عروس الملك السابعة الجزء 57

طالعة شادية و عيشة مور الملكة فالسفينة وحدة شادة فلخرى... مقاداهم فرحة وماتيقوش تفكو من غار مسعودة المضيوم ورجعو حرات . شدو بلايصهم فالسفينة جالسين بحوايجهم اللي باتو بيهم كيتمنضرو فالبحر ويتجمعو 

- عيشة : باش كتحسي دابا اشادية ؟ 

قالت شادية ساهية فالبحر : كنحس براسي عايشة ... كنحس براسي بنادم دابا ... ماكنتش عايشة ... كنت منفية فديك الدار ... دابا كنحس لحياة بحال الى كنقيسها بيدي ... حاسة بفرحة كبيرة فقلبي .. كنتسنى شي حاجة وانا ماعارفاش شنو هي ...شي حاجة زوينة بحال الى كنت عارفا شنو هي ونسيت عليها وكنتسناها دابا ... فهمتيني 

عيشة : حتى يانا بحالك .. كتت ميتة ... ولا عورة ... دابا علد كنشوف ... كنشوف كل شوية شي حاجة جديدة عليا .. وغريبة عليا .. كتفرحني وتعجبني ... فرحانة بزاااف اشادية .. ودابا مللي شفت الدنيا و مرتاح قلبي وعايشة حسن من بنات القاضي .. وبنات الشيخ والمقدم ... من بنات القبيلة كاملين ... نقزنا دقة وحدة .. ومنقدرش نرجع لداكشي اللي كنت عايشة فيه ونخرج من هاد لخير هادا كامل .. واخا تسلسلني وتجرني من شعري مانرجعش

قالت شادية ساهية : شكون هاد الهبيلة اللي تبغي ترجع لديك لعيشة... شكون تهرب من الجنة وتمشي لجهنم ... داكشي اللي كلينا لبارح عمرنا كليناه فشي فرح ولا فشي قرح . كنقليو غير الشعير ولا الضرى ولا لحسوة ... عمر اللحم جا فمنا ... وعمرنا لبسنا بحال هاد اللباس ولا حتى شمينا شي ريحة زوينة من غير ريحت الورد اللي كينوض فالبيع ...عمرها كانت عندنا قرعة دريحة ولا حتى شفناها من غير الزهر اللي كديرو لينا مي من لعيد للعيد .

تنهدو بجوجات .. هبطات عيشة راسها لقات فحرج شادية لكموسة الزرقاء شداها ورابطاها على يديها 

عيشة : شنو فهاد لكموسة؟ مالك معنقاها ؟

شادية : فيها لحوايج ديالي اللي هداتني الملكة فاش هزيت ليها لخط ... مابغيتش نلبسهم دابا خفت نوسخهم .. حتى نقربو نوصلو ونلبسهم .

عيشة : وشنو تما؟

شادية : هنا يالاللة قفطان ابيض ديال جوهرة ... وسبنية حمراء جديدة وحايك حمر ديال حرير الدودة .. وبلغة وشوية ديال الذهب والنقرى ولعطور .. دابا نعطيك ديري منهم شوية . 

عيشة : الذهب !!! حلفي 

شادية : راه هدية الملك ماشي اي هدية .

عيشة : شكوووون قال نلبسو هاد اللباس شي نهار ويكون حتى حنا عندنا الذهب خهه 

شادية : اييوا لحمد لله .

مشات السفينة ايام وليالي حتى قربات للبر وهي تهبط شادية وختها لبيت صغير.. فيه لبسات حوايجها الجديدة .. القفطان دجوهرة اللبيض .. طلقات شعرها الاشهب ودارت فرقة لوسط ودارت السبنية على راسها وحزماتها لقدام وخرجات جوج زغبات من لقدام .. البلغة حمراء والحايك حتى هوا .. تزينات بالحلي وتعطرات هي وختها وطلعو لقاو السفينة راصية فالبر .. نزلو بشوية هازين جلايلهم مور الملكة اللي كلشي داير بيها وشاد فيديها حتى طلعات فعربتها هي وعبدية وطلعو لبنات جلسو قدامها . .. لقات شلا عبيد وحراس كانو يتسناوها . داوهم نيشان للقصر ودخلوهم لداخل ... ومع الدخلة شافو شلة تماثيل منحوتة ... فيهم نسا عرياني ورجال حتى هما عريانين ... قصر غريب عليهم عمرهم شافو بحال .. كامل منحوت من برا دايرين بيه الحرادي ولخصاصي .. كبيير بزاف خلاهم غير كيشوفو ويتغامزو مع بعضياتهم .

نزلو من لعربة هازين راسهم كيشوفو ثمتال ابيض راجل ومرى معانقين مرمي حداهم توب ابيض وكلشي فيهم كيبان .. هبطو راسهم حشمانين ماقدروش يهزو الراس ومشاو مور الملكة . دخلو مع الباب الكبير لقاو كلشي مستف فالجناب واقفين حانين الراس مستقبلينهم بصوت النفار القوي ، تمشات الملكة هازة راسها مبسمة فوق الزربية الحمراء وقدامها عرش حمر واقف قدامو ولدها الامير يور هاز راسو مبسم كيشوف فيها جايا عندو . شد يديها باسهم وقال كيشوف فعينيها

- مرحبا بيك فبلادك 

تبسمات وقالت : كنت تايقة فيك ... وعرفتك غادي ديرها ... ولاكن اش داكشي شفت على برا !

