طاح ظلام وسط الغابة وتهلكو الرجال بجوج بالعصا .جبل وصخر كان كل واحد فيهم أعند من الثاني حتى مابقاوش قادرين يهزو الراس ... كلسو بجوج بيهم وتكاو على السيارة كاينهشو بتعب لكن لي فيه شي حاجة ماهناتو .
رفع جبل يديه وضرب صخر لصدر بتهالك وقال :
- والله حتى نقتلك .. راح أحسب الله ما خلقك .
هز صخر يديه بنفس الطريقة وضرب صدر جبل وقال بتهالك:
بينما بالقرب منهم كانت رؤية واقفة خلف شجرة كبيرة وكاتشوف فيهم حتى تهدنو وسكتو بجوج كاينهشو بتعب وقررت أخيرا تكشف نفسها .. قربت منهم بخطوات ثابتة حتى وصلت لعندهم وربعت يديها لصدرها ثم قالت بسخرية :
- أخيرا ساليتو القتال !.
شاف فيها صخر وقال بحدة:
- أشنو كاديري نتي هنا ؟
رفعت القرعة ديال الماء الصغيرة لي كانت فيديها وقالت :
- خرجت نتمشا شويا فلغابة وانا نلقا لماتش ديالكم بادي .. يعني على الأقل كونتو تقولوها لي من قبل ، كنت نجيب معايا شويا ديال زريعة وكاوكاو نتسلى بيهم وانا كانتفرج فيكم ... اولا اسي جبل .
شاف فيها جبل وقال بسخرية وهو كايدلك كتفو بألم :
- سيري جيبيهم ورجعي مازال عندنا الشوط الثاني .
ماقدرتش رؤية تصبر وغلبتها الضحكة وهي كاتقول :
- لا انا شفت فلهبال حتى شفت ولكن فاش وصلت ليكم نتوما صدمتوني فصراحة ... دابا علاما فهمت هاد لفيلم كامل طالع على ديك البنت ياك.
رد عليها جبل بحدة وقال :
- هاديك البنت مرتي الالة رؤية ..
تصدمات رؤية صدمة عمرها لدرجة بقات مبلوكية فبلاصتها .. جبل تزوج ديك البنت !!! ..لكنه قاطعها وكمل وهو كايشوف فصخر بغضب :
- ولي يفكر يلمس شعرة من مرتي غادي نقطعو بسناني .
قلب صخر عينيه بغيظ وقال :
- ااه هادشي لي فالح فيه .. تهديدات مور تهديدات وكأنني غادي نخاف منك مثلا .
شافت رؤية أنه غادي يدابزو عاود فتدخلت بسرعة وقالت وهي كاتزل لمستواهم على ركابيها .. فتحت القرعة ديال الماء ومدتها لجبل وهي كاتقول :
- هاك شرب شويا وتهدن اجبل ...
لكن قبل مايمد جبل يديه ياخدها خطفها من يدها صخر وزمجر بغضب :
- مازالة كاتبغيه ... اوووووووه شوفو شحال غاتكون زويييينة فاش نمشي لعد إيميليا ونقول ليها جبل كان فعلاقة مع هاد البنت ولييييي ولييييي ولييييي شو راح يصييير .
طار جبل على القرعة خطفها من يديه وغوت عليه بحدة :
- أنا ماعمر كانت عندي علاقة معاها ... وزايدون داكشي داز عليه 11 لعاااام .
تنهدت رؤية وحرقتها الهضرة لي قال جبل .. لهاد الدرجة مكايحملش حتى سيرة حبها ليه .. فعلا ماعمرو كان فعلاقة معاها وحب كان من طرفها هي بوحدها وهو كان ديما كايوضع الحواجز بينهم ومكايبغيش يشوفها وديما كان كايتهرب منها .. حتى أنها كانت كاتختلق بعض الأعذار التافهة باش تجي تكلس فالكونتيسا فاش كانت ليليا وراجلها الثاني ومحمد مازالين عايشين .
قاطع تفكيرها صخر وهو كايقول بسخرية :
- ااه 11 لعام ديال الفراق يامسكييين ... غادي نحط أنا راسي فبلاصة إيميليا فاش نعرف بأن رؤية هي حب طفولة راجلي.. أُووي أُوووي أُوووي غادي نطلب منك الطلاق اجبل .
