عروس الملك السابعة الجزء 53

من تأليف Ghazal trust
2018قصة مُلغاة

محتوى القصة

رواية عروس الملك السابعة , زوجة الملك السابعة

ناضت شادية كتحك فجنابها هازة سبنيتها الحمراء فيديها وشعرها منتوف وفردة من بلغتها فيديها ومشات كتجري حتى خرجات لبرى عاد لبساتها فرجليها وجمعات زغيبات شعرها المشتنف وصايبات السبنية على راسها ... نفضات حوايجها ومشات بحال الى ماطرا والو ... بحال تغدات بشي تجاجة محمرة ماشي قتلة ديال الكلاب ، ولفات لعصى لاهيا لاخواتاتها حتى مابقاتش كتسوق ليه .. لحق يتقال ، حتى هما كيدرو علاش ويستاهلو نحير الجمل عليها . 

مشات شادية كتسارا بين الشجر والحجر ودخلات للغابة كتسارى وتقلب على ختها لهبيلة فين مجلية حتى طابو رجليها وهي تكسل تحت واحد الشجرة فوق الربيع شادة شادة فيديها زرع خضر نتفاتو من بين سنابل اللي طالعة خضرة .. متكية كتنقي فيه بفمها وتاكل ساهية كتخمم بوحدها وتهضر

- دابا داك بو لحية مول شعر طويل.. هوا الامير يور ؟! ويل الشيطان .. مايمكنش! علاه الامير هاكاك كيكون ؟ يكون كدب عليا ؟ لااالالالالا ميمكنش قريت كفو بعينيا ماشي قالها ليا بفمو ... هوا الامير يور واخا مابيناش على حالتو ... داك السروال كامل غبرة وراكب فوق العود بلا سرج بحال الى هارب !... لااالا ولاكن بااين داك العود بركي ماشي عود عادي ... عمرني شفت بحالو عند شي حد ... ولاكن بلاتي... الامير خاص يكون لابش غير لحرير... دايرين بيه لخدم ولعبيد فين ما مشا وتمشى... وكيمشي بالموكب ويجي بيه... هادا لا ! لابس سروال بوحدو وكيدور بوحدو كي لبوهالي... وديك اللحية حتى هي مغطية ليه شفايفو ... وداك الشعر واصل لكتافو ... علاه هاكا خاص يكون الامير ... ياكما تكون مو شي غولة 🤔 ولاكن الى كانت غولة مغتولدش هاد الطولة . وهاد القد وهاد التجريدة ... وهاد الزين كااامل .. بلاتي... واااقيلا غتنووض الحرب.. شي حرب شاخدة هادي.. حسب ما شفت فكفو و غيقتل شي حد من دمو ولحمو واها ماخلانيش حتى نكمل قرايتو ... ياكما غادي يهجمو علييينااا!!!

وهي ساهية كتخمم ناشرة رجليها تحت الضل مجبدة حسات بشي حد كيجر ليها جلايل قفطانها الاحمر . هزات راسها وهي تلقا معزة قهوية كتجر فيها . خرجات عينيها وقالت

- الضاوية !!! ... ويلي فين مك وخوك؟ فين خليتي طاسيلتك؟

ناضت جراتها من حبل عنقها ومشات كتجر فيعا وتقلب بعينيها وتعيط على ختها 

- ياامنااا... واااااا ياالمناا..... يااااااامناااااااا ... فين مشات هادي وخلات لغنم مشتتة!

جرات المعزة كتعيط وتعتر فجلايلها حتى بان ليها لعود البركي علاش كانت كتهضر واقف بلا لجام قدامها بجنب الواد .. شدات معزتها عندها ووقفات معبطة راسها عاقدة حواجبها كتشوف فيه بنص عين ودور عينيها على مولاه فين كاين حتى سمعات داك الصوت لغليض هضر بشوية مور ضهرها وقال

- ياكما ناوية تهزي ليه لخط حتى هوا ؟

تلفتات بالزربة مخلوعة لقاتو واقف موراها كيشوف فيديه وينفضهم ... بنفس السروال والسماطي على يديه بيضين مغبرين .. صدرو عريان وشعرها محلول كحل موراه .. هز عينو فيها وقال

- مالك كتشوفي فيا ؟

هزات حاجبها وخنافرها ودارت يدعا على جنبها وقالت

- امممم... جيتي تقلب عليا تاني ياك .. باش نهز ليك الخط حيت لقيتي كلامي صحيح .. ياك قلت ليك غترجع تقلب عليا هه