هز راسو وقال : بني ديال ليهود هوا هادا ... منين مادزتي لقاي دراري صغار واقفين منحوتين ... عيالات ورجال كما شفتي ... ولاكن غادي نردم ديك التماتيل كاملة 

حركات راسها وقالت : لبني ديالهم زوين ... ولاكن داك قلة لحيا هي اللي خايبة 

تبسم وقال : زوين بزااف ... رتاحي ونديك تساراي ... كلشي غادي يعجبك ... وغادي نديك لواحد الساحة عجباتني بزاف ... فيها كيتحاربو الرجال ... وفيها النمور والسبوعا ... غتعجبك بزااف هاد البلاد ... كلشي فيها زوين ناقصها الاسلام 

تنهدات الملكة وقالت : غادي نوحلو مع هاد الشعب ... كفاش غادي نرجعوهم على ديننا 

هز حاجبو وقال : لبلاد ديالنا دابا ... قامت لحرب ... والنص مات ... والنص لاخر مغاديش يغلبنا 

الملكة : تقاليدنا ماشي هي تقاليدهم ... وانا دابا مكيهنيش هادشي ... انا جيت لهاد لبلاد حيت عندي فيها مايدار .. تكلف نتا بكلشي .. انا مابغيتش نعمر راسي هاد الساعة لا بالشعب ديالها ... ولا التقاليد اللي عندهم هنا ... انا همي كبر من هاد لهم 

الامير : قولي ليا همك باش نهزو معاك ونعاونك فيه بحال ديما 

الملكة : درتي لي عليك نتا ... هادا دابا شغلي انا ... خليت ليك حكام هاد لبلاد نتا حم باش بغيتي ... انا يانا مغاديش نطول هنا بزاف . غير هوا غادي نطلب منك واحد الحاجة ولاكن ماتسولنيش علاش وكفاش 

هز حاجبو وقال : اشنو هوا ؟

تنهدات وقالت : سيفطتك لهنا ملك .. وغادي تبقا ملك .. وانا ..... انا مابغيت حتى واحد يعرفني هنا مك

هز حاجبو معجب وقال

- كفاش؟

تنهدات وقالت : مابغيت حد يعرف باللي نتا ولدي ... عطيني لعهد 

الامير : وعلاش !!! اش كتقولي ؟ علاش هادشي؟

الملكة : قلت ليك ماتسولنيش علاش... انا دابا عييت وفاش نرتاح شوية نقول ليك علاش.. بلا متشطن راسك مكايناش شي حاجة كتخلع 

الامير : راه غنشطن راسي وميهنا لي بال ... كفاش مابغيتي حتى واحد يعرف انا ولدك ... واش كاين شي مشكل ؟

الملكة : مكاين حتى مشكل ... غير عندي واحد لخطة داخل فيها هادشي ... وفاش نرتاح غادي نفسر ليك كلشي غير تهنى ... ياك كلشي كنعاودو ليك .

هز راسو واقال : اممم... اشمن خطة وعلاياش ناوية ؟

تبسمات وقالت : دابا تعرف ... وانا منقدرش نخطط بلا بيك ... ماحد حتى واحد معارف شكون نكون ... وكلشي هنا عارف باللي نتا الملك ... داكشي علاش سبقت ليك الهضرة باش تخليها مستورة .. فهمتيني 

تنهد وقال : وااااخا لاللة ... دابا نشوفو شنو اللي جاي فالطريق تاني

تبسمات وحطات يدها على وجهه وقالت 

- كل خيير ... غير لخير اللي جاي ان شاء الله اولدي 

حرك راسو وقال : سيري ترتاحي .. واخا صعيب شوية تفاهمي مع لخدم اللي هنا ... حيت الهضرة ديالهم ماشي هي ديالنا .. ولاكن دغيا تقدري تولفي كما ولفت معاهم ... قبل مانعيط ليك تجي .. قادينا كلشي .. ونقينا الدنيا وهزينا اثار الحرب اللي كانت هنا ... صلحنا كلشي باش تقدري ترتاحي . 

تبسمات وقالت : وشكون اللي غادي يوريني جناحي ؟ 

هز يدو لوحدة شهبة لابسة توب باهت شوية معزم من الكرش .. تقدمات عندو وهضر معاه بزز باش قدر يقول اش بغا ... فهمات وشارت للملكة بيدها باش تديها 

الملكة : لهلا يخطيك عليا اولدي

تبسم وقال : سيري ترتاحي ... انا مزال عندي مايدار .. بدينا المساجد فهاد البلاد .. واخا بلاد صغيرة ماكبيراش بزااف .. والناس والناس فيها قلال ماشي كتار بزاف .. واخا هاكاك هاد الشعب خادم بلادو مزياان وفايتينا بشحاال من حاجة ... غير من لبني والنحت ديالهم يعطيك لخبار 

الملكة : الله يعاون .. انا مشيت لبيتي 

تلفتات الملكة مشات وبقا يور واقف كيتهند .. جات عينو على عيشة وشادية اللي واقفين اللور ولاكن ماردش البال لشادية حيت دايرة لتامها على فمها وكتشوف فيه بنص عين .. اما عيشة عيشة غير حالة فمها حتى جراتها شادية بالزربة وتبعو الملكة وعبدية ولوصيفات لخرين اللي جاو معاهم .

يتبع