بين قلبين حب أعمى الجزء الرابع

من تأليف ميمي المجنونة
2018

محتوى القصة

رواية بين قلبين حب أعمى

ليالي : ومن بعد ملي درت العملية علاش مرجعتيش تشوفني علاش غبرتي وتيليفونك مسدود وملي مشات رانية لحومة ديالك ملقاتكمش قالو ليها رحلتو
قاسم : غير بان لواليد وبانو معاه لمشاكل كان خصني نتبت النسب ونطلع لوراق بسميتي لحقيقية ولمحامي معايا فكل خطوة ممخلينيش حيت لواليد ديالي عرف بلي ولدو لي كان مربيه 24 ماشي ولدو لحقيقي وكيقول بلي مرتو غدراتو لكن هي كتقول معارفة والو على هدشي هي حملات وولدات وعندها شهود على هدشي لكن يمكن شي حد بدل ليها لولد في لمستشفى.... تحولنا من لحومة وجلسنا في دار خرا مكلف بيها سي كمال حتى نقادو الاجراءات من بعد تلتيام من داك نهار قررت باش نجي نشوفك عرفت ان داك نهار غتكوني حيدتي لباندة
ليالي : ايوا علاش مجيتيش
قاسم : رجعت لدار لي فلحومة باش نجيب واحد لكادو كنت شريتو ليك وبقى تم حيت مهزيناش كاع حويجنا نهار مشينا وخصوصا انا مهزيت والو تقريبا وانا خارج تلاقيت مع عبيقة
ليالي (بستغراب) هه شكون هاد عبيقة
قاسم : شمكار ديال لحومة كنت شحال من مرة تعاكست معاه كيقول ليا ضور معايا ومكنبغيش واحد لمرة كتر عليا وضربتو وحلفها فيا داك نهار كان مقرقب وتزايدت معاه كيف ديما شنقت عليه محسيت براسي غير وشي حاجة دخلات في جنبي والدم بدا نازل خاد ليا دكشي لي في جيابي وهرب بغيت نوض مقدراش تمشيت واحد الشوية بزز بغيت نوصل لدار صاحبي رضى ولكن مقدرتش وطحت فطريق فقدت الوعي محليت عيني غير في سبيطار
ليالي (حطات ايدها على فمها وشهقات) ومن بعد شنو وقع ياك ما مزال دابا كضرك
بلى متشعر حطات ايدها على جنبو وشافت فيه والدموع في عينيها
ليالي : قاسم بغيت نشوفها
قاسم حل صدايف لخرين ديال لقاميجة كانت باينة ضربة في جنبو مزال الاتار ديالها حطات عليها ايديها وهي كتحسسها بشوية
ليالي : شنو وقع من بعدك كيفاش مشيتي لسبيطار وشنو قالو ليك تم
قاسم (حط ايدو على وجها وطمأنها بشوفاتو) متخافيش دابا راه عام مبقاتش كضرني
ليالي : قول شنو قالو ليك الاطباء
قاسم : من حسن حضي اني كنت وليت من عايلة العماري وخداوني لاكبر كلينيك دارو ليا عملية حيت الضربة قاست لكلوة بقيت يوماين عاد فقت لقيت طبيب فوق راسي وسي كمال بطابيعت لحال مخلاونيش نخرج واصلا كنت مزال مكنقدر نوقف داز اسبوع وانا في المستشفى وبزز باش سمحو ليا نخرج قلت غادي نجي لعندك نتي الاولى خصني نشوفك كنت توحشتك بزاف
ليالي : ايوا وعلاش مجيتيش

قاسم : جا عندي سي كمال لمحامي هو لي خرجني هو وايمان وجابو معاهم لخبر لي زاد قلب حياتي وخلى ايدي مربوطين
ليالي : شنو هاد لخبر

#فلاش باك #
كان خارج من المستشفى مع ايمان وسي كمال كيتسناهم في السيارة داير عكاز كيتسند عليه حيت الرجل ليسرا لي في جهة الضربة مكيقدرش يتسند عليها
قاسم : ايمان شوفي عندي واحد لغرض غنقديه ونلحق عليكم
ايمان : ميمكنش خصك تجي معانا شوف راك مزال مريض
قاسم : غادي ناخط طاكسي ونمشي متخافيش دغيا غنرجع متقولي لواليدة والو
ايمان : سي كمال دوي معاه انت
كمال (حيد نضاضرو وتنهد) قاسم باك الله يرحمو
قاسم ( تصدم الدنيا دارت بيه فعلا هو مترباش معاه ومولفوش ويمكن مكيعنيش ليه لكن كان بدا كيحس باحساس ديال الامان الاحساس ديال السند معنى انك يكون عندك اب باقي متمتعش بهاد الاحساس تسلب منو) ك .. كيفاش...
كمال : باك مات اقاسم ليوم وانت مغتحرك لحتى بلاصة حيت صلاح رجع لدار هو ماشي ولدو انت لي ولدو انت لي مصك توقف في جنازتو وتاخد العزاء وعاد راه خلى وصية خصها تحل قدامكم كاملين وانا متأكد انها غدير بزاف دلمشاكل ولخلافات ويمكن حياتي تكون فخطر دكشي لاش خصك تكون قوي وتوقف راجل
ايمان : حنا كلنا معاك ولكن خصك تكون في بلاصتك في دارك وفي شركتك قبل ميفوت لفوت حيت هاديك الفعة ديال حياة غتستغل الوضع لصالحها كل معطيناها وقت دكشي لاش مخصكش تبعد وتخوي ليهم الساحة هدا هو لوقت لي خص يبان فيه قاسم لعماري

نرجعو لحاضر ليالي بقات غير حالة فمها فعلا لي داز عليه ماشي قليل
قاسم : عوتاتي طريت اني نمشي معاهم وقفت على الدفين وخديت لعزا وكيف قالو من بعد متحلات لوصية وعلن كمال على ان قاسم كتب جميع املاكو ليا وبطريقة قانونية حتى حياة خدات حقها باش ميضلمهاش ولكن صلاح مكان عندو حتى نصيب شئ لي خلى لمشاكل تبدا مشاكل لا نهاية لها وقفو معايا غير ايمان وكمال ورغم هدشي كنت كنحاول نوصل ليك لكن خطك مسدود من بعد مدة جيت لفيلا ديالكم باش نشوفك ولكن كان فات لفوت كان نهار عرسك
ليالي : انا من بعد مغبرتي بدلت نمرتي مبغيتش شي حاجة تبقى تفكرني فيك
قاسم : وقدرتي تنسايني
ليالي : تناسيت
قاسم : مزال في نضرك انا تخليت عليك
ليالي (حركات واسها ب لا وتلاحت فيه عنقاتو) ولكن عضرني حتى انا ماشي بيدي كنت محتاجة لشي حد لي يوقف في جنبي خصوصا من بعد لعملية محتاجة لشي حد لي يقويني نور سافرت وخلاتني وبابا وقعو ليه مشاكل في الشركة وكان غادي يدير افلاس لولا حسام لي دخل وشرا الاسهم ديالو ودارهم باسمي انا ودخلو شريك في شركتو وكان الطلب ديالو هو نقبل نتزوج بيه في الصراحة وقف معايا كاع هاديك الايام لعملية منجحاتش بنسبة كبيرة وليت كنشوف لكن ماشي عشرة على عشرة خصني حصص ديال الترويد ونضام ديال الدوية وكنت كنمشي تال برة ندير حصص ديال اليزر هدشي كلو هو لي وقف معايا فيه وتكلف بكلشي ملقيتش شي سبب يخليني نرفضو ومع الحاح العائلات على الزواج وافقنا واخا هدشي كامل قبل ان زواجنا يكون غير على لوراق وانو عمرو يقيسني وشرطو لوحيد نحتارم قراراتو وحياتو الخاصة مندخلش فيها
قاسم : مزيان اذا كنهنيك على هاد الزوج المتالي
ليالي : شنو كتفلى دابا
قاسم : ايوا نتي من صباح ونتي تشكري فيه بقى غير تعزفي ليه لحن المناضل شنو نقول متلا
ليالي : زعماك انت بقيتي حازن عليا ياك خاطب ديك تورية وعايشة معاك فدار
قاسم : اه خاطب خااطب ماشي مزوج.
ليالي : حتى زواجي ماشي زواج ونقدر نطلق
قاسم (بقى كيشوف فيها شحال قرب منها وحط ايدو على وجهها اخيرا توضح هاد سوء الفهم لي بينهم كيحس بحماس كبير ايمتى ترجع ليه ) انا مزال كنبغيك وكتر من الاول
ليالي (بعدات حسات بتوتر وفرحة فنفس لوقت) عفاك ا قاسم انا دابا كنتعتابر مزوجة
قاسم (ضور وجهو ودوز ايدو على راسو بنفاد صبر وهو كيتنهد)

ليالي (حطات ايدها على كتفو) ولكن انا ليوم غندوي مع حسام على طلاق ميمكنش نبقاو عايشين هاكاك
قاسم (بقى كيشوف فيها) متأكدة
ليالي (شدات في ايدو) عرفتي انا ليوم تولدت من جديد
قاسم عتقها مكرهش يخشيها فقلبو لداخل فرح بزاف انهم اخيرا غادي يتجمعو اما ليالي طايرة من الفرحة وصرعان مبدات فرحتها كتختافي ملي طرح السؤال ديالو
قاسم : متأكدة غادي يوافق على الطلاق بسهولة
ليالي (هزات فيه راسها بستغراب وهي كترجع شعرها ورا ودنيها) وعلاش مغاديش يوافق ...انا مكنبغيهش وزواجنا ماشي حقيقي
قاسم : نتي مكتبغيهش ولكن هو شنو احساسو من جهتك
ليالي : عافاك متصعبهاش عليا ...وحتي الى موافقش انا غنرفع دعوة ديال الطلاق (شافت فيه بتساؤل) وانت ؟؟
قاسم : مالي انا
ليالي : تورية غادي تقدر تفسخ معاها لخطوبة بلى مشاكل
قاسم (تفكرها وتنهد هو بهاد لفعلة غادي يضلمها طمعها فيه ومن بعد غادي يتخلى عليها غادي يجرحها وهو عارفها شحال كتبغيه ضميرو كيأنبو حتي قبل ميدير هدشي لكن لتزوجها وهو مكيبغيهاش هذا اكبر ضلم ليها ولراسو ولكن لقرار غيكون صعيب ) غنحاول هي اكيد مغتوافقش بسهولة هي بنت يتيمة وباها وصاني عليها غنحاول نقنعها بانها تستاهل لي حسن مني وغنبقى واقف جنبها كأخ
ليالي (هزات حاجبها) وغتبقى معاك في الدار
قاسم : اكيد راه مع ماما
ليالي (غوتات) نعااام لا اكيد لا ميمكنش
قاسم (قفز) صافي حتي نتفرقو ونديرو شي حل
ليالي (بحدة) بحالاش هم قول
قاسم : صافي غير بشوية عليك ... اصلا نتي حبيبتي انا مكنشوفش من غيرك وملي غنحلو امورنا غنمشيو نعيشو فدار خرا وحدنا
ليالي : لا دابا من هاد ليلة كيفاش غنتحمل انك معاها في نفس الدار
قاسم : ونتي راك غتبقاي مع حسام في نفس الدار
ليالي (بقات كتشوف فيه) انا غنمشي لدارنا ليوم حتى نطلقو
قاسم (بتاسم) بصح
ليالي : و تورية
قاسم : صافي متكونيش قاسحة راه لبنت يتيمة معندها فين غتمشي .... غير هاد ليوماين وانا غادي نلقى دار خرا
ليالي : عرفتي لعرفت انك قريب منها ولشفتي فيها ....
قاسم (كيقرب ليها) شنو غادي ديري هم
ليالي (قربات صباعها حدا عينيه) غادي نجبد ليك عينيك من بلاصتهم فهمتي
قاسم (بعد عليها بالزربة) مالك شريرة
ليالي : انا شريرة يااك
قاسم : واخا هكاك كنبغيك الشريرة ديالي ههه
ليالي (جمعات ايدها كضربو علي كتفو) انت لي شرير وعينيك فالتين حساب ليك مشفتكش كيفاش كتشوف في ديك ايمان حتى هي

