أنين العشق الجزء 18 والأخير

من تأليف Yossra Adam
2018

محتوى القصة

رواية أنين العشق

كلس فالكورسي كايشوف فطبلة وكايشوف فيها ..
مراد: صرااحة فاش كايتجمع بين زين والحداكة هاديك هي الربحة 
كوتر: دابا نتا ربحتي 
مراد: نهار شفتك راني ربحت ..كنت عايش بوحدي نهار كنبغي نحداك كنصاوب اتاي ههه ولا طاجين ..شوف دابا على منظر 
كوتر: بصحتك احبيبي ..جات باستو جنب فمو وكملات حطات كولشي مسمن بغرير كيك عصيرات بيض بالفرماج طوست وهوما غير جوج تناس ..كلسو كايفطرو واضحكو حتى سالاو وناضت كتجمع فطبلة ..
مراد:"وقف كايعاونها" انمشي ليوم لشركة
كوتر: غايجيو عندي لبنات لدار ..تافقت مع ريهام تجيبهوم بلا متقوليهوم انا هنا 
مراد: اوكي خاصك شيحاجة ..
كوتر: لاا ..كولشي غانقادو ..طحنت لوز وشرملت دجاج غاندير بسطيلة واللحم طنجية ..
مراد: مهم الى خاصك شيحاجة قوليها نصيفطها ليك 
كوتر:"شافت فيه" شي بوسة ..نزل باسها بقوة عصر ليها شفايفها عاد طلقها كضحك وتلحس شفايقها بحالا كانت كتلعق لعسل ..
كوتر: خليي اللحية تطوال 
مراد: وخاا شي لحية خراا لا 
كوتر:"حشمانة" معنديش مشكيل ههه كولشي زين 
مراد:"ضربها لترمتها" مكتحشميش ههه انطلع لبس باش نخرج ..طلع لبس وتقاد ونزل باسها وخرج بقات هي من هادي لهادي كتحرك بنشاط ودوق بصباعها وتبنن ..حتى سالات وطلعات دوشات ولبسات فراشة بالكميمات سامبل نشفات شعرها ودارت بوندو ونزلات شافت فساعة عرفاتهوم قربو ..سمعات صوت طوموبيلا وتخبات ورا لباب ..تحل وهي تبان ليها ريهام سابقة وتبعوها لبنات وحدة وحدة داخلين لوسط دار ...
كوتر:"من وراهوم" واااااااااااااااع ...كولهوم فقزو مخلوعين كايشوفو فيها ..
بسمة: تفوو امتا غاديري عقلك خلعيتيني قلت غير جنون 
هداية: انا كنشم ريحة طياب كنقول منين جاي ..
كوتر:"طارت كتعنق فيهوم وتبوس" توووحشتكوووم الخانزااات انعل طواسلكوم ماديال مفاجئات 
غفران: هادي تخويرة ماشي مفاجئة 
ريما:انا شميت رحتك جيتي حيت امين خرج واحد نهار بليل بسورفيت ودخلني شك 
كوتر:مشا عند صاحبتوو ..اويلي فينهوم ولادكوم 
غفران: حنا كنا عوالين جايين نجمعو دار لاش غانجيبوهوم
كوتر: ويليي اعطيوك لحكة ..تفوو "شافت فريما" وجه الله تاصلي اجيبوهوم ليك وادوزو اجيبو إيناس 
ريما: وخااا ..سيري جيبي لينا نشربو ..جابت بلاطو فيه كبسان والما ورجعات بين صحاباتها كابهضرو واتعاودو ..وصل شيفور تريما معاه مربيات وتوينز وجابو حتى بنت غفران وارجعو فحالهوم ..ضوراتهوم بيها كوتر تبوس وتعنق ...وصل لغدا وتعاونو حطوه وتجمعو على ضحك وطلقو بعدها لموسيقى وغير شطيح ..حتى وصل لعشية ..خرجو كاملين وناضت كوتر بدلات لبسات شورط وتريكو وبنوار قصير ..جمعات شعرها كامل لفوق وبدات كتمسح وتجمع دار ..دخلات لكوزينة كتغسل لماعن وتستف ..وحاسة براسها تقيل ..سمعات لباب تحل عرفاتو مراد ..وقف عليها باب لكوزينة 
مراد: ديك ساعة شديهوم اعاونك ..
كوتر:"مع ضورة باش تجاوبو كاتبان ليها ضباب شدات بيد فالبوطاجي واليد الخرا راسها ..رجليها كايفشلو بيها " مرااااد ....اخر كلمة قالتها قبل مايخطفها مراد قبل مايجي راسها الارض ..هزها بين يدو مخلوع كايفيق فيها ومطلعها مع دروج ديريكت لبيت تكاها ..وكايضرب فوجها ..
مراد:كوتر ..حبيبة ..فيقي ماااالك ..جاب ريحة شمها ليها واالوو ..زاد تخلع وهز لفون تاصل بالكيلينك وطلبهوم اسفطو ليه طبيبة ..بقا واقف عند راسها كايمشي وايجي وايديه كايدوزها على راسو بتوثر حتى سمع صوت طوموبيل ونزل كايجري ..طلع طبيبة ودخلها على كوتر ..
مراد: عفااااك دغياا راه من قبيلة وهي غايبة 
طبيبة" كتجبد معدات ديالها وكتهضر مع مراد" المدام كتعاني من شي مرض ..
مراد: لاا بخيير 
طبيبة:"بدات فالكشف" اول مرة اوقع ليها هكا 
مراد:وي كانت بخيير نهار كامل وهي كتحرك طبيعي ..فجأة طاحت ..
طبيبة:"علات راسها فمراد وابتسامة على شفايفها" عادي اسيدي بلا متخلع ..كيف قلتي لمدام ضلات كتحرك يعني دارت مجهود وهي فهاد الوقت بضبط كايخصها راحة 
مراد:"باستفهام" كيفاش هاد لوقت زعما الليل 
طبيبة: ههه لا زعما ..هي فهاد الاشهر خاصها راحة تامة .."شافت فيه بعنين داخلهوم شك" كنضن ماعارفش شنو عند مرتك
مراد: والله كون عارف منعيطش عليك 
طبيبة: ههه مبرووك اسيدي لمدام حاملة وعندها شهرين وتلاثة الاسابيع ...مراد سقل وحل عينيه على وسعهوم كايشوف فطبيبة واشوف فكوتر ..حس بصفارة فودنيه 
طبيبة:مهم غانكتب ليها شي فيتامينات ..وشوي وراه غاتفيق غير ترتاح ومتبقاش تجهد راسها كتر من لقياس ..
مراد: واش مرتي حاملة ..متيقنة ..زعما حاملة ..بغيت نقول حاملة بكثر من شهرين ..شحال بقال 9 شهور ..
طبيبة:"كتبتاسم وهي فنفسها حابسة ضحكة" دغياا كدوز ..
مراد:"شد فراسو" حمدك ياااربي وشكرتك ..حمد لله يااربي .."شاف فطبيبة" فراسك سمعتيني احسن خبر كنتسناه بفارغ الصبر 
طبيبة: مبرووك والله اكمل بخيير ..جمعات طبيبة معداتها ونزل معاها مراد خلصها وووفا ..ورجع طاير كلس عند راس كوتر كايبوس فيها وجملة الشكر لله هي كتردد ففمو ..

