عروس الملك السابعة الجزء 59

من تأليف Ghazal trust
2018

محتوى القصة

رواية عروس الملك السابعة , زوجة الملك السابعة

فالبيت كدور عيشة مقزبة فرحانة لابسة كسوة حمراء طويلة واسعة ومحلولة من لقدام فالجنب وعريانة من لكتاف والصدر ومربوطة بخيوط على الضهر ولكتاف .. طالقة شعرها وكتنقز فرحاانة 

عيشة : مبررردة هاد الكسوة ... مالبستها حتى قلبات ليا هادا للور... ماعرفت كي كيديرو يلبسو هاد لعجب.. وكيف كيدرو لدوك الدفيرات فشعرهم ؟ 

ناضت شادية من فوق السرير مقلوبة بالنعاس لقات عيشة كتهضر بوحدها وشي مغطي شي عريان وهي تخرج عينيها وقالت مخلوعة 

- ويييل الشيطان ... عنداك تكوني خرجتي هاكا !!!

عيشة : ومالي مانخرج هاكا ... حتى هما معريين ومقزبين 

شادية : اويييلي داكشي اللي بقا غير تخرجي هاكا مشوهة !! الصدر عريان وديك الكسوة محلولة كاملة فخادك كيبانو ... فين عمرنا عرينا على يدينا واش هبلتي 

عيشة : حنا دابا مابقيناش فلقبيلة باش يضحكو علينا ويدويو فينا ... حنا دابا فبلاد بعيدة وكلشي فيها كيلبس بحال هاكا ... نبدلو شوية .. ماشي غير لقفاطن والتكاشط والحايك اللي كاين ... وعاد حنا شهبات يحسابهم غير بنات هاد لقصر ههه ... لبسي داك الابيض يجيك غزااال 

شادية : لااالا اختي .. نحشم نخرج بيه .. انا كنحشم نلبس مقزب غير قدام لمرايا بقا غير على برا فين يشوفوني كلشي ... غير بالصحة عنداك غير تسمعي شي هضرة 

عيشة : ااجي .. شفت هادو نساونا فلعشا .. واش منتعشاوش؟

شادية : مانعرف .. انا بعدا خلصت الدين دالنعاس اللي كان فيا .

دخلات عليهم عبدية لقات شادية مجبدة فالسرير وعيشة جالسة حداها بداك اللباس وطالقة الشعور . عبسات وقالت

- نوضي نتي تعشاي.. وشكون
عطاك لحق دخل عندك وحدة من ليهوديات ؟

وقفات شادية شادة ضحكة وقالت : لاا ههه راه عيشة ختي هادي ههه 

وقفات عيشة كضحك وقالت : ماعرفتينيش ههه

عبدية : شكوون ... وييل الشيطان واش عيشة؟!

شادية : وايييه راه غير لبسات هاد لحوايج وصافي 

عبدية : اممم.. يالاه زيدو .. زيدو تعشاو .. تبعوني 

دارت شادية سبنيتها ولبسات شربيلها وخرجات مور عبدية بقفطانها لبيض جوهرة ، شافت عيشة غادية حداها كتجر شراوط الكسوة موراها وقالت

- ويييلي خرجتي هاااكااا! رجعي ستري راااسك المنحوووسة 

عيشة : هزات كتفها) خليييني... نسيتي فاش دخلنا لداك لقصر ديالهم .. حتى تما لقينا حريمهم لابسين مقزب بحال هاكا... راه مولفين .. عيب فقبيلتنا اما هنا راه قصر... خليتا نتفوهو شوية

شادية : ضبري راسك .. وانا ما....

شافت الامير يور جاي جيهتهم وهي دير طرف السبنية على نيفها وهبطات راسها اما عيشة بقات حاللة فمها فيه حتى نخزاتها عبدية باش تحدر راس .. داز حداهم وشاف فيهم وحرك راسو ليهم وزاد كمل على طريقو .. تلفتات عبدية معبسة وخرجات عينيها فعيشة

- فاش يدوو حداك الانير يور تحدري راسك ماشي تبقاي معلقة عينيك فيك كي النعامة... كتسمعي .

حركات عيشة راسها خايفة ومكمشة فشادية 

شادية : يالاه واشدي ... خاص اللي يجبد لباباك دوك لعينين 

همسات عيشة وقالت : كاع ماداها فيا وخا لابسة هاد لحوايج !

