قرر بهجت بيك يجمع كولشي على طبلة لفطور هاد صباح وأرسل الخدم باش يفيقو كولشي وماستثناو حتى شي حد .. كولشي تجمع على الطبلة ، أسد نورسين ، رافاييل تاليا ، روعة جبل ، مدام علياء والدون ماركيز وبرهان ، وباتريسيا وياسين وأسية ، وحتى رؤية لي كانت كاتبان مهمومة وهي كاتشوف فطباسل وسارحة بتفكيرها فالحظة لي باسها عصام بديك الطريقة الوحشية .
- بنتي كولي مالكي ساهية ؟
قالتها مدام علياء وهي كاتشوف فرؤية بريبة لكن رؤية ماجاوبتهاش وإستمرت فسرحانها .. تأففت علياء وهزات فنجان القهوة أخدت منو رشفة حتى قاطعها الدون ماركيز وهو كايقول :
- تربية لبنات صعيبة .. كايعاندو فكل شئ .
هزات علياء عينيها شافت فيه وماجاوباتوش إكتفت ببعض النظرات ورجعت حنات راسها لكن الدون ماركيز كان مصر يجبد منها لهضرة فكمل :
- الأب ديالها توفى قبل مايشوفها ياك ؟
بعدت بعض خصلات شعرها الأصفر من على وجهها وشافت فيه بغضب ثم همست بصوت منخفض باش مايسمعوهاش :
- سد فمك أداوود ولا ماغادي يعجبك حال .
إبتسم دون ماركيز بمكر وهو كايقطع بالموس قطعة من البيض المقلي وكمل بطريقة مستفزة :
- كاتشبه ليك ولا لباباها ؟ .
ثم على عينيه شاف فيها بمكر وكمل :
- قالولي بلي كاتشبه لباباها .
ضارت مدام علياء براسها شافت فبهجت واش كايشوف فيها لكن لقاتو مشغول وشافت فبرهان ولقاتو كايهضر مع أسد فرجعت شافت فدون ماركيز وقالت وهي كاتبرك على أسنانها :
- تبعني لبرا .
هزات منديل مسحت بيه أطراف شفايفها بعنفوان أنثوي ثم حطاتو وناضت خرجت من الباب الزجاجية تحت أنظار باتريسيا وثواني ولحق عليها داوود وتبعتهوم باتريسيا بعدما استأذنت انها غادي تخرج تهضر فتلفون ...لكن داوود غير ضار لخلف الڤيلة إنقضت علياء شنقات عليه من ياقتو ودفعاتو مع الحيط وهي كاتقول بغضب :
- أشنو كنتي كاتحاول دير هاااه ؟ .
شاف داوود فيديها لي شانقة عليه وإبتسم بمكر قبل مايلوي ليها يديها وقلبها وزيرها مع الحيط ثم قرب منها وهو كايقول بخبث :
- واالو .. ماكنت كانحاول ندير والو .. كايبان لي نتي لي محسوسة بزااف ... ولاا ياكما خايفا يعرف البارون الأعضم وخوك برهان الحقيقة ويحيدوك من الحالة المدنية !!.
تحول لون وجه علياء للأحمر بقوة الغضب فردت عليه وهي كاتحاول دفعو باش تبعدو عليها :
- أنا ماخايفا من حتى شي حد كاتسمع !.
همهم داوود بخبث وهو كايشوف فشفايفها ثم على عينيه فعينيها و قال :
- أهاه ! .. إذن دابا لامشيت لعندهوم وقلت ليهوم بلي بنتكم كانت كاتخون راجلها معايا حتى حملت مني وولدات ليكم حفيدتكم رؤية ماغادي يديروا ليك والو !!؟.
دفعاتو عليها بقوة وجمعت معاه بسقلة حتى ضار وجهو وقالت بغضب :
- واياااك أداوود .. كانحذرك .
تحسس دون ماركيز مكان الصفعة لكنه رجع إبتسم بمكر وشاف فيها وقال بهدوء :
- أوكي .. أوكي .. ماتخافيش ماغاديش ننطق بحتى شي كلمة .. واخا كانضن بلي من حق بنتي صوفيا تعرف بلي عنها أخت كبر منها اولا ؟ .
قربت لعندو بإندفاع وقالت:
- داوووووود .. هاديك كانت غلطة وأنا ندمت بزاااف ..
شاف فمدى إقترابها منو وهمس وهو كايشوف فعيونها الزمردية :
- كانت أحسن غلطة فالعالم ..