ماعرفتش رؤية فديك اللحظة واش تضحك ولا تعصب .. صخر مجنون كايقلب غير على الثغرة منين يجبد بيها جبل ويستفزو .... ومازال زايد فيه ، طار على القرعة خطفها من يد جبل وقلبها على فمو كايشرب منها بعناد لكن جبل تعصب وطار عليه حيدهالو من فمو وقلبها على فمو هو كايشرب منها ضد فيه ورجع صخر خطفهالو وداك لماء نص فيه تخوا ليهم على حوايجهم وهوما كايتقاتلو على قرعة ديال لماء صغيرة حتى عفجنوها وفاش خوات لاحوها وكملو لمقاتلة بيديهم بحال بجوج ديال دراري صغار .
جبل - مابغيتيش دير عقلك انا نوريك
صخر- اليوم نفركعو هاد رمانة .
إستقامت رؤية وهي كاتنهد بقلة حيلة ومكانش عندها شي حل أخر باش تفرقهم .. جبدت مسدس صاعق الكهرباء من خصرها فهي كانت داياه معاها كإحتياط باش تحمي بيه نفسها خوفا لايهجم عليها شي حيوان مفترس وسط الغابة لكن يبدو أن المفترسين ديال بصح هوما هاد جوج خوت ..
هزاتو بين يديها وبقات كاتسناهم يتفارقو لكنهم مجانين .. فرفعت يديها وضغطت على الزناد حتى طار صخر وطاح للأرض كايفركل من شدة الألم وكايغوووووت بربي لي خلقو فبقا جبل مصدوم كايشوف فيها ويشوف فصخر وشحال عجبو لحاااااال فديك اللحظة وكأنها نتاقمت ليه منو وبلاما يشعر بدا كايصفق عليها وكايقول بتفاخر :
- برافو عليك 👍.. تستاهلي التصفيقات .
حررت رؤية الطلقة الأولة ووجهت المسدس ناحية جبل لدرجة تلون وولا وجهو صفر وهو كايقول :
- لا ... لا ماديريهاش
ضحكت رؤية بمكر وقالت :
- اه غانديرها اجبل.
ضغطت على الزناد حتى أصابتو الصعقة الكهربايية وبدا كايتلوى فالأرض بألم ويغوت حتى حررت الطلقة من المسدس عاد تهدن وبدا كاينهش ويتنفس بقوة ... تجاهلت رؤية صراخ صخر لي كان باغي ينوض يقتلها لكن هي لي عندها سلاح وإلى إسترجى يقرب منها غادي تزيدو ضربة وحداخرا وهادشي لي مابغاهش .
شافت فيهم وغوتت بحدة وهي موجهة المسدس ناحيتهم :
- نوضو بجوج بيكم .
عاندوها ومابغاوش يردو عليها وتلهاو كايفكو خيوط الكهرباء من أجسامهم لكنها كانت مصرة تنوضهم بسيف عليهم .. فقالت بصوت ثابت وحاااااد :
- غادي نحسب من واحد حتى لـ 3 وإلى مانضتوش كانقسم ليكم غانصعقكم بالضوء حتى يبقى فيكم غير لعضام .
شافو فبعضياتهم جبل وصخر بغضب وكأن الواحد كان كايحمل المسؤولية للثاني فغوت صخر وقال بغضب :
- علاش كاتشوف فيا ماشي نتا لي عيطتيلي باش نجي لهنا .. عنداك ارؤية هو لي بدا الضرب .. هو لي تهجم عليا لأول .
- جووووووووج ... إلى نطقت ثلاثة ومالقيتكمش واقفين غادي نقتلكم بجوج ...
وقبل ماتنطق رقم ثلاثة وقفو بجوج بيهم بخوف .. كانو حوايجهم مقطعين .. تيشرت صخر مشرك من العنق والسوميج ديال جبل مقطعين ليها صدايف ومغبرين وحالتهم حالة بينما بعض الكدمات على وجههم بجوج .. كان منظرهم مضحك وفنفس الوقت كايعصب .. كانو كايشوفو فبعضياتهم بنظرات الوعيييد والإنتقام قبل ماتقاطعهم رؤية وهي كاتشير بالمسدس للسيارة :
- ركبو بجوح بيكم .
وفاش ماجاوبوهاش كملت بغيظ :
- هاد لمرة ماغاديش نحسب حتى لثلاثة وبلاما نعاود هضرتي غادي طلعو فطوموبيل ولا صعقتكم بجوج .
قلب جبل عينيه بغيظ وتوجه لسيارتو وبغا يركب فمقعد السائق لكن رؤية غوتت وقالت :
- ركب لوووووور .. فالخلف أنا لي غادي نسوق .
