الحب ليس بالكلمات الجزء التاسع

من تأليف نهى مر
2018

محتوى القصة

رواية الحب ليس بالكلمات للكاتبة نهيلة المرواني

تهز طبسيل البسطيلة و تبعو الدجاج المحمر بالدغميرة ديالو غير من الريحة يحل النفس .... كلاو فيه حتى شبعو و تحط طبسيل اللحم باللوز و البرقوق داكشي معسل و بنين لي عندها فين تزيد راه زادت و لي ماعندهاش راه غير داقت .... جابو الديسير بالانواع دارو بيه الختام.
تهزو الطوابل و غسلو الضياف يديهوم و رجعو لصالون باش يهضرو فالموضوع لي جاو على قبلو اما لي لينا فرجعات لبيتها جالسة كاتوجع خايفة باها تضور ليه النقشة و يدير بناقص منو زواج .... بدا محمد علي الهضرة بصفتو خال يونس
علي: اوا سي عزيز كايبان لي نهضرو فالمعقول دابا
عزيز: اتينا بيه ا سي علي
علي: اوا ولدنا شاف بنتك فعرس رانيا و يونس و عجباتو و بغاها للحلال و دابا حنا جينا طالبين راغبين فيد بنتكم المصونة لينا لولدنا يونس
عزيز: (بإبتسامة) الصراحة الراجل مافيه مايتعاب انا ماعندي مانقول الموافقة ولا الرفض لبنتي
علي: اوا نعرفو اش غاتقول لبنت
السعدية: انا نجيب الخبار
ناضت مشات لبيت بنتها دقات عليها و خرجات لينا متوترة
السعدية: امضرا ا بنتي واش موافثة ولا لا
حدرات لينا راسها و قالت بخجل : موافقة موافقة
غير سمعات السعدية الموافثة و ضرياتها بتزغريتة و رجعات عندهم ... بلا كاع ماتحتاج تقول اش ف قالت لينا فهمها كولشي بالتزغريتة و بداو كايباركو لبعض و يونس ماقادهش فرحة
عزيز: اوا الله يجعل كولشي مبارك و مسعود
يونس: اميين يا ربي
عزيز: شوف ا يونس بنتي راه هي عيني و غانعطيك طرف مني
يونس: (بابتسامة) غانحطها فوق راسي
أمين: اوا ايمتا الخطبة!
يونس: وقتما بغيتو ماعنديش موشكيل
معاذ: نقربوها من الأحسن
أمين: باغي تتفك منها بالزربة ههههههه
معاذ: اشمن راه غانتوحشها الى تزوجات
عزيز: قلتي ليا ساكن فكازا ياك
يونس: اه تما فين خدام داكشي علاش
عزيز: دارك ولا كاري
يونس: كاري ابارتومون فعمارة نقية و حي نقي
عزيز: مزيان مزيان
يونس: عندي طوموبيلتي و خدام مزيان و الصالير مزيان بنتك ماغاديش يخصها شي خير معايا و الى بغيتو لويكاند ديال سيمانة الجاية نديرو الخطبة
عزيز: هادشي سوق العيالات
السعدية: ا من هنا لسيمانة كولشي غايكون واجد نديروها غير فالدار و العائلة لي تحضر
عزيز: لي بان ليكوم (شاف فيونس) اوا الله يجعل كولشي مبارك و مسعود
علي: اوا مبروك عليهوم خاصنا نمشيو
معاذ: من دابا !!! يالاه تغدينا جلسو جلسو
عزيز: و الله ماتمشيو حتى تديرو كاسكروط
علي: غير حيتاش حلفتي ا سي عزيز
حسن: اوا فينها لالة العروسة كاع ماجلسات معانا
خديجة: ها انا غانجيبها راه غير حشمانة
ناضت خديجة فتحات لباب عليها لقاتها شادة لبيسي كاتفرج ففليم رومانسي عقلها ماكاينش مرفوع
خديجة: وا لالة لعروسة وا الحاجة (سدات ليها لبيسي) الناس جايين على قبلك و نتي كاع مامسوقة
لينا: اوا باراكة راه من قبيلة و انا واقفة كاتنسنا ياك وافقت اش بقا باقي
خديجة: بغاو يجلسو معاك شوية نوضي قدامي
ناضت لينا بسرعة فاش عرفاتهوم بغاوها تقابلت مع لمرايا قادات حوايجها و دخلاتها تاني الحشمة و الرزانة و دخلات حادرة راسها كاتلعب بصبعانها

جلسات بالتباتة حدا السعدية و راسها حادراه حناكها تزنكو حشمانة من وجود الأب ديالها قدام حبيبها بداو كايهضرو معاها هي كاتجاوب بالرزانة و تضحك بالقياس مرة مرة تهز راسها تشوف فيهوم و تضور راسها و ترمش و باها فرحان عاجبو لحال بتربيتو هزات ليه الراس قدامهم لي يشوفها يقول مربية متخلقة شكروها قدامو حتى بدا كايضحك و الضحكة بينات ليه ضرسة لعقل اما يونس فحابس الضحكة بزز حيتاش عارفها اش كاتسوا شاطا ماطا و رسانها باري منها تقول كلمة تعطيك عشرة و هادشي لي عاجبو فيها حارة كاتبرد لقلب و ماساهلاش و قافزة واخا مرة مرة كاتبهلل .... حطو ليهوم كاسكروط تجمعو كاملين على الطبلة بالضحك و النشاط حتى جا لوقت باش يمشيو .... ناضو توادعو و جا يونس حدا لينا مد ليها يديه و سلمات عليه بابتسامة خجولة و همس
يونس: سيفطي ليا ميساج باش تطلع نمرتك عندي
طلق من يديها بزز منو و سيفط ليها غمزة بالتخبية و خرجو ... مشات لبيتها جلسات فيه ربعات رجليها فوق الفراش مامصدقاش هادشي لي وقع هاد النهار .
طاح الظلام و ودن العشاء و لينا باقة مخشية فبيتها كاتتفرج فالأفلام مرفوعة كاينة فعالم ديالها بوحدو ... دازت لقطة فالفيلم لبطل كايقول للبطلة عيطي عليا و تفكرات هضرة يونس و مشات كاتجري لتيلي دخلات للواتساب طلات على الطوف لي دايرة لقات راسها دايرة وحدة مع خوها بحوايج الدار و بدلاتها سيغ بلاص دارت وحدة مقادة فيها و شعرها كامل جامعاه لليسر لابسة جاكيط ديال لجينز و صدرها كايبان جزء منو و السنسلة ديال يونس فعنقها كاتبان كيوت ... طلات على الستاتي و لقات فيه A Secret makes a woman woman (السر يجعل من المرأة مرأة) ... جلسات فوق الفراش و دخلات عندو سيفطات ليه hola ... عضات شفتها السفلية و ضحكات و حطات تيلي حداها كاتتفرج فالبيسي حتى سمعات صوت ميساج فتيلي طلات بلا ماتدخل للميساج لقاتو هو سيفط ليها ميساج
يونس: صافا ا الزين ديالي من قبيلة و انا كانتسناك تسيفطي ليا
قرات لميساج بلا ماتدخل للمحادثة و حطات تيلي خلاتو مشعول باش تبقا اون لاين و عضات على شفتها السفلية و كاتبتاسم بمكر ... فينما يطفا تيلي تعاود تشعلو باش تبقا اون لاين و عاود سيفط ليها
يونس: بسسست وا اون لاين و مامسوقاش ليا
قراتو و ضحكات بأعلى صوت و حطات تيلي خلاتو كايتقلا ... تعصب وبدا كايسيفط ليها فالوجوه الحمرين دليل على أنه تعصب 😡😡😡 ماسوقاتش ليه و شافت تاني وصلها ميساج لقاتو سيفط اوديو صبرات حتى عيات فالأخير استسلمات لفضولها و دخلات باش تشوف اش قال ... جبدات لي كيت و دارتهوم و طلقات الأوديو
يونس: (بعصبية) واش بغيتي تسيطني اون لاين و ماكاتجاوبينيش معامن كاتدوي بالسلامة 😡 دابا غاتلقايني قدام داركوم
ضحكات حتى شرعات فمها و دارت ليه ادويو كاتدوي بصوت حنون و فيه بزااف ديال الدلع
لينا: ماكنتش مسالية و ماهزيتش كاع تيلي مني سيفطت ليك و كان بان اون لاين غير حيتاش دايرة مدة طويلة باش يطفا تيلي سي توو
سيفطات الأوديو و تجبدات على ضهرها خرجات من المحداثة و بان ليها في ساع كايسجل اوديو
يونس: هممم واخا ا لالة ماتبقايش تخليني كانتسنا كيف الحمق (بصوت هادئ) اوا ا حبيبتي مانشوفوكش
سمعات الأوديو وبتاسمت بخجل و سيفطات ليه غير ميساج
لينا: هز راسك فالسما و غاتبان ليك الgمرة تما غاتلقاني
قرا لميساج ديالها و ضحك حتى شبع و رجع كتب ليها
يونس: تسناي نشوف التصويرة لي دايرة نسقي عويناتي بالزين الصافي ديالي

دخل لصورة شافها و رجع دالا اوديو و سيفطو ليها
يونس:(بعصبية) اش ديك التصويرة 😡😡 لاش داك الصدر باين لاش معرياه زعما ضاروري تعصبيني
سمعاتو لينا و جمعات لغوباشة و سيفطات ليه ميساج
لينا: مالك ا خويا ضارب بيا لاكط شفتك حرقتي ليزيطاب غير بشوية عليك ا وليدي راه غير ليوم جيتي دويتي فيا تطلع ليا الدم نقلب الفيستة و تقول بناقس كاع
صيفطات ليه لميساج و سرحات حجبانها و دارت ابتسامة ديال النصر اما هو غير شاف الميساج ديالها و ساط من نيفو و دوز يدو على راسو بعصبية و سيفط ليها ميساج
يونس: واخا واخا اووففففف منك ا لينااا
مادخلاتش للميساج و وركات على الصورة ديالو و تسناتها حتى صفات و خرجات عينيها ... جالس فوق الكرسي لابس شورط قصير فالشيبي بسيور بيضين و لفوق قاميجة بالكاروات شيبية حالها حتى باين صدرو المزغب ... طاويها من اليدين طوية وحدة و داير براسليات و مطلع شعرو داير نضاضر كحلين و مبتاسم ... فيديه كاس ديال الشراب و طابلة صغيرة حداه فيها صطيلة عامرة بالثلج و قرعة ديال الكحول و بعيد عليه باينين دي باف الشيء لي كايدل على وجود حفلة فالمكان ... ضهشرات لينا فاش شافت الشراب و سكرينتها و دخلات عندو باش تسجل اوديو
لينا:(بعصبية) قلنا كماي ماكاين باس ناوي يحيدو و بو بنات قلنا راه مسكين تبدل ولكن باش تكون سكايري هادي مانقبلهاش شوية تولي حشايشي شوية تتكرفس عليا شوية تخرج شي وحدة حاملة بالتوام منك ... لالا اولد الناس التيقار زوييين سير نتا و السكرة ديالك عطيوني بالتيساع
سيفطات ليه الأوديو و خلادات من المحادثة مامسدقاش داكشي لي شافت ماتوقعاتوش يكون كايشرب ... في ساع سيفط ليها اوديو ماعطلاتوش دغيا دخلات ليه سمعاتو
يونس:(كايضحك) هههههههههههه و الله الا نتي مقطعة لوراق وا يا لحمقة لااه ماكانشربش غير بغيت نتصور حدا داكشي و صافي و زايدون هاداك عصير ا لشويطينة ديالي ديك القرعة لي محطوطة راها شامبانيا و شامبانيا بحال بومس (لموناضا) و اللون مختالف بزاااف و الى دققتي فالصورة غادي تلقاي القرعة باقة مسدودة و الكيسان لي ضايرين بيها راه محسوبين و شكلهوم ماشي بحال لي هاز و بالنسبة للكارو قطعتو ا الزوينة و ماتخافيش ماعملاني مارست مع شي وحدة باش تكون حاملة شي وحدة بالتوام ان شاء الله نتي لي غاتحملي بالتوام مني هههههههههه
ابتاسمت بإرتياح و تنهدات ... مالقات ماتقوليه و سيفطات ليه هممم واخا مزيان ... غير شاف فالميساج و سجل ليها اوديو و سيفطو ليها
يونس: اوا ا حبيبة شناهوا هاد السر لي عندك لي مخليك مرأة
سمعات الأوديو وضهلاات علامات التعجب على وجهها و سيفطات ليه ميساج
لينا: مافهمتكش
يونس: (جاوبها بسرعة بمسياج) الستاتي ا حبيبة ديالي
بتاسمت تلقائيا فاش قرات جبيبة ديالي و كتبات ليه
لينا: شي حاجة خاصة بيا
يونس:(جاوبها بميساج) كاتخبي عليا ا حبيبتي
لينا: (عجباتها كلمة حبيبتي) ماشي شي حاجة باش تتقال ليك
يونس: هممم واخا ا حبيبتي لي بغيتي ... اوا مانشوفكش
لينا: راه قلت ليك فين تشوفني
يونس: غاندير ابييل فيديو و نهضرو واخا
لينا: لا لا لا
يونس: علااش !!
لينا: ماما غاتسمعني
يونس: و تسمع راه غير مع خطيبك
لينا: مزال ماتخطبنا غير داوي فيا
يونس: قرينا الفاتحة ا حبيبتي
لينا: واخا هاكداك مازال مادرنا فالطاجين مايتحرق
يونس: وا بلا عناد عافاك ديري ليا خاطري
لينا:(ضوراتها فراسها) واخا تسنا
يونس: نتسنا لعمر كولو ا حبيبة
حطات تيلي و ناضت تقادت مع لمرايا قادات لفوقي ديال لبيجامة و جمعات شعرها على شكل كعكة مهملة و دارت ملمع شفاه بالباربي بينك و مشات رجعات لقاتو كايصوني ... طفات الضو محداها و شعلات الفايوز لي حدا راسها بقا ضو خفيف شاعل ... هزات تيلي و قبلات المكالمة ، خشات لي كيت فودنيها و تجبدات هازة تيلي و هو يبان ليها لابس كابيتشو فالرمادي لابس القب و شعرو كايبان كتيف تحت منو ، داير يديه مور عنقو و مجبد داير ليكيت ... شافها و غمزها
يونس: اوا ا زين اش كاين
لينا:(قلبات عينيها) كاين اللّٰه
يونس: توحشتك
لينا: كبير العنابة
يونس:(شحك حتى تسدو عينيه) ههههههه على قبلك نكون عنيبة اححح على عوينات مدوخيني
لينا:(قلبات وجهها و ابتاسمات) فيك غير قوة الهضرة
يونس: احححح على الشفايف كايشهيو فالبوسة
لينا: (حشمات) واش معيط ليا باش تبقا تتعنب عليا ترجل شوية معانا
يونس: وا قولي شي كليمة زوينة ... قولي ليا كاتبغيني !!!
لينا: (تلفات) مانعرف (كاتضور عينيها)
يونس: باقي مابغيتيش تعتارفي بلي راك كاتبغيني كيفما كانبغيك

