عروس الملك السابعة الجزء 48

تلفت الملك بدم بارد وقال رافع راسو

- وجدو راسكم ... دابا شوية غتعرفو الخاين سيف الدين فين خليناه 

تلفت مشا خلاهم كيشوفو بعضهم ... بقا قدامهم غير الامير قاسم حادر الراس هوا اللي شافت فيه لاللة زينب وقالت

- فين الامير سيف الدين ؟ علاش قالها الخاين

الامير قاسم : الامير سيف الدين مات ... دابا شوية تعرفو علاش . 

حدر راسو مشا خلاهم واقفين مصمرين شادين فامهم شهقو كاملين شهقة وحدة .

داز كلشي قدام طامو الواقفة بعيد كتشوف وتسمع ولقطات الكلام ومشات بيه كطير لجناح روح الندى .

هزات لاللة ياقوت جلايلها ومشات بالزربة لحقات على سيد الملك لبيتو ودخلات لقاتو جالس على كرسي خضر ديال الموبرة وموراه عبد من عبيدو كيحيد عليه الحوايج بشوية ويعلقهم ، وقفات قدامو لاللة ياقوت وقالت 

- بغيت نسولك ... علاش قلتي على الامير سيف الدين خاين ؟

هز راسو وقال : دابا تعرفي من دابا شوية علاش قلت عليه خاين 

قربات عندو مبسمة وهوا ط كيحرك عنقدو تعبان حاط يدو على رقبتو كيرمش بشوية وقالت

- فراسك روح الندى حاملة ؟ 

هز راسو فيها وصغر عينيه قال 

- لا مافراسيش ! حاملة؟

تبسمات لاللة ياقوت وقالت : ايييه حاملة ... شهرها الثالت هادا ... موراك بشهر عرفناها حاملة ... مبروك عليك .. وعلينا كاملين .. امير صغير جاي فالطريق وغينور حياتنا ويعمر قصرنا بغواتو ... وكما عارف اولدي راه البنت صغيرة ... مزالة صغيرة بزااف ومكتعرفش الصح من الغلط وغير مدرمة جيب يا فم وقول ومزالة ما كتعرف والو .. زادها الوحم هبال على هبال وبدات تخرج لعقل ... الوحم صعيب ومااشي ساهل ... وراني حبستها فجناحها منو ماخرجات هادي شهراين وبااغا تخرج .. ولاكن خايفة دير شي زبلة راه الوحم مايشاور وغيير صبر شوية .. صبر راه البنت صغيرة وكتوحم الى غلطات سمح ليها 

سها فالجنب مبسم ورجع شاف فيها وقال

- ههه هادا خبار زوين سمعتو ... سيفطي ليا روح الندى نشوفها 

تبسمات وقالت : رتاح شي شويوش راك تعبان وباينة فعينيك مشابع نعاس ... حتى ترتاح ونسيفطها ليك 

وقف كيحرك كتافو مع عنقو وقال : 

- شوية وسيفطيها ليها ... غندخل ندوش ...حاس براسي عيان وهاد الحرب عياتني بزااف جسديا وفكريا 

لاللة ياقوت : علاش ماديرش لحجامة غتريحك كتر ... شحال هادي مادرتيها 

تبسم وقال : من بعد ... وجدي ليا روح الندى نشوفها هي اللولة

حركات راسها وهي وقفة متبعة ليه لعين داخل للحمام وموراه العبد اللي كيعاونو فحوايجو وحمامو ديما ويعطر ليه الجو ويختار ليه لفراش . 

تكسل على كرشو عريان فوق رخامة سخونة ساتر العورة ديالو بوحدها ولعبد الاسمر الطويل لعريض جسمو صحيح كيخوي عليه الماء ويكسلو ويدلك ليه عضامو ويطرطق ليه مفاصلو . غسل ليه بحال ديما ودار عليه توب من لفوطة كحل فيه طرزة فالضهر لبسو ليه من للور وخرج كيسمح شعرو ، جلس على سرير طويل رطب فالاحمر وتكا على ضهرو ساهي فالسقف كيرتاح من عيا السفر والحرب واللي داز منو كامل والعبد كيدور بيه من هنا ومن هنا ويطلق فلعود ويقاد ليه جناحو ويوجد ليه جو يرتاح فيه .

دخلات طامو سخونة كتغلي على روح الندى اللي وقافة واجدة كتسناها دخل وقالت كتشالي بيديها 

- جااا تعرضات ليه فاميلتو فلباب .. سولوه على الامير قاسم قال ليهم مات لخاين ... مانعرف شنو قصد بيها!

روح الندى : سيفطناك تجيبي خبار مسكدة ولا ملاوطة ؟ 

طامو : هادشي اللي سمعو ودنيا ... ماقدرتش نزيد نقدرب ليهم كتر حيت فين ما نزيد خلفة كيردوني لعبيد للور ... قال ليهم دابا شوية غادي تعرفو اللي كاين 

روح الندى : لالالالا انا ماااانقدرش نبقا مخشية هنا ماجااايبة للدنيا خبار! خاصني نخرج نشوف شنو واقع 

عبدية : مغااتمنشي فيين .. لاللة ياقوت قالت ليك....

