الما الزهر كايترش على الضيوف لي جالسات فالصالون لابسات و مصايبات كايشوفو فالعروسة كاتحني و الطرب الأندلسي مطلوق و المديح فالرسول صلى اللّٰه عليه و سلم حاضر حتى هو، سالات النقاشة للعروسة و حتال لبنات لي جالسات حداها كايتسناو نوبتهوم، دارت لينا صبيع فيديه بجوج و جلسات كاتنش باش تخفف عليها عليها حريق الدوليو
سمر:(ضورات وجهها و رجعات شافت فيها) واخا اجي معايا لجردة نجلسو تما بغيت نمزكمل واحد الرواية ديجا بديت فيها و منها نيت نبعد على الصداع ماعرفتش كيفاش هاد الناس صابرين فهاد الصداع اوففف
ناضت كاتسوط و تخاصم حيتاش سمر شخصية مهدنة عزيز عليها الكالم و التأمل و الخضورية و الطبيعة ماعندهاش مع الهراج و الصداع ، مشات لجردة جلسات فأرجوحة كبيرة مشبكة من لبخلف باش تتكا داروها الدراي تما، جبدات تيلي ديالها و جبدات الرواية و بدات كاتقرا و لينا مادا ليها يديها كاتسوط عليهوم و كاتقرا ، فهاد الأثناء شافهوم يونس و جا لعندهوم و جلس حدا سمر، شافتو لينا و قلبات وجهها ماحملاتوش
يونس: اش كاتقراي
سمر:(شافت فيه) كبرياء و هوى pride and prejudice
يونس: اه ديال جين اوستين
سمر:(بلهفة) قاري مؤلفاتها !!!
يونس: وي (متكي يدو على لحاشية ديال الأرجوحة) قاري ديال "عقل و عاطفة" و "إيما" و "متنزه مانسفيلد" و "إقناع" و لكن لي كاتعجبني بزاااف هي ديال " كبرياء و هوى"
سمر: علاااش!!!
يونس: حيتاش فالأول إليزابيث ماكانتش كاتحمل فالأول مستر دارسي و فالتالي ولات كاتبغيه و تزوجات بيه واخا هو من لول كان باغيها (تنهد)
سمر:حرام عليك حرقتي عليا الأحداث
يونس: فين واصلة نتي !
سمر: فاش هربات ختها
يونس: مستر دارسي هو لي غادي يلقاها و يجييها لمهم مانحرقش عليك الأحداث زوينة بزاف
سمر: مابايناش فيك بلي كاتبغي تقرا
يونس: اوا ضاروري ينادم يثقف راسو شوية و يقرا واخا كتاب ولا رواية اي حاجة لي دخلات لراس راه مزيانة
سمر: تنصحني نقرا شي حاجة وحداخرا !
يونس: خليك دابا غير مع جين اوستين حتى تكمليهوم و نقوليك اش تقراي
سمر: وا غدا لعرس و من بعد غانمشيو فين غانتشاوفو تاني
يونس:(بإبتسامة) غادي نتشاوفو مازال الفنيكيشة
لينا:( بعصبية) واش ماغاديش تبردي ليا على يدي نبرد راسي ولا شنوو
يونس: كاتحرقك الحناء !!
لينا:(قلبات وجهها) الصمت
يونس: نسوط ليك على يديك
لينا: الصمممت
سمر: (نغزاتها) حشومة الراجل كايهضر معاك و نتي منخلاه
لينا: ديها فماماك ا لبرهوشة
سمر: وا حشومة السيد بغا يدير فيك غير خير
لينا: خليتك معاه يخخخخ ماتنفعي ماتضري
ناضت لينا زعفانة و خلاتهوم جالسين متبعينها بعينيهوم
يونس: (تنهد) وايني على عيشورية
سمر: واخا هاكداك ضريفة اوا قوليا من ايمتا و عينك فيها
يونس: (بصدمة) هاااا !? لا غير غير كاتخربقي ا بنتي
سمر: هههههه من نهار جيت و انا كانشوفك غير تابعها بعينيك و ساهي فيها بحال لهبيل و ريوgك سايلين الشوفة فيك كاتجيب ليا الضحكة ، اوا قول ديرني كيف ختك
يونس: (تنهد) اوا اش غانقولك من نهار ضحكات ليا باقي عاقل كانت فالشرجم و انا برا كانهضر فتيلي شفتها و ضحكات ليا من ديك ساعة و انا طايح و عاد باش ما كانزيد نغرق
سمر: شخصية لينا صعيبة يعني غاتوحل معاها هي حنينة و ضريفة و لكن عيشورية فنفس لوقت و لسانها ماضي بحال جنوي و ماكاتيقش بسهولة يعني داكشي ديال الحب و الغرام ماكاتيقوش و هادشي راجع على لمحيط فاش كبرات شافت ا دراري كايتفلاو على بنات و بنات كايبكيو بسباب هادشي الوغ مابغاتش تجرب هادشي و رافضاه رفض قطعي
يونس: همممممم ماتخافيش غادي نخليها تيق فيا
سمر: عجبتيني نتا و كانضن بلي غادي تجيو مواتيين
يونس: الله يخليك ليا اخت حبيبتي (باسها فراسها)
طاح الظلام و تحط لعشا لعيالات كلاو و عمرو كرشهوم و جلسو مجمعات حيتاش حتى هوما بايتين فالفيلا، طلعات رانيا لبيتها معاها مها و خديجة ضارين بيها و اللاجال مجموعين بوحدهوم محمد علي و سي عزيز (أب لينا) و سي حمد (اب أمين) و حسن و رجال وحداخرين ضيوف اما الشباب فمجموعين فالجردة مفرشين تما دايرين جليسة زوينة تحت ضوء القمر و النجوم اللامعة
لينا: طلقو لينا شوية ديال لموسيقا نحيحو شوية
أمين: اش بغيتي تسمعي
لينا: شعبي ستايل هييييييي سيكسي ليدي
أمين: هوب هوب هوب هوبا شعبي ستايل هههههههه
