كانت روعة باغيا تحماق من شدة الألم حتى أنها بدات كاتنتف فراسها بيديها وتضرب راسها مع ضهر السرير وتبكي وهي كاتقول :
- راسيييي راسيييي غادي يطرطق عتقوني عتقونيييي .
ضارت براسها كاتقلب على أي حاجة تهدء لألم شويا حتى لقات بجنب السرير كيس فيه الأدوية وهزاتو بسرررررعة خواتو حداها وحلات لعلب كولهوم وشربات من كل علبة قرص حتى أنها بلعاتهم بلا ماء وتكات بضهرها على السرير وهي كاتنهش
- اشنو هادشيي ؟؟ أشنوو هادشييييي
غمضت عينيها وهي تأن بألم وكاتمتم وما هي إلى خمس دقائق وبدأ ألم رأسها كايخف شويا بشويا بسبب داك دواء كامل لي شرباتو .
ساعتها إستوعبت روعة أخيرا أشنو وقاع ليها وماعرفتش علاش دارت ديك ردة الفعل المبالغ فيها مع جبل واش غير بسبب الم رأسها ولا شي حاجة أخرى !... عادتا كاتواجه مواقف بحال هاديك بذكاء وفطنة كيما واجهت مديرها النصاب ، لكن أشنو لي خلاها منفعلة لهاد الدرجة ! حتى أن دقات قلبها كانو فتزايد وأنفاسها كانو سريعين !.
علات راسها فالسقف ؛ لكن لقاتو كايضور بيها شافت فلجدران لقاتهوم كايدخلو فيعضهم .. أشنو لي واقع بالضطب ؟.. غمضت عينيها بقوة باش تتوكد ورجعت فتحتهم لكن الدوران مزالش وكأنها كانت كالسا وسط شي دوح (سرير الأطفال) وشي حد كايدوح بيها ويديها ويجيبها .. حست بسرير كايضور ورغبة شديدة فالتقئ .
غمضت عينيها وخدات نفس كبييير باش تقدر تسيطر على نفسها ثم شافت فشنطتها لي كانت على سرير ومدت يديها جراتها لعندها وختارت منها كسوة طويلة فاللون الأبيض بأكمام طوال .. لبست بعض الملابس الداخلية بصعوبة وسترت نفسها بديك الكسوة .. لكن الرغبة الشديدة بالتقئ مازالتش ودوخة حتى هي مازالتش ...
شدت فراسها بريبة وقالت وهي كاتنفس بسرعة:
- أنا شنو لي واقع لي ؟
فديك اللحظة تفتحت الباب بهدوء وطل منها صخر براسو فهو قرر يطلع يطمن عليها بعدما شاف جبل خارج زعفان .. لكن فاش شافها شادا فراسها وكاتنهش دفع الباب ودخل كايجري لعندها كلس فجنبها وقال بريبة :
- إيميليا !.. إيميليا واش نتي بيخير ؟.
هزت روعة راسها شافت فيه وأخيرا ثبتت قدام عينيها صورة محددة ولحسن لحظ كان منقدها ..
-إيميليا راكي خلعتيني عليك باش كاتحسي ؟.
مكانتش باغيا تزيدو عبئ أخر ظنت بأن هادو مجرد أعراض عادية بعد كاع الصدمات لي دازت منهم بالإضافة أنها ماواكلاش من مدة طويلة وزيد عليها مريضة بالسكر .. حاولت ما أمكن باش تبان طبيعية حداه ثم إبتسمت بتصنع وقالت :
- اام .. يا قليل الذوق زعما أنا ضيفة عندك ؛ هكدا تخليني بالجوع ! .
بقا كايشوف فيها صخر وكايفكر ثم قال بهدوء بعد صمت :
- ماشي هكاك أنا وصيت الخالة مريم توجد ليك أكل صحي مفيد لمرضى السكري.
عقدت روعة حواجبها بإستفهام وقالت:
- ماعقلتش على راسي قلت ليك أنني مريضة بالسكر !.
تفكر صخر فاش قالهالو داك الدكتور اللعين لي حقن روعة بالهيرويين لكنو مابغاش يفكرها بأي حاجة متعلقة بداك الكابوس .. تنهد بقلة حيلة وقال :
- الدكتور سميث لي قالها لي .
ضيقت روعة عينيها كاتفكر واش الدكتور سميث دار ليها تحليلة السكري ديال الأصبع لكنها ماشافتوش كايديرو ليها لكن تجاهلت الأمر وقالت بعد صمت:
- صخر بغيت نسولك وجاوبني بصراحة.
