السارقة الجزء السابع

ففيلا كبيرة وغرفة مظلمة فيها نور خافت بزاف مكيبين والو حلت ناديا عينيها

ولقات راسها مكتفة من يديها وكالسة على كرسي وبقات كتغوت كتغوت

حتى جاو جوج رجال صحاح عندها وامروها باش تسكت وإلا غادي تندم وقالولها

بأنه مكاين تاشي فايدة من صراخها محيت هما فمكان بعيد وتاشي حد مغايسمعها 

ناديا(بعصبية):- خرجوني منا آش بغيتو مني خرجوني كتسمعوني ولا لاء خرجوووني........

واحد فيهم(هزز براسو لواحد ثاني باش يخرج)

ناديا فور ماشافت هاداك هزز براسو للشخص الثاني باش يخرج قلبها

بغا يسكت وخصوصا مبعد مجبد سكين من جيبو

ناديا(متفاجئة بزاف):- اا.. شنو باغي دير بهاد السكين ... جاوبني 

الشخص(بمكر):- باغي نسكتك للأبد 

ناديا(مخلوعة):- كيفاش...؟؟؟؟؟

الشخص (بتلاعب):-ممممم خصك تترجيني باش نخليك فحالك

ناديا(بتلعت ريقها):- عنداك يصحابلك انا غادي نخاف من الموت ابدا وابدا مغادي

نترجاك باش تخليني نهائيا متحلمش بهادشي وخا يكون اخر يوم فعمري

الشخص :- وشُجاعة معا راسك آه ... اممم دبا نشوف الشجاعة منا لثواني    

بقا يقرب منها وناديا بتلعت ريقها وعرفت بانه صافي هادي اخرتها فهاد دنيا

فكرت بجدها بمريم بعزيزة وشافت فسما وغمضت عينيها حيت هاداك الشخص

كان وصلها ووقف قدامها بعينيه كلهم شرار 

لحظات جد صعبة أن الانسان يشوف الموت وهي جاية ليه بقات ناديا مغمضة عينيها

وتستنا الموت وتستنا داك ولد الحرام يقتلها بداك السكين وفجأة قطع الحبال

اللي كانت مربوطة بيهم      

وحلت عينيها وبقات تشوف فيه باستغراب كبير 

ناديا(مخلوعة):- ك..كيفاش .. مقتلتنيش ... أنا مفهمت .. والو

الشخص :- تبعيني 

ناديا:- منتحرك تاتقولي فين غاتاخدني

الشخص(شاف فيها بشوفة تخوف):- الأحسن تتبعيني ونتي ساكتة وبلا تفلسيف بلاتي

غادي تعرفي كلشي أجي معايا 

ناضت ناديا وتبعت هاداك الشخص وهي مستغربة من هادشي اللي كيوقع خرجو

من داك القبو وطلعو للفيلا اللي كانت كلها توضح بأن مالكها شخص مهم جدا ،

 أمر الشخص ناديا تكلس فالصالون ونسحب من المكان بقات كتشوف فارجاء الفيلا

وبرا كيبانولها عشرات الرجال مسلحين وواقفين كيحرسوها..

