عروس الملك السابعة الجزء 46

تخلو لفام وتحلو لعينين وكلشي تصمر وكلشي تصدم وحتى واحد مقدر يرمش ملي سمعو كلام لاللة ياقوت ، وحتى روح الندى بحالهم وكتر كاع منهم . هزات روح الندى راسها مخرجة عينيها وحاللة فمها .. شوية وهي تجر تبسمة على فمها وناضت وقفات بالزربة حاطة يديها على كرشها كتفتف بحال الحمقة ماعارفة ضحك ولا تبكي 

- حاملة ؟!!! بصح؟! انا حاملة !!! (دارت كتشوف فالحريم وضحك فرحانة) انا حاملة !! هههه حاملة حاملة هههه (شافت فلاللة ياقوت ) دابا انا هازة فكرشي ولي لعهد !!!! ولي لعهد ولد الملك ههه!!! انا من دون هاد لبنات اللي غنولد ليه ولي لعهد ههههه هوا عارف ياك عااارف ههه غيكون فرحاان ... اااااااااي هههه غنتسطى بالفرحة 

هي بوحدها اللي كدور وتنقز من لفرحة اما تا باقي كلشي مخرج عينيه كاينة حتى اللي مشات وجات فبلاصتها تسخف من الصدمة وشادة فاللي حداها .. نساو راسهم وهزوه كاع كيشوفو بحال الى مواقفينش مع اميرات ، هزات لاللة زينب صدرها نفخاتو وفشاتو كتسوط من مناخرها مزيرة على سنانها بالفقصة وقالت

- امتى حملات ؟ وعلاش ماعلمتوش بيها عروسة ؟

جاوباتها لاللة ياقوت مبردة هازة راسها كتشوف وترمش بشوية وقالت 

- سيد الملك مابغا حد يعرف . . . شكون يقدر يحاسبو يبان . 

لاللة زينب : وكيفاش كانت كدخل عندو ؟

ماجاوباتهاش لاللة ياقوت ودارت فيها شوفة فشكل ديال تعدات الحدود وكتسول على شي حوايج بعاد عليها واللي غيجبدو ليها الصدع مع الملك . تلفتات لاللة ياقوت عند روح الندى وقالت

- طلعي لجناحك ومن تما ما تخرجي ولا درجي .. انا اللي مسؤولة عليك هنا وغتبقيا فجناحك حتى يجي سيدك يحسم فأمرك ... يالاه تحركي 

قالت روح الندى كضحك فرحانة : هي اللولة يا لاللة هههه 

مشات كتجري وعينيعا كيبريو بالفرحة خلات كلشي مقلوب موراها .. دخلات لجناحها وسدات عليها ومشات وقفات حدا مرايتها كدور براسها 

- حاملة هههه ياااه حليلي ههه وانا كان يحسابني واكلة توكال ! (دارت صبعها على خدها) ايييه بلحق خاصني نرد بالي لا يوكلو لي شي عجب نيييت ... حد مكيحملني فهاد القصر وعاااااد دابا مللي حملت ليهم من الملك وهزهم الريح وساط فيهم كاملين ... غااادي يقلبو ليا على شي موصيبة يطيحوني فيها ...خاصني نحضي راسي من ليوم ونرد لبال لجنابي مزياان ... مكاين غير لغدارة فهاد القصر من كبيرهم لصغيرهم وماااافيهم تقة.

وهي كتهضر ودور راسها وتخمم بوحدها قدام لمراية دخلات عليها لاللة ياقوت قفزاتها من بلاصتها . تهزات روح الندى ودارت عندها مخلوعة قالت كتغبن 

- ايوا هانتي يا لاللة ياقوت دخلتي عليا بحال هاكا كن دابا طاح ليا وتبقاي بلا حفيد لا انا لا نتي ... ماتبقايش تخلعيني ودخلي عليا يا لاللة ياقوت بحال هاكا راني كنتخلع

هزات لاللة ياقوت حاجبها وقالت معجبة

- سعدي فرحي ! كتخلعي! كتخلعي غير فاش كديري شي زبلة وتحصلي .... سمعي مزياان ... هاد البيت متخرجيش منو وماتفوتيش هاد الباب ... وزيدك الى بقيتي طيري غيطير داكشي اللي فكرشك ويرجع ليك ديك الساعة يشنقك 