دازو ساعات كانت لابسة ومقادة وجالسة في بيتها كتبكي سمعات لباب تحل مسحات دموعها ودورات وجهها
قاسم (جلس حداها وهو عارفها مقلقة حيت مجاش وخرجها كيف واعدها خداه وقتو مع ليالي ومتفكر حتى كان فطريقو لدار) احم تورية
تورية (كتشوف بعيد) عوتاني مجيتيش عوتاني خليتيني كنتسنى
قاسم : سمحي ليا اتورية
تورية (بتاسمت) انت ديما نساني وفي الاخر طلب مني السماحة وانا كيف ديما غادي نسمح ليك
قاسم (تنهد وهو كيخرج لخاتم من صبعو) هادشي لاش غادي نفسخ هاد كنطلب منك سماحة ماشي على هاد السبب التافه وانما حيت مغاديش نقدر نوفي بوعدي ونكون زوج ليك
تورية (ناضت من بلاصتها ونزلات على ركابيها شدات في ايديه باش ميحيدش الخاتم) لا لا عافاك شوف انت تقلقتي مني حيت كبرت الموضوع سمح ليا صافي... انا.. انا عارفة انت عندك لخدمة ولمسؤوليات كتيرة واكيد مغاديش تفكرني صافي مرة خرا
قاسم : تورية انا مكنبغيكش فهمتي وميمكنش نتزوج بيك هاكا كنضلمك وكنضلم راسي عمري غنقدر نسعدك ونوفي بوعدي ليك ولباك بلعكس لتزوجتك غنبقى ديما كنجرحك حيت في قلبي كاينة غير وحدة ومعمري غادي نبغي من غيرها
تورية (كتحرك راسها ب لا وكتبكي ) لا هئ هئ لا انا قابلة راضيا واخا مكتبغينيش كلشي غادي يتقاد انا غادي نسيك فيها ونخليك ديالي قاسم هي خلاتك ومشاات علااش مزال مباغيش تنساها علااش انا مستعدة نعطيك عمري كلو وانا كنتسنا قلبك يفتح ليا بابو
قاسم (تنتر منها وناض) تورية متصعبيش عليا الامور..... ليالي عمرها خلاتني .... وانتي عمري عتابرتك كتر من ختي غنبقا صديق ليك وغنبقا في جنبك ولكن زوج منقدرش مستحيل
حط لخاتم فوق لكوافوزة وخرج من لبيت وهي تبعاتو حتى سد لباب ورجعات جرات دكشي لي فوق لكوافوزة حتى طاح كلو تشتت وطاحت للارض كضرب بيطديها فلارض وكتبكي
تورية : لا لا هئ هئ متخلينيش هئ هئ قاااسم علااش هئ هئ
قاسم ركب في سيارتو ومشى مبغاش يبقى معاها فنفس الدار اكيد مغاديش يتحمل كيحس ان ضميرو كيأنبو كتبقى بنت يتيمة ومبغات والو من الدنيا من غيرو هو عارف هدشي مزيان دكشي علاش مبغاش يزيد يعلقها بأمال محطمة مستحيل تتحقق يمكن رتاح نسبيا حيت حيد عليه هاد الرابط لي مكان كيعني ليه والو ولكن واخا هكاك كيحس انو ضلمها باغي يبعد باش تقبل الواقع وتعرف انو كان جدي في قرارو

نمشيو عند ليالي كانت في بيتها ماشي بزاف باش جات بدلات ووقفات قدام لمراية بتوتر كتسنى حسام يجي باغة تهدر معاه فموضوع الطلاق ديما كيطل عليها قبل مينعس سمعات لباب تحل شافت فيه
حسام : مراتي لعزيزة ليوم تعطلت ونتي مزال فايقة كتسنايني ياك
ليالي : اه كنتسناك
حسام (كيقرب منها كان سكران) اممم اخيرا عرفتي اني عندي حقوق خصني ناخدها
ليالي : بغيت ندوي معاك
حسام (شدها من كتافها وقرب حدا ودنها كيشم ريحتها) حتى انا توحشتك
ليالي (كتبعد) حسام انت سكران
حسام (كيبوسها فعنقها) ومن بعد
ليالي (كتحاول دفعو) حسااام بعد مني
حسام مكيسمعهاش خاشي وجهو فعنقها وكيبوس فيها وهي كتحاول تبعدو عليها ....

ليالي (كتحاول دفعو) حسااام بعد مني
حسام مكيسمعهاش خاشي وجهو فعنقها وكيبوس فيها وهي كتحاول تبعدو عليها جمعات قوتها ودفعاتو حتى طاح فوق الناموسية
ليالي : قلت لييك متقيسنيييش واش مكتفهمش
حسام ( هز لافيست ديالو ووقف ) ليالي متخلينيش نبدل تعامل ديالي معاك نتي مراتي ومن حقي نقيسك
ليالي : اهاه ولكن هدا مكانش اتفاقنا قبل عام
حسام : قلت نصبر عليك ولكن نتي طولتي
ليالي : حتى دابا ماشي مطدر تبقى صابر
حسام (بستغراب) مفهمتش
ليالي : طلقني
حسام : نعام واش عارفة راسك شنو كتقولي
ليالي : اه عارفة كنطلب طلاق حنا تافقنا نعطيو لراسنا فرصة لكن هاد لفرصة منجحاتش انا عمري غنقدر نكون مراتك بصح وعيييت من هاد التمتيل قدام داركم ودارنا اذا طلقني
حسام : ليالي شوفي انا مزال مستعد نصبر... شوفي انا سكران معرفتش كيفاش درت هاكا سمحي ليا
ليالي : انا كندوي بصح حسام طلقني
حسام : ليالي سيري لداكم رتاحي شوية ومن بعد ندويو
ليالي : هدشي لي لقيتيني كندير لكن غنمشي بلى منعاود نرجع انا علمتك غدا غادي نرفع دعوى ديال الطلاق
حسام (شدها من دراعها) ليالي ديري عقلك
ليالي : علاش مباغيش طلقني علااش
حسام : حيت كنبغيك معرفتيش علاش رفضت ان شركة باك تعرض للافلاس معرفتيش علاش مورا لفضيحة لي دارت ختك صيفطتها لفرنسا معرفتيش علاش وقفت فجنبك شحال من مرة علاش مكتشوفيش حداك علاااش كضلميني
ليالي (كتشوف فيه بغينيها لخضرين عامرين دموع هدرتو فاجأتها) ك... كيفاش
حسام : ليالي انا مستعد ندير اي حاجة على قبلك غير بغيني مبغيت والو من غير انك تعاملني كزوج ليك
ليالي (تنترات منو) لا ميمكنش انا مكنبغيكش فهمتي
هزات باليزتها وخرجات من لبيت وهو جلس فوق الناموسية دوز ايدو على راسو بعصبية
حسام : مغتمشيش فهمتي وحتى لمشيتي غادي نعرف كيفاش نرجعك

قاسم جالس في الاوطيل وشاد التيلي في ايدو كيخمم واش يعيط ليها ولى لا باش يعرف شنو دارت مع حسام حتى كتصوني نمرة غريبة بقى كيفكر وجاوب
قاسم : الو
الشخص : سي قاسم لعماري
قاسم : سكون معايا
الشخص : متأكد ان باك مات
قاسم (وقف) كيفاش شكون انت
الشخص : انا بغيتك تحل عينيك وتاخد حقك من لي قتلو باك
قاسم : كيفاش شكون انت الو.... الو
... طيط... طيط... طيط تقطع لخط ههه

كان جالس في بيتو كيشرب وهو كيراجع الاحدات فراسو ندم حيت قرب منها معرفش ايمتي ولى كيفاش ولي كيبغيها ولكن مباغيهاش تبعد عليه سمع لباب تحلات
حسام : ليالي
نور : لا هادي انا
حسام : شنو بغيتي .... ختك في داركم
نور (قربات وجلسات حداه كانت لابسة كسوة كحلة لاصقة ليها على جسمها وبارزة كاع مفاتنها عندها غير كم واحد وقصيرة بزاف بفتيحة في جنب فخدها ) بغيتك انت ماشي هي
حسام (شاف فيها شحال ورجع شرب من لكاس) وانا بغيتها هي
نور (خدات لكاس من ايدو وهي كتحسيها بطريقة متيرة وناضت كبات ليه شراب وهي كتعوج هزات جوج مربعات ديال تلج حطاتهم في لكاس وهي كتحركهم بصبعها حيداتو ودارتو في فمها بطريقة متيرة مصاتو وهي كتشوفيه شوفات كلهم شهوة رجعات جلسات حداه وحطات ليه لكاس) هي متستاهلكش... معارفاش بقيمتك
حسام (شاف فيها وهز لكاس شرب منو وهو كيدوز صباعو علي دراعها لعريان) ونتي كتعرفي
نور (زادت قربات منو) كون غير عطيتيني فرصة وتجرب (حطات ايدها على وجهو) تخيل اني هي اصلا مكاينش اختلاف
حسام عينيه رايبين شرب بزاف وغلبات عليه الشهوة ديما كان كيفرغ شهوتو برة حيت ليالي مكتعطيهش فرصة يقيسها كيبقى راجل وعندو موقفو الخاص نور كتبان ليه فصورة ليالي خصوصا وانهم متشابهات محسش الي وهو كيقرب منها كتر وكتر حتى ولي فوقها وحتى هي مهدات ليه ومخلاتوش يحس انو كيدير ليها شي حاجة من غير رضاها حيدات ليه لقاميجة وهو مشعول كيبوس فيها وفي فمو كلمة وحدة سمية ليالي كينطقها وهو ساد عينيه وغير صورتها لي قدامو نور ستغلات هدشي وقرباتو منها حتى دخلو فعالم الشهوة كانت مزال بنت وسلماتو راسها بكل برود سلماتو شرفها مطولش بزاف وطاح ناعس اتر عليه الشراب بشكل كبير وهي جرات عليها لغطا ودارت ابتسامة جانبية
نور : ودابا وليتي ديالي اسي حسام غنشوفو كيفاش تنكر انك ديتي ليا شرفي

