أسد: (بابتسامة) شكرا بززاف ولكن بغيت نزيد نعتاذر بطريقة أخرى
أنا: (ساهية فسنيناتو اللي كايهبلو) اشمن طريقة !
أسد: المهم غدا مع ل5 ديال الصباح غاندوز عندك ونمشيو بزوج لواحد لبلاصة غاتعجبك..ولكن يبقى سر بيناتنا هادشي!
أنا: (بشك) ولكن علاش هادشي كامل؟ هانتا جبتيني هنا وعتاذرتي؟ علاش نعاودو نخرجو وبسرية؟ نتا مكاتعرفنيش بعدا وباغي تخرج معايا
أسد: (سد فمي بصبعو) شششششش عفاك (قرب حدا وجهي) غدا ماعندي والو وبما أنك أول مرة تجي لأمريكا ودوزتي فيها أيام صعيبة..قررت نخليك دوزي نهار زوين حيت من هنا سيمانة غاترجعي للمغرب..اش قلتي؟
أنا: (ناااري أسماء قلتي مغاتبقايش تيقي ولكن هانا مشيت وطرات شي حاجة أكيد مغاتكونش أسوأ من داكشي اللي داروه فيا مجد وسكينة وأصلا أسد ولد عائلة ومدام سهام أحسن أم مايمكنش يكون ولدها مامزيانش)
أسد: هيهو فين ساهية
أنا:لا لا هانا معاك صافي موافقة
أسد: صافي شكرا بزاف..أجي نتمشاو؟
أنا: ههه اهاه واخا.......بقينا غاديين فجنب بعضياتنا ولبرد كايطير شعري حتى كايوصل عند أسد وهو كايبتاسم بمعنى مكاين مشكيل..كان جو راااائع بزاف وخصوصا مع هاد التيتيز اللي حدايا
أنا: اااااااه (تلوات ليا رجلي وكنت غانطيح حتى شدني أسد)
رجلي تلوااات ااااااه😢
أسد: أواه نتي رجلك مريضة اش داك تلبسي شي طالون
أنا: 😢😢😢😢😢😢😢
أسد: حيديه وحاولي توقفي........حيدت ليبوط ولكن ماقديتش نوقف فمرة
بقا أسد هازني وغادي بيا يمكن راجعين للطوموبيل ولكن كان شارد كايفكر فشي حاجة ... رجعنا فين كنا نزلنا فالأول وهو يهبط راسو شاف فيا..
أسد: فيك الجوع؟
أنا: شوية😄
أسد: يالاه ناكلو حتى أنا جاني الجوع......بقا غادي هازني حتى دخلنا لواحد المطعم وكلشي كايشوف فينا ..حشمت بزااف من منظرنا حتى جلسني على كرسي فطابلة كاطل على لبحر..وجلس تقابل معايا بقينا 2 دقائق وجا النادل عطانا لmenu
أسد: شنو تاخدي؟
أنا: بحالك
أسد: هه واخا......ختار أسد لماكلة وعيط على النادل ...بقينا جالسين حتى بان ليا مجد داخل للمطعم بوحدو وكيقلب بعينيه على مكان يجلس فيه.......أنا صافي مشيت عند الله بالخلعة ماعرفت واش نوض نهرب ولا نتلاح من الشرجم ولا نشهد على حياتي ياربي لحبيب فينما نخرج نتلاقاهم ديك لمرة سكينة ودابا مجد..لاحظ أسد توثري وفمي اللي ولا بيض بالخوف
أسد: أسماء مالكي؟........... شافني مجاوبتوش ومركزة عيني جيهة مجد وهو يضور يشوف فاش كانشوف..
أنا: ياربي ياربي اش ندير ياربي عاوني ياربي ......
و فجأة...وقع اللي كنت خايفاه يوقع...جات عيني فعينين مجد وشافني..حسيت من خلال ملامحو أنه تصدم وبقا كايشوف فيا شوية حول نظراتو للشخص للي جالس معايا وشاف فأسد....صافي بديت نتسناه يجي عندي لكن لا...مللي شاف أسد بقا راجع باللور حتى خرج ومشا بسرعة كأنه مكانش هنا
انا: (بعصبية) كرزة عطيني التيساع الله يرحم جدك .. هزني حيت نتي عاطياني نلبس داك ليبوط فيه جوج ميترو وطحت بيه..وبزاف عليك قالا يتقبني يصحاب ليك أنا بحالك
كرزة: (ضرها كلام أسماء وتصدمات من الطريقة باش جاوباتها) سمحيليا كنت غير كانضحك....مشات كرزة من حدايا بكل هدوء عاد حسيت براسي كيفاش تصرفت معاها
أنا: 😢 نتي ا كرزة معارفاش باش كانحس.. راه لموت قريبة مني راني كانعيش فرعب اهئ اهئ..
