المتصل : هادي غير البداية ناي درتي اخطاء في الماضي جا لوقت باش التعاقبي عليها
رجعات لحاضر وهي كتوعد لهداك الشخص بالانتقام دازت هاد اليلة وجا نهار جديد
كان جالس في المكتب دخل عندو المساعد ديالو
المساعد : سي حسام جبت ليك لمعلومات لي طلبتي
حسام (دار ليه اشارة باش يدوي )
المساعد : ماشي شي حاجة مهمة لكن كتاشفة انو مكانش في برا وانما سي قاسم الله يرحمو مكان كيعرف عليه والو وملي كتاشف ان صلاح ماشي ولدو لحقيقي وان عندو ولد معارفوش 25 عام كلف المحامي باش يقلب على ولدو وكتب وصية سرية كوهب فيها ليه كل ممتلكاتو
حسام (كيدور بلكرسي) هدشي كلو وماشي مهم عندك
المساعد :احم يعني... نقدر نفيدك بشي حاجة خرا
حسام : كيفاش سي قاسم عرف بلي صلاح ماشي ولدو وكيفاش لقى ولدو لحقيقي .... قاسم ولد مرأة خرا هدشي واضح ولكن مكنضنش ان الام ديالو بالدكاء ديال حياة
المساعد : غادي نزيد نتعمق في البحت اسيدي ونعرف
حسام : ليوم قبل غدا فهمتي وبغيتك تعرف ليا حياة وصلاح فينهم وشنو كيخططو
المساعد : واخا اسيدي كون هاني
حسام : يلاه خراج(ناض وقف قدام الشرفة لي مغطيا بالزاج وهو كيفكر) طلعتي عندك اسرار اسي قاسم... مساهلش
تحل لباب ودخلات شاف فيها
حسام : شنو كديري هنا
نور : حتا انا عندي حق في الشركة ديال الاب ديالي او لا متنساش انو عندي نسبة من الاسهم
حسام (ضحك) ههه %10 حتى هي كتسميها نسبة معندكش حق لى في الامضاء ولى في اعطاء الكلمة ديالك
نور : ولكن عندي الحق نحضر الاجتماعات ونكون في جنب ختي
نور (قربات من ليالي) لا مغاديش نمحن راسي انا بغيت تكون عندي يد في الشركة ديالنا او لا اختي
ليالي : اه من حقك .....عادي
حسام : ايوا نتي تعرفي عنداك غير متقدريش وتنساحبي
نور : متخافش صبري طويل
ليالي : ايمتى غنبداو في المشروع الجديد
حسام : نبداو ليوم بما ان ختك المصونة قررات تدخل راسها وهي هنا اذا غتمشي تحضر معانا للاجتماع
نور : اه علاش لا
ليالي : احم اذا حنا لي غنمشيو لشركة العماري ماشي قاسم لي غادي يجي.. اا. بغيت نقول سي قاسم العماري
حسام : سي قاسم هو لي تكلف هاد المرة بغا الاجتماع لي غنوضحو فيه نقط الانطلاق يكون عندو في الشركة ومن بعد غيكون مصرح انو يجي في اي وقت وحتى حنا نقدرو نمشيو لشركتو في اي وقت
نور (سمعات قاسم رجع بالها لبعيد) لا ميمكنش يكون هو
حسام : انسة نور ياك ما تراجعتي
نور : لا بلعكس انا غير ما زاد الفضول ديال نتعرف على شريكنا
شافت في ليالي لي بعدات عينيها عليها باش ميفضحوهاش
خرج من المحكمة من بعد متعلن الحكم لصالحو من الجلسة الاولى بدليل قااطع لي كيتبت ان صلاح ماشي ولد قاسم وماشي خوه
صلاح : سمعني مزيان مغاديش نسمح ليك تاخد مني شي حاجة كانت ديالي لمدة 24 عام فهمتي
قاسم (دار ضحكة استهزاء) ورينا جهدك (شاف في حياة لي كانو مخرجينها لبوليس مع لمحامي موراه ) بسلامة امرات الواليد
حياة : غادي ندمك فهمتي غادي ندمك
طلعوهم لسطافيط وهو مشى ركب في سيارتو لقاها كتسناه
ايمان : مبروك
قاسم : علاش درتي هاكا انا مبغيت نضر حتى شي حد بغيت غير نحافض على حقي وصافي
ايمان : الى متشداتش في الحبس غادي تبقى تخطط وتبرزطك في حياتك واصلا هي دغيا غادي تفلت منها لمهم على ما قاديتي شغالك وتبتي في بلاصتك ميكونش عندك شي عدو لي كيلهيك
قاسم : وصلاح
ايمان : صلاح مكيشكلش خطر هي لي كانت كتسيرو
قاسم : كيفاش قدرتي ديري تحليل تبت النسب
ايمان (بتاسمات) كلشي ساهل في هاد الدنيا كاين جوج حويج كيغريو لفلوس ولبنات..... صلاح دوز ليلة مع بنت انا لي سيفطتها ليها عطيتها لفلوس وهي جابت ليا الشعر ديالو باش درنا التحليل بينو وبين باك لي تبت انو ماشي ولدو ودرنا التحليل بينو وبين حياة لي كذالك تبت انو ماشي ولدها وكانت سينين وهي كتنصب على قاسم الاب ديالك الشي لي خلى المحامي يطالب المحكمة باش تعوض الضرر لي سبباتو ليك والاب ديالك ومحاسبتها على افعالها الشيطانية
قاسم (كيشوف فيها) والله مكين شي شيطانة قدك ..... وكيفاش جبتي العينة من حياة
ايمان (بتاسمات ورجعات بداكرتها لور ملي عطات للخدامة لفلوس باش تجيب ليها فرشاة السنان لي كتستعملها حياة) قلت ليك كلشي كتحلو لفلوس لمهم انت ركز على المهم
قاسم : بديت كنخاف منك ههه
ايمان : الواحد هو بي يخاف على راسو ههه ....وصلنا لشركة عندك اجتماع من دابا نص ساعة
قاسم : اوك.... ايمان
ايمان : وي
قاسم : شنو رأيك نحتافلو بهاد البداية
ايمان : اه علاش لا .... في لعشيا ؟؟
قاسم : حدا لبحر
ايمان : صافي ملي تكمل خدمتك عيط ليا
نمشيو عند تورية ملي تخطبات لقاسم وولات عايشة معاهم في نفس الدار طلب منها باش ترجع تكمل قرايتها وتعمر وقتها حسن من الجلسة في الدار وحتى هي عجبها لحال حيت فكر فيها وفي مصلاحتها واي حاجة طلبها منها كتوافق بلى تردد تسجلات في مدرسة ولى الشيفور كيوصلها تعرفات على صحابات جداد
ليالي (دخلات عليه للمكتب) حسام كنضن وصل وقت الاجتماع
حسام (خدام في لبس هز راسو فيها ورجع شاف في الساعة) اووف ميمكنش
ليالي : شنو كاين
حسام : عندي شغل مهم ونسيت دابا عاد فكراتني المساعدة..... عرفتي شنو سيري نتي وختك
ليالي : ولكن... كنضن الوجود ديالك ضروري
حسام (ناض وجا عندها) كيفي كيفك امراتي العزيزة وزيدون مزال اجتماعات اخرا ....انا مشيت دابا تنتلاقاو في الدار
