قالو زهر يجي مرة فالعمر وشي كال زهر وهم وكولشي من العقل وأنا حايرة بين لقوال معرفت نتيق كلام العلماء والعقال ولا لي على زهر ضربو الأمثال،وكالو زهر لمتعوسة بظفارها تهبش عليه وسعد الصكعة بيديها تدفنو كاين لي تزاد مو مزغرة عليه وكاين لي نحس تزاد شكارة محرفو شي كال مكاين لا نحس لا زهر كولشي بإذن الله مقدر.
●●●
امرأة الخوف باين على وجهها بترجي كطلب وكتوسل لمرأة تانية باش متأديهاش
"عفاك لا لا انا غادي نسكت وندير كاع لي كطلبيه بلحق متأدينيش كنترجاااك لالالاااااااااا هادي هيا أخر كلمة لفضاتها وخرجات من فمها قبل مطيح لأرض...
"بضواحي مدينة ترودانت وبضبط بمدينة هوارة"
لالة شافية مرات لعطار البشير ناس على قد الحال عايشين بما يرضي الله
شافية:أواخا تكوني معايا فلمدينة كنخليك فين بغيتي تكون وفين بغيت تسكون يلاه وهاد لخدمة كاع لي كتقلبي عليها مالكي اتخدمي دكتورة
"الالة على سكنة ماضربي حسبة لحت اعلان فالانترنت وعيطات ليا واحد البنت بغات لي يسكن معاها ويتقاسمو فلوس لكرا ومصاريف ومتقسحيش راسك
شافية:شوفي أ نجمة كلمة وحدة عندي انا كلتها سلامو عليكم،خلاتها ودخلات لكوزينة
نجمة:موجهة كلام لباها)سمعتيها واش انا اتبقى دير ليا هكا؟
البشير:ماديريش فبالك ابنتي انا انهضر معاها امضرا شحال لقيتي ليوم؟،جبدات سكادو من ظهرها حلاتو وجبدات واحد كتاب
كتاب كبير غلافو بجلد قهوي وهيا فرحانة بيه
نجمة:55مثلة مغربية وانا كنحفظ فيهم واحد بواحد كاع دواور لي حدانا دزت ليهم واحد بواحد وكاع دوك عيالات لكبار عاونوني واخا انا راك عارفني معنديش مع ناس بزااف ولكن قدرت نزعم عليهم
البشير:مزياان مزياان هكاك نبغيك الله يرضي عليك
نجمة:أمين أبا يلاه نخليك انا انطلع لبيتي
البشير:واخا ابنتي سيري،طلعت لبيتي باش نخطط ونكتب على أول صفحات مدكرة ديالي دخلت لبيتي لي كان فراشو بسيط وعادي نموسية على الأرض مع زربية بلدية وخديات بالموزون وماريو صغير دلخشب بيتي بحال لبيوت لقدام كولشي فيه قديم حيت مولاتو لي هيا أنا قديمة جبت طبلة لوسط حطيت سكادو ديالي هزيت ستيلو ولاجوندا جديدة ديالي لي خديتها من عند علي مول لمكتبة لي فدورة ديال زنقتنا كلست الأرض وربعت رجليا ونزلت بستيلويا على أول صفحة فمدكرتي :
"بسم الله باش بديت وعلى نبي صلى الله عليه وسلم صليت سميتي نجمة نجمة أزهاربنت العطار لبشير أزهار متسمعوش عطار تكولو هدا مشعود وكيبيع ديك لبوية وتباخيرات وداك لعجب لا با غير با كيبيع العطرية على حقها وطريقها مطحونة على الايد كيبيع الحنة لحرة ومعروف هنا فهوارة مكاينش شيواحد لي مكيشريش عندو اما مي شافية عمارة دار خوافة بلاقياس موسوسة غير بوحديتها عالمها بوحدو هيا لقلب لحنين مرةوكادة ولكن حاجة وحدة لي خايبة فيها أي حاجة كتيقها لي كالو ليها ناس تمشي ديرها هادي تحيد تابعة تجي تبقى تبخر فينا هادي كتحيد لعين حتى كنوليو مخنوقين ونجيو نتستفو فسطح بينما خرجت ريحة من دار عيا با مايهضر معاها ولكن أش غادي نديرو لي فراسها فراسها أنا لكبيرة فدار ولداتني مي وحبسات ومن ورايا ب12لعام دزاد خويا صغير طاهر وكنعيطو عليه طاها مكانش كيحمل سميتو كتجيه كبيرة عليها ولكن با سماه على سميت جدي الله يرحمو ويوسع عليه أنا خرجت ماشي كيف بغات مي تشوفني الحمد ليه عندي حقي فزين كيف كتكول خرجت نشبه لجدات جدة حتى هي كانت بيضة وزعرة وعينيها مخلوضين وقصيرة بحالي ولكن مي لي فاقسها كاتليك لبنات فعمري تزوجو حتى ليا انا لي جا كنرضو لحلم ديالي هو نمشي لمراكش ونخدم ونحيد من هنا حيت مدينة صغيرة ولخدمة قليلة قريت حتى لباك وشديتو بحسن ومن بعدها درت تكوين فالانفورماتيك وشديتو ودرت تكوين فلخياطة وشديتو عندي جوج ديبلومات وشهادة الباك ممكن تخدمني فبلاصة مزيانة وداكشي لي كنطمح ليه هواية ديالي ولي مايحيدهاش ليا طبيب عيا جميع الامثال المغربية كيعجبني كل حاجة قديمة من قفاطن من عقيق من كلشي وكيعجبوني لعيالات لكبار ديال زمان نتسنط ليهم طبع ديالي ممفهومش مرة كنكون قاسحة بحال لعود منتزعزعش مرة نضحك مرة تلقايني غامضة غير ساكتة وكنشوف مرة راسي مكنحملوش ولحاجة لوحيدة لي مكنحملش وكنكره فهاد دنيا كلها وعندي فوبيا منهم وكيديرو ليا ضجيج وكوم نصيب نخنقهم هوما لمشاش اوووه غير دكرتهم لحمي بورش بلاتي شي حد كيعيط..
