السارقة الجزء التاسع

ناديا(كتغوت فراس الدرب والجوقة تلمت):- والله ومتخرج أداك الشماتة حتى

نطلع نجيبك مجرجر نفرج عليك الحومة كاملة 

سعيدة (والجيران كاع واقفين شي من سراجم كيطل شي برة):- ياك لاباس ابنتي ناديا

آش كاين على هاد الغوات .؟؟

ناديا:- معرفتيش اخالتي سعيدة ماشي هاد المقدم الشماتة ديال الحمة تعدا على جدي 

تا طيحو كومة مسكين مجاش يقدهالي انا مشا لعند راجل شيباني قليل صحة 

سعيدة:- واهادشي ميرضي تاشي واحد بصح كلشي بالعقل

ناديا(كتغوت):- مكانش العقل ... أهودلي هنا اهاداك راس الحنش 

مريم:- أنزل الخواف نزل قدهالنا هنا ماشي تحاما مورا بونسوان 

المقدم حمزة(خرج ملبالكو ديال دارو كيرجف):- اسمعي منك ليها راني غادي نعيط

لبوليس راكو كتهجمو على موظف حكومي وهادشي مخالف للقانون  

ناديا:-قانون هيهيه يابو قانون اهود هودلي هنايا الشفاية ديال الرجال نوريك

القانون كيف داير 

المقدم حمزة :- اجمعي فمك ولا نجي نهرسولك 

ناديا:- ونزل نزل نشوف كي غادير تهرسوووولي

مريم:- يصحابلك غادي نسكتو من بعد اللي درتو والله لابقاتها فيك ومزال تولي

ضحكة أنص بنادم (كان قصير هاد المقدم حمزة وضعيييف) 

سعيدة:- ابناتي الله يهديكم اش بغيتو بيه راه مكيسواش 

  المقدم حمزة(نزل هاز عصا وزعما لاعبها مخايفش):- راه كلشي قانوني واه تخرجو

من سطح ديال العمارة رشقتلي بغيت نديرو جردة هاكدة كالي راسي 

مريم:- كي كالت الواليدة الله يجعلو قبر يتلم عليك

المقدم حمزة:- اعوذ بالله اتفوو على بشر والله حتى تخرجوها من داك السطح

بيا ولا بيكم ونديرو جردة نتفجج فيه ونجري عليكم للزنقة 

ناديا(معصبة):- مريم بالاكي لهيه

مريم:- هانا ألالة 

ناديا(شدت حمزة من قمجة وبقات تهدر وهي كتمخض فيه):- ونتا أجي نوريك كيفاش

تحلف علينا واجي نوريك جدي اللي طيحو كومة واجي نوريك الجردة اللي غاديرها

اسي حمزة وأجي نوريك كيفاش غادي تجري علينا وتفجج ... 

ناديا ضربت براسها راس المقدم حمزة طيحاتو كاو وتلامو كاع الناس بقاو يكولوها

الله يرضي عليك الله يخليك بردتيلنا فيه الجنون... 

  طلعت ناديا هيا ومريم ميتين بالضحك على الموقف اللي وقع لتحت وكذلك باش يرتاحو شوية ويرجعو للسبيطار يجيب السي عيسى محيت كان فات 3 ايام وهو بالمستشفى

