عروس الملك السابعة الجزء 50 (الفصل الثاني)

قدام الخيل كتجري وفين ما زطمات تخلي حفرة ... الغبابر نايضة وصفيحة قدامها كتكوي جمرة ... لونها ترابي كيشع ومن الشوفة تسلب النضرة ... وسط غابة كبيرة كتجري تنقز الحجر وطير وراق الشجرة ... خيل اصيلة عربية ديلها حرير طويل وجبهتها عليها نجمة خضرة ... صحيحة قوية تقطع الانهار وتطلع لجبال بوحدها حرة ... ماحاكمها لجام ولا على ضهرها سرج تصهد جلدها وتصب من عرقها قطرة .

راكبها شاب قوي شعرو كحل كيبري طويل وفودنو حلقة وحدة صغيرة كضربها الشمس فكل مرة تلاخ شعرو للور .. صدرو عريان مشتت فيه شعر كامل عرقان ، نازل فوقو خيط رقيق كحل فيه عمارة كتبري شكلها شكل تاج .. لحيتو كثيرة طويلة ناعمة وحتى لحلقو واصلة .. شفايفو مخبية كيبان منها غير شوية ، عينيه كوحل كبار وحواجبو مربعة حادة .. شوفة عندو قاصحة وشعرو مرة مرة يزل على جبهتو .. لابس سروال كحل معلقة فيه قوس دايرين بيه سهام كتيرة . وفرجلو بوط من الجلد منقوش وعلى يدو سمطة بيضاء مزيرة المعصم ديالو . 

ضرب برجلو على الخيل وقفها وهز القوس والسهم ، نيشن بعينيه بعييييد وصغرهم وتبت القوس وطلق السهم مشا فرمشت عين ضرب فشجرة وفالنقطة اللي نيش فيها .. تبسم تبسيمة بالجنب وضرب برجلو على الخيل مشات بيه كتجري وهوا فوق ضهرها شعرو كيديه الريح ويجيبو نيشان للشجرة اللي لسق فيها السهم .. داز حداها بالخيل وطيرها بيديه ردها بلاصتها وكمل طريق هاكا كيجري .. مشاد الخيل بلجام ما مزيرها فحبل .... هي حرة وهوا حر وغادي كيتحدى راسو بالقوس والسهم وكل شوية ينيش بعد من القياس اللي قبل منو ... مرة يوقف ويطلق السهم.. مرة يطلقو والخيل كتجري بيه .

تحت شجرة مضللة حدا واد كيشرشر بالماء دايرين بيه غنم كتيرة .. جالسين بنات مجموعين بقفاطن بالية شوية مربعين رجليهم كيغنيو ومنهم وحدة كضرب البندير ... وكل شوية تلفت وحدة حاضية مع الغنم ديالها اللي كتسرح قدامها . بنات حسناوات ومنهم اللي دايرين شدة حمرة بالهداب على راسهم ومنهم اللي واشمات . ومن بين هاد البنات جالسة وحدة متكية على ديك الشجرة كضحك حتى هي وتغني معاهم . لابسة قفطان احمر واسع فيه رموز امازيغية وشربيل صفر فرجليها وعلى عنقها عقيق صغير مستف و مزير على عنقها .. دايرة زيف على راسها فيه الحمر والخضر نازل على وجهها الابيض بلهدب من الجناب .. ومن جبختها خارجين زغيبات من شعرها لشهب الفاتح كيزلق وترجع تردو لداخل بيدها وتكمل غناها وتزغريتها مع البنات . كضحك حتى كيتسدو عينيها ويالسقو رموشها الكتيفة ويمشيو الدموع فبياض عينيها حتى كيبدا مومو دعينيعا الازرق كيبري ، خدودها موردة بحال الى حشمانة وشفايفها مطبزة وضحكتها كتسحر . 

سكتو البنات البندير و زيروها كاملات كل وحدة منين كتجر .. لهجت هضرتهم غريبة فيهم اللي كتهضر الامازيغية .. وفيهم اللي كتهضر العربية .. وكل وحدة ولهجتها الامازيغية مخالفة على لخرى ، المهم كيفهمو بعضياتهم 

- شاادية هزي لينا الخط ياشحال ماهزيتيه لينا 

- اه اشادية هزي لينا الخط يرحم باباك داكشي كااع اللي قلتي ليا طلع صحيح ومرات با خرجناها 

عقدات شادية حواجبها وقالت

- دييييك المرة سهيت كنقرا ليك فالخط حتى تلفو ليا الغنم وبتنا نقلبو عليهم وبا كيقلب عليا ... سلخني بلعصا على عقلي لمودر اللي مامتبتش وناسي لغنم كترعى بوحدها 

لسقات حداها وحدة كتزاوك وقالت 

- هل حنا حاضيين ليك لغنم .. بداي بيا يانا اللولة ... هزي ليا لخط 

نفخات شادية حتى شبعات ورجعات تفشات فاش شافت عيون صحاباتها كتزاوك فيها ... بلعات ريقها وجرات للي جالسة حداها يدها وقالت

- هانا غنهزو واحضيو ليا نعاجي لا توظر تاني ويجري عليا با . 

