طباخة الرئيس الجزء 20

من تأليف سناء الصنهاجي
2018

محتوى القصة

رواية طباخة الرئيس

توضات وصلات صلاتها ومشات لبلاصتها تكات فيها هزات تيليفونها فتحات الواتساب حتى هجمات عليها أشراق
اشراق:امضرى شنو طرى عاودي بي بزربة راني نضت من حدا نزار غير باش نجيب الخبار
شيماء:واهي ناري على الرعدة انتي مالكي ياختي ابشوية يالاه جيت
اشراق:شوفي الله يرحم جدك بلاما تعصبيني طلقيني خلاص لفراجة عاودات شيماء لاشراق كاع لي جرا وحتى الخبار ازوينة كالتها ليها هنا اشراق ماقداتش تسكت
اشراق:رورورورورورويييي فرحتيني الحمدلله أحبيبيتي الله يكمليك بالخير دابا يالاه انعس مرتاحة وفرحانة
شيماء:ولايني هبيلة انتي سيري حدا راجلك كابليني انا 
اشراق:هههه دابا اه دابا انمشي حيت ضران ديالي راسي بردتيه بهاد الخبيرة هاني مشيت مواح مشات اشراق شوية سمعت ماما عيطات لي هبطت لعندها لقيتها هي وبابا كالسين
ماما:بنتي كلسي بابك بغا يهضر معاك الله يسمعنا خير كلست
بابا:ابنتي عاودات لي ماماك لي طرا شفت فيها ودارت لي اشارة زعمة ماتخافيش مكالتش كولشي
بابا:ابنتي انا كاتهمني مصلاحتك والفرحة ديالك ونشوفك فرحانة فدارك ونتهنى عليك نهار اللول كلتي مارتاحيتيش معاه وفسختي الخطبة ومابزناش عليك واخا كانو ناس الله يعمرها دار ولكن دابا راه واقفين على صح واش ابنتي متأكدة باشما تسرعي وتندمي تاني فكري مزيان
شيماء:بابا انا فكرت ديك ساع مكنتش عارفاه مزيان وتسرعنا ولكن عصام انسان مزيان وحتى دارهوم مزيانين
بابا:يعني مقتانعة ميا فالميا
شيماء:اه ابابا مقتانعة كون هاني من هاد الناحية
بابا:ايوا هادشي لي بغينا ابنتي غير تكوني فرحانة الله يكمليكوم بالخير والله يجعل كولشي مبارك ومسعود نضت بست ليه راسو وعنقتو وطلعت لبيتي دابا مرتاحة مدام كولشي راضي وفرحان هادشي لي بغيت هزيت تيليفوني لقيت عصام معيط جوج مرات سيفط ليه مسج"يمحلي كنت فدار لتحت

وخليت تيليفوني فالبيت ماسمعتوش غير سيفطو ليه وسونا ديك ساعة جاوبت دغية
شيماء:ابو عصام
عصام:وي عيون عصام
شيماء:مكنتش حدا تيليفون كنت كانهضر معا بابا
عصام:هضرتي معاه شنو كانت ردت فعلو
شيماء:عادية فرح لي بطابيعت الحال وبارك لينا وداعا معانا
عصام:الحمدلله داكشي لي بغينا ربي ماخيبناش
شيماء:اه بصح ربي وقف معانا ونصرنا ونتاصر حبنا فالاخر وهاهو غادي يتكلل بالحلال لي مابحالو حتى حاجة خصوصا مع الإنسان لي كاتبغيه
عصام:كانبغيك اشيماء وان شاءالله مغاديش نخيبك ونخليك فرحانة ومرتاحة كانواعدك
شيماء:حتى انا كانبغيك وكانواعدك اي حاجة واجهاتنا نحلوها بالعقل وتفاهم ويكون صبر ديما بيناتنا وتفاهوم حيت هو أساس كولشي وأساس بناء عائلة ناجحة
عصام:ان شاءالله أحبيبتي يكون خير طبيدة سيري رتاحي والله يبيتك فراحة حتى الغدا ان شاء الله
شيماء:تصبح على خير أحلام شيماء ههه قطعت مع عصام ونعست وانا معنقة تيليفوني وكانحلم بعصام .
أصبحناوأصبح الملك لله اليوم نهار جديد باحدات جديدة يوم كايحمل فطياتو احدات كتيرة نضت ناشطة اليوم حيت قريب يبدا العد التنازلي لزواجي وفرحي مع حبيبي جمعت بيتي ولبست حوايجي دغية وهبطت نفطر مع دار فطرنا انا وماما دغية نصبت الغدا وجمعت الدار وخدينا انا وياها طاكسي باش نشوفو هدى كي ولات وتبارك ليها ماما المولود الجديد وصلنا لكلينيك دخلنا لبيت عند هدى لقينا الحباب كامل مجموعين مليكة ومامات هدى واشراق مامات هدى باركات لي وضرباتها بتزغريتا وسط الكلينيك 
هدى:وأخيرا انفرحو بيك ونضحكو فيك هههه ياك اشراق عقلتي على مادارت فينا دابا هاهي جات نوبتها 
شيماء:شفتي انتوما والله ماديال العشرة تريكة ناقصة طليتو خضر معاكوم الحيوانات الناطقة
اشراق:اديك الكانيشة تحليك الفم ههه 
هدى:هي جمعة الخطبة خاصنا