تنهدت علياء بقلة حيلة ثم تنفست باش تتحكم فأعصابها وقالت:
- ماشي صوقك اسيدي دخل سوق راسك .. هادا شحال فين كنتي ماعمرك سولتي فيها ؟؟ .
إبتلعت ريقها بتوتر فاش إنتبهت لنبرة صوتها وبعدت عليه وهي كاتمرر يديها بين خصلات شعرها الذهبي فقال داوود بعد حين :
- ودابا أنا مستعد نسول فيها ، ومستعد نكون أب من جديد .. عندي جوج بنات صوفيا بنتي وبغيت حتى رؤية تعرف بلي أنا هو باباها .
طفح الكيل بأعصاب علياء ومكانش عندها شي حل أخر .. قربت منو وهدداتو بإصبعها السبابة وهي كاتقول :
- سمعني إلى فكرتي تقول شي حاجة لبنتي .. كانقسم ليك أنني غادي نمشي لعند صخر ونعاود ليه على حقيقة مو السافلة .. ومعامن خانت باه ..
إسودت الدنيا فعيون داوود وزمجر بصوت غليض وغاضب:
- عليااااااء
لكن علياء قالت بتحدي قارس:
- حتى نتا ماتقدرش تنكر ان ختك كانت عديمة الشرف وخانت خويا كيما خنت أنا راجلي معاك .. إلى تجراتي تقول شي حاجة لبنتي رؤية كانقسم ليك بلي غادي نفجر حقيقة ليليا للعالم كامل ونكشف الغطاء على شخصيتها الحقيرة فهمتي .
إستمر الصمت بينهم لثواني بين التهديد والغضب لكن داوود ماعندوش شي حل أخر .. همهم بغيظ وقال:
- فهمت !.
رجعت علياء شعرها لأشقر للخلف بخيلاء وقالت :
- دابا حنا متعادلين .
ثم طقطقت بكعبها العالي راجعا للصالة لي مجموعين فيها كولشي مخليا خلفها داوود كايحاول يتحكم فأعصابو قبل مايلحق عليها حتى هو .
******
شاف بهجت فالحاضرين للفطور وهو كايبتاسم بالخصوص فاش لاحظ سعادة جبل والإبتسامة لي مافارقتش وجهو ويديه لي مافارقتش يد روعة من تحت الطبلة .. لكن كان ناقصو صخر .. قلب بعينيه لكن مالقاهش .
حط فنجان القهوة من يديه على الطبلة وعلى راسو بشموخ وشاف الخالة مريم لي كانت واقفا عند راسو كاتسنا أوامرو .. مسح فمو بمنديل وقال :
- مريم .. فين هو صخر ؟
تنحنحت الخالة مريم وقالت بإحترام :
- دقيت عليه فغرفتو اسيدي وطلبت منو يهبط يفطر لكنه إمتنع ومابغاش .
همهم بهجت وقال بحزم :
- طلعي فيقيه ينزل يفطر مع العائلة ضاروري والى مابغاش جريه من رجليه .
أومأت الخالة مريم بطاعة وقالت :
- أمرك سيدي
حركت رجليها باش تمشي لكن إستوقفها الدون ماركيز وهو كايقول بحدة :
-بلاتي... فطريقك دقتي على بنتي صوفيا حتى هي باش تنزل
هزات مريم راسها بطاعة وخرجات من الصالة متوجها للطابق الثاني مخلية خلفها داوود وعلياء يتراشقون بنظرات نارية غاضبة ... لكن فجنبهم كانت باتريسيا حاضيا كل حركاتهم تصنتات على داكشي لي قدات وسمعات لي سمعات .
دارت رجل على رجل بعنفوان وهزات كأس عصير العنب فيديها وهي كاتقول فنفسها وكاتبتاسم بمكر :
- بدأت أشعر بالحماس : I started to feel excited
خدات منو رشفة وعلات عينيها شافت فتاليا ورافاييل لي كانو كايهضرو بصوت منخفض وكملت داخل نفسها بخبث:
- عصافير الحب تزقزق .. اووه مقزز : Oh Disgusting
توسعت إبتسامتها الخبيثة وهي كاتشوف فيهم وكملت فنفسها:
- ياترى واش غادي تبقا على وجهك نفس الإبتسامة اسي رافاييل ديمورو فاش غادي تعرف أن حبيبتك تاليا دارت علاقة جنسية مع هاري ؟ .
هزات قطعة من الحلوة عضت منها وهي كاتحاول ماضحكش وكملت فنفسها :
- الفضل كولو كايرجع لغباء صخر ...