ليالي : انا دويت معاه لكن للاسف هو رفض وانا دابا مشيت لدارنا وغدا غندوي مع لمحامي باش يعرف اني جدية في هاد الموضوع
قاسم : مزيان بقاي علي لموقف ديالك كنت عارف مغاديش يوافق وردي لبال لراسك عنداك يأديك
ليالي (بتاسمت) كتخاف عليا
قاسم (شد وجهها بين ايديه) اكيد وحتى من راسي
ليالي : تورية قبلات تفسخ لخطوبة
قاسم : حتي هي رفضات لكن كنت واضح معاها وخليت ليها لخاتم وخرجت
ليالي : خرجتي من الدار في مرة
قاسم : يعني... انا دابا في الاوطيل تنحل هاد لموضوع
ليالي : انا غنمشي كيف خرجت من الدار جيت عندك خصني نمشي لدارنا باش ندوي مع بابا يدوي لي مع المحامي
قاسم (كيشوف بعيد)
ليالي : قاسم مالك

قاسم (كيشوف بعيد)
ليالي : قاسم مالك
قاسم (تنهد) والو غير سيري انا مزال هنا شوية كنرتاح حدا لبحر
ليالي : واش عندك شي مشكل بنتي ليا مفرحانش اخيرا حنا غنكونو مع بعضنا
قاسم (بتاسم وشد خصلة من شعرها) لا فرحان... غير شي مشاكل في لخدمة
ليالي (حطات ايدها علي وجهو) متخبي عليا والو
قاسم : معرفتش.... غير.... غير مبغيتش نبرزطك
ليالي : قاسم لي تقلقك كيهمني نعرفها
قاسم : ليوم ملي خرجت من الدار ومشيت لوطيل عيط لي رقم غريب ملي جاوبت كان صوت غريب بحال الي شي حد مبدل صوتو وقال ليا بلي باك مات مقتول وخصك تنتاقم ليه.... معرفتش انا قلت غيكون غير شي حد باغي يشتت ليا انتباهي لكن مبغاتش تحيد لي لفكرة من راسي
ليالي : وانت كيفاش غادي تأكد
قاسم غادي نمشي ندوي مع ايمان.... اكيد عندها معلومات مهمة حيت كانت عارفة كاع تفاصيل حياتو وحتى لمحامي وكيبان لي غادي نزور مدام حياة في لحبس
ليالي : عنداك تكون هادي شي عصابة
قاسم : عصابة شنو غتبغي مني
ليالي : معرفتش لكن يبغيو يورطوك فشي امور باش يطلبو منك لفلوس.... او شي حد مسلطهم عليك. ...عفاك متهورش انت مزال مكتعرف اعداءك
قاسم : متخافيش غادي نعرف كيفاش نتحرك... سيري نتي دابا باش متعطليش راه داز لوقت
ليالي : واخا وغادي نعيط ليك صافي
قاسم : صاافي
ركبات في سيارتها ومشات لدارهم وهو بقى قدام لبحر مدة وعيط على ايمان
قاسم : الو ايمان صافا...... بغيتك غدا ضروري مع صباح تكوني عندي.... يلاه تصبحي على خير
هز راسو لسماء كيفكر مزال مباغيش يدخل لدار عيط لصاحبو رضى هو لي كيفهمو وكيرتاح معاه عيط ليه باش يجي عندو ويجلسو مع بعضهم

ليالي وصلات لدارهم لقات باها ومها كيشربو قهوة في صالون
مريم : بنتي اش هاد لمجية في ليل
ليالي : مبغيايش نجي
شوقي (عنقها) اش هاد لهدرة هي غير تشوشات ملي شافت جايا في ليل
ليالي : توحشتكم
مريم (شافت لخدامة مدخلة شانطتها) ليالي واش كاين شي مشكل
ليالي : ماما عافاك مكاين والو جيت غير نشوفكم ونجلس شي ايام نرتاح معاكم توحشتكووم
مريم : وحسام فينو
ليالي : في دارو
مريم : وخليتيه وجيتي
ليالي (ناضت) انا غنطلع لبيتي الى معندكش مشكل حيت عيانة.
يلاه بغات تنطق مريم شاف فيها شوقي باش تسكت وتخليها على خاطرها
شوقي : واخا ابنتي تصبحي على خير
ليالي عطاتو بوسة في لهوى وطلعات

طلع نهار جديد
حل عينيه بشوية وراسو كيحرقو الضوء ديال الشمس ديرونجاه يلاه كيستاعد باش ينوض سمع صوت بكاها دار بالزربة لقاها حداه عريانة و شاف في راسو حتى هو عريان ساترهم غير لغطا ديال الناموسية دوز ايدو على وجهو وهو كيحاول يتدكر شنو وقع لبارح... نطق وهو عاض على سنانو
حسام : شنو كديري في فراشي
نور (كتبوحط) ك.. كيفاش شنو كديري في فراشي... انت لبارح....
حسام (قاطعها وهو شاد شعرها وكيهضر بصوت حاد) نوور مديريش ليا فيها بريئة وقولي شنو وقع بالتفصيل ولى غادي ندمك
نور (كتحاول تفك منو) اووف طلق مني واش انا لي قلت ليك نعس معايا بزز... انت كنتي سكران وكتقول غير ليالي ليالي بقيتي كتشكي عليا وبشوية محسيتش حتي لقيت راسي معاك فلفراش حيت كنبغيك مقدرتش نقاومك وملي وعيت على راسي شديتي بزز وانت كتقول ليالي و...
حسام (علض على سنانو) وشنو كملي
نور (حدرات راسها وهزات طرف دليزار فيه الدم) و خسرت شرفي
حسام (ناض وشدها من دراعها ) كيحساب ليك غنتيق هدشي انتي ايمتى كان عندك الشرف اصلا ولى دابا عاد جايا ديري فيها ربيعة العدوية غادي تهزي تخرجي عليا دابا باراكة من التمتيل برااا
دفعها برا وناضت بالزربة وقفات قدامو بتحدي
نور : اه واخا غادي نمشي عند ليالي ونقول ليها شنو دار راجلها مع ختها وعندي الدليل اني كنت معاك هاد اليلة ونمشي ندير حتى شهادة طبية ونرفع عليك دعوة ونفضحك في المجلات والجرائد (سكتات شوية وبتاسمت) رجل الاعمال حسام الناصيري يغتصب اخت زوجته هههه عنوان زوين ياك
حسام (قرب لعندها وجمعها معاها بطرشة حتى بانو ليها نجوم) كتهدديتي المسخة ياك كيحساب ليك معارفش فعايلك وداك لفيديو لي صورو ليك داك الزامل وانا لي سديت لقدية وسيفطتك لفرنسا ها نسيتي
نور (كتغوت ودموع في عينيها) كنت مزال بنت هداك لفديو صورو ليا سكرانة ومقاسنيش غير. .....غير كان محيد ليا حويجي باش ينصب عليا ونعطيه لفلوس
حسام (شدها من لفك ديالها وزير عليه) غادي تسدي فمك ومتقولي والو ل ليالي ولي غادي نقتلك فهمتي
نور (دفعاتو) علااش كتبغيها تال هاد الدرجة وهي معمرها غتبغيك معمرها
حسام : ماشي سوقك
نور : هي كتبغي واحد اخر وعلي ودو طلبات منك طلاق فهمتي فييق وخليها تمشي بحالها راه مكتستاهلكش
حسام (بقى كيشوف فيها وعاود شدها من دراعها) شنو قلتي
نور : اه كتبغي واحد اخر وقبل متزوج بيك ومغاديش تصدق شكون هو
حسام (زاد زير عليها) نتي كتكدبي
نور : عندي الدليل
حسام : شكون
نور (تنترات منو ومشات هزات التيلي) هاك شوف بعينيك شكون ليوم كانت معاه قبل متجي تجمع حويجها وتمشي
حسام خدا تيلي بزربة وبدا كيشوف تصاور عروقو خرجو حس براسو غادي ينفاجر هاد قاسم من لول ممرتاحش ليه وحتى شوفاتهم كانو مكيعجبوهش ودابا حس براسو اكبر حمار وانها كتستغفلو وكتلاقا مع حبيبها وراء ضهرو وفي شركتو هز ايدو حتى لسماء وضرب التيلي مع الارض حتى تفرشخ وقجها
حسام : كلمة وحدة تخرجيها غادي ندفنك فهمتي ودابا غتلبسي شراوطك وتسناي يجي بلال عندك
نور (كتحرك راسها بأه)
طلقها كترجع نفسها ودخل لدوش طلق عليه لماء بارد دوش وخرج وهو كيفكر كيفاش ينتاقم منو دخل لشركتو ودارو وباغي يدي ليه مراتو لبس حويجو وعيط علي ليالي مكتجاوبش عيط علي بلال لمساعد ديالو وايدو ليمن
حسام : الو بلال ... دابا غتجي تاخد نور من دار عندي تديها لطبيب بيدك ومتخليهاش تحرك حتى دير لفحص وتاخد بيديك النتيجة وتجيبها ليا فهمتي.... يلاه دابا انا غنخرج
قطع وشاف فيها جالسة على طرف الناموسية تدير التلج على وجهها
حسام : غديري فحص باش نتأكد واش كنتي مزال بنت
نور : وشنو فايدتو
حسام (كان غادي ورجع شاف فيها هو براسو معرفش ولكن مكيبغيش شي حد يستغفلو او يضحك عليه) ماشي سوقك نتي ديري لي قلت ليك وباقي غندويو

