- كايبان ليا بلي نتا عارف كتر مني ... إسم بهجت حتى شي واحد مكايعرفو من غير العائلة والمقربين إذن شكون فيهم نتا .. اسي أسد مالك ؟.
تسمر أسد قبالت جبل وماعرفش مايقول... خاف إلا هضر يكون جبل مافخباروش بحقيقة جدو ويخلق مشكل كبير بين جبل وبهجت .. لكن النظرة لي كان داير فيه جبل كانت نظرة اصرار وفضول قاتل .. تنحنح أسد بثبات وقال :
- احم ... واش نسيتي انني وليت خدام مع المخابرات ! يعني معلومة بحال هادي ماغاديش تخفى علينا .
ضيق جبل عينيه فأسد بنظرة تشكيك ... قال :
- عليكم !!... كاتقصد بيها المنظمة اولا كذبت !؟.
تنهد أسد بقلة حيلة ثم جبد سيجارة من جيبو وشعلها وهو كايفكر مع راسو ... علاش غايخبع حاجة هو ممكن يكون عارفها غير باغي يجبد ليه لسانو .. نفث دخان السيجارة من فمو وقال بسخرية :
-زعما نتا ماعارفش بلي جدك واحد من الأسياد !!
توسعو عيون جبل بصدمة .. وقال :
- كاتقصد .... المنظمة لي كنتي خدام لصالحها ... جدي واحد من أسيادها !! .
غمض أسد عينيه بقلة حيلة وحس براسو تسرع فاش هضر .. إذن طلع جبل ماعارف والو ... مرر اسد يديه حول خصلات شعرو القصير وقال :
- ماعرفتش كيفاش حتى جبدتيلي لساني ولكن دابا ملي عرفتي الحقيقة خليني نقولك بلي جدك هو مؤسس المنظمة لي فنيت فيها عمري وشبابي .
مكانش قادر جبل يصدق الشئ لي سمع من أسد .. يعني المنظمة لي كان كايسمع عليها شحال هادي ولي كانت السبب فإفلاس شحال ديال الشركات ولي قتلات شحال من ريوس كبار من سياسين وأغنياء ومجرمين مؤسسها هو جدو "البارون الأعضم" .. اذن هذا علاش اسم البارون كايزرع الرعب فالناس !!.. مكانش عارف ان هاد اللقب وراءه شخصية عضيمة بهاد النفود وهو ماهو إلا نجل صاحب هاذ اللقب ومع ذالك واخد حصتو من الهيبة بين الناس .
فالسنوات الماضية فاش نزل جبل للساحة العمل تعرف بلقب البارون ديال جدو .. وكان كايستغرب فبعض الإجتماعات او المناسبات فاش كان كايوقف امام شخصية قوية وعندها نفود ، غير كايعرف الشخص اسمو ولقبو كايولي حداه يترعد ويدخل ويخرج فالهضرة وكايولي يسمع ويطيع ...
إستغرب انه اخر من يعلم بهاد المعلومة .. لكن جبل ماعاش مع جدو سنوات طويلة باش يقدر يعرف .. ممكن صخر يكون فخبارون هذا علاش كايتعنا بيه بزاف ... ولكن بلاتي ... أسد واش مازال عميل فالمنظمة ولا فعلا وضع إستقالتو كيف كايقول ... شاف جبل فأسد بنظرة عادية جدا لكن متصنعة للثبات ثم قال :
- جيب شي حاجة جديدة .. هاد لمعلومة عارفها وقديمة..
كذب جبل وتصنع انه عارف ... أولا مارضاش انه يكون اخر من يعلم لأن هذا غادي يقلل من شئنو فعين أسد مالك ويقلل من هيبتو وثانيا باش يزيد يسل ليه لسانو .
شاف فيه أسد بإستنكار وقال :
- اذن علاش بغيتيني نتوسط ليك عند لأسياد ونتا هو وريث المنظمة !!.. يعني راه نتا لي فيديك المدفع .
رد عليه جبل بسرعة بديهية باش مايعطيهش فرصة يشك فيه وقال :
- حيت انا عندي بعض الخلافات مع جدي ... وبما انك نتا عضو معاهم بغيتك تشوف ليا شي واحد من لأسياد من غير جدي يدعمني بالعتاد والرجال .