الليلة لي كتاشف فيها صخر ديك المعلومة كانت وصلاتو على شكل رسالة نصية فتلفونو من المخبرين ديالو ، فديك الفترة باتريسيا كانت حاطا عليه وباغيا ترجعو حبيبها كما في السابق لكنها لاحظت إنفعالو وغضبو وجاها الفضول تعرف محتوى الرسالة ومارتاحت حتى دخلت لغرفتو خلسة واستغلت الوقت فاش كان كايدوش وقرات محتواها وعرفت سبب غضبو ..
رجعت هزت كأس العصير شربات منو رشفة وحطاتو وهي كاتقول فنفسها:
حاولت روعة تسيطر على ضحكاتها وهي كاتشوف فجبل لي غلباتو ضحكة حتى هو بعدما إستوعب شنو قال وردت عليها روعة وقالت:
- جبل قالي واحد النكتة .. كاتقتل بالضحك .. قولهالهوم أجبل يرحم يمااااااااك
إختفت إبتسامة جبل وبدا كايشوف فيها بصدمة .. على اشمن نكتة كاتهضر هاد لهبيلة ؟؟ حتى قالت تاليا بحماس :
- اه اخويا قولينا هاد النكتة نضحكو حتى حنا .
تحتح جبل وشاف فروعة تحلف فيها بعينيه وهي غير مازادت شدت فكرشها كاضحك .. ففكر فشي نكتة لكن عقلو كان خاااوي اصلا عندو غير النكت السافلة لي كايعاودوهم ليه رجالو بقا كايفكر حتى طاح فنكتة محترمة :
- احممم.... في واحد غبي ضل يدعى ربه 15 سنه ويقول يارب ارزقنى بولد يارب ارزقنى بولد يارب ارزقنى بولد وفى الاخر نزل له ملك من الملائكه وقال له ابوس على ايدك اتزوج الاول.
تسمرو كولهوم كايشوفو فيه كما انه تسناهم يضحكو لكن ولا واحد فيهم ضحك من غير روعة لي دموعها نزلو حتى بدات كاتكح بقوة الضحك .. يمكن النكتة سخيفة لدرجة كاتنطابق على السؤال ديالو لأول لاتكون حاملة وهو يالاه دخل بيها لبارح .. تنحنح جبل بإحراج وقرب من ودن روعة وقال بصوت منخفض:
- بلاتي على مك الى ماحملتيش اليوم مانتسماش أنا جبل ... غير بلاتي يتسالا هاد لفطور ونطلعو لبينتا ونوريك .
شافت فيه روعة بصدمة وهي كاتكتم بعض الضحكات وقالت:
- منيتك ؟؟؟.
إبتسم جبل بمكر وقال:
- أشنو بان ليك نطلعو دابا لبينتا نوريك واش منيتي ولا ماشي منيتي !!!
فاش عرفاتو مكايضحكش تنحنحت بخجل وقالت وهي كاتهرب من نظراتو :
- خالتي تيماء .. شويا ديال الملح عافاك .
إبتسم جبل بمكر وهمس فأذنها :
- ماعندك فين تهربي .. غاضوري وترجعي لحظني .
كحت روعة بتصنع باش مايسمعوش حماقاتو وقالت بصوت عالي :
- خالتي تيماء وشي كأس ديال الماء عافاك .
فوسط حديتهم دخل عصام بطولو المهياب وغير شافاتو رؤية توترت وبدا قلبها كايضرب بقوة لكنه كان كايحاول مايشوفش فيها حيت فعلا ماعندوش لوجه باش يقابلها .. قرب من جبل وقال :
- معليييم .... واحد البنت على برا كاتسنا الإذن باش تدخل
شافت روعة فجبل وبادلها حتى هو نظرة الإستفهام ثم قال :
- ماقالتلكش شنو سميتها ؟
على عصام عينيه وفاش لقا رؤية كاتشوف فيه تنحنح بإحراج وقال :
- ديانا سيناتور معليييم .. من قسم الإنتربول زميلة سي رافاييل .
فغير خرجات هي حنا عصام راسو وخرج حتى هو وهو كايتمنى لأرض تنشق وتبلعو... شاف أسد فنورسين وقال :
- نورسين ، واش عندك شي مشكل ؟.
شافت فيه نورسين بنظرة حادة وقالت:
- علاش كاتسول ؟.
تسمر كايشوف فيها لإستغراب من طريقتها الحادة معاه وقال :
- مجرد سؤال حيت كاتباني ليا من قبيلة ونتي ماشي على طبيعتك .. يعني كاتباني مقلقة ومعصبة !.
تنهدت نورسين ثم تصنعت إبتسامة مزيفة وقالت :
- مامعصباش احياتي .. ماتشغلش بالك .
