عاهرة العبري الجزء 15 والأخير

احمد: بنتي.. آلاء..

هزات راسها شافت فيه و عينيها كلهم دموع.. قربات كثر و عنقاتو بقوة.. حسات براسها فعلا محتاجة لحضنو.. اشتاقت لكلشي فيه.. نسات كل ما داز عليها و هي كتشوف فيه قدامها دبا.. حاسة بالضعف.. 

آلاء : اه ا بابا.. اه.. انا بنتك آلاء.. توحشتك ا بابا.. توحشتك بزاااف..

لؤي كان جالس بغيد و هو كيشوف فيهم.. بقا حاضي آلاء و هي كتسول فباها.. يللا من زوج تواني كانت كارهاه و مكتعتابروش حتا اب ليها.. دبا دموعها مبقاوش بغاو اتحبسو و هي كتشوف حالتو قدامها.. دغيا حاولات تناسا.. نهار على نهار كيزيد ابغيها كثر.. حنينة بزاااف و كتفكر فكلشي قبل راسها.. فيقو من سهوتو صوت مريم و هي كتحط الصينية ديال اتاي فوق الطبلة.. خوات اتاي و مدات للؤي و آلاء.. جلسات جنبهم و هي حادرة راسها..

آلاء : احم بابا.. هادا راجلي.. لؤي..

احمد: بصح.. بصح ا بنتي..

آلاء : (هزات راسها باه) اه ا بابا.. كان صاحب ياسر الله ارحمو..

أحمد : (حدر راسو مبقاش قادر اشوف فيها مزال) الله ارحمو..

آلاء : بابا.. شنو عندك.. مفهمتش هاد الحالة.. شنو طرا؟!..

مريم: بنتي.. حنا غير كنتعاقبو على الاغلاط لي درنا معاك و مع خوك الله ارحمو.. صافي هادشي لي طرا.. كيقولو الدنيا دوارة.. يوم ليك.. و يوم عليك.. داكشي لي كاين..

آلاء : متقوليش هكا ا خالتي.. مفهمتش اش وقع..

مريم: ا بنتي لي وقع.. باك قبل واحد 6 شهور هكاك.. جراو عليه من الخدمة.. طراو شي مشاكيل و صافي.. اوا من الصدمة مرض و شد الفراش.. هانتي كتشوفي فحالتو.. من داك الوقت عايش غا بالدوايات و شي ماكلة مكياكلها.. اوا و انا ا بنتي بالسيف عليا كفدت على دراعي و خرجت نخدم.. هادشي را والو من لي دوزنا عليك نتي و خوك.. سمحيلينا ا بنتي.. الله اسمح لينا منكم و صافي.. ربي كبير و مكيضيع حق حتا واحد..

آلاء : لا ا خالتي متقوليش هككا.. نتي فمقام ماما الله ارحمها.. و معندي لاش نسامحكم.. اي حاجة درتوها نفعاتني واحد النهار.. كتبقاو عائلتي.. (شافت فيها بصدمة.. مزال لحد الان كتفكر شحال كانت كتستمتع بدموعها و كيتسلا فتعديبها.. شحال عيرات ليها مها و ذلاتها.. و ليوم كتسمع منها هاد الهدرة.. حسات بالم كثر و هي كتسمع لهدرتها رغم داكشي كامل سامحات و نسات.. نزلو دموعها و هي كتهدر)

مريم: ااه يا بنتي.. يا ريت لو عرفت نربي بحالك.. الله احفضك ا بنتي.. شغنقول ليك.. 

آلاء : اه و اميمة اش طرا ليها..

مريم: (زادت فالبكا كثر) ا بنتي ختك اميمة.. تزوجات و دارت حياتها ففرانسا.. و دبا كتحشم حتا تجي تشوفنا و تحط رجلها فهاد البلاصة.. ربيت و معرفت نربي ا بنتي.. ربي عاقبني ا بنتي.. فششتها و كبرت ليها الشان.. مخليت مدرت عليها و فلخر مالقيت فيها خير.. و لكن نستاهل ا بنتي.. نستاهل..

آلاء : (وقفات جلسات جنبها و شدات ليها فيديها ) متقوليش هكا.. انا بنتكم دبا.. ياك.. صافي مكين لاش هاد الهدرة دبا.. كلشي فات.. (شافت فلؤي) ياك ا لؤي..

لؤي: اه.. (شاف فساعتو و جبد تيلي من جيبو) هانا جاي.. (خرج من الغرفة بعد شوية و دوز لابيل بواحد من رجالو) الو.. ..... بغيتك دبا تجي عندي فهاد العنوان ****** ............. ربع ساعة و نلقاك عندي.. فاش توصل سيفط ميساج.. (قطع و رجع دخل)

قطع و رجع دخل جلس لقاهم كيضحكو فرحانين.. هاد المرة شاف اللمعة فعينين آلاء.. ابتاسم و هو حاس بيها فرحانة.. دبا فرحتها كملات.. كانت مشغولة مع اهلها مرداتش لبال لنظراتو لي غياكلوها.. هزات مريم راسها فيه و هي كتشوف فنظراتو ليها.. ابتاسمات و هي كتشوف الحب فعينيها.. فرحات ليها.. تستاهل كثر.. حدرات راسها و هي كتمنا لو كانت ذكا غير شوية.. تمنات لو كانت انسانة كتحس.. مكانتش غدير فالبنت هككا.. حسات بضميرها فاق.. اصلا حسات بيها من نهار تقلبات حياتهم.. كانت حاسة بحمل ثقيل فوق كتافها و هي حاسة بالمعاناة لي دوزاتها على آلاء.. معمرها رتاحت.. حتا شافتها دبا.. عاد عرفات معنى الراحة النفسية.. كانو كيهدرو و يضحكو رغم كلشي كيحاولو يفوجو.. حس لؤي بفيبرور ديال التيلي جبدو لقاه ميساج من الحارس ديالو.. وقف و هو كيشوف فآلاء..

لؤي: آلاء.. صافي خاص نمشيو.. تابعني ما يدار..

آلاء : (وقفات) اه واخا.. بسلامة دبا.. و لكن غنرجع..

لؤي: لا مكين لاش ترجعي..

آلاء : (شافت فيه باستغراب) و لاش؟!..

لؤي: حيت غيمشيو معانا.. 

آلاء : بصح؟!..

لؤي: (هز راسو باه) كيبقاو عائلتك..

مريم: لا ا ولدي مكين لاش..

آلاء : لاش.. بالعكس.. تبقاو معايا حسن.. 

مريم: مباغينش نبرزطوكم معانا.. دبا نتي درتي حياتك و دارك.. حنا كنبقاو عائلتك و صافي.. مكين لاش نثقلو عليكم..

آلاء : (شدات ليها فيديها) ماما.. فين عمر الواليدين كانو ثقل على ولادهم..

مريم: ماما !!..

آلاء : اه نتي ماما.. و لا ياكما مبغيتينيش نعيط ليك هكا..

مريم: لا بالعكس ا بنتي.. ليا الشرف تكون عندي بنت بحالك.. الله ارضي عليك..

آلاء : امييين يا رب.. خلليونا غير نمشيو دبا.. 

مريم: واخا ا بنتي.. نهز غير شي حاجة.. و نلبس جلابتي..

آلاء : واخا.. مكين لاش تهزي الحوايجهزي غير الضروريات و صافي.. (دارت شافت فاحمد) صافي.. هاحنا ا بابا غنرجعو عائلة بحال قبل..

أحمد : الله ارضي عليك ا بنتي.. (مشا لؤي فاتجاهو و عاونو باش اوقف.. تكاه على كتفو و تم خارج بيه.. خرجو كانت سيارة خرى من نوع رونج روفر كتسناهم.. كان فيها الشيفور لي اتاصل بيه لؤي.. حيت سيارتو فيها بلاصة زوج فقط.. عاونو يطلع لور و رجع عندهم لقا آلاء واقفة كتسنا.. شافت فيه و قربات ليه.. شدات فيديه)

آلاء : شكراا.. من ديما و نتا واقف معايا..

لؤي: (هز ايدها باسها) منبغيش نعاود نسمع هاد الهدرة.. لي راها ديالي.. ديالك حتا نتي.. و عندك الحق فيها.. و غير ابتسامة منك كتسوا الدنيا و ما فيها عندي..

آلاء : (تعلات على طراف صبعانها و باستو جنب فمو) كنموت فيك..

لؤي: (دور ايدو على خصرها و جرها عندو) علاش كتقلبي..

آلاء : (كتبيض فعويناتها) والو..

هز لؤي راسو بانت ليه مريم واقفة و حادرة راسها بعد شوية على آلاء و خرج سابقهم حتا تبعوه.. طلعات حداه آلاء فالفيراري و مريم مع احمد.. كسيرا مباشرة للقصر و السيارة التانية تابعاهم..

داز الوقت.. كانت واقفة قدام المرايا كتقاد فحوايجها.. لبسات سروال ديال العسكر طالع على السرة و لاصق عليها.. مع تيشورط بيض بكتبة الوسط فالكحل بحال ميني فونطر من القدام و واسع.. هزات تجاكيط ديال الكوير كحلة قصيرة لبساتها و هي تسمع تيلي ديالها كيصوني.. هزاتو لقاتها كاميليا.. دوزات صبعها باش تجاوب و ابتسامة مزينة وجهها..

اكرام : خالتي كاميييليا.. لاباس عليك؟..

كاميليا: لاباس ا حبيبة و نتي..

اكرام : حتا انا خالتي..

كاميليا: كيف راك مع الدراري.. و كيبقاو حتا هما؟!..

اكرام : لاباس الحمد لله ا خالتي.. 

كاميليا: مناوياش تحيدي ديك خالتي من فمك هاديك اه.. لؤي و كيعيط ليا مدام كاميليا.. و نتي مشرفاني..

اكرام : ههه لا.. مقصدتش هكا هه.. و براكة من الفشوش راك وليتي جدة زعما.. صافي نعيط ليك خالتو كاميليا.. 

كاميليا : مجداة حد انا.. يشويني فيك.. (سكتات شوية عاد كملات) احم.. المهم بنتي هادا ماشي موضوعنا..

اكرام : (حسات من نبرة صوتها بللي كاينة شي حاجة ماشي هي هاديك) اش كاين.. بلا متخلعيني..