شافية:نجمة نجمة هبطي تغداي
نجمة:واخا أمي انا جايا،بدلات نجمة حوايجها وهبطات تغدا على طبلة فبيت مفرش فراش حسبي تقليدي(حسبي هو لحسيرة مع زرابي مفرشين ومخاد)نقز باها
البشير:بنتي غدا وجدي راسك نوصلك لمراكش نخلص ليك كراك ونرجع ان شاء الله،علات فيه شافية عينيها ورجعات كتاكول
نجمة:(كتغمز فيه جيهت مها وتشير ليه بجبهتها)
البشير:أحم مك راه هضرت معاها سيري الله يرضي عليك
نجمة:أمين ياربي لهلا يخطيكم عليا
الطاهر:علاش فين غادية نجمة،جاوباتو مو
شافية:غادية تقلب على لمشاكيل وصداعات راس أولدي تكول غير أتوصل اتلقا كرسي ديالها فالوزارة كايتسناها
البشير:أهاد لمرة تكون نيتك صافية وزينة ودعاي مع البنت بتيسير راه حشومة هادشي لي كديري ليها
شافية:كراناتها واتزوجو او ولدو شحال من واحد جاها غير رجال زينين لالا بنتي ياتسكنات يا مديور ليها انا هاد سفرة معجبانيش غير انت لي مبزز عليا وصافي
نجمة:الله يهديك امي واش انت هاد خوزعبيلات مابغيتيش تحيديهم من راسك اشمن سحور اشمن مسكون وصافي عفاك الله يعطيك ستر دعي معايا باش نسيفطك الحج
شافية:هاه ديرو مابغيتو الله يدير شي تاويل ديال الخير وصافي
البشير:واها لي تكولي اللهم يسر ياربي،كملنا ماكلتنا وأنا فرحانة حيت غانول مرادي ولمدينة لحمرة أنا غادية ديك لعشية كولها وانا كنحنقز ونجمع فحوايجي من هنا لهنا لي سمع حوايج يبات هربان أكترية سراول دجين وقوامج طوال وكترت لكنادر ديال دار تايعجبوني مي دخلات كوزينة متلاتش خرجات سكانت فيها أما هزبت لكنز ديالي لي هو كتابي ديال لمثال هدا هو كنزي لي ضليت نقاد فيه سينين هادي درتو فسكادو ديال وحطيت حدا بالز ديالي هضرت مع لبنت لي اتكون شريكتي فسكنة عطاتني العنوان قيدتو من بعد لعشا طلعت لبيتي صليت ونعست حيت غدا تابعاني طريق وحياة جديدة لي انحقق فيها داكشي لي بغيت..
دخل البشير على بنتو مع 8 ديال صباح
البشير:نجمة نجمة نوضي ابنتي راه شمس كلكلات نوضي راه تابعنا طريق،بدات كتحل فعينيها وكتشبح
نجمة:با صباح الخير شحال فساعة؟
البشير:راه 8هادي يلاه تغسلي وجهك وتوضاي وتصلي ونفطرو نشدو طريق يلاه ابنتي،زولات لغطا عليها وناضت باست راس باها
البشير:الله يرضي عليك يلاه انا خرجت دغية متعطليش
نجمة:لا ابا انا دغية نوجد،جريت صندالتي ودخلت لطواليط طرفت حالتي وغسلت وتوضيت أول حاجة صليت عاد لبست حوايجي جلابة بالبيج مخيطة بشيبي قصيرة بحال جبادور وسروال دجين وسبرديلة درت سكادو ديالي على ضهري وجريت باليزتي درت تيليفوني لعادي فجيبي وهبطت مع دروج كان با كيفطر ومي غابرة كلست حدا با بديت كنفطر وانا نسولو:
نجمة:با فين مي؟
البشير:راها فكوزينة معرفتها أش كدير!يلاه انوض نشوفها اش كدير تمت خارجة وهازة بزاف ديال لبواطات وكتحط فيهم على طبلة وتعد فيهم
البشير:يلاه ابنتي يلاه نشدو طريق،فتح با الباب خرج باليزتي وساكي مشيت لبيت خويا طاهر عنقتو وسلمت عليه وخرجت لفم الباب با كان وا طلع حوايجي لبيكوب صغيرة لي عندنا شفت فمي لقيتها حابسة دموعها ابزز مابغيتش نطول عليها عنقتها وبدات تبكي وداعا معايا وتوصي
شافية:متيقيش بالبراني واياك ولي عطاك شيحاجة ماتشديهاش حضي راسك ودخلي بكري ولاتيقي فالغريب ابنتي الله يرضي عليك ويعوانك ويوقف ليك ناس لحلال ولملاح فطريقك،ركبت وانل كنردد كلمة وحدة أمين أمين شدينا طريق بدات شمس كتحمى ولحال كيسخن هزيت سكادويا ودرتو كدامي داني نعاس واحد شوية ومشيت غيبت حتى فيقاتني ايد با
البشير:نجمة راه حنا وصلنا أبنتي،حليت عيني على دخلة دمراكش لمدينة لي شحال حلمت نزورها وأخيراً حلمي تحقق وهواها ضرب فوجهي حطيت رجلي ليمنية وسميت معرفت هاد لمدينة أشمخبية ليا
لبشير:توكلي على الله وسمي
نجمة:خير ياربي بسم الله.
