وقفات لاللة شامة مخرجة عينيها وقالت : نوضي تكعدي من قدامي وتفكري سهمك ولا ندير فيك شرع يدي
خشات روح الندى فمها فلكبالة ماجاوباتهاش وبحال الى ماسمعاتهاش .. تعصبات لاللة شامة ومارضاتش قدام لحريم اللي واقفين كيشوفو فيها وهي تهز يدها ضربات يد روح الندى باش كتاكل وطيحات ليها كبالتها فالارض ، عفسات عليها برجلها وخلات كاع لحريم مخرجين عينيهم ويدهم على فمهم ، اما روح الندى بقات حالة فمها طارت النعمة من بين شفايفها وخلاتها هازة يديها كتشوف فالكبالة كترفس تحت رجل لاللة شامة ، عقدات حواجبها ودمعو عينيعا ومع النوضة مع الدفعة بيديها دفعات لاللة شامة بالجهد من صدرها حتى جا راسها على الطبلة دالشواء وهي طيح فالارض غايبة . كلشي حل فمو وكلشي تصدم وكلشي رجع لور كيشوف فالارض فلاللة شامة السخفانة فالارض اما روح الندى زادت خرجات عينيها وكملاتها بالبكا كتغوت
- هي اللي جبداااتني .. هي ماشي يانا ياك شفتو .. هي اللي ضرباتني اللولة انا مدرت ليها والو ... غزاافيك الله واشدي دابا
رجعلا اللور كتنهج من بعد ما بردات غدايدها . يالاه بغات طلع النفس وهما يدورو بيها العبيد شدوها من كل جهة ودارو بلاللة شامة الطايحة فالارض وقبل مايهزوها كانت لخبار وصلات لفوق عند لاللة ياقوت والاميرة الجدة لاللة زينب وام لاللة شامة حتى هي نزلو فلحين بتلاثة كيجريو سابقاهم لاللة ياقوت وعينيها خارجين سابقينها مخلوعة . وصلو عندهم شافو لاللة شامة طايحة وروح الندى كتنتر بين يدين العبيد وتبكي
- بعدو مني .. طلقو منيييي اهىء اهىء .. والله يجي الملك حتى نشكيكم ليه يقطع راسكم من الجدر
وهزات لاللة زينب راسها مخرجة عينيها ، شعرها كحل مافيه حتى زغبة بيضاء مجبد حرير دايرة ليه فرقة الوسط بيضاء بالنقاء وجامعاه اللور سفنجة وعلى نص راسها توب شفاف كيبري ناول عليها .. لابسة من التواب الرفيعة ومن شرابل الصم الحر والجوهر فعنقها والذهب والزمرد فيديها .. خرجات عينيها الكبار وقالت
- وحدة من حريم الملك اللي ميزها على غيرها .. وموصي عليها تبقا امانة فرقبتي حتى يرجع
خزرات لاللة زينب وقالت بالجهد حتى سمعها كلشي : كفاش ميزها ؟؟؟ بحالها بحال غيرها والى كان بصح ميزها غادي تمشي تجلد 100 جلدة ... وقطعو ليها داك السالف علقوه قدامها وخليوها مرمية فالمطمورة كتاكل الشياطة حتى يرجع سيدها يحسم فأمرها ... يالاه تحركو
كلشي حدر عينيه من لحريم وحتى الاميرات ، حتى وحدة ماقدرات تهز الراس قدامها وحتى لاللة ياقوت معاهم تزيرات وحمار وجهها باغا تفك الحريرة وكي غادي دير ليها وهي قدام لاللة زينب اللي حد مايعاند كلامها لامن ولادها لامن حفادها والوحيد اللي كتبغي تكسب تيقتو ومحبتو وكترطب معاه وتهرس كلمتها هوا الملك محمد اصيل واصلا مكاينش دابا. سمعات روح الندى كلام لاللة زينب اللي ازل مرة تشوفها وماعرفاتش حتى شكون هي وشكون تكون وقالت كتغوت
- حتى ياااانا اميرة ... سيد الملك توجني اميييرة .. بعدووو مني .. طلقووو والله حتى نشكيكم ليه وتشوفو ... غير بلاتي يجي
قربات منها لاللة زينب مخنزرة وجمعات معاها بطرشة للحنك قدام كلشي سكتاتها . غمضات لاللة ياقوت عينيها كمدات ديك الطرشة ورجعات كتشوف فروح الندى اللي بقات مصمرة حاللة عينيها .. شوية وهي تشوف فيها مخنزرة وبزقات على توبها وقالت
- تفووو...
