طباخة الرئيس الجزء الرابع

من تأليف سناء الصنهاجي
2018

محتوى القصة

رواية طباخة الرئيس

شديت طاكسي وانا لي دزت حداه يشوف فيا قبل مانوصل لوطيل وقفت مول طاكسي حدا كيوسك خلصتو وهبطت وخديت مسكة فلاش ودخلت لوطيل كولشي كايشوف فيا وكايضحك كولشي ميت بضحك طلعت نيشان لقاعة ديالنا لقيت رشيدة كاتسناني
رشيدة:الله اكبر مالك احبيبتي على هاد الحالة 
شيماء:كيجيتك هادا هو ستيل جديد لي خرج فامريكا علاه مافخبارك هادشي راه لامارك
رشيدة:لا لا باين لامارك نيت والله يسمح ليك الى شافك عصام فهاد الحالة اتجيه جلطة مسكين
شيماء:راه داكشي لي بغيت انا 
رشيدة:ههه الله يدير ليك تويل ديال الخير ابنتي الله يستر وصافي يالاه نوجدو الاجتماع قرب يسالي ونحطو الغدا .هبطنا لقاعة ديال الغدا وجدنا كلشي حطيناه وبداو الناس يدخلو انا تخبيت حتى دخل كلشي ودخل عصام ماشافنيش والقاعة عامرة بالناس الهاي لي جاي مع مرتو ولا خطيبتو وحتى شي بنات مانزلوش عينيهم على عصام ومعضم ناس لي تما حضرو العشا لي علن فيه عصام خطوبتنا قدمو سربايا الماكلو وكولشي ضاحك وناشط وانا مخبية وهو ينقز واحد
الشخص:سي عصام التبارك الله عليك وخلاص الاكل فمنتهى الروعة هادي اكيد خطيبتك ديتي وعرفتي شنو ديتي
عصام:شكرا بزاف موسيو العلامي 
واحد الانسة:ماشفناش الانسة شيماء هنا واش ماناويش تعرفنا عليها سي عصام نشكروها ولا كاتخليها ليك بوحدك ههه
لا حبيبة هاني عصام مايقدرش يحضر بلا بيا ياك احبيبي (ايوا مانكولش ليكم منضر عصام فاش خرجت كيداير جاتو اللقوة تزيزن سيد وعينيه خرجو حتى دلدلو وماعرف باش تبلة بقى غير ساكت وكايشوف فيا وجهو حمر خصوصا الناس كولشي كايشوف وكايهضرو واحد يسول تاني واش بصح هادي خطيبت سي عصام الوالي كولشي مبهوض عصام عينيه حمارو ةمارضاش بغا يحماق ويتسطا خصوصا فاش جيت حداه وعنقتو ومع ختكوم كابة عليها ايطرو ديال ريحة المسك الموت البطئ) عصام كايغزز سنانو وكايهضر تحت لسانو:شيماء:اش هاد الحالة واش بغيتي تشوهيني وتحمقينيواش عارفة نتائج

ديال هادشي لي كاديري فيه ولا لا 
شيماء:شنو درت احبيبي والو حرام عليك زعمة هادشي على ودك نكبر بيك
عصام كايشوف فيا بغا يقتلني:انحيب حتى ل3وغادي تغبري وتحيدي دبك الحالة لي لابسة ودابا وهو مزير على سنانو ويضحك معا الناس
شيماء:الا الا ماغادياش واش عرفتي هاد البسة بشحال طلعات علي زبابل ديال الفلوس راه كانت لبساتها واحد البطلة فمسرحية فهوليود اسمينها الحب المبهدل
عصام:وراكي انتي لي مبهدلة وماسايقة لراسك الخبار واش عنوة دايرا هادشي
شيماء:حبيبي تكالمة انجيب ليك عصير يبرد ليك القلب كنتمشى وكنعوج باش يتحركو الفرافر يال الصايا والناس كايشوفو فيا ويعضرو وانا عاجبني الحال وفرحانة هادا لول هدف ضد عصام مازال ماشفتي والو اعيني جبت ليه عصير حطيتو قدامو 
شيماء:حبيبي دوق العصير وجدتو ليك ايدي وبكل حنان .شد الكاس بيديه وكايشوف فيا ماتايقش فيا خايف نكون دايﻻة ليه شيحاجة فالكاس وانا كانمتل بالنظرات البرائة حشم قدام الناي وشرب العصير
عصام:اجي بغيت نهضر معاك شدني من ايدي وعتادر لناس وبعدنا على طبلة شوية عصام:شنو كاتسمي هادشي لي درتي دابا شنو كاتسمي هاد تصرفات صبيانية لي كاديري واش بغيتي تحشمي بيا شنو ايكولو ناس دابا خاطب وحدة حمقة هبيلة ماعندها عقل واش كاين لي كايلبس هكا مزال دراري صغار ومايرضاوش يلبسو هكا واش بغيتي طيري لي هاد شوية ديال العقل لي كانكساب وراه كانهضر معاك فاش ساهية هزيت ايدي حتى لسما ونزلت بيها على وجهو حتى تسمعات بشاخ فالقاعة كولشي سكت ودار كايشوفو فينا ومعجبين ومصدومين عصام شد حنكو ومصدوم وكايشوف فيا عينيه بغاو يخرجو من بلاصتهم كيفاش طرشتو قدام الناس وصحابو شوية وانا نبدا كانبكي حبيبي وخنونتي جايا (هادشي بلعاني) شيماء:حبيبي سمحلي كانت بغات تقرصك وتنفخ ليك وجهك وتشوه ليك معاليم

