هاحنا كنستناوك سيري ...
مريم بقات مكروشية براهيم بسيف عليه باش ميتزحزحش وهو كي الحيط كيتهزز
ليلى(شافت فيهم بحرج وصاوبت شالها وتمشات لفين كان واقف):-...علاء
علاء(بكل حب):- مبروووك
ليلى(بابتسامة خجل):- الله يبارك فيك
علاء(مرتبك):- أ.. كيف الولاد ؟
ليلى:- بخير خليناهم معا عمي عيسى .. أ .. كيف صحتك دبا ؟
علاء:- مبقالي والو ونرمي هاد الرجل الثالثة هلكتني هههه
ليلى(بأجمل ابتسامة):- الحمد لله على سلامتك
علاء(شاف موراها كلشي مسيلم):- أ.. طيب نشوفك من بعد
ليلى(محرجة):- آه إن شاء الله
علاء(كيهزز فراسو بشرود فملامحها مساخيش الأخ):- نبقاو على اتصال سلام احم
ليلى(تحركت):- آه ولا بد اممم مع السلامة
رجعت لعندهم وهي مرة مرة كتشوف موراها ومريم كدير حركات مضحكة وابراهيم زعما لاعبها معاجبو حال المهم ركبو ومشاو وهوما هازين فقلبهم أجمل فرحة ..
المحامي (دخل يشوف جواد فالحبس):- للأسف السي جواد تحكم فصالح الزوجة ديالك وماليوم هي طليقتك خسرنا القضية
جواد(كان ساكت وجمع القبضة نتاع يديه وضرب بيها المحامي وطار عليه بقجة كي المجنون):- نتا محامي فاشل قذر سافل لوكان كنت خدام خدمتك كنت غادي تنجح الحمااااار
شدوه البوليس وناض داك المحامي كيصاوب فحالتو وكينعتو بالمجنون وخرج من تمااا هارب مسكين أما جواد فانتهت بيه و ليلى قدرت تنفذ منو وتطلق لكن يستحيل يخليها تعيش فراحتها وغادي ينتقم منها مهما كان الثمن هههه السي جواد لا نسيت راك فالحبس آشمن انتقام صافي طاحو كواريك ^^
سارة مبعد يومين فالعناية خلاوهم ياخدوها لغرفة مستقلة ولكن هيلين أصرت باش تاخذها للفيلا ، وليد سول مصعب إيلا معليهاش شي خطورة وقالو أنها خصها ترتاح والعناية اللازمة ووليد طلب ممرضة ترافقها حتى تتحسن وخدا وعد من مصعب باش يزورها كل يوم ويطمنهم عليها ، ورجعت الأميرة الصغيرة للفيلا وكلهم فرحو بيها
سارة(كتهدر بصعوبة):- واووو كل هاته الهدايا لي ؟
وليد(كالس حداها):- و أكثر منها لأميرتي الصغيرة ليه شكون عندنا من غيرك يا مدللتنا
جاد:- فعلا مدللة وقفتينا على قدم وساق هاد اليومين الفايتة
هيلين:- بنتي حبيبتي نتي
سارة(بابتسامة):- ويل ويل كفى من الحب أنا ممتعوداش على هاد المديح كلوو هههههه
ناديا(كضحك معاهم مين ضحكو من جملتها):-طبعا انتي اساس فرحتنا دباااا
سارة(بمكر):- امممم لوكان فبالي غادي نولي شهيرة كاع هاكدة لوكان زدت تدللت أكثر
وليد(مسحلها فشعرها):- يالاه يا الحلوة ديالنا غاتنعسي دبا باش تولي بصحة جيدة تفاهمنا
سارة(بتذمر):- بدأت الأوامر يالاه أنا كنشكر فوضعي الرائع ؟؟
هيلين(وقفت):- ننن ساريتا نعسي أحبيبتي باش تبراي تمام
ناديا(باستها):- نشوفك
خرجت ناديا مالبيت وهي مبتسمة اللي ولات سارة بخير وتوجهت لبيتها وسمعت هاتفها يرن استغربت ودخلت مباشرة وهزاتو لقات رقم مريم
ناديا(بفرح):- مريم حبيبتي كيفك توحشتك بزااااف ؟
مريم(بصوت حزين ويخوف):- نادياااا حبيبتي أنا لاباس
ناديا(حست بيها):- مريم مالك شنو كاين ؟
مريم(تلعثمت):- نادياااا بصراحة كاين واحد الأمر بصح مبغيتكش تخلعي تفاهمنا
ناديا(كلست بفشل):- مريم عفاك قولي شنو كاين راكي خلعتيني
وليد(جا فايت وشاف بابها محلول ومنظرها كيخوف ودخل عقد حواجبو وسول ناديا اللي هززتلو راسها باش يستنى تفهم):- اممم
مريم:- ناديا جدي عيسى راه عيان شوية بصح متقلقيش هاوااا فالبيت غير
ناديا(دموع بداو يسيلو بدون شعور وبانهيار):- جدي جدي مالو أمريم؟
مريم(حكت فراسها بتعب):- افففف خصك تجي فورا أنادياااا نتي اللي تقدري تقنعيه يمشي طبيب
ناديا(مسحت دموعها):- طيب طيب أنا جاية
وليد(بقلق دخل عندها):- ناديا ياك لاباس؟
ناديا(برجاء وخوف):- جدي معرفت مالو مريض خصني دبا نمشي لعندووو
وليد(ارتبك وتوتر):- طيب نوضي نوصلك
ناديا(بشكر):- خذني بسرعة أوليد
وليد هززلها راسو وهي فيساع لبست جاكيطها وخرجت معا وليد اللي تاهو لبس جاكيطو ومشاو هي نسات كاع وليد وبقات تبكي وتدعي الله ينقذ جدها حبيبها ، أما هو فكان خايف يكون شي ملعوب من ياسر لكن بعد هاد الفكرة من بالو و بقا يتمنى يطمنو عليه من بعد ساعتين طريق وصلو وحلت حزام السلامة ديالها ونزلت بخطوات متسارعة ملهوفة تطمن على جدها ودقت الباب حلتها مريم اللي طارت عليها بتعنيقة وسلمت عليهم كاملين
ناديا(بخوف ودموع):- مالو جدي ؟
مريم:- متخافيش راه مزيان دبا لكن الصباح كان عيان بزاف ورفض يمشي للمشفى كيما درنا معاه
ناديا(بتذمر):- هو ديما كيدير هاكاااا خليوني نشوفو ؟
ناديا(دخلت عندو وغي شافها عينيه دمعو):- جدييييي حبيبي
عيسى(حاول يتكعد من فراشو مقدرش):- بنتي ناديااااا جيتي يا بنتي ؟؟
ناديا(شهقت وسرطت دمعتها):- جيت يا جدي علاش مبغيتش تمشي للسبيطار علاش باغي تخلعني عليك اجدي علالالاش ؟
عيسى:- يا بنتي شحال بقا فالعمر باش نخافو عليه
ناديا(بهلع ترمات فحضنو كي شي طفلة):- اهئ اهئ متقولش هاكدة نتا غادي تولي مزيان من أجلي أجدي ياك أحبيبي غادي تمشي ؟
عيسى(بحسرة):- غي شوفتك ردت فيا الروح ومكان لاش هاد السبيطارات
ناديا(شدت يدو وباستها):- جدي إيلا كتبغيني تمشي معايا دبا للسبيطار عفاااااك باش نكون مرتاحة
وليد(دخل بدون احم ولادستور):- احم سيد عيسى
مريم(بارتباك لناديا):- شفتو واقف برااا قلت أكيد معاك و دخلتو
كلشي بقاو كيشوفو فداك الكيان الأنيق فكل تفصيلة فيه جاهم غريب ورسمي جداااا واستغربوه صراحة
ناديا تكاكات باللي نساتو عند الباب ووقفت بتلعثم وهي كتهرب بعينيها عليهم
ناديا:- أ نسيت نعرفكم أ السيد وليد مدير العمل ديالي كناا فاجتماع فاش اتاصلت بيا مريم وأصر باش يرافقني لعندكم
وليد:- تشرفت بيكم مدام مريم . سيدة عزيزة .. سيد عيسى
عزيزة(كتهزز راسها حالة فمها فيه):- مرحبا بيك أولدي
مريم(تاهيا مخلوعة من وسامتو وكتشوف فناديا):- تتشرفنااا
عيسى(ابتلع ريقو وعقد حواجبو):- السلام أولدي ...ناديا فين ياسر ؟
طننن طرررننن طنطنط طرنرنطنطنطنننن طنطرررطننن
ضربت الأجراس فراس ناديا ووليد ونحبست الكلمات مبقا تاحاجة تترجم ولا تجاوب داك السؤال البريئئ وليد انفعل بصح بقا محافظ على هدوئو وناديا بسيف باش التقطت انفاسها
ناديا:- فالخدمة أجدي مسافر
عيسى(بنظرة تساؤل شاف فيها وفوليد):- لبسيني باش نمشيو للسبيطار
ناديا(بفرح):- ياحبيبي ياجدي
وليد(انسحب):- غادي نستناكم فالسيارة
ناديا(بامتنان):- تمام
بقات مريم وناديا كيلبسوه في حين عزيزة خرجت تطمن ليلى بموافقة عيسى أخيرااا تبعتها مريم اللي مشات تلبس باش تمشي معاهم و ناديا جات تجر جدها فالكرسي ووقفها
عيسى:- بنتي
ناديا(جات لمقدمة رجليه وانحنت عندو):- نعام أجدي
عيسى(بتخوف وقلق):- هاد مديرك مزيان معاك معرفتش علاش مرتاحيتلوش ؟
ناديا(باستغراب):- آه أجدي مزيان علاش كتقول هاد الكلام ؟
عيسى:- معرفت مهم انتابهي منو ممريحنيش ونظراتو فشكل
ناديا(تنهدت بعمق وناضت):- لا جدي راك تبالغ السيد وليد الله يعمرها دار يلاه يلاه خلينا نمشيو
عيسى سكت رغما عنو وهي مفهمتش علاش جدها مرتاحش لوليد مع أنه يالاه شافه ، ركبوه وداوه للمشفى.. طول الطريق والصمت مخيم عليهم تاشي حد معرف شنو ينطق وليد كان مرتبك شي شوية أما ناديا فكانت حمرا طول الطريق ومتوترة عيسى كان مرة مرة يسرق نظرات أما مريم فكانت عاقدة حواجبها وكطقطق فتليفونها اللي كانت تكتب مساج فيه لابراهيم وتبلغو بالجديد .. وصلو للمشفى وقلبو على مصطفى اللي فرح مين شاف عيسى وخلا الممرضين يدخلوه حالا لغرفة الفحص في حين بقات مريم وناديا ووليد فالكولوار
وليد(همس لناديا بشوية):- سيري كلسي لهيه متوقفيش
ناديا(هززتلو راسها):- وخااا
مريم(قشعت الفيلم وكمشت عينيها كي الثعلب وكلست حدا ناديا):- ضريف هاد مديرك
ناديا(ابتلعت ريقها وشافت فيه):- آه
مريم(شافت شوفتها):- ضريف تافات القياس
ناديا(بانزعاج التفتت عندها):- شنو قصدك؟
مريم(كتهدر معاها وتشوف فيه):- محكيتيليش عليه كاع
ناديا(متوترة):- مجاتش فرصة باش نحكيلك
مريم:- وياسر باقي مسافر ؟
ناديا:- آه بصح غادي يجي هاد الفترة هادي
مريم:- ونتي فين كالسة دبا ؟
ناديا:- مشايفاش أنه ماشي وقت هاد الأسئلة أمريم خليني نوض نشوف الطبيب
هربت منها طبعا لاحقاش عارفاها مغاديش تسكت ومن الواضح أنها هي الأخرى مرتاحتش لوليد اللي كان كيهدر فتليفونو وتجاوزه ابراهيم اللي مشا ديريكت عند مريم
ابراهيم:- حبيبتي غي خبرتيني جيت فورا فينو عمي عيسى؟
مريم(وقفت عندو):- فغرفة الطبيب وناديا دخلت عندو دبا
ابراهيم:- اممم جات ناديا إيوا ع الله يكون خيرر ... مالك؟
مريم(ريشتلوو بعينيها):- هاداك اللي واقف لهيه مديرها فالعمل
ابراهيم(التفت وشاف المستر وليد بشحمو ولحمو):- امممم عاد دبا حصلنا الشرف سناي هنا دقيقة راجعلك حبيبتي
مريم(جات توقفه كان مشا):- أ.. صبر ..
ابراهيم(تقدم عندو ووليد انتبهلو وقطع الإتصال):- مستر وليد
وليد (مدلو يدو يسلم عليه):- نعم
ابراهيم:- أنا زوج مريم
وليد(شدد على يدو بالسلام):- أهاا تشرفنا سيد ابراهيم
ابراهيم(بلمحة ماكرة):- أهاه سمحلنا عذبناك معانا وجبناك تالهنا وعطلناك على أعمالك
وليد(دار يدو فجيبو وبجنتلمانية):- تت أنا هنا معا ناديا ضروري متطمن على صحة جدها
ابراهيم(هزلو حواجبو):- آه ناديا امممم فيك الخير
وليد(بنظرة مضادة لتلاعب ابراهيم):- شكرا
مصطفى(خرج رفقة ناديا وتجامعو كلهم عليهم):- الحمد لله مكاينش شي حاجة خطيرة الموضوع بسيط وخصو غير مداومة فالدوااا وغاتولي صحتو أحسن مما كانت
ناديا(عاد خايفة):- نتا متأكد ياك أدكتور جدي ممحتاجش شي عملية ولا غيرو ؟
مصطفى:- لا الحمد لله شكوكي مطلعتش فمحلها وكلو من التعب والإرهاق
وليد:- دكتور إيلا كان بحاجة باش يبقى تحت رعايتكم أو تزيدو تتأكدو مكان مشكل المهم طمنونا عليه
مصطفى:- ميحتاجش لأنه فعلا بصحة جيدة غير خصو الرعاية الكافية لذلك
مريم:- حنا أدكتور كنعطيوه دواه فمواعيدو ومكانش شي تأخير
ابراهيم:- فعلا حتى الأطعمة اللي مكاتوالموش مكايعطيوهالوش
مصطفى:- قصدت بالرعاية الكافية أنه خصو دايما يكون حداه شي ممرض يخليه تحت العناية لأنه حالتو حساسة ومعرض لانتكاسة فأي وقت
ناديا:- طيب شنو تقترح أدكتور يبقى عندكم ولا شنو ؟
ابراهيم:- جدك ميقبلش يبقى هنا أناديا وغاتشوفيه دبا يخرج يقولك خدوني للدار
وليد:- طيب محلولة نعينولو ممرض يبقى معاه كنضن هاادا حل مناسب
ابراهيم(هادشي اللي بقا غير هادا يدخل ونجيبو ممرض داخل خارج على ختي ومرتي ونسيبتي محسش راسو ونطق بغلاظة):- طبعااا لا
ناديا(شافت فيه بتفاجئ هي والجميع):- علاش ابراهيم ؟
ابراهيم(انفعل):- كنضن عمي عيسى مغاديش يوافق
مريم:- بسيف عليه أبراهيم
ابراهيم:- ممكن تخليني نكمل كلامي
مريم(انفعلت من جملتو المحرجة):- انا داخلة عند جدي عيسى
وليد(فهم انفعالو):- ناديا شوفي اللي يناسب صحتو
ناديا:- دكتور مصطفى تقدر ترشحلنا شي ممرضة تجي مرة مرة تراقب صحة جدي وانتا ولا الدكتور علاء تمرو عليه بيما ولا مزيان كيف العادة
مصطفى:- تمام كيما بغيتي تفضلي معايا لمكتب الموظفات
ناديا:- عن إذنكم
ابراهيم(زفر بعنف):- إذن مستر وليد طمنت على السي عيسى بلاما تعطل أمورك معانا
وليد(شاف فيه بدون مبالاة):- أنا مرتاح تفضل نتا إيلا بغيت
ابراهيم(صاط):- عن إذنك
وليد(بابتسامة):- إذنك معاك ..
مبعد مختارو الممرضة اللي غاترافق عيسى رجعو كاملين للدار ووليد كذلك بقا كيستنا ناديا فسيارتو وهي لداخل كتودع جدهاااا
ناديا:- جدي نتابه لصحتك ومتخلعنيش عليك راه معندي حد مغيرك
عيسى(كيشوف فيها مطولا):- ناديا بنتي نتي مكاديريش شي حاجة تغضب الله ؟
ناديا(مرتبكة):- طبعا أجدي نتا عارفني كيفاش دايرة علاش كتسول؟
عيسى:- غي باغي نطمن عليك سلميلي على ولدي ياسر بزااااف ومتغيبيش عليا بصوتك نتي دوايا
ناديا(جاها لبكا):- ان شاء الله أجدي متخممش
عيسى:- نتابهي لنفسك و خليني نشوفك
ناديا:- طيب بصح توعدني تهتم بصحتك باش نمشي مرتاحة
عيسى:- يكون الخير أبنتي
ناديا(باستو وعنقاتو وقفلت عليه الباب باش يرتاح وخرجت للصالون):- أنا غادي نخليكم دبا
ابراهيم(منرفز):- سلميلنا على ياسر
ناديا(شافت فيه):- يوصل يلاه بسلامة عليكم
عزيزة:- الله يعاونك أبنتي
ليلى(مشات تبوسها):- نشوفوك على خير
ناديا:- فرحتلك بزاف ألف مبروك اللي تهنيتي ودبا التفتي لحياتك ونساي الماضي كلووو
ليلى:- أكيد وهادا اللي ناوية عليه تهلاي فروحك ومتغيبيش علينا
ناديا:- أكيييد
مريم(باستها):- بسلامة اختي وخلينا على اتصال
ناديا:- تمام أحبيبتي باي باي ..
مريم(وقلبها واجعها):- نادياااا
ناديا:- هممم
مريم(كروشاتها وجرتها لفم الباب باش ميسمعوهمش):- إيلا بغيتي تحكيلي شي حاجة اتاصلي
ناديا:- هههه آآآخ منك وخا ألالة غادي نتصل يالاه خليني نمشي تعطلت و جدي أمانة عندكم وأي حاجة اتاصلو فورا وحساب الممرضة دفعو السيد وليد يعني من غدا تشوف خدمتها
مريم:- امممم أنشووفو متخميش
ناديا:- يلا سلام
مشات مسرعة ركبت بجنب وليد اللي نطلق طيااارة من المكان ، ورجعت مريم لعندهم
ابراهيم:- وهاداك الطولة علاش يخلص حساب الممرضة مالنا حنا ماشي أهلو وملزمين بيه ؟
مريم(عاد معصبة منو على تصرفو فالمشفى):- مافيها تاحاجة مع أن مصطفى عيا فيه يخلي الحساب على المشفى لكن رفض
ابراهيم:- هاداك باغي يستعرض عضلات وصافي
مريم:- ونتا علاش معصبك الموضوع مدير ناديا وتدخل عادي مافيها تاحاجة
ابراهيم:- وراجلها كي يعرف مغاديش يكون عندو اعتراض
مريم:- كنضن باللي راجلها بخبرو كلشي غير هني راسك
ليلى(شافت الجو مشحون بيناتهم وشافت فعزيزة اللي عوجتلها شنافتها مفاهمة والو):- أ... المهم عمي عيسى مخرج فيه والو وصحتو مزيانة وع الله يولي بخير
بجوج بيهم سكتو وكل واحد مين بقا يشوف وباينة غايبقاو هاكا تايروحو لدارهم إيوا نخليوهم يفكو مشاكلهم بطريقتهم ونمشيو لديك السيارة ...
ناديا(بامتنان):- شكرا على وقفتك معايا اليوم أوليد
وليد(بابتسامة):- لاشكر على واجب مع أن الأمر كيهمني بقدرك
ناديا:- الحمد لله رتاحيت مين طمنت عليه
وليد(بتردد):- ناديامزال الحال الوقت باقي تقبلي دعوتي على العشاء فشي مطعم اللي بغيتي
ناديا:- اممم كنضن خصنا نرجعو خلينا ساريتا اليوم كامل
وليد:- ساريتا نعست اتصلت بيهم واطمنت عليها
ناديا(زفرت وهي مرتبكة كيدير ترفض):- معرفت
وليد(بإصرار):- ساعتين ونمشيو فحالنا هممممم شنو قلتي ؟
ناديا(نزلت راسها بقلق):- أووك طيب
وليد(فرح اللي وافقت):- امممم تمام ..
دور سيارتو بحماس واتجه لمطعم مالمطاعم اللي كيعرفها وهي تنفست بعمق وحاسة بارتجاف مفاهماش سرو ولا عارفة معنى هاد الإرتباك كلوو ...وصلو لداك المطعم كان زوين وكلسو لداخل محيت كان الجو شوية بارد كلعو جواكيطهم وهي كانت لابسة تنورة فاللون الوردي الشتوي وفوق منها قمجة فاللون الرمادي جاية مفضفضة من الجوانب وموديرن محيت مايلة من واحد الكتف ومشدود بسنسلة فالخصر عاطي فوليم مناسبها باش تخفي كرشها ... أما هو كان لابس تريكو فاللون الرمادي ناصع وفعنقو في وتحتو قمجة زرقا وسروال أسود .... المهم كلسو وجا النادل وعطاوه طلباتهم ومشا ..
وليد(بنظرة خاطفة ليها):- أسرتك لطيفة
ناديا(بابتسامة تشكيك لوكان تعرف شنو قالو عليك):- هذا من لطفك
وليد(بخبث):- بصح محبونيش
ناديا(متفاجئة):- أ .. علاش كتقول هاكدة واش ضايقك شي حد فيهم؟
وليد(بلامبالاة مصطنعة):- بلاما يقولي حد إنما إحساس
ناديا:- ننن راك تبالغ أهلي بسييطين جدااا
وليد:- وهاذا اللي لفت انتباهي ليك أول مرة بقدر كلشي محيط بيك يقدر يخليك تعيشي ملكة إنما باقية ببساطاتك محافظة عليها وهي اللي مخلياك جوهرة نادرة الوجود
ناديا(بحنق):- نعتبر هادا غزل يعني ؟
وليد:- امممم متخليش الحديث يمشي لمنحى بعيد اعتابريه مديح احم
ناديا:- أنا مكنعرف عليك والو من غير هيلين وساريتا وجاد
وليد(التقط لوزة وكلاها):- امممم وشنو باغية تعرفي ؟
ناديا:- يعني أي حاجة عليك فين عشت فين عائلتك كيفاش وليت مستر وليد يعني ...
وليد:- آه قولي باغية ديري عليا روبورطاج هههههه
ناديا:- أففف يعني غادي تندمني ؟؟
وليد:- هههه طيب طيب متعصبيش أنقولك يالالة أنا نشأت فالمغرب وسافرت معا أهلي لبرا كملت قرايتي مبعد فترة توفات الأم ديالي بالمرض للأسف وماشي بزاااف وحتى الأب ديالي توفى من قهرو على فراقها محيت أنا كنت ثمرة العشق بيناتهم امم عموما مبعد فترة استقليت فالدومين العملي ديالي وفتحت مكتب وتعرفت على البوس وبدات بيناتنا تعاملات عملية مبعد تعاملت معا جميلة وجعفر وشركة مور شركة وفرع مور فرع كبرت مجموعة مستر وليد و إلخ البقية كتعرفيهااا..
ناديا(مشدودة بقصتو):- أهاه ..لكن مدامك صنعت كيانك بوحدك علاش بقيت للآن معاهم ؟
وليد:- قتلك عندي أسباب معينة منعتني أنني نبعد عليهم لكن يجي يوم وتعرفيهم وعد مني
ناديا(شردت فنظرتو):- اممم سنرى
النادل(حطلهم العشا):- بالصحة والراحة
وليد:- ميرسي .. تفضلي بسم الله
ناديا:- ههه حاسة بجوع رهيب
وليد:- ههه بصحتك
جعفر:- واش غادي تضرب على الماكلة بمجرد ما أنها هي كتطيب والله تا أكلها لذيذ بعمري ما ذقت طعام نسائي بحالوووو
ياسر:- جعفر خرج مالبيت باغي نبقى بوحدي
جعفر:- اللي عجبك نتا اللي غاتموت بالجوع مش أنااا ....
نزل جعفر لقا زكية كتحط بحماس فوق الطابلة الأطباق ونحرج كيفاش يقولها مي معندو ميدير
جعفر:- غير حيدي أطباق ياسر
زكية(منزلة عينيها الأرض):- باقي مبغاش ياكل ؟
جعفر:- نتي خلي الأكل فالثلاجة كيجوع غاينوض ياكله بوحده كلسي تاكلي
زكية(كلست أونفاص ليه):- سي جعفر
جعفر(حشا أول ملعقة ففمو):- يا الله عندك نفس لذيذ فالماكلة تبارك الله عليك
زكية(بابتسامة امتنان):- ربي يخليك بالصحة والراحة
جعفر(زاد ملعقة تانية):- هاااه شنو باغية تقولي شي حاجة؟؟
زكية(محرجة وبرجفة):- بغيتك تحكيلي على مدام ناديا
جعفر(كان كلا المعلقة 3 وجبدها مفمو وولا عمَّرها):- امممم يعني شنو باغية تعرفي بالضبط
زكية(حشمانة):- يعني كاع اللي كتعرفو
جعفر:- ناديا إنسانة طيبة جدااا صحيح مجنونة بعض الشيء لكن قلبها كبير ويتعلق بيها أي واحد يعرفها، عنيدة جدا ومكادير إلا اللي فراسها لكن ت..
ياسر(منفعل):- جعفرررررر
جعفر(نزل عينيه باستغراب):- نزلت وا أجي تاكل
زكية(بلهفة):- نعمرلك طبسيك ؟؟
ياسر:- مباغيش ناكل ولا غيرو ومنبغيكش تهدر على مرتي معا هادي مرة أخرى أجعفر
جعفر(شاف فيها حمارت وتلونت وغادي تبكي):- الأمر عادي مجرد تعارف بسيط
ياسر(مكايشوفش فيها كاع وعينيه كي الصقر على جعفر):- كلامي واضح ؟؟
جعفر:- اففف باركة من هاد الأكشن صافي فهمنا
ياسر:- ونتي بعدي عليك مرتي إيلا بغيتي نبقاو مزيانين
زكية(بعصبية وقفت):- تانا مرتك إلى نسيت
دفعت الكرسي وطلعت كتجري لبيتها ولتختها وخلاتو حال فمو مصدوم كيشوف فجعفر اللي بقا ياكل فطبسيه معلقة مور معلقة ولا على بالو
ياسر(كلس بلاصتها):- سمعت سمعت شنو قالت ها نهاية شواراتك الغريبة هاه سمع ودي على قلبك
جعفر:- البنت مقالت عيب نتا اللي نازل تجريح فيها وهي المغبونة مقدتش تتحمل
ياسر:- وانا ضربتها على يدها ولا باغيني نحسسلها على السيد إحساسها الكريم
جعفر:- عههههه كول كول والله تايعجبك
ياسر(شاف فالأكل):- مناكلش السم ديالها نموت بالجوع ولا نذوقه
جعفر كمشلو عينيه ومداهاش فيه وبقا ياكل على مرأى من عيون ياسر اللي كانت تلاحقه فكل ملعقة وفكل مضغة ومتعة كذلك ومع ذلك حكم رأيوو مياكلش ماكلتها مهما يحدث ، لكن ليس لوقت طويل مبعد مطلع ينعس جعفر نزل هو مبعد مقرصاتو كرشو وجبد شوية من الأكل وبقا ياكل
ياسر(كيشووف من كل الجوانب لا ينزل شي حد فيهم):- امممم مبيهش مذاقو المهم يأكل ..
مبعد مكملو العشا فالمطعم لبسو جواكطهم وخرجو ومبعد متمشاو شوية ركبو فسيارتهم ..
وليد(بلطف):- قضينا وقت ممتع ياك؟
ناديا(بارتياح اللي أمور جدها بألف خير وحتى الجو كان ملائم):- آه محسيناش كاع بالوقت
وليد(بابتسامة):- ناديا
ناديا(شافت فيه بتساؤل):- اممم نعم
وليد:- جاي على بالي نتمشاو شوية تقدري ..؟؟
ناديا(كتفت يديها):- لا نتا باغي تجيب الفجر
وليد(سكت ومط شفتيه):- عييتي ؟
ناديا(حست باللي ستعجلت فالكلام):- أ لالا أنا مزيانة
وليد:- طيب خلينا نتمشاو شوية شايف فهاد الجهة حديقة رائعة الجمال
ناديا:- أوك يالاه
نزل وليد من سيارتو ومشا فتحلها الباب نزلت وقفل السيارة وتمشاو فداك البولفار ، هو كان مرتبك وابتسامتو مختفتش أما هي كانت كتشوف فيه مرة مرة وحاسة بفرحة غريبة بداخلها .. وصلو لديك الحديقة اللي كان فيها من كل أنواع الورود الجميلة مزينة جوانب المكان سبقها هو وكلس على واحد الكرسي خشبي أونفاص ليه أرجوحات كيتمايلو معا البرد .. كلست حداه بسكون كتشوف فنجوم السماااء وضوء القمر عاطي نورو للحديالقة وزايدها روعة على روعتها ، حست هي بالراحة لجمال المكان وهو كان مستمتع بنظراتو الخاطفة لملامحها المستمتعة بالمناظر اللي هي وسطهم ..
وليد:- مكنتش عارف أنك كتأثري بالطبيعة لهاد الدرجة؟
ناديا(بلمعة فعينيها):- الطبيعة آية لعظمة الخالق كنحسها مأوى لكل مخلوقات الأرض
وليد:- اوبس حيلك عليااا فاجأتيني
ناديا:- ههه طب ونتا شنو كتجيك ؟
وليد:- اممم يا سيدتي أنا كنعتبر الطبيعة مكمِّل بسيط للمخلوقات الأرضية لأنه لو ماكنا حنا موجودين كانت الطبيعة فقدت بهجتها لأننا حنا اللي كنقيمو هاد السحر اللي وهبولنا الله
ناديا(بلمحة تفكير):- وجهة نظر نحترمها
وليد:- شفتي هههه
ناديا(بقات تشوف فالأرجوحات):- فالماضي القريب يعني كانت بجنب عمارتنا حديقة ماشي بحال هادي يعني مهملة لكن كانو فيها جوج أرجوحات كنا دايمن كنمشيولهم أنا ومريم هي تشد وحدة انا وحدة وكنبقاو تما حتى يجي شي ولد من ولاد الحومة يقولنا خالتي عزيزة كتقلب عليكم ،، هههه كانت هاديك المكان الأول اللي تقلب علينا فيه وتلقانا فعلا كانت أيام بسيطة وزوينة ومتوليش
وليد(لمح نظرة الإنكسار اللي فعينها):- شكون قالك متوليش ؟
ناديا(بتشكيك):- هههه الله يهديك
وليد(وقف ومدلها يدو):- أجي معايااا
ناديا:- وليد الله يهديك دبا ميليقش كاع نن
وليد شدلها يدها بلاما يخليها تزيد تعترض وكروشاها ووصلو لدوك الأورجوحات وهو كلس فيها اللول باش يشوفها واش متينة
وليد:- امممم قوية أجي خوذي بلاصتي
ناديا:- وليد وباركة مالهبال واش فوضعي نركب فيهم
وليد:- أجي قتلك
ناديا:- هفففف
شدت فدوك الحدايد وغمضت عينيها بجهد وكلست على خشبة ديك الأجوحة وهو دفعها غير شوية وعجبها الحال ابتسمت وزادت ابتسمت حتى انطلقت أجمل ضحكاتها معاها وهو كان فرحاااان بزاف من حالتها وروعتها وهي تحت ضوء القمر والنجوم وفداك الجو مستمتعة باللعب ، فعلا بريئة وباقي قلبها طفل مكانتش سايعاه الأررض دوك اللحظات ، مبغاش يكترلها نظرا لحالتها ووقفت وهي مساخياش هههههه وشكون يسخى بدوك الأرجوحات ياعيني ^^
ناديا(كلست كتنهت):- أووووه من فترة طويييلة مضحكتش بحال دبا ههههه
وليد(حس بروحو كينقز):- إيني تايم
ناديا(التفتت عندو):- هههه شكرا ليك أوليد
وليد(بتكبر دعابة):- وصل وصل على الرحب والسعة
ناديا(تثاءبت):- امممم نمشيوو ؟
وليد:- ناري على قطة كتنعس فيساع هههه
ناديا:- الوضع ماشي سليم هناااا تخيل يهجمو علينا شي قطاع طرق
وليد(انحنى لوجهها):-أنا نحميك بروحي
ناديا(شافت فعينيه القرابين منها وتلعثمت):- أ... لا ممستغنيينش على روحك مستر وليد لذلك تفضل معي إلى البيت هيااا
وليد(دار يدو فجيوبو ووقف):- مدام مصرة تفضلي
وقفت وتمشات قبلو عدة خطوات ووهو وقف فبلاصتو
وليد(بنظرة عشق):- نادياااا
ناديا(التفتت عندو باستغراب):- وليد شنو ؟
وليد(غمض عينيه متردد ومرتبك):- بغيت نعطيك حاجة لكن واعديني متفهمينيش غلط أو يعني ..
ناديا(رجعت عندو ووقفت مقابلو بتساؤل):- أكيد أوليد شنو بغيت ؟
وليد(جبد يدو مجيبو وحلها كان فوسطها قابصة صغيرة مربعة كحلة):- انتقيتهالك بنفسي من فترة
ناديا(كتشوف فالقابصة وداخلها كيرجف):- أ.. معرفت شنو نقولك؟
وليد(فتحها وعينيه فعينين ناديا):- دورت حتى عييت باش لقيت جوهرة تعبر عليك لكن صعب الموضوع علي لأني ملقيتش بحالك أناديا وهاد الخاتم
ناديا(عينيها عمرو دموع وهي تشوف فديك الماسة اللي مزينة داك الخاتم الثمين):- وليد هادا خاتم زواج متكونش مجنون ؟!
وليد(بقا ماد يدو وكيحك فجبهتو باليد التانية):- قتلك متفهمينيش غلط
ناديا(مدت يديها وقفلت القابصة فيدو وحطت يديها على يدو وشافت فيه بعمق وابتسمت):- خلينا نمشيو
سبقاتو وخلاتو بلا جواب ولا تاحاجة فقط ابتسمت ابتسمت يعني اشارة زوينة ليتيم الاحساس بحالو دار الخاتم فجيبو وجرا حتى وصل لمستواها وكملو مشية خروجا مالحديقة
وليد(قبل ميركب فالسيارة):- غادي يستناك
ناديا(قبل متركب من بابها تنهدت بعمق على جنونو اللي مستحيل يعنيلها شي حاجة):- ربما ..
ركبو وكل واحد حامل فداخلو كلام لا يقال هي غابت عن الوجود وهو كان طاير لأبعد سمااا وبجوجهم غارقين فالتفكير ...الطريق اللي مشاوها كانت بالنسبة ليه طريق الأحلام اما بالنسبة ليها كانت طريق الأمنيات كانت باغية ترجع لأيام صباها ولا شيء غير .. وصلو هما للفيلا ولقاو هيلين وجاد مزال كيتعشاو فالمائدة وطبعا مستحيل متسمعهمش هيلين شي كلمة تسم البدن ، وطبعا كلامها كان موجه لوليد بالدرجة الأولى
هيلين:- اليوم كلو غايب وتقول اللي مريضة ماشي بنتك
وليد(كيحيد جاكيطو):- كان عندنا شغل
هيلين:- كترت مشاغلكم بزاف هاد اليامات
وليد:- علاش عندك شي اعتراض؟
هيلين:- بنتك مزال مريضة؟
وليد(بنظرة شرسة):- وكنت مطمن عليها وخا أنا برااا
هيلين(كتشوف بكره فناديا اللي قاتلهم تصبحو على خير وطلعت):- ياريتك تهتم ببنتك كيما كتهتم بغيرها
وليد:- تصبحي على خير أهيلين .. جاد فوت عندي لبيتي مين تسالي
جاد:- أوك
هيلين(مبعد مطلعو):- هادو فين كيمشيو طول الوقت الموضوع مبقاش ينسكت عليه أجاد
جاد:- متهتميش باش ميوجعكش راسك راهم كبار وكيعرفو
هيلين:- لا أنا خصني نعرف
جاد:- يوووه أهيلين هنينا من سيرتهم وكملي عشاك
هيلين(شافت فيه وكملت عشاها):- هاحناااا
وليد(وصل كل واحد لبيتو):- تصبحي على خير أنا غانشوف سارة شوية
نااديا:- أوك بون نوي
دخلت و استلقات على سريرها وهي مزال بكسوتها وجبدت لغطا غطات وجهها
ناديا:- آه يا جدي حبيبي شحال توحشت ريحتك تمنيت لوكان نبقا حداك ونرعاك بنفسي لكن الله غالب ، نواعدك أجدي غادي غي نفضي هاد المشاكل اللي عندي ونعيشو جميع كيف كنا ومعا ولد حفيدتك أنا متأكدة غادي تبغيه بحالي وهو غادي يتعلق بيك ههه يااااارب تحفظهملي .. افف وليد مجنووون واش يقدم خاتم زواج لوحدة مزوجة عييت منفهم فيه معرفت منفهم تتتت يا الله وقف معايا ورحمني مهاد العذاب هادااا يارب ...
دخل هو لبيتو مبعد مطمن على سارة وجبد داك الخاتم الماسي وبقا كيشوووف فيه وكيتفكر ملامحها وليلتهم وكل أحداثها وابتسامتو مفارقاتوش
بقات أيام على ديك الحفلة والكل خدام فيها على قدم وساق فالشركة ووليد وجاد أغلبية الوقت تما كينسقو ويقادو الأمور الخاصة بالدعوات وغير من داكشي ، أما البوس فكان على اتصال بالبوشتاوي اللي مكان عندو تاشي جديد معترش فمكانهم نهائيا لذلك البووس وقف البحث وصمم باش يدير مراقبة مكثفة فمكان الحفل لأنه كان حاس باللي جعفر وياسر غادي يكونو فنفس المكان جميلة مشات لفيلا وليد من أجل ناديا لكن استقبلتها هيلين وجرتها للمكتب وقفلاتو عليهم
جميلة:- هيلين سمعيني دبا تغير كلشي مقدرتيش تنفذي المهمة وكنشوف فات الفووت
هيلين(بحالة جنون):- نتي خاصك تعاونيني أجميلة كنترجاك
جميلة:- هيلين الموضوع خرج من يدي ياريت كان باستطاعتي نعاونك دبا رضاي بالأمر الواقع وانتظري الجاي بل تأقلمي معه من أجلك قبل أي حد
هيلين(بدون فهم):- شنو قصدك ؟
جميلة:- خلي مبقاش قد مافات وتعرفي ودبا عذريني خصني نشوف ناديااااا
هيلين خلاتها جميلة فحالة جنون جميلة موراها شي سر وهيلين لازم تعرفه ، طلعت جميلة لبيت ناديا ودخلت مبعد مطرقت طرقة خفيفة
ناديا(وهي كالسة على كنبة الصالون اللي فبيتها):- ادخل
جميلة(بابتسامة):- هادي أناااا
ناديا(جمعت تريكوها وناضت):- جميلة مفاجأة سارَّة هادي أجي تفضلي
جميلة(كلست ومسحتلها وجهها بيدها بحركة طيبة):- ناديااا جيت نطمن عليك
ناديا(براحة):- أنا بخير لكن مخبرتينيش أنك جاية ولا وليد قالي
جميلة:- امممم قلت نجي ندردشو شوية وقبل منطلع طلبت قهوة
ناديا:- تمام كنت غانسولك شنو تشربي
جميلة:- ناديااا بصراحة أنا جيت باش نطمن عليك وفنفس الوقت باش نتكلمو بجدية فالموضوع
ناديا(زفرت بتعب):- جميلة أنا مستحيل نطلق من ياسر ونتزوج وليد هادي تامنطق ميقبلها وانا إلى مكنتش لياسر عمرني منكون لغيرووو ولا حتى وليد
جميلة(عضت شنايفها وبجدية):- نتي معندكش خيار
ناديا(بعصبية وقفت):- هادا آخر كلام عندي
جميلة(ريشتلها باش تكلس):-كلسي وبالراحة خلينا نتناقشو فهاد المسألة الأعصاب مغادي تفيد بوالو
ناديا(كلست بتنهد):- سمعيني أجميلة أنا دايما اللي كنتو تطلبوها مني نديرها وكتجبروووني عليها وحتى وليد حاول معايا بصح أنا مستحيل نفرط فياسر بناء على رغبة سيادة البوس
جميلة مضطرة تدير كيف قالها البوس وإلا غادي توقع هي وناديا فمشكلة
~ كتتفكر ~
جميلة(كتبكي ونيفها حمر وصوتها مبحبح):- قتلني قتلني وريحنييي من هاد العذااااب قتلني منهار عرفتك معرفت طعم الراحة دمرتني وحرمتني من بنتي ودبا باغي دمرها لك نتا واش أب نتا أب نتا أصلا ماشي إنسااااان نتا شييييطااااااااااااااااااااان اهئ اهئ اقتلنيييييييييي قتلك قتلني قتلني اهئئئئئئئئئ آآآآه
البوس(كالس على الكنبة وكيشوف فيها):- جميلتي مالك على هاد الدراما كلها الامر بسيط جداااا علاش مكبرة الموضوع ؟
جميلة(حطت يدها على راسها وهي كالسة على ركابيها فوق الطابي وعند رجليه):- صفوااااان صفواااان خلي فقلبك ذرة رحمة شفقة تجاه بنتك خليها تا إيلا عرفت حقيقتك تتفكرلك حاجة زينة
البوس(شدلها فكها وزير عليها):- نتي عارفة أنك غادي تنفذي داكشي اللي طلبتو منك ولا غادي نقتلها حداك وهاد المرة ماشي غادي نحرمها منك فالحياة بل فالمماة وتما بكي على قبرها من جهتي منحرمكش من ضناااااك
جميلة(بمرارة مقادراش تصدق مدى فظاعتو):- تأكد غادي يجي يوم وتخلص كاع هادشي اللي كديرو فيا وفبنتيييييييييييييي
البوس(طلق فكها):- غدا صباح تكوني عندهااااا وتنهيلي القصة قبل نهار الحفلة و إلا غادي نهيوها بخبر مأساوي ، نتي حرة الإختيار ليك أجميلتي
جميلة(شافتو ناض كيصاوب فجاكيطو ورمات راسها على ديك الكنبة كتضرب فيها وتبكي بعنف وقهر وحرقةةةة من هاد الشيطان اللي داير كيف الغراب مكيخيم على بلاصة إلا ويعشش فيها الهم والغم ... لأنهم ملقاوش ياسر وجعفر البوس قرر يستخدم الأوراق اللي عندو وبدل مايجبر ياسر على الطلاق غادي يخلي مولات الشي هي اللي تطلبو وبالتي هي أحسن فعلا إنه شرير يالطيف ...
