السارقة الجزء الثامن

واشمن نعاس يزور ناديا وشبح جميلة مين ما دارت كتشوفو بين عينيها

وكتسمع صوتها يتردد على مسامعها وولات بحال الوسواس فالراس بالنسبة لناديا

وهادشي سببلها أرق كبير

فاقت غدا ليه كالعادة تقلب على خدمة وقررت باش تنسى جميلة للمرة الثانية

ومتفكرش فيها بتاتا وهي كتقلب جاها اتصال من جارتهم سعيدة باش ترجع فورا للدار

لان جدها حسبما ذكرت المتصلة خداوه للسبيطار وهو فحالة خطيرة

ناديا مسكينة معرفت باش تبلات ولا كيفاش وقع لجدها هادشي مشات

كتجري للسبيطار كتقلب عليه فالاستعلامات قالولها راه فالعناية المركزة

ومشاتلها كتجري ولقات تما السيدة عزيزة

ناديا(بلهفة مجنونة):- قممم .. خالتي عزيزة مالو جدي خبريني مالو جدي.؟؟

عزيزة (كتبكي):- منو لله هاداك عدو الله منو لله هو السبب اهئ اهئ هو السبب

ناديا:- خالتي عزيزة فهميني شنو كاين؟؟

مريم:- ماما ... عمي عيسى فينو اش كاين خليت الخدمة وجيت كنجري ناديا شنو كاين؟؟؟

ناديا:- حتى انا يالاه وصلت خالتي عزيزة تكلمي مالو جدي وشكون هو السبب؟؟

عزيزة:- المقدم حمزة لهلا يوريه الخير جا لعندنا هاد الصباح وبقا يحيح قالك

خصنا نخرجو من سطح العمارة بغا يردو جردة الله يرجعولو قبر يلمو ولد لحرام

ناديا:- ولد الحرام والله لابقاتها فيه واكيد جدي تعافر معاه بالهدرة ومتحملش

عزيزة :- داكشي اللي كاين ونتي عارفة قلب جدك ضعيف بزاف ميتحملش

وراني نستنى عاد داكاترة يخرجو يخبروني على وضعو وتكولي شي حد بان فيهم

مريم:- عدو الله ربي ينتقم منو .. ناديا نشالله ربي غادي يحفظ جدي عيسى متخافيش

ناديا(عينيها دامعين بالخوف عليه):- اللهم آمين هاوا دكتور ... دكتور الله يخليك جدي

هو اللي راه فالعناية المركزة بغيت نعرف حالتو الله يخليك

الدكتور:- للأسف جدك حالتو خطيرة خصنا ضروري نديرولو عملية فورا

ناديا:- اشنو كتقول عملية بصح صحة جدي متستمحلش ميقدرش يديرهاا؟؟

الدكتور :- ويلا مدارهاش ماشي بعيد يموت لذلك مالاحسن يديرها وبسرعة..