خرج وخلاها واقفة كتفكر زادت جوج خطوات وجلسات فوق لفوطوي مشى بالها لبعيد للماضي نهار لي غادين يحيدو ليها البانضة على عينيها باش يشوفو العملية واش نجحات
#فلاش باك #
ليالي جالسة فوق الناموسية ولبانضة على عينيها ليوم تالت نهار من بعد العملية كان خصها تحيد لبانضة لبارح وهي رفضات بحجة باقة ممستعداش لكن كانت كتسناه من نهار لي خلاها باش دخل لعملية مبقاش رجع وحتى الهاتف ديالو طافي
رانية : بفف والو ا ليالي والو عيت منصوني عليه من نمرتك ومن نمرتي انا ومشيت حتى للحومة ديالهم وقالو لي يوماين مبانش لا هو ولا مو
ليالي : ولكن هو واعدني واعدني غيكون هنا وغنشوفو ...زعما يكون ....لا مبغيتش نفكر في هدشي هو واعدني
بداو دموعها كينزلو من وهي كتحس بلحريق في راسها
رانية (عنقاتها وكتمسح ليها في دموعها) شنو كديري واش حمقتي راك يلاه دايرة عملية باغة تخرجي على راسك حبسي لبكا هو اكيد ميستاهلش هاد الدموع لي غادين ينزلو من عينيك على ودو
ليالي : قلبي كيضرني كنحس بشي حاجة ماشي هي هاديك هئ هئ حتى نهار جا باش يشوفني اخر مرة حسيت بيه فشكل زعمة كان باغي غير يضحك عليا ويستغلني وملي عرف اني غادي نولي نشوف تخلى عليا...... لا ميمكنش هو لي حفزني باش ندير هاد العملية هو لي عطاني الامل هئ هئ
تحل لباب ديال لغرفة ودخل الدكتور مع شوقي ومريم ونور
الدكتور : بنتي كنضن خديتي وقت كافي خصنا نشوفو النتيجة ديال العملية
رانية (شدات وجهها بين ايديها) ششش صافي نتي دابا قدام حادت غادي يغير حياتك يلاه خودي لقرار وخوي دماغك ليوم غادي تولدي من جديد نساي لماضي وبداي من هاد اللحضة
نور (جات حداها) ختي يلاه سربي خليه يحيد لبانضة باش نعرفو النتيجة انا متحمسة
مريم (دموعها بداو ينزلو خايفة لبنتها تصدم عاوتاني كانو دارو عملية قبل ومنجحاتش ودابا لمنجحاتش غتزيد تسوء الامور شدات في شوقي بحال الى كتقوليه طمأنني)
ليالي (خدات نفس عمييق) واخة تفضل دكتور الدكتور (قرب منها وبدا كيفك لبانضة وكلشي متوتر كيتسنى) بقاي سادة عينيك تنقول ليك حليهم وحليهم بشوية
ليالي حركات راسها بأه
الدكتور (كمل لبانضة وحيد واحد لسقات من على عينها) احم حلي عينيك بشوية ومتصرعيش واخا يبان ليك ضلام فلول
ليالي بدات كتحل عينيها بشوية حتى حلاتهم بقات مدة وهي كتشوف فنفس الاتجاه مريم شهقات وبدات كتبكي
ليالي : ماما علاش كتبكي مكتبانيش زوينة بالدموع
شوقي (فرح وجا حداها ) ليالي... بنتي
ليالي (حطات ايدها على وجه باها) ولى فيك الشيب ابابا ههه
عنقها وبدا كيبكي
شوقي : بنتي بنتي مبروك عليك ....مبروك علينا كلنا
رانية ونور تعانقو وخا مكيحملوش بعضياتهم
الدكتور : مبروك عليك...... ممكن تخرجو عافاكم باش ندير ليها شي فحوصات
نرجعو للحاضر حسات بشي ايد تحطات عليها فيقاتها من سهوتها
ليالي : ها شنو كاين خلعتيني
نور : فين حسام ياك قلتو عندكم اجتماع راه هدا هو الوقت
ليالي : اففف نسييت يلاه نمشيو راه بقات غير خمسات دقايق غنمشي غير انا وياك حسام جاه شغل ضروري ومشا
نور : اجي لهنا.... جاه شغل ولى صدرتيه
ليالي (بستغراب) كيفاش ....مفهمتكش
نور (ببتسامة) والو غير كنضحك معاك كيف لهادة
ليالي : ماشي وقت ضحكك دابا يلاه زيدي قدامي
نزلو بجوجات ركبو في السيارة ديال ليالي باش يمشيو لشركة نور دخلات لانتيرنيت من تيليفونها ودارت بحت على قاسم العمراني وملي شافت تصاورو تأكدات انو هو رجعات بذاكرتها للماضي نهار عرفات ختها عندها علاقة بيه
#فلاش باك #
كان جالس حدا لبحر كيتسناها كيف لعادة من بعد مسيفطات ليه ميساج بصوتها في ليل بانت ليه جايا من لبعد دايرة نضارات كحلين لكن ملي ركز النضر ديالو هادي ماشي طريقتها فلمشي وحتى انها مديراش العصا وممعاهاش الكلب محدها كتقرب وعلامات الاستفاهم كيبانو قدامو حتى وصلات حداه وحيدات نضارات هادو ماشي عينيها كانت نور
نور : واش انت هو قاسم ياك
قاسم (معرفش باش يجاوب تفاجأ بزاف من الشبه لي بيناتهم عرف انها غتكون ختها حيت هي عاودات ليه عليها لكن شنو جابها وفين ليالي معرفش شنو يقول بقى غير ساكت )
نور : باين هو انت اكيد كتقول انا شنو جابني مورا ما ليالي سيفطات ليك ميساج بصوتها و هي لي كان خصها تجي ...انا لي سيفط لميساج من تيليفونها وصوتي ماشي بعيد من صوتها
قاسم : ولكن علاش شنو السبب
نور : باش نقول ليك غادي تفرق عليك ختي فهمتي انا عارفة مزيان انك كتستغلها وكتستغل ضعفها وباغي ضحك عليها حيت الاشكال لي بحالك معروفين وحتى لكنتي كتبغيها بصح فغادي نصحك شوف مستواك وشوف مستواها هي مستحيل يكون تشابه فهمتي نتمنا تكون كتفهم بلكلام وماشي بطريقة خرا
قاسم (ولى كيغلي من لداخل مكرهش يجمع معاها بشي طرشة شنو عارفة هي اش غادي يفهمها في علاقتهم في حبو ليها كبت الغضب لي فيه وجاوبها ببرود) في الصراحة طلعتي بشع من لي وصفاتك ليالي علي الاقل هي كانت ملي كتوصف صفاتك الخايبين كتقول ان لداخل ديالك زوين ولكن انا بان لي بلي لداخل ديالك كلو انانية وحقد
نور : حتى واحد مسولك على رأيك فيا ااخر حاجة هي نتسني من واحد بحالك يقيمني لكلام لي عندي قلتو الى كنتي باغي ضحك علي ختي غادي ندمك وحتي لكنتي كتبغيها غير صرف نضر عليها حيت صعيب تحافض ليها علي نفس لعيشة ولمستوى لي هي فيهم وعاد نزيدك واحد الخبر اخر... ليالي راها مخطوبة
هاد الخبر نزل عليه بحال الصاعقة مشات وخلاتو مرفوع كيفكر فكلامها لي جاه منطقي من واحد الناحية