كلشي حط يدو على فمو مطرطق عينيه وحتى من لاللة ياقوت شهقات وحطات ديها على فمها . خرجات لاللة زينب عينيها محمرة بحال العافية وقالت مزيرة على سنانها
- قطعو راسها دااابا قداااامي ... دااااابا
طيحو العبيد روح الندى فالارض على ركابيها وهي كترعد والدموع كيقطرو من عينيها وكتغوت وتعيط
- لاللة ياااقوت ااهىء اهىذ ... لاللة ياااقوت فكيني عفاااك اهىء اهىء هي تعدات عليا اللولة والله مايانا ... هي ضرباتني سولي كلشي يقولك
كلشي سكت حتى حد ماقدر يهضر من غير لاللة رحمة اللي هزات راسها وقالت
- هي اللي بدات ... لاللة شامة ماقرباتها ما حداتها وبلا سبة ناضت هادي دفعاتها ... تكلمو نتوما مالكم ساكتين واش على حق ولا ماشي على حق
حركو الجاريات راسهم كاملين وقالو
- على حق الاللة هي دفعاتها بلاسبة
هزات روح الندى عينيها كتبكي الدم وضهرها مقوسينو ليها العبيد وقالت
- كدووووب .. كدووووب الاللة ياقوت والله حتى كدووووب هي ضربات لي الذرة من يدي وزطمات عليه ... شهدو الزور الله ياخد فيهم الحق .. الباطل والله الاللة حتى الباطل .
زعفات لاللة زينب وقالت كتشوف فيهم كاملين
- قليلة الترابي مالقات اللي يربيها وشاط عليها دفالها بدات ترمي بيه على سيادها ... تستاهل الرجم ولاكن غنقص عليها .. اليوم يتقطع راسها باش اللي تبقا ليهم عبرة .. اللي هزات راسها يطير ليها ... هادشي ميحتاج كلام وهاد قليلة الترابي بلا واليدين خاصها تعدم
كلام لاللة زينب كان قاصح وكيضرب فقلب روح الندى بحال الخجر وفصدر لاللة ياقوت بحال السهام ... شافت فيها لاللة ياقوت وهي حانية راسها منها للارض ودموعها كيقطرو . وزادت دمعات معاها فاش هزات روح الندى عينيها فلاللة زينب وقالت
- بصح انا بلا واليدين والحمد لله كنعرف ربي ... كيت اللي بواليديهم وخوتهم ومكيعرفو ربي غير بالسمية ... انا ماشي عبدة وعمرني نكون عبدة تحت رجليكم والموت هون ليا وكما درتو ليا مزال غيجي النهار اللي دار ليكم حتى نتوما وعقلو على هضرتي
وقف قطاع الريوس على روح الندى بالسيف هزو فالسماء .. خرجات لاللة زينب عينيها وزعفات بالجهد
- قطع ليهاااا راسها قبل ماتزيد شي كلمة
هبطات روح الندى راسها وزيرات على عينيها كترجف فبلاصتها ، عبد شادها من هنا وعبد من هنا ولاللة ياقوت عينيها غيفلتو من بلاصتهم ... شد قطاع الريوس السيف بجوج يديه ناوي يقطع .. حرك يدو بغا ينزل وهي تغوت لاللة ياقوت بالجهد وقفات قدامهم كتلهت بالخلعة
- وقااااف ... حبس ... حبس
وقف قطاع الريوس ونزل يدو ، خرجات لاللة زينب عينيها فيها وقالت
- شكون نتي اللي توقفي حكامي
هزات لاللة ياقوت راسها كتسوط من خنافرها وقالت
- انا مو ... ام اللي حاكم هاد البلاد ... وهاد البنت ميمكنش تقطعي راسها واخا بزقات ليك توبك
- البنت حاااملة... حاملة فكرشها حفيدي ... ولد الملك ولي العهد اللي كيتسناه البلاد كاملة واولى من اي واحد اخر .. اولى مني ومنك ومن كاع اللي هاد العاءلة ... ولي العهد فكرش هاد البنت وسيد المك عارف ... الى بغيتي يغضب عليك ويطفي نارو فيك قتليها .. قتلي ليه ولدو اللي كيتسنى وموصيني عليه وخلى جاريتو امانة فرقبتي حتى يرجع
عروس الملك السابعة الجزء 45
محتوى القصة
التنقل بين الأجزاء