قلب أمين عليها و جبدها "الشعبي ستايل" هي اغنية ديال pساي ديال gانgام ستايل حولوها لشعبي المغربي و دارو كلمات مغربية، تطلقات لموسيقة و بداو كايغنيو معاها و ناضت لينا باقة بقفطانها كاتشطح و ناض معاها أمين حتى هو كايشطح و معاذ و هند ناشطين بيناتهوم ام يونس و أيوب(ولد اخت راوية) و سمر و بنات عمام رانيا جالسين كايشوفو فيهوم و يضحكو ، فوسط هادو كان رجل ثلاثيني العمر هادئ وجهو طويل داير لحية خفيفة مقادة عينيه لوزيتان حجبانو كحلين و غلاض و شعر كحل كتير رطب شفافو غوز رطبين فوق منهوم موسطاش مقاد نيفو متوسط الحجم لونو حنطي طويل و مفورمي نوعا ما لابس سروال جينز مع قميجة بيضة حال ليها صدافي لفوقانيين لابس سنسلة رقيقة من النقرة و فيديه ساعة كحلة من كارتييه ، متبع لينا بعينيه اللوزيتان و مرسومة على وجهو ابتسامة خفيفة و هو كايشوفها كاتشطح مع خوتها ناشطة
لينا: وليت ننعس كل يوم بسباطي قلبي و عقلي لاعبيين الكراطي اي يا مااا دات راحت لبال و دات لي ناشاطي
أمين: و الله مانساتيني ناري صدما ا ا ا تنيييييي
معاذ: هوبا الشعبي ستايل
لينا: هيييييييي سيكسي لايدي
كايشطحو شطيح لا علاقة و لي يشهوفهوم يموت فيهوم بالضحك حمق على خوه تجمعو حركات لا علاقة، كملات الأغنية و وقفو كايضحكو كايشوفو فبعضياتهوم كاينهجو
أمين: اوفففف سخفت ههههههه اش تسمعي تاني
لينا: اي لوف يو ديال يونس مول الشاطو
أمين: او على خرج ديسك جديد
لينا: وايييه خرج ديسك الكمالة ديال هادا ديال مول الشاطو فالتالي كاتخلي داك لي بوطو لعاقة و كاتجي عند لبوفري راه كاين فأنغامي طلقو راه زوين
هز تيلي ديالو و طلقو و لينا متبعة معاه كاشتطح
لينا: موطور 103 ديريكسيون لاكوط شعرك طاير فالسما ما شيري و نضربو لاغوت ، غير صبري يا لكبيدة نشري ليك لوطو جديدة و لي بغيتيه ديه ايسونس ولا مازوط ، نبغيك ديري نية يا اوكان دوت ، صفيت كاع لي عليا بقا غير كارني دمول لحانوت سييي توو
الرجل:(فأذن أمين) هضرتي معاها !
أمين: لا مازال هضرت مع خوها و قاليا بلي زعما الفرق ديال لااج كبير شوية ا منعم
منعم: غادي نحطها فوق راسي و الله ماتحس بفرق السن راك عارفني ا أمين
أمين: نهضر معاها و نرد عليك
منعم: الله يخليك سربي راه طيرات ليا عقلي خفت يطيروها ليا
أمين: (تنهد) يكون خير
لينا: (مع معاذ) نوش شطح شوية
معاذ: عييييت
لينا:(قدام معاذ كاتشطح و تغني و كاتلعب بيديها) ايلا تبغيني tell me i love you ، tell me i love you قولي لي راني نبغيك.... الا تبغيني ماديريليش هاكدا و قولي ليا راني نبغييييك
بقات كاتمايل بكل أنوثة قدام خوها و الضحكة واصلة ليها حتال لودن و يونس متبعها بعينيه هايم
شبعات شطيح و رديح و اخيرا شدات الأرض حدا خوها و لبنات كايتغامزو عليها، قلبوها جماعة كل جوج فين شادين الحتيت... لحق منتصف الليل و ناضو لي يغا ينعس مشا نعس ولا بغا ياكل ناض ياكل، بقات فالجردة لينا و منعم و يونس و سمر و هند، استغل منعم الفرصة و جا جلس حداها
منعم:السلام لينا
لينا: و عليكم السلام (بتعبير تساؤلي) كاتعرفني
منعم: وي فايتلي شفتك شحال هادي و بقيت عاقل عليك
لينا: واايلي
منعم: و الله صافا بعدا
لينا: بيخير الحمد لله
منعم: داكشي لي بغينا ، جا معاك لبلدي
لينا:(طلعات حاجب هبطات حاجب) شنو بغيتي تدخلني بواتاك البلدي ا زيين و ديك الحموضة ديال والو يخخخخ على زماكور
منعم: لا ماتفهمينيش ا ختي غلط
لينا:(يديها على جنابها) الله يخوي ليك الجناب نوض مشي مشي بقيتي ليا غير نتا
منعم: ا تسناي راه غرضي شريف ا انسة
لينا: ماكانعرف لا شريف لا عطيف و ماشي انسة مزوجة و حاملة بالتوام باكما نوريك
منعم:(طلع حواجبو) وا غير تسناي ا لينا نشرح ليك
بقا يونس جالس كايشوف و فالداخل ديالو بركان على وشك الإنفجار كايسوط و يدوز يديه على راسو باش يكالمي راسو ساعة والو ماعجبوش لحال يجي منعم يهضر معاها ولا حتى يتقرب منها ماصدق تهنا من خالو و خرج ليه وحداخور من الجنب و هادا اصغر من خالو ب 10 سنين و وسيم خدام مزيان مهلي فراسو ، ناض باش يتدخل لقاها شاعلة كاتخاصم على منعم ، بغا يتقدم باش يعطيه علاش كايقلب و جراتو سمر
سمر: خليك الى مشيتي غاتخلطكوم بجوج راه قاجة بشغلها
يونس:(جلس حدا سمر) شكون هاداك !!! و علاش كايتغاوتو
سمر:(سدات كتاب كانت كاتقرا فيه) هاداك صاحب أمين على لي سمعت عينو فلينا و باغيها لزواج اصلا شحال من واحد كايجي يبغي يخطب و كاتجري عليه ماشي شي حاجة جديدة ولفنا هادشي
يونس: كيفاااش !! واش تهنيت من واحد خرج ليا لوخر اوففففف
سمر: ماتخافش هاداك غير مونيكة دغيا غاتكركبو تسنا شوية و غاتفرج فيه.
لينا: واك واك ا عباد الله واتاقولي منين كاتفهم واش من خرزتك ارا نهضر فيها باش تفهم وا عطيني بالتيساع ا سفود العواشر
منعم: غير تسناي يجي أمين و يشرح ليك
لينا: دابا غير قوليا واش ماعندك كرامة من الصباح و انا نصبن فيك ولا نتا بغيتي تفهم ترمتك
منعم: أستغفر اللّٰه نعلي الشيطان انا صاحب أمين خدام فالبنكة عجبتيني و بغيتك لزواج
لينا: (بغباء) شكووون !!!