نرجعو لحاضر فاقت من تفكيرها ملي وصلو قدام الشركة نغزاتها ليالي
ليالي : يلاه نزلو فين غايبة نتي
نور : مخفتينيش نعرفو شكون
ليالي (بتردد) شكون
نور (ببتسامة جانبية) حبيبك لقديم... قاسم واخا تبدل وتنقى ولكن عرفتو
ليالي (خدات نفس عميق) نور انا وقاسم شحال هذا سالينا وانا دابا مزوجة... معرفتش كيفاش وقع ولكن القدر رجع جمعنا وتلاقينا بالصدفة في الشركة من قبل لان هو شريك في المشروع الجديد وحنا كتجمعنا دابا غير لخدمة نتمنى تصرفي حتى نتي على هاد الاساس وتحيدي شي افكار اخرا من بالك .... واخا
حلات لباب ونزلات وتبعاتها نور وقفاتها
نور : بغيتيني نتيق كلامك ياك.... الشخص لي علي ودو قطعتي علاقتك بيا ونهار شفتي مشفتيش في وجهي بغيتيني نصدق انك وبسهولة غتجمعي نتي وياه غير على لخدمة
ليالي : نور هنتي قلتيها علاقتنا عاد بدات كتحسن الله يخليك متحاوليش تدخلي في حياتي وانا ماشي مدطرة نعطيك تقرير على لي كيوقع معايا نتي عرفتي شنو عشت ومناش دزت وها انا دابا كنعيش حياة جديدة من غير لي كنت عيشاها نتي كتعرفيني مزيان وكتعرفي مستحيل اني نسمح لشخص تخلى عليا مهما بغيتو ومستحيل نخون شخص وقف معايا في اصعب لي الاوقات لي قاسم عطاني فيهم ضهرو ومشى.... انا ميمكنش نخون حسام يمكن حنا مكنبغيوش بعضنا لكن انا كنحتارمو وكنحتارم تعاملو معايا كيف كان لانو و لحد الان عمرو مأداني بلعكس وقف في جنبي وحماني من شحال من حاجة..... ودابا ممكن نطلعو لخدمتنا ونسدو هاد الموضوع
ليالي كملات كلامها ودخلات لشركة ونور تبعاتها وهي كتحاول تقتانع بكلامها وصراع في لداخل ديالها كيقول من جهة ان من مصلاحتها ليالي ترجع لحبها لقديم باش تلقى فرصة مع حسام ومن جهة كيقول ان ليالي محقة في كلامها
نور (في نفسها) هحنا غادين نشوفو
نمشيو عند قاسم دخل لقاعة الاجتماعات
قاسم (موجه كلامو لسكرتيرة) معاش كان الاجتماع
السكرتيرة : مع 3 اسي قاسم
قاسم (كيشوف في ساعتو) امم 03:10 متاصلوش باش يلغيوه
السكريتيرة يلاه غتجاوب تحل لباب ودخلو ليالي ونور
ليالي : سلام... كنتأسفو علي تأخير
قاسم : مرحبا... تفضلو
نور : وقع بيناتنا سوء تفاهم والنقاش كان حاد لدرجة مديناهاش فلوقت
قاسم : نتمنا تكونو صلحتوه على حد علمي التوأم كيكون متفاهم
نور : لا اسي قاسم انت غالط التوأم حلاوتو في الاختلاف وحنا مختالفين في بزاف دلحويج منهم الادواق
ليالي (نغزاتها) ممكن نبداو الخدمة لان لوقت مكيسمحش لنقاشات بحال هادي
قاسم (موجه كلامو لسكريطيرة) خرجي نتي وعيطي علي انسة ايمان باش نبداو الاجتماع
كان جالس في الديبو مع شي رجال
حسام : مزيان السلعة وصلات في الوقت.... بلال سمعني مزيان هدشي يبقى بيناتنا انت تكلف بالرجال
بلال : كون هاني سي حسام
حسام: مخصش الواليد يعرف اننا كندخلو الكوكايين مع السلعة.... انا ماشي بحالو مغاديش نبني تروتي من ورتي ونتسناه حتى يموت عاد يولي عندي حق في الشركات
بلال: كون هاني اسي حسام
حسام(قرب منو) بلال انت عارف راسك علاش خدام معايا
بلال: باش انت ايديك ميتوسخوش بالدم
حسام: برافو..... تكلف بالسلعة انا غنمشي
نرجعو لشركة كملوا الإجتماع ديالهم في جو مكهرب
ليالي: احم كيبان ليا حطينا النقط على الحروف باقي خصنا ندرسوه مع الشركات الخرين
قاسم : اكيد لكن حتى يراسلونا ومن بعد غنحددو موعد نتجمعو فيه
رجعات ليالي بالزربة لقاعة الاجتماعات باش تاخد التيلي ديالها بدات كتقلب عليه فوق الطابلة وملقاتوش
قاسم(موراها) كتقلبي على هذا
ليالي (شافت فيه) آه نسيتو
قربات منو باش تاخدو بعدو عليها
قاسم: متبقايش تبيني بزاف عينيك من ديما كيفضحوك
ليالي: شنو كنبين شنو كتخربق انت
قاسم (كيقرب ليها باش يستفزها) انك مزال كتبغيني
ليالي (غير كيقرب منها وكتشم ريحتو قلبها كيولي يزدح وكتوتر حاولات تتحكم في راسها) الى سمحتي ماشي طريقة هادي باش تدوي مع وحدة مزوجة وكاينة هنا غير على قبل الخدمة
قاسم (زاد قرب حدا ودنها حتى حسات بانفاسو فوق بشرتها لدرجة تبورشات) كنسمعهم...... كنسمع دقات قلبك..... كترجعي ليالي لقديمة فاش كنقرب منك.... كتوتري وكترجعي عمياء
ليالي(سدات عينيها وهي كتبلع ريقها مبقاتش قادرة بزاف عليها هاد القرب كلو مكرهاتش تعنقو وتغرق في ريحتو فعلا فاش كيقرب منها كتولي عمياء كتمشي غير بإحساسها بحال الى عمرها بصرات النور كل حركة وكل نضرة كتفضحها كيفاش غتخبي وكيفاش غتقوي راسها وهي في قلبها حب اعمى
فجأة تحل باب القاعة كانت ايمان لقاتهم على نفس الوضعية
ايمان: سي قا.... احم واقيلة جيت فشي وقت ماشي مناسب
ليالي ( دفعاتو وخدات تيلي ديالها...قربات من ايمان) انا نسيت تيليفوني وجيت خديتو هدشي لي كاين لي شفتيه ماشي كيف ليك يريت توسعي نضرتك
ايمان: وي اكيد
خرجات هي برة بالزربة حتى وصلات لاسونسور عاد تنفسات بقاو ايمان و قاسم كيشوفو في بعضهم
ايمان : حتى انت في نضرك نوسع نضرتي
قاسم (هز راسو لسماء وتنهد) شي حاجة غلط انا حاس انو ماشي كيف كان كيحساب ليا
ايمان؛: مفهمتش
قاسم: ساليتي خدمتك
ايمان: اممم مبقاتش شي حاجة مهمة... غير هاد لوراق غتسني عليهم
قاسم (خداهم من عندها) واخة سيري نتي غندوز عليك لمكتب ديالك باش نمشيو نحتافلو كيف تافقنا صباح
ايمان: واخا
نزلات لتحت لقات نور كتسنا حدا السيارة
نور: فين طرتي نتي وخليتيني
