حب وسط الدماء الجزء 11

من تأليف أسومة
2018

محتوى القصة


رواية حب وسط الدماء

أسد: أنا مافهمت والو..تيرات فعروسة؟ عرفتها بغات تيري فيك .. لكن عروسة! المهم هادشي ماهمنيش ديك الساعة اللي همني هو نوصل عندك بأقصى سرعة... بعدما وصلنا لعين المكان لقينا الدنيا مقلوبة الناس كاتغوت والجوقة..نزلت كانجري من الطوموبيل فاتجاه الناس حتى كاتبانيلي طايحة جثة هامدة وكسوتك البيضة ولات كلها حمرة ولالة نجمة حاطة راسك على ركابيها وكاتغوت لربي اللي خلقها.. وحداها مولاي السلطان مصدوم..مشيت دخلت وسطهم هزيتك وبديت نجري بيك جهة الطوموبيل..تبعوني توفيق ونجمة مافاهمين والو ...تدخل حسام وقال ليهم أننا من عائلتك...هزيناك نيشان للمصحة وتبعونا لوخرين بطوموبيلتهم..بقيت كانتحسس دقات قلبك واكتاشفت أنك مزال حية لكن كنتي كاتنزفي بزاف ، وصلناك بسرعة ودخلوك نيشان لغرفة العمليات بعدما عرفو أنك متصاوبة بالرصاص.. دخلوك ساعات ..بقيت تما أنا وحسام ولالة نجمة وولدها وتوفيق..حتى خرج الطبيب وخبرنا أن الكلوة ديالك تضررات بزاف ومابقاتش صالحة وأنهم ماعندهم حتى متبرع..
أنا: ولكن خالتي نجمة قالتلي بللي شي واحد تبرع ليا!
أسد: اه، هي اللي تبرعات بالكلوة ديالها ليك
أنا: كيفاااااااش؟!!!😨😨😨
أسد: كيفما سمعتي...كانت خاصاك العملية فأقرب وقت.. وباش نقلبو على متبرع كان غاياخد وقت.. فالأول تطوعت أنا لكن فصيلة دمي مختلفة على ديالك... الشي للي خلا لالة نجمة تطوع ولحسن الحظ كانت فصيلة دمكم متطابقة ودارت العملية.. فالأول حاولت نمنعها ونوضت الحيحة باش يشوفو كيديرو لكن مكان حتى شي بديل آخر..
أنا: اهئ اهئ اهئ (طحت فالأرض) نتي راك مي اللي ماولداتنيش اهئ اهئ عطيتيني طرف منك باش مانموتش.. بغيت غانعرف باش غانجازيك على هاد الخير اللي كاديري فيا...نتي ملاك ماشي إنسان..اهئ اهئ
أسد: (جلس حدايا فالأرض وربع رجليه) كاين شي ناس اللي تلقا فيهم الخير كثر من عائلتك...فعلا مرا طيبة.. كانت وخا مريضة ودايرة العملية كاتبقى واقفة حدا راسك بلاما تمل.. باين عليها كاتبغيك بزاف
أنا: (كانتنخصص) حتى أنا كانبغيها...مي اللي ولداتني لاحتني بلاما تسول فيا ولا تهتم بيا اللي من لحمها ودمها.. لقيت الخير فهاد الإنسانة اللي غانواعد نفسي من اليوم أنني نهزها بسناني وعمري نفرط فيها ولا نتفرق معاها... حسيت بمعنى العائلة ودفئها فحضنها..مستحيل نتفرق عليها مستحيل😢
أسد: الله يخليكم لبعضياتكم
أنا: آمين.. كمل؟
أسد: اش غانكمل
أنا: 😒 داكشي اللي كنتي كاتعاود.. وكيفاش حتى توفيق....
أسد: أياياااي.... من بعد العملية ديالك اللي نجحات دخلتي فغيبوبة..النهار الثالت كنت خارج من المصحة باش نجيب ماما وختي عندك وأنا نسمع توفيق وماماه كايهضرو.. كانت كاتعاتبو على ختيارو ليك وأنك ماعندك لا أصل لا مفصل والقضية فيها القرطاس وبللي ولات سيرتهم على كل لسان.. وراجلك 😒 مدافع عليك بحتى كلمة بل أيد مو فهضرتها .. أنا من بعد هادشي اللي سمعت ماعجبنيش الحال وماحملتوش عليها خديت قرار نطلقكم
أنا: (جمعت الوقفة) كيفاش خديتي قرار طلقنا؟ علاش شنو كايسحاب ليك راسك؟ هوما شافو داكشي تصدمو واش يسحاب ليك بحالك موالفين بالمنضمات والمافيات..!
أسد: (الصمت)
أنا: علاش ديما كاتدخل فحياتي هاكا واش حتى راجلي تبعتيني فيه.. اش قلتي ليه حتى طلقني هاه؟
أسد: (جالس فنفس الوضعية بملامح هادئة) قلتلو أنك خطيبتي وهربتي ليا وبللي حنا عائلتك وبللي كاينة شي مافيا باغا تقتلك نتي واعائلتك عليها من الأحسن يطلقك😊 السيد خاف على راسو وعلى ولدو وفالغد جاب وراق الطلاق ماعطلكش
أنا: (بقيت حالة فيه فمي) من نيتك؟ واش محرشك عليا شي واحد؟ علاش ديما خارج عليا هاكا واش درت ليك شي حاجة غير قول؟
أسد: درتي بزااااف..
بديت نبكي ونترطا غا بوحدي وهو يجرني من يدي حتى طحت عليه جيت جالسة على رجليه بقيت كانشوف فيه ويشوف فيا حتى تلاحينا فأحضان بعضياتنا ..عنقتو بالجهد وكانبكي بالصوت وهو مبادلني نفس العناق وكايدوز يدو على شعري بقيت هاكاك حتى ماعقلتش ايمتا نعست..

كرزة: ويلي ويلي خخخخخخ 😂😂😂😂
سمعت صوت شي واحد كايوشوش ويضحك حليت عيني لقيت الشمس ضاربة فيا... هزيت عيني كانلقا راسي ناعسة على صدر أسد اللي مزال ناعس... كان جالس ومتكي ضهرو على واحد الطابلة حدا لابيسين وأنا متكية حداه وحاطة عليه راسي.. أوااااه بتنا الليلة كاملة فالجردة 😨 هزيت راسي نشوف منين جاي داك الصوت لقياها كرزة لابيسة دوبياس وبحالا ناوية تعوم..مقابلة معانا وخاشية صبعها ففمها كاتعضو وتفرنس..