بقا مراد عند راس كوتر كايبوس فيها واهز ايديها ابوسها ..كولو كايترعد وجملة شكر ففمو كتردد ..فلحظة حس بدموع خفاف نازلين على خدودو ..مامسحهومش وانما خلاهوم ومفتاخر بيهوم حيت عارفهوم دموع الفرح ..بقا على نفس لحالة كايبتاسم وابوس فيها ..حتى حس بيها كتحرك ..حلات عينيها بزز كاتشوفيه كايضحك 
كوتر:"تكعدات" اش وقع 
مراد:"شدها من كتافها" بشوي عليك احبيبتي ..باقي كتحسي بدوخة ؟
كوتر: شوية ..معرفتش كيف وقع ليا والله 
مراد:"كلسها وتقابل معاها وعينيه كايلمعو" وقع ليك هكاك حيت تحركتي بزااف ..ونتي خاصك راحة 
كوتر:اش درت اصلا عادي كيف مولفة كنشقا ديما
مراد: نسااااي شقاا ..متبقايش تحركي ولبغيتيها غاتجي حتى لعندك 
كوتر:ههههه اييه وعلاش ..ياكما معدومة 
مراد:"وابتسامة طالعة من لقلب" كوتر نتي حاملة 
كوتر:"ضحكات من قلبها" شحال من مرة حلمت قلتيها ليا ههههه عرفتي باش كايعجبني نحلم بيك كنبقا نقوليك كاع دكشي لمخبيا عليك فالواقع 
مراد:"ضحك من قلبو" وشنو مخبية عليا ههه 
كوتر:ارا بوسة هو الاول ههه "باسها مراد" والله الى بحالا حقيقية ..مهم مخبية عليك بلي شربت شي دواء طبيعي والواعرة شربتو ليك ونتا سخنتي وجهلتي وح** بالبيجامة هههههههههه 
مراد:ايهااي على ح*** خرجات مسرحة كملي 
كوتر: عادي تانتا غير حلم مغاتعقل على والو هه وشحال من مرة عاودتها ولكن واالوو ..محاملاش ..
مراد:همم وشنو آخر مخبية 
كوتر:واحد لمرة خرجت مع هديل وتبعني واحد كايكلاكسوني عليا وانا محل زاج وقلت ليه سير لينعلبوك ازامل ههههههه هرب مابقاش بان 
مراد:"قوص حجبانو"زيدي واش اخور ..
كوتر:والووو...عطيني بوسة خرا كايحمقني فمك "بصوت طوفولي" ناااكلو اناا نااكلووو ..قرب ليها مراد وعضها فشفايفها حتى غوتات وحسات بدم ورجع راسو وتقابل معاها 
مراد: مكتحلميش ..نقرصك ولا نصرفقك باش تحسي 
كوتر: "شادة فشفايفها" اححح والله حتى تقصحت .."شافت فيه وهزات ايديها كتقيسو وتحركو" مراد واش بصح 
مراد:نجيب لقرآن نحلف ليك 
كوتر:"نزلو دموع بسرعة" عفااااك امراد الى كنحلم متفيقنيش "كتشهق" واش بصح حاملة "شدات فكرشها" شكون قالها ليك باش عرفتي ..دوي راه قلبي غايسكوت ..واش انا حاملة زعما غايجي ليقوليا ماما وابكي ونهزو نعنقو ونبدل ليه وافيقني بليل من نعاس .."دموع عمرو وجها وكولها كترعد" مرااد نوووض داباا ديني عند.طبيبة بغيييت نشووف بعينيية ..عفاااك امراد .."لمحات دمعة نازلة من عينين مراد" كتبكي ..يعني بصح "تلاحت عنقاتو" مراااد غايولي عندنا بيبي فداار ..واخييراا ربي فرحناا .."بعدات كتشوفيه ومقادراش تسكت" اش قالت ليك طبييبة وااا هضر 
مراد:"باسها فراسها" كالم احبيبة ..تاصلت بكلينيك وطلبت منهوم طبيبة ..ولحسن لحظ صيفطو لينا طبيبة نسائية جات وعبرات ليك دقات تالقلب وجبدات واحد لباراي صغيرة وبيضة بدات كدوزها على كرشك ..انا قلت ياكما لمعدة ..فاش سلات بدات كتهضر معايا مفهمت والوو حتى قالت ليا واش معرفتيش مرتك اش عندها قلت ليها لا ..وهي تقوليا لمدام حاملة ب شهرين وتلاثة الاسابيع..
كوتر:"كضحك ودموع نازلين" حمد الله ياااربي ..حمد لله ياربي ..عرفتي والله باقي مامصدقة ..واش ديك طبيبة متيقنة ..يلاه نمشيو عند طبيبة خراا 
مراد:"شدها من وجها" غدا احبيبتي نديك عند احسن طبيبة فمراكش ...دابا تكاي وارتاحي ..
كوتر:"تكات وكضحك وايديها على كرشها" ياااربي تحفضو ليا يااربي ..عرفتي امراد الى وقعات ليه شيحاجة نتسطى"تقلبو ملامحها حزن" ماغانقدرش على صدمة خرا 
مراد: الله اخليكوم ليا بجوج ..مستحيل نخلي شيحاجة تآديكوم ..نتي حاجة وحدة ارتاحي..
كوتر: وخااا .."حلات دراعها" اجي حدايا بغيت نعنقك ..ضار ونعس جرها خشاها فحضنو وزير عليها 
كوتر:"علات عينيها " مراد خايفة نعس ونفيق غدا تقوليا كنحلم
مراد: غير ارتاحي احبيبة هه والله لعظيم مكتحلمي .."باسها فراسها" كنبغيييك بزاااااف 
كوتر:"تمخششات فيه" انا بزااف ..عرفتي قلبي غايسكت بالفرحة كنسمعو فقاع ودني 
مراد:"كايلعب ليها فشعرها" ارتاحي احبيبة ..انا كتر منك ههه بكيت بالفرحة هههه ..بقا مراد كايلعب ليها فراسها وهي كتهضر مسكتاتش وكل مرة تنزل ايديها تحسس كرشها حتى نعسات قادها فبلاصتها وباس راسها دخل لدوش توضى وخرج سرح سجادة وصلى جوج ركعات ..وفكل سجدة كتعطل حتى سالا سلم ودوص صباعو على عينيه مسح قطرات من دموع ...رجع تخشا حداها حاضيها بعينيه حتى نعس ...
🌞فاق مراد بكري وبقا حدا كوتر كايتحسس شعرها وخدودها من بعد نزل لتحت دخل لغوغل كايقلب على فطور صحي للحامل ..حل تلاجة وجبد قاد عصير وقطع قليل من فواكه ..قاد زلافة كبيرة كونفليكس بالقمح ..وطوسط بالجبن طبيعي كاس كبير حليب بالعسل ..قاد كولشي فبلاطو وطلع عندها ...حطو ومشا كايفيق فيها بهدوء وقبلات على مستوى وجها حلات عينيه بزز كتشوفيه ..بسرعة نزلات ايديها كتحسش كرشها 
مراد:"بابتسامة" مكنتيش كتحلمي ..
كوتر:حلف بالله ..

