إقبال.ومانخافش عليك أولدي نوال هي البنت المناسبة لك وخا دارت داكشي كامل لكن كنعتارف ان ولدي جاد هو المسؤول الواحيد فهدشي كامل
حيت هو لي عينو فالورث ولكن صافي هدشي دبا غيسالي وحدو هنا وداكشي لي بغاه جاد انا لي غنعطيه ليه ولكن عفاكم حاجة وحدة كنطلبها منكم هي توضعو حد لهذ العداوة لي بيناتكم انا مابغيتش يجي النهار لي نموت فيه ونخليكم فحرب انا بغيت نسد عيني ونموت وانا مرتاحة ومهنية من جهتكم.. (وتبسمات)
سيف.(ونتر يدو من يد نوال)هدشي لي ماعمرو غادي يكوون
إقبال.كيفاااش!!
سيف.كيما سمعتيي
إقبال.واش كترفض كلامي!!
سيف.كلامك ماشي مهم عندي اصلا!! باش نرفضو ولا مانرفضوش!! مشيتي ألالة غبرتي 25 عام ودبا رجعتي بلا حشمة بلا حياء باش تمثلي دور الأم لي كتخاف على ولادها!!
جاد.سيف عندو الحق ويلا باقة عندك غير شوية ديال الكرامة من الأحسن تهزيها وتمشي من هنا وخرجي من حياتنا فمرة
إقبال.(بقات غير ساكتة من كثرة الصدمة، ضربات الحساب لكولشي الا ردة فعل ولادها القاصحة)
نوال.سمحي ليا أخالتي انا درت بزاف ديال الأغلاط فحياتي (كتشوف فرغد) وندمت!! حيت بسبب طمعي وهوى بالي خسرت ناس من دمي ولحمي ولكن تعلمت وخا تدمرت ولكن موت ولدي (مسحات دمعة طاحت من عينيها) موت ولدي دار لي العقل وفييق ضميري لي كان شبه ميت وانا مايمكنش ليا نرجع لسيف وخا عارفاه اصلا مابقاش باغيني بسبب فعايلي خسرتو فالوقت لي هو بغاني من كل قلبو ولكن بغبائي خسرت حبو وفكلتى الحالتين غير ظلمت راسي حيت ماكنتش كنبغيه ابدا .. (دورات راسها كتشوف فجاد) انا حبي طاح على حجرة!! عمرها ترطاب ولا تحن فيا
إقبال.انا باغة غير مصلاحتكم
سيف.الا كنتي بصح باغة مصلاحتنا سيري من هنا وماتبقايش ترجعي وكملي حياتك لي بديتيها بلا بينا
جاد.اه رجعي كملي حياتك وخلينا نكملو حياتنا تا حنا
إقبال.بغيتوني نمشي باش تقتلو بعضياتكم ياك!!
سيف.كون مامشيتيش وخليتينا ماكانش هدشي كامل غيوقع كنتي غتلقاينا بخير دبا!! وهدشي كامل نتي السباب فيه وأصلا كون كان حب ولادك فقلبك گاع ماتسمحي فيهم هذ المدة كلها ودبا بغيتي الحب يكون فينا حنا!!..
إقبال.(يلاه بغات تهضر وهي يسكتها جاد)
جاد.صافي بلا ماتقراي علينا شي جريدة ديال الحب والحزن والحرمان حيت صافي تقهرنا وتگهمنا بكلامك لي باغة تفرضيه علينا
نوال.هدشي لي كدير فيه راه غلط صافي براكة عليك من هدشي كله واش مابقاش فيك ولدك لي خسرتيييه!! ولا اصلا ولدتيه تاهو غير على قبل الفلوس خسااارة قبرك غيتبرا منك
جاد.(ودور للجهة الأخرى)حياتنا كلها مهددة بالخطر أنا انت ونوال ورغد وتا خواتاتهم ريم وعبير تاهما داخلين فالموضوع
سيف.جاد وضح اشباغي تقول
جاد.كاين واحد الشخص باغي يدمرنا جميع وانا باش نحميكم منه قبلت ندير داكشي لي كيطلب مني ولا كان غيقتلنا كاملين ويحطنا فقبر واحد..
سيف.واااش عارف اشكتقوول!!
جاد.اه عارف اشكنقول انا باش نحميكم درت راسي واحد خبيث وطماع ومجرم ومن الفوق قتلت ولدي وخا كان بالغلط والقصة بدات هذي 4 سنوات فاش كنت باقي فالمانيا وداك اليوم كان يوم عادي جيت من الخدمة ومشيت للدار بحال كل مرة دخلت وانا نلقى بريية تحت الباب، هزيتها وبديت نقراها، كانت كتهضر على عائلتنا وفيها جميع معلوماتنا الصغيرة والكبيرة وكانت رسالة تهديد كتقول الا ماعطيتش 200 مليون لصاحب الرسالة غايجيني صندوق هدية فيه سيف خويا وهو مقطوع طراف طراف!! وديك الليلة كانت أسواء ليلة كندوزها فحياتي، مشيت كانجري للبنك وخرجت الفلوس لي كانو مطلوبين مني ومشيت حطيتهم فالعنوان لي خلا ليا كان طلب مني نديهم لمكان النفايات وبعدها نديرهم فميكة ونلوحهم فالزبل
سيف.بلاااتي هو هددك تعطيه الفلوس ويلا ماعطيتيهومش ليه غيقتلني ولكن كيفاش غيقتلني وهو تما!!