لينا:(عوجات فمها) ربي ماغير قوليا شكون هادا لي كدب عليك و تيقتيه اوا صافي بقا ليا غير لحب و الخزعبيلات
يونس:(ابتاسم) عويناتك ا زين كايقولو هضرة وحداخرا (غمزها)
لينا: عويناتي و حافظاهوم البراءة و الزين الصافي
يونس:(تنهد) ماكدبتيش و هاد الزين دوخني بلا قياس تلفني على لقبلة
لينا: تالف غير غير القبلة ديال الصلا ماتالف على القبلة الثانية (قلبات عينيها)
يونس: (ضحك حتى دمع و رجع راسو لور) ههههههههههه اوا اش ندير المغناطيس فيك غير كانقرب منك كانتشها شي بوسة حلوة
لينا: ماسخ غير مدلي شلاقمك
يونس: هههههههههه وا طبزتي و زدتي الخير خيرين
لينا: خمسة و الخمامس و الحرمل فالكمامس كيفما تشوفني تخليني كاتصرف عليا ا خويا
يونس: يخوي ليك الجناب غادي نتزوجو و كاتقولي خويا خوك هو معاذ و أمين شي خاوة وحداخرا ماكايناش اعويناتي
لينا: قالت ليا رانيا بلي ماماك مابغاتنيش
يونس:(دوز يديه على جبهتو) خلي داك الجمل راكد حريرة تما و الله
لينا: علاش اش واقع
يونس: قالت ليا ها السخط ها الرضا الى ديتيها انا ساخطة عليك دنيا و اخرة (ساط من نيفو) اودييي نتي مكحلة الضواسا مع لواليدة
لينا: هي لي كاتدير شي فعيال ماشي حتال لهيه انا ماتعديتش عليها
يونس: و لكن ا حبيبة راها فمقام امك كان خاصك تحتارميها على الأقل ماشي نتي عطيتيها بالسبان و المعيور غير من الصمطة للتحت
لينا:(قلبات وجهها) بسلامة عليك
يونس:(تقاد فالجلسة) علاش ماكاتبغيش تسمعي لأغلاطك باش تصححيهوم المرة الجاية !!! باغة ديما تكوني نتي على صح لا ا لينا بنادم كايغلط و حاجة عادي يغلط الخايبة هي يبقا كايعاود فأخطائو حاولي تبقاي تتقبلي انتقادات الأخرين و نصيحتهم
لينا: ساليتي هضرتك (شافت فيه مخنزرة) اوا بسلامة عليك سير عاود زابورك فشي قنت تاني
قطعات عليه و لاحت تيلي فوق الفراش مقندشة ماعاجباهش الحال يقول ديك الهضرة واخا عارفة هضرتو صحيحة %100 و لكن ماتقدرش تبدل راسها هاديك هي شخصيتها ماكاتقدرش تسكت لشي واحد ضلمها ولا تعدا عليها ولا على شي واحد كاتعرفو و راوية بالنسبة ليها فاتت الحدود بزااف بطمعها فأمين و حبها الأخوي لأمين خلاها تقول ديك الهضرة بلا ماتراعي لراوية ولا تسوق ليها تعماو ليها عينيها ... سمعات تيلي كايصوني هزاتو لقاتو يونس ... عقدات حجبانها و قطعات عليه و قطعات لويفي على تيلي ديالها باش مايبقاش مصدعها كل شوية و لكن معامن هي ناض كايعيط فنمرتها شافتو كايصوني و دارت ليه الصيلونص و خلاتو كايصوني و يقطع و يعاود يصوني تاني ... طار ليها المورال بهضرتو و خرجات برا مشا لكوزينة كلات شوية و لاجخات لبيتها وقفات قدام لمرايا كاتشوف راسها واش غلاضت بصح شافت الكرش داخلة مصطحة و المؤخرة تزاد فيها شوية و الصدر عندها كتير و وافي من عند ربي ... عرفات راسها تزادو فيها شي كيلوات من جيهة الأرداف بسبب قلة الرياضة لي كانت مواضبة عليها مي من الصيف لهاد اللحظة قلبات عليها .... سمعات بلي جاها ميساج و مشات طلات على تيلي قلباتو لقاتو من يونس ساطت بعصبية و قراتو
يونس: طلي من الشرجم
مشات لشرجم بيتها كاتجر فرجليها طلات و بان ليها واقف قدام لقهوة متكي على لوطو ديالو لي حداهوم لابس سروال سيرفيط رمادي مع لكابيتشو ديالو و فرجليه صبرديلة و حجبانو معقودين ... شافتو حدر راسو كايكتب و وصلها ميساج ... بسرعة قراتو
يونس: غادي نعيط عليك دابا و بربي و ماتجاوبي يا حتى نطلع لداركم نهضر معاك قدامهم
دهشرات لينا واخا غير السعدية و خديجة و هند و سمر لي كاينين مابغاتش الهضرة تجبد قدام خديجة لي ماعارفة والو على هاد الموضوع ديال استغلال راوية لأمين ... شافت فتيلي لقاتو كايصوني و جاوباتو و باقة كاتشوف فيه من الشرجم و هو هاز عينيه معلقهوم فيها
يونس: (بعصبية) اش هادشي ا لينا !!! واش حتى لي يهضر معاك و ينصحك مابغيتيهاش ... عرفتي شنو هبطي عندي نهضرو فاص ا فاص (زفر)
لينا: واش حماقيتي تسعود ديال الليل و بغيتيني نخرج !! ماما ماغاديش تخليني
يونس: قولي ليها اي حاجة لمهم هبطي عنديييي ولا غادي نطلع نهضرو قدامهوم نييت ماعنديش موشكيل
لينا:(بقلة حيلة) واخا واخا تسنا شوية نلقا السبة
قطعات عليه و بعدات من الشرجم بقات كاتضور فالبيت تالفة ماعرفاتش راسها باش تبلات مابغاتش خالتها تعرف بلي مخبية عليها حاجة كبيرة بحال هادي و فنفس لوقت مابغاتش تشوف يونس .... سلمات امرها لله و خرجات من لبيت كاتحاول تتصرف طبيعية و مشات عندهوم لصالون لقاتهوم مجموعات على براد اتاي و الكعك و الفواكه الجافة
لينا: ماما انا غادة مسخرة
السعدية: فين غادة فهاد لوقت
لينا: خاصيني وراق محتاجاهوم على حساب لخدمة سالاو ليا و خاصني نسالي هادشي ليوم باش نصورو لشاف و نوريه ليه حيتاش خاصو يعرفو قبل من غدا حيتاش عندو اجتماع مهم
السعدية: واخا سيري للمكتبة ماتعطليش يحصلك باك فالزنقة يقجنا كاملين
لينا: (ابتسامة صفراء) واخا
مشات كاتجري للبيت طلات لقاتو باقي واقف مربع يديه متكي على الطويوطا كورولا ديالو كايتسناها ... مشات للماريو حلاتو هزات كاب كحل داير بحال v من الخلف و لبسات بانطوفتها و هزات فلوس و تيلي و خرجات لزنقة ... خرجات من زنقتهوم للشاريع ... هز راسو شافها يالاه بغا يجي عندها و دارت ليه لا براسها ... سبقاتو و ضارت مع زنيقة مخبعة و مضلمة و تبعها هو

دخلو بجوج لزنيقة طويلة كيف المسران و مضلمة واصلها ضو خفيف من بوطو قريب .... وقفات ربعات يديها و خيبات سيفتها و وقف قدامها كايشوف فيها معصب حجبانو مقرونين و نافخ نيفو
يونس: علاش ماكاتجاوبيش
لينا:(بنفخة) مابغيييتش
يونس:(زاد تعصب) ليناااااااا ماقلتش ليك شي حاجة خايبة باش تكعاي (كايعبر بيديه) ماكاتقلبيش شي واحد يقولك عيوبك
لينا:(صعرات) اوا اخويا مني انا ماكانحتارم حد لاش لاصق فيا سير عند ماماك و خود رضاها لاش تابعني
يونس:(جمع القبضة ديالو و ضربها مع الحيط و غوت) انا ماشي خوووووك
لينا:(دفعاتو من صدرو) مالنا ا سااط حتى تعلي عليا ا صوتك راه باقي مادرنا فالطاجين مايتحرق الله يعاونك اولد الناس بلا ماتصدع ليا مخي ولا نصدع ليك مخك (ضربات فيه و زادت)
يونس:(شدها من يديها و جرها لصقها فالحيط و قرب منها) هاد الهضرة باقي غاتقوليها غادي نقطع ليك لسانك (كايحاول يكالمي راسو) اوكي اوكي (زفر) لينا انا اعدى حاجة عندي هي بنادم يتقلق على والو ( ضور يديه عليها) واش من نهار لول باغانا نفرتكوها
لينا: (شافت فيه بغضب) انا غير قليلة الترابي و ماكانحتارم حد
يونس: انا ماقلتش هاداك انا قلت ليك بلي الواليدة ديالي مقام الواليدة ديالك دابا نتي تبغي لي يغوت على لالة السعدية !! ولا يسبها ولا يقوليها شي كلمة خايبة راه واخا ماعرفت اش تدير ماغاديش تقدري و انا معاك دارت غلط كبير و لكن ماشي بديك الطريقة تحليه السبان و المعيور راه حشوووومة (كايساوي معاها) نتي زوينة من برا (دوز يدو على خدها) و زوينة حتى من لداخل و عرفت بلي غير بقا فيك أمين و فلحظة غضب قلتي هاكداك و لكن انا بغيتك تتحكمي فالغضب ديالك كيفما كاندير انا احبيبة ديالي مرة مرة خاصك تهبطي شوية و دير لما منين يدوز راه الا جا كولشي يتساب و يتعاير و يتغاوت راه الغابة لي غاتولي هنا غانوليو كيف الحيوانات .... و اخر مرة تقطعي عليا ولا غانقطع ليك صباعك
لينا: (بنفخة مدورة وجهها ماكاتشوفش فيه) راه باقة مانسيتش الطرشة لي عطيتيني
يونس:(تنهد) اوا هزي راسك شوفي فيا (ماسوقاتش ليه و هز ليها راسها بيديه) سمحي ليا ا حبيبة ديالي راه قلت ليك اش كاين و ماعمر يدي غادي تتهز عليك و هانتي شوفي (وراها يديه مجروحة) ضربت لحيط باش مانقيسكش نتي ا نووور عيني
لينا:(شدات ليه يديه كاتقلبها) ناري شوف شحال ديال الجرحات و الدم خارج خاصك تداويها
يونس: خايفة عليا (هز ليها راسها) باقة مقلقة!!
لينا:(بدلع) شوية
يونس: (باسها فخدها) و دابا !!
لينا: (كاتدفعو) وا جمع شنايفك عليا كل شوية كاتبوس
يونس:(زاد لصق فيها) و الله الا كانبغيك على هاد العناد لي فيك و هاد الكبرياء و الغرور ديالك ماتهبطيش للأرض و تقولي اه غلطت ولا تهبطي من كواريك شوية مخلياني انا لي تابعك كيف الحمق و انا لي نجي نحزر
لينا:(ربعات يديها) اوا انا هاكدا لي بغاني هاني ولي مابغاني هناني
يونس: (هبط راسو و قرب منها حتى حسات بنفسو فوجهها) اوا انا بغيييتك و بغيييتك بزاااف غير هو بقاي تتقبلي هضرتي راه غير باغي نصلح لي ديفو لي فيك و صافي اما راه كلك محمقاني و شخصيتك هبلاتني هي لي طيحاتني فيك
داخت لينا بهضرتو و حلاوتها و تعسلو عينيها و مابقاتش كاتحس بحتى حاجة من غير انفاسو السخونة لي كايضربو فوجهها و قلبها كايضرب كاتسمع نبضها فودنيها نسات الموشكيل ديالهوم و ترفعات معاه و يديه ضايرين عليها كاتحس بيهوم كبار و عامرين ... تجرآت و هزات يديها حطاتها على صدرو القاصح يد جابتها فوق قلبو و الثانية من الجهة الثانية ديال صدرو .... حس بيها ترخات ومابقاتش مزيرة و معصبة و بدا كايحرك يديه على ضهرها بوتيرة بطيئة خلاتها تتبورش و ترخا اكثر
يونس:(حط نيفو حدا نيفها) كانبغييييييك و نتي !!!
لينا: الصممممت (مرفوعة من لمساتو)
يونس: (بصوت خافت) خليك حتى تقوليها على خاطرك 
باسها بجانب فمها و هز راسو شافها مادلرت حتى رد فعل سلبية و قرب منها حط شفافو على شفافها و انغامسو فقبلة فرنسية رومانسية خلاتهوم بجوج يترفعو على العالم تابعين غير احاسييسهم ... بقا كايحرك يديه بنفس الوتيرة و كايقبل فيها ببطئ وحنان مغمضين عينيهوم بجوج عايشين اللحظة ماحاسيينش بحتى حاجة حداهوم ... كل شفاه عاطيها حقها ، وكايخليها تاخد النفس ديالها و يرجع يكمل التقبيل ديالو اما هي فمابقاتش عارفة اش وقع فيها تابعها قلبها و كاتبوس واخا ماعارفاش كيفاش غير كاتقلدو فقط ... ماخرجهم من تبادل القبل غير صوت تيلي لي كايصوني ديال يونس ، حبس التقبيل و رجع بلور و خلا يد موراها و جبد تيلي من اليد الثانية جاوب
يونس: الوو .... انا خارج ... لا ماشي فالقهوة (حيد يدو من موراها و مسح ليها حدا فمها و رجع ضورها عليها) واحد الشوية و غانجي .... صافي نتلاقاو تما ندويو ... اوكي يالاه بسلامة
قطع المكالمة و خشا تيلي فالجيب و شاف فيها لقا خدودها حومر حادرة راسها كاتلعب بشعرها كاتحاول تلف اش وقع

