حب وسط الدماء الجزء 13

بعدما مشاو أسد ولينا.. دخلو العائلة للدار شي باكي شي فرحان.. كل واحد مشا لبيتو وأنا مشيت للكوزينة جلست مع خالتي نجمة شوية للي كانت كاتقلب فعينيا على الحزن الساعة مابينت ليها والو..

نجمة: أسماء.. راه مغادوزيهاش عليا ولكن برافو عليك.. طلعتي قوية كثر من للي كنت كانتوقع.. ودبا مللي ختارها صافي نسايه.. نصيحة مني، ديها فراسك وقرايتك وبغي راسك وتهلاي فراسك وغايجي النهار للي يندم عليك ..

أنا: متخافيش عليا.. هاد النصيحة بديت نطبقها من لبارح 😉

نجمة: الله يرضي عليك ا بنتي..

خليت خالتي نجمة وطلعت كانقلب على كرزة فين مخشية..

أنا: (حليت عليها لباب) حب لملوك ديالي🍒

كرزة: (فالبالكون) شنو

أنا: مالك مقلقة مني..

كرزة: واااالو ماماليش ومامقلقاش

انا: (جلست على ناموسيتها) لمهم هانا غانعاود ليك كلشي... لبارح مشيت لبيت أسد...(عاودات ليها كلشي)

كرزة كانت فالبالكون وكاتسمع لأسماء باهتمام حتى سالات..

أسماء: وصافي.. بردت فيا النفس وقتانعت أن أسد عمرو يقدر يكون ليا.. ومبروك عليهم هادشي للي غانقدر نقول..

كرزة: (عينيها مغرغرين بالدموع) سمحيليا بزاف مايسحابليش هادشي وقع معاك (مشات تجري عنقاتها) أنا ما صاحبتك ما حتى خرية... بلاصة مانواسيك جالسة نفخ فريشي

أنا: (معناقاها) تواسيني هههه ا صافي تانتي ماوقع والو.. كرزة كانتمنى نساو هاد الموضوع.. صافي تواعديني

كرزة: كنواعدك😘

أنا: اش بان ليك مور لغدا نراجعو شوية وفلعشية نخرجو نضورو

كرزة: هااااا دبا عجبتيني كوني كوول ا الصاطة

أنا: ههههههه هاهي كول..

خليت كرزة وخرجت باش نمشي لبيتي وأنا ندوز من حدا بيت مدام سهام و سمعتها هي وشيماء كايهضرو بيناتهم.. كانو كايهضرو على أسد وكيفاش ولا باغي لينا.. وفهمت من خلال هضرت مدام سهام أنها بقا فيها لحال حيت بغا يتزوج لينا ماشي حيت سافر.. هي ماعندهاش مع لينا وحتى مع فوزية.. كانت عارفة بللي لينا كاضور بيه لكن كانت مطمئنة حيت أسد مكايبغيهاش.. ودبا تفاجئات كيفاش ولدها تقلب بهاد السرعة.. خليتهم كايهضرو وكملت طريقي لبيتي.. جلست وبقيت كانفكر فأسد وفكاع اللحضات.. من نهار طحت عليه مللي كنت كانلعب فالزعلولة حتى كتاشفت أنه هو رئيس المنظمة.. مللي عطاني لمجد وعاود عتقني منو.. مللي عطاني دار وكان راد ليا البال.. مللي لقا داك خونا صاحب غزلان باغي يتعدا عليا وسلخو عصا.. مللي كان كايقلب عليا وتعذب على يد مجد ورجالو بسبابي.. مللي كنا مربوطين ومتكية على ضهرو وكايعاود ليا... مللي كايكون قريب مني ملي كايبتاسم .. تفكرت كلشي كلشي وحسيت بقلبي تغلغل عييت مانمنع دمعتي أنها تهبط لكن أحاسيسي كانت قوا من كبريائي .. خليت دموعي ينزلو لكن ماكنتش كانبكي... كانو دموع كايترجمو الصراع للي عندي فالداخل ديالي فقط..

#بعد_مرور_شهر:

داز شهر على سفر أسد ولينا.. ومزال شهر للإمتحان الوطني..فهاد المدة حياتي كانت روتينية.. غير لقراية وسادة عليا بيتي... كانخرج غير ناكل ونرجع ندفن راسي وسط الكتب.. كانخرج جوج مرات فالسيمانة أنا وكرزة ولا أنا وكرزة ومدام سهام وشيماء نبدل الجو ونتنفس شوية الأجواء فالدار هادئة ومملة.. كانسمعهم كايقولو أن أسد هضر معاهم لكن عمرهم قالولي أنه سلم عليا أو سول فيا.. مانكذبش على راسي ونقول أنني ماكانتقرصش لكن هادشي للي عطا الله.. شرات ليا مدام سهام ايفون آخر ماخرج وبزاف دلحوايج والماكياج.. مامخلياني محتاجة حتى شي حاجة.. أما خالتي نجمة وأسامة فكل نهار كانمشي عندهم للدار نجلس معاهم شي ربع ساعة ونضحك معاهم شوية... المهم هذا هو ملخص هاد الشهر وكيفاس دوزتو ودبا خليوني نوض نهبط نفطر...

أنا: (لابسة بيجامة ومخلية شعري مهمل) صباح لخير خالتي كبيدتي..

نجمة: اهئ اهئ اهئ

أنا: مالكي كاتبكي اش واقع.. خالتي مالك

نجمة: (عنقاتني) ختي اهئ اهئ ختي للي بقات عندي فعائلتي كاملة ماتت لبارح فالليل.. ماااتت وخلاتني اهئ اهئ

أنا: (دمعو عيني) البركة فراسك ا خالتي.. عمرك قلتيلي عندك ختك..

نجمة: كانت مريضة بالقلب مسكينة.. كنت كانزورها مرة مرة مللي كنت فالرباط.. ودبا مللي جينا لطنجة كان بيناتنا غا التيليفون..

سهام: اش واقع هنا.. نجمة ختي مالكي..

أنا: أختها ماتت الله يرحمها..