شدات كف صاحبتها كتقرى ليها وتنعت بصبعها فخطوط يديها ولبنات كاملات مخشغين معاها كياسنطو حتى لواحد الشوية وهي تلسق حدا ودنها سهم ضربات بحال الريح جات فالشجرة وشدات ليها طرف من زيفها اللي على راسها حتى قفزات من بلاصتها هي وصحاباتها

دورات شادية عنقها بشوية وججها صفر شادة كف صاحبتها اللي كانت كتقرى .. شافت السهم خدا ودنها لاسق باقي كيترعد من جهد الضربة .. حلاات فمها بزز كترعد وقبلها غيسكت بالخلعة مزال مامتيقا راسها .. صحاباتها حداها حالبين فمهم مخلوعين .. الموت دازت وسط منهم وهادشي كيخلع عمرهم شافوه بداو يقلبو بعينيهم شكون ضرب السهم مابان ليهم حتى واحد .شافت وحدة فشادية وقالت

- ياربي السلامة شكون ضرب ... ياربي السلامة كن جاتك فعينيك 

مزال شادية كتشوف فالسهم بنص عينيها وزيفها لاسق فيه حتى تمدات يد كبيرة مشعرة مزيراها سمطة بيضاء نترات السهم بالجهد جبداتو ، خرجات عينيها وهزاتهم شافت فيه ...فلبلاصة تشتتو صحاباتها هربو بحال الفلالس كل وحدة فين طجات وخلاوها بوحدها مخرجة عينيها كطلع وتهبط فيه من رجليه لراسو ...شاب واقف قدامها طويل صدرو واقف عريض مقسم ولحمو كيبري فالشمس محمر مزياان ..يديه قاصحين و الوقفة عندو تابتة ، رجع السهم بلاصتو ودار بغا يمشي بحالو .. خرجات فيه عينيها وكمشات وجهها وغوتات كتقاد زيفها اللي تقب ليها بالسهم 

- ااااااااسيييي وااااا اللي مانعرف شكون تكون واش من الانس ولا من الجن ! 

تلفت عندها مصغر عينيه فيها كيشوف الخوف منعادم فعينيها 

قربات ليه مجبدة وجهها وقالت كتغوت

- راااك كنتي غتقتلني ... راك جبتيها حدا عيييني كنتي غتصفيها ليا .. مللي حول مكتشوفش فين تنيش سهامك سير تعلم هوا الاول ماشي تقتل فعباد الله بحال البط وتمشي تعطي بضهرك بحال الى ما وقع والو

عقد حواجبو وقال بصوت كي الرعد واخا هضر بشوية 

- قتلتك دابا؟ باقا حية !

زادت شعلات وخرجات عينيها : ورااااه دازت حدى ودني واش حول ؟!!! عور؟ هااا؟؟؟ 

هزات شربيلها كتشير بيه وهوا يطيرو ليها من يديها وقال

- ااه عور 

زاد بغا يمشي وهي توقف قدامو خرجات عينيها 

- ارا لهنا الشربيل ... ارا وسير نيش فجهة اخرى ... فرتكتي ليا لمجمع انا وصحباتي ... ارا لهنا الشربيل

ضحك بالجنب وقال : مجمعين على لكدوب .. هادا مجمع ! 

هزات حاجبها وقالت : لكدوب!! شغلك ؟ سوقك ؟ شكون نتا بعدا ... ياكما تالف ولا جاي من شي قبيلة جراو عليك ! 

قلب وجهو ضحك وقال : ماكدبتيش ... كتهزي لخط تبارك الله عليك ! 

حلات عينيها فيه وقالت : جيت فيها؟؟ هي نقدر نهزو غير بالشوفة ؟

هز حاجبو وقال : سيري الله يعفو عليك .

دارت يديعا فجنابها وقالت : الله يعفو عليا مالي كنسرق ولا كنطيح لرواح بحالك ! جالسة مع صحباتي حتى خلطتي علينا نتا والسهم لعوج ديالك ... شكون نتا بعدا ؟ 

طلع حاجبو وقال : فضولية مع راسك ... كن نقول ليك شكون انا موحال تقادي الوقفة ! 