فالوقت الحالي
ناديا(شدت يد جميلة اللي شافتها كترجف):- جميلة شغلتيلي بالي شنو كاين ؟
جميلة(ابتلعت ريقها وعينيها دامعين):- ناديا بغيتك تكوني كوراج ومتديريش فخاطرك تاحاجة متستاهل أحبيبتي والله وربي كاتبلك ما أفضل
ناديا(بخوف):- جميلة تكلمي شنو كاين راكي أرعبتيني ؟؟؟؟؟
السارقة الجزء 45
محتوى القصة
كانت لابسة طالون بوتيو واصل حد الركب وتحت منو جوارب سودا شفافة كتبين ركبها وتنورة دجين قصيرة حد الفخاذ وفوق منها قميص فاللون الأزرق غامق مفتوح من جهة الصدر بقفافل وفوق هاد القميص جاكيطا جلدية سودا وشعرها مرولياه وطالقاه بعشوائية ودايرة مايكاب مثير كحل بزاااف فعينيها و احمر شفاه فاقع وعطرها كيفوح كانت مغرية وتهبل بالزين ، نزلت من سيارتها وتقدمت نحو الفيلا وهي هازة حقيبتها وفيدها التانية هازة قرعة ويسكي وصونات الباب بعد مدة تفتح وهي انحنت براسها بإثارة وبمسكة ففمها كتتلاعب بيها وبنظرة منحلة شافت فيه ..
قبل ساعات
وليد(حاط يدو على جبهتو بنفاذ صبر):- واش باغية تجلطيني أنا مُصر باش تمشي حسب الخطة اللي رسمتهالك وأوياك يصورلك بالك تخرجي عليها أناديا
ناديا(دايرة رجل على رجل وكتشوف فيه بسكون):- هففف مفهمتكش دبا علاش مكبر الأمور غادي تكون قريب مالفيلا ويلا حسيت بالخطر غادي تعرف وتدخل وقتها
وليد(كلس حداها على الكنبة بجدية):- مع ذلك غادي تسمعي كلامي وغادي تحطي جهاز الإتصال ثم منيش فاهم هو مجرد سنسلة علاش مقادراش ديريها ؟؟؟؟
ناديا(ابتلعت ريقها وحطت يدها على عنقها بالضبط على العقد):- أ... اففف صافي صافي موافقة غير هنيني أوليد راك وليت كتلصق فالحاجة اوووو
وليد(عاد تنفس الصعداء وفهم علاش الفيلم وابتسم):- هههههه كنتي قولي مساخياش تحيدي عقدي يا ستي ماعليك غير نساليو المهمة ترجعيه
ناديا(وقفت باعتزاز):- هي هي نتا حمق وقيلة أشمن عقد اللي غاندير عليه أنا كاع هاكدة إنما هي حساسيات وصافي أنا أنا مجانيش فتصوري كاع هاد الهدرة اللي كتقول
وليد(وقف وجا موراها):- يس يس صدقتك
ناديا(دارت عندو بعصبية مصطنعة):- توقف متقلدش ساريتا
وليد:- ههههههه هفففف يا ناديا وراسك القاسح .. مملاحظاش معايا شي حاجة ؟
ناديا(باستغراب):- شنوو ؟
وليد:- لين غطست مبانتش من مور موصيتها تجيبلك ملابس
ناديا(تفكرتها وشدتها وجعة من هبالها):- اممممم وحياتك غير خليها غاطسة بمجرد مكتجي كيصيبني وجع معوي
وليد(انحنى بسرعة عندها وبعد بمجرد مكمل كلمتو):- لاباس عليك
ناديا(التفت تشوف فيه وراقباتو وهو يبعد وتنفست بغضب):- صبرا يا رب فهاد الليلة
وليد(هز تليفونو):- شنو قلتي ...؟
ناديا(ابتسمت بدعابة):- لا والو والو
وليد(فاهمها لكن مبينش وبابتسامة):- امممممم راني سمعتك ... تت ألووو وي جاد فين وصلت آه وصافي مزيان شوف متخليش بلال يتحرك قبل منعطي إشارتي تفاهمنا حنا منا لجوج سوايع نتحركو .. أوكي مزيان كيوصل كمال للفيلا بلغني فورا.. نتلاقاو ... تيت تيت .. إذن سنيورة ناديا غادي تجي معايا لفوق باش نعطيك السنسلة ونجربوها بيما جات الست لين
ناديا(تمشات قدامو):- أوكي يالاه
وليد(سبقها وفتح باب المكتب):-ياريتك تبقاي ع طول عاقلة كيما هاكدة
ناديا(بصرامة):- متحلمش
وليد:- عارف يا مصيبتي عارف
ناديا(خرجت قبلو وبقات تتمشى خلفيا):- شنو قلت؟
وليد(مدعي البراءة وكيقلدها):- لا والو والووووو
هيلين(نازلة معا الدروج وشافتهم خارجين يضحكو وتنرفزت):- إيوا اللي ضحككم يضحكنا ؟
وليد(صرط ضحكو وبحزم):- نعست سارة ؟
هيلين:- آه نعست
وليد:-إيوا نعسي حتى نتي ؟
هيلين(شافت فناديا بعصبية):- مفياش أون بليس مغاديش تشاركوني بتخطيطاتكم مصباح ونتوما فالمكتب عالم الله علامن ناويين؟
وليد(ريش براسو لناديا باش تسبقو واللي طلعت وهي تخنزر فهيلين):- هيلين حنا عندنا خدمة وماشي وقت تدخلاتك التافهة دبا شوفي تلفزيون ولا قراي شي مجلة تسليك
هيلين:- يووووه نتا محاسش بيا واش غانبقا نهدر معا الحيطان تاشي حد مكيفهمني
وليد(كان ماشي وولا خطوة عندها وباستهزاء):- سمحيلنا اليوم حجزنالك السي جاد لكن للضرورة أحكام
هيلين(حمرت فيه بعينها بصدمة):- أش شنووو وجاد واش دخله أنا أنا بغيتك نتا ؟
وليد(حيد يديها اللي حاوطتهم على عنقه):- مكاتمليش من محاولاتك التافهة وعاي شوية وكبري عقلك
هيلين(وجهها ترسمت فيه عاصفة):-كيفااااش ؟؟؟
وليد:- اللي سمعتيه ورجاء تديري فيا بليزيغ غير هاد الليلة وتبعدي من وجهي محيت منيش فمودي وخايف نغلط معاك أكثر
خلاها كتاكل فجنابها مالعصبية وطلع قدام عينيها المصدومين وهزت تليفونها
هيلين(بصوت باكي):- همممممم جاااااد اهئ اهئ فين مشيت وخليتني الليلة بوحدي ؟
جاد(بعد على بلال شوية):- حبيبتي عندي ظروف مغاديش نقدر نجي حتى نساليو الخدمة اللي عندنا آم سوري بيبي مغانقدرش نكون معاك
هيلين:- اففف شنو هي هاد الخدمة اللي تخليكم كاملين تخرجو وتخليوني بوحدي ؟
جاد:- بيبي سمعيني خصني نقطع دبا ونواعدك غدا غاناخدك لمكان زوين نتي وساريتا هااااه وضحكي
هيلين:- منضحكش صافي مودي تضرب بسلامة عليك
قطعت وهي منرفزة من كلشي وهو فيساع دخل لسيارتو وشاف سيارة كمال وصلت للفيلا ودار مساج لوليد خبرو بذلك وهنا وليد هز مسدسو دارو فجيبو وسمع طرق على الباب ودخلت هيا طبعا لغرفتو اللي كان فيها من الحنين رجعها لأول ليلة ليها فديك الفيلا نهار جات ونعست فبيتو وهي معارفاش غير شافتها حست بلمحة داك اليوم وضحكت فسرها لكن تنحنت وتقدمت عندو كان واقف كيسد جاكيطو وبابتسامة فتح الدرج ديال مكتبتو وجبد ديك السنسلة اللي فيها جهاز الإتصال
وليد:- قربي نوريك كيفاش تخدميه أناديا
ناديا(قربت بشوية وبهدوء وهي حاسة برعشة):- راني نعرف كيفاش نخدمهم (شافتو شاف فيها بعصبية وعرفت أنه فكر فخدمتها معا ياسر واستدركت كلامها )... يعني قصدت زعما ماشي أول مرة هادي ... اللي نستخدمهم فهمتني ..
وليد(زفر بهدوء ومبغاش يبنيلها):- مكان مشكل فالإعادة إفادة أجي ... (قربت منو وهو مدلها السنسلة وبقا يوجهها) شوفي ببساطة غير تدخلي من الفيلا غادي تضغطي على هاد البوطونة باش نقدر نلتقط الإرسال مهم جدا أناديا..
ناديا(هززتلو راسها وعينيها فعينيه):- اممم فهمت
وليد(بخوف شدلها ذراعها):- لآخر مرة كنسولك أناديا إيلا مقادراش علا هاد العملية أنا ممكن نكنسلها فالحال المهم نتي تكوني مرتاحة
ناديا(بطمأنينة):- مكان تاشي داعي أوليد أنا وافقت عليها ماللول ويستحيل نوقفها فهاد اللحظة هادي وزايدون واعدت جميلة بأنني نجيبلهم الملفات و غير ذلك غادي تكون معايا نتا فعلاش غانخاف ؟
وليد(عينيه لمعو من جملتها وحس بالسرور وشدد على يدها):- أكيد غانكون معاك و... ادخل
لين(فتحت وطلت براسها):- بعتذر منكم مستر وليد بس صار وقت تجهيز المس ناديا أنا خلصت كلشي
وليد(نزل راسو كيسب فلين اللي كتجي فالوقت الغير مناسب):- تفضلي أنادياااا
ناديا(نزلت راسها بأدب):- عن إذنك
وليد(غمض عينيه مين فاتت حداه ورجع فتحهم):- ناديا
ناديا(التفتت بشوية):- نعم
وليد:- نسيتي هادي ؟
ناديا(ابتسمت اللي نساتها ورجعت تاخدها من يدو):- اففف نسيتها
وليد(كيجات تهزها من يدو حط يدو التانية على يدها):-أنا واثق فيك بزاااااف وكوني مطمنة أنا معاك
ناديا(عينيها عمرو دموع لكن مبينتش):- عارفة
مشات لبيتها أخيرا وبقات كتوجدها لين ومين كملت خرجت ولقاتو واقف فالكولوار متكي على الحيط كيستنا ويفكر بشرود غير شافها طلع عينيه فيها من لفوق لتحت وابتسم وهي شعلت بالعصبية أصلا مكانتش راضية على داك اللوك وحاسة بشعور خايب
ناديا(تقدمت قبلو باش تنزل):- يووووه متضحكش عليا أوليد أنا الراسي محاملاش راسي
وليد(لحقها وشدلها يدها وجبدها لعندو غي بشوية):- على بالك أنك فكل حالاتك كتحمقي ؟
ناديا(صعقت من جملتو):- أ.. هاه ؟؟
وليد(عض شفتو):- يا ربي عاوني كيغاندير نفوت هاد الساعتين ونتي معا داك لل .....
ناديا(حست بيه وبانفاسو اللي كتصوط فوجهها بعصبية):- وليد وليد ماشي تاوصلنا هاد الخطوة غانخسروها نتا عارف ملقينا هاد الفرصة باش خدينا دور البنت اللي كان طالبها هاد الليلة من ديك المصلحة راه بصعوبة تامة مغانضيعوهاش دبا والفرصة مكاتجيش مية مرة همممم
وليد(استغرب انها كتبرد عليه وعقد حواجبو):- هاكدة كنتي تقنعي ياسر بوجودك معايا ؟؟؟؟؟؟
ناديا(تصدمت وحست بطعنة وجعتها فخاطرها وخلات كرشها تألمها ونتفضت بعيد عليه وهي كتهزز فراسها مقادراش تصدق شنو قال وعينيها فيساع بقاو يدمعو ومقدرتش تنطق):- نتا نتا .. افف
وليد(عاد استوعب أن اللي قالو كان جارح ليها بزااااف):- ناديا متفهميش كلامي ..
ناديا(بعصبية ريشتلو بيدها باش يسكت):- يكفي ما باغية نسمع والو تمشى خلينا نمشيو تعطلنا
بصمت وقسوة وعصبية وجرح وقلب مكسور كانت راكبة حداه وهي كتشوف فنقطة فارغة أمامها ومتململتش نهائيا عكسو هو اللي كان كيصوك وعينو عليها بالدرجة الأولى ومعارفش كيفاش يسحب داك الكلام من تفكيرها دباااا وحس بالغضب اللي نطق بمثل ديك الجملة كاع وفداك الظرف الحساس لكن ميقدرش يزيد يضغط عليها باش متنفجرش خصوصا أنهم على وشك ميدخلو فمعمعة كبيرة غير الله يسلكها على خير ... وصلو لنقطة اللقاء معا جاد والرجال
جاد لاحظ الجو المشحون بيناتهم واللي كان باين على وجوهاتهم وغمز لوليد بعبارة شنو كاين لكن وليد لهاه وخلاه يغض النظر وخلا ناديا تركب سيارتها بوحدها اللي كان جابها راجل من رجالهم لعين المكان باش تسبقهم للفيلا لكن مين ركبت انحنى لنافذتها وبقلق مرسوم على وجهه
وليد(تنفس بتعب):- ناديا الهدرة اللي قتهالك مم...
ناديا(حطت يديها على الفولة وعينيها مركزين فيه بدون حياة):- ميهمش .. نقدر نمشي دبا ؟
وليد حتار فجوابها ليه وفنظرتها الجليدية لكنو بعد على نافذتها وريش بيدو ليها وهي حكت جراير اللوطو ومشات على مرأى من عينيه وعينيهم كاملين
جاد(قرب منو):- نتا متأكد أنه مكاين والو ؟
وليد(بشرود متبع العجاجة اللي نوضتها وكيشوف فالطريق اللي مشات منها):- نكدب عليك لاقلت نو
عموما خذو مواقعكم وانا غادي نتبعها باش نكون فنقطة الوجود ديالي تفاهمنا خليونا على اتصال وأوياكم شي حد يغلط شي غلط راه غانعرضو حياتها للخطر تفاهمنا
جاد(حط يدو على سلاحو بطمأنينة):- متخممش موراك رجال غي توكل ع الله
ركب وليد سيارتو وتبعها ووقف بعيد على الفيلا غير بشوية وبقا كيراقب هي منزلتش فورا بقات كالسة شوية تاشافتو وصل وزمرت بسيارتها للباب باش يفتحوها وخرج عندها الكاردكول وانحنت بمياعة براسها وابتسملها وفتحلها البوابة ودخلت بسيارتها ، نزلت وهي حاسة بالرعب فداخلها لكن دبا لا مجال للتراجع فتحولها الباب ولقاتو واقف أونفاص ليها بكرشه اللي كتجيبلها الغثيان
كمال(بقا كيشوف فيها وعرفها):- شكوون اللي جا ناديااااا ميمكنش ؟
ناديا(دخلت دافعة صدرها وبإثارة وإغراء هزت قرعتها وريشتلو بيها):- أناااا جيت نعتذر منك إذا أمكن
كمال حل فموو وشهق بصدمة فاللول خاف ليكون شي ملعوب لكن مين طمن مكان حد معاها فرح بزاااااااف وكان كي الهبيل كينقز قدامهاااا ومزال ممصدقش راسو باللي هي فعلا بشحمها ولحمها قدام عينيه دخلها بسرعة وقفل الباب وبقا غير كيجري وينتر فالخدامة باش تكلس هي و فرحتو ملاقيش لمن يعطيها ... شد عليها القرعة وحطها على الطابلة وكلس حداها على الكنبة وهو معارف ميقول
كمال(بسذاجة):- لكن لكن كيدرتي وصلتي للمكتب الخاص اللي كنطلب منو البنات ؟
ناديا(بمياعة مصطنعة كتمضغ مسكتها):- واللي باغي يوصلك يدير أي حاجة السي كمال
كمال:- ناديا منساش ديك الليلة مين ...
ناديا(ابتلعت ريقها مين فكرها بيها ومدت يدها حطتها بفراغ على كتفو):- السي كمال نطويو الماضي خلينا حنا ولاد اليوم وبصراحة أنا مكنتش عارفة مصلحتي مزيان
كمال(بشيطنة):- ودبا عرفتيها"؟
ناديا(بعيون ملوعة):- أكيد وإلا مكنتش جيت
كمال:- شوفي راه أنا ولد الناس وكاع اللي قتلك عليه داك النهار غادي نديرولك لكن إلى كنتي معايا مرضية وو فهمك كفاية هههههههه
ناديا(ضحكت بسيف عليها):- ههههههه الله ياودي السي كمال اليوم جيت وانا ناوية نبداو صفحة جديدة
كمال(شاف فقرعة الشراب وفرح):- لا عااااارفك ماللي دخلتي معا ديك الباب بصح كيديرتي هربتي من دوك الجوج قنافح وليد وجاد ؟
ناديا:- معلمتهمش كاع هزيت سيارتي وجيتك تاشي حد ميقدر يوقف قدام السي كمال بجلالة قدرووو شكون هوما هادو اللي يوقفو قدام الرغبة ديالوو وبيني وبينك أنا مليت منهم مكرهتش نستقل وو نتا غاتعاوني ياك كيف قلتي قبل ؟
كمال(شافها قربت منو وابتلع ريقو مقادرش يتحمل):- أهااه اكيييد نتي غير آمري والسي كمال كلو ديالك يلااه يالاه نطلعو هاد القريعة للشومبرا لفوق وعندنا حديث طوووويل ههههههه الحبيبة ديالي
ناديا(قلبها بدا يشطح بالخوف):- ههههههه يالاه الزين يالاه
حطت يدها على سنسلتها ودارت راسها كتلعب بيها وهو شادلها يدها التانية ومطلعها كيضحك وضغطت على ديك البوطونة وهنا هو كان يتحرق ويستناها فوقاش تشعلها وكان غادي يتهور يفرع عليهم البيبان ويخرجها من ديك الفيلا ويوقع اللي يوقع المهم يطمن عليها لكن رحماتو من هاد الفكرة المجنونة مين شعلت الإتصال بيناتهم ... وصلها كمال لجناحو الفاخر ومد يدو باش يكلعلها جاكيطها وهي تنحنحت ولكن سايراتو وهي كتبتسم ولكن فيساع طيرتلو القرعة من يديه ومشات حطت جوج كيسان من اللي كانو فوق المنضدة وكبت كاس واحد وجابتولو وعينيها فاضحين مياعتها وهو حل قمجتو وتكا على سريرو وريشلها باش تجي تكلس حداه وهي كلست على الحافة ومدتلو الكاس لكنو فاجئها مين شد الكاس وحطو قدام الأباجورة وشدلها يدها وجبدها عندو وهي تهزت ووقفت كتتمايل
ناديا(بتهرب رجعت هزت الكاس ومداتولو):- السي كمال الليلة غادي تكون ولا فالأحلام غادي نسيك سميتك فيها لكن بشرط
كمال(قرب منها وهو كالس على ركابيه):- اللي هو ؟
ناديا(دفعاتو بطرف صبعها وجا ناعس على الناموسية):- تسمع لكلامي واللي نقولهالك ديرها
كمال(بقا يضحك بخلاعة خلاتها تشمئز):- طبعا طبعا أنا ملكك الليلة الحبيبة ديالي
ناديا(بسيف عليها ضحكت):- ههههه وهاكدة نبغيك ايوا هاك شد شرب هاد الكاس هو اللول وموراها نبديو العرض الخاص بيك بوحدك ههه هههههه
كمال شد داك الكاس شربه وهي جابت القرعة وزادت كبتلو كاس تاني وشرباتولو بسيف وهو تكا على سريرو وهي مشات سدت باب الغرفة بالمفتاح عليهم وقفت فالوسط وبدات تتمايل كتحل أزرار قميصها وعينيها عليه وهو ملهوف ريوكو كيسيلو بطريقة مقززة خلاتها تكره راسها وموقفها هادا اللي تحطت فيه لكن فتحت غير قفالة وحدة وجبدت من صاكها مينوط مدلدل بسناسل ووراتهملو وهو حل عينيه مصدوم بفرح من اللي ناوية ديرو وتقدمت لعندو كتتمايل
كمال(كيلهت):- ولايني نتي خطيرة معا راسك
ناديا(مضطرة تشم ريحتو المقززة):- هممممم قتلك غادي تكون ليلة عمرك منسيتها فحياتك
كمال بقا يصفق بفرح لكنها شدتلو يد وحدة وقيدتها معا جنب السرير وطلعت فوقو ونزلت برجليها بجوج على حواف السرير وهو فالوسط بجرأة خلاتو يتحمس أكثر بجنوووون منها وشدت يدو الثانية وهو مصدوم فيها ومتعطش ليها مين كملت ربطو معا داك السرير رجعت كبتلو كاس ثالثة وبقات تشربهالو وهي قربو وهو كيزرب فيها باش تبدي قبل ميهبل وهو مربوط ، استأذناتو غير لحظات ودارت روحها تخرب فصاكها اللي جبدت منو روب قصير وردي وريشتلو بباي باي زعما تدخل تلبس وتجي وهو بقا يتلاتخ فالسرير من الحماس ودخلت للدوش ودارت جهاز الإرسال فودنها
ناديا(بهمس خافت):- وليد
وليد(مغمض عينيه وشاد على قبضة يديه حتى بيضت مفاصلو من العصبية وفتحهم مين سمع صوتها):- غادي دبا حالا تخرجي من ديك الغرفة سمعتيني ولا قسما يا ناديا حتى نطلع ندير اللي ميندار
ناديا(عرفاتو غار وغادي يهبل):- وليد شتتت راني قربت بغيت غير نبلغك أنني ربطتو وو
وليد(قاطعها بعصبية):- راني سمعت داك الحديث المنحل وأنفاسو الحقيرة اففففف ناديا سمعي مني وخرجي من تما فوراا
ناديا(بنفاذ صبر):- إيلا ستحقيت شي حاجة غانكلمك سلام ....
رجعت سنسلتها لبلاصتها وخرجت ورجعت داك الروب لصاكها وهو تصدم مين ملقاهاش لبست
كمال:- واشنو الزين مالك ملبستيليش الوردي الحبيبة ؟
ناديا:- ا هههه بغيت نحيد حداك مكان لاش نتخبى شنو رايك ؟
كمال:- ياميمتي جريئة جريئة نتي هي النوع اللي كنبغي ويلاه الحبيبة راه ريوكي سالو من كترة مكنستنا فيك واش بغيتي تهبلي فيااا كتر من هاكااا هههه
ناديا:-حالا العمر حالا ... بصح باقي عندي شرط أخير بغيتك تنفذولي ممكن أكمولتي (بدلع)
كمال(بلهث):- الله الله على كمولتي خارجة من فمك كي العسل آمريني وانا خدام تحت رجليك نجوم الليل نجيبهملك لا بغيتيهم
ناديا(فكرت ولقات باللي هاد الكائن غادي تترتكب فيه شي جريمة خير الله تخلي الخطة فمنحى تاني وهزت واحد الشال نتاع الستائر اللي فبيتو ومشات عندو بنظرة خليعة):- بغيت نسدلك عينيك وتخلي غير ودنيك اللي معايا وخا ؟؟
كمال(مبغاش):- وانا كيفاش غادي نشوف اللوز اندوشتي ؟
ناديا(بنظرة إغراْْْْْْْْْْْْْء وإثارة):- عفاااااك أكمولتي عشان خاطري ؟
كمال(حل فمووو فدلعها ومقدرش يقاوم):- وخا الحبيبة اللي بغيتيها نديرهالك غير سربيني راني على نار على نار متلهف ليييييك بزاااف
ناديا صافي مقدرتش تزيد تسمع كلامو المقزز اللي جابلها التقية طلعت حاجب ونزلت حاجب وفيساع حطت على عينيه داك الشال وبقات تشوف فيه وهو مربوط بداك الشكل المضحك بصوفيطما وشورط فقط وفمو اللي كيتحرك بكلام بذيئ منحل وعلى نواياه شنو باغي يدير معاها هي مبقاتش قادرة تسمع داكشي ومشات بجدية ديريكت تقلب فدرج مكتبو وهو كيعيطلها لكنها صافي غاتنفذ مهمتها دبا وبقات مرة مرة ترد عليه وتقولو كتوجد راسها غي باش يسكت المهم بقات كتقلب ملقات والو فالمكتب وبقات تشوف فجنبات بيتو بتركيز لاربما لقات شي حاجة لكن والو مبان والووو وخافت لتكون مهمتهم فاشلة وتكبدو هاد العناء على والو هزت سنسلتها ورجعت هدرت
ناديا(بخفوت):- وليد ملقيت والو فمكتبو كيف بلغتني
وليد(كان شاد على راسو حاس بصداع ومقادرش يتحمل):- علاش مكتسمعيش الهدرة قتلك خرجي من تما يعني تخرجي من تما ؟
ناديا(زفرت بغضب):- هففف دبا أنا هنا قولي شنو ندير ؟\
وليد(بعد صمت تكلم):- شوفي مور شي صورة راه أكيد عندو شي خزنة واحد منحل بتفكيرو غايكون هادو حدود الأفكار عندو سربي راسك ...
ناديا رجعت سنسلتها بعصبية بلاما ترد عليه وبقات تقلب مور الصور حتى فعلا لقات خزنة والحلو أنها لقات فيها أرقام سرية وقالتها لوليد
وليد:- ناديا آنيلي العملية كلها وخرجي من عندك
ناديا(بنرفزة):- ممكن تتوقف على إصدار الأوامر
كمال(سمعها تهدر غي بوحدها):- حبيبتي فينك فينك معامن كتهدري ؟
ناديا(التفتت بعصبية عند كمال):- سكت نتااااا
وليد(مصدوم):- شنووو ؟
ناديا(تكاكات):- ماشي معاك نتا
كمال:- شنو قتلي
نادي(بصراخ):- يووووووووه صافي
طفات ديك البوطونة وقطعت الإتصال كامل بوليد و بقات تقلب فديك الغرفة والو ملقات حل وهزت شال من دوك الستائر وتقدمت عندو تربطلو فمو وهو كيهزز فراسو مفاهم تاحاجة جبدت سكين من جيبها
ناديا(دارت سكين على عنقو وهو بقا يرجف):- السي كمال غادي دبا تعطيني الأرقام السرية نتاع الخزنة ديالك بلا شوشرة وإلا غادي نغرقك فدموياتك
كمال(بقا يتمتم وهو مربوط الفم وحمار وجهه وهي زيرت السكين على عنقو بتهديد):- اممم اممم
ناديا(تنفست بعصبية):- غادي نحيدلك هاد الشال ولكن ياويلك وترفع صوتك قسما بالله غير موسي اللي غادي يكون آخر حاجة تشوفها فحياتك .. واش مفاهمين ؟؟؟؟
كمال هزز راسو مسكين كيرجف وهي حلتلو فمو
كمال:- والله والله حتى ندمك كتضحكي عليا يا .... (كلمات خايبة)
ناديا(زادت ضغطت على عنقو وهي شاداه من شعرو):- أظن كلامي كان واضح عطيني الأرقام ؟
كمال(جاه البكا وحس باللي وقع راسو فمصيدة):- مستحيل متحلميش
ناديا(دفعاتو على حيط السرير):- إيوا شهد على روحك الزين
كمال(كيرجف بالخوف):-سناي سناي سناي... قمممم غادي نقولك غادي نقولك
ناديا(طلقت شعره):- هاكدة نتفاهمو
عطاها الأرقام ومشات حلت الخزنة وجبدت الملفات اللي تما وكانو هوما المطلوبين حطتهم فصاكها ولبست جاكيطها وتقدمت عندو كديرلو من جديد الشال على فمو
ناديا:- هادي باش متنساش معامن كتلعب وتغامر السي كمال
خلاتو مربوط اليدين وعينيه مغمضين وفمو مبلع وهو كيلتخ برجليه القصار على ناموسيتو وكيأمأم وخرجت من بيتو مبعد مقفلتها عليه بالساروت لكن قبل متنزل لقات الكاردكول واقف فالكولوار وغي شافها استغرب لكن هي تحركت بمياعة وتململت بشعرها حداه
ناديا:- السي كمال مباغيش شي حد يزعجووو حتى لغدا الصباح آه راني عطيتو دروس خاصة و ياريت متزعجوهش عفاكم
الكاردكول:- وشنو هاد الصوت ؟؟
ناديا(سمعت صوت أمأمة كمال وقربت من ودن الكاردكول وهمست):- هادا الدرس الأول ههههه سلام
الكاردكول بقا يبتسم وفهمها شنو قصدت وبقا كيطلع فيها وينزل ومتعجب باستهزاء فمعلمو ونزل تاهوااا مخلي السي كمال عايش الدور الوهمي ههههههه
وليد(بعصبية كيهدر معا جاد):- سمعني راني مغاديش نستنى ناديا قطعت الإتصال وماشي بعيد تكون فخطر دبااااا دير اللي قتلك متهبلنيش حتى نتاااااااااااااا
جاد:- وانا مغاديش نخليك تغامر براسك ناديا قدها وغادي تنجح
وليد(خرج من سيارتو بنرفزة):- جاد دير اللي قتلك صافييييي
قبل ميوصل لباب الفيلا شاف البوابة كتتفتح ولقاها هي خارجة بسيارتها غي شافها اطمن وتنهد بعمق هي حركت سيارتها وسبقاتو بدون توقف وهو تبعها وصونا لجاد فورا باش يخويو المكان كلهم ويرجعو للفيلا ، كانت كتصوك وكترجف وعاطياها مية وستين ودموعها مبغاووش يسكتووو وهو موراها حاس بيها وبحالتها وصلت للفيلا ونزلت من اللوطو بهستيريا ودخلت للصالون وهو موراها ورمات الملفات بعصبية قبل ميوصل لعندها وصفحات منهم قاسو وجهه
ناديا(مسحت دموعها بيدها وريشت للأرض):- هاهوما ملفاتكم القذرة
وليد(باغي يكبت داك الغضب):- ناديا تهدني ومتعصبيش نتي راكي هنا دبا
ناديا(كتبكي وكترجف وكتتحرك من كل جهة):- أبشع مايمكن يتعرضلو الإنسان عشتو اليوم أنااااا اففف من أي نوع من البشر نتومااا آه ؟
وليد(قرب منها بعصبية):- علاش مخرجتيش مين طلبت منك ؟ وعلاش تقطعي اتصالك بياااااا جاوبي؟
ناديا(بسخرية مريرة):- صافي كي دخلت مكانش يليق نرجع نخرج وبلا فايدة عاد
وليد(مسح على وجهه بعصبية):- ناديا متغلطيش فكلامك
ناديا(بنرفزة تقدمت عندو وهي كتصوط):- مقادراش نتيق مقادراش نتيق لهاد الدرجة عندكم أعراض الناس لعبة مقادراش نستوعب قذارة الوسط اللي نتوما فيه تعرف باش حسيت وانا تما حسيت بالإشمئزاززززز بالتقزز يععع كان موقف آذاني بزاااااف وجرحني فالصميم افففف
بعدت من قدامو بتأفف ودموعها كيسيلو وفتحت باب الجردة الزجاجي وخرجت وهي كتمسح بكم جاكيطها حمرة شفاهها بقسوة وكحلها سال معا دموعها المتورمتين وكتتنفس بصعوبة باش تخرج داك الإختناق ، هو بقا يشوف فدوك الأوراق المنثورة هزهم ورجعهم للملف وحطو على الطابلة وتقدم لعندها بهدوء وقف بجنبها فين كانت واقفة كتشوف فالفراغ رابطة يديها وساكتة ..
وليد(معرف ميقول بصراحة هي عندها الحق):- آنا آسف اللي كنت يد فهاد الموضوع
ناديا(ضحكت بمرارة وشافت فيه بتعب):- همممم وفاش غادي ينفعني ندمك ولا اعتذارك دبا
وليد(التفت عندها بجدية):-طلبت منك تخرجي وقطعتي اتصالك بيا متصوريش كيفاش كانت حالتي مين درتي ديك الخدمة وانا معارفش شنو واقعلك الفوق ومعا داك المريض ورجالو محاوطين كل مكان كان ممكن لا سمح الله تنكشفي
ناديا(بوجع):- كتنسى فين تعرفت عليا أوليد أنا أصلا من داك العالم خرجت فمنضحكوش على راسنا
وليد:- لكن أنا عارفك ماشي هاكدك
ناديا(بلمحة حزن التفتت عندو تاهيا):- وفنظرك غادي يعنيلي الأمر ياك أنا غير كنقضي المصالح والمهمات الصعبة لسيادة البوس وجميلة وجعفر وفقط
وليد(شاف أمامو):- نتي جبانة
ناديا(بشر قربت منو وجرت يديه ودوراتو عندها):- شنو تفضلت ؟
وليد:- آه جبانة وبزااااف علاش مرفضتيش ببساطة
ناديا(عوجت شنافتها كتقلدو وبعدت):- علاش نتا باقي خدام معاهم مين كاع فيك هاد الشجاعة
وليد(جبدها من يدها لعندو وعينيه فعينيها تقريبا):- أنا عندي أسبابي
ناديا(نترت يدها):- وانا مكان عندي حتى سبب هوما خلقولي الأسباب مرض جدي ومساعدتهم مكانت إلا وسيلة باش يجبدو رجلي ومننكرش لوكان ما جميلة وجعفر لوكان راني نترحم عليه الآن
وليد:- وعلاش كملتي ؟؟؟
ناديا(تفكرت ياسر):- دبا واش نتا كتحاسبني حاسب نفسك اللول اللي مدخل راسك فهاد العالم القذر ووليت منو وفيه مقادرش تبعد مهما حاولت
وليد:- ماشي كلنا أقدارنا متشابهة
ناديا:- إيوا قولي أسبابك
وليد(قرب من وجهها وكيشوف باصرار فعينيها):- ممضطرش لذلك دبا يجي يوم وتعرفي كلشي
ناديا:- ههههه قتلتلوني بهاد الوعود الكاذبة تعرف شنو أوليد بعد مني عطيني التيساع
وليد(اعترض طريق دخولها):-ماشي قبل منسويو الأمور بيناتنا
جاد(دخل ولقاهم متشاحنين فالجردة وجا فايت):- أتصبحووو على خيرر
وليد وناديا فمرة:- بون نوي
شهقو بجوج وشافو فبعضياتهم هو تنهد بهدوء لكن هي هزت حاجبها رافضة لذلك طلع جاد وهو كيدندن وضارب الدنيا بركلة
ناديا(تجاوزاتو باش تفوت وتدخل):- يومنا كان مشحون خليني نطلع نبدل هادشي علياااا و هااااك سنسلتك قبل مننسى
وليد(حطتلو السنسلة فيدو):- اممممم كاع مين مرميتيهاش فوجهي باقي فيك أمل
ناديا(بابتسامة مستفزة):- ياريت نكون في مثل تفاؤلك والله لكن مقدرتش
وليد(شافها مشات):- ونتي من أهلووو
مالتافتتش عندو ووقفت شافت فداك الملف بحزن على اللي ضطرت تعيشه مقابلو و طلعت وهو بقا ملاحقها بعينيه ومسح على فمو بتعب وغضب لكن حمد الله أنها رجعتلو بسلام ، ويوجدو راسهم لبطش السي كمال مبعد لكن هادا غايتكلف بيه البوس ، هز تليفونو وصونا لجميلة وبلغها بنجاح العملية والأمور كلها تمام وهي حسب أوامر البوس طلبت منو يجيب ناديا ويجيو لعندهم للفيلا غدا على أكمل تقدير.. كلس بتعب على كنبة الصالون وتنفس بعنف فوقاش يتهناو من هاد الصراعات كلها فوقاش يستقر معاها كيف بغااا فوقاااش ودبا هاد البوس بمجيتو زادلهم غير المشاكل زفر بغضب وفتح أزرار جاكيطو ورماها بجنبو هز داك الملف ودخل بيه للمكتب ودارو فالخزنة ديالو وقفلها وطلع .. مباشرة دخل خدا دوش ولبس بينوار ديال الحمام رجالي فاللون البني فاتح وخرج كلس على كنبتو وهز واحد الكتاب وبقا يجرب يلهي نفسو فعالم تاني ولكن اشمن قراية كان يقرا السطور وهو عقلو غايب معااااهاا وخا كان مشتاق يقرا داك الكتاب اللي كان رفيقو لسنواااات حتى تفاجئ بيها دخلت لعندو بدون سابق إنذار وقفلت الباب موراها ...
قبل دقائق
طلعت لبييتها وقفلتها عليها بالساروت وبقات تحس براسها ثقيلة بزاااف من ديك الكسوة القبيحة حيدتها قطعة قطعة بكره فوسط البيت ودخلت جرية للدوش شعلت الما الساخن ودخلت تحتو وهي على ذات الهيئة بقات كتبكي وتبكي بحرقة وكحلها كيسيل معا كل دمعة وكانت كتمسح على جسمها اللي ضطرت تعرضو كنوع من التلهية لأبشع كائن فالأرض مخصو غير السيرك باش تكمل قذارتو حاولت تطرد ديك الساعة اللي عاشتها تما واللي عاشت فيها أقذر المشاعر وسمعت أقبح الكلمات البذيئة من داك بوكرش اللي مكرهتش تحشي فيه داك الموس ماشي غير تهددو بيه وحست بانها انتقمت منو لكنها مرتاحتش انما زادت تعذبت وحست بوجع قاتل بقات كتبكي وهي كتتفكر وفلحظة نزلت راسها وحلت عينيها ولقات دم كيسيل منها حست بالرعب وشهقت وشدت على فمها من الصدمة ولدها ولدهااااااا محست باش تبلات فيساع استدركت نفسها ولبست لباس نوم كرتوني كان معلق فالعلاقة وخرجت بشعرها مبلل وجسمها اللي تلصق عليه شوية داك اللباس من البلل وبقات تخرب فكرشها وتبكي بمرااارة لالالا إلا ولدها شنو دير شنووو دير دباااا بقات كترجف بالخوووف وشافت فالباب وخرجت دخلت ديريكت لبيتو وهنا هو تصدم ووقف عندها كيجري
وليد(شافها فحالة مرعبة):- ناديا ناديا مالكيييي ؟
ناديا(بقات كترجف وقربت منو غي نص الطريق وهو جرا عندها وبقات كترمش بعينها):- عفاك عفااااك أوليد ... وليد ع... عتق.... ديني للمشفى حالا حاااالا
وليد(كيحاول يفهم منها مخلوع):- ناديا مالكي جاوبيني شنو واجعك؟
ناديا(نزلت راسها شافت ففستانها اللي بانت منو بقعة دم وبقات ترجف بين يديه):- ولييييد اهئ خذني للمشفى عفاااااك دباااا اهئ اهئئئ
انتبه لبقعة الدم اللي على فستانها وشهق بصدمة وخوووووف فيساع دخل كيجري للدوش ولبس سروالو وخرج نصف عاري بدون تفكير ولا وعي وهي شافت فيه وزادت دموعها خوفااااا من اللي جاي وهو فيساع لبس تريكوه ومشا يجري لبيتها بخطى متسارعة بقا يشوف ولقا معلق تريكوها الكاشمير الرمادي اللي بالقب وهزو فيساع وجابولها لبسهلها وهي كترجف مقادراش تتحرك ولا تدير شي حاجة وجا يوقفها لكن كانت فاشلة تماما بالخلعة وبانهيار بالبكا وقفت بصعوبة وحط يدو تحت رجليها وهزها بين يديه فحضنو وهو كيطمن فيها باش متخافش
وليد(نازل بيها الدروج):- ناديا سمعيني غاتكوني مزيااااانة عفاااك متفقديش وعيك وركزي معاياااا صافي صافي هانا غاناخدك فورا للمشفىىىى انادياااا بقاي معايا..