خاصنا نباليو بيك ياك اشراق
شيماء:انتي بالي براسك انتي لولة لي مزالة نافسة اكاتنقزي
هدى:انتي شغلك انا بخير وعلى خير انا ولدي انور لي كان كايرضع الفنيكيش
هدى:اجي جات فبالي واحد الفكرة علاش لي مانديروش السبوع وضريب صداقك نهار واحد اش بان ليك ومنها يدخل عليكوم انور بالانوار والافراح
اشراق:والله حتى فكرة هادي ماعني مانيالك اهدى بعد المرات كاتخدمي داك السطل لي عندك
هدى:دابا انا ولا عندي سطل اودي ادزتي فوجه ولدي ومنا انوض ليك نخرك ليك سطل على راسك ديال بصح
شيماء:ههه انتوما والله مكاتقداو ماما شنو كلتي فلي كالت هدى
ماما:ابنتي انتي تعرفي وحتى هادي فكرة زوينة
هدى:صافي خالتي وافقات مشات يويويويويي
شيماء:اسكتي الهبيلة دابا يجريو علينا بقينا ضاحكين ومجمعين الفرحة والجمعة مع الحباب زينة سونا علي عصام خرجت على بﻻا نهضر معاه حيت صداع فالبيت
عصام:صباح الورد الاميرة ديالي
شيماء:صباح انو البطل ديالي كيصبحتي
عصام:بيخير وبزاااف فين كاينة
شيماء:انا عند هدى علاش
عصام:اوكي خليك انا قريب لتم عارض عليك الغدا ومنها نمشيو لقيساريات واد الدهب باس نختارو الخواتم واخا
شيماء:اوكي حبيبي واخا قطعت معاه ودخلت كلتها لماما وعلمتها من بعد شوية وصل عصام طلع عندنا سلم عليهوم وشاف البيبي صغير 
هدى:هاك هزو عصام بقا كايشوف فيها وكايشوف فيا خاف لا ي طيحو
شيماء:غير زعم ماتخافش قرب منو وهزو بشوية أنور كايشوف فعصام بعويناتو ويدياتو صغيورين كايلعب بيهوم قرب منو عصام وباس فرويسو وعطاه لهدى حرجنا انا وعصام ركبنا فطوموبيل وزاد
شيماء:باش حسيتي فاشهزيتي انور
عصام:احساس غريب وزوين للحظة تمنيت لو كانت فبلاصة عمران وانا لي أب والله حطيت ايدي على كتفو
شيماء:ان شاء الله اتهز وليداتك انا متأكدة اتكون اب رائع
عصام:ان شاءالله وحتى

انتي اتكوني احسن ام وصلنا لواحد السناك زوبن كلسنا نتغداو تما خديت بانيني وعصام حتى هو هكاك تغدينا وضروري من الغزل عصام مكايتفاكش خلص وخرجنا مشينا نيشان لقيسارية واد الدهب زرنا محل محل كانو بزاف ديال الاشكال زوينة ولكن صراحة ناعجبني حتى واحد حيت كولشي الموضيلات مشارجيين وعامر وانا بغين واحد سامبل بقا لينا واحد السيد المحل ديالو اسمو مجوهرات إسطنبول دخلنا العندو كان راجل كبير ورانا شي مةضيلات واخا هكاك ماعجبونيش 
الرجل:شنو بغيتي بضبط ابنتي
شيماء:بغيت شيحاجة لي تكون سامبل وجمالها هادئ وفنفس الوقت تكون جالبة للعين شاف فيا الراجل
الرجل:عرفتك علاش كاتقلبي انا شوية ونرجع مشا شحال ورجع هاز كرطونة فيديه
الراجل:انا منين شفت فعينيك ابنتي عرفت اختيارك حل الكرطونة كان خاتم غزال الخاتم الاول داير وسامبل وتاني فيه زمردة خضرا شفت فعصام وشاف فيا وحس انو من شوفاتي عجبني
الراجل:هادا ابنتي مصنوع من دهب توركي وانا لي مصايبو ومصصمو بيدي ومنين دخلتي عندي وماعجبك حتى خاتم وكلتيلي ختيارك عرفت دوقك وشنو بغيتي هو وخا غالي شوية ولكن مايتقدرش برمز ديالو
عصام:مدام عجب مرتي مكايهمش تمن خداه عصام ودارو فيدي 
الراجل:شنو سميتك ابنتي شافت فيه شيماء
شيماء:شيماء خلانا ومشا وتعطل علينا
عصام:شفتو تعطل فين مشا انا كانقلب براسي
شيماء:ماعرفتش بقينا شحال حتا خرج من واحد الباب 
الراجل:سمحو لي تعطلت عليكوم جاب واحد للخاتم نقري ديال الرجال شكلو زوين وحطو قدام عصام
الراجل:جرب هدا شاف فيا عصام هز الخاتم وجربو جا قدو نيشان
عصام:باش عرفتي قياسي
الراجل:اولدي سنين وانا فهاد الحرفة من شوفة فصبع نعرف القياس شوف الداخل ديالو وتعرف حيدو عصام وشاف الداخل كانت سميتي منحوتة بنحت العثماني معروف فتركيا
الراجل:من شوفاتكوم عارف شحال

المحبة ديالكوم
عصام:شكرا بزااف كنضن ختارينا المحل ديال الصح خدا الكريطنات قادهوم وجدهوم وخلصو عصام
شيماء:شكرا مرة خرا اسيدي
الراجل:الله يفرحكوم وبصحة وراحة خرجنا مشادين ليدين سونا تيليفون عصام
عصام:الو الوليدة
خالتي:ولدي شيماء معاك
عصام:اه معايا علاش
خالتي:عرفتي قيسارية كنزة اجيو ليها اتلقاوني تما وماتعطلش 
عصام:كاتليك الوليدة كاتسنانا حدا قيسارية كنزة 
شيماء:شنو كانتسناو يالاه مشينا لطوموبيل حطيت الخواتم عندو باش نهار العقد يجيبهوم معاه وركبنا مشينا كاتبان لي خالتي تورية وماما بجوجهوم واقفات نزلنا 
خالتي:اتخلي لينا بنتي شيماء وانت سير قضي شغالك حتى نعيط عليك تدينا
عصام:وعلاش مانبقاش اش فيها
خالتي:لا مخاصش العريس يشوف دهاز عروستو تبقا مفاجئة واسير الله يرضي عليك
عصام:أمري لله خلانا وركب فطوموبيلتو ومشا
خالتي:يالاه ابنتي مزال عندنا مايدار انا غير مزيديني هي وماما دخلاتني عند واحد سيدة كاتبيع توابات وتكاشط داكشي كايحمق حمقات مولات المحال تجبد وتحط
شيماء:ماما تورية براكة حادشي كتير
خالتي:بغيت نفرح بعروستي ختي عيشة شدي بنتك واجي شوفي معايا انا سكت مازدت كلمة خدات 6ثواب كاملين كايسطيو او واحد توب ديال تليجة فالبيض حطاتو يتخيط على ود جلابة هاديك السيدة نيت خدات عباري لابنسبة لجلابة وبنسبة لتكسيطة لي اتكون فوقها فالبيض والداخل زرق عاد القفطان بوحديتو خلصات الخياطة كولشي لا تواب لا الخياطة وخرجنا جراتني عند مالين صبابط وسيكان خدات لي شي سبيبطات توركيين وسيكانهوم تهز وتحط قدامي وتكولي قيسي انا نقيس وهي تكول
خالتي:هدا زوين انخدوه جمعو لي اولدي انا اكانشوف ويلا جيت نهضر اتقلق نكولو خدات المحال كولو والمياك غاديين ويتقلو علينا خلاتهوم عند ديك الخياطة وجراتني عند مالين الحوايج سولاتني