تحل عليهم الباب بالجهد قبل ماتكمل لاللة ياقوت كلامها وقالت 

- وجدي راسك ... سيدك بغاك من دابا شوية فجناحو ... وسدي فمك ماتجبديش ليه حس اللي وقع ولا تشكي ليه راه غتجبدي النحل على راسك 

حركات روح الندى راسها فرحانة وقالت

- مانقول والو ..نمشي عندو دابا؟

لاللة ياقوت : وجدي راسك هوا الاول 

روح الندى : واجدة 

طلعات فيها لاللة ياقوت وهبطات مزيان شافتها اش لابسة لقاتها محلقة ومعلقة ومعطرة كتشعل وضوي بالفرحة عاد قالت

- سيري ... وديري بكلامي هانا وصيتك 

تبسمات روح الندى فرحانة وخرجات حانية راسها معاها طامو وعبدية تابعينها وهي غادية كتجري فرحانة وتشالي بشعرها موراها سخفاتهم بالجرى حتى لباب الجناح ووقفات قدام العبد .. غير شافها حل ليها الباب دخلات وسدو فوجه طامو اللي بغات تبعها حتى جراتها عبدبة وقالت

- فين زادية فين؟ فين باغا دخلي ؟

طامو : علاه حنا مكندخلوش؟ !!

عبدية : الااا تبتي ماعندتا منديرو بينا وماعندو بينا غرض ... هي اللي عندو بيها لغرض راه بغاها ودخلا عندو 

خلات روح الندى معلقة عينيها بالفرحة لقاتو واقف يالاه لبس سروال وشاد الفوقانية ديالو فيديه .. سمع الباب تحل وتلفت دار لقاها موراه واقفة كنشوف فيه بحال الاميرة .. بحال شي وريدة مفتحة كتسناه يسقيها . فلحين حدر العبد راسو وحط السلهام من يدو اللي كانوي يلبسو ليه وخرج مشا ، تبسم ليها فوجهها وهي تمشي عندة كتجري تلاحت فحضانو معنقاه وتخشر راسها فعنقو وصدرو وتعنق فيه من هنا ومن هنا وهوا كيضحك ويبوس فيها فين ما جات البوسة 

- روح الندى : توحشتك توشحك توحشك ... بزااف بزاااااااف 

عنقاتو بالجهد وعنقها كمشها عندو وقال 

- توحشتك حتى انا ... توحشت النحيلة ديالي .. تهليتي ليا فولدي ههه؟

بدات ضحك معنقاه كتمسح فيه وجهها فرحانة ماخلاتوش كاع يشوف وجهها

بعدها عليه بيديه بغا يشوف فيها وهوا يلقاها كتبكي بالدموع .. شد وجهها بين يديه وقال 

- علاش كتبكي؟؟؟

دوزات يدها على خدها ورجعات عنقاتو كتخبى وقالت

- توحشتك 

عنقها بالجهد وقال : نتي فرحانة كتبكي غضبانة كتبكي كلشي عندك مالح ههه

بدات كضحك معنقاه وقالت : عمرك تخليني ياك ... ياك عمرك تسمح فيا ولا تنكرني 

باس خدها وقال : شكون يقدر يقطع يدو .. ولا رجلو ... ولا يجبدو قلبو من بلاصتو .... نتي طرف مني .. كتفهمي معنى طرف مني منقدرش نقطعك ولا نسمح فيك والى ضراتك شي حاجة غضرني حتى انا . 

باس شفايفها بالجهد ساد عينيه كيتلدد ويجر وهي مرخية تابعاه بفمها ، تبسم وقال بين شفايفها 

- مهلية لي فولدي ؟

ضحكات وحركات راسها ، تبسم وقال

- مهلية فيه ولا خفتي نعاقبك على اهمالك 

ضحكات بعوينات معسلين وشفاها على شافهو وقالت

- مهلية فيه والله ... بزااف 

طلق من وجهها وقال : بلاتي نشوف 

هزها بين يديه حطها فوق فراشو على ضهرها وطلع ليها القفطان مع رجليها وهوا طالع كيبوس حتى لكرشها وعضها .. بدات كضحك وقالت 

- مهلية فين كتر من راسي 

هز وجهو طالع عندها فرحان كيضحك عتى لعنقها وهي تهرب وجهها كتهر وتموت بالضحك بحال الدراري الصغار وكتقلب وتشقلب ليه حتى جات عينها على صدرو وهي تخرج عينيها وحطات يدها عليه وقالت 

- هيييه!!! شكون ضربك لهنا ؟ شكون دار ليك هاد الضربة خلاها فيك شرطة 

باسها فعنقها وقال : قتلتو 

قالت كدوز يدها على الجرح اللي تلم

- ااححح كضرك ؟

حل عينيه فيها بزز وقال : اااح توحححشتك ... 

عضها فعنقها وبدا يحيد ليها حوايجها ملهوف وخلا قوم على قدو واقفين مصافين برا شادين الحراس الخونة قدامهم اهل القصر كيدوزو ويشوفو مافاهمين والو 

يتبع