سهام: إن لله وإن إليه راجعون.. البركة فراسك ا ختي (عنقاتها)

نجمة: مامشا معاك باس..

سهام: فين كاينة دار ختك الله يرحمها

نجمة: الدار البيضاء..

سهام: سيري وجدي راسك هانا غانهضر مع الشفور للي غايوصلك تال تما...

نجمة: الله يكثر خيرك .. شكرا بزاف

سهام: هذا واجب... راه لموت هادي... أسماء غاتمشي معاها ياك ا بنتي

أنا: اه أكيد مانقدرش نخليها بوحدها

نجمة: لا ا بنتي بقاي قابلي قرايتك.. هانا غانشوف أسامة يمشي معايا

أنا: خالتي أسامة خدام ماعندو كي يدير.. وقرايتي راه ماشي غانهملها الى مشيت معاك يومين ورجعنا

سهام: أسماء عندها الحق.. خليها تمشي معاك... بعدا تلقاي علامن تحطي الراس..

نجمة: وخا الله يرضي عليك ا بنتي.. وجدي راسك باش نمشيو

أنا: وخا هي دابا..

طلعت لبيتي دوشت وصايبت شعري.. لبست سروال فلكري ديال التوب طاي هوت مع ديباغدوغ فالأسود خشيتو فيه وصندالة عالية كحلة ... ودرت عليا فيست فلبيض..خليت شعري مطلوق وجمعتو بقريرصات من الجنب وهزيت صاك كحل صغير درت فيه تيليفوني وكارط ديال البنك.. عاد جبت واحد لفاليز صغيورة جمعت فيها شي حوايج اللي غانحتاج مللي نكون فكازا.. اييييه على الدار البيضاء.. المدينة للي حليت فيها عيني بين يد مي رقية.. المدينة للي قريت فيها ولمدينة للي تعرضت فيها للإهانة من طرف ديك الانسانة للي رباتني..لمدينة للي تلاقيت فيها مجد وسكينة... المدينة للي منها طرت لأمريكا حتى لقيت راسي فمستودع وحشي... تفكرت كاع هاد الأحداث وهو يشدني خوف رهيب لكن هدنت نفسي وجريت فاليزتي ونزلت لتحت باش نمشي أنا وخالتي.. خصني نوقف معاها كيفما وقفان معايا طول هاد المدة للي عرفتها فيها..

لقينا الشيفور كايتسنانا.. ركبنا فاتجاه مدينة الدار البيضاء..الطريق كاملة وخالتي كاتبكي ومتكية عليا وأنا كانواسيها ونبوس على راسها ونبكي معاها حتى وصلنا.. عطات للشيفور عنوان الدار ودانا ليها.. بانت لينا الجنازة مبنية فالزنقة والناس كاتباكا.. خالتي عاد مزادت فيه بالبكا وأنا غاكانحاول نصبرها ماعرفت ماندير.. دخلنا لدار أخت خالتي استقبلونا بناتها للي غير شافو خالتي تلاحو يعنقو فيها ويبكيو .. كان منظر مألم بزاف..أنا دخلت جلست وخليتهم على خاطرهم.. شوية سمعنا أنهم غايديوها يدفنوها.. ماقدرتش نشارك فدوك المراسم فالصراحة.. حدي طمئنيت على خالتي أنها وسط بنات ختها وشديت القنت وتكمشت..داز نهار كلو حزن وبكا.. دارو لعشا وكانت الدنيا عامرة.. باينة كانت ضريفة ومحبوبة بحال خالتي..بعد هاد الليلة دازو يومين وحنا فهاد الدار.. خالتي تفشات شوية وولات مزيان.. الصراحة وخا مهمومين رحبو بينا وعاملونا مزيان فهاد اليومين..

نجمة: بنتي قنطتي ياك.. خصنا نرجعو

أنا: لا لا خودي راحتك حتى تبغي على خاطرك ونرجعو ماعنديش مشكل..

نجمة: الله يا بنيتي وقرايتك..

أنا: (وريتها التيليفون) هاهي.. كلشي عندي هنا كوني هانية

نجمة: الله يعطيك الرضا.. قلبي محروق ا بنتي على ختي وبنياتها.. الحمد لله أنهم كلهم مزوجين. بعدا مسكينة ماخلاتش وراها المسؤولية..

أنا: اه الله يصبرهم على فراقها..

نجمة: بنتي دبا شوية وجدي راسك تخرجي معايا نقضي شي سخيرة مهمة

أنا: اه وخا هي لولا..

نضت لبست عليا كيطمة وجمعت شعري ديل حصان وخرجت أنا وخالتي.. عطيتها نضاضري باش تخبي عينيها حيت ولاو حاالتهم بلبكا.. ركبنا مع الشيفور للي هاد اليومين بقا فكازا على ودنا كيما وصاتو مدام سهام.. طلبات منو يدينا عند شي ناس من عائلة ختها تعطيهم شي حاجة.. وصلنا للشارع وهي تنزل خالتي وطلبات مني نبقا فالطوموبيل بلاما نتعذب.. داكشي للي درت بقيت حاضياها حتى دخلات لديك الدار وأنا هبطت الزاج وبقيت كانطل حتى جات فعينيها.. اه هي.. كانت دايزة حتى وقفات مخرجة فيا عينيا..بجلابتها البالية ونظرتها الحادة كيف ديما..

أنا: خالتي رقية!!!!!!

بقيت غير كانشوف فيها وشداتني الخلعة من صبعي الصغير ماعرفتش علاش.. الظروف ديال الصغر ديما كاتبقا مأثرة عليك وخا مانعرف فين توصل.. شفتها جاية كاتقرب مني وأنا قلبي بدا يضرب وحسيت بوجهي صفار حتى وصلات عندي..

رقية:(كاضور عينيها على الطوموبيل) أسما.. هادي نتي ا بنيتي

أنا: (الصمت)

رقية: نزلي عندي ولا مابقيتيش راضية بمك رقية

صدماتني ماتوقعتش أنها غاتهضر معايا هاكا.. حليت لباب ونزلت عندها..