ضحكات فالسماء وقالت : شكوووون تكووون كاااع الامير يووور هههه واسييير فيق من الحلمة وطلق الشربيل لهنا وقلب الطريق وسير ترعا فشي جايحة ولا غنشكي بيك

ربع يدو كيشوف فيها وهي كتهضر وتلوى وقال 

_ لمن غتشكي بيا؟ 

كمشات فمها وقالت : نشكي بيك للشيخ والقاضي ويحبسوك ويعلموك دوز حدا خيال النسا... بقا غير طلق سهامك علينا مزياان تبارك الله 

بطلع فيها وهبط شاف القفطان قصير اللي لابسة مكمش من الجناب وفردة فرجلها فردة فيدو وهي دايرة يديها على جنابها كتعوج وقال

- كن شفتي بعدا راسك ... وخرجي راسك من هاد السرحة ... ماشي تكدبي على الناس وتوهميهم 

خزرات فيه وقالت : اللي كنقولو كيطلع صحيح ... انا عمرني كدبت ... الى بغيتي تجرب مرحبا 

ضحك بالجنب وعطاها ضهرو بغا يمشي حتى وقفاتو وقالت 

- مللي ماقاد على والو سد فمك من الاول ... خفتي نكشفك شكون نتا!!!

وقف وتلفت عندها وقال

- مخايفش .. داكشي ديالك غير خرايف 

شادية : ايوا اجي تجرب

ضحك بالجنب وقال : وهمي راسك بلخرايف ديالك ... 

شادية : هي خايف ! حامل شي سر 

وقف كينفخ ودار عندها كيشوف فيها .. كتحداه؟ ! 

تلات بيهم جالسين بجوج فوق الربيع تحت ديك الشجرة نيت مربعة رجليها وهوا قدامها مربع رجليه وعاطيها كفو 

شادية : ليمنة 

جمع يدو وعطاها لكف ليمنية شداتها بيديها وكدوز صبعها على خطوطها وهوا مطلع حاجبو كيتسنى شنو تقول 

داخت شادية وهي كتشوف فكفو عاقدة حجبانها ماعرفات باش تبدا .. حتى ضحك وقال كيشوف فيها

- تعمات ليك البصيرة؟

هزات عينيها فيه وقالت : سميتك تلاتية .. بلا صوتها مايقدو لعباد يعيشو .. الحزن والغرام عليه مكتوب .. شنو سميتك؟

هزات عينيها فيه شافتو عابس بحال بدا يصدق كلامها من السمية . رجع بعد عليه الوسواس وقال

- ياك كتشوفي ... ماطلعاتش ليك ؟

شادية : مايمكنش طلع ليا .. كيطلع ليا الوصف والنعت ! ياك ثلاتي بعدا؟

نفخ وقال : كملي وفوتي السمية نشوفو شطارتط 

شادية : ايوا خليني نشوف فخاطري ماشي تقجني بحال هاكا وتبدا تنفخ عليا !.... المهم .. (حنات راسها كتشوف) خط العقل هنا كيقول ... بالك هاني و شاد حبال متينة جارة الشرق والغرب .. الشمال والجنوب ... ناوي على رحيل قريب ..ناوي على شي رحيل؟

رمش وقال : كملي بلا متبقاي تسولي ... خاص نقول اه ولالا؟!

شادية : وشنو يحسابك ... خااصك تقول واش بصح ولا لا 

دفع يدو عندها وقال : كملي نتي وماشي شغلك يكون بصح ولا ماشي بصح 

نفخات و رجعات تشوف : ايوا لمهم عز الناس عندك حاسبها هي روحك .. هي نور عينيك ... غادي طفي هاد النور اللي فعينيك (خرجات عينيها) اااه ياااربي السلامة ... على راسك غيمة كحلة سبابها عز الناس وقريب هاد الغيمة غتبدا تنقط ... مك هيا عز الناس عندك ياك ؟

خرج عينيه وقال : ماتبقايش تسوليني وكملي ولا ...

شدات ليه يدو وقالت : صاافي منسولش صاافي ارا نكمل 

شادية كلاها لفضول وشافت عندو شلا مايتشاف وبغات تعرف .. دارت جهدها وكتر وخرجات عينيها كتشوف وتعاود باش متزكل حتى حاجة 

شادية : هاد عز الناس هي مك ...عندها اسم مزوج .. يعني فيه جوج سميات ... كيرمز للحياة .. فيدها حتى هيا حبال الشرق والغرب . طويلة بيضاء وشعرها كحل طويل .. مقامها ماتوصل قدم من الاقدام ... (هزا راسها) مك كتحكم؟ (هبطات راسها) صافي صافي منسولش... انا جاتني مك كتحكم ... حيت على راسها تاج وكتحنى ليها ريوس النسا والرجال ... ملكة... (خرجات عينيها) يووور! نتا هوا يور سميتك تلاتي كيكره ويحب وبلا بيه ماتقدر يعيش عبد من لعباد!! قلب!!!! 