تنهد بقلة حيلة وفتح الباب الخلفي وركب وبقا صخر واقف معاند وغير شافت فيه قال بغيظ :
- أنا مستحيل نركب فسيارة داك بنادم .
وضعت رؤية صبعها على الزناد وقالت ببرود :
- واخا لي بغيتي
لكن قبل ماتضغط طار صخر ومشا باغي يركب فالمقعد لي بجنب السائق لكن رؤية غوتت وقال :
- لاااا .. ركب حدى خوووك لووووور .
عض صخر على شفتو السفلية باش يكتم عيظو وتمتم بغضب :
- هادي عندها غير مسدس كهرباء وشنو دارت فينا وكون كان عندها مسدس حقيقي .
سمعاتو رؤية وردت عليه بزعاف :
- كنت غادي نفجر ريوسكم ... ركااااب .
قلب عينيه بملل وفتح الباب وركب حدا جبل وهو كايتمتم بمسبات وشتائم حاول جبل مايديرش راسو فيه وقلب عينيه كايشوف فالجانب الأخر علاما ركبت رؤية فمقعد السائق وهي كاتقول بسخرية :
- داييرين بحال البندير لامنزلتش عليه اليد بتصرفيق مايطبلش .. إلى سمعت أصواتكم غادي...
قاطعها صخر وقال بغضب :
- بلاما تعيشي اللحظة حيت زدتي فيه ارؤية .
تنحنحت رؤية وقالت بإحراج وهي كاديماري السيارة :
- اووه كانعتاذر من سيادتكم الموقرة ..
____________
قلعة ميخور بارون / إيبيزا
توهجت حديقة ميخور بألوان وأضواء وكأنها نجوم فعز السماء الكحلة .. كان وسط الحديقة ثلاثة ديال الطبلات طوااااالين مزوقن بفخامة فوق الحدود .. كيسان من الكريسطال كايلمعو ومجموعة من الأطباق والأواني لماركات عالمية ومناديل ناصعة البياض وجو دافئ وسماء صافية وبدر مكتمل .. كان جو ديال الإحتفال بحق بينما كالسين البنات والرجال على أريكات الفاخرة فنصف الجردة وبين يديهم فناجين القهوة .
إستغل أسد الفرصة فاش ناضت نورسين ولبنات يضورو فالحديقة مع باتريسيا والدون ماركيز لي كان مشغول كايتاصل بجبل وقرب من بهجت كلس حداه وقبل ماينطق بشي كلمة قال بهجت بلهجة سيد الأسياد:
- الوحش المضلم (لقب أسد)إخترق بند من بنود إتفاقية السيادة .. أشنو كاتقتارح فطريقة عقابو بما انك واحد من الأسياد أسي مالك .
تنهد أسد بإحباط ويبدو أن لقب الوحش المضلم مابقاش لايق ليه عند أول مهمة ليه بعد رجوعو ماقدرش يقتل إيزيك بسبب تهورو وزادها كشف هوية سيد الأسياد لجبل بكل غباء.
- نلتمس من سيادتكم العفو سيدي .. جبل طلب مني نتوسط ليه عند الأسياد باش ينقد روعة وقالي بأنه عندو خلاف معاك هذا علاش أنا ظنيت بأنه عارف بما أنك جدو ..
- وشنو لي خلاك تتأكد أن جبل حفيدي .. واش ماسبقلكش سمعتي إسمو الكامل .. "جبل محمد إبراهيم مرتجى " ومن المفترض يكون إسمو "جبل بركات بهجت مرتجى "
عقد أسد حواجبو بإستنكار وقال :
- كيفاش يعني ؟..
أخد بهجت رشفة من فنجان القهوة بهيبة وقال بهدوء :
- يعني حفيدي جبل ناكر أصلو وناكرني لدرجة متخد إسم أخي إبراهيم وإبنو محمد الله يرحمهم ومكمل بيهم إسمو .. هو ماباغي حتى حاجة تربطو بيا ..
- اه ولكن صخر إسمو الكامل هو "صخر بركات بهجت مرتجى " وصخر هو توأم جبل يعني أحفادك بجوج .
وضع بهجت فنجان القهوة على الطاولة ثم شاف فأسد بنظرة قاتلة وقال:
- تمام ... هوما أحفادي بجوج لكن واحد ناكرني والثاني لا ..
وكمل بغضب :
- وأنا مابغيت حتى شي مخلوق فالكون يعرف الخلفية ديالي شكون ما كان يكون باش تجي نتا لي وضعت فيك ثقتي وبكل بساطة تفضح كولشي لجبل لي هو فالأصل كايكرهني وواضع يديه فيد الإنتربول .... هادي مانقبلهاليكش اسي أسد .
