تهندات وقالت : هاد لحرب ديالو هوا ماشي ديالي انا ... وزايدون انا ولدت وعرفت اشنو ولدت ... انا ولدت راجل ماشي دري صغير... وكي مشيت معاه كيف بقيت ماغلدي يزيد مغادي ينقص... يربح الحرب ويشد حبال البلاد بيدو .. عاااد ديك الساعة نلحق عليه انا
عبدية : فاش كانو كيصليو صلاة الفجر وغاديين .. تفكرت نها باه كان غادي للحرب .. اللي ولد ماماتش الاللة روح الندى .. وانا كنشوف الامير قدامي بحال الى كنشوف باه فياماتو ... يعلم الله كيف غيكون رجع ؟
تنهدات الملكة وقالت : يكون كما بغا يكون ... انا مابقاش يهمني .. وهمي كامل هوا نرد حقي .. نرد لعز اللي مشا ليا معاه ... شحاال طحت ليه على رجليه .. شحال بكيييت .. ودلييت راسي على قبلو .. شحاال تعدبت وشحال قاصيت .. ودابا جا الوقت فين نوريه العيالات علاش قادات ... نوريه حكام الرجال من حكام النسى ... شوفي بلادي كيف هاانية ... وكيف فرحانين وعايشين مزياان وراضيين عليا ... ماشي بحالو هوا ... كان كلشي كيحفر ليه .. وكان كلشي كاره حكامو ... شدهم بالعنف ماشي بحالي شاداهم بالعرف . . . خليني ساكتة اعبدية الله يعطيك الستر
عبدية : خاااايفة .. خااايفة غير لاهاد النار اللي كتلعبي بيها تحرقك نتي اللولة ... ماتنسايش علامن كتهضري ... الى كنتي نتي ذكية .. ماتنسايش باللي حتى الاصيل ذكي .. وماشي غشيم وماشي ساهل.. كنسمعك كتهضري تايقة فراسك كنحس بحال الى كتهضري على شي واحد سااهلة دوز عليه .. راه الاصيل هادا ومن لا يعرفه
تلفتات الملكة مربعة بديها مبسمة وقالت
- انا عارفة كفاش نحارب الاصيل اعبدية ... حرب النسى واقيلة راكي عارفاه كيف داير ... والاصيل كما قلتي ماشي ساهل ... داكشي علاش انا غادي نضربو بسلاحو ... وغييير بشوية .. وبلعقل ... غادي تفرجي اشنو ندير فيه وكفاش غنخليه يموت الف مرة فكل مرة .
عبدية : ردي بالك ... ردي بالك وحطي ولدك بين عينيك .. وقبل ما تحرقي باه تفكري الولد اللي غيحرقك من بعدو
قالت عبدية كلامها ومشات خلات الملكة واقفة ساهية ... ماعليها غير تسنى خبار الحرب فين وصلات .
وصلات مسعودة فرحانة جارة البقرة فيديها وموراها ولاد لقبيلة جارين التور و الحولي والنعجة . تعرضو ليها بناتها فلباب بالزغارت فرحانين كيصليو على نبي ، يامنة كتنقز من العجل للبقرة فرحانة وتغوت
هربو البنات لداخل تا تبعاتهم يامنة واكلة لعصى ومنتوفة كتحك فجنابها ، تركنو حتى دخلات مهم كتنفض فجلايلها ضاحكة غير بوحدها ، شافتهم مكمشين و هي تعقدهم ووقفات عليهم مدورة صبعانعا بجوج فيديها وتحلف ليهم
- والله وقربااات فيكم شي وحدة للكوري .. غا لما كنت شااداهاااا .. هاو دااكَاهااا... وناتفاااها نتيف الفروووج فالماء طايب.. وهاااانا وصيييتكم .. هااااه سمعتي نتي ياديك المهبولة ... عنداااك تمشي دبحي التور ولا تقربي من البقرة ... ولا تمشي جيهت النعجة والحولي ... راه نعلق والديك من شفارك
عيشة : هادي راه تاكلو حي بقشورو