لمعاليم دوجهك وانا منقدرش نشوف وجهك بديك الحالة عصام مكرزة علا سنانو:شكون هادي
شيماء:نحلة احبيبي نحلة كانت بغات تحط علة وجهك بغيت نجري عليها وجات ضربة فوجهك سمحلي احبيبي ياكما قصحتك وتلاحيت عليه بالتعنيقة ديال الغدايد باش ريحت المسك تلصق فيه
شيماء:(فودن عصام:هادي باش عمرك تجرأ وتحط صبعك علي) سمحلي احبيبي ماقصدتش عصام بقا معنقني وساكت شوية وبعدت عليه كانمسح فدموعي وخنونتي وهو كون صاب الارض تحل ويتخشى فيها ناضو ناس بداو بغاو يخرجو سلت انا من الباب لوراني لقاعة مشيت عند رشيدة لقاعتنا 
شيماء:انا غادي نمشي الى جا عصام وسول علي كوليه اي حاجة مريضة ولا عيطولي دار هاني مشيت
رشيدة: شنو درتي المصيبة 
شيماء:من بعد ونعاودليك هاني مشيت .مشيت كانجري هبطت معا دروج وخرجت لشارع لقيت طاكسي مشيت نيشان لدار وصلت طفيت تيليفوتي بدلت حوايجي غسلت حالتي وتوضيت وصبيت وهبطت لدار لتحت نتفرج لقيت ماما وجدات المسمن وكرواصة والكرص والحلوة وصات عليها من برا حيت ماعندناش الوقت درت كاسكروط جمعت الماعن غسلتهم وكلست كانتفرج فالمسلسلي ومرة مرة كانتفكر اليوم وكنضحك بوحدي صراحة بردت قلبي وجنوني فيه واي حاجة اتجي من بعد انا نوقف ليها سالا مسلسلي وطلعت لبيتي نعس الغد ليه جاي وجه الحبس دعصام او عائلتو خاصني النعس ونرتاح خليت تيليفوني طافي ونعست مرتاحة .أصبحنا واثبح الملك لله، شيماء واديك البنت وانوضي راه خاصنا نوجدو ابنتي الله يهديك
شيماء:واغير شويكوك عفاك اشويكوك دابا نوض.واهي الى نضتي دابا ياللاه تكعدي سربي وجرات علي الغطا نضت غسلت وجهي وتوضيت وصليت هبطت التحت لقيت دار مقلوبة فطرت بعدا عمرت الكريشة وشمرت على ايدياوبديت فشغال جمعت دار كلها وسيقتها وجفيتها بخرتها حطيت الفاكية فطباسل ودرتهوم فوق طبلة وحداهم

وحداهم قراعي ديال الريحة هادو عداتنا صاوبت جوج كيكات لحتهم دغية فالفران حتى طابو زوقتهوم وطرفتهم مشيت جبت الحلوة وزدت كرواسة لا تكون خاصة وشي حويجات اخرين رجعت لدار ماما واش ماخاص والو
مانا:لا ابنتي صافي كولشي واجد سيري غير انتي وجدي راه مابقى.طلعت لبيتي دوشت غير خرقة وصابون لبست فراشة فالبلو مارين ومخيطة بالباج وفولار فالباج وفيه رشيشات بلو وقاديت وجهي قلم ازرق فعيني وعكر خوخي وتريحت هادشي ماشي حيت كنحس هاد الخطوبة بصح هادشي باش نوري لعصام الفرق مابين بنت البارح وبنت اليوم بقيت كالسة وشعلت تيليفوني بغى يتفرجع بالمكلامات والمساجات ديال عصام كايتحلف علي ويكول ماتحلف كاليك ايندمني مسكين واخا انشوفو شكون ايندم تاني شوية صونا بدر
شيماء:الو تبوكيسة دخوها
بدر:شيماء اش هادشي سمعت واش بصح اتخطبي لعصام واش حماقيتي واش عارفة شنو اديري هداك عمرو بغا شي حد اكيد هادشي وراه شيحاجة انا ماغاديش نخليك انتي كنتي ديما كاتكولي لي كيف كايعاملك وبين ليلة ونهار تبدل هادشي ولا كايبغيك مايمكنش (ماعرفتش واش نصارح بدر ولا لا ولكن الى ماصارحتوش ايتعجب اني وليت بعيدة عليه ومكانهضروش وانا مانقدش ناديه)
شيماء:مالك داخل سخون غير بالشوية عليك كيفاش زعمة مانستاهلش نتحب ياك قليل في هادشي انت طول عنرك بغيتيني نتزوج ونشوف حياتي ودابا بدلتي رايك
بدر:لا حاشا شيماء انتي ختي واعز صديقة عندي كنبغي ليك غير الخير وبغيت ليك ولد الناس لي صونك اه مانكرش عصام داير كيف البطة لي كاتخاف على ولادها وخنين ولكن راه واعر وبزاف انتي مكاتعرفيهش والحب مكايامنش بيه من بكري وهو هكاك القﻻايا والجدية وصرامة واش بغيتي تحمقيني نسيتي غير داك نهار كاتعايري فيه قدامي واش تسحابيني مالاحضتش شوفاتو ليك هادشي غلط فهميني علاش
شيماء:بدر تيق في

هاد الخطوبة مزورة دابا ماشي وقت الشرح لي نطلب منك هاد المدة كولها تبعد علي وماتهضرنيش 
بدر:اش كاتخربقي
شيماء:كيف كاتسمع مع 6:30 جي الحومتنا كاينة واحد جريدة تما نتسناك ومن الاحسن دير شي لتام واخا ونشرح ليك كولشي يالاه هاني مشيت.غير قطعت صونا المخنزر صباحاتو ليلاه
شيماء:ياك لباس
عصام:معامن كنتي كتهضري هادي نص ساعة كانلقا تيليفونك اوكيبي
شيماء:وانت شغلك حبابي كايسولو فيا 
عصام:شيماء بلاما تختابري صبري راه مغادي يعجبك حال بغيت نكوليك حنى انخرجو من دار دابا وكيف كتليك كدام عايلتي وعايلتك حنى كانبغيو بعضياتنا 
شيماء:هادشي عارفاه هادشي لي بغيتي تكول يالاه بالسلامة وانا نقطع ليه فوجهو هبطت لتحت نشوف شنو خاصعاودت بخرت باش تبقى ريحت البخور كاتعجبني كولشي مقاد يا ربي اللهم يسر ولا تعسر ودير لي تاويل دلخير سمعت دقان هادو هوما طلعت لبيت وسمعت بابا حال الباب وكايرحب بيهم حتى جات عندي ماما:تبارك الله ناس واشمن تاس ابنتي عرفتي تختاري وباينة فيهم الله يعمرها دار يالاه هبطي باش توجدي معايا 
شيماء:فين كالسين 
مانا:الرجال فالصالة وحماتك وبنتها فالبيت يالاه هبطي راه حشومة .شفت راسي فالمرايا وقاديت وهبطت لكوزينة عمرنا اتاي والقهوة قاديت الحلوة فطباسل وبغرير والملوي وكرواسة ةالعصير املو زيت فرماج الفاكية (اللوز كركاع كاوكاو) طبلت عامرة من الراس لراس ) ساليت وديت صينية لبيت العيالات مع دخلت
خالتي توريا:تبارك الله تبارك الله بالعرويتي عصام عرف يختار اجي حدايا سلمت عليها وسلمت على سكينة :اهلا اهلا بمرات خويا.انانبدا فتمتيل ديالي تصنعت الحشمة وتزنكت
خالتي:والله الالة عيشة الى من نهار شفت شيماء دخلات لي لخاطري وتمنيتها تكون مرات ولدي ودعواتي تقبلو الحمدلله وفاجئني وفرحني منين ختار بنتكم