كاميليا: لا لا.. معندك مناش تخافي.. بغيت غير نقول ليك.. بللي داداك فاطمة..

اكرام : مالها دادا؟!..

كاميليا: مامالهاش.. ا مالك ا بنتي غير بشوية خلليني نعرف نهدر.. لالة فاطمة غير عيانة شوية.. و بغاتكم تجيو غدا لفاس تشوفوها.. بغات حفايدها يتجمعو قدامها.. عارفاك مزال مقلقة منها.. و لكن ديري ليها خاطرها هاد المرة.. غير نهار و رجعي لكازا الى بغيتي..

اكرام: (تنهدات) واخا ا خالتي.. انشاء الله.. دبا نقولها لنزار و نجيو.. دونك حتا لؤي و آلاء غيكونو..

كاميليا: غنعيط ليهم دبا نيت..

اكرام : اووك انشاء الله..

كاميليا : يللا بالسلامة ا بنتي.. ا دومان..

اكرام : بسلامة..

قطعات معاها و دارت شافت فنزار لي كيطوي فالصلاية.. معارفاش لاش حاسة بشي شعور فشكل.. لعنات الشيطان و دارت شافت فالمرايا و هي كتقاد فشعرها لي خلاتو مطلوق على طولتو..

نزار: شكون عيط؟!..

اكرام: غير خالتي كاميليا..

نزار : الوليدة.. اش بغات؟!..

اكرام : قالت لينا نرجعو غدا لفاس.. دادا عيانة..

نزار: (تنهد) ضروري غدا.. 

اكرام: لاش؟!.. 

نزار: تابعني ما يدار..

اكرام : غير هاد المرة و صافي.. تانا نيت باغا نشوفها.. بلييز..

نزار: واخا انشاء الله.. اجي نتي شفت واحد جبهتك مبقاتش كتجي على الارض..

اكرام : (بقات ساكتة و هي كدور فعينيها.. شعلات تيلي شافت فالساعة و شافت فيه..) احم.. 9 دبا.. فات الحال.. يللا خاص نمشيو.. (دارت فاتجاه الباب باش تمشي حتا كيوقفها و هو شاد من ايديها)

نزار: مزال غنتفاهمو عليها.. وليتي عايشة غير هكاك.. اما اللبس مندويوش عليه..

اكرام : (نزلات عينيها كتاكد من داكشي لي لابسة) لا لا نتا هبلتي مافيهاش.. اش لابسة.. مولفة كنلبس كثر من هكا.. 

نزار: (حيد ايديه على ايديها و غمزها) كون غا بقيتي دايرة النقاب بحال قبل.. غتجي حسن😉..

اكرام : (شافت فيه مطولا و دارت فاتجاه الباب و هي كتبركم غير راسها) قالك النقاب.. هو يقتل الميت و يجي عندي انا صللي و تستري.. بشااار..

نزار: (تبعها و جرها عندو من خصرها.. كيحاول يستفزها) قلتي شي حاجة ا مراتي العزيزة..

اكرام : لا حرام.. مدويتش انا كاع..

نزار: و هكاك..

مشات اول حاجة عند وليداتها طل عليهم.. هزاتهم واحد بواحد باستهم و وصات عليهماسية مزيااان عاد خرجات.. واخا هكاك مكترتاحش و هي بعيدة عليهم.. خلاتها على الله و خرجو للحديقة.. ختار نزار الفيراري البيضة ديالو.. حل لاكرام طلعات و تبعها هو.. كسيرا بسرعة خللا غير العجاجة وراه.. اكرام ولفات السياقة ديالو.. حتا هي كتمل فاش كيسوق عادي.. بدات كتبقشش وسط الاغاني و كتقلب حتا ختارت وحدة و دارت الصوت على الجهد ديالو.. ختارت hight life ديال ريهانا.. بدات كتغني معاها و تشطح و هي كضحك غير بوحدها.. حيدات الفوقاني ديال السيارة وللات بحال ديكابوطابل.. وقفات و خرجات راسها و هي كتغوت.. نزار شوفة فالطريق و شوفة فيها.. ابتاسم فنفسو على تصرفاتها.. كتبان بحال شي بنوتة صغيرة يللا وصلات لسن المراهقة.. بحالة عاد عرفات الحياة..

نزار: (بصوت مرتافع كيغوت باش تقدر تسمعو) جاتك المراهقة معطلة و لا شنو.. 

اكرام : هههه يمكن.. عمري جربت هاد الاحساس.. ووووو.. هزيت المشاكيل و انا صغيرة.. معشتش كيف بغيت.. 

نزار: (دار و هو كيشوف فبنادم حاضيها و كرشها تعرات مع هازة ايديها لفوق و تيشورط قصير و لي داز كيبقا حال فيها فمو.. تعصب و جرها من ايديها نزلها.. طلع الفوقاني ديال لوطو.. و نقص الفوليم ديال الموسيقى..

اكرام : ا ويلي مالك؟!..

نزار: الهبال ديالك ماشي فالشاريع قدام كلشي.. شدي لرض شوية..

اكرام : حرام عليك.. بغينا غير نضحكو شوية ضروري متنكدها عليا.. 

نزار: (بقا ساهي فيها.. فعويناتها لي كيبريو و قنانفها لي جامعاهم بمعنى انها مقلقة و حجبانها المعقودين.. بقا ساهي فيها و نسا الطريق لي قدامو.. دار بسرعة فاش سمع الكلاكسون ديال طوموبيلات.. لقا راسو داخل فكاميو قدامو.. مردش لبال و هرب على الطريق و هو ساهي فيها.. دور الفولون بسرعة و هرب عليه.. اكرام مشات و جات معاه كان شوية و يدخل فشجرة و لكن وقف لوطو فجنب الطريق فاخر لحظة.. سائق ماهر عارف راسو اش كيدير.. اكرام لون مشا من وجهها و قلبها ولا كيضرب فالتسعين.. هربو من الكاميو فاخر لحظة.. لو تعطلو زوج التواني غيكونو محسوبين فعداد الاموات دبا..

نزار: شفتي.. هانتي كنتي غتخرجي علينا..

اكرام : (دورات وجهها شافت فيه و هي حاطة ايديها على قلبها.. معلى وجهو حتا شي تعبير.. كيبان عادي و هو مبتاسم.. مفهمات والو.. هي شوية و يسكت ليها القلب.. دارت شافت قدامها بلا متزيد كلمة وحدة.. نزار رجع حرك لوطو و كسيرا بقوة خلاتها تقفز هاد المرة)

اكرام : غير بشوية.. واقيلا را شوية و مندخلو فكاميو..

نزار: بسبابك..

اكرام : ها العار وللي ترد البال.. مزال مناوية نموت..

نزار: (قرب ليها هز ليها إيديها باسها و عينيه مزالة على الطريق) معندك مناش تخافي.. حتا حاجة متقدر تآديك و نتي معايا.. 

اكرام : على الله.. (طفات الموسيقى و هزات تيلي ديالها كتبقشش فيه.. مابقاتش عندها الكانة.. لاحت تيلي قدامها و ربعات ايديها و هي حاضية طريق.. سرعان ما وقف بيها قدام الملهى الليلي.. هزات راسها فالمكان.. مزال على حالو.. كيفما خلاتو.. نزلات و عينيها كتسارا فالارجاء.. تبعها نزار و شد ليها فيديها.. شافت فيه و دخلو بزوج.. حدرات راسها و هي كتشوف بنادم كيف داخل خارج.. نزار معجبوش الجو نهائيا.. مكيحملش اعمر فبحال هاد البلايص و خاصة هي معاه دبا.. اكرام محساتش براسها حتا طلقات منو و هي واقفة كدور فعينيها.. نزار بقا واقف جنبها كيشوف هادشي فين غيوصلو.. البنات غاديين جايين كيعرضو فمفاتنهم كيحاولو يطيحو فريستهم و هما متنافسات مع بعضهم على الكليان الاحسن..

ماجدة: جوزيييف صقلي شخصيا هنا...

نزار: (دار شاف فيها و هو مطلع حاجب و منزل لاخر.. عارف راسو فايت ليه شايفها و لكن معقلش فين بالضبط.. فضل انه ميجاوبهاش)

اكرام : (قربات لنزار و شدات ليه فيديه) نزار صقلي ا حبيبة.. سمعتي.. نزار.. مبقاش جوزيف..

ماجدة: (بصدمة واضحة على ملامحها) اكرااام؟!!..

اكرام : اه اكرام.. (جرات نزار و مشات فاتجاه الدرج بلا متزيد كلمة وحدة.. مزالة عاقلة مزيان على ماجدة و على كلشي هنا.. حفضات هاد الملهى من كل جهة.. طلعات للطابق التاني لي فيه الغرف.. من بعيد لمحات ليلى واقفة هي و ابتسام.. بزوج كانو خدامات تحت ايدها.. هزات راسها فنزار لي شاف فيها بمعنى تمشي بوحدها.. جبد تيلي ديالو كيخربق فيه.. تكا على الحيط و ايدو التانية فجيبو.. اكرام مشات مباشرة عند البنات لي تصدمو و هما كيشوفو فيها قدامهم.. ليلى غوتات و تلاحت عليها عنقاتها..

ليلى: اكراااااام.. فين هاد الغبووور..

اكرام : ههه تي غا بشوية غتخنقيني يا الدحشة..

ليلى: (بعدات غليها شوية) ويلي يا ختييي شحال توحشناك.. احح ناري شوفي فيا.. زيانيتي ا الصكعة ممم دوي..

اكرام : ههه اوا شتي.. (دارت سلمات على ابتسام)

ابتسام: اوا الزين مبقيناش كنشوفوك.. 

اكرام : الضروف ا حبيبتي الضروف..

ليلى: اوا شنو قصتك نتي.. فين غبرتي هاد الوقت كامل.. 

اكرام : اوا ختي راني تزوجت و ولدت ههه.. اش بغيتي مزال..

ابتسام: ايهيهي على الناس ديال الزواج.. مبرووك عليك ا الزين.. بعدا درتي دارك..

اكرام : ربي يخلليك.. العقبة ليكم..

ليلى: ههه الله امسخك.. علاه حنا ديال شي زواج بعدا.. 

اكرام : اوا معرفتي الدنيا اش مخبية ليك..

