عروس الملك السابعة الجزء 42

من تأليف Ghazal trust
2018قصة مُلغاة

محتوى القصة

رواية عروس الملك السابعة , زوجة الملك السابعة

ناضت كتجري مفزوعة من الحلمة اللي حلمات ومشات للحمام طلات بنص عين عليه لقاتو كارم فبلاصتو مكتف كيتنخصص .. كمشات فمها ورجعات وبدات تخربق فشعرها ودخلات هازة راسها كتجر العباية وقفات قدامو فالضلام هازة شمعة وحدة فيديها وقالت 

- غنطلق سراحك ... بشرط 

قال مخبي وجهو بين كتافو كيرجف

- شرطي كيف بغيتي ... غير طلقيني ومتعوجينيش 

- روح الندى : تسلق هاديك اللي مسيفطاك .. ونهار تحط يديك فشي حجاب ولا سحور ولا غير نويتي تغدر بسيدك غادي نعور بيك عينيك ونقلب حياتك سفاها على علاها ... تذكر دييما باللي انا فطريقك لا نتا لا غيرك ... واللي طاح فيدي مانرحمو 

تحنات عندو هازة موس قطعات ليه المرابط اللي فيديه و رجليه وفمات ليه العقدة اللي فمو ووقفات قدامو كتنفخ 

- يالاه خرج منين جيتي خوي مكاني ... وياااك تعتب هنا ولا يغرك الغرار ويكدب عليك شيطانك وتفكر توقف فطريق ماشي ديالك .

خرج من قدامها كيجري ويرجف مدارش موراه ومشا كيطير للشرفة وهي خارجة من الحمام بشوية عليها حتى كتسمع زدااااااااف . شدات ففمها كضحك وقالت

- هادا قلت ليه هرب بجلدك صحيح مشا رما راسو كااع رزا صحتو بيديه ههههه

رجعات لفراشها وطلعات عليها الغطا نعسات 

الشمس ضربات فالجناح وروح الندا واقفة قدام المراية كتلبس حوايجها وتقاد راسها . دارت بالجنب لابسة قميص خضر تحت الركبة ديال الموبرة فلكحل مطروز ودافرة شعرها وفرجليها شربيل كحل مطروز . مشات جيهت الباب خرجات راشقة ليها نيشان للكشينة ودخلات كتعوج عليهم دايرة يدها على جنبها لقات عبدية وطامو كيطيبو الخبز .

روح الندى : صباح الخييييير

هزات عبدية راسها : صباح النور ... ناشطة ماشطة هاد الصباح ياك لاباس؟ شي ذهبية عطاتها ليك لاللة ياقوت هاد الصباح ولا شنو؟

روح الندى: لااالا .. هادي شهر دابا ما شفت جيهتها مت داكشي اللي دارت ليا وذهبي اللي حيداتو ليا .

طامو : ايوا تبارك الله عليك بعدا . هانتي درتي عقلك ومابقيتي مديري لا مشاكل لا والو .. شوفي كي رجعتي زوينة 

عبدية : خرجات عينيها ) اااااااجبدي الخبزة ويييييلي حي تحرقاااات 

خشات طامو يدها فالفران ديال التراب جبداتها لاحتها فالطبق مخروقة من لتحت وقالت 

- هيييييه!!! شكون ياكل هاد الخبزة صافي ضاعت 

تحنات روح الندى عندهم وقالت : الله على ريحة (قرصات من الخبزة) غير عطيها انا ناكلها .. ديري لي معاها شوية دزيت البلدية واتاي 

طامو : تاكليها محروقة!!!

روح الندى : بغيتها هاكا غير خليها
عبدية : تمشي تفطري فجناحك ولا تجلسي هنا ؟

روح الندى : لا نجلس هنا غير جيبي لي لفطور.

طامو: دابا عجبتيييني اللي درتي عقلك... اييوا شتي ... هانتي تهنيتي 

روح الندى : ولاكن كن تعرفني لاللة ياقوت كنمشي نبات كل ليلة فجناح سيد الملك كن كواتني 

قالت طامو كتلوح الخبزة فالفران : ايوا باتي فجناحك مالك كل ليلة كتمشي مخبية ... هيبييه! كن شفتييييي مولاي حفيض مسكين حرااام واش بغا يبرا ... غير ناعس على ضهرو مكيتحركش 

روح الندى : شكون هادا؟

طامو : ويييلي ماعرفتيهش! عن الملك

روح الندا علاه عندو شي عمو!

