فطرنا بحال هكدا كلينا مزيان وهو يدخل شيفور ديالو وهاز صاك لي فيه فلوسي قاليا ها هيا فلوسك 50 مليون كيفما واعدتك شديتها حسبتها قدامو حليت شكارتي باقي فيها 20 ودبا ولات 70 سديت شكارة وقلت ليه لله يعاون وهو يقوليا شوف نهار تبغي تخدم مرحبا أنا غير هنا كالعادة قلت ليه صافي وخرجت طلعت فوق موطوري وشديث طريق كازا تاني حتى وصلت ديريكة دخلت لعند لواليدة توحشتها عنقتها لواليد كدالك قلت ليهم نبركو باغي ندوي معاكم بركنا قلت ليهم لواليد لواليدة بغيت نتزوج و لبنت راكم عارفينها شيماء وأنا كنت عندهم هاد ليوماين قاليا لواليد ولدي صبر غير ناخدو ليك شي دار قلت ليه لواليد سمحلي مقلتش ليك راه ولاو عندي 4 ديال ديور خديتهم سيمانة لي فاتت و لفلوس ها هيا 70 غادي نعرف شنو ندير بيها لمهم راكم عارفين لقصة كاملة وبغيت نزرب فهادشي لا توقع شي حاجة عاود تاني لواليد قاليا وباينا فيه لفرحة قاليا كبرتي بزربا نهار لكبير هدا أولدي شاف فلواليدة وقاليها يلاه نمشو نتقداو داكشي لي غيخصنا نديوه معانا بعد شي نص ساعة خرجو وبقيت أنا بغيت نستراح من طريق لبارح منعستش يلاه بدلت حوايجي وحطيت راسي حتى تنسمع صوت دقان فلباب ناري نساو شي حاجة تاني مفيا لي ينوض لحت ليهم سوارت ديال دار من شرجم وتخميت بالمانطة يلاه بدا تيدي فيا نعاس حتى تتجر لمانطة بجهد لقيت زوج درجال شاديني معرفتش باش تبليت وضفاك شكون علاش واحد معاهم واقف وتيشوف قايليا ششششش بلاما تشوه راسك فدربكم حنا بوليس وجبد ليا لاكارط ديالو قاليا كون بعقلك بغينا غير ندويو إلا تفاهمنا هنا مغادي يوقع والو قلت ليه صافي قال للي معاه قلبو لبيت مشاو لشكارة لي فيها لفلوس نيشان لقاو ديك 70 مليون تما وأنا مزال متكي فبلاصتي عكاو صاك لخونا لي قاليا بلي بوليسي و وقفو حدايا قاليا شوف عارفينك نتا ماشي معاهم وغير كنتي دايز وكدا و القصة ديالك من لول ولكين ديك توصيلة لي وصلتي تقدر تعاقب عليها ب كتر من 8 سنين شبالك تعاون معانا ولا لا قلت ليه إوا أشاف نتوما عارفين كلشي أنا غير مضلوم فهادشي وندير أي حاجة باش مندخلش لحبس قاليا مرحبا لبس حوايجك وتبعنا غتلقانا قدام لباب ولاح ليا لفلوس قاليا خبيهم دبا تحتاجهم راك غادي تخطب زعما ناريييي متيتخبى عليهم والو وليت شاك بلي معايا قواد فدار شكيت فلواليد فصراحة هههه هو لي يوصلها ليهم لواليدة حنينة متديرهاش خبيت لفلوس تحت ناموسية و لبست حوايجي ومشيت معاه لابريGاد قاليا تتبان مناعسش مزيان قلت ليه اه الشاف وهو يحل ليا لاكاب فين تسحبسو بنادم قلت ليه يهديك لله أشاف من نيتك قاليا غير ستاراح هنا مالك خايف بلاما ساليت واحد لخدمة حتى انا ونجي ، قلت ليه صافي دخلت حطيت لقبية ديال و رسحة فوقها داني نعاس و أنا بارك تنفكر بلي قودتها ...