مراد: صبري .."مشا جاب قرآن وحط عليه ايديه" اقسم بالله مكتحلمي هههه 
كوتر:"دموعها تاني نزلو" قلبي غايسكت امراد ..واش داكشي تالبارح كولو حقيقي ..انا حاملة وعندي كتر من شهرين .."ناضت برسعة لبرق ووقفات فوق ناموسية " انااا حاملة ...حاملة "يلاه غاتبدا تنقز خطفها مراد من دراعها وقربها ليه" 
مراد:لااا واش حماقتي ..باغا تنقزي .."شدها من ودنيها" عقلتي شنو قلتي لبارح ..
كوتر:"حلات عينيها " هااا اش ...اناا "شدات فكرشها" اييي اححح بغيت ندخل لطواليط فيا بيبي 
مراد:"طلقها وضربها لترمتها" سيري سيريي ..من بعد ونتفاهمو...دخلات كوتر غسلات وجها وتوضات خرجات صلات وكلسات كايوكلها مراد وهي عاجبها لحال ..كتبوس فيه وتمضغ حتى سالات وناضت بغا تهز بلاطو وحبسها ..
مراد: لبسي نتي غانمشيو عند طبيبة 
كوتر: وخااا ...نزل هو ومشات هي كتضحك وقفات قدام لماريو جبدات كسوة قطنية طويلة فالزرق بالكميمات وكاب طويل فالبيض ...شال مخطط بالبيض وصومو والزرق كونفيرس بيضة وساك طويل بيض ..طلع مراد جبد سورفيت كحلة وكاسكيط سبرديلة وخرجو معنقها تحت دراعو وهي غير كضحك ..مشاو لكلينيك عند طبيبة لكشفات عليها ليلة لقبل ..دخلو واستقبلاتهوم بابتسامة ..طلعات كوتر فوق باياص بيض طويل وعرات ليها كرشها دهنات ليها ببرودوي وحطات اباراي كتمررها يالعرض لبطئ..
طبيبة: "بابتسامة" شحال ونتوما مزوجين 
كوتر: كثر من عامين 
طبيبة: همم كنتي كتاخدي فانيد منع لحمل 
كوتر: لاا ..ديجا حملت وطاح لي ومن بعد مجابش الله حتى لدابا
طبيبة: مبروووك ..حمد لله لجنين فصحة مزيانة وكولشي هو هداك ..شوفو "حطات صبعها على شاشة"شوفو هو هدا ..
مراد:"بصوت خافت" مشاء الله تبارك الله ...اما كوتر كتشوف وعينيها غاديين بدموع وابتسامة على شفايفها ..بقات طبيبة كتناقش مع كوتر وتسولها على شحال من حاجة من بعد عطاتها كلينيكس مسحات وشد فيها مراد حتى نزلات قدات حوايجها ومشاو كليو قدام طبيبة ...
طبيبة: بعد ماعاودتي ليا على لوقع ليك ..حاولي تعطي راسك راحة غير فهاد الشهور الاولى و متعصبيش ..هو لجنين فصحة جيدة حمد لله ..دوك فيتامنات لكتب لزوج ديالك لبارح خوديهوم ..بانتضام وكولي الفواكه ولخضر وبعدي على ماكلة زنقة ..
كوتر:"عينيها كايبريو" غانطبق لقلتي بالحرف ..
مراد:"وقف" شكرااا بزاااف 
طبيبة:"وقفات ومدات ليه كارطة" هادا عنوان لعيادة عندي ..مرحباا فاي وقت ....خرجو بجوج ومراد شاد فكوتر وحاضي مع خطاوتها رجعو لدار ..
مراد:خاصني نشوف لتعاونك فدار ..ليوم 
كوتر: لاااا مستحيل ..
مراد:كيفاش ..سمعتي طبيبة قالت خاصك راحة 
كوتر:وي سمعتها مغانتحركش بزااف ولكن ماشي لدرجة تجيب لتقوم بشغل منقدرش 
مراد: كيفاش متقدريش؟!
كوتر:هكااك منقدرش نجيب وحدة تقدي شغلي وانا نتفرج فيها ومنقدرش نآمرها تدير ولا تفعل اللهم بلاش
مراد: وشنو لمعمول اشريفة
كوتر: انا غاندي شغلي لقدرت عليه بلا منجهد راسي ..وماتخافش غانرتاح تنا خايفة على راسي 
مراد: الله اهديك نتي راك كتموتي على كوزينة
كوتر:"عنقاتو" ماتخافش ههه خاصنا نقولوها لدارنا وداركوم ونقولها صحاباتي 
مراد: كتبيها فجورنال ههههه 
كوتر: هههه بالفرحة نقدر نديرها هههه 
مراد: شوفي غانعرضو عليهوم كاملين لغدا ونقولوها ليهوم ولغدا غانصيفط ليه من الاوطيل ..
كوتر: صافي .."تكات على ضهرها وسرحات رجليها فوق طبلة قدامها وايديها على كرشها" 
جبد مراد الفون وتاصل بالعائلة وكلف كوتر تاصل بصحاباتها علموهوم ..وتاصل مراد بالاوطيل طلب غدا وكلس جنب كوتر ..
مراد: دابا عاودي ليا شنو قضية العشوب 
كوتر:"تلفات" اشمن عشوب ..
مراد: من اللخر بلا طنز 
كوتر: تيقتيني هههه ويلي كنت كنتفلى كندعق متديش عليا
مراد:"خنزر فيها" قولييي ..
كوتر:"حدرات راسها" فاش كنا فطنجة خالتي جميلة جارتنا قادات ليا شي عشوب مافيهومش شيحاجة خايبة وعطاتهوم ليا وكنت كنديرهوم فالماكلة 
مراد: همم وشنو قضية داك الحمار لتبعك 
كوتر: لسقني فكريق عصبني وسبيتو 
مراد:"غزز على سنيه" احرق جد زامل لحطو ...ومقلتيهاش ديك ساعة قيضي الرقم ..مرة خرااا تعاود غانتفاهم معاك نتي 
كوتر:"قربات باستو جنب فمو" اوكي حبيبي 
مراد:هكاك الله ارضي عليك ..مشهية شيحاجة ؟!..غير قولي
كوتر:"حشمانة" نبقا كنبوس فيييك هههه

..قرب وقت لغدا بنات من الاوطيل مايوجدو واقادو طلعات كوتر لاسقة فمراد بدلات حوايجها لبسات فقطان فالبلو سيال وشال فالبيج بلغة فلون شال دارت شوي ماكياج لوجها ..مراد لبس دجين وتريكو لايق وبلغة كحلة ..نزلو لتحت كلسو ..شوي وهي تدخل واليدين كوتر وريهام وخوها صغير ..لباب كان محلول شافهوم مراد ووقف استقبلهوم ..
ريهام:نسيبنا لعزيز داير شي حفلة 
مراد:داير صدقة ...تسمعات "سلام " من لباب ..هزو عينيهوم كانو واليدين مراد وخوتو ناض كولشي كايتسالم وكلسو كايسولو على سبب دعوة ..قالهوم مراد حيت رجعنا بغينا نجمعو كولشي ..دخلو لبنات بسمة وهداية جابهوم شيفور تسالمو وكلسو ..بشوي دخل امين وجنبو ريما ..كل واحد هاز واحد من توينز ..تسالمو وامين كايشوف فمراد بمعنى شنو كاين 
مراد: والوو بغينا نتجمعو حيت شحال هدا متشاوفنا ...جان غفران وراجلها هاز ايناس فيدو ..تجمع كولشي والاصوات كترو وصط لفيلا وكولشي كايهضر واضحك وصل وقت لغدا تقادات طبلة كبييرة وسط دار وكلس كولشي ..سالا لماكلة ورجعو لصالون تفرق عليهوم تحلية ..وهو انوض مراد وقف جنب تلفازة وجنبو بيسي وكوتر وقفات حداه هازة الفون فيديها ..
مراد: اليوم تجمعناا كاملين ..نتوما اقرب ناس لينا واعز على قلبنا وبصراحة ناقصينا بعض لاشخاص لدالك جاتني فكرة زوينة ..شعل لبيسي وهز الفون ..قربات ليه كوتر بقا كايقاد شحال من بعد تشعلات البلازما والمفاجئة فيها عدة مكالمات فيديو ..كريم بلباس تالخدمة مبهوض كايشوف كولشي قدامو ..هشام تاهو ..غزال فدارها ..وفاتي فالخدمة ..
كريم: اش واقع 
هشام: كريم نتا هناااا 
كريم: انا غير حداك اجيي عندي لبيرو ..
غزال: سلاااام ..
فاتي: ما سبب هاد جماعة كاملة ..
مراد: صبروو وتعرفوو ...تحول هشام وكريم ففيديو واحد ..
مراد:مجموعين كاملين ..وكنتو ناقصينا نتوما 
كريم:"مفيكسي عينيع فبلاصة وحدة" احسن مدرتي حيت توحشناهوم 
هشام: واش كولشي بخيير ..
الكل: حمد لله ونتوماا 
فاتي وغزال: بخيير 
كوتر: مهم كاين سبب علاش جمعناكوم 
أمين: حسييت ..قولو اش كاين 
لالا لطيفة: قولو ليبغيتو الا غاترحلو تاني 
مراد: لااا .."جر كوتر بين دراعو" بغينا نقولو ليكوم بلي كوتر حاملة ..كولشي تصدم وتخلطو عليهوم الاحاسيس قربو كايعنقو كوتر واباركو ليها ام كوتر وام مراد كايبكيو بدموع وكايتعانقو ..غزال كتبكي وتشهق وابتسامة على شافايفها ..فاتي كتنقز وتضحك ..كريم وهشام كايباركو لمراد والاخير شادة امين كايعنق فيه بالفرحة كولشي فرح شي عبر بالبكا وشي بتنقاز ..ريهام كتهز وتحط بالفرحة ودموع فعينيها ونسات لعينين لمقابلينها ..كريم ساهي فريهام وكايبتاسم ..مكرهش اخرج من شاشة واهزها اطير بيها ..عينيه كايعبرو على مدى شوقو ليها ..بقاو معاهوم على لخط شحال عاد قطعو ..دوزو معاهوم لعشية كاملة حتى طاح ظلام وبداو كابمشيو ..كوتر شداتها عكوزتها ومها وكلسو كايسولوها اش مشهية شنو بغات ..متحركش متنوض ..وهي كضحك ..مشا كولشي وتجمعات دار طلعات كوتر بدلات وصلات جا عندها مراد وشدها كايعنق فيها وابوس وهي كضحك عاجبها لحال ..بعدات عليه وهزات تاصلات بهاجر وهديل بلغاتهوم وتاصلات بلالا جميلة بلغاتها وشكراتها ..
دازو اياام وشهوراا ..برا اب مراد وكملات فرحتو امتا كوتر عايشة كيف لملكة مستحيل شيحاجة تخصر ليها لخاطر لبغاتها كتجي حتى لعندها ..مراد مقابلها 24/24 الى فالخدمة كايبقا اشوفها من الكاميرات وفدار راه لاسقة فيه وكتبوس فيه ..طيبات ليه فمو ..رجعات دايرة شفايفو كيف سكاتة تنعس بيهوم وتفيق بيهوم ..مرة مرة كاتقلب ليها طبيعة ولكن ماشي بزاف ..كادير ليها مراد رياضة خفيفة فجردة ..وصلات 7 شهور تنفخات ورجعات كيف شي كورة مع هي قصيرة ..غادة وكرشها سابقاها ..ومهما دالك كتقوم بشقى تدار ومحبساتش نشاطها وباقي كتصور فيديوات وتشاركهوم مع ناس ....كانت فالكوزينة كاتوجد بريوات مالحين حتى دخل عليها مراد عنقها وباسها حط ايديه على كرشها ...
مراد:بنتي حبيبتي 
كوتر: غير بقااا كتحلم ..ولدي هدااك ..
مراد:كون خليتي طبيبة تقولينا اش 
كوتر: لااا وانا بغيت ولد ..وكنبقا نصلي ونطلب
مراد: بلعكس بنية زوينة فنكوشة وكونو عندها بحال حناكك
كوتر: تناا بغيت ولد واكون بحال عينيه كايحمقو .."خنزرات فيه" متعصبنيش تاتي وخليني نسالي 
مراد: صافي صافي .."باسها " نطلع ندوش ونزل نعاونك الحب ...بقات هي كتلوي ودوق ..وقف عليها مراد وابتسامة على شفايفوو 
مراد: قلعي آخر الاخبار 
كوتر: شنوووو ..ياربي سلامة متخلعنيش 
مرا: لااا خبر زوييين ....
كوتر: معرفتش قوووول شنووو ...