مولات المحال على التاي ديالي كلتها ليها 
خالتي:عفا بنتي بغينا حوايج مختاصين بالعروسة الله يرضي عليك بغينا شيحاجة زوينة جبدات مولات المحال شورطات وديباردورات ديالهوم غزالين
مولات المحل:عندي ليك واحد شكيل زوين يالاه خرج مشات جبدات شي مياك جابتهوم لينا هوما سروال قطنين رطبين ولكن فجنب شبكة هابطة فالكحل وعاد ديباردور ديالو بسميطات رقاق شافتهوم خالتي قرقشو عينيها
خالتي بغيناهوم ابنتي ب4 وحتا هادو معاهوم
شيماء:ماما تورية ماشي بزاف
خالتي:لا ماشي بزاف حتى حاجة ماتغلى على مرات ولدي ولي هي بنتي مولات المحل غير تحفن وتجيب لقاتها هميزة جابها ليها الله خدينا دو بياسات وشوميزات هادو بالكترة خالتي صدقات دواقة انا غير كانشوف ونشوف فماما لي ما حساش بيا كاتخنار مع خالتي متافقين علي بجوج رجلي طابو وشريان مازال مابغا يتقادا المهم خدينا كاع لي انحتاجوه من بيجامات وكتر 
شيماء:ماعييتوش يالاه نشربو شيحاجة
خالتي:الا مزال لينا شي حاجات
شيماء:ماما تورية مزال لينا غدا ان شاءالله
خالتي:ابنتي ليام دغيا كايطيرو ومزال تابعكوم شلى حوايج واش نسيتو توجاد العرس (كنا فررنا من بعد ضريب صداق بيوماين يكون العرس ان شاء الله)
ماما:خالتك عندها صح زيدي ابنتي مابقا غير القليل شفت حتى عييت ومشيت معاهوم دخلنا عند واحد مول المحال ديال المكياج صراحة بنادم كايبين ليك الحب ديالو من تصرافاتو بيك مخلات خالتي ماشرات مسكينة من روايح وباندوسات وكريمات اما المكياج غير الحاجة زوينة والواعرة مالين المحالات ترفحو معاها هاد النهار سالينا شراية ومشينا واحد القهيوة كلسنا فيها خدينا عصير وحلوة صراحة شدني جوع حيت الغدا هضمناه سونا خالتي لعصام يجي يدينا جا بزربة وصيفطاتو عند مولات تواب يجيب كاع لي خدينا رجع عندنا عصام
عصام:وقيلة شريتو

سوق كامل شفت فيه انا وضحكت وسكت ولات كاتبان لي غير الناموسية ونعس ناري عييت بالمعقول ركبنا مع عصام وصلنا لدار هبطت انا لولة سلمت على خالتي اما عصام ماتلفتش جيهتو شكون موال عاقل عليه مشيت نيشان لبيتي طحت نعست بحوايجي مافقت حتى 8 ديال العشية فقت رجلي طايبين قلبت تيليفوني لقيتو مشارجي بالزابيل ديال عصام سيفط ليه ميساج"سمحلي كنت ناعسة ماسمعتش تيليفون"سونا ديك ساع علي
عصام:الو انتي تنعسي وانا تخليني مشوش 
شيماء:والله مادرتها بلعاني راه عييت ماعقلتش على راسي
عصام:اكنضحك معتك احبيبة كنت بغيت نكوليك نتعشاو على برا ولكن خليها حتى الغدا نتغداو باش نتافقو على شيحوايج واخا
شيماء:واخا ان شاء الله قطعت مع عصام ونضت غسلت وجهي وتوضيت صليت هبطت التحت دخلت الكوزينة لقيت غدايا مغطي سخنتو وكليت حتى شبعت طلعت لبيتي ستفت الماريو ديالي وعكبت فرشت ونعست تاني بحال الى وليت مبنجة .الغد ليه فقت بكري حيت تابعني بزاف غير فطرت وخرجت وتافقت مع عصام نتلقاو باش على حساب نجمعو الوراق ديالنا جا خداني من حدا دار مشيت درت شهادة طبية لداتي ديال الامراض وحتى هو دارها جبت شهادة العزوبة داك صباح داز غير فالوراق وجري من هنا وهنا حتى لوقيت الغدا مشينا لواحد المطعم دخلنا خدينا طللة ودوموندينا على الغدا
عصام:عييتي
شيماء:بزااف هادشي صراحة ماساهلش والله ولكن الحمدلله كلشي تيسر لينا ماتسنيناش بزاف
عصام:هادشي ضروري منو المهم من ورا هادشي تكوني لي بقيت ساكتة وكانشوف فعصام
عصام:غير كولي شنو عندك باينة باغية تهضري 
شيماء:عصام مكرهتش عرسنا يكون فشكل
عصام:كيفاش فشكل مافهمتش
شيماء:كنت ديما كانحلم عرسي يكون مختالف ماشي فالقاعة وداكشي لا 
عصام:وفين بغيتيه
شيماء:علاش لي منقلوش القاعة لجبل
عصام خرج عينيه:جبل من نيتك انا جبل
شيماء:ماشي جبل بالضبط القهوة لي كنا مشينا ليها لي جات فجبل هاديك شفتي منين دخلنا لديك القاعة لكبيرة كي غزالة والنظر تما غزال بزاف مابغيتش انا بحال داك العرس بغينا شيحاجة لي نبقاو نتفكروها الى كبرنا ونوريوها لولادنا ان شاء شنو بان ليك
عصام:انا متافق معاك هادشي خليه علي شديت لعصام فيديه حيت مطايخصرش لي خاطري اليوم هدى اتخرج من سبيطار وبعد غدا ان شاء الله انبدا حياة جديدة ونهز المسؤولية ونولي انسانة مزوجة خرجنا انا وعصام وبقينا غاديين كانتمشاو انا وياه مشادين ليدين ضرنا فجامع الفنا ورجعني لدار 
شيماء:حبيبي الما جاوبتك عرفني مامسالياش حيت اندخل وعندي مايدار
عصام:واخا حبيبتي الوقت لي تسالي علميني بستو من وجهو ودخلت لدار دخلت تصدمت ادار مقلوبة سفاها على علاها ها الفرارن وطاوات ديال الحلو خالتي مليكة مامات اشراق ومامات مليكة كولشي حاضر مليكة حتى هي خارجة من الكوزينة واشراق هابطة من الفوق
اشراق:على سلامت لالة العروسة 
شيماء:الله ياربي الله واش كاين فاش نعاونكوم باينين محتاجيني انا نطلع البيتي نبدل ونجي
اشراق:سيري لبيتك وبدلي وديري واحد الماسك راه خليتو ليك ديال الخرقوم ودانون مسوس وروز مطحون ديريه لوجهك واجي حدانا راه مخاصش تحطي ايديك فالحلوة دابا جا نوبتك لي ندوﻻو بيك عنقت اشراق
شيماء:الله يخليكوم لي انا نطلع ونرجع طلعت لبيتي لقيتها وجدات الماسك وحاطاه حيدت حوايجي ودرت داك الماسك لوجهي وهبطت لعندهوم كلست جيت نهضر
مليكة:وياك تهضري راه ايتكمش ليك الوجه عكبت سكت كملو هوما خدمتهوم وانا بحال الاميرة عجبني راسي سمعت ماما كاتهضر معايا
ماما:خالتك تورية مسكينة بعدا هناتنا من النكافة والطيابة والسربايا كاتليك عندها لمعارف ديالها هي اتكلف بكولشي بغيت نهضر نكوليها علاش حشومة نعدبوها سكتاتني

