فتح جبل فمو باش يرد عليه لكن قاطعو صوت رقيق أنثوي كايعرفو حق المعرفة ... شعر بقلبو كايضرب بقوة لكن ماقدرش يضور ويشوف شكون بل كان متأكد أنها هي مكاينش من غيرها ... روعة الخطيب .
- أُولا سينيوريطا ...
قالتها روعة وهي كاتبتاسم فردت عليها الموضفة بإبتسامة عريضة :
- أولا ... اش حب لخاطر ؟
ماعرفش علاش حس جبل بالفرحة حيت سمع صوتها .. كان كلو شوق باغي يشوفها لكن خاف تشوفو وتعرفو وبالصدفة علا راسو وهو يلاحظ إنعكاس صورتها على المراية لي كانت ملسقة فالجدار ... إبتسم لا شعوريا وهو كايشوفها واقفا بقامتها لي كاتفتنو وشحال حمقاتو اللغة الإسبانية وهي خارجة من فمها ... كان شعرها أسود مازال ماصبغاتوش بالأحمر كان فاللون لي كايعشقو وكايحماق عليه ولابسة كسوة صيفية فاللون الأسود فوق ركبتها بشوية وبسميطات رقاق وفرجليها لابسا كونفيغس خفيفة .لاحظ الفرق بين أول مرة شافها فاليخت واليوم ... دابا كايشوفها فرحانة كاتبتاسم بعفوية .
- اااام ... بغيت هوت شوكليت بالكريمة ..اووو
سكتت شويا وكملت:
-سمحيلي واحد دقيقة .
جبدت التلفون من جيبها ودوزت رقم ثواني وقالت :
- عصام ... ماقلتيليش اشنو بغيتي؟ .
قلب جبل عينيه بغيظ فاش سمع إسم عصام إذن كيف توقع صداقتهوم حقيقية ... وعلاش غاتكون صداقة علاش ماتكونش حاجة اخرى مثلا !؟ ...
قاطع تفكيرو الموضف وهو كايقول :
- سيدي ماقلتيليش اشنو بغيتي طلب ؟.
تنحنح جبل بتوتر وهو كاينزل الكاسكيط على وجهو باش ماتشوفوش روعة ثم قال بصوت منخفض :
-احم بحال ... بحال داكشي لي طلبات هاديك لأنسة .
تمتم الموضف وقال وهو كايسجل فالحاسوب أمامو :
- اوكي .. هوت شوكليت بالكريمة .
ثم قطع الورقة ومدها ليه وقال :
-هذا هو الحساب ديالك اسيدي .
جبد جبل الكارط كيشي من بزطامو ومدها للموضف ثم قال :
- قطع حتى لحساب ديال ديك الأنسة .
قاطعو صوت روعة وهي كاتقول بإنفعال طفولي :
- عصام واش كاتفلا عليا .. واش نتا كالس فطوموبيل مرتاح ومبرد بلاكليم وزايدها كاتشرط .. صافي صافي قطع ، لي جبتو ليك غادي تشربو بسيف عليك وغادي نشربليك منو نص سمعتي نص غادي نشربو كامل .
قطعت الخط ورجعات تلفون لجيبها ثم كملت وهي كاتقول للموضفة :
شاف الموضف فجبل بإستهجان ثم شاف فروعة .. هو أصلا ماسمعش الطلب ديالها حيت كان دخل يجيب ليه طلبو ... لكن الزبون هذا وخصو ينفد أوامرو .. قرب من روعة وقال :
- سمحيلي اانسية شنو طلبتي عاد دابا ؟..
إبتسمت ليه روعة ودت بسرعة بلباقة :
- راني هضرت مع لبنت .
رد عليها الموضف وقال:
- لا راه حيتاش هاد سيد بغا يطلب نفس طلبك .
ماكرهش جبل يدخل فيه براس فديك اللحظة بسببو إنتبهت ليه روعة ... تمسك بالكاسكيط وزاد نزلو على وجهو باش ماتعرفوش وهو كايحس بالتوتر .. لكنه كان شايف من لمراية عيون روعة لي كانت كاتحاول تخترق وجهو بعينيها بأي طريقة باش تشوفو لكن كل محاولاتها فشلت فتنهدت بملل وقالت :
- كوكاكولا مجمدة مع كريمة مخفوقة ... و عصير التوت الأسود .
شعرت روعة بإحساس غريب تجاه الشخص لي واقف قبالتها .. ريحت برفانو كانت مؤلوفة .. كاتفكرها فيوم اليخت وكاتفكرها ... فجبل ... لكن اش غادي يجيب داك لبزناز لإيبيزا ! ، هو راه فجنوب أفريقيا دابا ...
قاطعت تفكيرها الموضفة وهي كاتحط قدامها الكؤوس البلاستيكية وقالت وهي كاتمد ليها ورقة ديال الحساب:
- حسابك خالص اأنسة
عقدت روعة حواجبها بإستغراب ثم قالت :
- شكون لي خلص حسابي ؟
نعتت الموضفة لجبل بيديها وقالت :
- هاد السيد .
ماكرهش جبل فديك اللحظة يعض ليها صبعها لي كاتشير بيه ليه ... قربت روعة منو وهو زاد نزل الكاسكيط لدرجة ولا غير نيفو وشفايفو ودقنو لي كانت فيه لحية كبيرة وكثيفة ... رفعت يديها وبصبعها نغزت كتفو وقالت :
- عفوا اسيدي ...
وكملت :
- شنو هي المناسبة لي خلاتك تدفع حسابي ؟
توتر جبل بالخصوص وهي كاتخاطبو شخصيا .. شعر بقلبو كايضرب بسرعة غير من ديك اللمسة الصغيرة .. لكن يكفي أن صبعها لمس بشرة جسمو المكشوفة بسبب التيشرت الرمادي لي كان لابس بنصف كم .
