قصة بنت الحومة

من تأليف Ghazal trust
2018قصة كاملة بدون سفالة

محتوى القصة


رواية بنت الحومة لغزال تراست


عندي ليكم شي حاجة مهمة بالاخص المتزوجات او المقبلات على الزواج .
فعقلي قصة قصيرة ولا نقول فيلم قصير كيحمل رسالة لكل وحدة مننا وشفت ليوم واحد النموذج اللي خلاني نكتب هاد القصة قبل ماطير من بالي . قصة غريبة عجيبة كتوقع بزاف لاكن مكنردوش ليها البال ومكنعطيوهاش اهمية .  عطيتها عنوان بنت الحومة حيت لقيتو جد مناسب لهاد القصة وابطالو تقريبا كيشبهو لهاد الابطال اللي فور ما شفت صورهم شفت فيهم الشخصيات الحقيقية .

ghazal trust ✍

في الكوزينة واقفة مرا طويلة ماغليضة ما رقيقة .. لابسة بيجامة زرقاء كاملة مطبعة بليدام .. شعرها الاشقر ناولة منه الصباغة لمنتصف الشعر وجامعاه بمقبط عشواءيا فالسماء .. اطرافو ناشفة وفروت راسها ميدمة كيبانو فيه 3 دالالوان ، ملامح وجها كيدلو على انها فالعشرينات من عمرها لاكن كتبان كبر من سنها لإهمالها بنفسها ... موسطاشها باين ووجها عرقان . عندها حقها من الزين وزيادة لاكن زينها غبر وسط الزغب وأهمالها لنفسها ، اللي يشوف الكوزينة كتشعل بالنقا والدار متولة مفرشة ومرتبة وريحتها مريحة يقول صاحبة الدار خبيرة التجميل ماشي فاطمة الزهراء اللي واقفة فالكوزينة .. حالتها كتبان بحال شي خدامة خاصها غير الطابلية . . . صبعانعا حومر ولحم اللي داير بدفارها منفوخين بالشقاء ، صونا ليها التيليفون من نوع ايفون وهزاتو بصبعها مكالياه بكتفها وجاوبات 
فاطمة الزهراء : االو 
صوت راجل : انا جاي ... خاص شي حاجة نجيبها ؟ 
فاطمة الزهراء : جيب ماطيشة دالحك راه باغا ندير لحريرة للعشاء 
واءل : صافي غير هادشي؟
فاطمة الزهراء : صافي 
واءل: يالاه اتوت الوغ .
قطعات ورجعات للمسمن ديالها .. ماهي الا دقاءق حتى سمعات الساروت كيدور فالباب وتلفتات من لباب دالكوزينة بابتسامة . دخل راجل طويل حتى هوا فاواخر العشرينات ديالو ... عكسها تماما من جهة المضهر ... لحية مقادة كحلة وشعرو ممشوط رطب وجسم رياضي لابس تيشورط كحلة بالكول من نوع بولو ودجين وسيرديلة بيضاء كتشعل ... وسيم فالوجه وزاد اهتمامو بمضهرو زادو وسامة ... هاز فيدو ميكة .. سد الباب ولحق عليها للكوزينة .. وقف حداها يحط الميكة وبدا كيشوف فالروينة اللي غارقة فيها 
واءل: السلااام .... عاوتاني ! انا فين ما نجي نرجع من الخدمة نلقاك غارقة فهاد الكوزينة ؟ شوفي كي كتقطري بالعرق .. شكون غياكل هاد المسمن كااامل وغير انا ونتي فالدار؟!!
ردت عليه وهي كتسرح العجينة بالزيت : غنديرو فالفريكو بلا منبقا طيبو كل نهار ... نحط بيك كاسكروط 
وائل: حتى نرجع غنمشي لاصال دابا . 
فاطمة الزهراء : وا جلس تاكل المسمن ماحدو سخون 
خرج كيهضر : الدري صاحبي خليتو كيتسنى لتحت فالطموبيل ... حتى نرجع ... فين صاكي؟
فاطمة الزهراء : راه فالبيت نجي نجمع ليك حوايجك ؟
رد عليها من البيت وهوا حال رجليهت فوق الصاك كيعمر 
واءل : بلاش غير طلقي راسك راه ريحت الزيت كتخنق ... اففف فين تقاشري ؟ ..... صافي هاهما 
خرج من بيت النعاس لابس سرولل سورفيت وتيشورط كحلة وهاز الصاك على كتفو ... وصل للباب قال
وءئل : هانا مشيت ... فوهي السراجم والله تا ريحت الزيوتات شميتها من الدروج .... باالركة راه داكشي اللي درتي يكفي لعرس .(خرج و الباب)

