طلع جبل مع دروج وهو كايخلف بدل الدرجة جوج باغي غير يوصل لروعة باش يطمن عليها وشحال حس بالقهرة بعدما عاود صخر شنو وقاع ليها وكيفاش حتى إضطرت تقتل إيدوارد ... كان صخر تابعو من الخلف حتى شاف جبل غادي يدخل لغرفتو وهو يقول بهتاف .
- اااسي ... اااسي أفندي فين غادي؟ .
وقف جبل وضار لعندو وهو كايقول بإستهزاء :
- فين فنظرك ؟.
طلع صخر وهبط فيه وقال:
-شوف نتا !، هاديك راها غرفتي .
ربع جبل يديه لصدرو وقال :
- ااام معلومة قديمة ... لكن البنت لي لداخل مرتي .
طلع فيه صخر وهبط بنفس طريقتو وقال بفضاضة:
- وإن يكن ..ماعندكش لحق تدخل لغرفتي حيت فيها مسائلي الشخصية وزايدون أنا باغي نبدل حوايجي وندوش ..
تكى جبل على الباب بجنبو وكأنه كايتحداه يدخل وقال بغيظ:
- دابا انا نخليك نتا تدخل للداخل وتبدل حوايجك حدى مرتي ودوش عادي .. كانبان ليك أنا ديوث هاه.
قلب صخر عينيه بملل وقال:
- أولا عندي غرفة ديال تغير الملابس ثانيا الحمام عندو لباب .
تنهد جبل بقلة صبر وقال :
- دابا عرفتي شغادير باش مانخليش دار بوك .. بدل ساعة بخرى .
قرب منو صخر بغضب وقال :
- هاد لهضرة أنا لي غادي نقولها ليك .
فتح جبل فمو باش يرد عليه لكن قاطعو صوت باب موراهوم تحلات فضارو بجوج بيهم ولقاو تاليا واقفا وبين يديها مايسي لي كانت هادئة بسبب الحمام الدافئ وفجنبها واقفا صوفي لي بقات حالا فمها وهي كاتشوف فجبل وصخر ..
ضارت صوفي عند تاليا وقالت ببلاهة :
- تاليا عافاك ، قنعيني أنني مكانشوفش فلمراية! .. واش فيهوم جوج ولا أنا عيني حوالو؟ .
لكن تاليا مستحيل يتلف عليها جبل كانت كاتشوف فيه وبلاشعور دموعها نزلو وطارت عليه عنقاتو وبين يديها مايسي .. عنقها حتى جبل وهو كايبتاسم ثم باس ليها راسها بحنية وطبطب على راسها وهو كايقول بهمس :
- شووو صافي أصغيورة ديالي أنا بيخير احبيبتي ماتبكيش .
كان صخر واقف وكايشوف فمنظرهم .. حتى هو خوها! وحتى هو كان غادي يموت ، علاش ماعنقاتوش بنفس الطريقة ، حتى فصبح فاش عنقاتو كان كايحساب ليها جبل وفاش عرفاتو صخر كحزت عليه وكأنه فيه شوك ولا كايعض .. حس بالنقص ساعتها وماكرهش هاد لمرة بصح يكون جبل كولشي كايبغيه وعندو مرة كاتحمق بحال إيميليا ، لكن هو ماعمرو نجح فشي حاجة فحياتو ، الحاجة لي كايعرف يديرها هي يصنع لقنابل ويفجر بنادم .
شافت فيه تاليا وكانت باغيا تعنقو حتى هو لكن كانت خايفا من ردة فعلو بحال صبح فاش تعامل معاها ببرود حتى قاطعتهم صوفي وهي كاتقول بهتاف:
- هييي هووو ياااعااالم .. حتى انا كاينا هناااا .. هو واخا ماتربيتش معاكم ولكن راني بنت خالكم ياحصرة .
تصدمو فيها بجوج جبل وصخر وهوما كايشوفو فبنت دون ماركيز لي ماعمرهم شافوها فقلبت صوفي عينيها وقالت بسخرية :
- على الأقل بينو شويا ديال الحماس حيت شفتوني أول مرة .. بيناتنا صلة دم ياحصرة . اااخ على هاد لعائلة الباردة لي كنت كانتحرق شوقا باش نشوفهم .
ضحك جبل بسخرية على خفة دمها بينما إبتسم صخر بهدوء لكن دغيا إنتبه لنفسو وجمع الإبتسامة لكن صوفي لمحتها وبتاسمت ليه بهدوء
قال جبل:
- أهلا صوفيا بنت عمتي لباس عليك ؟
ضحكت صوفي وقالت :
- اوووه لا سميتي صوفي هاكدا كايعيطولي صحباتي وحتى نتوما غاتناديوني صوفييييييي.
قربت من جبل بحماس سلمت عليه وهي كاتقول :
- بلا شك نتا جبل .. عرفتي كيفاش عرفتك حيت عندك واحد لكاريزما فشكل .