هند: داك لي 😂😂😂
لينا: خلاه فيك مدلي اوا سدي تقبتك حتى نتي لانجي نفرعك حسابي مع أمين هو لخر ولا كايجيب الزلالة معاه ماكاتحشم ماترمش وا شوف فيا بغيت ليك العما يخخخ على زماكور كيداير جيل القيمش مايحشم مايريمش
خرجات خلاتو واقف مصدوم معارف مايسبق ولا يوخر ماتوقعش هاد ردة الفعل ديالها و مافهمش علاش دارت هاكداك اما هي ففهماتو غلط كيصحاب ليها باغي يتفلا عليها كان مجرد سوء تفاهم ، بقا يونس جالس مصدوم فيها و فلسانها لي ماضي
سمر: اش قلت ليك دابا كون نضتي كون خلطاتك معاه
يونس: وايييه عند الصح صراحة هي قادة بشغلها
سمر: مالكوم بعدا علاش مخاصميين
يونس: سبات لواليدة و طرشتها
سمر: قفرتيها اوليدي ماغاديش تنساها ليك بمرة
يونس: وا عاونيني اش ندير و الله الا ندمت ماعمرني نهز باقي يدي عليها اصلا انا ماكانقدرش نضرب العيالات حيتاش قوتهوم ماشي من قوتي غير هي ستافزاتني بهضرتها و سبات لواليدة قدامي غانكون شماتة الا خليتها تسبها و مادرت والو فلحظة غضب هزيت يدي عليها
سمر: دابا غاتكون معصبة و غاتبغي شي حاجة حلوة بانت ليا حلوة دياال لاكريم فالكوزينة ديها ليها و حاول تقول شي حاجة تضحكها
يونس: زعما زعما
سمر: انا قلت لي عند (حلات لكتاب) اصلا داكشي شغلكوم و انا مازال صغيرة
يونس: ربي ماقولي ليا شحال فعمرك
سمر: عندي 15
يونس: عقلك كبر من عمرك كاتهضري بحال شي وحدة كبيرة
سمر: تهلا فختي و هنينا و عنداك يحصلك معاذ و الله مايعقل عليك
يونس: اخرتي مازال غاتكون على يد خوك ولا على يد أمين
ناض من بلاصتو مشا نيشان للكوزينة حل تلاجة بشوية لقا حلوة ديال لاكريم هز جوج وحدة شوكولا و وحدة كراميل و خباهوم و خرج لقا الناس نعسو ، بقا كايقلب عليها بشوية بلا مايدير لحس مالقاهاش فالفيلا بقات ليه بلاصة وحدة، خرج برا لقا السكاااات و البرد خفيف جو زوين و البدر مكتمل مضوي الشاريع، طل فالشاريع مالقاهاش و مشا للزنيقة لي كان ديجا فيها هو و جات عندو، طل و لقاها جالسة جامعة جلايلها هازاهوم و رجليها كايبانو بيضين بلقين ، دار ابتسامة جميلة على وجهو و تقدم عندها، هزات راسها شافتو و قلبات وجهها بغضب، جلس حداها كايشوف فيها و قال
يونس: شوفي شنو جبت ليك ختاري اينا وحدة بغيتي شوكولا ولا كراميل !
شافت فيه بنص عين و بانو ليها جوج حلاوي ديال لاكريم ، ت فخاطرها تشهاتهوم و لكن دايرة فيها عزة نفسي مابتسمحليييش
يونس: وا هاكي ختاري (حطهوم قدامها)ماتهضريش كاع الا بغيتي غير هزي وحدة لاتبان فوجهك
بعد صراع مع نفسها هزات ديال لكراميل و قلبات وجهها كاتاكل فيها و كاتبنن
يونس: انا ماعندي لا شاطو لا باطو و سميتي يونس شخضتيها قبيلة غنا نعام ا سي و الشطيح حتا هو (كاياكل) غني ليا شوية ديك ديال مول الشاطو
ماشافتش فيه و بقات قالبة وجهها و قلبها كايضرب بجهد بزز باش متحكمة فراسها
يونس: هاد الوقت لي دوزت هنا و معاك ماعمرني ننساه فحياتي
لينا: الصمممت
يونس: معاك تعرفت على مصطلح جديد ماعمرني ننساه ياهاد الزماكورة الشيطانة ديالي مولات المصايب الكحلة و الزبايل و المشاكيل و الأكار الجهنمية ، اجي بعدا اش كنتي باغة تديري بداك العضو الإصطناعي
لينا: الصمممممت 😳
يونس: ساكتة همم كنتي باغة تغتاصبيني بيه هههههههه احياني عليك يا سليعفانة و عاد زيدي عليها ريحة الخرا فالصندالة انا لمك وليت ريحة الخرا فالصندالة
خرجات لينا عينيها فاش سمعات هضرتو و جاتها الضحكة حبساتها بزز و الإبتسامة ضهرات على وجهها
يونس: اوا بتاسمي لينا من الصباح ا الشيطانة ديالي تصبحي على خير ا الشيطانة ديالي
اصبح الصباح على مدينة إيفران و اشرقت الشمس محملة بعدة أحداث.
فاقو اهل الدار و بداو فالتحضيرات للعرس ، خرجو الضياف باش يتساراو فالمدينة و بقاو الناس لي مكلفين كايحضرو اللازم و لينا معاهوم كاتعاون و معاذ حتى هو و حتى يونس داير يديه، خرجات لينا من لبيت لابسة سروال ديال لبيجامة واسع شوية فالبنفسجي مع لفوق ديالو هابطة مستورة فنفس اللون و جامعة شعرها على شكل كعكة مهملة و فرجليها كلاكيطة كحلة هازة فيديها بلاطو ديال لحلوى دخلاتو للبيت حطاتو تما و تبعها يونس هاز جوج بلاطوات ، شافها و بتاسم ليها اما هي قلبات وجهها و حولات عينيها و خرجات من لبيت رجعات لكوزينة
لينا: باقة شي حاجة !!
السعدية: هزي دوك لكراطن هبطيهوم لتحت
يونس: نعاونك!
