قصة ضحية الفضول

انا سميتي نزار عاندي 30 عام انا الحقيقة العمل ديالي غير ف مجال الرعب و ما وراء الطبيعة حيت انا كاتب قصص و روايات عن هذا المجال . اليوم غا نحكي ليكوم واحد القصة بعيدة تماما علا داكشي لي كانكتاب و نعاود حيت هاذي وقعات معايا شخصيا عشتها بكل الأحداث ديالها, كان واحد الحي سكني قريب من الدار تاعي لي عايش فيها مع مرتي و بنتي وقعات فيه واحد الحاجة لا تصدق فواحد الليلة تقطع الضو غير فداك الحي و بقا الحي فضلام ليل كامل تا صبح الحال لي غاتكون المفاجأة كانو غاع الناس لي ساكنين ف الحي مليوحين ف الشارع واحد الموتة اوف ما تقدررش تشوفها هالي مقطوع ليه راسو ها لي خارجين مصارنو..., المهم واحد الحالة و كولشي ميت بدون استثناء و الدم فلحيوط وكان لي كتاشف هاتشي هوا واحد السيد كان دايز تما مع 6 د صباح غادي لخدمتو, جاو لبوليس و بداو تحقيق ديالهوم كيسولو أي واحد و ف لاحياء الاخرى كما شي واحد عندو تما شي صاحبو ولا شي حد من عائلتو فداك الحي المشؤوم مي الغريب فالأمر ان داك الحي سكان تاعو ماكانش عندهوم معا الناس لاخرين والو عايشين غير بوحدهوم و ملي مابقا لا دليل لا والو قررو البوليس يداورو واحد السياج عالي علا الحي باش مايبقا تا حد يدخول ليه و حطات الحراسة عليه...

بداو البوليس ف لاغارد مي غير صباح الحال دوك البوليس صابحو مغاردين طراف طراف و مرميين فلارض , و كان مكتوب فالحيط بالدم {بعدو منا الا بغيتو نبعدوا منكم }. المهم قصتي غا تبدا هنا ملي سمااعت بهاد الحي و انا معرووف بالفضول تاعي لي غادي يخراج عليا بلبيان المهم بديت كانسوال فلاحياء لي حداه مي والو مالقيت تا جواب بنادم عاارف شحال من حاجة مي خايف و مخلوع ماعرفت منااش ,لي سولتو كيدير فيا واحد الشوفة و كيقوليا اش بغيتي عندهوم هوما كانو يستاهلو ماوقع ليهوم هوما لي قلبو عليه, صافي هاد الجواب لي سمعتوا كتار من مرة هو لي خلاني انني قرارت ندخول للحي. معا الفجر مشيت هاز فيدي بيل و غادي نقازت السور و بديت تانتماشى ناري علا ريحة و مناضير تفو . زادت شويا كيبان ليا واحد السيد واقف وسط الشارع فلاواال ما تقتش او شكيدير هدا هنا ال موهيم كان جاي عاندي ملي وصال قاليا شتادير هنا شكون خالااك دخول, لاش داخل لاش. جاوبتو قلت ليه راك تانتا معايا هنا ملك شنو كاين هنا فين صدامني ملي قال ليا بلي راه الوحيد لي مراحبيين بيه فهاد الحي و لي دخول هنا راه جامي يخراج صافي كيوالي منهوم, هنا زدت بغيت نكتاشف مزيان و نعرف شكون سوالتو قلت ليه نتا شكون قال ليا بلي هوا سميتو محمد وهوا خدام شفار و كان كيدخول لهاد الحي باش يسرق ديور حيت كانو خاويين و فيهوم شي حوايج غاليين و لكن واحد النهار كان ف دارو تا سمع دقان...