طامو : عندووووو وقالك ما قالك زلق مسكين فلحمام وجا على راسو تهرس من ضهرو مكيتحركش دابا كااع غير ناعس كيهضر غير بفمو 

خشات روح الندى لقمة فمها وقالت : ايوا سرو نييت هوا اللي كيمشي حفيان 

طامو : اااحححح مسكين كن شفتي هادي دابا شهر ماتحركش وحتى حد مكيقرب ليه ومرتو هي اللي مقابلاه معععععدبة معاه ... لخرا حاشات والبول مكيقدر ينوض يديرهم . مقابلاه باللي وبالنهار غادية بالطاس جاية بالطاس رجعات حالتها مكتخرج كاع من البيت ... مككككرفسة معاه 

روح الندى : ايوا هي اللي بغات ... لوصيفات موجودين اللي يقابلوه 

طامو : لااااالا بحال داكشي المرى اللي كتقابلو... فاش يتزغب شكون يكرط ليه الوصيفات! الى بغا يبدل شكون يبدل ليه ! والى بغا يوسخ شكون يوسخ .... عرفتي كيفيقها فنصاص الليل كيبغي يبول وكتنوض على سعدها ووعدها تشد ليه الطاس وهوا ناعس على ضهرو .. مرة يبول عليها مرة يفزك الفراش مرة يرشها ... كيبقا داكشي يطير فالسما ... سمعتها كتشكي على بنتها كالرهة حياااتها

حطات عبدية قدامها الصينية فيها اتاي والزيت وقالت 

- بااو ليك منقدرش نسرط داك الحراق .. لعجب !

روح الندى :قنطت فوووقاش غير يجي الملك توحشتو 

شافت طامو فعبدية وبداو يضحكو بيناتهم على روح الندى وهي كتامل وتغبز وتنتر الخبز ساهية كتخمم وكل شوبة تنهد . 

عبدية : كولي كولي وسيري رجعي للاصتك تكمشي . توحشتي الصدع واقيلا با ليا بحال الى كتقلبي على شي زبلة تاني 

روح الندى: فالصراحة كن غييير خلاوني فجناح الحريم ... علاش حرمات عليا لاللة ياقوت نهبط ليه مافهمتش.. وحتى باش نتلف ونلهي راسي مكاينش ... كنلقى غير جالسة ونخمم بوحدي وحتى الليلات اللي كيديرو ديال الحنة والغنا مابقاو كيديروها 

عبدية : واش الملك فلحرب وينوضو يحنيو ويغنيو واش خرج لباباك شي عقل!! 

روح الندى:: ايوا قنطنا ماكنخرجو مكندرجو شنو كانديرو ... انااا عيت وليت نكره نبقا مخشية بين ربعة دلحيوط كتجيني الغمة على قلبي رجعت كنتخنق ياربي السلامة 

تنهدات وسالات فطورها وناضت كتقاد قفطانها وقالت 

- نمشي نخرج للجردة شوية عييت بالجلاس

خرجات من الكشينة غادية وهي تلاقا بدريس جاي هاز كموسة على كتفو .. غير شافتو وهي دوخ بدات كدور فعينيها وتفتف انا هوا حل فمو وعينه وحطو الكموسة فرحان بغا يشد فيها وهي تهرب رجعات بلور كتشوف فجنابها 

- ويلي واش نتا باقي حي ! مزالة فيك الروح!

ضحك حتى بانو ضراسو وقال

- باقي حي يا نديديتي توحشتك (كيشد فيديها) توحشتك فين غبراي عليا

دفعاتو معبسة وقالت : بعد لهيه راه الى قربتي ليا يقطعو ليك راسك 

دريس : وعلاااش ياك نتي ديالي وكبرتي عندي شكون يحيدك ليا يالحبيباااااا 

روح الندى : يعطيك الحبوووب فرقني عليك منييين خرجتي ليا منييين 

فتح الكموسة بالزربة فرحان وقال

- شوفي جبت شي تواب من الهند كتهبل وتدي لعقل داكشي علاش غبرت وجبت ليك معايا واااااحد التوب من داكشي الرفيع 

طلات بعينيها مكمشة فمها وقالت : 

- امم... انشوف 

حلهم بيها وبدا يوريها وسط الممر ديال القصر . طاحت عينها على توب من لحرير حمر وقالت شاداه فيديها مبسمة 

- عجبني هادا ... ماكرهتش تفصل بيا منو شي عباية وطرو ليا فيه شي طرزة فالضهر بسميتي 