أنا: امالك كاتحنززي😞
أسد بدا يحك فعينيه فيقتو بصوتي.. ناض جلس وبدا يرجع فشعرو اللور وشاف فيا.. بتاسم وناض بلا حتى كلمة
كرزة: (جات تاتجري عندي) اوووووف وااااااااو يااااااااي
أنا: (متبعة أسد بعيني ) امالك الخرى
كرزة: كون تشوفي على ديكور كنتو فيه يضرك خاطرك ا الصاطة
أنا: وا هضوووور تعلمتي أ الصاحيبة
كرزة: شوفي فيا... علاش بتو هنا الليلة كاملة ومعانقين واش...
أنا: مكاين حتى حاجة من داكشي اللي فبالك! غير صدفة وصافي.. راه ماعقلتش على راسي امتا نعست
كرزة: مممممممممممممممم ماعقلتيش امتا نعستيييييي
أنا: (نضت وقفت) واسيري تخراي مقالوهاش ليك هادي
كرزة: طليه أ وجه لخرى... شوفي ضربي شي دوبياس واجي نعومو لميمة
أنا: لا ا ختي مكانعرفش باغا تقتليني نتيا
كرزة: يخ صافي سيري سيري
دخلت للفيلا كان الهدوء حيت باقي الصباح بكري... طلعت لبيتي نيشان للحمام غسلت وجهي اللي كان صابح منور وخا كاع الحزن اللي عشت لبارح..عاودت جمعت شعري ومشيت حطيت راسي على لمخدة وبقيت كانفكر فأسد😒 وا مسخوط هذا فينما يكون عندي شي عرس يخسرو ليا ههههههههه ولكن يقدر يكون كاع هادشي اللي كايدير غا على مصلحتي ولكن علاااااش بغيت غير نعرف علاش كايدير معايا هاكا!!! وأنا مكاتربطني بيه حتى علاقة..بقيت متكية وساهية وأنا نتفكر خالتي نجمة .. خصني ضروووري نهضر معاها نضت خرجت من بيتي بلا مانبدل الكيطمة دالبارح هبطت لتحت وسولت الخدامة على فين بيتها.. نعتوه ليا وطلعت كانجري فالدروج..وصلت قدام لباب عينيا كانو غايدمعو لكن حبستها ودخلت.. لقيتها ناعسة بهدوء وملامح الحنان والطيبة طاغية على وجهها الزوين .. قربت وجلست على طرف الناموسية ..بقيت كانشوف فيها دقائق وحطيت قبلة مطولة على جبهتها حتى بداو دموعي يطيحو ...لامسو وجهها الشي اللي خلاها تفيق مخلوعة من منظري..
نجمة: أسماء بنتي مالكي؟ لاش جيتي عندي ومالكي كاتبكي واش كاضرك شي حاجة هاه؟
بدون سابق إنذار عنقتها وبقيت كانبكي ونتنخصص وهي معنقاني وتسول مالي حتى بردت شوية عاد جاوبتها
أنا: عمري شفت بحالك... الطيبة ديالك مابقاتش عند الناس فهاد الوقت ... عمري غانسا التضحية ديالك عمري غانسا المعاملة ديالك عمري غانسا الخير ديالك.. ماعرفت كيفاش ندير نشكرك.. الكلام مايقدرش يعبر على امتناني ليك أقسم بالله
نجمة: اشمن تضحية علاياش كاتهضري راه مكاين والو
أنا: بلاما تحاولي تخبي عليا راني عرفت كلشي وعرفت أنك عطيتيني الكلوة ديالك وبقيتي عايشة غير بوحدة باش مانموتش اهئ اهئ اهئ
نجمة: ايوا الله يهديه هاد سي أسد عييت نطلبو مايقولكش لكن مدارش بكلامي.... أسماء راه كانقولك نتي راك بنتي وكون كانت بنتي أ.... كون كانت عندي بنت كنت غاندير معاها نفس اللي درت معاك... محبتي ليك كبييييرة و سبحان من زرع معزتك فقلبي.. ماتخافيش راه الطبيب قالي صحتي مزيانة ومافيها باس نعطيك كلوتي وشوفي سبحان الله حتى دمنا صدق بحال بحال.. وعاد نتي مزال صغيرة ومحتاجاها كثر مني أنا كبرت وغانمرض غانمرض
أنا: (حطيت راسي على ركبته) الله ينجيك ويحفظك ليا .. ندير المستحيل باش تبقاي ديما بخير ومرتاحة
نجمة: آمين... صافي ياك برينا بزوج.. ايوا خلينا من الحزن ولخناين وعاودي ليا شكون أسد !!!

أنا: مانعرف ليه.. مكانعرفوش😒
نجمة: 😒😒 هاويلي على مكاتعرفيهش... السيد دار الشوووهة المشوهة نهار تضربتي بالرصاص قلب عليهم الصبيطار وكايطلبهم يحيدو كلوتو ويعطيوها ليك... يضل واقف حدا راسك ويهضر معاك كيشي حمق ونتي مجايبة للدنيا خبار وتقولي مكاتعرفيهش؟ هادشي غا مكاتعرفيهش كون كنتي كاتعرفيه اش كان غايدير؟ وهاااااادي زويينة
أنا: 😨😨😨😨😨 حلفي
نجمة: والله ابنتي بحالا شفتيه بعويناتك .. مكاينش اللي فقصني وسالا معايا قد داك توفيق ماعمري نويتو يكون هكاك السيد غير شاف القضية فيها الرصاص والبوليس جاب ليك براتك بالحق عبر عليه غا أسد خلعو باش طلقك أما راه السيد مفضي مامنوش..