زينت البنات والحداكة وصواب
ماما:ربي يخليك اختي تورية وحتى حنا مانلقاوش حسن منكم باينة فيكم نقرة صافية والله يجيبنا فصواب يا ربي (اما انا كانتصنع الحشمة وتباتة على ود ماما وخالتي تورية باش مايعيقو بوالو هادشي علي غير زبل زبل ماكرهتش نفرتك هاد الرمانة ولكن الله غالب خاصني نمشي فهاد تمتيلي ونكمل دور ونتصنع الحسمة والبراءة على ود كولشي يمشي كيف بغيت) كملو الرجال الهضرة وخلطو علينا البيت مع دخلة هز عصام في عينيه وهزيت عيني (هزي عينيك سوفي في نديك نديك اصوريا عقلتو على هاد ديسك ههه ماعلينا نكملو) بقى واقف شحال كايشوف فيا وساهي حتى عيط ليه بابا يدخل كان لابس كومبلي زرق وقاميجة بيضا وكرافاطا زرقة جا نيشان حدايا بلعاني بقينا كالسين انا مكانهضرش شادا تيليفوني وكنلعب بيه وهو غير كايشوف فيا ويخنزر حتى غمزاتني ماما حطيت داك المشقوف وتضت نحط ليهم كاسكروط وجدت ليهم القهوة فاليطاس بزار فرقت عليهم القهوة وخليتو هو الاخير خدا من عندي الكاس ومشيت بعدت عليه وكلست حدى ماما مع جغمة اللولة تزير او وحلاتليه ولا وجهو حمر وتزنكع وبعا يتفرجع وكايشوف فيا ويحلف علي حيت القهوة سخونة بزاف وانا من الداخل ميتة بالضحك ومكانشوفش فيه باش مانطرطق فوجهو بضحك حتى هضر ات خالتي تورية:ايوا شنو كلتو شنو تافقتو حنا راه مانلقاوش ماحسن منكم 
بابا:حتى حنا الالة تورية الله يدير لي فيها الخير خليو العرسان يهضرو بوحدهم انا بقيت نحمار ونخضار 
ماما:بنتي سيري لبيت وهضري مع عصام وتشاورو راه انتوما صحاب القرار نضت وهو تابعني وساكت احتى دخلنا لبيت طار علي بحال شي سبع 
عصام:ادوي اللفعة اشيطانة بغيتي تسطيني اليوم

نخرج منك القديم وجديد ياله بغيت نغوت ونعيط على ماما وسد لي فمي .واش دايراني قرد كاتضحكي علي واش شايفاني برهوش قدامك كاديري فيا مابغيتي ولا شنو اش هاد الضحك الباسل والا مالفة هادشي معا صحابك تسحابي كولشي ميف كيف جمعي راسك وعرفي معامن كاتلعبي وشكون انا وبراكة من المزاح الباسل هادي اخر مرة تصرفي هكا ولا ماغاديش يعجبك حال انا حضرتك .تنطرت منو
شيماء:اول حاجة هادشي وقليل فحقك لي كاتشوف هادشي القليل من القليل لي مادير فيه ومزال ماشفتي والو الى كاتسحابني انجلس وندم فراك غالط احبيبي ضربة بالضربة ماتوقعش مني نبقى نتفرج فيك من بعد ماخليتيني نكدب على والدي لي بنسبة ليهم هادا احسن نهار ولكن معامن كانهضر مع وحش استغلالي وتاني حاجة هاد الحوايج لي درت كانديرهم اغير مع بحالك اما ناس الغاليين وصحابي كيف كاتكول هادوك كايتلقاو مني معاملة خاصة اشريكي و غمزتو تم كيتقرب مني وانا راجعة بالور هو يقرب وانا راجعة حتى تزدحت مع الحيط قرب من وجهي وبقى كايمس فخدودي وفمي وعيني حسيت بتبوريشة طالعة معايا
شيماء:بعد علي شنو كايسحاب ليك راسك كادير.شتتتت.حيد الفيليل ديال الفولار وحيدو بشوية طلق لي شعري. وبدا كايشم فيه نزل حدا ودني والعنقي وباسني بوسات خفاف كول وحدة فجيها بدا طالع كايبوس فحناكي وعيني وانا كلي كانترعد وباسني في فمي بوسو كولها حنان وحب ندامجت معاه فالبوسة ايدي كايلعبو فوق صدرو وفشعرو وفعنقو اول بوسة لي فحياتي ولاول مرة بقينا هكاك وهو معنقني وانا بدوري كانبوس فيه فوجهو وفو وعنقو وسلط العنقو كانخس بوجهو ولا سخون وقلبو تحت ايدي كايضرب كانحس بيه ولا اكتر رغبة واكتر عنف حسيت براسي شنو كاندير ودفعتو كلو كايرعد وانا كانمسح فمي ومصدومة من لي درت وحتى هو بعد علي ومشا حدا