شنو مخبي لنجمة واش داكشي لي كتمنى اتلقاه؟
البشير:بنتي عاودي كولي ليا العنوان فين باش نسول
نجمة:كاتليا ابا نتسناوها حدا باب دكالة وهيا اتدينا حتى لدار
البشير:بلاتي انوقف هنا ونسول شي واحد،وقف البشير لبيكوب ونزل منها بان ليه واحد راجل كبير فالعمر شوية وقفو
البشير:سمحليا أشريف نسولك الله يجازيك بيخير
سيد:بلهجة مركشية)أياه أسيدي مرحبا
البشير:الله يحفظك فين جا باب دكالة؟
سيد:علاه سيد ماشي من هنا؟
البشير:لا أسيدي هادي أول مرة انجيو فيها لهنا
سيد:إيوا مزيان مرحبا بيكوم باب دكالة مابعيد شاي من هنا الى عندك طوموبيلة خود هي هاد طوالة نيشان ودور على ايدك ليمنية ايبانو ليك جوج قواس كبار هاداك هو باب دكالة
البشير:الله يجازيك بيخير وسمحلنا
سيد:الله أودي مرحبا فرصة سعيدة والله يسعد صباح،رجع البشير لطوموبيل
البشير:ناس الله يعمرها دار هاد لمراكشيين
نجمة:وراك فين؟
البشير:مابعيدش من هنا قريب،ديمارا طوموبيل لفين وراه سيد وفعلا نفس لوصف لي عطاه هو لي لقا
البشير:ايوا باب دكالة هاهو ولبنت فين هيا
نجمة:انا انسوني عليها عندي نمرتها بلاتي،جبدت تيليفوني ودورت نمرة فاش سونيت عليها
نجمة:ألو سلامو عليكم ختي انا عند باب مراكش انت فين كاينة شنو لابسة أهاه أهاه صافي واخا، شافت فباها
نجمة:با انا انهبط غير هدا هاد لقةس راه كاتليا كاينة تما
البشير:بلاتي متنزليش بوحدك انا نزل معاك،نزلت انا وبا سدينا طوموبيل ورانا ومشينا جيهت لباب كاتبان لينا واحد البنت واقفة عاطيانا بظهر غير شعرها لمطلوق لي كايبان تمشيت جيهتها حطيت عليها ايدي على كتفها لبنت قفزات ودارت عندي كانو ملامحها بريئة وزوينة شعرها فلون لقهوة دايرة نظارات ديال شوف ولا ديال لعيا مزال ماعرفتش بإبتسامة ضوات وجها كاتليا:
"سلام انت هيا لبنت لي بغيتي دار ياك مرحبا بيك فمراكش(مدات ليا إيديها)أنا سكينة وأنت
نجمة:انا نجمة وهدا لواليد ديالي
سكينة:مرحبة بيك أعمي وألف مرحبا مرحبا بيكم فمراكش
نجمة:من هضرتك باينة ماشي مراكشية؟
سكينة:لا أنا من مكناس ويلاه هادي عام باش سكنت فمراكش يلاه نمشيو باش يلاه تشوفي دار وتشوفي واش عجباتك
نجمة:أياه على بركة الله،رجعنا لطوموبيل ب3بينا وسكينة ولا هيا بغات تسكت بنت فروجية وباينة فيها نية وضريفة وهبيلة ولكن مخاصنيش نتيق حتى نعاشرها هكا وصاتني مي من زمان داكشي باش معندي صاحبة لاخرة كل مرة تخرج لعجب فوحدة حتى درت بناقص منهم بقات سكينة كتورينا فين ندوزو حتى وصلنا لقصبة كان فيها واحد جامع وجهات با يدخل مع واحد زنقة كلها حوانت لعيالات غاديين جايين بلوصالي ديال لخبز لي دارة نكاب لي عاكفة راسها نطقة سكينة:
سكينة:صافي أعمي غير هنا هاهيا دار،حليت لباب وعليت راسي كايبان ليا باب داير فلكرونة ودار طويلة عالية بصطح ديالها وباينة فيها يلاه مصلوحة
سكينة:دار سفلية مولاها سادها كيجيو ليها غير من صيف لصيف وعاد انا كارية لفوق صراحة جاتني غالية شوية وكبيرة وانا بوحدي داكشي باش بغيت لي يتقاسمها معايا
البشير:ومول شي عارف؟
سكينة:أه اعمي عارف غير كاليا شوفي شي بنت لي تكون تقة هو مكايعرف غير فلوسو صافي يلاه بلاتي نفتح الباب بعدا،فتحات سكينة لباب كنلقاو جوج بيبان واحد مقابل معانا او واحد فجنب فتحات سكينة لي فجنب تحنينا ودخلنا انا وبا طلعنا مع دروج نيشان خرجنا فلمراح دار من لوهلو لولة عجباتني بفراشها لي كان بلدي ونفس لوقت عصري رميت عيني كوزينة كانت مرتبة خصوصا انا كنموت فترتاب ومكنحملش ربيج
سكينة:هادا بيتي وهاد لبيت قاديتو ليك هو بيتك هنا فلمراح فين كنتفرجو وكاناكلو هاديك كوزينة وهداك لحمام ولفوق كاين سطح هدا مكان
البشير:تبارك الله دار زوينة كلها شراجم ومشمسة وأهم حاجة جات بين ديور وناس غادية جايا ماشي بحال شي بلاصة خاوية أش بان ليك ابنتي؟
نجمة:كدور فعينيها)حتى أنا عجباتني
البشير:ايوا على بركة الله أبنتي هاهو خلاص 3شهور ديال لكرا أنا خاصني نمشي تابعني مايدار
سكينة:كلس أعمي تغدا معانا
البشير:لا أبنتي منصيبش تهلاو فبعضياتكم وديرو بعضياتكم خواتات الله يرضي عليك أبنتي سكينة متخليهاش تخرج بوحدها فينما مشات جنبك بجنبها ويلى كان شيحاجة أبنتي ها نمرتي
نجمة:يااك ابا!!