نزل كيدردك مع الدروج ديال العمارة. .. عمارة راقية .. عبارة على مجمع كيتكون من 8 دالعمارات مقابلين مع بعض وسطهم جردة كبير وعندهم باب كبير كيخرج للشارع ، خرج لسيارتو فولزفاكن كاط كاط حل الكوفر لاخ فيه الصاك وطلع لقدام حدا صاحبو وكسيرا الطموبيل كيتجمع هوا وصاحبو 
واءل : يالاه ناوي ندخل واحد 6 الطوموبيلات من اسبانيا ... حسن ماتشريهم من هنا اصلا هنا كيكونو واكلين الدق 
احمد : ماكرهتش حتى انا شي اجونص دو فواتيغ .. خدامين وكيتمشاو 
واءل : شحال هادي قلت ليك اصاحبي ندخلو شركة وبقيتي تعوج عليا ... 
احمد : بالضحك * ونديروها دابا اش فيها 
واءل : هادا عليا خاي حمد ...الشركة دابا مكتفكرش فيها .. كنت كنفكر فيها قبل مانبدا بوحدي ... دابا لا ... نجيك نيشان اهاي احمد ... الشركة كتفسد العشرة... بغيتي دخل شريك نضبر ليك معامن دخل اما انا مكنفكرش ندخل شريك هاد الساعة فحتى حاجة 
كملو الطريق كتجمعو على الخدمة ... لان واءل خدمتو يكري و يبيع ويشري فالطموبيلات اللي كيدخل من الخارج وهاد الخدمة غناتو وحامد عليها الله ... حالو ميسر .. شاري ابارطومون كبيرة عصرية فحي زوين وتزوج بالبنت اللي بغا ليه قلبو نهار الاول . 
ايييييه داك النهار اللي مشات عندو لاجونص ... كانت وحدة اخرااا عكس هادي اللي كيشوف دابا كل نهار فالدا ، كان الشعر زعر مصايب ولباس العصري ولاطاي حوتة والدفار مقادين ... كانت متبعة الموضة واللي خرجات كطبقها فراسها ... داك النهار اللي دخلات عندو لاجونص كتقلب تشري طوموبيل وجهدها 4 دالملوين ... هز عينيه وهوا جالس فالبرو شافها ومن تما وهوا مرفوع ... ناض من بلاصتو ومشا معاها بنفسو كيوريها الطوموبيلات وهي حشمانة غادية مع باها حانية راسها ... باها كيهضر مع واءل والاخير عينيه تفيكساو عليها وغير كيضحك فرحان . بلهلا يطريه ليه خلا ليها الطوموبيل ديال 7 دالمليون ب 4 دالملوين ... كلشي على قبل عويناتها ... وماخرجات من تما حتا هز كارط فيزيت خشاعا ليها فالجيب دالسروال للور بلا ميشوفو حتى واحد واخا حسات بيه هي ونتابهات ليه غمزها و هبطات راسها كضحك . خدات الطوموبيل نقية ومشات فحالها .. فكرات تعيط ليه وحشمات تبدل منها المبادرة .. كل ليلة قبل ماتنعس كتشد تيلي وتبدا تخمم .. نعيط .. لا منعيطش .. لالل يقول غير ملهوفة ... شنو ندير ؟!
فكرات حتى عيات وهي تصوني ليه على اساس غالطة فالنمرة .. عرفها هي وشدها مابغاش يقطع .. ومن تما وهما فالتيليفون .. طورات العلاقة ورجعو كيتلاقاو ... ونهار تبغي تلاقا بيه ماهي وما لونها ... خاصها حمام عروس . باش تكون فابهى حلة ؛ كانت داءما متألقة وسدات ليه عينيه على باقي الفتيات كاملين .. رجع كيشوفها غير هي .. رجع متيم بيها .. التيلفون بالنهار والليل ومادوزش عليه الراحة الى داز النهار بلا ميشوفها واخا يدوز يسلم عليها غير 5 دقايق ويمشي . كان مهلي فيها واخا مابيناتهم حتى ورقة .. الحاجة المخيرة ديالها وهوا اصلا من طبعو سخي بلا مطلب ليه كيعطيها ويصرف عليها .. كانت بحال شي اميرة ، ومتنهى حتى خطبها ورجع كيخرج شاد بيها فيدها علنا وسط حومتها بعد ما كان ميوقف بعيد باش ميوسخش ليها الصمعة ديالها .. ومع هوا كل مرة جاي فطموبيل كانو للبنات كيقولو عليها كل مرة واحد ..طموبيل تهزها وطموبيل تحطها ، ونهر سمع الهضرة بدات دور وفا بوعدو ليها وتزوجها .. دار ليها عرس تمناه اي وحدة وخداعا لدارو اللي فرشات على دوقها ... دازت الايام الاولى كلها عسل فعسل وكان غير كيسالي الخدمة يجي نيشان للدار .. عكس دابا رجع كيشغل نفسو كثر باش ميرجعش للدار بكري.
خرج من لاصال شعرو فازك والصاك على كتفو .. طلع فالسيارة وانطالق راجع بحالو للدار . وقف الطوموبيل بلاصتها ودخل للعمارات فين كيسكنو .. مع الدورة بانت ليه واقفة مجمعة هي وجوج عيالات حدا باب العمارة بنفس البيجامة ولايحة عبيها مونطو ... العياللات جالسين هدا رصا مع وللدهم اللي كينقزو و فنفس الوقت شادين الحتيت واللي طالع كيدوز حداهم واللي هابط كيشوفهم .. وقدلم واءل دازت وحدة لابسة كلاص باينة راجعة من الخدمة كتقرقب بالطالون ودازت حداهم .. شافت فيهم بميوعة وهما مجمعين بالجهد وطلعات ، اما واءل غير شاف التجمع النساءي اللي كيكره وهوا يخزر فيها وقال بعصبية حشمها قدام دوك العيالات 
واءل : تسخرتي؟
فاطمة الزهراء : بارتباك) اه 
واءل : وشنو واقفة كديري هنا ؟ مجمعة ليا على الهضرة الخاوية؟ ماعندك مايدار ولا شنو؟
بالزربة تفرقة دوك العيالات كيزطمو فحوايجهم وهي هبطات راسها مارضاتش وزادت قدامو فالدروج طالعة كتنهج وهوا كيسوط مابغاش يسكت
دخل للدار كينكر وزدح الباب بقوة ولاح الصاك للجنب كيغوت 
وائل : شنو اللي موقفك لتحت ؟ اش واقفة كديري لتحت ؟ حاضيين اللي غادي واللي جاي ؟ تابعة هادوك ماعندهم مايدار نهار كامل مجمعين فالبيبان
. ديجا تبريت ليك وحلفت ليك نهار لقاك فباب الدار واقفة مع شي وحدة ولا لتحت فالباب غنتفاهم معاك ... دغيا نسيتي هضرتي زايدة ناقصة عندك نتي 
فاطمة الزهراء بغضب : ماتغوتش عليا ... واخر مرة تغوت عليا قدام الناس
واءل : بغضب ) عند مك الزهر مارفعفتكش قدامهم ... تحركي من قدامي ولا غنمرمقها مع ديلمك 
دورات وجهها كتسوط مارضياش ... فنفس الوقت مكتقدرش تعاطا معاه فاش كيكون معصب ؛ عارفاه ماشي من النوع اللي كيحدر الراس ويبرد السوق ... بلعكس كيقلب على كلمة تخليه يزيد يشعل ... واللي كيخليهت تصبر ليه هوا حبها القوي والخوف على انها تخسر ليه خاطرو ويغضب عليها ، لاكن مع الاسف هي من النوع اللي كيسمع الهضرة يوماين 3 ايام ومن بعد انسا عليها ودير كتر منها 
دخل للبيت وزدح الباب خلاها كدور فالكوزينة كي سراق الزيت ماعارفة مادير ومحملاتش الجو اللي تكهرب عندهم ... حطات العشا ومشات عندو للبيت بشوية كتفيقو ... تقلب عطاها بالضهر وربع يديه 
واءل : ماخصنيش غا تعشاي . 
فاطمة الزهراء : وليك درتو ... راك جيتي من لاصال خاصك تاكل ماشي تبات بلا عشا 
واءل : لا رد 
بقات كتشوف فيه حتى عيات ومشان لداك العشاء جمعاتو رجعاتو بلاصتو ودخلات لبيت النعس نعسات حداه ؛ يالاه تسرحات وهوا يتقلب للجهة الاخرى وربع يده