ضحك جبل بسخرية وقال :
- اووه ... وااااو ... بصح !!
- اااايه ..
قالتها وكملت وهي كاتشوف فصخر وكاتشير بصبعها سبابة ناحيتو :
- ونتاا صخر .. عرفتي باش عرفتك ؟ .
تسناتو يدير شي ردة فعل لكنه كان كايشوف فيها ببرود وكل لي دارو هو على حاجب واحد وطلعها من راسها حتى لرجليها .. تنهدت صوفي بملل وقالت:
-قول باش عرفتك! .
لكن ماجاوبهاش واستمر على نفس النظرة فتنحنحت بإحراج وقالت:
-احم... تماما عرفتك بهاد النظرة حيت غير كاتقلب فعينيك وحتى حاجة ماعاجباك ومكاتعمر ليك لعين ! حتى فصبح فاش شفتينا تصرفتي معانا ببرود ... ياااااسيد بردان .
تبلد وجه صخر وهاد لبرهوشة بدات كاطلع ليه فالراس فقالت تاليا باش تنقد الموقف :
- احم احم صوفي
شافت فيها فغمزتها تاليا ورجعت شافت فملامح صخر المتبلدة وقالت:
- اووبس استسمح الى جرحت مشاعرك .
قلب صخر عينيه وقال ببرود:
- عن إذنكم .
مشا صخر وتبعوه عيونهم كاملين وشعر بيه جبل .. حس بأن هضرة صوفي قصحاتو من الداخل .. توأمو وكايحس بيه هادي هبة من عند الله ماعندوش دخل فيها .. شافت فيهم صوفي وقالت بإحراج:
- واقيلة زدت فيه .
ماجاوبوهاش بجوج وإكتفو بالصمت حتى لاحظ جبل مايسي لي كانت كاتشوف فيه بعويناتها صغيورين وإبتسم لا شعوريا .. هو كايموت على لوليدات صغار وهاد لملاك كاتشوف فيه ببرائة بلا شك بغاتو ياكلها بحال شي قطعة مارشميلو .. قرب منها وباسها من عويناتها وهو كايصلي على نبي باش مايعينهاش وقال :
- شكون هاد البنيتا زوينة.
إبتسمت تاليا وقالت:
- هادي لكتكوتا لغزالة لي كاتحمق هي مايسي بنت خت رافاييل .
رد عليها جبل بإستفهام:
- واش رافاييل هنا ؟.
تنهدت تاليا بحزن وقالت:
- لا كايوجد للجنازة ديال ختو وراجلها.. غدا غادي يكون الدفن واجب علينا كاملين نحضرو ونواسيوه كاينا ولا لا .
أومأ جبل براسو وقال بهدوء وهو كايمرر يديه على رأس مايسي الصغير :
- اكيد غادي نوقفو معاه كاملين ..
ثم طبع قبلة بين عيون مايسي الصغار ، فعلا تغرم بيهم وتغرم بيها كلها هاد رابعة ديال اللحم ..كان كايبتاسم حتى قالت تاليا برجاء:
- خويا! .. واخا دخلت نشوف روعة كيف بقات ؟.
تنهد جبل وقال :
- ااام من الأفضل اختي خليها ترتاح شويا ... ومن بعد شوفها غادي تبقا معاك لعمر كامل .
وكمل :
- اه نسيت شي حاحة ..
خلاهم واقفين وهبط جبل لسيارتو باش يجيب البوكيه ديال الورد لي خلاه فلكوفر .. فاش مشا يشريه داز فطريقو عند الصائغ لي شرا من عندو الخواتم وردهوملو وخدا بدالهم طوق ألماسي غادي يحمق روعة مافيهاش الشك. .
بينما بقات تاليا وصوفي واقفين فالممر فإستأذنت تاليا وقالت:
- شويا وغادي نرجع اصوفي نزلي للحديقة لابغيتي .
تنهدت صوفي وقالت بملل :
- أري عليك مايسي إلى عياتك.
إبتسمت تاليا وباست مايسي من خدها وقالت وهي غاديا:
- مستحيل تعيني هاد الملاك .
تنهدت صوفي فاش بقات غير بوحديتها وقالت بغيظ :
- برافو عليك اصوفي برافو كاتعرفي غير تكحليها لسانك كاياكلك الله يستر .. دابا كيف غاندير نصلح لوضع مع صخر .. أكيد غادي يحقد عليا .
تمشات تاليا فالممر وكانت كاتقلب على صخر بعينيها حتى قدرت تلمح خيال جسمو الرجولي داخل شرفة الطابق الثاني ... كان صخر واقف وشاد بيديه حافة الحدايد لي كايطلو على الحديقة فالأسفل وبين أصابع يديه لمزينة بخاتم رجولي فضي سيجارة كايدخنها وينفث دخانها بهدوء فالهواء .. تمشات تاليا حتى وقفت حداه لكنه مانتابهش ليها حيت كان ساهي حتى إنتبه لصوت أنين الطفلة مايسي لي كانت كاتعض فيديداتها الصغار ..