قبل مايلحق أسد يدافع على نفسو سبقو بهجت وقال :
- خليني نحكي ليك واحد الحكاية إنجليزية قصيرة اسي أسد ..
تكى على ضهر الأريكة ودار رجل على رجل بشموخ ثم بدا كايمسح على لحيتو البيضاء الطويلة وهو كايقول :
- هذا واحد الضفدع كان كايستاعد باش يعبر النهر من ضفة لضفة أخرى ، وهو كايستاعد .. إذ به لقا عقرب كايقول ليه... "واخا عاونتيني نعبر النهر معاك؟" ....فقال ليه الضفدع ببراءة: علاش واش ماتقدرش تعتامد على نفسك وتعبر بوحدك؟" ... فجاوبو العقرب وقال ..."أنا مكانعرفش نعوم باش نعبر النهر خصك تهزني فوق ضهرك حتى نوصلو بجوج !".... فقال الضفدع فاش بدا يدخلو الشك فيه .... "ولكنك مشهور بأنك كاتلدغ كل من قابلتيه ، واش معقول نسلمك ضهري وجسمي كولو وفين وسط النهر ؟ ".... فجاوبو العقرب بثقة وقال ..." أنا ماشي مكلخ باش ندير هاد الفعلة لأن حياتي بين يدك ، ولو لدغتك ، غادي نغرقو بجوج "....فاقتنع الضفدع بصدق العقرب, ووافق أخيرا باش يعاونو, وتسلق العقرب ظهر الضفدع ونطالقو بجوج في عبور النهر ، ولكن فمنتصف الطريق, فوجيء الضفدع بالعقرب يغرس شوكتو السامة في ظهر الضفدع أثناء العوم ، فخارت قوى الضفدع, وبداو كايغراقو تدريجيا، وسولو الضفدع وهو كايبكي: ..." علاش درتي هكدا ؟ واش ماقلتيش بنفسك غادي نغراقو بجوج إلى لدغتيني ؟"... فجاوبو العقرب وقال : ...." يا عزيزي.. أنا عقرب, وأنتا عارفني مزياااان , ولو ماعضيتكش وخدعتك ، علاش غادي نستاحق نكون عقرب هاذي طبيعتي !".... وغرقو بجوج وماستافد العقرب واالو من غرقه , سوي أنه أثبت أن عقرب, يندم من يصدقه, ويخسر من يثق فيه, ويغرق من اعتمد علي صدق كلامه ووعوده!.... انتهت الحكاية! ... واش قدرتي تلقا راسك وسط هاد الحكاية اسي أسد مالك .
قبل مايقول أسد شي كلمة سبقو بهجت وكمل :
- العقرب مهما كان فهو حشرة وماعندهاش عقل ودفعتها غريزتها تقتل الضفدع فمابالك بالإنسان لي كايقوم بالخدع والحيل ومع ذلك الله عطاه عقل .
رد عليه أسد وقال بحدة وهو كايشوف نورسين جايا مع البنات :
- سي بهجت أنا ماعمري خدعتك .. وماشي من شيمي الحيل ولا المكر .. لكن تقدر تعتابرني وسط هاد الحكاية لي حكيتيها ، الضفدع الغبي لي صدق مكر حفيدك جبل وغرق وغرقو معاه .
ابتسم بهجت ودغيا بدل الموضوع فاش وصلات نورسين ولبنات .. حفيدو وكايعرفو مزيان وإلى قال عليه أسد عقرب فراه ماكدبش لكن أسد مكانش عليه يكون ضفدع .
كلست باتريسا فالوسط بين بهجت وبين اسد ودارت رجل على رجل بطريقة مثيرة بحيث ان فستانها الأحمر الضيق إرتفع وكشف عن نصف افخاضها البيضاء الحليبية ...
قرب الدون ماركيز من بهجت وقال ليه فودنيه:
- كانصوني على جبل ومكايجاوبنيش وتلفون صخر خارج التغطية انا خايف لايكون واقع ليهم شي حاجة ولا يكونو تعرضو ليهم رجال شاهين .
تشوش بهجت من كلام داوود واستقام وهو كايقول :
- خييير اللهم اجعلو خير .