أنا: 😨😨😨😨😨 حلفي
نجمة: تي اش غانحلف اش اش؟ اويلي على حلفي
أنا: حلفي حتى أسد دار داكشي على ودي😨
نجمة: والله ا أسماء ابنتي حتى بصح.. عليها قلت ليك منين كاتعرفيه.. واش هادي عائلة ولا كايجيوك؟ أنا راه دارو معايا نهار تفيقي نجيبك عندهم وداكشي اللي درت
أنا: لا ماشي عائلتي.. هاد الناس بحالك! من نهار عرفتهم وهوما كايديرو فيا الخير
سهام: (واقفة حدا لباب) أسماء راه بهاد الهضرة غاتقلقيني منك وبزاف
أنا: مدام سهام صباح الخير... حاشا واش نقلقك
سهام: ايوا عمرك تقولي درنا فيك خير نتي راك وليتي بحال وحدة من العائلة... وحيت قلبك زوين كايلاقيك الناس مع الناس الزوينة (شافت فنجمة بابتسامة)
أنا: ربي يخليكم ليا ومايحرمنيش منكم... فعلا وليت نحس بللي عندي عائلة
سهام: الشرف ليا تكوني من عائلتي.. المهم نوضو نوضو تهبطو تفطرو راه الفطور واجد
أنا ونجمة: وخا
مشات مدام سهام عاد تبعناها أنا وخالتي.. هبطنا لتحت لقينا كلشي مجموع على طابلة لفطور من غير أسد.. قلبت عليه بعينيا لكن مبانليش..
فوزية: ايوا يا ختي سهام قلبك كبييييييير فالأول استقبلتيها عندنا حتى ولينا نحسو بيها هي مولات الدار... شوية هربات.. شوية رجعات وعاد جايبة معاها الزايد..ايوا تبارك الله...
لينا: هادشي اللي بقا.. مابقيت فاهمة والو أنا فهاد الدار
أسد: (هابط من الدروج بلباس أنيق وريحتو طغات على المكان) أنا غانفهمك ا بنت عمي! أسماء ولالة نجمة غايسكنو معانا فهاد الدار وابتداء من ليوم
لينا: كيفاااااااش!!!! ولكن....
أسد: مزااال ماكملت هضرتي... غايبقاو معانا كأنهم أفراد من عائلتنا واللي تصرف معاهم ولا قاليهم شي كلمة ماشي حتال ليه حسابو غايكون معايا أنا
نجمة: سمحليا وليدي ولكن راه داري ومدينتي وولدي و...
أسد: لالة نجمة ماعندك ماتبقاي ديري فديك تمارة... راه هضرت مع ولدك وخبرتو أنني غانخدمو فالشركة... وراه كاينا دار فالجردة غانعطيها ليه يسكن فيها.. ونتي راك حرة مرة سيري عندو مرة اجي عند أسماء هنا..
سهام: الله ياوليدي على فرحة فرحتيني هاد الصباح ولاهيلة أحسن مادرتي نيت كنت باغا أسماء تبقا معايا
نجمة: الله يكثر خيرك ا ولدي لكن مغانقبلش حتى توافقو على الشرط ديالي
سهام: قولي
نجمة: مايمكنش نبقا جالسة لا شغل لا مشغلة.. مانكرهش تخليوني نتكلف فالطياب فالكوزينة ولا شي حاجة نديرها الى وافقتو طبعا.. باش نحس براسي ماشي غير عالة عليكم
أسد: حاشا ا لالة نجمة.. لكن مدام هذا هو شرطك باش تبقاي فأنا موافق.. لكن ماتعذبيش راسك.. غير كوني مشرفة على الخدم فالكوزينة
نجمة : واخا ا ولدي الله يحفظك ويسهل عليك
أسد: ونتي ا أسماء موافقة؟
أنا: (من الصباح وأنا غا ساكتة وكانشوف) فينما كانت خالتي نكون معاها
سهام: ايوا صاااافييييي مرحباااا بكم من اليوم الدار ولات داركم
نجمة: لالة سهام.. أنا غانسكن أنا وأسامة فالدار اللي قالينا سي أسد وأسماء هاهي تبقا معاكم
أسماء : لا ولكن...
نجمة: (خنزرات فيا) صافي ا بنتي سمعي الهضرة
أنا: وخا😊

بعدما كمل أسد هضرتو فطرنا مجموعين... شي ملامحو باين فيها الفرحة وشي ملامحو كاتعبر على غضبو حول قرار أسد..
أنا داك الطبسيل بقيت غاكانلعب فيه حيت أفكاري مشوشة..واش غانبقا ساكنة فهاد الدار؟ وعلى أي أساس! بقيت ندي ونجيب فالأفكار حتى سمعت كرسي أسد تحرك .. ناض على الطبلة ودعنا ومشا للخدمة لكن قبل همس لمدام سهام فوذنها الشي اللي خلاها تشوف فيا.. أنا مافهمت والو..
سهام: نجمة.. أسماء.. اجيو معايا واحد الدقيقة
أنا ونجمة: وخا (نضنا تبعناها حتى وصلنا للكوزينة)
سهام: نجمة.. عتابري راسك من ليوم نتي المشرفة على الخدم كاملين اللي فلقصر.. هادي مسؤولية كبيرة كانتمنى تكوني قدها
نجمة: غاندير اللي فجهدي ونتمنى ربي مايخيبنيش..
سهام: يكون خير.. راه أسامة فطريقو لطنجة ومعاه حوايجكم وكاع مستلزماتكم..مللي يجي كلفي شي خدم يعاونوك تقادي الدار اللي فالجردة راها مفرشة خصها غير شوية التنظيف وترتبو حوايجكم فيها
نجمة: الله يعطيك الخير ا لالة سهام
سهام: الله ياودي على الراس والعين.. أسماء عزيزة وكاع اللي يجي من جهتها حتى هو عزيز..حقا أسماء بنتي بغيت نخبرك بشي حاجة وماعرفتش شنو غايكون رأيك..
أنا: تفضلي!