كوتر:معرفتش قوول
مراد: كريم واخيييراا جاه لفرج ..
كوتر:"بفرحة" غايرجع 
مراد: وييي قاليا ليوم غاينزل لمغرب ..وشوفي راه مقالهاش لريهام بايفاجئها 
كوتر: واخيييراا مسكينة غاتفرح ..اجي عاوني 
مراد:"قرب ليها " اري نلوي معاااك على خر يامي كنقاد بريوات
كوتر:ومالك ههه لوي لوي ..وقف مراد جنبها كتوريه وكايعاونها حتى كملات ودهناتهوم دخلاتهوم لفران غسلات ايديها ووقفات عاطية ظهرها لبوطاجي جرات مراد من تريكوه وقابلاتو معاها كتشوفيه وتبتاسم 
كوتر: ان شاء الله لفكرشي غايجي كايشبه ليك ..عرفتي وليت كنسطى عليك مكرهتش نبقا لاسقة فجنبك 
مراد:"جرها لعندو كرشها كتفرق بينهوم" حمد لله لجاك لوحم هكا مزيااااانة ..
كوتر: هههه ياك ..تعلقات فيه كتبوس فوجهو وعنقو وتشمشم ريحتو وهو مسايرها بكل حب ..طابو بريوات وخرجاتهوم سخان مع سلطة كانت مصاوبها وعصير حطات كولشي فطبلة ..وكلسو كايتغداو ..
مراد: تنفختيي هههه متولدي حتى تفركعي 
كوتر: هههه كناكل ونوكل عادي نتنفخ ..
مراد:غدا رونديفو مع طبيبة ..
كوتر: ويي ..وراه مغنشوفوش شنو جنس البيبي ..غير تهنى
مراد:"هز كفوفو " ياربي بنية ياااربي 
كوتر: انا حاملة دعوتي مقببولة "خشات بريوة فمها وهزات كفوفها"ياااربي ولد يااااربي ....
مراد:معيكيسة 
كوتر:كنبغييك "صيفطات ليه بوسة فالهواء" ..كملو لغدا وغسل مراد لماعن ومسح خرجو كلسو فجردة كايهضرو حتى وصلات لعشية وخرجها تمشا شوي ...
🌞صبااح جديد ..فاق مراد كايفيق كوتر بزز باش كتنوض دخلها دوش ليها وخرجات دوش وتبعها لقاها لابسة وكتصلي حيت مكتقدرش تفيق لفجر ..سالات وهي تشوف فمراد كالبس
كوتر: منفطروش
مراد:هههه غاتشربي كاس تالحليب نخرجو نفطرو فزنقة وندوزو عند طبيبة 
كوتر:وخااال ...لبسات عباية فالصومو وشال هزات صاك وصندالة بلا خرجو شانقة على دراعو وكرشها سابقاها شدو طريق ..وقفو جنب كافي هادئة وراقية شدو طبلة تحت اشعة شمس الخفيفة ..طلب مراد فطور متنوع وكلسو فطرو على راحتهوم ..عاد ناضو مشاو لعيادة عند طبيبة لبقات متبعة معاها كوتر حيت ارتاحت معاها بزااف ..دخلو وكلسو فالاستقبال حتى وصلات نوبة ودخلو عند طبيبة ..كشفات على كوتر وقلباتها مزيان ..ومراد كايتسناهوم جنب لمكتب ...هضرات طبيبة مع كوتر بصوت شوي منخافض 
طبيبة: مابغيتيش تعرفي شنو عندك ههه
كوتر: لااا لااا ههه بلاش
طبيبة: باقي كتجيك ليغيكل
كوتر: نووو هاد الشهر لا ..تفكرت نهار جاتني فشهر تالث قلبي وقف بالخلعة 
طبيبة: كون نتي تفكرتي بلي جاتك فالشهور لقبل عادي وقلتيها ليا كنت نشرح ليك حالتك ...
كوتر: اوا لعقل ترفع بالفرحة ...ناضت كوتر كتقاد حوايجها خرجو بجوج كلسات طبيبة بلاصتها وكوتر قدام مراد ..
طبيبة: مسيو مراد باقي كدير معاها رياضة 
مراد: اكيييد ..وكل ليلة كنعطيها جوج معالق كبار زيت العود عاد كتنعس 
طبيبة: مزيااااان ...هادشي غايسهل عليها لولادة ومتحس بوالو 
كوتر: بغيت امتا نولد ..بديت كنتخنق .وفليل الى تحركت كنفيق 
طبيبة: باقي كتجيك لحكة فكرشك
كوتر: لااا دوك زيوت باش نصحتيني خففها 
طبيبة : مزيان ..كملو حوارهوم مع طبيبة ووقفو خارجين حل مراد لباب لكوتر ..هزات راسها خارجة حتى تصدمات ووقفات 
كوتر: اعطيك دقة ..لحكة وقلت ظفااار 
كريم: ههههه سكتي الموصيبة راك حاملة ..
مراد:"خرج" امتا جيتي وباش عرفتينا هنا 
كريم:"تلاح عنقو" تفو مافيكوم صوااب ههه عرفتك وصافي
مراد: لجدك كتجسس عليا ..."خرجو من لعيادة" 
كريم: كوتر وليتي كيف شي بوطة ت 500 درهم تفركعي مراكش كامل 
كوتر: غانتفركع عليييك نتااا 
كريم: زعما انا خو راجلك ...وراجل ختك مانبقاش فيك تحرميهوم مني 
كوتر: مسكيين قطعتي ليا قلبييي 
كريم:"قرب وضربها بكتفو" توحمي علياا ..بقا ليك شهرين ..استدركي لوقت بدل ضائع وجيبي شي تيتيز بحالي
مراد:ضربو فصدرو" جيتي معطل ..
كوتر: غانجيب ولدي كايشبه لباباه 
كريم:ربي واش عندك ولد حلفي 
مراد: معرفناش هي كتحلم ..اوا نتا شفتك جيتي طيارة لمراكش ماقدرتيش تزيد تصبر 
كريم: لحب ..اجيبك مرمرد من قاع دنيا هههههه
كوتر:"خنزرات فيه" شوووف مغاديرو والوو حتى نولد ونرتاح
كريم: ياكما نتسناك حتى دخليه لمدرسة ..هاد سيمانة غانتفاهمو وخر الشهر لعرس ..
مراد:"شاف فكوتر" نتي مالك ...
كوتر:"كتغدد" بغيت نشطح ونتحرك على راحتي 
مراد:"ضار لكريم" شوف اخويا درك وتزوج ماتبقاش تسنى 
كريم: مرتك مشات فخبر كان ههههه مشاو بتلاثة كلسو فكافي وكريم مطلقش من كوتر كل شوي اطلق ليها كلمة اعصبها واضحك عليها وهي كتجاوبو وتدعي فيه ...من بعد رجعو لفيلا 
كريم؛ وتاصلي اكوتر ..دركينااا ونتي وليتي تقيلة كيف شي خنشة ترملة 
كوتر: باقي زايد فيه ...اوا شوف ليتاصل 
كريم:عفاااك اختي الله احفظك ..مراد هضر مع مرتك 
مراد: بيناتكوووووم ..
كريم: عفاااك ونجيب ليك كادو لبغيتيي فاش تولدي 
كوتر: لبغيييت 
كريم: لبغيتيي غير تاصلي ...هزات كوتر الفون كتعوج وتشوف فكريم وتعصبو ودوزات لخط ..

