توقفو خمس سيارات أمام باب مقهى ستاربكس ونزلو منهم 5 وحوش بشرية شريرة بأكتاف رجولية عريضة وحواجب معقودة بغضب .. رجال عصابات ؟؟ لا ! مجرمين هاربين من الحبس ؟؟.. لا !! قتلة مأجورين ؟؟... بردو لا !! .
لكن كل هاد الصفات كانت تنطبق على جبل وأسد وعصام ورافاييل إلى صخر لي كان داير بحال الدمية أنابيل الشريرة المبتسمة بسخرية .
قرب جبل من سيارة لي شافها فالكاميرا و لي كانو راكبين فيها لبنات ... طل عليها من داخل وهو كايقول :
- المجرمات مازالين لداخل ..
إستقام وضار لعند الرجال وكمل :
- تنفسو ...
شافو فيه الرجال بغباء فقلب جبل عينيه بملل وكرر :
- خودو نفس عمييييق .
إمتثلو الرجال لطلبه وخداو نفس عمييق إلى صخر لي كان مبتسم بسخرية وحتى هو بدا كايتنفس بعمق وكايقلدهم بغاية السخرية فقط .. هو اليوم جا باش يضحك شويا على هاد الرجال لي محمقينهوم حبيباتهم لكن بلاتي !!.. رافاييل وعصام علاش حتى هوما كايتنفسو بعمق ومتحمسين ووجههم حمر من شدة الغضب وعلاش معصبين اااااصلا!! .. ااايه جبل وأسد هادوك زوجاتهم والى تعصبو معدورين ولكن لوخرين ماااامحلهم من الإعرااااب! .
زمجر جبل وقال بغضب :
- زيدوووو ... كل واحد يجر وحدا ولي مابغاتش تخرج حلال فيها القتل.
هنا مابقاش قادر صخر يصبر وبدا كايموووووت بالضحك وهو كايقول :
- هاهاها ... بلاااتي بلااتي ..
توقفو الرجال ضارو شافو فيه بإستفهام فكمل صخر بسخرية:
- الهاجم يموت شرع كاتسمعو بهاد لمثل ولا لا .. تهدنوو ياك قبيلة كونتو كاتنفسو بعمق اشنو وقاع دابا .؟
بقاو كايشوفو فيه بصمت فكمل صخر وهو كايحاول مايضحكش :
- هوما علاش هربو بلا خباركم .. حيت خنقتووهم ودابا لاهجمتو عليهم ماغاتجيييش معيقة .. هوما بغاو يتنفسو شويا بعيد عليكم فنتوما ماخصكمش تكونو متطفلين على راحتهم .
- لا لا انا مامتافقش .. غادي ندخل نجر مرتي ونخرجها من تم .
لكن فاش حرك رجليه باش يمشي شدو أسد وقال :
- خلينا نجربو ماغانخسرو والو .
تنهد جبل بغيظ وقال وهو كايتأفف:
- اوووف .. واخا صاف .. ولكن مانضمنش ليكم انني غادي نتمسك بأعصابي لفترة طويلة .
رافاييل وعصام كان عندهم نفس رأي جبل واخا عصام مافهمش علاش منفعل لكن فداخل كاينا الموصيبة دصوفي وديك اشنو كان سميتها رؤية .. ديك لي حرقاتو صباح بلقهوة .. مازال كايحس بصدرو كايلهب بلحريق .. جلد صدرو تسلخ بسببها ...
تقدمو الرجال ودخلو للمقهى وهوما كايحاولو كايلفتوش الإنتباه .. لكن قبل نومروهوم مزيان وحددو مكانهم .. كلسو فطاولة طويلة كاطل على الخارج بحيث لي كالس عليها غايكون عاطي بضهر للمقهى وكتيشوف نيشان فالشارع يعني كلسو عاطين بضهر كاملين .. خمس اجساد ضخمة اسطفت بإنتظام ..
تقدم عندهم النادل خدا طلباتهم لي كانت كلها قهوة مرة باش يزيدو يمرارو بيها فوق المرارة لي كايحسو بيها ماعاد صخر لي طلب كابوتشينو ولي بغا يموت لعام طويل.
قال جبل وهو كايشرب من قهوتو وكايخصر فسيفتو :
- شنو كايديرو دابا .