ترقب جبل رد أسد أو أي تعبير يثبت أنه مازال مع المنظمة وماحطش استقالتو كيف كايداعي لكن تعابير أسد كانت جامدة وكأنه فهم أن جبل باغي غير يجبد منو الهضرة ..رمى السيجارة على الأرض ودعس على العقب بصباطو وعلا راسو بشموخ وشاف فجبل بنظرة خطيرة .
لولهة تخيل جبل ان لي واقف معاه ماشي اسد مالك لي تعرف عليه يوم عرسو .. رجل قليل الكلام غالب عليه الغموض ومحاوطو من كل جيه لكنه كان كايبان شخص مسالم ونادم على ماضيه السئ ... لو طلاقاه بصدفة فشارع يحلف انه مايقدرش يقتل حتى نملة سارحة فالأرض ... لكن النظرة لي دار فيه دابا .. ديال مجرم قتال قاطع يدو من الرحمة وكأنه تسيف ورجع أسد أخر اسم على مسمى ...
مد أسد يديه باش يصافح جبل من جديد وقال :
- معاك واحد من الأسياد شخصيا اسي جبل .
تصدم جبل وبقا كايشوف فيه وماعرفش شنو يدير واش يمد يديه يسلم عليه .. ولا يفرح ان واحد من الاسياد واقف حداه ... ولا يشك فمصداقية المخابرات لي كاتحارب جميع المنظمات الغير قانونية بأي شكل من الأشكال وهاهو واحد من الاسياد داخل بيناتهم لسلك المخابرات ... تشوش جبل ومابقاش فاهم لكن قاطعهم صوت نورسين لي قالت وهي كاتقرب منهم :
- سلام .. ياكما قاطعت حديثكم ؟..
جمع أسد يديه بسرعة ورسم إبتسامة عريضة قبل مايضور عند نورسين بتثاقل ...جرها من يديها لعندو وطبع قبلة على خدها بلطافة ثم همس بصوت رجولي لطيف .
- حياتي .. من فقتاش ونتي هنا ؟.
إستغرب جبل من نبرة صوت أسد لي تبدلات للطافة ولا نظرتو لي تقلبات °160 درجة ... قبل 10 دقائق فقط كانت ضايرا عليه هالة شيطانية خطيرة اما دابا تحول بين يديها لشبل وديع وهو كايشوف فنورسين بنظرات كلها حب
- الضربة لي دار ليه سي جبل .. الحمد لله ملي ماقتلاتوش .
قلب جبل عينيه بغيظ بينما تنفس أسد الصعداء ورتاح حيتاش ماسمعاتش نورسين الحوار لي ضار بيناتهم قبل دقائق ... شاف جبل فأسد وقال :
- من بعد ونكملو لهضرة اسي أسد موضوعنا مازال ماتسالاش ... اما دابا غادي نمشي نفيق الأميرة النائمة على طريقة ديزنيلاند .
تنهدت نورسين بقلة حيلة وحركت راسها يمين وشمال ماغادي يرتاح جبل حتى يقتل إيزيك اليوم .. فتبعاتو وهي كاتقول بهتاف :
- جبل ... جباااال ...تسنى عنداك تهور .
غمض أسد عينيه وفتحهم وهو كايفكر ان نورسين إلا مشات حتى عرفت أنه ماحطش إستقالتو من المنظمة ماغاديش يكون خير وإحتمال زواجو بيها يدمر على هاد لأساس .
اflash back
قبل سنتين:
أسد كان بالفعل حط إستقالتو فاش قرر يتزوج بنورسين قبل 9 سنوات لكن بعد المشاكل لي وقاعت و فراقهم وخلال مكوثو فأمريكة المنظمة مكانتش قادرا تستغنى على عميل بقدر وقوة أسد ... فلأول كان رافض الرجوع لكن من بعد تراكمت الضغوط على حياتو ومل من حياتو الروتينية وخدمتو ومل من نفسو .. كان كايمر من حالة نفسية كئيبة .. كان من الخدمة للدار ومن دار للخدمة وأحيانا كايشد على راسو فدار ومكايمشيش للشركة بشهور وكايستأنف العمل غير من دار حتى لليوم لي فاجئو رجل موصل طلبيات الأكل عند باب دارو وعطاه ضرف أبيض مكتوب عليه " إلى السيد مالك" ومعاه صندوق أكل كرتوني فالون الأزرق الفاتح .... إعترض أسد وقال للموضف بلي هو ماطلب حتى حاجة من الماكلة لكن الموضف كان مصر باش يمضي ليه على ورقة التسليم .
