للرعد عاصفته الجزء الخامس

رعد : مافياا للي يشرح تفرجي شوية يبينونا فالتلفازة.. 

نسرين : اوييلي ماالي اش درت !!!!

رعد : مادرتي واالو .. غييير قلبتي عليا الطباالي فالقهوة وقفتي شاارع موسكوو باااش طلعي ف كاميو دالزبل .. 

وعد (خرجااات عينيها و شافت فيها مصدومة ) بصح !؟ 

رعد (كايتسارا على التلفون فجيابو مالقاهش) : (شد بين عينيه بعياء ) فاش تخرجي هضري مع فهد يتكلف بالفيديوات للي غايكونو خرجوو .. و يمشي للريسطو يحيد ليفيديو ديال الكاميرات .. 

وعد : اووك نقولها لو دباا .. (كاتشوف ف نسرين كاتقولها بعينيها مشيييتيي فيهااا .. نزلات عندها بحالا بغات تسلم عليها و همسات فوذنها 

وعد : قد ماصبتي تبقاي مريضة بقااي .. 

نسرين : ختي راا خلعني فاش وقف عليا وااش انا لخاطرري را طوني مع شافوو نزل ليه

الما فالركابي .. 

رعد : فككككرتيني فداااك الحيواان .. 

نسرين (هااك افمميي ) ماالو مسكيين شنووو دااار 

رعد : (جلس على ركاابيه بعصبييية مقاابل معاهاا ) ااااش گلت ليك الباااااااارح هاا ياااك وصيييييتككككك .. 

نسرين : ماااسوووقكش فيااا.. 

وعد شافت الطرح بدا كايحمااض تسللات من وسطهم وخرجات لقات طوني واااقف مع السيدة فاطمة و السي عبد العزيز .. 

فاطمة : امضرااا ابنتي كيييبقاات نسريين 

وعد : الحمدلله شوية .. 

السي عبد العزيز : شنو عندهاا 

وعد : خدات ضربة خطيرة فظهرها اجدي 

شافت الخادمة دايزة بعد ما القت عليها التحية ..

وعد : بلاتي .. خودي عفاك هاد الورقة عطيها الحراس يجيبو ليها الدواا و بقاو معاها حتى تعاونوها.. (قبطات يد جدها باستها ) : نخلييكم دباا تععطلت على الكلينيك.. 

السي عبد العزيز : الله ينور طريقك ابنتي .. 

فاطمة : اجيي فين غاادة مزاال مااافطرتي.. 

وعد : واصااف اماما نفطر فالكلينيك 

سمعو الباب تحل خرج منو رعد مع شافو طوني قفز .. 

طوني : وعد تسناي انا انمشي معااك.. 

(حدر راسو و رمى الخطوة باش يمشي مع وعد حتى وقف رعد قباالتو .. بعد عليها و رمى الخطوة للاتجاه التاني ... بسرعة و قف تاني قدامو حابسو من الطريق رفع راسو ف وجهو 

طوني : خااص تفهم راها مريضتي .. 

رعد : مراتي قبل ماتكون عندك .. 

طوني : هادشي مافيهش شك السي رعد ولكن الى بقيتو على هاد الحال قريب تولي طليقتك.. 

رعد : اهاا 

طوني : اه خليني نشرح ليك علااش .. فالحالات العادية مراهقة فعمرها ماخاصهاش تكون مزوجة.. تانيا خاصها تفكر فين تكمل قرايتها وتعيش حياتها و تجرب علاقات كثيرة هي للي تختار واش تزوج ولا لا ماشي تجبر على الزواج.. تالتا حتى نتا كزوج خاصك تنقص من العصبية ديالك معاها (شاف فيهم كاملين ) ممكن نتكلم معااه على انفراد .. 

رعد : لااا هضر هانا كانسمعك .. 

طوني : للي عاشتو نسرين مؤخرا كايبين بلي علاقتكم كلها غلط فغلط 

وعد : احم احم طوني نمشيو ... 

طوني : حتى قضية الحمل كان خاصكم تناقشو فيها بلامااتكرفصهااا ... ماتنساااش نسرين الى بغات تحاكمك القانون غايوقف معاها قبل مااايكمل هضرتو عطاااه برووووسية تخبببط مع الحييط دياال الكولوااار ... 