ضار صخر براسو غير بشويا باش مايعيقش وقال :
- كايضحكو .. عايشين لافيدا .. الحياااة .
*********
- هاهاها غاتفرح ديك البايرا دختي فاش نديلها مول جاكيطا مارون .. تقول غير الممثل هينري كافييل.
قالتها روعة وهي كاتموت بالضحك كما كانو كاملين كايضحكو .
- شوفو شغاندير .
قالتها المسخوطة د صوفي و هزات كأسها دارت بيه إشارة ترحيب لداك الشاب الصغير وغمزاتو ولكن لسوء حظها كان صخر كايشوف فيها .. رجع ضار لبلاصتو وتمتم بغيظ :
- لبرهوشة تعلمت تغمز
شافو فيه رجال بإستفهام وقال أسد:
- شنو قلتي ؟
تنحنح صخر وقال وهو كايشرب من الكابوتشينو :
- والو غير بانو ليا شي عينين فالتين
شافو فيه الرجال بإستنكار لكن اعصاب جبل ماكانتش قادرا تستحمل الألغاز .. حط الكأس من يديه وجا نايض لكن عصام شدو وهو كايقووول :
- معليييييم .. ماضيعش الخطة لي زربو ماتو .
خنزر فيه حبل وقال :
- أنا لي كايبان لي شي نهار غانزرب عليك اعصام .. هادشي كامل بسببك نتا .
عقد عصام حواجبو وقال بغيظ :
- ولكن معلييم انا ..
قاطعهوم رافاييل بزعاف :
- صافي سكتونا هادا ماشي وقت دباز .
- هداك زعر البنات فكرني واحد لمرا تموتو عليا بالضحك هادشي وقاعلي غير فصيف دلعام لي فات .
قالتها صوفي وكملات وهي كاتحاول ماضحكش :
- حنا لبنات حق الله الى فالت لينا ريزو .. انا يعني كيف اي بنت كانحلم بفارس احلامي شي نهار نطلاقا بيه صدفة ولا يوقاع شي موقف مثلا وانا فلبحر نغراق وهو يجي ينقدني ولا يعني شي تخربيقا بحال هادي ... ايوا البنات لمزغوبة دماما فيها صواب بزاااف ... سكنو قبالتنا جيران جداد وكانو مغاربا ولاد بلادها فبغات ترحب بيهم وماجيتها غير انا فطريق .. صوبت ليهم واحد كيكة زوييينة حلفت مادوقني منها حتى فرتوتة ودارتهالي فطبسيل وقالتلي ندق عليهم نعطيهالهوم ونرحب بيهم نيابتا عليها ،
انا كيشويش دلهم خرجت ببيجامتي وحالتي حالة لكن فاش جيت نقطع شانطي ماحسيتش براسي الى والكيكة فسماء وانا فلأرض .. دازت فيا سيارة كانت غاديا بسرعة طيرتني خلاتني نشوف الدنيا باللوان ... نزل السائق ديالها وجا يطمن عليا كانت رجلي مهرسة .. هو كان مخلوع وشاداه سخفة ولكن انا كنت مرفوعة كانشوف فيه ونضحاااك .. وأخيييرا تحقق حلمي وتيتيز دخل فيا بسيارتو .. ويلي ويلي على زين كان فيه ولد لحرام .. قلت مع راسي اكيد دابا غادي تولد شرارة الحب والإعجاب فعينيه ويحس بتأنيب الضمير ومايبغيش يتفرق عليا حتى نبرا وموراها غادي يعتارفلي بحبو ويخطبني ونتزوجو ...
ضحكت تاليا وقالت بسخرية :
-هاهاها لا نتي بزاف اصوفي .. واخا يكون دخل فيك جاستن بيبر .
- ماااتت ماما بالضحك غير قطعات الخط ... وانا كانسولها على أحر من الجمر ...وهي تقولي ، داك الولد لي ضربك سولني عليك وقالي كيف بقات خدامتكم واش برات رجليها .
إنفجرو البنات بضحك حتى أن رؤية بزقت عليهوم الجغمة دلقهوة لي كانت ففمها بقوة الضحك لكن ضحكاتهوم كانت كاتستافز الرجال لي كالسين على أعصابهوم موراهوم ..
