تقلب جناح الحريم سفاه على علاه ... لبنات فرحانات غير كيوجدو .. غاديين جايين هاللي كتمشط ها اللي كدهن ها اللي كتلبس وكل فوحدة تايقة فراسها وتشوف بنص كضحك على اللي حداها . اما روح الندى واقفة فالشرفة مربعة يديها وساهية عاطية بالضهر ومتكية بكتفها على لباب كتنهد كل شوية . كلشي فرحان بالعيد من غيرها هي . . . كتشوف راسها حتى لفين غتوصل وشحال قدها تصبر .. حتى لفين جهدها وشوف على هاد الزهر ... نهار بغا قلبها بغا الانسان اللي يعدبها ، اش عندها مادير و مزال يجي النهار اللي كما خدات بلاصة فقلبو تاخدها ليها وحدة اخرى ، منها عدد كبير اللي دايرين ما فجهدهم .. والملك نهار ترشق ليه يبدل موحال كاع عليها يعقل ، هوا ملك واللي شافها ديالو واللي ماشافها عندو فيها النص ... هي اللي غير جارية ومرى بحال بحال غيرها باش كاع زايدة عليهم .. وكما صبرات باش توصل ليه صابرين كاع قراناتها ، والزهر مرة يوقف جنبها مرة يقلب وجهو عليها وتما شنو غيوقع ليها ... واش تقدر تصبر وهي كتشوف غيرها شاد مكانها .. وعلاش اللي مايشدوه راه كل وحدة عندها حقها من الزين .. وكيد النسا اللي حافضة هي حافضو غيرها... والمغرفة اللي هزات ليها الحمص هاد المرة موحال مرة اخرى تهزو ليها .. شي نهار يجيها فحقها غير الماء . . . والى عاندات وقصحات راسها يطير قبل طلع نفسها ، كلشي ضددها وكلشي محاميين عليها .. يدها بوحدها ويد وحدة مكتصفقش .. والى مصفقاتش كتسرفق والتصرفيقة غيجي نهار اللي تجي فحنكها وتفيقها وتلقا راسها غير هي وقلبها المجروح ... قلبها اللي تعلق فمكان عالي والى طاحت موحال تفلق ولاكن غادي تزهق كاملة وماتلقا ماتجمع .
نزلات دمعة على خدها بلا متحس.. وبيدها الصغيرة مسحاتها وتنهدات كدور وجهها للور وتشوف بعينيها فكل وحدة غادية جاية كتجر فجلايلها ، وقبل ماترمش دخلات لاللة ياقوت هازة راسها تابعينها وصيفاتها وفرمشت عين تصافو لبنات قدامها ، وحدة تنسيها فلخرى من غير روح الندى اللي بقات واقفة فبلاصتها ماحناتش الراس وبقات غير مربعة يديها وكتشوف بعيون حزينة فلاللة ياقوت كارهة شنو كيجرى قدامها وحاقدة على البشار من الطرف حتى للطرف .
شافت فيها لاللة ياقوت بنص عين وهزات راسها قالت
- نتي واش وحدة من حريم الملك ولا شنو؟
هبطات روح الندى عينيها للأرض ساكتة حتى حسات بيد جراتها ووقفاتها مع الحريم فالصف ، بلعات ريقها بزز كتشوف فيهم بنص عين ماحملاش تكون وحدة منهم وتوقف بيناتهم حيت هاد الوقفة هي اللي كتفكرها بمقامها وباللي هي وحدة منهم ونهار عليها نهار على غيرها ، حتى هي لابسها زين وزينة مامحتاجة لباس باش تبان واللي ميزها عليهم التاج اللي على راسها اما حتى السالف راه عند وحدة اخرى وفايتها فالطول حيت مولاتو كبيرة على روح الندى فالعمر .
هزات لاللة ياقوت راسها منهدة وبدات تشوف فيهم وحدة وحدة ومامشات عينها غير لمولات السالف اللي واخلة ليها روح الندى فالحلق وقالت
- نتي ... شنو سميتك؟
هزات الجارية راسها وقالت : نجمة
دورات روح الندى راسها من دون البنات شافت فيها والنار كتاكل فقلبها وبدات ترعد عليها وشافت فيها شوفة ديال لعدو ورجعات شافت فلاللة ياقوت بشوفات بحال السهم الشاعل وحتى لاللة ياقوت حسات بيها وواخا هاكاك كملات كلامها وقالت
- نتي اللي غدخلي الطاس . وجدي راسك .
ضحكات نجمة حانية راسها ودمعات روح الندى واخا عيات تصبر فراسها انا لاللة ياقوت خرجات مشات بحالها وتفرقو البنات وفلحين طارو الوصيفات بنجمة يضويوها شوية عاد تدخل عندو انا روح الندى خرجات فلبلاصة دايرة يدها على حنكها كتبكي ومشات كتجري خرجات لبرى بلا عقل حتى لقات راسها وسط جردة دالورد ملونة وطاحت على واحد الحجرة جالسة كتبكي وتشهق بوحدها فحين راجعين كاع اللي مشاو يصلي صلاة العيد وبدا السلام وكلشي فرحان ناشط ومنهم الملك اللي تجمع بعاءلتو كيباركو ليه لعيد وبمو اللي شادة فيديه فجناح كبير واسع كترضي عليه وتعاود .