جاد.لا اخويا هو كاين فالمغرب ولكن عندو شي واحد فالمانيا وحطو باش يراقب كل تحركاتي
سيف.وفاش حطيتي الفلوس تما مابقيتيش باش تشوف شكون غايهزهوم؟؟
جاد.لا مع الأسف كان ذكي حيت حط 2 عناوين واحد نحط فيه الفلوس والثاني نمشي ليه ونبقا تما تايهز الفلوس ويلا تحركت من بلاصتي غيصفيهالك وكان كيصيفط ليا تصاورك كل يوم باش نتأكد انه قريب ليك ويقدر يوفي بوعده مهم بعد ديك 200 مليوم ولا يطلب بزاف كل مرة وشنو كيطلب والمقابل هو يخليك عايش، وبقى مدة سنة وهو كيهددني تاخلاني نتعرض للسيزي وخسرت گاع داكشي لي كانملك وفاش عرفني مابقى عندي مانعطيه ولا يتحكم فيا وخصني ندير اي حاجة كيطلبها ويلا مادرتهاش راك عارف الباقي، مهم عرف انك تزوجتي وصيفطني للمغرب فأول نهار لك مع نوال انا جيت باش ننفذ ليه المهمة لي طلب مني وهي نفرقكم انت ونوال ونلعب بعقلها ونخليها تبغيني ويلا خالفت كلامه نوال حياتها غتكون فخطر، وبسباب الكينات لي كنعطي لنوال خلاوها بلا عقل وقدرت نتحكم فيها ؤولات كدير اي حاجة كنطلبها منها وديك الساعة حياتكم ولات فآمان تاللنهار لي طلب مني واحد الحاجة ومانفذتهاش ليه ...
سيف.(تحت تأثير الصدمة)شنو!!
جاد.طلب مني ندخلك معايا ونقولك على التهديدات باش تانت تولي تنفذ الخطط ديالو بحالي!! ولكن انا رفضت وكان الثمن هو الحريق لي وقع فدار نوال ورغد هذاك ماكانش حريق عادي انما كان حريق مخطط ليه من قبل، وبعدها راك عارف اشنو وقع واي حاجة درتها كانت تحت طلبه هو . وطلب مني نتخلا على نوال بعدما غرقتها بالدوايات تاولات ماقادراش تولد مرة اخرى
نوال.(بالدموع)ككفاااش
جاد.وطلب مني نفرقك مع رغد وبعدها نخليها تحمل مني والرصاصات لي ضربوك فرجليك ماكانوش مني حيت الفردي ديالي كان خاوي ديك الساعة شي واحد اخر هو لي ضربك وراه باين شكون هو وخطفت رغد حيت طلبها مني وبعدها مشيت كنقلب على ريان فالعنوان لي مشا ليه معاذ وفاش عرفني تبعتو هو هرب وكنت باغي نخلعو بالفردي لكن كنتفاحأ انه عااامر!! وكان السبب فمقتل ولدي ريان وفبلاصة مانبقى معاه ونديه ندفنو هو طلب مني نحجز رغد فواحد الڤيلا لي كانت من اختيارو وكان فها جهاز التنصط داكشي علاش كنت مضطر داك النهار نكذب ونقول ان السباب هو الورث والوصية لي خلا بابا وعرفت ان رغد كانت كتصنط لكولشي حيت درت كامرة فالغرفة كتصور كولشي وهذ الكامرة انا بوحدي لي عارف انها كاينة تما والباقي راك عارفو وداك النهار فاش تاصلت بك وقلت لك ان رغد عندها توحيمة زوينة هو لي كان طلب مني نخليها تاتنعس ونشوف شي ضربة الا كانت فجسمها باش نستخدمها ضدكم ونفرقكم وخليت رغد تااامشات تدوش ودخلت عليها على غفلة وبقيت كنقلب بعيني على شي حاجة تخليك تيق ان شي حاجة وقعات بيني وبينها وفعلا انت تيقتي كلامي وبسباب داكشي انت تفارقتي معاها لكن من داك النهار مابقاو وصلوني تهديدات من داك الشخص غبر فمرة!! تالليوم عاد صيفط رسالة تاني وقال بلي مهمتي مازال ماكملتهاش،وخصني نكملها ويلا ماكملتهاش غيقتلنا كلنا ويدفننا فمكان واحد!!
سيف.(بالصدمة)شكوون غيكوون هذ الشخص
جاد.تا أنا هدشي لي بغيت نعرف شكون هذ الشخص
رغد ونوال.(جلسو فوق الفوتوي من كثرة الصدمات لي تعرضو ليهم وراسهم تقلب فمرة وحدة)...
نوال.(وساهية)طول حياتنا كنا عايشين فكذبة!!