مضى أسد على الوصل لي عطاه للموضف وغلق الباب وهو كلو فضول يعرف شكون صاحب هاد الضرف... بسرعة وضع الكارطونة على الطاولة وفتحها لكنه تفاجئ بكيك شوكولاطة دائري الشكل وصغير كان متوقع يلقى هامبركر ولا دجاج كينتاكي لكن توقعو خاب فاش لقاها كيكة ...
ضحك بسخرية على نفسو وظن ان شي واحد من موضفينو سيفط ليه التحلية يلهي بيها الوقت بما انه شهر ماخرج من دار فتح أسد الضرف بفضول قاتل لكنه لقا داخلها بطاقة سوداء اللون ومكتوب عليها باللون الفضي "lincoln center" واسفلها بخط صغير "مسرح فنون الإستعراض" وفالأسفل مكتوب "حفلة أوبيرا" ... فتح البطاقة وقرا لي مكتوب عليها ... كانت بالحبر الأسود وكانت باينا مكتوبة بخط اليد .
" سيد أسد مالك ، يشرفنا أن ندعوك إلى حفلة أوبيرالية شبابية اليوم على الساعة العاشرة والنصف مساء .. ويسعدنا ارتدائك طقم رسمي اسود اللون . "
ماعطاش اسد اهمية كبيرة للدعوة ولاحها على الطبلة بإهمال لكن فواحد اللحظة لمحت عينيه خلف البطاقة شعار المنظمة " دائرة داخلها مربع مكتوب داخلو بالإنجليزية كلمة "Justice"معناه بالعربي "العدالة" .
تسمر شويا كايشوف فالشعار علاما استوعب الأمر فسارع هز الكيك بيديه وعفجنو مزيان خرب شكل الكيك حتى لقى داخلو مفتاح .. مشا كايجري للروبيني غسلو مزيان وظهرت اخيرا الكتابة لي كانت محفورة عليه ...
" الوحش المظلم" غرفة 24 طابق 2 ... الحضور ملزم"
شاف أسد فساعة وكانت 9 ديال الليل يعني باقي ساعة وحدا على العرض ... فالأول مكانش باغي يمشي لأنه صافي حط إستقالتو ومابقات عندو علاقة بيهم ... لكن فضولو ماهناهش ... لبس بدلة رسمية فاللون الأسود كيفما طلبو منو فالبطاقة وخرج توجه للعنوان المكتوب حتى وصل امام داك المبنى الفيكتوري .
كان متوتر ونوعا ما خائف من هاد الدعوة المفاجئة لكنو رجع زعم ودخل .. كان فإستقبالو موضف جا قاصدو وناداه بإسمو ولقبو ... دلو على مقعدو فمكان الشخصيات المهمة VIP في اي بي .... مر العرض ببطئ شديد وكان مُمِل يُملل الملل نفسه ... مرا مرا كانت كاتديه عينيه حتى كاتفيقو شي مغنية بصوتها لي كايشبه صوت كلاكسون السيارات وسط زحام .
بقى كايتسنا شي حد من المنظمة يبان ومرا مرا يدور بعينيه على الله يلمح شي حد كايعرفو لكن واالو حتى فاجئو نفس الرجل لي إستقبلو فالباب فغير شافو أسد ماكرهش يطير عليه يعنقو ويبوسو حيت جا ينقدو من هاد الجو الكئيب ومن هاد الموسيقى المزعجة لي كايسميوها ناس موسيقى راقية .. واللعنة على الرقي .
خرج أسد برا المسرح وبقا تابع الرجل حتى وصلو الغرفة ومشا وخلاه واقف أمام داك الباب الخشبي الكبير فاللون الأسود .... جبد أسد المفتاح لي لقاه وسط الكيك ودخلو فلفرخة ديال الباب وفتحو ودفعو بتردد ودخل بحذر لكنه تفاجئ بأن الغرفة كانت خاوية من الداخل ... سد الباب موراه وبقا كايشوف فديك الغرفة الفاخرة الكلاسيكية من الاثاث الراقي والكراسي وطاولة المشروبات والجدران الرمادية الجميلة ...
- واش كاين شي واحد هنا ؟.