السعدية: اه اولدي عاونها عافاك راه مفافية غير بوحدها
لينا: ماما 😡
السعدية: الغمة
هزات كرطونة كبيرة تقيلة و حيدها ليها يونس
يونس: (بصوت خافت) راه تقيلة عليك ا شيويطينة ديالي
حولات عينيها كتعبير على انه ماسوقوش ، مالقا مايدير و هي راسها اقصح من الحجرة، لقا حل وسط هزها معاها هو شد قنت و هي قنت و بالعاني حط يدو فوق يديها و تبتها ماخلاهاش تحيدها
لينا: حيد يديك 😡😡
يونس: الا حيدتها غادي تطيح لكرطونة
لينا: وا تطيح غير حيدها 😡😡
يونس: لااااااءح (غمزها و سيفط قبلة فالهواء)
ساطت من نيفها و قلبات وجهها لجنب كاتشوف حيتاش هابطين مع الدروج دايرة بالها لاتطيح حتى كملو الدروج و هضرة يونس ماكاتقداش كل مرة يلوح ليها كلمة غزل كاتخليها حشمانة و لكن ماكاتبينش هادا هو طبعها كاتخبي اي حاجة غاتبين ضعفها. حطو الكرطونة فالجردة و وقفات مقادة حتى سمعات صوت الترطيق فضهرها جاتها تقيلة و مابغاتش تبين ليونس
يونس: تقيلة ياك احح ا ضهري تقسم عليا
ماسوقاتش ليه و مشات و خلاتو ، مارضاتش لبال لgلتة ديال لما و غادة مدرمة كيف البقرة مقدمة الصدر و موخرة الترمة غاجية بكل ثقة حتى دازت فديك الgلتة و مع الكلاكيطة كاتزلق لعبو بيها رجليها و تهزات عرفات راسها غادي طيح على وجهها و تاكلها فعضامها تاني، غمضات عينيها كاتتسنا تجي على وجهها و لكن حسات بيد لتاقطاتها و هي علاين تقيس الأرض، تلاحت بين ذراعو و عينيها باقيين مغمضين و يديه مضورين عليها
يونس: عندك الزهر جريتك اما كون مشات ليك l'écran و ليوما لعرس هههههه (دوز يديه على شعرها) لينا مالك ساقلة !
خرجات راسها من صدرو بعيون خائفة و بدات كاتشوف فيه ببرائة
بقا مبتاسم و يديه ضارين عليها شادينها باش ماتهربش، وقفات على صباع رجليها حيتاش واخا طويلة ماواصلاش ليه هو اطول منها، حطات يديها على وجهو باش تفيكسيه و قربات من وجهو حتى حس بأنفاسها كايضرب فخدو و دار ابتسامة شر عرفها قريبة تبوسو و قلب وجهو بسرعة عطاها شفافو ماحس غير بعضة قاصحة جاتو فالشفة السفلية، حل عينيه بالصدمة و كاتم الغوتة فالداخل ديالوخرج عينيه فيها و شافها و هي كاتضحك حتى كايتسدو عينيها و كاترجع بلور بالضحك و ترجع تشوفو و تضحك تاني من قلبها، حيد يديه من عليها و بدا كايتحسس فمو اما هي غير طلقها طلقات رجليها لريح كاتضحك عليه
حس فشفتو كاتضرو كيف لا وهو واخد عضة قاصحة ، بقا كايدوز لسانو عليها كايحاول يبردها و عقلو طايح مع الضحيكة لي خلات فبالو السنينات بيضين مستفين و العوينات مسدودين و الفم حميمر كايشهي فالبوسة، زادت غرقاتو كتر فيها، تنهد و عينيه شبه مسدودين و ابتسامة على وجهو، دار يديه فالجيب و رجع لوسط الفيلا عاونهوم ... داز لوقت و بدا كايطيح الظلام، تقادت العروسة و لبسات و الجوق خدام و لعندها شي لبسة جبداتها و لي عندها شي ذهب بيناتو، كانت لينا مخشية فبيتها مع امها و هند و سمر وخديجة كل واحدة فيهوم لابسة و مقادة لينا لابسة تكشيطة فالغوز فاتح مرصعة بالأحجار فالألوان واسعة من لتحت بحال لي غوب و طويلة مجرجرة و من الفوق لاصقة عليها مبينة فومتها من لفوق مفصبة خصرها لمنحوت و صدرها الممتلئ ، ضهرها عريان و ناولة بالصفيق تال لتحت و فيها فتحة تال الركبة ، و صباط اسود مرصع بالأحجار لي فالتكشيطة و شعرها طلقاتو على راحتو فارقاه من النص و دايرة مكياج خفيف ، شافت لااسها فالمرايا عجبها لحال و عجبها راسها اما السعدية فلبسات تكشيطة فالأخضر ملكي مع فولارها و مضمة فضية و صباط اسود ماعاليش بزاف دارت غير كحل و عكر خفيف و خديجة لبسات تكشيطة فالأسود و الذهبي مع مضمة ذهبية و صباط طالون ذهبي و مكياج خفيف و زيف ديال التكشيطة اما هند فلبسات تكشيطة بلا كمام مشبكة فالأحمر مطروزة بالأسود مع مضمة و صباط اسود عالي دارت مشيطة لشعرها خلات جوج خصلات خارجين دارت مكياج سموكي برز ملامحها اكثر اما سمر فلبسات تكشيطة فالفضي مطروزة بالكحل مع مضمة فضية و صباط كحل سامبل و شعرها طالقاه دارو ليها مكياج خفيفكملو التحضياتر و خرجات لينا هي لولا بكل ثقة فالنفس هازة جلايلها بكل أنوثة و هبطات لتحت لقات سي عزيز لابس جلابة صفراء مع بلغتها و جالس مع سي احمد لي لابس جلابة بيضاء كايشربو عصير كايضحكو