جاد.نكونو عايشين فكذبة حسن مانكونو ميتين وفقبرنا دبا
سيف.(وكيشوف فجاد)انت رجعتي راسك كذاب وطماع ومجرم غير باش تحمينا حنا
جاد.اه ولكن ماقدرتش نكمل انا فعينيكم دبا واحد ماكيسواش ومجرم ولكن أخويا لا انا ماشي هكاك وسمحو ليا حيت ماقدرتش نحميكم تاللخر الأمور دبا خارجة من يدي، مانقدرش نشوف البنت لي كنبغي كتعذب قدامي حيت دمرتها وحطمت قلبها وخا هي كانت مراتك، ومانقدرش نشوفك أخويا كتبعد مني وحاط حدود بيناتنا وحاقد عليا على قبل فعايلي لي كاندير، ومانقدرش ندعس على قلبي وضميري ونحط يدي على شي حاجة ماشي ديالي رغد ملكك انت وسبقلي حطيت يدي على حاجة كتخصك ولكن صافي مابغيتش نعاود غلطي مرة أخرى وخا عارف ان حياتنا دبا عاد زادت ؤولات فخطر كثر من الأول ولكن متأكد هدشي غادي يسالي وقرييب غايسالي
نوال.(وناضت من بلاصتها ودموعها على خدها)انت...(يلاه بغات تكمل وهو يقاطعها جاد)
جاد.(وحط يدو على خدها)أه انا كنبغيك وخا حاولت مانطيحش ففخ حبك ولكن فشلت مشاعري كانو أقوى من أني نسيطر عليهم وكرهت راسي كثر فاش خليتك تحملي مني ولكن شنو ندير هما كيتحكمو فيا ويلا مادرتش داكشي لي كيطلبو مني كنتي غاتموتي وطلبو مني نمثل انني كنبغيك ولكن مع الأسف انا ماكنتش كنمتل انا فعلا كنبغيك ومن كل قلبي .. (مسح ليها دموعها وعنقها)
نوال.علاش بقيتي ساكت هذ المدة كلها أهئ أهئ علاش ماقلتي ليا والو وبقيتي كتعذب غير بوحدك على قبلنا!!
سيف.كون قلتي لينا شنو كاين من الأول كون بزاف دالحوايج ماوقعوش دبا
جاد.لا أخويا انا كون هضرت كان غيوقع أسواء من هكا
سيف.(وأفكاره مشوشة)ولكن شكون هذا لي عندو مصلحة فدامارنا؟
الشخص.مدام رغد حلي الباب أنا معاذ سي سيف صيفطني باش نبقى معاكم
نوال.(ورجعات التليفون بلاصتو)اووف هذا معاذ كنت غنموت من خوفي .. (مشات بخطوات متسرعة وحلات ليه الباب)
معاذ.(ودخل)سي سيف صيفطني باش نبقى معاكم، هو وسي جاد تبعو مدام إقبال
نوال.(وسدات الباب)تبعوها!!
معاذ.اه
رغد.زعمة تكون الشخص لي كيهدد جاد!!
نوال.مستحيل هي راه الأم ديالهم ماغتبغيش ليهم المضرة وتأذيهم
رغد.هي أصلا كيفاش جات لهنا وعرفات گاع داكشي لي واقع...
معاذ.هي اصلا كانت عارفة الڤيلا، ولكن فاش جات لقاتها خاوية ومشات عند العساس سولاتو وقال ليها بلي سي سيف بوحدو لي ساكن هنا ودبا خارج ماكاينش هنا وعطاها رقمي وقال ليها بلي المساعد ديالو غيقولك فين كاين صافي تاصلات بيا وجات عندي وفاش عرفتها هي الأم ديال سي سيف كنت مضطر نعاود ليها كولشي حيت سولاتني
نوال.يعني أكيد هي ماشي داك الشخص حيت كون كانت هو ماغتمشيش عندك وتسولك
معاذ.اشمن شخص!!
رغد.قصة طويلة مهم كاين شي واحد كيهدد جاد على قبل حياتنا ودبا حنا معرضين للخطر وداكشي كامل لي دارو جاد دارو بزز منو كانو تعليمات كيتعطاو ليه وهو كينفذهم
معاذ.(بقى غير مصدوم ومخرج عينو)
نوال.قلبي مقبوط عليا ماكانش علينا نخليوهم يمشيو
معاذ.انا غانتاصل بيهم هما خصهوم يرجعو ويعرفو أن مدام إقبال ماكانتش عارفة والو وانا لي قلت ليها كولشي
رغد.وخا تاصل بيهم .. (خرج معاذ والتليفون فيدو وتاصل بسيف، والبنات بقاو كيتسناه تارجع وقال ليهم بلي لقا تليفونو مسدود، وهنا خافت رغد وقلبها ولا يضرب بالزربة اما نوال فاهي كثر منها لونها رجع كله صفر فثانية وحدة، بقاو كيتسناو وهما كيتشواو فوق نار الخوف والرعب، دازت ساعة وساعتين ومازال مابان ليهم اثار)
رغد.يااااربي تحفظهم ياااربي وترجعهم بخير
نوال.غنتسطى عقلي غيخرج من بلاصته.. (ومازال گاع ماكملاتهاش وهما يتحل عليهم الباب دورو جهته وهما يلقاو جاد وسيف)
جاد.(بخيبة أمل)مع الأسف والووو
سيف.(الصمت، ومشا طلع للفوق وهو معصب ؤوجو تحمر)
نوال.(وعنقات جاد)كنت غنموت من خوفي عليك
جاد.انا بخير ماتخافيش
رغد.(حذرات راسها ودورات جهة الدروج باش طلع للفوق)
جاد.(ؤوقفها)من الأحسن تخلييه راه معصب بزاااف
رغد.(هزات راسها وشافت فيه، "زعمة مانقدرش"، وبعدها كملات طريقها وطلعات للفوق، .. حلات الباب ودخلات، دورات عينيها فالبيت ومالقاتش سيف، شوية سمعات صوت الدوش، وعرفات انه فالحمام، مشات جلسات فوق الناموسية وبقات كتسناه،...