: بقا فيها الحال من الحركة اللي دار وتقلبات حتى هي للجهة الاخرى كتبكي فصمت وتنخصص ... ماعلى بالهاش السبب اللي خلاه يتقلب للجهة الاخرى ... لانها بكل بساطة مكتشمش ريحتها ... عادي حيت مولفاها ومغتعرف راه ريحتها عاطية حتى يقولها ليها شي واحد
: باتت الليلة كاملة كتنخصص وهوا حال عينيه كيشوف جيهت المتريو فالضلام ... عيا . مل ... كفاش يفيقها بعيويها هوا اللي راجلها ... علاش حطاتو فهاد الموقف . . . مقادرش يقول ليها بدلي البيجامة اللي طيبت فيها الكوزينة كاملة عاد نعسي ... ديري عطر زوين كما كيدير هوا عاد تنعس.... غسلي وجهك من الصهد و برديه ... خوي عليك سطل ديال الماء ... مشطي شعرك وطلقيه حداه ... خليه يحس انه ناعس حدى انثى .. انه كاين فرق بين العزوبية والزواج ... خليه يرتاح فالنعاس حداك ... خليه هوا يقلب عليك ويخشي راسو فيه باش يشم ديك الريحة الزوينة وينعس عليها ... علاش كتسنى حتى يقولها ليها هوا ... ايلى فات حتى قالها فبلا متبدل غير تبقا كما هي حسن ... مغيبقا عندها معنى .. وهادا سبب من الاسباب اللي خلاوه يتبدل .. طبعو المخبل اللي هوا براسو معارفش كفاش يشرحو زاد عصبو ومرضو ... عارفاه عزيز عليه المفاجأت .. عزيز عليه دير من دايتها راسها داكشي اللي كيبغي هوا ... ويزيد يبغيها حيت فهماتو فير من تصرفاتو ... ولاكن اللي معارفاش انه كينفر من الحاجة الى باح بيها نفرة وحدة ولا امل فالعودة واخا يوقع اللي يغا يوقع ... معارفاش انه مزال كيتسنا التغيير يجي من عندها ولا على الاقل ترجع كما كانت .. كما عجباتو النهار الاول وخداها ... تجلس دقيقة وتفكر بينها وبين راسها .. تقول هاد السيد علاش خداني نهار الاول ... تخلي الجمال الداخلي جانبا حيت ماشي هوا اللي جدبو ... لاكن مضهرها وحركاتها وتصرفاتها هما اللي جدبوه وفتحو ليه باب باش يتعرف على الجمال الداخلي ... والا كفاش كان غادي يتعرف عليه لولا النضرة الاولى ... عارفاه كيعشق الزين .. وسبق ليه قالها واعتارف بيها بالضحك لاكن ماعطاتش اهمية لداك الضحك فديك الوقت وخا كانت فنيتو يوصل ليها المسج بحال الى كيحدرها على انها تهمل نفسها شي نهار وتوصل للحد الأدنى اللي تخليه يشوف الزين فبلاصة اخرى ويضحك بوحدو
علاش تخليه يحس ان الرجال كاملين مزوجين عيالات الا هوا اللي مزوج فام دميناج " خدامة ) الفرق بيناتهم هوا ان وحدة كتخلص على خدمتها ولخرى خدامة فابور ... ماشي هادي الحياة اللي كان راسم فخيالو مع شريكة حياتو ... ماشي هاكا كان كيشوف بيت الزوجية ديالو ... فين روح الحب اللي كانو عايشينه خمس سنين قبل الزواج ... خمس سنين وهما مع بعض وماعمرو مل منها ولا فكر يبدلها ... عكس عام ديال زواج ...بدل شحال من حاجة ... مشات الرمنسية ... مشات الليالي الحمراء ... ويمكن مات حتى الحب اللي جمعهم وتحول لولف . 
صبح الصباح واقف قدام البلاكار
حيد التيشورط ووقف عاطيها بضهرو عريان ..بدا كيجبد حوايجو ويوجد راسو للخدمة وهي ناعسة كتشوف فيه بنص عين ... مولفة تنوض توجد ليه لفطور .. لاكن هاد المرة بينات ليه انها غضبانة .. حتى هوا مافيقهاش ومدارش جيهتها ... لبس سروالو وقميجتو ومشا حدا مرايتها مشط شعرو .. دار الريحة وخرج خلا ليها البيت كيطعطع بريحت هيكو بوس وخرج مشا يشوف خدمتو ... ناضت من موراه لبسات جلابتها فوق ديك البيجامة نيت وجمعات شعرها ونزلات ركبات فسيارتها الصغيرة نيشان لدار باها تغضب عندو

جالس فقهوى مع اخته الكبيرة فايزة مربع يديه فوق الطبلة كيشرب القهوى معاها وكيهضر بعصبية 
فايزة : دابا علاش معصب ؟ غير بشوية غنحلو المشاكل ... واش دابزتي نتا وفاتي عاوتاني 
واءل : ديييما حنا مضاربين ماعرفتش شنو ندير معاها ولات كطلع الدم وغير كنشوفها كنتعصب بوحدي غير هاكاك ..
فايزة : يكون دار ليكم شي واحد شي عكس؟!!
حل عينه: العكس دايراه راسها حتى واحد مكديرو ليها ... تصاحبات بيا مع الجيران و ولات كتعاند معاهم فالتخربيق ديال العيالات وعاجبها داك الهيت ... تعلمات شي حوايج مكانتش كاع كديرهم 
فايزة : ايوا هدا عليا ... فاتي زعما بعقلها ... حادكة ومتولة مافيها باس الى دارت الصحابات ... راه كضل نهار كامل فالدار بوحدها . بغيتيها تحبس راسها حتى يجيها اكتأب 
واءل : باستغراب * فيين كتحبس راسها وريني فيين؟ كل سبت و احد كنخرجها فين ما بغات ... النهار كامل وانا كندور بيها حتى كتسخف وتقولي رجعني للدار .... دابا هي اللي مكاتبغيش تخرج ... ولات فشكل .. وداك الزمر اللي ولات فيه مكنحملش بحال هاكاك .. ما فهمتش كي غنشرحها ليك ... ولات كتعكز ... متبعة خمسة دالمسلسالات .. و واحد هندي فيه 3 دالسوايع كتبقا مخرجة عينيها فيه حتى 3 دالصباح ... والصباح تصبح كتعاودو ... رجعات مع مي .. حتى الطريقة باش ولات كتهضر معربنة ... بحالها بحال هادوك صحاباتها .. ماشي هاكا فاطمة الزهراء وانا هادشي بدا كيطلع ليا فراسي ا فايزة ... فين ما ندخل للدار كنسخط .. الى متلقيتهاش كتشقى نلقاها ملوية على راسها ميكة وريحت البصلة والتومة كاسرة الدنيا ... كنشوفها هاكا