داني نعاس بقيت ناعس حتى فيقني داك الكوميسير قاليا أنضو شفتك ولفتيها كيف وقفت على رجليا تنحس بظهري غادي يتهرس الله يا ربي غي نعسة دساعتين بهدلاتني بقا غير ندخل شي 10 سنين غادي يخرجوني ميت خرجت معاه بركنا فلبيرو فاليا ولدي نتا غير فسيكتور ديالي و عارف عليك كلشي و مك و باك ماشي ديال تبهديل حسن ليك تعاون معايا و نتعاون معاك قلت ليه شاف معاك أنا لي بغيتوني نديرها أنا واجد قاليا مزيان هادشي لي بغينا شوف غترجع لطنجة و غادي تقول لخونا بلي نتا باغي ترجع لخدمة و غادي تاخد سلعة و غادي تدير فيها واحد GPS صغيرة باش نعرفوهم فين تيوصلوها صاافي هادشي لي غادي دير و تنأكد ليك غادي ترجع بزربة و بحالا موقع والو هنا بيناتنا غنغمض عينيا على داكشي لي درتي قلت ليه شاف صافي معاك غادي ندير هادشي قاليا صافي نوض دبا سير بدل حوايجك و قول لداركم بلي غاتسافر و عطاني ديك GPS صغييرة قد شي حبة دالعدس و فاليا متخافش انا غنمشي ديما وراك خرجت مشيت لدار لقيتهم مزال مجاوش بدلت حوايجي و كتبت ليهم بلي غادي نمشي لشي بلاصة و غادي نتعطل شويا فورقة و خليتها فوق طابلة وخرجت هزيت لموطور و غادي شاد طريق على زهري لعوج الله ياسيدي ربي مالني يهودي ... رجعت ثاني لطنجة مشيت لوطيل ديال داك خونا دخلت مشيت قلت ليه باغي نخدم تيباليا بحالا شك فاليا وايلي ياك قلتي صافي هاديك أول و آخر عملة قلت ليه و صافي لسان مفيهش عظام دابا بغيت شي خدمة أخرى قاليا صافي كالعادة نزل لموطور لاكاب يقادو ليك فيه سلعة أنا جاي نوريك لبلاصة نزلت أنا لاكاب و هو بقا فلبيرو ..
جبت ليهم لموطور خليتهم تيديرو سلعة فيه ومشيت مع داك لمدير لبيروه باش يعطيني لفلوس وهو يجبد ليا 10 دلمليون قلت ليه شوف غير عطيني كلشي راه بغيت نمشي من تما لدارنا قاليا صافي لمهم توصل لناس سلعة كيف لمرة لولا قلت ليه كون هاني سلعتك غنوصلها جيبلي غير لفلوس وهو يبدا يجبد ليا حتى ولات 60 مليون قلت ليه ممكن تعطيني شي كرطونة عطاني كرطونة ضربت فيها دوك لفلوس وسديتها بسكوتش فكرت فخطة زوينة باش نتعاون مع لبوليس وفنفس لوقت نجمع شويا دلفلوس تاني هزيت لموطور وحطيت لكرطونة قدامي ومشيت حتال واحد لمحال ديال بريد أمانة وعارف كين واحد بحالو حدا دار دخلت قلت ليهم بغيت نوصل هاد لكرطونة فيها شي كتوبة قاليا مرحبا قيد غير لعنوان هنا وحنا نوصلوها قيدت لعنوان ديال دارنا وهو يقوليا ممكن تحل نشوف شنو لداخل قلت ليه أه ولكين راه عندي شي كتوبة قدام وغادي غير نولي