سرجم كيدوز ايديه على شعرو قديت فولاري
شيماء:خرج علي برا هادي اخر مرة تحاول تمسني مكانحملكش لمساتك وبوساتك كايعيفوني وحش ايتغلالي وجه الحبس ياخ 
عصام:العجب تصرفاتك كايبينو غير كبيل كنتي دايبا بين ايدي.هادشي درس ليك باش تعرفي راسك معامن وتلزمي حدك ولا هاد المرة مانضمنش ليك شنو اندير
شيماء مع ضحكة:ههه لا مايغركش هادشي لي طرا دابا هادشي غير مقارنة بينك وبين حبابي لوخرين نشوف شكون المعلم فيكمونشوف واش اتقدر تعوضني عليهم ولكن خسارة لقيتهم فايتينك بزاف ديال الحوايج مزال ناقصاك خبرة كبيرة اشريكي .عصام تعصب حتى ضرب ايديه مع الحيط :غادي تندمي غادي ندمك على انهار فاش تزادتي غير كوني واجدة اشيماء وديك الضحكة انمحيها على وجهك كوني واجدة باش نوريك واش انا راجل ولا ماشي راجل وتفكري اتبكي دم وطلبي الله يبعدك على طريقي وتندمي على نهار لي وقفتي قدامي ومزال غادي نفكر
شيماء:وانا كانتسنا فيك اشريكي لي فجهدك ديرو وكتر خرج وضرب الباب
شيماء:ديه معاك ولايني تور هههه دابا نشوفو شكون ايندم تاني قاديت راسي وهبطت عندهم باش مانعيقش
بابا:شنو تافقتو اولدي
عصام:كلشي هو هاداك اعمي حنا موافقين ياك الالة شيماء .انا غير شفت فيه وحدرت راسي كانمتل دور ديلل الحشمة شوية وهو ينطق .والعرس اعمي من هنا ل3 شهور انا حسيت بدوخة وراسي تقال علي اش كايخرف هدا 
شيماء:ولكن.. ماخلاتنيش خالتي تورية نهضر:مكاين ما ولكن ابنتي الى على العرس وتوجاد ملتخمي فحتى حاجة حنا كولشي انوجدوه غير تكوني مرتاحة راكي وليتي بنتنا دابا شنو كلتو الالة عيشة
ماما:لي دارتوها اختي حنا معاكم فيها
بابا:واخا اولدي كايكولو الخطبة الى طةلات كاتبسال ومادام نتوما باغيين وحتى حنا مكاين لاش نتسناو نقراو الفاتحة على بركة الله .هدا اش كايحاول يدير واش بهكا

بغا يرد لي صرف ولا شنو كايشوف فيا ويغمزني ويضحك قرينا الفاتحة وجبد عصام كارطونة من جيبو فيها جوج خواتم هادا امتا شراهوم وكيفاش عرف قياسي واحد عادي وتاني غزااال مدهب وفيه حجرة بيضا جا حدايا وشد ايدي وركبو لي وخالتي وماما كايزغرتو وانا كانغلي من الداخل عطاني خاتمو باش نركبو ليه شديت ليه ايديه وانا ايدي كايترعدو بالغدايد والفقصة ابلاتي ماشي دابا وقت تفاهم حتى من بعد بقا كايتسنا في نركب ليه الخاتم حتى عقت براسي سهيت وركبتو ليه ولينا مخطوبين رسمي تلقينا تهاني من عائلتما بجوج وجا الوقت فاش يمشيو جمعو الوقفة وناضو عنقاتني سكينة وسبقات هي وراجلها وباستني خالتي تورية:دابا راكي وليتي بنتنا خاصك تجي تزورينا انتي ودار راه حنا ولينا عائلة وحدة ياك اختي عيشة
ماما:ياه اختي ضروري وحتى انتوما مرحبا بيكم فاي وقت دار داركم شيماء:وصلي راجلك وحماتك لباب (دغية رضيتيه راجلي الله يا ربي اش هاد المكتوب ) وصلتهم لحدا الباب تصيفت مع خالتي تورية او واعدتها اني نجي نطل عليها مديت ايدي لعصام بالنفخة وجرني باسني من وجهي بلعاني بغا يجلتني كدام دارنا وجيران وحنا البركاكة مايطالو من شقوقة اش بغيت ليك لي انكولو ليك راه فيك طول فتعنيقة منين حيد غمزني وكالي فودني هادي غير وحدة من بزاف لي كايتسناوك باش نوريك واش انا راجل ولا لا ودار مشى ركبو وزادو بحالهم واخيرا مشاو واخيرا نقدر نتنفس دخلت بارك لي بابا وباسني وماما حتى هي وخويا طلعت لبيتي بدلت حوايجي ولبست كيطمة طويلة وفولار هبطت جمعت ديك روينة وغسلت الماعن وكلت لماما انخرج نتسخر ونجي خديتها بالرجل حتى لجردة فين انشوف بدر بقيت كانتسنا حتى حسيت بشي ايد قلستني ضرت كايبان لي واحد ملتم جيت نغوت سد لي فمي وحيد اللتام
بدر:ةاغير هدا انا المصيبة مالكي حامية سوق

شيماء:وراه انت لي خلعتيني كلس كلس
بدر:ماعنديش الوقت بزاف بغيتك تعاوديلي بالتفصيل الممل شنو واقع واش هاد المسرحية كولها .قررت نعاود البدر كولشي ومانخبي والو كولما وقفت عند كلمة كانشوف بدر كايتعصب ويتجنن حتى كملت كولشي 
بدر:والله حتى كونت عارف وحاس عارف سكاتهم وراه شيحاجة وكايضبرو لشيحاجة بغيت نعرف اشمن نوع هوما معارفينش بيانا حنا سواسية ولاد 9شهور واشمامنحقيش ناخد البنت لي كانبغي وانتي من نيتك قبلتي بهادشي كولو انا لي كانكول كيفاش عصام تبدل وعطاني القرض كول هادشي كولو وراه انتي لا هادشي بزاف كيفاش قدر يدير هكا وماهميتوش انا ومشاعر ديالي يتاداو ماضنيتوش قاصح حتى لهاد درجة وانت مغاديش نخليك تغامري ولا نخليك مع وحش بحالو ماعندوش القلب لا
شيماء:صافي سكتنا وهدا حتى انا ماسهلاش ليه تيق في هادشي خديتو تحدي بنسبة لي مابقاش كايخصك غير انت انا داك ولد عمك انغيرو ونخليه يندم ونوريه انا الناس خوت مكايهمناش كولنا الفلوس لي عند تاني وانت خاص تعاوني وابعد علي باش تيالي هاد 2شهراين تكون تزوجتي مليكة وانا هاد الرمانة انفرتكها واعدني ابدر تصبر وتعدني كانحلفك بباك العزيز عليك الله يرحمو 
بدر:ولكن اشيماء هادشي صعيب لي كاديري فيه وعلى قبلي ماعرفت شنو انكول ليك
شيماء:ماتكولوالو غير سكت وبعد علي حتى تفوت المدة المحددة الى بغيتي تواصل معايا اي حاجة كولها لمليكة تكولها لي تافقنا بقا بدر شحال وهو كايفكر وكايشوف واخا تافقنا ناض زعنقني انتي اروع واحسن اخت تهلاي لي فرلسك ورضي البال لراسك ويلى حتاجيتي اي حاجة انا هنا واخا ويلا حاول ياديك انسى واش عندي ولد عمي سميتو عصام تعانقنى وتفارقنا كول واحد مشا بحالو رجعت لدار طلعت لبيتي وكنفكر فاحدات هاد النهار وكانشوف فالخاتم فجيهة تانية وبضبط فدار الوالي