عيشة " زيدي زيدي ... نتي كبرات كرشك ومابقيتي تقنعي! مشيت لسيد لمير نيشان باش حسيتي فاش قلتيها!

تبعو عبدية داتهم لجناح لجواري .. كانو جالسين كاملين فوق طبلة طويلة ولعشا محطوط قدامهم .. دخلات عليهم عبدية جايبة معاها عيشة وشادية اللي تحلو عينيه كيشوفو فلبنات قدامهم بحال الحماماتو خلاتهم و خرجات مشات . جلسو على كراسا فالطرف حشمانات حادرات راسهم كيشوفو غير بنص عين .. والوحيدة اللي ساترة راسها ومزال دايرة السبنية هي شادية .. بقاو كيشوفو فيها ويضحكو بيناتهم ويتغامزو .. شوية بداو يهضرو وبدات صواتهم كتعلى بالضحك .. نخزات عيشة شادية وقالت بشوية

- هاد الخرقوم كيضحك علينا واقيلا ... مانعرف اش كيقولو 

شادية : يضحكو يلا بغاو يضحكو .. حتا حنا نضحكو ونهضرو ومايفهمواش اش كنقولو... ضبرو راسهم حنا مالنا ... غير مايجبدوناش ويخليونا فتيقار مابغينا صدع 

عيشة : عنداك يجبدونا ... ويشريوها لينا مع مالين شي ويجريو علينا ولا يردونا لخبرتنا 

شادية : غير نتي جمعي يديك ... ماتقيسي حتى وحدة فيهم ... اما لهضرة راه مكتلسقش .. وحسن كاع مكنفهموهم مكيفهمونا ... كولي وخلي الزمر يقول اللي بغا ... جري لهنا ديك الدجاجة وداك لعصير 

عيشة : الدجاجة لمحمرة ولا لمشوية؟

شادية : بجوج ههه

جالسة الملكة بلباس خفيف معري فوق سريرها ولعشا محطوط فصينية مدورة حداها وعبدية جالسة جتمع معا .. 

الملكة : ياك ديما كنقول ليك ما كنبغيش ناكل ليدام بالليل .. واش بغيتي تخرجي عليا!

عبدية : راه غيجيك بوصفير... مابقيتي تاكلي والو 

الملكة : الى تبعت رايك غنرجع حالتي ... عطيني لمبخر ولخضرة براكة عليا .

قرباتو ليها عبدية وقالت 

- هانتي وصلتي .. شنو غادي ديري دابا؟

تنهدات الملكة وحجات عضمة زيتون من فمها وقالت

- بيني وبينو واد اعبدية ... بلا شك يكون عرف باللي وقع .. و واش يكون عرف باللي انا اللي شديت هاد لبلاد ...

عبدية : نسيييتي شنو قالت لينا لاللة ياقوت زماان ... كانت قالت باللي هوا كيحلم بشنو كيوقع بالنهار .. وبلا شك غيعرف دابا شكون تتي وشكون يور ويعرف عليك كلشي .. وغادي يعرف باللي يرو ولدو يعني مابقا ليك ماتستري

ضحكات الملكة وقالت : واش عندك شي عقل ولا ماتكسابيهش! ها لعار معامن كنهضر انا ! 

عبدية : وعلاش! ياك هادشي هوا اللي كاين 

الملكة : لوكان كنتي تعثلي مزيلن وتخممي مزيان كاع ماتجي وتبداي تركعي فالهضرة... تفكري شنو قالت لينا لاللة ياقوت زماان ... قالت باللي الاصيل كينعس ويحلم بداكشي اللي وقع بالنهار.. وغير كيأدن لفجر صافي مكيبقا ليه مايحلم . يعني يا لحمقة .. انا بعيييدة عليه وولدت وربيت وكبرت بعييدة عليه .. بيني وبينو بحر .. وهي قالت باللي الى قطعت لبحر ماعندو مايحلم ديك الساعة وماعنظو منين يجيب خباري وانا مشيت لبلاد با اللي فطرف الدنيا .. فيين انا وفييين هوا وباش غيعرف ! والى بقيتي عاقلة مزيااان ... راه الاصيل الحبيبة كيحلم .. ماقلناش لا .. ولاكن شنو كيحلم فاش بقات .. والى نعس راه كيحلم غيييير بداكشي اللي وقع داك النهار نيت .. اما الى فات عليه الليل وهوا مزال فايق .. ونعس لغد ليه ماغاديش يقدر يحلم بشنو وقع فالنهر اللي قبل من نهارو وبات ليل سهران . فهمتي يا لهبيلة .. والاصيل الى كان غيحلم .. غادي يحلم بشنو كندير دابا .. ماشي بشنو وقع شحااال هادي وفاتو عليه سنين وليالي وبيني وبينو بحر ابيض وحمر ! ... ماغاديش ينعس هاد الليلة ولا غدا ولا بعدو ويحلم باللي يور ولدو.. منين جبتي هاد لفهامة ! 