ليالي: صافي هانا جيت ماشي مومو نتي
نور: وفين كنتي بالسلامة
ليالي (حلات السيارة)نسيت غير تيليفوني ومشيت نجيبو طلعي
نور: اممم تليفونك
ليالي؛: نووور
نور(طلعات حداها) هاهي ساكتة
كانو في الطنوبيل في طريقهم لشي كافي يتعشاو فيه راسو مهداش من التفكير باغي غير ينساها وكل مرة صورتها كتحتل تفكيرو وصل حدا لبلاصة لي كان كيصيد فيها وبلى ميحس وقف
ايمان : مالك علاش وقفتي هنا
قاسم : هنا كنت كنصيد شحال هدا..... مكرهتش نجي شي نهار وتصيد عوتاني
ايمان : ايه علاش لا في لويكاند نقول ليهم يوجدو ليك ليخت ديالك ودخل لبحر صيد على خاطرك
قاسم (ضحك) هه لا مقصدتش هاكا.... بغيت نجي هنا في الصباح بكري باقي الشمس مطلعاتش وندخل لداخل فين كاين الصخر ونجيب معايا السنارة ونصيد كيف ديما ونشوف الشمس وهي كتنشر خيوطها الدهبية في السماء ......ايمان
ايمان (حسات انو باغي يبقى بوحدو) لا غير خود راحتك.... انا عاد تفكرت واحد الاتصال مهم خص نديرو دابا علامن تجي
قاسم : مغنطولش
نزل من السيارة وقطع الشاريع ومشى لجهة ديال الصخر في كان كيصيد دار ايديه في جيابو وهز راسو لسماء حتى كيسمع صوت ديال لبكا قرب حدا واحد الصخرة لقاها جالسة وكتبكي على نفس الصخرة الصخرة لي كانو كيجلسو عليها بزوج
قاسم : ليالي..... شنو كديري هنا
ليالي (قفزات ملي سمعات صوتو ناضت وهي عاطياه بضهرها مبغاتوش يشوفها كتبكي مسحات دموعها بالزربة عاد شافت فيه) وانت شنو كدير هنا.... على اساس مبقيتيش كتبغيني ياك مسحتيني من حياتك ورميتيني ادا سير من هنا... علاش رجعتي دخلتي في حياتي خرج من حياتي لبغيتي نصدقك
قاسم (ضحك) ههه مسكينة بقيتي في الماضي.... هداك الراجل لي كان غادي يعطك حياتو صافي مشى مات..... مات قاسم لي كنتي كتعرفيه دفنتو نهار تخليتي عليه
ليالي : ودابا شنو باغي ها باغي تعاقبني..... كون غير كان غيفيد بشي حاجة (قربات منو وحطات ايدها على صدرو جيهت قلبو) وكن الجرح لي هنا عمرو غادي يبرى
مشات وخلاتو واقف ساهي فلبحر معرفش باش يجاوبها من غير انو يسد عينيه ويفكر اه مزال كيبغيها قلبو لداخل كيغوت ويقول انو مزال كيبغيها وعقلو كيفكر فيها مبقاش موراها بزاف ومشى رجع لطونوبيلتو لقا ايمان نازلة و واقفة حدا الطنوبيل
ايمان (كتشوف جيهة سيارة ليالي لي تحركات) كيبان ليا حتى ليالي عندها دكريات هنا
قاسم : بغيت شي ريسطو ممعروفش ويكون كيسربي الشراب
ايمان : اممم واخا موجود ولكن بشرط
قاسم شاف فيها بمعنى شنو
ايمان : شنو قصتك مع ليالي بانت ليا راجعة وهي كتمسح في دموعها وملي كتشوفك كتوتر ولونها كيتخطف
قاسم : تال تم وندويو
ايمان ( طلعات حداه ) كيبان ليا مبقيناش غنحتافلو بهزيمتك ل حياة... غنحتافلو بقلبك لي فاق من السبات ديالو
ليالي وصلات لدار حطات سيارتها ودخلات مشات نيشان لبيتها شعلات الضوء وهي تقفز
ليالي : هئ خلعتيني....... حسام شنو كدير هنا
حسام : كنتسناك ....حيت تيليفونك طافي ....فين كنتي
ليالي : ديشارجة و منتابهتش ليه
حسام : دويت مع نور على اساس راها معاك ولكن قالت لي شحال باش وصلتيها لعند صحابها وجيتي
ليالي : اه انا وصلتها وكنت غنجي ولكن حسيت براسي مخنوقة وانا في الطريق ووقفت حدا لبحر شوية
حسام (ناض جا عندها وقف قدامها ونطق وهو كيشد خصلة من شعرها ) وشنو لي مقلقك امراتي لعزيزة ياك فلخدمة كلشي مزيان
نرجعو عند قاسم لي كان جالس مع ايمان في الريسطو كيتعشاو ريسطو وفي نفس لوقت فيه ملهى لتحت كيدخلو ليه غير الناس المعروفين خص كنيتك تكون معروفة وخبارك منشورة في الجرائد باش تدخل ليه حيت فيه مطالب خاصة كملو عشاهم في الريسطو ونزلو لتحت
ايمان (طلبات بلاصة خاصة بعيدة على الصداع بحال الصلون صغير كتجلس فيه وكتبقى تشوف لي برا من الزاج كيسفطو ليك سرباي خاص يتكلف بيك ولبغيتي حتى لبنات كيسيفطوهم ليك )كيجاك ؟
قاسم : تبارك الله عليك ديما كنت كنعرف هاد الريسطو ولكن مكنتش عارف تحتو ملهى
ايمان : بحال هاد لبلايص مكيتعرفوش بسوهولة
قاسم (غمزها) ونتي شنو عرفك هاد لبلايص 😉
ايمان : ها ايوا غير بحكم لمهنة وعندي لمعراف قاسم : هه انا ملي طلبت منك شي بلاصة فيها الشراب مقصدتش هدشي مكنبغيش نجي لبحال هاد لبلايص
ايمان (ناضت) احم ديزولي لبغيتي نمشيو اسي قاسم نمشيو
قاسم (شدها من ايدها) جلسي للارض.... غنجلس شوية ونمشيو مدام جالسين بوحدنا وكالم ماشي مشكل مكنبغيش غير الصداع
ايمان : واخا لي بغيتي
جا السرباي حط ليهم دكشي لي طلبو
قاسم( كب ليه كاس وشربو بزز جاه حار ) احم شنو هدا
ايمان : ههه شراب علاش عمرك جربتيه
قاسم : ماشي بزاف ولكن مكيكونش حار لهاد الدرجة
ايمان : حيت هدا نوع خاص ماشي بحال لي كتشرب غي الحفلات والمناسابات وكيتشرب بشوية ماشي بديك الطريقة اه ولبغيتي تخففو تقد تخلط معاه من هاديك لقرعة
قاسم (شاف فيها) نهار على نهار كتصدميني
ايمان : ايوا ضروف كتخليك تعرف بزاف ديال لحويج
قاسم (كيشرب) معمرك عاودتي ليا على راسك
ايمان : مكتجيبهاش الفرصة ومكين منعاود
قاسم : ميمكنش اي واحد عندو ميعاود
ايمان : احم يعني حياتي مكانوش فيها بزاف ديال لحويج زوينين
قاسم : بحالاش
ايمان : بحال ان واليديا (سكتات شحال) ماتو وانا صغيرة وكبرت بوحدي
قاسم) بصح..... سمحي ليا ....مقصدتش