أومأ صخر براسو وكملت روعة :
- نتا قلتي لي 3 ديال حقنات الهيرويين ممكن يتسببو لي فالإدمان ياك ؟.
هو قال ليها ديك الهضرة باش يعطيها أمل حيت ماقدرش يقولها فديك اللحظة أن حقنة وحدا من الهيرويين كاتسبب فالإدمان فقال ليها 3 باش مايحبطش عزيمتها وباش مايخلعهاش ... أومأ صخر براسو بمعنى "أه" وكملت روعة وقالت:
- فاش كنت فاقدة الوعي .. واش ... واش زادوني حقنة وحدا أخرى ؟.
كيفاش غادي يقول ليها دابا أن 3 ديال الحقنات إخترقو جسمها محملين بسم الهيرويين .. شاف فيديها ولاحظ أنها كاتفركهم بإستمرار والتوتر واضح عليها .. شاف فصدرها ولاحظ دقات قلبها السريعة .. هادو أعراض إنسحاب السموم من الجسم .. يعني هي دابا فالحاجة لحقة وحدا أخرى من الهيرويين فأسرع وقت وإلا غادي يتزاد عليها الحال ... ماعرفش شنو يدير ! .. وماعرفش شنو يقول ليها ! .
واش يقول ليها الحقيقة ويصدمها ولا يكدب عليها ويخليها تعيش فالعداب لي مر منو هو قبل مايتعالج ... حيت حتى هو كان مدمن وكان فاش كايفوت مفعول الهيرويين لي تقريبا كايدوم من 5 ساعات لـ 6 ساعات كايبغي يحماق .. ومكايقدرش يستحمل داك الألم فالعضام وفالعضلات وفالرأس ونزيف الأنف بسوائل والعيون بالدموع وتوتر وقلق ودوخة ورغبة فالتقئ والشد العصبي والصراخ والهديان .
بقا كايشوف فيها كما بادلاتو هي نظرات الشك ... رجع قرب منها و كلس حداها ثم تمسك بيديها باش تهدء شويا وداكشي لي كان .. حنات روعة راسها وغمضت عينيها باش تسيطر على أعصابها .. مد صخر يديه وتمسك بدقنا وعلا ليها راسها وهو كايقول :
- ماعمرك تنزلي راسك .. ديما رفعي راسك بعلو الأمواج وفوق تلال الخوف ... ماتلتافتيش للخلف وماتهتميش كل شئ سئ داز وماغايرجعش... كملي حياتك من البلاصة لي وقفتي فيها . كيما نتي روعة الخطيب أو إيميليا مكايهمش كوني نتي نفسك وديما علي راسك .
غير هاد الكلمات كانو بمثابة البلسم على ألمها .. تنهدت ثم قالت بوهن:
- بغيت نعس شويا .
قاطعهم دقات على الباب ثم صوت الخدامة وهي كاتعلن على وصول الأكل فإبتسم صخر وقال :
- كولي بعدا وعاد نعسي .
دخلات الخدامة الأكل وصخر كان مصر ماينوضش من حداها حتى تكمل الصحن كولو وعطاها بعض مسكنات الألم القوية وبقا حداها حتى غطاها وتأكد بأنها نعست وعاد خرج بعدما طفا الضوء ...
〰〰〰〰〰〰〰〰〰
ڤيلة كونتيسا /إيبيزا
وصل جبل بسيارتو لڤيلة كونتيسا .. كان معصب من تصرف روعة العصبي وفنفس الوقت رتاح حيت أخيرا قال ليها الحقيقة ... زول السمطة وهو كايقول :
- مع الوقت غادي تولف الوضع .
ثم خرج وزدح الباب وكمل وهو متوجه للباب وعلى وجهو نظرة حادة :
- بسيف عليها غادي تولف .. وإلا غادي نكون مضطر نوريها وجه لبارون لي ماعمرها شافتو .