فايزة: والله ماعرفت مينين نشدك .... قبل ماتزوج بقيتي علينا باغيها حادكة ونقية ومتولة ... دابا جالس كتشكي عليا ... نتا بغيتي شي وحدة اللي تبقا نهار كامل شادة تيلي فيديها ومقابلة لمراية والنهار ومطال ونتا تابعها بالتيلفون فين مشيتي فين جيتي .. لا ماكلة واحدة ولا حوايجك مصبنين هادشي اللي بان ليا 
واءل: راك واقلة فهمتيني شنو بغيت نقول غير كتستهبلي عليا ... شنو اللي ناقصها؟ لفلوس ديما عندها ... ماناقصها والو الحمد لله ... كلشي واجد وكلشي موفر ليها ... كتبغي شي حاجة مكنقولش ليها ... يعني ماشي شي وحدة اللي غتجيها الميزانية غالية ولا تنقص منها وتوفر من هنا باش تكمل من هنا ... هي لااا مقابلة الذهايبي وكتهبط حتى لعندو للقصارية لابسة ديك الجلابة دالكاشمير القهوية وتحت منها بيجامة تاهيا دالكاشمير والتقشر والصابو ... مرة تمشي ببانطوفة هي كاع ماعندهاش سوق ... اللي لقاتو تجرو فرجليها وتلوح عليها ديك العباية الكاشفة وتبقا غادا جاراها مع الارض
والمشكلة الى حليتي البلاكار ديالها يريب عليك بالحوايج ... شي فوق شي واللي ضربها ضربها على الكاشمير وديك العباية ... كن شفتها هاكاك النهار اللول والله مانتزوج بيها 
فايزة : دابا بيني وبينك .. واش بغيتيها تبقا تخرج متبرجة ؟ واش نتا ديوتي؟
واءل : قرب وجهو ) دابا بيني وبينك ... واش كتفهمي اش بغيت نوصل ليك ولا عندك شي واحد اخر فداك الراس مجمع مع شس حد اخر من غيري ؟ واش هي دايرة الفولار؟ مادايراهش ... اصلا كتخر بيه عريان ... اللهم تمشطو كي الناس ... فبلاصت ما تلبس ديك الدربالة تلبس الجلالب راه معلقين الرخيصة فيهم خيطاتها ب 1000 درهم ... لمن شارية داكشي ولمن مخيطاه؟ تحيد غير دام الموسطاش اللي مشاركة معايا ... ماعرفنا شكون الراجل فالدار انا ولا هي

فايزة : وصافي انا غادي نهضر معاها 
قلب وجهو : واخا تباتي تهضري
فايزة : وعلاش ماهضرتيش معاها نتا 
واءل: شغنهضر معاها نقولها ؟ هادشي مخاصنيش نقولو انا ... خلي شوية ديال الانجداب بيناتنا .. هادشي راصها خاصها تعرفو .. انا ماشي خوها ولا باها نقول ليها ديري ليا وفعلي ليا .... راجلها انا خاص يكون بيناتنا شوية ديال الاحاسيس .. تحس بيا شنو باغي ماشي كلشي نقولو بالفم ... كاين شي حوايج كتحاس ماشي كتقال بالفم ... والى جيت نقولهم انا .. مانقدرش .. مانقدرش نقولها ليها انا ... نقولها لوحدة مابيني وبينها والو مي مرتي لا ... شنو بغيتي نقول ليها؟؟ نقول ليها عارفك كتبغيني ولاكن بدلي طريقة ديال حبك ليا ... عمري عيني وديري داكشي اللي كنبغي بلا منحتاج نقولها ... فوق مابين تقول لشي واحد دير ليا عاد يدير وفرق مابين يديرها راسو حتى كيفاجىء ... 
تنهدات فايزة وقالت : ايوا شغانقول ليك ... عندك الحق ... المرى اصلا فاش كتزوج كتعكز تبقا تابعة راسها 
دق فالطبلة وهز راسو : ايوا صافي ماشي مشكل ... خليها حتى نتبع شي وحدة انا وتجي هي تبعني ديك الساعة ... ماعرفت راسي مجوج باش نعيش داكشي اللي انا باغي ولا نخس براسي بحال الى باقي فالدار مع الوليدة ... ماعرفتها مرتي ولا مي .
فايزة : انا غنهضر معاها ونشوف شنو تقول .. ونعل الشيطان راه والله ماتلقى بحالها ... راه كلشي كيطلع فالراس ومغتبقاوش صغار مجبدين .. دابا تشرفو 
واءل : ماشي هاكا كنت باغي حياتي الزوجية وماشي هاكا كنت راسم مرتي فخيالي... كنت كنتصادف مع دوك العيالات اللي وعمرني تخيلت مرتي تكون وحدة منهم ... كنت كنت عارفها دير بناقص من شي زواج ... انا هادشي ديال الشرف ولا المرض راه بووحدو ... هادي حالة وهادي حالة ... مرتك مرضات وبدهلها المرض ماشي هي اصلا مبهدلة من الديبار ... ديك الساعة كتكون عارفها كي دايرة ولولا المرض غتبقا كيما هي ... انا فاطمة الزهراء ماخلاتش الفرق بين الصحة ولا المرض كااع ... نهار تمرض باش غنعرفها الى مقالتهاش وهي ديما وجهها صفر وشعرها فالسماء والمشطة كدير بدرهم ! 
فايزة : تنهدات ) مابقيت عرفت مانقول .. يعلم الله خالد (راجلها) اش كيقول عليا لختو حتى انا ... كن ماكنت موضفة كن راني كتر من فاتي ... جاب الله كنمشي للخدمة ونصايب حالتي بزز مني 
واءل: واخا هاكاك ... راه تاهيا كتخرج تسخر ... ومع ذلك كتخرج سواقية ... ولفاااات راسها هاكاك وولفات تخرج ببيجامة حتى رجعات عندها عاااادي وكيحسابها كاع الناس عندهم عادي 
فايزة : مهم .. دابا فيك ميخلص علينا شي سونطر دالسبا ولا والو 
طلع حاجبو : قالتها ومادرتهاش؟؟؟ بلا سونطر كاع ... راه العيالات كيضبو يطليو لوجههم فالماسكات ويمشطو ويغسلو ويلبسو الحاجة اللي كتفتح الشهية وفلعشية كتكون ناضية ماشي كيجي راجلها يلقاها مدهونة بحال مجلخة بحال الموطور د الطوموبيل.... مال هاد العيالات كاملين كيمشيو للسبا باش يبانو نقيات!!! 
فايزة : قول مافيك اللي يخلص
واءل : ضحك بسخرية ) عارفاني منقدرش نخلص!!! ندير ليها كارط معاهم يا ربي غا تمشي 
فايزة : صافي سكت انا غادي نصوني ليها نشوف اش كدير . . نقول ليها يالاه لسبا ونشوف ... 
رجع للور ودار صبعو على خدو وقال : عيطي ليها .... الى قالت ليك يالاه ها وجهي .... تلقايها كتخلط فشي حلوة باش تفرقها على الجيران توريهم شنو طيبات ولا تلقايها فشي قصارية معاهم وسط الماعن ديال الميكة