ايمان : ماشي مشكل عادي لمهم لقيت واحد لمرأة الله يعمرها دار رباتني وتهلات فيا وقراتني ومن بعد درت طريقي ومستقبالي وتعلمت انو لبغيت شي حاجة غنوصل ليها
قاسم (سكت شحال) ليالي هي الحب الاعمى لي قلبي مبغاش يزول وميمكنش يجمعنا
ايمان : كتبغيها !؟
قاسم : اااه كنبغيها كتر من اي حاجة وباغيها كتر من اي حاجة لكن هي دابة وحدة مزوجة شنو ندير غير قولي شنو ندير هي خلاتني ملي حلات عينيها وشافت الواقع عرفات ان واحد فقير بحالي ميصلحش ليها نهار كملت الاجراءات ومشيت عندها فرحان باش نقول ليها انا مبقيتش فقير.... انا وليت قاسم لعماري نقدر نعيشك كيف كتستاهلي...... مدرتش بكلام الواليدة لي ضيعات عليا عمرها وشبابها باش تشوفني بهاد المستوى وجريت عندها هي الاولى عرفتي شنو شفت هههه.... شفتها عروسة.... كان نهار عرسها..... حسيت بشي موص تغرس ليا في قلبي داك النهار قلبي تجمد.... ودابا معرفتش لاش غير كيشوفها وكيرجع يضرب
دازو ساعات
تورية : ماما قاسم تعطل ممولفاش ليه
كلتوم (كلتوم متكية فوق الناموسية) ايوا ابنتي لغايب حجتو معاه غتكون غير لخدمة ابنتي راه المسؤولية لي ولات عندو مساهلاش
تورية : بفف ولكن اماما راه نص اليل هدا راه 1 وهو مزال معرجع وحتى تيليفونو طافي خاطري ضارني عليه
كلتوم : سيري ابنتي تنعسي الله يرضي عليك وخليني تانا نعس رشربت دوايا راه مكاين والو دابا تلقايه داخل متدغطيش عليه تنتي راه هدشي جديد عليه
تورية : وااخاا ولكن غنبقى نعيط ليه حتى يجاوب
ناضت كتنتر مشات لبيتها سدات عليها وجلسات في الارض كتبكي وهي شادة التيلي بغاتو غير يعبرها ويعطيها وقت غير يعطيها امل ويعاملها مزيان ديما كيعاملها ببرود هي عارفة انو بغى وحدة اخرة وبغى يتزوج بيها لكن هي تزوجات ودارت حياتها واش مزال مبغا يدير حتى هو حياتو وينساها عليه
نرجعو عند قاسم شرب بزاف حتى داخ ومبقاش كيتحكم في راسو
ايمان (خارجة من الملهى وهي سانداه عليها) ويلي محسابش ليا عمرك شربتي هاد لويل
قاسم (غير كيخربق ويدخل ويخرج في لهدرة) ليالي.... شنو كديري هنا..... بعدي مني ......نتي تخليتي عليا .....شنو بغيتي
ايمان (وصلاتو حدا الطونوبيل وتكاتو عليها حتى جبدات ليه سوارت من جيابو وحلات) يلاه طلع انا لي غنسوق غنوصلك ونمشي في طاكسي
نرجعو لحاضر.... فاقت من افكارها والدمعة على خدها دارت وهي متكيا على لحيط وكتبكي كاتمة شهقاتها بيديها نزلات حتى جلسات في الارض وهي عاضة في طرف كمها وكتبكي
ليالي : كنبغيك... كنبغيك... كنبغييييك هئ هئ هئ
نرجعو عند ايمان سمعات تيليفونو كيصوني هزاتو وجاوبات
ايمان : الو شكون معايا
تورية (شعلات فيها لعافية) فين قاسم وشكون نتي
ايمان : ااا سي قاسم ممساليش عندو شي حاجة مهمة شكون نتي
تورية : انا خطيبتو وانا لي كنسولك شكون نتي يلاه جاوبي شنو كيدير تيليفونو عندك ايمان : اه انا ايمان ديريكتور جينيرال ديالو هو دابا ممساليش عندو اجتماع مهم من بعد ودوي معاك
قطعات عليها خلاتها غطرطق ولاحت التيلي ايمان ....قاسم خرج من دوش وهو كينشف في راسو لقاها وجدات لقهوة
تورية : وا خالتي راك محاساش بيا شكون عرف اش كيديرو مع بعضهم
كلتوم : اش باغين يديرو نعلي الشيطان ابنتي الله يعطيك عقل الله يهديك... راه ولدي وانا عارفاه ميديرش شي حاجة خايبة
تورية : وخالتي راه لعيب ماشي فيه ولكن هاديك ايمان هاديك مكتسرطش ليا والراجل كيبقا راجل
كلتوم : ايوا هي لى خفيتي عليه شوية وتقاليتي ونتي خانقاه خليه هو يقلب عليك
تورية : ومكرهتش اخالتي انا كنبغيه
كلتوم : نوضي نوضي سيري غسلي وجهك ونعسي وغدا يكون خير
ناضت خرجات كتحس براسها مخنوقة مسحات دموعها ومشات لبيتو جلسات فوق الناموسية ديالو وهي كتحسسها بيديها هزات وسادتو كتشمها ورجعات حطاتها وتكات عليها وجرات لخرا عنقاتها بقات كتستنشف ريحتو حتى نعسات
دازت هاد ليلة وجا نهار جديد
ليالي منعساتش ليل كلو اول حاجة دارت صباح عيطات لرانية باش تلاقة معاها بدلات حويجها وخرجات بكري فلوقت لي قاسم كان يلاه داخل لدار مشا ديريكت لبيتو باش يبدل لقاها ناعسة في فراشو قرب منها بشوية وجلس حداها وهو كيتأمل وجها لبرئ كل مرة كيحاسب نفسو حيت عارف راسو كيضلمها هو قلبو عمرو مغيتفتح ليها كتبان دابلة عرفها غتكون بقات سهرانة كتسناه حط ايدو على شعرها وهي تفيق حلات عينيها بشوية شافتو وضحكات ولكن مكملاتش ضحكتها وغوبشات ناضت من فوق ناموسيتو باش تخرج وهو يشدها
قاسم : مقلقة مني
تورية : شنو كنتي كدير مع ايمان ليل كامل
قاسم (بستغراب) باش عرفتي كنت معاها
تورية : حيت عيت نعيط ليك تشوشت وفي الاخر جاوباتني هي
قاسم : شنو قالت
تورية : قالت ليا ممساليش وعندك اجتماع... كاين شي اجتماع مع نص ليل
قاسم (وقف) تورية ايمان هي لوحيدة لي كنتيق فيها وكتعاونني في لخدمة عادي نكون معاها بزاف وراه فعلا كنت خدام متبقايش تكبري شي حويج
تورية : عرفتي شنو انا ممقلقاش انا غير بغيتك تهتم بيا عارفاك مكتبغينيش ويمكن غير كتعطف عليا كلشي هدشي مكيهمنيش لمهم غير تكون حدايا هدشي لي بغيت
قاسم ( تنهد معرفش اشنو خص يقول ولى باش يواعدها وهو عارف راسو مغيوفيش بأي وعد قطعو ليها خصوصا ملي عاودت بانت ليالي في حياتو.... ولكن هي كتبقا ملك لواحد اخر وحتى هو خصو يستقر في حياتو ) انا هاد الايام مبرزط بزاف ولكن كنواعدك قريب نصلح كلشي
تورية : وانا كنتيق فيك
رانية : مالك اصحبتي وجهك صفر ....ديما جاباني خالعاني اشنو كاين على الصباح
