عروس الملك السابعة الجزء 40

هزات روح الندى قفطانها حادرة راسها من فوق السرير وقالت 

- نمشي نلبسو فلحمام 

حركات لاللة ياقوت راسها جيهت الحمام كتخزر وربعات يديها .. مشات روح الندى مخبية فالعباية نيشان للحمام وبقات لاللة ياقوت كدور فجناح الملك وتشوف بعينيها .. دازت قدام السرير لمكمش فراشو وشافت الوردة مرمية بين المخاد وشلا منادل بويض ديالو فيهم طرزة مذهبة مكمشين فواحد السلة ديال النحاس جنب السرير ومنديل كانت دايراه روح الندى بين رجليها وتحيد فالنعاس وبقا مرمي فوق الفراش . افأفات لاللة ياقوت مغمضة عينيها ومشات جمعاتهم كاملين بيديها كتمتم 

- مكيخافش على راسو .. مخلي هادشي هنا هاكا كن دخل شي حد دابا وهزهم ولا هاد الهبيلة دروح الندى ترميهم فشي بلاصة .. باينين ديالو للعمى .. لا حول ولا قوة الا بالله . 

جمعاتهم فخنيشة صغيرة وربعات يديها كتسنى روح الندى حتى خرجات عندها بقفطانها الابيض اللي دخلات بيه وهازة فيديها عبايتو الكحلة ، مشات علقاتها فبلاصتها ويالاه بغات تهز تاجها من فوق الطبلة وهي تنطق لاللة ياقوت وقالت 

- حطي داك التاج تما 

تلفتات روح الندى حاللة عينيعا وقالت: ديالي 

لاللة ياقوت : قلت ليك حطيه تما هي حطيه مغنبقاش نعاود معاك الهضرة 

تعصبات روح الندى وهي تزير على سنانها مغمضة عينيها عاضة فالصبر .. حلات عينيها وهزات التاج دارت راسها ماسمعات والو حتى خرجات لاللة ياقوت عينيها وقالت 

- حطي التااااج

ردات عليها روح الندى عليها كتغبن وقالت 

- علااش نحطو ديااالي عطاه لي قالي يبقا على راسي منحيدوش ! وحتى لعباية عطاها لي علاش كتحيديهم ليا ؟؟

وقفات لاللة ياقوت قدامها وخرجة عينيها وقالت 

- عرفي راسك معامن كتهضري حسن ليك .. والى ماصغرتيش راسك وسمعتي لكلامي وعاندتي غادي تجيببها غير فعضامك 

بغات تبكي روح الندى وبقا فيها الحال وبدات تهضر كتنخصص وتشوف فيها 

- دياالي هادشي والله .. هوا عطاهم لي بيديه .. قالي غيوصيك عليا هنننهننن.. علاش كديري لي هاكا انا شنو درت ليك ؟! 

غمضات لاللة ياقوت عينيها وتنهدات ورجعات قالت بشوية شاظة فجبهتها 

- سمعي لهضرة وخلي داكشي بلاصتو ... حسن ليك سمعي لكلامي .

بدات تبكي روح الندى ووقفات حدا العباية جراتها عندها عنقاتها هي والتاج وبدات تنخصص 

- دياولي هادو والله مكنكدب عليك ... شنو درت ليك حتى تكرهيني ؟ بوحدي اللي مكتحملينيش من لحريم ديالو كاملين اهىء اهىء اهىء علاش كتحيديهم ليا بيدو هوا عطاهم لي وانا مغنحطهمش 

قربات ليها لاللة ياقوت ونترات من يدها التاج وجراتها من دراعها كتزعف

- قلت ليك حطي هي حطي وتعلمي تحتارمي .. يالاه زيدي تحركي 

دفعاتها قدامها كتبكي مافجهدها مادير قدام ام الملك .. هبطات راسها ويدها على خدها وتمات غادية قدامها كتخصص ماراضياش .. شافت لاللة ياقوت النبالات ديال الذهب فرجليها وهي وتقول 

- وقفي بلاتي .. حيدي داكشي اللي فرجليك حتى هما 

وقفات روح الندى مصمرة شافت فرجليها وهي تلفت وقالت مفزوعة خايفة ياخدهم ليها 

- لاا.. دياولي ... عفااكي خليهم لي سيدي اصيل اللي دارهم لي اهء اهىء ... عفاكي

بدات ترجع روح الندى بللور كتهرب مابغاش تحيدهم ولاللة ياقوت كتزيد قدامها حتى لسقاتعا مع الحيط وقالت 

- يالاه .. ايوا دابا ديري عقلك وعطيني النبالات 

جلسات روح الندى مكمشة فالارض شادة فرجليها كتبكي وقالت

- خلي لي خلاخلي علاش بغيتي تحيديهم ليا اهىء اهىء...الى عرف بهادشي اللي كديري ليا مغيبغيش 

ربعات لاللة ياقوت يديها وقالت : باينة غادي نوحل معاك تاني .