قاطع حديثهم دخول ديانا سيناتور وهي كاتبتاسم بعدوبة.. كانت أنوثتها طاغية هاد صباح ، واخا لبرد هي كانت لابسة كسوة لاصقة على جسمها فاللون الأبيض حد الركبة وفوقها معطف يعادلها فطول وغير دخلات إستلمت منها الخادمة المعطف ودخلت عندهم بشكلها لمثير .
- سلام عليكم .. فطور شهي .
إلتفتو لعندها كاملين ردو عليها السلام ماعاد تاليا لي شافت فيها بحدة ومارحبتش بيها . شاف فيها بهجت بإبتسامة هادئة وقال :
- أنسة سيناتور .. بنت السيناتور اللورد كارميلو مرحبا بيك
كانت باغيا تخنقو تاليا فديك اللحظة لكنها تغاضت على الأمر وقلبت عينيها وهي كاتشوف فنورسين حتى قربت ديانا من رافاييل وباستو من خدو برقة وقالت :
- كان يحسابلي غادي تفيق معطل هاد صباح ارافاييل..
شافت فيها تاليا وقالت بإستنكار :
- وعلاش ؟؟
إبتسمت ديانا وشافت فرافاييل وقالت :
- حيت لبارح عرضت عليه تعشا عندي فداري ومارجع حتى لشي 4 ديال صباح هذا علاش قلت راك غاتفيق معطل .
إسودت الدنيا فعيون تاليا فديك اللحظة وتفكرات فاش قال ليها قبيلة بلي الخدمة هي لي شغلاتو وسيد قصار عندها حتى لصبح والله الى مزياااان ... زيرت تاليا على الفورشط فيديها حتى لاحظها رافاييل وقالت بفضاضة وهي كاتشوف فرافاييل بحدة :
- تبارك الله كان قصار عندك .. ماشالله .. كان كايحسابلي بلي سيد مازال متأثر بموت أختو لكن يبدو انني غلطت .. وبسالاما شنو درتو باش بقيتو حتى ل 4 ديال صباح .. أنا كانعرف بلي لعشا حدو ساعة 9 ولباقي .. ياكما كنتي كاتواسيه فوق السرير .
توسعو عيون الجميع فلهضرة لي قالت وبالأخص رافاييل لي تصدم من جرأتها فتح فمو باش يرد عليها لكن سبقو جبل وقال بغضب :
- تحركي من قدامي .. نوضي تكعدي .. ومن بعد غادي نتفاهم معاك على طول لسانك الويلة .
تغرغرو عيون تاليا بدموع ومابقاتش قادرا تصبر بسبب هاد لي ماتتسمة ديانا سمعت سم ديال الهضرة من جبل .. شافت تابيا فديانا وبادلتها الأخرى بإبتسامة هادئة مستفزة شعلات العافيا فقلب تاليا زضربت بيديها فطبلة بقوة ثم ناضت دفعت الكرسي بقوة حتى طاح للأرض وطلعات كاتجري لغرفتها مخلية موراها رافاييل مصدوم و باغي يتبعها لكن ماقادرش بسبب جبل لي كان كايشوف فيه ..
ناضت نورسين بسرعة وخرجت تبعتها كاتجري حتى شدتها فضروج وقالت:
- تاليا تسناي .
نترت تاليا يديها بغضب وقالت وهي كاتبرك على أسنانها :
- شكون عطاك الحق تعرضي على ناس فداري انورسين ؟
قاطعتها روعة من الخلف بحدة وكانت هي وأسية معاها :
- تالياااا ... أشنو كاتقولي ؟؟
تنهدت تاليا بغيظ فاش سمعتها روعة واكيد دابا غادي تبدا عليها بالمواعض السخيفة ... شافت فأسية باش تههضر معاها قبل ماتبدا لكن أسية قلبت عينيها بلا مبالاة وكانها كاتقول ليها "بيناتكم " قربت منها روعة وقالت :
- تاليا واش فنظرك لهضرة لي قلتي على الطبلة منصفة فحق رافاييل .
ماقدراتش تجاوبها وحدرات راسها فكملت روعة بحدة وهي كاطلع فدروج حتى قربت منها ببطئ معتمدة على عكازها :
- نتي دابا مدينة ليه بإعتذار .
تأففت تاليا بضجر وقالت بزعاف :
- ماتزيديش تكملي عليا حتى نتي اروعة .. لي خلاه جبل كمليه نتي .. أسية ديها عافاك .
فتحت أسية فمها باش تهضر لكن قاطعتها روعة بغيظ:
- عشت معاك نتي كثر ملي عشت مع خوك جبل سمعتي وأنا وليت حافضاك مزيان نتي إنسانة انانية
أشارت تاليا لنفسها بغيظ وقالت:
- انا أنانية ..