فالممقابل ديالهم كانت صوفي وتاليا ونورسين كايتبادلو بعض المعلومات على نفسهم وكايتعرفو على بعضياتهم اكثر وكايضحكو بينما كان أسد ساهي وكايفكر فالمشكل لي تسبب ليه جبل فيه ، بينما بقات باتريسيا كالسا بوحدها فجنب أسد وكاتأفف بملل فالتفتت لعند أسد فاش لاحظاتو ساهي وقربت لعندو شويا بمياعة وهي تشوفها صوفي غير بنصف عين وقالت بهمس:
-بانولي شي وحدين عينيهم غير كايضورو
شافو فيها نورسين وتاليا وهي دير ليهم صوفي اشارة بحاجبها باش يشوفو فباتريسا فضارو بجوج بيهم ورجعو تاليا وصوفي شافو فردة فعل نورسين لي كانت مبلوكية من منظرهم .
ابتسمت باتريسيا ابتسامة مثيرة وشافت فأسد وقالت:
-مكاتبانش ليك نورسين غليضة وخصها تنقص شويا !.
شاف فيها أسد ورد عليها بإستفهام:
- عفوا ماسمعتكش شنو قلتي كنت ساهي ؟
شافت باتريسيا فنورسين لي كانت كادير فيها نظرات الشر وإبتسمت بمكر ثم رجعت شافت فأسد وقالت وهي كاتعض على شفتها السفلية بغنج :
- اممممم ياترى فاياش كنتي كاتفكر ؟
تنهد اسد بضيق ورد عليها ببرود ؟
- فشي أمور شخصية.
همهمت باتريسيا وقالت بغنج ماكر :
- هممم ..كايتعلق بنورسين مثلا !.
عقد أسد حواجبو بإستفهام وقال :
- مافهمش اش كاتقصدي !.
قربت لعند ودنو وهمست بصوت مثير :
- مالاحضتيش أنها غليضة ، باينا فيها كاتاكل لي جاها فطريق ومامهتماش برشاقتها بالإضافة لطريقة لبسها السوقية والرسمية فوق اللزوم شويا ، كاتبان بحال شي موضفة فبنك ومافيها حتى شي علامة ديال الأنوثة .
تبادلو صوفي وتاليا نظرات الصدمة ورجعو شافو فنورسين لي كانت غادي طرطق وهي كاتشوف باتريسيا كاتهمس فودن راجلها ونص فخاضها عريانين و ماجايها لا برد ولا سخط .. تنحنحت تاليا وقالت :
- احم ... كايبان لي شي واحد باغي يرتكب جريمة قتل اليوم!
بلا عكز على صوفي شدت ليها فيديها حيت كان كايبان ليها فنورسين مكاغاديش تتردد تنوض تجرها من شعرها .... هز أسد عينين وهو يلقى عيون لبنات مختارقينو وبلخصوص عيون نورسين لي كانو بحال جوج رصاصات فأي لحظة ممكن تيري فيه وتقتلو فتنحنح بتوتر وشاف فباتريسيا وقال:
- شفتتي داك الشعر لكحل ودوك لعينين بسببهم قدرت نورسين طيحني فشباكها .. انا هضرت ليك غير على الشكل ماشي الجوهر حيت على مابان لي نتي كاتهتمي غير بالمضاهر .
قلبت باتريسيا شفايفها بغيظ وكانت مستعدة تجاوبو لكن رسالة فتلفون أسد قاطعتها وغير قرأ التهديد لي وصلو من عند نورسين ماحسش حتى لقا راسو واقف وحرك رجليه وسط الحديقة فبسرعة ناضت نورسين وتبعاتو حتى بعدو عليهم وجراتو من يديه وهي كاتقول بزعاف وكاتشوف ليه فعينيه بشر :
- نتا إيمتا غادي دير عقلك وماتبقاش تشوف فشي وحدا من غيري هاااه !!؟
توتر اسد وعرف راسو قفرها معاها لكن فنفس اللحظة عجبو لحال فاش بينت نورسين غيرتها من باتريسيا .. إبتسم وقال بمكر :
- انا احياتي كانشوف فلبنات باش نحمد الله على النعمة لي عطاني سيدي ربي
عارفها غادي تبقا لاسقاه لاماهضرش لكنه بدا كايحس بالتسلية .. دار يديه فجيب سروالو وقال ببرود:
- امور تافة وصاف .
شداتو من كرفاطتو ولواتها على يديها وجراتو لعندها بعنف و هي كاتقول بغضب :
- بغيت نعرف حتى لو كانت قمة قمة قمة التفاهة .