مقطع شي لعبة ومديت ليه 100 درهم وهو يقوليا صافي بعد 4 يام غادي توصل لهاد لعنوان كون هاني عطيتو لكرطونة فيها 60 مليون وخرجت هزيت لموتور ومشيت لواحد زنقة خاااوية وحطيت لموطور قلبتو مزيااان حتى جبدت خنشة من ديك سلعة وجبدت ديك GPS درت واحد تقبة صغيييييرة ودخلت منها ديك GPS بزز دخلات وأنا نحرك لخنيشة مزياااان حتى دخللات GPS لوسط عاد رجعتها لبلاصتها ومشيت لديك لقهوى فين غادي نتلاقا بخوتنا تنتسنى فيهم ولخلعة شاداني ديال بصح ناري أنا بين زوج وحوش يا هاد خوتنا لي تيبيعو هادشي يقتلوني ولا لحبس و لبوليس شداني لهاد زبل كامل كنت طرونكيل وعندي 4 ديور يعيشوني بيخير القناعة ناقصة لي دارتها ليا وفهاد لحظة وقفو عليا خوتنا قاليا سلام سلام قاليا سلعة فلموطور ياك قلت ليه أه قاليا تبعنا طلعو فطوموبيلتهم وانا تابعهم من لور حتى مشينا لديك دار تاني دخلنا لموطور جبدو ديك سلعة وخلاو ليا لموطور قاديتو تاني وقفتو قلت ليهم سلعتكم هيا هادي صافي قاليا صافي سير دافع لموطور وغادي خارج مع لباب وهو يقوليا أه تفكرت مبروك الخطبة قلت ليه شنو كيفاش عرفتي أنا ويلاه ناوي نخطبها قاليا وراه شاف لكبير عرف حنا تنعرفو كلشي على لي غيخدمو معانا و شيماء بنت ضريفة قلت ليه لله يحفظك وخرجت بزربا تنجري طلعت فوق لموطور بعدت مزياان وانا نجبد تيليفون عيطت على لكوميسير قلت ليه حبس مدير والو هادو غير خدامين راه كين شي واحد هو لي تيسيرهم و عاد راهم عارفين كلشي عليا قاليا صافي غادي نأجلو هادشي بغيتك نتا تشوف كيدير وتعرف ليا هاد لي تيحكم فيهم شكون هو قلت ليه هيا غادي نعاود نوصل ليهم هادشي غدا ونحاول نعرف قاليا صافي قلت ليه راه GPS فديك سلعة قاليا مزيان دبا غادي نعرفوهم فين تيخبيوها بغيناك غير تعرف لينا هاد خونا شكون قلت ليه صافي الشاف كون هاني غير متنسانيش ملي يسالي هادشي قاليا نتا راك خدام معانا وحنا متنساوش رجالنا قلتلو على لله تكون قد كلامك وقطع مشيت لوطيل تاني ؟ ...
دخلت لوطيل طلعت لبيرو ديال لمدير شافني وهو يتصدم قاليا هدا نتا تاني شنو وقع حتى رجعتي تاني قلت ليه والو غير بغست نزيد نخدم وسلعة ديال قبيلا وصلتها قاليا هادشي فشكل عندك شحال من مرة تتقوليا أخر مرة نخدم معاك إلا كنتي باغي دير شي لعبة نصيحة مني غير دير عقلك دوك ناس ماشي بحالي هدوك ممعاهم لعب قلت ليه صافي أصحبي بغينا نخدمو شفيها مبغيتيش صافي قاليا أنا غير قلت لك أما لخدمة معندك ما توصل ليوم طلع تنعس فشي غرفة حتال غدا