ملي سمع محمد الدقان ناض حل الباب كيعاود ليا و هوا كيتراعااد و قال ليا بلي ملي فتح الباب لقا واحد الجثة من دوك الجثث لي مرميين فداك الحي و ياغا تدخل هوا بالخلعة سد الباب و هرب لبيتو باش يزيد يكمل الخلعة لقاها غالسا فوق الناموسية و بدات تادوي معاه قالت ليه مالك خفتي انا جيت بغيت غير نوصال ليك ميساج من عند سكان الحي قالو ليك مرحبا بييك فاي وقت اجي سرق غير لي بغيتي و لكن هاد السر يبقا بيناتنا. انا جاويتو قلت ليه ملي هذا سر لاش قلتيه ليا قال ليا بلي راه عيا و مل من هاتشي هو اه ولا لاباس علييه من هاتشي لي كيدير و لكن مابقاش قادر يصبر من هاتشي لي كيشوف و معامن عايش دوك الجثث قالبو ليه حياتو صعييب تعيش معا الموتة. و شويا بقا ساكت و قال ليا ها لييل قرب دب تشوف بعينييك انا بديت كانضحاك قلت ليه تا شتاتقول حنا دب يالاه ودان لفجر و نتا تاتقول ليل قرب, بدا كيضحاك و قال ليا راه نتا لي مجلوب راه 7 دلعشيا هادي جيت نشوف الساعة لقيت عندو الحق او امتا داز الوقت مايمكاانش او الوقت طار يالاه هزيت راسي باش نساولو لقيتو هرااب, بديت كاندور تما شوييا لقيت ظلام طاح اناري شهتشي لوقت كيطير شعالت لبيل كانلقا زنقة عامرة بمشاش كاحلين و كبار كولهوم دايرين غلسة وحدة و كيشوفو فيا بحال شي أصنام ; كملت المشي لموهييم لقيت واحد العمارة محلولة شويا حسيت بواحد المشة كتدفعني برسها بحال الا باغاني نطلع, ماحسيت براسي تاطلاعت لقيت واحد الدار دفاعت الباب دخالت لقيت الدار كحلا و موسخا بزااف و خانزاا بديت كاندور دخالت لواحد البيت لقيت فيه واحد الصندوق صغير حاليتو و انا لقا فيه تصويرا وحدا فيها واحد العائلة متكونة من اب و بنت و مرا و كان داك الصندوق كحل لموهيم حاطيتو و كمالت دوران دخالت لطواليط لي كانت كفس من الدار بقيت تانشوف كولشي مطلي بالدم و موساخ, كانت المرايا بوحدها لي نقيا معرفتش علاش المهم شي حاجة شداتني ليها بقيت تانشوف فيها و هنا كان الرعب ....

بقييت تانشوف فلمرايا صافي بدالت وجهي صورة تاع وجهي فلمرايا بقات ماتحاركااتش انا كانشوف هاتشي و مصدوم كنحرك وجهي كنحرك يادي والو وجهي بقا فالمرايا بحال شي تصويرة دالي لاصقة تما, شويا بدا لوجه كيحاال فمو بيدييه بجوج و هوا كيزييد يواسسع فمو كيزيد يوسع كيزيد يوسع تا ولا سااد لمرايا كاملا و بدا كيخرج منو بزاف تاع لباخوش كحال و كباار معرفتش شنو داكشي, ماعرفتش شنو واقع, كنحس براسي بحال الا تشالالت مقادرش نتحرك ولا نهرب, بخوش كيخرج كتيير و انا واقف و كنشوف مصدوم, شويا لمريا تشاقات و تهرسات و داكشي كولو طار ليا علا وجهي, غوت و بقيت راجع بلور تا كانقييس واحد المرا مورايا واقفا دارت بزربا نشوف شكون كانلقاها مرا شارفا و مكامشا و شعارها طويل بقيت كانحاقااق فيها و انا نعرفها هي لمرا لي كانت ف تصويرا و قالت ليا بلغوات: شكادير هنا شداخلااك هنا نتا شكون؟ انا تخلاعت و قلت ليها انا دخالت لهنا بغيت نعراف قصة تاعكوم و هيا تغواات نتا مالك سوقاك ش جابك لهنا نتا مالك فضولي شتي فضولك غا يخرج عليك و غوتاات واحد الغوتة لي لدرجة ان غاع الجاج لي فديك الدار تهرس, بدات كولها كاتسييل بدام من غاع جسمها كولو كيسيل بدم و كتيير تا بدا كيعماار دوش شويا بشويا كيعمر كيعمر,و باش اتكفاس جاو شي رجال من موراها و بداو كيداربو فيا و كايغاطسوني ف داك الدم و انا كانغاواات وندرب فيهوم وندفع فيهوم و هوما كيغاطسوني و انا كنغوت و ساد عينييا , صاف غنموت بديت كنتخنق شربت غاع الدم كنحس بالمداق ديالو كنقاوم و نعاود نتغطس عاود ,شويا صافي سخافت و غراقت ف الدم مبقيت حاس بوالو, صاف غبت و استسلمت...