قالت نورسين وهي كاتمسح وجهها من بزق رؤية :
- بنت الهمممم .. جات الحزينة تفرح ملقتلهاااش مطرح .
إستدار صخر وهو كايقول بسخرية
- بان ليا نتوما هوما اااخر همهم ... فرحااانين وناشطين
مابقاوش قادرين الرجال يصبرو فتقلب جبل فكلستو ودارو بحالو البقية .. كان كايشوف فروعة وفضحكاتها وفرنت صوتها وماقدرش ينكر أن ظحكاتها خلاوه يبتاسم ، من شحال هادي ماشافها فرحانا هاكا وكاضحك من قلبها .. إبتسامتها كانت زوينة بزاف قدرات تنسيه فكاااع المشاكل لي دازو منهم ولااا لي عااد غادي يدوزو منهم حيت هو مستغرق فنظراتو التأملية نغزو أسد لدراعو بمرفقو وقال :
- لاحظ فجنب لاخور شنو واقع .
ضار جبل للمكان لي أشر ليه وهو يشوف داك لكروب ديال الشباب .. نادا واحد منهم للنادل وقاليه شي حاحة فودنيه ومن بعد أشر ليه بيديه للبنات لي كانو مازالين كايضحكو .. جبل ماقدرش يصبر لداك لمنظر وجا نايض لكن أسد شدو وهو كايقول بغضب :
- صبر شويا حتى نشوفو شنو غادي يوقاع .
وصل النادل لعند طاولة البنات ببعض المشروبات الباردة وبدا كايحطهم حدا كل وحدا تحت نظرات الإستغراب لي على وجوههم فقالت روعة بإعتراض :
- سمحلي اسيدي كاع ماطلبناش هادشي .
إبتسم النادل ورد عليها بلباقة وهو كايأسر للشباب :
- هذا مشروب مجاني من عند دوك لولاد .. وكايقولو ليكم كايتمناو تقبلوهم منهم .
ضار لبنات كاملين ضورة ديال الطوبيس لان دراري كانو بجنبهم فلو زادو ضارو غير شويا غايلقاو خمسة ديال ملائكة الموت مارقبين شنو غادي يوقاع على أعصاب حارة وسخونة وكاتفور .
- نااري البنات واقيلة عيقنا !.
قالتها روعة وهي كاتفرك فصبعانها بتوتر لكن الطيارة دصوفي كان عندها راي أخر .. فقالت وهي كاتهز كاس العصير المجاني :
- حشومة نردوه ليهم فوجههوم مساكن شوفو على شوفات كايديرو فينا .. البرائة اخوتي لبرائة .. ومن اللباقة غير نبتاسمو ليهم .. يالاه هزو كيسانكم وديرو بحالي .
اتفقو البنات بالإجماع أنهم يشكروهم بإبتسامة ورشفة من العصير ومن بعد يمشيو بحالهوم لكن لي كان واقع موراهوم فيلم أخر ... رافاييل شاد فجبل باش مايفلتش منو وصخر شاد فأسد باش مايهجمش عليهم وكايموووت بالضحك .. مع أن عصام ورافاييل كانو معصبين اكثر لكن اشمن مبرر غايكون لعصبيتهم تاليا خت جبل ورؤية بنت عمت جبل يعني احتمال جبل يجمعهوم مع دوك دراري فخلاط مولينيكس ويطحنهم دقا وحدا .
تأففت رؤية وقالت وهي كاتنوض :
- تسناوني حتى نخرج من الحمام مزيرة بزااف .
مشات رؤية وتما استغل عصام الفرصة باش يحل داك سوء الفهم لي بيناتهم ويعتاذر ليها على داك التصرف لي دار معاها لكن لموصيبة لكحلة غير هي ناضت تبعها قبل منو داك لي كان حاط عليها لكن عصام واش غادي يفلت شنو غادي يوقاع مستحييل .. تبعهوم حتى لحق عليها الشاب فاش دخلات فالممر لي كايأدي للمراحيض وقال ...
- إلى سمحتي امادموزيل .
إلتفتت رؤية على إبتسامة داك الشاب وعلى رنة صوتو الرجولية ولقات راسها كاتبتاسم ليه حتى هي وردت عليه بلباقة :
- قبل كل شئ شكرا على العصير ... لكن انا دابا مامسالياش الى لاحظتي انني غاديا للحمام .