كانت جالسة كتفطر مع واليديها في جو عائلي
ليالي : نور فين هي مشفتهاش من لبارح
مريم : عيطات ليا وقالت بلي غتبات مع شي صحاباتها
ليالي (مسحات فمها وتقادات في لجلسة وهي كتضور عينيها بيناتهم) بغيت ندوي معاكم في موضوع مهم
شوقي : دوي ابنتي حنا كنسمعو
ليالي (سكتات شوية ونطقات) انا وحسام غادين نطلقو
مريم (شهقات) كيفاش ... واش حماقيتي اشمن طلاق وحسام .....هو لي بغى يطلقك ..
شوقي : سكتي خلينا نفهمو بعدا شنو كاين .... شنو واقع ابنتي علاش باغين تطلقو
ليالي : انت عارف ابابا اصلا هاد زواج من لول مكانش بإرادتي متجبرتش عليه ولكن كنحس انو مفروض عليا كنحس براسي مخنوقة ابابا منقدرش نعيش هاكا انا دويت مع حسام لبارح وغادي ندوي مع لمحامي
مريم : وحسام وافق باش يطلقك
ليالي : هو مقبلش ولكن مصممة علي لقرار ديالي ولمفروض نتوما كعايلتي خصكم اساندوني وتبغيو سعادتي
مريم : نتي راك معارفاش راسك شنو كديري وانا مغنسمحش ليك فهمتي مغنسمحش لي تطلقي
ليالي : ماما الله يخليك انا كنعرف مزيان شنو كندير وهادي حياتي انا
مريم : اه كتعرفي حتى ملي مشيتي بغيتي هداك ولد الزناقي لي فلخر خلاك مصدومة راك كنتي كتعرفي
ليالي (وقفات) قاسم ماشي ولد الزناقي ومخلانيش فهمتي
مشات خرجات لجردة ومريم شافت في شوقي وهي معصبة غوتات على لخدامة باش تجيب ليها دواها
شوقي : انا غنمشي ندوي معاها
مريم : شوقي رجع لبنتك عقلها انا راه مبقيتش قادرة نتحمل اعصابي غادي ينهارو
خرج موراها لقاها حدا لبيانو ديالها كتلمسو بصباعها وكتحاول تعزف لحن ممفهومش قرب منها ونطق
شوقي : قاسم رجع
ليالي : انا كنبغيه ابابا وعمري مقدرت نكون زوجة لحسام علاش غنعيش كنعدب راسي ونعدب جوج ديال الناس معايا قاسم حيت بعيد عليا وحسام حيت معمري نقدر نكون ليه
شوقي : وعلاش مشا
ليالي : كانو عندو ضروف صدق عندو باه وانت كتعرفو هو من اغنى رجال الاعمال دابا
شوقي : نتي عمر لفلوس مكانت مهمة عندك
ليالي : وباقة ماشي مهمة لمهم هو انو عمرو مخلاني
شوقي : متأكدة من قرارك
ليالي : عمري مكنت متأكدة من شي قرار بحال كيف دابا
شوقي : انا ديما معاك
ليالي ( عنقاتو) كنبغيك انت احسن اب
شوقي : كنتمنى حسام ميعاندش معاك

قاسم : خديتي ليا اذن باش نشوف حياة اسي كمال
كمال المحامي : اه اولدي خديت موعد ليوم مورا الضهر تقدر تشوفها
قاسم : مزيان لكان الواليد بصح مات مقتول كاين غير هي وصلاح لي ممكن يديروها
ايمان : وانت كضن انها غتقول ليك انا قتلت باباك .... اكيد لا
قاسم : غيكون دليل... انا دابا معارفش منين غنبدا ولكن خص نواجهها وردت فعلها غادي تبين لي
ايمان : دليل اكيد غادي يكون ولكن منضنش ساهل تلقاه
قاسم : شكون كان كيبقى مع الواليد قبل ميموت.... ونهار مات كيفاش عرفتو .. ..ايمان بغيتك تعاودي لي كلشي بالتفصيل
ايمان : مكانش بزاف ميتعاود... سي قاسم من بعد معرف ان صلاح ماشي ولدو كيحساب ليه حياة كتخونو وخصوصا كان داك الساعة عرف بلي ماماك ملي مشات ممشاتش لخاطرها وبلي كانت حاملة منو وهو عندو ولد من لحمو ودمو عاش 26 عام وهو بعيد عليه تم جاتو كريز وهزوه لسبيطار ...موراها بغات حياة تبرء راسها باش متخرجش خاوية لوفاض اكيد مغتستسلمش وتسمح ليه يتخلى عليها بهاد السهولة دارت تحليل تبتات فيه بلي صلاح ماشي ولدها حتى هي وهنا حاولات تقنعو بلي نهار ولدات فسبيطار سرقو ليها ولدها وبدلوه ليها بولد اخر ولكن سي قاسم كان مشغول بأنو يلقاك واخا هو شد لفراش ومبقاش كيقدر ينوض ولى عايش غير بالالات والاوكسيجين الاصطناعي الاطباء قالو غيتحسن وهو كان عندو امل لشافك يولي بيخير وفعلا ملي تلاقيتو فلمستشفى بدات كترجع ليه صحتو هدشي علاش الاطباء قررو باش يخرجوه من ويبقى فدار تحت العناية ورسلو معاه ممرضة فداك لوقت انا و سي كمال تشغلنا معاك ومع الشركة ومبقيناش تنشوفوه بزاف ...حتى لنهار لي عيطات فيه حياة وخبراتنا بلي مات
قاسم : وهي وصلاح كانو معاه في الدار
ايمان : اه هي رفضات تخليه وهو واخا عرف ان صلاح ماشي ولدو بصح مبغاش يسمح فيه حيت رباه بحال ولدو وهو كان مجرد طفل معندوش دنب
قاسم : ولخدامات لي كانو فدار مزال هوما نفسهم
ايمان : لا كانو غير جوج هوما لي كتيق فيهم حياة ومورة ممات سي قاسم تبدلو
قاسم : اممم اذا خصني نلقاهم.
ايمان : نقدر نعاونك فهاد القدية.
قاسم : صافي نعول عليك.
ايمان : كون هاني

نمشيو عند حسام لشركة
حسام : فين كنتي من صباح
بلال : كنت مع نور كيف قلتي لي اسي حسام
حسام : اه ومن بعد
بلال : لفحص اسي حسام اكد بلي انسة نور...
حسام (بعصبية) كمل
بلال : انسة نور كانت فييرج اسي حسام
حسام : فين هي دابا
بلال : وصلتها لدارهم كيف طلبتي مني
حسام : واخا خلينا منها دابا هاديك مني ليها انت غتمشي دابا تجيب ليا داك صلاح فهمتي
بلال : واخا سي حسام بغيتيه ليوم
حسام : واش مكتفهمش... دابااا ماشي غير ليوم طير نزل غطس تحت الارض لمهم جبدو ليا دابا
بلال : واخا اسيدي

ليالي في بيتها كدوي في التيلي وهي متكيا على الناموسية : الو قاسم صافا
قاسم واقف قدام الشرفة وكيدوي معاها : صافا ....ونتي ...شنو مزال درتي
ليالي : انا دابا دويت مع الدار واخا ماما رفضات بابا فهمني وغيدوي مع حسام عاد نرفع دعوى مبغاش لمشاكل
قاسم : مزيان قريب نتجمعو ياك ...توحشتك
ليالي (عضات على شفيفها وبتاسمت بلى متقول حتى شي كلمة )
قاسم (بتاسم بدورو) شفت حنيكاتك لي حمارو هه
ليالي (حشمات قلبها كيزدح من لفرحة كتحس بحال الى رجعات عام لور ) وصافي.. قولي بعدا شنو درتي انت

نزلو لتحت
مريم : حسام ولدي تفضل مرحبا بيك.
حسام : شكرا اخالتي..... فين ليالي
مريم : ليالي في بيتها اجي شرب معايا شي قهوة على معيطات عليها لخدامة
حسام (مشى جيهة الدروج) بلاش انا نطلع عندها
حل عليها لبيت قفزات من بلاصتها ملي شافتو ودارت تيلي وراها
ليالي : شنو كدير واش مكدقش
حسام : ندق حيت بغيت ندخل عند مراتي
ليالي : حسام خرج
حسام (كيقرب منها) باقي مدرتيش عقلك
ليالي (كتأكد كلامها )حساام خراج
حسام : معامن كنتي كدوي في التيلي
ليالي : مع.... مع رانية.... علاش كتسول
حسام : حيت من حقي نسول

عند قاسم مزال لخط مفتوح تعصب وهو كيسمع كلامهم ومبغاش يقطع

حسام : بغيت ندوي معاك
ليالي : معندنا فاش ندويو لي عندي قلتو لبابا وهو غادي يدوي معاك
حسام (بعصبية) انا مزوج بيك ماشي من باك (دوز ايدو علي راسو وتنهد) ليالي خصنا ندويو
ليالي : واخا خرج دابا وانا غنلبس ونزل عندك
حسام (كيشوف فيها) واخا متعطليش
خرج من لبيت وهي تبعاتو تأكدات راه مشى وسدات عليها وكملات لهدرة مع قاسم
ليالي : الو قاسم
قاسم : سمعت كلشي شنو مزال باغي منك ها عنداك يقرب منك او يأديك كنقسم حتي نقتلو بيدي
ليالي : عافاك اقاسم متعصبش وتهور غادي نشوف شنو باغي وصافي يلاه غنقطع حتي لمن بعد
قاسم : واخا هانا معاك صافي ويكون فعلمك اني نعطي عمري على ودك
ليالي (بتاسمت) عارفة

بدلات حويجها ونزلات عندو كان جالس في لحديقة
ليالي : شنو بغيتي تقول كنسمعك
حسام : علاش باغة تطلقي مني شنو السبب
ليالي : حيت مكنبغيكش
حسام : حيت مكتبغينيش ولى حيت كتبغي واحد اخر
ليالي : مفهمتش منين جبتي هاد لهدرة
حسام (حط ايدو على كتفها وهو كيضغط بصباعو على عنقها) متستحمرينيش ومتكدبيش عليا قاسم ياك.... شوفي غادي نقول ليك جوج كلمات يا غتنهي هاد اللعبة الحامضة وترجعي معايا دابا يا غادي تشوفي وجهي التاني
ليالي (وعتها في عنقها كتحاول تحيد ايدو) انت غير كتهدر متقدرش تأديني
حسام (رخف عليها وهو كيبتاسم) اه بصح انا منقدرش نأديك ولكن نقدر نأديه هو وعايلتو وحتى عايلتك (فجأة بدا كيبان عليه لغضب) كنقسم ليك واخا نعرف نحرقهم كاملين وتبقاي غير نتي
ليالي : وفنضرك لدرتي هدشي غنكون ليك واخا نعرف نقتل راسي
حسام : مغاديش نسمح ليك حيت نتي ملكي انا ماشي ملك راسك فهمتي ولكن لفكرتي تكوني ليه غنقتلو ونقتلك ونقتل حتى راسي
ليالي : عمرني عرفتك هاكا علاش غترغمني باش نبقى معاك رغم انك عرفتي بلي انا كنبغي واحد اخر
حسام : حيت انا كيعجبني التحدي وهو تحداني وانا مستحيل نخسر
ليالي : والى مجيتش معاك دابا شنو غادي يوقع
حسام جبد التيلي ديالو دوز النمرة وفتح مكبر الصوت
حسام : الو بلال فينك
بلال : انا قدام لفيلا
حسام : وشكون كاين
بلال : كاين غير مو وخطيبتو... حارس واحد وجوج خدامات
حسام (بتاسم بمكر) واخا تسنى نعيط ليك ونفد دكشي لي قلت
ليالي : شنو غنيفد مفهمتش
حسام : كنضن تورية الي تأدات هدشي غادي يفرحك وحتى هو مغاديش يأتر فيه ولكن الحاجة مسكينة قلبها ضعيف...
ليالي (قاطعاتو والدموع في عينيها) واش انت مجرم ميمكنش دير هدشي
حسام (شدها من دراعها) يمكن نديرو وندير كتر منو لمدرتيش عقلك دابا غتزيدي قدامي ولنعيط ليه باش ينفد
ليالي (كتبكي وهي كدرب فيه ) انت حيوان حيوااان
حسام (شدها وعنقها ملي شاف مريم كتراقبهم من الشرفة وهو كيدوي في ودنها) ماماك كتشوف متخليها تحس بالو انا غنتسناك في السيارة والهدرة لي قلتها ركنعنيها