ولكن تعطل والنعاس بدا يديها وعينيها كيتغمضو بوحدهم، بقات كتقاوم تاستسلمات وحطات راسها فوق المخدة ونعسات، وبعد 5 دقائق الباب ديال الحمام تحل، خرج منه سيف وهو كينشف راسو بالفوطة وعاري من الفوق، شاف رغد ناعسة بلاصته، وهو يعلق الفوطة بلاصتها ومشا عندها بخطوات مهيلة،جلس حداها وبقى كيشوف فيها وهي غارقة فالنعاس وساهي، كيفكر كيفاش هي صبرات لعذابه وگاع داكشي لي دوز عليها، ودبا حياتها هي وخواتاتها ولات فخطر بسبابه هو وخوه والذنب الواحيد لي داروه هو انهم دخلو لحياتهم، .. هز يدو وبقى كيدوزها فوق شعرها، وشوية بشوية بدا يقرب منها، كان مشتهي يسرق منها قبلة، حيت فأخير لقاء ماتعطاتلوش فرصة فين يكسر الشوق ديالو ليها بعد غياب دام لمدة شهر، ودبا كبريائه وغروره وعصبيته شمعتهم طفاتها رغد بالمشاعر لي زرعات فقلبو بعدما كانت كتلقبو بحيوان وعديم الضمير، .. وبمجرد ما أنفاسه تقربو لشفايف رغد حلات عينيها وهي كترمش بسرعة باش تأكد أن الشخص هو نفسه سيف)
هي.سيف!!
هو.سمحي ليا فيقتك
هي.(وعنقاتو)خليتيني نتسناك وانا مشتهية نحظنك كنت خايفة عليك بزااف ماتبقاش تمشي وتخليني انا ماغنقدرش نتحمل شي صدمة أخرى
هي.(ونفاجرات بالبكاء)مانقدرررش ماانقدررش انا ماشي بحالك باش نتحمل هدشي كامل
هو.(وشدها من خدودها وحط عينو فعينها)4 سنين وانا هاز هدشي بين كتافي وانتي 2 سوايع مقدرتيش تصبري!!
هي.انا خايفة عليك انت .. ماشي على راسي وخايفة على البنات لي عايشين حياتهم عادي ومافخبارهم والو
جاد.انا وسيف غنحميوكم وهذ الشخص طال الزمان ولا قصار غيبان وغيتشد
نوال.بما انهم باقي حر وماتشدش ماطلبش مني ننسى خوفي ونتصرف عادي ونضحك حيت حياتنا راه فخطر ربما انت جاتك عادية حيت ولفتي هدشي ولكن انا لا،..
["تغيير الوجهة"]
رغد.بمجرد التفكير اننا مهددين بالموت كنبغي نحماق
سيف.ماشي وانتي معايا، انا غنبقى حداك وماغنسمح لتاشي حاجة توقع لك .... [ وفعلا سيف كان عند وعده هو وجاد بقاو مع البنات وماخلاوهم تاشي دقيقة .. دوزو أسبوع وهما فآمان بدون أي تهديد لكن مع ذلك حياتهم باقة فخطر، وجاد وسيف طيلة الأسبوع كانو كيقلبو ويبحثو على صاحب التهديدات ولكن بدون جدوى ماقدرو يلقاو والو وعرفو ان داك الشخص ذكي لأقصى درجة وماشي من الساهل يلقاوه، وبقاو كيتسناو خطته الثانية شنو غتكون، اما بخصوص الأم ديالهم السيدة إقبال، بقات كل يوم كاتجي عندهم طلب وترغب وتزاوگ لكن قلب سيف وجاد كان حجر، كرهوها وحقدو عليها، حيت بسبابهم عاشو فكذبة وجلسات تالأخير عمرها وجات عندهم بالكلمة المشهورة انا مكم وكنت كنتعذب فغيابكم بسباب باكم لي طلقني، ولكن هما ماتيقوهاش وبغاوها تعذب باش تعرف بحق تبني وتعلي وتمشي وتخلي،)
["حاليا"]
رغد.عفاك صافي براكة عليها واش ماشفتيش حالتها كيف ولات!!
رغد.من الأحسن تمشي من هنا قبل مايجيو حيت الا شافوك ...(قاطعاتها)
إقبال.انا ماجيتش باش ناخد منك الإذن هدوك راهم ولادي سمعتي
رغد.(يلاه بغات تجاوبها وهي تسكتها نوال بإشارة باش مايديروش شي مشكيل)
نوال.معاذ عيطنا لك ولقينا تليفونك مسدود
معاذ.اه داكشي علاش جيت دبا سي جاد وسي سيف خاصهم يعرفو واحد الحاجة
رغد.بحال أش!!
معاذ.وصلاتني رسالة تهديد!!