إبتسم الشاب بلباقة ورد عليها :
- سمحيليا على لإزعاج ولكن لساني ماقدرش يصبر ومايعبرلكش على مقدار الجمال ديالك وحتى صوتك عندو نغمة فريدة مانكرهش نديرها رنة فتلفوني .
كانت هادي هي اسخف حاجة سمعتها رؤية من عند شخص باغي يتعرف عليها .. رنة لاواه سنفونية .. تنحنحت رؤية بإحراج وقالت:
- وااو شكرا على الإطراء وإكسكيوزميي خصني نمشي .
حركت رجليها باش تمشي لكن الشاب استوقفها بطلبو الملح :
لكن تلفونها نساتو فالكونتيسا .. كانت محتاجة تفك منو باش تدخل للمرحاض فقالت بسرعة :
- اام كانعتاذر ولكن تلفوني نسيتو فالدار .. تقدر تعطيني نتا نمرتك وانا كانواعدك غادي نسمعك صوتي فالقريب العاجل .
-بكل سرور .
جبد بطاقة عملو الشخصية ومدها ليها وغير شداتها وقرات المهنة ديالو شافت فيه بإستغراب وقالت بهتاف وهي كاضحك :
- واااو مهندس ... نفس التخصص ديالي .. كايبان لي غادي نتفاهمو انا وياك ..
وشحال فرح داك الشاب بهاد المعلومة لكن ماشي ديما لفرحة كاتكمل .. وقف عليه عصام بطولو المخيف وعلى وجهو نظرة شر وغضب خلات قلب رؤية ينزل لأسفل السافلين وكأنها كانت قادرا تشوف مصير الشاب المسكين مهتوك على يد عصام لي ماترددش شدو من السترة ديالو من الخلف وعلاها بعضلاتو الضخمة بطريقة خلات منظر الشاب وكأنه معلق وسط علاقة ملابس .
- وانا تخصص ديالي هو القتل مع سفك الدماء فنظرك واش غادي نتافقو ؟؟.
إبتلع الشاب ريقو بتوتر وحرك راسو بالنفي بمعنى "لا " بلاما يسترجي ينطق بكلمة وحدا تحت يديه .. فإبتسم عصام إبتسامة شريرة ودفع الشاب بقوة حتى كان غادي يطيحو وكمل :
- إذن مانشوفكش قدامي ..
عدل الشاب حوايحو بإحراج حتى ان لون وجهو تحول للأحمر وخرج وهو مكايشوفش قدامو وفطريقو إصطدم بكتف رافاييل لي كان صاعر على تاليا كايبهدلهاا حتى هي تبعات رؤية للحمام لكن رافاييل كان مصر يسمعها السم دلهضرة لكن حتى هي عندها ماتقول .. دفعت شعرها للخلف بعنفوان وقالت بفضاضة :
- على الأقل أنا مابايتاش عند راجل فدارو كيما درتي نتا اسي أفندي .
بغا يقتلها فديك اللحظة دايراها قد راسها وزايداها بتخراج العينين .. خنزر فيها وقال :
- وهانتا قلتيها 4 ديال صباح يعني بايت عندها حتى جا صبح جديد مكاينش الفرق
حاول رافاييل ما امكن يتحكم فأعصابو وقال وهو كايتنفس بسرعة :
- تاليا ماتبدليش موضوعنا .نتي كونتي كاضحكي لداك بنادم لي كان كايشوف فيك .
دارت يديها فجيابها وقالت بلا مبالات :
- ايه ومن بعد ... هو عطاني عصير هدية من عندو وانا قبلتها بكل رحابة صدر .. كيما بتي نتا عند ديك سليعفانا ديال ديانا ولا ماعرفت شنو سميتها .
مابقاش قادر يصبر مازال على هاد البرود ديالها وكأنها مادايرا والو فماحسش براسو إلى وهو كايفرش كولشي بصراخ :
- تاليااااا .. للمرة لألف مابتش عندها وماتعشيتش عندها بوحدي كان معانا خطيبها وحتى عائلتها وبقينا قصارين انا وجدها لبارح كانلعبو الشطرنج وماحسيناش بالوقت كيفاش طار
تسمرت تاليا قبالتو بصدمة يعني هو ماباتش فحظن بنت غيرها ... كررت خلفو بعد صمت :
- جدها !!... الشطرنج !! ... خطيبها !!