ضحكت تاليا وهي كاتشوف فمنظر نورسين لي شانقا على أسد وقالت بسخرية :
- صوفي .. ناري جيفاتو هههه
لكن فاش ماجاوبتهاش صوفي ضارت براسها شافت فيها ولقاتها ساهيا كاتشوف بعينيها فنقطة محددة فتبعت تاليا مجال نظرها وهي تجي عينيها على عصام لي كان متكي على شجرة وكايدخن سيجارة بهدوء .. مدت صبعها نغزت جنب صوفي حتى طيرتها بالخلعة وقالت:
- هاااه شنو واقع ؟ .
إبتسمت تاليا بمكر وقالت :
- امم كاتبانلي واحد الشرارة ديال الإعجاب كاتطار هنا .
ضورت صوفي راسها كاتقلب وقالت بغباء :
- فين هي ؟
ضحكت تاليا وقالت بسخرية :
- داخل قلبك اصفصوفتي ... قليبك صغير كايقلب على عصوميي .
تسمرت صوفي كاضور هضرتها فعقلها حتى إستوعبت الأمر وقالت بهتاف وإحراج :
- اااش كاتقولي ولي لا .. اش كاتخربقي هههه مستحيل غير كايبان ليك .
بقات تاليا كاضحك ثم ناضت وهي كاتقول :
- غادي نمشي نشوف مايسي لاتكون فاقت وكاتبكي ..
ناضت صوفي بسرعة وتبعاتها وهي كاتقول:
- تسناااي ديني معاك .
وقفت تاليا وضارت عند صوفي وقالت وهي كاتبتاسم بخبث:
- بلاتي ... كاتعرفي تبدلي ليكوش !؟.
تسمرت صوفي وقالت:
- ااام لا ماعمري بدلت ليكوش لشي بيبي .
همهمت تاليا وقالت :
- هممم سؤال اخر ، كاتعرفي تصوبي رضاعة ؟.
إبتسمت صوفي وقالت بحماس:
- رضاعة ساهلة .
بادلتها تاليا الإبتسامة وقالت وهي فطريقها للداخل :
- إذن تبعيني عندنا مايدار ... غادي نحممها وبغيتك تعاونيني فيها باش مانزدقش قاتلاها ولا مغرقاها ولا عامياها بشامبو .
فالجانب الأخر من الحديقة كانت نورسين شانقا على أسد حتى بغا يغراق فحوايجو من شدة الإحراج من الحراس لي كانو واقفين فأماكنهم كايحرسو القلعة .. شد ليها فيديها وباسها وقال وهو كايفك لكرافاطا من بين يديها
-مستعدة تسمعي وماتعصبيش !
طلقت من كرافاطتو وقالت بغيظ :
- هو في كلتى الحالات نتا اليوم غادي تموت على يدي غير نطق باش تموت ونتا مرتاح .
تنحنح أسد وقال بإحراج :
-ااه دابا طمنتيني ...
وكمل :
- يالالة قالت لي بلي نتي غليضة ...
شهقت نورسين بصدمة وقالت :
- ااانا ... انا غليضة غادي نمشي نوريها
شد فيها أسد قبل ماتحرك وقال وهو كايبتاسم بتوتر :
- ولكن انا كانموت على الهبرة ولحم .
وقفت نورسين وضارت عندو غير بشوية طلعة وهبطت فيه ثم قالت :
- كيفاش ؟؟.. بصح !.
أومأ أسد ورد عليها بسرعة:
- اااه
ربعت يديها وقالت بتررد وهي كاتخيل راسها غليضة وكرشها خارجة بسبب الحمل :
- حـ حلف بالله.
- والله لقاسام
رمشت بطريقة طفولية وقالت وهي كاتحسس الجنين لي فكرشها :
- طمنتيني حيت علاما بان لي مازال غادي نزيد نغلاض.
رفع أسد حاجب واحد وقال بإستغراب:
- متأكدة !.
أومأت براسها وعلى وجهها نظرة بريئة وطفولية وقالت:
- مع لأسف .
- بدا كايضحك أسد على لطافة مرتو لي كايحماق عليها ثم خداها فحضنو وقال:
- هههه نتي غير غلاضي اصلا فصالحي باش نلقا فاش نشد
بعدت راسها على صدرو وقالت بإستفهام:
- كيفاش !
طبع قبلة على أرنبة أنفها وهمس بصوت رجولي مبحوح:
- كيف سمعتي.
ضحكت نورسين وقالت بسخرية :
- الله يعطيك لمسخ .
طبع قبلة أخرى على خدها وكمل وهو كايمرر يديه على شعرها الأسود :
- زعما هاد القلعة كبيييرة حتى لهاد الدرجة مانلقاوش فيها شي بلاصة خاوية نستمتعو فيها شويا !.