وكان غادي يخرج فداك اليوم بعدا 

ناديا:- هههههه شتي شتي كي جاو هزوه سخفان مسيكين لدارو 

مريم:- وناري نتي خطيرة راك دوختيه براسك هههههه

ناديا:- أنا كنت حالفة حتى نخليه يفقد الذاكرة ونتمنى يكون فقدها هههه

مريم:- على الله احبيبتي راني فرحانة اليوم غادي يخرج جدي عيسى ويرتاح فدار

ناديا:- واه تانا راني طايرة بالفرحة الحمد لله على سلامتو 

شردت ناديا وبقات تفكر انه من بعد اربعة ايام مغاديش تشوفهم وغادي تشد طريق

نحو المجهول ماعارفاش فين غادي يوصلها او شنو مخبيلها 

رجع السي عيسى وعزيزة للدار واجتامعو كلهم فغرفة وحدة 

 عزيزة:- إيوا خلعتنا عليك السي عيسى واش بغيت تجرب غلاوتك عندنا ولا ههه

السي عيسى(متأسف) :- اسمحولي عذبتكم معايا وخلعتكم تت

ناديا:- متكولش هاكدة اجدي راه غير نتا اللي عندنا 

السي عيسى:- لوكان نموت ونريحكم من مشاكلي احسن

ناديا(باست يد جدها):- ششتتتت متكولش هاكدة اجدي انا نفديك بروحي ونتا ميصرالك والو

مريم(بغات تلطف الجو):- وغير سكت اجدي ماشي ناديا ليوم لعبت ماتش 

عزيزة :- كيفاش؟؟

مريم:- واااه لعبت ماتش بالمقدم حمزة ههههههه ضرباتو براس طاح كاو ودرنالو واحد

التبهديلة تاعلة فاركة فالحومة باش عمرو ميعاود يقرب لعندنا

السي عيسى:- هاداك مولا مشاكل وكان غير خليتوه فالتيقار

ناديا:- كنت حالفة تاندمو والحمد لله درتلو ماتش اعتزال ميعاودش يلعب مرة اخرى هههه

 عزيزة:- هه الله يخليكم ديما ضاحكين البنات

السي عيسى:- بصح مكلتوليش مين ضبرتو فلوس العملية ؟؟

سكتو كاملين وبقاو يشوفو فناديا اللي بتالعت ريقها وجمعت ضحكتها وشافت فجدها

ناديا:- ربي سهل اجدي وضبرتهم مهم درت العملية وكلشي فات مزيان

السي عيسى:- الحمد لله ابنتي

عزيزة شافت فمريم ومريم شافت فنادياا وناديا بقات تشوف فجدها

وتبتسم باش تبعد من نظرات التساؤلات اللي فعينيهم واللي ملقاولهاش اجوبة للآن 

نعس السي عيسى وعزيزة فغرفتها وحتى مريم مشات تنعس الا ناديا

اللي ناضت بقات كالسة فالمنضدة كتشوف فالنجوم وكتفكر 

احتارت بزاف ووخا هيا مكاتخاف تامشي حاجة لكن هاد المرة خافت على جدها

توقعلو شي حاجة الى مشا حتى تآذات او عرف شنو كدير أفكار كتيرة شوشو

عقل ناديا وخلاوها كل مرة تمسح وجهها بيديها باش تطرد هاد الافكار

وهي تشوفها مريم وتجي لعندها 

مريم:- نقدر نكلس؟؟

ناديا:- كلسي واه عاد تسوليني 

مريم:- انا مغاديش نسولك لانني عارفاك مغاديش تجاوبيني 

ناديا:- وغير جربي نشوفو

مريم:- مالكي؟

ناديا:- مالني ... هه ومالني هو اللي راه مغير حالي 

مريم:- راني نشوف فيك كاع متغيرة بصح معرفتش اش بيك

ناديا:- مريم 

مريم:- نعام اناديا 

ناديا(جات تهدر وولات سكتت):- آ... تتت

مريم:- مصحابليش انه تعلمتي تخبي على مريمتك اناديا ..

مهم بلاما نديرونجيك تصبحي على خير 

ناديا:- اجي هنا ...كلسي

مريم:- هانا

ناديا:- انا غادي نسافر

مريم(مخلوعة):- كيفاش ؟؟ فين؟؟ وامتا؟؟ ومعامن تشاورتي؟؟

ناديا:- شتتت هدري بشوية راهم ناعسين 

مريم:- وشرحيلي كيفاش غاتسافري؟؟

ناديا:- غادي نسافر معا واحد مول لفيرمة 

مريم:- مول آش؟؟؟ تتت نتي مبقيت فاهمة فيك والو انا

ناديا:- عندي 4 ايام ونسافر 

مريم:- وجدك وانا وماما فكرتي فينا ولا مفكرتيش؟؟

ناديا:- فكرت فكرت وهادا اللي مأرقني ومطير النعاس من عيني نتوما امريم

مريم:- صافي اناديا خليني عليك انا غادية نعس الواضح انك قررتي

ونتي موراك شي قصة غير الله يستر وصافي 

مشات مريم وهيا زعفانة وخلات ناديا فحيرتها وتساؤلاتها وكيفاش

دير تخبر جدها وعزيزة وكيفاش اصلا غاتقدر تخليهم 

 غدا ليه فاقت مريم مكتشوفش فناديا ومشات لخدمتها وناديا بقات مقابلة جدها

وكانت تعطيه الدوا واحد شوية وهيا تخرج وخلاتو معا عزيزة ومشات لفين كتخدم مريم 

ناصر:- ناديا عاش من شافك 

ناديا:- أهلا ناصر 

ناصر:- الحمد لله على سلامة قاتلي مريم انك خرجتي من الحبس هادي مدة الله

يجعلها اخر الاحزان

ناديا:- امين امين بغيت نشوف مريم 

ناصر:- وزيدي دخلي تشربي شي حاجة على حساب المحل غير زيدي

ناديا:- نن معليش معليش مرة اخرى

ناصر:- أزيدي زيدي واش نتي راكي تجي عندنا كل يوم 

ناديا:- اممم وخا ربي يخليك 

ناصر:- كلسي آنا غانكلملك صاحبتك ونخليك معاها 

مريم... مريم..

مريم(كانت خارجة مبتسمة غير شافت ناديا وهي تعبس):- نعام اس.... ناديا؟؟

يتبع..