ياسين : غير كنتي مشغولة بالليل وبالنهار ... اما كن كنتي جالسة كان غيبان ليك فلبلان ... ايوا ولكارو ؟
هبة : لكارو اللي مقدرتش
ياسين : وكيفاش كنتي كديري؟
هبة : كنطلع السطح ولا الطواليط ... بالليل
ياسين : عمرهم عاقو بيك؟
هبة: لا ... داكشي علاش بغيت نجي كنحس براسي مخنوقة .. وعاد جات مي عندنا كل شوية تقول ليا كلمة فشكل .. قلت لماما غادي نمشي لكازا وقولي لبابا رجعت خدامة تما
ياسين: علاش نتي مكتهضريش مع باباك،
هبة : ماشي مكنهضرش معاه ولاكن رجعات العلاقة ديالنا فالدار فشكل اياسين ... مابقيناش كما كنا فاللول ... هوا يمكن ندم على داكشي اللي دار معايا مابقاش كيبغي يجبد حسو ولا يدخل فيا .. رجع غير ساكت مابقاتش كاع كيهضر وحتى الصدقة اللي درنا ماريش فيها كاع
ياسين : غيكون مريض مسكين .. راه هادشي اللي داز ماشي ساهل ... ماماك بعدا لاباس عليها
هبة : الحمد لله ... حتى كتسولني عليك
ياسين : قلتي ليها راكي معايا؟
هبة : اه وعارفة كاع داكشي اللي درتي عليا ... حتى هي مابيديها حيلة راه اللي فراسي كنديرو
سكت كيشوف قدامو حتى وصلو لكازا.. نزلو وشد ليها فيديها كيضحك معاها مشاو تغداو بجوج .... فرحان برجوعها وغير كيسولها شنو خاصها شنو مخاصهاش ... شبعات دوران فكازا مع راسها ورجعات فلعشية هازة فيديها حوايج شراهم ليها ياسين
وهازة فيديها نونوس كبير وطموبيل صغيرة ، دخلات للدار حطات حوايجها على بيدمن يسالي ياسين حمامو وتشوف شنو دير هي وياه
دخل ياسين للحمام .. ومشات هي للكوزينة كتقلب شنو كاين وشنو اللي مكاينش ، حلات التلاجة وهي تلقا قرعة ديال الشراب منسية فيها جوج جغمات ولا تلاتة .. بلا متردد هبطات عليهم ... ماكفاوهاش وزادو شعلو فيها لعافية .. بحال الى كنتي عطشان وهزيتي لكاس لقيت فيه جغمة . حطات لقرعة ودخلات لبيت النعاس لقات ياسين جالس فطرف الناموسية كيمسحو شعرو من لما .. جلسات حداه كتفرنس وقالت كتلحن فالصوت
هبة : ياااسييين... نطلب طليبة؟
تلفت عندها شاف فيها وابتاسم ... كيعجبو الحال فاش تبدا دور بيه وتحلون وتشوف فيه دوك الشوفات باش يلبي ليها طلبها .
ياسين : هانا ... شنو بغيتي؟
هبة : بغيت واحد الحاجة هههه ... وعنداك تقلق عاوتاني
لاح يدو مور ضهرها باسها فعنقها وقال.
