بعد دفن بهجت بيك تكلف برهان بالمنظمة وبإدارتها بصفته الوريث الكبير ... لا صخر ولا جبل عتارضو بل حتى أن جبل تنازل على الوكالة ديال الثروة ديال البارون لي كتبهالو وهو على قيد الحياة وتخلى على حقو فالورث والحصة ديالو عطاها لصخر .. كان كايشوف راسو بلي واخا شركتو الوحيدة تحرقات ومشات الا أنه عندو القدرة باش يبني وحداخرة بفلوسو هو ومجهودو الشخصي .. اما صخر فطول حياتو كان متكل على بهجت فكل شئ والى ماخداش الورث لي بالطبع عندو كامل الحق فيه غايبقى بلا ريال بلا جوج .
واش غاينكرو بلي ماحزنوش على موت بهجت .. لا .. صخر بكى عليه واخا عرف الحقيقة إلا أنه تقهر أولا حيت طفولتو كولها عاشها معاه وتحت جناحو وماشاف منو غير الخير وتقهر أكثر حيت بهجت مات بالقنبلة لي صنعها هو بيديه .
هو كفر على كل ذنوبو ملي ضحى بحياتو باش ينهي داك الصراع لي كان غادي يجي يوم ويهلك شي واحد فيهم فضل يموت هو بدل أولادو .. ونعم الأب وأخبث الجد.
لكن موضوع usp فضلو يخليوه طي الكتمان ويطويو الصفحة ديالو حتى إشعار أخر .. حتى شي واحد فيهم ماكان مستعد يغرق راسو من جديد مع منظمة لا هي من سهمهم ولا هما من سهمها .. تزهقو بزااف ديال الأرواح وجاء الوقت باش يوقفو الدم ويعيشو حياتهم طبيعية بحال كل الناس الطبيعية
_________
بعد إكتمال أسبوع على موت البارون الأعضم :
المكان : الــمـــغــــرب
الزمان : 10:30 دقيقة صباحا
فاقت روعة على صوت جرس باب الدار فناضت وهي كاتحس بالخمول وتوجهت للباب طلات من العين السحرية وفاش لقاتو عبد السلام الكونسيرج حلت الباب وهي كاتقول بإبتسامة متصنعة :
- صباح الخير اعمي عبد سلام .
بادلها الإبتسام وقال وهو كايمد ليها ضرف أبيض
- صباح النور ابنتي .. هاد صباح جاء لفاكتور وخلا ليك هاد الضرف فيه سميتك .
ستالماتو منو روعة وقالت :
- واخا شكرا عمي .
تراجع عبد سلام باش يمشي لكن رجع وقف وضار عندها وقال:
هبط عبد السلام للطابق الأول وتوقف فاش لقاه واقف عند الباب بقامتو الرجولية وهو داير يديه فجيابو كان لابس تيشرت صوفي فالرمادي وسروال اسود ... إبتسم عبد سلام بحماس و قرب منو قال :
- سي جبل .. راني عطيت ليها الرسالة لي عطيتيني .
إستدار جبل وإبتسم بهدوء وهو كايشوف فعبد السلام ثم قال :
- تمام اسي عبد السلام شويا وغادي يوصلك واحد لبوكيه ديال الورد طلعو ليها حتى هو .
تردد عبدسلام قبل مايقول بصوت متوتر:
- ولكن اولدي ياك هي مرتك ... علاش ماطلعش لعندها بيديك وتعطيه ليها .. واش ماعيتيش من سفر .. ياك قلتيلي بلي يالاه وصلتي فصباح للمغرب وأي راجل كايبغي يرتاح فدارو من بعد تمارة .
توسعت إبتسامة جبل وقال فنفسو "ياريت لو كانت بهاد السهولة" لكنه مامتأكدش من ردة فعلها .. حس بلي دوك الأيام لي فاتو كان كايفرض راسو عليها بزز وهي دابا مريضة وماعارفش حتى كيفاش كاتواجه الإدمان غير وحدها بلا دعم نفسي ولا عائلي ولا طبي ... أكيد غادي تكون حالتها النفسية متدهورة ومابغاش يزيد يكمل عليها .
هز يديه طبطب على كتف العم عبد السلام وقال :
- من الأفضل تهتم غير بخدمتك أعمي عبد سلام .
رد عليه عبد سلام بإحراج وهو كايضحك :
- ههه عندك الحق .. ايوا نخليك لالة روعة سخراتني لحانوت .. غانمشي نجيب ليها صخرا بلاما نتعطل عليها .
إستوقفو جبل قبل مايخرج وقال وهو تابعو:
- بلاتي غادي نمشي معاك .
مشاو بجوج للحانوت لي مكانش بعيد بزاف على العمارة واندهش جبل فاش لقاها واخدا سلعة بسيطة بلكريدي بحال لخبز ولحليب والزيتون .. وعاد تفكر بلي راه مشات بلحوايج لي لابسة ماداتش معاها لفلوس باش تصرف على راسها ..