عيطت على فاطمة باش تعاوني نطلع لبيتي وفعلا جات طلعاتني وعيطات ليا على الطبيب..تكيت فبلاصتي وبقاو كايدوزو قدامي أحدات هاد الخرجة اعتذار أسد ومجد اللي جات عيني فعينو.. بقيت خاشية وجهي فمخدة وكانبكي حتى دخل عندي الطبيب شاف رجلي وعاود دار ليا فاصمة وعطاني شي دوا.. طلب مني مانعطيهاش الجهد وخرج..بقيت فديك الوضعية حتى غفيت وداتني عيني..
#عند_أسد:
(واقف على حافة جبل عالي وخاشي يديه فجيابو..كايتأمل فالسما ومغوبش بحال ديما..
أسد: أنا أسد ..أسد الفارسي مغربي من والدين مغاربة..عمري 29 سنة وكانتعتابر من أغنى رجال أعمال أمريكا لكن عندي فقر كبير فالأحاسيس.. فالفرحة والسعادة والحب والرحمة والهنا...خدمتي فمجال التجارة العالمية..الاستيراد والتصدير..ماشي هي خدمتي الوحيدة حيت أنا رئيس أكبر منظمة للتجارة فالأعضاء البشرية كاينة فأمريكا... وكانشارك فاجتماعات اللي موضوعها قتل الناس وفصل أعضائهم على جثتهم..عائلتي اللي هي ماما معارفاش هادشي حيت كون عرفات كانت تبرأ مني وأكيد أي أم ماتقدرش تشوف ولدها قتال ولكن هادي هي حقيقتي والواقع اللي كانعيش أما الأب ديالي اللي حاشا واش يكون أب مات هادي 4 سنين...عمري حبيت شي بنت حيت أصلا ماحاسبش راسي عندي القلب اللي غايبغي شي وحدة...كاندوز علاقات رخيصة مع بنات رخيصات كايساليو فليلتهم..على ذكر الليلة..فواحد الليلة كنت راجع من خدمتي حتى جات فطريقي بنت باينة حاولو يتعداو عليها شي وحدين..شعرها طويل بزاف وملامحها زوينة ..لكن كانت كاتخلع بالدم اللي كارم على وجهها..ماعرفتش شنو اللي خلاني نعتقها ونداويها.. اش هاد التناقض واحد قتال وكاينقد الناس..جبتها لداري ومللي فاقت تصرفاتها كانو مبرهشين قدها قداش وكاتزعلل وتفركل وتغوت غابوحدها..ولكن الصدمة الكبرى اللي زعزعاتني هي نهار تلاقيت دوك 3 دالأغبياء وكتاشفت أن البنت اللي هربات من المنضمة هي هاديك اللي عندي فالدار وكاذبة علينا فسميتها..رجعت وانا مصمم انني نخليها تقول الحقيقة فجاتني فكرة أنني نستفزها ونطعنها فشرفها حتى عتارفات بكلشي....قررت أنني نرجعا للمنظمة لكن قبل نحاول نعتاذر منها قبل ماتموت حيت ضروري مانقتلوها..الى بقات حرة غاتخرج علينا كاملين..ديتها لبلاصة كاتعجبني وعتاذرت وخا مموالفاش ليا ندير هاد الحركات ..عينيها الرماديين فيهم براءة عمري ماشفتها فشي قحبة..ولكن طرات حاجة ماكنتش متوقعها واللي هي أن ليو شافنا بزوج..... كانت خايفة بزاف ولكن أنا ماهماتنيش هي همني ليو وشنو غايكون فكر فديك اللحظة...من بعد ماخرج والصدمة على وجهو صونا عليا وخرجت نهضر معاه..قالي هضرة فرحاتني وصدماتني بزاف وفاقت توقعاتي الشي اللي خلاني نقرر قرار حاسم و اللي غانطبقو بعد غدا....)