إلتفت براسو وإستغرب فاش لقى تاليا واقفا بجنبو وكاتشوف فالمدى البعيد ولا ديك الأمورة لي بين يديها .. كان كايشوف فختو بنت ناضجة ومايسي زادتها حسن وعطاتها هالة من الأمومة والحنية .. كانت تاليا ملاحظة عيونو لي كايشوفو فيها وكايتفحصوها لكنها حافضت على هدوئها وصمتها .. مكانتش عارفا شنو تقول ولا باش تبدا معاه الحديث كأي أخ وأخت .. تنهدت بهدوء ورفعت صبعها للسماء وقالت :
- شفتي ديك النجمة لي قريبة من البدر .. هاديك النجمة لي كاتلمع وكاتبان كبيرة .
ماجاوبهاش صخر فضارت شافت فيه ولقاتو كايشوف فيها بملامح مامفهومينش بين تعبانين وبين غير مباليين حتى أومأ براسو كتجاوب مع الحديث لي بغات تفتحو معاه ...
إبتسمت تاليا وقالت :
- هاداك النجم سميتو سديم ... سديم الجبار .... سديم الجبار هو أشد السدائم بريقا حتى أنك تقدر تشوفو بالعين المجردة وكايبعد علينا ب 1350 سنة ضوئية هي سحابة متكونة من مجموعة نجوم وكاتنتامي لمجرة "درب التبانة" كايقولو بأن عرض سديم الجبار هو 24 سنة ضوئية ... فالنصوص القديمة كاينين العلماء لي كايسميوه سديم الجبار وكاين لي كايسميه سديم الجبار الأعضم بينما النصوص الأقدم كايسميوه "إنسيس" .. وأهم النجوم المحيطة بسحابة سديم الجبار هوما نجوم برج "الجوزاء" ولي هو برجي أنا والكوكب ديالي هو عطارد ...
ظهرت أخيرا إبتسامة مهتمة على ملامح صخر .. إبتسامة خلات تاليا تتحمس أكثر أنها تزيد تهضر معاه .. عاوطات مايسي فيديها وقالت بحماس :
- ونتا شنو هو البرج ديالك ؟ اااه نسيت نتا برج الثور بحال جبل مشات على بالي أنكم توأم ..
تنهد صخر ورجع البرود لملامحو لكنها مع ذلك كملت بحماس :
- النجم ديالك كاين بين نجم "الدبران" ونجم "الثريا" وللأسف ماتقدرش تشوفو بالعين المجردة خصك ضاروري تيليسكوب ، كتاشفو واحد العالم فلكي إنجليزي سميتو "جون راسل هند" وهاد النجم سمستو "T tauri"
"تي الثور" والكوكب ديال برج الثور هو الزهرة لي هو ثاني كوكب قريب من الشمس .. هو كوكب ترابي بحال كوكب المريخ وعطارد ... تسمى كوكب الزهرة بإسم "ڤينوس" نسبة لـ إلاهة الجمال عند الرومانين قديما وهاد الكوكب كايأثر بزاف على برج الثور . هذا علاش رجل برج الثور كايمتالك قدرة كبيرة من القوة والعزيمة ، ولكنه عصبي وماعندوش مشكل إطلاقا يفش غضبو فوجوه لأخرين .. كايدخل فأي تحدي مهما كان حجمو وخطورتو ومن مميزات برج الثور .. الثقة فالنفس ، الإجهاد فالعمل ،وكايبغي يساعد الناس ، وعطوف وجداب ،لكن عيوبو أنه ،عنيد ،وكسول ،ومتحكم ،ومادي ،وأناني .
ضحك صخر بلاما يشعر على لطافة أختو ... تاليا كانت بحال شي عالمة فلك صغيرة وإتضحلو شحال هي ضريفة .. واخا تصرف معاها فصبح ببرود لكنه ماعمرو كرهها حيت كاتبقا ختو .. صحيح كان معصب منها حيت كانت على علاقة مع هاري وكيف كايقول المثل لحمك منك واخا يكون خانز ولحم الخانز مايهزوه غير ماليه .. لكن تاليا كاتبقا بنت وهو كايحس بالمسؤولية تجاهها واخا ماعاشتش معاه وحمل المسؤولية لجبل حيت ماشددش عليها الحراسة وكيما بان ليه قبيلة جبل كايبغي تاليا بزاف لدرجة مكايبغيش يخنقها بالقيود ..