حيت الماسك فوجهي غمضت عيني ومشيت فسبات عميق حتى كانحس بيد كاتفيقني واشراق كاتعيط حليت عيني لقيت ديك الروينة كلها تجمعات نضت حيدت داكش فوجهي ومسحت وجهي بما ورد
شيماء:صافي ياليتو دعية
اشراق:ومالنا بحالك حتى خفافات ههه
شيماء:لهلا يخطيكون علي والله ماعرفت ماندير بلا بيكوم شحال حاجة كبيرة يكون الواحد عندو حبابو لي يوقفو معاه
اشراق:مابقيتش نسمع حسك مزال كاتشكرينا كل واحد مشا لدارو وانا طلعت لبيتي سونا علي عصام باش يعلمني انو كلشي واجد وراعه تافق مع واحد سيد على حساب ينقل القاعة ديال العراس لديك القاعة لي فالكافي وهضر حتى معا داك النصراني مول ديك القهوة الحمد لله ربي يسر لينا دازو هاد يوماين غير فتوجاد وكل مرة اشراق طايحة علي بماسك جديد انا وعصام هاد يوماين مكانتشاوفوش غير تيليفون حيت مابقاش عندي الوقت كاع بنسبة لي مزيان هكاك باش يتوحشني اليوم الخميس كنت كالسة معا ماما من بعد ما مشات اشراق ومليكة من عندنا عاونونا فالحلوة ستفناها وقاديناها وتافقنا غدا ايجي عمران يدينا انا وهدى وحتى مليكة واشراق معانا لكوافورة تقادنا ومنها نكريو تكشيطة على حساب السبوع وضريب صداق كلست مع ماما راس فراس شفت فيها وحسيتها فشكل بحال الى طايح عليها ضيم قربت حداها
شيماء:ماما بيك شيحاجة
ماما:لا ابنتي غير العيا ومكلبة وجها درت ايدي على وجها وضورتو عندي عينيها مدمعين
شيماء:ماما كاتبكي
ماما:غير دموع الفرحة ابنتي ضارت شافت فيا وطبطبات على ايدي تنهدات وشافت فيا 
ماما:سمعي ابنتي مزيان غدا ان شاءالله ادخلي حياة جديدة وتولي عندك مسولية لي نوصيك ابنتي هو صبر صبر هو كولشي الى طلع راجلك نزلي انتي ومو ديريها فعينيك شفتي قداش كاتبغيك كتر من بنتها وتكوني مع راجلك فالحارة والحلوة صونيه وصوني دارك وديريه فعينيك راجلك ولد

ولد الناس وشاريك واخا يطرا لي طرا عمرك تخرجي من ضارك اي دار فيها المشاكيل خاص تحل غير بتفاهوم والعقل ابنتي عنقت ماما بجهد ونعس على رجليها وهي كاتلغب لي فشعري
ماما:اه ابنتي كايكولو دار البنات خالية كايجي واحد تنهار وكايتزوجو
شيماء:انا عمري نخليك اماما وديما معاك كوني هانية علاه شحال عندي منك غير وحدة وعمرك ماتعوضي بنسبة لي دخل بابا
بابا:هاي هاي كاتحابو ايوا انا غير نرجع فحالي شاف فماما لي كاتبكي.امالك ياهاد المرة مالها اتهاجر راها اتمشي لدارها وزايدون مزيان تمشي باش نعاودو انا وياك شهر تلعسل ماما حدرات راسها حشمات انا مت بضحك نضت عنقت بابا
شيماء:الله يخليكوم لي يا احسن والدين فدنيا خليتهوم وطلعت لبيتي خديت تيليوفني عمرتو باش نوض بكري مشيت توضيت وصليت جوج ركعات طلبت ربي يسر لي اموري وفرشت بلاصتي يالاه طفيت ضو سانو تيليفوني هزبتو كان عصام 
شيماء:ألو 
عصام:مشيشتي نعسات
شيماء:يالاه طفيت ضو شفتك تعطلتي ماسونيتي لي كولت واش نعستي بالعية
عصام:لا حبيبتي كنت كانسالي شي شغال عندي عرفتي هاد الايام كولها الخدمة على بدر زكيت شي امور ويالاه ساليت توحشتك
شيماء:حتى انا توحشتك بزاف
عصام:كيكاتحسي دابا متوترة خايفة
شيماء:ههه ضروري شوي ولكن مدام انت معايا ماعندي مناش نخاف بديت كنتاوب
عصام:هه حبيبتي نخليك ترتاحي حتى الغد أن شاء الله قطعت معاه وديك ساع نعست الغد ليه فقت بكري دوشت صليت وهبطت فطرت العقد ايكون فدار هدى حيت كبيرة هو وسبوع جا عمران كانت معاه اشراق وهدى ومليكة اما انور خلاتو هدى لماماها او حاجة مشينا للعند الخياط كرينا خديت تكشيطة فالخضر وداخل ديالها فالموف كولها كاترعرع وشال فالموف