شادية : هههه
مسعودة : سكتوني من صداعكم ... تكعدي نتي خرجي ليهم السطل يشربو راه وكحو مساكن فديك العقبة
عيشة : انا؟
مسعودة : ااايه نتي .. ونتي ياديك غارقة النية غدا كتمشي تسرحي الحولي والنعجة .. زيديهم على داك العتروس والمعزة . ويييلى مشيتي حتى رجعتي ناقصة واحد فيهم ... اللي نديرو ليم مانعاودو ليك
شادية : تفرقني غير الخطية هادي وغادي نكون بيييخير ... شعالة العوافي الله يتبعك البلى يخخخ
ناضت شادية وعيشة كل وحدة مشات تشوف شغالها وبقات يامنة جالسة كتمسكن على مها
يامنة : خليني حتى يانا نسرح مع شادية غداا.. نشوف غاداك لغزااال على مزيناتو ونجي في حالي
شادية : ايوا تما بقييتي يا لحبيبة ... انا ماعندي مانعاود ليك .. وكلام يامنة غير تخربيق وكن تيقاتو مي كن دفناتني حية ... واش الاااااامير غادي يوقف معايا اااانا ويهضر معايا ااانا ... شادية بنت مسعودة المزلوطة .. لا لباس كي الناس لا ماكلة تكهمنا .. وكااع هادا زهر عندي باش يتلفت ليا الامير من دووون لبنات كاملييين ... ها بنات القاضي.. ها بنات الشيخ .. هابنات التجار لكبار ... بلااااا اللي عندو هوا فالقصر كيعاودو عليهم غير لحمامة لختها مكيشوفوش الشمس وكيقطرو بالزين (تنهدات) انا اختي عيشة ... كاااع مطامعة لا فأمير .. ولا ولد الشيخ ولا حتى تاجر كبير ... انا بغيت غير شي واحد بحرفتو يوكلني منها ويشربني منها ونلبس حتى انا تواب زينة بحال بنات لقبيلة.. مانخرج نسرح وضربتي الشمس تقلبني ..مانمشي نسقي .. نجلس غا فخيمتي نربي ولادي ويعزني ويبغيني وميخلينيش نشقى برى داري... صاافي هادشي اللي طالبة .. ماطلبة خدم ولا قصور ولا لويز ولا ذهب... بغيت غير نعيش شوية ونتهنى من لقهرة وتمارة ديال ديما
عيشة : واللي يطلبها يطلبها كبيييرة يا لهبيييلة ... مالك اش ناقصنا اللي مانطلبوها كبيرة .
شادية : انا مكنتخيلش راسي مجبدة دايرين بيا لخدم ... ولا كنعيش الاوهام وكل ليلة نحلم ... عارفة راسي معمرني نوصل لداك لمقام اللهم خليني كندور فروندتي براااكة عليا
عيشة : وا اللي سمعك يقول غا شي خويييبة ولا شرفتي وخرفتي وباغا تقبلي على اللي كان ... مالك باااقا صغيرة وبااقا تجيب سيد الرجال ... وزييينة وغزاالة رجال لقبيلة كاملين يتمناوك
شادية : هه! عليها شادين الصف فباب الدار ... فين عمر شي واحد جا وصاوم شي وحدة فينا؟ ياك ماعمروها جبدو حس الزواج حتى بالضحك
عيشة : واش اللي كيعرف مسعودة غيبغي يتناسب معاها!!! راه كيهربو منها هي ماااشي منا حنا ... كيقول المثل بعد من لبلى لا يبليك ... وهما راه مكرهوش يتزوجو بشي وحدة فينا .. ولاكن ياختي غييير كيتفكرو مسعوظة كيديرو بنااااقص من شي زواج وما يجي منو . نتي يا لحمقة مزااال تشرطي راك مزاااال صغيييرة ... مزااالين نتشرطو ونتكبرووو ههه ماشي راه عندنا دابا ارض وبقرة وعجل هههه
شادية : ههههههه ها لعااار وريني شي بنت فلقبيلة اللي كضل تسرح من الصباح حتى لعشية بحالنا ..