بتاسم ليها و قرب منها هز ليها راسها و تلاقاو عينيهوم
يونس: هانتي تعلمتي تبوسي (غمزة) شفتي لبوسة كيفاش كاتكون ماشي بحال ديال ديك النهار فاش حصلونا لبوليس ههههههه داك النهار بووحدو
لينا: الصمممت
يونس: شنو دابا باقة غادي تقطعي عليا (حركات راسها بالنفس) و الى صونيت عليك جاوبي سييغ بلاص صافي ا حبيبة (حركات راسها بالإيجاب و لسانها تعقد) باقة غادي تتقلقي مني الى كنت كانصحك
ضورات وجهها و حولات عينيها مابغاتش تقوليه لا اه لا لا مابغاتش تسمع ليه واخا كولشي
يونس: (ضور ليها وجهها) وا ناااري هههههه ماتطيحيش لأرض ... زيدي لدار ا حبيبة قبل مايحصلنا شي واحد
لينا: لااا راه خاصني نمشي للمكتبة
يونس:(بتعجب) علاااش
لينا: كدبت على ماما قلت ليها خاصني وراق و الى رجعت بلا وراق غادي تشك
يونس: كاينة شي مكتبة هنا!
لينا: كاينة لهييييه (شيرات بيديها) صافي غير سير نتا انا غانمشي نجيب لوراق و ن....
ماخلاهاش تكمل هضرتها و قطعها بقبلة خفيفة و رجع شاف فيها
يونس: كاتكوني زوينة و نتي هادئة كاتهضري و تعبري و زيدي رجلي برجليك حمق انا نخليك تمشي بوحدك فهاد ليل و الرجال يتبسلو عليك
دور يديه على كتافها و جرها لصقها مع جنبو و تمشاو فطريق المكتبة
يونس: ياكما كايعرفك شي واحد هنا يمشي يقول لباااك راه شفت بنتك مع شي واحد
لينا: لاا هنا ماكانعرفو حد
يونس: مزيااان .... سبحان مبدل الأحواال تلاقينا فحال و رجعنا فحال
لينا: خاصك تدير شي حاجة ليديك
يونس: هانية ا حبيبة ماشي شي ضربة خايبة غير جروح صغار ... قاليا أمين بلي خدامة فين خدامة بالضبط
لينا: ف BMCE لي ف .......
يونس: معاباش غادي تسالي الخدمة نهار تنين فالعشية
لينا: ديما مع 5 علااش !
يونس: باش نمشيو نشريو لخواتم غادي ندوز عندك غاتلقايني تما مع ل 5 صافي !
لينا:(بفرح مخفي) واخا
دخلات لمكتبة و بقا يونس واقف برا بان ليه gلاي مشا عندو شرا زريعة بيسطاش لوز كاوكاو و ما جاورهم و رجع لقاها يالاه خرجات... عطاها لبلاصتيكة لي فيها داكشي و هو عمر جيبو و كاياكل الزريعة
لينا: اش هادشي 
يونس: الزريعة و اللوز و شي حوايج
لينا: لاش هادو
يونس: كولي و هنينا و عطي معاك لختك الصغيرة اجي معايا للحانوت 
شدها من يديها و غادي باليد الثانية كاينقي و ياكل .. دخل للحانوت بقا علبه الاا هادي بغيت هادي زيد هادي حتى عمر جوج بلاصتيكات الحليب و العواصر و السقاطة الى اخره فينما بانت ليه شي حاجة خشاها تما ..خلص و خرج عندها و تمشا و بقات تابعاه مافهمات والو حتى رجعو مع الزنيقة و قربو لدارهم
يونس:(عطاها لبلاصتيكات) هاكي هادشي طلعيه لدار
لينا: و لاش هادشي كامل
يونس: الى قالت ليك ماماك لاش تعطلتي قولي ليها تلاقيت يونس و شرا ليا هادشي صافي ا حبيبة
لينا:(بقلة حيلة) واخا
يونس: نقدر نتكونيكطا معطل ليوم تسنايني حتى نهضرو شوية و نعسي صافي
لينا: واخا
يونس: يالاه سيري
يالاه خطات جوج خطوات بعيدة عليه و جرها من يديها و باسها فمها بوسة حارة
يونس: كنتي غاتمشي بلا ماتعطي لحبيبك بوسة ... يالاه سيري واخا ماسخيتش بيك (باسها حدا فمها)
مشات كاتفرنس و حناكها حومر هازة لبلاصتيكات و هو وقف بقا متبعها بعينو مبتاسم حتى دخلات لزنقتها و مشا لطوموبيلتو بان ليه دخلات لدارهم عاد رتاح و ركب فلوطو ديالو و ديمارا كاياكل الزريعة و يسوق اما هي غير طلعات سمعات غوات السعدية
السعدية: تي فييين تعطلتييي فييين
لينا: راه تلاقيت مع يونس و تسنيتو حتى شرا هادشي
السعدية: اش داكشي
لينا: ماعرفتش شراه و قاليا ديه لداركم
عطات لبلاصتيكات لمها و قلباتهوم لقات شكلاط فرماج كوفيتير الحليب العواصر و الكثير من الصقاطة و زيد و زيد
السعدية:(بضحكة) اوا شوفي النسيب ا خديجة من نهارو مسكين يعمر و يعطي علاش ماطلعتيهش مسكين
لينا: زربان داكشي علاش
هزات شي بيموات و مشات عند ع ختها عطاتها شوية من الزريعة و اللوز و البيسطاش و داكشي لوخر و مشات لبيتها تخشات فيه كاتضحك و تفرنس الفرحة ماقاداهاش

دوزات الويكاند غير فالدار كاتهضر مع يونس فالواتساب مرة غير شاط مرة مكالمة فيديو ... بحق نهار التنين مشات لخدمتها و رجعات تغدات و رجعات تاني للخدمة حتى لحقات الخمسة سالات الخدمة ... طلات قدام لبنك مالقاتوش و رجعات للبيرو ديالها جلسات كاتخربق فالبيسي حتى وقف عليها الشاف ديالها رجل فالخمسينات بكريشة لابس سروال توب رمادي مع قميجة بيضة
لينا: (بابتسامة) سي محسن
محسن: باقة عندك لخدمة ولا !
لينا: لا غير كانتسنا خطيبي
محسن: قاليا سي عزيز بلي قريتو لفاتحة مبروك (رتب على ضهرها)
لينا: الله يبارك فيك
محسن: اوا نخليك ابنتي 
مشا محسن و بقات جالسة تيلي محطوط حداها و عينيها فالبيسي حتى سمعات تيلي كايصوني لقاتو يونس و هزاتو جاوباتو
لينا: شوف انا غانمشي لدارنا ماغانبقاش نتسنا
يونس: غير صبري ا حبيبة شوية يالاه خرجت من الدار شدني امين بالجماعة و الله ما لخاطري
لينا: كدااااب غاتكون يالاه كاتلبس
يونس: و الله الا خرجت قربت كاع لباركينك فين داير طوموبيل ربع ساعة و نكون عندك
لينا: تفوت ربع ساعة غانمشي فحالي
يونس: واخا صافي
قطعات عليه حطات تيلي و دارت يديها على خدها كاتسنا و وصلها ميساج فواتساب ... دخلات لقاتو يونس سيفط ليها صورة شارجاتها و لقاتو مصور ليها راسو لابس تيشورت كحل فوق منو جاكيط بالقب و جاكيط كحلة على حساب لبرد مطلع شعرو للفوقو لابس نضاضر و داير شكل o بفمو .... شافت الصورة و ضحكات عليه و حطات تيلي كاتسنا و الفرحة ماقاداهاش الشخص لي صيف كامل و هي كاتحلم بيه اخيرا غايولي ديالها ... تنهدات بارتياح و سمعات تيلي كايصوني... هزاتو و جاوبات بسرعة
يونس: انا برا خرجي عندي ا حبيبة
لينا: واخا شوية و نكون عندك
قطعات و هزات صاكها القهوي المربع الشكل دارت فيه بورطابلها و وراقها و خرجات كاتمايل بان ليها واقف متكي على لوطو ديالو لابس سروال جينز و صبرديلة كحلة .. مشات عندو كاتعوج بالطالون وقفات حداه حيد النضاضر طلعها و هبطها و ضور وجهو ساط لجهة الثانية ... ماقال لا كلمة لا جوج ... جرها سلم عليها بالوجه و حل ليها لباب دخلات مافاهمة والو كاتشوف حجبانو مقرونيين .... ركب من الجهة الثانية دار الصمطة و دار امارش ماشافش جيهتها بمرة باينة فيه كاعي بقات معجبة كاتضور فعينيها بانو ليها لبوليس فرومبوان و دارت الصمطة و جلسات متبتة كاتشوف من الشرجم و كل شوية تتنهد اما هو كايخطف شوفة فيها و يرجع يشوف فالطريق ... ماكسر داك الصمت غير صوت تيلي ديالها لي بدا كايصوني ... جبداتو من صاكها بانت ليها نمرة و جاوبات 
لينا: الووو شكون معايا
سمع يونس ديك شكون معايا و بلاصا لوطو فالجنب و خدا تيلي ديالها من ودنيها و قال بصوت حرش
يونس: شكون معايا !!!
منعم: شكون نتا !
يونس:(بعصبية) وا شكون نتا لي معيط لخطيبتي
منعم: خطيبتك !!! واقلة غلطت فالنمرة
يونس: اوا قلب ستة تسعود ماباقيش تعيط فهاد النمرة
منعم:(قلب تيلي ديالو) و لكن سمح ليا ماشي هادي النمرة ديال لينا !
يونس: (بصوت عالي) وا شكون نتا ا لباشاار
منعم: عطي تيلي للينا اخويا بلا ضاك الضحك لباسل قوليها عبد المنعم
يونس: وا سير **** بعد من خطيبتي ولا غادي نجبد لوالديك مصارنك
منعم: (تصدم) واش بصح خطيبها !
يونس: وا روح ***** راه غانفرعك بقاو ليا غير ***** تعيط فهاد النمرة نحييي مك
قطع تيلي و شاف فيها بعيون حمرة كيف الجمر لقاها مصدومة ماعارفة ماتقدم ولا توخر
يونس: (بعصبية) شكون هادا
لينا: (بصدمة) ماعرفتش
يونس: قاليا سميتو منعم ماتمنعيم كاتعرفي شي رااجل سميتو منعم
لينا: اااااه صاحب أمين هادا داك لي كان فالعرس
يونس:(تفكرو) داك لي كنتي كاتكركري نتي وياه (صغر عينيه) شبينو و بينك
لينا: والو غير عيط ليا ديك السيمانة سول فيا و صافي
يونس: لينا ماتلعبيش معايا ها انا كانوصيك هادي غادي ندوزها بجغمة ديال الما حيتاش مادرتي لا بيديك لا برجليك و لكن نحصلك تاني هضرتي معاه ماتلومي غير راسك
لينا:(عقدات حجبانها و علات صوتها) مالنا على التهديد و الغوات و التخنزير من ديبار باديها هاكدا مني ركبت و نتا مخنزر كل شوية تشوف فيا بحال الا قاتلة ليك بااك و زايدها بهادشي اوا صافي

يونس:(حمر فيها العين) زيدي ا لالة علي صوتك كتر يالااااه و نشوفو صوت شكون غادي يغلب ... اوا الالة باغة تعرفي مالي شوفي حوايجك و شوفي اش لابسة هادا لبس بنت محترمة السروال مزير عليك بزاف و زيديها بهاد تقاطع لي فيه و صدرك غير كاتحركي كايبان عريان و فينها السنسلة لي عطيتك
شافت لينا فحوايجها كانت لابسة سروال جينز فيه تقاطع مبينين رجليها و لفوق لابسة ديباردور بيض محلول من العنق و فوقو فيست بيضة شيك و ساعة ذهبية فيديها طالقة شعرها على راحتو و نضيضرات فوق راسها و ضاكها القهوي فوق فخاضها و لابسة صنيديلة طالون فالشيبي صميطات ... هزات راسها فيه و خنزرات
لينا: ماشي سوقك نلبس لي بغيت
يونس:(خنزر فيها) شناهوااااا مونيكا انا ولا بوكيموون حترامي راسك ا لالة (حط راسو على لكيدون) غاتحمقي ديلمي ماكاتهبطييييش بمرة (هز راسو فيها) راه ماشي هبطت مرة و جوج صافي غادي تركبي فوق راسي و تقولي هادا كايبغيني نسيرو كيفما بغيت الى كنت كانهبط راه غير حيتاش مابغيتش نكبتوها انا وياك و الى شفتيني طالع هبطي نتي و الى شفتك طالعة غانهبط انا باش تستمر هاد العلاقة الى جيت ندير كيفما كاتديري كوني متأكدة بلي ماعمرك غاتشوفي وجهي باقي هضرت معاك ا لينا مابغيتش لي يسوا و لي مايسوا يتمنظر فيك حاجتي عزيزة عليا و غالية عليا مانبغيش بنادم يقرب ليها ولا حتى يشوف فيها داك اللبس فاش نتزوجو لبسيه ليا انا برعيني اناااا نشوف اش بغيتي الناس لوخرين يشوفو داكشي كاتلقطي غير الدنوب شنو زعما كاتقولي فورمتي زوينة وا عرفناااا فورمتك واعرة و من بعد !! هانتي عمرتي شاكوش ديال الذنوب و رجعتي فحالك صاااافي
تنهد تنهيدة عامرة حزن و بقا متكي على لفولون مكالي بيديه و هي ندمات عرفاتو تقلق مزياان حسات بتأنيب الضمير و فهاد لويكاند يوصي و يعاود على اللبس و هي دايرة ودن سمعت ودن لاا .... عرفاتو مقلق منها بزاااف و ضرها قلبها حيتاش مقلق منها و تبعات لي كايقولها قلبها و زعمات قربات منو بعيون حزينة و حطات يديها على ضهرو ... حس بيها و ماضارش بقا كيفما هو حتى حس بيها قربات منو و حطات ليد الثانية على راسو و قالت بصوت هادئ
لينا: سمح ليا
هز راسو و شد ليها فيديها و شاف فعيونها
يونس: و الله ماكانبغي نخاصم عليك و لكن راه كاتعصبيني
لينا: صافي ماوقع والو
يونس:(جرها عنقها) توحشتك
لينا:(بادلاتو العناق) باينة على زين الإستقبال
يونس: (شاف فيها مبتاسم) صافا ا حبيبة اش خبارك (سلم عليها بالوجه) و دابا
لينا:(بخجل) صافي غير زيد
يونس: (شد ليها فيديها) اوا بقاي مرة مرة تهبطي كيفما درتي ليوم مرة انا مرة نتي حتى تستامر الغولاصيون و ماعمرك ماتحسبي هادشي ضعف راه كاتكبري فعيني الى درتي هاكدا بحال دابا بكلمة سمح ليا طفيتي العافية لي كانت شاعلة فيا (باسها فيديها) نمشيو نشريو لخاتم !!
لينا: واخا
تبدل لجو عندهوم فطوموبيل ولاو غير كايضحكو مقشبين بيناتهم ... يونس شاد يد لينا و كايسوق واخا شاد ليها فيديها ... وصلو قدام محل كبير لبيع المجوهرات و بلاصة لوطو قدامو و سكتها
لينا: هنايا !!
يونس: اه ... تسناي
حيد جاكيط الكحلة ديالو و عطاها ليها باش تلبسها
لينا: لاش ! راه لابسة
يونس: من نيتك 😒 لابسة جوج شريويطات و كاتقولي لابسة شدي شدي غاتخرجي غايصرفقك لبرد راه لوطو فيها لكليمة
لينا: واخا واخا
خدات من عندو الجاكيط و لبساتها و هبطو بجوج .... جا حداها و شد ليها فيديها و دخلو للمحل