ابتسام: اودي مخبية لينا غير المصايب.. ههه معلينا.. فين شاداها.. العجب بعدا حتا جيتي عندنا.. حيت لي خرجات من هنا كتفك بمرة.. عمرها مكتفكر تعاود ترجع لهنا..

اكرام : ههه.. علاه شكون تفكات..

ليلى: ثلاثة هما.. سارة.. امنية.. (تنهدات) و اسراء.. مللي مشاو مابقينا شفناهم.. سارة رجعات تصالحات مع عائلتها واخا لقات المشاكيل فلول.. و لكن تقادات ليها حياتها دبا.. 

اكرام : مزيان.. الله اسهل ليها..

ليلى: امييين.. اوا و لالة امنية.. حملات من واحد الساعودي ههه.. و تزوج بيها.. اصلا هو كان طااايح فيها مسكين.. طاح طيحة خااايبة هه.. ولا يوميا كيجي لعندها.. عرفات كيفاش تلويه الصكعة..

اكرام : ايهي على لالة امنية.. مطلعاتش ساهلة.. و اسراء.. رتاحت تاهي شوية..

ليلى: هي من ناخية رتاحت.. رتاااااحت.. و بعدات فمرة.. مشات بعييييد..

اكرام: مفهمتش اش بغيتي تقولي..

ليلى: اسراء الله ارحمها دبا.. انتاحرات مرة خرى.. هاد المرة مقطعاتش ايديها.. لا.. دخلنا لبيتها لقيناها شانقة راسها.. و لكن بالسيف عليها.. مزالة صغيرة و شافت داكشي كامل فحياتها.. واخا معرت اش تكون.. كتبقا بنادم..

اكرام : عمر الانتحار مكان حل ا صحبتي..

ليلى: هادشي كلنا عارفينو.. و لكن الدنيا كترغم عليك شي حوايج.. كتوريك بزاااف حتا كتكرهي راسك.. 

اكرام : الدنيا وراتنا كاملين.. وراتنا لي مكيتشافش.. و لكن بالصبر كتفاجا واحد النهار.. يا ربي ترحمها و تغفر ليها.. متستاهلش.. حياتها ضاعت هكاك..

اكرام : الدنيا وراتنا كاملين.. وراتنا لي مكيتشافش.. و لكن بالصبر كتفاجا واحد النهار.. يا ربي ترحمها و تغفر ليها.. متستاهلش.. حياتها ضاعت هكاك..

ليلى: باين دازت عليك مزياااااان فهاد العام ياك.. ماشي بالساهل استقريتي...

اكرام : كلشي فات دبا.. 

ابتسام: اجي نتي كيدرتي حتا جيتي.. معندك راجل لييحكم فيك ههه.. خلاك ترجعي لهنا.. و لا سلتي..

اكرام : ويلي على نسلت.. هبلتي.. بغيتيه يقبر اصل مي.. منقدرش ا ويلي.. را هو لي جابني..

ليلى: ويلي على جابك.. بعقلك نتي لا؟!..

اكرام : و صافي شحال فيكم.. هو عارف قصتي مزيااان.. دونك ماعندي ما نخبي.. بغيت نرجع غير نشوفكم و صافي..

ابتسام: و فين خلليتيه.. عنداك دور ليك بيه شي وحدة ههه.. را و الله حتا يطيروه ليك..

اكرام : لا لا.. ماشي مع راجلي.. ميديهاش فيهم.. وحدة لي معرمرة ليه العين.. ديجا راهو فين واقف قبالتي نيشان.. (نعتات ليهم بيديها و دارو بزوجات يشوفو شكون.. بقاو واقفات فبلايصهم و هما كيطلعوه) 

ابتسام: الله اكبر.. اللهم بارك و زد من عندك..

ليلى: لا لا هاد الزين ماشي مغريبي.. يا لهويتي.. منين ضبرتي على هاد الكائن..

اكرام : هادوك اه.. جمعو عينيكم و لا نجبدهم ليكم كالا منين جبتو..

ابتسام: واه.. هادا كللو ديالك ا ختي..

اكرام : لا نصو.. ا ويلي على السيدة هبلات..

ليلى: وا ختي شوفي.. الزين كاوري.. و الفورمة ديال الصح.. عاد لايفووون ا صحبتي.. يعني حتا الفلوس.. يا ختييي.. سعداتك بالرب.. قل اعوذ برب الفلق.. الله اخلليكم لبعضكم..

اكرام : ههه يا ختي شحال بركاكة.. دغيا ضربتي على لايفون..

ليلى: اوا شنو.. را خدمتنا هادي😏.. 

اكرام : اوا اش باقي طاري هنا.. تبدل شي و لا والو.. اجي فينو واحد ياسين؟!..

ليلى: ويلي ويلي.. اححح وللا سي ياسين دبا..

اكرام : ههه لاش؟!..

ليلى: اوا يا ختي.. عمو مات.. بشي 7 شهور دبا.. اوا فاش مات خللا ليه كلشي وراه.. مع راك عارفة عمو ممزوجشش و مكين لي يورث وراه من غير ياسين.. وللا العظمة و الشان.. و لكن ا ختي را زاد زيان و تبوكس علينا.. 

اكرام : ههه غتلقاي كلشي كيدور بيه دبا.. حتا نشدو هداك..

ابتسام: يا ختي مكدبتيش.. ولاو غير سي ياسين و على خاطرك سي ياسين.. يلحنو فيها.. مع كتعرفي مكيقضيش فيهم الزين هادو.. و لكن غير شافو الفلوس.. كلشي حوال ههه.. 

ليلى: ا وديي بحالة شفتيه مديها فشي وحدة.. عنداك ا ختي.. دبا وحدة لي وللا يفيق عليها و ينعس عليها.. طاااح مسكين طيحة خااايبة..

اكرام : واايلي.. ياسين هادا..

ابتسام: ااه.. و لكن مسكين معامن طاح.. وحدة كثر منك.. طبعها صعب منك..

ليلى: و لكن الصراحة كتشبه ليك يا ختي.. بزاااف.. اصلا هي خدمات هنا بلاصتك دبا..

اكرام : وايلي.. امتا جات هادي..

ليلى: غير شي شهر و شي حاجة بحال هكاك.. ماشي بزاااف.. جابتها سمية.. و لكن تاهي دارت حالة فالبشار.. يا ختي را شابهاك.. لا فالوجه و لا لاطاي.. حتا التصرفات.. كاراكطير ديالها صعيييب ا بنتي..

اكرام : اممم.. اوا خاص نشوفها..

ليلى: اه.. ليوم نهارها فالرقص.. (عينيها على راجل فالخمسينيات من العمر بالكوستيم مقاد حالتو و شعرو شايب.. داز من حداهم) حيدي من قدامي خلليني نشوف مع كلياني..

اكرام : هه اوا سيري..

ليلى مشات فاتجاه الراجل وقفات وراه..

ليلى: اوا شفتي ا سي صابر.. الناس ولاو كيدوزو من حدانا و مكيعبروناش..

صابر: (دار شاف فيها) ءءء.. ليلى.. لا لا مشفتكش.. فين كنتي..

ليلى: يااااك ا سي صابر.. انا كاملة مشفتينيش.. دزتي من حدايا.. واها ا سي صابر.. هاهي عندك.. (كتهدر و هي مقلقة هازة خنافرها للسما و كتلحون فصوتها بطريقة خلاتو يبقا غير حال فمو.. اصلا من النوع لي ساهل يطيح)

صابر: لاا.. لا حاشا ا لالة ليلى.. كلشي ليك غير نتي.. شتي لا بغيتي نطلق مراتي و تكوني هي الشافة على كلشي مرحباا.. نتي راك الحوب ا ليلى.. حتا من ولادي نجري عليهم غير طلبي.. و كلشي يجي بين ايديك..

ليلى: لا لا ا سي صابر.. انا ماشي بنت الحرام.. مراتك خلليها ليك هي لي دايمة ليك هي و ولادك.. و انا فوقت ما كنتي غيان و باغي ترتاح.. جي عندي نفوج عليك و نسيك فهمومك.. اوا السي صابر هانا كنتسناك فالبيت كيف ديما.. (بقا متبعها بعينيه و هي غادة.. اكرام حتا هي بقات حاضياها من بعد عتاذرات من ابتسام و رجعات عند نزار..)

نزار: (دار تيلي فجيبو) صافي مشينا..

اكرام : ا ويلي مزال.. يللا شفت زوجات.. اصلا بغيت نشوف ياسين..

نزار: (مطلع حاجب و منزل لاخر) شكون هاد ياسين؟!..

اكرام : ءء.. ياسين.. متمشيش بعيد.. راه بحال خويا.. هو الوحيد لي كان كيفهمني هنا.. ميمكنش نجي و منشوفوش..

نزار: (مسح على وجهو) الصبر من عندك يا ربي.. يا ربي تخرج هاد الليلة على خير معاك.. فين كاين هاد ياسين؟!..

اكرام : غنمشي نشوف واحد الحاجة قبل.. (جراتو من ايديه و بقات غادة حتا وصلات للخر ديال الكولوار.. معلقة خامية طوييلة على الحيط.. جراتها اكرام.. طلات مباشرة على المنصة ديال الرقص.. كيبان منها كلشي.. نزار تكا على الحيط ربع ايديه و هو كيشوف معاها هادشي فين غيوصلو.. اكرام دارت ايديها فجيابها و هي مراقبة المنصة.. كتسنا امتا غتبان هاد الراقصة الجديدة.. 

نمشيو لتحت.. كانت واقفة فالدخلة ديال النصة كتستاعد باش دخل.. وقف جنبها و تكل على الحيط و هو مراقبها.. شافت فيه و رجعات كتقاد فلبستها.. كانت لابسة بدلة ديال الرقص.. عبارة على سوتيان و صايا كويلة بزوج فتخات من جيهة الفخاد.. فالغوز.. كلها محجرة و لامعة كتبان من بعيد..

ياسين: مزال مفكرتي..

كنزة: (تنهدات و قربات وقفات قدامو) معرفتش ا ياسين.. و الله ماعرفت.. 

ياسين : (شد ليها من ايديها) كنزة.. مكين لاش تبقاي تعقدي فالامور كثر.. الجواب مصعيبش حتا لهاد الدرجة..

كنزة: لا صعيب.. ياسين نتا متستاهلش وحدة بحالي.. وحدة مسخة مكتسوا والو بحالي..