كوتر:الو ريهام ..
ريهام: شنو مشهية تاني ..
كوتر: هههه حسيتي بيا ههه زيتون تقادااا لياا ..جيبيه ليا دابا الله احفظك 
ريهام: هاني جاياااا ..عرفتي يلاه جيت من لحمام باغا غير نعس
كوتر: الله اخليييك ليا 
ريهام: على وجه داكشي لفكرشك اما نتي طلعتي ليا فراسي 
كوتر: موااااح ازين ...قطعات وشافت فكريم لكان كايضحك بحال شي هبيل ..
كوتر:هاهي جايااا ..وعقل قلتي ليا تجيب ليا لبغيت 
كريم: فراااااعة ..وصافي هضرة وحدة ..غير مطلبي شي طيارو ولا صاروخ بربي نتبرا منك ومن راجلك وحتى ختك نخليها ليكوم كوتر: ايهااي بنتي على حقيقتك ..الغداار 
كريم: فرااااعة 
كوتر:تفوو جيتي نص نهار عصبتيني "كتغبن" مراد جري على صاحبك امشي فحالو محملتوش 
مراد:"كايضحك" وخااا احبيبة ..
كريم: كالس على قلبك حتى تولدي غير تهناي هوما شادين ليك لخاطر انا جيت باش نفقسك ونعصبك 
كوتر: تفوووو علييك يييخخ كيداير ..حالتك .."وقفات" مراد اجي شد فيا نطلع ..طلعها مراد وبقا كريم بوحدو كايضحك وتمتم بين شفايفو " بقاو متنزلوش" ..بقا كالس مسرح رجليه حتى سمع صوت طوموبيل عرفها فيراري تريهام ..وقف كايبتاسم طل عليها ووقف ورا لباب حلو بشوي وخلاه مردود ..حس بخطوات كايقربو ..تدفع لباب ودخلات طلعها وهبطها لابسة سروال سورفيت وتريكو نص كم لاسق ولاوية فوطة خفيفة على راسها وصندالة تصبع فرجليها ..قرب بشوي حتى لسق مع ضهرها جرها ساد ليها فمها وقلبها بسرعة وردخها مع الحيط حيد ليها بواطة فيديها حطها فوق طبلة ..بلقات عينيها فيه فصدمة ..كتشوفيه مامصدقاش ..طلعاتو ونزلاتو بعينها وايديها كايترعدو ..لابس سروال دجين وتريكو بوردو بالكول لاسق على دراعو كتافو زادو عراضوو ..هزات ايديها بشوي حطاتها على صدرو قاصح كيف صخرة ..كتحسسو بصباعها كتستوعب واش حقيقي ..ابتاسم ليها كريم ونطق ..
كريم: توحشتك ..توحشتك ..
ريهام:"دمعو عينيها" همممم عننننننن ...ضحك كريم وحيد ايديه على فمها 
ريهام:"حابسة لبكية" امتا جيتي علاش مقلتيهاش لياا ..
كريم: جيت دابااا ..توحشتك 
ريهام: تناااااا ..شدها كريم من حناكها ونزل قبلها بقوة فشفايفها وبعد وجهو كايتمعن فملامح وجها ورجع باسها فخودها نيفها راسها ..
كريم: توووووحشتك ..ريهام نزلو دموعها وتلاحت عنقاتو تعلات خاشة وجها فعنقو وكتبكي فصمت ..خلاها كريم على راحتها ..حتى بعدات عليه بعض خطوات كتشوف فدار ...
كريم: ههه كاينين لفوق ماتخافيش "قرب ليها" كتباني فنكوشية ريهام:"عاد عاقت اش لابسة" ااا ك كنت فالحمام ..و وجيت بغيت نعس طلباتني كوتر على زيتون وجيت 
كريم:"طلع حاجبو" ولكن هاد لباس ماديالش لخروج حشومة
ريهام:راه ركبت من باب دار ماشافني حد 
كريم:"جرها ولسقها معاه" اوكي حبيبة "باسها جنب فمها" توووحشتك اريهام ..جيت لبارح ومقدرتش نصبر وليوم صباح شديت طريق لهنا 
ريهام:"برائة" ماباقيش غاترجع ياك؟
كريم:"قبلها" لااا دابا كاين انا ونتي والمستقبل امامنا ..ماباقيش غانصبر او نتعطل ..غانمشي نهضر مع باباك ليوم وغانرجع نجيب مالين دار باش نتفاهمو ونحددو امتا لعرس
ريهام:"تخلعات"هااا ..باقي موجدت والوو ..
كريم: هاد لحركات مغايقضيو والوو معايا ..مهم هاني علمتك مغانزيدش نصبر ..
ريهام:وخااا ...بعدات عليه ومشات كلسات كتبلق بعينيها حشمانة ...كلس كريم مقابل معاها كايضحك عليها صيفط لمراد مسج عاد نزلو هو وكوتر ..
كوتر: امتااا جيتي 
ريهام: داباا يلاااااه دخلت ..
مراد:"غمز كريم" مرحباا بيييك ..
ريهام:"وقفات كتفتف" راه زيتون لبغيتي غانمشي انا 
كوتر: كلسي شوي مالك زربانة ..ياكما قلقك هاد راس طارو
كريم: انا مكنقلقش مدامتي ..كنقلق خت مدامتي 
كوتر: تفووو محملتك ..
كريم: غانربح فالوقت بدل ضائع وغاتفقسك حتى تجيبي الولد بحالي ...
كوتر: مزييناتك ..مافيك مايتشاف .."شافت فريهام" اش عجبك فييه غير قولي 
ريهام:"قربات لكوتر" جمعي فمك خلينا زوينين ..
مراد: "كايضحك من قلبو" هههه اهيياوينا فوتو عليكوم حبيبتي متعصبوهاش ..
كريم:"وقف" هاني غادي ..جر ريهام قدامهوم مخرجها وهي حشمانة حادرة راسها ..وصل لباب وقف ضار شاف فكوتر ..
كريم:نتشوافوووو الفراااعة ههه خرج خلاها كتغدد ومراد مايبرد فيها ..وقف كريم ريهام جنب طوموبيلتها وتحنى باسها فعنقها ..
كريم: سيري ديريكت لدار ..اوكي حبيبتي 
ريهام: وخااا ...حل ليها لباب طلعات كتباتسم وحنوكها غايطرطقو بسخونية ..خرجات على الفيلا وركب تاهو فسيارتو شاف فساعة عاد شد طريقة لمحل عند بابات ريهام ..وقف ونزل دخل شافو عاطيه بظهر ..وقف كريم وراه 
كريم: واحد سلاااام وعليكوم نسيبي لعزيز 
الاب:"شافيه مصدوم" اهلاااااا اهلااا ..عنقو كريم وباس ليه راسو ..
الاب: مرحباا اولدي نهار كبيير امتا جيتي 
كريم: جيت لبارح اعمي ..واخيراا حن عليا الله وتهنيت وجيت لبلادي 
الاب: حمد لله على سلامتك كنت ديما كنقوليك صبر 
كريم: وييه صراحة والله الى دازت عليا هاد لمدة كيف لويل 
الاب: كولشي داااز ..فين غاتستاقر دابا