تنحنح جبل وغلض صوتو ثم قال وهو كايحس بالإستمتاع :
- لأن الأسود يليق بك .
تسمرت روعة كاتشوف فيه وكاتفكر الجملة لي قالها جبل فغرفة اليخت ... كانت كاتشوف فإبتسامتو الجانبية الجميلة تحت لحيتو البنية الكثيفة ... ماعرفتش علاش شعرت حتى هي بالإستمتاع وقررت تسايرو ... إبتسمت بهدوء وقالت بصوتها لي كايفتنو :
- ااام فقط لأن الأسود يليق بي !!؟... مع أن عيونك البخيلة ماكلفتش نفسها تشوف فيا ؟
كان جبل واقف بالجنب وكايشوف فيها فالمراية لي كانت قبالتو خلف الموضفين وحمقاتو إبتسامتها .. ولو هو راه شبع عويناتو بشوفتها هي لي مالاحظتش... فرد عليها وهو كايحاول مايبتاسمش لدرجة ضرس العقل يبان ليه بقوة فرحتو بشوفتها ؟
- عينيك فتنة وخلقت لهذا الأساس .. مانقدرش نشوف فيهوم .. فصدقيني لو شفت فيهوم مباشرة ماغاديش نبقا قادر نفرقهوم ...
بقات روعة مبتسمة وهي ماعارفا ماتقول ... ماعمرها طلاقات شي حد بهاد اللطافة لكن رجعت الحياة لإبتسامتها وبسرعة جبدت قلم من حقيبتها وكتبت على ورقة الحساب ثم حطتها حداه على الكونطوار وقالت بصوت لطيف :
- طيب يا سيد فتنة ... هذا رقمي ، إلا كنتي محتاج لفلوسك تاصل بيا وغادي نردهوم ليك فالحال ... لكن أطونسيون ماتجينيش حتى للخر ديال شهر راه كانكون مفلسة داكساع إلا طلاقيتك بحال والو نكريسيك .
ماقدرش جبل يصبر وطلق ضحكة برنة رجولية فاتنة وهو كايشد فالكاسكيط ديالو ... غير هاد الحركة وهاد الرنة خلات روعة تتسمر قدامها ماعرفت لا واش تخرج ولا تبقا وتهضر معاه شويا ؟ ... مد جبل يديه وخدا الورقة ودارها فجيبو وقال بصوت مبحوح فاتن :
مكانش عندها ماتقول من غير لإبتسام ، ودعاتو بلطافة ثم هزات لكأس ديال الكوكا كولا وبدات كاتشرب وخرجات وهي مرا مرا كاضور تشوف فجبل لي كان مازال حاضيها من المراية وكايبتاسم .. نساتو كاع المشاكل لي مر منهوم اليوم فالصبح مجرد رنة صوتها خلات كل يومو يتقلب وإحساسو يتبدل من معصب وغاضب لهادئ وسعيد .
- غير تسنايني الغزالة حتى نرجع ليك وغادي تكوني ملكي حتى لأخر عمرك وعمري .
تمتم بيها جبل وبقا كايشوف فدوك الكيسان بثلاثة لكن ختار الكوكا كولا لي شربتها هي وخلا لكيسان لخرين محطوطين وخرج تبعها .لكن تصدم فاش شاف عصام واقف متكي على سيارتو كايتسناها وتعصب فاش شافها عطات لعصام الكأس لي فيه الكوكا كولا وخدات هي التوت الأسود ... تعصب لدرجة لاح الكأس الكوكا من يديه وركب فسيارتو وهو كايلوم نفسو على هادشي لي كايحس بيه .
ضرب عجلة القيادة بيديه وتمتم بغضب :
- وانا مالي .. تشرب حتى السم !..
وكمل وهو كايشوف سيارة عصام خارجة من الباركينك:
- وانا علاش معصب تركب حتى مع عزرائيل .. أنا باغيها تولد ولدي وتمشي مع من مابغات ... أصلا مكايهمونيش علاقاتها ! .
نسا نفسو أنهم فقط قبل ثواني كان كايتوعدها تكون ملكو .... إنتبه لنفسو أخيرا وقال :
- أنا أصلا لاش جيت لهنا ؟! .. ااه باش ناكل !...
لكن شهيتو تسدات ومابقاش حاس بالجوع .. مجرد شوفتها عملت ليه إضطراب فالأمعاء ومشكل فالشهية وتسارع فدقات القلب وأنفاس متقطعة و تصبب العرق الا إرادي والعطش ...
خرج القرعة ديال الماء من الطبلون ديال سيارتو وقلبها على فمو كايشرب بنهم وكأنه عاش سنوات فالصحراء .. شرب وكأنه جمل كايخزن الماء لوقت الجفاف حتى بغا يتقياه ... سد القرعة وقال وهو كاينهش بتعب بقوة لي شرب وكايلمس فمعدتو لعامرا بالماء بألم :
- مَرض هاد لبنت .. مُضرة بالصحة كون بقات غير شويا كنت غادي ندخل فغيبوبة ... من لأحسن نمشي بحالي من هنا .
جبد الرقم ديالها من جيبو وبقا كايشوف فيه وبلاما يحس لقا راسو كايبتاسم من جديد لكن فاش تفكرها مع عصام إختفت إبتسامتو وتعصب ... كمش الورقة بيديه بغضب ثم حل زجاج السيارة ولاحها وكسيرا وزاد باش يبعد على هاد الكافيتيريا اللعينة لي جمعاتو بيها ... واللعنة هو راه مازال كايحس بصبعها كايلمس دراعو .
العودة إلى الواقع .↪↪
داز يوم طويل داك نهار إبتدء ملي فاقت روعة وخرجت تتمرن فحديقة الكونتيسا حتى لاحها جبل فالبحر باش تواجه خوفها من الغرق تليه الصور لي لتاقطوهم رجال باتريك ألباتينو حتى عطاهم لشاهين باشا قبل مايدخل إيزيك ويعاود ليهم على المهمة ديال قتل الصحفي جورج لانكاستر وزوجتو فريدة لي إنتهت بأنه ماقتلش الطفلة الصغيرة مايسي ..
