- شكون هاد وجه الويل ؟! مانعرف فيين شفت كمارتو ؟ فاايت لي شايفاه فشي بلاصة
نسات على وجه مولاي حفيض حيت مرة موحدة اللب شافتو هوا نهار لفطور فاش كانت و صيفة لاللة ياقوت من تما مابقا بان ليها ولا تلقات بيه ، قلبات ليه وجهو كتشوف ياكما سال ليه الدم ساعة متلقات والو ورجعات وقفات على دليرة يديها على جنبها كتمتم
روح الندى : ولد لحراام ... كاع مامات كاع مسال الدم ! الشفار لاخر جاي تشفر
دفعاتو برجلها ضرباتو هي تشوف قرعة صغيرة فيها ماء صفر وحجابات ماويين طاحو من يديه .. خرجات عينيها وتحنات هزاتهم فيديها ، حلات لحجابات لقات شلا رموز مكتوبين لابالدم مافيهم مايتفهم . عقدات حجبانها مخرجة عينيها شافت فيه وقالت
- ايييه اولد لحرااام جايب السحووور (خوات عليه القرعة ) هانا نوري باباك السحور كي داير
كفضات جلايلها ومشات هزاتو من رجلو كتجرجر فيه بزز وتعصر معاه .. مرة تجرو من يديه مرة من رجليه .. مرمداتو ومسحات بيه الارض وبمشقة التفس دخلاتو للحمام لداخل ووقفات كتلهت سخفانة
- الله ياربي شحال تقيل .. عامر دنوب يا ولد لحرام با الشفار يا سحار افففف
خرجات من تما خلاتو ومشات كتقلب بين الشراوط فواحد الصندوق وجبدات منو شي شطايط ورجعات عندو سدات ليه فمو لواحد الشرويطة وكتفات ليه يديه من رجليه وجمعات الشمع اللي فلحمام كاملين ودوراتهم عليه شعلاتهم . بعات رجليها قدامها لابسة عباية الملك الكحلة ملوياها عليها وطالقة شعرها زادت شعككاتو قدامها وكحلات الدورة دعينيها كاملة بالكحل رجعات كتخلع سيفتها كتخلع .
حل عينيه مولاي حفيض دايخ شبعان سخفة وطول فيها نييت ، بغا يتحرك لقا راسو مكتف ويالاه هز عينيه وهي تبان ليه جالسة قدامو كتشوف فيه مخرجة عينيها مكتحرك مكتهضر . شافها وهوا يبعبع بصوتو ماقدر حتى يخرجو .. فلتو عينيه وبدا يفركل فبلاصو كيدفع الحيط المزلج براسو باغي يهرب .. وجهه صفار وبدا يدور فعينيه لقا راسو فلحمام مضلم داير بيه الشمع . ماقدرش يشوف فيها ولا يتلفت جيهتها .. البكى بكاه بالخلعة والبولة طلقها فحوايجو والقلب خرج من بلاصتو بدا يقرا فالقرآن تالف ماعرف منين يبدا وباش يسالي .. بدا يدخل ويخرج فالهضرة مكمش
- انننناعععع اعععععهنىء ااهععه
عنوووعنن
مدات يدها وهي جالسة حداه مربعة رجليها وهبطات ليه الشرويطة على فمو بالجهد حتى سال الدم من فمو بدفارها .. ماهضراتش ومارمشاتش ورجعات ربعات يديها كتخزر فيه .. غمض عينيه بالخلعة وبدا يرجف فبلاصتو
- حنا بالله وبالشرع معاكم ... حنا باللله وبالشرع ... اعوذ بالله من الشيطان الرجيم ... اعوذ بالله من الشيطان الرجيم ... حنا بالله وبالشعر اهاااااهىء اهىء وكلت عليك الله يا شمس الضحى الله ياخد فيك الحق فهاد النهار الله ياخد فيك الحق
وهوا كيتمتم مدور وجهو لجهة اخرى مقادرش يدور ماعرف تسرفيقة منين جاتو حتى نزلات عليه للحنك صلاااااي .. يالاه طلع النفس غوت وهي تجمع معاه بطرشة اخرى عوجات ليه الحنك وقالت بصوت تقيل كتهضر
- زم فمك وماطلعش النفس ... ولا الليلة نعشي بيك ولادي ونتا حي
سد مولاي حفيض فمو وعض بستانو على شفاهو مكمش كيشطح بالخلعة معاودش تمهد وبدا ينخصص فبلاصتو .. صاافي هادي هي اللخرة ليه وهوا اللي قلب عليهم ها هوا لقاهم . رجعات جمعات يديها وناضت من قدامو كامشى تجرج جلايلها موراها ، اما هوا غمض عينيه ماقدرش يحلهم وخاشي وجههو فالجنب.. يديه مكتفين قدامو ورجليه مجبدين تاهما مكتفين قدامو ماشافها امتى ناضت خرجات ولا امتى دخلات ... ماحلش عينيه حتى حس بواحد لاللة ومالي شحطة تحت رجليه وهوا يغوت حال عينيه لقاها واقفة قدامو هازة فيديها واحد السوط ديال الجلد غليض يعلم الله منين جبداتو .. غوت وهي تشحط معاه وهرجات عينيها فيه