روح الندى : غير تهناي من هاد الناحية حتى حد ميدور جيهتي ولا يقرب ليا 

لاللة ياقوت : تبتي ورزني ولا غتجيبيها فراسك كاتجيبيها فحد خر من غيرك ... هانا علمتك .. حدي من طول لسانك حسن ليك 

حركات روح الندى راسها وهبطات راسها كتشوف فيها من تحت لتحت وقالت

- فوقاش ترجعي ليا علاية سيدي وخلاخلي والتاج ديالي؟

نفخات لاللة ياقوت وقالت : حتى يجي اللي حملك ويرجع ليك داكشي بيديه ... دابا تبتي وسدي عليك راه الى مشاا داكشي اللي فكرشك غتمشي معاه حتى نتي كتسمعي... ماتنسايش راه كاسك فاض وغرقتيها زبايل ومكالي عليك غير داك الطرف من الملك اللي هازة 

سكتات روح الندى وتكمشات .. جلسات مهبطة راسها وقالت 

- و ..و و الى بغيت شي حاجة ناكلها لمن نقولها؟ كيجيني الجوع بالليل بزااف وكن..كن. كنتشها المشوي ... و مشهية لعلق لعسل 

ربعات لاللة ياقوت يديها كتنفخ وقالت 

- ايوا شكون فالحريم اللي كتيقي فيهم يجيو وصيفات يتسخرو عليك ... على الله تبتي حتى يشد داك الروح بلاصتو 

هزات روح الندى راسها مبسمة وقالت : لغيت طامو وعبدية ... اللي فلكشينة... هما اللي كنتيق فيهم وكيبغيوني من قلبهم وكيهافو عليا ... وهما اللي كيحضيوني وينبهوني 

لاللة ياقوت : جلسي هنا ومتخرجيش ... واللي عطاك شي ماكلة ماتاكليها حتى دوقيهم منها ... وعنداك تحلي فمك وتبعي كرشك حتى تخرج عليك

خرجات لاللة ياقوت خلات روح الندى فرحانة بكريشتها كدور عليها يدها ومتكية ففراشها على الجنب مسرحة رجليها ، حضرات عبدية وطامو في الحين عندها للبيت عارفين اش واقع .. غير دخلو وتسد الباب عليهم وهما يجريو عندها دارو بيها فرحانين وهي مكسلة وسط منهم كتعوج 

- طامو واش بصح داكشي اللي سمعنا؟ حاملة من الملك 

عبدية : ومالها ماتحمل راه كانت كنبات معاه وضل عندو تا للصباح . . . كنت ندخل الصباح نجمع الدنيا كنلقاها مكسلة فالفراش نصها الفوقاني عريان ، تبسمات روح الندى وقالت

- اااايييييه ... حاملة ... وكنتوحم .. و ولي لعهد باغي لعسل ... عزيز عليه الحلاوة بحال باه ههه

ضحكات طامو وعبدية وقالو 

عبدية : هههه الله يمسخك خهه 

طامو : ايوا راه ولي العهد بسيف مايبغي لعسل ... هااااهيا جبناها معانا وحرة غرة لعقي تا ينوضو فيك لحنوشة ... وصاونا نجيبوها ليك مقطرة ديال الشيح والزعتر ... وقالت لاللة ياقوت مايدخل عندك حد وماتفوتيش هاد الباب والماكلة اللي دخل عندك نكونو مطيبينها بيدينا وناكلو منها حنا لوالة .. .شدي هل لعسل لعقي حتى دودي ... راه خبار حملك قلبات لقصر سفاه على علاه .. ناضت الروينة فجناح لحريم وكلشي طالع ليه الدم وخاص فيمن يبرد الغدايد وحتى من لوصيفات كاملات .. اللي دزت من حداها كنلقاها كافرة وكتنفخ بوحدها ... اما الاميرات غبرو غبرة وحدة متلاوش بانت فيهم حتى وحدة هههه

عطاتها الكلة دلعسل فيديها وبدات تعلق فيها بصبعها متكية وتفشش عليهم .. مرة يمسدو ليها رجليها مرة ضهرها ويديها وهي متكية فرحانة وعاجبها الحال مابقات كتحرك كاع .. بغات غير دور على جنبها لاخر وهي تغوت مادة يديها 