 بتالعت ريقها اللي نشف وبقات تستنى القدر يكشف على شنو مخبيلها 

ومتسناتش بزاف بعد مدة جات نازلة سيدة من لفوق كأنها برانسيس في عهدها

ملابس جد فاخرة وجواهر لا تعد ولا تحصى ووجه منمق بصورة رائعة

ماشي كيما نهار شافتها فالسجن كانت لا علاقة بهاد سيدة اللي كتشوف دبا وناديا

غير شافتها ضحكت بالفقصة 

ناديا:- هههه وانا نقول  

جميلة:- اولا نعتدر على الطريقة اللي جابوك بيها 

ناديا:- طفرت دبا 

جميلة:- لكن كنحييك برغم أنك شفتي الموت مخفتيش وهذا عز المطلوب كنت

مراقباك من لفوق

ناديا(بلهجة صارمة):- بغيت نعرف انا هنا علاش؟؟

جميلة:- نتي عارفة وإلا مكنتيش اتصلتي بيا

ناديا(مرتبكة):- انا متصلتش بيك نهائيا

جميلة(ابتسمت وكلست):- ماعلينا تفضلي كلسي عندنا كلام طويل .. تشربي شي حاجة؟؟ 

ناديا:- مبغيت نكلس مبغيت نشرب بغيت نمشي لدارنا 

جميلة:- غادي تمشي لكن حتى نأمر أنا بذلك

 ناديا:- هيا نتي حابساني وقيلة ياك؟؟

 جميلة:-تتت متخليش الحوار يبدا بهاد الشكل السلبي كلسي وغاتفهمي كلشي 

ناديا:- هانا كلست هاه

جميلة:- سمعي اناديا نتي كنتي عاجلا أم آجلا غادي تلجئيلي سواءا اتصلتي متصلتيش

كنتي غاتجي لعندي 

ناديا:- قتلك متصلتش 

جميلة:- وخا متصلتيش ألالة لكن خصك تفهمي حاجة أنك دخلتي لعالمي ومنو مغاتخرجيش

ناديا(وقفت):- شوفي اسيدة جميلة داكشي اللي باغياني نديرو راه مغاديش نديرو

علاش غاتعدبي راسك معا وحدة رافضة من الاساس تكون معاك فلعبتك

جميلة(كتضحك):- عنيدة وهذا اللي كيخليني أعجب بيك كل مرة ومرة  

ناديا(بعنفوان):- مكيهمنيش 

جميلة(وقفت وقربت من ناديا):- فكري مزيان باش متندميش ماللي خرجتي

ونتي تقلبي على خدمة وكل اللي بغاو يخدموك بغاوك لغاية فانفسهم

وحتى الى كنتي لقيتي شي خدمة فكانت بدراهم قليلة فقط متكفيش حتى تجيب

نص الدوا اللي كيحتاجو جدك 

ناديا:-بأي حق تراقبيني ؟؟

جميلة:- نتي تهميني لذلك كنقولك راكي محتاجاني بزاف ونتي كترفضي تقري بهاد الشي

 ناديا:- متحاوليش تلعبي بأفكاري

جميلة:- مكنلعبش بأفكارك لكن كنحلك عينيك إلى متى غاتبقاي على هاد الوضع ونتي

مزدتي تاشي خطوة لقدام 

ناديا:- شنو هيا غايتك من اصرارك عليا بهاد طريقة هادي؟؟

جميلة:- باغيا مصلحتك فقط

ناديا:- مصلحتي ولا مصلحتك نتي فأنني نسيرلك أعمالك الوسخة

جميلة:- نتي مفاهمة والو فميمكنلكش تحكمي حتى تدخلي فعلا للمجال لكن كنقولك

أنك مغاديش تندمي 

ناديا:- انا منقدرش ... منقدرش سمعتيني

جميلة:- تقدري محيت نتي فقرارة نفسك باغية تخرجي مالمستنقع اللي نتي مدفونة فيه باغية تلبي حاجيات جدك مريم ومها حتى هما .. باغية تعيشي ومتبقايش فيما انتي عليه 

باغية ياناديا حتى لفوقاش غاتنكري خصك غير تتشجعي شوية وغادي نوريك عالم

عمرك كنتي تحلمي تدخليلو

ناديا:- حتى لو كنت باغية فماشي سرقة فلوس الناس هيا اللي غادي تكون الحل

جميلة:-بففف شكون قالك غاتسرقي فلوس الله يهديك قتلك متحكميش تادخلي للمجال معانا  

ناديا :- انا غادية فحالي 

جميلة:- فكري فمصلحة جدك أولا ثم فكري فمستقبلك 

ناديا(جاية خارجة من الباب):-الله يعاونك

جميلة :- عندك يومين فقط وغادي تلقاي سيارة تستناك فالمكان اللي جابوك منو 

جعفر..!!

جعفر:- نعام أمدام جميلة؟؟

جميلة:- رجعوها مين جبتوها 

  جعفر:- بأمرك أمدام تفضلي أآنسة 

ناديا دارت شافت فجميلة وهي مبهوضة وخرجت من الفيلا ومشات معا جعفر باش يرجعها 

للمكان اللي هزوها منو فهاد الاثناء كان جدها والسيدة عزيزة ومريم مقلقين عليها 

محيت تعطلت بزاف فالزنقة والفجر قرب يودن 

مريم:- أفففف تييلفونها باقي مقفول 

السيدة عزيزة:- معرفت فين غطست هاد البنت ياربي ميكون وقعلها تاشي حاجة 

السي عيسى:- لالا قلبي ممطمنش راه وقعتلها شي حاجة اكيد 

ناديا:- انا جيت 

مريم :- فين كنتي اصاحبتي خوفتينا عليك 

السي عيسى:- الحمد لله اربي الحمد لله ... ابنييتي خفنا عليك فين كنتي تالدابا؟

ناديا:- بشوية اجدي بشوية راه كنت كنقلب على خدمة ونسيت راسي سمحولي

السيدة عزيزة:- وتيليفونك علاش قافلاه ابنتي كنا طمنا عليك 

السي عيسى :- دبا عاد رتاحيت نمشي نرتاح تصبحو على خير

السيدة عزيزة:- خذني معاك السي عيسى تانا نرتاح الحمد لله عل سلامتك

ابنتي تصبحي على خير

ناديا:- وتانتوما تصبحو على خير 

مريم:- سمعي الفيلم اللي درتيه دبا مداخلش لمعاميع راسي قوليلي فين كنتي؟؟

ناديا(تفكرت كلام جميلة)جميلة:- نصحك متجيبي خبر لأي شخص من عائلتك ولا حتى

صاحبتك مريم هادا لمصلحتك من بعد 

ناديا:- أأ.. غير بقيت على الكورنيش شوية هادا مكان 

مريم:- أفففف ناديا الى كنتي مخبية عليا شي حاجة قوليهالي اختي باش نقدر نعاونك

ناديا:- مامخبية والو سيري سيري تنعسي راني سهرتكوم اليوم تايصبح ويفتح

مريم:- عنيدة يلاه اني مشيت بصح مغايهدالي بال تانعرف اش بيك

ناديا:- سيري يالفضولية بزاف سيري تصبحي على خير

مريم(باستها فحدها):- بون نوي مافي 

ناديا بقات كالسة فمكانهم المعتاد كتفكر فكلشي اللي جرالها وحست براسها

داخت ودخلت تاهيا تنعس باش تنسى كلشي الاحداث اللي مرت بيها ديك الليلة