إستغرب فالأول أنه لقى غير لعساس فلباب وبعض الرجال ولباقي مكاينينش وتفكر أمر إيزيك لي نساه بمرا لكن أكيد أسد غادي يكون تصرف فأمرو ولقا ليه شي حل .. لكن فطريقو للأعلى تصادف مع الخالة تيماء وهي لابسا ملابس أنيقة فاللون الباج عبارة عن جيب تحت الركبة وفيست فنفس اللون وجامعة شعرها البني المصبوغ على شكل كعكة مرتبة وغير شافت جبل سارعت لعندو وهي كاتقول بحماس وسعادة :
- ولدي حبيبي على سلامتك .. كيف بقيتي
لكن جبل جاوبها على سؤالها بسؤال أخر:
- واش مارجعوش رجال ؟
ردت عليه الخالة تيماء وهي كاتبتاسم:
- رجعو أولدي فصبح غير بدلو حوايجهم ورجعو مشاو لقلعة ميخور عرض عليهم جدك سي بهجت بيك للعشاء وحتى أنا راني معروضة ماشفتينيش لابسة حوايجي ومقادة ... قولي كيف جيتك واش ماناقصاني حتى حاجة؟
طلع فيها وهبط ثم إبتسم على منظرها المرتب ونظرتها لي كانت كاتسنا بحماس رأيو . همهم وقال :
ضحك جبل وسعادتو كانت ماتوصفش .. رجع باس ليها يديها وقال:
- هي .. كيفاش عرفتيها ؟ .
ضحكت تيماء وقالت وهي كاتشوف فيه بحنان الأم:
- المرأة تفضحها الغيرة والرجل يفضحه الإهتمام ونتا منهار رجعتي من سفر لسانك كايتكلم غير بسميتها وفينما ضارت تابعها وديما كاتشوف فيها وكاتسول عليها .. كنتي مفضوووح .. وكانقسم أن الرجال كاملين لي فالكونتيسا عارفين أنك كاتبغيها .
توسعو عيون جبل بصدمة وقال:
- لهاد الدرجة انا شفاف !
ردت عليه تيماء بإبتسامة حنينة :
- نتا مكاتعرف لا تخبي ولا تتصنع .. لي فقلبك على لسانك.
إبتسم جبل بهدوء وقال فاش تفكر حاحة مهمة :
- اه مازال حاجة اخرى محتاج رأيك فيها .
مشا بسرعة للخزنة الصغيرة لي فزاوية الغرفة وفتحها بعدما دخل الرقم السري ثم جبد منها عشرة ديال العلب فيهوم لي لونو حمر وفيهم لي لونو أسود لكن كلهم مغلفين بالدان ... ستفهم كاملين على السرير وفتحهم تحت نظرات الخالة تيماء لي بقات مندهشة من دوك لخواتم كاملين ديال زواج .. إعتدل جبل فوقفتو وكال بحماس :
- اشنو رأيك غادي يعجبوها .
شافت فيه ورجعت شافت فالخواتم وقالت :
- ااااام .. واش مابانولكش بزاف زعما .
على جبل أكتافو بقلة حيلة وقال:
-شريتهوم من مدة وكنت مخبعهم حتى نطلب يديها للزواج ، ماعرفتش شنو لي غادي يعجبها ، فاش وقفت عند صاحب المجوهرات كولهوم عجبوني وماقدرش نختار بيناتهم هذا علاش خديتهم كاملين .. باش مرتي وحبيبتي تبقا كل مرة تلبس واحد .. يعني تبدل بيهم .
تنهدت تيماء من عفوية جبل وغبائو فنفس الوقت ثم قالت بإستياء :
- علا هي مزوجا بعشرا ديال رجال ولا كاتفايل عليها أنها غادي طلق منك وتتزوج تسعود أخرين .
إختفت إبتسامة جبل وقال بدهشة :
- كيفاش !!.
كتمت تيماء غيضها لكنها ماقدرتش ورجعت ضرباتو على راسو وهي كاتقول بزعاف :
- كيف كاتسمع .. الخاتم الواحد يعني رجل واحد لي فحياتها لي كاتربطها بيه كلاقة ماشي عشرة .
حك جبل فراسو بغباء وقال :
- اااه .. يعني نلوحهم !.
غوتت عليه تيماء وقالت:
- أويلي ردهم لمولاهم وخلي غير واحد .
تنهد جبل بقلة حيلة وقال:
- صافي واخا .. ولكن كلهم زوينين ! .. ماعرفتش شنو نختار !.. بلاتي نتي بنت بغيت نقول مرأة .. وكاتعرفي فدوق النساء .. فين لي زوين فنظرك ؟ .. فين لي غادي يجي مع يديها؟ .
تسمرت كاتشوف فيه ثم قالت :
- بلاتي بعدا ... واش خديتي لعبار ديال صبعها ؟.