مشات لينا كاتضحك طلعات لفوق لبيت لعروسة دقات و دخلات لقاتها جالسة كاتدير ليها لكوافورة اللمسات الأخيرة و النكافة واقفة و راوية كاتشوف فبنتها لابسة تكشيطة فالأزرق ملكي بمضمة فضية و صباط فضي دايرة ليها فولار و مكياج خفيف بزاااف بانو ملامحها الأمازيغية اما العروسة فبداو ليها بتكشيطة فالأحمر جاتها واعرة مع مشيطة زوينة و مكياج طلعها خطيرة و الحناء صبغات فيديها و طلعات زوينة ، شافت فالعروسة بإعجاب و ضورات وجهها بان ليها يونس لابس كومبلي فالبلو مارين مع قميجة بيضة و صباط اسود كايلمع و مرجع شعرو لور و ريحتو عاطية و وجهو مابقاوش كايبانو فيه الضرابس جا وسيم بكل المقاييس ضورات وجهها بسرعة باش ماتبينش اعجابها بيه لي اصلا كاتحاول ترفضو اما هو فغير دخلات للغرفة تسحر بيها و بجمالها، بقا حال فمو فيها و طلعها و هبطها ماهي مرا ما هي جوج ... دخل أمين للغرفة لابس كومبلي أسود و قميجة سوداء داير بابيون فعنقو وجهو تنقا من الضرابي لي كانو فيه هو و يونس ، لابس صباط اسود مقمقم من لقدام و ماشط شعرو و ريحتو فايحة مجهدة و اىضحكة واصلة ليه حتال لودن. عاونات النكافة رانيا حتى ناضت و هزات راسها بخجل شافت فأمين لي مامصدقش بلي أخيرا وصلو لهاد المرحلة ماهي الا ساعات و غاتولي مراتو بالشرع و القانون ، قربات حداه حشمانة و تحت انظار الجميع هز ليها راسها و باسها فجبهتها، شاف فيها و ابتاسم ليها و حلو ليهوم لباب خشات يديها فيديه و خرجو و مساعدات النكافة من لور كايزغرتو و يصليو على النبي، تبعاتهوم راوية و بقات لينا كاتمشي بشوية و كاتشوف فيهوم فرحانة لأمين ، تبعها يونس و تمشا حداها و همس فودنها
يونس: تبارك الله ما شاء اللّٰه كلمة زوينة قليلة فحقك وا قرطاسة
لينا: الصممممت
يونس: وا ناري قلبي مسكين تزعزع من بلاصتو دوختيني و اللّٰه ماكرهتش نهزك نخشيك فصدري مايشوفك حد غيري
ضورات لينا وجهها خبات ضحكتها و حناكها تزنكو اما قلبها فغيطير بالفرحة، شدها من يديها و وقفها و شاف فيها بحب
يونس: انا يونس مابغيت لا شاطو لا باطو بغيت غير لينا تكون ديالي ماتقدريش تعطيها ليا
ضورات وجهها كاتمتل عليه الإنزعاج اما هي قريب تسخف بالفرحة لي مامعتارفاش بيها
يونس: سمحي ليا ا زين ديالي
قبل ماتلحق تسول على اش غاتسمح ليه حسات بشفافو تحطو فوق جبهتها باسها بوسة حنينة خلاتها تتفيكسة و تغمض عينيها عايشة اللحظة معاه، هبط بشوية و همس فودنيها
يونس: و الله ماكرهت نخبيك فصدري ماكرهتششششش ، نتلاقاو لتحت
بعد من حدا ودنها و دوز يديه على خدها بنعومة و هبط لتحت باش يحضر كأخ العروس
استوعبات لينا اش وقع حطات يديها على قلبها لقاتو كايزدح
لينا: يخخخ على فضيحة سير نقز عليه و قوليه راه جيتي زوين فرشة كيدايرة
نفضات هاد الأفكار من راسها و هبطات لتحت حناكها مزنكين، دايرين البرزة فالوسعة لي فالفيلا لتحت و دايرين الطوابل كل 10 فطبلة و منصة دايرين فيها الجوق و المصوريين خدامين كايضورو و يصورو كلشي، وقفات لينا كاتشوف لقاتهوم مشاو كايتصورو مع العرسان هزات جلايلها و مشات دخلات وسط الزحام و تخشات حدا أمين
لينا: ربي ماحيدو خليوني نتصور مع العرسان ، نوضي اختي عافاك نتصور مع خويا و جي تصور حتا نتي نوضي نوضي
نوضات كولشي زربات عليهوم دغيا تصورات مع العرسان و ناضت كاتشطح مع العيالات حتى عيات و شدات كرسي جلسات فيه كاتنهج، هزات كاس ديال لعصير ديال لخوخ من الطبلة نزلات عليه دقة وحدة و بقات جالسة كاتسفق بيديها ناشطة ... بان ليها منعم واقف مع معاذ كايهضرو واحد اوسم من لوخر معاذ لابس كومبلي اسود و قميجة بيضة حال ليها صدافي الفوقانيين و مطلع شعرو لابس صباط اسود لامع و منعم لابس كومبلي رمادي مفتوح مع قميجة بيضة و صباط اسود جاتو اللبسة خطيرة كايبان متبت و مرزن حركاتو بالقياس و هضرتو كذلك عندو كاريزما و شخصية ، شافها معاذ و ابتاسم ليها و شير ليها باش تجي عندو، ناضت حادرة راسها هازة التكشيطة ... وقفات حدا خوها ماقادراش تطلع فمنعم العين
معاذ: اتعاذرتي من السيد !!
لينا:(بصوت خافت) لااا
منعم: ماشي موشكيل غير سوء فهم
معاذ: ليناااااااا
لينا:(هزات راسها حشمانة) سمليا على داكشي لي قلت لبارح فهمتك غلط حتى شرح ليا أمين عاد فهمت
منعم:(بإبتسامة) هانية ماشي موشيكل ماتديريش فبالك
معاذ: هاني جاي واحد الدقيقة
تسلت من حداهوم و خلاهوم واقفين بجوج باش يهضرو أكثر و يحيدو الإحراج لي طاغي عليهوم بجوج عجباتو شخصية منعم و مارفضش الطلب ديال منعم انه يهضر مع لينا فإطار محترم قدام كاع الناس ... حشم منعم و حك لحيتو و بدا كايحك راسو ، رضات ليه لينا لبال و بغباء قالت
لينا: واش فيك القمل
منعم:(طلع حواجبو) القمل ههههههه لاا هههههههههه
لينا: اوا ا خويا شفتك كاتحك كيبحال شي مقمل
منعم: لا ههههههه فاش كانتوتر كانحك
لينا: اوا ترخا معايا الله يخليك راه عرس هادا ماشي جنازة
منعم: واخا شحاجة وحداخرا
لينا: ماتبقاش غير رابطهوم ضحك شوية باش تطيح تيتيز
منعم:(تنهد) مابغيتهومش
لينا: و علاش !!