فقت لقيت راسي متاكي فواحد الدار لي تعجبت منها انها كانت نقية بزااف كل حاجة فبلاصتها , بقيت شحاال و أنا متفاجئ من هاد الدار كنتلفت ليمن و ليسر كما نلاحظ شيحاجة غريبة و لكن ما بان ليا والو , شويا وقفت و بقيت راجع باللور تاقست جوج ديال الرجال ماعرفتش شكون, لمهم دوك الجوج هما لي زادو خلعوني ماعرفتش كيندير نوصفهوم ليكوم هوما بيضيين بزاف و كانو طوال مني لابسين كولشي كحال , مي الي بصراحة خلاني متفاجئ هو انه وجههوم كيتكون من فم واحد كبير, انا بقيت كنشوف, تا جاتني القدرة أنني نهضر معاهوم , شكون نتوما ؟؟ هنا زادت المفاجئة ملي شفت الطريقة باش كيدويو تخيلو معايا راس فيه فم كبير هوا لي كيدوي , اللول دوا غالي سميتو {زعبل} و الثاني كذلك نفس الاسم, بقيت كنشوف فيهوم شحاال علا مادويت غولت ليهوم شنو المطلوب مني انا لاش جيت لهاد الدار بالضبط شنو بغيتو مني ؟؟, غالو ليا نتا لي شنو باغي منا لاش جاي داخل عندنا؟؟, أنا بديت كنهضر و صوتي كيترعد : ااانا غير كاتب متخصص فففالغيبيات و ماوراء الطبيعة و انا جيت اللهنا باششش نننكتاشف السر ديالكوم, و لكن انواعدكوم أنني غدي نمشي منعاودش نرجع ولا ندور بيكوم مرة خرا. غير ساليت هدرتي دوك الجوج تبدل اللون ديال عينيهوم ولاو حمرين بحال الدم و هما يغوتو بجوج فدقة وحدة : كيفاش تخرج منهنا حنا لي كيدخول عندنا ماكيعاودش يخرج صاف نتا جنيتي علا راسك و هنا غادي تبقى...