أنا: السلام

رقية: هادا هو سلامك عليا.. هربتي وخليتيني غانحماق عليك ودبا جاية تقوليلي السلام..

أنا: وشنو خاصني نقول

رقية: (كاطلع فيا وتهبط) قولي للي بغيتي نتي للي جات معاك

أنا: لباس عليك؟

رقية: هه لباس عليا.. راه نتي للي بنتيلي لباس عليك.. صافي خرجتي ليها.. ايوا مزيان كل واحد كايرجع للأصل ديالو..

أنا: كيفاش؟؟؟

رقية: والو.. اش كاديري هنا

أنا: عندي شي غرض

رقية: تانتي ولاو عندك الأغراض.. ايييه ا بنيتي.. كون كان فيك الخير كون جيتي طليتي عليا وسولتي فيا واش ميتة ولا حية.. ولا صافي تهنيتي مني

أنا: (ماحملتش هضرتها يا ربي تسمح ليا) المهم مي رقية للي فات مات وأنا عمري نسا خيرك وسمحيلي على أي حاجة.. ضارني راسي شوية نخليك دبا (باغا غانحيد من قدامها)

رقية: باغا تفكي مني بالزربة.. ايوا هي للي عمرها تكون ليك يا بنت لحرام ليوم ندير لمك الشوهة.. وجهك ماشي وجه الكبرانية (شداتني من شعري) مشيتي تقحبنتي حتى ترفحتي ودبا باغا تقلبي عليا وجهك بلاما نذوق حقي من فلوسك.. ولا عاجباك حالتي وليت نسعى فعباد الله.. والله يامك لا طلقتك ليوم حتى تخلصي لقديم والجديد..

ودبا ماتصدمتش من تصرفها حيت هادي هي مي رقية للي كانعرف.. شداتني من شعري لواتو على يديها مابغات تعاود طلقني.. بانت ليها الطوموبيل يسحاب ليها صافي قطعت لواد ونشفو رجليا وبغاتني نعطيها الفلوس حيت أكيد ماهاماهاش أنا.. كون شافتني كانسعا بحالها كون مقالتلي حتى السلام..بقيت كانطلبها طلق مني لكن والو مابغاتش وحتى الشيفور مانعرف فين مشا ومكاين للي يفكني بقات مشادة معايا حتى حسيت بشي يد كاتحيد ليها يديها من على شعري وكانت خالتي نجمة..

نجمة: وا حيدي يدك على بنتي الله يعطيك لقطع فاليدين واش هادي حمقة (كاتفك فيا)..

حسيت برقية حيدات يدها وأنا نهز راسي وبديت نجمع شعري.. وكانسمع السقيل حدايا.. شفت فيهم لقيتهم كايشوفو فبعضياتهم وهي تحيد خالتي نجمة النضاضر ..شافتها رقية وهي تخرج عينيها حتى كانو غايطيحو من بلاصتهم وبدات كاترجع باللور..

نجمة: (كاتشوف فرقية بصدمة) ها..ها..هادي نتي.. هادي نتي ا عدوة الله..

رقية: (حاولات تمشي وهي تشدها نجمة) واش هادي نتي الكافرة.. وأخييييرا طحتي بين يدي.. 20 عام وأنا كانتسنى هاد النهار للي نلقاك فيه..

رقية: (كاضور وجهها) ش..شكون نتي اش كاتقولي فين كاتعرفيني ا لالة ومالك شاداني هاكا

نجمة: و بربي لاطلقتك ليوم غا بيا ولا بيك..

أنا: خالتي اش واقع واش كاتعرفيها.. كاتعرفي مي رقية

نجمة: واش كاتعرفيها نتي؟

أنا: اه.. هادي هي لمرا للي...

نجمة: (قاطعاتني وعينيها باغين ياكلو رقية) ليوم مغايفكك مني حد سمعتي

رقية: طلقي مني ولا ليوم غاندير ليك الشوهة.. طلقي خليني نمشي بحالي فين كاتعرفيني..

نجمة: اه غانطلقك.. ولكن مغانطلقك تال لكوميسارية

أنا بقيت غا مصدومة كيفاش هاد الجوج كايتعارفو وعلاش خالتي نجمة كاتعامل مع رقية هاكا واش دخل البوليس فالهضرة..

رقية: ا..اش دانا لشي بوليس (كاتبوحط) الله يا ختي الله وأنا مرا كبيرة اش غانمشي ندير فالكوميساريات..

نجمة: أسماء حلي لباب ..

أنا: اشمن باب

نجمة: وا ديال الطوموبيل

أنا: ااه وخا.. (حليتو)

نجمة: صوني على الشفور يجي...

حليت ليها الباب وهي تجر رقية ركباتها فالطوموبيل.. عيطت للشيفور جا وتحرك بينا.. أنا ركبت القدام وكلي كانترعد ومافاهماش شنو واقع وخالتي نجمة شادة فرقية وكانشوف فعينيها غضب كبير.. عكس رقية للي كايبان فعينيها الخوف ومكاتحاولش تقاوم نجمة..

نجمة: صافي وقف وقف هنا.. (طريق خاوية)

نزلات خالتي وجرات معاها رقية.. هبطت حتى أنا وطلبت من الشيفور يبقا فالطوموبيل.. يالاه جيت نضور لقيت خالتي نجمة كاضرب فرقية.. أنا تصدمت مشيت نجري بديت نفك فيها..

أنا: خالتي طلقي منها.. طلقي علاش كاضربيها..

رقية: بنتي ..بنتي عتقيني منها باغا تقتلني..

نجمة: (مشات جابت حجرة كبيرة والغضب مسيطر على ملامحها)سمعي ا رقية ولا اش سميتك.. ليوم غاتقولي كاع داكشي للي عندك ولا أقسم بالله حتى نقتلك ونشرب من دمك..مابقا عندي مانخسر.. روح وحدة راك ديتيها ليا... وربي مكاينسا حتى واحد.. كنت تايقة فالله أنه غايلاقيني بيك شي نهار.. وليوم بلاما تحلمي تفكي مني حتى تعتارفي بكلشي..