تنهد بوهن على سيرة ليليا وحتى هو كايعجبوه النجوم والكواكب حيت كانو كايعجبو ليليا الله يرحمها .. حرك رجليه لزاوية الشرفة وتبعاتو تاليا بعينيها بفضول حتى حيد الغطاء على جهاز التيليسكوب وجرو لعندها وهو كايقول :
- دابا كانضن غادي تقدري تشوفي نجم "تي الثور " و"الدبران" و"الثريا" وحتى "سديم الجبار الأعضم"
توسعو عيون تاليا بالفرحة وقالت بحماس :
- واااو عندك تيليسكووب
اه عندو تيليسكوب حيت هادي هي الحاجة الوحيدة لي خلاتها ليليا قبل ماتمشي وتسمح فيه .. التيليسكوب ديالها لي كانت كاتقضي ليالي شهر أكتوبر حاضيا سحابة النجم سديم الجبار والنجوم والكواكب المحيطة بيه ، هي الذكرى الوحيدة لي بقاتليه منها .. عطاتو تاليا الطفلة مايسي وطارت على التيليسكوب مخلياه موراها ماعارفش حتى كيف يدير يهزها .. لكن عيون مايسي البريئة خلاتو يبتسم لا شعوريا وضمها لصدرو وسند بيديه الكبيرة راسها الصغير وطبع قبلة على فروة راسها .. حتى هو كايحماق على الأطفال بحال جبل وأكثر ...
رفع راسو كايشوف فتاليا وهي حاشيا عينيها فالتيليسكوب وكاتبتاسم بحماس وتخيلها غير ليليا بشعرها الأسود لي ورتاتو من عندها بحق .. بقا كايشوف فيها وساهي حتى نزلت من عينيه دمعة شوق لأمو فسارع فإلتقاطها ومسحها بسرعة وهو كايشتم راسو على هاد المشاعر لي جرفاتو بسبب هاد البنت الحمقة وبسبب هاد الطفلة الصغيرة لكنه مايقدرش ينكر أن هاد لإحساس عجبو بزاااف ..
غوتت تاليا بحماس وقال :
- شفتو والله حتى شفتو .. نجم "تي الثور" هو و"الثريا" و"الدبران"
بقا مسمر ماعرفش شنو يدير حس بقلبو كايضرب بحنان الأخ لكبير .. هي راها عنقاتو بحالي عنقات جبل .. رفع يديه بلاما يشعر وحاوط خصرها النحيف وحنا راسو باس ليها راسها وهو كايقول بتردد وبصوت حاول ما أمكن يخليه بارد ومايدلش على المشاعر لي كايحس بيهم :
- العفو .. إلى بغيتي تستخدميه تقدري تجي فأي وقت بغيتي .
علات تاليا راسها شافت فيه بإبتسامة عريضة وباستو من خدو الرجولي وهي كاتقول :
- أكيد غادي نجي نراقب النجوم فالتيليسكوب ونشوفك حتى نتا ..
أومأ صخر بإبتسامة هادئة حاول يخفيها لكنه ماقدرش حتى إنتبهت تاليا لمايسي لي كانت ناعسة بين يديه فضحكت وقالت:
- مايسي عجبها حضنك أخويا .
شاف صخر فمايسي وإندهش فاش لقى عويناتها مسدودين وكاتنفس بهدوء .. وهذا إحساس أخر بالأبوة ماقدرش يقاومو فقال وهو كايمد ليها مايسي :
- هاكي ديها تنعس .
شداتها منو بهدوء وقالت بصوت منخفض باش ماتفيقهاش :
- بالمناسبة ماعرفتكش على هاد الأميرة .. هادي مايسي بنت أخت الرقيب رافاييل ديمورو لي قتلوهم مساكن دوك العصابة الله ياخد فيهم الحق ... البنيتا مسكينة يالاه عندها شهر وتحرمات من حليب أمها حسبي الله ونعم الوكيل فيهم .
تألم صخر فاش عرف أن مايسي مسكينة تيتمت بسبب الكاريبي وشعر بالغضب كايتزاد فقلبو عليهم ، يتمو البنت وكانو غادي يقتلو إيميليا وقهروها .. هو فرج ليهم مقر كامل ومغاديش يوقف حتى يفجر ريوسهم كاملين ..
خرجات تاليا ودات معاها مايسي وبقا هو واقف فالشرفة ... تكى على لحدايد وجبد سيجارة من جيبو ودارها بين شفايفو وقلب فجيابو على بريكة حتى لقاها و وشعل بيها سيجارتو حتى قاطعو صوت أنثوي حدى الباب ..
- سيد بردااان .
قالتها صوفي وهي كاطل عليه من الباب فقلب صخر عينيه بملل وتمتم بين شفايفو وهو كاينفث دخان السيجارة :
- هادشي لي بقا ..
تنهدت بيأس فاش ماجاوبهاش وكملت بإصرار:
- سيد بردااان واش كاتسمعني؟ .
عاوتاني ماجاوبهاش وكملت :
- سيد برداان ... واخا نضميت لسهرتك مع النجوم .
ضار صخر للجهة الثانية وماجاوبهاش ..خلاها كاتمتم بيأس لكن واخا ماعرضش عليها دخل .. هي دخلات .. وقفت موراه كاتفكر فشي طريقة كيفاش تعتذر منو على الهضرة لي قالت .. كانت واقفة برا وسمعات الحوار لي ضار بينو وبين تاليا وفاش عنقها وباس ليها راسها وندمت كاع لاش قالت ديك الهضرة ... قربت منو حتى وقفت بجنبو وقالت :
- أنا ماغاديش نهضر ليك على نجوم حيت مكانفهم فيهم تالعبة .