نرجعو عند قاسم لي خرج من مقابلتو مع حياة بدون ميستافد شي حاجة اكيد غتنكر وتزيف لحقائق لكن شكو بدا كيتأكد لقى ايمان كتسناه
ايمان : شنو درتي
قاسم : كيف متوقت ونتي
ايمان : لخدامات معارفين والو كتكون وحدة بنهار وبليل كتمشي ووحدة كتكون ديما هو مات فليل ولخرا قالت بلي كانت ناعسة ملي سمعات لغوات وللمرضة هي لي كانت معاه
قاسم : اذا خصنا نقلبو على للمرضة
ايمان : وي عرفتك غتقولها لكن انا ملقيتش ليها الاتر
قاسم : ماشي مشكل غنبقاو نقلبو حتى نلقاوها

دازو ساعات و تشغل بالو على ليالي وقرر باش يعيط عليها يطمأن
قاسم : الو حياتي
ليالي : الو
قاسم : شنو درتي مع حسام
ليالي (هزات عينها في حسام لي واقف فوق راسها وكيسمع كلشي مكرهاتش في هاد اللحضة تنشق الارض ودخل فيها جمعات قوتها ونطقات) قاسم منقدرش نطلق
قاسم (مبقى فاهم والو حس بحال شي طرشة جاتو على غفلة) كيفاش ياك تافقنا ياك دويتي معاه شنو قاليك.... واش دار ليك شي حاجة
حسام (خدا منها التيليفون وجاوبو) سي قاسم كيبان ليا انا لي خص نسول مراتي هاد السؤال حيت هي كتبقى مراتي وانت لي باغي تاخدها مني سمعني مزيان من الاحسن نتفاهمو ونفضو هاد الشركة لي بيناتنا وتنسا ليالي وتنساني عليك او غادي ندير معاك شغل اخر
قاسم (ولى كيغلي خصوصا وانو هي معاه دابا كيفاش غادي يعاملها من بعد معرف كلشي وكيفاش عرف مئة وميات سؤال كيضورو في بالو لكن خصو يعرف كيفاش ينصرف) انت غالط اسي حسام ليالي كانت ديالي وانت لي خديتيها مني ولكن متحلمش اني نحط السلاح بسوهولة ونستسلم والشراكة صعيب باش نفضوها
حسام : انت مزال مكتعرفنيش اقاسم انا عمري مستسلمت وكيعجبني لعناد
قاسم : وانا كتر منك وكنواعد انا اول واحد يخليك تستسلم ..اه ونبغي نبهك متحاولش تأدي ليالي حسن ليك
حسام (بدا كيضحك) هههه خاف غير على راسك وعلى عايلتك الى عاود قربتي منها
قطع عليه وخلاه كيتقلى باغي يوصل ليها اما حسام ضرب التيلي مع الارض حتى تشتت : سمعيني مزيان كلشي غيبقى كيف هو بحال الى موقع والو وعرفتي شنو حتى الشركة غتبقاي تمشي ليها والى شفت شي حاجة معجباتنيش غادي نتفاهمو داك الساع وكنتمنى تاخدي كلامي بعين الاعتبار
ليالي : مغاديش نكون ليك فهمتي غادي طلقني بغيتي او كرهتي يمكن ماشي دابا ولكن غادي نبعد عليك

نمشيو عند قاسم كان كيمشي ويجي فغرفتو بنفاد صبر كيفكر كيفاش يوصل ليها سمع دقان فبابو مشى حل وتفاجأ بشكون قدامو
قاسم : لواليدة
كلتوم (دخلات ) اه مك لي خليتيها وزدتي بلى متعرف عليك والو شنو كدير فلوطيل ومخلي دارك
قاسم : لواليدة ركنت غنجي عندك ندوي معاك فهاد الموضوع غير مساليتش
ليالي : غير مساليتيش هه ملهي مع ديك السحارة بانت عوتاني في حياتك ياك ولات مزوجة شنو مزال بغات منك ولى دابا حيت وليتي في لمستوى ديالها
قاسم : شكون قالك هاد لهدرة نتي مفاهمة والو
كلتوم : ياااك اولدي انا وليت مفاهمة والو دابا سمعني مزيان انا مغادي نبقى مك ولى انت ولدي الى سمحتي في ديك اليتيمة مسكينة لي عطاتك حياتها كاملة وتمنات غير تشوف فيها خليتيها كيف كتبكي ليل ونهار والنعمة مكدخلش لكرشها ربي غادي يحاسبك على كل دمعة نزلات من عينها وعلى سخطك معايا ختار يا تمشي عندها ويتبعك السخط يا ترجع لدارك وخطيبتك
قالت هاد لكلام ومشات حاول يفهمها لكن مبغاتش خلاتو غارق فوسط متاهة ومعارفش منين يخرج حتي بان ليه النور وعاودو تسدو الابواب فوجهو

بلال : صلاح اسي حسام واحد طايش ومكنضنكس غادي ينفعنا مزال حياة مرأة دكية وكتعرف الجهة لي خصها تختار
حسام : هدشي لي بان ليك انت ولكن انا بان لا ان صلاح غبي ونقدرو نلعبو بيه كيف بغينا ومدام باغي يتعاون معانا ويدير دكشي لي قلت ليه هدشي مزيان وحياة غادي تخرجها من الحبس حتى هي غادين نحتاجوها
بلال : واخا اسيدي
حسام : وشوف لينا شي حد عندو في الشركة يكون فصفنا باش يجيب لينا اخبارو
بلال : موجود اسيدي
حسام : انا غادي نشوف اسي قاسم غير بيا ولى بيك

نميشو عند ليالي ملي رجعات لدار وهي سادة عليها في بيتها وكتبكي كتحس بحال المسجونة واخا عندها كامل حريتها بغات تقول ليه السبب وانو هددها بيه ومقدراتش خافت عليه حارت فأمرها ومعرفات مدير خرجات لشرفة ووقفات كتشوف ضوء القمر كيف لعادة هو لي كيتشوف فيه وجهو من نهار غاب عليها تنهدات وهي كتنزل راسها لتحت بان ليها خيال ديال شي حد في الحديقة بقات متبعاه حتى وضاح ليها شكون هو تفاجأة ملي شافتو شهقات و حطات يدها على فمها
قاسم كان في الجردة ديال دارها جا باش يشوفها مقدرش يصبر نقز من فوق السور ودخل من لور دار ليها اشارة باش تسكت وتنزل عندو
ليالي دخلات كتجوي دارت عليها كاب ونزلات مشات من لباب لخلفي وخرجات لحديقة لي كانت كبيرة ومغطيها الشجر من واحد الناحية دخلات وسط الشجر وهي كتقلب عليه فين شافتو كتعيط بشويا
ليالي : قاسم... قاسم... فينك
شهقات ملي خرج من وراها : حرام عليك خلعتيني كيفاش درتي حتى دخلتي هنا
قاسم (شد في ايديها) مقدرتش نصبر ملي عرفت انك رجعتي عند هاد الحيوان علاش رجعتي شنو دار ليك واش بزز عليك شي حاجة ليالي (حدرات راسها معرفاتش واش تقول ليه او متقولش) معرفتش شنو نقول ليك في الصراحة هو
قاسم : هو شنو كملي واش قرب ليك واش اداك
ليالي : لا هو ميقدر يدير ليا والو ولكن هددني غادي يأدي عايلتي ويأديك حتى انت بغيت حتى نلقى شي طريقة نحاول نقنعو بيها هو راه مريض عمري عرفتو هاكا
قاسم : شنو هدشي كتقولي كتزيدي تخوفيني عليك هو راه ميمكن يدير ليك والو غير كيقول هاكاك باش تخافي متديهاش فكلامو
ليالي : الا هو كيعني دكشي لي قال انا سمعتو بدوني سيفط رجالو ل. ... (وحبسات كلامها)
قاسم : فين سيفط رجالو دوي مالك حبستي
ليالي : سيفط رجالو لعندك لدار وقال ليهم باش يدخلو يأديو ماماك وانا مقدرتش ميمكنش نسمح لراسي لوقعات ليهم شي حاجة بسبابي انت خصك ترجع لدارك وتزيد لحراسة باش تبقاو في امان انا اول مرة نكتاشف ان حسام خطير بزاف
قاسم بقى كيشوف فيها وهو مصدوم معرف ميقول في هاد اللحضة حسام كان واقف في شرفة المكتب ديالو وبانت ليه حركة في الحديقة وسمع شي صوت نزل من الشرفة وبدا جاي ناحيتهم

حسام خرج لحديقة ومشى جيهتهم حتى وصل عندها
حسام : شنو كديري هنا
ليالي : خرجت نشم غير لهوى او لي بغيتي تحبس عليا حتى لهوى
حسام (قربليها وحط ايديه على كتافها كيطلع ليها لكاب) لجو بارد دخلي غادي تمرضي
ليالي تنترات منو ومشات وقلبها كضرب كون مشسافتوش جاي في اخر لحضة كان غادي يشوفهم دخلات لدار ومشات ديريكت لبيتها اما حسام بقى كيضور عينيه في الحديقة بحال الى حس بشي حاجة ماشي عادية عيط على الحارس لي قدام لباب وسولو معرف منو والو وصاه ودار فبالو باش يزيد حراس خرين وخرج