: جالسة مع امها دايرة يدها على خدها وحاجبها طالع كتسمع الاسطوانة المعروفة ديالها 
الام : وا ولدي ولادك ... عام ديال الزواج ومزالة ما باغاش تولدي ... جاو قراناتك تزوجو وراهم ولدو .. هادوك لالياتك اللي باغيين يشدو الراجل انا نتي غتبقاي نتي وياه هاد العام العام الجاي حتى يزيد ويخليك ... نوضي ولدي ولادك وتقلي ليه جناحو بالدراري ... ؤاه وتاد المرا ولادها .
فاطمة الزهراء : اففف وناري واش فين ما نجي نفس الهضرة ... راه قلت هوا ماباغيش الولاد دابا ... بلاتي على الاقل واحد العاماين عاد نديرو شي ولد ولا بنت 
الام: عطاتها صبع ) هاااك ... باش تنوضي ديري ولادك وتشدي الراجل حداك كيما كيدرو لالياتك جلسي نتي دوري حتى دور ليك بيه شي وحدة 
فاطمة الزهراء : انا عااارفة واءل ... ماشي من النوع اللي عينو زايغة ومتبت ... كن بغا يلعب ويدور كاع ميتزوج ... اصل راهم مطلقين بولادهم وسامحين فيهم ... مانحتاجش نشدو بالولاد انا اصلا ... وكنعرف راجلي مزياان شاراه ماء واخا يحلفو ليا فمكة عليه منتيقش 
الام: واجلسي ... مابغاش تسمعي مني كيتك دابا توقفي على هضرتي ... باش ديري ولادك وتعمري دارك وديها فراجلك ودارك وولادك جالسة نتي كدوري ماعرفت اش حاضية وشنو كنسناي ... الراجل باقي صغير شهوة منو اي وحدة تمناه وكن شي وحدة بلاصتك كوراها ستفات ليه الدراري واحد مور واحد ... ماتخليهيش يتحرك لا هاك لا هاك 
تيلي كيصوني : الو .. 
فايزة : الو الزين .. لباس عليك مزيان؟
فاتي: صافا اختي حمد لله .. ونتي 
فايزة : صافا ... بغيت نقول ليك راه شريت واحد الديل فانترنت ديال السبا الى بغيتي تمشي معايا نتصولاجاو شوية
فاتي: فوقاش ؟
فايزة: ليوم ... دابا نيت .. جمعي حوايج الحمام واجي نتلاقاو فالمدينة ونمشيو بجوج 
فاتي: شافت بنص عين فامها) واخا .. لقيتيني عند ماما جيت نعاونها فالشقى حيت بدات التخمال .. مهم انا غنمشي للدار نهز حوايجي ونجي .
قطعات و معا مخرحة فيها عينيها مصدومة 
الام: مابقيتيش غضبانة!!!
فاتي: جيت نتسنط لعضامي ... ساعة لقيت راسي كنتسنط للحمدوشية .. اللهم نرجع بحالي مكاين اللي ينكر عليا .
ناضت جمعات الوقفة وهربات من نكير مها ... رجعات للدار جمعات حوايجها فالصاك وزادت فالطوموبيل نيشان عند فايزة 
- واقف هوا فايزة حدى الطوموبيل متكي بيدو على الطوموبيل 
واءل : انا غنمشي ... حاولي تفهميها شوية ... راه بنتي ليا غير نتي اللي نقدر نهضر معاها فهادشي 
فايزة : مهم راها جايا ... غير تجي غنهضر معاها 
طبع فالسيارة وطل من الزاج : قوليها تصبغ داك الشعر ولا تحيد ديك الصباغة الصفراء كاع ... مهم ماتخليهش فالنص . 
فايزة : هههه سير سير الله يعطيك عقل .
زاد خلاها وجلسات هي فالطوموبيل كتسنى فاطمة الزهراء . ماهي الا تواني حتى وصلات عليها .. ونزلات كتسلم ..بعدات فايزة كتشوف فيها وقالت حاطة صبعها على حنكها 
فايزة : اااويييلي جايا هاكا من الدار ؟ 
فاتي : كنت عند ماما ورجعت جمعت حوايجي بالزربة باش منتعطلش عليك ... عكزت نبقا عاد نبدل 
فايزة: و لو اصاحبتي .. شكون كيخرج ببيجامة فوقها فوقها جلابة للمدينة ... وعاد غاديين لسونطر كبير غندخلو يبقاو يعبرو فينا
فاتي: مالهم غيخلصو علينا شي حاجة!! ايوا صااافي اللي كيعرف با يمشي يدعيه 
فايزة : شهاد الهضرة وليتي تهضري بيها اصاحبتي بحال الطيابات دالحمام ... زيدي زيدي .. الله يعطيك شي عقل حتى نتي .