- شنو بغيتي ... وشنو اللي طلبتيه وماجبتوش ليك ؟
ضحكات وقالت معنقة ليه كتفو
- خفت تغوت عليا
ياسين : الشراب؟ ماكاينش ومغايكونش كما صبرتي شهر زيدي صبري
هبة : غير هاد المرة ... منعاودش نطلبو
تلفت معصب : غتشربي ... وتسكري .. وتنوضي تبكي ... وتجبدي لقديم والجديد ... ومن بعد تعواجي ... وتشربي قهوة وتقياي مسارنك .. وترجعي تسحاي كما جالسة قدامي دابا ... مااالك على هاد الدورة كااملة وهاد لعداب الشديد اللي كديري فراسك؟
هبة : واغير هاد المرة عفاااك ... راه شفتو فالتلاجة بقات فيه جغمة نوضات فيا العافية... ميدينيش النعاس دابا
ياسين : فييين ؟ فالتلاجة ؟
ناض مشا للكوزينة وبقات هي جالسةةكتسمع فيه كيهضر من تما معصب
- قلتهااا لفتيحة تلوحها نسااتها .. المرض تفووو
زدح باب التلاجة ورجع عندها قال
- بلا متسناي نجيبو ليك اهبة غير حيديه من راسك
ماشعراتش براسها حتى ناضت تعصبات عليه وبدات تغوت فوجهو .. بداو يديها كيترعدو بوحدهم ... ماعجبوش لحال وخرج من البيت زدح الباب .. جلسات مربعة يديها كتنفخ وصدرها كيطلع ويهبط .. شوية بانت ليها قرعة دالريحة ديالو وناضت عندها حلاتها وطرطقات ليها الراس وجلسات كتشرب فيها وتسوط ... شاف حسها تقطع ورجل دخل عليها لقاها كتشرب الريحة وكتبكي بوحدها ... نقز حيدها ليها من يديها كيهضر ويشوف فيها بحزن شديد
ياسين : صافي اري هادي ... انا غنجيبو ليك صافي
عنقها وحتى هيا عنقاتو وبدلت تبكي بحرقة وهوا كيسكتها ... هز ليها وجهها وقال
جرها عندو كيخزر وقال : سيري ولعبي وشطحي على بيدمن تسخني ... وفاش تخوا الدنيا شوية غنهبطك يالاه سيري
عيط على الاستادة وصاها عليها وهبط خلاها منها ليها .. حطات عليها الاستادة وخرجاتها منها . . . عرقاتها نييت وسخسخاتها مزيااان من دون لعيالات اللي كينقزو معاها ، وهي مكوزة مسرحة يديها لقدام ورجليها محلولين كتعصر سمعات الاستادة كتعيط ليها . تلفتات وقالت
- صافي سخت اختي ... واش كتحسبي ليا ؟
الاستادة : تكلمي
ناضت بزز كتنهج خرجات تعرض ليها بالضحك كيضحك عليها .. جرات الفوطة اللي على عنقو وقالت
- ناااري حكرت لايروبيك ماحسابش ليا صعييييب حتى هوا .. حساب ليا غير حركات وصافي
ياسين : باقي فيك مايهبط لتحت ؟
هبة : لالا حتى لشي نهار اخر .. عيييت جاني الجوع
ياسين : يالاه نهبطك لتحت راه خوات كاينين غير شي بنات
قالت كتمسح وجهها : واخا واخا .. بلاتي نرتاح
هبطات معاه للطبقة التانية لانو عندو دار كبيرة فيها 3 ديال الطبقات لاكن دارها نادي للرياضة كاملة من لفوق حتى لتحت وحتى من برا مبدل ليها الشكل تماما ومكتر ليها الزاج بزاف . نزلات معاه شادة فيه كتقاد شعرها لقات بزاف ديال ليماشين مستفين كل نوع فين محطوط والحيوط مدورين بالمرايات و القاعة مجهزة وقالت
- عندك لاصال زوينة اياسين انا حساب ليا فالاول غير صغيرة ولا كراج عادي ... زويينة مبهجة وكبيرة صرعتيها
ياسين : حط يدو على الالة وقال شي وحدين جبتهم من برا مالقيتهمش هنا
هبة : لالا زويينة وكبيرة
ياسين : يالاه طلعي
هبة : فين فهادي؟
ياسين : هادي ... ديري رجليك هنا ... وحطي راسك هنا وشدي فهادو
تشبحات على ضهرها كما قال ليها وقالت
- لاياش كتصلاح هادي
ياسين : الكرش والجناب ... اصعب منطقة فلكوغ هي لكرش
هبة : وماحشوماش عليك بديتي ليا بيها
ياسين :بابتسامة ) شووو ...
سمعاتو كيقرقب عند راسها ويقاد ليها التقل على قياسها
الضحكة المهجورة الجزء الثامن
محتوى القصة
التنقل بين الأجزاء