خلص عليها كل داكشي لي كايتسالها مول لحانوت هادي اقل حاجة ممكن يديرها بما أنه راجلها ومن حقها يصرف عليها وينفق على متطلباتها ... تقضالها من كل شئ أي حاجة غاتحتاجها للكوزينة و للدار من حد حتى مواد التنظيف للجسم وللمنزل
مشاو هو وياه عند أقرب خضار وتقضا ليها لخضرة لي تكفيهم هي ونورسين جوج سيمانات وكثر .. وداز للفرماسيان خدا ليها الحقن ديال لاأنسولين ولاباراي باش تعبر السكر والفيتامينات ... وعمرو كولشي فلكوفر ديال سيارتو ووصل معاه جبل تقل حتى للعمارة .
خرجت روعة من الحمام وهي كاتنشف شعرها المبلول وكاتفكر بصوت مسموع :
- ااخ فقتاش تبرالي هاد رجل .. نورسين عيقت عليها ومول لحانوت شويا وماغايبقاش يبغي يعطيني سلعة بلكريدي .. ااش غادي ندير ياربي فهاد الوحلة حتى ماما منين غانجيب ليها فلوس العلاج وأنا دوا ديالي غير نورسين لي شراتو لي .
توقفت قبالة لمراية فاش جات عينيها على العقد فوق طاولة التزين لي فغرفتها .. هزاتو بين أصابعها فإنعكس لمعان أحجارو مع أشعة الشمس .. قرباتو من شفايفها وطبعت عليه قبلة شوق لصاحبو وهمست بصوت مخنوق :
رفعت عينيها شافت فإنعكاس صورتها فلمراية وكملت وكأنها كاتخاطب شخص أخر :
- ولكن محتاجة للفلوس ..
كلسات على السرير بتهالك وهمست بصوت ضعيف وهي كاتمسح وجهها بيديها :
- ياااربي دير شي تاويل دلخير يااارب.
ناضت من بعد بدلت حوايجها وهي كاتفكر ان عبد سلام تعطل عليها تقول مشا يخبز الخبز ماشي يشريه .. شافت فساعة ثم قلبت دورة باش تدخل للكوزينة لكن بالصدفة جات عينيها على هداك الضرف لي جابولها الكونسيرج .. هزاتو بفضول وقلباتو من برة لكن مالقات عليه حتى شي كتابة كادل على المرسل ديال هاد الظرف وعبد سلام قالها وصل بسميتك !!!!.
كلسات بفضول على الكرسي وغير فتحاتو وصلت لجيوبها الأنفية ريحة عطرو حتى قبل ماتجبد الورقة فـ همست بصدمة :
- جبل ...
تسارعت دقات قلبها وهي كاتجبد الورقة وريحتو توزعت بين أصابعها .. ضمت الورقة لأنفها وستنشقت عطرو ثم كتمت أنفاسها باش تخلي ريحتو تتغلغل داااخل أعمااق قلبها وهي مغمضة عينيها .. توحشات هاد العطر وشتاقت للمست إيدو ...اشتاقت لأحظانو ... اشتاقت لسحر نظراتو
إغفري لي قسوتي وظلمي لكي مرات ومرات . هاجمتك كثيرا بسبب وأحيانا بغير سبب. واتهمتك مرارا بدليل وبغير دليل ، شوهت كل تصرفاتك واتهمتك بالحماقة والتهور .مرات ومرات .. لم أترك لك فرصة أو وقتا للدفاع عن نفسك ...ولم التمس لك عذرا منطقي أو غير منطقي ..
هاجمتك وهاجمتك .. بل وتماديت في ملاحقتك واقحام نفسي حتي في شخصيتك ....وهذا كله أعترف لأنه سلوك ظالم وقسوة لا رحمة فيها .... وأعرف في كل ما فعلت أني قاسي عليك .... ومع ذلك لا أتراجع ....أعرف كل أعذارك وكل تصرفاتك ومنطق سنك وغرور أنوثتك ....
أعرف إحتياجك لأشياء أنت ترينها ضرورية وأنا أنكرها عليك . أعرف أنك أخذت في الهروب مني والإختباء خوفا من قسوتي وهجومي اللاذع عليك ...أعرف كل ما يدور بخاطرك نحوي ونحو الأخرين ...أعرف واعرف وأعرف .
وأحيانا أجد نفسي أنا الأحمق ولا أعرف شيئا ..لأني لو حقا أعرف ما كنت قسوت عليك . ولكن عليك أنت أن تعرفي شيئا واحد وأظنك تعرفينه .وإن شككت فيه أحيانا من فرط قسوتي عليك .
أني أحبك .... أحبك يا صغيرتي .
وأخاف عليك من أن تؤذي نفسك أو يؤذيك الجاهلين لقيمتك ....
أخاف عليك من علاقات تكسر أشياءا جميلة في داخلك أنت تمتازين بها عن كل أمثالك ....