رقية: ب..باش غادي نعتارف..

نجمة: أسماء.. بنتي أسماء .. فيناهيا بنتي

سمعت هاد الجملة حسيت بحالا شي واحد صرفقني.. بنتها أسماء؟ علاه هي عندها بنت؟ وسميتها بحال سميتي..

رقية: وأنا مالي ومال بنتك ا لالة واش نتي بعقلك..

نجمة: اه دبا بعقلي.. مكان عندي عقل نهار تقت فيك وخليك عندك بنتي أمانة..صدقتي رازياني فحياتي.. دمرتيني الله ياخد فيك الحق..

أنا: وا فهموني اش واقع..

نجمة: من بعد ونشرح ليك..

رقية: (كاتحاول تفك منها) وا طلقي

كانت خالتي شاداها بيد ويد هازة بيها حجرة... شفتها هزات ديك الحجرة تال السما وغادة نازلة بيها على راس رقية.. أنا غمضت عيني وسديت فمي كانتسنى طيح شي روح حتى سمعت رقية غوتات..

رقية: (بالغوات) راه هادي هي بنتك..

دقيقة صمت.. هدوء رهيب وغير صوت الريح للي بقا كايتسمع... سمعت صوت الحجرة طاحت فالأرض.. حليت عيني وأنا نشوف صبع رقية موجه ليا.. شفت نجمة للي مخرجة فيا عينيها.. مافهمت والو.. كانحاول نستوعب اخر جملة تقالت..

نجمة: كيفاش؟

رقية: هادي راه هي أسماء بنتك للي عطيتيني هادي 20 عام..هاهي معاك وقدام عينيك وماقدرتيش تعرفيها.. ودبا جاية تمثلي عليا دور الأمومة..

نجمة: أسماء..هادي أسماء بنتي..مايمكنش..

رقية: سيري تأكدي.. راك عارفة كيفاش غاتأكدي..

أنا فهاد اللحظة عقلي حابس مقادرة نستوعب والو... شفت نجمة جاية جيهتي بخطوات ثقيلة.. قربات وهي تهبطلي راسي ويديها كايترعدو.. كاتقلب فشعري بيديها بزوج وأنا واقفة بدون حراك حتى غوتات..

نجمة: هاهي.. هاهي التوحيمة فراسها.. التوحيمة فرا..فراسها..

سمعتيها كاتغوت التوحيمة وأنا نعرفها كاتهضر على واحد التوحيمة عندي فراسي لكن مكاتبانش بالشعر.. توحيمة صغير فالشق الأيسر من بشرة راسي..

نجمة: أسماء (شدات وجهي بيديها) أسماء مايمكنش.. أسماء نتي هي بنتي.. أسماااء نتي بنتي..

جات عيني فعينيها مباشرة وهي طيح على ركابيها وعنقاتني من رجلي وبدات كاتبكي بصوت كلو ألم كايقطع فالقلب..رقية بدات غير كاضور فعينيها وأنا بقيت واقفة بلا حراك..

أنا: كيفاش..كي..كيفاش أنا بنتك.. فهموني راه راسي غايطرطق فيه شي عرق..

نجمة: (مزال على نفس الوضعية وكاتهضر بصوت باكي وتنخصص) قبل 20 عام.. ولدت بنت بحال شي ملاك كنت فرحانة بزاف لكن فرحتي ماكملاتش حيت راجلي كان قالي بللي الا ولدت بنت غايلوحها للكلاب ياكلوها.. كان جاهل سكايري مكلخ ديال لخلا.. كنا ساكنين فأكادير حيت بزوج أصلنا شلوح.. كانت أول بيبي ليا وولدتها عند هاد الكافرة بالله حيت كنت فالسوق حتى شدني لوجع وداتني لدارها على أساس أنها تولدني حيت قابلة.. مللي ولدت كانت صحتي عيانة بزاف وبقيت عندها 3 أيام حتى وليت شوية.. كنت فرحانة ببنتي وسميتها أسماء.. كانت كاتعجبني بزاف هاد السمية.. خفت عليها من راجلي وطلبت من رقية تخليها عندها.. نمشي نجمع حوايجي وشي بركة ونجي ناخد بنتي ونهرب بيها حيت تقهرت بداك الزواج ديال الدل (كاتبكي) تقت فيها وأمنتها على بنتي ومشيت.. مللي وصلت لداري لقيت راجلي وعائلتو تما وساقو لخبار أنني ولدت حيت وصلو ليهم الناس أنني شدني لوجع فالسوق .. سولوني فين كنت هاد 3 أيام وسولوني على المولود ..قلت ليهم أنني ولدت بنت وأنني باغا نطلق.. لكن هوما كانو جنس قصيف قباح بزاف.. ضربوني وتكرفصو عليا وأنا نافسة وماخلاونيش نرجع عند بنتي... حبسوني فالدار سيمانة لكن فالأخير قدرت نهرب بلا فلوس بلا حوايج.. مشيت نجري عند هاد لمرا عند من خليت بنتي وهنا غاتكون الصدمة للي غاتقتلني.. مللي غايقولولي أنها سيمانة هادي باش سدات البيت فين ساكنة ومشات بحالها وحتى واحد معارف فين..

مللي قالو ليا جيرانها أنها مشات بحالها ودات معاها كبدتي وليت كي لحمقة نجري ونسول فالناس وفيدي تصويرة وحدة للي كانت رقية صوراتها نهار تزادت باش تبقى ذكرى..قلبت أكادير كاملة لكن مالقيت ليهم حتى أثر مرضت ودخلت شي أيام لمصح عقلي دخلوني ليه شي ناس لقاوني فحالة خايبة ومن بعد مارجع ليا عقلي شوية قررت نخوي لمدينة بعدما طلقني راجلي.. جيت للرباط وقررت نبدا حياة جديدة وخا قلبي ماعالم بيه غير الله.. ومن تما وأنا كاندعي فكل صلاة أنني نتلاقا هاد العدوة شي نهار باش تعطيني بنتي حتى لقيتها ليوم من بعد 20 عام... ودبا (كاتبكي وضحك) ودبا جاية تقولي أن البنت للي شهور وهي معايا ودايراها بحال بنتي.. هي بنتي الحقيقة من دمي ولحمي.. أسماء نتي هي بنتي نتي كاتشبهي ليا وفيك نفس التوحيمة وقلبي حاسك بنتي ورقية مابدلاتش ليك السمية للي سميتك... نتي هي بنتي اهئ اهئ.......