من بعد ماسالا أسد الهضرة اللي كانت كاضور بينو وبين نفسو ركب فطوموبيلتو وتوجه للدار طلع نيشان لبيتو وسد عليه بلاما يشوف ولا يهضر مع حتى واحد....
أسماء فاقت بدلات حوايجها لبسات بيجامة وعاودات رجعات للفراش مابغات لا تاكل لا والو.. كان الهدوء مستعمر الفيلا ديك الليلة كل واحد فبيتو ساد عليه شي مقلق شي خايف شي كايبكي فصمت..فانتظار غد جديد وأحداث جديدة....
أنا: (يالاه حليت عيني كانشوف فالسقف) كرزة.. مسكينة غاتكون مقلقة مني هي غير ضحكات معايا وأنا ندمتها بفف خصني نوض نمشي عندها..نضت مشيت للدوش عمرت لبانيو وبقيت مرخية فيه شي ساعة عاد نضت تحمحمت..لويت عليا فوطة وخرجت مشيت جبدت سروال قصير فلكرونة وقاميجة قصيرة فالأسود ولبست بانطوفة على شكل ليبوط فلون لقاميجة على حساب رجلي ..نشفت شعري وخليتو على راحتو درت ماسكارا وتوجهت لبيت كرزة..
أنا: (حليت لباب) كرزة!
كرزة: (كاتمشط شعرها قدام لمراية) وي أسماء
أنا: (سديت لباب ودخلت) جيت نطلب السماحة حيت غوت عليك لبارح والله ماقصدت كنت معصبة شوية
أنا: (جريت لغطا على الناموسية وتلويت فيه) يا..يا..ك ياك قلت ليه بقا دق الباب
أسد: وانا قلت ليك هادي داري وندير فيها مابغيت😉
أنا: علاش جيتي عندي؟
أسد: جيت نفكرك فالموعد ديالنا غدا ماغايكونش مع ل5 دالصباح ولكن تال لعشية (كايطلع فيا ويهبط)
أنا: صافي صافي وخا ودبا ممكن تخليني نبدل
أسد: (بسخرية) ههه.........حل لباب وخرج بلاما يزيد حتى كلمة
أنا: ويلي ويلي على شوهة عاودت ليه كلشي وجالسة مممم احححح بيبي وييييلي غايقول هادي كاتجسس علينا ويييييلي وشافني عريانة تفووو على موقف غانحشم نبقى نشوف فيه
#عند_أسد:
أسد: (فالدوش طالق عليه الرشاشة) ههه برهوشة.. حسيييت أن داك النهار فالدروج كان شي واحد كان كايطل علينا ولكن مايسحابليش هي..جالسة تعاير كيشي حمقة وعريانة من لفوق..مسطية صافي (تفكر قرارو) ولكن أنا قررت مصير هاد البنت... اه وعندي الصح فهادشي اللي غاندير غدا...حيت هو الصواب وفصالح عائلتي....
#عند_أسماء:
لبست بيجامة فلحمر مطلوقة حد الركابي وتخشيت فلفراش
أنا: (خاشية وجهي فلمخدة وكانهضر) عمري نسا هاد الشوهة 😢 (تفكرت هضرتو) اه وعلاش مابقيناش غانمشيو فالصباح.. ناري متشششششوقة نعرف فين غايديني ..ولكن راه مغانقدرش نهز فيه راسي من كثرة الحشمة..الله يخرج غدا على خير وصافي..😪
صباح جديد..فقت مشيت دوشت ولبست كيطمة كيف العادة..نزلت لتحت لقيتهم كايفطرو..فوزية ولينا كون كانو نظراتهم قرطاس كون تقبوني كاملة..مدام سهام كاتشرب القهوة فهدوءها المعتاد ..كرزة كاتصرط وتفيبري بحالا فيها الدودة😂 أما سفيان وأسد مبانوليش..لحقت عليهم للطبلة وسلمت عليهم ، جاوبتني غا قزمتي الزوينة ومدام سهام ولوخرين خنزرو فيا😏 ..فطرت بسرعة وغمزت كرزة باش تبعني ..
مابان ليا حتى واحد لتحت وأنا نخرج نيشان لعندو كيما طلب مني..حليت الطوموبيل وركبت
أسد: ماشافك حد؟
أنا: (بنوع من الإستغراب) لا ولكن علاش هادشي..