فالممر الثاني عصر عصام على صوفي .. هو كايتقدم خطوة للقدام وهي كاترجع خطوة للخلف بخوف من منظرو المتوحش :
- هيي نتااا اشنو كاتحاول دير ؟؟
شاف فيها بنظرة حديدية وزمجر:
- مشاء لله دايرالي فيها أنسة عفة .
رفعت يديها وقالت بتهديد بصبعها السبابة :
- جمع راسك اسكايري .
ظهرت على ملامحو إبتسامة مخيفة خلاتها تزيد تتراجع للخلف وقال بحدة :
- سكايري ولكن مكانفرقش نوامري على لي يسوا ولي مايسواش .
شهقت رؤية بدهشة ثم غوتت بغضب :
- لهلا يحيييييك .. نتا فين كاتعرف شي حاجة على العلاقات .. بعدا كاتخرج من الكونتيسا
إبتسم عصام إبتساكة جانبية رجولية وقال بإستهزاء :
- عاودو ليك عليا بنت خايفا على عذريتها
- وشكون عرف !!
لو انها قالت شي حاجة غير هادشي لعنت راسها على تهورها ولسانها لي ديما مخرج العيب.. قدرات تشوف شياطينو كايشطحو فوق راسو فقالت بتردد على الله تصلح لأمر :
- انا .. انا غير سايرتو معايا و الى كنتي ملاحظ هو لي عطاني نمرتو وكايتسناني نعيط ليه
رفع عصام حواجبو وقال ببرود :
- ياااك الالة عفة ؟.
أومأت وردت عليه :
- ااايه
مد عصام يديه ليها وهو كايقول :
- اري نشوف ديك النمرة .
اصلا ماعندها ماتخسر يشوفها باش يبعد عليها .. مدت ليه البطاقة بملامح واثقة فإلتقطها منها عصام وقطعها تحت انظارها لقطع صغيرة ثم لاحهم فوق راسها بحال شتاء وهو كايقول بسخرية :
- هانا هنيتك منها الالة عفة ياك قلتي كنتي باغيا غير تفكي منو .
فوق هادشي زايدها بالإستهزاء منها نفضت شعرها بغضب من الورق وقالت :
تفكرات فصباح فاش هرقات عليه القهوة وقالت ونعتاتو بالحمار .. شعرت بالإحراج منو حتى انها شافت فصدرو وتفكرات لحموريا لي كانت فيه "اكيد غادي تكون كاتحرقو" تمتمت بيها فنفسها ثم قالت بصوت عالي :
- اوكي غادي نعاودهالك .. كانعتاذر منك هداك كان غير سوء فهم
قلب عصام عينيه بملل ومابقاش قادر يسايرها فعنادها غايديها لجدها كيف طلب منو وهو يتفاهم معاها على هاد لهروب الماكر لي دارو كاملين .. جرها من دراعها وحرك رجليه واخا كانت كاتقاومو باش يطلق منها ابدا ماهتمش لضرباتها الصغيرة على كتفو حتى تسمر واقف فاش لقا رافاييل عاصر على تاليا فلقنيتة كايبوسها بشغف وهي كاتبادلو ..
ماكانش قادر يصدق عينيه وداكشي لي كايشوف حتى فيقاتو من صدمتو رؤية وهي كاتقول بصوت عالي :
- وأخيرا تصالحوتو .
طفجو كاملين... تاليا ورافاييل ماكرهوش تنشق الأرض وتبلعهم من شدة الإحراج من عصام لي كان حال فمو فيهم وكايرمش بدهشة حتى قال رافاييل وهو كايحك فراسو بإحراج :
- احم ... خصنا نردو لبنات للكونتيسا .
حاول عصام يخفي من شدة الصدمة ... طلق من رؤية مشات كاتجري عند تاليا شدت فيها جرتها وخرجو وبقاو غير عصام ورافاييل كايشوفو فبعضياتهم بإحراج .. تنحنح رافاييل وقال :
- قريب غادي نقول لجبل على علاقتي بتاليا .