تهزااات وعد و السيدة فاااطمة كثر من السي عبد العزييز ماجا فين يشد رعد حتى هز طوووني بشنقا حتى تقابل معاه و بدا كايلكم فيه.. دييييللللمكككك نتااا للي اتوريييني كيندييييير لمرتييي نتاااا لللي اتعلمني كينتعاامل معااااهاااا شكووووون نتااا للي كاتههدني فقلب دااااري سيييير دعيييينيي قبل منهااا والعاااود المخير رككككب عليه للينعلللل اصلللممممممممك ال********** ضربوو بركلة حتى شد حجرووو ..

السي عبد العزيز : ررررررعدددددددددد بااااااارااااكاااااا 

طوني : غادي تندم ارعد اتندم ... 

رعد : شوووفو ولد ال**** ببالررربببب تااابااقييي كاااااايييهددددد نزلل عليه باللكمااات

وعد : اتقتلووووو مسكيييين بااااراكا عليه

نسرين كااتسمع فالزديييح و صووت رعد هززز الدنيااا بغااات تنووض فشلوو عليها ركاابيها شدااات فمهاا مخلوووعة معارفااش اش ايكوون طاري ولكن متأكدة برررد جنوونو ف طوني كاتسمع الغواات ديال وعد و السيدة فاطمة و صرااخ السي عبد العزيز... كايتبعوو صوت رعد بقااات كاتصفاار و تخضاار حتى بعد عليهاا الصوت وليت كلهاا كاترعد و ماقادراش تنوض بمؤخرتها... 

الحرااس ركبو طوني فطموبيلت وعد للي مشاات معاها السيدة فاطمة... و السيدة ليلى جرات الحاج لبيتو كاتعبر ليه الممرضة فالسكر... كيف ما رعد شعل سيجارتو بعصبية و اااقف قدام لااپيسين بغغغضضب

ساعتين كاتنتاظر شكون يدخل عليها معنقة مخدتها و ناعسة على كرشهاا مغطية بايزار خفيف كاتفكر فشنو ممكن يكون وقع لطبيب طوني.. ااوفف فكل مرة كاتقول تنسى شنو دار فيها كايزيد يفكرها برااسو .. علاش بلاها ربي بحب واحد راسو قااصح و طاغي احسبلو غير هو للي قوي فهاد الكرة الارضية ... لحد الان ماعرفاتش كيف تصرف معااه مرة كايبان ليها ضريف و حنين و مرة يباان ظاالم.. ااه ظاالم الى ضرب طوني للي ماذنبو والو ... وهي كاتفكر عينيها كايستسلمو للنعاس غمضات بتعب ... بقا واقف فالجردة بنفس الطريقه باش وقف ساعتين هادي حس براسو ولا شوية عففط على الكارو و دخل ... طالع فالدروج بهدووء عكس داك الرعد للي كان قبيلة خاشي يجو فجيابو و عاقد غوباشتو مع وصل لبيتو شاف الخدامة هازة فيدها زوج صيكان واقفة قدام بيتو شدهم من عندها و دخل لقنسرين متكية بالفوق ديال كسوتها للي على شكل سوتيان معنقه مخدتهاا و ناعسة مغووبشة.. قرب ليها جلس على طرف الناموسية

بتعب تنهد و كأنو هاز جباال فوق كثافو .. مشا يدو على شعرها كايتأمل فيهاا ماعارفش .... ماعارفش شنو كايوقع لو فاش كايشوفها مع شي حد غيره ... حتى من خوتو كايغير عاد طبيبها للي عاشت معاه شهرين.. قلبو كايغلي فاش كان يشوف ضحكااتها معااه فباريس ووقتهم مع بعضياتهم للي ماكايفرقو غير النوم ... فكل مرة كايبغي يكبت هاد الوحش للي جواتو .. كاتطلع ليه بمشكلة جدييدة على قبلها حاول يتبدل و يكون هادئ و يرجع رعد الملاك ... ولكن بتصرفاتها كاتضرب ليه كلشي فالزيرو .. هاهو تاني راجع جالس حداها لا هو قادر يبعد و يخليه تعيش حياتها ... ولا قادر يبقى معاها بلااما يتعصب.. نزل ليها سنسلة الكسوة و قطع دوك الخويطات على كتافها بلطف جرها ليها وخلا صدرها يتنفس بحركااتو تنهداات و تقادات فبلاصتها بارتيااح ... نقص درجة الكليماتيزور باش مايضربهاش البرد هز حوايجو ودخل للدوش ... 