جاتو الضحة على الهضرة لي قالت لكنه حاول يتماسك وتشبث بالبرود لأخر درجة حتى تمل صوفي وتخرج بحالها ... قال برداان قاااال ... بدات صوفي كاتفكر فشي طريقة باش تجبد معاه الهضرة حتى لمحت بعينيها شجرة كبيرة وسط الحديقة وقالت علاش لا ماديرش فيها فيلسوفة ولا عالمة بيولوجية .
نعتت بصبعها للأسفل وقالت:
- شفتي ديك الشجرة .... سميتها شجرة الرنج كاتولد ثمار بحال شكل البرتقال لكن عصيرها حامض بزاف ومر عرفتي كيفاش عرفتها رنج زماشي برتقال .. حيت دقتها قبيلة وجاتني مرة حتى كنت غادي نتقيا .. قلعة قدها قد لخلا والعشاء معطلين فيه تقول كايطيبو فخاض بيبي ... سلقولي مسارني غير بالقهوة القهوة لقهوة تقول كانضرب جوانات ..
خلاها كاتهضر وتشير بيديها وخرج وهو كايحرك راسو يمين وشمال على سخفاتها وكملت وهي كاتقول بحماس:
- على كلٍ خلينا من الماكلة دابا .. ديك الشجرة هي شجرة مُعمرة ديييما كاتلقاها خضرة والتربة ديالها مـ..
إنتبهت أخيرا أنها كاتهضر مع الريح فتنحنحت بإحراج وكملت بغيظ وهي كاتعدل فبعض خصلات شعرها خلف أدنها:
- سحقا .. قمعة خطيرة .. يبدو ان السيد بردان معصب مني بزاااف .
خرج جبل من الحمام بعدما إستحم ومانساش يتعطر لحبيبة قلبو من عطرو الخاص لي ديما داير زجاجة احتياط فسيارتو .. قبيلة فاش دخل وفيديه الورد لقاها مازالة ناعسا هذا علاش فكر يستحم ويبدل عليه دوك لحوايج لي تشروطو بسبب المدابزة مع صخر وماترددش يلبس من حوايج صخر حيت حوايجو بقاو فالكونتيسا ... لبس تيشرت فالأبيض نصف كم بارز كل عضلاتو القوية وبعثر شعرو المبلول ومانساش يقاد لحيتو .. هاد اليوم مميز بزاف عندو واخا جا داكشي على غفلة لكن يمكن هكذا أفضل .
كان جبل واقف قبالت المراية كايمشط شعرو لكن لفت إنتباهو صوت أنين ، إلتفت برأسو ناحية روعة وهو يلاحظ أنها كاترجف وتإن بصوت منخفض ... مشا عندها بسرعة فاش عرفها كاتحلم .. كلس حداها وحط يديه على جبهتها باش يقيص حرارتها لكنها إستمرت فأنينها الضعيف .
- لا .. لا .. صخر صخر .. لا .. لا قتلتو ...صخر
حاول جبل يفيقها وبدا كايطبط على وجهها بيديه بخفة وهو كايقول :
- حبيبتي ماتخافيش .. هذا مجرد كابوس ... فيقي يالاه فيقي اعمري فيقييي.
-لااااااااا.
غوتت بيها روعة وإنتفضت من مكانها لكن جبل إلتقطها وضمها لصدرو وهو كايقول ويمرر يديه على شعرها .
- شووووو تهدني تهدني .
لكنها إستمرت فالهلوسة والبكاء حتى بعدما فاقت كان جسمها كاينتافض بقوة وكاتغوت :
عنقها جبل بقوة باش يسيطر عليها ويهدأها .. وكأن الله عطاها قوة وطاقة فوق طاقتها كانت كاتفركل برجليها السليمة وتنتفض ..جاتها نوبة هلع خطيرة.. قلبها كان كايضرب بسرعة وقوة حتى أنها حست بيه غادي يوقف مع ألم فالصدر ونفس سريع وفقدان الشعور بالواقع ورعشة فالأطراف .. كانو أعراض ديال الهلع قوية ماعرفش كيف يتصرف معاهم جبل .
فمكانش عندو شي حل أخر دفعها غير بشويا حتى وضع راسها على الوسادة وتبتها بجنبو ثم شد ليها فراسها باش ماتحركش ولسق شفايفو مع شفايفها بقبلة عمييييييقة يمكن إستغرقت دقيقة كاملة حتى هدأت روعة شويا بشويا وهدء تنفسها السريع ..