وكملت بصراخ:
- أسية ديها قبل مانتعصب.
لكن قبل مادير أسية شي حاجة غوتت روعة بغضب:
- أه نتي أنانية .. وماتحاوليش تنكري هاد الصفة لي فيك تافقنا وتفكري مزيان شنو داز عليا بسببك وفتالي نكرتيلي كووولشي ورديتيني أنا السبب فموت هاري .. خصك شويا تنضجي اتاليا مابقيتيش صغيرة باش مانديوش عليك ...
الى ستمريتي على هاد الوضع غادي تخسري كاع ناس لي ضايرين بيك وكايبغيوك .
إبتلعت تاليا ريقها بأسف وحنات راسها كاتفكر فكلام روعة ثم هزات عينيها بعد حين وقالت :
- ختتتتيي .. انا مكانبغيش ديك البنت فهميها وبغيتها تمشي بحالها .. هي .. هي دايرا بحال شي لفعة كاتحاول ضور برافاييل .. واش سمعتي لهضرة لي قالت وفوق هادشي فاش شفت فيها لقيتها كاضحك .. انا متأكدة أنها مقصداها باش تعصبني .
تأففت روعة وقالت بغيظ :
- ونتي الهبيلة ماخصكش تعطيها فرصة تلعب على أعصابك ... خلينا واقعيين الى كانت فعلا كاتحاول تستفزك فغاتلقايها لتحت كاضحك من ودنيها وشكون لي سمع لهضر من جبل نتي . وشكون لي بان طفولي وسطحي نتي ..
- أنا كانعتاذر .. عيطت لديانا حيت عندي بعض الشكوك فعقلي .. من صبح وانا كانفكر غادي نتسطا والوحيدة لي غادي تجاوب على شكوكي هي ديانا .. ونتي عارفا ان جبل مانع الخروح وحتى أسد مستحيل يخليني نخرج هذا علاش عيطت ليها .
قربت منها وحطت يديها على كتف تاليا وكملت :
- سمعي ... أنا ... أنا عارفة أنك كاتبغي رافاييل وديك المستفزة ديال ديانا كاتحاول ما أمكن تحشي راسها بينكم ... لكن ستحمليها غير على قبلي هاد صباح ومسحي فيا لهضرة لي قالها ليك جبل .
أومات تاليا بتفهم وقالت:
- ماعليش .. أنا فاش كانتعصب مكانتحكمش فلساني... حتى أنا كانعتاذر منكم كاملين.. ودابا سمحولي غادي نطلع لغرفتي .
تراجعت تاليا للخلف وطلعات كاتجري فقات أسية وهي كاتلحق عليها :
- انا غادي نتبعها
ردت عليها روعة بصوت مرتفع :
- رديلها عقلها اأسية
ضحكت اسية وقالت بسخرية :
-هه مصاب غير ماطيرليش عقلي هي .
بقاو متبعين خطواتهم حتى إختفو فالطابق العلوي فلتافتت روعة عند نورسين وقالت:
- كانعتاذر على تصرف تاليا .
أومأت نورسين براسها بمعنى "لا بأس" وضارت باش تهبط لكن إستوقفتها روعة وهي كاتقول :
إبتسمت نورسين بحماس وكلسات على السرير مقابل روعة لي بدات كاتعاود ليها على أحداث الحفل حتى دخلت مع هاري لغرفتو الى أن مات مقتول على يد إيزيك ..
- هادشي لي وقاع .. مكاين لا سي دي ولا والو انورسين .
عقدت نورسين حواجبها كاتفكر بعمق ثم قالت بعد صمت:
- بلاتي اروعة ...نتي ممكن تكوني طيحتي السي دي .
تأففت روعة بضجر وقالت :
- اووف انورسين صاك كان صغير والى كان طاح غادي نشوفو أنا ماشي عورة .
ناضت نورسين كاضور وسط الغرفة وكاتفكر ثم قالت:
-بلاتي واش قالك هاري هاكي خبعي السي دي .
قلبت روعة عينيها بملل وقالت:
- لا. . هو قالي لهضرة لي قلت ليك .. بين يديك دابا سر لأخطر عصابة فالعالم عطيه لـ وماكملش لهضرة وماعطاني حتى حاجة لاح ليا صاكي لتحت السرير وصافي وصاك أنا فتشتو من بعد الحفلة مزيان و كان خااااااوي مافيه وااالو .
شهقت نورسين بصدمة وقالت:
- روعة ... روعة ممكن مايكونش عطاك سي دي !!..