قالها أسد وتسنا شي حد يجاوبو لأنه كان متأكد بلي راه مراقب وفعلا فديك اللحظة تفتح الجدار لي كان خلفو وخرجت منو بنت فالعشرينيات ... تقدمت عندو بزيها الرسمي الأسود وهي كاتبتاسم ثم مدت يديها باش تسلم عليه وقالت :
- سيد أسد مالك .. شكرا على تلبية الدعوة . كانتمنا تكون ستمتعتي بالعرض الغنائي
بادلها أسد إبتسامة متصنعة وصافح يدها وهو كايقول يسخرية :
- نتوما جبتوني لهنا باش تعدبوني ماشي باش نستمتع بأصواتهم النشاز .
ضحكت البنت بتسلية وهي كاتقول :
-هاهاها ... صدقني نفس لإحساس غير سمح لينا وصاف... نقدم ليك نفسي أسيّة بن شمسي ... جزائرية الأصل
ملاحظة من الراوية:
.(عرفتوها شكون اسية ولا لا ؟ ... يامتعلمين يابتوع المدارس ! 😂) ابتسام قراري .
صافح أسد يديها بحرارة ثم سحب يديه وقال بلهجة رسمية :
- تشرفت بيك أنسة أسيّة ... ممكن شي توضيح على هاد الدعوة المفاجئة !.
- دكتور ياسين ... بلغ البارون الأعضم أن الضيف وصل .
ملاحظة اخرى من الراوية 😊
(وياسين عرفتوه ولا ماعرفتوهش ؟.. يامتعلمين يابتوع المدارس ! 😂) ابتسام قراري .
توسعو عيون أسد فاش سمع إسم البارون الأعضم وأخر حاجة كان يتوقعها ان السيد الأعضم للمنضمة يستدعيه بنفسو ويستقبلو شخصيا ... هذا بالتأكيد ضرب من الجنون ... المنظمة لي شتاغل فيها ملي كان مراهق السيد الوحيد لي كان عارف بهويتو الحقيقية هو عمو إسماعيل بسبب القرابة لي بيناتهم ..
المنظمة عندها بزاف ديال الأسياد لكن بهويات مجهولة ومامعروفاش .. معروفين فقط بالألقاب ولقب البارون الأعضم كان هو اللقب العضيم بيناتهم .
(سمحولي ولكن ملاحظة اخرى :
مع لأسف لي غايفهمو أمر المنظمة أكثر هوما الناس لي قراو العميلة رقم 7 .)
توتر أسد بالخصوص فاش شاف الباب تحلات .... دخل بهجت فالأول وعلى وجهو إبتسامة متواضعة وتبعو الدكتور ياسين ... تقدم بهجت بلاما يقول حتى شي كلمة وجلس على الأريكة بشموخ واضع عكازو على جنب ودار إشارة لأسد باش يجلس قبالتو بينما وقف ياسين عند راس البارون فإنتظار أي طلب منو .
- مرحبا بيك اولدي .
قالها بهجت فرد عليه أسد برسمية وولباقة :
- الله يبارك فيك اسيدي .
قدر بهجت يلاحظ توتر جبل لأنه كان واضح عليه مهما حاول إخفائو بإبتسامتو المتصنعة فإبتسم إبتسامة رجولية هادئة وقال :
- أسية عيب عليك ابنتي حتى كأس ديال القهوة ماقدمتيهش لضيف ديالنا .
ردت عليه أسية وهي كاتقدم لعند ألة صنع القهوة الصغيرة فزاوية الغرفة :
- امرك اسي البارون ثواني وتكون واجدا .
إعترض أسد بلباقة وقال :
- مكاين لاش .. انا ماكرهتش نعرف سبب هاد الدعوة اسي البارون .
همهم بهجت لكن حافض على نفس الإبتسامة على وجهو المجعد بخطوط الزمن وقال :
- تبارك الله خدمتي معانا سنوات طويلة بدون كلل او ملل وديما كانت خدمتك نقية لكنني حزنت بزاف فاش قالولي بلي حطيتي إستقالتك من منظمة العدالة ... و فكرت انك كشاب محتاج لفترة راحة .. وكانضن هاد الفترة لي دازت كافية ووافية اولا لا اولدي أسد .