اما هدى ختارت تكشيطة موف طويلة ومليكة تكشيطة خضرا كاتحمق واشراق قفطان حمر ديال الموبرا بصم من بعد ما ختارين لباس مشينا نيشان لصالون لي كان حدا الخياطة عندمن كرينا دارو لينا مساج لوجهنا دلعونا داك انهار اشراق وهدى صايوبو ليهوم مشيطات غزالين اما انا ومليكة بحكم كانديرو الفولار قاديت ليها الفولار وقاديتو لراسي مع المكياج ليكان اسوغتي مع لبيسات جينا كيف الاميرات سونا لي تيليفوني ليكان عصام بطبيعة الحال
شيماء:الو 
عصام:الو شفتكوم تعطلتو ياكما نجي نجيبكوم
شيماء:لا ماتجيش عمران كايتسنانا
عصام:واخا المهم انا جاي وجايب العدول معايا ماتعطلوش 
شيماء:هههه لا ماتخافش غير غادي نهربو ونمشيو نفوجو عاد نجيو
عصام:شيماء
شيماء:ههه مالك اكانضحك معاك قطعت مع عصام عدى سونا ليها عمران باش نخرجو قدام الصالون خرجنا لقيناه كايتسنانا حنا فتحنا الباب لراسنا وهو مزال واقف كايشوف فهدى وحال فمو فيها وحتى هي واقفة حادرة راسها زعمة حشمانة وحنى مخليين كي لبلاكات شفت حتى عييت وانا نتقزدر
شيماء:هدى مغانمشيوش عاد سيدة توكضات هي وسيد وطلعو طول طريق وهو يشوف فيها ويتبسم بحال اول مرة او اول نهار فزواجهوم غير وصلنا القدام باب دار كلكسونا عمران من بعد شوية خرجو عيساوة كايغنيو خرجات مامات هدى هازا انور على مزيناتو المشيش خرجات ماما وخالتي تورية وسكينة حتى هي كيف الاميرة بتكشيطة فالبلو سييل مامات مليكة ومامات بدر كولشي خارجين كايغنيو دخلنا عطات مامات هدى انور لماماه هزاتو دخلنا كانت الدار كولها مقادة بالورد وسربايا واحد صالة كبيرة مفرشة غزالة مستفين فيها طبالي بالعواصر والحلاوي مشينا كلسنا وكولشي فرحان ويزغرت وكايشطح شوية دخل بدر كان لابس كوستيم فالكحل كايبان غزال تبارك الله وقف بعيد ويتحلف علي بقا غير عصام لي تعطل

ناضت خالتي لعند بدر كاتهضر معاه وكاتسول فيه شفتهوم كايتحتو انا بدا الشك كايدخل فراسي لتكون طارية ليه شيحاجة شوية تفتح الباب عاد دخل ناري غير دخل انا دخت صراحة دخت نيت كان لابس جلابة حمرا مخيطة بالكحل والبلغة اول مرة نشوفو بتقليدي مع دخل بداو العائلة يصليو على نبي غير بدا جاي بشوية ويشوف فيا ومبسم (كانت اجمل بنت شفتها فحياتها كنت كي الاميرة مابقيت حاس فين انا ولا شكون كاين معايا كانت اجمل واروع عيون انشوفهوم)قرب لفين كالسة وخدا ايديها فيديه وقرب لعند ودنيها
عصام:جيتي غزالة ماشاء الله سبحان الله شيماء حدارات راسها حشمات وتزنكات مالفة كايتغزل بيها ولكن اليوم عندو نكهة خاصة بزاف 
شيماء:فين تعطلتي
عصام:كان خاصني نجيب شيحاجة وجيت شيماء:شنو هي
عصام: من بعد وغادي تعرفي ناضت اشراق جابت واحد طبيلة صغيرة قدامنا جابت صينية فيها الحليب وتمر والخواتم كانشوف بدر جاي من الباب جايب معاه واحد الراجل كبير فالعمر دخل كال سالمو عليكوم كولشي رد سلام دخل بابا حبيبي بجلبتو بعد على عصام وكلس الراجل بيناتنا وانا حدا بابا طلب منهوم لكارط ناسيونال 
العدول:بنتي شحال اطحطو فصداق 
شيماء:كايقولو اسيدي اقلهن مهرا اكثرهن بركة لي دارها بابا انا معاه فيها شاف فيا عصام وتبسم لي 
العدول:عندك ابنتي شي شروط
شيماء:الا نفس سؤال سول عصام وجواب حتى هو بالنفي
العدول:بنتي واش انتي قايبلة زواج من عصام الوالي على سنة الله ورسوله بلا اكراه بلا غصب وتكوني معاه على الحلوة والمرة وفصحة والمرض وكاتعادي تبغيه وتصونيه شفت فعصام بغيت نعصبو شوية بقيت ساكتة كايبان لي عصام بداو يتبدلو فيه الالوان ضحكت 
شيماء:اه قابلة عاد سيد تنهد مسكين ورتاح 
اشراق فجنبي:ولايني شويطينة نفس سؤال سرلو لعصام لي ديك ساع جاوب
عصام:اه قابل
العدول:ولي الامر قابل تعطي بنتك شيماء لسي عصام 
بابا:اه قابل عطا البابا كتاب باش يسني سنا ومررو لعصام سنا وعاد عطاه لي انا سنيت
العدول:بومجب صللحية لي تعطات لي كانعلنكوم زوج وزوجة ناضت اشراق مليكة سكينة كولشي كايزغرت كولشي كايزغرت ويبارك لينا باسني بابا فراسي وسلم على عصام
بابا:مبروك اوليداتي الله يكمليكوم بالخير سلمت على ماما وبستها لي كانو عينيها مدمعين بالفرحة خالتي تورية كاتعنق فينا ومقادتها فرحة كولشي كايزغرت بدر حتى هو كلسونا انا وعصام جنب بعضيتنا عطاونا الخواتم لبسني هو الخاتم ديالي لي شرينا ديال الخطوبة هادشي كامل بزغاريت جيت نهز الخاتم نلبسو ليه لقيت خاتم عادي نقرة ماشي داك لي خدينا تعجبت ولكن مابغيتش نسولو ديك ساعة لبستو ليه عطاتها اشراق التمر وكلناه لبعضياتنا والحليب وصوراتنا قرب لي عصام 
عصام:مبروك علينا وأخيرا واخا خرجتيها مني 
شيماء:هههه غير حضي مني شوية كايبانو لي شي وحدينات داخلات بتكاشط كول وحدة قدها قداش كلسو فجنب صالة وجبدو هاطعارج عرفتهوم لعابات حيت هدى كاتموت على لعابات جا بدر 
بدر:نوض معانا أصاحبي
عصام:فين انوض
بدر:نوض معانا لصالة درجال
عصام:لا اخليني انا معا مرتي انا ميتا بضحك شاف فيا عصام انتي كاصحكي عاجبك الحال
شيماء:وراه خاصك تنوض 
عصام:علاش
بدر:خلي العيالات براحتهوم وراه خاص وضروري تكلس معانا شاف فيا وناض شاف فيه بدر
بدر:اسيدي سوبعة مدات ماجابت هاهي معاك العمر كولو ان شاءالله بدر مادا عصام غير بزز كلست انا حدا هدى او وليدها جبدت كريطينة وهادا هو الكادو ديالي لهدى كان خويتم صغيور ديال دهب منقوشة فيه سوميتو هزيتو ودرتو ليه فصبعو وبستو عاد بداو خالتي وماما كايعطيو الكادويات ديالهوم لهدى بداو لعابات فالغنا ناضت مليكة اشراق كايشطحو انا ماتبتش راه العابات