إبتسم عصام بهدوء وقال :
- كاتبغيها ؟؟.
أومأ رافاييل بعد صمت وقال بإحراج :
- أه ... بزااف .
قرب عصام عند رافاييل .. طبطب على كتفو بخفو وقال وهو جارو موراه باش يرجاو لعند باقي الرجال :
- جبل قيص ليه فعينيه وماتقيصليهش فختو فخبارك .
توقف رافاييل وقال بضيق :
- فخباري .. ولكن أنا ماناويش نتفلا عليها باغيها للمعقول
توسعت إبتسامة عصام وقال :
- إذن الله يكمل بالخير ...
لكن فالخارج كانت نايضا القيامة غير خرجو رافاييل وعصام تحشاو وسط لمضاربة كانو الطوابل كايتشقلبو الكيسان كايتهرسو الموضفين كايفرقو والبنات خايفين ومنزوين فالقنت وقلبهم كايضرب بقوة الخلعة .. الا صخر .. كان كالس خلف الكونطوار وكايشرب من الكابوتشينو ديالو ويشجعهوم ويصفر بفمو :
- هوووووو ... أسااااااد نزل عليه بالكورسي ... هادا افضل يوم داز فحياتي .. يخربيت التسلية . هوووووووو ووووووو
لكن ماحسش براسو حتى نزلت عليه ضربة لضهرو من حيث لم يحتسب .. ضار وهو مستعد يقتل لي ضربو لكن فاش لقا صوفي مخرجا عينيها فيه تراجع فغوتت هي بغضب :
قلب صخر عينيه بغيظ ورجع ضار للكونطوار هز الكأس ديالو وهو كايقول :
- الى بقاو فيك سيري فرقيهم ولا نتي كاتعرفي غير تغمزي بعينيك بحال شي حولة .
عقدت صوفي حواجبها بإستنكار وقالت :
- كيفاش !.. اشنو كاتخربق ؟؟
ضار لعندها وهو رافع حاجب واحد وقال بإزدراء :
- انا شفتك فاش كنتي كاتغمزي داك لبرهوش .
ضحكت صوفي بقلة حيلة ضحكة كانت مرة كما كشرت بملامح وجهها وهي كاتقول :
-هه... ونتا مااااالك !! نغمزو ولا مانغمزوووش سوقك ؟.
بقا كايشوووف فيها وفعلا كان كايفكر وهو مالو تغمزو ولا لا هي حرة .. لكنه ماعجبوش لحال وكان باغي يحشي صبعانو فعينيها فاش غمزاتو .. طلع فيها الشوفة وهبط وقال :
- واش نسيتي اننا تزوحنا غير فصبح .. انا راجلك دابا ونتي فاش غمزتيه يعني خنتيني .
نفثت صوفي الهواء من فمها بغيظ وقالت :
- كان كايحسابلي غير انا لي مجنونة ساعا طلعتي اجن مني .. سير اولدي الله يرد بيك .
قلبت الضورة باش تمشي لكن صخر شدها من يديها جرها رجعها لبلاصتها وقال وهو كايشوف فيها بنظرات قاتلة:
- اجي لهنا مازال ماساليناش لهضرا .
لكنها نترت يديها وغوتت :
- بالنسبة ليا ساليت .
حركت رجليها باش تمشي لكنه رجع جدبها لعندو وقال بغضب وهو كايشوف ليها فعينيها :
- علاش كاتصرفي معايا هاكا ؟.
بقات كاتشوف فيه بغيظ ومن بعد قالت بصوت مخدول :
- كان عندي فيك شويا ديال الأمل وكنت كانقول عندك من الشهامة والنخوة ما يكفي كأي رجل .. لكن دابا ثبتيلي العكس .. كالس كاتفرج فخوك وصحابو كايضاربو وبدل ماتجيك النفس عليهم كالس كاضحك عليهم .
حاول صخر ما امكن ماينفاعلش عليها غمض عينيه خدا نفس عميق ثم فتح عينيه شاف فيها وقال :
- بغيتيني تانا نوض نضربهوم ؟.
قلبت صوفي عينيها بغيظ وقالت بزعاف :
- قلت ليك نوض فرقهوم ماشي ضربهوم .
طلق من يديها أخيرا وناض من بلاصتو وهو كايقول :
- واخا .. اذن راقبيني مزيان .