وفالكونتيسا غفات روعة وسط حظن جبل ونعست بعد تعب السباحة حتى فاقت على صوت تلفونها وكان المتصل هو "مارتن" مديرها لي بزز عليها تجي تخدم فنادي الهوتيل ، لكنها كانت باغيا تحط إستقالتها فداك نهار فخرجات من الكونتيسا وتوجهات لمحطة الباص كاتنتاضر السائق لي غادي يسيفطولها مارتن بما أن سيارتها خاسرة ، حتى كايفاجأها أن السائق هو فالأصل " إيدوارد أليكزاندر"لي مكانتش عارفاه من أعضاء الكاريبي .. كان ناوي يختطفها لكن صخر وقف فطريقو ووضع قنبلة تحت سيارتو وهددو إلى مانزلهاش سالمة غادي يفجرو ..
وأثناء المكالمة كان إيدوارد أليكزاندر كايهدد فعائلة البارون وتما دخلها فيه شك ومارتاحت حتى نزلها ومشات كاتجري للداخل متوجهة عند مديرها باش تحط إستقالتها لكنها كاتفاجئ بأنه نصب عليها وزور توقيعها بعقد أخر فيه عشر سنوات ديال العمل والى بغات تلغيه خصها تحط فالمقابل مليون دولار فمكانش عندها شي حل أخر وهدداتو أنها تقتلو بالمسدس حتى قدرات تاخد توقيع على إستقالتها ...
〰〰〰〰〰〰〰〰〰
ڤيلة كونتيسا / إيبيزا
كان جبل وسط الحمام واقف قدام لمراية كايقاد فلحية دقنو بشفرة حادة ومعصصصب لواحد درجة كبيرة وكايفكر فالهضرة لي قالت ليه روعة على حبيبها المجهول ، لكن قاطع تفكيرو صوت تلفونو لي صونا ... حنا راسو وغسل وجهو بسرعة ثم نشفو ونشف يديه وخرج من الحمام .. هز تلفون وغير شاف فالنمرة كشر بملامحو وعقد حواجبو بغضب .
- اشنو بغا عاوتاني هذا !؟ .
تمتم بها جبل وهو كايبرك على أسنانو بغيظ ثم فتح الخط وقال بفضاضة بدون مقدمات :
- ياك لاباس ؟؟.
إبتسم الرجل على الخط الثاني بهدوء وقال :
- واش هاكا ناس كايجاوبو خوتهوم ... على الأقل حتارمني حيت كبر منك .
تنهد جبل في محاولة السيطرة على أعصابو ثم قال :
- "صَخر" باراكا من دخول ولخروج فالهضرة ... اش بغيتي ؟
إبتسم صخر بسخرية وقال :
- يعني هو واخا أنا كبر منك غير بـ 15 لدقيقة إلى أنني كانبقا خوك لكبير وأنا لي خرجت من بطن ليليا الأول عااد تبعتيني نتا ... يعني خصك تحتارمني وتقدرني .
قلب جبل عينيه بغضب وقال :
- الى ماقلتيش شنو بغيتي غادي نقطع الخط .
تنهد صخر وقال بتثاقل وهو جالس داخل سيارتو الفخمة:
- مابغاتش تزول منك هاد لعادة ... دائما متسرع... ولكن ماشي مشكل مانديش عليك اخويا صغير ..
وكأن جبل في مزاج يسمح ليه ياخد ويعطي فالهضرة معاه برك على أنفو بإصبعو وقال :
- غادي نقطع لخط بسلامة
حيد تلفون من على ودنيه لكن فاش سمع صخر كايهضر رجع تلفون لودنيه وهو كايتنهد بملل:
- بلاتي بلاتي ... كنت باغي نسولك على إميليا كلارك صاحبة الصوت الذهبي .. واش لباس عليها ؟؟
عقد جبل حواحبو بإستنكار .... علاش صخر منين كايعرف روعة ؟؟ ...
- اشنو كاتقصد !؟
زمجر بها بصوت غاضب خلا صخر يبتسم بإستمتاع ورد عليه :
- كنت كانضن بلي نتا إنسان ذكي ... قريتي الهندسة وتخرجتي تاجر مخدرات ثم ترقيتي وطلعتي كراد وقلبتيها ألماس وذهب ووليتي ميليارديير ... هادشي كلو كايدل انك انسان ذكي .. لكن طلعتي غبي فإختيار الناس لي ضايرين بيك اخويا لعزيز .
زادت توسعت إبتسامة صخر الوسيمة ... رمش بعيونو الزمردية المطابقة لعيون جبل ... كان وكأنه نسخة عليه مع بعض الإختلافات البسيطة فالملامح لكن الشبه بيناتهوم واضح ... فتح صخر زجاج سيارتو ونفث الرماد ديال سيجارتو المحروقة ثم سحب منها نفس ونفخ دخانها بإستمتاع وقال :
- قولي بعدا ختي صغيورة لباس عليها ؟؟
ضم جبل قبضة يديه بقلت صبر ثم زمجر بصوت شيطاني :
- ختك صغيرة إلى شافتك غادي تبزقلك فنص كمارتك ... جاوبني منين كاتعرف إميليا كلارك ؟؟.
قدر يلاحظ صخر غضب جبل لي ستحلاه ... قرر يلعب ليه على الأعصاب شويا بما أنه عارفو مزيان انسان عصبي وفلحظة غضب هو ممكن يقتل اي حد جاه فطريقو .. تكى براسو على المقعد وقال :
- ااااخ يبدو انك معمر ليها راسها بالحماقات ... لكن انا متأكد ان تاليا الى بغات تجي تعيش معايا غادي تكون سعيدة أكثر ... مؤخرا وليت كانشوفها حزينة بزاف ... اممم واش فخبارك ان تاليا كانت عندها علاقة مع الجاسوس هاري بلاك !؟ ... واش كاتسمي راسك إنسان مسؤول هاه ؟! ...ماقادرش تحضي حتى بنت صغيرة !!