دخلو للمحل لينا كاتضور فعينيها كاتشوف كولشي منضم و مقاد محل نقي أضواء فيه بيضة زوينة و حتى البائعين مقادين حالتهوم و واقفين مستقبلين الناس بابتسامة... مشاو عند فيترينا وقفو كايشوفو
يونس: كيجاك هاداك (شير بصبعو لخاتم)
لينا: زوين
يونس: و هاداك !
لينا: زويين
يونس: و داك لي لهيه
لينا: حتى هو زوين
يونس:(شاف فيها و ضحك) اوا شرينا بكري معاك نتي
لينا: راه زوينين كلهم
لبائع: (بابتسامة) خطاب جداد!
يونس:(شاف فيه) وي
لبائع: غاتشريو لخاتم للخطبة ياك
يونس: وي
لبائع:(جبد ليهوم خواتم) هادو زوينين و طخي شييك و كلاص
يونس:(يديه عاطها على ضهر لينا) كيجاوك ا حبيبة ... عجبك شي واحد! 
لينا:(حمقوها) زوينين كاملين حرت
يونس: ماكدبتيش ههههه عطينا رأيك
البائع:(عطاهم واحد من لي جبد ليهوم) شخصيا كانرشح ليكوم هادا غالي و فنفس لوقت زوين كيف كاتشوف ضاير كامل بالألماس ماشي بحال لوخرين سامبل
لينا:(عجبها و لكن سمعات غالي و تراجعات) مازوينش بزاف اجي نشوفو هادو لي لهيه
يونس:(عاق بيها) وا غير تسناي بعدا تجربيه
شد ليها يديها ليسريا و عطاه البائع لخاتم و لبسو ليها
يونس: شوفي جاك زوين و على عبارك
لينا: لا نقلبو على شي وحداخور حسن
يونس: واخا سيري لهيه انا جاي عندك
مشات لجهة اخرى كاتشوف فالخواتم بلا مبالات غير كاتدوز عينيها فقط حيتاش عجبها داك لخاتم شكلو زوين كايتكون من جوج ضاير بالجناب بالألماس الصغير و لفوق فيه الماسة كبيرة مزيناه ... بقا يونس واقف مع لبائع و رجع لخاتم للبواطة ديالو و عطاه للبائع
البائع: مابغيتيهش !
يونس: ههههه لاا بغيتو خليه جنب هنايا و جبد ليا خاتم ليا انا يكون سامبل
جبد ليه لبائع خاتم رجالي سامبل ديال لفضة زوين و دارو فبواطة و حطو مع لوخر
يونس: كاتخلصو بلا كارط بونكيير !
البائع: اه ا سيدي
جبد يونس لاكارط بونكير عطاها للبائع قطع لحساب بلا مايسول يونس على الثمن دياال لخاتم حيتاش غير من الشكل باين غالي و ماشي الألماس المزور داك الفري لي دايرين فيه ... عطاه لبواطات فبلاصتيكة فيها اسم المحل و تمنا ليهوم اىتوفيق و مشا يونس عند ليها شدها من يديها
يونس: يالاه نمشيو
لينا: مي مازال ماشديت والو
يونس: شدينا غير يالاه
مشات معاه مافاهماش ايمتا شد ولا كيفاش و بلا مايتشاور معاها و فنفس الوقت عقلها مع الخاتم لي خلات ... ركبو فلوطو و حط لبلاصتيكة و دار امارش ... شدها لفضول و هزات لبلاصتيكة تحت نضراتو لي كايديرهم غير من الجنب و حلات لبواطة لقات لخاتم ديالو
لينا: خاتمك زوين
حلات لبواطة الثانية و خرجات عينيها مامصدقاش بلي الخاتم لي عدبها شدو ليها واخا غالي
لينا: علاش شديتيه !!! ياك قلت ليك مابغيتوش
يونس:(كايسوق) عويناتك قالو لعكس
لينا: و لكن راه غالي ا يونس بلا ماتكلف على راسك
يونس:(ضربها لراسها بمزاح) حمقة نتي !! ماكايناش شي حاجة تغلى عليك ماهمنيش الثمن قدما غاتهمني فرحتك نتي
بفرحة مكتومة رجعاتو لبواطتو و خشات داكشي فالبلاصتيكة و رجعاتها فين كانت و جلسات متبتة و الابتسامة على وجهها
يونس: فين بغيتي تمشي !
لينا: فينما بغيتي
يونس: قلتي لداركم بلي نتي معايا
لينا: اه قلتها ليهوم
يونس: اوا صافي نمشيو لشي كافي نجلسو فيها
قلب الطريق لكافي هادئة جلسو فيها كايتبادلو اطراف الحديث و يد يونس على يد لينا و كل شوية يغازلها حتى كاتزنك و تقلب عينيها و لا تلعب بشعرها و يونس ماقاداه فرحة .... تعشاو تما نيت و رجعها لدارهم واخا ماساخيش بيها

أليس الحب هو ان تحترمني أولا قبل كل شيء و أحترمك بالمقابل!! ... أ ليس الحب هو ان تقدرني و تساندني و واجبي أن أفعل المثل !! .... أ ليس الحب أن تتذكر أدق التفاصيل عني مهما كانت صغيرة و دقيقة و واجبي أن أفعل المثل !! أليس الحب هو أن تحب شخصيتي و روحي قبل جسدي و جمالي ... أ ليس الحب بالأفعال و ليس بالأقوال !!!
لقد تأكدت أن #الحب_ليس_بالكلمات
فصالون كبير بفراش عصري فالباج و القهوي جالس يونس فالراس ديالو لابس كوستيم إيفازي كحل مع صباط اسود مقمق لامع مرجع شعرو لور مقاد لحيتو شابك يديه مع بعضياتهوم و كايهضر مع الرجال فرحان كايضحك على كاتسدو عينيه و كايبانو سنيناتو لبيضين و حداه بلاصة خاوية و قدامو طابلة زوينة ذهبية اللون خاوية و الوسط طابلة كبيرة دائرية فيها الحليب و العواصر و التمر و المملحات و الفواكه الجافة و الحلويات كولشي مقاد متول و الصالة عامرة بالرجال و العيالات من عائلة يونس و عائلة لينا .... فغرفة ثانية كانت لينا لابسة تكشيطة فالدوغي محجرة من الصدر و معرية منو على شكل v و يديها مزيرين بتوب شفاف ... جاتها على فورمتها مبيناها الصدر واقف مهزوز و المؤخرة مطراسية كذلك فعنقها السنلسة لي عطاها يونس و فيديها سرتلة ديال الذهب شراوها ليها و فاليد الثانية ساعة طخي شيك و ضفرانها مصبوغين لا ديال ليدين لا ديال الرجلين و اليد منقوشة و الشعر دايرة ليه بوكلي و خلاتو مطلوق على راحتو و و الوجه مقاد بالماكياج جات خطيرة و فرجليها صندالة عالية زادت علاتها اكثر ... جات امها حداها قرات عليها المعوذتين و جات حتى خالتها و خرجوها من لبيت و موراهوم رانيا و هند و سمر كايصليو على النبي .. دخلو لعروسة حادرة راسها حشمانة و الأنظار عليها وقفات حدا يونس بغات تجلس و ناض سلم عليها بالوجه و هي الدوخة شاداها و الدنيا ضايرة بيها ... شد ليها فيديها و جلسها حداه بقات حادرة راسها حناكها مزنكين غادي يطرطقو بالحشمة و يديها فيديه مامسوق لحد و كولشي كايشوف فيهوم ... جات السعدية هازة صينية متوسطة الحجم فضية حطاتها قدامهم فيها جوج بواطات حمرين فيهوم الخواتم و بواطة فيها سنسلة ديال الذهب فيها رشمة فالأخضر و الغوز شكلو زوين و باينة وازن مع نبالتو و حوالقو و خاتمو ... جابو جوج كيسان دياال الحليب بالطالون طويل و طبسيل فيه الثمر
السعدية: يالاه اولدي شربها الحليب
هز كاس ديال الحليب و ضار عندها هز ليها راسو بيديها و هو هايم فيها قرب لكاس من فمها شربات شوية و لكاميرا كاتصور و عطاها تمرة عضات منها شوية صافية و عطاتها السعدية كاس الحليب هزات راسها فيه و شافت فيه تفحصاتو مزيان بعينيها و قلبها كايدق جا وسيم بكل المقاييس و زين حرش رجولي ... مدات ليه لكاس لفمو جغم شوية و حيداتو حطاتو و عطاوها تمرة عطاتو عض منها شوية و حطاتها ... جات نجمة خالة يونس لابسة قفطان فالموف مع فولارو دايرة سرتلة ديال الذهب وقفات مع السعدية لي حتى هي مقادة و مشكية ... هزات نجمة خاتم لينا عطاتو ليونس و هز ليها يديها خشا فيها الخاتم و عينيه غاياكلوها زاد تغرم بيها اكثر و اكثر ... طبع قبلة حنينة على يديها زادت حشماتها حيتاش كاين باها و خوها و عمامها و عماتها ... هزات راسها بزز شافت فيه تلاقاو عينيهوم و شلا هضرة كاتقال غير بالعيون هضرة مايقدرش اللسان ينطق بيها ... عطاتها نجمة خاتمو و هزات ليه يديه الكبيرة و خشات فيها الخاتم و بدات العائلة كاتسفق ... قرب منها و هز ليها راسها و باسها فجبهتها و الكامرة كتأرخ ليهوم اللحظة ... عطاتو خالتو الكوليي باس يلبسو ليها و شاف سنسلتو فعنقها
يونس: (بصوت خافت) خاصني نحيد ديك السنسلة لي لابسة
لينا:(شداتها) لا غير خليها بلاش ماشي موشكيل الا مالبستوش
يونس:(شاف فخالتو) مابغاتش تلبسو خليها على راحتها
نجمة: واخا لبسها غير النبالة و الخاتم
هز يونس النبالة و لبسها ليها و لبس ليها الخاتم فاليد الثانية و هز الحوالق قرب منها و عطاتو ودنيها كايركب ليها الحلقة بالثقالة ماباغيش يبعد منها ... عطاتو لودن الثانية و ركبها ليها تحت انظار الجميع ... بداو كايصورو فيهوم و كل شوية يهز يدها يبوسها من الضهر و من الكف و عاد باش ماكاتزيد تتزير و تحشم ... جابو ليهوم حلوة و عطاوهوم موس حطات يديها و حط يديها فوقها و قطعو بجوج و خدا طريف وكلو ليها و عطاتو طريف وكلاتو ليه و جمعو داكشي ... طلقو الطرب الأندلسي و تلاهاو الناس مع بعضهوم بالجماعة و يونس شاد ليها فيديها مزير عليها ماباغيش يرخي منها و غير مبتاسم لي يشوفو يعرفو فرحان من قلبو ... جات العائلة كاتتصور معاهوم عاطيينهوم الخاطر كل واحد بوحدو و لينا طلقات منها شوية الحشمة و بدات كاتضور عينيها فالصالون و ملاة ملاة تخطف شوفة من يونس لي كل شوية يهمس فودنها بكلمة تخليها تحشم
يونس:(بهمس فودنيها) قراي القرآن فخاطرك ا حبيبة عين بنادم خايبة
شبك يديه مع يديها و حطها فوق فخدو كايدوزو صبعو على يديها بنعومة

حطو العشاء للناس بسطيلة ديال الحوت و يونس و لينا بجوج بوحدهوم فطبلتهوم كاياكلو
يونس:(بهمس) كولي ا حبيبة (دوز يديه على ضهرها)
لينا:(بصوت خافت) هاني كاناكل و الله
يونس:(هز كروفيتا) حلي فمك
حلات فمها خشا ليها الكروفيتة و بداو كايضحكو و السعدية هي و خديجة من بعيد مراقبينهوم و على وجههم ابتسامة رضا و معاهم هند
السعدية: يونس طلع ولد الناس ..شوفي كيداير معاها و كيكايتعامل معاها
خديجة: واييه ا ختي باينة فيه طايح فيها و غارق تال ودنيه يديها مابغاش يطلق منها
هند: و كل شوية يهمس فودنها و دابا كايوكلها
خديجة: اوا تستاهل مسيكينة
هند: حتى هي دات الزين شوفوه كيداير القلدة عندو كاتحمق يديه يديرو من يدي تلاتة ولا ربعة عاد الزين ديالو فشكل و عندو ديك الضحيكة زويونة مسرار بزاف و سنيناتو بويض مستفين مقادين و يديه مزغبة عامرة عروق و لحيتو مقادة عينيه كبار و مشفرين و حاط لفلوس فداك الخاتم و داك الكوليي لي جاب ليها و عاد الصداق و العرس و زيد و زيد سعداااتك ا لينا
خديجة: تي كوني تحشمي راه لينا فمقام ختك و نتي كاتغزلي براجلها
هند: ههههه انا قلت غير لي كاين ا ماما ويلي
السعدية: ديك مو انا لي خالعاني تمشي تسحر للبنت ولا سي حاجة معارضة الزواج و ساخطة على ولدها
خديجة: مسكين جاب خالتو باش تكون بلاصة مو واخا عماتو جاو الا ان مو مالقا حد يشد بلاصتها غير خالتو
السعدية: الله يدوز كولشي بيخير يا ربي
هند: حنا ماغاديش ناكلو !
خديجة: تاكلي جغديد زيدي لكوزينة
مشات خديجة و هند و السعدية للكوزينة و جاو السرباية هزو الطباسل و جابو طباسل الدجاج محمر بالدغميرة حطوه و حطو حتا للعرسان
لينا: طلع ليا هادشي فالراس 
يونس: و اش بغيتي تاكلي ا حبيبة
لينا: ماكرهتش الكفتة مشوية (دوزات لسانها على شفافها) كاتكون بنينة
يونس: غدا نغدي حبيبتي عند احسن (قرب منها) احسن كفات هههههه عقلتي عليها بلا حشمة بلا حيا كاتقولي ماباغاش تكفتي هههههه كايصحاب ليك نسيتها
خرجات لينا عينيها بالصدمة فاش تفكراتها و غرقات فحوايجها بالحشمة ماكرهاتش تتشق الأرض و تبلعها
يونس: كولي ا حبيبة غير كانضحك معاك غدا نديك تاكلي الكفتة دابا ماعندي كيف ندير
ماجاوباتوش و بدات كاتنقب من الدجاج و شعرها طاح على الجنب مخبي وجهها على يونس و جاتها من الجنة و الناس اصلا هي ماحاملاش يبقا يشوفيها و يضحك على النهار للي قالت فيه ديك لكلمة ... تهزو طباسل الدجاج و تحطات السفة و تبعها مباشرة الديسير و تجمعات الطبلة و جابو لغسيل للناس ... جا سي عزيز حدا يونس هو و معاذ و محمد علي باش يدويو فالمعقول
يونس: سي عزيز لبنت هاهيا خطبتها بقا دابا نهار العقد و العرس و الصداق ... ايمتا نديروهم
عزيز: شوف هي اش بغات
لينا:(حدرات راسها) لي بان ليك ا بابا
معاذ: من الأحسن العقد و العرس يتدارو نهار واحد
يونس: لي بغيتو لي عليا هو نوجد وراقي
محمد علي: و ايمتا بغيتو العرس !
يونس: ماكرهتش تسبقوه شوية باش نتكونسونطرا مع لخدمة مانبقاش غادي جاي
عزيز: نديروه بعد شهراين
يونس: مزيانة بينما نيت وجدات العروسة راسها ... العرس عليا بعدا
عزيز: لا لا بنتي ندير ليها عرسها
يونس: الله يهديك ا سي عزيز خليني ندير العرس بلا ماتكلفو على راسكم
عزيز: اشمن تكليف راه بنتي هاديك الى مادرتو ليها لمن نديرو
يونس:(حط يديو على كتف عزيز) الله يخليك ا عمي بغيت نديرو نتا شري ليها الدهاز ديالها
معاذ: خليه على راحتو ا لواليد و الى خصات شي حاجة كمل نتا
عزيز: زيرتوني دابا ... واخا يكون خير
يونس: فين نديرو لعرس فقاعة ولا اوطيل
معاذ: لينا اش بغيتي!
لينا: (بصوت خافت) قاعة
يونس:(قرب منها) بغيتي نديروه فقاعة !!
لينا: ااه
يونس: واخا صافي تكلفو نتوما بداكشي و يالنسبة لصجاق حتا نتافق عليه انا و العروسة
عزيز: اوا الله يجعل كولشي مبارك و مسعود
يونس: اميين يا ربي
بغاو يقراو تاني الفاتحة و هز كولشي كفو و بداو كايقراو الفاتحة جهرا و فالأخير تسمعات أمين معلنة على اختتام السورة ... جا وقت الذهاب ناضت العائلة كاتمشي و شي كايتوادع مع شي و نساو لعرسان... بقا يونس حدا لينا تسنا حتى خوات الصالو و ضورها عندو بسرعة شاف فيها و ضور يديه على عنقها و طبع قبلة حنينة على شفافها خلاتها تدوخ و تغمض عينيها و تمشي معاه و تبع شفافو ... بقاو هاكداك حتى تزيرات بغات تاخد نفس عاد بعد منها شاف فيها
يونس: و الله مامتيق قريب تولي ديالي
لينا: (بخجل) جيتي زوين ليوم
يونس:(بتاسم) نتي راه زوينة و يوميا كيفما كنتي و ليوم طلعتي أحلى هاد الزين كولو غايولي ديالي و هاد العينين الخوضر غانبقا نصبح عليهوم و نمسي عليهوم
لينا: الصممممت (خدودها حمارو)
يونس:مابغيتش ننوض و الله ماسخيتش بيك (باسها فخدودها) غدا ا حبيبة نتلاقاو مع ل 10 غانجي ليك لهنايا صافي !!!
لينا: واخا صافي
يونس: قولي ليا شي كلمة زوينة
لينا:(ضورات عينيها بخجل) الصمت
يونس: دابا نحيد منك هاد الحشمة لي راكباك من ساسك لراسك
باسها فشفافها و ناض و شداتو من حوايجو و ضار عندها ..ظ وقفات و مع الطالون يالاه ولات قدو فالطولة ... دوزات صبعها على شفافو كاتحيد منهوم العكر و هو متبع يديها و كايشوف فوجهها ... كملاتو لبه المسيح و هز يديها بجوج باسها فكفها و مشا