عقدت روعة حواجبها بإستفهام وقالت:
- كيفاش ؟؟
- ممكن يكون حط ليك فصاك كارط ميموار صغيرة لي واخا غادي طيح ليك ماغاديش تشوفيها .. انا شفتك فاش كنتي كاتحاولي تفتحي سيارتك وهاربة يمكن طاحت ليك فديك اللحظة ديال التوتر .
وقفت روعة من جلستها وقالت بإستغراب :
- واش كنتي فلحفلة حتى نتي انورسين ؟؟؟
ضارت نورسين شافت فيها وقالت:
- لا أنا وأسد كنا مراقبين لأوضاع على برا .. وشفناك فاش نقزتي من على السور وصطادمتي مع جبل ودابزتو نتي وياه ودفعتيه وهربتي ياك هادشي لي وقاع.
أومات روعة وقالت :
- ااه ..
قربت نورسين من روعة وقالت بحماس:
- روعة .. ممكن ... ممكن الكارت ميموار يكون طاح ليك فلأرض ؛ ولا طاح ليك فسيارتك وماشفتيهش .
- امم هادي شي ثلاث أيام قالي جبل بلي جابها دانيال من الهوتيل لي خليتها فيه.
هزت نورسين عكاز روعة من الأرض وعطاتولها وهي كاتقول بحماس :
-إذن يالاه .. يالاه نفتشوها .
*****
هبطو فالمصعد باش يختاصرو على روعة عناء النزول برجليها لمهرسة حتى وصلو للكاراح لي كايوقفو فيه السيارات .. ضارت روعة كاتقلب بعينيها على سيارتها لكن كانو جوج سيارات مغطين .. فغوتت بصوت عالي فاش لقات دانيال داخل للكاراج متجه لسيارتو باغي يفتحها :
- اه ليوسبي .. راني لقيتو تحت لكوسانة وعطيتو لسي لجبل باش يعطيهالك .
تسمرت روعة ونورسين كايشوفو فيه بصدمة فكمل دانيال بإستغراب
- واش ماعطاهالكش ؟؟ .
تنحنحت روعة فاش تفكرات حاجة مهمة وقالت :
- أااه .. عطاهالي غير نسيت ... صافي تقدر تمشي ادانيال .
إبتسم دانيال وهو كايشوف فالسيارة الثانية لمغطية وقال :
- واش مازال ماشفتيش لمفاجئة لي شرالك سي جبل
عقدت روعة حواجبها بتسائل وقالت :
- شنو هي ؟؟.
تمايل دانيال فمشيتو الرجولية حتى وصل للسيارة لمغطية وقال وهو كايبتاسم :
- شرالك سيارة جديدة .. اوااااعرة
شهقت روعة بصدمة وقال وهي كاتأشر لنفسها:
- شراها ليا انا !!!
مشات ليها بحماس وغير شدت فلغطاء باش تزولو سبقها دانيال كحز ليها يديها وقال :
- اووه سوووري .... ماغاديش نخليك ضيعي المفاجئة لي دايرها ليك سي جبل يالاه خرجو .. خرجو من هنااا .
رفضت روعة فالأول الخروج حتى تشوفها لكن نورسين جرتها من يديها وخرجتها لبرا وهي كاتحاول تخليها مركزا فموضوعهم المهم لكن المفاجئة خرجات لروعة لعقل فضحكت بتسلية وقالت :
- شرالي سيارة ههه
تنهدت نورسين وقالت بغيظ:
- روعة ركزي معايا .. فين هي ليوسبي لي قال عليه دانيال؟؟
همهمت روعة وقالت بعد تفكير :
- اه ليوسبي ... شي ثلاث أيام دابا جا عندي جبل وبين يديه يوزبي سولني واش ديالي ولكن قلت ليه لا ماشي ديالي ومن بعد دارها فجيبو ومشا .
القلب ديال نورسين طاح لأرض فاش عرفت ان جبل عندو اليوزبي وأكيد أكيد غادي يخبيه عليها وماغايبغيش يوريهلها ... أصلا كولهوم ولاو كايخبيو عليها حتى من راجلها بقات فجبل دابا .. شدت نورسين فيد روعة وقالت بإصرار :
- روعة بغيت هادك اليوسبي ضاروري .
شافت فيها روعة بهدوء وقالت:
- واخا يالاه نسولو جبل عليها
تنهدت نورسين حيت عارفا جبل غاينكر بالمرة لكنها مازال محتاجة مساعدتها .. تحركت روعة باش تدخل لكن نورسين إستوقفتها وقالت :
- بلاتي .. بغيتك تعاونيني فحاجة اخرى .