توتر اسد وماعرفش كيفاش غادي يعترض على طلب البارون الأعضم لي كان واضح وضوح الشمس فهو طلب منو يستأنف عملو بطريقة ذكية ... تنحنح وقال :
- غايتي من دخول هاد المنظمة كانت باش نلقا لي قتل واليديا ونتاقم منو .. ولحسن الحظ تحققت غايتي ولي قتل واليديا خدا الجزاء ديالو ... فمابقا عندي ماندير وسط المنظمة هذا علاش حطيت استقالتي لانني اكتفيت من القتل اسي لبارون .
استغرب بهجت من طريقة كلام أسد ورفضو لطلبو فلو كان مكانو شخص اخر كان غادي يقبل بسيف ولا بالخاطر لأن عضمة اسم البارون بوحدها تكفي لإخضاعو طول العمر ... ولكن مع ذلك استمر على نفس الإبتسامة وقال :
- اكيد وكانهنيك .. الإنسان يقدر يحقق اي شئ إلا هو بغا وعزم حتى المستحيل كايصبح ممكن ومحتمل مع الإرادة.
- تماما اسيدي .
استمر الوضع صامت بيناتهم وكل واحد كايفكر يقنع الثاني برغبتو حتى قاطع بهجت الصمت وقال :
- غير لي عزازين علينا هوما لي كانعطيوهم شرف لقائنا اسي أسد ...وأنا كانشوف فيك انسان اهل للثقة ... اقترحت اسمك على باقي الأسياد فالمجلس ووافقو على انضمامك لينا .
احتار أسد و ماعرفش شنو يقول ليه .. قلب على كلمات مناسبة للرفض لكن ولا حرف بغا يخرج حتى قال بهجت بصوت حازم :
- عارف انك مريتي من مشاكل فوق عمرك وطاقتك ... وخيبات تليها خيبات واحباطات لكن هاذي هي الحياة اولدي ... ماعرفتش علاش نهار لي عطاوني التقرير ديالك فاش قريتو تفكرت حفيدي الغالي ... هو تقريبا من جيلك شبابي ... وسيم .. وقوي ورجل بمئة رجل .
أومأ أسد بتفهم وإبتسم ثم قال :
- الله يخليه ليك .
- امين ... هذا علاش انا محتاجك .. قررت نضيفك للمجلس وتكون واحد من الأسياد .
تصدم أسد لدرجة وحلات ليه الهضرة فلسانو وقال بتمتمة:
- كيفاش !! .. ولكن !!.
قاطعو بهجت بإصرار :
- نتا مابقيتيش عضو عادي .. نتا غادي تولي واحد منا تأمر وتنهي .. ونتا ابدا مامضطرش تتولى المهام بنفسك .. غادي يكون تحت يديك عدد كبير من الأعضاء مستعدين يتحركو بإشارة منك ... على كل غادي نخلي ليك يوم واحد تفكر فيه وتعطيني الجواب .
فكر أسد فالأمر شويا .. البنت لي حط إستقالتو على قبلها مستحيل يرجع يشوفها مازال .. وحياتو اصبحت وكأنها سراب .. فارغة من كل معاني الحياة .. رتابة وروتين عاش فيه لمدة 6 سنوات يمكن جاء لوقت لي يغير من نفسو شويا ... لطالما كان اسد المتملك النرجيسي ولطالما حب يأمر وينهي وكلمتو ماتنزلش للأرض حتى جات نورسين وكسرت هاد القاعدة وعلماتو معنى التواضع وقطعات جوانح غرورو ونزلاتو للأرض لكن فين هي دابا ؟ ...
رجع لدارو ديك الليلة وفكر حتى عيا .. مابغاش يجيه نعاس ولا غفات عينيه حتى طلع ضوء الفجر وخرج يدير شويا ديال الرياضة ... وهو كايفكر فالعرض ديال البارون الأعضم ... ومارجعش لدار حتى كان متخد القرار الأخير ...
قرر يرجع لمنظمة العدالة لكن الرجوع ديالو غادي يكون قوي غادي يرجع واحد من الأسياد ماشي خدام تحت الأوامر ... جاء الوقت لي غادي يرد الجواب للبارون الأعضم وفرح بزاف بهجت فاش وافق أسد وفاليوم التالي إستقبلوه فمجلس الأسياد .
كانو دايرين اجتماع كبير فقاعة كبيرة وكالسين الأسياد على منصات وكأنهم في برلمان ولا في مجلس الشورى الدولي وعلى وجوههم أقنعة نحاسية على شكل وجه صامت ... دخل أسد وأقسم على القرأن باش يخلص للمنضمة حتى أخر قطرة من دمو ومن بعد زولو كل الأسياد الأقنعة ...