ناديا:- اشنو ..... الله ياربي ياجدي اهئ اهئ

الدكتور:- الأفضل تراجعو المحاسبات فورا لان أي تأخير غادي

يأدي بحياة المريض للخطر عن إذنكم

مريم(تاهيا كتبكي):- ناديا ناديا الله يهديك اختي كوني قوية

ناديا:- مسمعتيش امريم قالك غايدير عملية وهو ميقدرش نتي عارفة صحة جدي

متتحملش اربي اهئ اهئ

السيدة عزيزة(كتمسح دموعها):- متحصي ابنيتي ايلا دارها يريح متكونيش متشائمة

انا اللي مقلقني حاجة خورا

ناديا:- شنو هي اخالتي عزيزة؟؟

السيدة عزيزة :- مين نجيبو فلوس هاد العملية راها غالية بزاف وحنا معندناش تاربعها

مريم:- واه مشا مبالي كاع الحساب ديال العملية اففف كينديرو ؟؟

ناديا:- ياربي ... ياربي فرجها معندك ياربي اهئ

مريم:- تتت ياربي ويلا موجدناش لفلوس شنو غادي يوقع

ناديا(مسحت دموعها):- لا غانوجدوهم ميمكنش نسمح لجدي يموت ميمكنش

مريم:- فين غادية أجي ناديا؟؟؟

ناديا:- أنا غادية للمحاسبات

مريم:- سنايني نمشي معاك ماما بقاي هنا حتى نرجعو

السيدة عزيزة:- هاني هنا أبنيتي وخا

ناديا:- لو سمحتِي بغيت نسول على المبلغ ديال عملية المريض اللي فالعناية المركزة

الموظفة:- عطيني دقيقة فقط نشوف .. اممم 3 ملاين وببقاؤو وفترة علاجو

توصل ل4 ملاين

مريم(كتهدر ومخبية مور ناديا):-آشنو 4 ملاين هبلتو ولا صحابلكم الناس

راها تحرت الفلوس ..

ناديا:- شتتت شتتت امريم الله يهديك

الموظفة :- لو سمحتي اختي هادا مكان شغل ماشي سويقة

مريم(بتلعثم):- سويقة هي اللي جيتي منها نتي ... كالا سويقة

ناديا:- مريم سكتي صافي اجي معايا

مريم(مشاو والموظفة بقات غير تمتم تحت نيفها):- مسمعتيش ديك الويلة آش قالت 4 ملاين

هههه الناس راها تلقاهم فالزنقة الله يعطيهم القتيلة

ناديا:- سكتي شوية وخلينا نفكرو مين نجيبو هاد الفلوس

مريم:- احنينتي مين تجيبيهم سوى الى نمشيو نسرقو هههه هادا اللي بقا الله ياربي

على ميمون طاح علينا والله يا حمزة يا لمقدم الى بقات فيك منتسماش

انا مريم بنت عزيزة

ناديا(كانت سارحة):- مريم رجعي قابلي خالتي عزيزة وجدي أنا غادي نوقع بالموافقة

باش يديرولو العملية

مريم(مخلوعة بزاف):- أشنو راكي تقولي بغيتي ترجعي للسجن من تاني ايلا كتاشفو

باللي معندكش لفلوس غادي يحبسوك

ناديا:- متخميش سيري قابليهم وانا غادي نجيب لفلوس ونجي

مريم:-بديت نخاف منك

ناديا(بنرفزة):- مطيبليش قلبي كتر ماهو طايب ديري اللي راني نقولك عليه وهنيني

مريم:- وخا وخا بلا زعاف اني مشيت بصح غادي تحكيلي

مشات مريم باش تقابل السي عيسى وناديا تجهت للمحاسابات

وقعت على الموافقة بإعطاء المبلغ وكذلك بالقيام بالعملية وخرجت شدت طاكسي

وهزت تيليفونها

ناديا:- تيت ... تيت... أ.. ألو مدام جميلة موجودة ؟؟

جعفر:- هاهيا معاك

جميلة:- باقي مكملت المدة ديال التفكير اللي عطيتك مي كنشوف قررتي بسرعة

ناديا:- أنا جاية لعندك باغياك فموضوع ضروري

جميلة :- وانا كنستناك

(بعد مدة وصلت للفيلا ناديا)

ناديا(داخلة للصالون):- بلا مقدمات بغيتك تسلفيلي 4 ملاين

جميلة:- اممم لكن إلى سلفتك فهادا يعني أنه...