توقفت روعة وضارت لعند نورسين ببطئ ثم قالت بجدية :
- الى كنت غادي نعاونك إذن خصك ترديني شريكتك ..
- كيفااش
همهمت روعة وقالت بعد حين بجدية تامة :
- أنا عشت الكوابيس بسبب ديك العصابة لملعونة ومن حقي نعرف شنو كاين فهاد سي دي لي خطفوني على قبلو لكاريبي وعدبوني حتى كنت غادي نموت ..
تنهدت نورسين بغيظ لكن روعة كملت بإصرار :
- أنا عاودت ليك على كلشي و حتى نتي عاوديلي على هاد الشكوك لي فعقلك وديانا هي الوحيدة لي غاتجاوبك عليهم ..
مررت نورسين يديها بين خصلات شعرها بضيق وقالت :
- ولكن هادي خدمتي وخصها تكون سرية !!.
هزت روعة أكتافها بلا مبالاة وقالت:
- إذن شوفي شكون يجيب ليك ليوسبي وشكون يعاونك .
ضارت باش تمشي لكن نورسين استوقفتها بسرعة وقالت:
- واخا واخا صافي ! .. غادي ديري واحد الحاجة بعدا ومن بعد غادي نعاود ليك على كووولشي .
إبتسمت روعة بإنتصار ثم ضارت لعندها وقالت
- اوكي .. شنو هي هاد الحاجة ؟؟
قربت منها نورسين وقالت بصوت منخفض :
- جبل وجدو دايرين لينا الحصار هنا .. وأنا بغيت شي طريقة باش نخرج من هنا بغيتك تأمني ليا طريق وتغطي على غيابي .
حركت روعة راسها بالنفي وقالت :
- صعيبة بزاااف هاد المهمة واش شفتي شحال ديال رجال ضايرين بالكونتيسا من داخل ومن برا !!.
- حتى اعز صديق كان عندي هنا ولي هو عصام نهار لي طلبتو على حاجة بسيطة رفض بسبب أوامر جبل انه مايتحركش من مكانو .. غير حيدي هاد لفكرة من راسك انورسين اوكي .. ماعرفتش المدة لي غانبقاو محبوسين فيها هنا ولكن من هنا لتما عاد تقدري تخرجي على راحتك ...
شافت فيها نورسين بغيظ وقالت :
- إذن ماغاديش تعاونيني ؟؟.
حركت روعة راسها بالنفي وقالت:
- لا .. عرفتي علاش؟؟ .. حيت نتي حاملة! .. وحملك فخطر ويالاه درتي عملية ... انا الى خليتك تخرجي وأمنت ليك الطريق و من بعد وقاعت شي حاجة ليك ولا للجنين ماعمري غادي نسامح نفسي .. هذا علاش حيدي هاد لفكرة من راسك .
تمسكت نورسين بيدين روعة وقالت بترجي :
- عافاك اروعة . عافاااك
سحبت روعة يديها وقالت بالرفض:
- و الى خرجتي من هنا وخطفوك هااه !!.. شكون لي غادي يتحمل المسؤولية انا !... ولكن الى كنتي باغيا شي حاجة من برا ضاروري .. أنا ممكن نأمنها ليك .
عقدت نورسين حواحبها بشك وقالت :
- واش بصح .
أومأت روعة براسها وقالت :
- اه .. قوليلي شنو بغيتي من برا وانا كانواعدك غادي نجيبولك .. علاياش كاتوحمي ؟؟.. جوز لوز موز كراميل شاورما فلافل لي بغيتيه نوصي ليك عليه ؟.
تنهدت نورسين وقالت :
- الله يهديك اش كاتقولي ؟؟.
ثم جبدت من جيبها الحقنة ووراتها لروعة لي قالت بإستفهام :
- شنو هذا ؟؟
رحعت نورسين الحقنة لحيبها وقالت:
- بغيت نعرف شنو كاين فهاد الحقنة .. يعني بغيت نمشي لمختبر التحليلات ونعطيهم هاد الحقنة يديرو ليها تحليل باش نعرف شنو هو هاد المحلول لي فيها .
همهمت روعة بتفهم وقالت:
- واش شاكة فشي حاجة ؟ .
اومأت نورسين وبدات كاتعاود ليها على الطريقة لي مات بيها إيزيك وكيفاش حتى تقتل حتى تضحت الصورة أمام عينين روعة وقالت بإستفهام :
- إذن نتي شاكة بلي راجلك ورافاييل عندهوم يد فموت إيزيك هذاك المجرم لي قتل هاري بلاك .. اش كاتقولي !!! حتى لو فعلا هوما لي قتلوه واش مستوعبة هذاك المجرم شحال قتل ديال الباشار .. راه انا لي كنت ديك الليلة وشفت كيفاش قتل هاري بلا رحمة ولا شفقة .