سهام: اللي عارفة هو أنك حبستي قرايتك حد التالثة إعدادي ياك؟
أنا: اه
سهام: اش بان ليك تكمليها؟
أنا: (خرجت فيها عيني بتعجب) نكمل قرايتي؟
سهام: ومالكي تصدمتي؟ اه تكملي قرايتك.. هذا اقتراح تناقشنا فيه أنا وأسد لبارح... نتي بنت مزال صغيرة وزوينة حشومة مايكونش عندك مستقبل
أنا: ولكن راه عندي 20 عام كيف غاندير ليها
سهام: اويييلي سكتي سكتي اللي سمعك يضحك عليك.. راه لقراية ماعندهاش عمر ا بنتي غير توكلي على الله ويكون خير
أنا: فالحقيقة من ديما وأنا حلمي هو نكون قارية ومثقفة وكنت ديما كانجي أنا الأولى حيت كانت عزيزة عليا لقراية بزاف (غرغرو عيني) مدام سهام شكرا بزاف حيت فكرتي فيا وفكرتي أنك ترجعيني نقرى
سهام: هذا واجب ..عادي ابنتي مادرت والو.. دبا قوليلي شنو ميولك وشنو تبغي تقراي؟
أنا: فالصراحة ميولي كلو للغات! حلمي أنني نولي نهضر ببزاف داللغات بطلاقة
سهام: وخا.. أول خطوة هي الباك بعدا.. غانشوفو كيفاش خصك دوزي باك حر لكن القضية غاتكون صعيبة حيت مزال غير شهرين لامتحانات الباكالوريا.. ويلا كتاب ونجحتي غاندخلك لأحسن سونطر ديال اللغات..لكن قبل خصك ديري مجهود وتحاولي تكوني منضبطة باش تقدري توصلي فين بغيتي
أنا: (عنقتها) كنواعدك! كنواعدك غاناخد الباك .. غانوجد فهاد الشهرين اللي بقاو خصني غير الدروس غانخدم بالليل وبالنهار باش نكون عند حسن ظنك.. لكن كيفاش غانتسجل و...
سهام: هادي خليها علينا.. نتي غير خدمي ووجدي.. وغايوصل كلشي حتال عندك
شيماء: (دخلات عندهم) ممكن تقبلي بيا نعاونك؟
أنا: شيماء! لا بلاما نعذبك معايا فالصراحة هادشي بزاف عليا والله ..حشمانة منكم
شيماء: اويييلي اش كاتقولي.. غانعاونك بزز منك أصلا أنا هاد الفترة غير فالدار..غانكون فرحانة الى ساعدتك ووجهتك.. ومللي تاخدي الباك غانفرح كثر منك
أنا: شكرا بزززاف
سهام: صافي متافقين؟
أنا وشيماء: ههه متافقين
نجمة: يالاه يالاه كلا يمشي لبيتو خويو ليا كوزينتي😡
أنا،شيماء وسهام: ههههههههههههه حاااضر

كانت فرحتي كبيرة بعدما سمعت قرار مدام سهام اللي هو أنني نرجع نقرى..كنت كانحس براسي محكورة مللي كانسمع الناس كايهضرو بلفرونسي ولا لونكلي وأنا كانبقى حالة فمي كي الضبعة مفاهمة والو..إحساس خايب بزاف.. أنا كايعجبوني اللغات حيت فمنظوري الخاص.. اللغة الأجنبية كاتعبر على ثقافة الإنسان وكاتخليه ينفاتح على حاجات أخرى مختلفة عليها حطيت قدامي 2 أهداف.. الأول هو ناخد ورقة العبور اللي هي للباك .. الورقة اللي غاتخول ليا نحقق الهدف الثاني اللي هو تعلم اللغات الأجنبية..
شيماء: فاش سهيتي
أنا: والو.. غير فالقراية
شيماء: ان شاء الله غاتحققي كاع اللي فخاطرك غير تيقي فراسك
أنا: ان شاء الله.. ونتي فين وصلتي فلقراية؟
شيماء: أنا خديت الباك ديالي مللي كانت عندي 17 عام.. كان حلمي نولي مهندسة. الساعة ماكملش حلمي داك الوقت.. حيت خطفوني.. ومدة الخطف كانت 4 سنين..
أنا: فهمت.. ودبا شنو غاديري؟
شيماء: واعدني أسد أنه مللي غايتفتح التسجيل فمعهد الهندسة غايسجلني
أنا: الله يسهل عليك ياربي
شيماء: عليا وعليك ا حبيبة.. اش بان ليك نعومو فلابيسين
أنا: عاد قبيلة طلباتني كرزة وعتاذرت ليها..
شيماء: علااش؟
أنا: مكانعرفش
شيماء: ايوا لا .. نتي دبا غاترجعي تقراي وتكوني بنت مثقفة وماتعرفيش تعومي ماتقوليهاش حتى بالضحك.. شوفي غير لبسي ونعلموك أنا وكرزة.. ماتخافيش
أنا: ماعنديش حوايج العومان
شيماء: اجي معايا
مشيت مع شيماء لبيتها للي كان زوين بزاف أحسن ماشافت عيني فالأتاث الأنثوي.. جبدات جوج ديال ليدوبياس واحد فالأسود وواحد فيه الأزرق والأبيض..
شيماء: ختاري اللي بغيتي
أنا: ويييلي عريانين بزاف
شيماء: ياء وا عادي راه هادو هوما ديال لابيسين.. وا ختاري
أنا: الأسود..
شيماء: اوكي أنا غانلبس هاد الأزرق..
لبسنا دوبياس بزوج.. وااااع داكشي +18 أنا حشمت.. بقيت كانرخف فيا النفس ونقول عادي.. كانو لاسقين وبينو فورمتي زوينة بزاف مع أصلا عندي الصدر واقف والأرداف ياربي السلامة... وحتى شيماء جاوها واااعرين.. هي دارت الضفيرة جنب وأنا خليت شعري مطلوق على راحتو .. لوينا علينا فوطات ونزلنا..
شيماء: كااااراااااازة بيبييييي
كرزة: (دايرة عومة لميت) ممممممممم
أنا: واش من الصباح ونتي هنا ماعييتيش
كرزة: سيتقودي الخوافة
أنا: لهلا يحييك .. حلي عينيك شوفي
كرزة: (حلات عينيها وشافت أسماء بدوبياس) 😨😨😨 oh my god
شيماء: كرزة هانا زعمتها تعوم معانا.. لكن خصنا نعلموها
كرزة: احححح نعلموووها
أنا: اويلي على احح تي مالكي القردة
كرزة: خلاها الستاتي.. الزين ولاطاي كولشي كاااين .. ماعلينا..هبطو هبطو عندي
جاتني الخلعة شوية لكن زعماتني شيماء.. شدات فيا وهبطنا .. وجات حتى كرزة .. بقاو كايوريوني كيفاش نحافظ على توازني فوق الما وكيفاش نترخا وأنه راه ماغانغرقش.. بقيت كانتعلم منهم حتى حسيت بالراحة شوية.. بقينا مشادين ب 3 وكانعومو .. الصراحة والله ماكنت عايشة..هادشي زيييين..
كرزة: اجيو نشطحو البنات
شيماء: ههههههههه مزال عاقلة خخخخخخ
أنا: كيفاش نشطحو..