نزل بيها من الدروج بهدوء تام وفتح باب الفيلا بيد ولقا العساس اللي غوت عليه فيساع باش يفتحلو باب السيارة ويحلو البوابة وهاداك محسش باش تبلا تاهوا فيساع فتحلو باب اللوطو وكلسها بجنون ومشا يجري ركب حداااااهاا
وليد(خرج فيه عينيه):- متجيب لحد خبر بخروجنا تفاهمنااااااااا ؟؟
العساس(برجفة) :- أمرك أمرك
حرك سيارتو بسرعة جنونية خايف عليها وخايف من أنها تتألم إلى وقعت شي حاجة لولدها هي مقاتلو والو لكنو كان عارف وفهم خوفها بقات كترجف وتترعد وكتغيب عن الوعي لكنو كان كيهزز فيها مرة مرة وهو كيكسيري ويعاود واتصل بمصعب باش يطير بدورو لعيادتو لاحقاش غايجيبهالو فورااا استجابلو مصعب اللي نزل فنص الليل تاهوا ومشا بدورو باش يتلاقاو فالعيادة .. كان كيصوك بيد وشاد بيد على يدهاااااا مزير عليها ومكرهش يحيدلها خوفها اللي كتحس بيه ووجعهااااا بينو وبين نفسوووو حس بزاااف باالألم من اللي كتتعرضلو وكلو بسبب طمعهم وجشعهم هي راها تتأذى وهاهيا اليوم غتفقد ولدها ولا بنتها وهادا اللي غادي يخليها تهبل ولا تدير فراسها شي عجب، طرد من بالو دوك الأفكار السوداوية وبقا يحك فجرايرووو باش يوصل بأسرع وقت وينقذهااااا .... من بعد مدة وصل بيها للعيادة ولقا الممرض كيستانهم برا بكرسي متحرك وليد طار وهزها حطها عليه و وخلا بيبان اللوطو محلولين مكانش فوعيو نهائيا دخلها كيجري معا داك الممرض و غير شافها مصعب من فوره أمرهم يجهزو غرفة المعاينة دخلها الممرض وجا تابعو وليد ووقفه مصعب
مصعب:- بقا هنا أوليد متقدرش تدخل
ناديا(كانت شادة يد وليد وبرجاء وخوف كانت تشوف فيه وهو شاد يدها كذلك بخوف):- متخلينش أوليد
وليد(مقدرش يتحمل):- مصعب عفاك خليني نكون معاها
مصعب:- وليد وليد نتا واعي تماما وعفاك بقا هنا أي تأخير فيه خطورة عليها
ناديا (بتعب وحالة إغماء):- ولييييد
وليد(قلبو تقطع عليها وانحنى باسلها يدها وبقا شادهم بطمأنينة):- غانكون هنا نستناك وخااا متخافيش
مصعب هزز براسو للممرض اللي دخلها وجا تابعه
وليد(شد مصعب من طابليتو):- الله يخليك دير كلشي ونقذ البيبي أمصعب
مصعب(هزز راسو بضعف):- ربي يعاون
ناديا إيلا خسرت البيبي مصيبة كبيررررة وأزمة نفسية غادي تخليها تعيش فصراع طويل المدى معا ذاتها هادا إيلا مستعملتش أكثر الطرق جبنا ودارت شي عجب فراسها من بعد ولدها فنظرها مبقالها والو ،كانت كترجف و كتدعي فسرها ربي يوقف معاها وللحظات ولات الصورة عندها مضببة وفقدت الوعي أخيراااا ، أما هو كان كالس فالكولوار نتاع العيادة على الجمر حاط يدو المجموعين على فكو بقلق وندم وخووووف عليهااا بقا كيدعي تاهوا ربي يوقف معاها وينقذو البيبي دقائق من الجحيم وهو كيستنا ومرة يوقف مرة يدور مرة يحك فراسو مرة يتكا على الحيط مرة يشوف فالساعة وتاشي حد مخرج من ديك الغرفة أما هما فكانت شبكة عامرة قدامهم بقطن معمر بالدم ومصعب داير على فمو كمامة وكيخدم بيديه اللي فيهم ليكويات لربما قدر يوقف داك النزيف من بعد مدة فاتت طوييييلة وقاتلة لوليد خرج أخيرا مصعب كيحيد كمامتو وليكوياته وطار عندو وليد
وليد(خايف يسول):- هممم أمدرا ؟
مصعب(تنهد بصعوبة وشاف فيه بتعب):- بقاء الجنين للآن حي راه معجزة مع أنها نزفت بزااااف جبتها فالوقت المناسب أوليد لوكان تأخرت غي شوية كنا غانخسروووه
وليد(بفرح شدو من يديه):- قل والله يعني الجنين بخير اطمنت عليه بصح؟ وناديا ناديااااا كيراها؟
مصعب:- طمن أوليد الجنين بصحة جيدة ودرتلو اللازم باش نطمن ونبشرك عندكم ولد الله يسخر
وليد(بشرود):- ولد ؟؟
مصعب:- آه ولد تبارك الله عليه نموه ممتاز الحمد لله ونبضاتو منتظمة لكن هي اللي صحتها دبا محتاجة لدعم وفيتامينات باش تسترجع كمية الدم اللي فقدتها وتوقف من جديد على رجليها
وليد(عينيه دمعو بحزن وبفرح نفس الوقت من اللي سمعو):- مصعب نقدر ندخل عندها دبااا ؟
مصعب:- آه أكيد شوية وغاتفيق
وليد:- المهم هي بخيررر دبااا شكرا أمصعب معارفش كيفاش نشكرك
مصعب:- راحنا خوت أصاحبي وفرحك هو فرحي الله يسخر وايلا بغيت تبقى بجوارها فالغرفة مكان مشكل أصلا معنديش دوام غدا ومكاينش المرضى بزاف لذلك غانكون هنا فمكتبي إيلا ستحقيت شي حاجة علمني
وليد:- لا مصعب راه جبتك من دارك فهاد الوقت غير سير نتا وانا غانبقى معاها وزايدون الممرضين موجودين هنا
مصعب:- واش متأكد ؟
وليد:- آه أصاحبي متأكد غي سير رتاح ولهلا يخطيك
مصعب :- طيب أنا غدا صباح بكري غانجي عندكم باش نطمن على صحتها وتقدر تخرجها مبعد
وليد:- شكرا أمصعب تصبح على خير
مشا مصعب وخلا وليد متردد واش يدخل وكيغايدير يشوف فيها أو يواجهها بهادشي لأنه دبا صافي غاتعرف بأنه عارف كان خصووو يفكر مية تفكير قبل ديك الخطوة ولقا الحل أنه يتصل بجميلة وهي تخبرو شنو يدير فديك الحالة خصوصا وهي عارفة بالموضوع لكن هي معارفاش باللي ولد ياسر وهنا المصيبة واش غايصارحها بكلشي يخاف شي حد يعرف وتنوض مشكلة هو فغنى عنها لكن داهمو الوقت وبدات كرشها تبان صافي خصو يتحرك وهادا الوقت المناسب وخصوصا أن البوس قرر تزويجهم إذن كلشي محلول من غير قضية ياسر اللي غايلقاولها حل تاهيا .. غمض عينيه وحط تليفونو فجيبو وفتح الباب ورجع سدها واتجه لعندها كانت على داك السرير الأبيض بملامح شاحبة ناعسة بسكون ومعلقيلها السيروم من يدها ، جر كرسي وكلس حداها جبد يدها وحطها بين يديه وبقا يمسحلها على شعرها بهدوء متمتع بسكونها وروعتهاااا ومتألم من اللي تعرضتلو وفرحان اللي هي بخير والجنين كذلك ومقهور أنه تمنى لوكان كانت ملكووو فديك اللحظة وخايف من اللي جاي.. المهم مشاعرو كانت مشتتة مرتبكة لكن أهمها أنه اطمن عليها وهادا اللي كان مبرد على خاطرووو ... مبعد شي ساعة ونص تقريبا بقات تحرك صباع يديها وهو حس بيها واعتدل فجلستو باهتمام كيشوف فيها وهي كتحرك حجبانها وعينيها باش تفيق كانت حاسة براسها ثقيل بزاف عليها والدنيا كدور بيها بصعوبة فتحت عينيها والضو ضارب فيها بقات كتحقق وتشوف هي فين والتفتت لعندو كان كالس قربهاااا
ناديا(بثقل):- و.. وليد
وليد(قرب منها شادلها يدها كيطمنها):- أنا معاك أنادياااا نتي بخير دبا ؟
ناديا(بدات توعى وبهلع حطت يدها على كرشها وبدات ترجف وتبكي):- وليد ولييد ال...
وليد(ابتلع ريقو وعرفها مقدرتش تنطق لكن خصو يحسم الأمر وهادي فرصتو):- طمني الجنين بخير
ناديا(تضرب فودنها الرعد وتزلزلت النظرة وشافت فيه بعدم تصديق وفشل فلسانها نطقت):- ش...شنو؟
وليد(ابتلع ريقو وخصو دبا يكمل الكذبة وإلا غادي يخسرها):- علاش خبيتي عليا موضوع حملك أنادياااا كان منحقي نعرف بيه
ناديا(ببكاء فرحانة اللي ولدها بخير):- أنا أنا ... اففف الحمد لله اللي حفظتولي ياربي ياااا الله
وليد:- الحمد لله الدكتور طمني على صحتو و قالي خصك ترتاحي هاد الفترة باش ترجعي أحسن و قالي
باللي غايجينا ولد رائع
ناديا(بعيون لامعة تحسست كرشها):- ولد ياااااه
وليد(بمزاح):- أهااااه نتمناو غير ميخرجش عاصي وراسو قاسح بحال ماماه
ناديا(بابتسامة شافت فيه):- شكرا أوليد دائما كتوقف معايا
وليد(باهتمام وجدية):- شتتتت دبا متقولي والو من غير أنك ترتاحي باش يكون بطلنا على خير مايرام
ناديا:- بصراحة فاجأتني أنا كنت خايفة من أنك تعرف خصوصا بسبب الحملة الدعائية ومنكدبش عليك مكنتش واثقة فيك ولا فجميلة أو جعفر لا عرفو غادي يحرموني من ولدي وانا منقدرش نتحمل وليد غادي تساعدني ياااااك متخليهمش ياخدوه مني ؟؟؟؟
وليد(مسحلها على شعرها):- مغادي نخلي حد يقرب منك أو منو متخافيش أناديا نتوما فحمايتي دبا
ناديا(ارتاحت بصدق):- غادي تبلغهم؟
وليد:- افف حاليا لا لكن قريبا ضروري مغايعرفو
ناديا(شدت يدو وحست بالنعاس):- تواعدني ؟
وليد(وقف وانحنى على راسها وباس جبهتها):- نواعدك أناديا نعسي دبا ورتاحي
نعست وهي فرحانة بولدها اللي فأحشائها كيتربى يوم عن يوم وموقعلو والو وخا مسكين شاف معاها المرار لكنو قوي بحالها وتحمل كاع الصعاب معاها وكأنه كيساندها ويدعمها ، أما وليد كانت فرصة ذهبية جاتو هو عارف تماما أن البوس غادي يقوم الدنيا لاعرفها حاملة دبا وفهاد الوقت وغادي يعرف أنه من ياسر لذلك قرر يعجل بموضوع الزواج باش يربح الوقت و مين تكون على ذمتو مكانش اللي يهدر ويقدر يحميها منهم .. لكن المصيبة الكبرى هي زواجها من ياسر وكيفاش غادي يديرلو ..
كان كالس فالشرفة ديال البيت ديالو وكيشوف فداك الحي الشعبي اللي ولا مألوف بالنسبة ليه ديك الفترة كان كيشوف فالسما مرة مرة اللي كانت متلألئة بمئات النجوم كان داير قب على راسو ويديه فجيوبو وكيفكر فيها و فآخر مرة شافها نهار خرجتلو من الفيلا وكيفاش كانت تترجاه باش ياخذها معاه زفر بعدم صبر وهو مضطر لداكشي ومستحيل يتخلى على انتقامو لا من جهة جعفر ولا ابراهيم اللي كان متابع الأمور من بعيد ياسر مبعد معرف البوس جا سهالت عليه باش يقدر ينال منهم كاملين .. تنهد بصعوبة وشوق وفهاد اللقطة خرج جعفر وكلس حداه على الكرسي
جعفر:- شحال من نجمة ؟
ياسر(بعدم فهم):- شنو ؟
جعفر(دار رجل على رجل وشعل كارو):- ومقبيلة ونتا تحسب النجوم قلت نعرف شحال خرج معاك
ياسر:- يا لطافتك
جعفر:- هي هي والله فرحت اللي رحمت ديك المجلة اللي كليت جنابها مسكينة من كترة مشديتها بين يديك لكن بجدية شنو كدير هنا فهاد الجو ؟
ياسر:- غير مجانيش النعاس وقلت نتأمل مكان ميتشاف فهاد الحي اصلا غير راني نتلف
جعفر:- عيييب يا ولد هاد الحي هو اللي راه ساترك
ياسر(هزلو يديه بدون اعتراض):- ومقلنا والو
جعفر:- هاكدك
ياسر:- ايوا وونتا واش نوضك من فراشك فهاد الليل وهاد الجو؟
جعفر:- مجانيش نعاس تانا
ياسر:- ههههه كاع أنا وباين كنفكر فمرتي حبيبتي ناديا ونتا راك كتفكر فجميلة يالعفريت؟
جعفر(حيد الكارو من فمو وبجدية شاف فيه):- كون تحشم أهاد الولد راني قد باك احترمني
ياسر:- اممممم متلفش الهدرة
جعفر:- وسكت سكت شحال فيك يجي بنادم يفوج معاك تندمه
ياسر:- لاحقاش كنطيحلك فالبوان فيبل
جعفر(ناض):- وشبع تأمل فالحومة غادي نمشيو منها عما قريب؟
ياسر(باستغراب):- علاش؟
جعفر:- البوس هادا أول مكان غايقلب علينا فيه ووجودنا خطر
ياسر:- وفين نمشيو ؟
جعفر:- لواحد المكان دبرولنا جوليو متخممش غانكونو فأمان
ياسر:- أوك اللي تشوفه
جعفر:- احياني على العقل والصواب اللي كيطيحو عليك فجأة كتجبلي ميبقاش بيهم
ياسر:- وحرنا معاك تربينا مشكلة تمردنا مشكلتين
جعفر:- أنا راه في بالي غير سؤال كيدور
ياسر:- واللي هو؟
جعفر:- بنت البوشتاوي شنو غايصرالها مين تعرف
ياسر(كاره الحديث وضربو بيدو):- الله يعطيك متاكل توقعتك كاع غاتقول شي حاجة
جعفر:- هههههههه ونوض نوض مالبرد
دخلو وسدو باب الشرفة وهي فالشرفة التحتانية لوات على كتافها الشال ودموع حارقة كتنزل كي الشلال من عينيها سمعت كلشي مالحديث اللي دار دخلت بوهن وبقات تشوف فالمجلة وفصورة ناديا اللي عرفتها هي مرتو هي اللي فحياتو وبقات تلوم راسها كيفاش مكشفتش الأمر اللي كان واضح خصوصا نهار جابوه مريض كان كيهذي بسمية ناديا ، بنظرة حارقة ومؤلمة لعنت غبائها وتفكيرها وخيالها اللي عاشتو معاه وهزت ديك المجلة وضربتها معا الحيط وطاحت على سريرها كتبكي من حرقة ماسمعت منهم لفوق وصدرها باغي يخرج من مكانو من الألم اللي فيه ...
غداليه الصباح فتحت باب بيت باباها ملقاتوش وفتحت بيت ناديا ملقاتهاش ومشات تجري لبيت جاد فتحتها ودخلت تجري نقزت عندو فالسرير
سارة:- أونكل جاد أونكل جاد ويكاب .. فيييق أونكل جاااااد
جاد(منزعج وكيتململ):- هممم سارررررة بيبي خليني نعس راني مشبعتش نعاس اليوم
سارة:- يوووه مامي مكايناش ودادي مكاينش والخالة ناديا مكايناش
جاد(كان دار يدو على وجهه وحل غي عين شاف فيها):- يكونو فالجردة كيفطرو
سارة(هزت راسها بنفي):- نووو العم عماد قالي مشافهمش ومزال موجد الفطور
جاد(حس بشوية قلق):- طب شفتي فالجردة أو لابيسين ؟
سارة(بتذمر):- اففف غادي تصرعني أسئلة فييييق
جاد(بعصبية مرحة):- أنا عااارف عارف نتي ومك غادي تجيبو آخرتي
سارة(بتساؤل):- مفهمتش
جاد(رما الغطا وناض):- أحسن يختي معندك متفهمي غي سكتي
سارة:- ههههههههه
جاد:- سااااارة اجي لهنااا نوريك ضحكي على عمك جاد اجي
هزها وبقا يهرهرها تاسخفت بضحك ونزلها دخل للدوش غسل وجهه ولبس تونيه وشدها من يدها ونزلوو لتحت
جاد:- عماااااد وا عماااد
عماد:- نعم سيد جاد الفطور دقائق ويكون جاهز
جاد:- خليني مالفطور دبا قولي فين الجميع؟
عماد:- صراحة معارفش
جاد:- ونتا شنو شغلتك اسيدي إيلا معارفش شكون باغي يعرف أنااا ؟؟ صافي سير كمل شغلك
سارة:- بغيت مامي
جاد(هز تليفونو وكلس على الكنبة وجر سارة فحجرو):- شتت بيبي دقيقة غادي نعرفو فين هيا ماماك
تتت ألووو هيلين فينك؟
هيلين:- أنا فمركز التجميل جيت معا لين عندي شغل ساعة ونرجع للفيلا .. فاقت سارة ؟
جاد:- آه فاقت وهبلتني لكن احم قوليلي شنو كديري فالصالون وعلاش معندي علم؟
هيلين(بمياعة):- هششش راك تهدر هاد الهدرة وسارة حداك ولايني مجنوووون
جاد:- علاش مجنون عندي فضول ؟
هيلين:- وسكت دبا تانجي وتعرف بنفسك
جاد:-ينفع نتحسس ؟
هيلين(بضحك):- تبا لك هههه
جاد:- هههههههه طيب طيب سكتنا مي قوليلي واش ناديا معاكم ؟
هيلين(ضربها البرق وتعصبت):- وعلاش غادي تكون هاديك معانا ؟
جاد:- محيت مكايناش فالفيلا وتاشي حد معارف فين هياااا
هيلين(بنرفزة):- سول عليها المستر راه هو اللي عارف حتى عدد نبضاتها فالدقيقة
جاد:- ههههه عليك شي حوايج مين تنفاعلي عموما هاحنا نستناوك متعطليش
هيلين:- اوك سي يو
سارة:- اونكل جاد بغيت كونفليكس
جاد:- اهااااا وسبقيني للكوزينة غانجي فوراااا
مشات تجري قبلو وهو هز تليفونو يصوني لوليد مكايجاوبش استغرب عدم تواجدهم بجوجهم وعوج شنايفو بحيرة وقرر يستنى لربما جاو مشا فطر هو وسارة تحت جو مرح وهو كيقشب على عماد وسارة مفكوعة بضحك .. أما فالمشفى كان هو واقف معا مصعب
مصعب:- باينة فيك منعستش ؟
وليد(زم شنايفو):- اممم مقدرتش قلت وقيلة تفيق وتبغي شي حاجة
مصعب:- سعداتها بهاد الحب كامل
وليد:- هشش مهاد الكلام وطمني على صحتها ؟
مصعب:- مبعد معاينتها نقدر نقولك تقدر تخرجها لكن خصها الراحة وتبع الدوا اللي غادي نعطيهلها
وليد:- تمام فرحتني بزاااف غانمشي نخبرهااااا
مصعب(شد وليد من يدو):-وليد
وليد(بتساؤل):- امممم نعم أمصعب ؟
مصعب:- شوف بلاما تقلق مني ولا تاشي حاجة أنا باغيك بما أنك هنا ومتعتارضش عفااااك
وليد(برفض قاطع):- مصعب الله يخليك واش هادا وقت تحاليلك دباااااا خليني عليك
مصعب(مزير على يد وليد):-مغاديش نخليك فحالك وغادي تدير التحليل اليوووووم
وليد شاف إصرار مصعب اللي كان فوق طاقتو هاد المرة لكن اللي فراسو فراسو مبعد مدة دخل لبيتها وبابتسامة مرسومة على وجهه كلس حداها على الكرسي
وليد:- عندي خبر سعيد نقدرو نخرجوو هاد الصباح
ناديا(ببسمة خفيفة):- بصح رائع
مصعب(دخل كيكتب فواحد التقرير):- نادياااا بغيتك تهلايلي فراسك وممنوع الإنفعال الزايد ويلا عصبك هاد الأخ ديريلي رنة نجي نتفاهم معاه
وليد(كيحمر فيه باش يسكت):- ا هههه مصعب كيموت على المزاح
مصعب:- شكون قالك كنموت على المزاح انا بعدا كيعجبني البوعويد ههههههه
وليد عض شنافتو لمصعب باش يسكت وهي بقات كتضحك على داك المنظر
مصعب:- عموما مترهقيش نفسك كيف قتلك راه قلب مولاي السلطان هشيش ولبارح كان خايف عليك بزاااف وعلى البيبي
ناديا:- سمحولي عذبتكم معايا
مصعب:- مكان تاشي مشكل مي انا عارف صاحبي خصوصا إلى تعلق الأمر بالوليدات صغار كيحماق فين عاد ولدووو فطبيعي ميتقلق ايوااا شنو غادي نقوول غانستناو شي عراسية دايرها الكلام
وليد(ضرب على وجهه بعصبية مضحكة من كلشي اللي قالو مصعب مكان غي الفضايح):- شكرا شكرا أمصعب سيررر دبا وخلينا باش نمشيو
مصعب(همسلو):- قلت شي حاجة وا امم ؟؟
وليد(كيضحك بين سنيه باغي يقتلو):- لالالالا مقلت والوو غير الخيرر ههههه
ناديا حشمت بزااااف وسخانة طلعت معاهااااا من كلام مصعب وقلبها بقا يضرب بشدة بخوف وقلق اخيرا خرج مصعب وتبعو وليد للباب قفلها وتقدم بتردد لعندهااا وهي تحركت وكلست أفقيا على السرير باش تنوض لكنو استوقفها وبقات كالسة وهو واقف أونفاص ليها
وليد(حك راسو بحرج):- مديريش على كلام مصعب راه غير ...نتي فاهمة
ناديا(بحرج أيضا):- نننن مكان مشكل
وليد(تنفس بعمق وانحنى لعندها وحط يديه على سطح السرير وحدة على اليمين والتانية على اليسار وهي فالوسط استغربت لكن متحركتش وهو قرب من وجهها):- نهدرو بصراحة أنا مكرهتش لوكان كان داك الكلام اللي قالو صحيح
ناديا(بغات تتحرك لكن مد يدو وشدها من كتفها غير بشوية وهي بقات تشوف فيه):- وليد ..
وليد:- عارف اللي كانتمناه صعب إيلا مكانش مستحيل لكن بغيتك تعرفي بأمنيتي
ابتسملها بحسرة وهز بونطوفاتها القططية وانحنى على الأرض لبسهوملها وهي كانت كتشوف فيه ومتبعة حركاتووو وفقلبها غصة وحسرة فنفس الوقت وفكرة حدة ضربتلها فالراس أنه منى لوكان كان ولده مبعد اللي وقع فاليخت مقدرتش تستوعب أمنيتو وهي مندهشة فملامحو الجدية.. وقف وجرلها الكرسي وساندها كلست عليه غير بشوية وخرجو مالمشفى ، ركبها فسيارتو ومشاو
ناديا(قطعت الصمت):- وليد .. نتا ضامن الدكتور مصعب .. يعني ميتكلمش فهاد الظروف
وليد:- أكيد عتابري الأمر منسي بالنسبة ليه
ناديا:- شنو غادي نقولولهم فالفيلا ؟
وليد:- امممم وجعاتك المصرانة فالليل ومشينا لوبيطال ومكان تاشي حد يعرف
ناديا(براحة وطمئنان وبامتنان شافت فيه):- وليد
وليد(كيحاول يركز فالصوك باش ميفقدش اعصابو معاها):- نعم
ناديا:- نتا كنت عارف ؟
وليد(تنفس بتعب):- اممم المهم نتي بخير
ناديا:- عرفت الجواب اصلا تصرفاتك واهتمامك بصحتي و أكلي الفترة اللي فاتت كانو كيدلو على أنك عارف لكني مستغربة علاش مقتلي والووو ؟؟
وليد(اصطنع الكدبة):- أي واحد فحالتي كيستنا الخبر منك يجي
ناديا(تصدمت وحلت فمها بتشكيك):- وليد ياكماااا فبالك أنه يعني .......
وليد(كسيرا اللوطو بعنف ووقف ودار عندها):- اطمني أناديا منيش بداك الغباء باش نتوقع أنه ولدي عارف شنو كيدور فراسك مبعد اللي وقع بيناتنا
ناديا(عضت شفتيها ببكاء):- أنا خفت تكون ...
وليد(مسح شعرو بقوة):- هو عارف ؟
ناديا(فاجأها سؤالو وهززت راسها نفيا):- نننن
وليد(رتاح ولو قليلا):- وغادي تخبريه؟
ناديا(نزلت راسها بدموع فعينيها وتفكرت أنه مبغاش يهربها):- تتت
وليد(شاف فيها بعمق):- طيب غادي نتافقو على حاجة قبل، منهنا لفترة الولد غايكون ولدي معندنا كينديرو أصلا كرشك راها كتبان ومنا لفترة بسيطة غاتبان أكثر وعليها غادي نتصرفو قبل
ناديا(مسحت دموعها بكلينيكس نتراتو من قابصة اللي فاللوطو):- علاش كدير هاكدة ؟
وليد(باستغراب متألم):- كيفاش يعني ؟
ناديا(شافت فعينه بعمق):- علاش كتوقف معايا وباغي تحميني وتحميه ونتا عارفو أنه ماشي ولدك
وليد(قتلاتو بهاد الجملة ماشي ولدك ومكرهش يرميها من السيارة ولعن فكرتو الهبيلة):-تقدري متستفزينيش لو سمحتي محيت منيش بخير هاد الوقت هاداااااا رجاءاااا تطوي الموضوع
ناديا(غادي تزيد تكمل مصايبها مكتحشمش):- لا انا مصرة باش نعرف ؟
وليد(صاك اللوطو بنرفزة وعصبية):- ناديا سمعي كلامي وطوي الموضوع
ناديا(التفتت عندو بتركيز واستفزاز):- من فترة بسيطة فقدت الثقة فكلشي فمتخلينيش نتصدم حتى فيك نتا أوليد
وليد(شاف فيها بعدم تصديق وعقد حواجبووو وملامحو متصلبة):- أنا ماشي بحال ناس خرين
ناديا(فهمت مقصدو):- اففففف ياخوفي تكون عندك مصلحة من هادشي كامل وفالتالي نصدق واقفة ففراغ فقط
وليد(تصدم وهنا جابتلو ميبقاش حك جراير ديك اللوطو بعنف غادي يتقلبو والتفت عندها):- باغية تعرفي علاش كندير هادشي وخا ألالة ناديا ميكون غير خاطرك غادي نوصلو للفيلا وترتاحي اليوم وغدا وعد مني حتى نديك باش تسمعي بودنيك أسبابي تافقنا ؟؟؟
ناديا(بعدم فهم):- فين تديني ؟
وليد(كمل الصوك بجمود):- عند جميلة
ناديا(بتساؤل):- أو واش دخل جميلة فكلامنا؟
وليد(بجدية ممزوجة بالعصبية):- تقدري ترحميني وترحمي راسك وتخلينا نوصلو بخير وسلامة للفيلا لأنك إلى ستمريتي غادي نضطرو نوليو عند مصعب محملين فسيارة إسعاااااف
ناديا شافت فيه مكانش كيضحك كان كيهدر بصح وبعصبية عقدت حواجبها وعدلت كلستها وهي حاسة بوجع فكرشها يختي يختي وسقري ونتي قالبة الراس لداك الراجل مسكين يالطيف منك وصافي ^^
شاف فيها سكتت وتنفس الصعداء كان كاره فالحقيقة وحاس براسو ضايع مشتت كان فاللول مرتاح ولو شوية مين مكانتش عارفاه عارف أما دبا تقول جبل وتحط فوق كتافو .. وصلو للفيلا وفتحلها الباب وهي نزلت تتمشى غير بشوية وتوازنها مختل مخلاتوش يهزها لكن حاوطها بذراعو وياويلها وتنطق وخلاها تسند عليه تادخلوو ، كان كالس جاد وهيلين كيشربو القهوة وسارة حداهم تتفرج وانتابهولم واستغربووو بزاف منظرهم الغريب ، هي كمشت تريكوها عليها أما هو بعدها غير شوية عليه وطبعا لأنها هي دفعت راسها.. وقف جاد باستغراب عندهم كيشوف فوجههم بجوج صفر وهي باينة فيها مريضة من حالتها
جاد:- ياك لاباس فين كنتووو ؟
وليد(نطق قبلها وهي سكتت):- وجعتها المصرانة لبارح فالليل وديتها للمشفى
جاد(مخلوع):- بصصصح وعلاش مفيقتنيش أصاحبي نمشي معاكم ؟
وليد:-مفكرتش المهم هي دبا مزيانة خصها ترتاح
هيلين(وقفت كطلع فيها وتنزل وهي مكمشة عينيها):- علا سلامتك ومزيان عندنا بطل خارق كيتصرف فالوقت المناسب ههههه (كضحك باستفزاز)
ناديا(بدون حياة):- الله يسلمك
سارة:- ناديا لونك شاحب جدااااا ؟
ناديا(ابتسمتلها بحب):- غانكون بخير احبيبتي
جاد(طلع حاجب ونزل لاخور ممقتنعش كاع):- الله يشافيك
وليد(قاطعهم كاملين ومشاها رغما عنها باش تطلع):- شكراااا ليكم
زفر بحنق و تمشى بيها للدروج وبقات تطلع غير بشوية وهو مساندها مطلقهاش وخا كانت كتبعد يديه قدامهم لكن كان مصر فاستسلمت لعنادو طبعااا ...
هيلين(باستغراب شافت فجاد):- جاد هاد الفيلم دخل لعقلك ؟
جاد:- ولا فات مخي أصلا
هيلين:- كاين شي حاجة غريبة واقعة هما مكايقولوش الحقيقة
جاد(بتساؤل):- وفنظرك شنو يكون الأمر؟
هيلين(بتشكيك ونظرة تفكير):- منيش عارفة بالضبط لكن كاين شي حاجة غلط
جاد(وجعه راسه وبعد هاد الأفكار):- ياستي بكرة يدوب الثلج ويبان المرج
هيلين:- على قولتك دبا يبان المخبي
كانت حاسة بتوجس منهم بجوج كلست على الكنبة وهي مزال كتفكر وشاردة وحتى جاد كان مداخلش لراسو هاد الكلام لكنو مشاه معندو ميدير ...هنا كان وصلها لبيتها وكلسها على السرير
وليد(انحنى لمستواها):- نعاونك فشي حاجة ؟
ناديا(هزت راسها نفيا):- تتت غانكون بخير
وليد(وقف بعدم استماع ليها طبعا وفتح دولابها وبقا يقلب قدام عينيها المستغربة):- امممم
ناديا(ممصدقاش):- ممكن نعرف بالضبط نتا شنو كدير ؟
وليد(بدون ميلتفت ليها):- كيما كتشوفي كنحاول نقلبلك علا ماتلبسي
ناديا(بتأفف السيطرة):- متزيدش فيه قتلك غانكون بخير \
وليد:- مكانقتانعش بكلامك للأسف خصني نشوف بعيني ... آه لقيتهم هاد البيجامة غاتكون مريحة
ناديا(شافت فبيجامتها الرمادية بين يديه وابتسمت رغما عنها):- أتمنى غير متحماقش ...
وليد(بدون شعور فهم قصدها):- مع أني مكرهتش
ناديا(نحرجت وحست باللي غلطت ولكن بقات مبتسمة):- طيب غاندخل للدوش نبدل ونرجع
وليد(مدهالها بصمت وهو يحك فجبهتو):- تفضلي
وقفت غير بشوية وتوجهت نحو الدوش وهزت عليه البيجامة كانت حاسة بالدوخة لكنها كابرت دخلت وشافت فبلاصة الشرشارة نتاع الما فين لبارح شافت الدم وحطت يدها بلا شعور على كرشها تتحسسها وابتسمت قدام المراية اللي ربي حفظلها ولدها حبيبها اللي فرحت بيه فوق القياس واللي أكيد غايشبه لباباه ياسر وغي تفكراتو تنهدت بعمق وهي تفكر فينو دبا وهي كتعاني من كل جهة وطريق وهو ولا على بالو مهامو غير الإنتقام والخدمة أما هي تتحرق ، بقات كتسكت دوك الأفكار اللعينة بإشارة الصمت وبدلت ديك الكسوة ولبست بيجامتها بصعوووبة ووجع ، وحست بالشوق لياسر فداك الوقت تمناتو لوكان كان بجنبها ويدير اللي دارو وليد أكيد كان غادي يهبل عليها وعلى البيبي نزلت راسها ورفعاتو تشوف فملامحها الباهتة فالمراية غسلت وجهها وجمعت شعرها اللي كان مفرود ومشعت شوية من اللي تعرضتلو وشداتو بخيط وبقاو شي خصلات طايرين من الجانبين ، شافت فبيجامتها وابتسمت لاختيارو العجيب كيفه تنفست وخرجت لقاتو كالس القرفصاء على كرسي منضدتها اللي كتشوف لناموسيتها وداير يديه على فكو وكيهزز فرجليه انتظارا ليها حست بالراحة فداخلها
ناديا(شافت فيه ووقفت حداه):- وليد نتا منعستش مالبارح ولا رتاحيت انا غانكون مزيانة دبااا
وليد(وقف باعتراض):- حتى نشوفك نعستي عاد نرتاح أناديا أجي نوصلك لسريرك
ناديا(ضحكت بهدوء):- سريري على بعد خطوتين أوليد!!!!
وليد(بنظرة حب وطمأنينة):- ولوو متعارضينيش
ناديا(مبتسمة):- ههه طيب ... آآآآه
وليد شدها قبل ميختل توازنهااا كانت ضعيفة وحس بيها كي الريشة وساندها تالسريرها
حيدلها الغطا وكلست واستلقات بشوية وهو غطاهااا باهتمام بحال شي بنتو كيرعاها وهي كانت متبعة ملامحو المهتمة والمركزة فاللي كيديرو وكأنه كينجز شي صفقة مهمة ، صراحة كانت ممتنة لوقفتو معاها وموقفو كلووو اللي خلاها متحسش راسها بوحدهاااا ، فعلا قدر يساندها فأزمتها مبعد معدلها الغطا انتبه لعينيها اللي كانو ملاحقينو وضاع فسحرهم مجددا وبقا يقول يالطيف ساحرة حتى فوقت مرضك وتعبك اه ياقلبي ااااه .... انحنى لعندها وحط يدو على جبهتها
وليد(بنظرة طيبة وقلق عليها):- اممم الحمد لله مفيكش السخانة نبهني مصعب لهاد النقطة والدوا عندك مرة فالصباح مرة فالليل غادي نخليك تنعسي دبا وفالليل نجيبلك العشا وموراها تشربي دواك وخااا ؟؟
ناديا(بنظرة امتنان):- وخا
وليد(بعد نفسو عليها بسيييف):- مخصك والو ؟
ناديا(هززت راسها باعتراض):- تتء والو
وليد(تنفس بصعوبة غادي يبعد عليها):- طيب أنا غانطل عليك مرة مرة صافي رتاحي دبااا
ناديا بحال طفلة صغيرة حاوطت نفسها فداك الغطا وهي كتشوف فيه وحست باطمئنان وراحة وهي كتعنق فالغطا وتخلي عينيها يتغمضو بوحدهم هو حس بالأمان أنها بخير وسحب نفسو بستة وسبعين كشفة من بيتها وخرج لقا جاد متكي على الحيط كيستناه شاف فيه ودخل بيتو وتبعو جاد مبعد مقفل الباب عليهم
جاد:- هيييه مغاديش تتجاهلني
وليد(حط تليفونو وسوارت اللوطو والتفت عند جاد رابط يديه):- امممم هات أسئلتك هات أنا عارفك مغاديش تسكت اليوم
جاد:- ياعيني كتريحني بعدا مين فاهمني وخبرني نتا فين كنتو ومالها ناديا لأن اللي قلتوه مكيدخلش الراس نهائيا
وليد(كيحاول يخبي):- علاش حرام الواحد توجعو مصرانتو ؟
جاد:- محرامش إنما مجاتش معاكم هاد الكدبة
وليد(كلس على الكنبة بتعب):- وهادا اللي وقع اخويا
جاد:- اممممم متجبرنيش نعيط لمصعب
وليد:- عيط نتا حر ويلا زاد شي حرف علا كلامي نعطيك اللي بغيت
جاد:- مالني كامبو راني عارفك غادي توصيه اففف اجيني نيشان شنو كاين؟
وليد:- اللي كاين هو غادي تخرج من باب هاد البيت وتجبدو موراك وتخليني نرتاح إيلا جات على خاطرك راني عيان باغي غير ننعس
جاد:- يعني مغاديش تقولي؟
وليد(حط يدو على راسو حاس بصداع):- خرج أجاد
جاد:-هاوا خارج لكنك غادي تحكيلي دبا تشوف
وليد:- وغي سير دبا مبعد يمكن
جاد:- غانشوفو
وليد:- مكان خبر على كمال ؟
جاد:- تتت ولا صوت
وليد:- ههه يكون مات
جاد:- أو يوجدلنا شي مصيبة فراسك غانخلصو منو بسهولة
وليد(وقف باش ينعس):- ياسيدي يدير اللي عجبو رقبتو فيدينا دبا
جاد:- إمتا تمشيو عند البوس؟
وليد(تفكر وحس بالتذمر):- غدا
جاد:- أوك
وليد:- متخليش سارة وهيلين يديرو الضجيج ناديا مريضة
جاد:- حاضر جناب الباشا حااااضر هههه
وليد هززلو راسو بدون فايدة فيه وحط راسو على وسادتو أخيرا مبعد مخرج جاد وخلاه حبيس أفكارو وحبيس ليلة كاملة من القلق والتوتر والضياع لكن ابتسامة على وجهه مقدرش يخبيها وهو ضامم يديه لصدرو كيستنشق ريحتها اللي كتسحرو وتخليه طاير فعالم مفيه غير هو وهي ، كان يتمنى داك الولد يكون من صلبو فعلا ماشي غير ادعاء لكن يكفيه هي تكون بجنبو وكلشي ربي يديرلو طريق ...
جاد رجع لعند هيلين بخفي حنين بمعنى بدون جديد يذكر محيت وليد كان مستحيل يخبرو بالحقيقة وفداك الظرف ، طبعا بجوج بيهم مقتانعوش وقررو يسكتو حتى يبان المستور ..