ناديا(بتلعت ريقها وكملت كلامها بشموخ):- عارفة وانا مستعدة نخدم معاك ونرجعلك كل فلوسك

جميلة(ناضت شافت فناديا وبقاو وجها لوجه):- الخدمة معايا ماشي ساهلة وكنشوف خديتي

القرار الصحيح

ناديا(شافت فيها بحزم):- غادي نخدم معاك حتى نرجعلك لفلوس مبعدها غادي نرجع فحالي

جميلة(خبات ضحكتها):- امممم تاهادا نظر ... جعفر

جعفر:- نعام أمدام جميلة

جميلة:- تكلف بأمر المستشفى ديال جد ناديا وبقا تما حتى تساوي كل الأمور

جعفر:- هو الأول أمدام

ناديا:- يعني نتي عارفة مالأول علاش انا جيت لعندك

جميلة:- وكنت نستناك .. المهم سمعي دبا اللي غادي يكون جا وقتي أنا ونتي معليك

إلا تنفذي وبس سمعتيني

ناديا:- سمعتك واه

جميلة:- الواضح غادي تعبيني معاك المهم غادي ترجعي للمستشفى واوياك تدكري

لعائلتك منين دبرتي الفلوس لأنه غايكون خطر عليك فالمستقبل ضبري شي كدبة

غادي نشالله تنجح العملية ويرتاح جدك ويرجع للدار منا لأسبوع

تخبري عائلتك أنك غادي تسافري لمدينة أخرى باش تقلبي رزقك وتجي للكورنيش

غادي تلقاي جعفر يستناك ويجيبك لعندي... تفاهمنا أناديا ؟؟؟

ناديا(سكتت وغمضت عينيها ودموعها مغرقينها):- أ.. واه تفاهمنا

ناديا هاد لكلام كلو كانت تفكرو وهي راجعة معا جعفر فسيارة فطريقها لعند جدها

عرفت باللي صافي طاحت فحفرة ومستحيل تخرج منها لقات راسها محاصرة

من طرف جميلة فين ما مشات كتلقاها وسلمت بالأمر الواقع اللي ممنو مهرب..

رجعت ناديا وهي مبهوضة وحائرة ومعارفة اش دير دبا تافقت معا جميلة

ويلا اخلت بالوعد معارفاش شنو ممكن دير حيدت من راسها هاد الافكار

وقالت نخليها لوقتها المناسب لقات مريم وعزيزة باقيين فمكانهم

والدكاترة كيقومو باجراء العملية لجدها

ناديا:- راهم يديرولو العملية ياك؟؟

مريم:- واه ربي معاه

ناديا:- اللهم آمين

مريم(جرت ناديا بعيد شوية على مها):- ضبرتي لفلوس

ناديا:- اممم واه ضبرتهم

مريم(متعجبة):- لقيتي شي مصباح علاء الدين ولا شنو كتفلاي عليا

مين ضبرت 4 ملاين

ناديا:- يوووه امريم ضبرتهم يعني ضبرتهم صافي

مريم:- عرفناك ضبرتيهم لكن منين ؟؟

ناديا:- اففف لعبت التيرسي(اليانصيب) وطاحت فيا 4 ملاين صافي رتاحيتي

مريم:- نتي ماللي خرجتي مالحبس ماشي هي هاديك مخبية شي حاجة وانا غانعرفها

ناديا:- وكيتعرفيها اجي قوليلي

السيدة عزيزة(شافت ممرضة خرجت من غرفة العمليات):- لبنات .. ألبنات..

الممرضة:- الحمد لله على سلامة المريض العملية نجحات و حالتو مستقرة

ناديا:- الحمد لله ياربي نجيتلي جدي الحمد لله

السيدةة عزيزة:- اللهم لك الحمد

مريم(بقات تشوف فناديا ومعاجبهاش الحال نهائيا):- اللهم لك الحمد

بقات تهدر معا راسها :- أشمن سر مخبياه ناديا العالم الله شنو تحت راسها

ياربي متكونش كدير شي حاجة غلاط بصح انا واثقة فناديا ابدا مدير شي حاجة

تتت بصح مين جابت هاد المبلغ مين مين؟؟؟

يتبع..

صفحات مرتبطة

صفحة القصةقصة السارقة

مؤلف القصةقصص الكونتيسة

السارقة الجزء الثامن

محتوى القصة

التنقل بين الأجزاء