رفع جبل حواجبو وقال :
- ااام .. لا
تنهدت تيماء بإستياء ثم مدت يديها ليه وهي كاتقول:
- واخا أرا يديك .
شاف فيديها ورجع شاف فيها وقال بإستفهام:
- لاش يدي ؟
تأففت تيماء بضجر وقالت:
-أووف .. أرا يديك وماتبقاش تسول بزاف .
لكنه بقا كايشوف فيها بغباء فطارت عليه شداتو من يديه بسيف عليه ثم هزات خاتم ودخلاتو ليه فصبعو صغير .. إستغرب جبل لتصرفها الغريب وقال بسخرية :
ندم كاع لاش عيط ليها ولاش تشاور معاها ولاش جا للكونتيسا من الأصل .. هكا هي تيماء هوايتها المفضلة هي نكير .. كاتنكر على لكبير وصغير وشكون ماكان يكون .. تنهد باش يسيطر على أعصابو ثم حاوط أكتافها بدراعو وقال :
- صافي مايكون غير خاطرك .. غادي نسيفط شي حد يجيب سيارتها القديمة غادي نخبعها باش ماتلقاهاش ونشريلها وحداخرا ونديرها ليها مفاجئة .. اش بان ليك ؟
إبتسمت تيماء برضى وقالت :
-دابا عجبتيني . ولكن بلاتي واش غادي نخطبوها من سي بهجت ؟.
تنهد جبل بقلة صبر وقال بإستهجان :
- نخطبها !! خالتي ركزي شويا ..روعة راها مرتي وبيناتنا عقد ديال زواج فتنا مرحلة الخطبة .
- اااه يعني سبق وطلبتي يديها بشي طريقة رومنسية ياك ؟.
خاف يقول ليها لا .. وتنزل عليه بشي ضربة ففضل يكدب وينقد روحو من الهلاك تحت يديها .. تنحنح وقال :
- ولكن على ماسمعت أن سي بهجت جايب فرقة الدبكة السورية .. هذا علاش قلت يمكن باغي تحتفل بتركاب ديال الخاتم .
ايوا صافي هادشي لي كان ناقص غير الدبكة السورية ... خرجت الخالة تيماء من غرفة جبل وخلاتو كايفكر فهادشي كامل .. الهدية لي ممكن تفرح بيها روعة هي ماماها المريضة ...
تنهد وهز الخاتم لي ختارتو تيماء ودارو فجيبو ثم رد الباقي للخزنة لكن قبل مايسدها جبد عقد الزواج ومعاه دفتر الحالة المدنية لي أشرف عليه محاميه المخضرب ووقف على إجرأتو فالمحكمة حتى أتم إعداده .. دارو حتى هو فجيبو وخرج .. كان كلو شوق باش يشوف مرتو من جديد ويوريها العقد باش تتأكد من صحة كلامو لكن قبل ذلك خصو يدير حاجة مهمة .
〰〰〰〰〰〰〰〰〰
قلعة ميخور بارون / إيبيزا
نزل صخر للحديقة بعدما تأكد أن روعة نعسات ولقا جدو بهجت كالس مع أسد ونورسين والدون ماركيز وتاليا وصوفي وعصام وباتريسيا ورؤية وحتى المدام علياء ، كانو كايتبادلو بعض الأحاديث وكذلك الضحكات ...شافتو باتريسيا لكنه مكانش عندو إستعداد يكلس معاهم ولا يقرب منهم ..
رجع دخل للصالة وتأكد أنه يسد الباب مزيان ثم وقف قبالة الجدار لي متكون من الزاج لي كان كايبين الناس لي فالحديقة بينما هوما مكايشوفوهش ... لاحظ حتى الخدم والرجال لي كانو كايجهزو الحديقة للسهرة ديال العشاء لكن كل تفكريو كان مع روعة ... وكيفاش غايتصرف مع إدمانها ؟؟
كان محتاح لإستشارة عاجلة .. جبد التلفون من جيبو ودوز رقم الدكتور لي ساعدو فالإقلاع على المخدرات .. حتى تفتح الخط وجاوبو .
- سلام دكتور مَازن ..
عاود للدكتور مازن على مشكلة روعة وكمل :
- دابا ماعرفتش أشنو غادي ندير ادكتور باش تنصحني؟.
رد عليه الدكتور وقال :
- سي صخر .. نتا على دراية أنك ماغاديش تقدر تساعدها على العلاج بوحدك فالدار .. خصها رعاية طبية ... ضاروري تجيبها للمصحة والأمر ماغاديش يتعدى الشهر وغادي تبرا إنشالله ..