كلسنا على شطيح دوزنا وقت زوين بزاف تصورت انا والبنات ودرنا سيلفيات ديال الضحك والحماق تصورنا كاملين عاد جاو رجالتنا كاملين تصورنا مع بعضياتنا ودرنا تصويرة كولنا فيها العائلة وصل ليل وصل وقت باش كول واحد يمشي فحالو الغد ليه تابعني بزاف غدا هو نهار ديال الحنة تفارقنا بضحك ونشاط بدر وصل خالتي تورية وسكينة وخالتي حليمة وعصام وصلني انا وبابا وماما وخويا اما لشراق مشات مع نزار وصلنا لدار نزلو وليدي دخلو لدار بقيت انا مع عصام 
عصام:كون غير بقيتي معايا اليوم ماخلاونيش نشبع منك كون غير نادرنا لعرس لا حتا حاجة
شيماء:لا سمحلي انا بغيت نطلع فوق العنارية وندير لناس باي باي
عصام:هههه حميمقة ديالي غير كانضحك معاك حتى انا بغيت نشوف الاميرة ديالي كيف غادي تكون 
شيماء:الله يخليك لي وميحرمنيش منك شد ايدي ضمهوم ليه وباسهوم وكايشوف فعيني وكيقرب نن فني بغا يبوسني حطيت ايدي على فمو وقربت فمي وبست ايدي شاف فيا وضحكت قربت من وجهو وبستو بشوية جنب فمو طلعت لجبهتو بستو ونزلت لفمو حطيت فمي بشوية على فمو وبستو بعدت كان مغمض عينيه فتحهوم بشوية كانو كايبريو حليت الحزام باش انزل شد لي فيدي شفت فيه عصام:رتاحي لي الله يصبحك على خير اميرتي نزلت وشيرت ليه ودخلت لدار طلعت لبيتي حيدت الفولار وغسلت وجهي بدلت حوايجي وصليت صلاتي وانا كانشوف فخاتمي وكانضحك غير بوحدي فرشت بلاصتي ونعست حيت مخاصنيش نسهر وغدا نايضة بكري .
داق داق ناضت ماما حلات الباب كانت اشراق صابحة على صباح جايا
اشراق:صباح النور خالتي شيماء فاقت ولامزال
ماما:مزال ابنتي طلعي فيقيها طلعات اشراق جرية وحدة حلات الباب وهي كاتحل فشراجم وتبغم
اشراق:اودي ياودي على لي عندو الحنة وعلى العروسة خامرة حتى لهاد الوقت وانوضي الله ينوضها فضهرك نوضي
شيماء:اوف اوف

مالكي جايا كيرعدة يخليها سلعة ماتخليوش بنادم ينعس
اشراق:دابا هضرة جوج اتنوضي لا
شيماء:الا الا يالاه وريني اش اديري
اشراق:واخااا انا اوريك مشات جايبا غراف ديال الما عامر وهي طلعو حتى لفوق وبدات شرررر شيماء قفزات دخان ايخرج من نيفها
شيماء:يابنت الحرام من فعلك واش بغيتيني نمرض ناضت بزربة كاتعكل فالمانطة اشراق هاربة وهي تابعاها من اللور كانو ايهبطو ضالة ديال الدار اشراق مخبية ورا ضهر ماما
اشراق:خالتي شدي علي هاد الوحشة ديال بنتك
شيماء:ماما حيدي من قدامي خليني معاها
ماما:سيري خلي البنت عليك واخا دارت ليك لي دارت غزات فيك اويلي راك عروسة يا حسرا 
شيماء:جتى انتي معاها اماما واش انا بنتك ولا هي
ماما:بجوج بجوج بيكوم بناتي وعنقتنا ولكن واخا هكاك مادرتش الحس وقرصت اشراق من ورا ماما غسلت وجهي وفطرنا مجموعين مشات اشراق جمعات لي حوايج الحمام كاملين وهبطات لي ساك وجلابة
شيماء:زعمة انتي لهلا يخطيك علي وخلاص 
اشراق:حيت عارفاك الى طلعتي لداك البيت مغاديش تهبطي لبست حوايجي وخرجت معاها هازين سطولو ديالنا قربنا الحمام تلقات لينا هدى ومليكة بصلا وسلام مافخباريش ةاش حتى هوما كاينين دخلوني حيدت حوايجي مرروني كولي بالحنة وهو يصليو على نبي شي خلاطات داروهوم لي ماعرفتش شنو هوما كاع الموهيم فيهوم حتى الورد طلاوني بدوك الماسكات عاد شلو لي وبداو الفريك فرك فرك ماتفرك حتى رجعوني بلقة بغاو يحيدو لي اجلدة دارو لي ماسك لشعري وغسلوه مزيان عاد منين شللت شلوني باندوسات ديال الورد وخرجت لبست حوياجي جابو لي كاس دلحيب وتمر عاد خرجنا جي لدار لقيت خالتي تورية وسكينة والعائلة كولها حاضرة ومخدمين سجالة طلعوني لبيتي نشفت شعلي مزيان ولبسوني البنات قفطان فالخضر وفولارا فالخضر بدلو حتى هوما لبسو فراشات جات مامات هدى