كرزة: هههههه نشطحو بزازلنا فلما
شيماء: هههههههههههه😂😂
أنا: اوييييلي تفو على حمارة واش مكاتحشميش!
كرزة: تفو على مك يا لمعقدة.. راه غير غانبقاو نشطحو بكتافنا وصدرنا بحال الوجديين
شيماء: كرزة مللي غانشطحو صدرنا كيغايبقا يدير فلما؟
كرزة: بلق بلق بلق
شيماء: وييييع هههههههههههه علااااام نتي والله
كرزة: وصافي يالاه زيدو.. ولكن فريتم واحد واللي حشمات وحبسات نخورها
أنا: لا حولة😒
درنا تلاثي فالما وبدات كرزة تغني وتشطح وحنا كانغنيو معاها ونشطحو بكتافنا وصدرنا وداكشي كايبقبق خلاتها كرزة.. حتى كاتبان لينا شيماء تكوفرات
كرزة: واش باغا اللي يخورك وا مالك حبستي!
ضرنا نشوفوها فاش كاتشوف لقينا أسد وحسام واقفين كايشوفو فينا مصدومين
أنا وكرزة وشيماء: 😨😨😨

بقينا مصدومين كاملين لاحنا لا هوما..حسيت بواحد الحشمة عمري حسيتها فحياتي ، كان أسد واقف ومعاه حسام مخرجين فينا عينيهم وحالين فمهم صدمهم منظرنا وكيفاش كانلعبو بصدرنا حتى نقزات كرزة..
كرزة: ايوا صافي ماتزيدوش فيه اويلي مالكم عمركم شفتو لابيسين ولبنات كايعومو
أسد: (خنزر فيها حتى دابت) أسماء
شفتو كيفاش خنزر فكرزة وكيفاش عيط بسميتي وهو يبرد ليا لما فالركابي..ماعرفت مانجاوب وأنا نغطس تحت لما حيت خفتهم يشوفوني عريانة
شيماء: (مزال كاتشوف فحسام اللي كايبادلها نفس النظرات) أ..أسماء مكاتعرفش تعوم
أسد: كيفاش؟ وا راها غطسات جبديها..
غطسات شيماء تحت لما وبقات مضاربة مع أسماء باش تخرجها لكن هي تعكسات كاطلع غير تنفس وترجع وتفركل فلما..شافها أسد كاتصرف هكاك وهي طلع ليه القردة للراس حيد التيشورط والسروال وعطا لحسام تيليفونو وتلاح فلابيسين..مشا جهتهم وطلب من شيماء تخرج وهو يشد أسماء من رجلها..هي يسحاب ليها راه شيماء اللي مزال كاتعنتت معاها وبقات تركل حتى حكمها وهزها فوق لما..
أنا: (شافتو قدامها وهو عريان وفازك بقات حالة فمها)
أسد: بغيت نعرف غير حاجة وحدة..واش نتي حمقة؟
أنا: لا..را..راه..لا راه غير..
أسد: (قرصها من صدرها حتى غوتات) راه شنو
أنا: اش درتي
أسد: قرصتك من هادشي للي عاجبك وجالسة تشطحي بيه
غير سمعاتو أسماء وهو يحمار وجهها وغطسات ثاني تحت لما وهو يغطس معاها قرب ليها وباسها من عنقها وصدرها تحت لما..بدات كاتغرغر وهو يطلعها ثاني وبقا جارها معاه بلاما يشوف فيها حتى خرجها...
كانو كرزة وشيماء لاويين عليهم فوطة وجالسين فلكراسة كايضورو عينيهم وحسام واقف كايخربق فالتيليفون وكايشوف فشيماء بنص عين..
أسد: (لاح على أسماء فوطة) سيرو لبسو حوايجكم لاتمرضو..
ناضت كرزة جرات أسماء اللي مزالا حشمانة من الشي للي طرا ودخلو ب 3 للدار
شيماء: ويلي يا لبنات على شوهة عمري نساها.. هزيت راسي لقيت حسام كايشوف فيا كانبقبق صدري فلما
أنا: (الصمت)
كرزة: واتانتوما مالكم معقدين راه عادي هادشي.. طيراتني أنا غا أسماء اللي تخشات فلما وحلفات لا طلعات خخخخخخ
أنا: هادشي كامل بسبابك تفو أنا للي حمارة دايرة فيك راسي
شيماء: (حابسة الضحكة) وصافي صافي اصاحبتي ماوقع والو راه الدراري موالفين بلابيسين ولعرا تانتي
كرزة: واييه قوليها ليها ..تي مالكي عندك كاكا فراسك
أنا: (كاتفكر فأسد اللي باسها تحت لما) نمشي نلبس حوايجي نتوما راه حماق
شيماء وكرزة: 😂😂😂😂😂😂😂😂
أنا: (خنزرت فيهم)
شيماء وكرزة: ها حنا 😑
طلعت لبيتي دوشت ولبست ديباغدوغ فالأسود لاصق ومعري من الكرش مع سروال جينز وصندالة بالصميطات فالأحمر(الصورة).. صايبت شعري بلبلاك درت فريقة من القدام وخليتو مطلوق ودرت عكر خفيف وجلست فلبالكون كانشوف فلابيسين
أنا: يخخخخ على شوهة ..اويييييييلي وحدي (كاتفكر كيكانت كادير بصدرها) ويلي ويلي عمرو حبا ونهار حبا طاح فبير..عمري عمت ونهار عمت درت فضيحة (تفكرات مللي باسها أسد تحت لما فعنقها وصدرها) باسني عوتاني! بالسيف.. السيد جالس يشوف فالبزازل كايتشتتو ويبقا يتفرج..موحال واش نبقا نقد نشوف فيه هو وحسام
بقيت جالسة شوية حتى دق شي واحد فالباب..كانت فاطمة الخدامة هازة فيديها كرطونة..
فاطمة: صيفطاتها ليك مدام سهام وقالت ليك هذا هو المقرر ديال الباك
أنا: ااااه قولي ليها شكرا بزااف..
خرجات فاطمة وأنا نضت حليت الكرطونة.. كانو فيها كتوبا ومطبوعات ديال الدروس اللي غايخصوني..ومعاهم حتى pc
أنا: جاو فوقتهم..نيت ندفن فيهم راسي شوية
جمعت شعري لفوق ومشيت حطيت داكشي فوق البيرو وبديت نصايب فالبروكرام اللي غانتبع باش نبدا نبريباري..أكيد غانلقا صعوبة حيت ماقارياش الدروس ديال الثانوية لكن غانستاعن بالأنترنت ونقلب حتى تبان ليا الطريق ان شاء الله.