كريم: رباااط ..
الاب: مزياااان ..
كريم: عمي بصراحة جاي بغيت نهضر معاك فموضوعي انا وريهام ..فكرت نجيب الواليدة ونتافقو على موعد لعقد ولعرس فاقرب وقت 
الاب:ههه مرحباا اولدي ..وقت لبغيتو غاتنورونا .."طبطب على كتفو" راك ولدي ..
كريم:"بابتسام طالعة من لقلب" لهلا اخطيك عليااا ..بقاو كايهضرو واتناقشو من بعد خرج كريم شد طريق لدارهوم ...داز اسبوع ورجع هو وعائلتو محمل هدايا وفرحة غاطير من عينيه ..جاي بكل اناقة بجسمو الرياضي ..واللحية مطراسية ..لابس شوميز فالبلو وسروال فنفس اللون وصباط ..دار عند كوتر عامرو بالمقربين كولشي فرحان كان يلاه جاي اخطبها وجدو ما الد وطاب من شهيوات ..كوتر لابس فراشة غادية جايا وكل مرة اكلسها شيحد ..دخل كريم مع الام ديالو ختو وزوجها وخالتو ..استقبلوهوم وحتى ريهام واقفة لابسة قفطان جوهرة فالموف منبت من جهت صدر طالقة شعرها سامبل لتزاد طول ديالو شوي ماكياج ..واقفة جنب ختها وحشمانة كتسالم بابتسامة وعينيها كايلمعوو ..دخل لجميع لصالون ..وتقدم لعشاء كولشي كايهضر واضحك كانهم عائلة وحدة ..سالاو وتحط لحلوة واتاي ..وبدات المناقاشات حول لعرس ولعقد ...ريهام ساكتة وكتسمع ليهوم وبضبط لكريم لكايهضر بكل طلاقة ماحشمان من حد ...قاليهوم لعقد بعد اسبوع والعرس غايكون بعد العقد بعشر ايام ..ناضت كوتر كتناكر معاه وهو كايشد معاها ضد بلعاني باش افقسها واخليها تعايرو وتنفر منو ..كمل لعشا وخرج كولشي ...كلسات كوتر منفخة وكتسوط
مراد:"مخنزر" مالكي نتي دابا ..كديري بحالا نتي هي نكافة
كوتر: عرس ختي لوحيدة بغيت نشطح ونشط على راحتي ماشي لداز من حدايا اقوليا كلسي ..ارتاحي ...
مراد:"خنزر فيها وسكت"
ريهام: راه تولدي وغايخصك وقت من بعد عاد ترتاحي ..
الاب:لولد مغايصبرش ..من حقو شحال وهو خاطبها 
كوتر:"عمرو عينيها بدموع" صافي ديرو لعجبكوم "وقفات" انطلع لبس حوايجي باش نمشيو ..خلاتهوم وزادت كتسوط وتغبن ...
مراد:هكا كتقلب ليها طبيعة دغيا ...تبرد وغدا تصبح بحالا مكاين والوو 
ريهام: مابغيتهاش تقلق مني ..
مراد: لالااا كوني هانياا " وقف" يلا تصبحو على هاهي نازلة ...نزلات تسالمات معاهوم وخرجو ..طريق كاملة وهي كتغبن وتحبس فيها لبكية مراد سكت مابقاش هضر معاها ..وصلو لدار دخلو وشدها مراد من دراعها وجرها مقربها ليه 
مراد:"مقوس حجبانو" شوفي كتر من 7 شهور وشاد معاك لخاطر ..دابا غانجيك كوود العرس غاتبتي الارض .شطيح مكااااينش ..وماشي حيت حاملة ..حيت اناا مابغيتكش تشطحي ..تفاهمنا 
كوتر:"صمت ومخلوعة" 
مراد:"داها وجابها" تفااااااهمنااااا 
كوتر:"بصوت خافت" وخااا ..
مراد:وتانياا لماكياج شوييي متكتريش ولا مغاتحضريش وبكي مغانحنش فيك ..العرس مخلط ..ومخلط مزيااان ..كريم معيط على الدراري تالخدمة كاملين وحتى عائلتو يعني منبغيش شيحد اطلع فيك عينيه 
كوتر:اويلي راني حاملة وكرشي قدامي ..اش غايشوف فيا 
مراد:بنادم مكتعرفيهش اش فمخووو ...يقدر شيحد اشوفك واقول مرت مراد زوينة ولا شيحاجة بحال هكا ..وخا اقولها فخاطرو منقبلش بيهااا ..
كوتر:"كتبغبن وكتعصر عينيها" ومحشوماش عليك ..عرس ختي لوحيدة ونبقا كالسة كيف ضياف ..ونمشي صفرة لعرس
مراد: صفرة ولا خضرة نتي فلاما ..هضرة وحدة منعاودهااااش تفاهمنا اشريفة 
كوتر:صافي .."نترات ايديها ومشات" 
مراد: تفركعي كاااع ..ضسرتي والله ..
كوتر:"فخاطرها" مشيي ..طلعات بدلات عليها ولبسات شوميز بسميطات حد فخاضها وعريض صدرها واقف ومنفوخ ..طلقات شعرها كتمشطو وهو ادخل مراد كابشوف فيها وكتخنزر فيه ..حيد حوايجو وهي حاضياه من لمارية كتدهن ايديها ..لبس شورط قصير وتلاح فوق لفراش ..ناضت تاهي وتكات على ضهرها شادة الفون فايديها وكتبقشش فيه ..قرب منها مراد وهي تشوفيه ..
مراد:"دوز لسانو على شفايفو"طفي ضوء
كوتر:"عينيها على فمو" نعس حتى نبغي نعس ونطفيه 
مراد:"عض على شاربو تحتاني" انااا بغييت نعس 
كوتر:"جاتها لبكية"..دابا انا حاملة بولدك 
مراد:ولا بنتي 
كوتر: وكنتوحم ..
مراد: ومن بعد 
كوتر:"كتعصر باغا دمع" بغييت نبوسك ..ولكن راه مقلقة منك
مراد:لااا "بلل شفايفو" لاش باغا تبوسي
كوتر:ولد باغااا 
مراد: حتى اتزاد ونبوس بنتي وتبوسني ..
كوتر:"حطات الفون وشداتو من كتافو" عفااا..قاطعها مراد بقبلة حارة ..خلاها تلدد من حلاوة شفايفو وتستطعمهوم على راحتها ..عطاها جسمو كامل تاخد لبغات وتشبع رغبتها لكبيرة جيهتوو حتى نعسات عريانة راسها عند صدرو وشعرها مغطي ظهرها كامل..حط مراد ايديه على كرشها كايتحسسها حس بضربة خفيفة خلات قلبو اتزعز ...بقا متبعة بصباعو وكل مرة احس بضربة خفيفة كايبتاسم واسد عينيه ..بقا هكاك حتى نعس وابتسامة مرسومة على شفايفو ...

...دازو ايام معضمها كوتر فدارهوم ..كتوجد مع ماماها وختها ..وصل نهار لعقد جا كريم والام ديالو ..جابو لعدول لدار وتم عقد القران ..كريم غايطير بالفرحة وريهام قلبها غايسكت بالخلعة ..كتهرب من شوفات كريم ليها وغير ساكتة ..تغداو وطلعات وسلتات لبيتها ..حيدات قفطان لابسة وبقات بشورط قصير وديباردور ديالو ..وقفات قدام لمراية كتمسح وجها حتى سمعات لباب تحل ..شافت شكون واهو تخطف لون وجها ..ووقفات مسمرة ..
ريهام: لاش جاي غايشوفك شيحد 
كريم:"كايقرب ليها وابتسامة شريرة على فمو" حلفي ..
ريهام:"لسقات فالبلاكار" خرج اكريم ..حشومة غايشوفنا شيحد
كريم:"طلعها وهبطها شد طرف شعرها من صباعو" نتي دابا مرتي ..يعني ديالي ..مكاينش شيحد عندو لحق امنعني 
ريهام:"كتفتف" ح ح ح شووومة ..باسها كريم فخدها ..عاود بوسة خرا فراسها ونزل طبع قبلة طويلة تحت ودنيها حتى حس بجسمها كامل تهز وتحط ..خلا شفايفو فنفس البلاصة .يد شاد بيها طرف شعرها ..واليد الخرا طالعة مع فخضها مرورا بخصرها ..تحطات على صدرها ..
كريم:"كايهضر وشفايفو كايتحركو فوق لحمها" كنبغيييك ...عرفتي شحال صبرت على قبلك ..شحال وانا صايم ..
ريهام:"لارد نفس كايطلع من صدرها مقطع ..لحمها كانها فجلسة وخز الابر...واقفة على طرف صباعها وكتجبد كيف لاستيك ...مقادراش تحرك ..
كريم:"هز راسو وحط شفايفو على شفايفها وكايهضر " فالليل غاندوز عليك ..ليوم غاتباتي معايا ..وجدي راسك "طبع قبلة طويلة وسخونة" ....
ريهام:"كتهضر بزز" منقدرش ..شنو غانقوليهوم ..
كريم:مغاتقولي والوو ...غانجي ونديك ..نعاود نقوليك مكاينش شيحد امنعني ..
ريهام: باقي مدرناش لعرس 
كريم : ولكن لعقد لمهم درناه .."باسها فراسها" اجيي ...جرها من ايديها وداها لناموسية تكا على ظهرو ونعسها فوق منو ..حاطة راسها عند عنقو ..حاط يدو على ترمتها ..
كريم: شوفي احبيبة ..نتي دابا مرتي يعني واجباتك هي تهلاي فيا ومتخسريش ليا خاطري ..حيت الملائكة غاتبقا تنعلك ..وحتى انا عمري نرفض ليك طلب فهمتيني 
ريهام: خايفة ..وحشمانة ..الى مشيت معاك كيف غانتقابل معاهوم غدا ..
كريم: ديري بحالا ليوم كان لعرس ..
ريهام: معرفتش ..والله 
كريم:"شحطها بشوي" انا رااه تنفخف ..اختاري تمشي تباتي معايا ولا نشوف لتبات معايا 
ريهام:"علات فيه عينيها" تقدر زعما .."عينيها عمرو بدموع" 
كريم:"قبلها" كون بقدر كنت نديرها فاش مشيت لشحال من دولة وغير كايتلاوحو كيف البق ...
ريهام:شوف جي وقوليهوم غانمشيو لشي بلاصة ولا كدب شي كدبة عفااك ..والله حتى حشمانة منهوم 
كريم: هههه وخاا ... مصاحب معاك اناا ههه ..بقا معاها كريم فالبيت كايداعب جسمها وهي عاجبها لحال ومكمشة بين احضانو حتى نعسات باسها ووقف كايقاد فسروال وانقز باش ابرد ..عاد خرج وسد عليها لباب ...دازت مدة عاد ريهام فاقت على ايدين كوتر حلات عينيها وكتشوف فجنابها .. 
كوتر:"كضحك" ماكاينش ..ومشااو شوي هدا 
ريهام: اواااه 
كوتر: وي ..والواعرة قدام كولشي قال لبابا غاندوز على ريهام بغيتها دوز معانا شوي تالوقت ..انا حبست ضحكة مراد خرج عينيه فكريم ..ماما حدرات راسها ..اما مو معرفات مادير ..كولشي حبس ضحكة ..
ريهام:"شدات فحناكها" اويلييي على شوهة..واش قاليه بابا 
كوتر:قاليه مرتك هاديك ومن اليوم متبقاوش تشاور معايا 
ريهام:انااارييي على مقزدر ..فين غاندير وجهي 
كوتر:شوفي فين غاديري طب*** ههه والله مايزكلك ليوم تاكلي لحلوة ...
ريهام:"تخطف فيها اللون" تفوو على مك المسوخة حشمي من داكشي لفكرشك ..
كوتر:نوووضي ازين بالي براسك ..كريم كايتسناا وداير دهناا هههههههه 
ريهام:بلا طنز وقولي ليا اش ندير 
كوتر:فرقي رجليك هههه 
ريهام:"ضرباتها بمخدة"تفوو على خليقة نوضي تخراااي ..
كوتر:صافي احبيبة هه بلا متقلقي ههه دابا لحمك نقي مافيه تازغبة درتي لايزر تهنيتي ..دخلي ديري دوش ..دهني لحمك بكريمات متكونش ريحة مجهدة ..انا غانصاوب ليك شعرك باش تبقا فيه ريحة زوينة ...لبسي دوبياس بيضين من دوك لشريتي ..باش حتى الى زرب عليك ومخلاكش تبدلي تكوني موجدة ..ودي معاك شوميز فالصومو بارد ببنوار متكونش معرية بزاف ..نتي باقي جديدة غير صبعك الكبير اشوفو اقيم عليك ههه ...خنزرات فيها ريهام وناضت دوشات وخرجات ملوية ففوطة كلسات قدام كوتر وعطاتها شعرها كتسرحو ليها وتهضر معاها 
كوتر:شوفي بلا متخلعي عيشي اللحظة ونساي كولشي ومتعصبش غاتجيبيها فراسك ونتي لغاتقصحي ..اللهم ترخاي وديري عومة جرانة هههه 
ريهام:واش ضروري طنزي تفوو ...كملات ليها شعرها وخرجات خلاتها كدهن فلحمها وعقلها سااارح ...
طاح ظلام ..وريهام باقي مرهونة فبيتها مقادراش تقابل مع شيحد حتى صونا الفون ديالها وقفزات ...جاوبات 
ريهام:وي 
كريم:الحب هاني فالباب ندخل ولا تخرجي ..
ريهام: ماقدراش نزل ..
كريم: كيفااااش ...صافي "قطع عليها"