زهرة:كيفاش هادشي لي درتي حنا بغينا نبعدوها على بدر وعلينا كلنا وانت مشيتي تخطبها
عصام:شوفي الالة زهرة انتي كاتعرفيني مزيان شنو كانسوى مانحتاج نجي نتشاور معاك انتي ماتعرفي غير نبعدها على طريق بدر والمباقي ماشي شغلك فيه هادي دابا خطتي انا وطريقي انا وانتي خرجي هاد سوق وماتليتي دخلي فوالو 
زهرة:ولكن.
عصام:انا عيان خليت ليك الراحة تصبحي على خير خلاها عصام وطلع البيتو بدل ودوش وتوضا وصلا مالكوم جاتكوم عجب اه عصام كايصلي سالا وتكى فبلاصتو وكايفكر فشيماء وفهادشي لي كابدير انا ماهامني والو لمهم تبعد على بدر شيماء بالنسبة لي تحدي عاجبها راسها ولكن هادشي ماشي بزاف قريب انطيح بمناخرها الارض ونوريها عصام شنو كاسوا عصام الوالي لي كايسمع هاد سمية مايتهز من صغرو عندو شخصية قوية حتى فقرايتو كان كايجي من اوائل ومعروف كاينصر الحق وعندو هيبة وحضور طاغي فينما كان كايلفت نضر ليه ياما حاولو بنات يطيحهوه ولكن ماقدوش قلبو مسدود بساروت عمرو ماتنازل وكرامتو فوق الارض وعائلتو هي الرقم واحد بالنسبة ليه وشيماء بنسبة ليه تحدي صغير سبحان الله المضاهر خداعة البراءة فالوجه والافعال ديال الفاع شوية تفكر نهار الحفلة وشنو دارت بقى كايضحك بوحدو حمقى واتخرج لي العقل ولكن الالة شيماء انوريك وجهي الحقيقي وشنو كانسوى الما تمنيتي كون ماشفتيش وجهي وجيتي فطريقي مانتسماش عصام
أصبحنا واصبح الملك لله
فقت مدقدقة وبغيت نبقى غير ناعسة حتى سمعت ميساج جاني حليتو لكيت وجه الحبس دعصام
عصام:صباح النور مراتي العزيزة اظوجدي راسك انتي وداركوم انجي نديكم تدوزو معانا نهار فالفيرما الواليدا دايرا ليكم عراضة تماك من هنا لنص ساعة نلقاك واجدة.بغا يفقصني ويحكني مراتك العزيزة تعزك عبيدت القبور ان شاء الله وتهنيني منك نضت على سعدي اواعدي

نكولها لماما حيت عارفة الى رفضت غادي يشكو خليتها على الله غسلت وجهي وهبطت عند ماما لقيتها موجدة لفطور ماما:صباح الخير عروستنا
شيماء:ماما واش حتى انتي صافي براكة او راه يالاه مخطوبين ماشي تزوج بيه او ليت مراتو ومن هنا الغدا ماعرفنا شنو ايكون
ماما:لا ابنتي الله يحفظ ماهو فالك ناس الله يعمرها دار
شيماء:باش عرفتيهم وانتي يالاه شفتيهم البارح الله يهديك اماما
ماما:ابنتي انا علمني زمان وعارفة بنادم الخايب من العيان من شوفة والملامح وسيماهم على وجوههم مافهمت مالك هاد الصباح
شيماء:سمحي لي اماما ماعرفتش مالي هاد الصباح مهم عصام صيفط لي ميساج ماماه عارشا علينا ليفيرما نتغداو تماك
ماما:ويلاه كايلاها لي نوض نوجد راسي ونكولها لباباك ونتي فطري دغية وجدي راسك راه يجي راجلك يلقاك هاكا 
شيماء:ماما سيري كادي لي بغيتي وخليني نفطرت بخاطري الله يحفظك ولا انخرج بهاد شعكوكة هكا مشات ماما وهي كتردد الله يستر حسن عوان هاد الراجل معاك.حتى يكون راجلي بعدا ويحسن عوانو نديه من غينيا وسينيكال وناكل دود ولا حاداك راس المقلمة فطرت على خاطر خاطري وجمعت الماعن غسلتهوم وشطب البيت وانا كانتمزك وغير بالخاطر علي حتى ساليت جات ماما كاتولول مزال ماكاديت حالتي تلعطت لبيتي توضيت وصليت لبست صايا طويلة فالخضر وشوميز بيضة وصباط موكاسان وفولار خضيضر مزال ماساليت سمعت دقان والهضرة فالباب هادا مايكون غير هو حتى انا تعطلت بلعاني ضد فيه حتى ساليت على خاطري وتميم هابطة كانلقاه واقف قدامي 
عصام:واش غادي نباتو هنا واش انا خدام عندك ولا زيدي تحركي خلاص
شيماء:وانا كتليك اجي وصلني صيفط اي واحد يجي يجيبنا سديت الباب حيت والديا سبقوني لطوموبيل
عصام:شكون انصيفط بدر متلا ولا والفتي ناس يوصلوك ودار ضحكة استفزازية لي عصباتني كايرد لي