ياسين: انا بغيتك كيفما نتي.. و مكتهمنيش هاد الهدرة كاملة..

كنزة: انا ماشي غير وحدة بلا شرف و صافي.. انا وحدة بلا كرامة.. بلا احساس.. بلا قلب.. وحدة انانية و بزااااف ا ياسين.. واش عارف انا شحال من حياة دمرت.. غير باش نرتاح فنفسيتي.. و لكن مرتاحيتش.. غير ما زدت تعدبت.. عفاك بلا متصغب الانور علينا بزوج.. انا وحدة منستاهل حتا واحد ابغيني.. كنستاهل نبقا بوحدي.. هادي هي العيشة الانسب ليا.. عاهرة راقصة بليل.. صافي و بنهار نكرة.. انا لقيت كلشي قدامي واحد النهار.. و لكن محمدتش الله.. عفاك بلا متزيد تعدبني.. نتا معارفش اش دوزت فحياتي.. معارفش كنزة الحقيقية.. انا مخاص حتا واحد احن فيا اصلا.. مزال على رايك دبا؟!..

ياسين: الوقت كللو ليك.. مزال عندك الوقت فين تفكري.. غنتسنا جوابك..

كنزة: (شافت فيه شحااال.. حاسة بقلبها كيتقطع.. حسات فعلا بكل جرم رتاكباتو فحق عائلتها) شكراا..

ياسين: لاش؟!!..

كنزة: صعيب تيق فوحدة بحالي.. عائلتي و كرهاتني.. و نتا بغيتيني.. هادشي بوحدو كافيني..

ياسين: كلشي كيستاهل فرصة تانية..

كنزة: يمكن... (تنهدات و خرجات للمنصة ديال الرقص و دماغها مسافر بيها لبعيييد كدوز قدام عينيها سلسلة احداث ي💋..

انتابهات اكرام كثر و هي مراقبة المنصة.. كيبان ليها فقط خيال فتاة بجسم متناسق.. شعلو الاضواء فالقاعة.. و ركز فقط على الراقصة لي عاطية بضهرها.. مفاتنها جاو بارزين فبذلة الرقص.. بدات موسيقى شرقية هادية فلول.. كتحرك معاها يمين و شمال بجسمها.. نزلات بجسمها لور و شعرها الحريري واخد راحتو كيديه الريح و يجيبو.. بشوية بشوية بدا الايقاع كيزيد.. دارت بخفة و هي كترقص على انغام ايقاع شرقي.. كتحرك بطريقة رائعة مخلية كلشي حال فمو فيها.. الانظار كلها عليها.. اكرام عيات متحقق فيها مبانتش ليها صورتها مزيان.. كانت بعيدة عليها و مع الاضواء مقدراتش تشوفها.. معرفاتش لاش لمجرد ما شافت رقصها تفكرات نفسها.. تفكرات حتا هي واحد النهار كانت فبلاصتها.. كانت كترقص قدام كلشي بنفس الطريقة.. نفس الميلة ديالها و نفس الحركات.. حتا من شعرها كانت كتلعب بيه بنفس الطريقة.. حركاتها محسوبين فوق المنصة.. مكتزيد مكتنقص.. رجعات بيها ذاكرتها بلوور.. كتفكر ايامها لي دازت تحت هاد السقف.. كانت كظن بللي حياتها فاستقرار.. كانت كظن انها واخدة القرار الصحيح.. مكانتش كتفكر فعواقب افعالها.. فكرات غير فحاضرها.. ظنات بللي كانت ذكية.. و لكن كانت خاطئة.. هزات راسها شافت فنزار.. لي كان شاد تيلي ديالو كيخربق فيه معلى بالوش.. باغي غير امتا يجرها و يخرج من هنا.. محاملش البلاصة كاملة.. تنهدات بصوت مسموع و رجعات شافت فالمنصة.. جاها الفضول تعرف هاد الراقصة الجديدة.. مكدبوش فاش قالو كتشبه ليها فالرقص و خدات بلاصتها.. هي بنفسها حاسة براسها هي لي واقفة تم.. سدات الخامية و دارت تكات على الحيط و هي كتسترجع ذكراياتها المؤلمة لي بدات من هاد البلاصة.. تحجرو الدموع فعينيها و لكن سرعان متحكمات فراسها.. مسحات عينيها و رجعات حلات الخامية.. كانت المنصة خاوية و الناس مزال كيصفقو و يصفرو.. شافت فنزار لي فهمها.. دار تيلي فجيبو و تبعها.. نزلات لتحت.. فالدخلة ديال المنصة كدور فعينيها.. بانت ليها عاطياها بالضهر واقفة كتهدر مع شي بنت.. بقات كتشوف فيها مدة طويلة.. باغا تشوفها و تعرفها.. طلعات نفس و هي كتقرب ليها.. حتا كيوقفها شي صوت من وراها.. كان صوتو.. صوت ياسين كيناديها..

ياسين: اكرااام..

اكرام : (دارت شافت فيه.. محساتش براسها حتا تلاحت فيه عنقاتو.. كتعتابرو كثر من اخ ليها.. خشات راسها فصدرو.. توحشات الحضن الدافي لي كان الوحيد لي كيفهمها.. الوحيد لي شد فيديها نهار دارت بيها الدنيا.. هو لي وقف جنبها فاصعب ايامها.. فاش كضيق بيها الدنيا كتلقاه جنبها.. كثر من صديق و كثر من أخ.. دفنات راسها فصدرو و هي مزيرة عليه.. مكانتش دايرة بال مع نظرات نزار لي غياكلوهم بزوج.. كون كانو رصاص كون تيراو فيهم.. جمع ايديه على شكل قبضة وهو مزال كيحاول يتحكم فاعصابو.. مبغاش اتهور و يدير شي فعل يندم عليه.. اكرام بعدات على ياسين بشوية.. شافت فيه و هي مبتاسمة و كتمسح الدموع لي تسللو من عينيها بكمها.. حط ايدو بشوية على حنكها كيدوزها بشوية و هو كيمسح دموعها..

اكرام : توحشتك بزاااف..

ياسين: فين كنتي؟!.. عام على قدو و نتي غابرة.. حتا من العائلة لي رباتك تحولو.. مبقيتيش بنتي..

اكرام : قصة طويييلة بزاف.. مغتساليش الى بديت.. انا لقيت عائلتي ا ياسين.. رجعت لحياتي.. استقريت.. و دبا مزوجة.. تزوجت.. درت داري ا ياسين و ولدت.. (كتهدر و هي مبتاسمة و الدموع محجرين فعينيها بالفرحة و الاشتياق.. كلشي مخلط عليها.. محساتش بنزار لي واقف عند راسها.. متحكم فراسو بالسيف.. هدر من تحت سنانو)

نزار: لاباس مزال مفكرة راسك مزوجة..

اكرام : (شافت فنزار و بدون اهتمام لكلامو شدات ليه فيديه.. رجعات شافت فياسين) هادا راجلي نزار..

ياسين: (مد ايدو لنزار) مشرفين.. غتكون عرفتيني.. و مبروك ليكم..

نزار: (سلم عليه و ايدو التانية مزال شاد بيها ايد اكرام بلا مينطق)

اكرام : مبروك ليك بعدا..

ياسين: لاش؟!..

اكرام : داك الشارف ديال عمك.. تهنينا منو.. و.. (غمزاتو) عاد البنت الجديدة😉.. عند بالك مجايبة للدنيا خبار..

ياسين : لا عارف حتا حاجة متخفا عليك.. قادة براسك..

اكرام : اوا شنو.. را اكرام هادي لي معاك... عرفتي متخيلش شحال فرحت فاش رجعت شفتك.. 

ياسين : خفت منرجعش نشوفك.. غبرتي بزاااف..

اكرام : اه.. حكلك سولتي فيا..

ياسين : سولت و قلبت.. و لكن عرفت بللي خالتي خديجة و غيثة تحولو من الدار.. مبقيت فهمت والو.. و نتي مكنتش عارفك فين مشيتي.. راك عارفة..

اكرام : صافي مكيهمش.. كلشي فات دبا.. و رجعت شفتك.. (دورات عينيها على المكان) فينها البنت الجديدة بعدا.. يللا كانت هنا..

ياسين: غتكون طلعات لبيتها..

اكرام : اااه.. بغيت نشوفها..

ياسين : اجي.. 

نزار: مناوياش ترجعي بحالك.. راك درتي شحال من دورة.. مكفاتكش..

اكرام : لا لا.. نزار عفاك.. غير نشوفها و نرجعو.. صافي و الله..

نزار: راني مزال صابر عليك.. مطلعيش فوق راسي و خللي هاد الليلة دايزة بيخير..

اكرام : 10 دقايق.. و الله غير عشرة..

نزار: (هز راسو و مسح على وجهو مبقاش قادر اصبر..) 10 دقايق نلقاك فلوطو.. و لا نقبر مك هنا.. (خنزر فيها بطريقة خوفاتها و خلاتها تبلع ريقها و هي كتشوف فيه.. دار و خرج من الملهى فاتجاه السيارة.. هي غير خرج طلعات النفس و شافت فياسين)

اكرام : اوووف شحال فيه..

ياسين : من حقو.. خاصو يقبر مك.. كاين شي وحدة مزوجة و كترجع لبحال هاد البلايص..

اكرام : ياااك ا ولد القحبة.. جيت غباش نشوفك يخ.. دبا غرفتي اش غدير.. زيد قدامي نشوف هاد المرض و نقود بحالي..

ياسين : عام على قدو مقادش ليك فمك..

اكرام : لا لا نتا تزادت فيك شي حاجة..

ياسين : ههه.. زيدي زيدي و لا ليوم راجلك اقلب علينا الدنيا.. 

طلعو بزوج و مشاو فالكولوار حتا وقفو قدام غرفة اكرام القديمة..

اكرام : متقولش ليا جالسة فبيتي..

ياسين : بقا خاوي مللي مشيتي.. و فاش جابتها سمية لهنا عطاتها هاد البيت.. 

اكرام : صافي صافي.. غير زيد..

دق ياسين على الباب حتا سمع "دخل" عاد حل الباب.. كانت واقفة قدام المرايا كتجمع فشعرها.. كانت بدلات حوايجها.. غير حل الباب دارت شافت فيهم..

ياسين : كنزة..