لاحظ جبل أنها هدأت أخيرا فرفع شفايفو على شفايفها وشاف فعيونها .. كانت حتى هي كاتشوف فيه بصدمة حيت قدر غير بقبلة يخرجها من نوبة هلع مكانتش قادرا تسيطر عليها ... شافت فشفايفو الرجولية وإنتقلت بعيونها لزمردية عينيه وهمست بصوت ضعيب:
- كيفاش .. كيفاش درتيلها ؟.
توتر جبل حيت هو براسو ماعرش غير جرب على الله ونجحت المحاولة... مد أصابعو تحسس خدها وهمس بصوت مبحوح .
- قريت واحد المرة أن القبلة كاتهدئ الأعصاب وكاتقلل من إفراز الجسم لهرمون الكورتيزول لي هو المسؤول على التوتر ... وكايبان لي أنك محتاجة لجرعة وحداخرا باش ترتاحي.
قرب من شفايفها بهدوء ولمسهم بقبلة خفيفة لكن فاش لاحظ أنها مابادلاتوش بعد شويا وطبع قبلة على جبهتها وقال بهمس :
- كيف كاتحسي براسك ؟ .
ميلت راسها باش تتأكد أن لي معاها جبل ماشي صخر ، واخا أن جبل مايتلفش عليها وسط ملايين الناس لكنها فحالة نفسية مبقاتش كاتعرف حتى نفسها شكون هي .. شافت فوشم اليانغ لي فيديه وطمأنت أن لي باسها هو جبل وماشي صخر وإلى كانت غادي تقتلو .. علاش ؟ ماعرفتش !...
قبلة جبل كانت وكأنها بلسم ودواء على قلبها ، كاتعجبها أفضل من مليون قبلة أخرى ..وكتحرك فيها بزاف ديال مشاعر الحب ... تفكرات إعترافها بحب جبل لصخر ونساات أنها ماوصاتوش يتحفض على ديك الهضرة ومايقولهالوش .. هي قالت ليه ديك الهضرة في حالة مانجاتش من تحت الأرض وماتت لكن دابا هي عايشا وتغيرو بزاف ديال الأمور .
ميلت راسها شافت فعيونو وهي تفكر أخر حوار دار بيناتهم .. ديال إعترافو بالحب و زواج وبأنها مرتو ! . عقدت حواجبها كاترجع لأحداث بطريقة خلات جبل يتوتر وعرف أن هاد الهدوء ماغاديش يدوم أكثر بالإضافة للهيرويين لي كايجري فدمها .. إستقامت روعة وتكات على ضهر السرير وهي كاتشوف فيه بنظرات مبهمة .
- قبيلة نتا ..
وضع جبل أصابعو على شفايفها باش يسكتها ومد يديه الثانية هز وردة حمراء من البوكيه ومدها ليها وهو كايقول :
- فقلبي ورده حتى شي واحد مايقدر يقطفها ..
مدت يديها بتردد وستلمتها من أصابعو .. قربتها من أنفها وإستنشقت لفحة من عبيرها وهي مغمضة عينيها حتى وعات على لمسة من أصابعو على خدها وهمسة من صوتو المبحوح :
- وكأن الله خلق قلبك من الورد ، كلما نبض نبضة ، ملأ الدنيا بالعطر .
ماعرفتش واش تبتسم على كلامو اللطيف ولا تعصب حيت نصب عليها ولكن إلى كان غير كايكذب ؟.. نبرت صوتو قبيلة مكانتش ديال واحد كايكدب .. لكن واش تفكر فهاد الموضوع وهي غارقة حتى لودنيها فجريمة قتل .. تغرغرو عينيها بالدموع فاش تفكرات إيدوارد وهو ميت فالأرض ..
تنهد جبل بيأس وقال :
- دابا علاش كاتبكي اعمري ؟.
مسحت دموعها بيديها وهمست بصوت مقهور :
- كيفاش كاتصرف فاش واحد من رجالك كايقتل روح ؟..
بقا كايشوف فيها وماعرفش باش يجاوبها .. عرفها كاتقصد إيدوارد ، لكن شنو غادي يقول ليها ! ... نزلو دموعها من جديد وقالت بخوف :
- جبل ... أنا قتلت روح .. خايفا بزاف ندخل للحبس .. مابغيتش ندخل للحبس اسي جبل .
سحبها لعندو وعنقها وهو كايقول وكايطبطب على راسها:
- شووو .. حتى شي واحد ماغادي يديك للحبس فهمتي ... كون ماقتلتيهش نتي أنا لي كنت غادي نقتلو اروعة .. نتي راك درتي فينا خير وهنيتينا من داك الشيطان
بعدت عليه وهي كاتنفي الأمر راسها يمين وشمال وكاتبكي وهي كاتقول:
- تهربت من الحبس المرة لأولة فاش ضربت جهاد ولكن دابا ماغاديش نفلت منها البارون .. أنا مشيت فيها .. ماما غادي تموت وعائلتي غادي دمر .
حضن خدودها بيديه الرجولية وقال بحدة:
- واش كاتأمني بالله ؟.
إومأت روعة بوهن وهمست:
- ونعم بالله.