نمشيو لدار قاسم خلى الاوطيل ورجع للفيلا كانت تورية موسدة ركبة كلتوم في الصالون وسارحة بتفكيرها ملي شافتو دخل قلبها قفز من بلاصتو بحال الى ممصدقاش ناضت بالزربة ومشات كتجري عندو
تورية : قاسم رجعتي عرفتك غادي ترجع اانت غير كنتي مقلق راه قلتها لماما قلت ليها غادي يرجع
قاسم (بتاسم ليها بزز ومشى عند كلتوم جلس حداها ) كلتوم توحشتك (هز ايدها وباسها) متبقايش مقلقة عليا راني منقدرش نشوفك مقلقة هانا رجعت
كلتوم : ايوا هي لدرتي عقلك ورجعتي لدارك وخطيبتك شوف لبنت كيف لوردة وانت معارفش بقيمتها مشيتي وخليتيها كدبل ماشي حرام عليك
قاسم : صافي الواليدة هدا موضوع اخر من بعد وندويو فيه
كلتوم : لا كلشي غندويو فيه دابا (شافت في تورية) جيبي لخاتم
تورية (كانت جالسة حداها من الجهة الاخرا حدرات راسها وهي كتلعب بصباعها ) انا اخالتي مبغيتش نبزز عليه شي حاجة لمهم هو يرجع ليك نتي وميبقاش شاطنك ومقلقك
كلتوم : انا مغادي نفرح حتى نشوف ولادكم وحتي ندير بوصية مك وباك ونأمن عليك معاه قبل منموت
قاسم شاف في تورية باش غير تنوض ناضت فرحانة كتجري جابت لخاتم وجات عطاتو ليه دارو في صبعو وبتاسم ليها
قاسم : هانا الواليدة بقيتي على خاطرك
كلتوم : ايوا هاكاك اولدي كون بعقلك الله يرضي عليك
قاسم (شاف في تورية) واخا ندويو شوية
تورية (ناضت غطير بالفرحة) اه واخا ندويو
خرج لحديقة وتبعاتو وهي كتشوف في كلتوم بنضرات كلهم فرح وسعادة

تورية (ناضت غطير بالفرحة) اه واخا ندويو
خرج لحديقة وتبعاتو وهي كتشوف في كلتوم بنضرات كلهم فرح وسعادة
تورية (قربات منو) انا كنسمعك شوف انا متفهماك عادي من الضغوطات لي عليك مغاديش تعرف تحكم في راسك وحتى انا كنبقى نضغط عليك (قربات وشدات ليه في ايدو) انا كنواعدك مغنبقاش نطلب منك شي حاجة وغادي نتسناك لاخر نهار في حياتي معنديش مشكل.....
قاسم(قاطعها وجر ايدو من ايدها وهو كيتنهد) تورية انا معرفتش كيفاش نشرحها ليك راه ميمكنش نبغيك وميمكنش نتخيل راسي معاك بطريقة خرا من غير خوك انا رجعت حيت مبغيتيش الواليدة تقلق عليا وحيت رضاتها كتهمني وحتى هاد لخاتم رديتو على ودها لكن انا راه كنبغي ليالي وحتى هي غادي تفرق مع راجلها ونتجمعو انا مبغيتش نزيد نأديك ونضيع ليك حياتك هاد لخاتم لي في ايدك عمرو غادي يقيدك سيري عيشي حياتك الى ميكون شي حد لي غادي يبغيك ويوهبك حياتو داك النهار غنفرح ليك من كل قلبي ونرتاح من جيهتك كتر من لكنتي معايا (حط ايدو على كتفها) تورية كوني كبر من هاكا بلاش مدخلي الواليدة فهاد المواضيع هدشي بيني وبينك ولبصح كتبغيني عاونيني باش منخسرش الام ديالي
تورية ( كتحس بالدنيا كدور بيها نزلو دموعها بحال لحجر فوق خدودها لداخل ديالها صرخة تهرس الصخر ولكن كاتماها بتاسمت ) رجعات ليك
قاسم : اه قريب غترجع
تورية : انا بغيتك انت مبغيتش واحد اخر
قاسم (شد وجها بين ايديه وطبع بوسة على جبينها) تورية سمحي ليا ميمكنش نبغيك ومنقدرش نواعدك بشي حاجة منقدرش نوفي بيها ... صافي تفاهمنا
تورية حركات راسها بأه .. دخل لدار وخلاها كتحاول تبرد راسها ودموعها مبغاوش يحبسو

نمشيو عند حسام لي ونور كانو في غرفة في الاوطيل
حسام : شنو بغيتي علاش طبتي تشوفيني
نور : ياك تأكدتي بلي انت اول واحد قاسني حسام انا كنبغيك علاش عاود رجعتيها هي رمبغاتكش
حسام (جالس وكيشرب) ومن بعد
نور : كيفاش من بعد واش انت مكتحسش راه مكتبغيكش مكتبغييكش مكتعطيكش حتى حقك كتبغيه هو فاش كتكون انت كتفكر فيها كتكون معاااه هو فهمتي
حسام (شير عليها بلكاس جاب الله مجاش فيها درب في لحيط حتى تشتت وناض قجها ) ماشي سوقك فهمتي ماشي سوووقك واخر مرة تقولي بحال هاد لهدرة
نور حطات ايديها على وجهو وكتشوف فيه بطريقة متيرة حتى رخف منها
حسام : سسيري بحالك
نور : انا صورت هاديك اليلة
حسام :كيفاش
نور (رجعات قربات منو وهي حاطة ايدها على صدرو وكتشوف فشفايفو) خليني غير حداك ولي بيغيتيه نديرو معاك
حسام دفعها حتى لسقات على لحيط وبدا كيبوسها وكيمص شفيفها وهي متفاعلة معاه.
حسام : عرفتي شنو لحاجة لوحيدة لي كتعجبني فيك
نور بتلسمت بمعنى شنو
حسام (دفعها فوق الناموسية) اسرارك انك توسخي راسك

تلاقاو في نفس لبلاصة ديالهم كيف مقال ليها لبارح حدا لبحر نفس لبلاصة لي شهدات على حبهم ولي كون كانت تنطق كانت تحكي شحال عشقو وشحال عاناو
ليالي : انا خايفة يكون كيراقبني
قاسم : متخافيش انا كنعرفك قوية كتر من هاكة شوفي انا عارف شنو كندير هو راه مغادي يقدر يدير والو غير ديري لي قلت ليك
ليالي : انا خفت يأديك او يأدي عايلتك
قاسم : متخافيش انا رجعت لدار وزدت لحراسة وكاين حتى لكاميرات هو مغيقدرش يدير شي حاجة.... (شد في ايدها) وحتى الى وقعات شي حاجة ابدا واش تكوني نتي مسؤولة عليها
ليالي ( حدرات عينيها لصبعو وبان ليها لخاتم) انت رجعتي لتورية
قاسم (شاف في ايدو ونزلها) لا انا تافقت معاها هدشي مؤقت علامن نلقاو حل غير باش الواليدة متقلقش عليا
ليالي (حدرات راسها) واخا
قاسم (هز وجها بيديه) شنو
ليالي : صافي ليوم غادي نرفع الدعوة
قاسم : مزيان ... يلاه دابا خص نمشي حتى نتلاقاو في الشركة

بعد ساعات في الشركة
كان اجتماع لشركتين شركة ناصيري وشركة العماري وجميع المساهمين حاضرين
قاسم : بما اننا كلنا هنا نبداو الاجتماع ديالنا
فجأة تحل لباب ديال قاعة الاجتماعات والصدمة هي شكون كان
حياة : تسناو كيفاش غادين تبداو الاجتماع بلى بيا
قاسم (وقف) علاش شكون سيادتكم وشنو كديري هنا اصلا
ايمان (لي بضورها كانت مصدومة كتحاول تهدن قاسم باش ميوقعش في الغلط) بلاتي خليها تفهمنا
قاسم : شنو غتفهمنا شنو ياك كانت فلحبس
حياة : اه بصح كنت ولكن نزلات عليا التهمة ملي تبتت انو معنديش يد فهدشي ويمكن انت معارفش ان حتى انا عندي نسبة من الاسهم انا و صلا
قاسم (كيشوف في ايمان)
ايمان : صدقني مكنتش عارفة هدشي
حياة (دخلات وجلسات) مدام عرفتو دابا مضيعوش لوقت وخليونا نبداو الاجتماع اه وبالنسبة لصلاح هو داير ليا توكيل باش نتصرف في الاسهم ديالو
قاسم ولى كيغلي غادي ينفاجر شاف في حسام لي كان كيبتاسم بمكر عرفو غيكون هو لي عاون حياة باش تخرج من لحبس وهدي اكيد شي خطة مزااال مبانو معالمها ضور عينو ل ليالي لي كانت بضورها متفاجأة وكتشوف فيه بتوتر بحال الى كتأكد ليه ان حسام هو السبب
حسام : احم مدام نضمو الاعضاء جداد خلينا نبداو الاجتماع ديالنا يلاه
قاسم : غنبداو الاجتماع ديالنا تفضلو