دريس : يالا معايا يا لحبيبة نشد ليك العبار 

شافت فيه هازة قنوفتها من الجنب ولاحت ليه التوب على وجهو وقالت 

- سير فصل على داك العبد اللي لهيه ... ماشي عليا يانا 

دريس : وعلاه لعبد اللي غيلبسو؟

روح الندى : ونتا مالك ... انا بغيت داك القياس بغيتو طويل نتغطا بيه ونلبسو ونجر بيه القصر كامل ... واش تخيط ولا نمشي بحالي؟

دريس : نخيييطو لعويناتي ونديديتي

قلبات عينيها كتمتم : يعطيك لعمى يعميك ... (شافت فيه) لمهم بغيتو طوييييل وعريض قياس سيد الملك 

صغر عينيه فيها وقال: ياكما ليه؟

تبسمات مكمشة فمها وقالت : ايييه لييه .. وبغيت شي فصالة وشي طرزة منداكشي الرفيع ... طلق يديك راه غنهديه ليه ان شااء الله فاش يرجع من لحرب 

دريس : وعلاه نتي كتلقاي بيه؟

روح الندى : واش فيها الى هديتو ليه واخا نكون عبدة عندو ! هدية هادي والى عرف شكون خيطو غادي يجازيك .. وادير شي خياطة فاعلة تاركة وزوق ليا لكتاف وعنداااك تنسا ليا الطرزة فالضهر بسميتي .. ولا عرفتي شنو .. الطرزة ديرها من لداخل ماتباش على برا حسن 

دريس : هي اللي متعاود انديديتي.. ونتي ماخصك والو ؟ هل التواب عزلي وتخيري لمخير ديالك 

تبسمات عاجبها الحال وكتشوف التواب فرحانة وطل هنا وتجر هنا ولاللى شامة واقفة موراها حدا واحد الحيط مع وصيفاتها سمعات كلامها واللي دار بينها وبين التاجر دريس كامل... هزات راسها كتنفخ ناوية على نية .. تبسمات تبسيمة شارنية ورجعات باللور مشات بلا ميشوفوها

طلعات روح الندى كتعوج فالدروج والضحك حتى لواحد اللحضة وهي تشهق شادة فكرشها ، وقفات شادة فالحيط ومع التطليعة ديال النفس دارت لاللة ياقوت بغات تنزل هي ووصيفاتها وهي تبوع عليها روح الندى فوق حوايجها كاع داك الخبز المحروق واتاي اللي كلات خلات لاللة ياقوت هازة يديها مخرجة عينيها وروح الندى حاللة فمها ويديعا على كرشها وكل شوية ترد بزقة فوق حوايج لاللة ياقوت حتى شبعات ردان عليها وهي تهز عينيها فيها خايفة وكتمسح فمها 

- غير الخبز واتاي الاللة صااافي ماشي خانز 

زيرات لاللة ياقوت على سنانها مخرجة عينيها بغلت تهضر وتغوت وهي ترجع سكتات ودارت مشات ساخطة كتبخ الدم .

دخلات لبيتها معصبة وقالت لوصيفة من وصيفاتها 

- سربي دغيا حيدي عليا هادشي .. سخني ليا لحمام سربييييي دغيااا

بدا يجريو ويتجاراو حيدو عليها الحوايج ودخلوها للحمام كيطيرو .

دخلات روح الندى لجناحها وتلاحت على ضهرها حاطة يدها على كرشها وقالت 

- اااه ياربي ... اااح مالي واش مريضة ولا كليت شي توكال ... لاينة وكلوني شي توكال خاصني نشرب شي عشوب اللي يغسلو ليا مصارني.. بنات لحرام وكلوني هادا توكال مافيها شك هوا اللي قلب ليا كرشي ومسخسخني.

خرجات لاللة ياقوت من حمامها مزنكة لابسة قميص زرق خفيف وجامعة شعرها سفنجة لور فارقة الفرقة لوسط والشعر كحل كيبري والوجه نقي مافيه حتى حبة . جلسات دارت رجل على رجل شادة فيديها كاس دلويزة وتلفتات عند لكبيرة وقالت 

- سيري جيبي ليا لحكيمة لهنا .. وجيبي لي روح الندى حتى هيا .. سربي راسك 

حنات الكبيرة راسها وخرجات كتجري . دخلات على روح الندى بلا مدق لقاتها مجبدة .. هزات راسها مخلوعة وقالت 