كلماتي هاذه تكفيرا عن ماقلته فيه السابق مع حماقات وجرحت مشاعرك ...ثقي أني أحبك مهما كان حالك لأن حبي لك هو إنعكاس حبي لنفسي .... ولما لا وأنت مني ... جزء مني من إسمي من عقلي وكل كياني ...ايوجد في الكون من يكره قلبه أو يكره نفسه ....قد يقسو عليها ولكن لا يمكن أن يكرهها مهما كانت تشوهاتها أو عيوبها .
أحبك واقدر كل تصرفاتك ولن الومك ولكن أطلب منك بقيمة الأب وحنو الأم ورعاية الأخ ونصح الصديق المخلص ورجاء زوجك المحب لشخصك ... كوني مترفقة بنفسك وقدريها بقدرها ...
عندما تفعلين ستكوني الأروع والأعظم في بنات حواء ....
أرجوكي .... بكل الحب وبكل الفهم أناديك .لا تبتعدي ولا تتواري عني ... فانا المرايا التي تريك جمالك وعيوبك فلا تكسريها ....وتقبلي كل حبي وعظيم اعتذاري عن قسوتي .... واعدك أن أكون لك السند والمعين وبلا قسوه ...
ولـــكـــــن أيضا لن أخدع وأسكت إذا ما رأيت شيئا يحاول او يفكر ان يأذيك .لأني بعمري لو دعا الداعي فديتك .... يا بنتي وصغيرتي وصديقتي وحبيبتي وزوجتي وأم أولادي وكل شيئ لو تصدقي بالنسبة لي . فتقبلي اعتذاري وإستوعبي كلماتي ....
شتقتلك ياعمري ... ولك شتقتلك ياحمارة ."
شهقت روعة بعد إنتهاء حروفه والدموع على خدها والإبتسامة على شفايفها .. ماعرفتش واش تضحك ولا تبكي وهي كايقولها مازال ياحمارة ... لكنها توحشاتو وماكرهتش كون كان حداها غادي تاخدو فحظنها وتعنقو بقوة وتبكي على صدرو وتشكي عليه ..
مجرد كلمات منو خلاوها تحس بلي سندها رجع وهي لي هربت منو .. الكتف لي تقدر تحط راسها عليه كاين وهي لي هجراتو .. من بعد داكشي لي وقاع ليها مع جهاد حسات براسها وحيدة وضعيفة قدام خبثو ومكرو حتى أنها مابقاتش كاتخرج من دار بزاف الا للمستشفى عند ماماها وكاتكون معاها نورسين كاتوصلها وتردها ولا بعد لمرات الدكتور ياسر كايصر باش هو يوصلها لكن ولا مرة تجرأت باش تخرج بوحدها من كثر خوفها من الي مايتسمى جهاد وهي لا حول لها ولا قوة .. لا صحة باش دافع على نفسها ولا نفود باش تواجه المستوى لي وصل ليه من الثراء والشر .
قفزات غير سمعات صوت جرس الباب وأول حد جاها على بالها هو جبل .. نسات بلي رجليها مهرسة نسات أصلا بلي راه خانها مع باتريسيا وناضت وهي كاتنقز على رجل وجدة حتى وصلت للباب وهي كلها أمل تشوفو وطير عليه تعنقو .. لكن خاب ظنها فاش لقاتو غير عبد سلام واقف وكاينهش بتعب وموراه جوج ولاد صغار هازين فيديهم أكياس ثقيلة
- حلي لباب كاملة ابنتي حلييي
إمتثلت روعة لطلبو وكحزات من الباب وهي مصدومة وبقات حاضياهم بعينيها وهوما كايدخلو دوك صخاري للكوزينة وكاتحاول تستوعب الأمر حتى قاطع صدمتها عبد السلام وهو كايمد ليها بوكيه ديال ورد الجوري فاللون الأحمر .
خداتو من عندو بشوق ولاحظت بلي داخلو بطاقة فاللون الباج جبدتها روعة وقرات لي كان مكتوب فيها بخط يديه :
"توحشتك الويلة"
ماقدراتش تخفي إبتسامتها وفرحتها لكن قاطعها عبد السلام وهو كايسلمها ظرف أخر .
- هاكي ابنتي راه سي جبل خلالك حتى هاد الضرف حتى هو
خداتو منو وهاد لمرة كان ثقيل .. فتحاتو بفضول وتوسعو عيونها بصدمة فاش لقاتو عامر بلفلوس
- يااا الله .
تمتمت بيها بدون شعور ثم هزت عينيها فعبد سلام وقالت:
- فين هو .. واش غادي ييجي؟؟
تمسك عبد سلام بجنبو لي كان كايحرقو بقوة الثقل لي هز وقال :
- واش انا لي مزوج بيه ابنتي واااه على سؤال كيف داير
تنهد بتعب فاش لقاها كاتشوف فيه بحدة فتأفف وقال:
- يمكن يكون بيناتكم شي مشكل ولكن حاولو تفكوه دغيا راه مسكين بانلي عيااان ومريض بزاف.