من بعد ما سمعت قصة خالتي نجمة ، مشاعري ترونو ماعرفت واش نحزن ولا نفرح...نضحك ولا نبكي.. نحزن على هاد الفراق للي دام 20 سنة وعلى الظروف اللي دازت منها.. ولا نفرح حيت خالتي نجمة للي بحال ماما هي ماما الحقيقية بقيت غير واقفة وهي مزال معنقا رجلي وكاتبكي.. الصراحة مللي كانت رقية كاتقولي بنت الزنقة مك لاحتك ليا ومشات كنت كانحقد على الأم ديالي وكانقول عمري نسمح ليها.. ولكن مللي سمعت قصة ماما وأنني ماشي بنت الزنقة وأنها طول هاد المدة كانت كاتعذب كثر مني كيفاش غانحقد عليها ؟

نزلت عندها وشديتها حتى وقفات وتقابلات معايا بقيت كانشوف فعينيها الرماديين للي ولاو طايبين بالدموع تغررغرو عينيا وأنا نعنقها بالججججهد وبديت كانبكي بصوت مسموع وهي زيرات عليا كثر وكثر بقينا معانقين وكانبكيو وطحنا للأرض وبقينا معانقين فنفس الوضعية وكاتبوسلي راسي وعنقي ووجهي وعينيا وتعاود تعنقني بقينا هاكاك مدة عاد بدينا نتهدنو شوية بشوية..

أنا: نتي هي ماما .. نتي ماما للي طول عمري كانحلم بيها.. وطول هاد المدة للي عرفتك كانتمنى تكون ماما بحالك.. والمعجزة هي أنك نتي ماما اهئ اهئ اهئ..

نجمة: اه على هاد كلمة ماما.. 20 عام ا بنتي وأنا كانتمنى أنها تخرج من فم بنتي أسماء... وأخيرا لقيت روحي وأخيرا لقيت عمري.. الحمد لله ياربي.. (سجدات فالأرض وكاتبكي)

أنا: واش أسامة خويا؟

نجمة: لا ا بنتي ماشي خوك حيت هو ماشي ولدي.. لكن أنا للي ربيتو مللي يالاه تزاد... فداك البيت فين كنت ساكنة فالرباط كانت حدايا واحد الجارة أم عازبة.. ولداتو وماتت مسكينة ووصاتني أنني نربيه ونتهلا فيه وداكشي للي درت.. وفرحت بزاف حيت عمر عليا شوية من الفراغ للي خليتيلي..لكن راني كانعتابرو ولدي وكثر..

أنا: هو عارفك مربياه..

نجمة: أكيد.. مللي كان صغير قلت ليه الحقيقة باش يتعايش معاها ماشي تال الأخير ونصدمو..

أنا: اجي فين رقية (كانضور عيني فالمكان)

نجمة: كانظن هربات.. تمشي الله يتبعها لبلا كون بقات كون رتاكبت فيها شي جريمة.. واش كانت كاتعذبك ا بنتي

أنا: اه... سبق ليا وعاودت ليك على كيفاش كانت كاتعاملني

نجمة: الله ياخد فيها الحق.. ليوم هو أسعد نهار فحياتي.. وان شاء الله نعوضو بعضياتنا على كل ما فات

أنا: معلوم.. عمرنا غانتفارقو ا ماما

نجمة: عاوديها

أنا: (كانغوت ) ماااااامااااااااا

رجعات ماما عنقاتني وبقينا جالسين على الضس كي لحمقات والشيفور واقف حدا الطوموبيل وكايشوف فينا مفاهم والو ههه

بعد هاد اللحظات ديال الحقيقة والمشاعر والشوق.. نضنا أنا وماما (مغانبقاش نقول خالتي نجمة أكيد هه) للطوموبيل.. ركبنا وتكيت عليها.. طلبنا من الشيفور يوصلنا لدار خالتي أخت ماما الله يرحمها.. وصلنا وخبرناهم بالحقيقة للي هي أنني بنت خالتهم للي كانت تالفة ، فرحو بيا بزاف وفرحو لماما وخا هوما فقدو ماماهم.. سبحان الله ربي كايعطي لشي وياخد من شي..قررنا أننا نرجعو لطنجة فالصباح وداكشي للي كان..

شدينا الطريق فالصباح وحنا كلنا حماس نقولو ليهم الخبر للي كتاشفنا فهاد لمشية ديال الدار البيضاء..

أنا: (يالاه دخلنا للفيلا) السلام..فاطمة فين مدام سهام..

فاطمة: على سلامتكم.. راهم يالاه كايتجمعو على طابلة الغداء

أنا: وخا.. (شديت فماما) اجي معايا😍..

مشينا عندهم ولقيناهم تجمعو كاملين.. شافتني كرزة جات تلاحت عليا تبوس وتعنق.. ناضت مدام سهام وشيماء سلمو علينا وحتى سفيان وفوزية..

سهام: لالة نجمة كيبقا الخاطر شوية..

نجمة: اش غانقولك .. فقدنا ناس وكسبنا ناس

سهام: كيفاش زعمة

أنا: أنا غانقولك كيفاش.. مدام.. كرزة.. شيماء.. خالتي نجمة صدقات هي ماما.. ماما الحقيقية اهئ اهئ

كلهم حلو فمهم بالصدمة وحتى الخدامات وكلشي بقا مخرج فينا عينيه.. بديت نعاود ليهم على مللي مشينا حتى كيفاش تلاقينا رقية وكيفاش كتاشفنا الحقيقة.. أغلبيتهم نزلو دموعهم والابتسامة على وجههم..