صدمة أسد كانت كبيرة بزااف ... الأسياد كانو فالحقيقة شخصيات معروفة فالمجتمع العالمي... منهم شخصيات سياسية وقضات وحكام ورجال أعمال أغنياء ... كلهم كان مترأسهم البارون الأعضم لي نال شرف تسليم أسد شارة السيادة لي كان مرسوم عليها رمز منظمة العدالة .
ركب أسد داك نهار فسيارتو بعد الإجتماع وهو كايحاول يجمع فعقلو كاع دوك الوجوه والأسماء الحقيقية لدوك الشخصيات لي كان من المستحيل يتوقع انهم من المنظمة ... لكن فاش وصل للدار تفاجئ بوجود أسية وياسين لي ستقبلوه فالمسرح الأوبيرالي قبل يومين فقط ... كانو واقفين عند باب دارو وهازين فيديهم بوكيهات الورد ..
- سي أسد ... مبروك عليك المنصب الجديد .
قالها ياسين ومد يديه يسلم عليه بعنفوان شبابي وكملت أسية وهي كاتقول بمرح :
- سمح لينا جينا بدون موعد ولكن كان ضاروري نباركو ليك .. ونيت ماجيناش بيدينا خاوين .
مدت ليه بوكيه ديال الورد وحنات للأرض هزات كارطونة زرقاء كاتشبه للكارطونة لي جابهالو موصل الأكل قبل يومين ... ضحكت أسية وقالت :
- الكيك ديال داك نهار مكانش للأكل لكن هذا كانضمن ليك أنه لذيذ ومافيهش سوارت من الداخل ... لكن خصو شي شويا ديال العاصير باش يدوز .
دخلهم أسد للدار وتكلفت أسية بوضع الكيسان ولغطران على طاولة الزجاجية لي فالصالون بينما كلسو ياسين وأسد كايهضرو شويا ...
- كيفاش نتا دكتور وفنفس الوقت خدام مع المنظمة ؟
قالها أسد بإستفهام فرد عليه ياسين وهو كايحط كأس العصير على الطاولة :
- بحالك تماما ... نتا رجل أعمال وفنفس الوقت خدام فالمنظمة نفس الشئ ...
عجباتو أسد طريقة جواب ياسين المراوِغة واكتفى بإبتسامة هادئة فكمل ياسين هو كايبتاسم :
- دابا حنا ولينا صحاب وقريبا غادي نوليو حباب اذن علاش غادي نخبيو على بعضياتنا ...أنا تربيت على يد بهجت بيك .
عقد أسد حواجبو وقال بتسائل :
- شكون هذا ؟
ردت عليه أسية :
- بهجت هو البارون الأعضم اسي أسد .
همهم أسد بتفهم واستوعب ان اسم البارون هو اخر اسم غادي يعرف بعد كل دوك لأسماء المخملية فكمل ياسين وقال :
- الأب ديالي كان إنسان بسيط وكان عندو مخبزة وسط السوق فالمغرب منها كنت عايش أنا وخوتي الخمسة وعشرين .
تصدم أسد من عدد أخوة ياسين لـ25 بينما ضحكت أسية وكذلك ضحك هو بسخرية على نفسو وكمل :
- الواليد كان زهواني تزوج 5 ديال لمرات لي ماتت ماتت ولي عاشت بقات وعاد لي طلقهم .
بقاو كايضحكو ويتمازحو على عدد زوجات اب ياسين ومن بعد كمل وقال :
-الواليد كان صديق مقرب لبهجت بيك ... عاشو تقريبا فترة الطفولة و الشباب مجموعين وكان بهجت كايزورنا مرا مرا فبيت العائلة هذا علاش فاش توفى الأب ديالي كنت صغير تكلف بهجت بمصاريف تعليمي ودراستي حتى كبرت وتخرجت دكتور أمراض الرأس والأعصاب . ومن بعد انضميت للمنضمة برغبة مني طبعا ..