فصباح بكري غتلقا لموطور واجد وصلو عطيتو سوارت ديال لموطور ومشيت انا لبيت باش نعس طلعت دويت مع لواليد قاليا فينك راه ماماك وجدات لحلوى وكلشي بقيتي خاصنا غير نتا قلت ليه لواليد سمح ليا دخلت راسي فشي صداع كبير ولكين غنشوف كيفاش نخرج راسي لمهم ديك لبنت مجاتش نخوي بيها عولو غادي نمشيو غدا ولا بعدو ضروري قاليا محمد ولدي لله يرضي عليك معرفتش شنو واقع ليك ولكين أنا راضي عليك لله يعاونك دوز ليا لواليدة لي بدات تتبكي قوداتها عليا نفسيا بقيت داوي معاها حتى حيد ليها لواليد تيلي قاليا صافي ماماك غير خايفة عليك وصافي سير شوف خدمتك قطع بقيت بارك تنفكر شويا فهاد صداع شويا عاد عيطت على شيماء مقالت ليا لا سلام لا والو قالت ليا فينك مجيتيش ياك قلتي غادي تجيب باباك و ماماك وترجع وليتس غابر يوماين ومتتسولش حتى فتيليفون قلت ليها شيماء ديزولي ولله ما لخاطري كنت راجع لدار نقولها لواليدة و دخلت لوطيل و ... عاوظت ليها كلشي من لول وهيا تقوليا محمد شوف انا عارفاك غادي تجي ياك غادي نتسناك وخى منعرف شنو يوقع كيفما تسنيتيني غادي نتسناك قلت ليها وا لحمقة راني يمكن نجي غدا ولا بعدو غادي نشوف كيفاش ندير لهاد لحريرة بمهم غنجي إنشاء لله وخا منعرف شنو يوقع قالت ليا صافي غير نلي تبغيو تجيو قولهالي قبل على لأقل بشي 5 سوايع قلت ليها صافي قطعت وانا نحط تيليفون يتشارجا ونعسة كنت عيااان غير حطيت راسي وانا نمشي حتى فقت صباح على صوت دقان ديال لخدامة حطاتلي لفطور وقالتلي تيتسناو فك لتحت فطرت بزربا ونزلت لعندهم لقيت لموطور مقاد وداكشي وسطو خديت لفلوس فلبلاصة للمرة تالنية درتهم ف كارطونة تاني وسديتها و وصلتها لديك أمانة وضورت مع خونا تاني وقلت ليه نفس لعنوان ديال لبارح قاليا صافي كون هاني ركبت فوق لموطور وتلاقيت بالكوميسير عطاني واحد تيليفون وقاليا ملي تلقا خونا صوني عليا غادي ندخل ، مشيت لقهوى فين تنتلاقا بخوتنا كالعادة جاو تبعتهم مشينا لديك دار دخلنا بداو تيحيدو سلعة من لموتور و أنا نشوف فداك لولد وقلت ليه خويا بغيت نخدم معاكم قاليا هانتا خدام معانا دبا قلت ليه فهمني بغيت شي خدمة أخرى من غير توصيل بغيت خدمة معاكم هنا حيث محتاج فلوس قاليا صبر نسول شاف ودخل لواحد لبيت بقى تما شويا وخرج قاليا صافي غادي تخدم قلت ليه واش مولشي تما قاليا علاش تتسول قلت ليه بغيت نعرف باغي ندوي معاه قاليا شنو تدوي معاه فاش مناقش انا و خونا حتى تحل لباب ديال لبيت وخرج خونا قاليا أجي أجي ...