ليالي : منعستش ليل كلو.... ليل كلو عيني متسدوش اول مرة نتوحش الضلمة لي كنت عايشة فيها نتمنا لو مشفتش النور
ليالي (كتشوف في راسها) وشنو فيها غير مشيت شميت لهوى وشفت رانية... واش كتحقق معايا ولى كيفاش
حسام (قرب منها وحط ايدو على وجهها) غير شفتك مبقيتيش عاجباني وصافي
ليالي (بعدات عليه) انا بيخير هانا غادة نمشي لبيرو ديالي خرجات من مكتب حسام ومشات دخلات لمكتبها خلات لباب محلول وكانت كتقلب فشي وراق
قاسم دخل للشركة وتاجه لبيرو ديال حسام حتى داز من قدام مكتبها وعاود رجع دخل وسد لباب
ليالي (شافت شكون دخل لقاتو هو نفس المشكل نبضات قلبها كيبداو يتزادو وكتفقد التركيز ولكن حاولت تبت راسها ومتبينش )
قاسم : مدام ليالي شفاك مكضيعيش لوقت في لخدمة
ليالي : اكيد كاين شي حويج عندهم اولوية في حياتي
قاسم (كيحاول يستفزها باش يبرد النار لي فيه) كنضن كزوجة مسؤولية راجلك هي لي خص تعطيها الاولوية..... مزال مناوينش ديرو شي بيبي
ليالي (كلامو كيجرحها ولكن خصها توضح وتحط النقط على الحروف قربات عندو وشافت فيه شحال) قاسم خصنا ندويو
قاسم (دار باش يخرج واخا قلبو كان ميقول ليه تسنى شوفها شنو باغة تقول يقدر لي غتقولو يغير بزاف ديال لحويج ) معندناش فاش ندويو
ليالي (شدات في ايدو) قاسم... انا وحسام زواجنا ماشي حقيقي
دار شاف فيها ونزل عينو ليدها لي في ايدو وهي حسات على راسها وسحبات ايدها بتوتر دوزات على شعرها
ليالي : كاين شي حويج خصك تعرفهم باش خص ندويو باش تعرف اني ماشي انا لي تخليت عليك باش يكون ضميري مرتاح ومنبقاش كنتشوى من لداخل كل مشفتك وانت كتسمعني كلامك لي كيتغرس في قلبي بحال لخنجر
كانت كدوي وكترجف قاسم غير كيسمع ليها
ليالي : حسام عمرو لمسني كل واحد فينا كينعس في غرفة وحدو انت لوحيد لي لمستيني من داك اليلة انا...
قاسم (قاطعها وهو حاط ايدو على فمها وقريب منها لدرجة نفسو كضرب في وجها ) اذا نتي مزال كتبغيني ....كتعتارفي بيها
في هاد اللحضة حلات نور لباب ودخلات.....
في هاد اللحضة دخلات نور
نور وقفات مصدومة وحتى ليالي
قاسم : سمحيلي مدام ليالي حساب ليا لبيرو ديال سي حسام
نور : وسي حسام مبانش ليك قلتي تقلب عليه عندها لتكون مخبياه
ليالي : نور احتارمي راسك
نور (كتشوف في قاسم) كنضن هاد الكلام خصك توجهيه لواحد اخر
قاسم دفعها وخرج وهو مصبر راسو بزز من جيهتها كلام ليالي بقى كيضور في راسو فرح بزاف حس بحال الى قلبو كان شعلة ديال النار وطاحت وسطو نقطة ديال الجليد اخيرا طلع النفس من اعماقو خص مزال يعرف شحال من حاجة خرج من الشركة ومشى لشركتو
نرجعو عند ليالي
نور : صافي متقولي والو حيت باينة غتعطيني محاضرة كنت جايا باش نقول ليك غنخرج تلدار وندويو
ليالي : حسن..... يلاه غير سيري
نور (خرجات وهي كتبتاسم) واخة الالة ليالي غنشوفو هاد حب اعمى ديالك فين غادي يوصلنا
ليالي جلسات فوق لمكتب كتحس بنوع من الارتياح على الاقل خلات ليه الكرة في ملعبو هو لبغاها دابا غادي يدير شي مبادرة رجعات رايها لور وهي كتفكر فيه بتاسمات حتى سمعات التيلي كيصوني هزاتو كان رقم غريب رضات
ليالي : وي الو
قاسم : في لعشية حدا ابحر نفس لبلاصة.... خص نكملو كلامنا
ليالي : كيفاش عرفتي رقمي
قاسم : ماشي شي حاجة صعيبة
ليالي : اوك
قاسم قطع ورجع راسو لور كلاامها مبغاش يحيد من بالو خصوصا ملي قالت ان حيسام ملمسهاش وانها مزال ملكو من داك اليلة رجع بداكرتو لور لنفس اليلة قبل عام
#فلاش باك #
كانو فلبحر كيتمشاو ومشابكين ايديهم الشمس غربات والجو زوين نسمات الهواء كتلعب بشعرها وهي فرحانا واخا مكتشوف والو لكن كتحس ببزاف ديال لحويج
ليالي : قاسم... مكرهتش نطير
قاسم (طلق منها) طلبتي غير لموجود
ليالي : شنو كدير
قاسم : غير شدي في راسك
تحنى وهزها فوق كتافو وهي كتغوت وشادة فيه
ليالي : لا عافاك قاسم لاااا
قاسم ( وقف وهي فوف كتافو بصوت مرتافع) واش مكتيقيش فيا
ليالي : كنتييييق
قاسم : ايوا حلي ايديك وحسي براسك طايرة
ليالي (حلات ايديها في لهوى وبدات كضحك من قلبها) ااااه انا بصح طايرة
بقاو كيلعبو ويضحكو تمشى بيها شوية ونزلها
قاسم (عنقها) كنبغيك
ليالي : حتى انا فرحانة حيت غندوز ليلة معاك
قاسم : متأكدة
ليالي : ويي ردويت مع رانية وهوما عند بالهم بايتة عندها متخافش
بدات كتصب شتاء شد في ايديها وبداو كيجريو
قاسم : اجي نتخباو سربي هه
ليالي :اول مرة غنجري غير بوشيااا هه
قاسم هزها بين ايديه وهي حالة ايديها ومنزلة راسها عاجبينها نقاطي ديال الشتاء لي كيطيحو فوق وجهها حتى وصل لواحد لكرافان ودخلو ليه كان كيجلس فيه مع صاحبو رضى وليوم قادو على ودها حطها فوق واحد الناموسية تم وجبد ليها فوطة دارها ليها في ايدها
قاسم : هاكي نشفي راسك
ليالي (شدات في ايدو) واش فزكت بزاف
قاسم (حط ايدو على شعرها) اه شعرك ولى زوين وهو سارد
مشعرش وهو كيقرب ليها حتى تلاقاو شفايفهم كل واحد فيهم كان متعطش للاخر حطات ايدها على وجهو كتشجعو باش ميبعدش دخل صباعو وسط شعرها وزاد قربها عندو وهو كيستمتع بمداق شفيفها لي كيخليوه يسافر لعالم اخر وليالي كانت مستسلمة ليه بل وكتبادلو نفس المشاعر وكتجاوب معاه لان الاحسيس فقد لي كيوجهو الانسان في بحال هاد المواقف بعد عليها وشد وجها بين ايديه وهو كيشوف فيها كيتسنى ردت فعلها