عطات انور لماماه ترضعو حيت كايبكي رضعاتو نعس حطاتو فوق ناموسيتي ودارت ليه المخاد وغطاتو هبطوني من البيت بصلا وسلام دخلوني لصالة كاتو سداري مفرشينو بالخضر على ود الحنة نقاشة كالسة وحاطين فوق واحد الطبلة السكر وكاع لي كايتماشى معا الحنة كلست وكولشي يصلي على نبي وجدوني وبدات النقاشة كاتقش لي رجلي والنات يتصورو معايا سيلفي دارو الحماق داك النهار سالات لي رجلي بالحنة وبدات لي فيدي حناتهوم لي شوية كانسمع زغاريت حدا الباب وصوت الحاولي كايبعبع وعصام هو وبدر داخلين بدر بجلابة بيضة وشاد حولي وعصام بجلابة بيضة مخطة بزرق وجار حولي جوج حوالا انا مادايرة والو لوجهي وعلى هضرة البنات النور على وجهي جابو عصام حدايا وانا مغطية وجهي بزيف كالو ليه يهزو على عيني هزو وشاف فيا
عصام:ماشاء الله وباسني فجبهتي سلات لي انقاشة الحنة ودارت لعصام دويرة فيديه هادو هوما العادات البنات كايغنيو وفرحانين وكولشي ناشط مكاينش لي مكالس كولشي كايشطح وفرحان وانا الفرحة بغات تنقز من عيني (كاع البنات لي كايقراو قصتي انا وعصام الله يرزقكوم بزوج صالح ووحتى الكاتبة ديالي الله يفرحكوم كيف فرحتي ياربي) نشطو البنات حتى الليل جابت اشراق دبليج ديال انقرة من بعد ماسقاوها لي ولواو لي عليها القطن باش تنضر لي عصام ورجال مشاو لدار عندهوم يباتو تما اما البنات والعيالات ايباتو معانا والغد يفطرو ويمشيو طلعوني لبيتي بدلو لي واشراق نعسات حدايا هي ومليكة وهدى او ولدها كولنا فبيت واحد مخشين (هادي هي الصداقة الحقيقية على الحلوة والمرة بلا غيرة بلا حقد حب حقيقي من القلب وتبغي لي معاك الخير صداقة من عالم وهمي للحقيقة اجمل صداقة كانفتاخر بيها) نعسنا معنقين.أصبحنا وأصبح الملك لله جات ماما فيقاتنا غسلو لي وجهي باش مانخصر الحنة
شيماء:الله شحال زوين كون اكنت عروسة ديما دلوني ودلعوني غير كلتها حسيت بمخدة نيشان لوجه واشراق طالعة فوق ناموسيتي برجليها
اشراق:دوزي خلاص وانتي عجلك راسك ضسرناك العوجة
شيماء:انتي هي العوجة جيت كانجري طلعت فوق نموسيتي وهدى حطات الولد بين ايدين مليكة وكلسنا نلعبو ونطلعو ونزلو طران طران حتى دخلات علينا ماما:اويلي ويلي على مولات العقل ولي بغات تزوج اليوم تربي ماخشمتي كون طلعات عدوزتك دابا اتكول بغينا نلبقو ليها حمقة وانتي احمقة وكالو ليها زغرتي وشدات تزغريتة مابغات طلقها كولنا كلسنا درنا راسنا دريويشات 
ماما:اح فيكوم يالاه هبطو خلاص راه مزال تابعكوم بزاف مايدار فعلا بصح نضت لبست قميس خفيف بيض وهبطنا القينا كولشي فايق 
خالتي تورية:صباح الورد عروستي الغزالة كيصبحتي نعستي مزيان
شيماء:الحمدلله اماما وانتي رتاحيتي شوية
خالتي:الحمدلله ابنتي انا نخليكوم انمشي دابل باش نوقف على كولشي وانتي ابنتي اتسالي من الصالون اتمشي للقاعة نيشان يالاه ابنتي الله يرضي عليك قربات لعندي عنقاتني وجات حدا ودني
خالتي:ماتنساي ابنتي صلي جوج ركعات وقراي الادمار باش يحميوك من عينين الناس
شيماء:لهلا يخطيك اماما كوني هانية مشات خالتي وتبعاتها سكينة رجعات عندي
سكينة:يخليلي زين انا خويا مشا فيها وحتى انتي مشيتي فيها وغمزاتني ومشات طيحات لي الما فركابي جات عندي اشراق
اشراق:وانتي زيدي خلاص مالك تبلوكيتي كلسنا كانفطرو وكولهوم يوكلو فيا
هدى:كولي لا تيخفي فالعرس ويشدك جوع راه كانعرفوك فطرنا وسالينا سونا لي تيليفون لفيت عصام مشيت لبيت ماما وسديت علي
شيماء:صباح النور
عصام:صباح الورد شفتك نسيتي البارح دغية صدرتيني ولكن ايام الله جايا غير صبري شوية تفكرت شيحاجة
شيماء:عصام بغيت نسولك
عصام:وي حبيبة تفضلي
شيماء:فين لخاتم لي خدينا من عند دهيبي 
عصام:مالك زربانة كولشي فوقتو زوين احبيبتي دابا تعرفي كامل فوقتو لي بغيت نكوليك القاعة ديالنا واجدة كيفما بغيتي وبدر هو لي ايجي يجيبك من صالون وكاتسناك بزاف ديال المفاجئات كنتمنى هاد اليلة ماتنساش بنسبة لينا
شيماء:ان شاءالله احبيبي يالاه انا مشيت نشوفك.قطعت مع عصام وخرجت النات جمعو مع ماما الدار كولها طلعت لبيتي لقيت الفنيكيش انور فاق من نعاس كلست كانلعب معاه حتى سلاو البنات طلعو عندي لبست جلابتي لبسو حتا هوما خرجنا طركنا خالتي مامات هدى خلينا ليها انور وشدينا طاكسي لصالون
اشراق:اجي النكافة عيطي ليها
شيماء:كولشي تكلفات بيه خالتي تورية مسكينة من نكافة من كولشي وصلنا لصالون دخلتنا هاديك ليتما
الكوافورة:اتحيدي زيف ولا اتخليه
شيماء:لا غادي نطلع بزيف دترت لي سوان دو فيزاج ونقاتو لي وصايبات لي شعري واخا مغانعريه عاد دارت لي المكياج الكونتور وغمقات لي فوق العين وقدات حجباني غير بالقلم اصلا مقادير من عند الله والبريون فالحناك والعكر فاللون ليموني بارد
الكوافورة:انسيفط معاك هاد البنت اتكون معاك باش اي لبسة اتزيدك لمسات باش يتواتا المكياج مع لبيسات ومبروكة الالة
شيماء:الله يبارك فيك البنات كولهوم تقادو اشراق دارت مكياج دهبي على ود تكشيطها لي كانت فالبيج ودهبي مليكة مكياج موف ود تكشيطها الموف اما هدى دارت مكاياج كري حيت تكشيطة كحلة موبرة بجيبي مشبك ومنبت بالكري كاتحمق وصل بدر سمونة لمليكة وخرجوني مغطيين لي وجهي وكايصليو على نبي
بدر:مال الزين مخبي علينا وجهو
شيماء من تحت الغطا:حيت عينيك قواسة وحارين خفتك تعيني
مليكة:سوك وهنينة
شيماء:الله يعز الحكام بدر ايدينا نيشان لقاعة
بدر:بغيت غير نعرفكوم مالكوم على هاد العداب كون درتو العرس فقاعو وانتوما طالعين لديك القبة