ردت عليه روعة بريبة وخوف:
- كيفااش؟؟
- مسكين وجهو صفر وعينيه داخلين ..ماعمري شفتو فديك الحالة .. باينا فيه محتاج يرتاح ابنتي ونتي مرتو غاتعرفي كيف ديريلو .. هذا علاش نعلو شيطان وفكو هاد الخلاف لي بيناتكم
أشر بيديه للأكياس وكمل:
- ماخلاش من جهدو مسكين تقضالك من كل شي وخلص مول لحانوت من حد حتى دواء شراه ليك .. وزاد الورد ... شنوما دار ابنتي راه باينا فيه نادم حاولي تتفهميه وترجعو المياه لمجاريها ..
فاش لاحظ عبد سلام نظرات الحزن على وجه روعة تنهد وقال :
- واش كايضربك ؟؟ ..يعني واش هو لي هرس ليك رجليك ؟
مافهمتش روعة علاش لي شاف رجليها مهرسة كايقولها واش راجلك لي ضربك فالاول ماماها ودكتور ياسر ودابا عبد سلام .. تنحنح بإحراج فاش ماجاوباتوش وبقات ساكتة فقال بسرعة:
- يالاه خليت ليك راحة وبصحة لفطورك ابنتي ...
ضار عيط لدوك لوليدات لي طلعو معاه صخرا وقال :
- يالاه نتوما زيدو .
شعرت روعة بالإحباط .. كانت كاتمنى لو كان هو لي جاء بدل عبد سلام مدامو مسيفط ليها رسالة إعتذار وتصخر ليها داكشي كامل وهانو عليه جوج درجات .. لكنها فعلا رجعات فكرات لو كان هو بالفعل لي جاء كانت غادي طير عليه وتحشى وسط حظنو وهذا ماشي لصالحها بعدما خانها .. اه هي كاتبغيه وكاتموت عليه لكن ماشي حتى يدفع ثمن خيانتو .. فالرسالة هو عتاذر على الكلام لقاسي لي قالو فحقها وماعتاذرش على لخيانة ومابررش ليها الأمر واش هذا كايعني أنه مانادمش حيت خانها ؟؟
لكن جبل مستحيل كان يعتذر على حاجة مادارهاش .. هو ماخانهاش إذن ماغايعتاذرش .
وقف جبل سيارتو قدام واحد القهوة على الشارع العام وخرج .. كان فإنتظارو دون ماركيز وصخر .. كانو كالسين على برا فلاطيراس داوود كان كايشرب القهوة بينما صخر أتاي .
- سلام عليكم .
قالها جبل وكلس فالكرسي الفارغ .. ردو عليه بجوج السلام فقال داوود بإستفهام:
- نصحك تجي هاد الليلة تعشى معانا تشبع غير ضحك على داوود وهو كاياكل سقل من عند بهية وجميلة هاهاها
ماقدرش جبل يصبر وبدا كايضحك .. سبق ليه حظر لمحاظرات خوالاتو لي داائما كاتنتاهي بالضرب ولمعيور لكن سبب لي خلاه مايمشيش لدار خوالاتو هي "تاليا" .. مازال مانساش زبايلها ومازال ماقادرش يسامحها ... قاطع ضحكاتهم داوود وهو كايقلد ضحكهم بغيظ:
- هعهعهعهع بسالة كيف دايرا ... راه غير مكانبغيش نحكر عليهم وخلاص .
كتم جبل ضحكاتو وقال:
- طيب ياسي سيد .. فين هو السيد لي قلت ليك كلفو بمراقبة روعة ؟
هز داوود البراد ديال أتاي وكب كأس ثم قال وهو كايمدو لجبل :
- حيحيييم .. راه جاي فطريق .. بلاتي نصوني عليه .
جبد داوود التلفون باش يصوني عليه لكن حيحيم كان وصل فديك اللحظة شير لداوود فقطع الأخر الخط وناض من مكانو وهو كايقول :
- على سلامة اسي حيحيم فين هاد لغبور ؟؟.
تجاهل حيحيم وجود داوود وكأنه تكلم مع الحيط .. التفت عند جبل وصخر وقال:
- سبحان الخالق الناطق .. فولة وتقصمات نصين
تبادل جبل وصخر بعض النظرات الساخرة على وجه داوود لي تلون بسبب تصرف حيحيم .. علاش اعباد الله حتى واحد مكايدير ليه اعتبار واش تالهاد الدرجة بنادم مامأدبش ؟؟
- تفضل اسي حيحيم.
قالها جبل فإمتثل حيحيم لطلب جبل .. كلس ثم مد ليه يديه وقال :
- نقدم ليك راسي "عبد العالي حيحيم" محقق سابق متقاعد .
بادلو جبل المصافحة وكذلك صخر وقال جبل:
- سي عبد العالي .. كانظن بلي دون ماركيز كلفك بمهمةلـ..
قاطعو حيحيم بسرعة وقال :
- الله ياودي .. وانا نفدت لي عليا بزيادة
مع أن جبل كايكره بنادم لي كايطير من المقلة الى أنه تغاضى على تصرف حيحيم وقال:
- ايوا شكاتسنا .. هادي كثر من جوج سيمانات ونتا حاضي البنت .. قولي واش كولشي تمام ماشفتيش شي حاجة ماشي هي هاديك ؟.