منعم: القلب عامر بوحدة (تنهد و هبط راسه)
لينا: اوا الله يكمل ليكوم بالخير
منعم: من فمك لربي
لينا: ناري لبارح اش درت ليك سمح ليا بزااف فهمتك غلط كيصحاب ليا كاتبسل عليا حتى مشيت عند أمين عاد قاليا بلي نتا صاحبو جاي هنايا لعرس
منعم: ماشي موشكيل مزيان بنادم يعطي القاصح و مايديرش التقة بسهولة انا لبارح ماعرفتش نوصل ليك لفكرة
مشات و خلاتو بوحدو توجهات للكوزينة باقة كاع ماوصلات ليها حسات بيد جراتها دخلاتها لبيت و كالاتها على لحيط، شعل الضو و شافت يونس عينيه خارجين و معصب لأقصى الحدود
يونس:(بعصبية) لينا ماتختابريش الغيرة ديالي حيتاش راها خاااااااايبة و بزااااااف اش موقفك مع داك الزمر
لينا: و نتا سوقك
يونس: (من تحت السنان) لينااااااااا قلت ليك ماتختابريهاش ولا دابا هاد العرس يتقلب سفاه على علاه
لينا: طلق مني اييي يدييي ماعندكش الحق كل شوية تبقا تجر فيا و تدخلني لبيت
يونس: عندي لحق و بااات الحق و لي عندو مايقول يجي دابا يوريني اش غايدير ... قولي ليا اش موقفك معاه
لينا:(بعصبية) قلت ليه يسمح ليا
يونس: علاش لي كايقول سمح ليا كايشدو الجماعة و التكركير
لينا: وا نتا مااااالك اصلا ... مزوج بيا ولا خاطبني
يونس: بغيتي نتزوج بيك ماعنديش موشكيل دابا نقولها لواليديك نتي ديالييي عرفتي شناهيا دياااااالييييي دوختي ليا دماغي و رونتيييه ولا كل شوية يفكر فيك شوية و غانتصطا مابقاش بزاف و تلقايني خارج لزنقا محيد حوايجي و كانقول لينا لينا ، الله يرضي عليك الا بغيتي العرس يدوز بيخير بعدي من حس الرجال (طلع ليها التكشيطة خبا لفرقة ديال صدرها) و هاد الصدر لاش كايطل و ضهرك عريان حتا هو وا نارييييييي (كايسوط بعصبية) اوووففففففف غادي نحمااااق ا عباد الله واش بغيتي تهبليني !!! الله يرضي عليك ا لينا ماسمعي الهضرة
يونس:(قلب وجهو ساط النفس بعصبية و رجع شاف فيها) واخا صافي
لينا: طلقني بغيت نمشي
يونس: واخا مي عيني راه عليك ماتجربيش تختابري غيرتي حيتاش خايبة و بزاااف
طلق منها خلاها خرجات داز شوية ديال لوقت عاد خرج حتى هو
مشات لبلاصة لعرس لقات العرسان طلعو باش يبدلو جلسات حدا السعدية كاتضور فعينيها متبتة خايفة لايصدق يونس مخصر ليهوم لعرس، بان ليها منعم جالس بوحدو فطبلة جيهة الرجال تلاقاو الأعين و ابتاسم ليها ، بادلاتو الإبتسامة و ضورات وجهها بسرعة متوترة في حين يونس كان حاضيهوم بجوج واقف مربع يديه و حجبانو معقودين و كايسوط، حس بيد تحطات على كتفو ضور وجهو لقاه محمد علي لابس كومبلي كحل مع قميجة شيبية جا أنيق و بعض من الشعر الأبيض فراسو زادو وقار و وسامة
محمد علي: مالك من الصباح و نتا عاقدهوم !!
يونس:(بنرفزة) والو والو
علي: واش كاتبغيها اولد ختي
يونس:(كايشوف فالفراغ) مازال ماوصلت لاموغ مي طايح فيها نيييت (تنهد)
علي: مافهمتش
يونس: لاموغ مايمكنش يكون فليلة و نهار هي كاتعجبني بزاف و داك الإعجاب زاد تطور فهاد جوج سيمانات لي دوزنا هنايا
علي: انا خويت ليك الساحة واخا بصح عجباتني و نويت ندوي مع باها
يونس: (مورك على الهضرة بعصبية) محمد علييييييييي
علي: هههههه واخا صافي صافي ماقلت والو
يونس: وادابا خرجتي نتا و بان وحداخور من الجنب
علي: ههههههههه حسن عوااانك اوا مانكدبوش هي الصراحة كاتفتن بالزين
يونس:(مغوبش) عارف راه هادشي لي محمقني انا ماغاديش نتهنا بمرة
علي: تزوج بيها و غطيها هههههه
يونس: غير جي و تزوج و لموشكيلة هي مابغاتش حتى تعتارف لراسها بلي كانعجبها
علي: و علاش
يونس: على لي قالت ليا ختها واخدة فكرة مسبقة على هادشي ديال لي غولاصيون غير تبرهيش و تفلية يعني خافت تتعلق بيا و نلعب عليها ديييس و نخليها
علي:(بصدمة) ماعمرها ماتصاحبات !!!!!
يونس: لااا
علي: شوف الا ماكنتيش غاتطير بيها خليني نديها انا لمهم هاهيا فالعائلة وا ناري واش باقية شي بنت ماتصحباتش ا يونس و الله الا دجاجة بكمونها يا ديها يا خليني نديها
يونس: وا انا فين و نتا فين بففففف
علي: ميت ليك نتا لحوت ماقادر على والو
يونس: وا تولف عليا بعدا و تيق فيا عاد نشوفو الزواج
علي: بقا تتسنا حتى يطيروها ليك
مشا محمد علي و خلا يونس واقف ساهي فيها كايفكر ... هبطات لعروسة لابسة لبيسة ديال الشلوح و أمين لابس جلابة صفراء مع طربوش و بلغة صفرة فرجليه، جلسو فالبرزة و بداو كايتصورو معاهوم الناس، ناضت لينا تزاحمات حتى نوضات كلشي و جلسات حدا أمين باش تتصور و بان ليها يونس جاي حتى هو جلس حدا ختو و شد سيلفي شافو كاملين فتيلي ديالو و ضرب سيلفي عاد تصورو بالكاميرا لوخرا، ناضت لينا بالزربة قبل مايشدها يونس تاني و مشات كاتشطح مع لبنات ناشطة ماشطة .... بقات رانيا كاتبدل كل شوية هابطة بلبسة و لينا كاتزاحم باش تتصور معاهوم فكل لبسة ، لحق وقت لعشا و جاو السرباية هزو الحلويات و المكسرات و العواصير لي كانو فوق الطبلة و فوقت واحد تحطات بسطيلة ديال الحوت كبييرة على حقها و طريقها، سماو الناس اللّٰه و طاحو فيها عميين بكترة لبنة لي فيها ، كملو الطبسيل بل لحسوه و تحط طبسيل ديال الدجاج محمر بالدغميرة ديالو مع الخبز و المونادا، كلاو فيه حتى عمرو كرشهوم و تبعو طبسيل ديال السفة بالسكر الكلاصي و الكوكاو مدقوق، كلاو غير من لفوق حيتاش شبعو من البسطيلة و الدجاج ، تحط طبسيل ديال الديسير بمختلف الأنواع و بداو كاياكلو حتى تجمعات الطبلة و رجعو لور منفوخين و شبعانين