تخطاها ومشا كايجري قاصد الولد لي غمزاتو ولي كان محامي مع صحابو ضد جبل ورجال وغير وصل لعندو سحبو من دراعو ودخل فيه براس بقوة بطريقة خلات صوفي تغوت بقوة الخوف والصدمة .. تراجعت بخوف لعند البنات وإكتفت بالمشاهدة ديالو من بعيد وهو كايتكرفص على الولد لي كان اصغر منو لا فالعمر ولا فالقوة والجسم .
- ياربي اش هاد الموصيبا لي طاحت علينا .
غوتت بيها روعة بغضب وهي كاتشوف فالمقاتلة ديال الرجال وكملت نورسين :
- أنا صافي عيييت ودابا غادي نوضع حد لهاد زمر كولو .
- غادي نعتقهوم من الحبس ..واش مكاتشوفوش كيفاش تكرفصو رجالنا على دوك دراري شوفو دمايات لي فوجههوم ... الى وصلو الشرطة والله حتى يتحاكمو كاملين من شهر لسنة بتهمة الإعتداء .
رفعت يديها للأعلى وضغطت على الزناد ثلاث مرات فالسقف حتى هدء الجو وسكنت الحركة ... ضارو الرجال كايشوفو فيها بصدمة وفديك اللحظة إستغلو الشباب الفرصة وخرجو كايجريو من المقهى هاربين بحياتهم .
- أشنو هادشي لي درتي .
غوت بيها أسد بغضب وهو كايشوف فنورسين لكنها تجاهلت غضبو ورجعات المسدس لبلاصتو وقالت :
- ممكن تقولولي نتوما اشنو هاد الكوارث لي درتو ؟
شافت فرافاييل وكملت:
- ونتا امول لعقل ياسيد القانون بشمن حق تتهجم على ناس ماداروليك حتى حاجة .
لكن لي رد عليها هو جبل فقال بغضب :
- وممكن تقولو لينا نتوما علاش هربتو من الكونتيسا بلا خبارنا وجاين لهنا وستحليتو نظرات دوك شمايت لا وكايعطيوكم العواصر من الفوق.
تأكدت روعة أنهم قفروها وجبل غادي يصعر عليها كيف العادة فاش كايغير .. فقربت منو وقالت بصوت لطيف ورقيق على الله يهدء :
- جبل نتا فاهم الموضوع غلط .
خنزر فيها جبل وفتح فمو باش يغوت عليها
- روعاااا ...
لكن عصام قاطعو وقال بحدة :
- معليييم خصنا نمشيو من هنا قبل مايجيو الشرطة .
تعصب جبل اكثر ماهو معصب .. اصلا خصو يهضر معاها على إنفراد ويفش خلقو فيها .. جرها من دراعها بعنف حتى انه نسا بلي راها مهرسة لكن فاش سمع صرخة ألم خارجة من بين شفايفها وقف وضار هزها بغضب وخرج بسرعة قاصد سيارتو كيما دار رافاييل جر تاليا من دراعها وخرجها وأسد كذالك كيما خرج صخر وهو كايشوف فصوفي بنظرات قاتلة وخرجت هي تابعاه ..
تأففت رؤية بغيظ ومشات قاصدا واحد الشخص مرتب الشكل واشيب الشعر ..قربت منو وقالت بلباقة متصنعة :
- نتا هو المدير ديال هاد القهوة اسيدي
خنزر فيها الراجل وإكتفى بهز رأسو فكملت بإحراج:
- غادي نعوضو ليك كاع الخسائر ديال اليوم بشرط ماترفعش ضدنا قضية فالمحكمة ..وكانعتاذر ليك نيابتا عليهم كاملين ... ممكن تعطيني رقم حسابك البنكي ؟.
قاطعها صوت خلفها مباشرة كايقول بحدة :
- سيري خرجي .