البشير:أبنتي حقي نطمن على بنتي حتى نجربي لكبدة وديك ساعات هضري يلاه دوزو بخير
نجمة:الله يوصلك على خير ابا
البشير:تهلاي فراسك الله يعاونك ويلكي ليك ولاد لحلال فطريقك ابنتي الله يرضي عليك،مشا با وبقيت انا وسكينة ديت بالزي لبيت فين وراتني سكينة كان فيه ماريو صغير بديت كنستف فحوايجي حتى دخلات سكينة
سكينة:انا رضيت طويجين يطيب باش نتغداو واخا كلست معاك؟
نجمة:مرحبا،كلسات سكينة على واحد سداري كتلعب بيديها
سكينة:ههههه مديريهاش مني قلت صواب وتشوفي فيا هكاك والله مكنضحك عليك ولكن واش من نيتك كتهضري جايا مراكش تخدمي هاد خدامي هادو
نجمة:علاش؟ شنو ايمنع؟
سكينة:فخبارك انا واخدة باك+3 ودايرة لاميكانيك وخديت ديبلوم ديالها ومحاسبة وخديت ديبلوم ديالها وبستيطاعتي نخدم فأحسن بلاصة ومالقيت هنا الما كان باك صاحبي ودفعتي فلوس لاخدمتي أخرتي خدامة فبيتزارية مقابلة لاكيص كونماشي با لي مزال كيعاوني فلكرا مرة مرة وتشوفي اغير كتروني أختي والله
نجمة:أنا انقلب ونشوف ظهري كل واحد وزهرو ماعرفتي
سكينة:انت تعرفي أختي مهم نخليك دابا نمشي نشوف لغدا،خرجات سكينة وبقيت كنفكر فكلامها يكما انلحق على كلام مي لالا مهاصش نعمر تفكيري بحوايج فارغة لي كيبغي شيحاجة كيوصل ليها هدا هو هدفي قاديت حوايجي ورتبت بيتي كيف بغيت حطيت كتابي حدا راسي كنسمع سكينة كتعيط باش نتغداو خرجت عندها تغدينا بجوج وزدت تعرفا عليها كتر بنت ضريفة صراحة تكينا ورا لغدا بساعة جات عندي سكينة
سكينة:يلاه نخرجو تعرفي على مراكش شوية،لبست حوايجي وخرجنا انا وياها مخلات فين دوراتني مالين لحوانت كامل عرفاتني بيهم وحنا راجعين لفت انتباه ديالي واحد دار جات ملاصقة مع دارنا كلها زليج منقوش وبابها بالبيض ومرسوم فيه واحد لقطة بالكحل وفيه ايد كبيرة ديال نحاس وقفت بلا هوايا قدامها كنشوف فيها
سكينة:جات فكيليز واحد بلاصة زوينة انا كناخد طومبيس ولا طاكسي مرات كنجي على رجليا هاد بلاصة اسمها بيتزا هات كيليز صافي بغيتي تخدمي؟
نجمة:نعدي بينما جات ماحسن شنو اندير
سكينة:غدا فصباح ان شاء الله نمشيو بجوج نوريك لباطرون
نجمة:ان شاء الله،ديك ليلة بقيت حالة عينيا وكنفكر واش لي حدراتني مي منو هو لي انلقاه ولكن مخاصنيش نوقف خاصني نكمل وانا كنفكر كنسمع شيحاجة طاحت على سطح قفزاتني من بلاصتي حيدت لغطا وخرجت من بيتي حفيانة كيبان ليا خيال فكوزينة لخوف أنا مافياش مشيت بااما نفكر شعلت ضو دلكوزينة غوت غوتة وحدة كتبان ليا كوزينة كلها مشاش فالكحل وفرمادي خرجات سكينة كتجري منلبيت
سكينةكتجرني باش متمشيش وانا لي فراسي فراسي نطرت ايدي منها وهبطت حفيانة فتحت باب دار وسكينة ورايا كتولول زنقة خاوية حس بشار مكاينش مشيت كدام باب شارفة يلاه دقيت لباب تفتح كان محلول مع أنا فيا واحد قاعيدة خايبة لفضول كيقتلني رميت رجلي ليمنية وصوت سكينة ورايا كيعيط
سكينة:بالهمس)ونجمة ونجمة أجي لهنا أجي،مديتهاش فيها دخلت كلي لدار دارت كانت بحال شي رياض وانا نبدا نعيط
نجمة:كاين شي حد هنا الالة أفينك امو مشاش فينك،دخلت لقلب دار كتبان ليا واحد لمرة كالسة بحال كلسة ملوكية كبيرة فالعمر لابسة تكشيطة من دوك تكاشط لقدام دايرةشرتلة فكل ايد وكثرت لخواتم بزااف شادة لقتبان كتخدم بيه شي تريكو ومحنية عليه مبسمة مشافتش فيا دفعت جبهةوهضرت معاها