مشات العائلة و بقات لينا مع أسرتها و خالتها تخشاو فبيتها و جاو كايقلبو فاليزة متوسطة الحجم ... حلوها و بانو ليهوم ثوابات واحد ينسيك فلوخر
السعدية: شوفي الراجل اش جاب الله على سعد بنتي
خديجة: زيدي عليها الذهب و الشكلاط و الحلوة و الورد لي جاب معاه
هند: مسكين غايكون حط زبابل ديال لفلوس فهادشي
لينا: (كاتبدل) فيناهوا الشكلاط
السعدية: راهوا لهيه فالميكة ... حيدي داك الخاتم و النبالة و الحوالق و عطيني نخبيهوم ليك مع السنسلة ديالهم
لينا: واخا تسناي غير نحيد التكشيطة باش ترجعوها لمولاتها
هند: اري نشوف الخاتم ديال لخطبة كي جا على يديك
لينا:(حيدات التكشيطة) اوفف شحال تقيلة (مدات ليها يديها) هانتي خضري عويناتك ا لالة
هند: ناري شحال زوين و هاد دياموند ديال بصح ولا مزور
لينا:(كاتميق) فري ا حبيبة حط فيه زبابل ديال لفلوس (جرات يديها)
خديجة: اجي بعدا شحال عندو فالعمر
لينا: 27 عام
خديجة: خدام فدوزيم ياك
لينا: اه و لكن راه عندهوم بارطما ديال باه الله يرحمو خلاها ليهوم هنا فأكادير كارينها كاملة كاتدخل ليهوم الصرف و كايقسمو على ربعة (كاتحسب بيديها) هو و مو و خوه الكبير و ختو الصغيرة)
خديجة: هادشي كاع ماقالو ليا داك المزغوب ديال ولدي
لينا: تلقايه غير نسا
السعدية: (جمعات لفاليزة) يالاه نوضو تنعسو
لينا: اه راه غدا بغاني نخرج معاه فالصباح
السعدية: اوا رضي بالك ا بنتي واخا هاكداك الرجال مافيهوم تيقة
لينا: واخا واخا يالاه خرجو خليوني ننعس
خرجاتهم بالدفيع و جابت البلاستيكة لي فيها الشكلاط و خباتو و جابت لبوكي ديال الورد الأحمر لي جاب ليها دارتو فمزهرية و حطاتو فوق الكوافوز لي عند راسها ومسحات وجهها من لماكياج لبسات بيجامة و تجبدات كاتاكل فالشكلاط و كاتشوف فالورد و مرة فخاتمها مامصدقاش بلي رسميا تخطبو حتى نعسات

فاقت فالصباح على صوت الرييفاااي ... مبوقة بالنعاس هزات تيلي سكتاتو و ناضت كاتحك فعينيها مشات لطواليط قضات حاجتها و غسلات وجهها و سنانها و خرجات رجعات لبيتها جبدات سروال أسود سليم و لفوق كابيتشو رمادي سخون و مشات قدام المرايا مشطات شعرها جبداتو مزيان و جمعاتو على شكل ذيل حصان و دارت آي لاينر جبدات بيه عينيها و ماسكارا لرموشها و براونزر لخدودها و ملمع الشفاه فالبينك ماط و دارت ريحتها و ا السنسلة لي عطاها يونس مزينة عنقها و خاتم الخطبة فيديها .... جبدات صبرديلة كحلة أديداس لبساتها مع تقيشرات بيضين و هزات صاك جانبي أسود دارت فيه بورطابلها و الفلوس و خرجات من بيتها مشات لكوزينة لقات أتاي سخناتو و كبات ليها و شرباتو مع الحلوة و سمعات تيلي كايصوني جبداتو و جاوبات بسرعة
يونس: صباح لخير حبيبة
لينا:(بصوت ناعم) صباح النور
يونس: والو لا حبيبة لا كبيدة لا شحيمة لا رجيلة اخخخ معامن انا
لينا:(كاتضحك بصوت مرتفع) ههههههه
يونس: نتي معامن جا الضحك لمهم هاني لتحت هبطي الا وجدتي
لينا : هاني هابطة
قطعات و رجعات تيلي للصاك و شللات فمها من لماكلة و عاودات العكر و خرجات من الدار كملات الزنيقة ديالهوم و بان ليها واقف متكي على لوطو ديالو لابس سروال جينز مع تيشورت بيض سامبل الكول ديالو على شكل v من لاكوسط و لفوق جاكيط ديال لكوير كحلة و فرجليه صبرديلة بيضة من نايك لابس معاها تقيشرات فالأبيض و شعرو مطلعو كيف عادتو و فيديه ساعة كحلة طخي شيك و فصبعو خاتم الخطبة فعنقو سنسلة ديال النقرة رقيقة رجالية زوينة ... قطعات الشانطي و جات عندو ضرباتها ريحتو حتى داخت ولات غير تابعاه بعينيها و قلبها كايضرب تأكدات بلي صافي طاحت فيه كيفما طايح فيها ... جرها من يديها حتى قربات ليه و خرجات عينيها وبعدات منو
لينا: يونس الناس كايعرفو بابا
يونس: سمحي ليا غير نسيت فاش شفت هاد الزين تلفت ... ركبي عاد نسلم عليك
ضارت لجهة الثانية حلات لباب و طلعات دارت الصمطة و ركب هو دار أمارش لطوموبيل و بعدو من حيهم عاد وقف لوطو و ضار شاف فيها
يونس: وا قربي نسلم عليك و نتي مخشية فداك القنت بحال الا غاناكلك
لينا: لي بغا شي حاجة هو لي كايجي ليها
يونس واخا ا لالة مقبولة منك
حيد الصمطة و قرب منها و ابتسامة على وجهو ... طبع قبلتين كل وحدة على خد و كملها بقبلة فرنسية رومانسية على شفايفها ... غمضات عينيها و مشات معاه فيها ترفعات تاني على الدنيا و مشات ماكاتقدرش تمنعو ولا تحبسو كيف لول حيتاش هي براسها محتاجة ديك لقبلة باش تشبع اشتياقها ليه ... بخفة يد حل ليها الصمطة و جرها عندو لصقها عليه ضور يديه عليها وحدة على خصرها و الثانية مور عنقها و هي يديها حاطاهم على لحيتو و متبعة معاه فينما يتحرك تتحرك و مشاعر فشكل كاتحس بيها اما هو فماكانش اقل منها فالشعور شي حوايج جداد عليه كايحس بيهوم قلبو كايضرب بحال الا كايجري النفس ديالو مابقاش منتظم ريحتها كاتفقدو الإدراك بالأشياء المحيطة بيه ... كل لي كايهمو هي لينا ... عينيه هوما لينا ... روحو هي لينا ... عقلو ماكايفكر غير فلينا ... قلبو كاينبض لأجل لينا .... على لسانو اسم واحد و لي هو اسم لينا ... دائما بدون شعور كايلقا راسو انقض على شفايفها كايقبل فيهوم بلهفة و شوق كايعيا مايتحارب مع راسو باش مايبوسهاش و يخلي مسافة محترمة بيناتهم و لكن ماكايقدرش شي حاجة بحال المغناطيس كاتجرو جيهتها

بصعوبة باش بعد منها و حل عينيه المعسلين و مسح جنب شفافها و شاف فيها
يونس: نوارة قلبي فين بغيتينا نمشيو
لينا:(بخجل) فينما بغيتي
يونس: فطرتي !!
لينا: اه فطرت
يونس: انا مازال نمشيو لشي كافي نفطرو فيها ولا تعاودي فيها لفطور !
لينا: لي بان ليك
يونس: اححح على هاد الزين غادي ناكلك
لينا: وا سووووق بقا مقابلني
يونس:(صغر عينيه) شاك فراسي خاطب عبد القادر ماشي بنت لا علاقة ليك بالرومانسية (شد ليها فيديها) الحوبينو
ديمارا لوطو و باقي شاد ليها فيديها واخا معدب مع لفيتاس ... مشاو لاكوط بلاصاو لوطو فالباركينج ... هبطو ليد فاليد غاديين طالقين رجليهوم ... بان ليهوم كافي زوينة و هادئة ... دخلو ليها طلعو لا طيراس مقابلين مع لبحر لي هايج و لهوا كايضرب فيهوم ... جا عندهوم السرباي رحب بيهوم
يونس: اش بغيتي تاخدي !
لينا: والو راه فطرت
يونس: (شاف فالسرباي) جيب ليها كافي كخييم مع كخييب بالشكلاط و انا نص نص كبيرة مع بتي بان و كخييب بالشكلاط
مشا السرباي و ضار عند لينا متكي على الطابلة و كايشوف فيها
لينا: ياك قلت ليك مابغيتش لاش غاتشد ليا!
يونس: و انا بغيتك تاكلي و تعاودي لفطور اش فيها زيادة الخير خيرين (شد يديها) او لا ا نوارة قلبي
لينا:(كاتضور فيعينها) فين غانمشيو ليوم
يونس: نمشيو لسوق لحد من بعد نمشيو نتغداو بالكفتة لي مشهية نوارتي و من بعد لي بغيتي نديروه
لينا: نمشيو لشي نايت كلووب !?
يونس:(طلع حواجبو) نايت كلوب كاااع
لينا: (بترجي) عافاك عافاك غير مرة وحدة شحال تمنيت ندخل ليه
يونس: واخا غانمشيو لواحد لوطيل فيه نايت كلوب داكشي نقي و زوين و لكن حتال ليل حيتاش هاديك هي وقتو
لينا: شكراااا
يونس: خلصيني
لينا: باااش !!
يونس:(حط صبعو على خدو) عطيني بيزو
لينا: ضاروري !?
يونس: خلصيني
لينا: اووووفففف واخا
قربات منو و عطاها حنكو غمضات عينيها باش تبوسو و غفلها ضور وجهو صدقات بايساه فشفافو و بعدات منو
يونس: الله شحال حلوة
لينا: حشومة عليك 😒
يونس: مالي اش درت ! عادي بستي خطيبك ا نوارة قلبي (جا السرباي حط ليهوم لكونسوماسيون) ميغسي .... يالاه كولي
لينا: بزز 
يونس: لااا غير بالخاطر
هز فورشيط و قطع ليها شوية من لكخييب و هزو بيها و قربها لفمها
يونس: يالاه كولي ا نوااارة قلبي عافاك غادي ترجعيها فوجهي ! هم ماشي حشومة
حلات فمها و خشاها ليها و حط لفورشيط و شربات قهوتها ... تحطات قدام الأمر لواقع و كملات لكخييب مع لقهوة و حتى هو فطر دغيا و ناضو
لينا: انا غادي نخلص على راسي صافي
جرها من يديها و شاف فيها بعينين مخنزرين
يونس: سبقيني لطوموبيل تجبدي ريال من صاكك غانمشي فحالي و نخليك
تخلعات من نبرة صوتو و حدرات الراس و مشات باش ماتطراش شوهة تما ... خلص هو فطورهم و خرج ركب فلوطو طالع ليه الدم ماعجبوش لحال تقول ديك الهضرة بحال الا قللات من قيمتو علاش هو ماشي راجل حتى يخلص عليها ولا ماشي من لمستوى ... شافتو مكشكش ماقال حتى حرف و سبقات هضرات باش تبردو
لينا: قلت ليك هاكداك غير حيتاش ماكانبغيش شي واحد يخلص عليا ولا نكون عالة عليه
ضار شاف فيها بعيون غاضبة زادت هاد الهضرة جرحاتو فكيانو و فرجولتو
يونس: واش انا ا لينا اي وااااحد !!!! كيفاش غاتكوني عالة عليا انا خطيييببك و قريب نولي راااجلك غادي نتشركو كولشي واش كاتفهمي هضرتي و نتي مازال دايرة فبالك بلي انا اي واحد
لينا: وا صافي ماتزيدتش فيه
يونس: واش كاتبغيني بعدا ا لينا ولا انا بحال ايها الناس عندك
حدرات راسها ماقدراتش تجاوبو بغات تقوليه اه كانبغيك و يمكن كتر منك و لكن ماقدراتش ماعمرها قالتها لشي راجل من غير خوتها بجوج جاتها حشومة حلقها نشف ليها و غصة فقلبها ... حدر راسو حتى هو ماعارفش اش كايسوا عندها عينيها كايقولو كاتبغيه و لكن شي تصرفات كايبينو العكس ... هز راسو و تنهد بالجهد و ديمارا لوطو فإتجاه سوق الحد ... ماهضرش معاها طول الطريق فقط اكتفى بأنو يشوف فالطريق قدامو و موسيقى مطلوقة ... يد مخرجها من الشرجم و يد كايسوق بيها و شلا حوايج كايضورو فراسو و هي جالسة مضورة وجهها لجهة الشرجم كاتشوف فالطريق ... جو كئيب كايتخللو صوت الموسيقى من الراديو ... وصلو لسوق الحد بلاصاو لوطو و هبطو غادية حداه و ساكتة ماكاتهضرش و هو نفس الشيء داير يديه فالجيب و عاقد حجبانو مسرح عينيه فالطريق ... دخلو ليه عامر كيف العادة كولشي كايشري او لي ما شرا يتنزه ... مشاو جهة الحوايج كايضورو و يشوفو و داز مول كروسة شاد الطريق و لينا عقلها مامعاهاش كاتشوف جيهة لحوايج علاين يضربها ... بسرعة جرها يونس لجيهتو عتقها فاللحظة المناسبة و ضورها لجيهة الثانية و شد ليها يديها ... بقات كاتشوف فيه الخلعة شاداها من ساسها لراسها
يونس: صافي ماوقع والو رضي بالك
زير على يديها و قربها ليه و كملو طريقهوم ... تعلقات عيون لينا على جلابة جاهزة سخونة بحال الفراشة فالرمادي فيها سفيفة من لفوق تال لكرش ... عجباتها بزاف و لكن ماهازاش الفلوس لكافيين عارفاها غاتكون بشي 200 درهم ولا كتر و مابغاتش تقولها ليونس تبرزطو ... صدفة ضور وجهو و شافها كاتشوف فيها و قال
يونس: زيدي نشوفو داك المحل واش فيه شي حاجة