كيفاش جنيت علا راسي , كيفاش واش انا بزز عليا انبقا هنا ولا شنو ؟؟, بداو كيدويو بجوج فدقة عاوتاني: اتمشي عندوا هو لي ايشرح ليك كولشي, عمارة 13 عندوا فين اتلقا الجواب ديالك. انا مابقيت فاهم والو غولت ليهوم واش انا انبقى نتنقل بينتكم هاكا , عندمن اتسيفطوني عاود شكون هادا لي ايشرح ليا علاش لي متشرحوش ليا نتوما؟؟ لا حنا ماشي مهمتنا هادي .كيفاش و شنو هيا مهمتكم؟؟ هنا فين نسمع اغرب جواب : مهمتنا حنا هيا نوريوك الطريقة باش اتموت ,هنا انا تصدمت مادازتش علا هدرتهوم ثانية وحدة تا بديت كنحس بحال شي ماس ماضيين كيقطعو فلحمي انا ماعارفش هاتشي منين جاي ولا شكون كيقطع فيا كنحس بيهوم كتار داخلين خارجين فلحمي انا مابيدي والو غير كنغوت شويا بديت كولي كنسيح بشي مادة كحلا كنحس بيها خارجة من كل ضربة او جرحة فجسمي و باش اتكفاس مزيان الدم كيخرج من كل منطقة فجسمي هانشي كولو انا شايفو و مابيدي تاحجة ماندير غير كنغوت كنغوت من الالم كنغوت من الندامة اش داني نجي لهنا , مع اخير غوتة ليا انسمعهوم كيضحكو انا انحل عيني منلقا فيا والو بحال الاكنحلم , بداو كيدويو بجوج عاود : مالك هههه راه حنا غير وريناك الطريقة كيفاش اتموت مادرنا ليك والو. نازل فالدروج و كنفكر فين سيفطوني : عمارة 13,نمشي ولا منمشيش, من جهة الفضول ايقتلني و من جهة الخوف ايقتلني, انا ماعمري عرفت راسي كنخاف هاكا , انا لي تخيلت شي حوايج و كتبت شي حوايج كانو كيرعبوا بنادم, هادشي كولو كنهدر معا راسي و غادي تاكنحاس براسي وقفت هازيت راسي : العمارة 13, بقيت مدة مصدوم كيفاش جيت لهنا و انا ماعارفش هاد العمارة فين جات, علا شحال عاد تحركت ختاريت انني نرضي الفضول ديالي و نطلع, بديت طالع لقيت باب محلول دخولت, دار نقيا و موسيقى خافتة هادئة خارجة من واحد البيت, تاكنسمع واحد السيد كيعاياط ليا من داك البيت: سي نزار الكاتب ديالنا دخول مرحبا بيك, طاليت غير بشويا و انا خايف لانشوف شي منظر كفس من لي قبلو, نن مايمكنش راجل طويل عريض عادي لابس بيجامة شاد سيجار ف ايديه ,سلم عليا و طلب مني نشاركو في الجلسة, انا بقيت غير ساكت مافهمت والو, انا يعقوب كنت فالعسكر شحال هادا مت قبل من نخرج تقاعد, و جيت سكنت هنا فهاد المجمع صراحة عايش فواحد الراحة لا توصف و تاتنا دب تعجبك الاقامة معانا هنا. ككككيفاش شنو كتعني علا انا غنبقا عايش هناماغاديش نمشي, واش انا وليت سجين هنا. امم انك تمشي هادي مستحيل و لكن ماتخافش

ايعجبك الحال هنا تا هادو لي ساكنين معانا هوما عزااز و تنتا ايعجبوك و اتعزاز عليهوم و امكن راك تلاقيتي بشيوحدين منهوم و مزال الخير تبارك الله حنا هنا عايشين كاملين فراحة و دب تجي تشكرني , هاكا جاوبني.انا صاف جمدت بلاصتي بقيت كنشوف و بحال الا تقبلت الموضوع: شنو مهمتك نتا شنوا توريني سي يعقوب...