- زم فمك .. الى فيقتي ليا ولادي نقطعك طراف ونتا حي
قربات وجهها من وجهو خزرات فيه وطلعات الشرويطة على فمو سداتو ليه وبدات تحمل فيه بالسوط وهوا كيبعبع جالس فالارض متكف وضهرو على الحيط ... بقات عليه هادي تنفع هادي ضر... هادي تنفع هادي الضر حتى طابو رجليه من لتحت وتنفخو .. وقفات عليه كتنهج وخرجات فعينيها قالت
- تعلم فاش تبغي تسحر شوف ليك شي جن ولا جنية فايق ماشي تفيقني من نعاسي وتجيبني من تلت لخالي كنجري لهنا باش نقضي ليك غراضك ... مااااكنبغيييش اللي يفيقني من نعاااسيييي ونتا فيقتيني اش بغييييتي منييي اش بغيييتي مني هضر ... نطق ااااش بغيتني مني والى كدبتي عليا نسلخ ليك الجلدة عالعضم ونعوج فيك النص تبقا حايتك كامل عوج ... يالاه هضر
زير على عينيه كيبكي والنفس مقطوعة فيه كيتنفس غير من نيفو وبدا يتنفس بالجهد حتى خرجو خناينو ، هبطات ليه الشرويط على فمو و جلسات شادة السوط فيديها ، حل فمو كيجمع النفس وسنانو كيتقرقبو وعينيه فازكين مكمش وقال
- مم. مممراتي... ماشي يانا ..مم .مراتي ...مراتي
خرجات فيه عينيها وقالت : مالها مراتك ؟ شنو بغات مني مفيقاني من نعاسي
مولاي حفيض : كيلهت ) هي اللي دارت هادشي ... قالت لي نحطو هنا ... هي اللي دارت هادشي
بدا يبكي ويتنخصص كيزاوك : هي لكافرة بالله اللي كتعرف لهادشي .. اما يانا بغيت غير نرجع ملك ... بغيت نرجع ملك وهي كدير هادشي باش نرجع ... هي اللي دارت السحور باش الى رجع الملك حي يلبس دوك الحوايج ويخرج ليه لعقل ويتسطى ومابقا شاد حكام ويرجع ليا
- مسكييين ..بغيت ترجع ملك وبغيتي الملك ديالك يخرج ليه لعقل ... اااه.. مسكييين مافخباركش بيلا الملك مزوج جنية !... وديك الجنية هي يانا وعندي معاه الدراري ولهراري ... واللي وقف فطريقو نحش لباباه الركابي ... واللي بغات طيرو لي نطيرها من الدنيا قبل ماتوصل ليه ... واللي غييير نوا يآديه نقلب نعارو ليل وليلو نهار .. ونقتل ليه ولادو وعاءلتو كاملة ونخليه ينتاحر بووووحدو ديك الساعة ... باقي باغي ترجع ملك ؟
معنى اللحلاحة غلبات السحارة . هادا هوا كيد النسا
حرك راسو بالجهد سخفان وقال
- مابقيتش باغي نرجع لا ملك لا قران كحل... بغيت نرجع صحيح فصيح غير متآديني عمرني نعاود انا مزاوك
- غادي ترجع لجناحك ... وتغلي واحد الغلاي دالماء حتى يبدا يعيط بالعداو ... يفور مزياااان وتهزو... وتخليها تحتى تنعس ... وتخويه ليها على رجليها ... صلقهااااا . صلقهااااا والى ماصلقتيهاش نتا اللي غتصلق بداك الغلاي ... سمعتيني ... غنصلقك بيه .. وغادي نوقف عليك كل ليلة بقتلة ديال العصا حتى تبدا طلب الموت وماتلقاهاش
جمعات يديها عندها كتشوف فيه .. نتفات ليه اللحية من كل جوايه خلاتو مبرقع بحال الى فيه التونية .. رجع حالتو حالة وغير يابس مكيتحركش من بلاصتو .. بدا يتمتم كيهضر مخلوع وقال
- نصلقها .. غادي نرجع ونصلقها كلها ماشي غير رجليها ... ديريني عبد بين رجليك نتي آمري وانا نفد غير متآدينيش انا مزاوك فيك وفولادك .. مابغيت لا ملك لا قرينة كحلة اللي ضرب جد بابايا لكلب .