بقيت النهار كامل وأنا كانرتب فأموري وخاشية راسي فلوراق حتى بدا يظلام الحال..
نجمة: (حلات الباب) أسماء..مزال كاتقراي؟
أنا: (كانشوف فالورقة) اه مزال.. تواحشتك
نجمة: ممم باينة عليها طليتي عليا
أنا: وراه من الصباح وأنا خدامة..جاني الجوع وتسنيتك تجيبيلي الماكلة وماجيتيش
نجمة: الله على كبيدتي الله.. والله الى من الصباح وأنا فديك الدار نخمل ونسوس ونقاد فلحوايج يالاه ساليت..سولت عليك فاطمة قاتلي راكي كاتحفظي..
أنا: غاضحكت معاك.. كيجاتك الدار؟ كيداير أسامة؟
نجمة: الدار غزالة راه جيت باش نديك تشوفيها وتشوفي حتى أسامة راه كايسول عليك..
أنا: (حطيت لوراق من يدي) هي لولا
نضت عنقت خالتي نجمة وهبطت معاها لتحت دزنا للكوزينة عطاتني طرف ديال كيكة وكاس دالعصير عاد كملنا طريقنا للجردة..مشينا للدار اللي ولات ديالها هي وأسامة كانت زوينة بزاف صغيرة ومجموعة ومفرشة على حقها وطريقها..
أنا: واااو زوينة بزاف
أسامة: جيتي ا شنيولة
أنا: (مشيت جلست حداه وعنقتو) تواحشتك ..كي درتي مع تمارة ديال ليوم
أسامة: مزيان الحمد لله وخا ضروني رجليا شوية حيت عطيتهم الجهد بزاف ولكن هانا كانرتاح ..نتي لباس؟
أنا: لباااس الحمد لله..عجباتك السكنة الجديدة؟
أسامة: عجباتني السكنة وعجباتني طنجة وكانتمنا تعجبني الخدمة اللي غايخدمني سي أسد.. فالصراحة ولد مزيان ماتخايليش كيفاش كايتعامل معايا..كلو أداب واحترام وكايتعامل مزيان
أنا: (بتاسمت تلقائيا) وي دار معانا زوين ... الله يدومها راحة وفرحة
نجمة: امييين ا بنتي.. لهلا يخطيك علينا جيتي بخيرك..من النهار دخلتي حياتي وأنا لفوق لفوق
أنا: هاد الهضرة أنا للي خاصني نقولها.. المهم أسامة نخليك ترتاح هانا مشيت..تبات فراحة الله
أسامة: تصبحي على خير
نجمة: أسامة هانا غانمشي نوقف على لعشا.. مللي نسالي راه نجيب ليك عشاك ... شعل التلفازة ورتاح
خرجنا أنا وخالتي نجمة ورجعنا للفيلا..دخلنا من باب الكوزينة وحنا نلقاو أسد ولينا معانقين..بقيت واقفة كانشوف فيهم وماحسيت حتى غرغرو عينيا وقلبي بدا يضرب بالجهد .. حطيت كاس العصير بالجهد فوق الطبلة حتى حبسو من التعنيقة
لينا: هيماجية! ماتعرفيش تحطي الكاس بالأداب اش هاد التربية
خليتها وخرجت من الكوزينة وطلعت لبيتي وسديت عليا..ماعرفتش علاش تصرفت هاكاك وعلاش غرغرو عينيا؟ واش غرت؟ علامن غانغير وعلاش غانغير أصلا..أسماء بلاما تكذبي على راسك.. أسد كايعجبك وكاتحرك شي حاجة فيك من جهتو..بغيت غانعرف غير اش بينو وبين لينا..كرزة كانت قالتلي بللي مكايحملهاش ولاصقة فيه.. ودبا شفتو معنقها وعايشين اللحضة... يمشيو يخراو مالي أنا سوقي..بقيت نترطا غا بوحدي حتى سمعت الباب تحل ضرت لقيتو أسد..دخل وسد لباب ومشا وقف حدا لبيرو فين كنت خدامة ..
أسد: راه حشومة تردخي على الناس الكيسان وتقاطعيهم
أنا: (جمعت يدي على شكل قبضة) مانويتش..سمحلي
أسد: وي وي عرفتك مانويتيش.. المهم جيت نقولك واش عجبوك المطبوعات و واش محتاجة شي أستاذ يخدم معاك
أنا: مزيانين..ملخصين بطريقة زوينة.. لا بلاش راه كانقلب فالانترنت وواعداتني شيماء أنه الى حتاجيت شي حاجة نطلبها منها..
أسد: اوكي اللي بغيتي (خرج وسد الباب)
أنا: يخخخخخ تفو تفو تفو هادشي لاش جاي حقا ما حقا حشومة تردخي لكيسان ..أنا ماكرهتش نردخ ليكم ريوسكم بزوج ..
بقيت جالسة حتى جات الخدامة طلبات مني نزل نتعشى خرجت من بيتي باش نزل فالدروج حتى بانولي أسد ولينا خارجين من بيتو وهابطين حتى هوما.. دارت ليا لينا نص ضحكة ديال السم وأسد مشافش فوجهي كاع وهبطو سبقوني وأنا بقيت واقفة نتغدد غابوحدي عاد تبعتهم..
لقيت كلشي مجموع على الطابلة وجلست حتى أنا..كانت خالتي نجمة واقفة على الخدم حتى حطو لعشا عاد مشات..تعشينا فجو عادي مرة سفيان يهضر مع أسد على الخدمة مرة شيماء تهضر مع مدام سهام مرة مدام سهام تسولني على لقراية أما لينا مكاتسكتش من الهضرة على المجلات واللبس ولخرا والزمر فرعات ليا مخي.. كملت عشايا بزز تمنيت ليهم ليلة سعيدة ومشيت للكوزينة عنقت خالتي نجمة وقلت ليها تصبحي على خير وهي كاتشوف فيا بواحد النظرات اللي فهمتهم.. كاتسولني بعينيها على التصرف اللي درت قبيلة مللي شفت أسد وديك السلكوطة معانقين..تجاهلت شوفاتها وطلعت لبيتي لبست بيجامة وتخشيت ففراشي ونعست.