نوال.(ومخرجة عينيها)
معاذ.وماشي غير بوحدي تا السيدة إقبال وصلاتها نفس الرسالة
نوال.واش عارف راسك اشكتقول
إقبال.معاذ كلامه صحيح قلت يمكن شي واحد بغا يضحك معايا ولكن فاش مشيت عند معاذ اوريت ليه الرسال تفاجئت بلي تاهو ولاصتو نفس رسالتي داكشي علاش جيت باش نعرف شنو لي كيوقع فهذ الدار
رغد.مع الأسف كلنا وصلاتنا رسالة تهديد
نوال.وخا توريوني الرسالة؟
معاذ.بدلنا الرقم ديالنا ومسحناها حيت كنا خايفين
رغد.وشنو كان مكتوب فيها
إقبال.قال بلي الا مابدلتش المدينة وماتخليتش على سيف وجاد خلال 24 ساعة غايصيفطني للقبر
نوال.ككفاااس!!
معاذ.وتا انا نفس الشئ
رغد.صبرو قرب يتكشف كولشي ولكن اوووف علاش تعطلوو
نوال.عنداك يكون وقعات ليهم شي حاجة؟
رغد.(الصمت وكلام ختها زرع فيها الخوف)
معاذ.شنو نديرو دبا واش نعييطو للبوليس!!
نوال.لا سيف وجاد راهم فالطريق قدرو يكشفو الرقم ديال من دبا يوصلو ونعرفو
["تغيير الوجهة"]
جنى.ماعرفتش علاش ماكايجاوبش
إيمان.يقدر يكون مازال فالخدمة
جنى.ولكن كان غير يجاوب بعدا على الأقل
إيمان.ماتخافيش دبا يجي
جنى.5 ساعات وانا كنحاول نتاصل بيه خايفة غير تكون شي حاجة وقعات ليه
["تغير الوجهة"]
الشخص.يااااربي تلطف بينا وتجعل السلامة
الشخص2.كون بعدا علمو غير خواتاتهم باش يجيو تلقايهم ماعارفين والو
الشخص3.اختي كون كانو كايجيو لهنا ويطلو على خواتاتهم ماكانتش هذ المصيبة غتوقع
الشخص4.راه وحدة فيهم كانت ماتت فالحريق يمكن سميتها نوال بقات غير رغد تزوجات ومشات وماعمرها رجعات...
إقبال.من 27 سنة ونار الإنتقام شاعلة فيا ونهار وقفت على رجلي وخطط ننتاقم من باكم كنتفاجئ بموته ورجعت اللور وفكرت بعقلي باكم مات ومكم بسباب مرضها كتموت يوم بعد يوم داكشي علاش قررت ان حقي غناخدو منكم نتوما وهذا كان اقتراح بنتي بعدما تعقدات بكلام الناس وصمعتها توسخات بداكشي لي دار فيا باكم
هناء.(بالدموع)بسباب باااكم انا بنت الحرااام وكولشي كيشوف فيا بنظرة ناقصة وكينعتني ببنت الحرااام وهدشي لي دفعني تا انا ننتاقم منكم وخا ماعندكم تاشي ذنب فوالو ولكن نتوما ولاد علي الراضي وخاصكم تدفعو ثمن اغلاطه
جاد.طول هذ المدة كنتي غير كتمتلي!!
سيف.مامتيقش اننا دخلنا العدو لوسط الدااار
نوال.(وهجمات على هناء)انتييي لييي قتلتييي لياااا ولدي المجرمة انتييي
هناء.(ودفعاتها)كننصحك ترجعي اللور وثبتي بلاصتك ولا هذ القرطاسة غنفضيها فراسك
هناء.هااااه شتك مصدومة!! مالك اااه ولا ولفتيني فدور الخدامة لي كتمسح وسخك وكتوكلك اقليلة الترابي
سيف.ردددي البااال لكلامك
هناء.انت لي خاصك ترد البال لكلامك حيت من دبا شوية غنلعبو واحد اللعبة زوينة سميتها لعبة الموت
إقبال.شحااال وانا كنتسنى هذ اللحظة
هناء.هذا نهارك أماما يوم إنتصارك على عدووك
جاد.مامصدقش ان هدشي كامل خرج من وحدة بحالك
هناء.شنو واش حجمي صغير من كلامي أخويا!!..
سيف.مانظنش انك غتوسخي يدك بدمنا ودوزي باقي أيام حياتك فالحبس
هناء.باغي تأتر عليا هاااه عجبني تفكيرك هو فعلا يدي غيتوسخو بدمكم لكن الحبس ماشي ليا حيت بعد ساعة طيارتي في إنتظاري وفيها غنعلن إنتصاري وانا متاجهة لبلاد الحرية أمريكة
إقبال.صافي نهي هدشي خلاااص وخلينا نمشيو فحالنا راه هذ 160 ساعة لي دوزت هنا قهراتني
مروان.حاول يهرب ولكن شديناه ونتوما فآمان دبا (تبسم ليهم ومشا خرج، والشرطي لي معاه جر هناء وإقبال وداهم للصطافيت)
رغد.(وجلسات فوق الفوتوي)اوووف الحمدلله ياربي
جاد.(وضرب يد سيف)خطتك نجحات ماعندي مانسالك
نوال.ولكن كيفاش درتو هدشي
سيف.داك النهار فاش قلنا ليكم بلي غنتبعو إقبال حنا مامشيناش عندها حنا تاجهنا ديريكت لمركز ديال الشرطة عاودنا كولشي للمحقق مروان وتاهو رأيه كان من رأينا وقال بلي الشخص أكيد غيكون واحد منا و بيناتنا حيت عارف علينا الصغيرة والكبيرة، وهو طلب أرقام جميع الناس لي قراب لينا وكيتواصلو معانا باش يراقبهم وحنا عطيناه رقم إقبال ومعاذ وهناء وبقى كيراقب أرقامهم، وجميع التحركات ديالهم عرفهم من خلال المكالمات لي كانو كيوصلوهم ولكن ماقال لينا والو حيت خاف نمشيو نديرو ليهم شي حاجة وفنفس النهار لي كان غيشدهم هما صيفطو رسالة وحنا مشينا دينا ليه الرقم لي جات منو لكن كنتصدمو انه ديجا عارف شكون مولاهم وكيراقبو وتعاون معانا وبغا يشدهم وهما متلبسين داكشي علاش حط لجاد جهاز التنصط وانا بلعاني تاصلت بيكم وقلت بلي حنا عرفنا شكون وفالوقت لي كنت غنقل الاسم قطعت الخط حيت الا هضرت نتوما كنتو غتعاودو كولشي لمعاذ وديك الساعة كانو يقدرو يديرو ليكم شي حاجة قبل مانجيو حنا وبعدها يهربو كيما خططو وراكم شفتو النتيجة دبا
رغد.(وكتبكي)وختييي!!
