السارقة الجزء السادس

 طبعا ناديا راسها اقصح من لحجر لايمكن دير شي حاجة هي ممقتانعاش بيها وكلام جميلة عشعش فمخها وبقات تفكر فيه طول الوقت حتى انه حرمها النعاس وجابلها صداع فراسها وقررت مين تخرج ترمي نمرتها فالمهملات وتنسى امر شخص اسمو جميلة بالمرة وتعيش حياتها كالعادة وهاكدة كان 

فات اخر اسبوع ليها فداك الحبس ودعت كل البنات اللي تعرفت عليهم في السجن وقضات معاهم ايام من عمرها ومشات تستلم اغراضها الشخصية وبالفعل عطاوها رقم خاص مكتوب عليه 

اتصلي باش متندميش لكن ناديا قطعاتو وملقات فين ترميه قالت نرميه مين نخرج برا وخلاتو فصاكها وهو مفصل الى اجزاء صغيرة 

المهم خرجت ولقات صديقتها مريم وجدها السي عيسى وسيدة عزيزة كيستناوها خارج السجن

والابتسامة مرسومة على وجوههم سلمو عليها بكل فرح ومشاو لدارهم والسعادة مسايعاهمش واخيرا تلم الشمل ديالهم  ... وهما فطاكسي فطرييقم لدارهم 

ناديا:- الله ياربي شحال زوين طعم الحرية 

مريم:- الحمد لله على سلامتك احبيبتي ناديا والله دنيا متسوا والو بلا بيك

السي عيسى(عينيه دامعين):- الله ابنتي الحمد لله عشت تاليوم باش نشوفك خارج الحبس اللي دخلوك ليه ولاد الحرام 

ناديا:- جدي حبيبي اني معاك لاش الدموع 

السيدة عزيزة:- بالفرحة ابنيتي بالفرحة

مريم:- ههههه الحمد لله ياربي  

وصلو لدارهم وقضاو اليوم كلو كيتحاكاو وشنو وقع فهاد 6 اشهر كلها وكل هاد الجلسات وكان باقي خاص جلسة خاصة ديال مريم وناديا هادي ميحيدهالهم حد خاصة بيهم بوحدهم 

نعسو السيدة عزيزة والسي عيسى وخرجو لمكانهم المعتاد 

مريم :- هاني جبت الشاي المعتاد باينة توحشتيه الحبيبة ديالي 

 ناديا(كالسة ساكتة):- آه توحشتو وتوحشت كلشي كلشي متصوريش شحال خايب الحبس كيخليك تشتاقي حتى لأتفه الأشياء

مريم:- عارفة أحبيبتي ربي كتبها عليك اش ديري والحمد لله قضيتيها وهانتي رجعتي لينا 

ناديا:- وي الحمد لله .. مهم نتي كيف دايرة معا الخدمة؟

مريم:- لاباس ناصر مول لقهوة باقي مخدمني عندو وتالمصبنة راني فيها مزيان 

ناديا:- خصني غدا نخرج نقلب على خدمة صافي باركة عليك تعدبتي بزاف فالمصروف

مريم:- واش شي حد شكالك هاحنا مستورين والحمد لله

ناديا:- مريم .. آمريم واش عليا أنا هاد لكلام رني عارفة البير وغطاه 

مريم:- والمهم المهم خليني نحكيلك مكتلكش على ابراهيم

ناديا:- شكون ابراهيم ؟؟

مريم:- ههههه واه حقا مكناش كنعرفو سميتو ابراهيم داك اللي كان يجي يقابلني فالمطعم ديال داك الشارف السي حميد  

ناديا:- آه آه داك اللي ضربتيه بصقلة وي عرفتو مالو هاداك؟؟

مريم:- واه هو بعدا نقولك السي حميد خلااتو مراتو يطلق لبنى غدا ليه مبعد مفضحتهم ههههه وجرات عليها من المحل وهي اللي راها مقابلاه وجابت واحد جوج نسا كي القواطا ياربي تسمحلي وخلات السي حميد يخدمهم باش ميزيغوش عينيه هههههههه

ناديا:- الله اكبر ههههههه بغيتهالهم ربي شاف من حالي 

مريم:- واييه ههههه وسمعي يا لالة نحكيلك على سي براهيم مين خليت الخدمة عند داك اللي ميتسما هو رجع مورايا وقلب عليا تما فالمطعم وقالولو باللي خليت الخدمة عندهم المهم بقا كيقلب عليا حتى لواحد النهار وجا للقهوة ديال ناصر صدفة وهو يشوفني وتسناني تاخرجت من الخدمة وجا يكلمني واشا نكولك ياحبوبتي واحد الضرافات واحد الكلام .. 