- مااالكي مدرمة عليا اااااش كاااين 

قالت لكبيرة معصبة من تحت السنان

- بطا عليا امتى نربي بيديا ... عندك الزهر مالقيت ليك جهد

وقفات روح الندى دايرة يدها على جنبها وقالت : ايوا من دااابا وجدي راسك فاش يولي ليا الجهد نبدا بيك ناي اللولة ... سبحااان الله حتى انا مكدوزيش ليا ياربي السلامة كما انا مكندوزش ليك 

لكبيرة : تكلمي لاللة ياقوت بغاتك فلحين ... ونهار طيحي بين يديها مايفكك مني فكاك 

روح الندى : وانا نهار طيحي بين يديها نعصرك عصير الزيتون ... ماعرفتيش علاش بغاتني لاللة ياقوت 

لكبيرة : دوزي تحركي وسدي داك دلقوش ... باينة درتي شي زبلة وغادي تصفيها نشاء الله 

صفار وجه روح الندى وقالت : هااه! واش حيت تقيييت عليها ؟ راه واقيلا كليت شي حاجة راه دارو لي التوكال من لبارح وانا نرد حتى خرجو مصارني

لكبيرة : زيدي قدامي براكة من لهضرة حتى لتما وقولي لها هادشي 

جراتها من دراعها طلعاتها كتفتف فالدروج وتفرك يديها مخلوعة ، دخلاتها لجناح لاللة ياقوت ووقفات 

لكبيرة : ها المتعوسة يا لاللة 

لاللة ياقوت: خليها .. خرجي نتي ولوصيفات حتى نعيط عليك ومنبغي حد يدخل عليا 

خرجو لوصيفات بقات غير روح الندى واقفة كدور فعينيها خايفة وحانية راسها .. كتشوف فلاللة ياقوت بنص عين وتشوف فلحكيمة اللي واقفة جنبها .

لاللة : ياقوت : نعسي ... لحكيمة غتشوف مالك 

هزات روح الندى راسها حاللة عينيها وتبسمات قالت : واخا .. نعس هنا ؟ 

لحكيمة : اجي هنا 

نعساتها فالارض فوق مخدة طويلة وعريضة وجلسات قدامها عند رجليها ولاللة ياقوت عابسة وعاقداهم كتشوف فالجنب شادة لكاس فيديها . وتسمع لصوت روح الندى كتوجع وكل مرة تنطق " اي " اااح" حتى سالات وناضت لحكيمة وروح الندى كتلبس حوايجها ... تبسمات لحكيمة وقالت ..

- صحة سلام مافيك والو 

تلفتات لاللة ياقوت وقالت : سيري رجعي لجناحك وماتعاوديش تخرجي منو والى شفتك خارجة نقطع ليك الراس. 

هبطات روح الندى راسها ومشات خرجات وسدات موراها الباب وبقات لحكيمة واقفة قدام لاللة ياقوت . تنهدات وقالت كتسوط 

- داكشي اللي قلت واقيلا هوا اللي كاين .

حركات لحكيمة راسها وقالت: ايه نعام لاللة ... حاملة 

شافت فيها لاللة ياقوت وقالت

- هادشي يبقا سر بيناتنا مانبغي حتى مخلوق يعرفو ولا حتى هي براسها تعرف. ماشفتي ماريتي . راكي عارفة حكام الملك وحتى وحدة دابا مكتحمل واللي حملات راه تكون دارت شي حاجة واللي حصلات غيتقطع راسها (غمزات ) صم بكم عمي ... سدي على هادشي فمرة

لكيمة : تهناي الاللة مكاينش اللي يعرف ... انا ونتي اللي عارفين صافي .

خرجات لحكيمة وهزات لاللة ياقوت راسها كتنهد مغمضة عينيها 

- ياربي كاع جهدي درتو باش تبقى بعيدة عليه مايآديهاش... (حلات عينيه كتسوط) اش بقا لي ماندير اللي عطا الله عطااه ... وبنت خويا حاملة من ولدي ... فين ما نقول بعدو كنلقاهم قربو . 

هبطات روح الندى لجناحها ودخلات كتجري للحمام وجاحت على كابيها كترد مخرجة عينيها وشادة فكرشها .

- دارو لي التوكال بنات لحاااااااعععععععوء 
.. ااااااعععععععععىء بععععععععىء... (كتلهت) والله لاخليتها فيكم باغيين تصفي اععععععع ءااااعىء ااااه اربي كرشي ااااااه اربي خاصني نشرب عشوب ينقيو ليا مصارني .. ااااهى اربي ياربي

يتبع


التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.