عروس الملك السابعة الجزء 43

ردات حتى شبعات وتكات سخفانة على ضهرها كتلهت حتى نعسات .

فصحراء قاحلة ماليها اول ولا اخر .. رمالها صفرها ورياحها قوية .. حرارتها كتمايل فالجو ورمالها سخونة كتحرق واقفة عليهم روح الندى حفيانة بقفطانها الكحل وشعرها مطلوق كيطيرو الريح ويعمي عينيها . واقفة كدور فبلاصتها وتشوف راسها فين هي .. لقات راسها وسط الصحراء واخل تسرح عينها حتى تعيا كتبات لبها غير الرملة ملاقيا مع السماء . سمعات صوتو موراها قال

- روح الندى

تلفتات كتبعد الشعر على وجهها بالزربة شافت واقف موراها بنفس اللباس حاط يدو على سيفو وعبايتو البيضاء كيطيرها الريح فالهواء ... تبسمات وتلاحت فحضانو معنقاه 

روح الندى : توحشك الغالي ... توحشتك بزاف فوقاش ترجع ليا 

باس جبهتها مبسم وقال كيهمس فودنها 

- قريب ان شاء الله ... يالاه وصلنا لارض الحرب ... يرتاح الجيش هاد الليلة باش غدا نتقابلو مع العدو .. دعي معانا 

هزات راسها شافت فيه وقالت 

- غدا !!! علاه مزال ماتقابلتو ؟

شد راسها بين يديه وقال : الطريق طويلة يالاه وصلنا .. كل مرة نرتاحو فأرض .. الحرب ماشي ساهلة ... الحرب صعيبة واللي ستاهن بيها طمرو حي .. وانا عندي عدو غارس سيفو فضهري وغدا غنغرسو ليه فصدرو ... حيت مكنجيش مور الضهر ونضرب 

روح الندى : شكون عدوك شكوون؟ بغيت نعرف عدوك شكون ؟

تبسم وقال : غادي تعرفي غير رتاحي .

عنقها وغطاها من العجاج اللي داير بيهم والشمس الحارقة الضاربة فيهم . حلات عينيها مبسمة لقات راسها معنقة مخدة حداها ... شافت فيها كدوز يدها عليها وقالت 

- ياااربي غلبو على من عاداه يارب . يارب غلبو على من عاداه 

ناضت مغيرة عياانة سخفانة وزادت الحلمة سخفاتها . مشات للحمام توضات و خرجات راسها من جناحها شافت هاكا وهاكا مابان ليها حد ومشات كتجري لجناحو ووقفات حتى حل ليها العبد الطريق دخلات وسدو موراها الباب. شعلات الشمع ضوات بيه ضلام الليل الحالك ومشات لسجادتو فرشاتها وقامت الصلاة كتصلي ودعي حتى أدن الفجر وهي مزالة ساجدة كطلب الله ينصرهم ويرجعهم سالمين .