حركت نورسين راسها بعنف وقالت بإصرار :
- روعة .. عندي شكوك أخرى كاتاكل عقلي ... ماشي غير هاد الحقنة لي محناني وباغيا نعرف شنو فداخلها
همهمت روعة بتفهم وقالت:
- فهمت وشنو أخر؟ .
تلفتت نورسين يمين وشمال باش تتأكد من خلو المكان ثم قالت :
- بغيت نمشي للدار لمهجورة لي كان حابس فيها جبل إيزيك ... بغيت نمشي لتما ضاروووري اروعة .
قالت روعة بإستفهام :
- علاااش !!!
قالت نورسين :
- حطيت تما كاميرة ومحتاجاها ضاروري
همهمت روعة بتفهم وقالت :
- واخا إذن غادي نمشي معاك
شهقت نورسين وقالت بصدمة :
- واش حماقيتي راه رجليك مهرسة ماتقدريش تمشاي مدة طويلة
هزت روعة اكتافها بلا مبالات وقالت:
- وحتى نتي راك حاملة وحملك فخطر .. ياك انا شريكتك ... نمشيو بجوح ولا نبقاو بجوج
قالت نورسين اخيرا بقلة حيلة :
- وكيفاش غادي نديرو نخرجو ؟
ردت عليها روعة وهي كاتبتاسم :
- بما انه مستحيييل نخرجو من الباب عندي واحد الطريق سرية وراهالي عصام شحال هادي مصممة للهروب من الحرائق.. ولكن المشكلة أنه خصنا شي سيارة من بعد باش نتحركو فاش نخرجو
قالت نورسين بسرعة :
- طاكسي ..
تفكرت روعة نهار لي تخطفات فيه فاش خرجات من الهوتيل وشافت سائق طاكسي كايتحرش بوحدا سكرانة فهزت راسها بالرفض وقالت:
- حماقيتي مستحيل نركب فطاكسي والى خطفنا شيفور
شافت فيها نورسين بغيظ وقالت:
- اش كاتقولي !!.
حركت روعة راسها بالرفض التلم وقالت:
- لا لا ... ولكن بلاتي شكون لي غضبان حاليا .
شافت فيها نورسين بإستفهام ثم قالت فاش تفكراتها:
- تاليا !!!
إبتسمت روعة بمكر وقالت :
-تاليا فاش كاتغضب كاتسد عليها فبيتها سيمانة .. وحتى واحد مكايقدر يقرب منها من بعد .. هي لي غادي تأمن لينا سيارة
شافت فيها نورسين بصدمة وقالت:
- اويلي اروعة !!!
هزت روعة اكتافها وقالت :
- نتي مضطرة تزيدي شريكة وحداخرا .
بدات نورسين كاضور فبلاصتها وتفكر وهي كاتمتم :
- اااه ياربي اش هادشي .
لكن ماعندهاش شي حل أخر رجعت لعند روعة وقالت:
- صافي واخا .
شعرت روعة بالحماااس كايقتلها وقالت :
- دابا عرفتي اش غانديرو .. غانرجعو لبلايصنا وكأنه ماواقع واالو عرفتي علاش حيت قبيلة سمعت جبل كايقول لجدو بهجت باغيه فإجتماع مغلق هو وأسد وياسين ورافاييل ودون ماركيز .. يعني محادثة سرية يعلم الله شحال غادي دوم .. وحنا تما غادي نستغلو الفرصة
عقدت نورسين حواجبها بإستنكار وقالت :
- واش حتى أسد ؟؟
أومأت روعة براسها وقالت:
- اه ماقالها ليكش ؟؟
تنهدت نورسين بغيظ وردت عليها :
- لا ماقاليش!! .. وهادشي لي قاتلني حيت كايخبع عليا كولشي حتى ابسط الأمور .
همهمت روعة وقالت:
- لموهيم من بعد وشوفي شي وقيتا وقتليه دابا خصنا نفكرو كيف نخرجو من هنا ..
شافت فيها نورسين وقالت :
- عندك شي خطة ؟؟
إبتسمت روعة بتسلية وقالت:
- عندي .. انا هي ام الخطط ماتخافيش .. ودابا يالاه ندخلو نديرو لديك ديانا إستنطاق .
البارون الأعظم الجزء 74 شركاء جدد
محتوى القصة
التنقل بين الأجزاء