طلعات ليه الشرويطة على فمو سكتاتو بيها ووقفات قدامو كضحك وتخلع فيه بعينيها وهوا كيتركل ويبكي ويتعصر فبلاصتو .. ساطت على الشمع كضحك وهوا مخلوع كيشوف فيها بنص عين ويخبي وجههو ، طفات الشمع خلات عليه الضلام وخرجات من لحمام وسدات بابو ديال الخشب المنقوش .. فير سدات الباب عليه وبعدات وهي طلقها بواحد الضحكة وتلاحت فوق السرير كضحك بالدموووع وتفركل حتى سخفات ومشات حدا المرايا مسحات لكحولة دعينيها ورجعات السوط وكل حاجة بلاصتها كما كانت ومشات طلعات على السرير وغطات راسها معنقة وسادة محمد اصيل وكدوز عليها بيديها وتقول
- نفديك بحياتي يا الغالي ... توحشتك يا لحبيب ديالي امتى ترجع سالم غانم وتحدها لعديانك اللي دايرين بيك ... الله يغلبك عليهم والله ياربي متوريني فيه حتى باس ومتحزنش قلبي عليه .
باست المخدة وعنقاتها عندها وغمضات عينيها نعسات .
حلات عينيها وسط الطبيعة ولخضورية دايرة بيها والطيور كتنقز من شجرة لشجرة وشعرها مسرح فوق الورد وبلعمان .. وعلى حنكها يد حنينة كدوز وتمشي لودنها وشعرها .. تلفات جيهت اليد وهي تشوفو بلباس الحرب والسيف على جنبو كيشوف فيها مبسم وكيقول
- علاش مابغيتيش ديري عقلك
هزات راسها عندو كتشوف فيه ماتيقاش ودوزات يدها على وجههو كتلمس لحيتو .. عنقاتو بالجهد وقالت
- رجعتي؟
عنقها بيدو وقال : ديري عقلك الاللة روحي ... بعدي من لبلا لا يبليك ... وطلقي سراح اللي حابسة فالحمام يكفي مادوزتي عليه
شافت فيه شادة فوجهو وقالت : هوا اللي بغا يحيدك من طريقو .. هوا اللي بغا يغدر بيك ... شكون هاداك ... وشكون مراتو اللي سميتها شمس الضحى ؟
دوز يدو على خدها وقال : عدياني عارفهم واحد واحد ... خليك بعيدة على هادشي حسن ليك
روح الندى : انا مابغيت حد يآديك ... مابغيت حد يقيس شعرة منك وخايفة عليك
تبسم وقال : وحتى انا مابغيت حد يقيس شعرة منك وخايف عليك .. داكشي علاش خليك بعيدة على هادشي ... عارفك كتخافي عليا وانا راني قااد بشغلي
روح الندى : ولاكن راه كيسحرو ليك
شد وجهها بين يديه وقال : مكيشدش فيا فير هني باالك ... حتى حاجة من داكشي مكتشد فيا غير خليك بعيدة
قرب لجبهتها باسها وهي حادرة راسها مغمضة عينيها .
حلاتهم وسط الجناح وتهزات حاطة يدها على صدرها مخلوعة كتشهق
- الله ياربي اش هادشي حلمت بيه ... الله ياربي واش غير كنحلم وكنخرف مع راسي حيت عقلي بقا معاه ولا بصح جا عندي فمنامي... الله ياربي اشنو هادشي؟!!!
عروس الملك السابعة الجزء 41
محتوى القصة
التنقل بين الأجزاء