فوق ارض واسعة وعريضة ماعليها شجر ولا ربيه ... تعيا تسرح فيها العين ماتجبر ليها تالي .. وفوق هاد الارض مقابلين جوج ديال الجيوش جيش الملك محمد اصيل وجيش امبراطور عدوه .فمقدمة الجيوش واقفين فرسان مصافين فوق العودان وموراهم صف ماليها اول ولا خر بفرسان واقفين بالرماح وموراهم عدد لايحصى من المحاربين بالنبال والسيوف . واولهم اللي واقف فالصف الاول لوسط هوا الملك محمد اصيل وحداه ولاد عمامو كاملين .. عازمين وفعينيهم شوفة شديدة جيهت العدو .. فرمشة عين وبلا كلام بدات النبال كتطلق فالسماء من عندهم بجوج وتلاقا فالهواء بخال شي غيمة كحلة وكتنزل على الجيوش بجوج بحال الشتاء وديما كيكون الدرع اللي كيتهز فوق الراس هوا الحامي من شتا النبال . ترفعات السيوف فالسماء واجدة وباشلرة من محمد اصيل اللي هو سيفو وجهو جيهت العدو نيشان بدات الخيل كتجري واللي على رجلهم كيجريو والنبال مخلطة كتشاير فالسماء والرماح كترمى فالهواء . كل واحد كيضرب فجهة وكل واحد معامن مضارب . الحرب نايضة والعجاج حتى هي نايضة والارض مغبرة والخيول كتهز فالسماء والسيوف كتغرس فجساد بني ادم بلا رحمة . هاللي كيضرب بيديه ورجليه ومشانق وها اللي هاز جوج سيوف كيخلط ويشلض وها اللي بسيف واحد كيضرب ربعة فدقة وحدة . اما الملك محمد اصيل راكب فوق العود عطيني نعطيك هوا الامبراطور اللي محامي عليه مع ربعة اخرين . كل مرة يهز الدقة بالسيف مزير على سنانو من جهة حتى كتكون غاادي تجي فيه وكيشدها بالسيف . شاف راسو كترو عليه والربعة ولاو تمنية والتمنية غاديين وكيتزادو ومعاهم الامبراطور ديالهم وهوا يضرب على عودو برجلو ومشا كيجري ويضرب هنا وهنا فاللي جا قدامو من عديانو حتى خرج من عجاج الحرب غادي كيجري والامبراطور ورباعتو تابعينو كيضحكو على الهربة اللي هارب . . . بعد بزاف على رحبة الحرب وغادي كيجري مرة يشد ليمن مرة ليسر حتى شتت اللمبراطور وربعاتو وهوا يجر اللجام ودار عندها هاز السيف كيضحك وقصد الامبراطور نيشان اللي بقا بوحدو معزول ... بجهد اللي غادي الملك كيجري واقف برجليه وشاد اللجام بالجهد اللي عطاه بالسيف للعنق قطع ليه الراس وزاد قلب الدورة كيجري من واحد لواحد حتى داز عليهم كاملين ورجع لرحبة السيف دخل من جديد كيقتل هنا وهنا ، نزل على العود كيتقاتل .. ومن لبساو باين الملك داكشي علاش كل مرة يتجمعو عليه حالفين يصفيوها ليه .

سالات الحرب .. اللي هرب هرب واللي بقا من العديان راه مجبد فالارض . هز الملك سيفو للسماء كيعلن النصر ... الجيش كامل فرح وكلشي كينقز هاز سيفو ولاكن اللي مفرحش الملك واللي خلاه يقلب وجهو على ولاد عنو مشافش جيهتهم كاع هوا علاش حتى واحد مدخل يضرب معاه وكيشوفو فيه وسط جماعة من السيوف كتقرقب عليه ناويين يقتلوه . خلاوه واحل كيفك راسو وزعما هما اللي ولاد عمو خاص يكونو بجنبو ويحميو ملكهم هوا اللول .

ولاكن الملك لقا غير درعانو المحجرة هي اللي كالات عليه وصحتو اللي جاهدات باش يبقا حي وسط سيوف كل مرة تخرج ليه من جهة . تقاس فصدرو بضربة خايبة تشرطات ليه حوايجو ودازت فلحمو حتى هوا .. الدم سال وشرشر وماضرب ليه حساب وماخرج من الحرب الا وهوا قاطع راس العدو .

شافوه الرجال الشجعان اللي بحاو اللي يستاهلو كلمة الرجال مجروح من صدرو ومزال واقف ودارو بيه فرحانين كيسولوه على حالو وهوا كيضربهم لكتافهم عاجبو الحال فرحان بيهم . تنصبات لخيام فديك البلاصة نيت ... وتحطات الرحال ونواوه تما يباتو وتما دوز ليلتهم باش يصبحو شادين الطريق وراجعين بالعز والنصر . 

يالاه تنصبات خيمة الملك محمد اصيل وجلس فيها يتكى حتى كيوقف علين سيف الدين ناشط فرحان .. حنا راسو ليه وقال 

- سيدي ... مبروك النصر .

تبسم محمد اصيل كيطلع ويهبط فيه بعينيه وهوا متكي على جنبو وقال بدم بارد 

- الله يبارك فيك ... مبروك علينا كاملين 

تبسم الامير سيف الدين وقال : بهاد المناسبة الى جات على خاطرك ... ماكرهتش شي طرح بيني وبينك ... يكون لي الشرف اسيدي 

تعجب الملك وقال : وحنا يالاه خرجنا من الحرب ... كن جيتي ديك الساعة هزيتي عليا سيفك وبارزتيني 

هز حاجو وحشاها ليه سخونة كمدها الامير سيف الدين وحس بكلامو كيمعني علين ولا يمكن نسبو من عديانو كاع ... سكت كيفكر اش يقول وقبل مايلقا لجواب لقا الملك واقف قدامو هاز راس وماد يدو للجنب وقال كيشوف فيه 

- عمااااار .. السيف.