أسد: مولات لأصوات غاتغير منك مثلا
أنا:(طلعات معايا الحرارة بالحشمة وحنيت راسي)
ديمارا أسد الطوموبيل وخرجنا من الفيلا فاتجاه المكان اللي معارفاهش أنا...بقينا غاديين فصمت مدة طويييلة حتى بانلي خرجنا من المدينة... كنا غاديين فطريق وسط الغابة..للحظة جات فبالي الغابة اللي كنت هاربة فيها ديك الليلة وتزير عليا قلبي لكن ماقدرتش نسولو فين غانمشيو ..حاولت نرخي فيا النفس ونتصرف عادي..
حوالي شي ساعتين وحنا شادين الطريق بلا حتى شي كلمة حتى وقف أسد الطوموبيل فجنب الطريق اللي كانت وسط غابة ولكن كانت زوينة ماشي بحال اللي كانو خاطفيني فيها...نزل وضار حل عليا لباب...نزلت حتى أنا فصمت...بقا واقف كايشوف فيا..بادلتو النظرات مدة 3 دقائق وماعرفتوش علاش كايشوف حتى نطق...
أسد: أسماء.
أسد: أسماء..
أنا: نعام...
أسد: سمحيلي بزاف
أنا: علاش؟
أسد: ليووووووو خرج عندي
لحظة صمت جسمي برد ..قلبي وقف مع انتهاء هاد الجملة.."ليو خرج عندي" ليو هو مجد ..ومجد كاين هنا .. وأسد جابني ليه..أي جابني للمنظمة..يعني ليوم هو آخر يوم فحياتي..يعني تغدرت 2 مرات .. يعني أنا أكبر حمارة..يعني مصيري هو نموت تحت يدين هاد المجرمين
أنا: (كانشوف فعينين أسد) ههههههههههههه ههههههه حتى نتا؟ نتا؟ نتا جبتيني هنا باش تسلمني للمنظمة اللي عتقتيني منها النهار الأول؟ (تفكرت مللي قلب ليا الهضرة فالمطعم مللي شفنا مجد تما) ههههه برافو عليك والله طلعتي بحالهم وحسن منهم (بديت غانغوت على حر جهدي ) لاااااااااااااااااااااا شنو بغيتو مني علاش علاش أنا بالضبط كاتلعبو ليا بحياتي هاكا علاش أنا شنو درت ليكم أنا غير درويشة عمري آديت نملة علاش مصرين تقتلوني بأبشع طريقة علااااش...بقيت كانغوت حتى ضرني حلقي وأسد واقف بلا أي حركة
أسد: راه هضرنا فهادشي ودبا غبر عليا وجهك مانشوفكش هنا حتى تكون معاك..
مجد: و..و..وأسماء؟
أسد: قلت ليك غبر من قدامي....
هادشي كامل داز على وذني وانا مزال تحت تأثير الصدمة..شكوناهيا؟ وكيفاش أسد كايغوت على مجد بحالا هو الرئيس ديالو.. وفين سكينة والرجال ديالهم...بقيت كانفكر حتى حسيت بأسد وقفني وقابلني معاه
أسد: أسماء سمحيلي بزاف نتي ماتستاهليش هادشي اللي غايوقع ليك ولكن ماعنديش حل آخر وللضرورة أحكام
أنا: (كانشوف فيه ودموعي شلال) شكرا بزاف... شكرا على كلشي
بقا أسد كايشوف فيا مدة وأنا غير دموعي هوما اللي كايهضرو حتى حط شفايفو على شفايفي بكل حنان وبقا ملصق فمو مع فمي بلاما يتحرك حتى واحد فينا
أسد: (حيد فمو من على فمي) سمحيلي مرة أخرى
أنا: (واقفة كانشوف فيه ومصدومة من هادشي اللي طرا دابا) امتا غايجيو بغيت نموت
أسد: ...يالاه غايهضر حتى شفت ملامحو تبدلو وصدمة كبيرة بانت على وجهو.. خلاني واقفة ومشا كايجري بحال شي سبع..ضرت نشوف شنو واقع حتى بانلي مجد واقف وحداه بنت قدي فالطول..رقيقة وشعرها كحل وطويل..مربوطة من يديها وكاتبكي بالجهد
البنت: أسااااااااااااااد اهئ اهئ اهئ......مشا أسد عنقها بالجهد وهزها بين يديه وكايبكي ..حطها وفك ليها يديها وعاودو تعانقو وكايبوسها فراسها ويديها.. أنا بقيت غا حالة فيهم فمي حتى حسيت بيد شداتني
مجد: أسومتي.. وأخييييرا
أنا: (بديت نغوووت على حر جهدي حتى ضار شاف فيا أسد) عافاك عتقني عفاااااك أسد عفاك ماتخلينيش ليهم اهئ اهئ....بقيت نطلب فأسد حتى حسيت بشي مشوار تحط على نيفي الشي اللي خلاني نغيب عن العالم...