مابقاش قادر جبل يصبر أكثر هز المزهرية لي كانت على الطبلة الزجاجية الصغيرة وضربها مع الحيط حتى تهرست ووقال بغضب:
- كانتمنا كون كنتي حدايا دابا ماكنش غادي نتردد وندخل فيك براس ... ينعل الدم لموسخ لي شاركينو يبدو ان لبارون الأعضم ماقصرش فتربيتك ... ورتي منو كل الوقاحة والسفالة والدنائة ..
إختفت إبتسامة صخر وزمجر بغضب :
- ونتا اش ورتي من راجل مك ... تسنطيح و لهضرا لخاويا !!
كان باغي يقتلو ... ولو كان صخر قدامو مكانش غادي يتردد يدفنو فأرضو لكن مع ذلك سيطر على نفسو ... شاف فساعة وكانت 8:00 مساء ثم قال بصوت غليظ :
- فين راك .. ؟
رفع صخر حاجب واحد بإستنكار وقال :
- علاش كاتسول ؟!
رد عليه جبل بغضب :
- هادي مدة طويلة باش ماطلاقينا... ماكرهتش نشوفك و ندخل يدي فنص وجهك اخويا لعزيز كايبانلي توحشتي لعصا من يدي .
ضحك صخر وقال بسخرية :
- اوووه حمستيني ... عرفتي شحال توحشت شي مبارة قتالية معاك ... غادي تلقاني كانتسناك قبالت هوتيل سود إيبيزا سويتس لي خدامة فيه الحارسة الشخصية ديال تاليا .
توسعو عيون جبل بصدمة وقال :
- اشنو كادير تما ...!؟
رد عليه صخر بطريقة مستفزة:
- ااام بما انني رجل ... فاعندي بعض الرغبات ... وبانتلي واحد المغنية اسمها إميليا كلارك داخلا للهوتيل قبيلة شويا ومانكدبش عليك عجبتني عندها صوت خطير وجسم اووووه ياسلام ولا شعرها الأحمر مثيرة بكل المقاييس ...
ضرب جبل يديه مع الحيط بقوة ثم قال بغضب
- الى ماسديتيش فمك غادي نقتلك .
داكشي لي كان باغيه صخر وصل ليه ومن خلال ردود جبل تأكد بلي خوه مغروم بالمغنية الفاتنة ولكنو شافها مع إيدوارد أليكزاندر وكان واجب عليه يحذرو ...
- محتاج نستمتع اليوم ... غادي ندير لي فجهدي باش نتقرب من ديك زوينة على الله ترضى وتخليني ناكل شويا ديال السكاكر من جسمها ... اااه وشحال مثيرة شفت غير رجليها وحماقيت على هاد لقبل لباقي كيف غادي يكون .
غوت جبل بصوت شيطاني وقال وهو كايلهت من شدة الغضب :
تسناه يجاوب لكن لارد حيد التلفون على ودنيه ولقى الخط مقطوع ... ضحك صخر بإستمتاع ثم فتح باب سيارتو وخرج قبل مايسحب نفس كبير من سيجارتو ورماها للأرض وهو ينفث الدخان في الهواء ...
- خلينا نستمتعو شويا .
همس بها بمكر ثم سد باب السيارة وتكى عليها وهو مستمتع وكايتسنا غير فقتاش غادي يشوف جبل من جديد.
〰〰〰〰〰〰〰〰
لتخ جبل باب غرفة روعة فاش قلب عليها ومالقاهاش .. كان غادي يطرطق بالفقصة براكين الغضب كاتغلي داخل قلبو ... واش ديك الحمقة الغبية باغيا طرطق ليه شي عرق فدماغو عاد باش ترتاح .. كاتعرف دير غير لكوارث مامنها حتى شي حاجة مفيدة ... كون كانت قبالتو فهاد اللحظة كان ماغاديش يتردد يعطيها ضربة حتى تنسى شنو سميتها ولكن عندها زهر .
نزل كايجري للطابق لي تحت الأرض ولكن فطريقو لقى عصام .
- معليييم واش نتا بيخير ؟؟!.
وقف جبل وشاف فيه بنظرة غضب لكن فاش تفكر روعة وهي معنقاه وكاتقول ليه نتا هو سندي شعر بالكره والحقد ناحيتو وأكيد ماغاديش يخليه يستغل فرصة بحال هادي باش يبان حداها البطل المغوار لي باغي يحميها من الكاريبي ... روعة هي حبيبتو هو ... وهو لي من المفروض يحميها من أي شئ ... علاش باش حسن منو عصام باش تفضلو عليه هو .. قرب جبل من عصام وقال وهو كايبرك على أسنانو :
- غادي نعطيك نصيحة دخلها فراسك مزيان ... إلى عاودت شفتك كاتقرب من روعة ... غادي نهي حياتك بيدي ..
عقد عصام حواجبو بإستنكار وقال :
- أشنو كاتقول معليييم ؟
قرب منو جبل بغضب ودفعو للحيط بقوة ثم شنق عليه وقال وهو كايشوف فيه بنظرات شيطانية مخيفة لدرجة حتى عروق جبينو برزت وهو كايقول بغضب :
- كيف سمعتي ... روعة ... ديك البنت ملكي أنا بوحدي وأي واحد غادي يقرب منها غادي نقتلو .... كن حذر من تصرفاتك معاها الى بغيتيني نحافض على حياتك . وهذا أول وأخر تحذير مني ليك وإلا أقسم برب الكعبة غادي نسا انك فيوم من الأيام كنتي صاحبي ... غادي نتلدد فتعديبك قبل مانقتلك بيدي ... أنا كانبغي ديك البنت ... أنا مجنون بحبها .. أنا مهوس بيها ... وحتى شي واحد مايقدر يبغيها كيفي ... وإلى فكرتي أنك تحرق قلبي عليها غادي نصفيك نتا وكل شخص كايعرفك أعصام ... كن حذر مني أعصام ... كن حذر
بقا عصام مسمر فبلاصتو وكايشوف فيه ... جبل من ديما كان صديقو قبل مايكون البوس ديالو وروعة حتى هي صديقتو والمشاعر لي كايحس بيهوم تجاهها ماشي ديال اللعب ولا التهديد .