هزات راسها وعيطات 

- عااابد .. عابد 

دخل عابد المكلف بجناح الملك ووقف قدامها هاز راس جامع يديه قدامو وقال

- نعام الاللة 

لاللة ياقوت : جيب ليا لكبيرة " لوصيفة ديالها" هي و وحدة اخرى من لعبيد بغيتها تحضر فلحين 

لاللة ياقوت كتهضر وروح الندى مكمشة فالارض شادة فرجليها كتبكي وترغب وطلب وتزاوك حتى حضرو لوصيفات وشدوها بجوج وحدة من هنا وحدة من هنا وروح الندى كدفع فيهم وتهرب رجليها عندها حتى بزقات على وحدة فيهم معصبة وكتنهج مخرجة عينيها وقالت 

روح الندى : وا يالااه

هنا تعصبات لاللة ياقوت وماشعرات براسها حتى تحنات عندها وجمعاتها معاها بطرشة خلاتها ليها مصورة فحنكها وخلاتها كتبكي مهبطة راسها على ركابيها وكتشهق وهما كيحيدو ليها النبالات من رجليها عطاوهم لاللة ياقوت ووقفو خلاوها كما هي متحركاتش من بلاصتها ، عطاتها للبكا والنحيط اما لاللة ياقوت جمعات كلشي حطانطتو فخزنة من الخشب ديالو ورجعات عندها قالت 

- يالاه نوضي تحركي

ماتحركاتش روح الندى. بقات كما هي مهبطة راسها كتبكي حتى تجروها الوصيفات نوضوها وهي كتنتر فدرعانها ماحاملاش يشدو فيها . مشات معاهم مور لاللة ياقوت مابغاتش تسكت من البكى داتها نيشان بعيد على جناحو لجناح عندو باب صغير بيه جوج بيبان ووقفات ، حلات ليها الوصيفة الباب ودخلات لداخل وتلفتات عند روح الندى هازة راسها 

لاللة ياقوت : هادا هوا جناحك كما وصى عليه سيد الملك . 

هزات روح الندى راسها كدور فعينيها وامسح دموعها وتنخصص وتشوف ..حتى هي رجع عنده جناح بسرير عالي على الارض دايرين بيه ركايز فالقنات ومدليين منو تواب فاللون الوردي وفراش بمخاد فنفس اللون و خزانة من لخشب وطبلة طويلة لاسقة مع الحيط ومراية طويلة واقفة فالقنت . عندها زربية حتى هي فالارض وسراجم طوال كيطلو على الغابة جناح متول وزوين ، ولاكن روح الندى ماعمر عينيها لابيت لا فراش بقا عقلها معلق غير مع حوايجها اللي تخيدو من يديها . سكتات مقالت والو وحتى الشوف ماكملاتهاش فالبيت . تكلمات لاللة ياقوت وقالت 

- ديري عقلك وسمعي لهضرة ... هادا جناحك دابا .. وبعدي على جناح الحريم مابقا عندك مايدار فيه 

ماجاوباتش روح الندى حتى نخزاتها لكبيرة اللي بزقات ليها على وجهها مغددة على ديك البزقة ومحلفة عليها وقالت 

- حني راسك وشكريها 

قلبات روح الندى وجهها للجنب خلات لكبيرة مصدومة فيها ولقصوحية راسها ، هزات لاللة ياقوت خنافرها وخرجات من تما تابعاها لكبيرة 

لاللة ياقوت : ماتحكروش عليها بزااف ... البنت صغيرة ماعندها عقل حسن بعدو عليها 

تعجبات لكبيرة وقالت : تعاقب بحالها بحال قراناتها علاه باش فايتاهم

لاللة ياقوت : فايتاهم بوصية سيد الملك .. وصى عليها ماتقاس حتى شعرة منها حتى يرجع 

سكتات لكبيرة مافاهمة والو وتبعات لاللة ياقوت . اما روح الندى قلبات البيت سفاه على علاه . جرات الفراش وطيحات لخوامي وقلبات الطبلة وجرات الزربية اللي خل للبيت يتخلع . رجع بحال لكوري وهي مجبدة على كرشها فوق السرير بلا فراش ومهبطة راسها كتبكي وتنهط