نجمة:شوفي الالة هاد لمرة جيت حتى لعندك باش نكوليك شدي علينا مشاشك ماشي يبقاو يدخلو لينا لقلب دار بقاو غير ياكلو معانا داكشي لي خاص هاد لمرة كنحلف ليك هاد لمرة انشدهم بيدي ونقجهم وا بواحد،علات فيا عينيها لي كانو كحلين بحال سواد ليل وبنفس الابتسامة لي وراهم سنان كي جوهر شافت فيا ورجعات حنات راسها ونطقات بسوط كيبورش اللحم
"وتقدري ديريها أنجمة بنت العطار"منين نطقات بسمية جمد ليا ما فركابي فين اتكون عرفات سميتي شوية بدا كل مش كيخرج من جيهة هارمادي ها لكحل هاصفر أشكال وألوان تجمعو عليها بحال سوق لمشاش بديت كنرجع بلور وديك سيدة كتهضر معاهم
"هانتوما قلقتو لينا نجمة ياك كتليكم متمشيو فين ليل هدا خاصكم تنعسو أ،متسنيتهاش حتى كملات هربت برجليا ماشي خوف منها ولكن من لمشاش لي مكنحمل فيهم شعرة رجعت لدار ولقيت سكينة غادية جايا
سكينة:أه اختي السحر راه كاين وزايدون عمري شفت شي حد مكيحملش لمشاش لهاد درجة حتى ليك علاش؟
نجمة:منين كنت صغيرة كانت عندنا واحد مشة صغيرة جابتها مي ورباتها كنت بغيت نلعب معاها مديت ليها ايدي طيراتني بواحد العضر لدابا الاتر مزال عندي ديالها هانتي شوفي،عريت ليها على ايدي تشوفها اتار سنان مزال فيها
نجمة:كاتليا مي كانت لمشة مسمومة ولا معرفت مسعورة مابقيتش عقلت وكنت غادي نموت فيها حتى داوني عند شي مرة داواتني بدوا لعرب وبريت
سكينة:أه دابا انت تعقدتي من المشاش أجي هادي شريرة لي لتحت كيفداير وجها انا عمري شفتها فحياتي
نجمة:مباينش عليها تشعويد لكيتها كتخدم فشي تريكو لباسها ديال بكري دوك تكاشط ديال شحال هادي وكل ايد فيها شرتلة وكتىت لخواتم عينيها منساهمش زينين وكحلين واخا كبيرة فلعمر ولكن عليها واحد لهيبة فشكل ياختي
سكينة:اخر مرة تقربي ليها وانا كتليك يلاه سيري تنعسي راه غدا فايقين بكري،مشات سكينة تنعس وانا رجعت لبلاصتي وبين عينيا غير هاد لمرة لي شفت ليوم بقيت على صورتها حتى داني نعاس،فيقاتني سكينة باش نمشي نشوف لخدمة لي انخدمها لبست عليا فطرنا دغية فطور ديال زربة هزيت سكادو ديالي وخرجنا بجوج ركبنا فطاكسي نيشان لكيليز فين كالت سكينة غير وصلنا وقف طاكسي هبطنا خلصاتو سكينة
سكينة:شيرات ليا لقدام)ها لبيتزارية لي كتليك هنا فين خدامة أنا
نجمة:زوينة،دخلنا ليها فعلا كانت زوينة من برا ولداخل تلاقيت بشاف سولني على شي حوايج أوافق يخدمني خدمتي نوصل طلبات لناس لديورهم بالموطور عطاني واحد طابلية فيها سميت المحل وكلست جات واكد طلبية عطاني العنوان وانا ممخالطاش حتى تيليفون عندي عادي ماشي سمارت فون فيه جيبي ايس سيفط معايا واحد دري باش يبقى يوريني لبلايص داز أسبوع وانا فالخدمة ديالي كنمشي مع سكينة ونجيو بجوج تقربنا بزااف ولينا بحال لخواتات وكثر انسانة ضريفة وصغيرة متخبيهاش عليك من نهار مشيت لديك شارفة ماشفتش مشاشها مزال مرة مرة نهضر مع دار ونطمنهم كتليهم بديت خدمة معلمة فيكول بريفي مابغيتش نشطنهم ضريت نكدب ياربي تسمح ليا فات شهر على مجيتي لمراكش وليت مخالطة شي بلايص الحمد لله مالين حوانت ولاو يعرفوني وعزيزة حيت ديكوردية وعندي نيشان،كنت فخدمتي مابيا ماعليا سكينة مشات بكري لدار حيت مريضة وانا تعطلت وزدت تخاصمت مع واحد لكليان كان بغا يبسل عليا رجعت لخدمة لقيت لخبار وصلات لباطرون