كانت كالسة فحوش الدار وشاردة الذهن وباين فيها الحزن والتعاسة ومرة مرة تغدرها دمعتها وتمسحها بدون وعي وهي مركزة نظرها على واحد النقطة فارغة فالشجرة اللي عندهم وسط الدار ، عيشة مبعد مشافتها مشات جرت ربيعة وبقاو بجوج كيطلو عليها من سرجم الكوزينة
عيشة:- لالة هانتي شوفي مكنكدبش راها على هاد الحالة من فوقاش
ربيعة(فارشة سبب حزن بنتها وبألم):- يومين وتولي مليحة نتي ديها فشغلك اليوم جايينا ضياف ربي
عيشة:- لالة زكية محال لا تقبل شوفيها على هاد الحال
ربيعة:- بسيف عليها توافق ولا غادي تاكل وتفرق
عيشة:- والله إيلا راها شافاني لالة زكية حالتها مبقاتش هيا ياحسراه الضحك واللعب دركا ولات هي وديك الشجرة كيف كيف ميفرق بيناتهم غير الدموع هححح
ربيعة(دارت يدها على جنابها وشافت فيها بتهديد):- غادي دركي عليا كمارتك ولا كيفاش ؟
عيشة(حاسة بالخوف):- هانا غادية هااااه
ربيعة(شافتها مشات): وهاكك ونتي ما مقابلة ليا غير القيل والقال اففف ..(بنظرة انكسار) وتانتي يابنتي واش قلب حالك كنتي في راحة ووليتي كالسة على الشوك هاااح .. (مشات عندها وكلست حداها) بنتي زكية ...زكية ... وا زكية
زكية(انتبهتلها وقاطعت شرودها):- هاااه مَّاا عيطتيلي ؟
ربيعة(مخلوعة وكتتحسس سخانة بنتها):- الله يا بنيتي ساعة وانا نهدر فين عقلك ؟
زكية(كتحاول تعدل روحها قدام مها):-لا والو والو أمَّا غي راني عيانة شوية هادا مكان
ربيعة:- عيااااانة أنا مك إلى مفهمتكش شكون غادي يفهمك الولد اللي لفوق هو السباب وراه غادي نتهناو منو والجلا الما والشطابة موراه مجابولنا غي وجع الراس
زكية(بخوف وهلع شدت يد مها بلاما تحس):- لاباس عليه أمَّا متدعيش عليه هاد الدعاوي
ربيعة:- أيهاي هاي هااااي ولايني قلال فيك الحيا ومبقيتيش تحشمي
زكية(بدموع فعينيها):- قولي اللي عجبك هاادا ماعطا الله
ربيعة:- ونوضي نوضي تكعدي من هاد الكلسة نتاع الشوارف ودوري براسك شوية اليوم جايين عندنا شي ضياف الله
زكي(حلت فيها عينيها بصدمة):-علاش متقلتيليش و شكوووون هادووو ياكما خطاب راه قسما عظما غير إلى صورتلكم هنا شي ميت وبعدووووني انا مباغياش نتزوووووج غير بعدو مني
ربيعة (وقفت وشدتها من ذراعها بعنف جبدتها عندها):- سمعيني مليح غادي بسيف عليك تشوفي هاد الناس هادو صحاب باك ونساوينهم جايين يشوفوك وبربي العزيز متسكدي روحك حتى نوشمك
زكية(بانهيار ودموع كتغوت وسط الحوش):- والله منتزوجهااااا والله منتزووجهاااااااا يالاه
ربيعة(هزت نعالتها):- إيوا غادي نشوفو يا بنت بَّاك والله غير إيلا دخلتي عند الناس وهاد النعالة مصورة فوجهك وقولي مَّا مقالتش .. نوريك الغوات كيداير كبرررر راسك بزاااف وخرجو رجليك الشواري وقيلة خنتناك بزااااف ولكن دواك عندي غي صبريييييييييي
هاد المعيور كامل كانت كتسمعو زكية وهي فطريقها لبيتها اللي قفلتها وهي حاسة بالإختناق هاد المرة كي غادي دير تسلك راسها وشنو غادي تجاوب بَّاها على هاد العريس تاني من كترة مرفضت اللي قبل غايشكو فيها ، كاع وقبل مكانوش يعجبوها وكانت شايفة راسها عليهم أما دبا ومين دخل ياسر لحياتها وبقا كيجريلها فالدم كيدير تكون معا شخص آخر من غيروووو تغبنت وحست بروحها تايهة وكيدير تسلك ومها ناويالها على الغدر محيت مستحيل تخليها فالدار مبعد معرفت بمشاعرها تجاه ياسر خوفها طبيعي كأي أم خايفة على بنتها وفنظرها بالزواج غادي تخرجها من داك الوضع وتخرج ياسر من عقلها أراكي غي كتحلمي يا لالة ربيعة وغي تكايسيلنا على زكية الله يجازيك بالخير ^^
جا البوشتاوي مزنطر ومنرفز مالدخلة نتاع الباب وهو كيسب ويلعن ومشات كتجري عندو ربيعة تكسر الشر اللي راه طالع من جبهتو قبل عينيه
البوشتاوي(بالغوات):- ربييييعة ربيييعة
ربيعة:- هاني السي البوشتاوي مالك على هاد التعصيبة خير شنو كاين ؟
البوشتاوي:- والو باس غي جعفر بغا يخرجلي عقلي كنقولو خليكم هنا عندنا مستورين مابيكم معليكم إلا وهو قالك لا باغيين يمشيو فحالهم
ربيعة(كتكلعلو الصباط مبعد مكلس):- ولاواه السي البوشتاوي إيلا بغاو يمشيو فحالهم طريق السلامة علاش نتا باقي تبزز عليهم كل واحد عقلو فراسو
البوشتاوي :- نتي مفاهمة والو جيبيلي ندعز شي لقيمات باغي نورك شوية قبل ميجي المغرب و يجيو دار الفيلالي...
ربيعة(منزلة راسها بتردد):- السي البوشتاوي وغي بغيت نسولك فواحد الشوار
البوشتاوي:- هاتي هاتي نتي شواراتك يديو للعاقبة
ربيعة:- علاش مانشوفوش معا دار الفيلالي و يعني نخليو هاد الزيارة تايمشيو الناس اللي راهم ضياف عندنا كنضن باللي هاكا حسن ولا واش بانلك؟
البوشتاوي:- وعلاش واش دخل ضيافي فدار الفيلالي بالعكس غادي يفرحو معانااااا نوضي نوضي جيبيلي ناكل وقولي لبنتك توجد راسها راه غايجيو كاع دار العريس يشوفوهاااا ولبسيلها شي حاجة مدوك القفاطن اللي فصلتلها وخليها تلبس كاع ذهبها باش يعرفو بنتمن غادي يناسبو هييييه
ربيعة ناضت وهي دافعة رجل لقدام رجل اللور وملقات جهد ، أما عيشة كانت تصنط لكاع الحديث وطارت جابتها فبيت زكية اللي كانت ناعسة على سريرها وعايشة ألمها
عيشة(داخلة بلهفة وسدت موراها الباب):- لالة لالة ؟؟؟
زكية(على وضعها):- عيشة خرجي منا عليا راني باغية نبقى بوحدي
عيشة:- وسمعت بَّا سيدي كيقول لللالة ربيعة دار الفيلالي هما اللي جايين يخطبووووك
زكية(انتفضت من مكانها كتشوف فيها مصدومة):- لالالالالا أعيشة ميمكنش دار الفيلالي لا وقيلة سمعتي غلاط ميمكنش ؟؟
عيشة(بفرح):- لا والله تاسمعت بصح بهاد الودنين اللي غادي يخرج منهم الدود وعاد قالها بَّا سيدي خلي بنتي تلبس وتتزوز وتتصيغ باش يعرفو معامنش غادي يتناسبووو هههههه والله فرحتلك أللالة ربي جابلك السعد الزين والعائلة اللي سمييتها ضاربة كاع الحومات
زكية(بألم وحسرة):- السعد الزين قولي المصيبة الكحلة دار الفيلالي معروف عليهم لا شيرو على شي وحدة مكيخرجو إلا وهي مرت واحد من ولادهم وعلى ماقاتلي نهيلة باقي الولد الصغير اللي بلا زواج وهادا اللي خارج على كارهم وخدام فشي وظيفة تتت ياااربي على مصيبة هادي
عيشة(بدون فهم):- معرفتش علاش كتقولي مصيبة راه كاع البنات كيحلمو يديو من دار الفيلالي وزيدي عليها ولد قاري وفاهم وموظف وببلاصتو وقيمتوو شنو بغيتي كتر ؟
زكية(بداو الدموع ينزلو مين تفكرت ياسر):- أنا مبغيتش اعيشة نتزوج مبغيتش نتزوج اهئ اهئ
عيشة معرفت ماديرلها محيت مفاهمهاش أصلا لكن فعلا مصيبة كيما سماتها زكية وديك العائلة مكايتنازلوش نهائيا ومدام نيشو على بنت البوشتاوي المتميزة بالزين والأصل والمال والجاه فأكيد غادي ياخدوها وخا تلاقا السما معا الأرض ، هي مبغاتش تسبق العيد قبل رمضان وقالت تجرب معا مها مجددا لربما قدرت تقنعها باش يوقفو هاد الشي قبل متوقع الفاس فالراس ...
خرج من البيت عاد بالشورط والصوفيطما وهو هاز حزامة فيدو وكيضرب بيها اللي جا فطريقو وسلخ رجالو كل واحد فين جاتو الضربة وهو كيلهت
كمال:- أنا مخدم معايا الحميييييييييير الحميييييييييييييييييييير ليلة كاملة وانا كنازع ونعيط تاشي حد مقدر يدخل يفكني يا ولاد الكلب يا الشمايت تفوووو عليكم واحد واحد
الكاردكول(كيرجف):- أسمحلنا أسيدي بصح ديك البنت قاتلنا نتا عطيت أوامر باش تاشي حد ميزعجك
كمال(عطاه بالحزامة بضربة):- هاديك سرقتلي ملفاتي وقدام عينيا وااااانا اللي عطيتها الرقم نتاع الخزنة بصح والله متبقاها فيهاااا إيلا مجبتهاش وخليتها تبوس صباع رجلي منتسماش كمال
جا داخل لبيتو من تاني وهوما كيشوفو فيه كيتنيقز بداك الوضع ومسكين داك اللي فكووو كانو دموياتو يشرشرو من جبهتو لاحقاش غير فك كمال بالجنون ضربو بفاز ههههههههههه
كمال(كيقلب على تليفونو):- أنا أنااا تلعب معايا بزة مزال مخرجتش من اللرض أنا تلعب عليا أنااا السي كمال اللي مكايديرها بيه حد تلعب عليااا قذرة منحلة بحالها بصح وخاااا أناديا وخاااا .. تيييت تيييييت تييييي تتتيييت ألوووو ألوو فيديريكو أنا كمال باغي نكلم البوس وحالا ..كيفاش منقدرش قتلك باغي نكلم البوس سير ديلو التيليفون وبلا كترة هدرة .. وهاكدك هاني نستنا .....أ.. ألو سيدنااا
البوس(ببرودة):- كمال
كمال(بلهفة وخوف كيرجف):- سيدنا بغيت نشكيلك من وليد وجماعتو ديك ناديا اللي خدامة معاه جات لبارح عندي للفيلا وسرقتلي الملفات الخاصة بعملياتنا وعليهم كلشي توقيعي وسميتي والتواريخ ديالها وزيد وزيد المهم مصيبة إيلا طاحو فيد البوليس ...
البوس:- كيفاااااش سرقتهم واش نتا حمق وفين الحرس الشخصي ديالك كيفاش تسمح بهاد المهزلة
كمال(كيعرق):- أ سيدنا سيدنا هي غفلتني أ.. معرفتش .. سمحلي سمحلي لكن خصكم تدخلو سيادكم باش تعتقونا من هاد المصيبة ..
البوس:- بنت قدرت تضحك على كيان معتبر فالمجتمع وذراعي فالخدمة
كمال(حاس بالشمتة):- أ سمحلي لكنها قدرت تضحك عليااااا ..
البوس:- إيوا سمع شغايجيك مليح ماليوم مباغي نسمع عليك ولا منك تاحاجة وغادي نصفيو الخدمة اللي بيناتنا وكل واحد من طريق معندي مندير ببونسيوات بحالك
كمال(مخلوع):- كيفاش لا اسيدنا منقدرش منقدرش كيفاش كتعزلوووني من خدمتي لالالا أسيدي
البوس:- آخر مرة نشوف رقمك انتهى
قطع عليه وخلاه كياكل فجنونو مالأعصاب وهرس كلشي فبيتو من كترة الجنووون اللي ناضو فيه ..أما هو غير قطع ابتسم بخبث
البوس:- غبي معارفش أنه تاحاجة مكتوقع بلا إذن مني خليه دبا يشرب من البحر
جميلة:- معرفتش علاش تعطلو وليد وناديا؟
البوس(التفت وهو كيشرب فنجان قهوتو ببرودة):- غادي يجيو ويجيبو الملفات فعلا طلعت بنتك تستاهل وسام شرف على إنجازاتها معندي منسال فيها وهادا كيخليني نزيد نعجب بيها ونعول عليها فما هو أكثر
جميلة(ارتجفت وشافت فيه):- مفهمتش شنو تقصد؟
البوس(بلمعة خبث وحماس):- بنتك جوهرة خصنا نستغلوها كما يجب
جميلة(بتأفف):- واش نتا كاع مغاديش تخليها فحالها ؟؟
البوس(ضحك بخبث):- هههه عمرك شفتي شي حد كيرفس النعمة برجليه
جميلة(مقادراش تتحمل ناضت من قدامو):- عن إذنك غادي نجرب نتصل بيهم
البوس(شاف من النافذة):- مكان تاشي داعي لأنهم وصلو فعلا ..
شافت فين كان كيشوف ولمحت وليد وناديا متجهين لعندهم وعاد حست بالراحة لكن بقات كتحقق فناديا اللي وجهها كان شاحب وباينة فيها مامزياناش عقدت حواجبها وهي كتفكر وأجلت تساؤلاتها لمبعد
وليد:- مرحبا
البوس(حط فنجانو ووقف بأدب):- وليد عزيزي يا أهلا وسهلا
وليد:- أهلا بيك سيدنا
البوس(تحرك ووقف أونفاص لناديا وبقا يتأملها ومد يدو جبدلها يدها بين يديه):- الجميلة ناديا سعيد برؤيتك مرة تانية
ناديا(بسيف وبتعب):- شكرا ليك
جميلة(لمحت تعب ناديا وبغات تعدل الأمر):- أ.. تفضلو بالجلوس تفضلوو
ناديا(بامتنان هززت راسها لجميلة):- كلك ذوق أجميلة ميرسي
البوس(مبعد مكلسو جميع فالصالون):-أنا فخور بيك أناديا بالإنجاز اللي حققتيه أنقذتينا من يدين داك القذر كمال
ناديا(بدون نفس):- درت غير واجبي
البوس:- أكيد لاء إنجازك ماشي ساهل وبيني وبينك مشكيتش فقدرتك ولو لثانية عكس وليد
وليد(تلعثم بهدوء):- قلت نتعامل شخصيا معاه لكن ناديا أثبتت أنها كفؤ لذلك
البوس:-وهادا اللي كنهدر عليه
وليد:- اتصل بيك؟
البوس:- من دقايق وأنهيت الأمر
وليد:- تمام تهنينا منو
البوس(شاف ناديا شاردة وصفرا):- مال الجمال اليوم شاحب وحزين ؟
ناديا(ابتلعت ريقها قلقا وشافت فجميلة ووليد اللي كذلك تهزو من جملتو):- أ غير بداية نزلة برد غاتمشي بالدوا أكيد
البوس:- وليد علاش مكاتعتانيش بعميلتنا الجميلة ؟
وليد(بحرج):- أ.. جاري ذلك أسيدنا بالطبع
البوس:- عال عال فين الملفات ؟
ناديا(جبدتهم من حقيبتها وعطاتهملو):- تفضل
البوس(شدهم وبقا كيتصفح فيهم):- اممممم رائع جداااا رائع الملفات كلها ولات دبا بين يديا
جميلة خذي ناديا فجولة باغي وليد فحديث مهم
جميلة(وقفت بسرعة وهي كتسنا هاد الفرصة):- تفضلي أنادييا معايااا
ناديا شافت فوليد اللي هززلها راسو باش تمشي معاها وهي تحركت تابعدو ونطق البوس
البوس:-باغي حفلة تأسيس المنتج اللي غادي تديرها شركتك الرئيسية لهيه تندار هنا فالمغرب ويكون هنا الملتقى وباغيها تكون مختلفة شوية وفيها غادي نعلنو للصحافة على خبر ارتباطكم نتا وناديا
وليد(ممستوعبش):- سيدنا أنا مكنتش ناوي نحضر الحفلة فالمقر الرئيسي فالخاريج غير باش منخليكمش يعني بوحدكم لكن أنك تطلب ننقل الحفل لهنا وفالفرع ديالنا سمحلي مقادرش نفهم علاش ؟
البوس:- عندي أسباب عدة لذلك المهم تنفذ المطلوب منك أوليد
وليد:- الحفل باقيلو يالاه شهر وفنظرك غادي يقدنا الوقت باش نديرو كاع هادشي ؟؟؟
البوس:- ههه مستر وليد قادر يطوع الحجر ماشي غير حفلة
وليد:- لكنها حفلة غاتكون أقل شيء من أرقى الحفلات اللي غاتندار على أرض الوطن
البوس:- ولذلك باغيك تهتم بيها شخصيا .. خبرت ناديا بالقرار ديالي.؟
وليد(سكت وابتلع ريقو):- يعني ...
البوس(شاف فيه متأملا):- يعني مزال مخبرتهاش كنت متوقع لذلك خليت لجميلة المهمة الصعبة
وليد(مفزوع):- لكن علاش أنا كنت باغي نمهدلها الموضوع وو عاد ن..
البوس:- وانا سرعتلك الأمر علاش التأجيل
وليد(حط راسو منفعل وكيخبي):- اللي تشوفو أسيدنا
البوس:- وليد كاين شي حاجة أنا معارفهاش؟
وليد:- حاجة تتت لا مكاين والو
البوس:- إذن خلينا نفرحووو بهاد المناسبة
وليد:- عندي سؤال ومعارفش كيفاش غادي يجيك واش نتا ممقلقش يتعرف عليك شي حد أو صورك تنزل فالجرائد مبعد كاع هاد السنين ؟
البوس:- ههه لا ممهتمش بصغائر الأمور محيت تاشي حد ميقدر يثبت عليا ولو شعرة
وليد:- تمام
جميلة(كتحاول توصل معا ناديا لشي كلام):- يا الله أناديااا واش غادي تخبريني بشنو كتفكري؟
ناديا(كتمسح دموعها اللي خرجو رغما عنها ):- مكنفكر فوالو أجميلة غير راني عيانة شي شوية هاد اليومين هادا مكان
جميلة(كتمص غضبها):- آه هادي عرفتها محيت باينة من وجهك لكن باغية نعرف أكثر
ناديا:- مكان متعرفي أجميلة قوليلي نتي وليد قالي عندك شي خبر باغية تبلغيني بيه
جميلة:- هو قرار البوس أناديا وغادي يكون كي الرعد بالنسبة لينا كاملين واش مستعدة تسمعيه؟
ناديا(بقلق):- ياك لاباس أشمن قرار؟
جميلة صرطت ريقها باش تنطق بالزلزال بمجرد مكملت جملتها ناديا وقفت ودارت بيها الدنيا وكانت غادي تفقد وعيها بعدت يد جميلة اللي كانت مقربة باش تهديها وخرجت بلا شعور للصالون شافت بضياع فوليد وبتشكيك فالبوس لايكون إنسان ، بجوج عينيهم كانو مسمرين عليها وهي جامدة غي الدموع اللي مكومين فعينيها مرة ينزلو مرة ينحبسوو شهقت بعنف وضربات قلبها تسارعو ررجعت شافت فجميلة اللي كانت كتهزز فيها و تقدمت لا إراديا وبشرود هزت حقيبتها و خرجت بدون استئذان وليد اعتذر منهم ووقف مصدوم من الشي اللي دارتو وخايف لاتفقد وعيها وهي مزال عيانة ولحق بيها للعتبة وتمشا حداها وهو عينو عليها أما هيا مكانتش كاع حاسة بوجودو بجنبها كانت كتبانلها ديك السيارة هي المنفذ الوحيد من عالم الغوال فتحت الباب وركبتها بصمت وحطت راسها على راس الكرسي ورخات رجليها بتعب ويدها على كرشها .. هو ركب بصمت حاول يكلمها لكنها مردتش عليه سمعاتو أو مسمعاتوش الله أعلم
جميلة(كتبكي وتضرب فصدر البوس):- بنتي إيلا وقعتلها شي حاجة فراه نتا غاتكون السبب منك لله منك لله كيف باغي دمرلها حياتها كيما دمرتلي انا حياتي
البوس(شدلها يديها بهدوء ووبقوة):- لزمي حدودك وعرفي شنو راكي تقولي وانا لمصلحتي أنها تتزوج بوليد ومدامني قررت فقراري لازم يتنفذ
جميلة:- الولد قالك مستعد يضمنا بدون زواج
البوس(بعدلها يديها ونفضها):- أنا اللي كنقول ونآمر هنا أنا اللي كنتحكم فمصائركم كاملين أوياك وتنساي هاد الشي أجميلة
جميلة(كتستجدي عطفه):- هاديك بنتك
البوس:-علاش محسساني أنني راميها للنار أي وحدة مكانها كانت تبوس يديها وجه وظهر ، عريس بحال مستر وليد شكون ترفضه وسامة وإسم وجاه ومال ومنصب فين اللي يمنع ؟
جميلة:- اففففف معمرك غادي تفهم
البوس(بعد عليها وكلس دار رجل على رجل بأريحية):- ولا باغي نفهم سيري لبيتك دبا باغي نراجع هاد الملفات متزعجينيش
جميلة ابتلعت غصتها منو وملقات متقول طلعت لبيتها ورسلت مساج لوليد تطلب منو يتصل بيها إيلا وقع شي جديد وهو قرا مساجها ورجعو لجيبو أما هيا كانت عاد على نفس الكلسة فوق واحد الكرسي خشبي مطل على البحر حاطة يديها على جناب الكرسي وكتشوف فالفراغ وعينيها مسكتوش من البكا
وليد:- ناديا أنا مكنتش باغيك تعرفي بهاد الطريقة لكن لكن ...
ناديا(بلاما تشوف فيه):- نتا كنت عارف من أول زيارة ليهم ياك؟
وليد(تنهد بتعب):- آه كنت عارف لكن دبا ميهمش
ناديا:- عارفة أن اللي كيهم دبا هو استعدادي لزواجنا اللي تقرر مبعد شهر ياك أوليد ؟؟؟؟
وليد(عرفها غادي تنهار وشفاتو ومعرف مايقولها):- أنا آخر شخص ممكن نفكر بأنانية فهاد الموقف لذلك أنا مخليلك القرار ليك
ناديا:- ههههه كتضحك معايا مسمعتش أنه مقرر ماللي كانو لهيه وماعلينا حنا إلا السمع والطاعة
وليد:- خصك تتقبلي الموضوع
ناديا(حلت فيه عينيها):- أنا مزوجة أصلالالالا أشمن موضوع باغيني نتقبلو إيلا نتا كنت ناسي فأنا كل دقيقة كنعيشها كنتفكر كلشي فات
وليد(حس بانقباض فصدره ووقف مقابل البحر):- وغادي تطلقي
ناديا(باستهزاء وألم):- ببساطة ببساطة محيت حضرتكم الآمر الناهي لحياتي ههههه متحلمش بزاف
وليد:- ناديا متنسايش ولدك وحنا أصلا متافقين باش يكون ولدي قدام الجميع كيغاديري تواجهيهم بكرشك إيلا ماتماشيتيش معا هاد القرار؟؟
ناديا(وقفت بعصبية):- منسمحلكش تستغل ولدي لا نتا ولا داك البوس نتاعك فمصالحكم القذرة
وليد(مصدوم التفت عندها):- مصالح قذرة كتسمي زواجنا مصالح قذرة ؟؟؟؟؟
ناديا(بصوت عالي مواجهة ليه):- زواااااجنا أي زواج كتهدر عليه واش كدبت الكدبة وتيقتهااااا ؟؟؟
وليد(ماقادرش يتيق مدى فظاعة كلامها وتبخ ع الآخر):- متقتهاش وميحتاجش تفكريني بالأمر كل لحظةةةةة ويكفي تجريح فعباد الله نتي مجبرة باش تمتاثلي للقرار سواء برضاك أو من غيرو
ناديا:- هههههه والله حتى حماقيتووو أنا بنفسي غادي نواجه داك البوس نتاعكم ونقولو أنني مزوجة ومن العميل اللي كيقلب عليه وباغي يصفيه وحامل بإبنه ، عجبك هاكدة؟
وليد(بنرفزة):- ناديااااااااا نتي بسيف عليك غادي توافقي محيت خصك تحافظي على ولدك وهادا مغايكون إلا بهاد الطريقة
ناديا(كلست بانهيار على الأرض وهي كتبكي):- واش أنا مكتوب عليا إبلا بغيت شي حاجة خصني نضحي عليها بحوايج تانيييييين علاش ياربي تعذبني هاكدة علاش
وليد تألم بزااااااااف من داك الشي اللي كتقولو ناديا لهاد الدرجة هي معتبرة زواجها منو عذاب وليه شنو صحابلك أوليد غادي طير لحضنك وتقولك امتا غي يجي داك اليوم فيق فيق من أوهامك هي لحد الآن مزال على عهد ياسر ومعمرها غاتكون ليك حتى لو امتثلت لأوامرك ولا لمشاعرك في بعض الأحيان لكن كيبقى الأصل أن ياسر هو اللي واخذ كلشي ، بقا كيشوف فيها بتأثر ومقادرش يقرب منها آلماتو بزااااااف بهاد الموقف وجرحاتو عمداااا تحرك كيحاول يبعد عنها قدر الإمكان لكنو تراجع ولعن نفسه وحط يدو بتردد على كتفها باش تنوض مالأرض هي بقات دافنة وجهها بين يديها وكتبكي بحرقة وهو مد يديه وحركها ووقفها باش تتمشى معاه للسيارة وينطلقو من جديد لكنها دفعت يده ووقفت بوهن وهي كتفكر بأسف أنه أمامها مواجهة ضارية فالأيام الجاية ..
تأزمت نفسيتها بزااااف مبقاش قادر يكلمها أو يجي مجيهتها بمجرد مكانت تشوفو تنفعل وتبقا تغوت عليه وتنهار بجنون على مرأى من عينيه هو خاف عليها خصوصا أنها مزال خارجة من حالة إجهاض قدر الله أنهم نقذوها فآخر وقت ودبا هي على شفا شعرة وحدة وتخسر كلشي ، لذلك كان كيتحاشى يحتك بيها ولا يقرب منها برغم شوقو وعذابو أنه يكون معاها لكن قرر يمتثل لرغبتها في حين يفكر فحل لأزمتو معا ياسر وفين غادي يلقاه باش يخليه يطلقها وماشي بعيد ينسفو من هاد الدنيا انتقاما لكل الآلام والأوجاع اللي كيسببهالو ، هيلين وسارة مكانو جايبين للدنيا خبر لكن جاد كان عارف المصيبة اللي غاتوقع على راسهم لأن لاهيلين غادي تسكت ولا ياسر غادي يخليهم فحالهم إيلا نتشر الخبر وهي مزال على ذمتو فملقا حل إلا أنه يتوجه بنفسه لعند البوس ويخبره بالمستخبي كلو .. طبعا بلا خبر وليد لأنه غادي يقتله إيلا عرف
البوس(استقبلو فمكتبو):- أتمنى اللي يكون جايبك مهم ومضيعليش وقتي ؟
جاد(ابتلع ريقو وحس بالندم لكن ضروري ميعاون وليد):- سيدنا أنا عندي خبر غادي ينرفزكم ولكن مكانش مغيركم اللي غايقدر يحله
البوس(بنظرة تركيز):- كمل كلامك شنو كاين؟
جاد:- معارفش مين نبديلك لكن لمصلحة وليد وناديا ضروري ميكون عند حضرتك علم باللي كيوقع من موراك
تنهد جاد وبدا يسرسر للبوس كلشي مخبيينو عليه وهاداك كان كيشوف فيه بملامح جامدة وعاقد حواجبو لأول مرة شي حد يستغفله بهاد الشكل والأدهى من ذلك أن كلشي عندهم الخبر إلا هو وهو اللي حاسب روحو نزق وتاشي حد ميقدر يفلت من بين يديه لكن لاء خرج هو البهلوان اللي مستغفلو الجميع ، شكر جاد اللي مشا وهو داي وعد من البوس أنه يتدخل لكن بدون ميعلم تاشي حد أنه هو اللي بلغه بهاد الشي ، كلس مايقارب الساعة وهو جامد فمكانو حتى نتفض فجأة فتح باب المكتب مالوسط وطلع الدروج وتمشى فالرواق تاوصل لبيتها وفتحها بجهد لاتخها معا الحيط هي تخلعت بمنظرو اللي كان كيخوف وتقدم لعندها شدها من شعرها بدون تفكير
صفوان:- أنا تستغفليني يا الحشرة طراااااق
جميلة(كتبكي مخلوعة وكتقيس فخدودها):- ص.. صفوان مالك ياك لاباس اهئئ ..؟؟؟؟
صفوا(شدها مجددا من شعرها وجرجرها حتى للسرير ولتخها عليه):- نتي حثالة نكرة كان خصني نقتلك هادي شحااااال معمرك ماتولي إنسانة محترمة يا الحشرة
جميلة(كتبكي ومعارفة باش تبلات):- علاش علاش راك تقولي هاكدة شنو كاين؟
صفوان(بعدم تصديق وقف مبعد عليها كيريش بيديه):- و كتتمهبلي كتستغبيني عاد متحشميش فعلا اليوم صدمتي فيك أكبر صدمة خديتها منك فحياتي
جميلة(تكعدت كتبكي وكتحاول تفهم منو):- صفوان هئ قولي شنو كاين؟
صفوان:- بنتك حاملة من وليد و مزوجة من ياسر وحضرتك عندك علم بكاع هادشي ومقايلاليش المضحك أن الكل عارف إلا أناااااااا
جميلة(تصعقت وجمدت بلاصتها وبخوف وهلع):- ش.. شكون قالك هاد الشي أكيد راك غالط
صفوان(كيشوف فيها بألم):- آه غالط مين كنرجع نتيق فقذرة بحالك لكن غادي نديرلك حد عييت منفوتلك وتالهنا ويكفي
جميلة:- ش... شنو قصدك؟
صفوان:- من مور عرس بنتك غاتعرفي
جميلة(بدون فهم وببكاء):- ولكن هانتا عرفت بشنو كاين فعلاش متخليهاش معا ...
صفوان:- آآآآه هادا اللي باغية حتى نتي وكتعارضيه من هادي شحال لكن لا نتي ولا غيرك غايبدل قراري اللي تاخذتو وناديا غادي تتزوج وليد وبسيف عليها يكفي أنها هازة ولدو فأحشائها ودرت مزيان مين سرعت موعد إعلان الخبر
جميلة(نزلت على ركابيها لصقت فرجله كتترجاه):- عفاك أصفوان كنترجاك كنترجاك تخليها و...
صفوان(شدلها فكها بقبضة قاسية):- إيلا خرجتي حرف من باب هاد الغرفة بالله العلي العظيم غادي نقطعلك لسانك ونرميه للحوت ياكله
جميلة(ابتلعت ريقها):- صفوان عفاااااك ؟
صفوان (دفعها من على رجلو جات طايحة الأرض):- بعدي لهيه
خلاها كتبكي وترجف بالخوف من اللي غادي يوقع من بعد واشمن قيامة غادي تنوض مبعد معرفة البوس بكلشي ، ووهاد الأخير مشا كيسب فخاطرو ويلعن دخل لمكتبو مبعد مزلزل الفيلا بتعييطة لفيديريكو اللي جا كيهرول موراه
صفوان:-فيديريكو بغيتك تجمعلي كاع الرجال
فيديريكو:- أمرك لكن علاش وسمحلي على التجاوز أسيدنا؟
صفوان(بنظرة شريرة):- دير اللي قتلك وبلا فهامات
فيديريكو(انسحب حاني الراس وكيترعد):- أمرك أمرك ..
كلس على الكرسي وحط يدو على فكو وغاص فتفكير عميق ومريب ...
فاطمة(كتبكي):- اهئ اهئئ الله يا ولدي الله
رشيدة(كتصبرها):- الله يهديك يا فاطمة راكي مسكتيش مالبكا منهار جاو البوليس هنا للدار
فاطمة(كضرب فصدرها):-الله ياحنيني وفين تكووون واش حي ولا ميت غي نشوفك أولدي ويرتاح قلبي
رشيدة:- قولي اعوذ بالله مالك تفولي على الولد راه راجل ويكون مدبر على راسو
فاطمة:- شتي يا رشيدة شتي بنت الحرام فين وصلت ولدي خرجاتو من خدمتو وعلى دارو وشكات بيه وبغات ترميه فالحباسات لهلا يمسحلها ويبركلها الخبز والملح فالركابي إن شاء الله
رشيدة(كتهزز راسها بدون فايدة ففاطمة اللي كتنوح):- الله يسترك متسكتي وتنعلي الشيطان راه توفيق ولدي كيجري فالقضية ويلا وصلو لشي حاجة غادي يبلغنا
فاطمة:- وياميموني ويا سعدي لا بنت لا ولد وليت وحدانية الله ياربي الله اهئ اهئ
رشيدة(باستسلام):- لا حول ولا قوة الا بالله أنا نوض نوجدلك شي حاجة تاكليها
فاطمة(مبعد مناضت رشيدة للكوزينة بقات شادة فصدرها):- لا ماكلة ولا شراب يبردو نار جوفي على وليداتي اهئ اهئ شكيتك لله يا ليلى شكيتك لله اللي خرجتيلي على ولدي حبيبي اهئ
إيه يا خالتي فاطمة نتي معارفاش شنو دار ولدك وكالسة تدعي على بنات الناس مي الله يهديك راكي أم وطبيعي متحرقي على فلذة كبدك اللي كاع ممسوقلكش غي هني روحك ، كان داير على رجل ولابس توني فاللون الأسود ومتكي كيتفرج وفاتي كتحط الماكلة بدون نفس وطايرالها ولتخت الطبسي
جواد(شاف فيها):- غير بشوية عليك مالك على هاد اللتيخ ؟
فاتي(كتعاوج بفمها):- مالني كنحط كي العادة
جواد:- ديريلي براد أتاي جا على بالي
فاتي(بتأفف):- وكترتي واش صحابلك أنا هنا خدامتك ديريلي العشا ديريلي الغدا ديريلي تاي جيبيلي نشرب قاديلي فراشي حمميني كيسيني لبسيني حدديلي لنكون مرتك وانا لاخبر شوووف جوج كلمات منزيدهمش إيلا بغيتني نخدم عليك تحطلي فلوس الشهر مدوبلين منبقاش أنا نصرف من جيبي راه كملو الفلوووس قلب على راسك
جواد(علا راسو شاف فيها وهي دايرة يد على جنب وكترايش وزفر زفرة):- عرفي شنو راكي تقولي؟
فاتي:- كنقول للي لازم يندار ويلا معجبك حال كتعرف الباب فين جاية أنا عيييييت
جواد(غمض عينيه وفتحهم بشر ووقف شدها من شعرها وضربها بالصقول ودفعها طاحت على الأرض ودار رجلو على صدرها):- سمعي أديك الحقيرة يا بنت الليل غادي تجمعي فمك وديري اللي نقولك عليهااااا بلا هدرة بلا كلام سمعتيني انا فمخي بزاف الحوايج اللي خصني نفكر فيهم ماشي فيك نتي يا الناقصة ومرة تانية إلى عليتي صوتك عليا غادي ندمك سمعتيني وزايدون الفلوس اللي قلتي كملو يا الكذابة كانو هادوك المانضات ديالي اللي كنت نصيفطهملك كل شهر جاية يا بنت الحرام دبا تجملي عليا لعنة الله عليك تفووووووو ...(ضربها بركلة لكرشها وهي كتلوى بالبكا والوجع) تكعدي ديريلي تاي تكعدي يا الحمارة تفووو تاكلو وتنكرو الخير كنس راشي ...
ناضت كتجرجر فراسها وهي كتبكي ومقهورة أما هو رجع لبلاصتو كينهت وكيشوف بتركيز فالتلفزة بدون نفس ، وقفت عند البوطاجي نتاع الكوزينة وهي كتمسح دموعها
فاتي:- هادي مبقاتش عيشة هادي حابسني فالدار لاخدمة لا زطمة وزايدهالي بالأوامر وكيمد عليا يدو الحقير والله لا بقاتها فيك يانا يانتا السي جواد ..
عزيزة:- واش بصح أولدي ابراهيم المحكمة قبلت بطلب الخلع ديال ليلى؟
ابراهيم(بفرح):- آه قبلوه وغايشوفو فالقضية بالمنظور ديال الأمور الجديدة اللي طرآت وكلشي حطو محامينا فالمستندات اللازمة وقدمهم للمحكمة وعلى ربي ميتعطلوش علينا وناخذوه من أول جلسة
عزيزة(بدموع الفرحة):- الله ياربي صبرتي يا بنيتي وهاوا مولانا غادي يفرج عليك
ليلى(كتمسح دمعتها):- الحمد لله أربي حمدتك وشكرتك
ابراهيم:- مبقالنا غير نشدوه نرميوه فالحبس ونتهناو أختي
مريم:- والو مقدرتوش توصلولو يا ابراهيم زعما كنتو صحاب فكر شي شوية فين ممكن يكون
ابراهيم:- ياودي وخا كنا صحاب تقولي معمرني عرفتو فآخر فترة بان على حقيقتو أنا قبل مختي كنت مخدوع فيه ومصاب يطيح بين يديااااا على ربي
مريم:-ياربي آمين
عيسى(كيكح وباينة فحالتو عيان):- أنا داخل نرتاح فبيتي شي شوية
جر كروستو وتوجه بصمت لبيتو وكلشي بقا يشوف فيه
مريم:- ماما مالو جدي ؟
عزيزة:- والله معرفت هادي يومين وهو على هاد الحال
ابراهيم(بقلق):- ياكما يكون مريض ومبغاش يقولنا
ليلى:- عمي عيسى من النوع اللي ميبغيش يشطن الناس عليه وقيلة كيما راك تقول أبراهيم
ابراهيم(وقف بخوف):- إيوا نجيبولو طبيب لهناااا علاش نتفرجو فيه وهو مغاديش يقولنا وخا ضاراه شي حاجة
مريم(جاها الرعب عليه):- واه ابراهيم دخل عندو حاول معاه راه ماللي جينا ماكلا والوو
عزيزة(بقلق تاهيا):- ياربي تستر دخل أولدي وطمنا معاك
دخل ابراهيم لبيت عيسى ولقاه كيحاول ينوض من كرسيه ويتكا على السرير وطار عندو ابراهيم اللي عاونه وخا عيسى كان كيقولو معليش معليش
ابراهيم(كلس حداه على السرير):- عمي عيسى نتا مريض حاسس بشي حاجة واجعاك قولي راني بحال ولدك ونتا بحال الواليد
عيسى(تنفس بتعب):- لا ياولدي يكتر خيرك غير وشا هيا عمك كبر فالعمر ووليت فيساع نعيا
ابراهيم(كيحاول يشجعه):- أيهاي نتا مزال شباب وتقولي كبرت فالعمر ههههه
عيسى:- ههه أح أوه ...
ابراهيم:- شوف أعمي عيسى بغيتك تصارحني إيلا ضاراك شي حاجة نجيبلك دبا الطبيب
عيسى(كيحاول يكابر):- لالا متشقيش راسك أولدي هادا ميكون غي برد وغادي يمشي فحالو
ابراهيم:- واخا أسيدي المهم لا ستحقيت شي حاجة تقولي ياك ؟
عيسى:- الله ياولدي ربي يكتر خيرك
ابراهيم:- نخليك ترتاح أنا دباااا
عيسى:- الله يعاونك أولدي .. أكح اه اوح...