نوال.(وحابسة دموعها)عبييير ختي مشاااات..
جاد.(وشد نوال فيدها)ختك فآمان
رغد.شنووو!!
سيف.عبير وريم بخير وماوقع ليهم والو
ريم.(ودخلات)علاه لي عندو بحال هذ الرجال فعائلته تقدر توقع ليه شي حاجة!!
رغد.(ونقزات من بلاصتها)رييييم
عبير.(ودخلات تاهي)الصراحة نسيبنا خارج يكون شي عضوو في اف بي اب
رغد.(جرات عندهم وعنقاتهم بإبتسامة عريضة رغم دموعها لي على خدها، اما نوال فا بقات جامدة بلاصتها وعلاش لا وهذي مدة طويل ماشافتش خواتاتها)
عبير.(وشوفاتها متاجهة لنوال)ختي!!
ريم..نوال
جاد.(ويدو فوق كتف نوال همس فوذنها)سيري
نوال.(بدموعها مشات ستقبلات خواتتها، وبقاو معنقين بعضياتهم ب 4 بيهم وهما كيبكي دموع الفرح اما سيف وجاد بقاو غير كيشوفو وهما متبسمين وفرحانين حيت واخيرا بعد طول هذ العذب والمعانات لي دازت عليهم كيخرجو من الحرب بيد منتصرة،)
نوال.(ويلاه بغات تقول ليهم على موتها لي كان كذبة وهي تسكتها عبير)
عبير.حنا عارفين كولشي أختي وأهم حاجة كتهمنا دبا هي أننا تجمعنا وخا ماكانش عليكم تخبيو علينا هذ الحرب لي نتوما فيها ولكن (شافت فجاد) ولكن كيما قال جاد نتوما بغيتو تبعدونا على هدشي كامل باش نقدرو نكونو فآمان
رغد.كنت غنموت من خوفي عليك احسابلي بصح نتاحرتي
ريم.لا هي كانت بخير ماوقع ليها والو ولكن كانت غديرها قبل اسبوع من دبا لولا جاد لي تدخل
نوال.(ستغربات من كلامها ودورات كتشوف فجاد)
جاد.اه انا لي طلبت منها دير هكاك حيت بعدما هضرت وعاودت ليكم كولشي انا تاصلت بالبنات وعلمتهم انني بغيت نتلاقا بيهم ونيت داكشي لي درت مشيت عندهم وعاودت ليهم كولشي بالتفصيل حيت كنت متأكد انني بعدما نهضر العدوو ديالنا غيمشي ليهم هما ديريكت ولكن تحركت فالوقت المناسب ومع الأسف تصدمت أن عبير على علاقة برجل ماكتعرفوش ولي طلع دبا انه معاذ لي هو رضوان
رغد.ككفاااش!!
عبير.(وكلامها مخلط مع البكاء)قبل شهر تعرفت على معاذ ولكن بإسم الحقيقي رضوان كان ظريف معايا وحنين وحيت انا خسرت أهلي ونتوما لي مشيتو ومابقيتوش كتبانو كنت كنعاني من النقص وخا ريم كانت معايا ولكن كنت كنحس بالوحدة وبالصدفة تعرفت على معاذ لي كتشفت من بعد انها ماشي صدفة حيت كانت خطة منه، هو من خلال شهر فقط طيحني فحبه كان عمر المكان لي كان خاوي فقلبي، كان كيدير ليا خاطري ويجيب ليا اي حاجة بغيتها وخا داكشي مكيهمنيش ولكن كان مهتم بيا لأقصى درجة
نوال.(وعقلها غيخرج من بلاصته)مادار لك والو ياك؟؟
عبير.(الصمت)
رغد.(وشدات عبير فيدها)ختيي هو ماتقربش لك
عبير.(ونفجرات بالبكاء)ستغلنيييي وستغل النقص والوحدة لي كنت فيها هو دمرررني أهئ أهئ دمررني
نوال.(بالغوات)ووولد الحرااااااام
عبير.وانا دبا ...(الصمت)
رغد.شنوو!!