المدير:الالة هنا خاصك تحني راس فهمتي وتجاوبي بطريقة مزيانة
نجمة:وراه قلل عليا لعفة عرفتي اشناهية قلل العفة واش بغيتي نسكت ليها واش ترضاها لمك ولا مراتك ولا ختك انا راه محتارمة خدمت دل معندي منكجدر بيها
المدير:وابقاي فداركم الالة حنا مصلحة لكليان فوق كولشي،حيدت طبلية رميت على كمارتو
نجمة:وخدمتك زيدها فراسك انا اصلا كون كنتي راجل مترضاش بهادشي والله يعطيك العز اما دل راه غايس فيه من راسك رجليك ولكن راه كالوها ناس زمان الحشمة على وجه طراح،هزيت سكادو ديالي خرت وخليتو ومع ماخرجتش بكري طاكسيات وتكول واش بغا يدوز شي واحد وتكول ولي دازت خاوية نشير ليها تحلف واش تبغي توكف تعصبت ولقنديشة طلعات ليا لسما كنزبل ونعير بوحد ضطريت ناخدها كراعية وجبدا واشمن جبدة
نجمة:تفو على زهر أش رماني هاد رمية أش داني ليها كاع كانت هانية مهنية فدارنا بغيت نطير خزيت تفو ياربي واش هاد لمكتوب،رجليا طابو مسمار دخل فسبرديلتي قطعها
نجمة:لا مابقاتش مزيان نيت نبدلو الجو،فطرنا ولبسنا علينا وخرجنا الجو مشمس متكولش لبارح كانت شتا شادة فيا سكينة وكنتمشاو مرة مرة نخلو بوتيك نسولو على خدمة دزنا من واحد زنقة واكفين فيها شي 6دلعيالات بجلالبهم شافونا بداو يتغامزو وانا نسول سكينة
نجمة:كتعرفيهم؟
سكينة:شكون؟
نجمة:دوك لعيالات لي واقفات عند بوطو،دارت سكينة رجعت شافت فيا
سكينة:بانو ليا غير لمشاش شي مرة ماشتها،درت كيبانو ليا 6 ديال لمشاش واكفات حدا بوطو كيقلبو فواحد لميكة، رجعت شفت فيها وشفت فدوك لمشاش كيبانو ليا تاني عيالات
نجمة:راهما،دارت سكينة
سكينة:نجمة راه غير مشاش مكاين بو عيالات،درت تاني كيبانو ليا غير لمشاش
سكينة:نجمة مالك أختي ياكما مريضة
نجمة:شكون انا لالا مابيا والو وقيلة مشاو وبدين نضحك من فوق خاطري
نجمة:اعود بالله من الشيطان الرجيم انا وقيلة خاصني نرتاح شمس ضربات فيا بزااف اه يمكن(هادشي لي كنكول بيني وبين راسي حيت فعلا معرفتش مالي واش حيت منعست مزيان ولا شمس قاسحة دارت ليا هكا واش هادشي ليكنشوف بصح ولا دخت مابقيتش عارفة شنو وافع رجعت راسي لور كايبانو ليا نفس لغيالات واقفات وكيشوفو فيا وكيضحكو دورت راسي بزربة
نجمة:أش هادي كيطرا ليا أش هادشي؟؟...
فيقاتني سكينة من سرحان ديالي
سكينة:نجمة شوفي يكما مريضة راه ديك ضربة لي فرجلك ممكن دير ليك سخانة
نجمة:أه أه عند صح
سكينة:شنو بان ليك نمشيو ناكلو فشي بلاصة ولا نرجعو لدار
نجمة:حسن نرجعو عيت ورجلي ضرتني
سكينة:أه صافي يلاه،فطريقنا لدار بانت لينا واحد لورقة فواحد لمحل يمكن ايتفتح جديد بغاو سربايات
نجمة:لهلا يخطيك عليا اختي،خليت سكينة ومشيت لبيتي كنت فعلا محتاجة نرتاح شوية تلاحيت فبلاصتي وبقيت كنفكر ونهضر مع راسي يمكن غير سخانة ولا يمكن فاش دارت سكينة كانو لعيالات مشاو اه هادا هو سبب ولكن فاش رجعت شفت بانو ليا انا اووف ياربي انحماق،كنهضر مع راسب حتى داني نعاس..