عيشة : اللهم السرحة ولا لجلاس فهاد لخربة حدا مشعووطة ... النهار ومطال وهي تنكر يار بي السلامة ... شتي انا منك .. نددير ليها الطلاميييس .. نضبعها ونخليها غير حاللة فمها وتقول اييه ماتجبدش لا على فمها
عيشة : ايوا ديريها حرفة وجمعي منها لفلوس مالك .. ياك كااع داكشي اللي كتقولي صحيح .. ايوا بالي بناس لقبيلة وتشوفي الى ما شدو الصف فم باب الدار عليك
شادية : والله كن تبغي مسعودة حتى نديرها من غدا
خشات عيشة راسها فودن شادية وبدات تشوش
- اجي .. مفراسكش ... راه مي غتدي يامنة لواحد السيد عند واحد الفقيه تزورها باش يرجع ليها عقلها شي شوية
شادية : حلفي... وفين غاديها؟
عيشة : سمعتها كتهضر مع جارتنا وقالت ليها فالصحراء ... وغاتمشيييي شلا ايام وشلا ليالي .. وغاتخلينا غيييير وحدنا فالدار وظيك الساعة نقلبو هاد لخربة زاوية وماتجي فين ترجع مسيعيدة حتى نكونو جمعناااا وطوينا ودرنا لاباس ايوا وديك الساعة مللي تشوف لخير مدفق ماتقدر دير حتى حاجة .
حلات شادية عينيها وقالت : ايوا وامتى غتهز الرحال ؟ ونيت مزيييااان غتمشي معاها يامنة باش نقضيو فخاطرنا ... ايوا على الله تمشي دغيا .
تافقات عويشة وختها شادية وبطا عليهم غير امتى تمشي مسعودة وتخوي الدار ... رجعو يحسبو ليام ويتسناو فشي صباح يصبح وتصبح مسعودة هازة شطايطها ومسافرة . اما يامنا ضل نهار وماطال فالزريبة تنقز فرحانة .. رجعات حادكة مقابلة غا لعجل والبقرة تشطب ليهم و دور بيهم من قنت لقنت .
واحد الليلة .. جمعات مسعودة بناتها حداها فوق الطبلة ديال العشى تحت ضو القنديل ..ربعات رجليها وبدات
- سمعوني مزياااان وحلو ودنيكم ... انا الصباح مع لفجر غادية نزور ختكم يامنة .. واحد 3 ايام ونرجع .. ويااااااوييييييل شي وحدة فيكم تلعب معايا ولا يغرها الشيطان.... غاديرو النوبة .. كل نهار تسرح وحدة ... وقبل ما يادن المغرب تكونو فالدار ... الشقى ديال الدار تناوبو عليه وبلا دباز بلا خصومة هاتا كنوصيكم ... يقدر نمشي فنهاري ونجي فنهاري .. ويييلى مشيييت حتى جيت ولقيتكم دايرين شي زبلة ... راكم عارفيني مزياااان
عيشة : غتجلسي غير 3 ايام؟
خرجات عينيها مسعودة وقالت : ااااايه ... والى ساليت شغلي نجي في سااع ... الفقيه غير قريب ماشي بعيد
شادية : ايوا الله يديك ويجيبك على خير
يامنة : والله وجينا ولقيناكم مرونينها غا لما كليتو ماكلا الطبل نهار لعيد وا هاااودني
مسعودة : سكتينا تي ... واري ديك النعالة اللي حداك
تلفتات يامنة كتقلب وهي تقول : فين هي؟
زعفات مسعودة وقالت : رااااها قداااامك قربات تبوسك في فمك ... حلي عينيك يا لعورة
ناضو لبنات جمعو الطبلة ونقاو كلشي ومشاو لواحد لبيت صغير فين موالفين ينعسو بثلاتة مستفين فالارض فوق الفراش وحداهم سرجم صغييور كيدخل لهوا بارد فهاد الصيف . الضلااام غير ضوء القمرة اللي ضارب فيهم .. يامنة عاطية وجهها للحيط كتشخر ، اما عيشة وشادية متكيين كيتجمعو بشوية
عيشة : قالت ليك غييير 3 ايام ... وهي جامعة صندوق حوايجها كامل ومسلفة البغلة من عند عزوز ... عوالة دوز صيف وشتى وقالت ليك غييير 3 اياااام
شادية : ومالكي بغيتيها تقول لينا غنطااااول باش حنا نديرو مابغينا ... راه مسعووووودة هاديك واجرك على الله
عيشة : ايوا حتا حنا بنااااااتها واجرها على الله .. قلب القدرة على فمها طلع لبنت تشبه لمها .