#بعد_مرور_أسبوع:
مجد: أسماء أميرتي نوضي تفطري
أنا: مجد خرج عليا عفاك خليني نوض ندوش بلاما تعصبني الصباح هذا
مجد: واخا سمحيليا هانا خارج مللي تسالي خرجي نفطرو..
خرج مجد وأنا نضت دخلت للحمام ..حيدت حوايجي ووقفت تحت الرشاشة
أنا: اهئ اهئ ياربي تال امتا وأنا غانبقى محبوسة هنا بين يدين هاد الحمق😢 حياتي تقلابات كلها فهاد السيمانة
#فلاش_باك:
من بعد ماتحط منوم على نيفي غبت عن الوعي...كان كايصحابلي صافي عمري غانعاود نفيق ولكن فقت ..اه حليت عيني على غرفة زوينة فاللون البنفسجي..كانت كبيرة بزاف وفيها أثات زوين وراقي.. شفت فحوايجي لقيت راسي مزال لابسة نفس اللبسة!! واش أسد عتقني وجابني للدار؟ ولكن هادا ماشي بيتي.. فين أنا وشنو وقع..نضت من فراشي بغيت نحل لباب كان مسدود بالساروت والشرجم حليتو لكن كان كولو داير بالشبيك والسلوكا!!! مافهمتش اش هادشي! طليت كاتبانلي الجردة والدنيا خاوية..
مجد: (سد فمي بيدو) لا ا أسماء قلبك بغيتو يكون ديالي بمعنى تبغيني ماشي نقتلك...مايمكنش نقتل الإنسانة اللي كانبغيها.. عمري حسيت هاد الإحساس حتى حسيتو معاك (طاح على ركابيه وكايبكي) عفاك سمحيليا كنت غانقتلك وعذبتك ولكن ديك الساعة ماكنتش فاهم اللي واقع ليا.. حتى هربتي وبعدتي عاد حسيت..عييت مانقلب عليك.. ماشي باش نديك للمنظمة لا لكن باش نهرب أنا وياك صافي أنا خليت ختي وخدمتي وبلادي وكلشي غير باش نكون معاك..من أول نهار شفتك حسيت بشي حاجة ماشي طبيعية جيهتك ... وداك النهار فالمستودع مللي طلبتي مني لماكلة وطلبتي نفكك لبيت رغبتك بلاما نفكر وخا عمرها كانت ليا.. وماكنتش باغيك تموتي ولكن راه المنظمة اللي كاتقرر.. حتى ماعرفتش كيفاش هربتي (كيضحك بحال شي حمق) عبرتي هه عبرتي عليهم كون ماهربتيش كون ماكناش دبا..هههههههه
أنا: (كانشوف فيه ومصدومة) الله أكبر هادشي اللي بقا غير يبغيني واحد قتال كايسلخ بنادم ومريض نفسي من لفوق..وجابني تال فرنسا ومطرق عليا لبيبان صافي هذا هو قبري..ولكن شنو علاقتو بأسد؟ علاش أسد داني ليه؟ شكون ديك البنت؟ مابقيت فاهمة والو
مجد: (ناض وقف) راه الدوش كاين وراه شريت ليك بزززاف دلحوايج ههه دوشي ولبسي وهانا غانجيب ليك لماكلة راه من لبارح ماكليتي
أنا: مجد.. مابغيتش نكون هنا ديني للمغرب وبعد مني عفاك
مجد: (عينيه حمارو وجا شدني من كتافي بالجهد) نتي ديالي وغاتبقاي هنا حياتك كاملة حتى نموتو بزوج فهمتي.. بلاما تحاولي تهربي حيت ماغاتقدريش..