بقا مراقب جبل بعينيه حتى دخل لمكتبو وزدح لباب بقوة وتنهد بغضب ... بينما جبل توجه لخزنة مكتبو الصغيرة وحلها بالبصمة ديال يديه وجبد منها ربعة ديال ربطات ديال لفلوس ودارهوم فجيبو وهز مسدسو وضعو خلف ضهرو ثم سد الخزنة بغضب وخرج بسرعة وهو كايتمتم بغيظ:
- غادي نوريك اروعة معنى التهور على حقو وطريقو ... غادي نوريك كيفاش تخرجي فداك الوقت بوحدك وبلا حماية باش تمشي تشطحي وتغني فالبار الحمارة ... غير بلاتي على طاسيلتك .
خرج كايجري من المكتب ونزل نيشان بلاسانسور لمرأب السيارات وركب فأول وحدا بانت ليه قبالتو وإنطلق بسرعة وهو كايحس بالغضب كاياكل فعروقو ...صخر هذاك النذل تجرأ وحط عينيه على لبنت لي كايبغيها ... غادي يقتلو ... غادي يخنقو بيديه حتى يخرج روحو ويسيفطها للسماء ..
〰〰〰〰〰〰〰〰〰
هوتيل سود إيبيزا سويتس / الساعة 08:27 دقيقة مساء
رمش صخر بعيونه الزمردية وهو معلي راسو للسماء و كايشوف فالهلال فوق مبنى الهوتيل لي كان متوسط السماء وضاير بالنجوم الكرستالية ... لطالما كان كايأمن بأن نجوم السماء عندها قدرة تغير مزاج الواحد .. وشحال من واحد فينا كان صدرو ضيق بالهموم ومع أول لفحة من نسيم الليل وأول نظرة للسماء كايتنهد لا شعوريا ويغلق عينيه متأملا ضلمة الليل ونجومه .
كان صخر متكي على سيارتو ومربع يديه لصدرو كايتسنا جبل وهو كايتفكر شكل روعة وهي كالسة فالمحطة وحركات رجليها وبلاما يحس لقى نفسو كايبتاسم بهدوء ...
ومابعيدش بزاف كانت سيارة أسد مالك الفيراري واقفة قبالة سيارة صخر .
- فاش نقولك ان جبل كايبغي ديك المغنية ماتبقايش تعارضيني !؟.
قالها أسد وتأفف بملل فشافت فيه نورسين وقالت وهي كاتفوه بالنعاس .
- كانضن ان الصح معاك هاد لمرة احبيبي ... من قبيلة وجبل واقف تما بلا مايمل .. انا جاني نعاس وهو ماعياش بالوقوف .
رمى أسد عقب سيجارتو المحروقة ثم طلع الزاج وتنهد وهو كايبتاسم بهدوء ...شاف فنورسين بنظرات مغرومة ثم مد يديه وتمسك بيديها الصغيرة و طبع قبلة صغيرة على ضهرها وهمس:
ثم مد يديه وجدب لعندو نورسين ، تحسس خدها بأصابعو وكانت انفاسو الساخنة ترتطم بشفايفها قبل مايوضع شفايفو على خاصتها بقبلات متقطعة وبين كل قبلة وقبلة كان يهمس بحبها حتى إستغرقو فقبلة عميقة قاطعتها مرور سيارة جبل من أمامهوم فبعدت نورسين على أسد وشهقت بصدمة
علا أسد راسو بسرعة وقال :
- مالك ياك لباس ؟؟
كانت نورسين حالة فمها ومصدومة لدرجة ماقدراتش تنطق بحتى كلمة فضار أسد براسو باش يشوف فالمكان لي كاتشوف فيه وتصدم حتى هو من المنظر لي شاف وقال بدون شعور .
- جبل .. وجبل .. كيفاش ؟؟
نزل جبل من سيارتو بجسمو الضخم وتقدم وهو كايتمايل بعضلاتو المفتولة كان لابس سروال اسود ومعطف أسود وكذالك صخر لابس كلشي فاللون لأسود وتقريبا دايرين نفس تسريحة الشعر كانو وكأنهم فولة وتقصمت على نصفين... إعتدل صخر فوقفتو وفتح يديه وقال بسخرية وهو كايشوف فجبل نزل من سيارتو وجاي مدرم لعندو
- ياأهلين بأخي لصغير .
لكن جبل هجم عليه وهو كايغوت بغضب :
- بدي حط إيدي عَ خوانيقك ياكلب .
وغير وصل عندو دخل فيه براس حتى تراجع صخر للخلف وتضرب ضهرو مع سيارتو وبدا الدم كايسيل من أنفو ...
شهقت نورسين داخل السيارة وقالت بهتاف :
- اللعنة ... جبل منو جوج ... جبل كايضرب جبل ... ياربي شنو هادشي ؟.
حرك أسد راسو بالنفي ثم قال :
- إذن طول هاد الفترة وحنا مراقبين ... بلاتي ... واش كنا مراقبين جبل ولا توأم ولا شبيه جبل ... مابقيت فاهم والو !!.
شافت نروسين فأسد ثم شافت فجبل وصخر وقالت:
- دابا بلاتي .. شكون فيهوم جبل ؟ ... عندهوم نفس النضرة ونفس الطول ونفس الصحة ونفس لون الشعر والعينين وحتى أصواتهوم متقاربة !!.