الصرف شوية بشوية ولكن واخا ركبت القدام وديمارا وشدينا طريق فسكوت وهو يخدم الموسيقى اغنية ديال دكرى يوم ليك ويوم عليك مش كل يوم معاك ومرة مرة يضور جيهتي ويشوف في بحال هاد الاغنية دايرها لي وهي راه مغنية عليه بقينا شادين الطريق فسمات حتى دخلنا الواحد المنطقة خضرا غزالة شجر وربيع بقينا شادين ديك الطريق حتى دخلنا لواحد دار قدها قداش فطول والعرض كان محرك شوية البرد هبطنا تلقات لينا خالتي حليمة عنقتها بالهفة حيت عزيزة علي مع دخلة تلكاو لينا بزغاريت والحليب والتمر .مرحبا مرحبا بالعروسة ولدي وانا نبدا فالتمتيلية ديال الحشمة والضحكة البريئة لي علا وجهي :ربي يخليك اخالتي تلاقينا بسكينة وراجلها او ليداتها ملاك وايمن علا مزيناتهم دخلونا لواحد للصالة كبيرة قدها قداش مفرشة فراش تقليدي بلدي غزال حطو العواصر والحلاوي اي حاجة تخيل ليك حطوها حتى عمرو جوج طبالي كبار سكينة الصقة في وتضحك وتنغز في حتى من سيهم عصام كايضحاك وناشك معانا كايستاهل جائزة نوبل لتمتيل 
خالتي تورية :وانهار كبير هادا منين شرفتونا والله حتى نورتونا وفرحتونا خصوصا منين شيماء ولات ننا وبنتنا الله يرضي عليهم ويفرحم
ماما:امين اختي ويكمل ليهم بالخير (اودي اشمن خير اماما ايجي من داك وجه الحبس الله يهديك ماعارفا والو)
تورية:عصام ولدي نوض دور خطيبتك او وريه الخيل ودورها فالفيرمة نوض بينما وجد الغدا ونصيفطو ليكم
شيماء:الا خالتي هانية اخليه ايكون عيان من طريق ماحسيت بيه حتى وفق حدايا ومد لي ايديه ماصبت مانكول نضت ومشيت معاه خرجنا من الباب درنا مع واحد دورة وبقينا غادين جنب واحد الحوش كانسمع صوت البقر ودجاج واو على منظر كنت انستمتع بيه كتر كون ماكانش هاد الكنس حدايا بقينا كانتمشاو حتا بعدنا شويةوضرت عندو:انت شنو كايسحاب ليك راسك

وشنو ناوي دير بلا حشما بلا حيا ملشي كاتكول ليهم العرس من هنا ل3شهور واش بغيتي تصطيني
عصام:ايه صافي سكات.كالها بالغوات حتى طرت من بلاصتي وتقطع حسي.انتي من صباح وانتي دودودو مكاتسكتيش خدامة بضو ضريتيني فراسي وزايدون هادشي شغلي انا ونزيدك انا دقيقة فاش كاتكوني حدايا كاتجيبيلي الاشمئزاز عساك نتزوج بيك الف وحدة بحالك بريال ماتيقيش راسك بزاف وتنغامسي فضور وماتنسايش والديك كانو ايشكو فنيتي جيهتك كونما جبتليهم حس زواج والدين مايستاهلوش وحدة بحال تكون بنتهم طماعة.ناحسيت بايدي حتى طلاعات لسما وكنت انزل غليه ولكن شد لي ادي ولواها وجاني من لور وهو شادها
عصام:ماتفكريش ديريها وماتولفيش حيت عصام مزال ماعرفتيه شنو كايسوا كنحدرك ماتلعبيش بالعافية حيت اتحرقك انتي لولة وخلي صبري معاك الى مشيت حتى فقدت صبري يا ويلك مني مشا تنطر مني حتا كنت انطيح وخلاني ومشا الله يلكيها ليه يا ربي بغيت ليه جنون البقر والابولة بغيت ليه القمل فشعرو لي عاجبو ويبقى سارح ليه معا ودنيه ان شاء الله بديت كنضرب برجلي حيت دار هكا وملجاوبتوش وبردت قلبي كاع ليدرت ليه بغا يرضو لي بالفن جحموم لاخول وجه المسطرة ابلاتي ربحتي هاد الجولة الجولة تانية نشوفو شكون ايربح فيها .وتميت راجعة لدار .دخلت
خالتي تورية :عجباتك ابنتي للفيرما 
شيماء:اياه اخالتي غزالة تبارك الله
خالتي:فين هو عصام
شيماء:هاهو جاي .جات خالتي حليمة تعلمنا انا الغدا واجد واتحطو دابا نضنا لصالة كبيرة فيها طبلة وكراسة كلسات خالتي فالكرسي الكبير حداها ماما وبابا وراجل سوكا وليت كاندلعها جيت نكلس حداها ولكن شكون خلاك صبقني عصام لكرسي لي حداها وانا حداه وحدايا سكينة حطو لينا اللحم بالمشماش والكركاع (تشهيتو ليكم البنات خصوصا ليك اسناء عارفاك كاتموتي فاللحم معسل .كولي

كولي وسكتي وخليني نكمل لبنات القصة)
خالتي:كولي ابنتي دار راه داركوم ماتحشميش 
شيماء:ربي يخليك اخالتي انا كاناكول انا حتى الماكلة كنولي مقزدرة هه شوية نغزني عصام من تحت طبلة زعمة كولي ولا اتقلق مي شفت فيه وكملت ماكلتي
خالتي:مارحبا بيكم دار داركم نهار كبير هادا وفرحتي كبيرة بيكم وبشيماء خصوصا دابا ولينا عائلة وحدة
ماما:ربي يخليك اختي تورية ويكبر بيك الحمدلله لي لقانا الله مع ناس بحالكم .انا غير خاشية وجهي فتبصيل وكاناكل وكاع متحاسا يراسي مغيبة حتى عمرت لكريشة مزيان جيت نطلع راسي كانلقا عصام حاضيني وكايشوف فيا وانا فمي عامر بالماكلة وانا نشير ليه براسي زعمة شنو ياك هو لي كالي كولي وانا كاناكول جا حدا ودني وكالي :بشوية عليك لا توحل ليك اديناصورة .خرجت عيني حتا بغاو يخرج بغيت نجاوبو حتوا وحلات لي عطاني الما نشرب وهو يخبطني لضهري واحد الخبطة كون كنت حاملة كون خرج دري بلا وجع بغا يرد لي تصرفيقة
خالتي:بشوية عليك ابنتي كيحسيتي
شيماء:الحمدلله (فخاطرها كيف انكون كانحس من بعد الخبطة دولدك مثلا لباس علي منين بقيت حي) كملنا ماكلة ديالنا لي كانت شلايض وبسطيلة ولحم والعاصير وسلاد فروي حتى الماكلة بغات تخرج لي من ودني وعصام حدايا كايضحك غير بوحدو شفت فيه وخنزرت 
شيماء:ياك لباس ضحكنا معاك كولشي بقا كايشوف كايتسناو فيه شنو ايكول 
عصام:لا والو اتفكرت واحد الخبر قريتو كالو انهم من بعد سنين لقاو شي دايناصور مجلي ولحد دابا مزال مالقاوه وكالو انه ليلقاها كاياكولها وكالو انه كايتواجد فشي وحدة من الفيرمات لي حدانا نقزات سكينة:اويلي اخويا كاتهضر بصاح
عصام:وانا عمري كدبة عليك ولكن ماتخافيش راه صغير ونتوا مكاياديش .وانا كون صبت نوض نقجو دابا انا دايناصورة كيما شفتيني تخلينا الله يخليني