فمقابلهم كانو عيون كايتفرسوهم بنظرات الحسد والغيرة .. ماكرهتش حتى هي يكون عندها زوج شاب يعيشها فالرومنسية ويبوسها ويعنقها ماشي بحال داك شارف لي مابغاش يموت .. تنهدت باتريسيا بملل وهي كاتفكر فمصيرها المجهول ... الرجل لي دارتو ياحصرة طريق للغنى والرفاهية كتب لحفيدو كل أملاكو وهي ماخلالها حتى باش تنقي سنانها تحت عذر أن "كلشي ديالك وحفيدي ماغاديش يحرمك من حقك" ..
كل لفلوس والجاه والأملاك غادي تبرع بيهم ديك المدمنة حبيبة جبل . روعة ولا اش كان سميتها إيميليا .. عندها جوج سميات ويعلم الله شحال من وجه غادي يكون عندها .. لكنها كاتبقا مدمنة تافهة .. لا جمال لا قوام ...
قلبت عينيها بتثاقل وعلات راسها شافت فالغرفة ديال صخر لي كانت ناعسا فيها روعة وظهرت على وجهها أخبث إبتسامة على وجه الأرض ماقاطعها غير وصول سيارة جبل الكبيرة ،فنزلو منها بثلاثة بيهم وواحد قالب وجهو على ثاني .. كانت رؤية كاتبتاسم بسخرية على منظرهم حتى لمح جبل أسد داخل الحديقة وكان محتاج يسولو على حاجة مهمة ..
إنضم جبل لنورسين وشاف فأسد لي بقا حاير فشكون فيهم هو جبل حيت صخر لحق عليه وكان واقف موراه ، كانو بجوج كايتشابهو بطريقة كادير حريق الرأس ... لكن أسد ماعرف لاواش يقول لجبل على سلامتك ولا يلومو حيت فرشو مع البارون الأعضم فكانت المبادرة مع عند جبل تقدم عندو وسلم عليه بلوجه و قاليه فودنيه بخصوصية :
- إيزيك..
تأكد أسد أن لي حداه جبل وقاطعو وقال بحدة وغضب :
- مات .
توسعو عيون جبل بصدمة لكن الوقت ماشي ديال الهضرة فهاد لموضوع قبالة كولشي :
- من بعد ونهضرو فهاد الموضوع .
قالها جبل وهو كايشوف فصخر لكن أسد كان مصر يفرش كولشي حدى خوه كيما فرشو هو مع جدو فعاود ليه على لي وقاع من A حتى لـ Z قبالة صخر لي تسمر كايسمع بفضول وحتى رؤية وباتريسيا ونورسين لي بقات كاتحرك راسها يمين وشمال على تسرع أسد وإلتحقو بيهم الدون ماركيز وبهجت سمعو التفاصيل من فم أسد ونورسين ..
تنهد بهجت بهدوء وقال وهو كايشوف فأسد :
- يعني إيزيك مات مسمم داخل مقر الإنتربول ..
تنحنح أسد بتوتر مهمة قتل إيزيك كان من المفروض هو لي يقوم بيها لكن وقاع لي وقاع وهذا كايتعتابر إخفاق أخر فمسيرة أسد مع منظمة العدالة .. تدخل أسد وقال وهو كايبتاسم :
- هاحنا حيدنا عليها واحد فقائمة أفضل الرجال فالكاريبي والعقبة للباقي ..
وافقوه الرأي كاملين لكن صخر كان عندو مايضيف .. تنحنح وقال بطريقة دراماتيكية :
- تقدرو تقولو جوووج ... جوج لي زالو من قائمة أفضل رجال الكاريبي .
شافو فيه كاملين وقالت نورسين:
- اشنو كاتقصد اسي صخر ولا جبل ولا شكون نتا !!.
دار يديه فجيابو وقال بإبتسامة عريضة :
- إيدوارد أليكزاندر حتى هو مات .
رد عليه جبل بغضب :
- أشنو كاتخربق نتا .. أنا شفتو بعيني وهو كايتيري ناحيتنا برصاص مع باقي رجالو ورجال شاهين .
قلب صخر عينيه بغيظ وقال :
- تيق ولا كاااع ماعمرك تيق .. إيدوارد أليكزاندر مات وإيميليا كلارك هي لي قتلاتو .