حلت نورسين باب السيارة باش تخرج لكن أسد جرها وسد الباب وهو كايقول بغضب :
- فين غاديا مدرما ... خلينا بعدا نفهمو شنو واقع .
فالمقابل ديالهوم قبل مايلحق صخير يدير شي ردة فعل جرو جبل وشنق عليه ثم جمع معاه بضربة لوجهو وعاود ليه ضربة ثانية وثالثة ورابعة حتى طاح صخر على الأرض بألم وغوت جبل بغضب.
سند صخر يدو مع الأرض ثم مد يديه ومسح فمو من الدم وبدا كايضحك بسخرية ... تفكر جبل ديك الهضرة لي قالها صخر على حبيبتو ، حس بالدم كايتقلى فعروقو ... نزل عندو شنق عليه ونوضو بسيف عليه وزمجر بغضب .
- فكرني أشنو قلتي قبيلة ؟... بغيتي تقرب منها ياك !.
- وقلت ليك غير شفت رجليها وحماقيت على هاد القبل لباقي كيف غادي يكون ؟؟..
رجع صخر راسو للخلف وضرب جبل براسو بقوة حتى رجع للخلف وهو شاد فوجهو ...كان صخر كايحس بالألم فكامل جسمو لكن رغبتو فقتل جبل كانت كبيرة فوق قدرتو ، مشى تكى على سيارتو كايتنفس بقوة وألم وهو شاد فوجهو ... لكن جبل مابرداتلوش كان كايبان ليه صخر وكأنه عدو اللعين ، إستفزو بزاف وتطاول علي البنت لي كايبغيها ولي مايقدرش يستحمل أن بعوضة تقيسها عاد إلا كان أكبر أعدائو ...
مشا جبل عند صخر هاجم عليه لكن الضربة لي كان باغي يسددها فوجه خوه بردها فالسيارة لي كانت موراه ثم بعد عليه وهو كايتنفس بقوة وكايلهت .
تصدم صخر من ردة فعلو لأخيرة والطريقة لي ضرب بيها السيارة بيديه ،... لو كان هو فمكانو مكانش غادي يسدد دوك الضربات فالسيارة كان مكانهوم غادي يكونو فنص وجهو ...
جبد صخر كلينكس من حيبو ثم بدا كايمسح فالدم لي كان فنيفو وففمو وهو كايشوف فجبل بنظرات حقد قاتلة وقال :
- كاضرب خوك على قبل مغنية أجبل !.
شاف فيه جبل وقرب منو ثم قال بصوت شيطاني غاضب :
- هاديك ماشي مغنية ... هاديك ..
كان باغي يقول ليه هاديك حبيبتي والبنت لي كانبغي ولي مقرر نكمل معاها حياتي .. هي لي ختارها قلبي وعقلي ، لكن تردد وقال بغيظ :
- هاديك الحارسة الشخصية ديالي .
بقا صخر كايشوف فيه وهو كايتفكر اللحظة لي ركبت فيها فسيارة إيدوارد أليكزاندر ، ثم ضحك بسخرية وقال :
- هه ... حارستك الشخصية اشنو كانت كادير مع إيدوارد أليكزاندر !؟
توقف الزمن عند جبل وهو كايسمع تردد داك الإسم الكريه من فم صخر ثواني علاما إستوعب الأمر وتسائل بصدمة :
- كيفاش ؟
حس صخر باللذة وهو كايشوف نظرات الإستهجان على ملامح جبل وحسب الصور لي سيفطهوم ليه باتريك ألباتينو هاد صبح إستنتج أن خوه غارق فالحب والغرام مع ديك المغنية الفاتنة وإلا شنو كايعني أنه كان معاها وسط البحر وهازها من الفوق وباس ليها راسها وهي حاطا راسها على صدرو ومرتاحة .... عدل صخر حوايجو وقال بإستهزاء وهو كايشوف فخوه:
- يبدو أن حارستك الشخصية عندها بزاف ديال المعجبين من إيزيك حتى لإيدوارد أليكزاندر اخويا لعزيز ...
ثم كمل بفضاضة :
- شفتها قبيلة وهي راكبة مع إيدوارد فسيارتو وكانت كاتبان ليا مستمتعة معاه .
تسمر جبل كايشوف فصخر بغير تصديق .. روعة وإيدوار !.. كيفاش ؟! ... اشمن علاقة عند روعة مع داك المجرم ؟.. اشنو لي واقع بالضبط ؟... حسب الهضرة لي قالها ليه صخر فتلفون انه شافها وهي داخلا للهوتيل .. ولو كانت فعلا مع إيدوارد كان غادي يخطفها ويستخرج منها مكان السي دي ومن بعد يعذبها ويقتلها ... لا بلاتي إلا كانت الهضرة ديال صخر بصح واش هذا كايعني ان روعة متعاونا مع الكاريبي ... عنداك تكون جاسوسة زرعوها وسط حياتو .
غمض جبل عينيه بقلة حيلة من الوساوس ثم مرر يديه على خصلات شعرو البنية وتمتم بصوت منخفض:
- اشنو هاديشي لي كاديري فيه اروعة ... واش باغيا تقتليني !؟ .
لكن قاطعو صخر وهو كايقول بتعالي وتفاخر :
- اليوم كان من المفروض إيميليا تكون عندهوم ... لكن خوك لكبير ، سوبر فنتاستيك ، البطل الخارق أنقدها ..
توسعو عيون جبل بصدمة ... نفى كاع دوك النظريات واستوعب ان إيدوارد كان غادي يخطف روعة شاف فيه بنظرات قاتلة وكمل صخر بإستهزاء وهو كايضحك :
- هاهاها واش من نيتك اصاحبي.! ديك البنت حارستك الشخصية !... يبدو انك نتا لي خصك تكون الحارسها الشخصي .