جا العدول جلسو معاه عطاهوم سناو تحت انظار الجميع و اخيرا ولاو مزوجين بعد انتظار طويل ... بقا العرس خدام حتال الخمسة ديال الصباح و بنادم ماشبعش من الشطيح و الرديح الجوق منوضها و العرسان عياو بكترة التبدال، هبطات رانيا لابسة كسوة بيضة طويلة منفوخة من لتحت بحال اميرات ديزني و من لفوق لاصقة على صدرها و على كرشها عندها سميطات و معرية من لكتاف و صباط أبيض عالي زوين و تاج فوق راسها كمل ليها الطلة، هازة ورد فيديها و أمين حداها خاشي يديه فوسط يديها لابس لكومبلي ديالو و هابط فرحان، طفاو الضواوات و ضو واحد لي بقا تركز عليهوم بجوج و تطلقات أغنية حالة حب ديال إليسا، ضور يدو على خصرها و عطات لورد لنكافة و حطات يديها على عنقو و بداو كايشطحو بجوج هايمين فبعضياتهوم ماهضروش خلاو العيون تتواصل مع بعضها، لي يشوفهوم يعرفهوم شحاال كايبغيو بعضياتهوم غير من النضرات ديالهوم ... كملات الغنية و شعل الضو و سفق ليهوم الحضور و مشاو للبزرة تصورو معاهوم و لينا كيف العادة مزاحمة واخا فيها الموت ديال النعاس الا انها مابغاتش تفلت عرس خوها ، تصورات و رجعات لبلاصتها مابقاتش كاتنوض خايفة يتحط عليها يونس من شي قنت و يتصدق مشري ليها موشكيل و باها كاين و خوها كذلك، ناضت رانيا باش ترمي لبوكيه ديال الورد ، تجمعو موراها لبنات إلا لينا لي بقات جالسة حتى جرها أمين بزز منها وقفها مع لبنات، حدرات راسها كاع مامسوقة و كاتسنا ايمتا يتحط فاليد ديال شي وحدة باش تمشي تجلس ، لاحتو رانيا عالي و ماجا غير فيد لينا لي كاع مامسوقة ليه، هزات راسها متفاجئة كاتشوف فالبنات و كاتشوف فالبوكيه، قلبوها ضحك بسرعة و حتى هي ضحكات بدات كاتبان ضرسة العقل و يونس متبع معاها كايشوف فيها
أمين: اوا عقبا ليك ههههه
لينا: لا لا مابغيتش هههههه
أمين: ضاروري ا زين بغيتي ولا كرهتي .... انا غانمشي نبدل باش (قرب من ودنها) باش ناكل الحلوة
لينا: هههههههه ماكاتحشمش لمك
طلع يونس و معاه مراتو باش يبدلو حوايجهوم و يمشيو لوطيل مابغاوش يدخلو بديك كسوة العرس و لكومبلي. رجعات لينا لبلاصتها كاتسناهوم يهبطو باش يودعهوم و هي تنغزها ختها
ناضت كاتنكر مضاربة مع دبان وجهها طلعات لفوق هازة جلايلها و تخاصم، دخلا لبيت شعلات ضور و بدات كاتقلب على تيلي حتى سمعات لباب تحل ضارت لقاتو يونس دخل و سد لباب
لينا: لاش جاي هنايا
يونس: جاي عندك
لينا: خرج برا ا يونس ماقادا على صداع
يونس: ماتخافيش مشغولين حد مامسوق ليك
طفا الضو و شوية ديال الضو من القمر داخل من الشرجم واخا هاكداك الرؤية ماواضحاش، مشا يونس شعل الضو ديال لفايوز و قرب منها اما هي تيبسات فبلاصتها مخلوعة منو و حتى الا غوتات ماغايسمعها حد بسباب الجوق ، وقف حداها و شد ليها يديها شبكها مع يدو و حط يدو على الذقن ديالها و هز ليها وجهها شاف فعينيها الخضرين
يونس: خلينا غير هاد المرة نوقفو نهضرو بلا ماتقولي ليا طلق مني ولا بسع مني، (ضور يدو على الرقبة ديالها) غادي نمشي غدا قبل ماتفيقي اخر وقت عندي انا وياك هو هادا غادي نحط لواليدة و لخوادري و مرتو فأكادير و غانشد الطريق لكازا
سمعات هاد الهضرة و حسات براسها تيبسات البرودة طلعات معاها كيفاش مابقاتش غاتشوفو اخر وقت عندها معاه هو هادا ماتيقاتش قلبها بدا كايضرب بجهد و كايضرها و شدها وجع فكرشها كولشي تخلط عليها مابقاتش عرفات راسها باش تبلات
يونس: جبت ليك شي حاجة باش تتفكريني
جبد من جيبو سنسلة ديال النقرة فيها فراشة زوينة كيوت ديال لبنات
يونس: نلبسها ليك !!!
حركات راسها بالإيجاب بزز و غصة فقلبها كاتماها و كاتحاول تتصرف عادي ، عطاتو ضهرها و جمعات شعرها لبسها ليها و سدها و طلق ليها شعرها و رجع ضورها شاف فيها
حركات راسها بالإيجاب و صوتو الحنين الهادئ فشلها كتر ماهي فاشلة و شداتها البكية ، بقا كايشوف فيها مدة طويلة مامتيقش بلي مابقاش غايشوفها و صافي غادي يتفارقو طبع قبلة حنينة على جبهتها و قلبو مزير عليه ، داز لخدها و انفاسو كاتحرقها فوجهها طبع القبلة الثانية على خدها و غمضات عينيها هبطات دمعة سخونة هربات من عينيها ، داز للخد الثاني باسها فيه و قرب من فمها
يونس: واخا نبوسك ففمك!
لينا:(بصوت مبحوح) لاا
يونس: غير بوسة صغيرة
لينا:(تزيرات) لااا
يونس: غير باش نتفكرها وقتما توحشتك
شاف فيها بعيون ذابلة و لقا وجهها مزير محبوس فيه الدم باغة تبكي و ماقادراش تبكي قدامو، قرب يونس من شفافها و عينيه ذابلين مركزين غير فيهوم باغي يبوسها و لكن بموافقتها باش مايفرضش عليها شي حاجة متباغاهاش، صبرات حتى عيات و كاتحس بأنفاسو سخونة كايحرقوها حدا شفافها بلا شعور قربات من حدا فمو و باستو بوسة خفيفة ، تفاجئ من الفعل ديالها و شاف فيها و بتاسم فهم بلي عطاتو الضو الأخضر بلا ماتقولها ، تبت النظر ديالو على شفايفها و يديه وحدة ضايرة على عنقها و وحدة محطوطة على خصرها، قرب منها بشوية حتى حط شفافو على شفافها و بداو كايتبادلو القبل هي ماعارفاش و لكن كاتحاول تقلدو ، حطات يديها على صدرو و غمضات عينيها عايشة معاه اللحظة اما هو فقبل حنينة لي كايعطيها و ماكايفورصيش عليها كايخلي ليها الفرصة فاش تلتاقط أنفاسها ، خلاو القبل يعبرو على باش كايحسو اتجاه بعضياتهوم من شوق و مشاعر سامية و داكشي لي مايقدروش يقولوه قالوه عن طريق القبل ، بعد يونس من عليها باش تلتاقط أنفاسها و خلى جبهتو على جبهتها ، دوز صبعو حدا شفافيها مسحهم و ابتاسم ليها
يونس: شكرا ... شكرا بزااااف
عنقها بجهد حتى حسات براسها غادي تقسم من الضهر . خشا راسو فعنقها و غمض عينيه كايشم فريحتها اما هي فطلقات العنان لدموعها و زيرات عليه كاتبكي فصمت كايتسمع غير صوتها فاش كاتشهق ، زاد زير عليها كأنو كايواسيها و يسكتها بلا مايحرجها، خلات راسها فعنقو كاتبكي ماسخاتش بيه واخا كاع المشادات ديالهوم مابغاتوش يمشي ولفاتو حداها ولفاتو كل شوية يجرها و يقول ليها هضرة تحشمها و يغازلها و يتبعها واخا هاكداك كابغاتش تعتارف لراسها بلي كاتبدالو المشاعر واخا وصلو لهاد النقطة الى انها باقة ماتقبلاتش هادشي فقرارة نفسها
يونس:(همس فودنها) غادي نتوحشك بزاااااف ماسخيتش بيك نتي و زبايلك غادي نتوحشك و نتي غاتوحشيني !