- شدوني شدوني ندور ... عنداك توقع ليا شي حاجة ... ااه .. ياربي .. ااه ياميمتي 

بداو يضحكو عليها وشادينها باش دور تنعس 

طامو : هاي هاي على الفشاحة يالاللة وشحال جات معاك ... هادشي غير مزال الوحم باديك ومزال ماكبرات كرشك 

عبدية : فاش تكبر لكرش يعلم الله اش دير ... خاصها العبيد يهزوها ويقلبوها ديك الساعة 

قالت تحت المخدة ناعسة ورجليها عريانين 

- راه ولي لعهد هادا .. خاصني ماندور حتى نخمم ليها مزيااان ... بغيتوني ندور بالجهد نخلعو مسكين 

عبدية : وشكون قالك غتولدي لولد ... والى ولدتي لبنت 

هزات راسها عابسة وقالت : انا حاملة بالولد وغتشوفو الى مولدتو ... انا حاسة براسي حاملة بالولد بحال باه وغيكون امير وزوين كيحمق بحال باه وبحالي انا 

طامو : يا سعدي فرحي بيك ... نعسي نعسي ... وحسن كاع مانوضي من بلاصتك حتى يقبط موطعو مزيان .

نعسات روح الندى وبدات تشخر ونعسات طامو وعبدية بجنابها كل وحدة من جهة .. رادين ليها البال الصراحة و غير كتنهد بالليل كينوضو عندها يشوفو مالها . ناضت عبدية فاش سمعات تحنحينها وقالت هازة الشمعة فيديها 

- شنو بغيتي واش شي حاجة ؟

هزات راسها روح الندى معرننة وكترمش بزز وقالت

- شعلو ليا الشمع ماتبقاوش ضلمو ليا لبيت ... فيا الجوع ... تشهيت بغرير معسل ... انمم ااه ياربي 

رجعات تكات على ضهرها وعبدية واقفة كتنخز فطامو تنوض وتقول

- ياااا تي نوووضي نبغررو ليها بغرير فهاد الليل .... اش هاد الوحم المحرحر اللي عندك ... بغرير فنصاص الليل ومعسل !

ناضت طامو بالزيف مكمش عوج فوق راسها وعينيها كيتلسقو وتنوض بزز 

طامو : بغرير ! ... مزبد ؟

عبدية : وا معسسسسسل نوضي وعنداك طيبي ليها شي فضيحة ... حللي عينيك انا غنبقا معاها هنا .... راه ولد الملك فكرشها عنداك تنساي 

ناضت طامو مضهشرة هبطات كتحك فراسها وبقات عبدية مع روح الندى جالسة شاعلة الشمع وكتحك ليها فشعرها . طاب بغرير وطلعاتو ليها طامو نعسل ومتختخ بالعسل ، حطو ليها الطبسيل قدامها ففراشها وجلسو كيتسناوها تاكل وهي كدور فراسها وتشوف فيهم وتبوحط 

- ايوا وكلووني ... عييت 

طامو : اااايما مايسالي هاد الوحم حتى تسالي معانا .... جيبي وحمك على الملك جات معاك ومعاه بعدا 

روح الندى : بصوت تقيل ) ياك فكيتكم من تمارة ولكشينة ... ولبستو لباس زوين ورجعتو وصيفات .... ماتخدمو ماتردمو ... ماتهزو ماتحطو قابلوني غير يانا 

طلات عليها طامو اللي جالسة حداها وقالت

- ياكما فيك البولة نوض نبول فبلاصتك 

-روح الندى: ياااك ياااك ... واخا ... بلاش كاع 

بغات تقلب وهما يشدوها كيدوزو يدهم على راسها وشعرها ويوكلوها بشوية عليها وهي كتعوج وتفشش وتنعس شوية وتاكل شوية حتى شد فيها النعاس. 

فيقها صوت البواق من كل جهة فالقصر كامل والنفار فالصوار حاميين السوق بلحن لحرب المعروف كيعلن انتصار الملك على العدو ديالو .. حلات روح الندى عينيها بزز وقالت دايخة 

- شنو هادشي؟ 

رجعات عبدية عندها فرحانة من السرجم وقالت : سعدي وفرحي راه الملك حي وربح الحرب ... جا المرسول جايب الخبار ديال النصر ديالهم .. وراهم راجعين مابقا ليهم غير واحد السيمانة ويوصلو ولا قل كاع حيت المرسول قلع من تما نهار الاول اللي ربحو الحرب وخلاهم موراه جايين بشوية عليهم هازسن رحالهم .

يتبع