قبل مايلحق حيحيم يهضر نطق داوود وقال :
- اش غادي يشوف اولد ختي .. روعة راه مسكينة ما..
قاطعو حيحيم وقال بأسلوب فض:
- اولا هاد البنت شنو كاتجيكم ؟
رد عليه صخر وقال :
- روعة هـ...
إنتبه صخر لنظرة جبل الحادة فتنحنح وكمل:
- هي مرت خويا .. مرتو
إلتفت حيحيم لعند جبل وقال وهو رافع حاجب واحد :
- واش كنتي شاك فيها بلي كاتخونك ؟
نقز داوود وقال بسرعة قبل مايزبلها ويزيد يكفس علاقة روعة وجبل كثر ماهي مكفسة :
- حيحيم شكاتقول ؟
إلتفت حيحيم لعند داوود دار فيه نظرة المحقيقين الماكرة وقال بحدة:
- سي داوود خليني نهضر مع العميل وبلاما تحشر راسك فلوسط.
تسمر داوود أمام جرأة حيحيم وكان كايبان ليه غير يهز داك لبراد دأتاي سخون ويكبو عليه لكن حيحيم تجاهل أمر وشاف فجبل وقال:
- واش شاك فيها كاتخونك ؟
رد عليه صخر بحدة ماهي صديقتو ولو مكانتش مع خوه مكانش غايتردد ولو للحظة أنه ياخدها ويحبها ويتزوجها كاع وهاد شارف خايد غير كايدور فعينيه بطريقة عصباتو .. :
- شوف فيا نتا .. هاديك لي كاتهضر عليها اشرف من الشرف
هز حيحيم يديه بإستسلام وقال وهو كايبتاسم بمكر:
- تانا ماقلت والو .. كان مجرد سؤال.. حيت أنا ملي شفتها مع داك راجل قلت واش شاك فمرتو كاتخونو
ضربت كلمة رجل فودن جبل بحال البرق فعقد حواجبو وفقال بفضول قاتل:
- شكون هاد راجل ؟
ولد اللذينة قبل اسبوع طلاقا مع دون ماركيز ووراه شي تصاور ديال روعة مع دكتور ياسر واش دار داوود قطع صور وقال ليه ماتحيبش سيرتهم لولد ختي وغلق هاد الموضوع واشنو كايحاول يدير هاد شارف عاوتاني !!!
شاف حيحيم فداوود بخبث ماهو ماصورش دوك صور باش فلخر يقطعهم خصو يتخلص عليهم مقابل تعبو ..والى ماخلصوش داوود جبل لي غادي يخلصو ..
جبد ضرف من جيب معطفو الأسود ثم حطو فوق طبلة أمام جبل وقال :
-هاد سيد جبت ليك عليه كااع المعلومات ... سميتو ياسر البناني فعمرو 40 عام خدام طبيب ومختص فأمراض الرأس .
ضيق جبل عينيه كايحاول يتفكر هاد لإسم لي سبقلو تعامل معاه فقال بصوت منخفص مخاطب نفسو:
- قلتي ياسر !!..
رد عليه داوود بسرعة وهو كايحس بالتوتر :
- ياسر هو الدكتور دماماها .. هو لي كايعالج نسيبتك اولد ختي
رفع جبل عينيه شاف فداوود بحدة ثم حول أنظارو لحيحيم وقال:
- قلتي شفتيها معاه ؟؟
أومأ حيحيم براسو وقال بسرعة وحماس:
- اه كايجي عندها تالدار ... وفداك الظرف عندي الصور ديالهم .. انا وريتهم لسي داوود لكن هو قالي ماشي مهمين وغير قطعهم
هز جبل الظرف من على الطبلة وهو كايغلي من داخل فاش قال ليه بلي كايجي عندها حتى لدار .. لي كايعرف هو أن طبيب كايبقى فالمستشفى أش وصل هاد لحبس ديال ياسر عند مرتو لوسط دارو ..
جبد دوك صور كاملين وبدا كايمررهم وحدا مور وحدا ويحطهم على الطبلة بينما صخر كايهزهم ويشوفهم ويدوزهم لداوود لي كان باغي يقتل حيحيم بعينيه وكايتحلف فيه .. تأفف داوود بسخط وقال:
- راه دكتور ماماها اولد ختي
رفع جبل عينيه فداوود بنظرة قاتلة وزمجر وهو يصك على أضراسه بوحشية:
- كايجي عندها تالدار اداوود .
تأفف داوود وقال:
- انا قلت ليك خليني نجيبها تكلس عند خوالاتك ونتا لي يبستي راسك .. دابا بلاما تبدا تأول وشيطان يلعب ليك فراسك يكفي غير داكشي لي داز.
بدا حيحيم كايمد ليه وحدا بوحدا والى ماشافش شي وحدا كايمدهالو باش يحقق فيها حتى طار عليه داوود حيد ليه الصور من يديه وغوت:
- ارا نتا دوك تصاور لهنا .