سهام: يا سبحان الله ..انه على كل شيء قدير.. شكون قال ا نجمة أنك بسباب موت ختك غاتلقاي بنتك.. شكون قال أنكم غاتلاقاو ديك لمرا تما.. وشكون قال أنك نتي وأسماء غاتلاقاو أصلا فالرباط وتوليو بحال الأم وبنتها وفالتالي غاتكون هادي حقيقة.. فعلا فرحت ليكم من قلبي (كاتمسح دموعها)

جاو شيماء وكرزة عنقوني وحتى سفيان عنقني وفرحو لينا بزاف.. فوزية بانت ليا مامهتماش أصلا ولكن دارت الصواب وصافي.. جلسنا على الطبلة كاناكلو ونضحكو ونتعاودو وكل مرة نبوس ماما وقلبي غايطير بالفرحة..

أنا: ماما كملي باش نمشيو نقولوها لأسامة

سهام: اه سيرو غايكون غا فالدار حيت ليوم الأحد مغايكونش خدام

نجمة: هانا كملت يالاه نوضي..

مشينا أنا وياها دخلنا لقيناه عاد غايتغدا..

أسامة: جيتو.. ماما كيبقيتي من جهة خالتي شوية

نجمة: الحمد لله ا ولدي.. قلبي مزال محروق عليها ولكن ربي بغاها ماعندنا مانديرو..

أسامة: الله يرحمها.. أسماء لاباس (عنقني)

أنا: لاباس.. أسامة جينا نقولو ليك شي حاجة

أسامة : قولو

نجمة: صبرو..

مشات حلات لماريو وجبدات واحد الصنيديقة.. ومنها جبدات الصورة ديال البيبي للي هي أنا.. للي كنت شفت عندها داك النهار..

نجمة: أسامة شكون هادي..

أسامة: (كايشوف فيا زعمة مابغاش يقول قدامي)

نجمة: غير قول

أسامة: بنتك

نجمة: للي هي هادي للي واقفة قدامك..

أسامة: 😨 كيفاش؟؟؟؟!!!

أنا: اه ا أسامة.. نجمة ماما وأنا هي بنتها أسماء للي فقدات هادي 20 سنة (عاودنا ليه)

أسامة: (عنقني بالجهد وعنق ماما) ماتصوروش شحال أنا مصدوم وفرحان فنفس الوقت.. أصلا للي كان يشوفكم يقول أم وبنتها.. سبحان الله.. ماما أنا فرحان حيت عارف أن هادي هي فرحتك .. لقيتي بنت الوحيدة

نجمة: لا ماشي وحيدة.. أنا عندي جوج وليدات.. أسماء وأسامة.. غير دبا أسماء مزال جديدة دبا تقدام

انا: ياااااااااااااااك😕

أسامة ونجمة: هههههههههههههه

تعانقنا بتلاتة وجلسنا كانتعاودو ونضحكو حتى للعشية..

نجمة: بنتي نوضي لبيتك تحفظي راه مابقا والو وأنا بغيت بنتي توصل فين بغات ان شاء الله

أنا: وا والله لامشيت.. ليوم غانلصق فيكم تال غدا ونمشي..

أسامة: صافي ا ماما خليها تونسنا وليوم أول ليلة ليكم ونتوما أم وبنتها هههه

نجمة: هههههه واخا ا سيادي.. بقاو هنا هانا غانمشي نشوف اشنو غايكون فلعشا .. ومللي نسالي نجيب لعشا ديالنا وناكلو ب 3 صافي..

أنا وأسامة: صااااافي😊

#بعد_مرور_شهر:

نجمة: أسماااء وا بنتي نوضي راه 6 هادي

انا: نااااري من دابا

نجمة: وراه يالاه تلبسي وتوجدي باش توصلي للإمتحان ب نصف ساعة قبل..

أنا: وخا وخا هانا نايضة..

نضت كانتكسل للدوش درت دوش خفيف وخرجت نشوف مانلبس... اه حقا ليوم الوطني ، دازت شهر وأنا كانوجد ونحفظ مكانخرج مكانعمر مع كرزة بزاف وحتى هي قالتني عليها.. ماما كاتهتم بيا وتقادلي بيتي وحوايجي وماكلتي.. حيت مكانلقاش فين نحك راسي..

جبدت تريكو خفيف باج سامبل خشيتو فشورط جينز قصير وصباط عالي فالباج صايبت شعري سامبل وخليتو على راحتو وكتافيت بماسكارا.. هزيت كلشي للي غايخصني فصاك وحليت لباب باش نخرج الساعة خرجت فماما..

نجمة: اش هاد الشعورات واش غادة للامتحان ولا للحفلة😡

أنا: وراه كايعجبني مطلوق😢

جابت بانضة وحلات الصاك وحطاتها فيه..

نجمة: مللي تبداي الامتحان جمعيه.. ومللي تسالي طلقيه.. وهكا بزوج غانبقاو مرتاحين ياك..

أنا: (عنقتها ) أحسن ماما فالعالم

نجمة: يلاه دوزي تفطري

أنا: وخاااا

نزلت فطرت وماما واقفة عند راسي ودك ليا الزبيب ففمي 😂 زعما هو للي غاينجحني.. وخا كان الصباح بكري فاقو كرزة ومدام سهام وشيماء تمناو ليا التوفيق وشجعوني.. لقيت الشيفور كايتسناني باش يديني للمؤسسة فين غاندوز.. ماما مسكينة ماسكتاتش من الدعاء للي دارلي الطمأنينة فقلبي حيت كنت خايفة بزاف ..

مشيت دوزت الامتحان فظروف زوينة وهاكاك دازو أيام الإمتحان كاملين حتى ساليت.. نسبيا كنت راضية على خدمتي وكانو عائلتي كايشجوعي بزاف الشي للي خلا ثقتي فراسي وفربي كبيرة..

#فبيتي:

كرزة: دبا ساليتي لباك ياك..