شادية : ايوا الليلة نشوفو هاد الطريق اللي غضرب واش طويلة ولا بعيدة .
ناضت بشوية هزات كف يامنة وهي كتشخر وبدات تشوف فيه تاشبعات وحطاتو ..تلفتات عند عيشة اللي حاضية غير بعينيعا وقالت
- مسيعيدة عندها طريق طويييلة ماشي قصيرة ... كف يامنة كيقول باللي غتشد طريق طويلة .. يعني حتى مسعودة غتمشي معاها ... مايمكنش تمشي غير يامنة بوحدها
عيشة : وراه قلتهااااا ليك ... راه بودني سمعتها .. الله ياربي غنتهناو شي يامات
شادية : انا غدا غنبدا .. غير تمشي مي ونخرج نضرب لخط لعيالات لقبيلة ... نقول ليهم غير النص وداكشي اللي قريب .. ونخليهم حتى يوقفو على كلامي ويرجعو عندي ..وديك الساعة يلقاوني هنا كنتسنا فيهم .. واللي بغات تعرف تجيب معاها يا حولي .. يا معزة .. يا نقرة .. ياتوب من لحرير... المهم هاك وارا .. وانوووضي تنعسي باش يجي الفجر دغيا
تقلبات على جنبها باش تنعس ساعة طاح فبالها الامير يور وضحكتو وشوفاتو وهي تنهد تنهيدة طويييلة عاد غمضات عينيها .
صبح لحال وتغيرات لحوال ... سافرات مسعودة هي ويامنة جارين لبغل .. وخلات موراها عيشة وشادية ناوين على خزيت وحالفينها فلقبيلة ، داكشي اللي نواو عليه داروه ، غير خوات ليهم مسعودة الرحبة وهما يقلبو القبيلة سفاها على علاها عيشة تجر من جيه وشادية تجر من جيه ... حتى رجعات شادية حديث كل لسان ورجع الصف فباب الدار فيه نسا ورجال .. قلبو الدار زاوية وعيشة اللي جالسة فالباب شادة واحد العصى ودايرة ليهم النوبة .. مدخل اللي موراه حتى يخرج اللي قبلو .. جالسين مشتتين حدا باب الدار وعيشة كل شوية تعيط بسمية . اما شادية جالسة لداخل فلمراح لابسة قفطان حمر بحال ديما . ماتلبس من غير لحمر حتى لون.. ماشي حيت مضروبة عليه .. ولاكن كتحماق عليه وعزيز عليها .. واخا كشفات ليه اللون باقي تلبس فيه وتعاود . مربعة رجليها ودايرة سبنيتها لحمرة بالهدب على راسها و شادة كف وحدة من لعيالات وجالسة تقرا ليها
- راجلك الاللة مزوج عليك ... وحدة سمراء وطويلة من لهييييه من الصحراء ونتي يامسيكينة ضبي تبكي وتشكي عليه وهوا يقولك راه غاااادي نزور السادات ... ياك كيمشي للسادات؟
المرى : ااايه ابنتي ديييما
شادية : ايوا السادات هما مرتو وولادو ... راجلك مامريض ماقرصاه ناموسة .. راجلك عشاق الزين اخالتي ... ونتي ماعليك غير بالحنة ولعشوب الى بغيتي يرجع يتلفت ليك .. وانوضي سيري شوفي واش كلامي صحيح و واش مزوج وديك الساعة اجي نقول ليك اللي باقي
المرى : واىى طلع كلامك صحيح اش ندير ؟
شادية : غتجيبي ليا لقلوش ديال لعسل باش واعدتيني ... ولا صافي نسيتي؟!!! ياك راجلك كيبيع لعسل
المرى : وانا راه مابغيتش كلامك يطلع صحيح .. كن غيير كدبتي عليا حسن
هزات شادية خاجبها وقالت
- ايوا منين بغيت نجيب ليك الهضرة من جنابي ؟ اللي كاين راه قلتو ليك ... واسيري وعنداك تنساي بيا لقلوش دالعسل .. راه باااقي عندي منقول ليك ومزال عندك ميتقال غير سيري حتى ترجعي
المرى : ايوا كملي ليا دابا
شادية : الااا .. حتى تجيبي لقلوش دالعسل وديك الساعة نكمل .. اما هاد القلوش دالسمن اللي جبتي ليا مكافيش .. نوضي سيري خلي اللي موراك يدخل
لوات المرى عليها حايكها ولتامها وخرجات . ومن موراها دخل راجل كيجري فيديه طبق كبير ديال الفاكية و توب من لحرير .. حطو فرحان فوق الميدة وعطاها يديها وقال
- على سلامتي يا لاللة ... شحال وانا برا نتسنا
هزات شادية حاجبها مربعة يديها وقالت
- جمع يديك عندك ... انا مكنشد يدين الرجال اسي رحال . سرح يدك فوق الطبلة وانا نشوف بعينيا
شادية : انا غنقول ليك داكشي اللي عندك حسب هادشي اللي جبتي ليا ... انا اللي كيتهلا فيا كنقول ليه كولشي .. اما اللي كيتزقرم عليا حتى انا كنتزقرم عليه ... بسم الله
تلفات الملكة بالزربة مخرجة عينيها فعبدية وقالت
- كفاش؟!!!!