لكن صورة لي بقات فيد جبل هي الصورة ديال روعة وياسر فاش كانو داخلين للقهوة وهي كانت شاداليه فيديه.. ماحسش جبل بنفسو حتى كمش الصورة فيديه وتمتم بغضب قاتل
- ياااااك اروعة
لو كانت حداه مكانش يضمن راسو واش غادي يصبر عليها ولا يجمع معاها بضربة حتى يدخلها فالحيط .... خطف ليه صخر الصورة من يديه وهو كايقول:
- ارا نشوف .
الصراحة حتى هو ماعجباتوش لوضعية لي كانو فيها كانو كايبانو بحال كوبل ظريف ولحق يقال كانو مواتين بعضياتهم ..لكن فاش شاف فوجه خوه لي ولا حمر من شدة الغضب والغيرة تنحنح وقال باش يخفف عليه شوية:
- عادي .. رجليها مهرسة وعاونها باش تتمشى .. واش مالاحظتيش بلي عندها غير عكاز واحد .. مايمكنش غادي تتمشى حدى الشيد وهي كاتنقز وهو غير بغا يعاونها .. نتا كون كنتي فبلاصتو كنتي غادي دير نفس الشئ سواء مع روعة ولا مع أي شخص كان.
وافقو داوود الراي وقال :
- اه صخر عندو الحق ..
قاطعو حيحيم وهو كايمد لجبل صورة :
- وشوف حتى هادي.
لكن قبل مايلحق يشدها منو جبل طار عليها داوود خداها وكانت الصورة داخل المستشفى وكان ياسر هاز روعة بين يديه وهي كاتشوف فيه وكانو قراب لبعضياتهم بزاف .. الصراحة الصورة كانت معيقة هو براسو ماعجباتوش لكن مع دالك تنحنح بتوتر وقال:
-احم شفتي هنا كون ماشدهاش كون طاحت شفتي .. شوف مزيان
خطف جبل الصورة من يد داوود بغضب فكمل داوود كايقول بصوت متوتر:
جبل فديك اللحظة لو كان أمامو ياسر .. كان غادي يجمع يديه ويشتت ليه سنانو وأقسم على ذلك فنفسو ...واش هو لي راجلها فاش كايهزها بديك الطريقة كايبغي ياكلها أكل من لطافتها فكيف غايكون حس رجل غريب عليها وهو هازها .. تمعن فكل تفاصيل الصورة شعر روعة لي كان كايلامس يدين ياسر ولا جسمها الضعيف لي معنقو هو لصدرو .. كان باغي يموت والله ثم والله لو كان فديك اللحظة أمامهم لقتلهم بجوج وأداقهم أشد عذاب .
كان صخر حاس بالنار لي شاعلة فخوه فبدا كايقلب بين الصور على الله يلقى شي وحدا يبرد بيه عليها .. هو راه مجرب غيرتو على روعة وشحال كلا ديال لعصا من عندو بسببها ..بقا كايقلب حتى طاح على صورة كان فيها ياسر كايحط روعة على الكرسي المتحرك :
- اه هانتا شوف هاهو حطها فالكرسي المتحرك يعني ماقدراتش تمشى على رجليها راه باينااا
وكمل داوود وهو كايدفع فحيحيم باش يمشي بحالو قبل ماتوقاع شي موصيبة بسببو :
- سي حيحيم تقدر تمشي ولد ختي صافي رجع وفلوسك غادي نحول هوم ليك لحسابك مابقيناش محاجين ليك .
دفع حيحيم يد داوود بغيظ وقال:
- ولكن انا مازال ماقتش كولشي !.
تمتم داوود بزعاف:
- انا فين كان عقلي نهار شفتك اولد لكلبة .
وكمل بصوت عالي وغاضب:
- اصلا مكاين لاش تقول .. واش صورتيها عاود وهي غاديا للمارشي ولا غاديا لعند مول زريعة .. بانلي فرحان بكاميرتك
إعتدل حيحيم فجلستو وقال بمكر وهو كايشوف فجبل
- لا ... انا صورتها وهي غاديا لواحد البار مشبوه
كرر خلفو جبل بصدمة وهو عاقد حواحبو:
- بار مشبوه
جبد حيحيم ضرف أخر من جيبو وقال وهو كايمدوليه:
- ايه هانتا هاتصاور
فتح جبل الضرف بسرعة وبدا كايشوف فالصور ويلوحهم فوق الطبلة ودون ماركيز كايهزهم موراه وكايقول :
- هانتا كانت معاها نورسين اولد ختي يمكن .. يمكن نورسين كان عندها شي غرض تما ؟؟
قاطعو حيحيم وقال :
- فاش نزلو من السيارة كانو كايبانو بحالي تالفين وبقاو كايهضرو مع الكارد لمدة ومن بعد دخلو وفاش خرجو كان كايبان الخوف على وجههم و مدام روعة كانت كاتبكي ووجهها حمر هانتا شوف هاد تصويرة
بالفعل الصورة كانت فيها روعة كاتبان متأثرة وكاتبكي وصورة أخرى نورسين معنقاها وبحالي كانت حاتحاول تسكتها وهذا ان دل على شئ فهو كايدل على ان روعة مشات لتما ونورسين غير مرافقاها .. جبل فديك اللحظة كان غادي يقتلو لفضول لمخلط بالغضب .. هز عينيه فحيحيم وقال بصوت كالرعد:
هاد لمرة صخر لي كان باغي يقتل حيحيم ومازال كايكفسها ويقول دعارة .. شاف فجبل وقال :
- ماتسرعش اجبل .. حتى تسمع منها .