عبير.(وكانت غطيح ولكن شدها جاد)ولدووو فكرشييي أهئ أهئ اناا حاااملة منه
رغد ونوال.(الصمت، من كثرة الصدمة)
جاد.(وعنق عبير)حنا معاك متخافيش
عبير.ولد العدوو ديالنا فكرشي شنو ندير ضحك عليا وانا من قلة وعيي تبعتو ولولا جاد لي جا عندي داك النهار فالوقت المناسب كنت دبا غنكون فقبري حيت ماتحملتش هدشي أهئ أهئ...
ريم.(وكدوز يدها على شعر عبير)صافي اختي صافي
عبير.خطته كانت نقتل راسي باش نتوما تعذبو ورايا وحط رااجل يراقبني باش يشوف ياكما علمتكم وكان كل يوم تابعني وعلمت جاد قتليه ان داك الشخص حط عليا حراسة وكون كانت عندي شي صورة ديالو كان جاد غيتعرف عليه ولكن ماخلا تاشي حاجة عندي باش نقدر نكشفو بيها وباش نتفك منه ونخليه يقول انه تهنا مني انا درت راسي نتاحرت وختي جمعات الجيران كلهم وقالت انا قتلت راسي وتاصلات بيكم تانتوما حيت جاد قال ليا داك الشخص كاين وسطكم ولكن دبا فاش وقفت مع البوليس برا عرفت انه كان مساعد سيف وفنفس الوقت عدوونا وتصدمت ولكن دبا صافي مشا
رغد.(وساهية)مشا ولكن خلا ولدو فوسطنا
جاد.(وبغا ينسيهم الصدمة لي تعرضو ليها مرة أخرى)حنا دبا تهنينا منهم وخصنا نحتافلو ولا لا أنوال؟
نوال.اه اه بصح
رغد.(تبسمات ليهم ومشات طلعات للفوق ودخلات ديريكت لبيتها، وغير حطات فيها رجليها وهي تبدا بالبكاء)
سيف.(ودخل)عرفتك غديريها
رغد.ماشي لخاطري
سيف.(وعنقها من اللور)حييدي دوك الأفكار من راسك ولد عبير ماغيخرجش بحال معاذ
رغد.حنا على قبل جريمة وقعات هذي سنين تشتتنا وتدمرنا ودبا يمكن التاريخ يعيد نفسه ويوقع نفس الشئ هناء نتاقمات منا حيت بنت غير شرعية ودبا ولد معاذ...(يلاه بغات تكمل وهي يسكتها سيف ودورها لعندو)
هو.انا متفهم انك خايفة حيت هما نفس الحالات ولكن حنا غنسدو هذ الموضوع هنا ونبداو حياتنا من جديد بحالا تاحاجة ماوقعات والماضي غيكون ماضي وغنخليوه ورانا
هي.(وكتشوف ليه فعينيه)ويلا جا شي نهار ؤولدو عرف الحقيقة كلها؟ هو اكيد ماغيرحمناش خصوصا وحنا دخلنا باه للحبس
سيف.(وكيضحك)وليتي تفكري بحال الأفلام
رغد.(وضحكات فعز شكوكها)اه زدت فيه ياك
سيف.(بدا يتقرب منها وكيدير شوفة الأسد لفرسته)
رغد.(بخوف وكترجع خطوات للوراء)مالك!!
هو.(الصمت ومازال كيقرب منها تاحاصرها فالحيط ومابقا عندها فين تزيد)
هي.(وكدور فعينيها)سيف
هو.مابغيتيش تعرفي واش كسبتي الرهان؟؟
هي.(بعدما عرفات داكشي لي كيتسناها بدات تبلع فريقها)رهان اشمن رهان؟
هو.مالك تلفتي شنو وقع لك؟
هي.(وبغات تهرب منه)غنمشي نشوف البنات مازال ماشبعت منهم
هو.(ومشا سد الباب وجرها لعندو)البنات يقدرو يتسناو ولكن أنا لا واليوم خصني نشبع منك...