جرا عندو واحد من الجيش هاز ليه السيف ديالو ومدو ليه حاني راسو .. شدو الملك وقال هلز خنافرو 

- ليك الشرف غتموت على يدي ... بغيتي تقاتلني مرحبا ... ولاكن قبل قولها بصوت مسموع ... يسمعها كلشي

استاغل الامير سيف الدين الوجيبة وهز راسو حركو وخرج برا هاز السيف فيدو وقال 

- كلشي يعطيني ودنو ... اليوم انا غنبارز ملكنا ... فرحة بالنصر ديالنا .. ولاكن عطاني شرط ... هاد الحرب اللي غتبدا بيناتنا غتسالي بموت واحد منا .. 

جرو الامير قاسم من دراعو وقال عاض سنانو باغي يهبل 

- واش كتخرف ولا تزمر واش خرج ليك العقل ... اش هاد الهضرة كتقول واش بعقلك .... كتقلب على الموت ؟ 

هز راسو وقال : انا عارف اش كندير . بقا نتا غير تفرج 

نتر يدو وخز السيف تاني وقال.

- ولاكن ... هاد الحرب بيني وبينو ... وبعيدة على عينيكم واللي شفتوه رجع عندكم منا عرفوه هوا اللي غلب 

خرج الملك بدم بارد واخا هاد الهضرة جاتو غريبة ... كفاش بعيد على عينيكم ! وحتى الرجال اللي قراب منهم مافهمو والو وبقا شي كيشوف فشي ويتسناو جواب الملك ديالهم ... عمرها كانت هادي ... شكون يقدر يتحدا الملك ويقول بهاد الكلام تايق فراسو ؟ شافو حتى عياو وقالو ولاد العم باغيين ينشطو بيناتهم .. الفرحة كديرها والدنيا هانية 

الملك مجاوبش ... ركب نيشان فوق عودو هاز راسو ... ومشا يجري مع سيف الدين حتى غابو على لعيون . وقفو فوسعة دايرين بيها الجبال وتقابلو واحد لواحد . 

الامير سيف الدين : طول عمري وانا كنتسنى هاد النهار اسيدي

تبسم الملك وقال : وانا هاد الحرب اللي كنت كنتسنى ماشي لحرب اللي خرجنا منها كاملين . عطيني شنو عندك دغيا 

تبسم الامير سيف الدين وقال : بوحدنا فهاد الخلا ... ولا حتى واحد يطيح فبالو نكونو هنا ... عشتي حياتك امير وباك ملك ... ودابا ملك واللي بغيتيها ليك ... حكمتي باللي بغيتي وحتى من الامراء رديتيهم عبيد عندك ... ليوم تجني كاع داكشب اللي حصدتي 

هز الملك راسو فالسماء كيضحك وقال : فيكم اللي يستاهل يكون عبد بحالك ... عبد نمسحو مع الارض برجلي ... الرجال كتجي فلوجه ماشي فالضهر اسيف الدين ... ونتا مزال معرفتي الملك محمد اصيل مزياااان ... كن عرفتيه متقدرش ترمي راسك هاد الرمية كاملة 

تبسم سيف الدين كاره وحاقد وقال

- يامك سالات 

بدا يسفق بيديه كيضحك وهما يضلو رجال من الجيش نيت من فوق الجبال ومن مور الحجر تابعين للامير سيف الدين كاملين هازين النبال ومصوبين جيهت الملك وغير زلقة من ليد يدخل الرمح لحمو ويضرب فعضمو . كل الامير سيف الدين يديه فرحان كيضحك وهوا كيشوف الغضب والصدمة مكحلين عينين الملك اللي كيشوف فرجال من جيشو تقلبو عليه ودارو بيه بعيييييد بزاف على الجيش ديالو والرحال اللي حاطين .. بوحدو بين يدين عدوه الحقيقي .. ولد عمو اللي غدر بيه وبين على نيتو .. ومادام بين عليها الا وغادي يقتلو ويقاضي عمرو مافيها شك

يتبع

سوري نسيت مادرتش تنبيه التأجيل
مساء الخير الليلة منقدرش نحط عينيا عيانين بسبب الحمام كينشفو ليا وكيضروني وخاصني نكتب وتبقا نشوف فتيلي ونضيف شي حوايج لهاذا مغنحطش الليلة. لي عندهم الاستدراكية الله يوفق والله بنجحكم كاملين واللي فاقت الصباح دايخة تشرب قهوة كحلة معصرة تحل ليها عينيها ودماغها والله يسهل عليكم 😘😘😘