سكت شويا وفكر يستفزو شويا ويختبر قلب أخوه وحبو لديك البنت زوينة فكمل بصوت جاد متصنع وقال :
- إلى ماكنتيش قادر تحميها أنا نقدر نقدم هاد الخدمة لخويا صغير ... مستعد نحميها بروحي إلا بغيتي .
تراقصت الشياطين قدام حبل ... ولا كايشوف صخر بحال شي فريسة باغي يقطع لحمها بسنانو ... قرب منو بخطوات تقيلة وقال تحت أنفاسو بغضب :
-عاود شنو قولتي !! .
- بما أننا توأم لعين فحنا تقريبا كانتشاكو بعض لأحاسيس. فاش كاتمرض واللعنة حتى أنا كانمرض وفاش كاتعصب كيف لحمار كانتعصب حتى أنا ... ومؤخرا وليت كانحس بواحد شعور غريب ... بحال الإعجاب ولا لحب وماكنتش عارف شنو هو السبب وبالصدفة واحد نهار كنت دايز من حدا لكونتيسا وهي تبان ليا أيميليا خارجا مع تاليا ...
كان جبل مسمر قبالت خوه كايسمع ليه وهو كايحاول يتماسك باش مايقتلوش .. لكنو كان محتاج يسمع باقي الهضرة باش يعرف نية صخر وغايتو ..فكمل صخر وهو كايقول بصوت هادئ وهدأت ملامحو المستهزئة وولا كايتكلم بجدية
-فديك اللحظة حسيت بقلبي كايضرب بواحد السرعة خيالية .. تصور اخويا ماعمري حسيت بهاد لإحساس ولا نجادبت لشي بنت بحال لي نجادبت لحارستك الشخصية ...
إبتسم بهدوء وكمل :
-وليت مدمن على صوتها وكنت ديما كانجي للنادي لي كاتخدم فيه غير باش نتفرج فيها وانا مخبي باش ماتشوفنيش ويحسابها انا هو نتا ... كنت محتاج نقدم ليها نفسي بطريقة زوينة بشخصية صخر ماشي جبل .
قدر جبل يفهم غاية صخر من هاد الهضرة ، لكن كيف قال هوما راهوم توأم وكايفهمو بعضهوم بسرعة البرق ، باغي يستفزو باش يعرف مشاعرو الحقيقية تجاه روعة باش يستغلهوم ضدو بما أنها هي حبيبتو ونقطة ضعفو ... حاول جبل يتمسك بأخر درجة من درجات صبرو ورسم إبتسامة مزيفة صفراء على وجهو وقال :
- اوووه ... مكانش كايحسابلي راك عاطفي حتى لهاد الدرجة ... وعلاش كاتوصفلي شعورك نقدر نعرف ؟؟ هه وليتي كاتبان ليا بحال شي بنيتا مراهقة اول مرا غادي تحب .
أومأ صخر برأسو فاش فشلت المحاولة الأولى لكن مازال فيديه الجوكر الكبير ... دار يديه فجيابو بشموخ وقال :
-أنا عارف القصة ديال ديك البنت المسكينة وعارف حتى سبب دخولها لديك الڤيلة وعلى قبل شكون هي مشات لعند هاري ...
إختفت إبتسامة جبل وعقد حواجبو بإستنكار ثم قال:
-أشنو كاتخربق !؟.
صخر مستحيل يكون عارف شي حاجة على روعة قدو هو .. روعة هي ديالو بوحد ومعلوماتها هو بوحدو لي متكتم عليهوم حتى وأسد ونورسين مافخبارهومش ان روعة حضرت للحفل فڤيلة الكاريبي ورافاييل كون ماقالهالوش هو مكانش غادي يعرف ... قاطع تفكيرو صخر وهو كايقول :
-أنا مكانخربقش ... على قبل ديك البرهوشة ديال ختك هي مشات لديك الڤيلة..
هاد المعلومة كون ماسمعهاش جبل غير بالصدفة من فم تاليا ختو مكانش غادي يعرفها وروعة مستحيل كانت غادي تقوليه الحقيقة خوفا على تاليا وهو قدر الموقف وماضغطش عليها فهاد الأمر ... إذن هاد النكرة لي كايحاول يحشر أنفو فأمور حبيبتو فين باغي يوصل بالضبط ؟؟ قاطع أفكارو صخر وهو كايقول :
- أنا مراقب الخط ديال تاليا ملي شرات أول تلفون فحياتها لدابا ... باش تعرفني إنسان مسؤول واخا ماعايشاش معايا ديك البرهوشة ولكن حاضيها وحاضي فعايلها الصبيانية...
قرب صخر عند جبل وكمل بصوت جاد :
-ختك .... ديك البرهوشة كانت عندها علاقة مع داك السافل ديال هاري لي ثقتي فيه ... هذا علاش فاش كانقول ليك انك انسان غير مسؤول فأنا كانعنيها ديال بصح ...
سكت شويا وكمل :
- كايبان لي راك مستوعب حجم الخطر لي داك البنت فيه اخويا لعزيز ومع ذلك اليوم خليتيها تخرج بوحدها فداك الوقت .
بلاتي صخر كيفاش حتى شاف روعة وهي خارجا !؟.. ومن الأصل صخر علاش كايدافع على روعة بديك الطريقة وكأنها شئ مهم فحياتو ؟ لايكون الهضرة لي قالها بصح وماشي غير محاولة من محاولاتو الفاشلة فإستفزازو .. لايكون صخر بصح معجب بروعة ... فين باغي يوصل هاد بنادم بهاد لفعايل ؟ ... ملي كان صغير وهو شخص إنتهازي وماتغير فيه والو واخا كبر . لكن قاطع افكارو صخر فاش لاحظ علامات الإستفهام على ملامح جبل وقال :
- كنت مراقبها هي وتاليا من أول يوم حطيتو رجليكوم فإيبيزا ... إيميليا فديك الفترة كانت كاتبان محطمة وعندها بزاف ديال المشاكل وكنت كانضن أنها ضعيفة وماتصلاحش تكون حارسة شخصية لختي هذا علاش كنت مراقبهوم بجوج فالفترة لي كان جدي عندو خلاف مع واحد العصابة ... كنت خايف عليهوم بجوج وداك تافه ديال دون ماركيز لي معتامد عليه واخا قلت ليه لي كاين ماهتمش ...