خرج براهيم عاض على شنايفه وشاف فيهم بقلق مرسوم على وجهه
مريم:- ياك لاباس أبراهيم؟
ابراهيم:- باينة فيه مريض بصح كيكابر مبغاش يقولي
مريم(جايها البكا):- هادا طبعو ديما كيخبي علينا إلا ناديا اللي كتقدر تجبرو يمشي للطبيب و ياخذ الدوا تتتت أنا غاندخل عنده نحاول معاه
ابراهيم:- لا صبري أنا بانلي نعيطو على مصطفى يجي يشوفو وهو يقولنا إيلا محتاج للمشفى ناخذوه
عزيزة:- صونيلو أولدي صونيلو فالحال ... ياربي تطمنا ياربي
ليلى حست بالخجل والإرتباك من مجرد مجابو سيرة مصطفى اللي طبعا كتلحقها سيرة علاء لكن قلقها الفعلي على عيسى غطا على شعورها ديك اللحظة .. اتصل ابراهيم بمصطفى اللي واعدو يمر مبعد خروجو مالمشفى وفعلا جا عندهم لكن ماشي بوحدو جا رفقة علاء اللي كان باقي كيستعمل الدبابيات لكن بتحسن أفضل هاد المرة
عزيزة:- علا سلامتك أولدي علاء الله يشافيك
مريم:- علاش شقيت راسك أخويا علاء
علاء(كيسرق نظرات من ليلى مقادرش يبعد عينو عليها وفنفس الوقت حشمان):- ربي يخليكم أنا عمي عيسى كيعنيلي بزاف ومستحيل نسمع أنه عيان ومنجيش
مصطفى:- أصر باش يرافقني وباش نتهنا من النكير ديالو قلت نجيبه ههههه
رياض:- عمي علاء علاش كتحني على هاد العصا ؟
ليلى:- عيييب ولد حشم عمك عل .. أ دكتور علاء عيان شوية علاش كيحتاجها
علاء:- ههه صاحبي رياض غانحيدها عما قريب ومنبقاش محتاجها
ليلى(شافت فيه بحرج وببتسامة):- على سلامتك
علاء(بادلها نفس النظرة):- الله يسلمك
مصطفى(بغا يقطع الكونطاكت ولا غادي كاملين يمشيو فيها هههه):- أ... فين بيت العم عيسى ؟؟
ابراهيم:- زيدو معايا مناااا تفضلوو .. مريم ليلى وجدولنا شي شهيوات بيما سالينا
مريم:- وخا هاحنا غاديين زيدي ياختي زيدي
ليلى:- الولاد بقاو هنا ومديروش صداااع مفهووم .. زيدي أمدام من بعدك ههههه
مريم(كتهمسلها):- شفت الضحك غي مزلع كيباصا فالقضية؟
ليلى(كتعدل شالها بحرج):- تي كوني تحشمي أشمن ضحك
مريم(غمزتلها):- امممم على ماما يا بابا
ليلى:- خالتي عزيزة خالتي عزيزة شدي عليا بنتك
عزيزة:- مريم هداي على ليلى مالك ناض فيك هبالك
مريم:- هههههههه شريتيهالي ياكي ياكي
ليلى(كتهززلها فحاجبها باستفزاز):- تستاهلي ههههه
مصطفى(تابع ابراهيم وتقل فالمشية وهمس لعلاء اللي كان تابعهم بشوية بالدبابيات):- امممم شايف من دابا الدعوة كتسطر ههههه
علاء:- لوكان تسكت ميكونش حسن
مصطفى(غمزلو):- هحححح حياني القلب هشيششش
ابراهيم:- عمي عيسى راه جا الدكتور علاء وصاحبو الدكتور مصطفى يطلو عليك
عيسى(كيحاول يصاوب كلستو بصعوبة):- مرحبا بيهم أولدي
علاء(كلس قدامو):- عمي عيسى كيراك ؟
عيسى:- نحمدو الله أولدي وعلى سلامتك فرحت للي شفتك
علاء:- وانا فرحت عمي عيسى بصح غادي نفرح أكثر لا خليت مصطفى يفوت عليك
عيسى(بحرج):- لالالا مكان تاشي داعي أنا مزيان
ابراهيم:- عمي عيسى متكابرش صحتك كتهمنا وخصنا نتأكدو
مصطفى:- سمحلي الشريف راه غانفوت غي الصناطات على قلبك مكان لا يبرة ولا يحزنون باش تخاف هههههههه
عيسى:- ههه الله يعطيك الخير وخا أولدي وخا غاتشقيو روحكم
مصطفى(كيحل حقيبتو الطبية):- مكان لا شقا ولا والو راك بحال الواليد هات هات ديك اليد نشووفو لاطونسيون اللول
عيسى(كيطلع تريكوه):- هاهيا ...
مبعد مفوت عليه مصطفى رجع معداتو للحقيبة
مصطفى:- عمي عيسى مافيه والو الحمد لله غير شوية إرهاق
عيسى(كينزل كم تريكوه):- وشفتو قتلكم أنا بخير غير خصني نرتاح شي شوية
مصطفى:- فعلا هادا ماخاصك ولكن مفيها باس إيلا جابك ابراهيم عندنا زيارة للمشفى تما معدات كتر ونقدر نفوت عليك مزيان وغير باش نطمنو أكثر ماشي شي حاجة
عيسى(اختفت ابتسامتو):- علاش أولدي ياك غي دبا قلت انا بخير ؟
ابراهيم(بتساؤل):- خير أمصطفى ؟
مصطفى(كيضحك بلاما يبين):- ههه مالكم مالكم راه مقلت شي حاجة كتخلع بالعكس أنا باغي نفوت على عمي عيسى كما يجب باش نطمنو أكثر هادا مكان ...
علاء:- فعلا التفويتة فالمشفى غاتفيدك أكثر منها نتبعو حالتك الطبية ومنها نطمنو أعمي عيسى
عيسى(بقلق وخوف):- لا أولدي ميحتاجش نمشي السبيطار
علاء:- ياك أعمي عيسى باغي تحرجنا ؟
عيسى:- حاشا أولدي بصح انا عارف راسي مليح خليوني على راحتي
مصطفى(لاحظ خوفو ومبغاش يزيد يضغط عليه باش ميتخلعش اكثر):- وا السي ابراهيم مكانش شي كويس ديال أتاي راه جوعنا الحاج عيسى
هعيسى:- الله ياولدي أمنيتي غير نحج بيت الله وموراها لا بغا مول الأمانة يدي أمانتو لكن مصبت جهد
علاء:- لاباس عليك اعمي عيسى الله يخليك لينا بركة تنور حياتنا
عيسى:- الله ياولدي مبقا فالعمر قد مافات نطلبو الستر تانتغطاو تحت القبر
مصطفى(بقلق):- مالنا على هاد الفال ميكون غير الخير إن شاء الله
ابراهيم:- هانا جبتلكم كاس ديال أتاي مشحر ديال خالتي عزيزة
علاء بقا يشوف فالباب وليلى كتستنى ابراهيم باش تعطيه بلاطو اللي فيه الماكلة ومحرجة حس بدقات قلبو باغيين يخرجووو مقادرش يتحمل باغي يطير عندها وميهمو حد لكن الأصول أصول ومدامو صبر فما فيها باس إيلا صبر كذلك شي شوية مي الشوق كيحرق الله الله ^^
شربو تاي ومشاو فحالهم مبعد مودعوهم وعاد دخل عندهم ابراهيم مبعد ماتكلم شوية فالباب معا مصطفى وعلاء وتبدل لون وجهو بالقلق والتوتر
مريم(فالكوزينة وبصوت خافت):- ابراهيم وقول شنو كاين راك خلعتنا؟
عزيزة(تاهيا بشوية):- آه أولدي شنو قال الطبيب ؟
ابراهيم(كيشوف فيهم بجدية):- عمي عيسى خصو يمشي للمشفى باش يفوتو عليه مصطفى ممتأكدش من صحتو وقال الأعراض مكطمنش ولكن المشكل أن عمي عيسى رافض يمشي
مريم(شهقت بفزع ودموعها بقاو ينزلو):- جدي جدي مسكين كان مريض وتاشي حد محس عليه اففف ياربي مسكين تشافيه ياربي
ابراهيم(قرب منها):- مريم مريم متنهاريش قدامو راه مفخبرو والو وحنا مزال ممتأكدينش
عزيزة(كلست بفشل وشدت على صدرها):- ناديا ..ناديا هي اللي تقدر تقنعو باش يمشي للمشفى خص ناديا تجي فوراااا
مريم(كتمسح دموعها):- أنا غانعيطلها
ابراهيم(غمض عينيه بتشتت):- مكان تاشي داعي حنا نقنعووه باش يمشي ناديا فين اللي باغية تجيبيها
مريم:- ابراهيم متمنعنيش ناديا خصها تجي تشوف جدها من حقها تعرف
ابراهيم:- ولكن علاش غادي تخلعوها وحنا باقي معارفين والو
عزيزة:- ولدي ابراهيم ناديا هي اللي كتعرف تفاهم معاه ياما فوتها علينا وهي الوحيدة اللي كانت تجبرو وكيسمعلها الكلام
ليلى:- خويا ابراهيم متعرف إلى شاف حفيدتو غادي يتحسن
ابراهيم(نزل راسو بقلق):- خليونا نجربو معاه ويلا منفعش تما تاصلو
مريم:-وخا أبراهيم غادي نشوفو وع الله يوافق وميعاندش كيف كل مرة ..
فاليوم التالي فدار مريم وابراهيم
مريم(والشر كينقز من عينيها جات تفيق ابراهيم):- ابراهيم ابراهيم فيييق فييييق
ابراهيم:- امممم خليني نعس شوية أمريم مزال الحال
مريم:-ياودي فيق راه نخوي عليك سطل ديال الما فيق شوف المصيبة اللي جاية كتسول عليك
ابراهيم:- شنووو شكون هادي ؟
مريم:- قولي نتا شكون هيا راها فالصالون ومرتاحيتلهاش
ابراهيم:- ونتي كيفاش دخلي شي حد مكنعرفوووهش هبلتي ؟
مريم:- لا غي تهنا مهاد الناحية هادي كتعرفك ومزيان عاد
ابراهيم:- شكوووون؟
مريم(ربعت يديها وبقات تلاوز):- نوض ونتا تعرف
ابراهيم مكانش عارف كاع علامن كتهدر مريم ولا شكون هيا هاد الزائرة لكن مريم وكونها امرأة فأكيد غادي ينوض فيها جنون الدنيا كلها خصوصا بلبس هاديك خيتي الغريب وتدميغة اللي فعينيها كتخوف ..
ابراهيم(صاوب حالتو وخرج للصالون وشاف ديك المرة الغريبة):-السلام عليكم
فاتي(بحالة يرثى عليها):- وعليكم السلام السي ابراهيم وسمحولي جيتكم بلا موعد
مريم(كتمتم تحت فمها):- دبا جيتي
فاتي(فهمتها):- نتا مكتعرفنيش السي ابراهيم لكن أنا كنعرفك عز المعرفة
ابراهيم:- فعلا حاولت نتذكر لكني معمرني شفتك .. شنو سر إصابة عينك ؟
فاتي جايها البكا مين تفكرت كيفاش رفضاتو لبارح ومبغاتش تتستسلملو وهو ضربها بونية لعينها وبكل وحشية امتلكهاااا وهادا خلاها تكفر بكلشي جا منووو وتزعم باش تنتقم منو وتخرجو من حياتها اللي حولها لجحيم وخلاها تبكي الدم من الألم اللي كيعيشها فيه
فاتي:- أنا غادي نحكيلكم كلشي بصح طالبة منكم الأمان لأن حياتي فخطر وهادشي اللي غادي نديرو غادي نغامر بحياتي فيه
ابراهيم(ابتلع ريقو وشاف فمريم اللي كلست باهتمام حداه كتشوف فيها):- عاطيك الأمان غي قولي
فاتي :- أنا نكووون .. (ابتلعت ريقها)... صاحبة جواد من هادي عامين تقريبا
مريم(شهقت):- شنوووو ؟
ابراهيم(بعدم تصديق)):- صبري أمريم خلينا نفهمووو كملي
فاتي:- تعرفنا على بعضياتنا فواحد الليلة جا للبار اللي كنشطح فيه ووقع مشكل معا واحد الزبون وهو تدخل وتما كان التعارف وكان يتردد بين فترة وفترة باش يتفرج فلوحاتي حتى لواحد الليلة وفاجأني مين قالي مقادرش يبعد تفكيرو عليا وعرضت عليه يجي عندي للدار ومن داك اليوم بدات علاقتنا ..
ابراهيم:- طيب هادشي فهمناه اختاصري شنو مبعد
فاتي:- أنا مستعدة ندير اللي بغيتو بصح بصح اهئ اهئ تحميوني منو راه إلى عرفني أنا غادي يقتلني
ابراهيم:- قتلك عليك الأمان غي قولي شنو عندك
فاتي:- جواد هو اللي قتل داك العساس سمعتو بودني و هو كيكلم شي حد معرفتو ويقولو تاشي حد مغادي يفرشنا وهو منهار اللي هرب عندي فالدار حول حياتي لجحيم وبغيت نتخلص منووو فأقرب وقت علاش لجأتلك السي ابراهيم محيت عارفاك كدور عليه وانا بغيت نتفك
ابراهيم(عينيه لمعو بفرح):- دقيقة نكون عندك
دخل كيجري لبس كسوتو نيشان وهز مسدسو وخرج معاها تحت دعوات مريم اللي طارت للتليفون تزف الخبر لليلى وعزيزة وعيسى وهادو فرحتهم ودعاويهم باش يشدوه مقلتش على فرحة ابراهيم وهو كيحك اللوطو ومعاه فاتي اتجاها لدارها لكن منساش يدير اتصال للدوريات باش يسبقوه للعنوان وميخليوش داك جواد يهربلهم هاد المرة .. وصلو وطلب ابراهيم من فاتي تطلع عادي لدارها وتفتحها وغي تردها متقفلهاش باش هو ميشكش ويهرب منهم خصهم يداهموه على غفلة ، دخلت وهي كترجف بالخوف لايعيق بيها جواد تما يفصلها تفصال المهم حطت صاكها وخلات الباب كيف قال ابراهيم غير مردودة وبقات تقلب بعينيها عليه ملقاتوش فالصالون ومشات لبيت النعاس وسمعت صوت الشرشارة نتاع الدوش وفتحت غي شوية باب الدوش وشافتو تما واطمنت وهو خلعها بصوتو
جواد:- فاتييي هادي نتي ؟
فاتي:- واه أنا راني جيت مشيت وجبتلك الفلوس اللي طلبتي
جواد:- وحطيهم تما نسالي الدوش ونجي
فاتي(بمكر وخبث كتهدر من مور الباب معاه):- خذ راحتك راهم هنا يستناوك معندهم فين يمشيو
ابتسمت ابتسامة انتصار وهو سالا دوشو على راحة راحتو ولوا فوطة على جسمو وخرج وهنا كانت الصاعقة لقا ابراهيم مربع يديه وكيستناه أونفاص والدار عامرة بوليس
ابراهيم: عاش من شافك يا رفيق الروح
جواد(مخلووووع):- فاتي يا بنت الكلب والله حت..
ابراهيم(هززلو المينوط):- شتتتت متزيدش عليك شي تهمة تانية أنا محلك نفكر مزيان لأنه عندك مشكل أهم من ذلك وهو امممم كيغادير تدخل للكوميسيرية بهاد المنظر هههههههههه
جواد(عينيه كحالو بالحمورية وبغا يطير عليه لكن البوليس فيساع شدوه من يدو ودارولو المينوط):- ابراهيم خليني نلبس كسوتي متهبلش أكيد مغاديش تدي عميد شرطة للكوميسرية بهاد المنظر
ابراهيم:- ديزولي أنا الأوامر عندي كتقول نجيبك فالحين واللحظة ومتلبس مع أنه كاين تشكيك فكلمة مُتلبس ههههههههه
جواد(بقا يتنتر لدوك الجوج اللي شادينو):- والله حتى نتقم منكم كاملين غادي تشوفووو
ابراهيم:- القانون فوق الجميع يا رجل القانون هههههه
جواد:- والله تاندمكم والله تانخرج عليكم واحد واحد دبا تشوفووو
ابراهيم(سبقه وهو كيضحك باستفزاز):- جيبووووه مورايا
جواد(حمار وجهه وغادي يخرج قلبه بالغوات):- يا الكلب يا الحقير خليني نلبس كسوتي هادشي غير لائق فحق عميد شرطة غادي ندعيكم غادي نقاضيكم كاملين هادشي مسيء ليا ومنقبلش بيه ... ابراهيييييييييييييم ابراهيييييييييم ..
طبعا ابراهيم كان أخذو لجواد بداك المنظر أقل أقل انتقاما ليه والمفاجأة الزوينة أنه اتصل بواحد الصحفي يستناهم عند الكوميسرية باش يصوره كي يخرجوه من الصطافيط وياعيني على المنظر وجواد بقا كيحاول يدور وجهه باش ميصوروهش الصحافة اللي تما لكن تفضح تفضح بداك المنظر ربي جابهالو وهادشي عاد والو ، روحي يا فاتي يرضي عليك كيهنيتينا منو .. خليه يستاهل ^^
تاهيا جابوها معاه باش تعطي إفادتها وواعدها ابراهيم باش يوقف معاها وميكون عليها والو خصوصا أنها شاهد إثبات وهي اللي بلغت عن جواد ، الفرحة كانت عند ليلى كتتزوع فصنادق على الحومة لبست كسوتها فورا وخرجت معا مريم للكوميسرية كانت باغية تشوفو مشدود ومذلول لعل وعسى تبرد نارها وصلو وكان صعب باش يشوفوه لأنهم كانو كيحققو معاه وهو وقع وحس براسو صافي كملولو كاع المحاولات الفاشلة فالهرب من العدالة وبعد ترجي منو عاد تكرم واحد من معارفو وجابلو توني لبسه ،دخلو لمكتب ابراهيم اللي خبرهم باش يرجعو للدار لأنه صعب يشوفوه درك وخا كان فاهم رغبة ليلى وترجيها ليه خلاها تستنى لكن خروج فاتي من إحدى الغرف وقفها باش تتكلم معاها
ليلى(بمرارة شافت فوجه فاتي المدمغ):- نتي مزيانة ؟
فاتي(حست بيها):- غادي نكون بخير مين تهنيت منو وحتى نتي غادي تكوني بخير
ليلى:- أكيد
فاتي(بعد صمت):- طول الوقت كان يبغيك وخا كان معايا
ليلى(ضحكت باستهزاء ودموعها كيسيلو):- همم انتبهي لنفسك
فاتي(تنفست بعمق):- حتى نتي
مشات فاتي ومريم وقفت وربتت على كتاف ليلى اللي مسحت دموعها وقبل متكلس كانو مخرجين جواد وغي شافها بقا يغوت ويتنتر بين يديهم
جواد:- غادي نكون كيف الكابوس فحياتك معمرك غادي ترتاحي سمعتينيييييي يا الحقيررررة
ليلى(بقوة):- ههههه مبقيتش كتخلع السي جواد وبعد فترة بسيطة يتحكم فقضية الخلع وتما غادي نرميك باش تتعفن فالحباسات اللي كيليقو بيك سمعتني مغادي يبقالك حد غاتعيش وحيد طول عمرك وهادا ما تستحقه ..
جواد(بغا يهبل وهوما جارينو يديوه):- والله منخليك تعيشي يوم فراحتك غادي نسودلك معيشتك وهادا وعد يا الحقيرة القذرة الخاينة طلقوووووني طلقوووووني بعدوووو مني ....
مريم(شافت ليلى كتنهت بسرعة وعلى وشك تنهار):- ليلى ليلى نتي مزيانة ؟
ليلى(ضحكت برغم بكائها):- عااد دبا وليت بخير يا الله .. مريم مريم خلينا نمشيو فورا عند المحامي بغيتو يجي يتابع هنا وفأقصى سرعة نتطلق منوو
مريم(كتبكي لفرحها):- إن شاء الله ياربي إن شاء الله
امممممم السي علاء بمجرد مسمع الخبر الدنيا مساعتووش بالفرح ودبا مبقا إلا يتحكم بالخلع لصالح ليلى وغادي يتقدملها رسمي وأخيرا قرب الوقت اللي كيستناه من هادي شحال قرب يحقق حلمه المنتظر من سنوات ..
مزال كانت كتتفكر داك اليوم اللي جاو دار الفيلالي وجبرتها مها تلبس وتتزين بدون نفس ولا خاطر وقابلتهم بتعالي ووجه مقلوب والمصيبة أنها عجبتهم وهبلو عليها تا العريس طب فيها مالوهلة الأولى ومبقا إلا يتممو الهدرة ويتافقو على الصداق وداكشي وموراها يقراو الفاتحة ، البوشتاوي كان طاير بالفرحة واللرض مسايعاهش نسب ديال دار الفيلالي غادي يزيدلو همة ورنة كتر ماللي كيسعاها وهما عندهم وزنهم فالحومات كاملين وكلشي كيتخاطف يناسبهم والحظ طرق بابهم هاد المرة شكون كان يتوقع ، أما ربيعة كانت حاسة بوجع بنتها وحرقتها لكن كانت كتمسح دموعها وتتمنى ربي يسخر باش تنقذها مالهاوية السودة اللي وقعت روحها فيها ، لذلك كان من الصعب شي حد يفهم وجعها وألمها وتنهيداتها الحارقة اللي مكتطلع غير بسيف اما عيونها المبوقلين بالبكا كانت كتتحاشى بيهم تشوف فباها اللي ضربا بصقلة مين عارضت الزواج ورفضاتو وبززو عليها وقالها بسيف عليك تتزوجي ولد الفيلالي ولا غادي يكونلي حساب معاك ، ترجي ربيعة ومزاوكتها خلاو زكية تسكت ديك الفترة كلها لكنها مقدرتش تتحمل هادشي هي مستحيل تكون معا شي حد غير فارس احلامها اللي كتحلم بيه ليل ونهار ولا ساكننلها فالدم وبلا بيه متقدرش تعيش ... مسحت دمعتها وبقات تتلصص تاسمعت جعفر خرج واستغلت عدم وجود ربيعة والبوشتاوي فقط عيشة وهادي غاطسة فالكوزينة متنتبهش .. تسحبت بشوية بفستانها البني الغامق اللي فيه خطوط طولية فالبني بارد وكان طويل وفيه فتحات على جانبي الركب ودايرة شدة مزوقة فاللون البني على راسها كذلك وباينة فعينها ووجهها أنها مداقتش النوم من فترة ..لذلك اعتبرت أن هاد الخطوة ضرورية إلى بغات تنقذ حياتهاا وتلغي هاد الزواج اللي تكتب عليها رغما عنهااا ، طلعت الدروج درجة درجة وخلخالها فرجلها كتحاول ما أمكن متخليهش يدير صوت وهو استلغالو ووقف بانتباه كيشوف مجيهت الباب تنهد بصعوبة وغمض عينيه بعصبية ومشا بخطى متسارعة حل الباب بجهد وهي نتفضت وحطت يدها على صدرها بالخلعة وهو مكلمهاش وجا يقفل الباب فوجهها لكنها مدت يديها بقوة وحبست الباب وشافت فيه بتحدي يقفلها
زكية(تنفست بتعب وقلبها كيدق مليون دقة):- بغيت نكلمك فموضوع مهم
ياسر(جاي يبلعو مجددا):-مكان مواضيع بيناتنا أبنت الناس فرجاء نزلي لتحت بلاما تجيبي مشكلة ليك وليااا الله يخليك
زكية(متألمة من كلامو):- عفااااك مغاديش نعطلك غير جوج كلمات ونزل فحالي
ياسر(زفر بتأفف):- طيب اختصري شنو باغية تقولي ؟
زكية(شافت فديك الوقفة وبتعجب):- هنااا ؟؟
ياسر(باستغراب اكثر):- وفين بغيتي ؟
زكية ابتلعت ريقها ودفعت جسدها داخلة للشقة بلاما تسناه يجاوب وهو بقا غي يشوف فيها بتعجب وكيهزز فراسو جا يقفل الباب لكن تفكر أنه لا يليق وحلها على مصراعيها وتقدم لوسط الصالون على بعد 10 خطوات منها تقريبا
ياسر(رابط يديه):- تفضلي كنسمعك
زكية(قربت غي شوية وبتلعثم):- معارفة مين نبديلك بصح أكيد سمعت بخبر خطوبتي الفترة اللي فاتت
ياسر:- وي سمعت والله يسخرلك ويباركلك فزواجك
زكية(بوجع مخنوق):- أنا مباغياش نتزوج هاد الشخص وبَّا ومَّا مبززينو عليا بسيف نديه وانا إيلا تزوجت بيه غادي نمووووت
ياسر(بتعجب):- طيب كنتي ترفضي ؟
زكية(ضحكت بمرارة وعينيها كيدمعو):- عييت منغوت ونقولهم مباغياهش فالتالي كليت العصا ومكان عليا إلا نرضخ للأمر الواقع وحاولت والله حاولت نتعايش معا الموضوع بصح تخنقت مقدرتش مقدرتش نتخيل راسي معا شخص آخر مغير..
ياسر(حل عينيه بصدمة):- آنسة زكية كنضن باللي المكتوب ممنو مهرب ويلا عائلتك سيفوه عليك إذن راهم عارفينو هو الشخص المناسب ليك
زكية(قربت منو أكثر كتبكي):- نتا مفاااااهمش مفاااهمنيش أنا أنا ... كنبغيك نتا ومنقدرش نعيش حياتي معا شي حد تاني من غيرك أيااااسر والله ايلا كنبغيك
ياسر(مفزوع وبعد منها شوية):- ووووه وواو حدك تماااا أآنسة شنو هادشي اللي كتقوليه نتي أكيد حمقة وجاية ترمي بلاك علياااا
زكية(قربت بإصرار):- لكني تعلقت بيك وحبيتك كتر مأي حاجة فالدنيا ولذلك خصك توقف معايا وتعاوني
ياسر(ريشلها بيدو):- سمعيني مزيان الدروج اللي طلعتي منو غاتنزلي منو ومنحبش نشوفك هنا ع الأقل حتى لموعد رحيلنا اللي الحمد لله قرب بزااااف فرجاء كنتمنالك كل السعادة مقلبي تفضلي ..
زكية(بألم):- علاش واش أنا ماشي قد مقامك عارفة باللي أنا بنت حومة بسيطة لكني قارية وفاهمة صحيح ماشي تالشي درجة تخليني ناخد شهادة بصح نقدر نفهم شنو كيدور من حولي
ياسر(بغضب):- نتي مفاهمة والو رجاء تنزلي دباااا
زكية:- آه ولا أنا ماشي زوينة كيف مراتك اللي عايشة معا راجل غيرك فالحرام
ياسر(حل فمو بلاما يحس وهز يدو باغي يضربها بصقلة وهي غمضت عينيها بجهد وبخوف وبكا):- عندك دقيقة منشوفش وجهك هنا مرة أخرى ولا غادي نشكيك لبَّاك
زكية(انتفضت قدامو):- لا مغاديش ننزل قبل مندي منك وعد غادي تعاوني ولا غادي ندير شي حاجة فراسي وذنبي غايكون فرقبتك
ياسر(دون تصديق شدها من ذراعها بقوة):- لا نتي وقيلة جاية ترمي بلاك عليا معمدة سمعيني مزيان غادي تنزلي ولا ميعجبك حال
زكية:-إذن غانقول لبَّا أنك حاولت تتحرش بياااا وتما شوف شنو غايوقعلك
ياسر(جرها لعندو بجوج يديه بعنف وعينيه كيطلقو الشرار):- سمعيني آ بنت الناس أنا مباغيش نمد يدي عليك ف باللتي هي أحسن بعدي من وجهي أرحملك من غضبي
زكية(بحالة هستيرية وانفعال):-أنا كنبغيك كتر منها هي لوكان كانت تبغيك متقبل تعيش فدار راجل غريب ونتا شايف شنو كيقولو فالجرائد والمجلات عليهم وزايدون أنا سمعت كاع كلامك عليها هي خانتك معاه ولا دارتلك اعتب ... طراااااق
ياسر(ضربها بصقلة وبقا يتنهد بتسارع):- أوياك وتغلطي فيهااااا منسمحلكش وآه هيا مراتي وانا كنبغيها قنعي راسك بيها ولا شوفي كيديري المهم بعدي مني هاد الساعة مقادرش نزيد نتحملك
زكية(كتبكي بالقهر ومصدومة اللي ضربها وطارت شداتو من تريكوه):- عفااااك عاوني عفاااك أنا مستعدة نكون خدامة تحت رجليك طول حياتي غير خذني ومتخليش بَّا يزوجني أا أنا قابلة نتزوج بيك وخا مزوج وووو ..
ياسر(نزل يديها بعنف وجرها تالباب):- مباغيش نشوووفك الله يهنيك
زكية(بنظرة شريرة تنفست وصدرها كيعلو ويهبط بانفعال وغضب):- غادي تندم
ياسر:- ههه وصافي بقا غير البز دباااا يهدد فيا نزلي نزلي .... (طااااق قفل الباب لاتخها)
ومصيبة هادي بقيتيلي غي نتي م الوالي نهز همك اففف على لصقة يالطيف
نزلت وهي كتتوعد ياسر بالشر ومشات لبيتها كلست حدا مرايتها وبقات تشوف فراسها بدون نفس
زكية:- هي زينة بصح أنا أجمل منها وأحلى وغادي تتزوجني يا ياسر ونتا كتترجاني غاتشوف ..
ابتسمت بمكر لمرايتها ديك الابتسامة مباينلي موراها شي خير أحضي راسك أعمي ياسر لايهزك الما ويصفق عليك الحوووت ^^
الآنسة زكية طبعا طاحت عليها فكرة جهنمية وقررت تنفدها فداك اليوم بعدااا واللي ليها ليها مشات ياسيدي سيلت الكحل من عينيها اللي اصلا كان نزل من البكااا مي بالغت وحطت ملمع شفاه ومسحاتو بطريقة لامست شوية خدها و قطعت كم لباسها وشوية من فتحة الصدر وهزت عمود ديال الحديد وضربت بيه يدها وفخدها اللي قطعت الفستان من جهتو وبقا يبان ،كانت باغية تدير كدمات على جسمها وفعلا نجحت دغيا بانو وهزت مساك ديال الشعر وفوتاتو تحت شفتيها وجرحتها غي شوية ومسحت داك الدم اللي خرج من تما وشعبشت شعرهااا وقرصت حنوكها بزاااف وغي سمعت صوت مها وبَّاها جاو نزلت من الدروج اللي كانت كالسة فيه كتستنا بلاما يعيق بيها حد ودارت روحها كتبكي وغي شافتهم تخلعت وبقات تحاول تستر راسها بخجل وكأنها دارت شي ذنب أما مها وبَّاها شهقو ومقدروش يتصورو المنظر اللي العمى يفهمه ....
ناضت القيامة ومتقولو مناضتش طلع البوشتاوي هاز عصاه وموراه رجالو وبقا يدقدق فباب الشقة لفوق وهو كيغوت وموراه ربيعة تسكتو وتقولو متفضحناااش متفضحناش خلينا نسترو القضية بيناتنا لكن شكون يسمعها دفعها غادي يطيحها لولا واحد مرجالو سندها وفتحلو جعفر مخلوووع ، دفعه البوشتاوي ودخل وموراه كلشي
البوشتاوي:- فيرااااه فيراه عديم الأخلاق أنا أنا يندار معايا هاكدة دخلتكم داري وسترتكم أجعفر وفالتالي تغدرووو بياااا فيراااه داك الشماتة اللي مسلي عرضي وشرفي والله هاد النهار نتحي عليه وربي كبير
جعفر(ماقادرش يفهم):- البوشتاوي الله يهديك متفهمني بالعقل شنو كاين ؟؟؟
البوشتاوي:- ربيعة ربيييييييييييعة جيبيهالو جيبيهالو يشوفهااا بنت الحرام حسابها معايا هو التالي بيما قتلت هاد عديم الشرف والنخوة
ربيعة(جرتها موراها وهي كتبكي ودفعتها للصالون وهي كتحاول تجمع كسوتها وحشمانة):- هاهيا
البوشتاوي:- واش شفتها ولا مشفتهاش فهمت ولا نفهمك شنو دار داك اللي جبتولي وكلتو من أكلي وشرابي وفالتالي عضلي يديا
جعفر:- راه واقع سوء تفاهم ياسر مستحيل يك....
ياسر(خرج مالبيت مفاهم والو):- شنو كاين ؟؟
البوشتاوي(طار عليه شدو بقجة وجعفر كيحاول يفك):- أجي لهنا كتقتل القتيل وتمشي فجنازتو أجي لهنا وكتسولنا عاد شنو كاين ضيعتلي مستقبل بنتي يا الحمار يا الشماتة
ياسر(شاف فيها مخلووووع وكيحاول ينتر يد البوشتاوي):- أسيدي بعد مني نتا وبنتك أنا مفاهمش أصلا علامن كتهدر
البوشتاوي:- وتنكر تنكر أنك ضحكت عليها وتعديت عليهااااا شهد على روحك شهد اليوم ميصبحش عليك الحال يالناقص
جعفر(كيحاول يهدي الموقف):- غير بالعقل البوشتاوي غير بالعقل ويلا الولد غلط نصلحوه وبلاما نفضحو راسناااااا
البوشتاوي(فكر فكلام جعفر وطلق ياسر):- أويلي كينقول لدار الفيلالي فضحتيني وجبتيلي العاااار
مشالها عطاها جوج صقلات ومها شدتها من الشعر مفكوعة بالبكا وتندب وتحندب أما هي كانت تبكي مي كتشوف فياسر بتحدي واستفزاز
ياسر:- هادشي ملعوووب أنا مقربتش منها ولا جيت مجيتها بنتك اللي كتطلع عندي وكانت ترمي روحها عليا ولكن أنا مقربتش منها باش تجيو دبا تتهموني فيها
البوشتاوي (واقف جعفر حاجز بينو وبين ياسر وباغي يطير عليه مجددا):- والله إيلا ما قطعتكش ياهاد الشماتة على طولة اللسان اللي فيك والكدوووب بااغي تفلت منها، لكن وشرفي وعرضي اللي مسيتو يا تكتب عليها هاد الليلة يا تشهد على روحك
ياسر(غادي يجيه انهيار مهاد الشي):- واش غادي تطيحو عليا الباطل أسيدي شوف بنتك وانا راني قتلك مقربتها مامستيها
جعفر(كيدفعو باش يسكت):- سكت سكت متزيدش النار أياسر ويلا غلطت ودرتها معليش نصلحو غلطنا وزيتنا فدقيقنا
ياسر:- واش باغيين تبليوني بيها جعفررر متهبلنيش نتا عاود كاع هادو ومتخلفين وعروبية بصح متجيش نتا وتمشي فهواهم
البوشتاوي(باغي يقجه تاني وكيتنيقز بعبايتو):- أبلعه ولزم حدودك باش تطلب السماح زايد كتعاير فعلا نتا ناقص وخصك التربية ماللول وجديد لانتا لا هاد قليلة الحيا اللي غادي ندبحها ونشرب من دمها
ربيعة(عنقتها وخا غبنتها):- إلابنتي يا البوشتاوي إلا بنتي هو يصلح غلاطو ويتزوجهاااا ويادار مدخلك شر هو يتزوجها وربي كبير
البوشتاوي:- جعفر قسما بالله وميكتب عليها هاد الليلة حتى نحرقه هو وياها بليصونص
ياسر(كيتنهد بصعوبة مقادرش يتيق شاف فرجاء فجعفر اللي الواضح كان فصفهم):- جعفر الله يهديك واش غادي تيق هادشي ... ونتي نطقي قوليلهم الحقيقة علاش كتبلاي عليااا والله مكتحشمي
زكية(حاطة راسها وبدموع):- اهئ ياسر دبا اللي عطا الله عطاه وهما عرفو اهئ خصك تستر عليااااا
ياسر(كيريش برفض وغلب عليه الضحك):- عهههه واش كتضحكو معااااايا .جعفرررررررر
جعفر(قرب منو):- ياسر ياسر تهدن اياسر وكلشي ليه حل والبوشتاوي ماطلب غير الأصووول نتا لازم تسترتها (بقا يعض شنايفو ويغمزلو باش يسكت).. أ البوشتاوي عيط للعدول غادي نزلو عندكم لتحت بيماااا عدلتو البنت وسكدتوها
البوشتاوي(ضرب بالعصا فاللرض بعصبية):- منزل تانسمعها منوووو
ياسر(هزز راسو رفضا):- شنو يسمع شنو يسمع واش باغيييين تهبلوووني ولا جعفرررر شنو هادشي
جعفر(كيغمزلو):- اممم امممم ويالالاه اياسر حنا راحنا مأصلين وغادي نصححو غلطنا يالاه بوس يد عمك البوشتاوي وطلب السماح
ياسر:- مستحييل واش باغييين..
جعفر(طار عليه بلعلو فموو وبقا يضحك ويهدر للبوشتاوي):- راك عارف طيش الشباب ولاموووغ يا البوشتاوي بصح أنا نكفلولك هاد الليلة نكتبو كتابنا على بنتكم ليه فين لينا نلقاو بحاااالها
البوشتاوي(مزنطر عاد):- غادي نشووف السي جعفر لكن والله وتخرجو الهدرة غير ايلا وريتكم وجهي التاني وتما عليا وعلى اعدائي ورجالي غادي يبقاو فم الباب يستناو إشارة مني ويلا فكرتو تلعبو سبسبوت معايا تجيبوها فراسكم... يالاه نزلوو (شد زكية مشعرها)نزلي نزلي يا بنت الحرام
نزلها مجرجرها مشعرها ولتخها وسط الحوش ديالهم وطاح فيها بالضرب والعصا وربيعة وعيشة كيحاولو يسلكوها وهي كاع مهمها لا ضرب ولا سبان ولا والو بقدر فرحها اللي كينقز فداخلها غادي تتزوج بيه شكون كان مصدق والله ونجحت خطتها هههه خرجتي مالجنب يا زكية معرفتكش ^^
أما هو كلس فشلان صافي على الكنبة
ياسر:- جعفر جعفر واش نتا تيق انني ندير هاد الشي اللي مكايدخلش للعقل ؟
جعفر(كلس حداه):- ياودي كلعت شنافتي وانا نعضلك ونغمزلك باش تسايرهم وتسكت
ياسر:- علامن نسكت هادشي راه باطل وطيحاتو عليا ديك اللعينة
جعفر:- هوما ناس تفكيرهم سطحي مستحيل مغادي يتيقو بنتهم أنا عارفك ممسيتهاش لكن هوما صافي وصمة العار ودخلت لدارهم ودبا عندك خيارين اللول فيهم أنك تتزوجها وتسترها هاد النهار ومبعد فترة مؤقتة تطلقها تما تاشي حد ميكون عندو معاك شي حاجة وتخليها فدارهم وتقول للبوشتاوي تفضي مشاكلك وتجي تاخدها راه مغايعارضش المهم يتم الزواج والخيار الثاني نهربو هاد الليلة ونخليوهم يقتلوها ويديرو فيها شرع يديهم ..