أنا: اه

كرزة: ايوا اراك لتفيجيط

أنا: اش هاد المصطلحات لعروبية

كرزة: هاي هاي هاااااااي على أسماء.. ياكما دوزتي لباك وكبرات فيك الخرية .. نسيتي يامك

أنا: ناااري كان راسي باااارد بدينا ثاني

كرزة: كنت مبعدة منك حيت مدام سهام كانت مواعداني بللي الى بعدت منك وخليتك تقراي غاتخليني ندوز أحسن صيف.. فلوس ولبس وخريج وتسافير😍😍😍😍😍

أنا: هاي هاي غاتبرعي على ضهري..

كرزة: الله يعطيك الدل راه غاتكوني معايا..

أنا: ان شاء الله.. خللي يخرجو النتائج بعدا

كرزة: الله يسمعنا خبار لخير.. بغيت نقولك واحد لخبيرة

أنا: اش؟

كرزة: يااااربي يااااااااااااربي تسمح ليا .. شوفي راه مانويتش نتصنط عليهم

أنا: ايه وا قولي..

كرزة: داك النهار غادة لبيتي مابيا ماعليا حتى كانسمع ممممم اححح

أنا: 😨

كرزة: ش..شيماء وحسام...

أنا: ضربت على حناكي اويلي ماتقوليهاش

كرزة: والدم اصاحبتي..

أنا: اويييييييييييييلي..

كرزة: ضربات صبعها الصغير مع القنت ديال الدروج حتى طار ليها الضفر ولقيتو كايمسح ليها على رجليها وباسها ليها😨😨😨😨😨😨😨

انا: شيرت عليا ب بانطوفتي.. ايوا الله يغصبك ا بنت لحرام تفوووووو على ديلمك

كرزة: نتي عقلك فيه دار الدعارة وأنا مالي اختي ضارباني ب بانطوفتك خانزة... غا للي قالت اح راه كاتهزو

أنا: مكاين الخانزة قدك.. وانتي كانتوقع منك غا لمسخ عليها مشا عقلي تما..

كرزة: يخ (كاتعوج فمها)

أنا: كرزة بغيت نسولك و....

كرزة: (قاطعاتني) لا ماسولش فيك.. وهاد الشهر عيط غا مرة وحدة.. ولينا حتى هي مكاتهضرش مع مها.. صافي؟

أنا: هه مامساليينش😉

كرزة: هادو بعدا ممكن تفكري فديك اح ديال دار الدعارة😉

بعدما دوزت امتحانات الباكالوريا قررت مانبقاش غير جالسة فالدار..قبلت باقتراح مدام سهام للي هو أنني ندوز لبيرمي وندخل للاصال وندير أنشطة أخرى من اختياري.. فعلا تسجلت فيهم بزوج وبديت فيهم..هكا دازت مدة انتظار الامتحانات مابين الدار ولاصال ولبيرمي ولخريج مع كرزة.. شرينا بزززاف دلحوايج ديال الصيف.. أما ماما فهي ديما معايا ومهليا فيا وفجنبي..لكن فهاد المدة كانت واحد علامة استفهام كبيرة فوق رأس كل فرد من أفراد العائلة..للي سؤالها هو أسد ولينا مالهم قطعو التواصل؟ حسام حتى هو قالينا أنه مكايهضرش معاه ومدام سهام سولات فالشركة للي تما قالو ليها أنه مكايجيش وهنا بدات المخاوف كاتنتابهم خصوصا فوزية للي ماعرفات بنتها اش طاري ليها..

دازت شهرين ماشفت أسد الصراحة تواحشتو بزاف لكن تصرفاتو الأخيرة معايا كاتقصح ليا قلبي جيهتو.. ومشوشة عليه بسباب هاد الغبرة للي دارو مللي مشاو..

#بعد_ثلات_أيام:

شيماء وكرزة: أسماء أسماااااااء

أنا: (فايقة مفزوعة) هااه مالكم ا ناري الصباح هذا

شيماء: راه خرجو النتائج ا صاحبتي راه تلاحو فالسيت

أنا: حلفي.. قولي والله

كرزة: وااا والله يالاه صونات لينا صاحبت شيماء قالت لينا ندخلو نشوفو

أنا: نااااري لpc فين لpc (نضت ليه نجري)

كرزة: اناري غا بشوية ستري غا طرمتك (كنت لابسة غا شورط قصير وسوتيامات)

أنا: لبنات لبيسي طافي ناااري (درتو فلبريز) واش الضو ماخدامش؟

شيماء: اواه مايمكنش (شعلات الضو) هاهو خدام

كرزة: يمكن لبريز للي فيه مشكل.. يالاه لبيتي ولا لبيت شيماء

أنا: وخا يالاه

ناضو سبقوني وخلاوني كانلبس تيشورط عليا .. غسلت وجهي وخرجت غادا كانزرب لبيت كرزة حتى حسيت بيد جراتني ودخلاتني لبيت..

أنا: شكون نتا (ساد على عيني) حيد عليا يدك .. شكون واش سفيان

الشخص: مبروك عليك الباك مونسيون ا لالة.. فخور بيك

بقيت مبلوكية فبلاصتي وركابيا فشلو لسببين...الأول هو سمعت أنني نجحت بمونسيون والثاني أن الصوت للي سمعت جاني بحال صوت شي واحد مؤلوف بقيت شي 2 ثواني عاد استوعبت شكون هو الشخص للي شادني..

مجد: (حيد يدو على عيني) أسماء العلوي.. صاحبة العيون الرمادية.. جالسة هنا ( كايضور عينيه فالبيت) فهاد القصر لفاخر كاتمتعي ليا مع راسك وأنا جالس كانضور بين لحباسات والصبيطارات ديال الحماق ممممم مزيان.. مالكي ساكتة؟ راه قلت ليك مبروك الباك راه شفت نتيجتك أنا الأول وبغيت نفرحك..

أنا: مج...... (ضرب ليا برا فكتفي طحت فلبلاصة)

مجد: أوبس ... تو تو تو أسومة للأسف غانضطرو نعاودو نفس السيناريو..