بردات روح الندى على قلبها بالبكى ووقفات سخفانة بزز شاداعا السخفة وكتخل عينيها بزز منها وتنخصص.. فمها كيترعد ويديها كيرجفو كتشوف فالجردة كدور بيها ودور دور دور .. غمضات عينيها وهزات راسها فالسماء خرجاتها بصوت مبحبح
- ياربي .
دوزات يدها على الورد بشوية غادية كدور بوحدها فقفطان ابيض بحال الحليب وشعرها الكحل مطلوق حرير بحال الملاك كتبان من بعيد غادية بين الورد كتسارا .
وقفات قدام باب جناحو حانية راسها ويديها موراها كتسول بشوية
- بغيت نشوف سيدي
فتح ليها العبد الباب ودخلات بشوية كتشرمش بعويناتها خايفة تشوف تما الجارية . من سعد سعدها لقانو لوحدو يالاه دخل كيحيد عبايتو البيضاء . تلفت مبسم موراه شافها واقفة فبلاصتها دايرة يديها موراها ولاح العباية بقا بالبلدي ابيض ومشا جيهتها فرحان . وقف كيشوف فيها وهز ليها وجهها . تبسمات وجبدات يديها عطاتو وردة حمراء .. ضحك وشدها من عندها وقربها ليه باس جبهتها مغمض عينيه وعنقها لصدرو وقال
- توحشك
تحل الباب عليهم وهوما معانقين وهي تبان نجمة هازة الطاس ديال النحاس بين يديها . غير شافتهم خرجو عينيها اما الملك هز عينو فيها وقال
- من بعد
تلفتات روح الندى موراها وهي تعقد حجبانها وشدات فدراعو معنقاه وكتشوف فنجمة وتخزر فيها وقالت
- غير عطيه لي انا نغسل ليه رجليه
مشات عندها حيدات ليها الطاس وهزات فيها عينيها كتخزر وتزفر من مناخرها . نتراتو ليها وبدات تجري عليها بعينيها وحتى نجمة رجع وجهها حمر بغات طرطق ، عضات فالصبر وحنات راسها وخرجات
رجعات روح الندى بالطاس عند الملك اللي واقف كيشوف فيها مبسم ، شد فيديها وقال
- حطي هاداك واجي
حطاتو ومشات معاه جلس وجلسها على ركبتو معنق خصرها كيشوف فيها والوردة فيدو كل شوية يشمها مبسم وقال وهوا كيركبها ليها مور ودنها فشعرها
- شكرا (باس يدها)
بدات دير فيه شي شوفات غراب ... خايبة شي نهار تخسرو وتلقا راسها كتحارب فحبها بوحدها وبلاصت مكانت تحارب الناس باش توصلو تولي تحارب راسها باش تنساه .
صغر عينيه فهم شي حاجة ماشي هاي هاديك وغمزها كيسولها بعينيه ، تبسمات وحلات يديها عنقاتو سكاتة ، جمعها بيديه لصدور وقال
- خايفة نمشي منرجعش ؟
زيرات عليه بالجهد ماهضراتش .. لاس راسها ودوز يدو عليها وقال
- ماشي لحرب اللولة هادي ... غادي نرجع ليك صحة سلام ان شاء الله ماعندكش مناش تخافي ... وباش تبقاي عايشة خاصنا نخوضو هاد الحرب قبل مايتهجم علينا وعلى ولادنا وعاءلاتنا .
هزات راسها شافت فيه وقالت : ديني معاك ... عافاك ياك علمتيني وكنعرف بحالك غير ديني معاك
ضحك على كلامها وقال : حساب ليك واش لحرب ساهلة ؟! كيموتو فيها الرجال بشلاغمهم واللي طول حياتهم فيها .. ونتي اللي مرى باغا تمشي ! عمر هادي كانت وعمر شي مرى خرجات للحرب . لمرى ماشي ديال الحرب لمرى كتجلس فدارها وتربي ولادها معززة مكرمة والراجل اللي كيخرج يقاتل .. يحارب على قبل ولادو .. وارضو وبلادو ... الى مات على هادو كيموت شهيد وماخصكش تحزني خاصك تفرحي ... وهاد الحرب هادي غتصفي بزاف ديال الشوك من طريقي غير كوني هانية
باسها من فمها مبسم ودوز يدو على خدها .. كانت على سبة وخاصو غير يقيسها ودغيا ستحلات البوسة ورخات راسها ، عجبو الحال معاها وبدا يبوس فشفايفها بشوية عليها وناض هزها بين يديه حطها على ضهرها ففراشو وتكا عليها كيشوف فيها يبعد الشعر على جبهتها وهي كتشوف فيه مبسمة وقالت بصوتها الحنين حاطة يدها على لحيتو
- شنو اللي عجبك فيا ؟ من دون البنات كاملين ؟
عض على شفاهو شوية كيشوف فحروف وجهها وقال بشوية
- الى قلت ليك الزين ... غايجي وقا ويدبل ... والى قلت ليك الصغر ... مزال فيوم من الايام تكبري .. والى قلت ليك الشعر ... شحال ما بقا كحل غادي تشيبو لأيام ... والى قلت ليك شطارتك ... فالدنيا كاين ما شطر منك ... والى فلت ليك قلبك اللي الصافي اللي كيبغيني ... غانكون ضلمت قلوب اخرى تقدر تكون حتى هي كتبغيني .
عروس الملك السابعة الجزء 37
محتوى القصة
التنقل بين الأجزاء