"حشومة عليك كنت بغيتك غير تعاونيني ونتحامة فيك علاش ضربتيني علاش انت سباب انت سباب والحل بين ايديك"نضت مفزوعة قلبي كيضرب بجهد وجهي عرقان،جات سكينة كتجري
سكينة:مالك ياك لباس بلاتي نجيب ليك تشربي،مسات سكينة جابت ليا نشرب وانا صورة لمرا لي شفت فلحلمة مابغتش تمحى ليا من بالي
سكينة:شنو شفتي؟
نجمة:شفت فسكينة)والو غير راكي عارفة مع لعيا ومدابزة ديال هداك خونا فيا جوع لغدا واجد
سكينة:ضحكات)واجد يلاه نوضي،مشيت طواليط غسلت وجهي كنشوف فلمرايا وانا نخرج كنتعود من شيطان رجيم،تغدينا انا وسكينةوانا غير ساكتة كناكول وعقلي غايب على الوعي كون صبت نرجع لدارنا ونترما فحضن مي أش داني نجي لهنا مالي اش واقع ليا يمكن خاصني ندير رقية شرعية ولا نوض نصلي ليوم
اليوم ماصليتش كاع نوض نصلي نضت من على طبلة شافت فيا سكينة
سكينة:كولي شفتك نضتي
نجمة:لا براكة عليا الله يخلف،مشيت سخنت الما توضيت وصليت وكلست ندعي يدير ليا الله تاويل ديال الخير،خرجت نكلس مع سكينة شوية مجمعين كنتلف فالوقت ونحاول منفكر سونة ليا تيليفون هضرت مع مي وبا مي غيرتوصي وتكول ماوصات نسيت شوية لي وقع ومشا من بالي ورجعتو غير حيت منعستش مزيان وصافي.
لغد ليه نضنا بكري انا وسكينة باش نمشيو نشوفو لخدمة فطرنا فطريق عند مول محلبة حرشة ورايب وزدنا مع طريق وصلنا لقهوة هاد لمرة كانت محلولة كبيرة بزاف كراسة ديال جلد بالقهوي وطابلويات لقينا واحد لابس سروال كحل وقميجة بيضة وطبلية بالبيج ولقهوي ومصور فيه القهوة
سكينة:سلامو عليكم حنا جينا على قبل داك الاعلان لي درتو على برا انا سكينة وهادي صاحبتي نجمة
"مشارفين انا عادل المسؤول على المحاسبة بلاتي يجي موسيو هارون المدير وهضرو معاه
سكينة:شكرا خويا عادل،كلسنا تسنينة مول شي يجي وقفات طوموبيل عمري ماشفت أغرب منها فحياتي دايرة بحال ديال عبد الحليم حافظ فياماتو تفتح الباب ونزل منها واحد سيد يكون فأوائل تلاتينات ولا وسط بيض شعرو كثيف وكحل ورطب داير لحية خفيفة على وجهو ضحكة مكايناش على وجهو ملامحو غامضة والحزن باين على وجهو لابس كحل فكحل دخل مشافش جيهتنا نهائيا نيشان لداخل مشا عندو عادل بقاو شحال وسكينة تشوف فيا
سكينة:واقيلة غير نوضو نمشيو بحالنا حسن
نجمة:بلاتي يرجع سيد مالك زربانة،خرج عادل مبسم
عادل:مرحبا بيكم معانا سي هارون وافق تخدمو معانا،شوية سمعت صوت طوموبيل درت كتبان ليا طوموبيل مشات
نجمة:وكاع ماهضرنا مع مول شي
عادل:هو مكايكونش جا غير يشوف الاحوال ويمشي
سكينة:واش هاد القهوة اتكون طلينية ولكن شفت فيها طابلويات بالخط
بالخط العثماني،ضحك عادل
عادل:لا هاد القهوة عربية ولقهوة كتجينا من البلدان لعربية حتى من الماعن كلهم عربيين صنع
سكينة:ويمتا انبداو؟
عادل:غدا من دابا الى بغيتو وثمن هو 2500درهم لوحدة
سكينة:فرحانة)على بركة الله،أنا غير ساكتة حيت طبعي ماشي اجتماعية بزااف عطانا جوج طبليات بحال ديالو وبدينا الخدمة نهار الأول كانت مزيانة واخا لكليان قليل بحكم القهوة جديدة ولكن الخدمة غادية مزيان من داك نهار مابقيت شفت لا حلم وماوقع ليا والو تما تأكدت أنو مكاين ماولو لخدمة غادية زوينة ومزيانة عادل انسان ظريف بززااف وكايعاونا..