تكمشات روح الندى فبيتها ماخرجاتش منو حتى سمعات الدقان فالباب وهوا يتحل وخلات عبدية راسها من الباب كدور فعينيها مكمشة فمها . شافت مكاين حد دفعات لباب ودخلات هازة الصينية وطامو موراها معاوناها . سدو للباب ودخلو .. روح التدى شافت شكون دخل ورجعات لبكاها ودموعها ، حطو الصينية فالارض مخلوعين فالبيت وبداو يجمعو ويرجعو كل حاجة بلاصتها 

- عبدية : مالكي علاش كتبكي؟ لقيتي بيت ديالك بوووحدك ماتعطا لحتى وحدة وكتبكي 

طامو : راه كايقول المثل .. كبير الكرش يديها كاملة ولا يخليها كاملة ... فكرتيني فحكايتها ههه ... كان واحد الراجل قديييم معروض لواحد العرس . مرتو وجدات بيه عشا مبرع ديك الليلة .. اشمن يا دجاج محمر وفاكهة . . . سمح فداك العشا اللي دارت ليه واخا عمرها فحياتها داتو حتى لداك نهار.. حيت خاافا راجلها لا يمشي ويشوه براسو فداك العرس ويطيح على الماكلة عما . ساعة هوا سمح ليها فيه بغا يخلي كرشو خاوية ويعمرها بالمحمر والمجمر والمشوي ماشي يشبع فدارو وفالعرس مايلقا فين يحط النعمة . ايوا يالاللة مشا للعرس وجلس مع الناس كيتسنا لعشا . ساعة داك العشا كاع ماكمل ولعرس تفرتك وناضو فيه حباب لعروسة مدابزين مع حباب لعريس قبل ماتحط الماكلة وناضو الناس خرجو جيعانين ، رجع سيدي ومولاي كيجري لدارو عند مراتو نو ضها من ركادها تحط ليه لعشا .. ساعة صدماتو وقالت ليه تعشاااات هي ولادها وغسلات الغتر وقلباتو وداك الفروج اللي كانو يكسابو هوا اللي دبحاتو وحمراتو باش تشبع كرشو وتبرتو .خخخخههه ماعجبوش الحال وتعصب عليها وناضت عندو قالت ليه ياكبير لكرش فاش حطيت ليك تاكل سمحتي فيه باغيها كبيرة ودابا راجع كتجري عندي ! بقيتي لادي لاديك . بات جيعان ... لاعشا مرتو لا زردة لعرس المنحوس من تما خرجات هاد المثلة .. كبير لكرش يديها كلعا ولا يخليها كلها .. وهادي عليك يا لحاذرة عينيك وتبكي ليا تما . حمدي الله اللي عندك بيت وبعدتي من جناح لحريم .. ديري عقلك لاتصدقي بايتة فالحبس . مانتي بمخاد من الريش مانتي بفراش من الديش .. منك للضس والضس مايصبر ليه لحمك لهشيش 

هزات روح الندى راسها كتغبن وقالت

- سيدي خلاني فجناحو قالي نبات فيه الى بغيت .. وعطاني عبايتو وجاو خرجوني من تما وقلعو لي كاع داكشي اللي عطاني .. علاش يقلعوهم ليا علاااش 

طامو : يا لهبيلة ديري هبل تربح مالكي مابغيتي تفهمي... صبري حسن مايشتفو عليك الرجلين.. اللي قالوها قولي على راسي وعينيا حتى يرجع ان شاء الله بالسلامة وخوي ليه المزويدة .. بعدا مايلقا منين يشدك ويلقا لحق عليهم وديك الساعة جلسي فوق كتافو وتفرجي فيهم وشنو غيخرج منهم . ماالك مابغيتي تفهمي 

عبدية : الى خداوهم ليك راه غيرجعو ليك ... غير صبري يرجع وكلشي غيرجع ليك وديك الساعة شكي وبكي عليه كيف بغيتي 

عقدات روح الندى حواجبها وقالت : ايوا ويلا صفاوها ليا قبل لا يرجع ! هما بداو بيا مع يالاه حليت عينيا! مايدوزو هاد 3 شهور حتى يكونو صفاوها ليها . قلعو ليا حوايجي اللي عطاني وسكتوني بهاد الصندوق باش غدا ولا بعد غدا يخرجوني منو تاني مع حلة عينيا نلقا راسي فشي غابة مرمية !