جبد من جيبو تلفونها لي لقاه فسيارة جبل حدا الكوخ .. إستغربت روعة أن تلفونها معاه وإستغربت أكثر أنه بقا عاقل على الكود من نهار لي عطاتو ليه فالبحر .. شغل جبل الفيديو لي سيفطولو الدون ماركيز فتلفونها بلبلوتوت لأن الفيديو وصل فتلفون داوود ثم عطاه ليها ليديها وهو كايقول :
- شوفي هاد لفيديو !.
شدات التلفون وماعرفتش علاش كانت خايفا من داكشي لي غادي تشوف ... كان الفيديو فيه إيدوارد وهو كايحاول يخنق روعة وباغي يجيفها ، فديك اللحظة هي شافت الموت بعينيها وفواحد اللحظة شهقت فاش تقلب السرير بصخر وبسببو إيدوارد بعد عليها ورجعت الروح لجسدها ..
وضع جبل يديه على كتفها وقال :
- فينما تحسي بتأنيب الضمير فتحي هاد الفيديو وتفرجي فيه ساعتها غادي تستوعبي أن داك الحيوان مايستاهلش حتى دمعة من عينيك .. هو كان باغي يقتلك وماترددش لولا صخر لي دار هاد الحركة الغبية لكنها نفعت وخلعاتو باش عاد بعد عليك ... ولحبس ماتخافيش منو المجرمين لحقيقين لي خصهم يدخلو للحبس أحرار ومستمتعين بحياتهم .. فين جيتيهم نتي !.
حست بكل كلمة كايقولها جبل كاترفع من معنوياتها وكاتصبرها .. استوعبت أنه فعلا عندو لحق وهي ماخصهاش تبكي ولا يأنبها ضميرها عليه شافت بعينيها فالغابة فاش نزل عليها بضربة لوجهها بالموس ، كان باغي يقتلها لولا أنها طاكات الضربة بيديها وشافت فاش كان باغي يقتل صخر .. إنسان بحالو فعلا مايستحقش يأنبها ضميرها على قبلو .. رفعت عينيها باش تشوف فيه لكنها لمحت الضمادة لي كانت ملوية على دراعو .. عقدت حواجبها وقالت بإستغراب:
- مال دراعك اجبل ؟؟
شاف فيديه ورجع شاف فيها وقال وهو كايبتاسم بهدوء
- تصابيت برصاصة فدراعي فاش كنت وسط الإشتباك .
لمست الضمادة بيديها وقالت :
- أشمن إشتباك ؟؟
تمسك بيديها لي كانت كاتحسس دراعو بإهتمام وقال بهدوء:
- من بعد ماخرجتي من الهوتيل معصبة مني .. أنا تبعتك و للأسف مالقيتكش ، قلبت عليك حتى عييت ....
أومأ جبل براسو بمعنى "أه" وإستوعبت شحال كانت مكلخة فاش ظنت بأنه ماتحركش على قبلها وأنها مكاتهموش .. تفكرات داك عزرائيل لي كان واقف عند راسها فصبح وشافت فجبل وقالت :
- هداك الرجل لي شارف ولحيتو بيضة وكبيرة واش هو جدك لي قلتي عليه:
تنهد جبل على سيرة بهجت وقال:
-مع لأسف ، اه هو .
- إذن هو تعاون معاك وجمع رجالو باش ينقدني أنا وصخر .
أومأ جبل وقال:
- أه هادشي لي كاين .
إذن هذاك الرجل غريب الأطوار مكايكرههاش كيف ظنات .. شافت فجبل وهمست :
- يحسابلي كايكرهني .
إستنكر ديك الهضرة لي قالت .. والى كان داكشي لي على بالو غادي يقتل بهجت إلى قرب مرتو بسوء .. شاف فيها وقال بإستنكار :
- شنو لي خلاك تقولي هاد الهضرة ؟ .
تنهدت روعة وقالت بهدوء:
- فصبح كان كايدير فيا واحد شوفات مافهمتهمش بحالي كان كايحملني المسؤولية ديال حفيدو لي تخطف بسببي .
ضحك جبل بقلة حيلة حيت هادشي لي قد يدير فبلاصة مايتعصب .. شد ليها فيديها وقال بغيظ:
-اش كاتخربقي هااه !.. اولا نتي تخطفتي بسبب داك الحيوان ديال صخر ، وهذا علاش كنت غادي نقتلو فصبح .. هو راه سيفط رجالو تعداو عليك ، ومن بعد خطفك ونتي مغيبة وداك لواحد الكوخ وسط الغابة ... وتما هجمو عليكم الكلب إيدوارد ورجالو وخطفك نتي وياه .. يعني لمسؤول لأول على هادشي كاااامل هو صخر ماشي نتي كاتسمعي .
تسنى شي ردة فعل مفاجئة ولا مندهشة لكن روعة بقات كاتشوف فيه بهدوء فعقد جبل حواجبو بإستنكار وقال:
- واش .... كنتي عارفا ؟ .