وقع الصمت.. شي كيشوف فشي.. حتا وحدة فيهم مقدرات تنطق.. جاب ليهم الله بحالة كيحلمو.. حتا وحدة مفكرات فانها غتحط فبحال هاد الموقف.. حسو بالدنيا دايرة بيهم.. مبقا كيبان ليهم والو من غير هما بزوج.. تفكرو اول لقاء كان ليهم.. شافو بنفس الطريقة.. غير هاد المرة الآية معكوسة.. نزلو دموعهم بزوج حارين على خدودهم.. مكانوش كيفكرو فلقاءهم التاني.. اخر مرة.. كل وحدة كانت كتكن كره كبير للتانية.. نطقو بزوج فدقة باسماء بعضهم..

اكرام : كنزة..

كنزة: اكرام..

رجعو سكتو و هما كيتاكدو من رؤيتهم.. دقات قلبهم كتسارع و هما حاسات براسهم كيدورو فدوامة كبيرة مباغاش توقف.. بصعوبة باش قدرات اكرام تنطق و هي كتفكر قدام عينيها كل دمعة نزلات من عينيها و قلبها محروق على بنتها.. 

اكرام : صافي.. هنا فين وصلاتك الدنيا..

كنزة مسحات الدموع من عينيها و هي كتفكر اخر مرة فاش خرجات من الدار.. كتفكر حالة اكرام و كيفاش كانت منهارة.. تفكرات لؤي لي عطاها ثقتو و غدرتو.. تفكرات قمر و هي كتشوف فيها ميتة قدامها براس مقطوع.. تفكرات فاش اقرب الناس ليها عطاوها بالضهر دارو و خلاوها.. تفكرات مراد فاش طعنها فشرفها و قتل روحها.. تفكرات فاش لاحتها الدنيا لهاد الملهى.. على كل جرم دارت خدات عقابها.. 

كنزة: اه.. هنا فين وصلت.. متحناجي تقولي والو.. انا لي ختاريت هاد الطريق.. قتلتك.. و طعنتك.. و مت حتا انا معاك.. نستاهل اي حاجة كطرا فيا دبا.. و عارفة مزيان.. هادشي مغيمحيش كرهك و حقدك عليا من قلبك.. انا صافي.. وليت جسد بدون روح.. عرفت مزيان بقيمة الحياة.. جربت ا اكرام.. جربت كلشي.. انا ليوم فنفس بلاصتك من قبل.. كاين فرق بسيط.. نتي رجعات ليك حياتك.. و انا مشات مني.. و هاد المرة انا لي ختاريت هاد الطريق.. حياة العهر هي الحياة لي نستاهل..

(اكرام منطقاتش.. بقات غير كتشوف فيها و هي كتقرب بخطوات بطيئة.. بقات حتا وصلات قدامها.. محساتش على راسها حتا رخات ايديها و جمعاتها معاها لتصرفيقة خلات حنكها يدور.. بقات شادة فحنكها.. ياسين مفهم والو.. فكر انه يدهل من بعد تراجع.. فهم بللي بينهم بزاف ديال الحوايج.. خاص احللوهم مع بعضهم..)

اكرام : هادي.. هادي كان خاص نعطيها ليك قبل.. يللا كنتي تفيقي شوية.. يللا كنتي تخدمي داك الدماغ عندك.. نتي لي ختاريتيها.. شنو ختاريتي.. التقحبين.. عاجبك الحال دبا.. باغا ضيعي راسك بالسيف.. انا لي جربت ا كنزة.. مغتحسيش بيها دبا.. حتا تجربيها.. حتا تعيشيها.. انا كرهت راسي.. دوزت ايام و ليالي وسط الجحيم.. واش عند بالك غير جيت و خليت نزار يبغيني.. واش عارفة اش دوزت.. عشت الذل و العذاب لي عمرو عرفتو فحياتي.. خلاني نكره راسي.. خلاني نكره كلشي.. فواحد الوقت.. ماتت كل حاجة زوينة فيا.. يمكن عوضني من بعد.. و لكن راني دوزت تقريبا عام فالعداب.. واش عارفة بللي نور و قمر مكانش غيكون ليهم اب.. واش عارفة شحال من ليلة منعستش.. عارفة كيكدوز ليلتي.. عمري عرفت معنى الراحة.. واش عند بالك فاش جيتي و شفتيني مستقرة راني من طول الوقت فاستقرار.. راني مت.. و تدفنت.. و رجعت حييت.. حتا واحد ميستاهل حياة العهر.. عارفاك ذكية.. لاش غضيعي راسك.. و هكاك..

سكتات اكرام من الهدرة و هي كتحاول تكتم شهقاتها.. دموعها كانو نازلين شلال من عينيها و هي كتهدر.. دورات وجهها فاش شافت الباب تحل بقوة.. كان نزار.. كان جاي معول على انه غيقلبها.. شاف اول حاجة اكرام لي كتبكي و تنخسس.. دور وجهو شاف فكنزة لي واقفة و هي التالية دموعها على خدودها.. تنهد و هو كيسد فالباب.. وقف و بقا كيشوف فيهم..

كنزة: انا ضعت ا اكرام.. ضعت صافي.. واش عند بالك مجربتش داكشي لي دزتي منو.. داكشي لي تفرق على حياتك فسنيين.. جربتو فشهر.. عرفت معنى عدم الراحة.. عرفت معنى تخسري شرفك.. انا اصلا كنت خاسرة شرفي.. حيت الشرف مكيرتابطش غير ببكرة و نقطة ديال الدم.. حتا انا جربت.. حسيت بمعنى تهاد منك شي حاجة بالقوة.. حسيت بمعنى الاغتصاب.. عشت الذل و العذاب لي فيه.. مراد.. دمرني و قتلني فديك الليلة.. هاد السمية عمري نقدر نساها و لا غتمحا من ذاكرتي.. يمكن جربت.. و لكن عمري غنحس بداكشي لي داز عليك نتي.. انا قتلتها.. قتلت ليك بنتك.. من حقك تقتليني و تنهي حياتي.. من حقك تخرجي روحي.. حيت نستاهل.. انا ليوم دارت عليا الدنيا.. و لكن اي عقاب غتحكمي عليا بيه.. نستاهلو.. انا غلطت بزاااف.. عارفة النار لي شعلتها فقلبك مكينش لي غيطفيها.. 

اكرام : قمر مماتتش..

كنزة: كيفاش؟!..

اكرام : اه.. هاديك مكانتش قمر.. و قمر ناعسة دبا جنب نور.. قمر رجعات لينا.. و مراد وللا محسوب مع الاموات.. كلشي رجع لبلاصتو.. كل واحد فمكانو الحقيقي دبا..

كنزة بقات راجعة بلور و كلها كترعد.. لصقات على الحيط.. ركابيها مبقاوش قادرين اهزوها.. بقات طايحة و هي مزال لاصقة على الحيط حتا جلسات على الارض.. بدات كتبكي بحرقة و جسمها كللو كيترعد

كنزة: واش... واش عارفة راسك.. شنو.. شنو درتي دبا.. واش عارفة راسك حررتيني فهاد الدقيقة.. متخيليش باش كنحس دبا.. متخيليش باش حسيت هاد الايام كلها.. عمري.. عمري نعست حتا ليلة فخاطري.. كللا ليلة كنبقا نتقلب.. و صورة قمر و هي ميتة قدام عيني..

اكرام : (قربات عندها و نزلات لمستواها) صافي.. دبا كلشي تصلح..

كنزة: لا.. لا.. متصلح والو.. عرفتي.. اول مرة فحياتي.. كنجرب داك الشعور.. عرفتي شحال صعيبة.. واش عارفة شحال من ليلة كنوض قافزة بليل.. كللي.. كللي كنترعد.. واش.. واش عارفة شحال.. شحال ديال الراحة عطيتيني دبا.. و عندك.. عندك الحق.. كل واحد فينا فمكانو الحقيقي دبا.. هادي هي بلاصتي.. هادشي لي كنستاهل.. غنطلب منك حاجة وحدة.. غتجيك صعيبة.. و لكن كنترجاك.. غير باش نرتاح.. عييت.. مبقيتش قادرة نهز شي حاجة فوق كتافي.. جرمت فحقك بزااااف.. و عارفة ماشي من خقي نطلب هاد الطلب.. و لكن كنترجاااك.. متكرهينيش.. مغنقولش ليك نساي.. لا.. و لكن سامحيني.. عارفاها صعيبة عليك.. انا ندمت.. و الله حتا ندمت.. غير نسمع سماحك ليا من فمك.. عمرك ماباقي تشوفي وجهي مزال.. مبقيتش قادرة نشوف الكره فعينيك.. كنترجاااك

اكرام بقات غير كتشوف فيها كيفاش كتبكي و ترجاها.. كانت كتبكي بحرقة.. حاسة بقلبها كيتقطع.. كتبكي و تنخسس.. ايديها كترعد و كمايمها كلهم يه😢..

اكرام بقات غير كتشوف فيها كيفاش كتبكي و ترجاها.. كانت كتبكي بحرقة.. حاسة بقلبها كيتقطع.. كتبكي و تنخسس.. ايديها كترعد و كمايمها كلهم فزكو بدموعها..

اكرام : (مسحات دموعها و قوات راسها) انا سامحتك.. ماشي تا لدبا.. نهار رجعت هزيت بنتي بين ايديا نسيت.. عمري كرهت شي حد.. و عمري حقدت على شي حد.. و لكن كنبقا ام.. صعيب على اي ام تشوف داك المنضر.. كرهتك و لكن كتبقاي ختي.. و بنتي رجعات ليا.. بلاصتك ماشي هنا ا كنزة.. بلاصتك جنبنا حنا.. بلاصتك معانا ا كنزة.. وسط عائلتك.. كلشي فات دبا.. و كلشي داز.. و كلشي خاص ارجع كيف كان..

كنزة: منقدرش.. غير سيري ا اكرام.. حياتي مبقاش عندها معنى.. غير سيري..

اكرام : لا.. مغنمشيش حتا نديك معايا..

كنزة: منقدرش ا اكرام منقدرش.. الى نتي سامحتيني.. هما لا.. مغيسامحونيش.. لؤي مغيسامحنيش.. (هزات راسها شافت فنزار لي كيراقبهم بهدوء.. طولات فيه الشوفة عاد نطقات) و عارفة حتا نزار ميقدرش اسامحني.. بلا متكدبي على راسك ا اكرام.. انا حياتي سالات.. و هدا قدري و مكتابي.. خاص نرضا بيه..