حسام : كنضن انو ماشي شغلك دكشي لي كنديرو في الشركة انسيبي لعزيز كون ما انا لي نقدتك من الافلاس مكنتيش غتكون دابا كتواجهني بهاد الهدرة ومكانش غادي يكون عندك حتى الوجه باش تشوف فيا
شوقي : لزم حدودك احسام واحترمني انا هادشي بنيتو مع باك والى هو مكانش قدر يربيك باش تحافض على هدشي انا مغنسمحش ليك تخربو هدشي بنيناه بجهد لسينين وانا عارف شنو كتخلود مورا ضهرو
حسام ( قرب منو بتحدي) شنو كتهددني اشوقي
يلاه بغا ينطق تحل لباب ودخلات ليالي
ليالي : ياك لاباس كنسمع صوتكم من برا
حسام (بتاسم وقرب منها حط ايدو على خصرها) ماشي شي حاجة احياتي مجرد نقاش في الخدمة وكنضن ان نسيبي كياخد الامور بجدية اكتر
ليالي : بابا شنو واقع
شوقي ( كيبان معصب ملي كتاشف ان حسام متورط مع عصابات ديال المافيا وكيهرب المخدرات وسط السلعة ديالهم ولكن مبغاش يبن ليها) والو ابنتي كيف قال حسام مجرد نقاش على لخدمة غير سيري نتي
ليالي : واخا انا كنت جايا نعلمك بلي غنغرج دابا عندي موعد مع رانية
حسام (باسها في خدها) سيري احياتي وحضي راسك راه لوقت خايبة
هي خرجات وشوقي بغى يكمل كلامو قاطعو حسام : سمعني مزيان غادي تسكت ونتجبدش هاد لهدرة على فمك مرة خرا هادي شركي وانا حر فيها متخلينيش نستخدم اساليب مسخة وانت راه عندك علامن تخاف
شوقي : عنداك يحساب ليك واش ليالي :غادي تبقى ليك انا دابا ملي زدت تأكدت من حقيقتك غادي نتأكد براسي انها تطلق منك وغادي نوقف فجنبها ولو بحياتي حيت بنتي مسعيداش معاك وفوق هدشي ميمكنش نسمح ليها تكمل مع واحد مجرم
حسام : لي فجهدك ديرو وحياتك راه هي لي كتكساب اصلا باش ضحي بيها وكنواعدك غنخليها تضحية تستاهل
شوفي خرج من لمكتب معصب من هدرة حسام معرفش شنو خصو يدير ولكن خصو يتأكد من حاجة وحدة واش فعلا قاسم كيبغي ليالي ويقدر يرقف في جنبها اما حسام فخططو الشريرة واضحة كيتسنا غير لوقت لمناسب باش ينفد سمع دقان على باب مكتبو
حسام : دخل
ايمان (دخلات)
حسام (مستغرب) اوو انسة ايمان في خليتي قاسم ياكما تلفتي هه
ايمان : لا انا متلفتش وعارفاك شنو كدير ولاش تتخطط انا بغيت ندوي معاك بخصوص قاسم
حسام : شنو مسيفطك باش تفاوضي معايا
ايمان : لا هو معارفش اني جيت انا لي عندي منقول ليك
حسام : كنسمع
ايمان : جوج كلمات دكشي لي كتفكر فيه غير حيدو من بالك حيت الى اديتي قاسم غادي نخلي حياتك جحيم
حسام (كيسفق وهو مبتاسم) اوو ههه ضحكتيني فصارحة هاد قاسم مهجباتو بزاف

حسام (كيسفق وهو مبتاسم) اوو ههه ضحكتيني فصارحة هاد قاسم معجباتو بزاف
ايمان (قربات وجلسات حداه) انا عارفاك شنو كتسوا وعارفة كاع الاعمال الغير القانونية لي كدير وعندي حتى الادلة (جبدات كلي من ساكها )مصدقتينيش شوف هادي شنو فيها ولي فيها غير جزء من دكشي لي عندي كامل انا نقدر نغرقك في الحبس حياتك كلها ونقدر نخلي الشركاء دياولك في اعمال التهريب يعرفو انك كتلعب من وراء ضهرهم ويصفيوك واخر حاجة اني نفكر نقول هدشي للاب ديالك حيت متأكدة ان شخص بحالك يقتل الاب ديالو مقابل مصلحتو
حسام مد ايدو خدا لكلي وهو مصدوم من كلامها بصح فاجأتو جرأتها وتهديدها معرفش حتى كيفاش يرد عليها
ايمان (وقفات وتوجهات لباب وهي كتبتاسم بانتصاو عاودت ضارت عندو) اه بلى متحاول تقتلني حيت كلشي الادلة في يد شخص اخر بمجرد ميوقع لي شي حاجة غادي يفضحك
كملات خطواتها وخرجات خلاتو عاجز على الرد كل همو يعرف يشنو كاين في داك لكلي دارو في لبيسي وخدمو ولي شافو زاد صدمو كان فيها فيديو ليه هو و المساعد ديالو بلال ورجال خرين كيدخلو السلعة ديال المخدرات لديبو ومن بعد وقع سوء تفاهم مع شي راجل وقتلو هدشي كلو مسجل صوت وصورة خبط لبسي وغوت بالفقصة لي شداتو
حسام : حقييرة منين خرجات هادي (هز السماعة ديال الهاتف ) بلال دابا تجي عندي لمكتب

في جهة خرا شوقي وقاسم لي تلاقاو في لكافي من بعد متاصل شوقي بيه وطلب منو يتشاوفو
قاسم : سي شوقي مبغيتش نرفض الدعوة ديالك لكن عندي اعمال شوية مستعجلة كنفضل ندخلو في الموضوع
شوقي : انا اولدي عيطت عليك ليوم باش نتأكد من حاجة وحدة
قاسم : شنو هي
شوقي : انت كتبغيها قد ما كتبغيك
قاسم (سكت مدة ونطق) كتر متخيل انا عارف نتوما مراضينش على علاقتنا لكن انا وليالي ختارينا حياتنا الله يخليكم متوقفوش في وجه سعادتها
شوقي : كون متأكد انو لكان شي حد غيوقف في طريقها اكيد ماشي انا ..... ليوم عيطت ليك باش نقول ليك انا في جنبكم حيت حسام شخص ماشي ساهل
قاسم : انا عارف هدشي
شوقي : لا انت معارف والو حسام راه مجرم ماشي شخص عادي غادي تحاربو ويمل ويستسلم
قاسم (ركز معاه) مفهمتش
شوقي : انا عرفت شي حويج بالصدفة لكن خصني ادلة وهدشي هو لي غادي يعاوننا باش نتهناو منو

حسام : كيفاش وصل لفيديو ليدين هاديك الحقيرة فهمنيييي ياك غير انت لي عارف هدشي
بلال : كنقسم ليك اسيدي معرفتش انا كندير كاع احتياطاتي
حسام (قجو) انت عارف اني نقدر نمحيك في ليلة وحدة ياك
بلال (كيحرك راسو بأه وهو كيكح)
حسام (طلق منو) غبر دابا من قدامي
خرج كيجري وحسام بقى يخبط لي قدامو شاعلة فيه لعافية غادي يطرطق دخلات سكريتيرة فجأة ملي شافت حالتو رجعات
حسام : اجي لهنا شنو كنتي باغة
السكريتيرة ( دخلات وهي مترددة) ا سي حسام غير واحد الضرف من المحكمة ومبغيتش نعطلو
حسام (باستغراب) شنو فيه ....اري نشوف
السكرتيرة عطاتو ليه بتوتر ورجعات لول حلو وزاد تصدم وتعصب كتر وكتر
حسام : ايمتى وصل هدشي
السكرتيرة : غير دابا
حسام (كيقطع فيه) صافي خرجي بحالك
السكرتيرة مصدقات خرجات كتجري
حسام (هز التيلي ديالو ودوز الرقم ديال ليالي مكتجاوبش ) واخا امدام ليالي مشيتي درتي لي فراسك ورفعتي دعوى ديال الطلاق... لمرة لي فاتت نبهتك وهاد المرة غادي نعرف كيفاش نرجعك وبكن بلاتي نتفك من هاد ايمان ونشوف شنو باغة
عاود دوز النمرة ديال ايمان
حسام : غادي نتلاقاو من هنا ساعة
ايمان : شفتي لفيديو
حسام : اكيد وكاين بزاف ميتقال
قطع عليها ودخل عندو بلال
حسام (شاف فيه) شنو باغي لاش كتوريني كمارتك تاني... ياك قلت ليك مبغيتش نشوفك
بلال : احم كاين خبر مهم وبغيت نوصلو ليك
حسام : دوي
بلال : كنتي قلتي ليا نراقب سي شوقي
حسام : ايوا كاين شي جديد
بلال : ليوم تلاقى هو وقاسم
حسام (زاد جعر) وشنو قالو لبعضهم فاش دواو يلاه نطق
بلال : مقدرتش نعرف
حسام (عطاه كروشي) انت بديتي كطلع لي في راسي علاااش مخدمك معايا ملي عارفشذ
بلال : س... سمح ليا اسيدي انا الرجال لي كلفتهم يراقبوه قدرو غير يصوروهم ومقدروش يسمعو
حسام : برااا حرج برا خراااج
بلال خرج بالزربة وحسام كمل تهراس في دكشي لي خلى قبيلة
حسام : انا غنوريك الشارف لاخر باغين تافقو عليا وهاد الق** ديال ايمان تاهي غنعرف نتسرف معاها كيفاش جابت الادلة كيفاااش

تورية كانت واقفة قدام لبحر فوق الصخر كتبكي وكتفكر واش ديرها او لا الدنيا كحالة في وجهها ملي قال ليها هاديك لهدرة كتشوف في الخاتم لي في ايدها بحصرة من صغرها وهي عمرها بغات او شافت حتى الشوفة فشي واحد اخر من غيرو تخنقات حتى لهوى ديال لبحر مقدرش ينعشها سدات عينيها وهي كتفكر ان هادي هي النهاية قربات خطوة خرا ورخات جسمها حتى حسات بشي ايد تحطات على كتفها شهقات ودارت عندو...

نمشيو لكافي عند ايمان وحسام
حسام : كيفاش قدرتي تجيبي هداك لفيديو
ايمان : كنضن حنا هنا ماشي باش تعرف كيفاش جبتو ولعلمك ماشي هو لوحيد لي عندي كاين اخرين ومنهم صور وحتى تسجيلات صوتية لمكالامتك السرية
حسام (هز لكاس ديال الماء شرب منو) احم شنو لمطلوب مني
ايمان : حاجة وحدة لي بغيت متأديش قاسم الى اديتيه ولو بابسط طريقة غادي ندير كاع لي فجهدي ونستغل كاع لي عندي باش نأديك بأبشع طريقة
حسام ( بتاسم) فخبارك انا معجب بشخصيتك
ايمان (ضحكات) هه هاد لحركات مكياكلوش معايا.
حسام : عمر شي حد هددني وخصوصا مرأة
ايمان : اذا انا اول وحدة ناخد هاد الشرف
حسام : نجيك من الاخر قاسم مباغيش يبعد على مراتي...
ايمان (قاطعاتو) هي لي مباغاش تفرق عليه... شوف انا مستعدة نبعد عليه ليالي لكانت هي السبب لي غادي يخليك تبعد منو ومتأديهش
حسام (باستغراب) كتبغيه
ايمان : كتر مكتصور
حسام (ترسمات الابتسامة على وجهو) اذا حاولي تخليه بعيد على مراتي فهمتي
ايمان : حاول غير انت تخليها قريبة منك
حسام (وقف) كنعرف كيفاش نتصرف مع مراتي خليك نتي في (وضحك) حبيبك
خرج وهي جبدات تيليفونها ودوزات نمرة
ايمان : الو..... كلشي مزيان كنضن غادي يخصنا نخليو ليالي بعيدة على قاسم ..... اه عارفة هادي خدمتي شكرا ليك حيت عاونتيني في شي لاخر..... اوك بسلامة انا عارفة شنو غندير

