الفرحة مالية القصر .. لعبيد ولخدم كيتجاراو فكل مكان .. باب القصر الكبير مزداحم بالناس واقفين بولادهم مصافين على ليمن وعلى ليسر كيغوتو ويزغرتو فرحانين .. باب لقصر لكبير محلول واقفين فيه عبيد وحراس كياسناو الفرسان الشجعان يرجعو ويفرحو بالملك اللي ربح الحرب ويهتفو بسميتو .
وفيت روح الندى جالسة لوسط بين طامو وعبدية لابسة قفطان ابيض وطالقة سوالفها .. كل مرة تنوض طل من الشرجم هازة جلايلها تشالي بشعرها فرحانة .. مقادى ومحلقة ومعلقة كتستى فوصول سيد الملك وامتى تشوفو .
روح الندى : كيبان لي كلشي غادي جاي كيتجاراو نكيبان ليا كاع باب القصر
طامو : علاه باب لقصر غيبان ليك من هنا! فييييينك وفين باب لقصر راه الى بغيتي توصلي ليه خاصك كرويلة تديك حتى لتما .
روح الندى : ولااا كنهضر على باب لقر ديالنا هادا ... واش نطلع لفوق سطح نطل؟
عبدية : ويييلي على السطح هبلتي!! السطح دايرين بيه الحراس وطلعي نتي طلي منو ... تبتي ورزني ... دابا يجي ويجي يطل عليك برجليه ولا يعيط ليك ... راه العبيد ولحراس مصافين من باب لقصر لكبير حتى للباب دخلاني ديالنا وممنوع شي حد يدوز ... الطريق خاوينها قدامهم ولباب حتى هوا .. اللي بغا يدوز ولا يدخل ويخرج كيمشي للبيبان لخرين
طوووووووطزووووططططططففوو
طامو : وصلو ...وصلو سمعي ... راه وصلو
وقفات روح الندى كتجري من هنا لهنا تالفة وتمشي وتجي فبلاصتها حتى جلساتها طامو وقالت
- تبتي للارض ... جلسي بلاصتك ... صافي غير حا نوضي نتي تلاحي عليه من السرجم
تحل عليهم الباب ودخلات لاللة ياقوت موراها وصيفتها فيديها صندوق صغير .. وقفو ليها حانيين الراس .. شافت فروح الندى وقالت
- ها حوايجك ... تاجك ودهبك كلشي هنا .. وماتخرجيش من هاد البيت . (تلفتات عند الوصيفة) عطيها الصندوق
هزات روح الندى راسها كتبوحط وقالت
- ومنشوفش انا شيد الملك ! توحشتو
خرجات عبدية وطامو عينيهم وعضو على شفايفهم وحمار وجههم لا همها لا لوصيفة ...اما لاللة ياقوت طاح ليها لعجب ... ايوا هادي نيت اللي بقات كملات وجملات ورجعات تقولها لثها بوجها حمر ماحشمات ماراعات بحال الى كتهضر مع وحدة من صحاباتها .
افافات لاللة ياقوت مطلعة حاجبها وقالت
- ماعندك فين تمشي الى بغاك غيعيط ليك
مشات كتعوج فعينيها وخلاتها واقفة . شدات روح الندى صندوقها حلاتو فرحانة بيه كتجبد فذهبها وتاجها شوية هزات راسها عند طامو وعبدية لقاتهم كيشوفو فيها معبسين
روح الندى : مالكم كتشوفو فيا هاكا!
طامو : هادا وجهك ولا قفاك !
روح الندى : مالي اش درت!
عبدية : وجهك صحيح ياختي كتقولي ليها توحشتو بطاي طاي ! ماحشمتي مراعيتي ! راه لااااللة ياقوت هاديك ماشي وحدة من لوصيفات
روح الندى : ايوا نكدب! راه بصح توحشتو وبغيت نشوفو .. يشوفوه غير هما !
عبدية : باااااز وبزييييز ليك يا لاللة مابقيتي تحشمي مابقيتي تراعي... تخدو لاللة ياقوت معاك مابقات تعرف باش تجاوبك
روح الندى : شدي شدي لبسيني هادشي راني حاملة بولي العهد واااااالد سييييد الملك الاللة واش عرفتي قيمة هاد الكلمة هادي ولالا ! راه ولي لعهد الحبيبة اللي غيكون امييير وكلشي يحدر ليه الراس فكرشي اااانا .. انااا اللي مو ... والبسيني دغيا وشي وحدة تمشي تشوف شنو واقع لتحت
طامو نمشي انا ... نمشي نشوف ونجي بالزربة
خرجات طامو كتجري وجلسات روح الندى مع عبدية كتلبسها النبالات فرجليها والتاج على راسها وتقاد ليها فحوايجها وروح الندى كتنفخ ليها فراسها بالهضرة
عروس الملك السابعة الجزء 47
محتوى القصة
التنقل بين الأجزاء