عبدية : كي كتسمعي الاللة .. لقبيلة مقلوبة سفاها على علاها ... وكيقولو باللي كلام هاد البنية صحيح ... ومكاينش اللي قالت ليه شنو واقع فحياتو ومطلعش صحيح .
هزات الملكة حاجبها وقالت : وهاد البنت قداش؟ كبيرة صغيرة ؟ ... عرفتي يا عبدية الى كان كلامك صحيح ... غادي نتهلا فيه مزيااان
عبدية : والله الاللة الى هادشي اللي سمعت .. حتى من ناس القصر اللي كيخرجو يخدمو على برا ومسموح ليهم يفوتو الباب ... مشاو عندها وعاودو ما مرة ما جوج ... مكاينش اللي مكيهضرش عليها .. وكيجيو ليها الناس من قريب ومن بعيد
حلات الملكة عينيها مزيان كتخمم وهي تهز راسها وقالت
- سمعي ... هاد خيتي بغيتها عندي هنا ليوم قبل غدا ... جيبوها ليا دااابا قبل ماتعاشا لعشية
عبدية : والى مابغاتش تجي؟
الملكة : جروها من رجليها وجيبوها ... يالاه جري انا مايهنا لي بال حتى نشوفها ونشوف واش كلامها بصح ولا كدوب ... وعرفتي الى كان كلامها صحيح ... خلااات على الاصيل ... غير هوا حاااجة وحدا مانبغيهاش تكون .
عبدية : شنو هي ... غير تحط رجليها هنا ... ماتهز لخط لحتا مخلوق.. خايفة يكون خطها صحيح وتفضحني قدام يور . ولا يمشي يجربها وتحط ليه كلشي فوق الطبلة ... ولدي وانا عارفاه .. عزيز عليه لعناد وعزيز عليه يعرف ويجرب ... والى مشا حتى جرب غادي يولفها .. والى ولفها مصيبة كحلة ديك الساعة ... داكشي علاش قبل مادخليها عندي وريها جهنم لحمراء باش متقدرش تشوف لحتى واحد .. يالاه جري
عبدية : هي اللولة الاللة
* كانت روح الندى جالسة مابيها ماعليها كتقرا وحالة فعينيها .. شدة فكف مرى حداها بنتها وكتعبر بيديها حتى دخلو عليها لعبيد بلباس ابيض وسلاهم وشاشية .. درمو فالدار حتى وقفو ليها عند راسها وهي تهز عينيها فيهم مخلوعة
نطق واحد من لعبيد وقال : مطلوبة فلقصر ليوم قبل غدا
وقفات شادية دايرة يديها على جنبها وقالت : اااااشنو؟؟؟ ومعااامن تشاورتو ... اااشمن قصر ولا شحمة!!! وزايدون ماعلمتوتيش قبل باش نوجد راسي ومزال تابعيني بزاف دالناس حتى نسالي
يالاه بغات تجلس وهما يهزوها من رجليها جمعوها تا بان سروالها المطروز بالاخضر من لتحت وداوها كتغوت وعيشة موراها كضرب فخادها وتولول .. وقبل مايخرجو شافت واحد مشا للفاكية وهي تغوت كتشير بيديها وراسها مقلوب
عروس الملك السابعة الجزء 55
محتوى القصة
التنقل بين الأجزاء