كريم قطع على ريهام وبقات مشوكية ..معرفات شنو دير كتمشي وتجي باغا تبكي اكيد تقلق ومشا ..بقات هكاك حتى تحل عليها لباب ودخلات كوتر مختزرة 
ريهام: مالك حتى نتي 
كوتر:لبسي دغيا نزلي خرجي نتي وداك وجه لحبس باقي مارتكبت فيه شي جريمة خنق وحرق وتقطيع 
ريهام: واش دخل كاين لتحت 
كوتر: اييه كالس فوسط صالون كايتسناك ...لبسي دغيا 
ريهام: بابا كاين 
كوتر: فين غايكون ..وهو صيفطني قاليا قولي لختك تلبس وتكلم لرااااجلها "طولات حرف راء" ..ودغيا راه محاملا نشوف كمارتو
ريهام: وبراااكة لانولدك قبل لوقت ..مدات ليها كوتر صبع وخرجات ..جبدات ريهام كسوة بكميمات حد لمرفق كتسد بصدف حتى التحت فالبيض لبساتها فوق دوبياس تاهوما بيضين ..دارت سمطة فالبوردو وسط لكسوة ..لبسات صندالة بوردو وهزات صاك متوسط حطات فيه داكشي لغاتحتاج ..طلقات شعرها دارت شوي ماكياج رشات ريحة ..لبسات سنسنلة طويلة لكان جاب ليها كريم وخاتم فيديها ..ونزلات عينيها فالارض وقفات عليهوم مقادراش تهضر ..زرب عليها كريم ووقف عنقها من كتافها وخرجو...ركبات معاه ايديها طيباتهوم بكترة مكتعصر فيهوم بتوثر ..كريم حاضيها وكايبتاسم..بغا غادي وربهام مقابلة طريق خرجو على مدينة وهي تشوفيه 
ريهام: فين غاديين 
كريم: واحد بلاصة زوينة ..وقف قدام باب كبيير تحل ودخل مع ممر طويل حتى وصل باب فيلا متوسطة الحجم ..قدامها جردة كبييرة كايتوسطها بيسين مزيين بضواو ..نزلات كضور يمين وشمال حتى حسات بيد كريم على خصرها ..دخلها مع باب ..فيلا انيقة جداا فراش قليل طلعو مع دروج وريهام غير ساكتة ..دازو مع ممر حتى وصلو باب غرفة حلو كريم وهو اهزها بزربة حتى طاح صاك من ابديها ..
كريم: مرحبااا بيك احبيبة فدارك 
ريهام:"بصدمة" داري .."حطها وهي تحل فمها غرفة مزينة بشمع ناموسية بيضة مكتبانش بالورد ..طبلة صغيرة جنب فوطويات فالحمر ..عامرة بانواع من مأكولات ..جرها كريم كلس وكلسات جنبو 
كريم: مكليتيش من لغدا 
ريهام: وي ..عمر طبسيل وضار تقابل معاها كايوكلها وهي حشمانة ..حتى شبعات ..
كريم: واش غاتبقاي حشمانة بحالا يلاه غانتشوافو ..
ريهام: انااا لااا ..
كريم:"قرب ليها بزاف" بصح ..
ريهام:"كتفتف" والله ..زاد قرب ليها كريم وشدها من شعرها اللور وجرها دخلها بين دراعو ولسق على شفايفها ..كايقلبها بحنان ..كايمرر شفايفو على شفايفها ..حتى حس بيها ترخات وقف وهزها غادي بيها لناموسية وعينيه فعينيها ..
كريم: شحال تسنيت هاد نهار ..كنت كنطلب ادوظ لوقت بسرعة باش تكوني قريبة ليا .."حطها وغطاها بخيال نصف جسدو" وهانتي دابا ديالي ..تاحاجة مغاتبعدك عليا ...نزل راسو كايطبع قبل متفرقة على شفايفها وايديه كايحلو صدف تالكسوى ..حتى حلها ولاحها...بعد وتكعد تقابل مع جسمها لعاري ..سمار بشرتها مع بياض ملابس داخلية ..خلاو عقل كريم اترفع ..نسل تريكو وحل صدفة تسروال ورجع تكا عليها كايقبل عنقها وارجع لشفايقها ..حس بيها تجاوبات معاه ..زاد فوتيرة القبلات واديه كايتحسيو جسمها ..حد داكشي لبقا ساتر قليل من جسمها ..قدر امتالكها جسدا وروحاا ..قدر اعيشها احسن اول ليلة فحياتها عمرها تنساهاا ....اصبحت ملكه اسما وكياناا ...خدا وقت طويل حتى ترخات عاد قدر افض البكرة ..تألمات ريهام ولكن معاملة كريم خلاتها متحسش بالالم مقارنة بقلبها كايفرف ..نعسات بين احضان حبيبها .....
دازو ايام بعدها وبدات تجهيزات لعرس لغايكون فالاوطيل ..اكبر عدد من لمدعوين ..من جهة لعروسة ومن جهة لعريس ..هشام وغزال جاو قبل بتلاث ايام كوتر عرضات على هاجر وراجلها وخواتها وماماها ..وهديل وراجها جاراتها وعلى رأسهوم لالا جميلة ...ريهام عرضات على صحاباتها العائلة كاملة حاضرة ..أمين ومراد وقفو على تجهيزات والغرف للمدعويبن...وصل نهار المنتظر ..كولشي كايتحرك ..كوتر شادو الفون فودينها كتسول على صغيرة ولكبيرة ..مشات ريهام مع صحباتها لسونطر ..وكوتر مع ريما وبسمة وهداية وغفران فالاوطيل ..
بسمة:حنا مغانمشيوش نصاوبو 
كوتر: صبري ايجيو لبنات لخرين "شيرات بيديها" هاهوماا ...
هديل: سمحالي ازين تعطلنا عليكوم ..هاد طرنونة تهاجر خلاتني نساينها 
هاجر: اوعدي على كدبة قاداش..كلست نعستو لعبد النور وهودت لعندك 
بسمة: اوعدي يانا على هضرة شحال حلوة بحالكوم 
غفران:كون عير بقيتو كتهضرو ههه 
كوتر: هههه البنات هادي هديل وهادي هاجر ..ونتوما هادو هومت صحاباتي كنت كنعاود ليكوم عليهوم ...ريما هداية غفران وبسمة 
هديل وهاجر:مشرفين ..
هديل:حتا نتوما هضرتكوم مزيونة حق الله 
كوتر: زيدو براكة مت بعد وتعارفو ..توجهو كامل لسونطر بيوتي واحد آخر ..وقادو سالاو ورجعو ..تلاقات كوتر مع غزال لكانت كتعاون عائلة لعريس ...
غزال: عطي راسك راحة 
كوتر: سيريي تخراي حتى نتي ..خلاتها وطلعات بقات ريهام بداو ليها نكافات ..كلشي لبس وتقاد ..ريهام لبسات تكشيطة خضرة موبرة سامبل مزينة بحلى من دهب ومشيطة خفيفة ..جنبها صاحبتها اكرام بقفطان خضر ..