ليالي (بتاسمت وحطات صباعها على فمها) كانت اول بوسة في حياتي
قاسم (بإستغراب) فعمرك 24 وعمر كانت عندك شي علاقة
ليالي (مدات ايدها وحطاتها على وجهو وجهو) لا انت اول واخر واحد في حياتي (حطات راسها على كتفو) بغيت نكون غير ليك ومعمري نكون لشي حد من غيرك حيت لي كنحسو معاك شي حاجة فوق اني نوصفها وصعيب اني نعاود نعيشها غير معاك
قاسم : متأكدة
ليالي علات راسها فيه وبتاسمت دور ايدو على خصرها وتكاها فوق الناموسية وايديها على كتافو جراتو عندها حتى جا فوقها كان عارف انو مغاديش يتخلى عليها واخا يوقف لعالم كلو ضدو في هاد اليلة لمساتهم لي غادين يتكلمو.... غادي يهديو لبعضياتهم دكرا من بعضهم عمرهم يقدرو ينساوها..... بكل قبلة طبع في جسدها حسساتها بحرارت انفاسو كانت كتاخدها لعالم اخر وبكل لمسة منها كتخليه يعيش حلم ....كل واحد فيهم عبر على مشاعرو وحبو بطريقتو وسلم نفسو الاخر باش يخليه يعرف معنى الحياة .....مارسو الحب بمعناه الحقيقي بدون طمع سلماتو راسها بلى حتى متعرف وجهو لان الاهم هو روحو لي لمساتها وحساتها متنكرش انها حسات ببعض الخوف والتوتر لان اول مرة يقيسها شي ولد لكن قدر يخليها تيق فيها وعرف يوصل ليها صدق مشاعرو واعد راسو باش عمرو يقيس من غيرها غير مهتم بفرق الطبقات والمستويات..... بعد مدة من عم فيها الصمت وتكلمت فقد احاسيسهم ورغبتهم عاونها لبسات حويجها من بعد ملبس حويجو جلسها فوق رجليه بحال شي طفلة صغيرة نعسات بين ايديه على كلمات الحب وقصص العشق لي كيطرب بيها مسامعها
نرجعو للحاضر رجع لوعيو وهو كلو امل ان هاد اللقاء غادي يوضح بزاف ديال الحويج مكرهش لوقت ايمتى يدوز باش يتلاقاها حتى خدمتو تلف فيها حتى دخلات عليه ايمان
دازو ساعات وصلات العشيا وتلاقاو في نفس لبلاصة كانت جايا وهي حايرة معرفاتش واش خصها تجي ولى مخصهاش في هاد اللحضة كانت تابعة قلبها حتى بان ليها كان جالس من شحال تم كيشوف في البحر لي كان خير ونيس ليه لسنين وكان شاهد على الحب ديالو من قبل عام ومن بعد شهد على حزنو حتى ليوم بغاه يشهد على بداية جديدة في حياتو
قاسم : علاش زواجك من المزور من حسام مبرر لتخليك عليا
ليالي : انا وضحت ليك اني...
قاسم :انك شنو ....دوي.... انك مزال كتبغيني ومسمحتيش ليه يقرب منك... ولكن علاش علاش تزوجتيه من الاساس
ليالي : حيت كنت محتاجة لشي حد يكون فجنبي وحيت حسام كان اقرب شخص ليا فداك لوقت حتى ختي خلاتني وسافرت مورة لعملية وانت غبرتي ومبقيتيش بنتي شنو بغيتيني ندير... تقدر تقولي السبب لي خلاك تمشي وفين مشيتي......انا هنا ليوم غير باش نريح ضميري لي كيعدبني كل ليلة مورة مبنتي تاني في حياتي.... انا هنا باش نسمع كلشي منك ونقول كلشي عندي
قاسم (مد ليها ايدو) اذا اجي معايا
ليالي : فين
قاسم : خص نجلسو فشي بلاصة باش ندويو على خاطرنا
ليالي بلى متردد شدات في ايدو ومشاو غافلين العين لي مراقباهم
تورية : ماما وا ماما
كلتوم (كتفرج) الله يسمعنا خبار لخير
تورية (شادة تيلي) كنعيط لقاسم ومكيجاوبش
كلتوم : وغتلقايه غير خدام
تورية : وراه واعدني ليوم نخرجو نتعشاو بجوج
كلتوم : باقي لحال دابا يعيط ليك
تورية : افف معرفتش واش نوجد راسي ولى لا
كلتوم : غير نوضي وجدي ياك هو قالها ليك دابا شوية تلقايه كيعيط ليك
تورية (ناضت) واخا غنوض نوجد راسي ونعاود نعيط ليه
كانو راكبين في السيارة والصمت سيد الموقف حتى بان ليها خرج من المدينة وهي تنطق
ليالي : فين غادين
قاسم : قلت ليك غنمشيو لشي بلاصة نقدرو ندويو فيها بخاطرنا
قاسم (حبس الفران بالجهد حتي تهزات من بلاصتها ودار عندها) مكتسكتيش ياك باقي فيك لهدرة بزاف لي نقسو ليك ربي من لعينين زادو ليك في السان واخا رجع ليك الشوف مقللتيش من النكير
ليالي (غير كترمش بعينيها وكتشوف فيه)
قاسم (كمل كلامو) لكنتي مقلقة حيت مخليا راجلك لعزيز مشطون عليك نرجعك عندو ها شنو بان ليك ولعرفتي شنو عيطي ليه جاوبيه وقولي ليه انا كنحل مسألة شخصية مع شريكك سي قاسم
سكت وتأفف بدل نبرة صوتو
قاسم : بفففف (بندم)سمحي ليا
ليالي (بتاسمت) غرتي
قاسم : لا
ليالي (كطنز) لا ماغرتيش غير كنتي شوية و ضربني
قاسم (بتاسم حتي هو) لا غير كيبان ليك اصلا انا جايبك غير باش نشرح ليك لموقف ديالي باش ميحسابش ليك بلي تخليت عليك
ليالي : باغي تقول زعما باقي كتبغيني؟؟ و فين كنتي فاش كنت محتاجاك؟؟
قاسم : لجواب ديالي غادي يشكل فرق
ليالي : فرق كبير
قاسم : اذا مبقاش بزاف غنوصلو لواحد الدار هنا غندويو فيها على خاطرنا
ليالي (كتحاول تستفزو) دابا غير بيني و بينك زعما ماغرتيش
قاسم : لا مغرتش
ليالي : (حابسة الضحكة) صافي تيقتك
قاسم قطع الحس عرف راسو بين ليها بلي غار غير مارضاش يقولها و هوما باقي ماصفاوش الخواطر
مطولوش بزاف حتى وصلو لواحد الدار على طريق لبحر خارجة من المدينة من املاك قاسم
ليالي : واخا هحنا دابا براحتنا نقدر نسمع منك كلشي
قاسم : نصايب قهوة ونجي حشومة نتي ضيفتي 😉
دخل لكوزينة يصايب قهوة وليالي كتمنضر في الدار كان تيليفونو محطوط فوق لفوطوي بدا كيصوني هزاتو داتو ليه
ليالي : تفضل اسي قاسم خطيبتك كتعيط ليك
قاسم (شاف فيها وخدا تيلي طفاه) ماشي مهم
ليالي : متأكد
قاسم : واقيلة غرتي لا
ليالي : لااا علاش انا... انا غير كنتأكد وصافي يعتي يقدر تكون مسألة مهمة
قاسم : يعني نجاوب.