خرج داك مولشي قاليا أجي دخلت معاه لداك لبيرو قاليا برك ريحت حداه قاليا باغي تخدم معانا قلت ليه أه قاليا مرحبا ولكين راه متقدرش تجي شي نهار وتقوليا بغيت نحبس مغادي تحبس حتى ترشق ليا نحبسك قلت ليه صافي معاك وهو يعيط ليه شي واحد فتيليفون جبدو بدا تيهضر معاه جبدت حتى انا تيليفون وعيطت على لكوميسير باش يعرف خونا هنا وقطعت رجعت تيليفون لبلاصتو ودرت بحالا مكاين والو حتى تنسمعو صداع ولغوات برى خونا لاح تيليفون حل لباب بانو ليه لبوليس وهو يدوز من قدامي نقز من شرجم لواحد سطح ديال دار أخرى بقيت غير تنشوف وتنتفرج وهو يدخل لكوميسير قاليا فيناهو خونا قلت ليه راه يلاه نقز من هنا قاليا ونتا تتفرج أصحبي تبعو راه إلى مشى حتى هرب غادي يحلفها فينا و فيك غير سمعت هاد لكلام وأنا نقز تبعتو من درب لدرب و زنقة ب زنقة حتى عيا و وقف حدا واحد خونا تيبيع لماكلة مشيت لحقت عليه قاليا هربتي مزيان ملي مشدوكش خونا عيان وحاني راسو تتباليا غير لمقلة فوق واحد طابلة شديتها هزيتها حتال لفوق و أنا نتكى عليه بيها لراس تيباليا تنشر بقيت واقف حداه لا يهرب حتى جاو لبوليس لقاوه مجبد حدايا قاليا لكوميسير تبارك لله عليك وصافي مخليتيلنا منديرو ههههه وهادي خدمة نقية طلعو كاع دوك لي خدامين معاه و هو فطوموبيل و أنا فطوموبيل أخرى مع لكوميسير قاليا غتمشي غير تدلي بالأقوال ديالك وتسني عليها وتمشي لداركم قلت ليه صافي منها نعيط على دار يوجدو ريوسهم باش منزيدوش نتعطلو عيطت على لواليد قلت ليه وجدو راسكم غندوز ليوم نمشيو لعند دار لبنت قاليا صافي وعيطت على شيماء حتى هيا قلت ليها بلي غادي نجيو ليوم عندهم قالت ليا صافي مشيت معاهم لابريغاد دخلنا بداو تيقيدو داكشي لي وقع وكدا وحتى أنا سنيت بصمت غادي خارج وانا ندوز من حدا داك لي ضربتو لي حاكم فدوك خوتنا قاليا خونا هدا نتا وخا عقل على هاد لوجه مزيااان غدا ملي نخرج غادي نتفاهمو خليتو داوي وخرجت هزيت موطوري ومشيت لكازا تلاقيت مع دار خديت طوموبيل من عند واحد عشيري دخلت لدار لقيتهم تيتسناو فيا دوشت وبدلت حوايجي وهزيت لواليدة و لواليد و كاع ديك سلعة و لحلاوي عمرو طوموبيل وشدينا طريق حتى وصلنا لتما دقينا فلباب خرج باها حل لباب مرحبا مرحبا دخلو دخلنا بركنا مجموعين باها غير تلاقا مع الواليد وهوما يطبقوها بزوج و لواليدة و مها حتى هوما كل زوج وفين داوين تنحس براسي غير زايد حتى دخلات شيماء هازا صينية سلمات على لواليدة لواليد وبركات حدايا قالت ليا شنو درتي فديك لمشاكل لي خشيتي راسك فيها قلت ليها صافي نساي كلشي سالا دبا لمهم قادينا لأمور مع عائلتها درنا بلي بعد سيمانة غادي نديرو لعرس ولي غادي يكون فكازا بغيت نزرب على هادشي لا تولي واقعة شي حاجة تاني للهم نزرب ندير هاد بنت ناس فداري توقف معايا ، بقينا معاهم حتال لعشيا وخرجنا راجعين لدار لواليدة عاجبها لحال محيحا هيا و لواليد فطوموبيل تيغنيو كون لقاو مساحة كبر كون تحزمو و شطحو هههه تنحس براسي ف برتوش ماشي طوموبيل وصلنا لكازا حتال 21:00 وصلتهم لدار ديت طومزبيل لافاج نقاوها ورجعتها لمولاها وخديت موطوري ورجعت لدار غير دخلت طلعت لفوق جبدت تيلي بغيت ندوي مع شيماء شويا وهو يجي عندي لواليد قاليا تكلم ...
أوتاكو الجزء الرابع
محتوى القصة
التنقل بين الأجزاء