سكت شويا وكمل بجدية :
- كان بإمكاني نكلف شي حد اخر بحمايتهم لكن صدقني رجعات عندي مراقبة إميليا هواية مسلية وزوينة ، حتى لنهار لي رحعتي نتا لإبيزا وكنت كانظن أنك قادر تحمي ديك البنت وختك ومابقيتش كانراقبهوم حتى وصلني خبر اليوم فلعشية أن الكلب شاهين عطا أوامرو للسافل إيدوارد باش يجيب ليه إيميليا ... قلت مكاين لاش نخاف عليها وهي معاك وعايشا فوسط دارك لكن قلبي ماهنانيش وبقيت مشطون عليها هذا علاش من لـ 5 ديال لعشية وأنا واقف برا لكونتيسا حتى دارت 7 وإليك أن تتخيل ... إيميليا كلارك خارجا من فيلة كونتيسا بلا حراسة وغاديا على رجليها وفين هو سي جبل الله أعلم ...
مابقاش جبل قادر يصبر مازال ولا يتحمل طريقة كلام صخر على حبيبتو .. ضم قبضة يديه حتى بياضت وبرزت عروقو وهو كايشوف فيه بشر لكن صخر كمل كلامو بكل سلاسة وهو كايقول :
- كنت عارف أن ديك البرهوشة ديال ختك ماغاتهنا حتى دير شي كارتة تغرقنا كاملين ... ومامشات حتى دارتها وللأسف مشات فيها إيميليا وهي كحزت لور وكأنها مادايرا والو ... ديك البرهوشة المراهقة وصلات لهاد المرحلة بسبب إهمالك ومازال غاتشوف الكوارث من موراها ... بلحق مانستغربش هي وارثة الدم لموسخ ديال باها معروف بالغدر والخيانة .
بلغ السيل الزُبى بأعصاب جبل فإنقض عليه وشنق على ياقة معطفو وغوت بغضل :
- ســد فمــــــــك
لسق صخر جبهتو مع جبهت جبل وكأنه كايتحداه كان منظرهوم بحال شي جوج ثيران هايجين وغوت حتى صخر وقال بغضب :
- علاش كذبت !! هاااه ... قول واش كذبت !! بسبب شكون ليليا ماتت !؟ ... بسبب شكون أنا تربيت بدون أم !؟ .. ولا لاتكون نفاعلتي حيت هضرت على إيميليا وبينت ليك عيوبك .
اش كان باغيه يقول جبل كان منفعل عليهوم بجوج على سيرت حبيبتو وعلى إهاناتو أب تاليا لي كبر معاه ، مابقاش جبل قادر يصبر ودفعو بقوة حتى إرتطم ظهر صخر من السيارة وجمع معاه بضربة لوجهو لكن صبر صخر نفد وبدا كايرد ليه الضربات ... كانت ضربة فيه وضربة فجبل بالتناوب حتى عيا صخر وتكى على سيارتو بتعب لكن جبل كان مازال باغي يفش فيه غضبو بسبب كل كلمة قالها على روعة لكن واحد لجانب منو كان مامصدقش كلامو هو حاس ان صخر غير باغي يستافزو كيف العادة هذا علاش شد فسيرة روعة ومابدلهاش ... تمايل جبل بتعب ثم قال وهو كايهدد صخر بإصبعو السبابة :
- غادي نحذرك وعتابر كلامي تهديد ... الماضي ولا ماضي بالنسبة ليا ... كل لي كايهمني حاليا هو الحاضر والمستقبل . وحاضري ومستقبلي مكاينش فيهوم شخص إسمو صخر هذا علاش لو عرفت مرة أخرى أنك كاتحاول تحشر أنفك فحياتي وفعائلتي وفناس لي كانبغي غادي نسا انك كونتي خويا فواحد نهار وكانقسم ليك غادي نقتلك ...
- غير عرف كيف دير تحضي ختك بعدا عاد هضر لكن إميليا مايمكنش ليك تمنعني من مراقبتها حيت لاهي من عائلتك ولا من ناس لي كاتبغي على حد ما فهمت من كلامك.
لا صخر دابا باغي يموت على يديه ... قرب منو جبل بغضب وشنق عليه وزمجر وهو كايشوف ليه فعينيه :
- إميليا مرتي أصخر ... مزوج بيها فالسر وإلا فكرتي تقرب منها ولا تأديها بسبب كرهك ليا ... أنا كانقسم ليك أنني غادي نلوحك فزنقا بحال لكلب وماتنساش أن الثروة ديال جدك كلها فيدي وجدك مابقاليه والو ويقبر .. عرف راسك دابا شكادير وخدم عقلك شويا .
تراجع جبل للخلف وتوجه للهوتيل لعند روعة باش يخرجها من تم ، مخلي موراه صخر مصدوم وماقادرش يصدق الشئ لي سمعو من جبل .. لكن هادشي مستحيل ... مستحيل تكون إميليا مرت جبل اكيد غير كايكدب باش يخليه يبعد عليها .
قاطع تفكيرو صوت تلفونو وهو كايصوني فبسرعة فتح الخط وقال :
- باتريك ألباتينو .... كاين شي أخبار جديدة ؟؟
واش زعما يكون جبل غير كايكدب على صخر ولا فعلا جبل تزوج روعة فالسر .. اشنو كايوقاع لهاد المجانين بالضبط ؟؟؟؟
البارون الأعظم الجزء 42 عينيكـ فتنة
محتوى القصة
التنقل بين الأجزاء