أنا:(كانبكي) ونتا مخايفش من المنظمة ؟ سير رجع قبل مايعيقو بيك وينتاقمو منك اهئ اهئ عفاك رجع وخليني تانا نرجع لبلادي و حياتي لبسيطة
مجد: هههههههههههه الى رجعت غايقتلوني بأبشع الطرق حيت غدرتهم ودرت كارثة كبيرة....أنا وياك بزوج هاربين من المنظمة دبا..اللهم خلينا هنا حتى واحد مغايطيح علينا فهاد لبلاصة
أنا: (كانبكي) اهئ اهئ اهئ لا ماتقوليش غانبقا معاك هنا لا
مجد: (غادي فاتجاه الباب) هادا هو الواقع وخصك تقبليه حيت ماعندك حتى حل.. دوشي وبدلي هانا غانوجد الماكلة..
#الحاضر:
أنا: (فالحمام) اه هذا هو قدري ...يبغيني واحد مريض..سيمانة وأنا محبوسة فهاد البيت كانخرج غير ناكل معاه ونرجع.. ضريف معايا ولكن عنيف فنفس لوقت السيد مقطع السلوكة ماعرفت كيفاش غاندير نتفك من هاد الحياة ديال لويل.. شحال من مرة حاول يتقرب مني لكن كانهددو أنني غانتاحر الى قاسني..وفينما نسولو على أسد وعلى ديك لبنت كايقولي ماتسولينيش..بغيت غير نفهم علاش أسد دار معايا هاكا!! (حطيت يدي على شفايفي) باسني! ولكن علاش باسني داك النهار؟ شنو كان القصد ديالو؟ بصيفتي شكون يبوسني؟ أول قبلة ليا كانت مع انسان باعني رخيصة لواحد مريض..
أنا: مجد راك واعدتيني والله وتكون كاتكذب حتى نقتل راسي
مجد: والله مكانكذب غا حللي
أنا: (حليت لباب)
مجد: (كايقلب يدي ) أسماء واش حماقيتي لاش ضاربة يدك صبري هنا.............مشا يجري جاب دوا وفاصمة وقاد ليا يدي..
مجد: واعديني عمرك تعاوديها كيما أنا واعدتك
أنا: (بنفخة) صافي صافي كانواعدك عفاك خرج خليني بوحدي
مجد: وخا ولكن راك مافطرتيش
أنا: مافياش ا مجد غير خرج وسد عليا بحال ديما...... (يالاه مشا يحل لباب)
أنا: مجد امتا غانمشيو؟
مجد: هانا غادي نوجد لكيفاش غانمشيو مللي يوجد كلشي غانعلمك
أنا: اوكي😒
#في_المغرب:
سهام: شيماااااااء وانوضي ابنتي راه لعشية هادي
شيماء: ماما ناااري عفاك غير شوية
سهام: بغيتي ماماك تقلق وأنا عاد رجعات لفرحة لحياتي؟
شيماء:(ناضت عنقاتها) لا لا ماما ماتقوليش هاكا صافي هانا نضت (ناضت قفزات من الناموسية)
سهام: ههههههه الطيران هو الطيران.. وا هبطي للكوزينة تفطري معايا راني ماكليتش ..بغيت حتى ناكلو بزوج
شيماء: واخا يالاه..
أكيد كاتساءلو شكون شيماء.... شيماء هي بنت مدام سهام وأخت أسد الصغيرة اللي تخطفات 4 سنين هادي ..زوينة بزاف وكاتشبه لأسد شعر أسود كظلام الليل وعينين فلون السما الصافية.. من بعد سنين حرمانها من عائلتها هاهي رجعات ...الشي اللي خلا لعائلة كلها تقرر تستقر بالمغرب لأسباب غانعرفوها من بعد.. وفمدينة طنجة بالضبط كان قصر عائلة الفارسي..سهام شيماء أسد فوزية لينا سفيان وكرزة طبعا..كرزة اللي فرحات برجوع شيماء لكن مقلقة من هروب أسماء...اه هروب هادشي للي قال أسد لعائلتو...قال أنه متأكد وشافها حتى هربات أو بالأحرى ختارت تبعد عليهم لأسباب مجهولة... الشي اللي خلا سهام ماتحكرش فالموضوع..أصلا من بعد مارجعات ليها بنتها نسات الناس كاملين..
حب وسط الدماء الجزء السادس
محتوى القصة
التنقل بين الأجزاء