عقلتي علا الشفار محمد, هو كيما غاليك مابقاش قادر انه يزيد يعيش معانا, مكلخ حنا درنا معاه بزاف فتحنا ليه ابواب السعادة, لفلوس, لي تماناها كتجيه. انا مهمتي انوريك كيفاش هوا مات حيت فاش تلاقيتي نتا اوياه هرب و خلاك, و هو كيهدر و كيشرح ليا واحد الشرجم حداه غاليا شوف فيه هو ايوريك كولشي, شرجم عادي مي بحال الا كنشوف شي فيلم : بان ليا المشهد فاش يالاه تلاقيت بمحمد اول مرة و خلاني و هرب, غادي كيجري كيجري قرب يخرج شويا تقسم على 3, او كيفاش بحال شي حاجة مكتبناش قسماتو فاقل من ثانية, كيبانليك السرعة باش كان غدي باش تفرق , اكفس موتة شافت عيني.انا بقيت كنشوف تكنحس بيعقوب كيغوليا نزار نزار صاف صاف المشهد سالا السيد مات ودب ولا واحد منا. دب دب و انا شنو غندير, كنهدر و انا كولي كنترعد, غاليا نتا دب غير هبط من عندي و كيما جيتي عندي اتمشي عند داك لي كيتسانك. المهم نزلت من عندو لقيت الشارع عامر بالمشاش كولهوم كحلين و مصافين بحال الا مصاوبين ليا طريق باش نتبعها بقيت تابع الصف ديالهوم غادي غادي تكنلقاه كيسالي قدام باب ديال واحد العمارة, بقيت كنشوف : شنو كيتسناني هنا عاود شكون انلقا و شنو انشوف. المهم طلعت و تميت غادي معا دروج والو ماكاين لا بيبان لا تاحاجة غادي طالع طالع تال اخر طبقة لقيت باب دقيت فيه و هو يحل ليا واحد الرجل: سي نزار الكاتب لكبير ديالنا دخول مرحبا بيك, انا ماقلت والو دخلت موراه و غلسنا فواحد الصالون, لقيت محطوطة شي ماكلة و شي مشروبات عمري شفت بحالهوم, المهم بداالسيد الهدرة لي هو سميتو عزيز, شحال من فرصة جاتك ا نزار باش تهرب, 3 او 2 فرص لحد الان و لكن نتا بقيتي تابع فضولك, باغي تعرف كولشي باغي تفهم كولشي, و لكن مزيان مزيان هانتا نيت بقيتي تابعو تا اتجيبها فراسك. دب علاش كتغول ليا هاد الهدرة جيني نيشان و غوليا شنو مهمتك تانتا شنو اتوريني ولا شنو ادير فيا,شنو باغيييين منيييي. ههه حنا لي شباغيين منك ههه شكون لي جا و دخول على لاخور حنا ولا نتا , دب هاتشي مابقاش هام اجي نبدا ليك من اللول, انا هو المهندس عزيز انا لي تبنيت هاد المشروع و ممكن تغول انا لي بنيتو, هاد البلاصة لي كتشوف دب فاش جينا ليها اول مرة كانت عبارة عن حطام شي مردوم فوق شي معرفناش واش كانت مقبرة ولا سيد ولا شي بلاصة مهم كنا كنلقاو ناس كيجيو يزوروها و يتبركو منها بزاف, المهم حنا فبدايةالمشروع لقينا

بزاف ديال الصعوبات باش نقنعو الناس انهم يخيليونا نبنيو المشروع ديالنا, و كيما نتا عارف اي واحد عند وشي بلاصة كيسترزق منها مكيبغيش يتلقها, هادا هو لحال ديال واحد السيدة لي ممكن تغول انها شوافة او دجالة, كانت محتلة المنطقة و بطبيعة الحال حنا ملي جينا هنا كنا كنمثلو ليها عائق كبير, شحال و حنا معاهوم فالمشاكيل حتى لواحد النهار لي ممكن تغول سلطات عاينا واحد اللعنة, حنا مديناهاش فداكشي لي لقينا مرمي علا الارض و لحيوط المهم سالينا البني , سالا المشروع, حتا بدات الاعراض ديال اللعنة, غاع العمال لي كانو هنا و انا منهوم بدينا كنقتلو فبعضياتنا و المشكل بحال ال ضاحكين وكنلعبو عادي كتهز موس و دبح صاحبك و هو نتا كدبح فيه و هو عادي عندو, كنا كنحسو بحال شي واحد لي مسيرنا حنا مابيدينا مانديرو غير كنفدوا داكشي. بقات اللعنة مستمرة تاوقعات اخر جريمة لي نتا بسبابها معانا دب. اذن الناس مكدبوش و دوك الاشاعات لي كانت على هاد الجريمة بصح, هاتشي لي ستنتجت انا و الدهشة باينة على وجهي. وي و حنا كيما كتشوف باقيين على الهيئات ديالنا و هوما اغلبية ديالهوم كيفضلو الهيئة ديال مش, وي بلا متخلع بصح داكشي لي فدماغك غاع لمشوش لي شفتي فشارع راه هوما هادوك ممكن تغول كيتستاوك تسالي الدورة علينا باش يرحبو بيك.