- أهم حاجة دابا عطيني شي طريقة باش نخفف عليها الأعراض ديال إنسحاب السموم من جسمها ... مثلا شي مخدر طبي يقدر يساعدها.
- مانقدر نقولك حتى حاحة وهادشي مافيهش اللعب اسي صخر ... حاليا مرا مرا غادي تبقا تنفاعل وكل ما عليك هو تحاول تطول بالك عليها وتجنب أي حاحة تعصبها لكن الألم ماغادي يبداها حتى تكمل 24 ساعة أو أكثر وأنا كانصحك تجيبهالي اليوم حيت حنا فريق طبي غادي نعرفو نتصرفو معاها .
تنهد صخر وقال بقلة حيلة :
- واخا مانواعدكش ولكن غادي نشوف كيف ندير .
رد عليه الدكتور مازن بصوت رزين ونصوح :
- سي صخر .. حبيبتك مستقبلها بين يديك بإمكانك دمرو وبإمكانك ترممو .. حاول تساعدها ووقف بجنبها معنويا وماديا ... وجيبها فأسرع وقت .. غادي نتسناك ... بسلامة عليك .
قطع الدكتور مازن الخط وبقات كلمة "حبيبتك" كاترن فودنيه .. هو ماقالوش أنها حبيبتو لكن يمكن حيت لاحظ انه مهتم بيها وهو داك الشخص لي ماعمرو هتم لأمر شي حد من غير نفسو .. إبتسم لا شعوريا وبدا كايفكر فشي خطة كيف يدير يقنعها تمشي تتعالج ولأهم كيفاش يوصلها فكرة أنها ولات مدمنة .. لكنه مكانش ملاحظ دوك لودنين لي كانو خلف الباب ولي سمعو كل حرف قالو صخر.
إبتسمت باتريسيا بمكر بعد داكشي لي سمعات وأومأت براسها بخبث .. إعتدلت فوقفتها ثم دفعت شعرها لأشقر للخلف بأنوثة طاغية وطقطقت بكعبها الأسود خارجة من الحديقة وهي كاتمتم بخبث :
كلس صخر على الكنبة وتنهد لكن وصلو صوت إشعار لرسالة فتلفونو فتحقق منها بفضول وتصدم فاش لقى الرسالة واصلاه من رقم "جبل" وكان مكتوب فيها .
"طلاقاني للبلاصة لي كنا كانلعبو فيها فاش كنا صغار ..كانتسناك تما "
إستنكر صخر هاد الرسالة وتسائل ، شنو غادي يكون سبب لي ستدعاه على قبلو لكن الفضول كان هو سيد الموقف .. ناض صخر من جلستو ودخل التلفون فجيبو وهو كايتمتم
- خلينا نشوفو شنو عندك اسي جبل .
خرج صخر من الباب الخلفية باش مايشوفوش جدو بهجت وتمشى داخل الغابة بعدما منع الرجال باش مايتبعوهش ... كانت ديك الغابة كثيفة الأشجار وكل خطوة دعسها صخر على الأرض خلات موراها صوت خشخشة تكسر الأغصاب الصغار والأوراق اليابسة والقديمة حتى وصل للمكان المعلوم .
كانت سيارة جبل مركونة فالوسط بينما جبل واقف فوق سطحها وبين يديه سيجارة كايدخنها بشراهة وحاني راسو للأسفل ...
إستغرب لجبل لي كان واقف بداك الشكل فوق سيارتو لكن رجع رفع صخر راسو أعلى ديك الشجرة .. منزل الشجرة كان مازال مقاوم تقلبات المناخ ..كان منزل صغير بناه ليهم باهم "بركات" بمساعدتهم فوق شجرة كبيرة ، كانو صخر وجبل فكل مرة كايجيو ليه يلعبو ويجيبو معاهم حتى صحابهم لي كايقراو معاهم.
كانو دايرين مطايشا (أرجوحة) برويضة ومعلقينها عند الشجرة وكايديرو عليها النوبة كل شوية يمطش فيها واحد وغاليا كان يومهم كاينتاهي بشجار طفولي عليها .