دخلو لصالون كبير ومشاو بجوج دقة وحدة بداو بنتيف الزغب وتبعو لي حمام سخون ... جلسو يرتاحو كل وحدة فوق بياص فواحد الوسعة فحوض سباحة مغطى وبداو يتجمعو 
فايزة : مالكي وليتي خاشية راسك فالدار ... وليتي مرى بلدية اصاحبتي . . . شوفي راجلك كي داير وشوفي نتي كي دايرة ... داخلنا عليك بالله واش مكتغيريش منو 
فاتي : وعلاش نغير .. هوا راجل وانا مرى علاش غنغير منو 
تقلبات فايزة بنفاد الصبر عندها وقالت: سمعي ... واءل تشكا ليا منك ... مابقيتيش كتديها فراسك ... هملتي راسك بزااف وهوا من النوع اللي كيلاحظ ابسط الحوايج ... وكيعلق عليهم . كينتابه وكيبغي الزين .. ونتي اصاحبتي حتى شعرك مكتمشطيه ؟!
فاطمة الزهراء تحبلو عينيها ...كلان فايزة ليها جرحها واحتاقرات راسها ... سكتات ... ضهشراتها الهضرة دفايزة والتفت قالت 
فاتي: واءل قاليك هادشي؟
فايزة : وشنو اصاحبتي ... راه من حقو ... كيشوف شي حوايج كديريهم ومقادرش يهضر معاك عليهم ... راه راجلك باقي صغير وماحدو كيبغيك فيقي براسك شوية ... البنات راه موجودين .. تخرجي للزنقة وحدة تنسيك فوحدة انا براسي اللي مرا وكندوخ عضاك الرجال .. 
بدات فايزة كتهضر وفاتي ساكتة ماعجباتهاش الهضرة بمرة . . . هزات فخاطرها وكتماتها فصدرها حتى شالاو وخرجو .. كل وحدة مشات بحالها ورجعات فاتي للدار لابسة كولون بالتريكو ديالو فوقو الجلابة .لقات واءل فالدار متكي بشورط وتيشورط كيتفرج فالكورة ... تلفت شافها وقال كيضحك 
واءل : بالصحة ... بان فيك الضوء 
جاوبات جواب ناقص وهي كتحيد الجلابة : الله يعطيك الصحة ... محسابش بيا كنت بير مضلم باش يبان فيا الضوء ... 
لاحت ليه الهضرة ومشات للكوزينة كتعمر اتاي وكتذكر كلام فايزة 
فايزة : الحوايج عندك غير لفريع ونتي كنلبسي داكشي كاشف وتخرجي بيه ... غيحسابهم فير محرمة من الحوايج .
تنهدات وطردات ديك الهضرة ... مابغاتش دخل ليها للراس ان واءل قال عليها داك الكلام ... كفاش قدر يقوولو عليها ... لالا غير ختو اللي كتهضر من فراغ وكتخشي راسها فما لا يعنيها ..
هزات البلاطو ديال اتاي خارجة بيه وهي طيح عينها على السطل دالزبل بانت ليها شي حاجة فشكل ورجعات حطات البلاطو وطلات على الزبل ... هزات بيدها التوب الاسود مصدونة لقات عبايتها الكحلة مقطعة ومرمية فالسطل ... تصدمات وتاكدات من هضرة فايزة ... مشات بالعباية فيدها عند واءل ولاحتها قدامو بصدمة 
فاتي: شنو هادشي!! علاش قطعتي ليا عبايتي يا وائل
واءل : ببرودة ) ماقطعتهاش... تقاصت بجافيل عاد قطعتها ... صافي دابت الى بغيتي عباية غدا نشريوها اصلا هاديك كشفات 
فاتي: وتكشف ولا ماتكشفش.. واش انا كنقطع ليك حوايجك ؟ علاش ماتشاورتيش معايا؟ 
واءل: بففف وصافي قلت ليك بغيتي عباية غدا نشريوها جديدة مالك دابا اش وقع ... على شرويطة غتمرضينا هاد الليلة ... جيبي الله يحفضك داك البلاطو واجي نجلسو شوية 
بثات واثفة غير كتشوف ومشات كتسوط من مناخرها ماعجبهاش الحال ... لاحت ديك العباية وحطات البلاطو فوق الطبلة ... هوا كيتفرج فالكورة مركز وهي ساهية وكل شوية دور تشوف فيه ... اييه ولا يعايرهاو يعاود عليها بالخايب .. فبلاصت ميستر عيوبها مشا كيعاودهم لختو .. باش حتى هي تمشي تعاودهم لخواتاتها ويولي يقرقبو بيها الناب ويضحكو ... هادشي اللي باغي؟ باغي خواتاتو يحتاقروها ... هادا هوا واءل اللي كتيق فيه وعارفاه عمرو يقول عليها شي كلمة خايبة ... هادا هوا واءل اللي كتقول عمرو يتبدل .. هادا هوا اللي كان غيهبل النهار اللول فاش شافها .
غرغرو عينيها وناضت وقفات كتخبي وجهها بارتباك .. هز عينو فيها وقال
واءل: فين غادا؟ راه جبت بيتزا بلا ماطيبي لعشا 
قالت ووجها مقلوب دايرة راسها كتقلب على تيليفون باش ميفضحوهاش عينيها 
فاتي : غير تفرج .. انا غنمشي لبيت النعاس نتفرج فواحد المسلسل 
خرجات من غرفة المعيشة خلاتو بوحدو ومشات لبيت النعاس .. سدات عليها الباب وجلسات كتبكي بوحدها حتى بردات نعسات قالبة وجهها للحيط 