تورية (شهقات ودارت عندو ملي حط عليها ايدو) هاا رضى شنو كدير هنا
رضى : كنت دايز وشفتك واقفة هنا ياك لاباس مالك
تورية (كتمسح دموعها) والو غير كنت كنشم لهوى وصافي
رضى : اه مزيان كيف غادة نتي وقاسم ايمتى غديرو خلاص العرس
تورية : علاش صاحبك مقالش ليك
رضى (باستغراب) لا مقال والو ياك ما غادي يدير العرس بلى خباري
تورية : لا لقى حبيبتو لقديمة وصافي انا مبقياش كنعني ليه
رضى : كيفاش شنو كتقولي ليالي مزوجة
تورية (بداو تاني دموعها كينزلو) لا هو قال ليا بفمو بلي هي غادي طلق وانا عمري معنيت ليه شي حاجة ديما كيعتابرني بحال ختو
رضى (بقات فيه ومعرفش كيفاش يتصرف) احم معرفتش شنو نقول ليك في الصراحة
تورية : عرفتي شنو كنت غدير دابا هئ هئ كنت غادي نتاحر فهمتي انا حياتي مبقاتش عندها معنى هئ هئ هو راه صافي تخلى عليا علاش جيتي علااش هئ هئ كنت غنكون دابا ميتة
رضى (عنقها) ششش صافي انا غندوي معاه
تورية (كتحرك راسها بأه) لا هئ هئ متقولش ليه غادي يتقلق مني
رضى : ومزال خايفة تقلقيه صافي ديها غير فراسك نتي دابا.... اجي نوصلك لدار اجي
خداها معاه وداها باش يوصلها لدار

نمشيو عند قاسم وايمان
قاسم : فين كنتي
ايمان : غير كانت عندي شي خدمة على برة
قاسم : سمعي بغيتك تعاونيني فشي حويج مهمين
ايمان : اه اكيد نعاونك فاش
قاسم : حسام صدق كيف قلتي وكتر ليوم تلاقيت مع شوقي وقال لي عليه شي كلام صدمني انا خصني منخليش ليالي معاه خصنا في اقرب وقت نلقاو عليه دلائل باش نسجنوه ونتهناو منو
ايمان (باستغراب) بحالاش هاد الدلائل
قاسم : اي حاجة كتوضح انو متورط مع لمافيات وانو كيهرب المخدرات وسط السلعة
ايمان : وكيفاش عرف هو هدشي
قاسم : شافهم ولكن مقدرش يتبت وملي واجه حسام هددو بحياة ليالي انا مخصنيش نخليه يأديها فهمتي
ايمان : الى دخلتي راه غادي يأديك حتى انت
قاسم : مكيهمنيش
ايمان : ولكن انا كيهمني
قاسم : مفهمتش
ايمان (بتوتر) انا بغيت نقول انت كتعني ليا يعني انا وعدت الاب ديالك سي قاسم باش نكون فجنبك ومنخليكش تغلط ونعاونك
قاسم : الى بصح كنتي باغة تعاونيني ديري هدشي على قبلي
ايمان (حدرات راسها) واخا غنحاول نلقاهم
قاسم : شكرا حتى انا بدوري غادي نقلب
خرجات من لبيرو وخدات الهاتف ديالها تاصلت ب حسام
حساام : الو شفتك دغيا توحشتيني
ايمان : قاسم عرف كلشي من شوقي وهو كيقلب على دليل ضدك
حسام (بجدية) ونتي اكيد غتعاونيه
ايمان : للاسف مضطرة نعاونك ومغاديش نخليه يوصل لشي دليل هدشي الى واعدتيتي تخليه بعيد
حسام : كاينة طريقة وحدة لي غادي تخلي ليالي تكون ديالي وتبعد عليه في مرة خص نتلاقاو باش نفهمك

كان جالس في لمكتب ديالو كيفكر كيفاش ممكن يلقى شي دليل على حسام خصو يدخل لقلب دارو اكيد عندو شي حاجة ولكن كيفاش غادي يدير خص شي حد يساعدو فيقو صوت الباب لي تحل
قاسم (متفاجأ) رضى
رضى : قاسم خصني ندوي معاك
قاسم : كنتي تعيط ليا او تجي لدار
رضى : مكنتش نقدر نتسنى لموضوع مهم
قاسم : ياك لاباس واش واقعة شي حاجة
رضى : انت عمرك مكنتي اناني علاش تبدلتي اقاسم واش على قبل هاديك خيتي لي خلاتك ومشات تزوجات بواحد لباس عليه عفطتي على كرامت ناس حبوك من قلبهم
قاسم : انا مفهمت والو معرفتش علاش كدوي
رضى : لا راك عارف مزيان علاش كندوي انت قلتي ليا عاود تلاقيتي بيها ولكن مغاديش تضعف قدامها شنو وقع دغيا كلات ليك دماغك وخلاتك تبعها
قاسم : صافي ارضى باركة منسمحش ليك تبقى كتاهم ليالي وانت معرف والو لبنت كتعاني ومعمرها كانت راضية على هداك الزواج وانا باقي كنبغيها ومغاديش نتخلى عليها فهمتي
رضى : ايوا حتى انا مغاديش نسمح ليك تزيد تأدي تورية كتر من هاكا فهمتيني الى عاود شفتها كتنزل دمعة وحدة خرا من عينها بسبابك غادي نسى الصحبة لي بيناتنا ملي انت مكتبغيهاش علاش طمعتيها بيك وخليتيها كتسناك علااش باش في الاخر ترميها وتمشي كتجري عند وحدة مزوجة ومحاساش بيك واش كاين
قاسم : انا مفهمتكش شنو دخلك انت وفين عمر تورية كانت كتهمك.... انا غندوي معاها باش تحبس من داك اللعب ديال التبرهيش وهي لي كان كتعاودو وتتفضح فيا انا مضربتهاش على ايدها باش تبغيني انا قبلت نخطبها حيت لواليدة بغاتها وبغيت نتهنا من صداعها كل ساعة وحيت كنت قطعة الامل من ليالي
رضى : ودابا بمجرد مرجعات ليالي تورية مبقاتش صالحة يااك سمع انا من ديما تورية كتهمني ولكن مكنتش باغي نبين ليكم حيت كنشوفها متعلقة بيك بزاف وكنت كنقول واحد نهار غتنساه هدا مجرد حب مراهقة ولكن هي نهار على نهار كتعلق بيك وخصوصا ملي عاشت معاك فنفس الدار وخطبتيها كانت فرحانة وانا فرحت وكتمت مشاعري رسكت باش هي تعيش سعيدة وباش منتسماش خنت صاحبي وحطيت عيني على خطيبتو ولكن باش نشوفك كتعدبها ونسكت لا
قاسم : كيفاش علاش مقلتيش ليا هدشي من قبل...
رضى (قاطعو) هاهو دابا قلتو ليك انا ليوم لقيتها حدا لبحر عرفتي شنو كانت باغة دير كانت غتنتاحر
قاسم (بصدمة) شنوو
رضى : قاسم انا عارفها مغتبغينيش حيت كتبغيك انت دكشي علاش انت خصك تسعدها فهمتي
خرج وخلى قاسم الدنيا دايرة بيه اش هاد المصائب لي كيجيو متابعين شاف تيليفونو كيصوني وجاوب
قاسم : الو ليالي
ليالي : توحشتك
قاسم : حتى انا
ليالي : شنو كدير
قاسم : كنفكر فيك.
ليالي : نتلاقو
قاسم : مكرهتش تقدري
ليالي : اه نقدر
قاسم : تسناني فبلاصتنا.
ليالي : واخا

مدازش بزاف ديال لوقت تلاقاو فنفس لبلاصة ومشاو لدار لي تلاقاو فيها داك النهار
ليالي : انا جبت معايا لماكلة غادي نمشي نسخنها ونجي اكيد غيكون فيك الجوع
قاسم : ولكن غنعاونك
ليالي : واخا انت صايب لقهوة هه
دخلو لكوزينة باش يسخنو دكشي خفيف وقاسم كان كيصوب لقهوة
ليالي (كتشوف فيه وهي مبتاسمة) كنتخيل ان دابا حنا فدارنا غادي تبقى كتعاوني في لكوزينة ياك
قاسم (بتاسم ليها) بطابيعت لحال نتي مغتكونيش تعلمتي طيبي في عام واحد وانا منقدرش نغامر بحياتي ههه
ليالي (ضرباتو على كتفو) انا غادي نتعلم ونصدمك غير تسنا (عاود ختافات ابتساماتها وحطات لي في ايديها) قاسم غادين نتجمعو ياك هدشي مغاديش يطول
قاسم (شد وجها بين ايديه) اه قريب غنكونو مع بعضنا غير كوني هانية
ليالي : ولكن انا شفتك ماشي على طبيعتك ليوم قول ليا شنو كاين
قاسم : انا غير كنفكر كيفاش نلقا دليل اكيد الدليل غادي يكون في دارو وانا خصني شي طريقة باش ندخل تم
ليالي : انا غنعاونك نقدر نقلب في بيتو او فلمكتب ديالو
قاسم : لا عندااك ديريها مبغيتش ندخلك فلمشاكل باركة غير دعوة الطلاق لي رفعتي ونتي دابا راك في داركم يعني غادي لمشيتي فجأة لدار غادي يشك
ليالي : لا انا نقدر......
قاسم (قاطعها) صافي باركة مبغيتش تعاندي معايا كتر فهمتي انا قلت لي عندي يلاه لقهوة وجداات اجي نمشيو نجلسو
ليالي : واخا انا غنجيب لماكلة ونجي
خرجو لصالون وجلسو ليالي قربات وحطات راسها على كتفو
ليالي : مكرهتش كون كنتي انت داري وتحميني
قاسم (حط ايدو على شعرها) اكيد انا غنحميك كنواعدك غادي نقدك منو

نمشيو لبلاصة اخرا عند نور دخل شوقي عليها لبيت كانت كتسنط لموسيقا ملي شافتو
نور : بابا ياك لاباس
شوقي (قرب منها وعطاها طرشة حتى بانو ليها النجوم) علاش ابنتي علاااش اشنو درت ليك ها اول مرة قلت كنتي طايشة وضحك عليك واحد مكيسواش ودابا معامن مع راجل ختك
نور (بقات غير حالة فمها مصدومة) انت شنو كتقول ابابا
شوقي (لاح عليها التصاور) ها شنو كنقول
هزاتهم كانو تصاورها مع حسام في بزاف ديال الاوضاع
نور : كيفاش دشي شكون عطاهم ليك
شوقي : مزال عندك لوجه تجاوبيني بغيتي تعرفي هو هو لي عطاهم ليا باش يدلني ويمسح بكرامتي الارض باش يبين ليا انك رخييصة قولي ليا واش انا نقصتك من شي حاجة ها شنو درت ليك انا دوي شنو لي غلطت فيه من ناحيتك اااه
شد من قلبو وسخف
نور (كانت غير كتبكي ناضت كتجري) بابا بابا فيق شنو وقع لييك هئ هئ باباااا

يتبع..

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.