كيما شفتيني واخا اعصام غير بلاتي كاتجبدني نضنا من طبلة مشينا لصالة لكبيرة جابت لينا خالتي حليمة القهوة وشي حليوات وكلسنا مجمعين وانا نغز ماما زعمة يالاه وهي تفهم ماما راسها ايوا نوضي ابنتي 
خالتي:فين؟؟
ماما:خاصنا نمشيو اختي تورية ابوقت هو هادا 
خالتي:عصام واش ماكلتي ليهم والو كيفاش اتمشيو لا مكاينا مشية اتباتو وانا عيطليكم على هاد القبال باش دوزو معانا السبت والاحد .وانا نشوف فعصام لقيتو شاد تيليفونو وكيلعب بيه بلعاني مامسوقش بلعاني دار هادشي
انا:ولكن اخالتي مادرنا احتياطنا وماجبناش باش غادي انباتو خليها مرة اخرى ان شاء الله
خالتي:بنتي لي بغيتوه كاين والحوايج عطاهم الله راه سكينة تعطيك باش تباتي وعصام ايعطي لباباك وانا انعطي لماماك صافي رتاحيتي ايوا كلسي وبراكة من البسالة اتقلقيني.نقزات ماما واخا اختي لي بغيتو صافي كلسنا كملنا القهوة ديالنا وبقينا مجمعين انا شدني النعاس حيت البارح مانعستش بكري شافتني خالتي وعيطات على سكينة باش توريني بيني فين انعس نرتاح شوية بينما بوجد العشا تبعتها حتى دخلاتني الواحد البيت غزال مسبوغ بشيبي (ازرق سموي) والبيج وزوين فيه بالكون كايطل على الجردة 
سكينة:انا فرحانة اختي حيت اتولي مرات خويا انا عارفاه قاسح ولكن راه قلبو حنين وماكاينش ما احن من قلبو عصام كان من ديما كايضحك ولكن منين توفى بابا بحال الى تصدم منين لقى راسو فواحد المسولية وهو باقي صغير وتحط قدام الامر الواقع ولا هو فبلاصت بابا داكشي باش كاتشوفيه قاسح كون ماشي هكا مايوصلش لهنا كانتمنى اناك تفهميه وتملكي قلبو ان شاء الله خاصك اتعرفيه ليه 
شيماء:يكون خير ان شاء الله يا ربي كنتمنى من الله مايحاشمنى اختي سكينة
سكينة:امين انا متاكدة انكوم اتكونو احسن الازواج.انا مع خاطري (سمحيلي اختي ماشي)

بيدي نكدبو عليكم كولشي من خوك) ههه ان شاء الله
سكينة:يالاه هاني هبطت رتاحي شوية اوكي.وهبطات بقيت انا كاندور فالبيت ونبقشش مشيت لبالكون كايدخل منو واحد الهواء يا سلام بقيت شحال وانا ساهية كايبان لي عصام خرج ركب فطوموبيلتو زاد الله على راحة مشيت لحمام غسلت وجهي وتوضيت وصليت وتكيت على ناموسية كيف ريشة وباردة وريحة داوني كاتعطي منها ماحسيت براسي حتى مشيت وغيبت .ضرباتني الفيقة على صوت ضحك وهدرة وايلي شكون جا عندنا فقت حالة عين وسادة عين اويلي فين انا عاد تفكرت اننا فافيرما نضت لقيت ساعة 7:30 نعست هادشي كولو كولوراني غيبت ماشي نعست نضت غسلت وجهي وطليت من البالكون لقيتهم مجمعين فالجردة وعصام مامعاهومش قررت نهبط ماحدو مكاين نتصر بحريتي هبطت كاتبان لي خالتي حليمة فالكوزينة كلت نمشي نشوف ياكما محتاجا شي حاد يعاونها
خالتي حليمة:بنتي ستارحتي شوية
شيماء:كولي غيبت اخالتي ماحسيتش براسي والله اشنو ماديري
خالتي:كانوجد ليكم العشا ابنتي
شيماء:انا نعاونك 
خالتي:لا غير سيري دي ليهم القهوة وهاد الحلوة انا راه قاديت كلشي واجد ابنتي بلاما تعدبي راسك 
شيماء:واخا مدام ساليتي اجي كلسي معانا .واخا انا تابعاك .هزيت صينية دالقهوة والحلوة وديتها ليهم
سكينة:الخمارة واجبدتي عليها هههه
شيماء:واياه غيبت سمحوليا ماكلست معاكم
خالتي:لا ابنتي المهم اتكوني رتاحيتي
شيماء:الحمدلله ربي يخاليك اخالتي 
خالتي:هاديك خالتي ان شاء الله اتبدليها وتعيطي لي ماما تورية دابا راه عندك 2ماوات اولا الالة عيشة
ماما:ياه علاش لا راك بنتها تانية دابا وبدينا كانضحكو حتى كانشوف ضو ديال طوموبيل داخل سبحنا على الله غير حسيت بيه داخل هوما ماشافوهش
شيماء:خالت ههه بغيت نكول ماما تورية انا نخرج نتمشى شوية نسرح رجلي ونرجع واخا .واخا ابنتي