اكرام : لؤي غينسا.. كلهم غينساو.. حيت انا لي ام و نسيت.. صافي.. متبقايش تعقدي فالامور كثر.. دادا عيانة شوية..

كنزة : مالها دادا؟!.. شنو عندها؟!.. ياكما مخبية عليا شي حاجة..

اكرام : دادا معندها والو.. غير بشوية.. معندي ما نخبي.. دادا غير عيانة و صافي.. متفكريش بزاف.. و بغات حفايدها.. كلهم يتجمعو جنبها.. بغات تشوفهم حدا بعض.. صافي.. 

كنزة : مغنقدرش نشوف فيها.. من بعد كلشي..

اكرام : غتكون توحشاتك.. و بزااف.. هي اكثر وحدة حاسة بيك.. حتا هي قلبها كيتقطع علينا كاملين.. حلمها انها تشوفنا مجموعين مرة خرى.. عطيها هاد الامنية.. 

كنزة محساتش على راسها الا و هي معنقة اكرام و كتبكي على كتفها 

كنزة: شكراا.. شكرااا.. معرفتش كيفاش كنتي عمية.. مشفتكش قدامي.. مشفتكش ختي لي ديما غتكون جنبي.. شفتك عدوتي.. سمحيليا..

دازت هاد الليلة على خير.. جا صباح جديد.. صباح جديد باحداث جديدة.. حلات عينيها بشوية.. دورات وجهها ملقاتوش جنبها.. ناضت بشوية و هزات راسها شافت فيه خارج من الدوش ابتاسمات ليه..

نزار: صباح الخير..

اكرام : صباح النور.. 

نزار: نوضي دوشي.. باش نمشيو.. 

اكرام : اه.. خاص نمشيو لفاس.. اوف واخا..

نزار: (حتا كان خارج رجع شاف فيها) اه قبل ما نسا.. قسما بالله و باقي تحطي ايديك على داك ياسين حتا نهرسها ليك.. هانا علمتك..

اكرام : اووف شحال فيك.. را قلت ليك راه بحال خويا و الله العظيم..

نزار: بحال خوك ماشي خوك.. و ديري لي فراسك هاد المرة تاني..

اكرام : اووف صافي.. هادي و التوبة.. (خلاتو هرج و وقفات مشات مباشرة للحمام.. دوشات بالخف و خرجات بدلات عليها.. لبسات كسوة طويلة فالغوز بااارد.. بالكمام نازلة سامبل عليها بسمطة رقيقة فالوسط.. كتافها طايحين بخيوطة من جيهة الصدر..مشات عند ولادها هما لولين.. لمجرد ما حلات الغرفة لقات كنزة جالسة و شادة كنزة بين ايديها.. ابتاسمات و قربات هزات نور..

اكرام: صباحوو.. كيصبحتي؟..

كنزة: صافا الحمد لله.. مقدرتش منشوفهاش.. غير حلليت عيني جيت نطل عليها.. واخا كلشي تلاحت عندي.. يا ربي يسمح ليا منها.. لحتها بين ايدين وحش بلا رحمة..

اكرام : كلشي فات دبا.. اسية عفاك قولهم اطلعو لينا لفطور لهنا..

اسية: هي لول مدام اكرام..

اكرام : و نتي شغديري مع ياسين..

كنزة: معرفتش..

اكرام : انا كنعرف ياسين مزياان ا كنزة.. دوز حتا هو شي 100 بنت و الصرف فحياتو.. و لكن كان غير كيدوز بيهم الوقت.. راه كثر من خويا.. كثر من لؤي بالنسبة ليا.. و باين فعينيه.. ماكيكدبش..

كنزة: عارفاه مكدبش.. و لكن وحدة بحالي.. متستاهلوش..

اكرام : تستاهلي كثر ا كنزة.. متبقايش تشوفي وراك.. صافي كلشي فات دبا.. شوفي قدامك و لي جاي غيكون حسن.. انا متأكدة..

كنزة: انشاء الله.. معرفتش دبا افكاري كلهم مخربقين.. بغيت غير نشوف دادا نجلس معاها و نرتاح.. من بعد و نجاوب ياسين..

اكرام : رتاحي و فكري كيف ما بغيتي..

فطرو و خرجو مجموعين طلعو فالسيارات مباشرة للمطار.. رغم هادشي نزار مدواش مع كنزة.. خلا اكرام على راحتها فهاد القرار.. مبغاش ادخل.. و فنفس الوقت مباغيش اتواجه مع كنزة.. طلعو مباشرة فالطائرة الهاصة بنزار.. مدة نصف ساعة تقريبا كانو فمطار فاس.. نزلو لقاو السيارات كيتسناوهم.. مباشرة هاد المرة للرياض.. خرجو من السيارات.. نزار لي كان هاز قمر دخل فورا بلا ميشوف وراه.. كنزة و اكرام بقاو واقفين فالعتبة كيشوفو فالرياض.. كل وحدة فيهم و ذكراياتها فيه.. طلعو نفس قوي و دهلو بزوجات و احياس هايب كيجول فخاطرهم.. مفاهمينش معناه.. تلاقاو مع آلاء هي لولة قدامهم.. كتبان تالفة و كدور و تنادي بلؤي..

اكرام : آلاء آلاء.. مالك؟!..

آلاء : (شافت فيهم و جات كتجري عندهم) اكرام.. مزيان مللي جيتي.. (هزات راسها شافت فكنزة بحالة كتاكد من عينيها.. سكتات و هي كتشوف فيها.. كنزة وتروها شوفاتها و حدرات راسها)

اكرام : بغيت نسا كلشي ا آلاء.. و بغيت كلشي يرجع كيفما كان..

آلاء : كتبقاو خواتات.. من حقكم.. دبا عفاك طلعو شوفو دادا فبيتها.. تزاد عليها الحال بزاااف.. انا غنشوف لؤي و نتبعكم..

كنزة: مالها دادا.. شنو واقع ليها..

آلاء : بلا كثرة الاسئلة.. غير طلعو.. (شافو فبعضهم من بعد طلعو بسرعة عندها.. وقفو فالباب لي كان محلول و هما كيشوفوها قدامهم فوق السرير.. كانت كاميليا جنبها.. شادة ليها فيديها و كتبكي.. حسو برجليهم فشلو.. مبقاوش قادين اهزوهم.. سرعان ما بان ليهم لؤي و نزار جايين.. دخلو بخطوات بطيئة و حتا واحد مامصدق عينيه.. حتا واحد ما باغي يصدق.. نزلات دمعة من عينيها و هي كتشوف فيهم كلهم قدامها.. هدرات بصوت باح كيرجف.. كتخرج الهدرة بصعوبة.. بخالة حاطين حجرة فوق صدرها..

فاطمة: شكرا.. شكرا.. جيتو كلكم.. حمدتك يا ربي و شكرتك.. ءدرت نشوفهم مجموعين.. ءبل ما تمشي الروح عندك (جلس لؤي من جهة فالسري و كنزة و اكرام لي مزال هازة نور فالجهة التانية.. كاميليا آلاء و نزار بقاو واقفين و هما غير كيشوفو)

اكرام : متقوليش هكا ا دادا.. الله اطول لينا فعمرك..

فاطمة: لا ا بنتي... لا.. اجلي ءرب صافي.. ا بنتي.. انا بغيت نجمعكم.. مبغيتشي.. نمشي.. و نخلليكم كارهين بعضكم.. مبغيتشي تبءا شي حاجة فءلوبكم من جيهتي.. ربي يحفضكم لي.. سمحيلي ا بنتي ا اكرام.. سمحلي بزااااف.. جرحتك و انا مءاصداشي ا بنتي.. مواسيتكشي و مهزيتشي بيديك فاش حتاجيتيني.. سمحلي ا بنتي و متهزشي بءلبك من جيهتي.. ربي يحفضك ا بنتي..

اكرام : (مخاساش الا و دموعها نازلين شلال من عينيها) لا ا دادا.. لا.. متقوليش هكا.. منقدرش نهز فقلبي من جيهتك.. نتي اصلا مدرتي والو باش تعتاذري..

فاطمة: عمملت ا بنتي عملت.. كنزة يا بنتي.. سمحلي.. سمحلي حتا نتينا.. انا السباب فكلشي.. انا السباب.. معرفتشي نربيك.. لو زيرتك و غرفت كيفاش نربيك.. يمكن مكانشي غيطرا هادشي..

كنزة: (هي التالية دموعها ناظلين بحال الحجر على خدودها) لا.. لا ا دادا.. الغلط مني انا.. ماشي منك نتي.. انا لي معرفتش لمحبتكم و كنت انانية..

فاطمة : هادشي كللو مكتاب.. كللو مكتاب.. ا بنتي.. (شافت فآلاء لي واقفة و الدمعة فطرف عينيها) ءرب ا بنتي.. ءرب الله ارضي عليك..

آلاء: (قربات جلسات جنب لؤي و شدات ليها من ايديها و هي كتبكي..) داداا..

فاطمة: حتا نتينا سمحلي ا بنتي.. من اول ما جيتي و انا مسخسخاك و مكرفساك.. و لكن كلشي غيفيدك واحد النهار ا بنتي.. سمحلي.. و لكن انا لي عارفة ولدي لؤي.. هو صعييب.. و انا بغيتك.. تكون .. لالة و مولاتي تقد بيه.. هادا ما كان ا بنتي.. عمري كرهتك.. و حتا نتينا وحدة من بناتي.. و ربي لي عالم بيا ا بنتي.. متهزشي فقلبك حتا نتينا من جيهتي..

آلاء : لا خاشا ا دادا.. حتا نتي من ديما فمقام ماما الله ارحمها..

فاطمة: الله ارضي عليك ا بنتي.. الله ارضي عليك.. تهلا فراسك فدارك و فراجلك.. (شافت فلؤي) و ختا نتينا وللي تجمع ايديك عندك.. تهلا فيها و ديرها فعويناتك.. راها تستاهل كل الخير معاك.. ختاريتي و عرفتي شكون تختار.. (هزات راسها شافت فنزار) بنتي.. بنتي امانة فيديك.. عارفك تبدلتي.. و لكن شي حوايج كيبقاو.. و حتا نتي ا كاميليا.. كوني ام ليها.. تحرمات من شحال من حاجة.. عفاكم غنطلبكم.... غنطلبكم اخر طلب.. و من بعد.. تخرج.. تخرج الروح الى بغات تخرج..