جر ليها راسها و حطو فوق صدرو و ضور يديه عليها و هي ضورات يديها على كرشو مرتاحة فوق صدرو و كاتسمع دقات قلبو
يونس:(باسها فراسها) تمشي معايا !
لينا: فين !
يونس: لكازا
لينا: حماقيتي !!
يونس: سكني معايا و نبقا نجي نلقاك كاتسنايني لابسة ليا و مقادة نتغداو بجوج و نخرجو بجوج و نعسو بجوج مانتفرقوش
لينا: بقا تحلم راه الحلم زوين
يونس: شي نهار غايولي حقيقة ، تهلاي فراسك بزااااف و ماتخليش شي ذكر يقرب منك ولا غانتحط عليك كيف عزرائيل
لينا: (هزات راسها من على صدرو و شافت فيه) مالك مزوج بيا اش هاد لحكام
يونس:(زير عليها و باسها من فمها بوسة حارة) بحال هاكداك يالاه سيري الا كنتي باغة تشوفي أمين قبل مايمشي راه هبطو
دازت لينا وجهها حمر باينة فيها كانت كاتبكي و المكياج تجخلط ليها ، شدها من يديها و جرها عندو
يونس: وجهك مجلخ بالمكياج اري شي كلينيكس باش نمسح ليك
جبدات قطن دارت فيه ديماكيون و عطاتو ليه ، مسح ليها جناب فمها لي تجلخو بالعكر و مسح ليها عينيها حتى تقادت حالتها
لينا: مسح هنايا (شيرات لفمها) راه عندك فيه لعكر
يونس: فين !!
لينا:هنايااا
دوزات يديها على شفافو مسحات العكر لي بقا لاصق فيهوم و قرب منها عينيه ذابلين
يونس: الا بقيتي هنايا راه موحال نطلقك ا لينا
لينا: واخا ها انا غادية
يونس: عطيني بوسة هي لولا
لينا: لاااا
يونس: عافاك غير بوسة وحدة عافاااااك
لينا: وا لااااا
يونس: واخا صافي
طلقها و لكن باينة فيه التقليقة مشات و عطاها بالضهر ، تنادم معاها لحال خصوصا انها اخر مرة غاتشوفو و رجعات عندو باستو فخدو و هربات، ضار هو و حط يديه على خدو كايتحسي بلاصة لبوسة و ابتاسم و لكن قلبو مشدود عليه مازال ماشبع منها.
هبطات لينا بسرعة لتحت لقاتهوم كايتوادعو معاهوم و يتباكاو حيتاش غايدوزو ليلة فلوطيل و من بعد غادي يسافرو يدوزو سيمانة فمدن مختلفة ، نقزات لينا على أمين عنقاتو وبادلاها العناق و شداتها البكية تاني فاش تفكرات بلي مابقاتش غاتشوف يونس و زيرات على أمين كاتبكي و كاتشهق بصمت، دوز يديه عليها كايواسيها و يسكتها على اساس انها كاتبكي عليه،
مابغاتش تسكت فخطرة و بدات كاتبكي بحرقة ، جا معاذ خداها منو و بدات كاتبكي على معاذ و هاد الأخير بدا كاسكت و يراري بيها، خرجو كاملين برا و النص كايبكي مع العروسة لي مابغاتش تسكت ك بحال بحال راوية مقنتة و تبكي و تنخصص و ختها و خوها كايسكتو فيها ،لقاو طوموبيل مزوقة فيها زفاف سعيد و الكوفر عامر ببعض من الدهاز دياال رانيا، ركبو العرسان فلوطو و مشاو اما لينا غحلفات هي لاسكتات تبكي و تشهق شانقة على معاذ و يونس واقف بعيد كايشوف فيها بأسى حيتاش حالتو ماشي حسن منها غير كاتم داكشي فالداخل ديالو و راض الحر لقلبو .... جلسو لينا فوق فوطوي و خوها حداها كايسكت فيها و السعدية كاتقرا عليها القرآن و سي عزيز كايشوف مالاقي مايقول ، بدات كاتكالما شوية مع القرآن و داتها عينيها فوسط من حضن خوها ، هزها و داها لبلاصتها غطاها و وجهها عامر بالدموع.
صبح الصباح و طلعات الشميسة و توسطات السماء فاق يونس بسباب تيلي لي محققو لقا مو نايضة جمعات حوايجها هي و حسن و رقية كولشي واجد، توادعو مع السعدية و خديجة و تسامحو على لي فات و خرجو برا ، خلاهوم يونس كايستفو لي فاليز فلوطو و طلع لبيت لينا تسلت و دخل عليها لقاها ناعسة بدلات ليها مها و خلاتها غير بديباردور خفيف مبين النص فصدرها و شورط حد الركبة، بانت ليه هند ناعسة و سمر فسابع نومة و زعم قرب حدا لينا باسها فجبهتها و باسها ففمها بوسة خفيفة ، هز يديها باسها فكفها ... شاف فيها مطولا و ماساخيش ينوض بغا يبقا حداها و لكن ماعندو مايدير قرب حدا ودنيها و همس
يونس: غادي نتوحشك ا فليفلة غانتوحشك بزاااف
حلات لينا عينيها مقلوبة بالنعاس تحطات عينيها عليه و ابتاسمات هزات يديها حطاتها على وجهو ، شاف فيها كاصحاب ليه فاقت ساعة ديك ساعة تقلبات لجهة الثانية نعسات و عطاتو بالضهر، باسها فضهرها و ناض خرج قبل مايحصل و قلبو و عقلو بقاو معلقين معها
الحب ليس بالكلمات الجزء السابع
محتوى القصة
التنقل بين الأجزاء