ياسر:- ههه يعني دبا مصيرها مرهون بيا هاكدة باغي تقولي ياك ؟
جعفر:-للأسف هادا اللي كاين ونتا مجبر باش تنقذها
ياسر(وقف بعصبية):- لا ماشي مجبر شكون قالهالك أنا مضربتهاش على يدها باش دير هاد المسرحية إذن تتحمل النتيجة اللي غاتجي فراسها هيا بعيد عليا وكاع بلا هادشي دبا نجيبو ديك نهيلة طبيبتهم وتفوت عليها ونفضحها قدامهم
جعفر:- ولووو دبا وخا تايحلفولهم كاع الطبة نتاع المغرب أنها عاد بنت وملمسها حد راه مغاديش يرجعو يتيقو فيها وهاد العار لابسها وخا بريئة
ياسر(بانفعال):- يعني شنو لبستني لبستني هاد المصيبة هادي ؟؟؟
جعفر(وقف):- ياسر حنا ولاد ناس صحيح يدينا ملوثين لكن تبقى فينا ذرة إنسانية ودبا حكم ضميرك\
ياسر:- واش نسيت أنا أصلا مزوج بحبيبتي ؟
جعفر:- ومضطر تتزوج هادي حتى هيا وإلا غادي يكون ذنبها فرقبتك ليوم الدين
ياسر:- وناديا إيلا عرفت شنو غادي دير ؟
جعفر(كيحاول يقنعه):- شكون غادي يقولها حتى جميلة مغاديش يكون فعلمها
ياسر(ريشلو وجاي داخل لبيتو):- سمع سمع هادشي ميخرجنيش السي جعفر و ميهمنيش هي سطاش تعوم بحرها هي اللي دارت هادشي وتفكه
جعفر(تكا على الباب بقا كيشوف فيه وهو كيجمع حوايجو):- ياسر البنت سمع غواتها راهم كيضربو فيها ماللي نزلت واش مشفاتكش خلي فقلبك درة رحمة
ياسر(كاع مهتمش وبقا كيجمع):- صراحة متسال عليا إلا ندعي معااها فمصابها أما باش تحصلني فبزاف عليها
جعفر:- هادا مكتوب و قدر خصك تمشي عليه
ياسر:- الله يخليك متشد فلسفتك عندك أبَّا أفلاطون مانيش ناقصك
جعفر:- صافي قررت ؟
ياسر(هز كارطابو وخرج):- نشوفك مبعد
جعفر بقا مسمر بلاصتو كيشوف فالباب اللي لتخها ياسر موراه وخرج وبقا كيفكر وجامع يديه كيغاديرو فهاد المصيبة فاتت شي 4 دقايق ودخل من الباب رما كارطابو على الكنبة واتجه مريش صبعه لجعفر بتهديد واضح وشر كيطاير موجهه
ياسر:- فترة مؤقتة ؟؟
جعفر(بابتسامة):- مؤقتة
ياسر:- ونطلقها؟
جعفر:- وطلقها
ياسر:- وتاشي حد ميعرف ؟
جعفر(دار حركة قفل الفم):- بيني بينك مع أنه تعرف شنووو كان بودي تعرف ناديااا ع الاقل باش تحس ناديا بالنار اللي كتحسها نتا وهي معا وليد
ياسر(فكر للحظة بأنانية وحس باللي فعلا هاد الخطوة غادي تبرد نارو إلى شعلها فقلب ناديا لكن يستحيل يكسرهااا مغاديش يسمح لشيطان يلعبلو هو غايدير الواجب ديالو ويهني السوق):- اففففففففف ياربيييييي تعاوني وتسهل باش نديرو هاد الخير ونتفكو منو على خيرررر وهي والله والله غير إيلا خرجت منها هادشي كامل بنت الذين بغات تخرج عليا
جعفر(كيضحك):- مي اعترف دارتها بيك ههههه
ياسر(بعصبية):- واش فبالك مغاديش نعترف لا نعترف ونص دارتها بيها ولعبت عليا العشرة كاع
جعفر:- هههه شكون بحالك يا الجن غادي تزوج جوج مرات وانا خوك هادي 30 عام تقريبا كنحاول نتزوج غي بوحدة مقديتش ههههههههه
ياسر:- والله مافيا خاطر لضحكك الباسل دبا خليني نفكر فمصيبتي اللي غادي نوحل راسي فيها لكن حاس براسي كنخون ناديا وخا أنا غير فيكتيم فهاد اللعبة هادي
جعفر:- ماتخونها ما والو نتا غادي دير واجب إنساني وياخويا نتا خليتها تطب فيك إذن تحمل ادونجوان
ياسر(صاط باستسلام):- افففففففففففففففففففففففف
جعفر:- نتا غادي تنقذها فما عليك إلا تدير الخير وترميه للبحر
ياسر:- تخاف هو يرميني للبحر غي سكت سكت
جعفر:-هههههه هاوا ساكت أمولاي السلطان
ياسر(بنرفزة):- جعفرررررررررررر
جعفر:- هههههههههههههه والله الموقف كلو مضحك لوكان ملحقتكش كان غادي يقتلك باها
ياسر:- غي سكت وكلو بسببك نتا اللي جبتني لهاد المكان
جعفر:- ولاواه متردهاش فيا نتا ماللي جيت طيحت بنتو فشباكك
ياسر:- وانا كاع قربت منها الله يبعد علينا شي باطل
جعفر:- وا وليدي شنو نقولك راه طاح عليك ونتا مضطر تهز الحمل ويالاه يالاه دخل ضربها بتدويشة راه الليل عندك تزويجة عهههكخخخخ
ياسر(كاره راسو):- لوكان متسكتش غادي نقتلك بيدي نتا وياهم ونهرب
جعفر:- ههههههههه
جعفر كان كيضحك من قلبه أما ياسر بخخ وقع فهاد المشكلة وعند بالو غادي تفضى مبعد فترة بسيطة كيما واعده جعفر خصوصا أن موعد عمليتهم قرب إذن خصو يكون فضا كاع أمورو و للأسف كان مجبر كيما قالو جعفر باش يقوم بديك المهمة وإلا غايقتلها بَّاها المسعووور ، مبعد عدة ساعات كانت كالسة أونفاص لمرايتها وعيشة كتصاوبلها شعرها ومها كالسة كتبكي ونهيلة كتحاول ديرلها شوية ماكياج لوجهها وهي عينيها كانو يفرفرو بالفرح وكيلمعو وخا حاولت تخبي قدامهم لكن قلبها كان طاير وفداخلها كلشي كيترعد ويخفق بقوة وصلت لمرادها وغادي تكون هي وفارس أحلامهااا يااااه ، بقات ربيعة تتحسر وتاكل فجنابها اللي صيفطو اعتذار لدار الفيلالي ولفلفو القصة أن الولد كان باغيها وغادي تمشي معاه للخاريج وخا غادي يجيهم صداع فالحومة أنهم خرجو على هدرتهم وبزاف الحوايج لكن اللهم دوك صداعات ولا العاااار اللي كان غادي يتوصم بيه البوشتاوي اللي كان كالس فالصالون لابس جلابتو وداير يديه على عصاه ومتكي عليها غارق فتفكيرو حتى جاتو ربيعة مبعد ملبست تاهيا قفطان بيتي وكلست حداه كتمسح دموعها
ربيعة:- مكنتش باغية نزوج بنتي بهاد الشكل
البوشتاوي(هدر بلاما يهزز راسه):- ولا أنا .. كنت باغي نديرلها عرس مطرطح تهدر عليه المدينة كلها
ربيعة:- قدر الله وماشاء فعل الحمد لله قبل يسترها
البوشتاوي(ناض بعينيه حومر):- بسيف عليه يسترها ولا غادي يخرج مهاد العتبة محمل
ربيعة:- دخل عند بنتك شوية راه ...
البوشتاوي:- بنتك ماليوم معزتها ماتت فقلبي غير تكتب كتابها على الراجل ويديها معاه مباغيش نشوفها ليوم الدين
ربيعة(شهقت بهلع وخوف):- حرام عليك هادي بنتك الوحيدة سامحها نبوسلك يديك
البوشتاوي:- ربيعة هدرت هدرة منعاودش جوج خلي هاد الليلة تفوت على خير ويحلها مولانا
ربيعة:- فوقاش يجي العدول؟
البوشتاوي:- منبعد صلاة العشا وباغي كيكملو تخلي عيشة تزغرت مناقسناش فضايح بركة غي الناس شاكين فالموضوع
ربيعة:- البوشتاوي الله يخليك متدخل عندها غي شوية
البوشتاوي(شاف فيها بتأثر وحنان لبنتو لكنها جرحاتو ودبحت كرامتو فالأرض):- نوضي عليا منا
ناضت وهي مطأطأة راسها ومخلياه مزنزن بالقهر والوجع وحرقة القلب بنتو جرحاتوو جرح عمرو مايبراا بنتو اللي كان كيحلم يديرلها عرس همة وشان ويزوجها أحسن تزويجة يحسدوها عليها بنات جيلها ويديرلها اللي مايندار ويفرح بيها وهو هاز راسو أما دبا حطتلو راسو فاللرض ووسخت علاقتها بيه ومستحيل يقدر يسامحها على الشي اللي دارتووو ولا يسمح لياسر ولا جعفر تاهوا .. كان الغضب باين عليه بصح كان بسيف عليه يفوت ديك الليلة بسلام .. جاو العدول وصيفط البوشتاوي شي حد يعيط لجعفر وياسر اللي نزل مجرور مسكين كيحس بوجع عميق فقلبو وكأنه كيخون حبيبتو وهو فعلا كيخونها بصح مجبر بسيف عليه يتزوج بنت البوشتاوي ولا غادي توقع مجزرة ، نزل راسو وكلس فبلاصتو والدنيا مضيقة عليه وحاس بالخنقة أما البوشتاوي كان غير كيخنزر فيهم وطلب مالعدول يستعجل وهادا اللي بدا فالمراسم وطلب استدعاء البنت وجابتها مها وعيشة ونهيلة كانت رقيقة بفستان وردي اللون بارد وتسريحة شعر على الجنب ومايكاب خفيف ياسر غي شاف فيها حس بالضيق وبقا يتنفس بغضب أما هيا فكانت كتشوف فيه وعينيها طايرين معاه ودفعتها مها باش تكلس حدا باها اللي كحز عليها ومبغاهاش تقرب منو هي ستشعرت ديك الحركة لكن مهتمتش كان معمي على قلبها وعيونها اصلا سولهاا العدول وجاوبت بموافقة وسنياو وطلقت لالة عيشة تزغريتة زلزلت الحومة وتبعتها نهيلة وربيعة اللي مكملت تزغريتها تانطلقت بالبكا والنواح وكان غادي يضربها البوشتاوي لولا تدخل جعفر ، مشاو العدول ونهيلة وبقاو غير هما فالصالون
البوشتاوي (بعد صمت):- جعفر كنضن للآن ودرت معاكم الواجب لكنكم طعنتوني فظهري وجاب الله صححتو غلطكم ودبا كنطلب منكم تخويو الدار الفوق ودبرو على راسكم والبنت هايا ملككم من اللحظة ديرو فيها اللي عجبكم أنا بنتي ماتت بالنسبة لي
زكية(شهقت مخلوعة وطارت عندو تبوسلو يديه):- بَّا بَّا لا مديرهاش أبَّا نتا عارفني شحال كنبغيك وو
البوشتاوي(دفعها بيده جات طايحة الأرض):- بعديني لهيه لانتي بنتي ولانا نعرفك ماليوم منحبش نشوفك ونتا دي مرتك وخرج من داري
زكية(حست بالندم والوجع وطارت عند مها تبوسلها يديها):- مَّا مَّا قولي شي حاجة عفاااك بَّا راه غي يضحك ياكي أمَّا ...
ربيعة(انفجرت بالبكا):- الله يابنتي الله وشنو درتي اهئئ اهئ
ياسر(مقدرش يتحمل هادشي):- جعفر نطق !!!
جعفر(همسلو):- شنو ننطق البوشتاوي ضيعلنا كاع الفكرة ضروري مخصنا نديوها معانا
ياسر(بقا يتناقز):- مستحيل فين نديوها جعفر نتا حصلتني دبا و حلهااااا ؟
جعفر:- مراكش شايف الوضع متوتر طلب زهرك نخرجو منا سالمين وعاد أحياء
ياسر(كيشوف فيها بعدم تصديق):- يعني شنوووو حصلت فيهااا ؟؟؟؟؟؟
جعفر(شاف فنفس الشوفة نتاع ياسر):- واهادا الواااضح
البوشتاوي:- كاين شي مشكل ؟؟؟
جعفر :- لا والو والو ألبوشتاوي غادي نخويو الدار نطلعو نجمعو حوايجنا ونتوكلو ع الله
البوشتاوي(بدون ميشوف فيها):- ونتي سيري جمعي اللي تيسرلك من حوايجك وخوذي كاع دهبك معاك و الحوايج اللي كانت مخبياهملك مك و ربيعة عطيها شي بركة باش غدا مغدا متقوليش بَّا رماني
زكية(ركعت تحت رجليه):- مبغيت والو مبغيت والو أبَّا غير تسمحلي ياك أنا بنتك حبيبتك؟
البوشتاوي(قلبو واجعو وغادي يضعف):- بنتي حبيبتي اللي ربيتها وسهرت عليها الليالي متطعنيش فظهري وتحط راسي تحت التراب متحرمنيش نفرح بيها وانا رافع راسي نوضي نوضي روحي معا راجلك مبقيتش قادر نشوف فيك ..
ربيعة(مبعد مشافت البوشتاوي دخل لواحد البيت وقفلها عليه):- درك يهدا وينسى كاع هادشي نوضي معايا أبنتي نوضي اهئ اهئ
ياسر(بعصبية طالع):- تبعني أجعفر تبعني
ربيعة كانت كتحطلها فواحد الصندوق جهازها ونقدتها اللي كانت كتجمعهالها كأي أم وحطتلها صامصونيط عامرة دهوبات أما عيشة كانت تبكي وتحط ففاليزة ثانية كسوتها وحوايجها الشخصية أما هي فكانت كالسة فكرسي ومتبعاهم وحاسة بالإنكسار اللي حطتهم فهاد الموقف مفكرتش فهاد النتيجة وأن الأمر غادي ياخد هاد المنحى صحابلها غادي يفرحو معاها سعا كسرتهم وجابتلهم العار بغات تنطق وتقول لمها الحقيقة لكن تحبست الهدرة فجوفها دبا فات الفوت واللي تكسر مستحيل يتصلح ، تنهدت بعمق وهي كتبع حركاتهم ، في حين هو كان لفوق يتشارع معا جعفر
ياسر:- دبا حلهالي أجعفر على أساس نخليوها فدارهم
جعفر:- بَّاها غضبان عليها ويلا خليناها غادي غير نأزمو الوضع خصنا نديوها معانا حاليا ومبعد يحلها الله اياسر دبا معلينا إلا نسايروهم تانشوفو فين غايوصل هادشي
ياسر:- سمعني أجعفر الوضع بدا يخوف وانا مغاديش نتحمل مسؤوليتو
جعفر:- اففف خليني نتاصل بجوليو نشوف فين وصل موضوع الدار ويلا كانت واجدة يعني نحلت
ياسر:- غانشوفو أجعفر
الدعوة مبقاتش تعجب ياسر حس راسو حصل فهاد المشكلة وصعب يخلص راسو منها من حسن حظهم جوليو كان مجهز الدار وعطاهم العنوان باش يمشيولها وداكشي اللي كان خرج ياسر ركب بلا هدرة ولا كلام وجعفر بوحدو اللي كان هز جوج فاليزاتها حطهم فالخلف نتاع اللوطو وهي لوات شال بعشوائية على راسها ووقفت فعتبتهم مبعد معنقت عيشة ومها وبقات تشوف فدارهم ودموعها كينزلووو شافت بألم فسرجم البيت اللي كان فيها بَّاها ولمحت الحجاب تهزز نزلت راسها الأرض وركبت الخلف وجعفر ودعهم وصاك بيهم لمكان مكايعرفو حد ... ياسر بقا ساكت منطقش ولا حرف وهي بحال المش كلالها لسانها قفوزيتها كلها مشات حست بالألم ماشي هاكدة كانت راسمة ولا متخيلة كلشي تقلب ضدها لكن وجودها معا ياسر غادي يمسح داك الألم اللي حست بيه وهادا اللي كان راسم الأمل فعينيها وفقلبها ..
بعد قيادة طويلة وصلو لواحد الدار على البحر نزل ياسر هو اللول لاتخ الباب بعصبية و لقا واحد الراجل كيستناهم وفيدو المفتاح شدو عليه وشكره هاداك مشا وياسر فتح الباب بعنف ودخل أما جعفر نزل وهز دوك جوج فاليزات ودخلهم للدار ولمح أنها متزحزحتش ومشا فتحلها الباب وبتسملها بطيبة هي حست بالإمتنان مع أنها كانت باينة فيها مكسورة ونزلت بكل خجل ودخلت موراه بقات كتشوف فجنبات البيت حالها حال جعفر لكن هي كانت تقلب على أثرو اللي تلاشى حتى انتبهت أن باب الجردة اللي خارجة مالكوزينة مفتوح ورمات عينها لقاتو كالس فواحد الكرسي تما و مورَّك على يديه بشرود لمحها جعفر وبغا يكسر الإحراج ويحسسها بالطمأنينة ولو شوية ..
جعفر:- أ زكية طلعي لفوق شوفي البيت اللي عجباتك وخوديها باش نجيبلك فاليزاتك تعدلي حوايجك
زكية(بدون متحس شافت بعيد فين كان ياسر):- أ...
جعفر(فهمها):- هو عصبي مبعد وغادي يكون هادي لكن نتي ديري اللي قتلك
زكية:- وخاا السي جعفر
طلعت وموراها كان جعفر هاز حقائبها وشافت بيت مطلة على ديك الجردة بعدا وأمامها البحر مباشرة كان المنظر رائع ونجوم الليل والقمر منعكسين على البحر لكن شكون يستطعمو فداك الموقف حطلها جعفر حقائبها وخرج كيشوف فالدار وفمداخلها ومخارجها وشنو فيها كاع أما هيا بقات تشكر ديك اللامبة اللي شعلها ياسر قبل دخولو للجردة واللي خلاها تشوفو وخا كانت شوية الدعوة مضلمة لكن بعداااا ، بعدت على ديك النافذة مين شافتو وقف وحمر فيها مباشرة ودخل حست بالخوف والقلق لكن صبرت روحها دبا رمات راسها وسط النار فخاصها تتحمل بقات تشوف فغرفتها الجديدة واللي كانت غريبة على اللي تعودت عليهااا طول حياتها كلست وجبدت من صاكها صورة ليها كالسة وسط ربيعة والبوشتاوي وحطتها فوق المنضدة وبقات تصاوب حوايجها بكل أريحية، عكسو هو اللي كان كياكل فجنابو فالصالون وجعفر مربع يديه كيحاول يهديه ...
ياسر:- وجودها بحد ذاتو كيخنقني يا جعفر وافهمني متمعصنيش
جعفر:- يووووه وهنينا مهاد الصداع دبا البنت هنا ومعندنا منديرووو من واجبنا نحميوها ونوقفو معاها
ياسر:- علاش كل مانقول تتسكد كتعواااج من جديد
جعفر:- كل عثرة فيها خير
ياسر:- ههه خير لا نتا متفائل بزاف مشاء الله عليك
جعفر:- كنحاول ناخد الموضوع من جهة إيجابية باش منجلطش أعصابي
ياسر(بعصبية ربع يديه):- اهاه تفضل تفضل وخبرني على جهتك الإيجابية وعظني لعلك ترضى
جعفر:- حاليا البنت فذمتنا حنا خصنا نوجبو معاها ونحافظو عليها غير ذلك هي فترة وغادي تمر وكلها ويمشي فطريقو
ياسر:- أنا خايف مهادشي والله لوكان غير خليتني نحكي لباها الحقيقة ونخرج راسي مهاد الدوامة هادي أنا مالني بيهااااا أنا مزوج وعندي حبيبتي اللي غادي نرجعها فأقرب فرصة وتما كيندير إيلا كان مشكل هادي مزال متحل غادي نحصل فيهااااا ؟
زكية(بألم ودموع سمعت كاع حديثو ونزلت مالدروج بثقة):- سي ياسر أنا معمرني فكرت نأذيك وكيما قال السي جعفر يمكنلك فترة وطلقني نرجع لدارنا لكن منا لتما نتا مضطر تحتارمني ولو قليلا وكن على يقين مستحيل نوقف فطريق سعادتك
ياسر(تمشا حداها كي النار):- نتي غادي دمريها أآنسة زكية
طلع كيجري فدوك الدرجات وسمعو لتيخ الباب وهي دموعها نزلو معينيها
جعفر(وقف عندها):- زكية الوضع متوتر بزاااف وطبيعي يوقع هاكدة الموضوع عاد جديد عليه ومستحيل يستوعبو لذلك عطيه وقت ، ياسر كيبغي مرتو فوق متصوري لذا حاولي تكسبيه كصديق غير ذلك غادي غير تصعبي عليك المعيشة أنا بحال عمك وكنصحك لمصلحتك لاحقاش مكانش اللي غادي يتألم بقدرك نتي
زكية(مسحت دمعتها):- طالما كيبغيو بعضياتهم علاش مخليها بعيدة عليه وعايشة معا رجل غريب وكتصور هنا ولهيه شنو تسمي هادشي عييت نفهم مقدرتش ؟
جعفر:- سمعيني كاين شي حوايج صعيب تفهميهم لذلك خليها للوقت وصافي
زكية(عرفاتو مغادي يقول والو):-تصبح على خير
جعفر:- ونتي من أهله أزكية
طلعت كتجرجر رجليها ودخلت لبيتها اللي لقاتها فارغة كيف خلاتها وعرفت أنه خدا غرفة بجنبها بقات تشوف بألم فدوك الحيطان وكتبكي لكن عزمت باش ترجع الأمور لمجاريها مهما يكن هي مستعدة تضحي وتصبر ويكفي أنه بقربها دبا ومعاها فنفس المكان شنو بغات أكثر ..
تقريبا تاشي حد منعس ديك الليلة هو بقا يتقلب فالفراش وحاس بالخنقة ومكرهش يسمع صوت ناديا فديك اللحظة لكن مكانش قادر يتصل قلبو كان واجعه أما جعفر كان كيشرب وطلع يتمايل حتى دخل لبيت اخر الكولوار وترما على السرير بدون ميحيد صباطو وهي كانت معنقة وسادتها وتتخيل روحها فحضن ياسر وهكذااااا .. فاق الصباح ولقا راسو واجعه وحاس بصداع من صوت المعصرة مولينيكس اللي كتضرب هادي 10 دقايق ولا سكتت بقا يزمجر ويربب وضرب الوسايد وفاق خدا دوش خفيف ولبس كسوتو ونزل لقا جعفر كالس على مائدة الأكل وزكية كتحط الفطور وعصير برتقال طحناتو شاف بحقد فداك العصير اللي حرمو النعاس
زكية(بلطافة وهي واقفة فالبوطاجي اللي كيشوف فطاولة الأكل):- صباح الخير
ياسر(مردش عليها وكلس أونفاص لجعفر):- نوض نخرجو
جعفر(راسو مقسوم):- عندي صداع رهيب لبارح تقلت شوية وراني نستنا اتصال مهم
ياسر:- إيوا أنا خارج
جعفر:- معندك فين تمشي أنا محتاجك الإتصال مهم لينا بجوج
زكية(حست بالخنقة مين مردش عليها لكن رجعت ابتسمت):- كيتبغي قهوتك السي ياسر ؟
ياسر(شاف فيها بشر):- جعفر قولها تتحاشاني وإلا غادي السي ياسر ميكونش مليح
جعفر(شرك وبقا يكح):- اه وحح مكيشربش القهوة أبنتي نهائيا بلاما تعذبي راسك راه اليوم أقلع عنها
زكية:- أنا كنت غير...
ياسر:- جعفر قلها تسكت محيت صوتها كيجيبلي رغبة فالقتل افففففففففففففف
وقف وصاط فوجهها وتجاوزها وخرج للجردة أما هي ارتبكت ورتعش جسمها وحست بحنوكها حومر والدموع بقاو يسيلو بوحدهم
جعفر(يحاول يطيب خاطرها):- طيب عمك جعفر ميستاهلش قهيوة قاسحة من يديك ؟
زكية(بأمل وفرح):- حالا تكون عندك
مبعد مشرب قهوتو خلاها تهز الفطور وخرج لعندو وكلس حداه وبقاو يشوفو بجوج فالبحر
جعفر:- تحاول عليها متبقاش كالس تقهر فيها كل لحظة
ياسر:- هادا اللي باقي تزوجهالي بسيف ودبا قولي كيفاش نتعامل معاها وزايدون هاديك لحمها مر مهما قلت عديمة الإحساس اللي دير هاد الخدمة شنو فبالك عندها عقل أو إحساس هه
جعفر:- مع ذلك حاول متجرحهاش
ياسر:- جعفر الله يخليك متدخلش يكفي أنني متحملها معايا تحت سقف بيت واحد
جعفر:- ولايني راسك قاصح آه آه
ياسر:- خليني منها ومن سيريتها اللي كتجيب الغمة قولي شكون اللي غادي يتصل بيك ؟
جعفر:- جوليو وصيتو على واحد الموضوع وراني نستنا اتصالو
ياسر:- آشمن موضوع وعلاش مقتلي والو ؟
جعفر:- هاوا غادي يعيط وتفهم بوحدك ...
صفوان:- فيديريكو شنو معناة كلامك قتلك تجبدهملي ولو كانو فسابع أرض لكنك فاشل لانتا لارجالك
فيديريكو:- سيدنا راه مخلينا فين قلبنا وللأسف مقدرناش نعثرو فيهم
صفوان:- لاحقاش غير الأغبياء افففف فين يكونو هادو فين ؟
فيديريكو:- معرفتش لكن جعفر داهية أكيد مغاديش يكون بعيد والسيدة جميلة معندهاش شي معلومات على مكانهم هي على اتصال بيهم هاتفيا فقط ومقدرناش نتبعو الإشارات
صفوان:- جميلة معارفاش مكانهم سولتها
فيديريكو:- شنو تأمر أسيدي ؟
صفوان:- لوكان كنت بلاصة جعفر أفيديريكو فين كنت غادي تتخبا ؟
فيديريكو(حك فراسو):- بصراحة مطاحش فبالي هاد السؤال لكن كنت غادي نتخبى عند أقرب ناس ليا
صفوان:- امممم والمعروف أن جعفر معندو تاشي عائلة هنا
فيديريكو:- إذن يكون عند شي صديق
صفوان:- صديق امممم جعفر معندوش أصدقاء عندو غير الأعداء
فيديريكو:- وحيرتني أسيدنا معرفتش فين ممكن يكون
صفوان:- فتح الباب على جميلة وخليها تنزل عندي حالا
فيديريكو:- أمرك أسيدي
جميلة(مبعد مفتحلها الباب نزلت كتزعف):- هادي مبقاتش عيشة ونتا حابسني بين 4 حيطان أصفوان
صفوان:- سؤال محدد جعفر فين ؟
جميلة:- ههه هاد سؤال سولتوني شي 20 مرة وقتلك منعرف
صفوان:- جعفر معندو لا عائلة ولا صحاب هنا باش يلجألهم
جميلة:- الله أعلم
صفوان(بعدم صبر):- جميلة جميلة فينو جعفر.؟؟
جميلة:- قتلك منعرف
صفوان:- اففف جميلة راكي كتزيدي وكتقلي فالحساب ديالك خلي شوية رحمة فقلبي باش منحطمكش
جميلة(بثقة):- وانا قتلك اللي كنعرف
صفوان:- نتي كنتي تعرفي جعفر مزيان خبريني عندو شي حد هنا فالبلاد يكون عندو ؟
جميلة:- جعفر مقطوع مشجرة ونتا عارفة
صفوان:- والحومة القديمة ؟؟؟
جميلة(حمار وجهها وتلعثمت):- هااااه الحومة القديمة؟
صفوان(بقا مركز عينيه فعينيها المرتبكتين وابتسم):- فيديريكووووووووو فيديريكو
جميلة:- مالك مالك تعيطلو شنو كاين ؟؟؟؟
صفوان:- هههه علاش تاه من بالي هادشي جعفر أكيد فالحومة القديمة ... فيديريكوووووو
فيديريكو:- نعام نعام أسيدي
صفوان:- جمعلي الرجال فورااااااااااااا غادي نعطيكم عنوان تمشيو تجيبولي جعفر وياسر مجرجرين ونتي هاتي داك التليفون وغادي تبقاي تحت أنظاري تايرجعو باش متلعبيش بذيلك وتمشي تحذريهم
جميلة(حاسة بالخوف وبداو الدموع ينزلو معينها):- صفوان نتا راك غالط هوما مستحيل يكونو تما
صفوان(وقف بابتسامة خبيثة):- خلينا نشوفووو ونتأكدو مخاسرين والو
جميلة تحطت فموقف خايب كيدير تحذر جعفر دباااا كيدير وهو حابسها قدامووو عطا العنوان لفيديريكو اللي نطلق هو ومجموعة من اللواطا عامرين رجال ومشاو البوشتاوي غير حل الباب شهق محيت كيعرف هاد الدخلات غير ديال البوس
فيديريكو:- سيد بوشتاوي باغي جعفر وياسر ؟
البوشتاوي(عاقد حواجبه):- شكووون جعفرر هادي سنين بيني وبينه مشفتو مشافني
فيديريكو:- البوس عارف أنهم هنااااا وغادي رجالي يفتشو الدار
البوشتاوي(معارضهم ودخلو رجالو وقفو موراه وريشلهم باش يريضو):- عندي نسا فالداااار كيفاش تفتش خليني نعطيهم خبر يخرجو بعدا
فيديريكو:- فالحال خليهم يخرجووو فيساع
البوشتاوي(مشا عند ربيعة وعيشة اللي لواو على ريسانهم شيلان وخرجو):- تفضل فتش فين بغيت
فيديريكو(ريش براسه للرجال اللي نتاشرو فالدار شي لفوق شي لتحت لكن ملقاو والو):- سيد بوشتاوي معلوماتنا أكيدة جعفر وياسر كانو هنا عندك فالدار لذلك تعاون معانا أحسنلك
البوشتاوي:- وانا قتلك مشفتهمش
فيديريكو:- طيب كيما بغيت جيبوووه ...
البوشتاوي(بقا يتنتر وبغاو رجالو يضاربو معاهم لكن مقدولهمش):- بعدووو مني بعدووو مني ...
ربيعة(كتغوت):- طلقو راجلي شنو بغيتو بيه طلقوووه
البوشتاوي:- أدخلي للدار أنا غادي نولي دخلي ومتحلو لحد ..حمودة خليك معاهم
ربيعة:- اهئ اهئ الله ياربي شنو واقعلنا
عيشة:- لالة هادي شي عين خصنا نبخرووو شوية بالعرعار
ربيعة(بألم دفعتها):- بعدي مني تانتي هادا وقت عرعارك افففف
ياسر(مكالمي فمنظر البحر الأزرق):- هادشي وقع بحال الحلم أجعفر لالا كابووس شمن حلم
جعفر(التف وشافها كتجفف بالجفاف أرضية الدار وشاف فوق البوطة الأكل كيطيب):- وبصراحة كان خصنا وحدة دور بينا ههههههه تبارك الله عليها مالصباح مكلست من النفيض والطياب
ياسر(علا شنافتو باشمئزاز وشاف من باب الجردة للكوزينة):- وناري عليك انا بعدا مقديتلكش
جعفر:- عموما ربي كتب عليك هاد الشي لذلك تعايش معاه باش تهني بالك
ياسر:- تتتت قولي واش جوليو متأكد مهاد المعلومة ؟؟
جعفر:-آه متأكد و راك سمعتني مين سولت جاسوسي الأخرق وأكدهالي هما فراس الشهر غادي يديرو ديك الحفلة السنوية لكن هاد المرة هنا والبوس هو اللي أمر بهاد الخطوة
ياسر:- امممم لكن علاش العام اللي فات حضرنالها لهيه وكانت هاديك أول مرة ناديا تشوف فيها داك المتعجرف وليد وحتى أنا كنت كنعرفو غير بسمية
جعفر:- خلينا مهاد الديباجة وقولي شنو بانلك نديروها ولا نستناو عاد شوية ؟
ياسر:- شنو نستناو طبعا نديروها لكن أجعفر هاد المصيبة اللي لداخل منا لوقتها نكونو تفكينا منها ياك؟
جعفر(بتساؤل تاهوا كيشوف فيها):- وماااااااانعرف
ياسر تاهوا كان يشوف فيها وهي شافتهم ودارتلهم باي باي بابتسامة وبجوجهم رجعو لتفو للبحر بسرعة ، كان منضرهم مضحك عكس البوشتاوي اللي كان كيترعد زمااااان على هاد الإحساس وقبل ميدخلوه بلغهم فيديريكو أنهم ملقاوش ياسر وجعفر عندو فالدار زفر بعنف وأمرهم يدخلوه وكان كذلك دخلوه وهو كلو كيرجف لمكتبو اللي كانت كالسة فيه جميلة والبوس
البوشتاوي:- جميلة .. سيدناااا ؟؟؟
البوس(بصوت مريب):- البوشتاوووي
البوشتاوي:- عاش من شافكم أسيدي 23 عام وغيبة هادي
البوس:- ههه وقيلة توحشتنا زيادة ع اللزوم ولا لا أجميلة ؟
جميلة(ابتلعت ريقها كتشوف فالبوشتاوي باش يسكت):- امممم فعلا
البوشتاوي(مفهمهاش):- سيدي أنا جاو رجالك جروني من الدار قدام ناس الحومة وانا مفاهم والو
فيديريكو:- ملقينا والو عندو فالدار لكنو كيكدب
البوس:- هششش فيديريكو عيب تقول على السي البوشتاوي كذاب هو رجل خدوم وأكيد غادي يعاونا
جميلة(قاطعت الحديث فرحانة مين ملقاوهمش):- لكن ملقاو والو فدارو إذن مكاينينش عندو
البوس(بنظرة شريرة):- سكتي نتي .. البوشتاوي قرب لعندي
البوشتاوي(كيتلعثم):- سيدنا أنا قتلك اللي عارف
البوس(جبد لقاط حديدي وحطو على سطح المكتب):- وانا مصدقك
البوشتاوي(غير شاف اللقاط جمدلو الما فالركابي بالخوف):- سيدنا أنااااا ...
فيديريكو(شد يدين البوشتاوي مالخلف وزير عليه):- شتتت متقاومش
البوشتاوي(بقا يتنتر بعبايتو):- طلق مني طلق مني
البوس:- البوشتاوي حنا عشرة سنين وبيناتنا بزااااف الأمور وياما دقت على ريسانا طبول لذلك أجيني نيشان وقولي فين راه جعفر وياسر ؟
البوشتاوي(كيتهزز):- معارفش معارفش
البوس:- البوشتاوي نتا كتستفز صبري وانا صبري ضئيل بزاف فبحال هاد المواضيع لذلك رحمني ورحم راسك باش ترجع سالم غانم لدارك
البوشتاوي(شاف فجميلة بحيرة وهي بقات تهززلو عينيها باش يسكت):- اممم
البوس(انتبهلهم وضرب فسطح المكتب):- جمييييييييييلة كنتي عارفة أنهم عندووووو ؟؟؟؟
جميلة(قفزت وبقات ترجف):- أنا لالالا معارفاش
البوس(وقف بعصبية ومشا شد الفك نتاع البوشتاوي وهز فيدو لقاط ودارو فودنه):- غادي تنطق ولا اليوم تفقد عضو من أعضاء جسمك
البوشتاوي(كيرجف بالخوف):- ننطق ننطق أسيدنا وانا طالب السماح لكن جعفر هو اللي أجبرني
جميلة:-لالا ألبوشتاوي لالالا
البوس(شاف فيها باحتقار):- فين راه جعفر وياسر؟
البوشتاوي:- سمحيلي أجميلة
البوس(شدلو ودنو باللقاط وبدا يزير عليه):- نطق فين راهم؟
البوشتاوي:-آىه يآآآآي آي غادي نقوول غادي نقووول
البوس(مطلقهش):- قول دباااا فين هما ؟
البوشتاوي:- دبا والله معارف كانو عندي وداك الحمار ديال ياسر تعدا على بنتي وتزوجها لبارح فالليل ومشاو لكني والله معارف فين مشاو والله معارف مقالوليش أنا اللي طردتهم من داري مبعد ديك الفضيحة اللي دارها داك الولد معا بنتي
جميلة(كتبكي وغير مصدقة):- شنو كتقوووووول ياسر مستحيل يتعدا على نملة كيفاش تعدا على بنتك وكيفاش تزوجهاااااااا لبارح نتا شنو كتخربق
البوشتاوي:- والله أجميلة هادشي اللي وقع والله أسيدنا هادشي اللي كاين
البوس(بقا يشوف فعينيه مطول وطلق ودنه):- حسابك غادي يكون معاااايا يا البوشتاوي كتآمر نتا وجعفر ضدي ومبعد هاد السنين غير بلاتي عليكم المهم عندي دبا نعتر فيهم البوشتاوي
البوشتاوي(كيحك فودنه اللي حمارت بالألم):- معارفش بصح اللي عليا إيلا اتاصلت البنت بمها نخليها تعرف هوما فين وتقولنا ونجي نخبركم
البوس:- وانا غادي عاد نستنى بنتك المصون باش تتاصل بمها فعلا تفكيرك غبي كيفك
فيديريكو:- ممكن تقولنا فوقاش مشاو وفاش ؟
البوشتاوي:- مشاو فلوطو ديالهم و هاداك ياسر كان عندو موطور كبير بصح خلاه فالكاراج مداهش
فيديريكو:- اللوطو نتاعمن ؟
البوشتاوي:- قتلك نتاعهم
البوس:- جيبلي الرقم ديال السيارة فورا البوشتاوي ضروري ميكون شي حد انتابه لهاد النقطة
البوشتاوي(كيحك فراسو بغباء):- بصراحة لا انا معارفش الرقم وتاشي حد مرجالي مخداه بصح أنا عارف مواصفاتها كيما حافظ حروف سميتي
البوس:- يا ذكائك أسمعني مزيان أنا ميهمني لا بنتك ولا غيرو بغيتهم يكونو عندي فأقرب وقت استغل بنتك ولا شوف كيدير تصرف
البوشتاوي(ميقدرش وبغا يعترض):-لكن كيندير ...
البوس(قاطعه بالغوات):- ملكنش انا ماشي شغلي دبر روحك نتا خبيتهم بلا خبري إذن تجيبهملي ولا غادي طير ريوووس حمد الله أن زواجو من بنتك غادي يفيدني وإلا كنت دفنتك ونتا حي ..
االبوشتاوي(ابتلع ريقه):- بأمرك
جميلة(فرحانة بصح مبينتش):- انا غادية لبيتي
البوس(شاف فيها بصمت):- نتي غادي نتحاسب معاك غير صبري علياااا
جميلة مشات بتعالي كاع مداياهاش فيه وفرحانة فقلبها أنهم مشدوهمش لكن مصدوووومة فنفس الوقت من اللي سمعاتو أووو ياسر تعدا على بنت البوشتاوي وتزوجها وهادا اللي مكان لا على بال ولا على خاطر طارت الفوق وجبدت التليفون اللي سرقاتو من مكتب البوس مين كان شاد ودن البوشتاوي بلاما يحس وصونات فورا لجعفر
جعفر(بعد شوية على ياسر مبعد محمار وجهه وابتسم):- جمييييلة عاش من سمع صوتك فينك؟
جميلة:- غي سكت أجعفر راه نايض هنا الزلزال
جعفر:- شنو كاين قلقتيني ياك لاباس؟
جميلة:- قولي اللول واش الخبر اللي سمعناه حقيقي ياسر تزوج بنت البوشتاوي ؟
جعفر(مخلوع):- ونتي شكون قالهالك؟؟؟
جميلة:- أويلي يعني بصصح تعدا على البنت اووو هادا هبل ولالالالا ونادياااا ايلا عرفت؟؟؟
جعفر:- جميلة تهدني وفهميني شكون قالك هاد الهدرة ومبعد نحكيلك شنو وقع؟
جميلة:- البوشتاوي بلسانو قالنا هاد الهدرة مبعد ما البوس صيفط الرجال يجيبوكم معندو معرفت كيدار فكر فالحومة لقديمة نتا عارف البوس المهم مين ملقاوكمش جابو البوشتاوي ونتا عارفو جبان فيساع نطق المهم مخصكمش تبانووو نهائيا وأوياكم تخليو بنتو تتصل بيهم أجعفر إيه والبوس راه عرف بقصة زواج ياسر وناديا وراه منوض القيامة وناوي يخليه يطلقها
جعفر(ضرب بقبضة يدو فالفراغ):- باش تتزوج بوليد
جميلة:- اففففف ترونت من كل جهة وطريق وزادت هاد زكية كملت الزين
جعفر:- افففف هاد بنتو كانت أساس المشكل بصح بهاد المشكل خرجنا مالدار مالوكان شدونا وسمعي راه ياسر مضلوووم وهاشنو وقع ......
بقا كيحكيلها كلشي اللي وقع معاهم وهي كتسمع مصدوومة ومخلوعة من ديك زكية وماخرج منها وكتفكر كيفاش غادير ناديا إيلا عرفت بحال هاد الخبر بقات غير تشهق وتعاود حتى دخل عليها وحيدلها التليفون مبعد مشاف فيها شوفة خطيرة وخرج وقفل عليها الباب بالساروت
البوس:- جعفررررر مبغيتش تحشم ياك ؟
جعفر:- جميلة معندها دخل وحتى البوشتاوي أنا اللي أصريت علا هادشي
البوس:- وسمعني مزيان غادي تجي وتجيب داك الولد وهادي آخر فرصة كنعطيهالك أجعفر
جعفر:- أنا مغاديش نرجع أصفوااااااان
البوس(سمع سميتو منو حافية وكمش عينيه بشر):- غادي ندمك وندم داك النكرة اللي معاك وقولو حسابو غادي يوصله فراس الشهر .. تييييت تييييت
جميلة بقات تضرب فالباب وتترجاه شاف فالباب باحتقار ونزل ....
ياسر:- شنو بغات جميلة؟
جعفر(شاف فيه مطولا مين يبديلو ومين يكملو):- سمع ...