كيقولو بعد كل قرح فرح وبعد كل حزن سعادة تخليك تنسى گاع داكشي لي دزتي منه، ورغد بعد كل معاناتها الأيام واخيرا ضحكات ليها، والبسمة مابقاتش كتفارق وجهها، ونسات كل آلامها وجروحها، وبالقرب من حب حياتها نسات المرار لي كلاتو فعز شبابها، وبعد أسبوع من الحرب لي خرجات منها هي وسيف قررو انهم يسافرو بعيد وينساو المغرب ولكن ماشي فمرة هما أكيد مازال غيرجعو ولكن اشمن نهار الله أعلم، هما بغاو يخليو كولشي وراهم ويبداو حياة جديدة، سيف قلبو واخيرا حن على رغد، وبيين مشاعره ليها، وبادلها نفس الحب، اولاو دقيقة مايقدروش يدوزوها وهما بعاد على بعضياتهم، سيف رغم عصبيته قدر يخلي رغد أسعد وحدة، وخا هو ولا يغير ويشك ويخاف عليها بزاااف، ولكن هدشي عادي بحال أي زوج كيبغي مراته وخا الثقة كاينة لكن فاش كتبغي شي واحد وخا يكون ملكك كتولي تخاف عليه وتغار عليه من ابسط الأشياء وتامن الهواء لي كيتنفسو بنفسو، وهدشي ماغيعرفوه غير لي داقو الحب والعشق وشرب من كاسهم، على اي حال نرجعو لحكايتنا وبالظبط بعد مرور سنتين، ونمشيو ديريكت عند جاد ونوال لي تزوجو ومشاو كملو حياتهم فآلمانيا، تاهما حبهم كان حقيقي وقوي وماشي من الساهل تفرقهم ولا تزعزع الثقة بينهم، خصوصا وأنّ آدم جامعهم، .. الولد لي وخا ماشي ولدهم حسسوه انه فعلا ولدهم وأكثر، نوال وجاد بعد شهر من زواجهم قررو يتبناو ولد وسماوه آدم، اما بخصوص ريم وعبير فحكايتهم حكاية آخرى، ريم بفضل سيف قدرات تمشي تكمل قرايتها وحياتها فإطاليا ولحد الآن باقى عزباء ومعايشاش أي حالة حب، وعبير كنظن نتوما كتوقعو ان حياتها غتكون تعيسة بعدما حملات من معاذ، هي حتفظات بالجنين ؤولداتو وكان بنت وهي تحملات مسؤوليتها لحالها، وبقات فالمغرب لكن بدلات المدينة ورفضات تمشي مع ريم، حيت بغات تكبر بنتها فبلاد إسلامي، البنت لي سماتها رحمة ولحد الآن تاواحد ماعارفش علاش سماتها هذ الإسم، وبخصوص هناء وإقبال ومعاذ حكايتهم هما حكاية أخرى، إقبال بعدما تسجنات ماتحملاتش تبقى محبوسة بين أربع حيطان، وبعد شهر فقط انتحرات ودات شرها للقبر، وبنتها هناء بعد الصدمة لي تعرضات ليها حماقت ؤولا عندها مرض نفساني وداوها تعالج وبقاو حاطين عليها حراسة، لكن السؤال يبقى، واش فعلا حماقت ولا هذي غير خطة دارتها باش يخرجوها ويحطوها فمستشفى؟...
اما بخصوص معاذ راجلها خبارو مابقى تاواحد كيجيبهم بعدما كشف المحقق مروان ان عندو يد مع الإرهاب غبروه فمرة ومابقى له اثار، ، ودبا نمشيو لجهاد وجنى لي تاهما حكايتهم حكاية أخرى ولي غتشوفوها بعد إنتهائي من قصتي الجديدة "تاني أوكسيد العشق" أنا قررت ندير ليهم قصة حيت كاين فحياتهم شلا مايتعاود وبلا مانقول ليكم والو عليهم حيت كل حاجة فوقتها زوينة، ودبا نرجعو لبطلتنا رغد، لي لحد الآن عايشة فالأحلام وكدعي الله ليل ونهار باش يرزقها الولاد لي تحرمات منهم، ماخلات فين مشات گاع الأطباء دوزات عندهم لكن الله مازال مابغاها تكون أم، هي رغم سعادتها مع سيف، مازال طرف صغير من قلبها تقطع ومشا بعيد ولحد الآن باقة كتقلب عليه، وماشي غير هم الولاد لي عندها، تاهم بنت ختها عندها، كتفكر نهار تكبر رحمة وتقلب على باها اشغدير، ونهار تكتشف الحقيقة المخبية كيفاش غتكون ردة فعلها!!، هذا كان تفكير رغد اما عبير وجاد ونوال وريم وتاسيف ماعمرهم فكرو فهدشي الا هي لي ديما عايشة فالرعب والخوف كلما كتشوف رحمة ولا تصاورها قدامها، وتاداك التفكير ديال (هي رزقها ربي بنت بلا زواج وانا لي لساني نشف من كثرة الدعاوي گاع ماعندي) عبير وخا هي ختها الغيرة كتجيها وماقادراش تييق انها باقى ماولاتش أم، اما بخصوص سيف ديما كيحاول يخبي خيبة آمله بعدما كان متمني قطعة تجمع بينو وبين رغد القطعة لي غتكون ثمار حبهم، ولي الحد الآن كيقلبو عليها بجوج، وفكرة انهم يديرو بحال جاد ونوال مستبعدينها نهائيا، ومازال عندهم آمل انه يقدر يجي شي نهار ويكونو عائلة حيت هذي غير سنتين لي دوزو مع بعضهم مازال الخير للقدام،.... 🎬
"خلاصة" 👇
[سيف رغد]تحرمو من الولاد وأمنيتهم الواكيدة يكونو أب وأم
[عبير وريم] عبير تقبلات انها أم بلا زواج، وريم عاشت حياتها ومتابعة طموحها وهدفها
[جهاد جنى] جهاد تقبل بنات جنى قبل گاع مايتزادو ودارهم كثر من بناتو وجنى عايشة فسعادة معاه وخا ماكاينش حب بيناتهم
[هناء معاذ] هناء بنت غير شرعية وبيدها دمرات حياتها وكملات باقي أيامها مجنونة ومحبوسة، اما معاذ هو أيضا داخل قضبان السجن وماعارف والو على بنتو رحمة لحد الآن
[إقبال] السيدة لي كانت السبب فدمار عائلة الراضي غدرات الدنيا وستقرات تحت الأرض ......🎬
هذا كان أخير جزء من قصتنا "الأسد الجائع" نتمنى تكون قصتي المتواضعة نالت إعجابكم وأستسمح على الأخطاء الإملائية او على الكلمات الغير مناسبة مستوايا الدراسي السادس إبتدائي فقط ✋
الأسد الجائع الجزء الخامس والأخير
محتوى القصة
التنقل بين الأجزاء