اكرام: (كتبكي و هي كتشوف فلالة فاطمة كتهز و تحط.. هدرتها ثقالت بزااف و جسمها كللو ترخا.. كتشوف العرق نازل ليها من ورا ودنها.. مقدراتش تستحمل) لا ا دادا.. متقوليش هكا عفاك..

فاطمة: خليني.. نكمل.. عفا ا ولدي ا لؤي.. سامح ختك.. مبغيتشي.. نموت.. و نخليكم.. كارهين.. بعضكم.. هي غلطات.. و لكن بسبابي.. انا لي معرفتشي نربيها.. انا لي فششتها.. حتا ولات باغا.. كلشي ليها.. عفا ولدي.. الله ارضي عليك.. را ءلبها بيض.. و دخلها نءي.. غير ملءاتشي لي يوريها طريء.. و انا مكنتشي باش نوريها.. انا لي غلطت.. عفا ولدي.. بغيت نموت.. و نموت مرتاحة.. عارفاك ا اكرام سامحتيها.. مللي جبتيها لهنا.. ربي يحفضك.. 

لؤي بقا غير كيشوف فيها و كيشوف فكنزة لي حادرة راسها و الدموع شلال من عينيها.. ملقات متقول و معرفات متقول.. لؤي تنهد و هو كيشوف فلالة فاطمة قدامو.. يللا جا ينطق سرعان مولات كتهز قدامهم و هي كتشهد.. اكرام حطات ايديها على فمعا كتحاول تكتم شهقاتها.. و كنزة مزال شادة ليها فيديها و دماغها موال مقادر يستوعب هادشي.. لالة فاطمة عينيها تتقلبو ولات جماد مكيتحركش من بعد صراع و روحها كتخرج.. قرب لؤي ايدو بشوية و سد ليها عينيها.. نزلات دمعة من عينيه و لكن سرعان مامسحها.. كانت فمقام الام ديالو.. اكرام محساتش براسها حتا وقفات و هي راجعة بلور.. كتحرك راسها بلا و كتخربق فالهدرة.. معارفة حتا شنو تقول..

اكرام : لا.. لا.. ميمكنش.. هي غير ناعسة.. لا.. 

دارت بسرعة خرجات و هي كتجري و هازة كسوتها.. حتا من نور هزاتو كاميليا و عيطات للخدامة باش تهز قمر.. خرجاتهم من البيت و دموعها هي التالية مبقاوش بغاو احبسو.. كانت معتابرة لالة فاطمة بحال امها التانية.. رغم الفوارق لي بينهم.. كان بينهم بزاف ديال الاشياء مشتركة..

كنزة جلسات على الارض وهي متكية على الحيط جنب السرير.. داتها كلها كترد.. بدات كتبكي بهستيرية.. حاطة ايديها على فمها و عاضاها باش تكتم شهقاتها.. لؤي شاف فآلاء لي حتا هي دموعها شلال من عينيها.. فهمات راسها و وقفات خرجات و هي متكية على الحيط.. رغم كلشي كانت عزيزة عليها.. لؤي تنهد و مشا وقف قدام كنزة و مد ليها ايديه و هو مدور وجهو..

لؤي: نوضي.. خرجي من هنا غير غتزيدي تعدبيها بصوت بكاك..

كنزة غير سمعات هدرتو.. حدرات راسها و هي مزال كتبكي.. عارفاه مزال مقدر اسامحها.. جرات رجليها عندها و دموعها مبقاوش باغين احبسو.. لالة فاطمة كانت هي الام و هي الاب ليها.. مزال فكرة انعا ميتة مبغاتش دخل لدماغها.. مقادراش تستوعبها.. كتقول مع راسها هادا مجرد كابوس و غتفيق منو.. حاسة بقلبها كيتقطع و روحها غتخرج.. هزات راسها شافت فيه.. هاد المرة كان كيشوف فدادا بكل اشتياق.. واخا كبر بعيد عليها.. و لكن كتبقا جداها.. كانت جنبو فبزااف ديال الاوقات من حياتو.. باين على ملامحو الحزن و اليأس.. واخا مكيبينش.. قرب كثر و هز ليزار غطا ليها جسمها و وجهها.. رجع شاف فكنزة..

لؤي: راك كتعدبيها هككا.. (نزل لمستواها و شد ليها ايديها بزوج وقفها.. حط ايدو على حنكها بشوية كيمسح دموعها) شو.. عارفها صعيبة عليك تقبليها..

كنزة : هي.. هي.. مماتتش.. ياك.. ياك ا.. لؤي.. هادا.. هادا.. غير حلم.. حلم.. و غنفيق منو.. ياك ا لؤي..

لؤي ملقا ميقول.. اكتافى بالصمت و جرها لعندو بقوة عنقها و خشاها فصدرو.. كانت كلها كترعد.. حالتها حالة.. مقدرش اشوفها هكا.. كتبقا ختو.. مدام اكرام سامحاتها و نسات.. حتا هو سامحها.. واها مزال مقادر ينسا بزااف ديال الحوايج.. هي خانت ثقتو.. و لكن فآخر المطاف كتبقا ختو.. بعدها عليه بشوية.. دور ايدو على كتافها تكاها على صدرو و تم خارج هو وياها.. داها لغرفتها و هلاها تلاحت فوق السرير عنقات الخدية و طلقات العنان لدموعها.. بقا كيشوف فيها شحال فالتالي تنهد سد الباب و خرج.. خدا تيلي ديالو.. خاصو يدير شي اتصالات..

نزلو لتحت.. كانت جالسة وسط غرفتها فوق الارض.. كتبكي بحرقة و تجمع فشعرها لي طايح على وجهها.. مقدراتش تبقا فالبيت و هي كتشوف فجسمها ممدود فوق السرير.. و ريحتها مزال مليا الغرفة.. نزار تحنا لعندها و هز ليها راسها بشوية.. شافت فيه و زادت فالبكا..

اكرام : لاش هكا.. لاش كيطرا فينا هكا.. يللا كنقول رتاحيت.. كتخرج لينا شي حاجة..

نزار: الموت علينا حق ا اكرام.. خاصك تفرحي ليها.. مشات للدار الآخرة تما فين كاينة راحتها.. هاديك هي بلاصتها.. بكاك معندو باش افيدها.. خاصك دعي ليها.. راك بنتها.. و هي محتاجة لدعاءكم و صلاتكم دبا.. صافي.. 

اكرام : (الدموع محجرين فعينيها) الله.. الله ارحمها.. (نزلات راسها و دارت ايديها على وجهها و هي مزال كتبكي بحرقة.. مقادراش تيق هادشي.. نزار حس بيها و جرها لعندو خشاها فحضنو.. بقات مدة طويييلة كتبكي على صدرو و هي كتحاول تكتم شهقاتها.. صوت بكاها مسموع رغم ذلك.. بشوية بشوية بدات كترخا.. شاف فيها نزار لقاها كتبكي فصمت.. دور وجهها لعندو و مسح ليها دموعها.. 

نزار: نوضي توضاي.. 

اكرام : (بقات غير كتشوف فيه و هي مفاهمة والو)

نزار: ماشي هكا غترتاح.. لا نتي و لا هي.. راك بعيدة على الله.. خلليها تموت و هي مرتاحة عليك.. صلاتك و دعواتكم هما لي غيفيدوها فهاد اللحظة.. هي محتاجاهم كثر من اي وقت اخر..

اكرام بقات شخال كتشوف فيه فالتالي مسحات دموعها و وقفات فاتجاه الحمام.. عندو الحق.. دموعها غيزيدو غير اعدبوها.. نزار مشا حل الماريو و جبد جلابة بالشال ديالها.. حطهم فوق السرير و خرج اشوف لؤي.. لقاه فالكولوار كيهدر فالتيلي.. غير شافو قطع..

لؤي: درت غير شي اتصالات باش اغسلوها و يقضيو.. بفيتها تدفن ليوم.. مكين لاش تبقا كثر..

نزار: عندك الحق.. (قرب ليه كثر و حط ايدو فوق كتف لؤي) البقية فحياتك..

لؤي: شكرا.. (شاف فاول خدامة دازت من حداه) حيدي عليا هادشي و ديري القرآن.. (كان صوت الطرب الاندلسي مزال مسموع فالدار.. كيف مل صباح.. هادي هي عادة لالة فاطمة و اوامرها.. الخادمة هزات راسها باه و مشات.. نزار حتا هو قلب الدورة و رجع عند اكرام.. كانت توضات و لبسات الجلابة.. مفرشة السجادة وكتصللي فخشوع.. بقا ساهي فيها و هي لاوية على راسها الشال.. ماشي اول مرة يشوفها بيه.. و لكن هاد المرة حس بشي احساس فشكل و هو كيشوفها هكا.. جات معاها.. حتا منضرها و هي كتصللي فرحو من الداخل.. سالات صلاتها و هزات كفوفها للسما.. كتحرك شفايفها فقط و هي كدعي و دموعها شلال من عيونها.. نزار بقا غير متكي على الباب و هو حاضيها.. وصل وقت الضهر و هي عاد صلات الصبح.. فاش شافها سالات خدا سجادة خرى.. فرشها قدامها.. هي رجعات سجادتها شوية لور و وقفات وراه.. قام الصلاة و كبر بصوت مرتافع.. دخلو فصلاتهم و كلهم خشوع.. حادرين ريوسهم و هما واقفين بين يدي الله عز و جل.. كاميليا كانت واقفة فالباب و هي كتشوف فيهم.. ابتاسمات و هي كتشوف التناسق بينهم.. هاد المرة شافت الاسلام الحقيقي بينهم.. شافت الاسلام دين السلام.. دين تناسق و رحمة.. كانت السكينة غاشياهم بزوج.. كاميليا من طول عمرها عاشت فقط دين الحرب.. شافت من هاد الدين بزاااف ديال الحوايج كرهوها فيه.. و لكن مبقاتش قادرة تنكر بللي الاسلام لي كتشوف قدامها دبا هو الطاغي.. هادا هو الاسلام لي جا على لسان محمد.. شافت النور فالبيت.. و شافت علاقة مثالية بينهم.. محساتش بالوقت حتا لقاتهم سالاو الصلا و سلمو.. نزار هز كفوفو للسماء و هو كيدعي.. دعاء هادئ و فصوتو بحة رجولية زادت صوتو جمال.. كاميليا سدات الباب بشوية و رجعات لغرفتها و هي عارفة و متأكدة هاد المرة بللي ولدها مشا فالطريق الصحيح.. واخا مزال ما متأكدة من الدين الاحق.. و لكن عارفة بللي الله كاين.. مكيهمش كيفاش عبدتيه.. الطريقة او العادات او الديانات دائما كيختالفو.. المهم انه واحد أحد لي خاصو العبادة..