رد عليه بجل وهو كاينوض من بلاصتو:
- ماشي منها ؟؟.
ناض حتى صخر وقال بريبو
- اشنو كاتقصد ؟ .. فين غادي ؟
توقف جبل ثم ضار عند صخر وقال وهو كايغلي من داخل بالفقصة:
- غانقلب على نورسين
هز صخر سوارتو بسرعة وقال وهو تابع جبل :
- تسنا انا غادي نجي معاك .
وقف داوود وجبد لفلوس من جيبو دبال اتاي ولقهوة وحطها على الطبلة ثم جا خارج باش يلحق عليهم لكن حيحيم شد فيه وقال:
- فين هوما فلوسي
ضار لعندو داوود وعينيه كايقطرو بالعافية وزمجر:
- علاش ماوريتينيش دوك تصاور لوخرين هااه؟؟
هز حيحيم أكتافو بغير إهتمام وقال :
- حيت فاش قلت ليك على تصاور لولين قلتيلي غير قطعهم .. نتا ماواخدش لأمر بجدية هذا علاش خليت لمعلومة لاخرى لصاحب دعوتو ولي هو ولد ختك .
نتر داوود دراعو وزمجر بغضب قاتل وهو كايشوف فحيحيم :
- تحرك من قدامي
- ولفلوس
رد عليه داوود وهو خارج من القهوة:
- غايوصلوك فحسابك ومانعاودش نشوف وجهك .
وقفت سيارة جبل أمام العمارة لي ساكنة فيها روعة .. ماكرهش فديك اللحظة يطلع كايجري لعندها يهرس عليها الباب ويهرس لي جاه فطريق حتى هي بنفسها .. كان كايحس بالبراكين كاتغلي فداخل ديالو .. فالأول هاداك لي مسمي راسو دكتور ياسر كاتشد فيه وكأنه مزوج بيها و من بعد خارجة من بار مشبوه بالدعارة بلا حشمة بلا حياء .
لكن وسط داك الشوشرة والغضب مابغاش يتهور وتحكم فأخر فتفوتة فأعصابو ومابغاش يواجهها قبل مايتأكد .. خاف يدير شي خطوة صعيبة ومن بعد يكتاشف شي حاجة ويندم ندم ماينفع بعده ندم .. مابغاش يتسرع كيما دار فالأول فاش خرجات مع لبنات بلا خبارو .. كون مانفاعلش داك نهار عليها كون راهوم دابا مزيانين وسمينة على عسيلة .
كان صخر كالس قبالتو وكايشوف فيه .. ماقدرش يهضر حيت عارفو معصب ... هو لو كان مكانو مكانتش ردة فعلو غادي تختالف بشكل كبير على خوه .. الغيرة ساكنة ليهم فالدم وهي عربون رجولتهم وحبهم .
فتح جبل باب السيارة ونزل وبسرعة تبعو صخر وتمشاو حتى دخلو للعمارة وغير شافهم الكونسيرج عبد سلام ناض من مكانو وبقا حال فمو فيهم ..
- سي عبد سلام .. واش روعة فدار .
رد عليه عبد سلام وهو مرفوع:
- سبحااان الله ... كاتشابهو بزاااف .
لكن أعصاب جبل ماكانتش مستحملة فقال بصوت غليض وغاضب:
- سي عبد سلام راني هضرت معاك ؟
تنحنح عبد سلام وقال بإحراج:
- اه سمحلي .. سولتيني على روعة لا ماخرجاتش اولدي وراها سولات عليك .. قاتلي واش ماغايرجعش ؟.
مع أنه فرح شوية حيت سولت فيه إلا انه كان مازل باغي ياكل ريتو بالفقصة جبد صورة ياسر ومدها لعبد سلام وهو كايقول :
- واش هاد بنادم كان كايجي لهنا ؟؟
تحقق عبد سلام من الصورة ثم قال:
- اياااه جااا شحال من مرة ... فاش كانسولو شنو بغيتي كايقولي باغي نشوف لالة روعة
فتح جبل فمو باش يهضر حتى قاطعاتو صاحبة دعوتو ..