مشاو ليه و عقلها مع الجلابة رحب بيهوم مول المحل و نيش ليه يونس لجلابة و جبدها ليه و لينا مابقات فاهمة والو 
يونس: سيري قيسي هادي بغيت نشوف كيفاش غاتجيك
عطاها ليها و مشات لبلاصة لقياس و بقا هو واقف برا كايشوف فبلاصة لقياس راض لبال لا يقرب شي واحد تما ... بعد وقت قصير خرجات لابسها جاتها على طايتها زوينة و سخونة ... قلبات على يونس بعينيها لقاتو برا واقف و مشات جيهتو و ضورات عينيها لقات بنت شابة فمقتبل العمر كاتشوف يونس باغة تاكلو بعينيها ... خنزرات لينا و مشات عندو لغيرة كاتاكل فيها من لداخل شدات ليه فيديه و جراتو لداخل المحل مافاهم والو
لينا: بقا هنا ماتخرجش برا (كاتشوف جيهة لبنت) و بقا هاكدا عاطي بضهرك
يونس:(بدهشة) علااش ! اش واقع (بغا يدور وجهو و جراتو ليه بيديها) لينا: شوف فيا انا ... كيجاتني هادي
يونس: زوينة ساتراك بعدا و جات معاك
لينا: غانمشي حيدها و نجي ماتتحركش
مشات لبلاصة التبدلات و بقا هو واقف منوي بغا يعرف اش شافت حتى دخلاتو ... خرج برا ضور عينيه و بانت ليه بنت واقف حشمانة كاتشوف فيه و تضور عينيها طالقة زينها و متبتة كاتهضر مع مرا و مرة مرة تشوف فيه و تضحك بالقياس ... حرك يونس راسو يمين و يسار بمعنى لا حول ولا قوة إلا بالله و دار يديه فجيبو دخل و ابتسامة على وجهو عرفها غارت عليه و هادا دليل على أنها كاتحس بشي حاجة جيهتو ... خرجات لابسة لحوايج باش جات و فيديها الجلابة ... مشات عندو و شافتو مبتاسم ليها و خدا من عندها الجلابة و مشا عند لبائع تاوا معاه و خلصو و رجع عندها دايرها بلاصتيكة
لينا: لاش شريتيها
يونس: عجباتني و شريتها نيت باش تتسرتي شوية
لينا: شكرا
يونس: باراكة عليا من شكرا ماتبقايش تقوليها انا وياك مابيناتناش شكرا فهمتي
لينا: واخا صافي
وصلو لخرجة ديال لمحل و تخشات فيه شدات فيديه و شبكاتها مع ديالها بحال الا كاتقول لناس هادا راه ديالي و هو فرحااااان لأقصى لحدود

بجيست صغير دارتو بسباب غيرتها خلاتو ينسا لموشكيل لي كان بيناتهوم قبل ساعتين ... ضور يديه على خصرها و فيديه الثانية لبلاصتيكة بدا كايهضر معاها و يدردشو و يضحكو و يضورو فالسوق و فينما تعجبو شي حاجة يمشي يشريها ليها مامسوقش للفلوس حيتاش عندو لخير و البركة جامع راسو و جامع الحصيصة نييت عاد فلوس العمارة و فلوس الصالير ديالو مامحتاج والو ... اذن الضهر و مشاو للمسجد
يونس: حبيبة تسنايني هنايا نصلي و نجي
حركات راسها بالإيجاب و دخل يتوضا و بقات واقفة كاتسنا فيه و بان ليها قدامها واحد مول كروسة كايبيع دي بورتكليي بالأسماء .. مشات عندو بدات كاتقلب على اسم يونس بقات كاتبقشش و تجبد و تعاود بالكشايف باش لقات اسمو خشبة صغيرة منقوش عليها اسم يونس بالأسود بالخط العربي فيها علاقة ... خرج يونس مالقاهاش ضور عينيه و بانت ليه عند مول لكروسة و مشا عندها وقف عليها
يونس: ياك قلت ليك ماتتحركيش
لينا: بغيت غير نشري بورتكليي
يونس: تسناي حتى نخرج ديك الساعة
لينا: صافي ماوقع والو
جبدات لفلوس من صاكها و شد ليها يونس يديها
يونس: تاني ا لينا !
لينا: وا ماجاتش تخلصو و انا شارياه ليك غاتكون بحال الا شاريه لراسك
طلق من يدها مالقا مايقول حيتاش عندها لحق ... خلصات السيد و تمشاو بعيد عليه
لينا: هاك
جبدات ليه لبورتكلي خداه من عندها عجبو الشكل لي ختارت دار فيه السوارت و خشاه فجيبو و على وجهو ابتسامة رضى ... عنقها جنب و باسها فراسها
يونس: شكرا
لينا: اش قلتي مابيناتناش شكرا
يونس: وي وي قلتها ا حبيبة (حل ليها باب طوموبيل) طلعي ا نوارتي
طلعات و الضحكة مافارقاتش وجهها حطات لبلاصتيكات لور و طلع هو ديمارا و مشا نيشان لشواية كايعرف مولاها ... بلاصة لوطو و هبطو مشادين ... مشا اولا عند جزار حدا مول الشواية عبر ليه نص كيلو كفتة تحت نظرات يونس لي كايقلب و يشوف اش غايطحن ليه ... تطمأن من جودة اللحم و خلاه يطحنها .. خلصو و عطاه الكفتة داها لمول الشواية عطاها ليه باش يشويها ... اما لينا و يونس فجلسو فطبلة عادية بكراسا عاديين مقابلين مع الشواية و كايشوفو داكشي كايطيب ... بعد ربع ساعة تحط قدامهم طبسيل عامر كفتة مشوية مع البصلة و ماطيشة و الخبز و الملح و لكامون .... طاحو فيه عميين لينا ماعقلاتش على يونس ماكاين غير الله يعطيك صحيحتك
يونس: تبارك الله ههههه ياكما نزيد شي نص كيلو
لينا: (فمها عامر) لا باراكة شبعت ... الله... و الله الا بنييييين
يونس: واش ديما شهيتك هاكدا ولا غير ليوم
لينا: فاش كاتقرب تجيني ليغيكل كانولي هاكدا غير كانتشها و غير كاناكل 
يونس: ياكما مشهية شي حاجة وحداخرا
لينا: مشهية نسوق
يونس: تسوقي بيكالة
لينا: وا طوموبيلة قالاك
يونس: كاتعرفي !
لينا: لاااا ... تعلمني ? 😁
يونس: خفتك تخشي ليا طوموبيل فشي حيط
لينا:(بدلع) دابا الطوموبيل حسن مني
يونس: امري لله ليوم غانودع طوموبيلتي مسكينة
لينا: صافي بلاش ماقلت ليك والو (قلبات وجهها)
يونس: وا باراكة من لفشوش نوضي غسلي يديك و زيدي قدامي نديك لشي خلا باش تسوقي
لينا: (بفرحة) بصح
يونس: علاش انا نقدر نخلي نوارة قلبي مقلقة مني
بتاسمات لينا بخجل و ناضت غسلات يديها و شافت فالمرايا وجهها احمر و مزنك و جا موراها شافيها فالمرايا
يونس: الحنيكات حومر نعام اسييي كايشهيو فالبوسة
تحنا عندها و باسها من خدودها و هربات ليه ... غسل يديه و تبعها لقاها طلعات لطوموبيل ... ركب و ديمارا و كل شوية يغازلها ولا يضحك معاها حتى بعدو شوية على اكادير و وقفو فالخلا و وقف طوموبيل
يونس: هبطي و ضوري عندي
دارت داكشي لي قاليها حلات لباب لقاتو مفارق مابين رجليه داير ليها بلاصة و هي بكترة لفرحة ماسوقاتش و جلسات بين رجليه و جا ضهرها لاصق مع صدرو ... تحنا عندها و نفسو كايضرب فعنقها كايهضر و يشرح ليها كل حاجة ديالاش و هي متبعة معاه واخا شاداها التبوريشة ... بقا شحال كايحفضها و مع عقلها خفيف شدات داكشي دغيا و دازو للتطبيق ... ديمارا لوطو و حطات يديها على لفولون و حط يديه فوق ديولها بداو كايتحركو بشوية و كايوريها فين تحط رجليها ... شوية بشوية حتى بدات كاتتعلم و كاتسوق واخا باقة ماعارفاش شحال من حاجة الا ان داكشي لي كايقولها يونس كاتبعو بالحرف الواحد ... ببطء حيد يديه من على يديها و حطهوم على خصرها ... كايدوز يديه ببطء عليه و راسو فعنقها كايشم ريحتها و التبوريشة شاداها فجميع أنحاء جسمها ... غمض عينيه و طبع قبلة على خدها و داز لودنها باسها فيها حتى تسمعات فقلبها ... فرانات على غفلة و شدها باش ماتتجرش مع قوة الفران و بقا كايدوز يديه على خصرها من فوق الحوايج و كايطبع قبل على خدها ... استحلاتها و نسات راسها و غمضات عينيها كاع دفاعاتها خارت قواهم حطو السلاح قدام لمسات يونس ..اما هو ترفع و غمض عينيه و هبط بالقبل لعنقها و بدا كايزير على خصرها شوية بشوية ... حطات يديها على ركبتو و زيرات عليها و عينيها مغمضين مرفوعة حتى نطقات بإسمو
لينا: يوووونس
حبس التقبيل و حل عينيه كاينهج بذكرها اسمو رجعات ليه عقلو و الوعي ديالو و عرف اش كان كايدير ... تدارك الموقف و حل لباب و خرج 
يونس: سدي عليك لباب 
سدات لباب و خلاها جالسة دايخة باقة الشهوة غالبة عليها اما هو فندم و لعن الشيطان حيتاش عرف راسو كان غادي يزبلها فلحظة ضعف ، جسدو سخون عقلو مع منحيات جسمها المغرية و على فمو كلمة وحدة اعوذ بالله من الشيطان الرجيم كل شوية يضور يشوف فيها و يبغي يرجع يكمل لي بداه و لكن كايضارب مع راسو و كايرجع يبرد على راسو بالريح لبارد لي كايضرب فيه

بقا كايقرا القرآن و كايتمشا غادي جاي و راسو سخوون ... برد عليه الراس و تكالما و ضار شاف فيها لقاها رجعات لبلاصتها مكمشة عاد عرفات اش وقع و تندام معاها لحال ... ناض و مشا حدا طوموبيل وقف حدا الشرجم من جيهتها و دق جوج دقات فالزاج ... هزات راسها مخلوعة كاتشوفيه خافتو يجي يغتاصبها
يونس: هبطي الشرجم
هبطات الشرجم شوية باش يتسمع الصوت بوضوع و لخوف باين فعيونها ... تحنا و شافها مبتاسم
يونس: غير حلي عليا لباب ماتخافيش بردت دابا ماغاديش نقيسك
حسات بالصدق فهضرتو و حلات لبيبان و ضار حل لباب دخل لوطو و ضار شافيها
يونس: سمحي ليا (حك مؤخرة راسو) سخنتيني و ماتحكمتش فراسي (شاف الساعة) ااااي ساعتاين و انا تما عاد بردت (شاف فيها خايفة و شد ليها فيديها) ماغاديش ندير شي حاجة تضرك ا حبيبة تيقي فيا راه غير ترفعت و مابقيتش حاس براسي اش كاندير كون مانطقتي بسميتي كون درنا لولاد (دوز يديه على خدها) واش بصح ماعمركي تصاحبتي
لينا:(بصوت خافت) لاا
يونس:(بتاسم) ماعمر شي واحد قاصك كيفما كانقيصك!
لينا:(بخجل) ماعمر شي واحد قرب ليا من غيرك
يونس: بغيت نقولك مابقيتش غانقرب ليك حتى نتزوجو و لكن الغالب اللّٰه كانضعف قدام هادو (دوز صبعو على شفافها) كانقسم بالله ماندير معاك شي حاجة قبل ماتولي مراتي من غير بوسة ولا تعنيقة نتي بنت نقية و غانخليك نقية حتى نتزوجو ... اش بان ليك نمشيو لنايت كلوب راه دابا الثمنية
لينا: لي بان ليك
يونس: واخا نمشيو ليه (ديمارا لوطو) اوا تعلمتي تسوقي ولا لا
لينا:(بخجل) شوية شديت شي حاجة
يونس: شديتي بزااااااف (تنهد) ناري يا سليعفانة ياكما ساحرة ليا راه ماعمر هاكدا وقع ليا مع شي بنت
لينا:(عقدات حجبانها و ربعات يديها) مدوز بعدا عرام ديال لبنات
يونس: داكشي قديم و غير تدواز وقت مي نعطيك عهد الله ا حبيبة يا ماعمرني درت مع شي وحدة علاقة جنسية
لينا: و اش كاتدير معاهوم
يونس:(تنهد) مابغيتكش تتقلقي راه داكشي قديييم
لينا: وا غير جاوب
يونس: بوش ا بوش و قيس هنا دوز يديك هنا الى اخره
لينا:(تعصبات) مزيان(ضورات وجهها جيهة الشرجم)
يونس: قلت ليك غادي تتقلقي اوففففففف
لينا: لا عادي اصلا هاداك سوقك
يونس: لينا نتي لي كانبغي (شد فيها و عين فالطريق عين فيها) داكشي قبل مانتلاقا معاك و الله هاكي قلبي بورطابلي بلوكيتهوم من لفيسبوك و من لواتساب ماعندي ماندير بيهوم
لينا: داكشي ماشي شغلي
يونس:(هز يدها باسها) وا صافي فكيها شوية (بلاصة لوطو و سكتها) و الله ماعمرني بست شي وحدة كيفما كانبوسك ولا حتى قصتها كيفما قصتك (ضورها عندو لقا عينيها مغرغرين بالدموع) ينعل طواسلي انا لي بكيتك ... لينا بلييز (مسح ليها دموعها) دابا لاش كاتبكي و اللّٰه ماكانخونك
تلاحت عليه عنقاتو كاتبكي فصمت و كاتشهق مزيراه و قالت
لينا: علاش تبوسهم علاااش😭 (كاتضربو فضهرو) ماتقربش ليهوم تبغيني نقولك حتى انا باسني واحد و قاصني (شهقات) ماخصكش تقيس شي وحدة 😭😭😭
يونس: حمار كلب ماكانسوااااش (كايدوز يديه على ضهرها) هاداكشي داااز ا حبيبة ديالي لي جاي فيه غير لينا بوحدها حيتاش انا ديالك و نتي ديالي شششش (زير عليها) عارف بقا فيك لحال و لكن راه و الله ماكانتعامل معاهوم كيفما كانتعامل معاك
لينا:(شافت فيه) حلف بالله
يونس:(كايمسح ليها دموعها) اقسم بالله يا ماعمرني درت مع شي وحدة كيفما كاندير معاك نتي راكي حبيبتي و قريب تكوني مراتي و قلبي (حط يديها على قلبو) و قلبي خديتيه مني صافي دابا باراكة من لبكا (مسح ليها عيونها) وعد مني ماعمرني نخونك ولا نقرب لشي وحدة غيرك ... شنو دابا نهبطو نسهرو ولا ناكلو فشي بلاصة عاد نمشي لنايت كلوب
لينا:(بخجل) بغيت طواليط
يونس: ههههه واخا
هبطو بجوج و قفل لوطو و شد فيديها دخلو لوطيل مشاو لجهة لقهوة ... جلس هو فطابلة و هي مشات لطواليط جا عندو السرباي كونسوما لي بغا و رجعات عندو وجهها صفر ... جلسات حداه و بقات كاتضور فعينيها حتى لاحظها يونس
يونس:(ضور يديو عليها) حبيبة مالك
لينا: لا والو (كاتلعب بيديها)
يونس: لا بيك شي حاجة ياكما بسل عليك شي واحد !
لينا: لا لا ماشي داكشي
يونس: و شنو مالكي ! قالك شي واحد شي حاجة !
لينا: لا حتى واحد ماهضر معايا
يونس:(بقلة حيلة) و شنو كاتضرك شي بلاصة !
لينا: فيا ليغيكل و مادايراش اولويز
يونس:(فرد ملامحو) خلعتيني عليك يا سليعفانة ... شنو دابا نمشي نجيب ليك اولويز !
لينا: اه راه خاصاني
يونس: واخا تسناي هنايا ياك انا نمشي نجيبها ليك ... ياكما غاتبغي تبدلي
لينا: اه ضاروري
يونس: غانجيب ليك داك سروال دجين لي شرينا قبيلة ياك مع دوك دو بياس
لينا: جيب غير لبيكيني بلاش من سوتيام
يونس: واخا (ناض) شوية و نكون هنايا غادي يجيبو لماكلة كولي و شبعي مع راسك و تسنايني
لينا: واخا
بتاسم ليها و طبع قبلة على جبينها و مشا