بعد مرور 6 سنوات..

كانت واقفة جنب الباب بعبايتها السوداء و شالها فوق راسها و هي مراقبة البنات كيلعبو و ينقزو فرحانات.. كل وحدة هازة الكادو ديالها فيديها و ابتسامة صافية ملية وجهوهم.. خرجو للحديقة كيتجاراو كيلعبو و يضحكو مع بعضهم.. ابتاسمات و هي كتشوف الفرحة فعينيهم.. دارت فاش سمعات صوت مديرة الميتم من وراها..

المديرة: شكرا.. كتفرحي هاد البنات بابسط الحوايج.. غير ابتسامة منك كتفرحهم.. فما بالك بهادشي لي كتعطيهم كل اسبوع.. عمرك نسيتيهم شي نهار..

اكرام : متحتاجيش تشكريني.. انا جربت حياة اليتم واحد النهار.. كيبقاو بنات صغار.. هادا واجب عليا.. 

المديرة: انا عارفاك مكتهتميش ببلاصة وحدة.. عارفاك كتخدمي شحال من جمعية من غير هاد الميتم.. الله اكثر من امثالك و ربي غيجازيك من عندو اكيد..

اكرام : راني قلت ليك هادا واجب.. (ابتاسمات و هي غادة فاتجاه الباب.. مشات مباشرة للسيارة طلعات لور و كسيرا بيها الشيفور بقوة.. مسافة الطريق و كانو فالقصر.. نزلات و هي كتقاد فشالها تحل ليها الشوية.. دخلات و طلعات مباشرة لغرفة هيام.. اه هيام بنتها الثالثة.. سماتها على اسم الام ديالها.. عندها 8 شهور دبا.. دخلات لقات اسية جنبها.. التاسمات ليها و قربات هزاتها.. هيام غير شافتها بدات كضحك و تلاحت عليها.. بقات كتلعب معاها و ضحك معاها.. حتا بدات كتشم شي ريحة..

اسية: راها مخسرة يللا كنت غنبدل ليها..

اكرام : اوو حبيبة ماماها مخسرة الكوش.. سيري عند خالتو تبدل ليك سيري ا حبيبة.. (مداتها ليها) انا غنمشي نشوف داك الزوج اش دايرين تاني..

اسية: هه.. راهم قالبين لمدام كاميليا راسها.. اه و البروف ديال الالمانية جا..

اكرام : (هزات راسها باه و خرجات مباشرة لغرفة التوأم.. لقات كاميليا واقفة عند راسهم لابسة قفطان فالخضر.. مطرز بالذهبي و لاوية عليها شال فوق راسها و قمر جالسة فوق السرير مربعة رجليها و شادة المصحف فيديها و كتغوت)

قمر: هاداك راس الطارو.. بعد عليا و تفرج.. راني باغا نحفض زعما..

نور: اش بغيتيني ندير ليك.. خاصني نتفرج..

كاميليا: الله ارضي على ولدي طفي التلفازة راك اصلا مكتفرج فوالو.. كيغدير تفرج و نتا شاد كتاب قدو قداش قدامك كتقرا.. اصلا هادشي كبير عليك ا ولدي..

اكرام : الكتاب كيهدر على علم الجينات.. و البرنامج حتا هو كيهدر على نفس الموضوع.. ولف انه يدير زوج حوايج فدقة.. قمر حبيبة البروف ديال الالمانية ديالك وصل.. حطي المصحف فالجنب و سيري عندو.. من بعد و كملي حفضك..

قمر: (سدات المصحف و ناضت بالنفاخة طفات لنور تلفازة و خرجات كتجري و هي كضحك.. خلات خوها كيغوت.. ابتاسمات اكرام و هزات تيليكوموند شعلاتها ليه و خرجات هي و كاميليا)

كاميليا: ياا بنتيي.. غير قولي ليا كيف كديري مع هاد الزوج.. هما مااااشاء الله عليهم واخا صغار دماغهم كيطير.. انا لي قد هكا و مزال مكنقدر نستوعب داكشي لي كيديرو.. و لكن را شي طفولة بحال الدراري الصغار ماشافوها.. النهار كامل و هما خاشيين ليا ريوسهم وسط الكتوبة غا القرايا القرايا..

اكرام : مديريش فبالك ا ماما.. هادي هي حالهم ولفت معاهم.. كيف قلتي عندهم ادمغة نيت ربي تحفضهم.. خلليهم هما راحتهم كيلقاوها فالبحث.. من صغرهم ولفتهم بالقرايا.. و راهم كيلعبو و يضحكو مع بعضهم واخا هكاك.. عندهم القرايا غير فالصباح.. واحد الوقت كيحبسو باش استراحو و يلعبو كيفما بغاو..

كاميليا: يا بنتي حتا لعبهم ذكي.. ربي تحفضهم من العين.. انا غنمشي نصللي الضحى ا بنتي.. هاد الزوج عندك اتلفو لي ميتلف..

اكرام : ههه.. سيري ا ماما سيري..

مشات كاميليا فاتجاه غرفتها و اكرام حتا هي فاتجاه غرفتها.. سدات الباب و وقفات قدام المرايا حيدات شالها لاحتو فوق السرير و حلات شعرها حتا طاح على طولتو فوق كتافها.. قفزات فاش شافت خيالو من المرايا..

اكرام : ا ويلي فين كنتي..

نزار: غير حداك.. داخلة مرفوعة مشفتينيش..

اكرام : اووف.. مباقيش ديرها.. ممشيتيش لخدمتك..

نزار: (قرب ليها و حط ايدو غلى كتافها) قلت ندوز النهار مع مراتي العزيزة.. و لكن باين ليا مبقاش عندها الوقت ليا.. نهار كامل و هي غادة جايا.. عرفتي كنفكر نحبس عليك الخروج شي وقيتة..

اكرام : (دارت عندو و حطات ايديعا على صدرو) يااااك.. ناوي تحبسيني.. راك عارفني غير كل مرة مع جمعية فشكل و صافي..

اكرام: يااااك.. ناوي تحبسيني.. راك عارفني غير كل مرة مع جمعية فشكل و صافي..

نزار: (حط ايدو على وجهها كيدوزها بشوية) مكين لاش تبقاي تعدبي راسك هككا.. نجيب ليك اي واحد يتكلف بهادشي فبلاصتك..

اكرام : و لكن هكا مغنقدرش نشوف ابتسامة الدراري الصغار.. و اللمعة فعينين الناس الكبار.. كنبغي نشوفها بعينيا باش كنرتاح.. (تكات راسها على صدرو و هي حادرة راسها)

نزار: (كيدوز ايدو بشوية على شعرها) كنموت فيك.. حبي ليك نهار على نهار كيزيد كثر..

اكرام : و انا كثر..

دازت مدة طويلة.. 6 سنوات.. واخا هكاك متبدلوش بزاف ديال الحوايج.. كل واحد استقر فحياتو.. آلاء و لؤي استقرو فقصرهم مع اهل آلاء و دبا عندهم ولد فعمرو 5 سنين تقريبا و بنت عندها عامين.. كنزة تزوجات بياسين و دبا عندهم بنوتة كتحمق عندها 3 سنين.. عايشين فالفيلا ديالهم بعاد على كلشي.. ميساء و يوسف بقاو مستقرين و دبا حتا هما عندهم بنت فعمرها 4 سنين و ولد فعمرو عامين.. كاميليا بعد مدة من موت لالة فاطمة و من بعد مابحثاث فالاسلام كثر و اقتانعات بيه فعلا كدين خق سلمات و دارت الحجاب.. اكرام حتا هي من نهار ماتت لالة فاطمة و حجابها فوق راسها.. مشات للحج هي و نزار و كاميليا.. هدات حجتها للام ديالها بنية صافية.. كذلك نزار هداها للأب ديالو فنفسو.. قمر و نور بينو قدرة خياااالية من الذكاء لا طبيعي.. اكرام من الصغر ديالهم لمجرد ما ولات حياتها فاستقرار بدات كتعلمهم.. جابت ليهم اي حاجة ممكن احتاجوها و نزار كان موفر ليها كل الضروف.. هي فقط رباتهم على الدين و حفض القرآن.. محساتش حتا لقاتهم كيميلو للعلوم و اللغات و عطاو فيهم نتائج مذهلة.. ولاو كيقراو فالدار زائد الحصص ديال مدرستهم.. رغم ذلك كتخللي ليهم وقت للعب فرغم كلشي كيبقاو اطفال.. اكرام ولات كل نهار فجمعية فشكل.. ولات كدخل بزااف فالعمل التطوعي و نزار مساندها كيف عادتو.. دائما واقف جنبها...

ليوم و بعد سنييين طويييلة.. دوزات بزاااف ديال الحوايج فحياتها.. منهم اشياء زوينة.. و منهم الخيبة.. اوقات ضعفات فيهم و طاحت.. و لكن دائما كانت كتلقا بصيص امل تتشبت بيه.. هادي هي الحياة.. دائما كتسد فوجهك البيبان.. و لكن كيفما كيتسد باب.. كيتحل باب من جهة تانية.. الحياة كتعطي فرص للجميع.. فقط خاصك تعرف تستغل كل فرصة على قدها.. هادي هي قصة اكرام.. العاهرة.. حياتها مكانش ليها معنى.. و لو معنى بسيط.. و ليوم حياتها ولا عندها عناوين مختالفة.. قصتها مع العبري.. العبري لي كان سبب باش تعرف إسلامها.. قصة فيها عبر كثيييرة.. واخا نجي نسردها مغنكملهاش.. كنتمنا تكون كل عبرة وصلات فمكانها.. نخليكم نتوما تكتاشفوها و تفهموها.. 

#عاهرة_العبري🔯..

**💋......النهاية......💋**