أومأت روعة وقالت ببساطة :
- اه .. إيدوارد قالي كولشي .
طلق جبل من يديها ووقف بغضب .. بدا كايدور وسط الغرفة وهو كايحس بالعروق ديالو كاينتافضو من شدة الغيظ .. رجع ضار لعندها وقال بحدة:
- فاش دخلت عليك فصبح وعنقتك ناديتيني بإسم صخر وكأنه حبيبك ولا عندك معاه علاقة وتقبلتي قُبلتي وبادلتيني بكل حب وقلتي بأنك وفيتي بوعدك ليه .. كاتواعديه بالقبلات أروعة هاااه ... نسيتي كااااااع داكشي لي دارو فيك وبسببو كنتي غادي تموتي .
تسمر حداها فاش مادارت حتى شي ردة فعل تذكر وكمل جبل بغيظ:
- بلاتي ... دابا تأكدت مزيييان ... صخر هو حبيبك اللعين لي فرعتي ليا راسي بيه .
تنهدت روعة فاش بدا كايأول من راسو عاود وقالت بجدية:
- صخر واخا دار داكشي كاااامل كفر على ذنبو ونقدني من تحت الأنقاض ومابغاش يخليني نموت .
غوت فوجهها بغضب
- وشكون لي دخلك تحت دوك لأنقاااااااض ؟ .
تسمرت روعة قدام صراخو وبقات كاتشوف فيه وفطريقة تنفسو السريعة ونظرات المجرمين لي كايدير فيها ثم قالت بحدة :
- تهدن أجبل .
رد عليها بسخط وغصب:
- هو لي دخلك ... هو لي خطفك... هو لي تعدا عليك ونتي كادافعي عليه بكل بسااااااطة وكاتواعديه بالقبلاااات..
تنهدت روعة بقلة صبر لكن حتى هي أعصابها غير على سبة وغوتت بحالو:
- لفيديو لي وريتيني موضح أنه ندم على الشئ لي دار .
لاحظ جبل انها غادي تشعل بيناتهم فهاد النهار لي من المفروض يدخل لتاريخ حياتو ومابغاش يضيع عليه الجو .. تنهد باش يسيطر على أعصابو وقال :
- واخا خليني نتنفس شويا باش مانديرش شي حاجة ندم عليها عمري كولو اروعة ... عندك رجل مهرسة مابغيتش نهرس ليك حتى رجل لوخرا ونخليك كاتزحفي .
خرج جبل للشرفة وخلاها متبعاه بعينيها بصدمة فشعل سيجارة .على الله يقدر يسيطر على أعصابو بيها وهو كايحك فجبهتو بتوتر وغضب. ... كان متوقع أنها غادي تكره صخر بعدما يعاود ليها على كاع داكشي لي وقاع لكن الغبية تعاطفت معاه وكأنه هو الضحية .. صخر اللعين فهادي تغلب عليه .. داك الشيطان قدر يوسوس ليها فدماغها وقنعها بداكشي لي بغا حتى مابقاتش كاتميز الصح من الغلط والصديق من العدو .
لكن بلاتي عنداك يكون بصح هو حبيبها .. صخر قاليه من قبل أنه كان مراقبها هي وتاليا وكان كايهضر عليها بإهتمام .. زعما يكون طلاقاها وخلاها تغرم بيه ؟؟ ...
صك على أضراسو حتى نبض فكه بوحشية وزير على الحديدة ديال الشرفة وهو كايتمتم داخل نفسو:
دابا فنظرها هو البطل لي أنقدها وداكشي كامل لي دارو هو على قبلها ماتحسبليهش وفوق هادشي مسمياه ملاكي .. واش كاين شي دليل أكبر من هذا .. اللعين ديال صخر ماعارفش أنها كاتبغيه حيت واللعنة عليها هي قالت ليه بلي حب من طرف واحد ... دابا كيف غايدير باش ينهي هاد الكابوس ويخرج صخر من قلبها ويحتل هو مكانو ..
أومأ جبل براسو وهو كايشوف فالمدى البعيد وقال بصوت خبيث:
- إلى كنتي نتا كاتملك قلبها أنا كانملك حريتها ..
رجع دخل للغرفة بسرعة وهجم على شفايفها باسها بقوة بطريقة خلاتها مصدومة ومن بعد بعد عليها وهو كاينهش وقال :
- إنخفض هرمون الكورتيزول ..
ثم ضار مخليها كاتلمس شفايفها بصدمة وكاتشوف فيه ... توجه للكنبة لي كان واضع عليها ملف فاللون الأسود هزو وفتحو طالع على العقد ديال الزواج وهمس فنفسو :
- نتي ديالي اروعة مرتي واخا تبغي بدالي مئة صخر .. وإلى ماحبيتينيش بالخاطر غادي تحبيني ورقبتك تحت السيف .
البارون الأعظم الجزء 64 أمتلك حريتها
محتوى القصة
التنقل بين الأجزاء