شيماء:عرسي وانا حرة فيه انت مالك راه غير الغابة مكاينة فمراكش كوراه نديرو فغابة ونلبسو جلودة ونشطحو مع القرودة دارو البنات كراخ بضحك
بدر:راني عارفك ديريها راه العقل لي خاصك ماتكسابيهش كان الحال بدا يضلام حيت داك اللحاف باش حتة ندخل نوصل ونرجعو طلعنا مع الطلعة لي طلعنا فيها انا وعصام داك نهار ولكن هاد المة طريق كولها من جناب بشمع مضوي ومع ضلام واحد المنضر غزال وصلنا للجنب الكافي فين دايرين عرسنا طوموبيلات واقفين وناس داخلين بتكاشطهوم وكانسمع طرب الاندالوسي باب القاعة منبت بالورد وسميتو وسميت عصام شاعل فيها ضو صراحة كانت احسن مفاجئة هنا عرفت المفاجئة ليكان عصام كالي عليها دخلوني البنات من الباب الوراني لواحد البيت حيت عصام حجز البلاصة كولها لقيت نكافة كاتسناني نخليو نكافة تلبس شيماء ونوصف ليكوم القاعة كيف كانت.مع دخلة كاين الراجل لي كايعمر اتاي وعاد سرباي بلباس تقليدي كايتلكا لناس يرحب بيهوم بالعصير والحليب وتمر معمر بالكركاع مطحون عاد كادخلي القاعة الداخل لي كانت عريانة ولكن عصام جاب ناس ليقادوها وغطاها بشباكي منبتين بالحجار والورد المفاجئة لي موجد عصام لشيماء اتكون هنا سكينة خت عصام كانت كاتحمق بتكشيطة فالعكري بارد ولاصقو وعندها ديل من اللور ومنبتة بالحجر وطالقة شعرها لي زادت ليه باش يطوال ودايرا مكياج سموكي مامات شيماء حتى هي كانت فأحسن حلة كاع الميمات كانو غزالات ونور على وجهوم القاعة كانت كبيرة بزاف عاد الدروج لي فيهوم لحاف هابط فالخضيضر فاعلى دروج كان بدر واقف مع نزار وعمران ومعاهوم العريس لي كان هاد اليلة احسن واحد فالقاعة بطولتو وشعرو لي نقصو شوية والكوستيم ديالو الجاكوار والبابيون جات عندو اشراق باش تكولو نكافة كاتعيط ليه عرف جا الوقت باش يهبط هو وشيماء مشا جيهت

الباب وقف حتى خرجو دوك المرفقات دنكافة كايصليو على النبي عاد مخرجين شيماء عصام طلع راسو بقا مصدوم بحال الى كبيتي عليه الما البارد مامصدقش عينيه هادي ماشي شيماء هادي أميرة كانت شيماء نيت بحال الاميرات فتكشيطة بيضة الفوق ديالها كولو مدهب وطويلة من اللور ودايرة زيف رقيق دهبي على راسها شدات فيد عصام وبداو هابطين والبنات تابعينها من اللور كايردو مع نكافات ويصليو على النبي بدات الاركسترا كاتعزف حتى خرج طهور من اجنب كايغني على العروسة كولشي ناض مبهوض كولشي وقف كايغني ويزغرت ومامات شيماء وخالتي تورية كايصليو على نبي ويقراو القرآن على شيماء بدات شيماء هابطة من دروج مع عصام مشادين وهي فالداخل دبالها فرحانة من المفاجئة لي جاب ليها عصام بقاو هابطين وصلاتهوم النكافة للبلاصتهوم وقفاتهوم كاتليه يحيد ليها الفوال حيدو ليها وباسها فجبهتها وكلسو مشادين الليدين بصح منين كادخل وكاتشوف هاد الناس كولشي كايشوفو فيك كاتوتر وكاتحس بالحلقك ناشف مكاتعرف شنو كايكولو فسر ديالهوم المهم عندي هادي ليلتي وغادي نفرح بيها وندير فيها اي حاجة تجي على البال حيت هاد الليلة عمرها ماتعوض ناضو البنات كولشي كايشطح هدى حطات ولدها لمها وجرات عمران وكلسو ستك ستك انا وعصام ميتين بضحك قرب عصام لودن شيماء
عصام:انتي اميرت هاد الليلة وانا محظوظ انك ملكي ومرتي وحبيبتي ونور حياتي
شيماء:وانت اروع واوسم رجل فهاد القاعة كولها بقينا مشابكين ايدين بعضياتنا حتى لدابا دايز العرس غزال جات نكافة باش تلبس شيماء اللبسة تانية طلعاتهوم بجوج عصام بدل الكوستيم الكحل بزرق مكلفين بيه صحابو وشيماء تكشيطة بشيبي والغوز كانو تكاشط من احدث صيحات جديدة خفاف ولكن غزالين بزاف خرجوها نكافات لقات عصام كايتسناها هبطوها بدا طهور كايغني حتى خرج اصويري لعندو كولشي ناض يشطح والفرحة بعينيهوم..

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.