همهم اسد بتفهم وبقا كايدردش مع ياسين على حياتو وطفولتو بينما مشات أسية للمطبخ كاتهضر فالتلفون مع بهجت بيك .. حتى سالات المكالمة ورجعات كلسات معاهوم فالصالون .. شاف فيها أسد وقال :
- ونتي .. أشنو هي حكايتك اأنسة أسية ؟
إبتسمة أسية بهدوء وشافت فياسين بخجل وقالت :
- أنا تزاديت فالجزائر لكن كبرت وتربيت هنا فإسبانيا.... العائلة ديالي كان وضعها المالي متواضع و الحمد لله بابا كان أستاد إبتدائي وماما كانت مستشارة مبيعات وأنا الإبنة الوحيدة لي عندهم ... كنت دائما متفوقة فدراستي حتى كبرت وأصبحت طالبة جامعية متفوقة بفضل الله .... ماعمري كنت نتخيل انني ممكن ننضم لشي منظمة او شي حاجة بحال هادي حتى جاء اليوم لي غادي نتعرض فيه لحادث سير خطير ... كنت على حافة الموت والجمجمة ديال رأسي تشقات ... دخلت فغيبوبة دامت شهور حتى كانو كايقولو بلي صافي غادي نموت ووالديا فقدو الأمل ... مكانوش عارفين انني كنت واعية لكل شئ كايدور من حولي لكن ماكنتش قادرا نفتح عيوني ولا ندير شي حركة تثبت ليهم انني واعية على الواقع ...
تنهدت بألم وهمست :
-كانت روحي مسجونة داخل جسدي العاجز ...
رفعت رأسها وشافت فياسين لي بدورو كان كايشوف فيها بنظرات حنينة وكملت :
- كان الدكتور ياسين كايجي فكل لليلة يطمن على حالتي وبعض المرات كان كايشرك معايا مذكراتو اليومية ولا مقتطفات من حياتو وعند بالو انني فغيبوبة ومكانسمعوش ...
إبتسم ياسين بطريقة خلات أسد يشك أن بيناتهم مشاعر حب مشتركة بسبب نظراتهم الهائمة و المتبادلة ... كملت أسية وهي كاتلعب بصبيعاتها :
-كان كايونسني بهضرتو وكان فاش كايخرج كانتمنا فقتاش يرجع لعندي ويسمعني صوتو وحكاياتو ... كانو الدكاترة مصرين باش يقطعو الأجهزة لي مخليين قلبي ورأتي عايشين ...و مع الأسف واليديا وافقو على صفقة الموت الرحيم لأنهم مابقاوش قادرين على مصاريف علاجي الباهضة لكن وحده الدكتور ياسيين كان كايعتارض وبشدة وبما انه مكانش عندو كلمة فوق كلمة الدكاترة الكبار ... توسط لي عند بهجت بيك لي جاء حتى لعندي لغرفتي وطمن على حالتي ...
شافت فأسد وكملت :
مازال نعقل على كلامو بالحرف فاش قال ان هاد البنت داخلها روح محتاجة تتحرر ... انا غادي نقنع مدير المشفى باش يخليك دير ليها العملية وتكاليف لبلوك خليها عليا انا غانخلصها ... حسيت بفرحة كبيرة رغم ان نسبة نجاح العملية كانت فقط 10 فالمئة لكن على الأقل كنت غادي نتحرر ياإما نعيش يا إما نموت وتصعد روحي لعند خالقها باش نرتاح من داك سجن لي كنت عايشا فيه ... بالفعل تمة العملية ولحسن الحظ ربي وقف معايا وبفضل الدكتور ياسين انا عايشا اليوم ...
تنهدت وكملت :
-داز عام وبقيت على تواصل مع ياسين ... ولينا أصدقاء مقربين ... لكن فواحد نهار بابا تطرد من الخدمة وتراكمت علينا الديون وماما مكانتش قادرا تخدم لأن الشركة لي كانت خدامة فيها دارت افلاس .. بقينا عايشين بفلوس شوماج ديال ماما لكن ماشي بزاف وتسالاو .. كنت مضطرة نخدم باش نعاون عائلتي لكن هنا فإسبانيا مكانوش كايقبلوني ماعرفتش علاش يمكن بسبب القدر لي غادي يوصلني للبارون الأعضم ... بقيت هكاك حتى يأست بمرا ولجأت للدكتور ياسين باش يساعدني وبالفعل مابخلش عليا و توسط ليا عند البارون الأعضم وقبل يخدمني سكرتيرتو ومرافقتو الشخصية بعد تدريبات دامت سنة كاملة وبفضلو أنا قدرت نهز عائلتي وخلصت كل ديون بابا وشريت ليهم دار محترمة فمكان زوين .. وهادي هي حكايتي .. حكاية أسية بن شمسي العادية والمتواضعة .