دخلت نورسين من باب العمارة وغير شافتو هو وصخر صفرت بفمها وقالت بسخرية :
تمشى لعندها جبل بسرعة شدها من دراعها وجرها موراه للزنقة بغضب متناسي انها حاملة كان باغي يتناقش معاها و يتفاهمو على رواق .. لكن بالنسبة لنورسين هاديك طريقة همجية ماعندوش الحق يعاملها بداك شكل شكون مابغا يكون فغير طلق منها جمعات يديها وضرباتو لصدرو بيديها وهي كاتغوت :
تحسس جبل مكان الضربة بيديه ومارضاش قبالة صخر لكنه يعترف بلي الغضب عماليه عينيه وتصرف معاها بوقاحة .. غمض عينيه باش يسيطر على أعصابو ثم قال :
- كانعتاذر .. سمحيلي راني معصب شويا
دلكت نورسين دراعها بألم وقالت:
- سير فك غضبك فشي حيط نطح راسك معاه ... على بشار كيف داير مادير خير مايطرا باس .. ولا ياكما معلي علينا زنافرك لسما حيت تكرمتي علينا بدارك ... كون يحسابلي غاتجي وتعامل معايا بهاد الهمجية كون ديت روعة لشي بلاصة اخرى بدل مانجرجرها معايا لهاد لعمارة دلأشباح.
شاف فيها جبل بدهشة وقال:
- واش روعة عرفت بلي هاد العمارة ديالي ؟.
- ماعرفتش ولكن دخلها شك فالأول وبسيف باش قنعتها بلي غير مرزوق لي تكرم علينا وراه باااينا للعمى فضلمة لمكلخ وغايفهم
فداك صبااح وقبل مايوصل المركب للمغرب صونا جبل على تلفون نورسين وفيقها من النعاس .. طلب منها باش ماتفرقش على روعة وتحميها الى تطلب الأمر وطلب منها تقنعها تمشي للعنوان لي غايعطيهم برهان بلاما تكشف لرةعة بلي دار ديالو حيت كان عارفها ماغاتقبلش تمشي ليه .. فالاول نورسين رفضت لكن مع إلحاح جبل وتوسلاتو وافقت باش تعاونو بشرط أنه يبعد عليها أسد ومايعطيهش عنوانها .
جبد جبل الصورة من جيبو ومدها لنورسين فقالت بإستفهام وهي كاتشدها منو :
- شنو هادي ؟
ربع جبل يديه لصدرو وقال:
- هادي صورتك نتي ونورسين بعدما خرجتو من داك لبار .. قوليلي انورسين شنو مشيتو ديرو تما ؟
نفثة نورسين الهواء من انفها وقالت بسخط:
- كنتي داير جاسوس حاضينا .
حمر فيها جبل وقال:
- جاوبيني على سؤالي .
ردت ليه نورسين الصورة وقالت:
- هداك غير فوطو شوب .
قاطعهم صخر من الخلف وهو هاز تلفون فيديه :
- جبل .. أسد كايصوني عليا .. من صبح وهو كايسولني على العنوان فين ساكنة روعة ونورسين شنو نقول ليه ؟
طارت لعندو نورسين وبغات تحيد ليه التلفون من يديه وهي كاتغوت:
- واياااك تعطيه لعنوان
لكن صخر رفع يديه للسما باش ماتلحقش تلفون وقال بمكر:
- علاااش مسكين راه كايقلب عليك فكل قنت من نهار عرف بلي راكي حاملة وسيد خرج ليه لعقل .
شهقت نورسين بصدمة وغوتت :
- كيفاااااش ؟؟؟.
- واش نعطيه عنوانك ؟؟
بدات كاضربو لصدرو وتغوت بغيظ:
- لاااااا ... مشاكلي مع راجلي خليكم بعادين عليهم
تكى جبل على لحيط وبدا كايتفرج فيهم وهوما مقاتلين .. صراحة عجبو لحال فاش تدخل خوه وبغا يعانو باش يطلع المعلومات من نورسين لي دايرا بحال لبير والله مايطلع منها لكلمة الا لاكان شاد عليها شي زلة .. وحاليا أسد هو النقطة لي يقدر يستغلها فهاد الضروف وهاهو صخر قايم بالواجب ..
كان صخر كايحاول يبعدها عليه وكابقول بمكر:
- ولكن انا ماشي هو جبل .. انا مكاندير حتر حاجة فابور .. عطي وخود .. الى بغيتي نتستر على مكانك ومانقولهاش لأسد غادي تقولي لينا شنو مشيتو ديرو نتي وروعة فداك لبار ؟
جمعت معاه نورسين بركلة لمؤختو وغوتت :
- وليني راك انسان خبيث وإنتهازي
حك صخر فمكان الضربة وقال وهو كايضحك:
- شكرا على المجاملة امدام نورسين .
تنهدت نورسين بتعب وقررت تستسلم .. صخر ولات كاتعرفو مزيان غادي يهبلها هاد نهار وهي يالاه وصلت من الخدمة ومهدودة وعيانة خصها غير ترتاح .
-صافي واخا ... غادي نقول ليكم علاش مشينا لتما ولكن ماشي خوفا منكم ..... لا حيت خايفة على روعة مسكينة من داك المجرم
البارون الأعظم الجزء 95 إغفري لي قسوتي
محتوى القصة
التنقل بين الأجزاء