ضارت وهي ناويا تسمعو خل ودنيه لكنها تصدمات فاش لقتو موراها نيشان يمكن فاصلهوم بعض الإنشات فقط .. توترت رؤية وبعدت على عصام ثم قالت بغيظ:
- واش دابا غادي تخليني ندير خدمتي ولا لا ؟
فالحقيقة هاديك كانت خدمتو هو وغير من نظرتو فهمت بلي راها تدخلت فحاجة ماشي سوقها فيها فابسط حاجة ممكن تخدمهم بيها هي تحرك رجليها وتخرج كيما طلب منها .. تأففت رؤية فاش بقا كايشوف فيها بجمود وقالت :
- طلبت منو رقم حسابو البنكي ماشي رقم تلفونو .
فداخل عصام كانت متخبية إبتسامة صغيرة اصلا كانت باينا من عيونو الضاحكين ... شكون طلب منها تبرر الأمر وكأنه سولها .. قرب من ودنيها وقال بحدة متصنعة :
- خرجي باش مانهرسش حتى هاد المدير وتكوني مضطرة تعوضي ليه رجليه برجلين إصطناعيين .
ثم بعد عليها وقابلها بنظرة باردة جليدية حادة خلات براكين الغضب تشعل فقلبها فخرجات وهي كاتغوت وتنكر :
- اووووف .. تفووو على نهار كيف داير .
لكن فاش خرجات مالقات حتى شي واحد كولهوم هزو سياراتهوم ومشاو وبقات غير ديك السيارة لي سلفهالهوم صديق تاليا ولكن مفاتحها بقا عند نورسين .. كرهت واقع انها غادي تكون مضطرة انها تركب مع عصام بالخصوص ان حتى صاكها ماهزاتوش باش تركب فطاكسي .
خرج عصام بعد ربع ساعة بعدما تافق مع مدير المقهى على مبلغ التعويض وماخرج حتى كتب ليه شيك بمبلغ كبير ... لكن فاش خرج استغرب من رؤية لي كانت كالسا على الطروطوار وساندا راسها على يديها وكاتسناه بملل ... إبتسم عصام وهو كايشوف فمنظرها والحق يقال كانت بحال شي بنيتة صغيرة تالفا على واليديها بينما الريح كايلعب بخصلاتها البنية ..
اخد نفس كبير وحاول ما أمكن يرجع البرود لملامحو ثم داز من حداها وهو كايقول :
-توقعت غادي تكوني مشيتي .
غير شافتو وقفات وبدات كاتنفض معطفها من الغبار لكن مابغاتش تجاوبو .. اصلا مارضاتش قدامو فاش سمحو فيها كاملين .. تخطاها عصام وفتح السيارة بجهاز التحكم لي فيديه ثم ركب وديمارا .. تسناها تركب لكنها كانت واقفا معاندا وكاتحاول ماتشوفش فيه فتأفف عصام بضجر وكلاكسونا عليها حتى قفزها بالخلعة حيت جاها على غفلة .
- واش ماغاتركبييش ؟.
لكنها تجاهلت سؤالو وقلبت راسها للجهة الثانية باش ماتشوفش فيه .. اه باغيا تركب اصلا هي في حاجة ملحة باش تدخل للحمام وإلى مثانتها غادي طرطق وطلقها فسروالها .. اللعين فاش كانت غاديا للحمام وقفها داك بنادم لول وزاد جرها عصام ولي بغا يبول لعام طويل .
مثانتها كانت كاتقولها طلعي وكبريائها كايقولها حرربش وطلعي ساعتها ماغاديش يبقا يحتارمك .. لكن ماذا لو طلقتها فالأرض حداااه .. هداك ساع لي غادي تفقد الإحترام ديالها قدامو فخطرا .. وممكن تجمع حوايجها وتشد اول طيارة للموزنبيق وماتعاودش توريه وجهها ..
تنحنحت رؤية بإحراج ثم ضربت شعرها بيديها للخلف بطريقة متعالية وتقدمت فتحت باب السيارة الخلفية وركبات باش تخليه يتعصب .. زعما غاتخليه يحس بلي هو غير خدام لكن بالنسبة ليه هذا هو الواقع .. حركتها الغبية ابدا مأثرتش فيه بالمرة بالعكس .. احسن باش يراقبها على راحتو من المراية القدامية .
- ممكن تزيد شويا فسرعة .
قالتها رؤية وهي كاتلوى فبلاصتها ومحصورة فأومأ عصام بقلة حيلة وقال:
البارون الأعظم الجزء 78 عراك عنيف
محتوى القصة
التنقل بين الأجزاء