بكات حتى داها النعاس ... دخل موراها شافها ناعسة وسد الباب ومشا عندها طل عليها ... لاحظ التغيير فشعرها اللي تصبغ بالماغون وتوحد ليه للون ومصايب مسبسب وبدا كيلعب فيه عالله تفيق وتحل عينيها .. باسها فخدها وبدا كيفيقها بشوية حتى فاقت وهي تهز كتفها وطلعات عليها الغطا ... 
واءل : وافيقي شوية ... زعما مولفة تسهري !
فاتي: عياانة .. فيا النعاس 
واءل : مجاك النعاس حتى جيت عندك انا! عنقها من اللور وباسها فعنقها
واءل: توحشتك 
ردات عليه من تحت الغطا : فيا النعاس ... وعاد جيت من الحمام مافيا اللي يصبح كيدوش عاوتاني
عقد حجبانو وساط من مناخرو وتقلب بالزعفة عطاها بضهررو وربع يديه ونعس ... هزات راسها تلفتات عندو وهي تعوج سيفتها ورجعات نعسات . 
الصباح فاقت بحال كاع العيالات .. واقفة فالكوزينة كتصايب الفطور وهوا غادي جاي حداها كيوجد راسو يمشي للخدمة ... ماهضرش معاها وصبحات شوكتو طالعة مكيشوفش جيهتها كاع .. لبس حوايجو ومشا خرج مع الباب وهي وقفة كتعيط 
فاتي: وهاد لفطور لمن دايراه !
واءل : بالنفخة) غنفطر برا 
سد الباب وزاد خلاها غطرطق كلاتو بوحدها وجمعات الدنيا وخرجات دقات على جراتها عيشة 
فاتي: مساليا؟
عيشة: مالكي ياك لاباس؟
فاتي: دخلي بغيتك نهضر معاك 
عيشة: سيري انا نطفي على البوطة وندق عليه .
دخلات فاتي وعينيها حومر ... ماهي الا دقاءق قليلة حتى دقات عيشة ودخلو جلسو فالصالون ... شافت عيشة عينين فاتي حومر وماجات فين تسولها حتى بدات كتبكي عليها فاتي وتشكي
عيشة: مالكم دابا شنو وقع؟ ياك لاباس
فاتي: مشا كيعاود عليا لختو ... ماخلا ماقال فيا .... بغيت غير نعرف فاش قصرت معاه ... كيجي يلقا كولشي واجد ... كلشي مستف .. فاللخر قال عليا معفونة ... هانتي كتشوفي ياختي الدار .. وريني هاد العفن فين كاين؟ .. كيمشي يغبر من الصباح ميرجع حتى لليل ... كيرجع هاز شوكتو يتعشى ويمشي ينعس 
عيشة: ولد لحرااااام .. ياختي الرجال كاملين ولاد لحرام ... كيشوفو غير فالزنقة واخا تشوي ليه صبعانك .. خليه ماتسوقيش ليه .. غتهليك غير صحتك ونتي باقا صغيرة ... مالو كاين غير هوا .. يمشي كلب ويجي كلب الف واحد يتمناك 
فاتي: تبدل ... مابقاش كي كان ... وزاد مشا عند ختو كيشكي عليها مني ... لبارح شرك ليا العباية ولاحها فالزبل... فاش سولتو مالقا مايقول وقال حكا فيها جافيل ... وهي مافيها حتى قطرة
عيشة: هادا باغي يجبد معاك الصدع ... نتي ماديهاش فيه خليه ونخلي باباه ... راه الرجال كاملين بحال بحال 
الدقان... 
فاتي: هادي ماتكون غير سعاد .. غنمشي نحل 
ناضت حلات ليها الباب وهي تلقاها واقفة لابسة بيجامة وفوقها كاب كحل .. 
فاتي: دخلي .. راه معايا عيشة
سعاد: نتوما مجمعين هنا ... دزت عند فاطمة دابا وطلعت عندك .
دخلات سلمات وجلسات .. عاودو ليها النزيلة من اللول للخر وهي تعوج سيفتها وقالت 
سعاد : يخخخ منهم ومايجي منهم ... كاملين تريكة وحدة كبير وصغير ... تعطيهم عينيك يطمعو ليك فالحجبان الله يستر ... تا هاداك عندي نوضتها معاه هاد الصباح على السبوع .. بزز باش عطاني ديك 50 درهم .. الله يعطيه موصيبة ... مادريشي فخاطرك ... غدا السبوع عند حياة .. نطلعو نفوجو راه دايرة اللعابات .. خليه يموت فسمو ... كيبغيو سسمموك حتى تشرفي قبل الوقت وينوض يجيب عليك الضرة ... هما راه مكيشدوش فقلبهم بحالنا داكشي علاش مكيشرفوش دغيا
عيشة: انا بااان ليا هادا خرجو رجليه الشواري... عنداك غير تكون دارت بيه شي وحدة 
فاتي: اويييلي!! لااالا ميقدرش... واااااءل!!! ميديرهاش انا كنعرفو مزياان 
سعاد: عطاتها صبع* وهاكي.... حتى لكحل الراس متعرفي اش فيه ... راع يكون يموت ويسطا عليك وتلقايه داير مرى اخرى والد معاها فقنت اخر... علاه مالو مادارهش عمار لفتيحة . 
عيشة دارت يدها على فكها كدور راسها : كاااينة... ياختي شحال من عام وعمرها عاقات بيه ... فاللخر طلع مزوج وعندو ولد !!! خلاها بغات تسطا مسكينة .. وهي اللي نهار ومطال مقابلة ليه ولادو .. منها كراص وغطا للراس .
سعاد : وبدلها بوحدة ق*** انا بعدا هاداك نحلف عليه فمكة مايديرها ... كان يبان درويش ... وهي مسكينة ديما نلقاها تخمل وتوجد فالغدا وهازة الدار والدراري كتسيفطهم للمدرسة كيشعلو ... فاللخر مشا عند وحدة بنت الزناقي تشوفيها تحلفي عليها حتى بنت الزنقة ... الدفار بحال النسر و التعكيرة والشعر صفر ... راه الرجال ولاد الحرااام ياختي 
عيشة: دابا عا قولي ليا هاداك اش ناقصو ... عندو مرى ديال الدار ودريويشة ماعمرها رضات عليه الهضرة وحانية الراس ... 
سعاد : تانتي الله يهديك عزيز عليهم خبز الزنقة .. اما خبز الدار شكون داها فيه ... كيبقا حتى يغمل 
عيشة: مابغاتش تفهم ليا علاش جاب عليها ديك المسخة ... دخلي لدارها تلقايها كتشعل ... وحادكة ... ماتجبدش العيب ياختي كاع ... الشهيوات عالجهد ... كيجي بحال الملك عندها .. تكون مريضة وتنوض للكوزينة توجد ليه . 
فاتي: كدور عينيها ) لااالا عمار عا عروبي ... هاداك يديرها ويفوتها لهيه اللي ضحكات ليه يحل فمو ... ام واءل مداااوز لبنات ماشي من داك النوع ديال عمار . غا هوا يمكن معمرو شي واحد
سعاد : وماتعرفي تكون مو ولا خواتاتو ... وختو اش دخلها فيكم مالها على دخول الصحة ... هادي بغات تجبد ليكم الصدع اما هوا تلقايه مقال ليها والو .
فاتي: لاالا قال ليها ... انا باش عرفتها مكتكدبش حيت شحاا من مرة عاير ليا العباية ... ودابا مشا ليها شركها .. كان قالي كتباني بحال ق*** السواعدة بديك العباية فاش كيخرجو الصباح من الفيلات وجههم ممسوح من المكياج بقوة السهير 
سعاد: وييييلي بااااا ... هادا عندك مشا بعيييد اختي ... باينة كان مولف بيهم ودابا رجع ليهم ... راه كيبغيو لمسخات ماعرفتش اش كيعجبهم فيهم .
فاتي: لالا هوا عايرني بيهم ماشي رجع ليهم ... راه اصلا كانو كيمشيو عندو يكريو الطموبيلات يعني كيشوف وعاارف .
سعاد: عرفتي شديري ... نوضي يضربك البرد ... يالاه معايا نجيب اية من المدرسة 
فاتي: ايوا تسناي نلبس حوايجي
سعاد: ها المدرسة غير هنا .. مالكي فين غادية... لوحي عليك شي جلابة ولا مونطو ويالاه بالزربة 
عيشة : ايوا بلاتي .. راه كلشي عطا 50 درهم ... باش ندخلو عند حياة غدا 
سعاد: بقيتي نتي وفاطمة الزهراء ... غنعطويها الجوا .. راه كتبت فورقة كاع العيالات اللي عطاو 50 وخشيتها مع الجوا بعطيه ليها غدا ... الا مرت الكوميسير اللي ما بغاتش تعطي .. دقيت عليها قلت ليها راه غندخلو عند حياة وكلشي عطا 50 ... وريتها الورقة باش زعما تعطي تا هيا وندخلو كاملين قالت ليك لا ... بغات تعطي منها لحياة وبلا مانتسناوها غير ندخلو 
حياة: هاديك متكبرة وعاجبها راسها ... كتبغي تمشي معزولة .. ديك الخطرة فالعرس ماجلساتش كاع مع الجيران فالطبلة .. مشات جلسات مع البراني ... جايا طالقة الشعر وكتجر فالتكشيطة زعما شفوني 
سعاد: ضبر راسها لهلا فين تعطي ... هههخه عرفتي قتلاني نعيمة اللي تحت منها بالضحك ... شافتهم مطلعين سدادر وداكشي جديد ومشات زعما وقفاتها سلمات عليها وبعات تجبد معاها الهضرة ... ساعا قالت ليها لخرى سمحيلي زربانة ... مارضاتش نعيمة ههههه كانت بغات تصاحب معاها و دخل عندها تشوف الصالة اللي فرشات زعما ... شبعات فيها سبان هههه .
عيشة: بنادم مريض.. اش فيها الى شافت الصالة ... انا بعدا كيدقو عليا لعيالات عاادي.. ونتي ياك كدخلي شي مرات بلا مدقي عمري قلت ليك شي حاجة !! غير بنادم متكبر عاجبو راسو ... دارت الختانة لولدها وجمعاتنا كاملين دارت لينا الغدا ولغد ليه دارت الحفلة وعرضات على الناس والامداح وماعيطات لحتى وحدة من عيالات العمارة ... حشوومة ... زعما سبقاتنا حنا اللولين عاد عرضات عاءلتها 
سعاد: انا حتى ديك السلام مانعاود نقولها ليها بعدا واخا دوز من حدايا.. قالك المثل اللي ضركك بخيط ذركو بحيط
خرجات فاتي لايحة عليا جلابة فوق البيجامة وهازة 50 درهم فيدها عطاتها لسعاد 
سعاد: صافي انا غير نهبط لدار نزيد سميتك معانا ... يالاه راه تعطلت على اية غنلقاها بوحدها واقفة كتسناني