انا بقيت غير كنسمع طوال هاد الزيارة الاخيرة, مندهش من هاد الحقائق لي سمعت. ولكن علا حساب ما فهمت انا نتوما لي دخل لهنا كتقتلوه باش يولي منكم و علاش انا عطيتوني لحق تعرف هاتشي كولو عليكوم ؟؟. نتا كاتب و بالتالي كفاش بغيتي تكتب علينا و نتا ماعارف علينا والو, كان خاصك تفهم اي حاجة كبيرة ولا صغيرة, و نزيدك باش تكمل لقصة ديالك انا هو لمسؤول علا هاتشي كولو لي وقع هنا يعني انا المتهم الرئيسي, خيت انا كنت عارف حقيقة المكان و خبيتها.و لكن علاش انا بدات موقغ ليا والو؟؟. الناس عندهوم واحد السلاح لي ديما خارج عليهوم و لي نتوما كتسميوه لفضول, كيما غولت ليك نتا اتكتب القصة ناس ايبغيو يكتاشفو و يعيشو المغامرة و بالتالي هاحنا جبنا ضحايا جداد. انا تصدمت بغيت نهدر و هو يسكتني: صاف سالينا مهمتي سالات دب نتا اتمشي لدارك ونتا عند بالك راك خرجتي من الحي مي نتا لا. هبطت من العمارة نفس المنظر ديال لمشاش مطراسيين ليا الطريق لي نتبع مي هاد المرة كانو كيشوفو فيا بحال الا كيضحكو معايا و متبعيني بعينيهوم, وصلت لداري معا حاليت لباب تكنلقا مرتي و بنتي تلاحو عليا كيعانقوني و كيبوسو فيا فرحانين, انا تعجبت لانه بالنسبة ليا انا غبرت غير نهار و لكن انكتشف انني شهر و انا غابر عليهوم, المهم دخولت لبيزو ديالي اصلا انا جيت لدار غير باش نكتب عيييت غلست تانكتب تانكتب و نعاود كولشي كيما هو, شويا كنحس بمرتي دخلات: نزار مالك شحال غبرتي و دب ملي جيتي ونتا غير كاتكتب ماعرفت مالك ما عرفت شنو ملي جينا سكنا هنا ونتا مبدل, عرفتي كون ما هاد الجيران جداد ديالنا و كون ما السيد يعقوب لي قابلنا و قابل الطلبات ديلنا كون حنا ضعنا.انا وقفت مخلوع: شنو كتغولي كيفاش جيران جداد و منين كتعرفي يعقوب, مشيت كنجري لشرجم طليت كنلقا راسي ساكن فعمرة وسط داك الحي الملعون. مبقيت فاهم والو ماحاس بوالو , هه اصلا راه غالها ليا ههه غاليا راك مغاديش تخروج, بقيت ساكت و كنشوف تما فهمت بلي انا راه ميت من نهار دخلت للحي, انا دب كنكتبليكوم هاتشي و انا ميت معرفتش كيفاش ااتوصلكوم اخير رواية ليا و لكن انا متاكد انكم اتقراوها و اتجيو عندي و اتلقاوني كنرحب بيكوم.