ليالي : لا ... اااا زعما لي بغيتي
قاسم : وشنو
ليالي : افف صافي ارا هاديك لقهوة واجي تجلس
قاسم : باش منطولش عليك انا حياتي تبدلات في نفس الشهر لي تبدلات فيه حياتك مكانش كيحساب لي عندي با كاع حتال داك النهار كنت في لبحر كنصيد كيف لعادة حتي وقفو عليا جوج ديال الناس راجل كبير فلعمر وبنت شابة زوينة باينين اغنياء فلول حساب لي غادين يشريو من عندي لحوت من بعد مدخلنا في حوار عرفت ان هداك هو لمحامي ديال الاب ديالي وان لي معاه هي ايمان فلول دكشي مدخليش لراسي واش 26 عام وانا عايش على اساس ان با ميت حتى كيجيو يقولو ليا بلي كاين وبلي هو واحد من اكبر رجال الاعمال بزز قنعوني باس نمشي معاهم هزوني معاهم ومشينا عند الواليدة باش نفهم منها
#فلاش باك #
كلتوم : شكون شكون غير بشويا غتهرس لباب
حلات لباب دخل قاسم هايج بحال شي تور
قاسم : لواليدة انا عندي با دوي واش انا با مزال عايش مميتش كيف قلتي ليا... شكون هاد الناس راه غير كيكدبو عليا ياك قولي نتي الصراحة.... انا غير تغالطت ليكم مع شي حد هاهي لواليدة نتوما مكتعرفوهاش
كلتوم (تصنمات معرفات باش تبلات شافت ايمان وسي كمال لمحامي) سي كمال
قاسم (سمعها نطقات سمية لمحامي بقى كيشوف فيها) كتعرفيه ....هاد لهدرة لي قالها ماشي كدوب ادا..... دوي قولي شنو وقع بالضبط راني غادي نتسطاااا
كلتوم (طاحت فوق السداري وجلسات تبكي) سمح ليا اولدي انا غير حميتك ومبغيتكش نضيع مني سمح ليا
كمال لمحامي : لالة كلتوم عافاك شرحي لقاسم كلشي وحنا كنتأسفو بصح كون قاسم كان عارف انك حملتي منو مكانش غادي يتخلى عليك وهو دابا راه مريض وشاد لفراش وباغي يشوف ولدو قبل ميموت.... انا غنمشي دابا وغدا غنرجع باش نديه معايا
هوما خرجو وقاسم بدا لي لقاها قدامو كيهرسها
قاسم : علاش كدبتي عليا علاش عيشتيتي يتيم حياتي كلها يتيم علااااش انا
كلتوم (شداتو )عفاك ولدي مديرش هاكا انا غنشرح ليك
قاسم (شاف فيها وهو كيلهت وعروقو خارجين) قولي شنو عندك ومتخبي عليا والو مزال
كلتوم : كنت صغيرة ملي بغيتو يلاه عندي 15 عام وخدمت عندهم في لفيلا بغاتي وبغيتو وواعدتي غادي يتزوج بيا لكن مو لالة فاطمة مبغاتش ملي عرفات بعلاقتنا وملي عرفات راني حاملة حلفاتني لقلتها ليه غادي تطيح ليا لولد لي في كرشي وتجري عليا وعطاتني لفلوس وقالت ليا نغبر من لمدينة حسن ليا وهي غتكلف بقاسم وتقوليه راني هربت مخلاوش ليا لفرصة وهزني الشيفور في ليل جابني لهنا ومن تم لي سولني كنقول ليه مات ليا الراجل وخلاني حاملة حتى ولدتك وحطيتك بسميتي متسرطاتش ليا واها هاكاك وهزيتك واحد النهار كان عندك عام ونشيت لفيلا باش نشوف قاسم لقيتو تزوج ومراتو حاملة وعاود هددتني لالة فاطمة ورجعت بلى منشوفو
قاسم : يعني حتى هو مكانش منو لغلط حتى هو مكانش عارف راك حاملة وراك ولدتي
كلتوم (كتبكي) لا
قاسم ناض دخل لبيت وسد عليه باغي يبقى وحدو
كلتوم (كدق) حل اولدي عافاك حل مديرش هاكا انا رمدرت ليك والو هئ هئ
نرجعو لحاضر نزلات دمعة من عين قاسم وهو كيعاود دغية مسحها
قاسم : فداك لوقت كنتي نتي مشيتي ديري لعملية عاود رجع عندي لمحامي وداني شفت لواليد كانت اول مرة واخر مرة خرجت من عندو وجيت عندك فاش لقيتك غدخلي لبلوك وواعدتك ملي تحلي عينك تلقايني قدامك كنت باغي نقول ليك كلشي ونشاركك همومي لكن مقدرتش مبغيتش نزيد نشطنك ونتي داخلة ديري عملية قلت حتى تخرجي بالسلامة ويتقاد كلشي وغادي ندويو
ليالي : ومن بعد ملي درت العملية علاش مرجعتيش تشوفني علاش غبرتي
بين قلبين حب أعمى الجزء الثالث
محتوى القصة
التنقل بين الأجزاء