طبعا حكالو كلشي إلا نقطة زواج ناديا من وليد باش ميشدهش هباله ويخرج على الخطة اللي أسابيع وهوماا كيحضرو فيها وهما فخضم الحديث قاطعتهم زكية بصوتها اللي كيستفز ياسر ويهبله باش يدخلو يتغداااااو فالحال
جعفر:-صراحة عصافير بطني تزقزق منفلتش هاد الوجبة
ياسر:- غير كول بصحتك
جعفر:- ونتا متجيش؟
ياسر:- أنااا ناكل من ماكلة هاديك وخا نموت بالجوع منقربش منها
جعفر(شافها سمعاتو ونزلت راسها بألم):- وبقا بالجوع أجي أبنتي نتغداو أنا وياك
زكية:- تانا مافخاطريش غادي نعمرلك السي جعفر تفضل
كلس جعفر فالطابلة وهو كيستنى الوجبة المنتظرة وعلى علا يديه وبقا هاتك يا أكل لكن هي كانت كترد الماعن وعينيها فالجردة عند ياسر اللي كان على كلستوو وتمنات لوكان تدخل لعقله وتعرف فشنو كيفكر ، فاتت ديك العشية وجعفر خرج يتلاقا بجوليو على شي أمور وبقا هو حبيس غرفته وقرصه الجوع ونزل يدبر يشوف شي ينتكل ولقاها كالسة فالكوزينة وحاطة طبسي نتاع الروز كتنقيه ، كانت مستفزة فكل حركاتها ولبساتها وطريقة حديثها وصوتها كلشي كان فيها كينوض فيه الأعصاب ويبغي يقتلها هي كاع محستش بيه وهو شاف باشمئزاز ففستانها الأخضر بارد البيتوتي واللي كان على نفس ستيل لباساتها كلهم وملوية على مقدمة راسها شال فالأخضر عاكس لون سواد شعرها المدلي مالخلف بحرية كانت حاطة يد على خدها بتلقائية واليد التانية كتنقي بيها الروز بشرووود هو غمض عينو وجا منسحب طالع وهي قشعاتو وشافتو قلبها فرفر وعيطتلو
زكية:- سي ياسر محتاج شي حاجة نوجدهالك؟
ياسر:- .. لارد
زكية:- سي ياسر
ياسر(بقا كيحسب تالعشرة فخاطرو قبل مينفجر فيها):- مباغي تاحاجة منك
زكية(وقفت وجات عندو بجرأة):- قلت إيلا بغيت ...
ياسر(بقا كيشوف فيها بصمت وانفجر):- سمعيني مزيان هادشي اللي درتيه والمصيبة اللي حصلتيني فيهااا مغاديش تفوتلي من حلقي ولا نهضمها فيوم لذلك يا بنت الناس نتي فترة بقائك هنا معانا محدودة وغادي نرجعك لداركم وربي يسهل عليك فما تعيش الدور بزاف تفاهمنا ...؟؟؟
زكية(حطمها وتكومو دموع فعينيها):- أمرك السي ياسر
ياسر:- متبقايش تعيطيلي بسمييتي الله يخليك متجيش مجيتي عتابريني ماشي موجود وتعايشي على أساس ذلك لاحقااااش وجودك وكلشي متعلق فيك كينوضلي لينير وكيستفزني فرجاء تاقي شري
زكية(بتلعت ريقها):- سمحلي على اللي وقع لكن حبي ليك هو اللي مخليني قادرة نصبر طول عمري
ياسر(مقادرش يستوعب):- واش مكتفهميش العربية
زكية:- باركة ما تجرح فيااااااا أنا عارفة معمرني غادي نوصل لشي مكانة عندك وما قابلة بهاد الوضع إلا لأني ختاريتو ومعنديش خيار تاني باش نريحك مني نهائيا
ياسر(كيشد فودنو):- سكتي سكتيييييييي مباغيش نسمع صوووووتك
زكية(شهقت بألم ودموعها اللي كانت حابساهم نزلو):- اهئ
ياسر(متأفف وجا خارج):- انا خارج فحالي
زكية:- وتخليني بوحدي فهاد الداررررر عفااااك متمشيش تايجي سي جعفر
ياسر(التفت كيشوف جرأتها اللي فاقت تخيلاتو):- ولايني مكتحشميش عاد عندك عين مبعد اللي درتيه تطلبي وترغبي أنا بحالك ندفن راسي فبلاصة منباش ع الأقل حتى نستوعب مصيبتي اللي صبتيني بيها منك لله هادا منقولك
خرج لاتخ الباب موراه وهي كلست على الدرجة وبقات تبكي بحرقة دبا معندها مدير ضروري متتحمل هاد المعاملة منو خصوصا أنها فرضت نفسها عليه فرضا وقالهالها بصريح العبارة لكن هي مغاديش تستسلم مسحت دموعها وناضت تكمل شنو كانت دير .... أما هو كان كالس فالعتبة ديال الدار وحاطط راسو بين يديه وكيفكر فحالتهم اللي وصلولها حتى صونالو جعفر وخبرو باللي غادي يتعطل معا جوليو تالليل ويرجع وهنا حلوووت بقا يسب ويلعن مضطر يبقى دبااا بسيف عليه معا ديك الكائنة المستفزة ..دخل للدار ولتخ الباب وتوجه ديريكت الفوق بلاما يكلمها ولا يعبرها بنظرة وهي انتفض جسمها معا لتيخو كي الرعد وشدت على صدرها ونزلت راسها تكمل شغلها ، حتى نزل من تاني مفاجئها..
ياسر:- واش نتي غادي تسكني فهاد الكوزينة شوفي شي حاجة تانية ديريها باغي نصاوب كاس قهوة راسي غادي يتفركع
زكية(بلهفة وحماس):- أنا نوجدهاااالك
ياسر(بنظرة احتقار):- طبعا لا متشكرين غي خويلي البلاصة هادا مامطلوب منك
زكية(نزلت راسها بحرقة وهزت طبسيها وكلست بيه فوق طاولة الأكل):- تفضل
ياسر شاف فيها شوفة الشر هو طلب منها تغادر إلا وهي كلست قدامو فالطابلة واش دركا ماشي حلال فيها القتيلة وهي كتستفز فيه وتزيد تشعل فيه النار ، مالقا مايدير تقدم رغما عنو و دار الما فالتيرمو نتاع القهوة وبقا يستنا العصارة تعصر بقا كيشتت بنظرو فكل مكان باش ميشوفش فيها ويمشي يدبحها هاد المرة مافيهاش الضحك إلا وهو يسمع ابتسامة خافتة ضحكتها والتفت وزعابيب أبشير فوجهه وهي حمارت وسرطت ضحكتها
ياسر(بدون صبر):- مالكي ؟
زكية:- أحم ... غير راك مدرتش القهوة فبلاصتها
ياسر(حس بالغباءء كيفاش نسا القهوة وهو باقي كيستناها تعصر البرد):- ديها فشغلك ونتي حاضياني
بقا كيقلب فالبلاكارات على قوطي القهوة وفوق البوطاجي مبانلوش وهي تهزت بخفة ودفعتهالو قدام يديه وهو شاف فيه وصاط بعصبية والتقط القوطي بلا تاشي كلمة وهي رجعت مكانها ، بعد مدة كان فنجانو فيدو وخرج بيه للجردة وحطه فوق الطابلة وسرح رجليه كيشووف غروب الشمس وتفكر نهار راقبوه هو وناديا فأيام عسلهم بجوووج وفنفس المنظر الغروب والبحر حس بغصة فقلبووو والحنين لدوك الأيام وغمض عينيه يسترجع ملامحها فخاطرووو وفخيالو وابتسم ابتسامة شوووق وهو مغمض عينيه كيحاول يشم عطرها اللي ساكن جوارحووو .. حتى قاطعاتو مسمومة الصوت
زكية(جابتلو غطا وحطاتو على ظهره):- الجو بارد
ياسر(شاف فيها وهي ملوية على كتفها شال وبعصبية انتفض ولوالها يدها):- أوياك وتقربي مني
زكية(بقات تتألم من اللوية وعينيها سالو بدمعتين حارقتين وهي كتشوفو داخل):- علاش كتعذبني هاكدة مكفاكش حبك اللي حارق قلبي وانا عارفة قلبك مع غيري اهئ اهئ
جملتها قالتها بينها وبين راسها مكانش اللي سمعها من غير الصدى ديالها بقات تتحسر على حالها وطاطات راسها الأرض ودخلت تاهيااا لقاتو كيلبس جاكيطو باش يخرج
زكية(بتلعثم وصوت خافت خايفة من ردة فعلو):- خارج
ياسر(بنظرة مستعجبة):- إلا إيلا كان عندك مانع أختي ؟؟؟؟؟؟؟؟
زكية(بنظرة خوف):- لالا...
ياسر:- مديريش حسابي أنا وجعفر لعشا ولا عرفتي شنو يجيك مليح تعشاي غي نتي وانبسطي ياك هادي هي العيشة اللي درتي عليها داك المسلسل هندي إيوا شبعي بيها
زكية(مسحت دمعتها):-متعطلوش راني نخاف بوحدي فالليل
ياسر(غير مصدق جنونها هو فين كيهدر وهي فاش كتفكر):- الصبر ياربي الصبرررر
زكية شافت فيه بعينيها البريئتين وهو عقد حواجبووو وزفر زفرة تقولي غادي ينوض موراها الزوابع وحيد جاكيطو وطلع لفوق يعني مخارجش وشبع فجعفر سبان اللي حطو فهاد الموقف ، أما هي فابتسمت أنه مخرجش وبقا ورجعت تكمل شغلها بكل حب وفرح ...
لعبلها الشيطان فالمخ وقالت بيما مكاينش جعفر تستغل الفرصة وتغوي ياسر طلعت كتجري لبيتها وجبدت فستان أحمر زوين وطويل بلدي يعني وسرحت شعرها على جهة وحدة من كتافها ونساب بطلاقة واصل لخصرها وتعطرت ودارت مايكاب وملمع أحمر وتنفست بعمق وتجرأت وفتحت باب بيتو بدون متطرقها وكان ناعس غي شافتو تفكرت نهار شافتو أول مرة فدارهم ، تقدمت بخطوات قليلة وخلخالها كيرن معاها ومشات مجيهتو وكلست على شوية مالسرير وبقات تشوف فملامحو الساكنة وشحال عجبها وجاها وسيييم بزااااف وجاتها رغبة تتلمس شعرو الكثيف بحركة سريعة ومدت يدها غير بشوية وحطتها على شعره وهو فلحظة حل عينيه وشدلها يدها و قلبها على السرير وجا مقابلها
زكية(قلبها غادي يخرج من قربو منها بداك الشكل اللي معمرها حلمت بيه):- أنا .. كن
ياسر(كيهدر بين سنيه):- ياكما صورلك بالك أنني ممكن نشوف فيك هاد النقطة خصك ديريها فودنك شنو هاد المهزلة اللي لابساها كتجيبلي الإشمئزاز ..(كيعوج شنايفو)
ناض عليها وهو جار يدها بكل اعتراض ودفعها لوسط البيت
ياسر:- هادي آخر مرة تعتبي فيها بلاصة أنا كالس فيهااااا سمعتيني وسيري منا ولا غادي نسمعك اللي معمرك سمعتيه ويلا كان خيالك المريض مصورلك أنك ممكن تهزيني بهاد عرض الأزياء ديالك فكاتحلمي أنا قلبي وعيني عامريييين بمولاتهم كنضن كتر من هاكدة غادي تحطي راسك فمكانة منحطة متافقة معايا امممم تفضلي من قدامي ..
زكية نطعنت وحست بالألم والجرح من كلامو المسموم ومشات تجري لبيتها دفنت راسها وهي كتبكي وتمسح فداك الماكياج بإحساس فظيع ووجع عميق وبقات تندب فروحها اللي حطت راسها فهاد المكانة الحقيرة قدامو وهو قاسي القلب احتقرها بطريقة خايبة صراحة ... من داك اليوم وهي كتتحاشاه كاع والى شافتو نزل كتكمل شغلها وتطلع لبيتها اللي ولات ملاذها ومهربها تامعا جعفر قليل ماتهدر وهادشي ريحه شوية مع أنه كان منوضله السكر ...
جعفر:- مملاحظش معايا شي حاجة زكية مبقاتش كتكلس كيما اللول وليت نشوفها غي تجي نتا طير لبيتهاااا شنو وقع ديك الليلة ؟
ياسر:- موقع والو غير فهمتها مكانتها وسبب وجودها ووضحتلها أنها فترة مؤقتة وكلها يمشي فطريق
جعفر:- باينة تكون قسحت الكلام لأنه من داك اليوم وهي مبدلة
ياسر:- عفاك الله يخليك متخليها علياااا راها جايبالي الكوليك فمعدتي متزعجنيش بسيرتها تاهيا بركة غي وجودها معانا
جعفر:- ولايني قاسي نتا مكانش فبالي قلبك كودرون كاع هاكدة
ياسر:- خليتلك ليك القلب الحنون
جعفر:- هممممح لوكان غي مشايفكش معا ناديا كيف كتولي كي الحلوة الدايبة هههههه
ياسر(بغصة فحلقو):- ونااااديااااا حبيبتي حكاية تانية ضحكتهاااا كتسلب روحي وتخلي كلشي فيا كيضحك أما نظراتها فيهم ألف حكاية وحكاية ولا شعرهااا وريحتو اللي لاصقة فخياشيم نيفي كل يوم كنستحضرهااا ولا صوتها الحنون اللي كيخليني غايب عن الوجود ولا نبضها اللي كيدفيني ، نادياااا هي كياني كلشي فياااا متعلق بيها هيااااا ياريت نقدر نضمها لصدري غي نشعر بيهاااا
جعفر(مأثر وحاس بكل كلمة كيقولها لأنه نفس اللي كيحسو معا جميلة):- فعلا نسائنا كيتحكمو حتى فمزاجناااا ياريت كنا نقدرو نضموهم العمر كلووو ... ياريت
تنهدت فوق الدروج وهي كتسمعلهم وكبتت شهقتها وتمناتو يبغيها شي يوم كيف كيبغي ناديا غمضت عينيها بألم ورجعت لبيتها كتجر فأحلامها المحطمة خلفهاااا و حاسة بالخوف من اللي جاي هادشي مكانش فبالها ولا توقعاتو فعلا ماشي كاع اللي كنحلمو بيه كيصدق كيف بغيناااا ::(( ..
كانت كالسة فشرفتها لاوية شال على كتافها وكتشوف فالسما ونجومها وعيونها متورمين من الدموع كانت كتفكر فراسها وفاللي قالب حياتها رأسا على عقب كانت إنسانة طبيعية وهي دبا ولات شخص آخر بنفسها مكتعرفوش نزلت عينيها كتشوف فكرشها اللي بدا يتوضح انتفاخها وحطت يدها عليها وهي كتناجي طفلها لربما عاونها وعطاها القوة اللازمة باش تقاوم ديك الموجة اللي كتحاول تغرقها لأعمق مدى تغرقها فنقطة بعيدة هي معندها جهد ليهااا ، متكلمتش معا ياسر من فترة ولا هيا قادرة تكلمو مبعد ما جد من مصايب وحتى هو مراسلهاش بمرة ولا حاول يتصل بيها يكفيه اللي فيه ، أما وليد فكان كيوصل حتى لباب بيتها كيحاول يدق لكنو يتراجع وينسحب باش ميزعجهاش أو تجرحو كيف كانت تجرحو الفترة الأخيرة بالكثير من الهدرة اللي كانت تقولها بعصبية ، خبراتو لين أنها ولات طول الوقت ساكتة ومكتتفاعلش ويلا جاوبتها كتهززلها غير راسها أو تريشلها باش تسكت وهادا اللي خلا لين تستغرب وتلجأ لوليد وتخبرو باللي واقع وهنا قرر يقتحم عزلتها مافيدو ميدير خصو يطمن عليها ويحاول يتواصل معاها ولو بالغصب ...
وليد(طرق الباب مجاوبتش وفتحها شاف فالسرير مكانتش وانتبه للشرفة مفتوحة تقدم مباشرة ولقاها كالسة بهدوء تما وشاعلة أغنية ساموان لايك يو وضغط على زر وطفاها وكلس أونفاص ليها فالكرسي):- مساء الخير
ناديا(هزت عينيها شافت فيه بسكون):- ... لارد
وليد:- يمكنلي نعرف حتى لفوقاش هاد الإضراب ؟؟
ناديا(تنهدت):- لا ......لارد
وليد(زفر بتعب):- ناديا فاتتشي 20 يوم تجاوزي الأمر يكفي
ناديا(بعدت عينيها عليه وبقات تشوف فالجانب الثاني بصمت):- .... لارد
وليد(عيا ميحاول وتعصب):- يعني مغاديش تردي علياااا ..؟؟
ناديا:- ....لارد
وليد(وقف جا ماشي):- على راحتك
خرج وخلاها موراه زفرت تنهيدة عميقة خرجتها من صدرها وموراها انفجرت بالبكا أما هو دخل لبيتو لاتخها موراه ومسح على شعره بيده بعصبية وشد فكو ورجع جمع يديه فقبضة تابيضت مفاصيلو وكلس على حافة سريرو مقادرش يتحمل هاد الوضع كلو ، حالتها مألماه فخاطرو بزاااف ومعارف شنو يدير الشي اللي كان ملهيه شوية أنه كان هو وجاد مهتمين بالحفلة اللي غادي يديرها فمقر الشركة وغادي تكون على مستوى لكن صراخ هيلين قاطع تفكيرو وتفزع وخرج كيجري في اتجاه الصراخ ولقاه من بيت سارة حتى هي سمعت نفس الصراخ مسحت دموعها وباستغراب وقفت ومشات ولقات جاد جاي يجري فالرواق ومتجه لبيت سارة
وليد(لقا هيلين كتهزز فسارة اللي مبغاتش تفيق):- هيلين هيلين مالها سارة ؟؟؟؟
هيلين(كتبكي بانهيار):- معرفت جيت نعطيها الدوا لقيتها فهاد الحال
وليد:- بعدي لهيه (بقا كيتحسس نبضها وتنفسها)
ناديا(مخلوعة عليها):- أوووف ياك لاباس؟
هيلين:- معرفت لقيتها فاقدة وعيها اهئ اهئ بنتي
ناديا:- طب ديرولها الحقنة اللي كتعطيوهالها الصباح
هيلين(ناضتلها بشر وهستيريا):- ليه نتي دكتوووورة باش تفتي علينا شنو نديرو وشنو منديروش غير بعدي لهيه وغادي تكون بنتي فأحسن حال
وليد(كيغوت):- هييييييييييييلين ماشي وقت هبالك دبا ... جاد وجدلي يبرتها فيسسسساع
هيلين(كتبكي):- بنتي اهئ أوليد خلينا نديوها للمشفى بلاما تعطيها الحقنة دبا حنا معارفينش واش غادي تفيدها ولا تأثر عليهاااااا
وليد:- سكتي شوية غادي نعطيها يبرتها وتولي مزيانة
جاد(عمرلو الحقنة وهو كيرجف بدورو ومدهالو):- هااااك
وليد زيرلها يدها وضربهالها وبقاو يستناوها تفيق لكن مفاقتش وهنا هيلين انهارت وطاحت بهستيريا كتبكي وتغوووت عليهاااا
وليد(بصراخ هز سارة بين يديه):- جاد خذها لبيتها غادي ندي سارة للمشفى حالا
جاد(انحنى كيحاول يهدي هيلين اللي بغات تهبل):- هيلينا هيلينا غاتكون مزيانة
وليد(فايت عليهم وفيدو سارة اللي كانت كيف الريشة مسكينة):- عفاك أجاد أهتم هاني غادي
ناديا:- نمشي معاك
وليد(شاف فيها باستغراب وهدر بشوية):- نتي وضعك ميسمحش غي بقاي هنا مرتاحة
ناديا(بعناد):-قتلك نجي معاك
وليد:- أوكي فيساع وكان
ناديا جابت جاكيطها وتليفونها وتبعاتو بشوية لتحت وركبت فالخلف وحطلها سارة فحجرها وبقات كتمسحلها على شعرهااا وهو طار بالسيارة طيرااااان ، لاحظت ملامحو الخائفة فالمراية وابتلعت ريقها
ناديا:- هي كتجيها هاد الحالة دايما ؟
وليد:- هادي 3 سنين تقريبا وهي تجيها
ناديا:- شنو نوع مرضها بالضبط ؟
وليد:- حمى روماتزمية
ناديا(بدون فهم):- مفهمتش كيفاش؟
وليد:- هادي 3 سنين التهبو اللوز ديالها مما سببلها بكتيريا خلاها تتحول لأعراض بهاد المرض اللي كيأثر على مفاصلها وقلبها بشكل كبير وفالغالب كتبات ليالي كتتألم فمناطق فجسمها لذلك خصها ديما مضادات حيوية وحقن لكن ماعرفتش علاش اليوم تعرضت للإغماء من فترة طويلة هادي متعرضت لنفس الحالة افففف يارب تستر
ناديا(حست بألمو وخوفوو وبقات تشوف فسارة بقلق تاهيا):- غادي تكون بخير إن شاء الله ...
كان كيصوك ومرة مرة كيضرب فالمقود بالأعصاب والقلق وكيلتف يتلمس شعر سارة وفلحظة قاس يد ناديا اللي نتفضت بشهقة وهو رجع يصوك بتركيز حتى وصلو للمشفى ودخلها وهو كيغوت ويطلب المساعدة وعينيه كيقلبو على مصعب اللي كان كيستناهم
مصعب(جار النقالة اللي فوقها سارة):- وليد خليك هنا اطمن غادي تكون بخير
وليد:- عفاك أمصعب نتا عارف بمرضها
مصعب(بحزم مطمأنو):- ستنا هنا ...
دخل بيها مصعب لغرفة المعاينة و هو بقا كيشوف فيها من دوك النوافذ الزجاجية حتى اختفوا بيها فدوك الغرف حس بالألم وعينيه تغرغرو بالدموع
وليد(مأثر):- هي صحتها هشيشة بزاف ومتتحملش هادشي كلووو
ناديا(وقفت حداه):- دعيلها تفيق وتولي أحسن ماللول
وليد(التف عندها بضياع):- إيلا وقعتلها شي حاجة معمرني نسامح نفسي
ناديا(كتبكي بخوف وشدتلو يدو):- شتت متقولش هاكدة هي قوية وغادي تفيق منهاااا
وليد(زير على يدها بقلق وتمني):- يااااربي تحفظهالي
بقاو كيستناو هي كلست على الكرسي أما هو بقا كيدور من كل الجوانب ومرة مرة يشوف فالساعة والو مبان حد ومرة كيصوط مرة كيتأفف وهي كانت تشوف فيه وملقات جهد باش تريح بالو فديك اللحظة لأنها تاهيا خايفة عليهاااا ، مبعد العذاب أخيرا خرج مصعب
وليد(جرا عندو):- هاااه طمني كيفها بنتي ؟
مصعب:- للأسف وضعها مكانش يطمن مين جبتوها لكن الحمد لله وضعها استقر خصها يومين تحت العناية المشددة وترجع بألف خير
وليد:- نتا متأكد يعني متأزمش قلبها ولا شي حاجة؟؟
مصعب:- وليد منكدبوش على بعضياتنا حنا عارفين مدى ضعف قلبها ويقدر يتعرض فأي لحظة لانتكاسة لكن ربي كيلطف وراني درتلها اللازم وتنفسها انتظم أخيرا ومزية حقنتوها بدواها اللي كتحتاجو قبل متجيبوها وإلا كنا عانينا
وليد:- طب نقدر نشوفها ؟
مصعب:- هي باقية مغمى عليها مزال متفيق حتى لعدة ساعات
وليد:- محتاج نشوفها رجاءا أمصعب منتعطلش 5 دقايق ونخرج
مصعب:- طيب أجي معايا تلبس .. آنسة ناديا أتمنى تكون صحتك بخير ؟
ناديا:- شكرا أدكتور أنا الحمد لله
وليد(كان تابع مصعب ورجع لعندها):- ناديا شكراااا بزاف ليك
بفرح حط يدو على راسها بكل مودة وعاد دخل وخلاها مستغربة شكرو الغريب لكنها ابتاسمت وحمدت الله نجالهم سارة مسيكينة .. كانت عاد مبتسمة تاختفت ابتسامتها مين شافت هيلين جاية قالبة الكولوار بطالوها وجاد موراها
هيلين:0 فين بنتي اهئ نطقي فين ؟
ناديا(وقفت بتعب):- هي بخير دبا وحالتها مستقرة والطبيب قال خصها ش....
هيلين(تجاوزتها ودخلت فداك الممر اللي كيدي للعيانات المركزة):-بعدي مطريقي باغية ندخل نشوف بنتي منرتاح تانشوفها
تجاوزتها كي العجاجة وهي بقات تشوف فجاد بصدمة مرحة وهو تنهد الصعداء مين طمن على سارة وفنفس الدقيقة جات خارجة هيلين وتابعها وليد كيزعف علاش تدخل بلاما تلبس اللباس الخاص بالعناية المركزة خصوصا أن الوضع حساس وزيادة على ذلك بلا إذن ، لكن حسن عونها محيت تبقى أم خايفة على بنتها ورغب مصعب اللي داها باش تطمن عليها وعاد خرجت وهي تمسح دموعها ..
جاد:- دبا علاش كتبكي ياك طمنونا عليها
هيلين(عنقت وليد بدون استئذان):- كنت خايفة على بنتنا اهئ اهئ
وليد(تلعثم وتفاجئ بيها معنقاه وشاف فناديا اللي خضارت ماشي حمارت وبقات ترجف رجلها وهي جامدة وربت على كتف هيلين):- الحمد لله على سلامتها
جاد(غادي يرتكب شي جريمة):- امممم طمنونا عليها فعلاش مترجعيش نتي وناديا للفيلا غانبقا هنا معا وليد لا لزمت شي حاجة
وليد:- نو أجاد أنا غانبقى ونتا سير خد ناديا وهيلين معاك باش يرتاحو تالغدا صباح وجيبهم
هيلين:- ننن مستحيل نتزحزح منا أنا غانبقى معا بنتي
جاد:- بقائك مغادي يزيد ولا ينقص خلينا نمشيو وهاوا وليد هنا إيلا كان شي حاجة غادي يتصل بينا
هيلين(مطت شنايفها بدلع):- هممممم
وليد(قرب من ناديا):- ناديا تانتي نوضي رتاحي فالفيلا تالغدا صباح ويجيبك بلال ولا جاد تشوفيها
ناديا(عارفاه مغايخليهاش تبقى):- طيب ويلا ستحقيت شي حاجة اتصل
وليد(بابتسامة):- أكيد تهلاي فراسك
ناديا(شافت فيه ونزلت راسها وناضت):- تصبح على خير
هيلين(قربت من وليد وحطت يدها على كتفو):- بليز هاني إيلا وقع أي حاجة اتصل بينا
وليد(زفر بحنق):- ان شاء الله تهلاو
جاد:-سي يو بيناتنا
وليد:-اممم باي
مشاو وهو كلس على داك الكرسي وتنفس براحة مين طمن على بنتو حبيبتو الحمد لله لكن ضرباتو الشاهدة اللي صيفط ناديا معا جاد وهيليييييييييين ناري هادوك ماشي بعيد يقتلوها ولا يرميوها فالطريق ومشا يجري تابعهم كيدخل فالناس ويتجاوزهم مرعوب عليها، أما هيا ركبت وهي حاسة باللي بجوج بيهم مكرهوش يرميوها من الباب لكن قبل ميقلع جاد استوقفهم وليد وخلعهم بديك الوقفة
جاد(باستغراب):- ولييييييييد ياك لاباس؟
هيلين:- بنتي مالها؟
وليد:- أ ... لا والوو الموضوع مكيخصش سارة مي تفكرت واحد الحاجة خاصة بناديا أ... ناديا نزلي بغيتك فواحد الأمر ونتا أجاد كيتوصل صيفطلي بلال معاك باغيه تاهوا
جاد(فرش الفيلم):- وليد أنا كنت دايهم للفيلا ماشي لشي قنت آخر الله يهديك
هيلين(شافت ابتسامة ناديا وراحتها):- نزلي أحبيبة راه صحابلو غادي نختاطفوووك مساليينلك حنا
ناديا(نزلت وهي ممتيقاش وبلاما تنطق):- اممم
وليد(حس براحة مين نزلت وهما حكو جرارتهم ومشاو):- افففف
ناديا(كتضحك):- ههههه شنو لزوم هاد الشي كلووو ؟
وليد(حك فجبهتو وهو كيبتسم):- سولي راسك هههه
ناديا(عضت شنافتها وهي حاسة بفرح):- بيني بينك تانا كنت مرعوبة وانا معاهم حسيتهم غايرميوني فشي غار ههههه
وليد(بضحك قلبو لجدية وبنظرة ارتياح فيها):- وراه نفس الشي خفت عليك
ناديا(نزلت عينيها بخجل):- طيب دبا خصنا نستناو بلال يعني ..؟
وليد:- أجي ندخلو للكافيتيريا بيما جاااا عارفة شنو هيا مشكلتي ؟؟؟
ناديا(كتمشا حداه متاجهين للكافيتيريا):- نننن خبرني
وليد:- امممم مشكلتي مكانئمنش شي حد غيري يحميك صراحة مبقيتش قادر نغامر بيك
ناديا(تنفست بعمق):-بالمناسبة كنشوف أنك غير زدت حقدهم ليا
وليد(عوج شنايفو بغرور):- آخر همي
ناديا بشبح ابتسامة شافت فيه أما هو تنهد بفرح اللي هي مزيانة وبنتو مزيانة وكلو على مايرااام ..
مبعد ساعة تقريبا اللي فاتت طايرة وصل بلال ووصلها وليد لعندو ودعاته ومشاات وهو رجع للمشفى فين كان كالس لكن هاد المرة بارتياح كبير وبوجه مليئ بالتعابير العشقية معرفش علاش حس بداك الشعور نتاع الأمان الداخلي لكن صراحة ديك الليلة كانت من أروع لياليه خصوصا أنه رسلها رسالة نصية كيطمن واش وصلت ولا ختاطفها بلال ، هي ضحكت وردت عليه كنضن باللي مسألة خطفي رهينة بيك ، و رد عليها صدقيني إيلا جيت خطفتك غادي تنهار مخططات هيلين وجاد ، وهي جاوباتو اممم ع أساس آخر همك ، هو ابتسم ورد عليها لأن أول همي ... صيفطلها 3 نقط حذف بلاما يكمل رسالتو وبقا يستنا الرد اللي جاه مبعد دقائق نشوفك غدااا ... مردش عليها إنما خلا اللحظة الجميلة اللي فاتت معلقة بيناتهم بشكل زوين هي مبعد صراع ديال اليامات اللي فاتت حست أن مرض ساريتا حسن مزاجها ونفسيتها وخرجها من القوقعة اللي كانت فيها حتى موقفها معا وليد طمنها شوية وأول ليلة غادي تنعس بأمان وخا مدخلت بيتها تاقفلتها عليها بالساروت هي ناعسة معا عقرب ولفعة تحت سقف واحد وضروري الإحتياط لاحقاش سوبرمان كاين معا الأميرة النائمة فالسبيطار دبا هههههه ^^
على أنغام أغنية القديرة أم كلثوم [ بعيد عنك ] وكنتمنى كلكم تشعلوها وتستلغاو معايا الفن الأصيل ههه كنضحك معاكم المهم متلهيونيش خليوني نكمل ^^ فاش كنت إيه ... على هاد الأنغام اللي كتدخل لأعماق الروح وتتغلغل فالقلب كانت شاعلاها ناديا فالراديو وهي حاضنة نونوسها اللي حاطة عليه راسها ويدها كتتلمس بطنها وغارقة فتفكيرها وعينيها كيلمعووو بحب ، أما صدى الأغنية وصل لهيلين اللي دخلت لبيت بنتها وهي كتبكي ولقات جاد كالس ومعنق دمية بنتها وحست بالأمان ومشات عنقاتو بقا كالس وهي فحضنو كتبكي ، حتى وليد كان كذلك كيسمعها محيت كان طالقها مول الكافيتيريا اللي نزل يجيب معندو كاس قهوة باش يكمل سهرتو سعا خدا كرسي كيستلغا لدوك الكلمات وسافر معاهم لبعيد بعيد لوحدو معا أميرتو ، كانت زكية فاتحة الراديو وهي واقفة عند البالكون من غير متفتحو ويديها على الزاج ودموعها كينزلو وهي كتشوف فالمدى البعيد ، كانت واصلة لياسر أصداء الأغنية اللي رجعاتو لأيام حلوة عاشها معا حبيبتو وخلاتو يغوص فتفكيرو فيها وهو متكي فسريرو ، حتى جعفر كان طالع لبيتو وتوقف فالكولوار وبقا يتصنت ومشا بأحلامو عند جميلة اللي كانت حبيسة غرفتها وماعندها إلا داك الراديو اللي أذاع هاد الأغنية وخلا دموعها تسيل وهي تفكر فالدوامة اللي عايشة فيها ، وصفوان كان فمكتبو ديك الساعة وداير يدو على فكو وكيتصنت لأنغام الأغنية بعمق وكيفكر فقرارتو اللي لازم يتاخدها مبعد ، كانت ليلى كتمشط شعرها وعلى كتافها شالها اللي حطاتو على المنضدة عضت على شفتيها بحرج وهي تتفكر نهار جا زارهم معا مصطفى وكان هو بذاتو موسق معا الأغنية وكيحلم بيهاااا ، وهاد الجوج كانو فوق الروعة كان واخدها فحضنو وكيلعبلها فشعرها سعيد معا حبيبتو مريم أما هي كانت فعلا عايشة معا الأغنية لكن خاطرها واجعها بزاااف وباللي مألمها ومامخبراش ابراهيم بيه .. تاتوفيق كان شاعل الراديو من بورطابلو وحاطو عند راسها لربما سمعتها ورجعت للحياة ولقلبو بالذات ، حتى ربيعة تسحبت بشوية وهي كتسمع هاد الأنغام جاية من شي دار قريبالهم ودخلت لبيت زكية بدموع حارقين وبقات تتفحص أشيائها وكتكتم دمعتها وشهقاتها الحارقة ، و البوشتاوي عاق بيها ووصل لنص البهو وقشعها معنقة لباس ملباسات زكية وكتبكي وحس بالشوق تاهوا لبنتو وبالخوف من البوس اللي ناوي يدخلها فاللعبة الخبيثة ديالهم .. إيوا وحتى أنا كنت كنسمعها وكنوصفلكم كل واحد من أبطالنا شنو كان كيدير وشنو دار وقع الأغنية عليه إيه كلشي مَّحن ...
جا الصباح وانطلقت هيلين وجاد للمشفى أما هيا فاقت على خاطرها ولبست فستان مفضفض شوية باش تخبي انتفاخ كرشها ونزلت تفطر على راحتها بوحدها ميزعجها حد عاد طلبت من عماد يخلي بلال يجهز السيارة باش يديها للمشفى تاهيا بدورها تطمن على سارة ..
يا الله شحال زوين المضلوم مين ينصرو الله وياخذ بحقو موعد المحكمة جا وليلى وعائلتها كاع كانو كالسين كيستناو القاضي يحكم لصالحهم ، وبعد مرافعة المحامي اللي مد فيها الدلائل الجديدة وبرأ التهمة المنسوبة إليها واللي خلاتهم يحكمو بالحضانة لجواد وبعد مصارعة بين المحاميين القاضي حكملها بالخلع وخدات طلاقها لأن معها الحق ويا ليل الليل الفرحة مكانتش سايعاهم كلهم كانو ممصدقينش راسهم وليلى كانت تحمد الله وتشكرو وفرحتها معاطياها لحد يكفيهم مالعذاب اللي شافوه ومن الجحيم اللي عيشهم فيه واللي للآن كيعانيو منو هي وولادها واللي مزال كتشوف كوابيس كل ليلة أن جواد جا باش يقتلها وتفيق مفزوعة وولدها رياض اللي ولالو داك الخوف فأزمة نفسية كتخليه يبلل فراشو كل يوم تقريباااا وضطرت تاخدو هو وزياد اللي ولا عصبي وكيغوت بسبب وبدون سبب لطبيب نفسي باش تعالجهم وترجع هي وياهم كيف كانو قبل ميعيشو دوك الأيام معا داك الوحش البشري اللي سميتو باهم ، خرجو لبرا المحكمة وبقاو يتسالمو حتى وقفت عليهم فاطمة جاراها رشيدة
فاطمة(وهي تبكي):- شكيتك لله يا الخاينة دعيتك لربي ينتقم منك حبستيلي ولدي روحي لهلا يسمحلك
عزيزة:- أسمعي الشريفة روحي دعي لولدك يفك مصايبو على خير ويغفرلو الله
ليلى(تقدمت عندها):- يشهد عليا الله عمرني مغدرت بولدك بقدر مغدر بيا هو وآذاني وخاني و مخلا مدار فحقي ويشهد الله شحال كنت كنقدرك بحال الواليدة وكتر بصح تالهنا ووقفت العشرة ، ولادي هوما ولادك فنهاية الأمر وقتما بغيتي تشوفيهم مرحبا بيك
فاطمة(وهي تبكي بمرارة):- مباغية لانشوفك ولا نشوفهم منكم لله منكم لله أهئ اهئ
مريم(ربتت على كتف ليلى):- راها مقهورة على ولدها مديش عليها
ليلى(كتبكي):- الحمد لله ياربي الحمد لله تفكيت منووو
ابراهيم(عنق ليلى):- ختي حبيبتي ربي نصفك وجابلك حقك ودبا هو راه يتجرجر مزال غادي يدي حكم على كاع جرائمو اللي رتكبها فحقك وفحق الناس كاملين
ليلى:- إن شاء الله
ليلى شافت ابراهيم كيشوف فنقطة معينة وكلشي كانو يشوفو موراها والتفتت بشوية ولقاتو واقف بدبابيتو كيشوف فيهم
ابراهيم(قرصاتو مريم وطبعا بسيف عليه):- الدكتور علاء جا باش يطمن روحي عندو أليلى وشكريه
ليلى(مترددة وكتشوف بتشكيك فابراهيم):- هااااه
مريم(كتغمزلها باش تمشي):- هاااه شنووو احم هاحنا كنستناوك سيري ...
مريم بقات مكروشية براهيم بسيف عليه باش ميتزحزحش وهو كي الحيط كيتهزز
ليلى(شافت فيهم بحرج وصاوبت شالها وتمشات لفين كان واقف):-...علاء
علاء(بكل حب):- مبروووك
ليلى(بابتسامة خجل):- الله يبارك فيك
علاء(مرتبك):- أ.. كيف الولاد ؟
ليلى:- بخير خليناهم معا عمي عيسى .. أ .. كيف صحتك دبا ؟
علاء:- مبقالي والو ونرمي هاد الرجل الثالثة هلكتني هههه
ليلى(بأجمل ابتسامة):- الحمد لله على سلامتك
علاء(شاف موراها كلشي مسيلم):- أ.. طيب نشوفك من بعد
ليلى(محرجة):- آه إن شاء الله
علاء(كيهزز فراسو بشرود فملامحها مساخيش الأخ):- نبقاو على اتصال سلام احم
ليلى(تحركت):- آه ولا بد اممم مع السلامة
رجعت لعندهم وهي مرة مرة كتشوف موراها ومريم كدير حركات مضحكة وابراهيم زعما لاعبها معاجبو حال المهم ركبو ومشاو وهوما هازين فقلبهم أجمل فرحة ..