دخلات عليها كوتر بتكشيطة فالزرق مغلوق مرصعة من لكمام وجلايل بحزام رقيق فنفس اللون وشال فالبيض وشوي ماكياج فوجها وبلغة فرجليها ..وقفات كتشوف فريهام حتى نزلو دموع من عينيها وابتسامة فخر على شفايفها ...قربات ليها عنقاتها كتحبس دموع باش مايخسرش ليهوم ماكياج ..مدات ليها بواطة كحلة مربعة حلاتها ريهام وهي تلقى كوليي من الالماس كايحمق تسطات عليه وعاود عنقات ختها تحل لباب ودخلات فاتي ليلاه جات هي وزهير دخلات كتعنق فريهام وتبارك ليها ...نزلو بصلاة وسلام على الرسول الله ..دنيا عامرة وكولشي وقف ..ريهام تلفات كتشوف بنادم فرحان معاها ..هزوها فالعمارية تحت انغام الشعبي ..ضوروها بين الحضور كتضحك وتشير بيديها من بعد نزلوها وبداو ماينقشو ليها ..تسمع صوت طقطوقة الجبلية ..ودخلو رجال لابيسن جلابة بيضة وفوقها جلابة فالقهوي لابسين يد ومرخرجين يد خرا ..كولشي ضار كايشوف فيهوم ..خرج كريم من وراهوم لابس قفطان بيض مخدوم بالبيج وبلغة صفرة ..ابتسامة عريضة على شفايفو ...تقدم كلس جنب ريهام هز عليها توب على وجها وباسها فراسها ..تحطو طيافر قدام ناس وتحلو ..تحت انغام موسيقيين ...داز لعرس وكولشي فرحان وناشط صبح صباح وخرج كريم هو ريهام لكان وجها عامر دموع ..ركبها فطوموبيل سد عليها عاد رجع تسالم مع كولشي ...توجهو لفيلا لكانو مشاو ليها قبل ..شراها كريم باش وقتما جاو لمراكش اكلسو فيها ..ارتاحو وبعد يومين سافرو لباريس ..
⏳....دازو ايام واسابيع كتيرة ..كوتر كتوجد غرفة لبيبي لخلاوها فاللون الابيض ..كتشري حوايج فجميع الالوان ..مراد كادوز وقت كامل معاها خايف اجيها لوجه ومايكونش قريب ليها ..واقغة كوتر كتقاد شهيوة و كتصور فيديو ..محسات حتى طلقات الفون من ايديها وغوتات ..زيرات على شفايفها كتنهج ..جا مراد مخلوع شدها من ظهرها 
مراد:مالكي ..
كوتر:لوجع ...لوجع امرااااد 
مراد:ياكما كيف ديما ...غير دايز 
كوتر:لااااا "كتعصر"قاااااااصح ..اعععععععععنننن ...مراااد عنقنيبيي ...هزها مراد حطها فصالون وطلع جاب ليها عباية وشال وبلغينة لبسعوم ليها وهي كتقطع وتعرق ..خرجها والفون فيدو كايهضر مع طبيبة ...شدو طريق لكلينيك حتى حسات كوتر بشي حاجة سخونة نازلة مع رجليها ..قلبها بدا كايضرب بجهد
كوتر"غوتااات"غانولد ...بزربة ...وااااااعععععننننننن هممممم ..وصلو لكلينيك دخلوها فكرسي متحرك ..لقا طبيبة كتسناهوم دخلوها ديريكت غرفة الولادة ..تاصل مراد بكولشي ..ايديه على على جبهتو غادي جاي مخلوووع ..وقف عليه امين وريما ..وبعدها واليدين كوتر ..عاد واليديه ...خرجات طبيبة ووقف ليها مراد قدامها ووجهو مخطوف منو اللون 
مراد: امدراااا 
طبيبة: مبرووووك مدام ولدات ولد ..
مراد: واش هي بخير 
طبيبة: بجوووجهوم بخيييير وعلى خير ..غير ترتاح ابدلو ليها ولبيبي ونحولوهوم لغرفة وديك ساعة تشوفهوم ...تنفس مراد وطعاتو تبوريشة والفرحة ..شكرها وضار كايباركو ليه ..وهو مرفوع غير كايضحك ..جاو لبنات سمعو لخبر وفرحوو ..داز وقت قصير حولو كوتر لغرفة خرا كانت لابسة بيجامة بكميمات وشال على راسها ..قرب منها مراد قدام كولشي باس ليها راسها وايديها ..ونزل لودينها " شكرااا بزاااااف " قربو باركو ليها كولشي ووخا سخفانة كضحك وتجاوبهوم ..دخلو ليهوم لبيبي لابس لبيسة زرقة وحميمر عوينات مسدودين ..هز مراد كايشوفيه ونزل كبر ليه فودينه عينيه تغرغرو ..قرب حطو لكوتر لبلفرحة مقدراتش تحبس دموعها ...
مراد: شنو باغا تسميه 
كوتر:"جاوبات بسرعة" قصي 
مراد:قصي 
كوتر: وي قصي .."كتبوس فولدها" حبيب ماماه .."شافت فمراد" دعوتي تقبلات ...بداو المكالات مايجيو وكولشي كايبارك ليها اول فرحة ..دوزات دوجوغ وخرجات ..وجدو لسبوع وختانة فالفيلا عندهوم عرضو على كولشي ومراد واقف برجليه باش اكون كولشي هو هداك ...قدم لكوتر هدية خلات قلبها اسكت ..فتح ليها مطعم باسمها شهورة طويلة وهو كايقادو واوجدو لهاد نهار ..وعطاه ليها باش اكون تحت اشرافها ولكن حتى تبراا

...داخل مراد مع باب الفيلا ظلام فجردة ..نزل من طوموبيل وقرب لباب كايسمع لغواات تكوتر وصوت مجهد حل ودخل سد ضار لقا عند رجليه طفل دو تلاث سنوات لابس توني شورط وتريكو تريال مدريد بعينيه لخضرين وابتسامة شعرو زعر نازل على عينيه 
قصي: "بصوت طوفولي" بابا ..بابا ماما شافت هداك سيرخيو راموث..وقالت عليه زويين 
مراد:فينها جويرية ختك 
قصي:ناعثة..قبيلة نعثاثها ماما 
مراد: ماماك كتفرج فكورة 
قصي: وي فراموث ..
مراد: صافي غاتولد لينا شي كوايري ..غير نتا خرجتي ميلونج بيني وبين كريم وهدا جاي فطريق غاتزاد كيف راموث 
قصي: ولاا ابابا رااموث ..ماشي راموث ..باغي اخرج حرف س بزز 
مراد:سيري احبيبي عند ختك هاني جاي ونعطيك حاجة زوينة ..مشا قصى كايجيري طلع مع دروج ..مشا مراد بشوي بلا حس ولسق لكوتر مع ظهرها حتى قفزات ...حط ايديه على كرشها يلاه كتبان ..
مراد:كنبغييييك....

🌟💥 النهاية 💥🌟
هاد القصة كانت اول تجربة ليا ...
قصة شخصين حقيقين خلاوني نكتب ..
شخصين كنتمنى من اعماق قلبي انا حياتهوم تستمر وحبهوم اكون اقوى من كولشي 😢

السفالة في القصة
كيفاش يمكن نصنفو هاد القصة؟
  • بدون سفالة
  • القليل من السفالة
  • سفالة مفرطة

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.