شافت فيه مخرجة عينيها كتفتف وقالت

- واش نتا هوا الامير يور !!! 

دفع يدو وقال : كملي كلااامك ... هوا انا ودابا حطي ما عندك 

تصمكات شادية وتصمرات فبلاصتها كتشوف فيه وتبلع ريقها وقالت كتمتم

- سسس سسمح سمح لي امولاي رر رراه فمي كياكلني وسبقت لعيب وو..

هز حاجبو وقال : كملي دابا عليك الامان 

حركات راسها وقالت : صافي كون هااني ... غادي نحط ليك كلشي واضح ... لمهم ... غيهز قلبك من الهموم ما هاز لبحر من الحوت ... جايك رحيل قريب كنشوفو قرييب بزااف وحرب مع لحبيب ... 

صغر عينيه وقال : شكون هاد لحبيب؟

شادية: شي حد مشارك معاه الدم ... كنشوف موت ... غتقتل شي حد بيديك قريب ليك ... وغادي تندم عليه ويتقطع قلبك عليه .

دار يدو على خدو وقال عاقد حواجبو : شكون هاد لقريب ؟ ماعندي حد من غير اعز الناس ! 

شادية : لااا عندك ... عندك عروووق مجدرة وصحيحة عندك شجرة وشجرة كبيرة 

جمع يدو وجمع الوقفة وقال

- هضرة خااوية .. هنا عرفتك غير كتزفي وتلوحي ... تقدري تعرفي سميتي حيت مكتوبة على رقبتي داكشي باش عرفتي شكون انا و ولد من .. اما شي لاخر غير هضرة خاوية وكدوب .

وقفات كتحلفة وتعطي راسها باش يتيقها 

شادية : باش غنعرف سميتك ... ماشفتها ماريتها ... رقبتك مغطيها الشعر ... مكندكبش داكشي اللي قلتو ليك هوا اللي كاين 

تلفت غادي بحالو وقال : كتكدبي... انا ماعنديش هاد الشجرة اللي كتهضري عليها لبلاد كاملة عارفة هادشي ... كاينة الملكة روح الندى والامير يور ... شي حد اخر مكاينش 

شادية : خليني غير نكمل ليك ... انا كنقول داكشي اللي كاين فخطوط يديك... مزال خط لحياة ومزال خط لقلب .. مزال ماكملنا 

طلع بالخف على لخيل ولاح ليها شربيلها وقال .. مكنتيقش بهادشي ... بغيت غا نشوف واش كلامك صحيح ولا ماشي صحيح .. طلع حتى حاجة ما صحيحة . الله يعاون

عطاها بضهرو خلاها واقفة كتغوت موراه 

- عنداااااك تنسااااا شنو قلت ليك ... ايواااا عقل .. وعنداااك ترجع تقلب عليا باش نكمل ليك .... دابا نشوفوووووو 

مشااااا داه الريح مادارش عندها خلاها واقفة كتشبك خيوط يدو فراسها .. كانت باغا تكمل وعنرعا كانت ناوية طيح فكف الامير يور بشحمو ولحمو وتقراه ليه وتعرف سرارو

زفرات وهزات واحد لعصا وخشات رجلها فالشربيل كتعيط وتجمع غنمها تردو حيت صافي تعاشات لعشية وخصها تروح لخيمتهم .

دخلات الخيل كتجري مع صوار القصر العالية تعرضو ليها لعبيد كيتجاراو .. نزل منها الامير يور قبل ماتوقف وخلاها ليهم داوها ومشا على رجليه شاد فيدو لقوس والسهام .. منين ماداز كيحنيو ليه الراس وهوا غادي حتى دخل للقصر لداخل ووقف واحد من لعبيد اللي داز حداه حنا ليه الراس وسولو 

- الامير يور : الملكة فين جالسة؟ 

العبد : مع النسا فالنزاهة بحال ديما 

الامير يور : هاك (عطاه السهام ) وجد ليا لحمام هانا جاي ليه 

عطاه السهام ومشا خرج من باب اخر غادي جيهة الجردة لكبيرة من لقصر فين مفرشين زرابي ومخاد وجالسين نسا دايرين بملكة متكية على جنبها وشعرها الكحل مسرح حداها لابسة من للباس الرفيع ومزينة بالذهب والجوهر و طالقة ودنها كتسنط وتنغم مع الحان لعود و الناي وتفرج فحوريات البحر اللي قدامها كيشطحو فرحانات مجمعين معاها ويدليو سوالفهم يمين وشمال

يتبع