سيري.خرجت دغية باش مايشوفنيش وشديت واحد طريق وانا غادية وساهية غير ضو القمر والبرود والغربي واحد الجو روعة بزاف غير الخضورية انتا غادي وجنانات حداك ماحسيت براسي حتا كانردد:بلادي يا زينت البلدان يا جنة على ارض شوق يا ارض كريمة مضيافة وجماها ناطق بالحروف ناسها نخوة وضرافة ناسها نخوة وضرافا وكرمهم شاي يا معروف شحال يا بلادي ولافة ولي سال يجي ويشوف"وانا غادية بين جنان وشجر ونعني بانت لي واحد شجرة مشيت وقفت حداها واحد البحيرة قدامها انا واقفة وكانرمي فيها الحجر ونضحك نسيت راسي ونسيت كولشي حتى حسيت بيد جراتني جبت نغوت وايد تحطات لي على ايدي كايبانو لي غير عينين كي صقر كايشوفو فيا بكل غضب 
عصام:اخر مرة تبقاي ديري هاد تصرفات اخر مرة كانحضرك انا ماعندبش عير انتي لي نبقى نقلب عليك واش كاديريها بالعاني باش تيري الانتباه ولا شنو خارجة من كبيل وكولشي يقلب يسحابوك تجليتي ولا طرا ليك شيحاجة انتي انانية وعاجبك راسك حتى والديك مامسوقاش ليهم هادشي كولشي وانا غير ساكته ومكانجاوبوش مابغيتش نتزايد معاه فالهضرة ونصدقو فشيحاجة وخصوصا هو معصب كتر من لقياس حيد ايدو على فمي
عصام:اش كتسناي ياكما كاتسنايني نهزك ونركب فوق ضهري زنوصلك حتى لدار سربيني راه مامسالي ليك يكفي الوقت لي ضيعتو معاك زاد وخلاني وانا تابعاه من اللور علاش ماردياش عليه علاش ولكن الحمد لله ماعلموتيش والدي ندير صداع فدار ناس رحبو بي كون فالبلاصة اخرى كون وريتو اش كانسوا ولكن حشومة خليه يتلورض كيف بغا تمينا راجعبن كاتبان لي ماما وخالتي واقفين وباين من وجهم مخلوعين جات ماما كاتجري عندي.الله اكبر ابنتي فين كنتي تخلغنا عليك
شيماء:سمحولي ماقصدتش والله الطبيعة هنا زوينة ونسيت راسي وصطها سمحوليا
عصام:هاد المرة دي تيليفوتك المهم ماتليتيش

ماتليتيش اتخرجي ايلما كنت معاك 
شيماء:شنو كيفاش عصام راك زدتي فيه عصامبقا اكايشوف فيا وحتى انا حيت اول مرة نطق بسميتو بلاما تفهمو غلاط ونكولو هادي ولات كاتبغيه ودوك القصص راه حشومة واحتراما لمو وعائلتو وخاصني نكمل فتمتيلي قدامو
عصام:مكاين ما ولكن بلاما تعدبي راسك لي عندي راه كلتو ليك سمحوليا وطلع لفوق.انا بغيت نطرطق مع راسي هادا اش كاليه راسو ياكما خدامة عندو 
خالتي:غير عدريع وبلاما اقلقي كونما كان هايف عليك مايديرش هكاك
ماما:ياه ابنتي كون مخايف عليك مايكولش ليك هكا هكاك باك فيام زمان كايدير لي هكاك (انا فخاطري وناما الله يهديك واش ايام زمان بحال دابا وبحال ناس دابا يا ربي تعطيني صبر ايوب يا ربي).
وجدات خالتي حليمة لعشا عطات علينا نتعشاو كل واحد خدا بلاصتو حتى تام هابط عصام لابس كيتكا زرقا بلو مارين داكنة وكلاكيطة وشعرة فازك صراحة الكدوب على الله حرام كون مكنتش كانحملو وماكناش فهاد ضروف كنت انتخلى على ماباديئي العزوبية وطحت فيه ولكن دوماج كامل الرجولة لا راجل ونص بهضرتو الموزونة وتقيلة وكيفاش كايهضر مع والدي والكيطمة لي عطا الواليد يلبسها الى بغا ينعس وخالتي عيشة فسما سبحان مبدل الاحوال هادا بغا الى تفراقنا يجريو علي والدي ويكولو لي جاك المخير فالرجال مابغيتيش وانا راه انا لي عارفاه ومزيان كلسنا حطات لينا خالتي حليمة كرتان ودمجال معمر بالبيبي ولاصوص بيشاميل داكشي غزااال وبنين انا كيف العادة تحطات الماكلة قدامي كنكر ناس لي حدايا كاندير راسي مكانعرفهومش كانفقد داكرة حتى كنعمر الكريشة عاد كاترجع لي هههه بقينا كاناكلو ونضحكو انا وسوكا ضرفات وغزالة اما راجلها حلوة حتى هو طولة وتجريدة والقلدة وضرفات جامعهم كاملبن واوليداتهم كايحمقو ماشاء الله حتى نقزات خالتي :ايوا دابا ان شاء

-80 شهور راه دغية كاتفوت خاصنا نوجدو ريوسنا الايام دغية كادوز جيت نهضر نقز عصام:اه لي درتوها انا موجود عندك الصح الواليدة الايام دغية كادوز من الاحسن نوجدو كولشي من دابا باش يدركنا الوقت ان شاء الله اندي شيماء تشري الخاتم ديال زواج على دوقها وناخدو الحرايج لي اتحتاج ياك اشيماء (اناري هادو دوروني اويلي هادا اش كايكول واش كنا فالخطبة حتى صدقنا فزواج واش هاد الضحك عندو بغا يخرج لي العقل بقيت اساكتا وكانشوف فيهم ونضحك ولي كالوها كاندير براسي اه بصكترة صدمة لي جاتني مابقيت عارفة ماندير وسيهم عصام الضحكة واثلى ليه الودنين قرب حدا ودتي؛ مراتي ياكما بيك شيحاجة اه ولا من كثرت الفرحة وغمزني حسيت بموس كايتغرز فصدري اشنو الحل يا ربي تعاوني وتوقف معايا هادشي مخا ص وش يكون مستحيب مايمكنش سلاو هضرتهم لي نصها كان على العرس وتوجاد وانا غير يارحة ومصدومة كولشي فرحان وناشط حتى لي انا غير كنخمم وساهية عصام ناض مشا لواحد المكتب ساد عليه بابا طلع ينعسومانا وخالتي بقاو مجمعين سكينة وراجلها طلعو لبيتهم ينعسو وليداتهم انا طلعت لبيتي من بعد ماتمنيت ليهم ليلة سعيدة دزماج الويفي مكاينش هنا وحتا 3ج مابغاتش تشد لي توحت اشراق وهدى ماعرفت شنو خبارهم تمنيت نهضر معاهم الايام ليكادوز مكاتلقاش بحالها كانتفكر كولا نهار كان كايدوز بيناتنا بضحكو ولعبو وهبالو اه الايام غير يفوت هادشي ونفرتك هاد الرمانة وندير معاهم شي خرجة ديال الهبال عاوتاني ابلاتي جات عندي سكينة كادق حليت ليها جابتلي بيجامة باش انبات فالموف غزالة حريرية بسروالها ونفس الوقت سهونة السروال طويل والقميجة قصيرة عادي شكون ايشوفني توضيت بعدا وصليت ولبستها مشطت شعري سرحتو وتكيت خديت تيليفوتي كانقرى واحد الرواية عندي حتى غلبني النعاس ونعست ضرباتني الفيقة..

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.