عبدية : مافهمت والو 

الملكة : حسن .. الى فهمتي غيضرك راسك .. حسن بيك ماتفهميش... المهم راه معارفش يور ولدو ... و مغاديش يحلم بيه وهوا عمرو شاف وجهو ... الاصيل .. مكيعرفش يور .. وماعارفوش واش كاين .. ومعارفش اشنو كيدوز عليا ... ودابا مللي جريتي ليا لساني .. فرشي ليا هاد الليلة فالشرفة نعس تحت ضوء القمرة قبل ماينعس هوا ويحلم بهادشي اللي قلت انا كاامل ونتفضح ونصدق ماقاضية والو .. نوضي جري دغيا 

ناضت عبدية فرشات ليها فالشرفة ودورات عليها سبعة دلحجرات .. خرجات الملكة كتبات سميتو كاملة عند راس لفراش وجلسات كملات عشاها تما هي وعبدية 

عبدية : هي دابا الاصيل حلم بيك لبراح فاش نعستي؟

الملكة : لااا.. فاش خرجتي نتي خرجت نعست هنا ... معارفش كاع شكون نكون ... ولا شكون انا ... يقدر يكون عارف باللي رجع ملك جديد لهاد لبلاد ... داكشي علاش مابغيتش انا نبان ... حيت الى سمع بيا غادي يبغي يعرف شكون انا .. وكما نتي عارفة .. هوا مسلم وانا مسلمة .. ماجاتش نتحاربو ونضحو فينا لبلدان لخرا ... لمسلمين محاربين بيناتهم ! لا .. ماجاتش .. بلعكس خاصنا نتعاونو .. ماشي نقتلو بعضنا ونخليو ليهود يتشفاو فينا 

عبدية : ايوا وشنو غادي ديري ... مللي نتي مناوياش تحاربي نتي وياه .. اشنو غاديري ؟

تبسمات بالجنب وقالت : غاادي نوريه النسى علاش قادات ... بلا مايسيق حد لخبار وبلا منضحك فيا حتى بلاد . دابا كيفصل بيني وبينو واد ... ماشي بحر ولا صحراء... بين بلادي هادي وبلادو .. كاين واد صغير وطويل ... وداك لواد مننوع نقطعوه حنا لعندهم وممنوع يقطعهم هما عندنا ... كتهضر على الناس اما يانا يالا بغيت نمشي لتما نمشي ... وزيد هاد لقصر جا قريب من لواد بزااف .. وقصرو حتى هوا قرييي وبزااف ... الى طلعتي السطح وطليتي غادي يبان ليك لقصر ديالو من بعيد كيبان .

عبدية : ايوا .. وشنو لمعمول .. هانتي قربتي اشنو غاديري 

الملكة : نتي اللي غادي ديري دابا ماشي انا ، غادي نزل عليه بحال اللعنة .. مغيعرف اش يدير .. غيتلف .. غادي نهيج عليه بحال الفيضان ... حتى يرجع يقول واش هادي لعنة ولا دنب درتو فحياتي قديم . . . وجدي راسك اعبدية وعنداك تخلي يور يحط عليك يدو .. راه كاع داكشي اللي بنيت غادي تردميه ليا ... وياااك تقربي منو ولا تخليه يشك .. دابا خاصني نشوف كيفاش نردو لبلادي يجلس تما علا مانسالي انا شغلي .. حيت الى بقا هنا غايبدا يسول علاش هادي وعلاش هادي... واى شك فشي حاجة ودارها فراسو غادي يبقا يهبش عليها حتى يجبدها .. بحالو بحال باه . داكشي علاش مانبغيه يشك فحتتتتتى قطرة من داكشي اللي ناوية ندير 

عبدية : واقولي شنو ناوية ديري؟

الملكة : غدا مع لفجر .. غادي نبدا ليه الضربة .. ضربة وحدة منعاودهاش ليه وهي اللي غادي تهبط عليه كي اللعنة .. تبقا لاسقة مايعرف ليها طريق ومايلقا ليها فكاك

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.