رفع جبل راسو فاش شعر بخطواتو كاتقرب وشاف فيه ... كانت نظراتو قاتمة كايشوف فيه بشر وغضب فوق الحدود .. لاح عقب السيجارة عند رجل صخر وقال:
- ماتوحشتيش تلعب شويا ؟
شاف صخر فعقب السيجارة فالأرض ورجع شاف فيه وفهم شنو بغا يقصد .. مد رجليه ودعس على السيجارة وقال بسخرية:
- كايبان لي انني كبرت على اللعب .
نقز جبل من فوق السيارة وتقلب وتشقلب حتى وقف على الأرض بحركة رشيقة وكأنه لاعب جومباز محترف .. كانت حركة خلات عيون صخر تتوسع على الأخير وفاجئو فاش شدليه راسو بحركة خاطفة برمشة عين وضغط عليه بقوة حتى إصطدم راسو مع مقدمة السيارة بضربة كانت خطيرة لدرجة حس صخر بالدنيا كاضور بيه وغير طلق منو جبل طاح للأرض مغمى عليه ..
شاف جبل فجسم صخر لي كان سخفان فالأرض وقال وهو كايشوف فيه بغضب :
- لكن أنا توحشت نلعب .
مشا للكوفر وفتحو ثم جبد منو قرعة ديال الماء ورجع لعند صخر وهو كايفتحها باش يخويها عليه ويفيقو لكنه تصدم فاش لقا بلاصتو خاويا وهو مكاينش إختفى .... ماجا فين يضور حتى نزل عليه صخر بضربة خلف راسو بغصن شجرة خلات الطنين يدوي فأدن جبل لثواني حتى إستوعب الضربة الثانية لي جاية قاصداه فتحنى بسرعة خوا ليها وجر رجل صخر بسرعة وطيحو للأرض وطلع فوق منو كايضرب فيه بكل قوتو ومع كل ضربة كايقول :
- هادي حيت سيفطتي كلابك تعداو على مرتي .
ونزل عليه بضربة وحداخرا وكمل :
- وهادي حيت خطفتي مرتي .
زادو ضربة وحداخرا وكمل:
- وهادي حيت بسببك مرتي خطفها إيدوارد.
ناض من فوقو وجرو بحال شي جثة لا حول لها ولا قوة وجمع معاه بصفعة وكمل بصراخ :
-وهادي فداء روح مرتي والموت لي شافتو بين يدين السافل إيدواااااااارد .
شنق عليه بقوة ورفعو ولاحو على السيارة وزادو صفعة أخرة وغوت :
- وهادي حيت بسبببببببك تهرست رجل مرتي وبسبب هي كاتعدب دابااااااا..
رجع هزو بقوة ولتخ ليه راسو مع إطار السيارة وكمل بلغوات :
- وهادي حيت بسببك مرتي ممكن تولي مدمنة .
تصدم صخر فاش سمع أش قال جبل وقبل مايزيد ليه شي ضربة أخرة دفعو عليه بكل قوتو حتى كان جبل غادي يطيح وغوت صخر :
- أشنو كاتقول !! .. باش عرفتيها ؟؟.
إعتدل جبل فوقفتو وغوت بأعلى صوتو :
- باش عرفتها اولد لـ .. اولد لـ ... اولد لـ ... اولد لـ...(شتائم)
سبو بأقذر الشتائم وكمل وهو كايقرب منو بغضب :
- هاااه باش عرفتهاااااا .. عند بالك أنا ناعس على ودني هاااه .. الكلب شاهيين هو لي عيط لي وقالي كولشي داكشي لي درتي فمرتي نتا ولي دارو فيها هو ..
شنق عليه من ياقة التيشرت لي كان لابس وغوت فوجهو بغضب :
- نتا تعديتي عليها .. وهو حقنها بالهيرويين .. وإيدوارد خنقها ... بغيت غير نعرف !.. واش روعة عمرها أداتك هاااه ! .. واش عمرها وصلاتك !.. عارف بلي كاتكرهني وعندك مشاكل معايا على الورث لكن مرتي أشنو ذنبها فهادشي كاااااامل .
دفعو صخر بقوة ونتر ياقتو من بين يدين جبل وغوت بغضب دفين .
- ذنبها أنهاااااا مرتك .. ذنبهاااااا أنك كاتبغيها .. وأي حاحة نتا كاتبغيها أنا غادي ناخدها منك كيما خديتي مني كل أملاك جدي .. وخديتي مني ليليا وخديتي مني كل حاجة زوينة حتى بركات .
البارون الأعظم الجزء 62 ذنبها أنك تحبها
محتوى القصة
التنقل بين الأجزاء