هو حاجبو فيها هاز راسو وكيطلع ويهبط فيها وقال

- دابا اللي لقيتيه فلغابة كيصيد ولا تالف ... ولا حسابو مع شي حد راع كيقلب عليك... وعلاش متكونيش نتي اللي كتقلبي عليا هاا؟؟

عوجات فمها وقالت : انا كنقلب على ختي ... شتي نتا راك ما امير ما والو غيير كدبتي عليا... نتا فير شي حطااب كتجمع الحطب وتصيد الحجل ... حالتك ماشي حالة امير 

دار يدو على جنبو تنهد وقال : مالو لحطاب ماشي بنادم ؟ نتي براسك كتسرحي .. وكتنقصي من لحطاب ماحشمتيش ! غراااب نتوما يا هاد الناس ... غارقين فالجوع حتى لودنين وكضحكو على واحد غارق بحالكم ... اشنو لفرق بينك نتي وبين لحطاب ؟ 

زيرات شادية على سنانها وعوجات وجهها ، قاصها كلام الامير وجرحها ... عطاتو بالضهر غادية شوبة وعي توقف تلفتات عندو كتشوف فيه وقالت

- اييه غارقين فالجوع حيت اللي حاكم بلادنا واكل رزقنا . عايش فقصر وحنا عايشين فخربة .. الحمد لله مكناكلوش ديال الناس وكنحفرو على اللقمة بيدينا ورجلينا .. كبير الكرش تفركع ليه 

دورات وجههل ومشات جارة معزتها خلاتو واقف كيدور كلامها فراسو . بوحدو ومتبعها بعينو حتى غبرات . 

كانت واخد الغولة ..بغيت نقول واحد البنت كطل من بعيد مور واحد الشجرة حاللة فمها ضاحكة .. غليضة وشعرها مشعكك فالسماء الضفرة فيه ضربات العام وتكمشات مابقاتش كاع كتبان .. حازمة راسها بواحد العقدة رابطاها لقدام ودايرة عقيق غليض ولابسة قفطان كاشف باهت كحل كامل مطبع ومحزمة بتوب صفر على كرشها نازل مع قفطانها لمكمش .. مكفضة يديها المغبرين وفرجلها نعالة كحلة واكلة لعصى . فوجهها زوينة كتشبه شوية لشادية ولاكن موحال واش رشات وجهها بالماء من نهار خرجات من كرش مها .

حلات فمها وخرجات كتجري كضحك ضحكة غليضة كتخلع .. ماحس بيها الامير حتى دارت بيه كتنقز ودور بجنابو وهوا كيدور معاها ماعرفها منين سلاطت عليه .. كتنقز فرحانة وتشير بيديها وطلع فيه وتهبط 

- ياااع تا هوا الامييير !! وااااش تاهوا ؟؟؟ ونااااري شحااال طوييييييل ااابحال العصا اللي كتحبد بيه مي الخبز من لفرااان . 

ضحك بنية صافية وقال : شكون نتي؟ ومنين خرجتي؟

وقفات قدامو وضربات فخادها وقالت مخرجة عينيها

- ماعرفاييينش؟؟؟؟ 

عقد حاجبو وقال : لا ؟ !

حلات فمها ضاحكة وقالت كتشير بيديها

- هاااااويييلي مااعرفتييش شكون انا 

تبسم على حالها وكيفاش كتهضر وقال

- لاا! وكيفاش غنعرفك وانا هادي المرة اللولة اللي كنشوفك

قربات منو بشوية كتوشوش وقالت
- واراااه اااانا ... وااهيا يااامنة .. خت شاااااادية هاااهاهاهههههه

بعد راسو وقال : شكون شادية؟؟؟

حلات فمها وعينيها وقالت

- وشاااادية اللي كانت دابا واااكَفة معاااك وعايراتك وقالت ليك واكل رزقنا ... وهي بنت لحراااام اللي واااكلة رزقنا وتاكل ماتشبع .. طالعة واكلة نازلة واكلة كي لمنجل... وراااه غاطيحات عليك الباطل ... هي اللي بنت الهم ديييما تاكل ليا حقي .. اساااعة وكلاتها ليها مييي باش عمرها تمد يديها لقدرة ديال لحسوة .. دييما كتشريها ليا وكنبات بلاا عشااا

هز حاجبو وقال : هادي اللي كانت واقفة دابا ختك نتي! 