كرزة: لخانزة.. وااا وجه الكلب...واااا بزازل الدحشة
أنا: (سادة عينيا وكانهضر) ختي بغيت غانعرف اش درت فحياتي حتى سلطك عليا الله..
كرزة: (كاتعوج ففمها) ايوا الله يعطيك الدل..خصك تحمدي الله وتشكريه كل دقيقة اللي عندك صاحبتك بحالي كاتفوج عليك.. وشوفي هاه راني نعايرك ومانخلي اللي يعايرك
أنا: (كانتكسل) تايقة فراسك ... شحال فالساعة
كرزة: الجلدة قل عظم دقيقة ويدوز الدم
أنا: يخخ صبحنا على الله واش مكاطفايش
كرزة: 8 هادي نوضي تفطري يطفي ضوك..
نضت من فراشي دخلت دوشت بالزربة باش نتوكض..خرجت لقيت كرزة جالسة تماكي وتعوج وتسيلفا
أنا: ااااه يا با هاه...
كرزة: (كاتشوف فلمراية) مالك
أنا: والو
كرزة: شوفي خليني نقادك بحال شحال هادي..اش قلتي
أنا: هههه واخا
ناضت كرزة للماريو بدات تزعل وتخير .. جبدات ليا كيطمة فالأزرق سماوي لاااااصقة بزاف..سروالها طاي هوت ومقطع من الركابي ولفوقاني ديالها قصير معري من الكرش وبلكمام لاصقين..مع سبرديلة بيضة..المهم لبستهم بنت لاصقة بزاف..
كرزة: احححح قيمت عليك
أنا: ويلي ويلي على حمااارة
كرزة: الطرف عندك ناضي والله خلينا من ديك لينا ضل تهضر على لاطاي والاشهار والقلا.... كون يشوفوك الناس معامن خدامة هي كون فgسوهم..
أنا: اشناهوما...
كرزة: داكشي كبير عليك ... المهم اجي اجي قدام لمراية..
جلساتني و جلسات تنتف ليا فالحجبان المسخوطة صرعااات ليا فورمتهم وطراساتهم .. دارت ليا كريم أساس وواحد التجبيدة بالايلاينر وطلعات ليا الشفار بالماسكرا.. فاراجو فالمارو بارد وعكر فالغوز ماط... المهم بدلاتني عجبني وجهي بزاف.. دازت ليا للشعر سرحاتو ليا بالسوشوار السيدة طياااارة فهادشي...دارت ليا الشعر القدامي سفنجة صغيورة والشي لاخر بقا مطلوق..أنا بقيت غا حالة فمي..
أنا: ومالي ا ختي فين غادة؟
كرزة: (عطاتني الصبع) وهاكي... واش حتى تكوني غادة خارجة عاد تهلاي فراسك هادشي راه خصك ديريه ديما..ماتكونيش حامضة فتفكيرك اه حقا حتى يكونو غايشوفوني الناس عاد نتقاد لا لا وخا تكوني غادوزي النهار غا فبيتك لبسي وتقادي وعجبي راسك😉 (ميساج ليكم البنات من كرزة)
أنا: 😨😨 بنت لحرام كاتعرفي تهضري
كرزة: اودي ختك ضايعة ضايعة... وا نوضي تهزي نفطرو راه كرشي كاتقزقز
أنا: هههههههههه اوكي يالاه

نزلنا أنا وكرزة فالدروج كانتناكرو ونتقارصو حتى وصلنا للطبلة ديال لفطور.. سلمت على مدام سهام وشيماء وسفيان وفوزية .. جلست وجلسات حدايا كرزة.. كانو ناقصين أسد ولينا..بقيت كانضور فعيني حتى جات خالتي نجمة ومعاها الخدامات هازين لفطور.. سلمت عليها وبدات تحط فالماكلة وكرزة غا مخرجة عينيها تاع للي يثقبهم ليها بشي فورشيط..
أسد: صباح النوور عليكم..... هزيت راسي لقيتو جاي جيهتنا لابس حوايج ديال السبور فالرمادي وداير فوطة على كتافو ومعاه لينا لابسة حتى هي حوايج السبور فالغوز ودايرة كاسكيط..
لينا: (كاتعوج) بونجوغ
فوزية: صباح الخير يا لالة لبنات.. عاد جيتو
لينا: واييه ساعتين وحنا كانجريو ولكن أسد حاول عليا ماخلانيش عييت ولا حسيت بالطريق (كاتشوف فيه)
أسد: ايوا بصحتك ا لالة.. المهم هانا نطلع ندوش ونجي
لينا: واييه جرني معاك
أسد: يالاه زيدي (قاسها فكتفها)
سهام: يالاه دوشو دغيا ونزلو تفطرو... (موجهة هضرتها لينا) ونتوما بداو تفطرو بلاما نتسناوهم
أنا من هادشي كامل بقيت غا حالة فمي واش السيد حتى الشوفة مشافها فيا وكيفاش هاد المعاملة للي ولا كايدير مع لينا مابقيت فاهمة حتى خرية..بقيت ساهية حتى نغزاتني كرزة وقالتلي بالاشارة نفطرو ونوضو نهضرو..داكشي للي كان كلينا بالزربة ونضنا بحجة أنني عندي الحفاظة ...
#فبيتي:
كرزة: (كاتمشي وتجي) لا لا شي بلان مقاااااود هذا دايراه لينا مايمكنش
أنا: (جالسة على طرف الناموسية) كيفاش .. اشمن بلان
كرزة: واش مستوعبة هادشي للي كايطرا ولا لا
أنا: (كانبرد على راسي) اش كايطرا اويلي؟
كرزة: واش ا عباد الله السيد عمرو عبرها.. وا عمرو خرج معاها ولا عطاها وقت ودبا ولا يديها دير معاه السبور فالصباح ويجرها تمشي دوش 😨
أنا: ياء عادي ياك بنت عمو وأصلا بيناتهم علاقة حب اولا
كرزة: هاديك راه سميتها علاقة لمريد علاقة خشيه كلو اشمن حب ولا لقلا... بلاما تبوهلي عليا اصاحبتي راه عاودت ليك كلشي النهار الأول..
أنا: ودبا مالكي مفقوصة صافي خلي بنادم يعيش..