بقات جالسة كاتضور فعينيها حتى جا السرباي و بابتسامة حط ليها ليها بتي بان و كخييب مل فووي و نص نص كبيرة ليونس و كافي كخيم ليها .. طاحت فداكشي عمية حيتاش من جوج ماكلاتش ... خلات ليه حقو و بقات جالسة كاتسناه حتى بان ليها داخل هاز بلاصتيكة فيديه مبشور فوجهو غير مبتاسم لناس كيفما كانو صغار او كبار ... شافها و كبر ابتاسمتو حتى بانو سنيناتو مستفين بيضين و وقف عليها
يونس: هاكي يالاه سيري بدلي
خدات من عندو لبلاصتيكة و مشات كاتجري لطواليط باش تبدل لديك لحالة لي تحتها اما هو فبدا كاياكل و عمر كرشو و هز راسو بان ليه جاية بدلات السروال لبسات سروال جينز لاصق عليها ... جلسات هداه و حطات لبلاصتيكة و بقات ساكتة
يونس: شبعتي !!
لينا: اه
يونس:(ضار شاف فيها) واش ديما انا لي غانبقا كانهضر وا دوي معايا جبدي موضوع
لينا: اش نقول
يونس: لي بغيتي ... فينها ديك لينا الجعواقة لي لسانها سابقها فين درتيها رجعيها ليا
لينا: انا هي انا 
يونس: نتي حشومية ماكاتبينيهاش فلول حتى كايطول معاك الإنسان العشرة عاد باش كاتبان الحشمة ديالك ... باقة ماتطلقتيش معايا كيفما انا مطلوق معاك
لينا: راه ماعمرني ماكنت مع شي راجل بوحدنا خارجين من غير خوتي بجوج
يونس: انا خطيبك (شد يديها) و قبل مانكون خطيبك كنت عدوك ياكما نسيتي ههههههه زعما واحد لعداوة كانت بيناتنا لا علاقة و الله
لينا: هههههههه ماعمرها تنسا ليا نهار خرجتي من الدوش بالرغوة مقطوع ليك لما
يونس: هههههه شويطينة و خلاص و الله شي افكار الله يحضر السلامة و ديك الريحة ايييفففف كانتفكرها كايشدني الرضاااان كانعس بيها و نفيق بيها و ماعارفش داكشي من اش
لينا: تستاهل ماخليتينس ندخل ندوش قبل منك
يونس: كان خاصنا ندخلو ندوشو بجوج
لينا: فأحلامك 😒
يونس: اشمن بعد شهراين ا حبيبة وجدي راسك سآكل لحلوة لا لا ماشي لحلوة غاناكل لفرماجة 😂😂😂😂
لينا: اويلي اش من فرماج
يونس: غاناكل فرماجتك ا نوارتي و زيدك غاتكون فخبار باباك و خوتك بجوج و ماماك و عائلتك كووووولها الشوهة ايديسيون فينها لبنت مشات مع الراجل باش ياكل ليها لفريميجة
لينا: و الله الا فضيحة
يونس: الاب مسكين سينين و هو حاضي لبنت و فالأخير كايعطيها ليه بييديه و كايتسنا يعرف واش لخدمة دازت مزيانة ولا لا 😂😂
لينا: دابا لاش كاتقوليا هادشي
يونس: بغيت نقشب معاك ... نمشيو لنايت كلوب !
لينا: اه اه يالاه
عيط يونس لسيرفور خلصو و ناضو هزات لينا بلاصاكيتها و حطوها فلوطو و رجعو لوطيل دخلو من بابا فالخلف فيه واحد لبودرة ضارب كولشي كحل واقف عاس ... سلم عليه يونس و دخلو لقاو جو تاني تما كولشي محيح و الموسيقى على الجهد و لبنات و الدراري مخلطين ... جلسو بجوج فوق فوطوي ثدامو طبلة جا معزول شوية على الناس و لكن كولشي كايبان من تما ... ضور يديه عليها و جرها لعندو حتى لصقات معاه و قرب من ودنيها
يونس: عجبك هنا
ضارت عندو و حركات راسها بالإيجاب و كاتلعب برجليها على إيقاع الموسيقى ... جا عندهوم سيرفور و طلبو بجوج عصير و مشا خلاهوم مستمتعين بالجو .. يد مضورها عليها من خصرها و الثانية شادها بيدها الثانية و مرة مرة يهزها يبوسها ... جا السيرفور حط ليهوم المشروبات و مشا خلاهوم كايتعاشقو
يونس: بغيتي تشطحي شوية !
لينا: ماكرهتش
يونس: يالاه نوضي
ناض و جرها معاه مشاو لحلبة الرقص كايشطحو بحال لحماق ماكاينينش حركات محددين غير كايتحركو و يتمايلو مرة يونس يضورها مرة هي تضور عليه و الضحكة واصلة ليها حتال لودن فرحانة لأقصى لحدود ... عياو بالشطيح و رجعو لبلاصتهوم جلسو شربو مشروباتهوم ... قلب الساعة لقاها العشرة
يونس: نوضي ا حبيبة باراكة راه العشرة
لينا: ااااي دغيا داز لوقت
يونس: باقة بلاصة وحدة نمشيو ليها
جرها من يديها و خلص المشروبات و خرجو كايضحكو ... مشاو لباركينك ركبو فلوطو و ديمارا بسرعة وصل لاكوط... بلاصا لوطو و هبطو جبد ايزار من لكوفر و شد فيديها و هبطو لحدا لبحر و لجو بارد ... فرش تما مقابلين مع لبحر و المكان شبه خالي لباشار قليل تما ... جلس و جرها من يديها حتى طاحت عليه و جلسها حداه و نعس فوق رجليها و يديه فيديها ... خشات يديها فشعرو كاتلعب فيه و حاطا يديها الثانية على وجهو كاتدوز يديها بكل نعومة عليه و حتى هو غمض عينيه و مرتاح مع لمساتها و فينما تقرب يديها من فمو كايطبع قبلة على يدها
يونس:(مغمض عينو) عجبك هاد النهار !
لينا: ااه زوين بزاااف خاصنا نعاودوها 
يونس: ضاروري فاش نتزوجو نبقاو ديما نخرجو هاكدا
لينا: قبل كاع الزواج علاش نتسناو حتال لديك لوقت
حل عينيو و جلس بسرعة و شاف فيها
يونس: حبيبتي انا غدا غادي مسافر
لينا: لفين !
يونس: لكازا سالا لكونجي و خاصني نرجع للخدمة
لينا: كيفاااش !!? 😨

يونس: ماتخافيش قبل لعرس غادي نجي
لينا: غاتمشي شهرااااااااين مايجمعها غير لفم
يونس: ماشي لخاطري لخدمة ا حبيبة
لينا:(تقلقات) صافي سخيتي بيا
يونس:(جرها لصدرو) ماعمرني نسخا بحبيبتي راكي نوارة قلبي و لكن ماعندي ماندير خاصني نرجع
لينا: (ضورات يديها عليه) مابغيتكش تمشي غاتغبر عليا تاني
يونس: ههههههه واش لي عندو هاد الزين كامل غادي يقدر يغبر عليه يوميا غاندوي معاك و نديرو ا بيل فيديو باش تشوفيني و نشوفك و هاد المرة ماشي بحال ديك لمرة دابا انا وياك مخطوبين و غانوجدو لعرسنا
لينا: اوفففففف واخا سييير
يونس: غاتوحشني !
لينا:(زادت تخشات فصدرو) لاااا
ضحك يونس ضحكة رجولية خلات عينيه يتسدو
يونس: مني ماغاديش تتوحشيني لاش كاتقولي ليا ماتمشيش
لينا: هاكداك بغييت
يونس: كانبغيييك ا مغيارتي (باسها فراسها) صافي دابا مزياان
لينا: شوية
يونس: واخا نبقا معنقك ياك هانية
ماجاوباتوش و بقات مخشية فيه كاتشوف فالبحر و كايسمعو صوت إنكسار الأمواج و البرد كايضرب فوجههم جو رائع واخا بارد ... طلقات من يونس تدريجيا واخا هاكداك باقة حزينة مابغاتوش يمشي حيتاش غادي تتوحشو ولفاتو حداها ولفات هضرتو و قبلاتو و همساتو و لمساتو و ضحكتو و عيونو و حروفو .. هبطات راسها شافتو حط راسها فوق فخاضها و شاد يديها فيديه ... دوزات يديها على جبهتو و عينيه متبتين عليها حتى هو غايتوحشها ماباغيش يمشي و لكن عندو التزامات خاصو يرجع ليهوم ... تنهد بحرقة و عينيه متبتين عليها و تابع لمساتها لي كانو على وجهو لمسات حنينة خلاتو يترخى و مع الجو لي محيط بيهوم كملو معاه ... ضورات راسها يمين و يسار مالقات حد و تحنات عندو باستو فجبهتو ماعارفاش علاش باغة تبوسو فقط تابعة احساسها ... نزلات لنيفو طلعات عليه قبلة صغيرة و نزلات لشفافو تخالطو الأنفس و حطات شفافها على شفافو و غمضات عينيها و هو كذلك هز يدو لوخرا ضورها على عنقها و زاد هبط ليها راسها أكثر حتى تحكم و بقاو كايتبادلو لقبل حتى تقطع فيها النفس و بعدات عليه كاتلتاقط انفاسها و حلات عينيها لقات عينيه معسليين كايشوف فيها ... هز يديها داها جيهة قلبو و حطها فوقو لقاتو كايضرب بحال الا كايجري
يونس: هادا ماعمرو ضرب لشي وحدة حتى جيتي نتي ... غادي نتوحشك بزاااف و لكن ان شاء الله غادي نرجع و نديك معايا عروسة مكتوبة على اسمي لينا يونس الهلالي
اكتفت بأنها تقبلو على جبهتو و بثاو هاكداك شحال هو على رجليها و يديهوم مشبوكين كايهضرو و البحر قدامهم منضر يرجع الروح ... لحق الوقت باش ترجع لدار و جمعو ليزار و ناض يديها فيديه و رجعو لوطو ديمارا نيشان لدارهم ... الشارع خاوي و الزاج فيمي لقاو راحتهم
يونس: رضي بالك لراسك باغة تخرجي علميني و يخرج معاك شي واحد و فالخدمة ماتهضري مع حد و الى عيط عليك داك لكلب قوليها ليا و ماتلبسيش مزير و المعري ماتنوضيش الصداعات و المشاكيل و ماعمرك تحيدي الخاتم من صبعك
لينا: واخا واخا صافي مايكون غير خاطرك
يونس:(باسها فيديها) يالاه سيري قبل مانخطفك
قربات منو و باستو فخدو و هزات لبلاصتيكات و هبطات مشات لحدا دارهوم بقات واقفة كاتدير ليه باي باي حتى مشا و دخلات لدارهم

جالسة فبيتها لابسة بيجامة فالرمادي سخوونة طالقة شعرها دايرة ملمع شفاه شادا تيلي فيديها كاتضحك و شادة خصلة فصبعها كاتضورها بكل أنوثة
لينا: فين غاتمشي !
بان وجه يونس فتيلي لابس سيرفيط فالأسود من نايك و مطلع شعرو و مجبد كايشوف فتيلي
يونس: وا قلت ليك لاصاااال حلي ودنيك شوية
لينا: لاصال تاني فين زايد باقي باراكة عليك
يونس: غانوصل لواحد الحد و غانحبس لحديد ... اوا اش درتي ليوم
لينا: والو غير الدار صافي حتال غدا و نبدا لخدما تاني
يونس: ليوم الحد ماكاين حد ... ياكما كايبسل عليك شي واحد
لينا: لا لا
يونس:هممم مزياان ... توحشتك
لينا:(كاتضور فعينيها) مزياان
يونس: مازال ماغاديش يحن عليا ربي و تقولي ليا كلمة زوينة
لينا: (قلبات لموضوع) ايمتا غادي تجي
يونس: باقي شهر لعرس ياك الوغ سيمانة قبل منو ... ااااييي دغيا داز شهر
لينا: وايييه دغيا كاع ماحسيتش بيه
يونس:(طلع حواجبو) ماحسيتيش كااع
لينا: و الله ماحسيتش 
يونس: ااااو قدو قداش و ماحسيتيش بيه
لينا: ماطويلش بزاف
يونس: كاع داكشي و ماطويلش شحال بغيتي يكون فيه على هاد لحساب
لينا: مانعرف
يونس: خاصك نتي حنش يالاه تحسي بيه
لينا: علاياش كاتهضر بعدا نتا
يونس: على الإحساس ههههههه وا حمقة صافي و الله شوفي اش قلتي
لينا: قلت ليك ماحسيتش بيه اش فيها
يونس:(ابتسامة جانبية) دابا تحسي بيه ا حبيبة دابا تشوفيه و تعبريه كاع نتي الا بغيتي
لينا: (بتساؤل) علاياش داوي
يونس: على لحنش بو سكة لي غادي يعضك بعد شهر ههههههه مهلية بعدا ففرماجتي
لينا: اشمن فرماجة !
يونس: لفريميجة لي عندك
لينا: وا اشمن فرماجة مافهمت والو و اشمن حنش
يونس:(ضرب جبهتو) وا مكلخة من الطراز الرفيع حتى نجي لأكادير و نوريك الحنش و حتى لفرماجة غير صبري غانفدي فيك القديم و الجديد (سيفط ليها بوسة فالهوا)
لينا: واخا واخا حتى تجي ... بوحدك فالدار
يونس: لا جايب الجيران مجلسهوم عندي ... وا بوحدي راه باينة
لينا: غير سولتك حيتاش سمعت التخرشيش
يونس: غايكون غير شي فار كايقلب على مايقصي
لينا: اويلي على فار 😨
يونس: و مالو مسكين ماعندوش حق يعيش
لينا: عندك لفيران فالدار لا لا اخويا بدل الدار عاد جيبني تما
يونس: يخوي ليك الجناب باش تقول حبيبي كاتقولي خويا يا هاد الزماكورة
لينا:(عوجات فمها) الى عندك لفيران غير بدل الدار ولا و اللّٰه مانخوي دار باا
يونس: غير كانضحك معاك حتى نتي خاصك غير السبة ... غير شي بلاصتيكة حركها لبرد ... لمهم حبيبة حتال ليل و نهضرو انا غانمشي لاصال دابا هو هادا لوقت
لينا: يالاه الربعة مازال لحال
يونس: ا نوارة قلبي راه يالاه نبدل و نوجد راسي و نمشي غانوصل مع الخمسة كيف ديما
لينا: واخا صافي و سيفط ليا التصويرة كيف ديما
يونس: نتي آمري و أنا ننفذ ا نوااارتي
لينا: منين جبتي هاد نوارة قلبي كنتي كاتقولها لشي وحدة
يونس: شهر و الصرف و انا كانقولها ليك يالاه رضيتي ليها لبال اححح معامن انااا ... لا الالة نتي لمن قلتها بوحدك نتي دايرة بحال شي وريدة و النوارة جات معاك و حيتاش نتي ديالي جات معاك نوارة قلبي فهمتي
لينا: همممم فهمتك ... اش مسميني بعدا فالتيلي
يونس: نوارة قلبي نييت و نتي
لينا:(كاتضور عينيها) سير سير مشا عليك لحال
يونس:(ناض) غير مني قلبتي لموضوع باينة لقاضية حامضة قولي اش دايرة ليا
لينا: ضاروري تعرف !
يونس: ااه بغيت نعرف (دخل لبيت النعاس) غير قولي ماغانتقلقش
لينا: دايرة سميتك
يونس:(بحزن) شوية بشوية حتا تتبدل و تولي حياتي و قلبي ولا رجيلتي (غمزها) يالاه بسلامة عليك ا حبيبة
لينا: بسلامة
قطعات المكالمة و تنهدات و شافت اش دايرة ليه فالإسم ... مكتوبة my life (حياتي) ماقدراتش تقولها باقة كاتحشم منو كاتبغي تعبر ليه حتى هي و تقول داكشي لي كاتحس جيهتو و لكن ماكاتقدرش الحشمة كاتطغا عليها بزااف و الهضرة كاتوقف فحلقها و كاتبقا غير كاتضور فعينيها و يتزنكو حناكها ... ناضت مشات لكوزينة هزات طرف من لكيكة لي كانت مطيبة السعدية مع كاس اتاي و رجعات لبيتها هزات لبيسي و طلقات فيلم رومانسي بقات كاتفرج فيه و كاتاكل حتى مشااات مع لفيلم ... سمعات صوت تيلي ديالها هزاتو شكون غيرو لي غايسيفط ليها ... عرفاتو هو قبل كاع ماتدخل للواتساب .. دخلات للمحادثة لقاتو مسيفط ليها تصويرة تيليشاراتها و دخلات ليها جالس فوق كرسي مقابل مع المرايا لابس شورط قصير فالبلو مارين و لفوق ديباردور فالبرتقالي و فرجليه صبرديلة جامع شفافو على شكل بوسة و شعرو طالع لفوق و الآلات ضارين بيه ... ابتاسمات و حطات تيلي كملات لفيلم ديالها