ناديا(كتضحك):- امممم ضرافات ياكي ايوا وفهمنا باللي ضرافات ومن بعد؟؟

مريم:- شنو من بعد احم هو عتارفلي بانه عندو مشاعر تجاهي وباللي يعني 

ناديا:- اممم كملي هادا المهم ويعني..؟؟

مريم:- احم يعني من نتعارفو مزيان غايجي يقابل ماما ويخطبني رسمي منها 

ناديا(بتخوف):- ححححححح مانعرف واش نفرح ولا نخاف؟؟؟

مريم:- وعلاش تخافي هو كيبان ولد الناس

ناديا:- كاع كيبانو هاكدك فالاول مهم هادا خصني نتلاقاه ونشوف ساسو من راسو باش يعرف باللي نتي ماشي وحدة معندها ظهر 

مريم:- يخليك ليلي يظهري العزيز ههههههههه

ناديا:- هههههههه يعطيك النو ....(ضحكت وولات سكتت وسرحت بخيالها لبعيد)

مريم:- ناديا .. مالكي.؟؟

ناديا:- اممم لالا والو احبيبتي جاني نعاس اليوم عيينا بزاف وغدا يوم طويل غانقلب فيه على خدمة دعي معايا ربي يسهل عليا 

مريم:- اللهم آمين يالاه احبيبتي تصبحي على خير تالغدا

ناديا :- وانتي من اهل الخير..

دخلت ناديا باش تنعس ومشات تجبد من صاكها شي حاجة وهي تلقا نمرة جميلة مقطعة فصاكها وتفكرت باللي نسات ترميها جبدت النمرة وحطتها فواحد الكتاب ونعست 

ومرت الايام وناديا ملقاتش ولا خدمة وحدة تنتشلها من هاد الضياع اللي عايشاه ومن الحرج تجاه مريم اللي كتصرف عليهم وعلى احتيجاتهم وللحقيقة بزاف عليها كل هادشي 

وناديا حست باليأس الباب اللي تطرقو يا اما يكونو طامعين فجسدها وجمالها يا اما مكاينش شي ثمن مهم وهادشي اللي خلاها تكفر بكلشي 

ناديا :- مليت امريم مليت واه ياصحبتي وتكولي خدمة وحدة كاينة فالبلاد 

مريم:- وصبري راه ماشي بساهل تلقاي خدمة هاد الوقت 

ناديا:- الصبر عيا مني ماشي انا عييت منو اففف والله اللي يطج من هاد القبيلة ويهني راسو 

مريم:- ابحالي غادي غير تهناي الله يهديك تانتي 

ناديا:-معرفت منقولك ياختي البيبان كلهم تسدو فوجهي عييت منقلب ومكان غير ولاد الحرام اللي طامعين فلعياذ بالله

مريم:- هادا حال مجتمعنا مكيفكروش فشي حاجة فسبيل الله كلو من اجل الماديات وصافي

ناديا:- لا شواهد لا خبرات لا والو الله يعطيهم الجوع 

مريم:- وقاتلينا غير بالفهامات والخوا الخاوي غير الله يشوف من حالنا وصافي

ناديا :-امين ياربي نوضي نوضي سيري تنعسي راه غداعندك الخدمة انا نبقى سهرانة شوية وعاد نعس

مريم:- سمحيلي احبيبتي بصح خصني نوض بكري

ناديا:- معليكش العمر ديالي تصبحي على خير 

مريم:- تالغدا نشالله بون نوي 

بقات ناديا كتشوف فسما وكتفكر وتذكرت الرقم ديال جميلة وهي تمشي تجيب الكتاب اللي فيه الرقم وجابت سكوتش لصيقة يعني ولصقت الرقم وهزت تليفونها وركبت الرقم ورن 

طيط طيط طيط 

شخص مجهول:- ألو 

ناديا(مرتبكة):- آ,.. تليفون السيدة جميلة هادا؟؟ 

شخص مجهول:- أيه هو هادا شكون معايا؟؟

ناديا:- أنا ... أنا.. تتتت طيط طيط طيط

قطعات ناديا التيليفون ورماتو على الكنبة ومشات غسلت وجهها وبقات بحالي ندمت كاع علاش تصلت وحمدت الله جميلة ماشي هي اللي ردت عليها ورجعت النمرة للكتاب ورجعاتو لبلاصتو ومشات تنعس 

 فاتت مدة ماشي بسيطة واحد النهار كانت ناديا تمشى بجانب الكورنيش المطل على لبحر معا ليل وقفت عند رجليها سيارة كحلة وخرجو منها 4 ديال الرجال صحاح شدو ناديا ودخلوها

للوطو وهي كتغوت طلقو مني بعدو مني اش بغيتو مني ولا حد سمعها دخلوها ودارولها منوم على فمها وفقدت الوعي ..