ضحكات حتى بانو ضراسها وقالت : اااه هااهاهااهعهعهه ختي انااا ... ختي والله ... غا هي خرجات خويييبة ماشي بحالنا ... مي توحمات على واحد الحمار ديال عمي قدور جارنا وجابت شادية ... داكشي علاش دييينا تعيط ليها غا لحمااارة ... تاكل فلعصى بحال لحمار وحرااااام واش يكَر فيها ... هاكا تقول ليها مي ديما ... (حلات فمها مضحك ودوز يدها على يدو وتشوف فيه ) ياااه شحال زوييين ... اووغزاااال تبارك الله 

تبسم وقال : حتى نتي غزااالة 

شدات يديها عندها وقالت : حلف؟

الامير يور : والله ... خاصك شوية ديال لعقل ترجعي حسن من ختك شادية

يامنة : عمر شي واحد كَال ليا غزالة .. وانا راه عاااندي لعقل غا هما مشايفينوش .

جمع شعرو للور بغا يمشي وهي تحل عينيها فيه وقالت

- شعرك رطب بحال شرابت البغلة ديال خدوج جارتنا 

ركب فوق عودو كيضحك وقال

- بغلة كاااع هههه 

مشات مور العود بغات اقيس فيه وهوا يالفت قال

- ماتقيسيهش غيركلك ... سلمي على ختك شادية 

عقدات حواجبها : منسلم عليها ماتسلم عليا ... حجارها يشدوها شعالة العوافي ... المعزة ديالي في قلب مي كبييييرة وهي كتشريها ليا معاها باش تصغرها 

دار عندها العود مينشي ويجي ويور فوق منو كيضحك وقال

- المعزة ؟ هههه تهلاي فختك .

ضرب لعود ومشا كيجري بقات موراه كتنقز فرخانة وتشير بيديها

رجع الامير للقصر بحال العادة ، دوش ولبس وتريح ومشا يشوف مو الملكة لاللة روح الندى ، دخل عندها لبيتها لقاها كتصلي ووقف فالجنب حتى سلمات وقال

- الله يقبل

تلفتات وقالت : اميين يا ربي... شنو درتي ... وجدتي راسك باش نمشيو ؟

هز واحد القرعة كيلعب ليعا فيدو من فوق الطبلة وقال : السفينات كيوجدو ... الجيش واجد من ديما ... السيوف راه خدامين فيهم ... بقا تعلني لحرب باش لعدو تكون فراسو.. ماشي نجيو ونهجمو عليه غير هاكاك

ناضت وقفات لابسة طويل وعلى راسها زيف مغطيها وقالت

- كما قلت ليك اولدي ... هاد الحرب بسميتك ماشي بسميتي ... هاد السلطان معارفش كاع واش كاينة شي بلاد اللي حاكماها مرى ... بعيييد علينا مكاينش اللي يوصل ليه خبارنا 

الامير يور : وفين كتعرفي هاد السلطان هادا؟ على حسب قولك هوا بعيد وخاصنا طريق باش نوصلو ليه ... شانو دار ليك؟

هزات راسها وقالت : حساب قديم ... لحرب اللي غنعلن عليه انا دابا ... سبق وعلنها عليا هوا .. داكشي علاش صبرت وقلت خلي حتى نلقا اللي يوقف جنبي ويقويني عاد ناخد حقي بيديا ... واعدني تقتلو .. كما كان ناوي يقتلني ... واعدني ماتخليهش حي فوق الارض 

قرب منها وقال : كنواعدك نقتلو وتحكمي نتي بلادو .

الملكة : هادشي اللي كيعجبني فيك ... مكتخافش والى صممتي غلدي توصل... علنو على الحرب هاد العشية وخليو لبلاد كاملة تعرف ... وسيفطو مرسول للسلطان يخبرو باللي الملك يور عوال يجيب النصر

حرك راسو وقال : نسيفط ليك الوزير ... انا دابا عندي مايتقضا 

تبسم وخرج مشا للجناح فين كيتلمو ويتجمعو ويخططو وجلس فوق كرسي كبير ساهي كيخمم حتى دخل عندو وزير من الوزراء وحدر راسو قال

- نعام سيدي .. قالو باللي بغيتيني 

هز الامير يور راسو وقال : نبغي نشوف بيوت لخزين خاوين ... والزريبة حتى هي خاوية... لكل دار غتعطيو بقرة وتور... حولي ونعجة ... وخنشة ديال الزرع ... وارضي اللي فغرب هاد القبيلة فين كاينين حنا .. تقسم على كل دار ماتكساب شبر من الارض . خليوهم يفلوحها ويزرعوها وماتنساو حتى دار 

حدر الوزير راسو وخرج ينفد كلام الامير يور بلا ميعاود حتى كلمة .

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.