كرزة: (جات قربات حدايا ووقفات قبالتي ومع هي قصيرة..جا وجهي مقابل مع وجهها وخا أنا جالسة) أسماء .. نتي صاحبتي وعزيزة عليا بزاف حيت بريئة وقلبك بيض .. أنا حمقة وهبيلة ولكن كانفهم الإنسان من خلال نظرة.. (حطات يدها على قلبي) شفتيه كيفاش كايضرب بالجهد؟
أنا: (الصمت)
كرزة: مغانسولكش واش كاتبغيه حيت عارفة جوابك للي غاتنكريه..
أنا: كرزة لا راه ما....
كرزة: شششش ماطلبتش جوابك ولا تبرير ولا شي حاجة.. ولكن كانواعدك والله لاخليتو ليها وهانتي غاتشوفي
أنا: ممكن تعنقيني؟
كرزة: بشرط!
أنا: أما هو
كرزة: ماتجيبيهش عليا راني موضية
أنا: تفووووووووووو على فاسقة واش مكاتعيايش من هاد الهدرة
كرزة: لا مكانعياش.. اجي نقولك داك الدري للي جا مع خالتي نجمة اش سميتو
أنا: 😒
كرزة: ختي تشهيت غا شي دلاحة باردة نحط عليها طرمتي راه سخنت هاد الأيام
أنا: كرزة سيري عطيني التيساع خليني نحفظ نتي راه مسالية قبك
كرزة: ايه سري.. أنا غانمشي نعوم راه ريحتي عطات وشوفي هاه.. لميمة مور لغدا نخرجو نضربو دورة لمييييييمة
أنا: حتى نشوف
كرزة : تشوفي لعما.. هانا مشيت
أنا: سيري

خرجات كرزة وبقيت أنا ساهية وكانفكر فأسد.. واش زعمة وليت كانبغيه ؟ ولكن راه هو للي زوين بزاف وكايتعامل معايا زوين وكايبوسني وأنا راه كانبقى أنثى ضعيفة قدام رجولتو الطاغية راه وخا نكون حجرة غانتزعط فيه ولكن والله مانبين ليه شي حاجة أنا ماشي هي لينا غانولي مدلولة وتابعاه مايمكنش.. وللي زاد وثرني هو تصرفاتو مع لينا كيفاش هاد التغيير للي طرا واش كايبغيها؟ ومالو للي مايبغيها هي راه بنت عمو ومن مستواه .. قارية وزوينة😐 ولكن مسموومة ماتستاهلوش.. هههه وشكون غاتستاهلو مثلا ..أنا؟ اودي نوض نقرا على راسي ماينفعني..نضت جلست فالمكتب وشتت الأوراق ثاني وبديت نراجع...
#في_غرفة_لينا:
لينا: ماما واش شفتيه كيفاش ولا كايتعامل معايا؟؟
فوزية: تبارك الله عليك ابنتي شفتي كون تبعتي رأيي من الأول كون راه كاعما ضيعتي هاد الوقت كامل
لينا: حتى دبا باقي الحال.. ها أسد رجع بين يديا وغاندير مافجهدي حتى نولي أنا هي مولات هاد الدار
فوزية: وأسماء؟
لينا: غا سكتي على ديك السعاية ..واش شفتيها الصباح كيفاش جالسة كاتفطر.. اللبس والشعر والماكياج ... وليت كانحس بيها خطر عليا
فوزية: ايوا فطري بيها قبل ماتعشا بيك
لينا: كوني هانية غير صبري وغاتفرجي مزيان..
#في_المساء:
كرزة: عاااافاااك قولي اه عاااافاك
سهام: كرزة ضارني راسي تفرفي عليا هاد الساعة
كرزة: احمييييمتك شوفي ولاهيلة ساعتين ونرجعو
سهام: بعدي من البنت خليها تقابل قرايتها
كرزة: واييه لقراية اه ولكن راه خصها تخرج شوية باش تبدل الجو
سهام: مممم ايوا باز لوجهك ياختي... اوكي سيري شوفيها وايلا بغات تخرج خرجو.. خودي لكارط ديالك وشريو للي بغيتو وعلمي الشيفور يوجد ليكم الطوموبيل
كرزة: لاحافظك نتي صاطة مزيانة
سهام: شنو؟
كرزة: ميغسي مدام سهام 😊
سهام: الله يمسخك
طلعات كرزة كادردك لبيت أسماء وحلات لباب بالجهد
كرزة: أسماء أسماء أسماااء نوضي نقودو هاء بغيت نقول نوضي نخرجو
أنا: الله يحرق طواسل أبات مك (شادة فقلبي من الخلعة)
كرزة: اويلي مال هادي معصرة عليا بزازلها واتي نوضي باراكة من لعياقة راه ل5 هادي وانوضي الخرا نخرجو مالك معقدة
أنا: عيقتي اصاحبتي بقاي دخلي بالشوية راه كانتخلع (بقات كاتأثر من ايام المستودع والدم وداكشي للي عاشت)
كرزة: وخا سمحيلي.. وانوضي لبسي عفاك
أنا: كرزة ديري بناقص مافيا مانخرج (خافت تلاقا سكينة ثاني ولاشي حاجة)
كرزة: (حسات بيها) شوفي راه غايمشي معانا لبوديكارد ومغانبعدوش كوني هانية.. راه مايمكنش تبقاي حابسة راسك غا فالدار خصك تعيشي حياتك عادي ا أسماء
أنا: (قنعاتني) وخا.. سيري لبسي .. هانا غانوض ندوش ونلبس..
كرزة: سربي 6 نلقاك لتحت
أنا: اوكي.
حطيت الأوراق على جنب ونضت للدوش دوشت بالزربة وخرجت وقفت قدام الماريو بقيت نشوف فيه قررت نجبد كسوة قصيرة فالأسود بلكمام مشبكين لبستها ولبست معاها ليبوط ديال الطالون قصار فالأحمر وبوشيط فالأحمر.. صايبت شعري بالبلاك سامبل ودرت ايلاينر وماسكارا وعكر باارد مكايبانش..درت حلقات ورشيت بارفان وخرجت من بيتي.. يالاه جيت نزل فالدروج وأنا نسمع صوت الضحك من واحد البيت للي كانظن أنه بيت أسد.. بغيت نهبط لكن لفضول حبسني.. مشيت كانتسلت فاتجاه الصوت وكانحاول مانقرقبش بالطالون حتى وصلت قدام الباب..

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.