فاقت على صوت المنبه .. هزات تيلي سكتاتو و تكسلات و ناضت كاتحك فعينيها جارة رجليها ماحاملاش تنوض و لكن بزز منها ... مشات لطواليط غسلات وجهها حكات سنانها و قضات حاجتها ... خرجات من الطواليط تكسلات مزيان حتى طرطقو عضامها و رجعات لبيتها طلات من الشرجم لقات الجو بارد مشتوي ... جبدات سروال رمادي لبساتو مع قميجة بيضة هابطة مغطية مؤخرتها و فنفس الوقت شييك ... جبدات جاكيط رمادية سخونة لبستها و خرجات من لبيت مشات تفطر لقات باها فايق و خوها كذلك و ختها سمر و امها حطات لفطور و مشات نعسات ... جلسات معاهوم كبات ليها اتاي و بدات كاتاكل
معاذ: ليوم راه عارض علينا أمين للغدا بلا ماتجي هنايا سيري لدارو نيشان صافي
لينا: واخا صافي
كملات ماكلتها و ناضت رجعات لبيتها مشطات شعرها و فرقاتو من النص جرات خصلات من اليمين و اليسار جمعاتهم لور و خلات شعرها مسرح مطلوق ... دارت كات ايلاينر و ملمع شفاه فالغوز مفتوح ماط ... لبسات ساعة بيضاء فيديها ليسرية و خلات خاتم الخطوبة فيديها و السنسلة فعنقها ... ناضت جبدات صبرديلة بيضة فيها علامة اديدياس بالأسود مع تقيشرات بيضين ... جبدات صاك ابيض من غوتشي دارت فيه مسائلها و هزات تيليفونها و خرجات لزنقة ... شدات اول طاكسي لقاتو و حطها قدام لبنكة ... دخلات مشات لبيرو ديالها و بدات خدمتها بنشاط كيف ديما حتا لحقات العشرة و وصلها ميساج ... دخلات فيه لقاتو يونس
يونس: هاد الصباح فاش فقت تفكرت فاش نعستي حدايا ليل كولو فاش كنا فإيفران فاش فقت بقيت كاندوز يدي على وجهك و نتي غارقة فنعاسك كاتباني زوينة فكل حالاتك توحشت نشوفك هاكداك تاني ناعسة براحة و انا حداك ... كانبغيك ا نوارة قلبي❤
ترسمات ابتسامة على شفافها و تزنكو حناكها عجباتها هضرتو و طلعات ليها لمورال كتر ماهو طالع ... هزات تيلي باش تجاوب كاتكتب و تمسح حتى كاتكتب ليه حتى انا كانبغيك و كاتمسحها ماعندهاش الجرأة باش تسيفطها ... بقات كاتكتب و تمسح تكتب و تمسح صراع داخلي رونها و فالأخير اكتفت بشكرا مع قلب و رسلاتها ليه ... حطات تيلي كاتحسر على حالتها الشخص لي كاتبغيه ماقادراش توصل ليه مشاعرها حاجز بينها و بينو ماقادراش تحيدو و خلاها تبان باردة المشاعر واخا عارفها كاتبغيه غير ماغاديش يتأكد حتى يسمعها بودنيه ... كملات خدمتها و كل شوية تتنهد لحق وقت الغدا و ناضت هزات تيلي لقاتو شاف الميساج و ماجاوبهاش او بالأحرى مالقا باش يجاوبها و اكتفى ب vu ... شدات طاكسي حطها فالدشيرة و هبطات مشات لدار أمين .. دقات و حلات ليها رانيا بإبتسامة و سلمات عليها بالوجه و دخلات لقات خديجة و السعدية و هند جالسين تما مجمعين ... سلمات عليهوم و جلسات كاتهضر حتى هي معاهم لاحظو بلي نضجات شوية و تبدلات مابقاتش مبرهشة فتصرفاتها و فهضرتها بدلها يونس شوية و خلاها تتحسن بالنصائح ديالو لي ولات كاتسمع ليهوم ... دخل أمين سلم عليهوم كاملين و جلس معاهوم شوية دخل معاذ و تبعو عزيز و حمد و موراهوم جات سمر ... جلسو كاملين فالصالون كايهضرو صوت الرجال العالي و قهقهات النساء خلقو واحد الجو فشكل ... صونا لباب و ناض أمين حلو و بدا كايتسالم مع راجل متين لبنية نوعا ما شعرو اسود كثييف عينيه لوزيتان .. كايتسمع صوت الضحك ديالو فالدار كلها ، داه أمين لصالون و دخل عليهوم لقا السلام بصوتو الحرش و هزات لينا راسها لقاتو عبد المنعم كايضحك لابس سروال جينز مع تريكو ديال الصوف فالأسود ... ضور عينيه فالموجودين و بانت ليه هي و تصدم .. حدر راسو و حيد صبرديلتو و دخل سلم عليهوم حتى وصل لعندها و سلم عليها و عينيه على يدها شاف الخاتم و زاد تأكد بلي بصح تخطبات و تنهد و كمل السلام و جلس ... بقاو مجمعين حتى طاب لغدا رفيسة بالدجاج البلدي على حقها و طريقها .. دارو جوج حطات وحدة الرجال و لوخرا للعيالات جوج قصريات عامرات بالتريد و كل دجاجة فقصرية .. سماو الله و بداو كاياكلو و كايشكرو فطياب رانيا حتى كملو و جابت ليهوم الغسيل غسلو و جابت الديسير حطاتو ... كلاو منو شوية و هزاتو جمعو الدنيا و بقاو مجمعين و منعم مرة مرة يهز عينيه يحطهم على لينا و يضور وجهو ... جلسات هند حدا لينا و بقاو مجمعات
هند: اوا اش خبار حبيب لقلب
لينا: لاباس عليه
هند: احح تاني الناس ولاو كايحبو ههههه عتارفتي ليه بعدا ولا باقة حشمانة
لينا: ماقلت ليه والو حتى كانبغي نطقها و كايتسد ليها حلقي ماكانقدرش كاتجيني فشكل
هند:هاكي (قلزات ليها) دابا طلعي ليه فالراس و يمشي و يخليك الرجاال ا لهبيلة كايبغيو لي لسانها حلو ماكاتنقط غير لعسل
لينا: و منين عارفة هادشي
هند: اوا ياختي الكروبات لي فالفيسبوك فيهوم العجب ... كوني لحلاحة تغزلي فيه شكريه كل شوية حبيبة قلبي حياتي ماشي الجفاف راه هو براسو غادي يشكل غايقول هادي ماكاتبغينيش
لينا: راه ماكانقدرش
هند: اوا صافي غير صلي ليه دابا طيرو ليك شي وحدة قبل لعرس تلقايه فرخ مع شي وحدة
لينا: لا يونس ماشي من داك النوع (جاها ميساج) هاهوا سيفط ميساج
دخلات ليه لقاتو سيفط ليها
يونس: اش كاتديري ا حبيبة
هزات تيلي باش تصور ليه اش كاتدير و بدات هند كاتبوزا و لينا كذلك و حتى صورة ماصدقات ليهوم ... سد يونس عاد تقادات ليهوم الصورة و سيفطاتها ليه ... لحق وقت الرجعة و تسالمات مع كولشي و منعم تاني طول فيها الشوفة و يدها فيديه ماسخاش بيها تمشي ... جرات يديها و مشات خرجات شدات طاكسي و مشات لخدمتها

تعاشت لعشية و رجعات لدارهم بدلات حوايجها لبسات بيجامتها مسحات وجهها من لماكياج و خرجات دارت كاسكروط مع السعدية و سمر و رجعات لبيتها هزات لبيسي خدامة فيه حتى بدا تيلي كايصوني ... لقاتو يونس جاوباتو بلا ماتعطل
لينا: (بصوت حنين) الوووو
يونس:(معصب) شكون كان فالدار ليوم عند رانيا
لينا: علاش ! مالك
يونس: (كايحاول يكالمي راسو) جاوبي ا لينا
لينا: كنت انا و ماما و بابا و خويا و ختي و خالتي و هند و عمي حمد و و و 
يونس: شنو و و و تكوانسيتي شكون كان تاني
لينا: (بصوت خافت) كان منعم
يونس: علاش ماقلتيهاش ليا !!! قولي ليا ا يونس راه كاين واحد الراجل زايد معانا !!! ماشي نعرفها من أمين واش باغة تحمقيني
لينا: دابا مالك كاتخاصم ماوقع والو هو شد قنت و انا قنت ماهضرتش كاع معاه
يونس: سلم عليك بالوجه قوليييييي
لينا: لا واش حماقيتي سلم عليا باليد صافي يونس بلا ماتعصب عليا انا ماعطيتش عليه و مافخباريش واش غايكون تما حتى قرب يتحط لغدا عاد باش جا
يونس: و اش دوك الشوفات كان كايدير فيك !! واش باغيين تحمقوني نااااارييي كون كنت تما غانشرب من دمو
لينا: اشمن شوفات !!!
يونس: دابا نسيفط ليك التصيورات ا الحادكة شنو كنتي باغة تخبيها عليا ولا شنو راه تحصلي تحصلي
لينا: (بصراخ) مالي اش كاندير بالسلامة مادرت لا بيدي لا برجلي و كاتخاصم عليا اوا صافيييييي من الديبار بدينا فهادشي !!! ماكاتيقش فيا قولها و هنينا و زايدون ماشي انا لي عندي سوابق راه نتا ا مسيو علام الله اش كاتدير تما و الى كنت طالعة ليك فالراس و مليتيني بلا ماتفكر تقلب عليا القفة بهاد الستون حيتاش انا مادرت والو فهمتي
قطعات عليه و لاحت تيلي فوق الفراش مفقوسة كاتغدد نوض فيها الأعصاب و الرعدة ... سمعات تيلي كايصوني لقاتو هو ... قطعات عليه و دارت سيلونس خلاتو كايصوني حتى كايبرد قلبو و يقطع و يرجع يعيط و هي مقابلاه كاتشوف فيه و قلبها مشدود عليها ماكاتحملش تتخاصم معاه ولا تقطع هي وياه الهضرة كاتحس براسها ضايعة و المورال غير طايح و حتى حاجة ماكاتعجبها كأن حياتها تسلبات منها ... شافتو حبس من التعياط و رجعات لور ربعات يديها كاتبكي و كاتنخصص ... دازت ساعة ماعيطش باقي فيها و بقات هي فالبيت غير كاتبكي و قلبها مزير عليها خايفة تكون هضرة هند بصح و يمشي و يخليها كيفما قالت ليها ولا يمشي عند شي بنت ... ناضت كاتضور فالبيت كاتحاول تكالمي راسها و لكن ماقدراتش كل مرة كاتطيح فبالها فكرة كاتلوا بالبكا ... شافت تيلي ديالها شعل فيه الضو و مشات كاتجري ليه لقات ميساج من لواتساب دخلات بسرعة لقات يونس مسيفط ليها تصاور ... بقات شحال طالعة اون لاين و مادخلاتش للمحادثة ... فضولها قتلها و ضاروري كان خاصها تدخل ... شارجات التصاور و دخلات شافتهوم الصور ديال لعائلة كلها مصورين على غفلة من طرف أمين و كاينين تلاتة ديال التصاور فيهوم منعم كايشوف فلينا بطريقة غريبة كأنو عاشق ولهان اما هي مامسوقاش و ماشافتش كاع جيهتو ... خرجات من المحادثة و ماجاوباتوش خلاتو مفقوص صبر حتى عيا و عيط ليها ... صونا مرة و قطع و الثانية و قطع تال الثالثة عاد جاوبات كاتداعي القوة
لينا: شنو باغيييي
يونس: حطي راسك بلاصتي وحدة كاتبغيني انا وياها فبلاصة وحدة باش غاتحسي !! ماشي غاتشعل فيك الغيرة ! ماشي غاتخاصمي عليا واخا مانكونش انا معيط ليها ولا اصلا عارفها تما غاتغيييري و هادشي واقع معايا لفكرة ديال ان واحد شبع فيك شوفات و كان معاك فبلاصة وحدة ماكاتدخلش لعقلي و شناهيا علام الله اش كاتدير تما!! غدار انا !? انا ا لينا كانتيق فيك فهمتي مي ماكانتيقش فالباشار لي حداك و راه مازال غانعيط ل أمين نصبنو
لينا: و لكن علاش تغوت عليا
يونس: علاش ماقلتيهاش ليا !? غير شفتيه دخل سيفطي ليا ميساج علميني ماتخلينيش كيف الحمق حتى توصلني لخبار من جيهة ثانية انا ماكانلومكش دابا.. غير قبيلة كنت معصب سمحي ليا
لينا: حتى نتا سمح ليا قلت ليك هضرة بحال الا كانشك فيك
يونس: داك مونعيش مازال غادي نهرس ليه عضامو الى مافرقكش ياكما باقي كايعيط عليك
لينا: لا من نهار هضرتي معاه نتا
يونس: واخا مزيان مي لحساب على تالي (تنهد) نوض فيا الأعصاب كون كان قدامي كون شخشختو
لينا: صافي ماوقع والو لمهم هو ماتبسلش عليا
يونس: كون تبسل عليك كون شديت الطريق جاي لتما بناقص من لخدمة
لينا: صافي ا يونس نساا
يونس: انا غانعيط ل أمين دابا من بعد و نهضرو
لينا: واخا صافي بسلامة (قطعات)

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.