خرجو .... عيشة طلعات لدارها وسعاد و فاطمة الزهراء مشاو للمدرسة لقاو اية واقفة لداخل مع العساس وكلشي مشا بحالو وداو ولادهم ... جابت بنتها فيدها ورجعو بحالهم كيجرو صنادلهم .. دخلو للعمارة تلاقاو جارة اخرى ووقفو كيهضرو ويتجمعو .. هادي دارت هادي فعلات .. انا كريت القفطان .. انا غنلبس قفطاني... راه خديجة قالت فيك وقالت وعنداك تقولي ليها قلت ليك ... راه حياة دايرة دجاج محمر.. فلان مريضة مغتمشيش لخرى مخلاهاش راجلها ... هادي خايبة هادي زوينة .. هادي عطات 50 هادي عطات 100 ... هادي سلفتها انا باش تمشي هادي مارداتش ليا سلف ديك المرة اللي دازت ... هادي بغات تشد القرعة هي اللولة .. هادي ماعطاتش فلوسها ... هادي خرجات هادي دخلات .. ريحة الحراق عاطية يمكن نعينة تحرق ليها الغدا ... ولد فلانة طلح ضربو فلان .. ولد فلان دفع فلان .. فلان تبرا من فلان وغضب على فلان ... فلانة ... فلانة مابقيتش كنهضر معاها دارت ليا وفعلات ليا عنداك تهضري معاها غادي نقاطعوها كاملين مامزيانش طلعات بنت لحرام ... ولدي جاب 5 .. ولد فلانة جاب 4... مرت الكوميسير غادا جايا كل مرة جلابة فشكل فيها العياقة ... ولد فلان جاب 9 .. مال ولادهم كياكلو الخبز طايب وولادنا كياكلوه خضر! مالو جاب 9 ... و ولدي جاب 4 . دو دو دو دو دو دو ... حتى مشا الحال على البنت اللي غاترجع تقرا وزربات عليها مها وكلاتها بالزربة حتى وقفات ليها وداتها للمدرسة كتشرب الماء فالطريق . 
فاتي بدا كيدخلها الشك فواءل ... سبق ليه تبرا ليها من الوقوف برا مع العيالات ورجعات وقفات ومن زهرها مارجعش للدار وقت الغدا ويلقاها واقفة مجمعة . 
وصلات العشية وهي معبسة طالع ليها الدم .. صونا ليها تيليقون من الكوزينة ومشات لقاتو واءل وفتحات الخط 
فاتي: الو 
واءل: انا غندوز عليك نمشيو لمرجان 
فاتي: واخا 
قطع ومشات لبسات لبسات جلابتها دالكاشمير على اساس غاديين مسخرين يجيبو التقدية ولبسات صابو كحل ... عيط ليها تهبط عندو ونزلات منفخة .. يالاه ركبات حداه وهوا يشوف فيها كاعي 
واءل : مالك مالبستيش حوايجك؟!!!
وهادو شنو ؟ غير مسخرين ماشي معروضين!
واءل : وديك السورفيت اللي شاري ب 1400 درهم من اديداس لمن ؟؟ مخبياه تلبسيها فعرس!
فاتي: دابا واش مسخرين ولا معروضين؟؟؟
واءل : راه غنتلاقاو الناس ..العاءلة ... الصحاب ... واخا تكوني غادا غير للحانوت غتلاقاي بنادم مالكي ماباغاش تفهمي ... سورفيت والسبرديلة جداد عندك بيهم كيتسخرو الناس ويخرجو برا 
شدات العكس وقلبات وجهها : بغيتي تمشي يالاه متبغيتيش نطلع بحال 
ساط وديمارا الطوموبيل ساخط ... وصلو لمرجان ودخلو كيتقداو ... هوا موراها جار الشاريو مابغاش يطلق البشرة وهي قدامو هازة خنافرها ... وصلو لاكيس شادين الصف وهوا يسمع جوج بنات واقفين موراه كيهضرو بشوية 
-شوفي شوفي 
- شااافت غير خليني ساكتة 
- ياختي بغيت غير نفهم .. علاش ديما كنشوف واحد بوكوص مزوج وحدة لاعلاقة معاه هوا .. بغيت غير نعرف اش عاجبو فيها
- فاش تفهمي فهميني حتى انا باغا نفهم .. ضربي عليها ههه .. كنكره هاد الجلالب دالكاشمير مانخرجش بيهم واخا يرميوها ليا فابور 
- شوفي هوا ... كيحمقني هاد الستيل ... كيبقا فيا الحال فاش كنشوف شي بوكوص لاسقة فيه وحدة بحال هادي يخخخ .. مالنا حنا اختي كيتبعونا غير المجرتلين ... ولا تلقاي وحدة تيتيزة طايحة فواحد خانز ... ديما العكس يا ربي السلامة 
- ها العار وريني دابا فهادي شي حاجة كتعجب ! هوا ريحتو قربات تلسق فينا وهي موحال كاع واش كتشوف راسها فالمراية ... باينة عروبية 

تلفت واءل بنفاد الصبر شاف فيهم باحتقار بمعنى سمعهم وقلب عينيه .. اما فاطمة الزهراء وقافة قدامو كتستف السلعة .. داز قدامها كيجمع فالصاك ويهز عينيه بنضارات حادة فدوك البنات وهما كيتغامزو ويدورو وجههم عاقو بيه سمعهم . رجع كلشي للشاريو وجرو ودار يدو على فاتي فوق كتفها عنقها وخرج

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.