طامو : ايوا بزاااز ... هادا صندوق هادا ! هي بغيتي تسكني فجناح سيد الملك نييت ... شفتك ولفتي تواسع حتى رجع بيت قد هادا ماكنتي تخلمي بيه حتى عند دريس رجع كيبان ليك صندوق! وااديري النية وباتي مع الحية يا هاد الجنية

روح الندى : الحية باتي معاها نتي نيت ... يالاه تجي فكرشها هي هاديك تشدي ليها على الجوع بعدا واحد الشهر 

عبدية : دوزي تعشاي ها لعشا غيبرد 

روح الندا : باقي حتى مافطرت!

طامو : علاه معاش فقاي يالاللة غنو! ماشي حتى للعصر ! الرجال مشاو للحرب ونتي خامرة ماجايبة للدنيا خبار ... راه لعشا دازت ولعشا كيتحط مور الصلاة دلعشا نيشان وكلشي راه طاحو يركدو بقيتي غير نتي اللي تقلبو ليك ليام 

روح الندى: صافي خليه هنا انا غادي ناكلو 

عبدية : دارت سديها على جنبها) اجي ... دوشتي بعدا؟

روح الندى : لا 

عبدية : ايوا نووضي دوشي واش بغا تبقاي بجنابتك ماحشمتيش!

روح الندى: راه قااالها ليا وقالي ندوش وراني عااارفة غير زربو عليا . 

طامو : ايوا هي الة جمعتي راسك ودرتي عقلك... يالاه اعبدية قبل مايقلبو علينا الدنيا تاني ونوليو فشي طاب وشي مطابش

جمعو لبيت وتولوه وخرجو خلاوها جالسة مربعة رجليها عند الميدة كتاكل ماتشبع وتشرب واكحة بحال الى عام مشافت النعمة . عمرات كرشها حتى عمراتها وناضت لبسات شربيلها فرجليها وخرجات راسها من باب البيت طلات .. الضلام ماكادور تما حتى ناموسة شافت السقيل وهي تسد الباب موراها ومشات كتختل وترجع فشعرها للور هازة قفطانها للجنب بيدها وغادية كتزرب هربانة ودور بجنابها حتى وصلات لجناح لملك ووقفات قدام عابد وقالت 

- بغيت ندخل ... واش ندخل ؟

حرك عابد راسو وقال : سيدي وصا على لاللة ياقوت بوحدها لي دخل ونتي . زيدي دخلي .

حل ليها لباب ودخلات مبسمة فرحانة .. يالاه دارت رجلها فلباب وهي ترجع باللور طلات كتشوف لا يكون تابعها شي حد وقالت 

- ماتقول لحد راني هنا .

دخلات وتسد موراها الباب ووقف عابد لوسط وحطو لحراس الرماح مقابلين بيديهم على لباب 

مشات نيشات لحمامو طلقات ماء سخون عمرات السريج ديال النحاس ودخلات فيه عريانة كتلغب بالماء وتهز رجليها قدامها كتغني ودندن بوحدها وتخوي لماء على كتافها وتعوج وتشير بيديها وتغسل على خاطر خاطرها حتى عيات وخرجات كتعصر فشعرها وتمسح فلحمها . مشات هزات عبايتو لبساتها ودخلات ففراشو فرحانة نعسات وغطات راسها ودارت يديها بجوج تحت حنكها مبسمة وغمضات عينيها .. رجعات حلاتهم وهزات راسها ساطت على الشمعة طفاتها ورخات راسها للنعاس.

يالاه بغا النعاس يشد فيها وهي تسمع الحس جاي من الشرفة .. حلات عينيها بان ليها خيال داخل كيتختل بشوية ويدور فراسو مانعرف علاياش كيقلب . خرجات روح الندى عينيها وعرفاتو ماشافهاش ناعسة حيت مكتبانش .. وقف الخيال قدام الخزنة وحلها ومعاه هزات روح الندى راسها وحلات عينيها مغزفة كتحلف وتلوي فراسها . ناضت من لفراش بشوية كتمشي على صبعان رجليها ودازت على واحد النحاسة ديال لحديد كيتحطو ليها الشمع هزاتها بيديها وتمات غادية كتختل حتى وقفات موراه لابس سلهام كحل كيبان غير من اللور .. كمشات فمها كي النقطة وهزات النحاسة للسمى ونزلات عليه رااق حتى طاح قدامها طيحة وحدة مكسل معاودش تحرك

يتبع