سكينة:أجي أختي نخرجو شوية قدام الباب
نجمة:دابا يجي شي كليان
سكينة:مكاين حد شوفي عادل منساجم فتيليفون مع خطيبتو،خرجنا انا وسكينة قدام الباب
سكينة:معرفت علاش مول شي مكايجيش مكلف غير عادل
نجمة:الله أعلم كوراه عندو شي خدمة خرا داكشي باش،شوية تمات جاية واحد سيدة هاي كلاص من مشيتها وحالتها هيا وصاحبتها جات عندي
"سلام ختي واش خدامين؟
نجمة:أه اختي مرحبا بيك،نقزت سكينة
سكينة:نجمة شفتك مابقيتيش أختي كتخافي من المشاش اش طرا وجرا؟
نجمة:أشمن مشاش دخلي نشوفو سيدات اش بغاو ولا نمشي أنا
سكينة:نجمة واش كتفلاي شادة فيا أشمن عيالات الله يهديك غير انا وانت لي كاينين وهاد جوج قطات شوفي على مزيناتهم
نجمة:وجهت هضرتي لديك سيدة)ختي سمحي لينا راه صاحبتي فيها ضحك
"هههه لا أحبيبة مديريش فبالك عندها صح غير انت لي كتشوفينا اما هيا كتشوفنا غير مشات"
نجمة:مافهمتش؟
"ههههه شوية بشوية اتولي تفهمي قدار ومقدر عليك ممنو هروب انت لي جنيتي على راسك وانت لي فيدك خلاصك"خلاتني أكنشوف ومشاو بجوج شوية فبلاصة ولا كيبان فبلاصتهم جوج قطات وحدة فرمادي ولاوخرا زعيعرة شوية حسيت بدنيا دارت بيا شداتني دوخة
شداتني سكينة من إيديا كلساتني مشات كتجري جابت ليا كاس ديال لما عطاتو ليا نزلت عليه دقة بقيت غير كنشوف وساهية لا ياربي لا ميمكنش أشنو هادشي واقع ليا
سكينة:نجمة شنو واقع داك نهارات كلتيليا كتشوفي عيالات وهوما كانو غير مشاش ودابا تاني كتهضري وضحكي مع جوج قطات ليشافك يكول كتهضري مع بنادم؟
نجمة:أنا كيبانو ليا بنادم
سكينة:مبهوضة فيا)واش من نيتك كتهضري؟وليتي كتخلعيني عاودي ليا ياك حنا صحابات؟قررت نعاود لسكينة باش نرتاح
نجمة:نمشيو لدار ونعاود ليك،كنت كنتسنى غير ايمتا يوصل الوقت ونمشيو لدار وصل الوقت خرجنا من لخدما دزنا خدينا بانيني من على برا باش نتعشاو ورجعنا لدار قربنا لدار شارفة كيبان لباب مبسم والقطوط داخلين وحدة ورا وحدة جراتني سكينة وضربناها بجرية لدار فتحات سكينة وطلعنا كنجريو حطينا سبابطنا عند الباب ولحنا سيكانا حطينا داك بانيني وبدينا كناكلو وساكتين نقزات سكينة
سكينة:كونماشي هاد دار زوينة ونقية وصعيب تلقاي دار بحالها بهاد تمن والله حتى نرحل كتخلعني هاد سيدة وكترت المشاش لي عندها وبززاف جيش
نجمة:انا هيا مكتخلعنيش كيخلعوني القطوط لي عندها
سكينة:فكرتيني عاوديليا شنو واقع دابا راه جينا لدار وبااما تكدبي وتكولي بيك شيحاجة مابيك والو الحمد لله راه صحتك مابيها والو
نجمة:احم واعديني تسنطي ومتقاطعينيش هادشي لي غادي نكوليك يقدر مايدخلش ليك لعقل وتخافي وتقدري ماتبغيش كاع تولي ساكنة معايا
سكينة:لا مدخلها والو غير داك نهار مشيتي حاركة ليها وكتهدي فيها باش تقجي ليها مشاشها هاهيا اتحمقك اويلي وحدي
نجمة:داكشي غير خرافات الله يهديك أش جاب كعو لبعو
سكينة:راه كعو وبعو براسو هدا وفكري فيها متكون اهيا لي سلطات عليك شي مشة سكناتك،كلمة سلطات عليك مشة كتردد فراسي وتفكرت نهار تبعاتني ديك لمشة وضربتها كلام سكينة صحيح وقفت زقفة وحدة ومشيت جيهت الباب فتحتو تبعاتني سكينة تغوت
سكينة:واش مابغيتيش تحشمي أجي أجي،مديتهاش فيها ضربتها بجرية لباب شارفة لقيتو محلول تاني هاد لمرة دخلت دخلة وحدة لقيتها نفس لكلسة كالسة علات فيا عينيها مبسمة ورجعات حدرات راسها وهي تهضر:
"كلسي لاش واقفة كنت عارفاك أتجي أنجمة
نجمة:شوفي هاديك..قاطعاتنا واحد لبنت بلهفة كتهضر:
"لالة راضية سلطانة فاقت"وقفات هاديك شارفة لي سميتها راضية ومشات مع ديك لبنت دورت عيني كنلقى ماع لمشاش عيالات لخوف مابقاش فيا تبعتها من لور حتى دخلت واحد لبيت كانو فيه غير لبنات بقفاطن واقفات وكيشوفو فيا بيت فيه نموسية كيبان ليا رجلين شي مرة ناعسة بديت نطل براسي بلا هوايا مابان ليا والو ديك راضية واقفة عند راسها وكتهضر كنسمعها كتكول
راضية: الحمد لله على سلامتك لالة سلطانة،لفضول قتلني شكون هادي لي دايرين ليها هادشي كامل بديت كنقرب بشوية ونطل براسي دارت راضية عندي كتشوف فيا شفت فيها حيت بحال الى قتاحمت خصوصية ديالها دورت وجهي جيهت لمرا لي ناعسة طلعتها من رجليها لابسة كسوة بيضة حتى وصلت لوجها وقفت فبلاصتي شهقت وبديت راجعة بلور مخلوعة ومافهمة والو وكنردد:
قصة أصابتني لعنة هرة
محتوى القصة
قالو زهر يجي مرة فالعمر وشي كال زهر وهم وكولشي من العقل وأنا حايرة بين لقوال معرفت نتيق كلام العلماء والعقال ولا لي على زهر ضربو الأمثال،وكالو زهر لمتعوسة بظفارها تهبش عليه وسعد الصكعة بيديها تدفنو كاين لي تزاد مو مزغرة عليه وكاين لي نحس تزاد شكارة محرفو شي كال مكاين لا نحس لا زهر كولشي بإذن الله مقدر.
التنقل بين الأجزاء