المحامي (دخل يشوف جواد فالحبس):- للأسف السي جواد تحكم فصالح الزوجة ديالك وماليوم هي طليقتك خسرنا القضية
جواد(كان ساكت وجمع القبضة نتاع يديه وضرب بيها المحامي وطار عليه بقجة كي المجنون):- نتا محامي فاشل قذر سافل لوكان كنت خدام خدمتك كنت غادي تنجح الحمااااار
شدوه البوليس وناض داك المحامي كيصاوب فحالتو وكينعتو بالمجنون وخرج من تمااا هارب مسكين أما جواد فانتهت بيه و ليلى قدرت تنفذ منو وتطلق لكن يستحيل يخليها تعيش فراحتها وغادي ينتقم منها مهما كان الثمن هههه السي جواد لا نسيت راك فالحبس آشمن انتقام صافي طاحو كواريك ^^
سارة مبعد يومين فالعناية خلاوهم ياخدوها لغرفة مستقلة ولكن هيلين أصرت باش تاخذها للفيلا ، وليد سول مصعب إيلا معليهاش شي خطورة وقالو أنها خصها ترتاح والعناية اللازمة ووليد طلب ممرضة ترافقها حتى تتحسن وخدا وعد من مصعب باش يزورها كل يوم ويطمنهم عليها ، ورجعت الأميرة الصغيرة للفيلا وكلهم فرحو بيها
سارة(كتهدر بصعوبة):- واووو كل هاته الهدايا لي ؟
وليد(كالس حداها):- و أكثر منها لأميرتي الصغيرة ليه شكون عندنا من غيرك يا مدللتنا
جاد:- فعلا مدللة وقفتينا على قدم وساق هاد اليومين الفايتة
هيلين:- بنتي حبيبتي نتي
سارة(بابتسامة):- ويل ويل كفى من الحب أنا ممتعوداش على هاد المديح كلوو هههههه
ناديا(كضحك معاهم مين ضحكو من جملتها):-طبعا انتي اساس فرحتنا دباااا
سارة(بمكر):- امممم لوكان فبالي غادي نولي شهيرة كاع هاكدة لوكان زدت تدللت أكثر
وليد(مسحلها فشعرها):- يالاه يا الحلوة ديالنا غاتنعسي دبا باش تولي بصحة جيدة تفاهمنا
سارة(بتذمر):- بدأت الأوامر يالاه أنا كنشكر فوضعي الرائع ؟؟
هيلين(وقفت):- ننن ساريتا نعسي أحبيبتي باش تبراي تمام
ناديا(باستها):- نشوفك
خرجت ناديا مالبيت وهي مبتسمة اللي ولات سارة بخير وتوجهت لبيتها وسمعت هاتفها يرن استغربت ودخلت مباشرة وهزاتو لقات رقم مريم
ناديا(بفرح):- مريم حبيبتي كيفك توحشتك بزااااف ؟
مريم(بصوت حزين ويخوف):- نادياااا حبيبتي أنا لاباس
ناديا(حست بيها):- مريم مالك شنو كاين ؟
مريم(تلعثمت):- نادياااا بصراحة كاين واحد الأمر بصح مبغيتكش تخلعي تفاهمنا
ناديا(كلست بفشل):- مريم عفاك قولي شنو كاين راكي خلعتيني
وليد(جا فايت وشاف بابها محلول ومنظرها كيخوف ودخل عقد حواجبو وسول ناديا اللي هززتلو راسها باش يستنى تفهم):- اممم
مريم:- ناديا جدي عيسى راه عيان شوية بصح متقلقيش هاوااا فالبيت غير
ناديا(دموع بداو يسيلو بدون شعور وبانهيار):- جدي جدي مالو أمريم؟
مريم(حكت فراسها بتعب):- افففف خصك تجي فورا أنادياااا نتي اللي تقدري تقنعيه يمشي طبيب
ناديا(مسحت دموعها):- طيب طيب أنا جاية
وليد(بقلق دخل عندها):- ناديا ياك لاباس؟
ناديا(برجاء وخوف):- جدي معرفت مالو مريض خصني دبا نمشي لعندووو
وليد(ارتبك وتوتر):- طيب نوضي نوصلك
ناديا(بشكر):- خذني بسرعة أوليد
وليد هززلها راسو وهي فيساع لبست جاكيطها وخرجت معا وليد اللي تاهو لبس جاكيطو ومشاو هي نسات كاع وليد وبقات تبكي وتدعي الله ينقذ جدها حبيبها ، أما هو فكان خايف يكون شي ملعوب من ياسر لكن بعد هاد الفكرة من بالو و بقا يتمنى يطمنو عليه من بعد ساعتين طريق وصلو وحلت حزام السلامة ديالها ونزلت بخطوات متسارعة ملهوفة تطمن على جدها ودقت الباب حلتها مريم اللي طارت عليها بتعنيقة وسلمت عليهم كاملين
ناديا(بخوف ودموع):- مالو جدي ؟
مريم:- متخافيش راه مزيان دبا لكن الصباح كان عيان بزاف ورفض يمشي للمشفى كيما درنا معاه
ناديا(بتذمر):- هو ديما كيدير هاكاااا خليوني نشوفو ؟
ناديا(دخلت عندو وغي شافها عينيه دمعو):- جدييييي حبيبي
عيسى(حاول يتكعد من فراشو مقدرش):- بنتي ناديااااا جيتي يا بنتي ؟؟
ناديا(شهقت وسرطت دمعتها):- جيت يا جدي علاش مبغيتش تمشي للسبيطار علاش باغي تخلعني عليك اجدي علالالاش ؟
عيسى:- يا بنتي شحال بقا فالعمر باش نخافو عليه
ناديا(بهلع ترمات فحضنو كي شي طفلة):- اهئ اهئ متقولش هاكدة نتا غادي تولي مزيان من أجلي أجدي ياك أحبيبي غادي تمشي ؟
عيسى(بحسرة):- غي شوفتك ردت فيا الروح ومكان لاش هاد السبيطارات
ناديا(شدت يدو وباستها):- جدي إيلا كتبغيني تمشي معايا دبا للسبيطار عفاااااك باش نكون مرتاحة
وليد(دخل بدون احم ولادستور):- احم سيد عيسى
مريم(بارتباك لناديا):- شفتو واقف برااا قلت أكيد معاك و دخلتو
كلشي بقاو كيشوفو فداك الكيان الأنيق فكل تفصيلة فيه جاهم غريب ورسمي جداااا واستغربوه صراحة
ناديا تكاكات باللي نساتو عند الباب ووقفت بتلعثم وهي كتهرب بعينيها عليهم
ناديا:- أ نسيت نعرفكم أ السيد وليد مدير العمل ديالي كناا فاجتماع فاش اتاصلت بيا مريم وأصر باش يرافقني لعندكم
وليد:- تشرفت بيكم مدام مريم . سيدة عزيزة .. سيد عيسى
عزيزة(كتهزز راسها حالة فمها فيه):- مرحبا بيك أولدي
مريم(تاهيا مخلوعة من وسامتو وكتشوف فناديا):- تتشرفنااا
عيسى(ابتلع ريقو وعقد حواجبو):- السلام أولدي ...ناديا فين ياسر ؟
طننن طرررننن طنطنط طرنرنطنطنطنننن طنطرررطننن
ضربت الأجراس فراس ناديا ووليد ونحبست الكلمات مبقا تاحاجة تترجم ولا تجاوب داك السؤال البريئئ وليد انفعل بصح بقا محافظ على هدوئو وناديا بسيف باش التقطت انفاسها
ناديا:- فالخدمة أجدي مسافر
عيسى(بنظرة تساؤل شاف فيها وفوليد):- لبسيني باش نمشيو للسبيطار
ناديا(بفرح):- ياحبيبي ياجدي
وليد(انسحب):- غادي نستناكم فالسيارة
ناديا(بامتنان):- تمام
بقات مريم وناديا كيلبسوه في حين عزيزة خرجت تطمن ليلى بموافقة عيسى أخيرااا تبعتها مريم اللي مشات تلبس باش تمشي معاهم و ناديا جات تجر جدها فالكرسي ووقفها
عيسى:- بنتي
ناديا(جات لمقدمة رجليه وانحنت عندو):- نعام أجدي
عيسى(بتخوف وقلق):- هاد مديرك مزيان معاك معرفتش علاش مرتاحيتلوش ؟
ناديا(باستغراب):- آه أجدي مزيان علاش كتقول هاد الكلام ؟
عيسى:- معرفت مهم انتابهي منو ممريحنيش ونظراتو فشكل
ناديا(تنهدت بعمق وناضت):- لا جدي راك تبالغ السيد وليد الله يعمرها دار يلاه يلاه خلينا نمشيو
عيسى سكت رغما عنو وهي مفهمتش علاش جدها مرتاحش لوليد مع أنه يالاه شافه ، ركبوه وداوه للمشفى.. طول الطريق والصمت مخيم عليهم تاشي حد معرف شنو ينطق وليد كان مرتبك شي شوية أما ناديا فكانت حمرا طول الطريق ومتوترة عيسى كان مرة مرة يسرق نظرات أما مريم فكانت عاقدة حواجبها وكطقطق فتليفونها اللي كانت تكتب مساج فيه لابراهيم وتبلغو بالجديد .. وصلو للمشفى وقلبو على مصطفى اللي فرح مين شاف عيسى وخلا الممرضين يدخلوه حالا لغرفة الفحص في حين بقات مريم وناديا ووليد فالكولوار
وليد(همس لناديا بشوية):- سيري كلسي لهيه متوقفيش
ناديا(هززتلو راسها):- وخااا
مريم(قشعت الفيلم وكمشت عينيها كي الثعلب وكلست حدا ناديا):- ضريف هاد مديرك
ناديا(ابتلعت ريقها وشافت فيه):- آه
مريم(شافت شوفتها):- ضريف تافات القياس
ناديا(بانزعاج التفتت عندها):- شنو قصدك؟
مريم(كتهدر معاها وتشوف فيه):- محكيتيليش عليه كاع
ناديا(متوترة):- مجاتش فرصة باش نحكيلك
مريم:- وياسر باقي مسافر ؟
ناديا:- آه بصح غادي يجي هاد الفترة هادي
مريم:- ونتي فين كالسة دبا ؟
ناديا:- مشايفاش أنه ماشي وقت هاد الأسئلة أمريم خليني نوض نشوف الطبيب
هربت منها طبعا لاحقاش عارفاها مغاديش تسكت ومن الواضح أنها هي الأخرى مرتاحتش لوليد اللي كان كيهدر فتليفونو وتجاوزه ابراهيم اللي مشا ديريكت عند مريم
ابراهيم:- حبيبتي غي خبرتيني جيت فورا فينو عمي عيسى؟
مريم(وقفت عندو):- فغرفة الطبيب وناديا دخلت عندو دبا
ابراهيم:- اممم جات ناديا إيوا ع الله يكون خيرر ... مالك؟
مريم(ريشتلوو بعينيها):- هاداك اللي واقف لهيه مديرها فالعمل
ابراهيم(التفت وشاف المستر وليد بشحمو ولحمو):- امممم عاد دبا حصلنا الشرف سناي هنا دقيقة راجعلك حبيبتي
مريم(جات توقفه كان مشا):- أ.. صبر ..
ابراهيم(تقدم عندو ووليد انتبهلو وقطع الإتصال):- مستر وليد
وليد (مدلو يدو يسلم عليه):- نعم
ابراهيم:- أنا زوج مريم
وليد(شدد على يدو بالسلام):- أهاا تشرفنا سيد ابراهيم
ابراهيم(بلمحة ماكرة):- أهاه سمحلنا عذبناك معانا وجبناك تالهنا وعطلناك على أعمالك
وليد(دار يدو فجيبو وبجنتلمانية):- تت أنا هنا معا ناديا ضروري متطمن على صحة جدها
ابراهيم(هزلو حواجبو):- آه ناديا امممم فيك الخير
وليد(بنظرة مضادة لتلاعب ابراهيم):- شكرا
مصطفى(خرج رفقة ناديا وتجامعو كلهم عليهم):- الحمد لله مكاينش شي حاجة خطيرة الموضوع بسيط وخصو غير مداومة فالدوااا وغاتولي صحتو أحسن مما كانت
ناديا(عاد خايفة):- نتا متأكد ياك أدكتور جدي ممحتاجش شي عملية ولا غيرو ؟
مصطفى:- لا الحمد لله شكوكي مطلعتش فمحلها وكلو من التعب والإرهاق
وليد:- دكتور إيلا كان بحاجة باش يبقى تحت رعايتكم أو تزيدو تتأكدو مكان مشكل المهم طمنونا عليه
مصطفى:- ميحتاجش لأنه فعلا بصحة جيدة غير خصو الرعاية الكافية لذلك
مريم:- حنا أدكتور كنعطيوه دواه فمواعيدو ومكانش شي تأخير
ابراهيم:- فعلا حتى الأطعمة اللي مكاتوالموش مكايعطيوهالوش
مصطفى:- قصدت بالرعاية الكافية أنه خصو دايما يكون حداه شي ممرض يخليه تحت العناية لأنه حالتو حساسة ومعرض لانتكاسة فأي وقت
ناديا:- طيب شنو تقترح أدكتور يبقى عندكم ولا شنو ؟
ابراهيم:- جدك ميقبلش يبقى هنا أناديا وغاتشوفيه دبا يخرج يقولك خدوني للدار
وليد:- طيب محلولة نعينولو ممرض يبقى معاه كنضن هاادا حل مناسب
ابراهيم(هادشي اللي بقا غير هادا يدخل ونجيبو ممرض داخل خارج على ختي ومرتي ونسيبتي محسش راسو ونطق بغلاظة):- طبعااا لا
ناديا(شافت فيه بتفاجئ هي والجميع):- علاش ابراهيم ؟
ابراهيم(انفعل):- كنضن عمي عيسى مغاديش يوافق
مريم:- بسيف عليه أبراهيم
ابراهيم:- ممكن تخليني نكمل كلامي
مريم(انفعلت من جملتو المحرجة):- انا داخلة عند جدي عيسى
وليد(فهم انفعالو):- ناديا شوفي اللي يناسب صحتو
ناديا:- دكتور مصطفى تقدر ترشحلنا شي ممرضة تجي مرة مرة تراقب صحة جدي وانتا ولا الدكتور علاء تمرو عليه بيما ولا مزيان كيف العادة
مصطفى:- تمام كيما بغيتي تفضلي معايا لمكتب الموظفات
ناديا:- عن إذنكم
ابراهيم(زفر بعنف):- إذن مستر وليد طمنت على السي عيسى بلاما تعطل أمورك معانا
وليد(شاف فيه بدون مبالاة):- أنا مرتاح تفضل نتا إيلا بغيت
ابراهيم(صاط):- عن إذنك
وليد(بابتسامة):- إذنك معاك ..
مبعد مختارو الممرضة اللي غاترافق عيسى رجعو كاملين للدار ووليد كذلك بقا كيستنا ناديا فسيارتو وهي لداخل كتودع جدهاااا
ناديا:- جدي نتابه لصحتك ومتخلعنيش عليك راه معندي حد مغيرك
عيسى(كيشوف فيها مطولا):- ناديا بنتي نتي مكاديريش شي حاجة تغضب الله ؟
ناديا(مرتبكة):- طبعا أجدي نتا عارفني كيفاش دايرة علاش كتسول؟
عيسى:- غي باغي نطمن عليك سلميلي على ولدي ياسر بزااااف ومتغيبيش عليا بصوتك نتي دوايا
ناديا(جاها لبكا):- ان شاء الله أجدي متخممش
عيسى:- نتابهي لنفسك و خليني نشوفك
ناديا:- طيب بصح توعدني تهتم بصحتك باش نمشي مرتاحة
عيسى:- يكون الخير أبنتي
ناديا(باستو وعنقاتو وقفلت عليه الباب باش يرتاح وخرجت للصالون):- أنا غادي نخليكم دبا
ابراهيم(منرفز):- سلميلنا على ياسر
ناديا(شافت فيه):- يوصل يلاه بسلامة عليكم
عزيزة:- الله يعاونك أبنتي
ليلى(مشات تبوسها):- نشوفوك على خير
ناديا:- فرحتلك بزاف ألف مبروك اللي تهنيتي ودبا التفتي لحياتك ونساي الماضي كلووو
ليلى:- أكيد وهادا اللي ناوية عليه تهلاي فروحك ومتغيبيش علينا
ناديا:- أكيييد
مريم(باستها):- بسلامة اختي وخلينا على اتصال
ناديا:- تمام أحبيبتي باي باي ..
مريم(وقلبها واجعها):- نادياااا
ناديا:- هممم
مريم(كروشاتها وجرتها لفم الباب باش ميسمعوهمش):- إيلا بغيتي تحكيلي شي حاجة اتاصلي
ناديا:- هههه آآآخ منك وخا ألالة غادي نتصل يالاه خليني نمشي تعطلت و جدي أمانة عندكم وأي حاجة اتاصلو فورا وحساب الممرضة دفعو السيد وليد يعني من غدا تشوف خدمتها
مريم:- امممم أنشووفو متخميش
ناديا:- يلا سلام
مشات مسرعة ركبت بجنب وليد اللي نطلق طيااارة من المكان ، ورجعت مريم لعندهم
ابراهيم:- وهاداك الطولة علاش يخلص حساب الممرضة مالنا حنا ماشي أهلو وملزمين بيه ؟
مريم(عاد معصبة منو على تصرفو فالمشفى):- مافيها تاحاجة مع أن مصطفى عيا فيه يخلي الحساب على المشفى لكن رفض
ابراهيم:- هاداك باغي يستعرض عضلات وصافي
مريم:- ونتا علاش معصبك الموضوع مدير ناديا وتدخل عادي مافيها تاحاجة
ابراهيم:- وراجلها كي يعرف مغاديش يكون عندو اعتراض
مريم:- كنضن باللي راجلها بخبرو كلشي غير هني راسك
ليلى(شافت الجو مشحون بيناتهم وشافت فعزيزة اللي عوجتلها شنافتها مفاهمة والو):- أ... المهم عمي عيسى مخرج فيه والو وصحتو مزيانة وع الله يولي بخير
بجوج بيهم سكتو وكل واحد مين بقا يشوف وباينة غايبقاو هاكا تايروحو لدارهم إيوا نخليوهم يفكو مشاكلهم بطريقتهم ونمشيو لديك السيارة ...
ناديا(بامتنان):- شكرا على وقفتك معايا اليوم أوليد
وليد(بابتسامة):- لاشكر على واجب مع أن الأمر كيهمني بقدرك
ناديا:- الحمد لله رتاحيت مين طمنت عليه
وليد(بتردد):- ناديامزال الحال الوقت باقي تقبلي دعوتي على العشاء فشي مطعم اللي بغيتي
ناديا:- اممم كنضن خصنا نرجعو خلينا ساريتا اليوم كامل
وليد:- ساريتا نعست اتصلت بيهم واطمنت عليها
ناديا(زفرت وهي مرتبكة كيدير ترفض):- معرفت
وليد(بإصرار):- ساعتين ونمشيو فحالنا هممممم شنو قلتي ؟
ناديا(نزلت راسها بقلق):- أووك طيب
وليد(فرح اللي وافقت):- امممم تمام ..
دور سيارتو بحماس واتجه لمطعم مالمطاعم اللي كيعرفها وهي تنفست بعمق وحاسة بارتجاف مفاهماش سرو ولا عارفة معنى هاد الإرتباك كلوو ...وصلو لداك المطعم كان زوين وكلسو لداخل محيت كان الجو شوية بارد كلعو جواكيطهم وهي كانت لابسة تنورة فاللون الوردي الشتوي وفوق منها قمجة فاللون الرمادي جاية مفضفضة من الجوانب وموديرن محيت مايلة من واحد الكتف ومشدود بسنسلة فالخصر عاطي فوليم مناسبها باش تخفي كرشها ... أما هو كان لابس تريكو فاللون الرمادي ناصع وفعنقو في وتحتو قمجة زرقا وسروال أسود .... المهم كلسو وجا النادل وعطاوه طلباتهم ومشا ..
وليد(بنظرة خاطفة ليها):- أسرتك لطيفة
ناديا(بابتسامة تشكيك لوكان تعرف شنو قالو عليك):- هذا من لطفك
وليد(بخبث):- بصح محبونيش
ناديا(متفاجئة):- أ .. علاش كتقول هاكدة واش ضايقك شي حد فيهم؟
وليد(بلامبالاة مصطنعة):- بلاما يقولي حد إنما إحساس
ناديا:- ننن راك تبالغ أهلي بسييطين جدااا
وليد:- وهاذا اللي لفت انتباهي ليك أول مرة بقدر كلشي محيط بيك يقدر يخليك تعيشي ملكة إنما باقية ببساطاتك محافظة عليها وهي اللي مخلياك جوهرة نادرة الوجود
ناديا(بحنق):- نعتبر هادا غزل يعني ؟
وليد:- امممم متخليش الحديث يمشي لمنحى بعيد اعتابريه مديح احم
ناديا:- أنا مكنعرف عليك والو من غير هيلين وساريتا وجاد
وليد(التقط لوزة وكلاها):- امممم وشنو باغية تعرفي ؟
ناديا:- يعني أي حاجة عليك فين عشت فين عائلتك كيفاش وليت مستر وليد يعني ...
وليد:- آه قولي باغية ديري عليا روبورطاج هههههه
ناديا:- أففف يعني غادي تندمني ؟؟
وليد:- هههه طيب طيب متعصبيش أنقولك يالالة أنا نشأت فالمغرب وسافرت معا أهلي لبرا كملت قرايتي مبعد فترة توفات الأم ديالي بالمرض للأسف وماشي بزاااف وحتى الأب ديالي توفى من قهرو على فراقها محيت أنا كنت ثمرة العشق بيناتهم امم عموما مبعد فترة استقليت فالدومين العملي ديالي وفتحت مكتب وتعرفت على البوس وبدات بيناتنا تعاملات عملية مبعد تعاملت معا جميلة وجعفر وشركة مور شركة وفرع مور فرع كبرت مجموعة مستر وليد و إلخ البقية كتعرفيهااا..
ناديا(مشدودة بقصتو):- أهاه ..لكن مدامك صنعت كيانك بوحدك علاش بقيت للآن معاهم ؟
وليد:- قتلك عندي أسباب معينة منعتني أنني نبعد عليهم لكن يجي يوم وتعرفيهم وعد مني
ناديا(شردت فنظرتو):- اممم سنرى
النادل(حطلهم العشا):- بالصحة والراحة
وليد:- ميرسي .. تفضلي بسم الله
ناديا:- ههه حاسة بجوع رهيب
وليد:- ههه بصحتك
جعفر:- واش غادي تضرب على الماكلة بمجرد ما أنها هي كتطيب والله تا أكلها لذيذ بعمري ما ذقت طعام نسائي بحالوووو
ياسر:- جعفر خرج مالبيت باغي نبقى بوحدي
جعفر:- اللي عجبك نتا اللي غاتموت بالجوع مش أنااا ....
نزل جعفر لقا زكية كتحط بحماس فوق الطابلة الأطباق ونحرج كيفاش يقولها مي معندو ميدير
جعفر:- غير حيدي أطباق ياسر
زكية(منزلة عينيها الأرض):- باقي مبغاش ياكل ؟
جعفر:- نتي خلي الأكل فالثلاجة كيجوع غاينوض ياكله بوحده كلسي تاكلي
زكية(كلست أونفاص ليه):- سي جعفر
جعفر(حشا أول ملعقة ففمو):- يا الله عندك نفس لذيذ فالماكلة تبارك الله عليك
زكية(بابتسامة امتنان):- ربي يخليك بالصحة والراحة
جعفر(زاد ملعقة تانية):- هاااه شنو باغية تقولي شي حاجة؟؟
زكية(محرجة وبرجفة):- بغيتك تحكيلي على مدام ناديا
جعفر(كان كلا المعلقة 3 وجبدها مفمو وولا عمَّرها):- امممم يعني شنو باغية تعرفي بالضبط
زكية(حشمانة):- يعني كاع اللي كتعرفو
جعفر:- ناديا إنسانة طيبة جدااا صحيح مجنونة بعض الشيء لكن قلبها كبير ويتعلق بيها أي واحد يعرفها، عنيدة جدا ومكادير إلا اللي فراسها لكن ت..
ياسر(منفعل):- جعفرررررر
جعفر(نزل عينيه باستغراب):- نزلت وا أجي تاكل
زكية(بلهفة):- نعمرلك طبسيك ؟؟
ياسر:- مباغيش ناكل ولا غيرو ومنبغيكش تهدر على مرتي معا هادي مرة أخرى أجعفر
جعفر(شاف فيها حمارت وتلونت وغادي تبكي):- الأمر عادي مجرد تعارف بسيط
ياسر(مكايشوفش فيها كاع وعينيه كي الصقر على جعفر):- كلامي واضح ؟؟
جعفر:- اففف باركة من هاد الأكشن صافي فهمنا
ياسر:- ونتي بعدي عليك مرتي إيلا بغيتي نبقاو مزيانين
زكية(بعصبية وقفت):- تانا مرتك إلى نسيت
دفعت الكرسي وطلعت كتجري لبيتها ولتختها وخلاتو حال فمو مصدوم كيشوف فجعفر اللي بقا ياكل فطبسيه معلقة مور معلقة ولا على بالو
ياسر(كلس بلاصتها):- سمعت سمعت شنو قالت ها نهاية شواراتك الغريبة هاه سمع ودي على قلبك
جعفر:- البنت مقالت عيب نتا اللي نازل تجريح فيها وهي المغبونة مقدتش تتحمل
ياسر:- وانا ضربتها على يدها ولا باغيني نحسسلها على السيد إحساسها الكريم
جعفر:- عههههه كول كول والله تايعجبك
ياسر(شاف فالأكل):- مناكلش السم ديالها نموت بالجوع ولا نذوقه
جعفر كمشلو عينيه ومداهاش فيه وبقا ياكل على مرأى من عيون ياسر اللي كانت تلاحقه فكل ملعقة وفكل مضغة ومتعة كذلك ومع ذلك حكم رأيوو مياكلش ماكلتها مهما يحدث ، لكن ليس لوقت طويل مبعد مطلع ينعس جعفر نزل هو مبعد مقرصاتو كرشو وجبد شوية من الأكل وبقا ياكل
ياسر(كيشووف من كل الجوانب لا ينزل شي حد فيهم):- امممم مبيهش مذاقو المهم يأكل ..
مبعد مكملو العشا فالمطعم لبسو جواكطهم وخرجو ومبعد متمشاو شوية ركبو فسيارتهم ..
وليد(بلطف):- قضينا وقت ممتع ياك؟
ناديا(بارتياح اللي أمور جدها بألف خير وحتى الجو كان ملائم):- آه محسيناش كاع بالوقت
وليد(بابتسامة):- ناديا
ناديا(شافت فيه بتساؤل):- اممم نعم
وليد:- جاي على بالي نتمشاو شوية تقدري ..؟؟
ناديا(كتفت يديها):- لا نتا باغي تجيب الفجر
وليد(سكت ومط شفتيه):- عييتي ؟
ناديا(حست باللي ستعجلت فالكلام):- أ لالا أنا مزيانة
وليد:- طيب خلينا نتمشاو شوية شايف فهاد الجهة حديقة رائعة الجمال
ناديا:- أوك يالاه
نزل وليد من سيارتو ومشا فتحلها الباب نزلت وقفل السيارة وتمشاو فداك البولفار ، هو كان مرتبك وابتسامتو مختفتش أما هي كانت كتشوف فيه مرة مرة وحاسة بفرحة غريبة بداخلها .. وصلو لديك الحديقة اللي كان فيها من كل أنواع الورود الجميلة مزينة جوانب المكان سبقها هو وكلس على واحد الكرسي خشبي أونفاص ليه أرجوحات كيتمايلو معا البرد .. كلست حداه بسكون كتشوف فنجوم السماااء وضوء القمر عاطي نورو للحديالقة وزايدها روعة على روعتها ، حست هي بالراحة لجمال المكان وهو كان مستمتع بنظراتو الخاطفة لملامحها المستمتعة بالمناظر اللي هي وسطهم ..
وليد:- مكنتش عارف أنك كتأثري بالطبيعة لهاد الدرجة؟
ناديا(بلمعة فعينيها):- الطبيعة آية لعظمة الخالق كنحسها مأوى لكل مخلوقات الأرض
وليد:- اوبس حيلك عليااا فاجأتيني
ناديا:- ههه طب ونتا شنو كتجيك ؟
وليد:- اممم يا سيدتي أنا كنعتبر الطبيعة مكمِّل بسيط للمخلوقات الأرضية لأنه لو ماكنا حنا موجودين كانت الطبيعة فقدت بهجتها لأننا حنا اللي كنقيمو هاد السحر اللي وهبولنا الله
ناديا(بلمحة تفكير):- وجهة نظر نحترمها
وليد:- شفتي هههه
ناديا(بقات تشوف فالأرجوحات):- فالماضي القريب يعني كانت بجنب عمارتنا حديقة ماشي بحال هادي يعني مهملة لكن كانو فيها جوج أرجوحات كنا دايمن كنمشيولهم أنا ومريم هي تشد وحدة انا وحدة وكنبقاو تما حتى يجي شي ولد من ولاد الحومة يقولنا خالتي عزيزة كتقلب عليكم ،، هههه كانت هاديك المكان الأول اللي تقلب علينا فيه وتلقانا فعلا كانت أيام بسيطة وزوينة ومتوليش
وليد(لمح نظرة الإنكسار اللي فعينها):- شكون قالك متوليش ؟
ناديا(بتشكيك):- هههه الله يهديك
وليد(وقف ومدلها يدو):- أجي معايااا
ناديا:- وليد الله يهديك دبا ميليقش كاع نن
وليد شدلها يدها بلاما يخليها تزيد تعترض وكروشاها ووصلو لدوك الأورجوحات وهو كلس فيها اللول باش يشوفها واش متينة
وليد:- امممم قوية أجي خوذي بلاصتي
ناديا:- وليد وباركة مالهبال واش فوضعي نركب فيهم
وليد:- أجي قتلك
ناديا:- هفففف
شدت فدوك الحدايد وغمضت عينيها بجهد وكلست على خشبة ديك الأجوحة وهو دفعها غير شوية وعجبها الحال ابتسمت وزادت ابتسمت حتى انطلقت أجمل ضحكاتها معاها وهو كان فرحاااان بزاف من حالتها وروعتها وهي تحت ضوء القمر والنجوم وفداك الجو مستمتعة باللعب ، فعلا بريئة وباقي قلبها طفل مكانتش سايعاه الأررض دوك اللحظات ، مبغاش يكترلها نظرا لحالتها ووقفت وهي مساخياش هههههه وشكون يسخى بدوك الأرجوحات ياعيني ^^
ناديا(كلست كتنهت):- أووووه من فترة طويييلة مضحكتش بحال دبا ههههه
وليد(حس بروحو كينقز):- إيني تايم
ناديا(التفتت عندو):- هههه شكرا ليك أوليد
وليد(بتكبر دعابة):- وصل وصل على الرحب والسعة
ناديا(تثاءبت):- امممم نمشيوو ؟
وليد:- ناري على قطة كتنعس فيساع هههه
ناديا:- الوضع ماشي سليم هناااا تخيل يهجمو علينا شي قطاع طرق
وليد(انحنى لوجهها):-أنا نحميك بروحي
ناديا(شافت فعينيه القرابين منها وتلعثمت):- أ... لا ممستغنيينش على روحك مستر وليد لذلك تفضل معي إلى البيت هيااا
وليد(دار يدو فجيوبو ووقف):- مدام مصرة تفضلي
وقفت وتمشات قبلو عدة خطوات ووهو وقف فبلاصتو
وليد(بنظرة عشق):- نادياااا
ناديا(التفتت عندو باستغراب):- وليد شنو ؟
وليد(غمض عينيه متردد ومرتبك):- بغيت نعطيك حاجة لكن واعديني متفهمينيش غلط أو يعني ..
ناديا(رجعت عندو ووقفت مقابلو بتساؤل):- أكيد أوليد شنو بغيت ؟
وليد(جبد يدو مجيبو وحلها كان فوسطها قابصة صغيرة مربعة كحلة):- انتقيتهالك بنفسي من فترة
ناديا(كتشوف فالقابصة وداخلها كيرجف):- أ.. معرفت شنو نقولك؟
وليد(فتحها وعينيه فعينين ناديا):- دورت حتى عييت باش لقيت جوهرة تعبر عليك لكن صعب الموضوع علي لأني ملقيتش بحالك أناديا وهاد الخاتم
ناديا(عينيها عمرو دموع وهي تشوف فديك الماسة اللي مزينة داك الخاتم الثمين):- وليد هادا خاتم زواج متكونش مجنون ؟!
وليد(بقا ماد يدو وكيحك فجبهتو باليد التانية):- قتلك متفهمينيش غلط
ناديا(مدت يديها وقفلت القابصة فيدو وحطت يديها على يدو وشافت فيه بعمق وابتسمت):- خلينا نمشيو
سبقاتو وخلاتو بلا جواب ولا تاحاجة فقط ابتسمت ابتسمت يعني اشارة زوينة ليتيم الاحساس بحالو دار الخاتم فجيبو وجرا حتى وصل لمستواها وكملو مشية خروجا مالحديقة
وليد(قبل ميركب فالسيارة):- غادي يستناك
ناديا(قبل متركب من بابها تنهدت بعمق على جنونو اللي مستحيل يعنيلها شي حاجة):- ربما ..
ركبو وكل واحد حامل فداخلو كلام لا يقال هي غابت عن الوجود وهو كان طاير لأبعد سمااا وبجوجهم غارقين فالتفكير ...الطريق اللي مشاوها كانت بالنسبة ليه طريق الأحلام اما بالنسبة ليها كانت طريق الأمنيات كانت باغية ترجع لأيام صباها ولا شيء غير .. وصلو هما للفيلا ولقاو هيلين وجاد مزال كيتعشاو فالمائدة وطبعا مستحيل متسمعهمش هيلين شي كلمة تسم البدن ، وطبعا كلامها كان موجه لوليد بالدرجة الأولى
هيلين:- اليوم كلو غايب وتقول اللي مريضة ماشي بنتك
وليد(كيحيد جاكيطو):- كان عندنا شغل
هيلين:- كترت مشاغلكم بزاف هاد اليامات
وليد:- علاش عندك شي اعتراض؟
هيلين:- بنتك مزال مريضة؟
وليد(بنظرة شرسة):- وكنت مطمن عليها وخا أنا برااا
هيلين(كتشوف بكره فناديا اللي قاتلهم تصبحو على خير وطلعت):- ياريتك تهتم ببنتك كيما كتهتم بغيرها
وليد:- تصبحي على خير أهيلين .. جاد فوت عندي لبيتي مين تسالي
جاد:- أوك
هيلين(مبعد مطلعو):- هادو فين كيمشيو طول الوقت الموضوع مبقاش ينسكت عليه أجاد
جاد:- متهتميش باش ميوجعكش راسك راهم كبار وكيعرفو
هيلين:- لا أنا خصني نعرف
جاد:- يوووه أهيلين هنينا من سيرتهم وكملي عشاك
هيلين(شافت فيه وكملت عشاها):- هاحناااا
وليد(وصل كل واحد لبيتو):- تصبحي على خير أنا غانشوف سارة شوية
نااديا:- أوك بون نوي
دخلت و استلقات على سريرها وهي مزال بكسوتها وجبدت لغطا غطات وجهها
ناديا:- آه يا جدي حبيبي شحال توحشت ريحتك تمنيت لوكان نبقا حداك ونرعاك بنفسي لكن الله غالب ، نواعدك أجدي غادي غي نفضي هاد المشاكل اللي عندي ونعيشو جميع كيف كنا ومعا ولد حفيدتك أنا متأكدة غادي تبغيه بحالي وهو غادي يتعلق بيك ههه يااااارب تحفظهملي .. افف وليد مجنووون واش يقدم خاتم زواج لوحدة مزوجة عييت منفهم فيه معرفت منفهم تتتت يا الله وقف معايا ورحمني مهاد العذاب هادااا يارب ...
دخل هو لبيتو مبعد مطمن على سارة وجبد داك الخاتم الماسي وبقا كيشوووف فيه وكيتفكر ملامحها وليلتهم وكل أحداثها وابتسامتو مفارقاتوش
بقات أيام على ديك الحفلة والكل خدام فيها على قدم وساق فالشركة ووليد وجاد أغلبية الوقت تما كينسقو ويقادو الأمور الخاصة بالدعوات وغير من داكشي ، أما البوس فكان على اتصال بالبوشتاوي اللي مكان عندو تاشي جديد معترش فمكانهم نهائيا لذلك البووس وقف البحث وصمم باش يدير مراقبة مكثفة فمكان الحفل لأنه كان حاس باللي جعفر وياسر غادي يكونو فنفس المكان جميلة مشات لفيلا وليد من أجل ناديا لكن استقبلتها هيلين وجرتها للمكتب وقفلاتو عليهم
جميلة:- هيلين سمعيني دبا تغير كلشي مقدرتيش تنفذي المهمة وكنشوف فات الفووت
هيلين(بحالة جنون):- نتي خاصك تعاونيني أجميلة كنترجاك
جميلة:- هيلين الموضوع خرج من يدي ياريت كان باستطاعتي نعاونك دبا رضاي بالأمر الواقع وانتظري الجاي بل تأقلمي معه من أجلك قبل أي حد
هيلين(بدون فهم):- شنو قصدك ؟
جميلة:- خلي مبقاش قد مافات وتعرفي ودبا عذريني خصني نشوف ناديااااا
هيلين خلاتها جميلة فحالة جنون جميلة موراها شي سر وهيلين لازم تعرفه ، طلعت جميلة لبيت ناديا ودخلت مبعد مطرقت طرقة خفيفة
ناديا(وهي كالسة على كنبة الصالون اللي فبيتها):- ادخل
جميلة(بابتسامة):- هادي أناااا
ناديا(جمعت تريكوها وناضت):- جميلة مفاجأة سارَّة هادي أجي تفضلي
جميلة(كلست ومسحتلها وجهها بيدها بحركة طيبة):- ناديااا جيت نطمن عليك
ناديا(براحة):- أنا بخير لكن مخبرتينيش أنك جاية ولا وليد قالي
جميلة:- امممم قلت نجي ندردشو شوية وقبل منطلع طلبت قهوة
ناديا:- تمام كنت غانسولك شنو تشربي
جميلة:- ناديااا بصراحة أنا جيت باش نطمن عليك وفنفس الوقت باش نتكلمو بجدية فالموضوع
ناديا(زفرت بتعب):- جميلة أنا مستحيل نطلق من ياسر ونتزوج وليد هادي تامنطق ميقبلها وانا إلى مكنتش لياسر عمرني منكون لغيرووو ولا حتى وليد
جميلة(عضت شنايفها وبجدية):- نتي معندكش خيار
ناديا(بعصبية وقفت):- هادا آخر كلام عندي
جميلة(ريشتلها باش تكلس):-كلسي وبالراحة خلينا نتناقشو فهاد المسألة الأعصاب مغادي تفيد بوالو
ناديا(كلست بتنهد):- سمعيني أجميلة أنا دايما اللي كنتو تطلبوها مني نديرها وكتجبروووني عليها وحتى وليد حاول معايا بصح أنا مستحيل نفرط فياسر بناء على رغبة سيادة البوس
جميلة مضطرة تدير كيف قالها البوس وإلا غادي توقع هي وناديا فمشكلة
~ كتتفكر ~
جميلة(كتبكي ونيفها حمر وصوتها مبحبح):- قتلني قتلني وريحنييي من هاد العذااااب قتلني منهار عرفتك معرفت طعم الراحة دمرتني وحرمتني من بنتي ودبا باغي دمرها لك نتا واش أب نتا أب نتا أصلا ماشي إنسااااان نتا شييييطااااااااااااااااااااان اهئ اهئ اقتلنيييييييييي قتلك قتلني قتلني اهئئئئئئئئئ آآآآه
البوس(كالس على الكنبة وكيشوف فيها):- جميلتي مالك على هاد الدراما كلها الامر بسيط جداااا علاش مكبرة الموضوع ؟
جميلة(حطت يدها على راسها وهي كالسة على ركابيها فوق الطابي وعند رجليه):- صفوااااان صفواااان خلي فقلبك ذرة رحمة شفقة تجاه بنتك خليها تا إيلا عرفت حقيقتك تتفكرلك حاجة زينة
البوس(شدلها فكها وزير عليها):- نتي عارفة أنك غادي تنفذي داكشي اللي طلبتو منك ولا غادي نقتلها حداك وهاد المرة ماشي غادي نحرمها منك فالحياة بل فالمماة وتما بكي على قبرها من جهتي منحرمكش من ضناااااك
جميلة(بمرارة مقادراش تصدق مدى فظاعتو):- تأكد غادي يجي يوم وتخلص كاع هادشي اللي كديرو فيا وفبنتيييييييييييييي
البوس(طلق فكها):- غدا صباح تكوني عندهااااا وتنهيلي القصة قبل نهار الحفلة و إلا غادي نهيوها بخبر مأساوي ، نتي حرة الإختيار ليك أجميلتي
جميلة(شافتو ناض كيصاوب فجاكيطو ورمات راسها على ديك الكنبة كتضرب فيها وتبكي بعنف وقهر وحرقةةةة من هاد الشيطان اللي داير كيف الغراب مكيخيم على بلاصة إلا ويعشش فيها الهم والغم ... لأنهم ملقاوش ياسر وجعفر البوس قرر يستخدم الأوراق اللي عندو وبدل مايجبر ياسر على الطلاق غادي يخلي مولات الشي هي اللي تطلبو وبالتي هي أحسن فعلا إنه شرير يالطيف ...
فالوقت الحالي
ناديا(شدت يد جميلة اللي شافتها كترجف):- جميلة شغلتيلي بالي شنو كاين ؟
جميلة(ابتلعت ريقها وعينيها دامعين):- ناديا بغيتك تكوني كوراج ومتديريش فخاطرك تاحاجة متستاهل أحبيبتي والله وربي كاتبلك ما أفضل
ناديا(بخوف):- جميلة تكلمي شنو كاين راكي أرعبتيني ؟؟؟؟؟
يتبع ...
التنقل بين الأجزاء