كملو اكلهم للكيك وهوما كايتبادلو المعلومات على بعضهم البعض حتى قاطعهم صوت تلفون أسية لي كان كايصوني من مدة ..جاوبت وفتحت سبيكر باش يسمعو كاملين شنو كان باغي يقول البارون الأعضم .
- أسية وياسين فين راكم ؟
ردت عليه أسية برسمية :
- جينا نباركو لسي أسد مالك منصبو الجديد .
همهم بهجت بتفهم وسلم على أسد ثم قال :
- بما أنك معاهم فأنا محتاح مساعدة من خبرتك الطويلة اسي أسد .
رد عليه أسد بلباقة :
- بكل سرور البارون .
- تعقل على حفيدي لي قلت ليك عليه
قالها بهجت ورد عليه أسد :
- اكيد ..
كمل بهجت وقال :
- حفيدي بدأ يتهور شويا .. راجل أمو مات وخلا ليه دين عبارة عن شحنات مخدرات لعصابة منظمة أسمها الكاريبي ومؤخرا بدأ يسلمهم الشحنات ...
رد عليه ياسين وقال :
- واشنو تبغينا نديرو ليه اسيدي نوقفوه ولا نعاونوه
رد عليه بهجت بإعتراض وقال :
-لا ابدا خليوه .. انا عارف ان رئيس العصابة هو اكبر عدو لحفيدي جبل وبما انو كايسيفط ليه الشحنات بإنتضام فهذا دليل على أن حفيدي ناوي شي حاجة ومستحيل يبقى وفي ليه طول العمر ..
قالت أسية :
- والمطلوب منا اسي البارون ؟
رد عليها بهجت وقال :
- بغيتكم تضيقو عليه الخناق .. المخابرات فالمغرب حاطينو فراسهوم ومؤخرا اسمو دخل لقائمة المطلوبين عند الإنتربول الشرطة الدولية .. سي اسد كاتسمعني ؟؟
رد عليه أسد لي كان كايستامع بحرص وفضول وقال :
- ايه اسيدي .
بقا بهجت ساكت شويا ومن بعد قال
- عارف أنك انسان ذكي بزاف هذا علاش بغيتك تعاونهم وتوجههم ... غادي نبعت ليك كل المعلومات المتعلقة بحفيدي جبل .
وافق أسد باش يعاون ياسين وأسية وغير بعض معلوماتهم الشخصية كالعمر فأسية سنها الحقيقي هو 28 سنة والدكتور ياسين 43 سنة والتهم لي كانت فسجلاتهم العدلية كانت مزورة وأسد هو لي زورهم باش مايكشفش على حقيقتهم ثم بعد مدة بعتهم للمغرب مع بعض الرجال لي كانو كايتبعو جبل بطريقة ملحوظة باش يدخلوه الشك ويخليوه متيقض بينما لعتو ليه شخص بلغو بأن المخابرات حاطين عليه
بأن المخابرات حاطين عليه وفديك الأيام رجع أسد طلاقا مع نورسين من جديد فأمريكا ونهار لي تبعها للمغرب وطلب منها زواج هو نفسو اليوم لي حاولت روعة تنتحر وسط البحر وهو نفسو اليوم لي هرب جبل وختو تاليا على يخت الجوهرة مع القبطان مرزوق وياسين وأسية ومراد ولي كان إسمو الحقيقي رافاييل وكان عميل عند الإنتربول ...
ومن بعد مدة بسيطة وفاليوم ديال عرسو تفاجئ بدخول جبل وتفاجئ اكثر أنه إنضم للمخابرات مع نورسين ومكانش عندو اي خيار اخر غير انه يقبل عرض عابد بإنضمامو ليهم لكن هاد لمعلومات كاملة كانت فراس لبارون الأعضم لي عطا لأسد الضوء الأحمر باش يبقا قريب لجبل ويبلغو بكل المستجدات بالإضافة أنه يبقى بجنب نورسين ويحميها من بعيد ومن قريب .. بدون علمها بأنه رجع للمنظمة لي دخلت نورسين لحياتو فالنهار الأول بسببها .
البارون الأعظم الجزء 47 منظمة العدل
محتوى القصة
التنقل بين الأجزاء