شهقت نورسين بصدمة وتسمر جبل حتى لقا راسو كايشوف فالسرجم ديال الغرفة لي ناعسا فيها وهو كايفكر فحالتها النفسية .. إستوعب أخيرا أن روعة دوزت مصائب لا يعلم بيها غير الله وحده ، هو شاف نهار لي بغا يدربها على التصويب بالسلاح كانت رافضة حتى انها تقيص المسدس بيديها وفاش تطلقت أول رصاصة من مسدسها غوتت بقوة الخلعة ... رفع عينيه فصخر وقال :
- كيف وقاع ليها ؟ .
تنهد صخر ورجع بذاكرتو للخلف كايتفكر دوك الأحداث وقال :
- بعدما قدرنا نهربو من تحت الأرض إعترض طريقنا إيدوارد الكلب وهجم علينا .. كان باغي ياخد إيميليا لكنني وقفت فوجهو وتقاتلت معاه .... أنا وياها كنا بلا سلاح وهو موجه مسدسو ناحيتنا ..
غمض عينيه وكمل وهو كايفتحهم وكايشوف فجبل:
- داكشي داز بسرعة لكن الحمد لله قدرنا أنا وياها نحيدو ليه سلاح ووقاع بيني وبينو عراك باليدين لكن اللعين كان عندو موس كبير ديال الصيد ..
تنهد صخر بوهن وكمل وهو كايشوف فالسرجم لي داخل غرفتو روعة :
- لولاها كنت أنا غادي نكون ميت دابا ، لكن ديك البنت قاومت ألمها ورجليها لمكسورة وزحفت حتى وصلت للمسدس وتيرات رصاص فسماء و قدرت تنقدني من حد الشفرة ، لكن اللعين طار على إيميليا وبغا يقتلها لكنها طاكات الضربة لي كانت غادي تجيها فوجهها بيديها علاما قدرت نوض وهجمت عليه وتلاحينا عليها بجوج كانتقاتلو حتى تطلقات رصاصة من المسدس ولحسن الحظ جات فيه .
شاف صخر فأسد وقال:
- إيميليا ماكانتش باغيا تقتلو لكن الرصاصة خرجت بالغلط وإستقرت فجسم داك ولد لكلبة فبلاما تكلسو تتاهموها ياأصحاب القانون..
- واعدتها نحميها ووفيت بوعدي واخا بكات على صدري .. وكانت خايفا بزاااف لكنني عنقتها و قدرت نواسيها ونصبرها حتى وصلتها فأمان وعلى خير كيف واعدتها .
قدر يلمح صخر بعينيه قبضة جبل لي كانت مشدودة بغضب .. كان كالس على أعصابو وهو كايسمع لكلامو وأخر جملة قالها على الحماية ماكرهش كون شق ليه فمو وهرسو ليه .. قصدو بأنه هو قدر يحميها بينما جبل لا ... واللعنة شكون لي وصلها لتما لولا فعايلو شيطانية ...بسببو خطفوها السفلة ديال الكاريبي ودابا كايتفاخر عليه وزايدها كايقول عنقها وواساها وبكات ليه على صدرو .. حس بالقلب دالو كايتكوى بنار الغيرة ..
وقف جبل وهو كايدير فخوه نظرات الغضب وتوعدو غير بعينيه ثم تخطاه ودخل للقلعة متوجه لعند روعة يطمن عليها بعدما سمع شنو دوزات فقالت باتريسيا بسخرية وهي كاتشوف فصخر :
- ديك لبنت دوزت أكفس يوم فحياتها مسكينة شافت الموت بعينيها .
تفكر بهجت فاش وراه جبل الفيديو ديال إيدوارد وهو كايخنقها وتعاطف معاها حتى هو فتنهد وقال :
- عندك الحق ، عانات بزاااف وخلصاتنا من وجه الشر إيدوارد أليكزاندر ... لكن مازال باقي راس الحية عايش ومادامو عايش غادي يبدا يولد ويجمع فالحلفاء من جديد.
واقفاتو نورسين وقالت برزانة وجدية :
- حنا أسي بهجت دايرين لي فجهدنا باش نتخلصو من جماعتو الملعونة وإنشالله ينصرنا الله عليه .
إبتسم بهجت بهدوء وقال :
- نتوما كاتقصدي بيها المخابرات ؟ .
شاف فيه أسد ورفع حواحبو بمعنى إنتبه لداكشي لي غاتقول .. لكن بهجت ماشي مكلخ .. شاف فنورسين لي أومأت براسها بمعنى "اه" وقال بصوتو المهياب :
- الله يقدركم عليهم ، والله ينصركم على دوك الضالمين !.
البارون الأعظم الجزء 63 مجانين
محتوى القصة
التنقل بين الأجزاء