#في_مكان_آخر:

سكينة: (مع رجالها) دخلو دخلو .. اه ربطوها هنا.. قولو ليا واش مشافكم حد؟ فين مجد؟

مجد: لا ماشافنا حد.. لينا فعلا صدقات مخلصة وأمنات لينا مزيان كيفاش غانقدرو نجيبو هاد الحتالة لهنا

سكينة: الصراحة أنا ماتأكدت من صدقها حتى شفتكم دبا قدامي.. (كاتشوف فأسماء) اااااه وأخيراااا وأخيييرا طحتي بين يدي بسبابك حنا هربانين دبا من المنظمة بسبابك خويا تعذب فالحبس بسبابك حياتنا تخربات ولكن كنواعدك أنك غاذوقي أشد أنواع العذاب على يدي وديك الساعة نشوفو شكون غايفكك منا

تخوى ليا لما على وجهي وأنا نفيق مخلوعة لكن عينيا ماقادراش نفتحهم.. بديت نحلهم بشوية حتى كانلقا وجه سكينة وعينيها الزرقين مفيكسيين مع عينيا..

سكينة: تفوووو (دفلات ليا على وجهي)

أنا: (مزال كانحاول نستوعب) ف..ف..فين أنا

سكينة: فجهنم الكحلة

هزيت عيني فيها مزيان وتأكدت أن للي كاتهضر قدامي راها سكينة.. ماهضرت مابكيت مادرت حتى شي حركة ، بقيت منزلة راسي وساكتة حيت بحال هاد الصدمات صافي ولفتهم ووليت نتوقعهم فأي لحظة صافي سنيت على راسي أنني ماعندي حياة وعمر فرحتي غاتكمل.. أكيد غانموت..حيت صافي طحت بين يدين هاد الزوج للي مابغاوش يتفرقو عليا.. اللهم نموت بهدوء بلاما نعذب راسي كثر ما أنا معذبة.. كان المكان عبارة على بيت صغير مهجور ولحيوطا ديالو من لخشب.. رجعولي ذكريات المستودع خصوصا مع أنني مربوطة بنفس الطريقة.. كتافيت بابتسامة فقط.. ابتسامة كاتحمل كل مشاعر الخوف والألم والصدمة والاحساس باقتراب النهاية.. نفس المشهد كايتعاود غير المرة لولا ماكنت فاهمة والو.. أما دبا فاهمة كلشي..

سكينة: (تكات فالأرض وكاتشوف فالسقف) من نهار تسلطتي علينا انا وخويا تقلبات حياتنا.. كان كايصحاب لينا صيدناك كضحية لكن حنا كنا هوما الضحايا.. صيفطك أسد باش تجي فطريق مجد ويجيبك عندنا للدار وحنا نضنو اننا ربحنا جثة جديدة.. خليتينا مكملين الدور وتانتي كنتي لاعبة علينا الدور ببراعة..ديناك لمستودع الموت ونهار غانقتلوك هربتي بطريقة غريبة.. أنا ومجد ماكناش فاهمين أنك دايرة يدك فيد الرئيس أسد وكاتلعبو علينا وهادشي كامل باش تهربو ختو وتخليو المنظمة تقتلنا..من بعد ماهربتي جاتني معلومات أن الزعيم الثاني للمنظمة كايقلب عليا أنا ومجد حيت كايضن بللي حنا للي خطفنا شيماء وعطيناها لأسد.. خويا كان غابر ديك الفترة ومن بعد مدة اكتاشفت أنه كان فالحبس حيت نتي دخلتيه ليه وتما حقدت عليك وقررت أنني نقتلك.. كنت هاربة من المنظمة وجيت للمغرب ..تيريت فيك بالقرطاس لكن مامتيش ومع ذلك بقيت مواعدة نفسي أنك غاطيحي غاطيحي بين يدي وهادشي للي طرا .. ليوم أنا أسعد وحدة حيت غاندمك ونتاقم منك على هاد اللعبة للي لعبتي مع كاطا وليو.. غانتاقم ليا ولخويا

كانت كاتهضر وأنا غير كانسمع وكانتصدم فكل كلمة قالتها.. كيفاش هاد الأحداث للي كاتعاود وللي لا أساس لهم من الصحة واش من نيتها هادي.. واقيلة حماقت بحال خوها.. كيفاش كنت دايرة يدي مع أسد وكنت كانلعب عليهم!!!!

أنا: اش كاتقولي واش حماقيتي.. هادشي للي كاتقولي كلو كذوب أنا عمري فكرت نلعب على شي واحد نتوما للي من ديما كاتعذبوني وتخرجو فطريقي..

مجد: (دخل) اوااااه.. نكري وقولي أنك ماشي نتي وأسد للي هربتو ختو من عند الزعيم ولصقتوها فيا أنا وختي

أنا: (خرجت فيه عيني) كيفااااش؟؟ ياك نتا للي...

مجد: (بالغوات ) سدي فمك الكلبة (قرب حدايا وغمزني بمكر) آخر مرة نسمع صوتك

سكتت وبديت نفهم الفيلم كامل.. للي هو أن مجد كايكذب على ختو باش يبرأ راسو ويخليها توقف جنبو.. مجد هو للي هرب شيماء وعطاها لأسد مقابل ياخدني أنا وهرب على ختو وخلاها.. ودبا قنعها أنهم كانو بزوج ضحية خطة للي كانت من تصميمي أنا وأسد باش نطيحوهم فالفخ بزوج ونخليو الزعيم يضن أنهم هوما للي خانوه ورجعو لأسد ختو..

سكينة: (ناضت وجبدات جنوي كبير من سروالها) أنا مغانبقاش نكثر الهضرة ونرتاكب نفس الغلط الأول.. غانذبحك دبا ونرميك للكلاب يفتارسو لحمك..

بدات سكينة كاتقرب جيهتي ومجد كايشوف فيا ويبتاسم ... شداتني من شعري ووقفات ليا راسي ..صافي عرفتها غاتذبحني.. غمضت عيني وكانتسنا ديك التدويزة ديال الجنوي على عنقي.. شهدت وجاتلي فبالي ماما مسكينة للي مزال مافرحات بيا..يالاه حطات سكينة لموس على عنقي وأنا نسمع صوت طلقة ديال الرصاص...

يتبع