فالمستشفى : 

وعد دخلات مع وائل لغرفة طوني باش يطمنو عليه.. لقاوه متكي حال عينيه للي تحتهم زرق بالكدمات والفاصمة دايرة على راسو... تقدمات ليه وعد بخجل .. 

وعد : كانتأسف على هادشي للي دار فيك رعد .. انا حشمانة منك بزاااف

طوني (بابتسامة) : ماتقلقيش انا مزياان .. 

وعد : عارفة ماشي وقتو دبا ولكن جيت نقولك بلي عيطنا للبوليس.. 

طوني : علااش !!!

وائل : لحقاش فالضوسي ديالك سجلنا تعدى عليك شي حد.. 

وعد : جدي السي عبد العزيز وجميع للي كانو حاضرين مستعدين يشهدو معك... الا انا و السيدة فاطمة مانقدروش نكونو ضد خويا كانتمنى تفهّم ولكن هذا مكايعنيش انا ماتقدمش باقوالك 

وائل : اه تقدم بالاقوال ديالك للبوليس.. واش مستعد نعيط ليهم 

طوني : اش كاتقوولو.. نوو نوو .. نووو 

وعد (جلسات حداه) طوني نتا صديقي قبل مايوقع هاد الخصام كامل بينك و بين خويا .. و انا من جانب الصداقة كانقولك القانون معاك وهو غايتعاقب ... 

طوني : ههه وانا دبا كانتكلم معاك لحقاش نتي ختي ... بيناتنا رعد الامبراطور يتعاقب! .. فنظرك القانون ياخد لي حقي !! 

شافت ف وائل و سكتو ماعرفو باش يجاوبوه.. 

وعد : ولكن غادي يتعااقب نتا طبيب و مسؤول على مريضتك فاش شرحتي لو حالتها هجم عليك 

طوني : فالعالم كاامل القانون كايتطبق على الفقراء و الناس للي ماعندهمش للي يحميهم و يكون جنبهم .. القانون كايتطبق على الناس العاديين ماشي على للي عندو سلطة و نفوذ و صانع الاسلحة... القانون ماغاديش يتطبق على رعد.. 

وائل : وملي عاارف هادشي اصااحبي علااش جالس كاتهدد فييه بنسرين .. 

طوني : للحظة فاش بدا كايسمع ليا نسحاب واش كانهضر مع شي واحد اخر ماشي رعد.. ولكن ها النتيحة... 

ضحك وائل بخفة و جلس حدااه ربت على كتافو 

رعد دوش و لبس حواايجوو للي عبارة عن سروال كلاص و قميجة تاني كمايمها على عروق يدووبعد ما رش عطرو و صايب ساعتو و خاتمو ... جلس فالفتووي هااز التلفون كاايتفررررج فالفضيييحة للي دااااااارت هاادي للي جااتهاا غيبووبة قداامو ... كايشوف فالصفحاات كلهم كايتكلمو على البنت للي ركباات فكاميو دالزبل و كانت غادي تطحن كوون ماعتقهاا رعد ... بببببففففف طفى التلفون و هز راسو كايشوف فيها حالة عينيها كااتوججع بالحريق ... 

رعد : مالكيي 

نسرين : ااه فخااضي كايوجعووني... اي الجرح للي فيهم ضررني .. واش وعد ماجابتش الدواا.. 

تفكر الصيكان .. بسرعة هزهم كايجبد منهم و كايقرا التعليمات فالورقة ...

رعد : اووك اوك هذاا ديال الجرح و هذاا مهدئ الآلام ... جلس مقابل معاها هز فخضها وبدا كايدهن 

نسرين : كانتشوااااا اهئهئهئ 

رعد : صبري دبا يفوتك الحال .. 

نسرين : اااه هئ هئئ ... 

سالا ليها و دور الفاصمة عليهم بزوج .. 

نسرين : بغيت ندور على ضهرييي 😭😭😭😭 

رعد (كايقلب فالصيكان) بلااتي نصاايب ليك هادو ودوري.. 

حلات عينيها كاتمسح فدموعهاا حتى كاتفاااااااااااجئ .... لييييكوووووووووووووش 😱😱😱😱😱😱😱😱😱😱😱 

رعد (كايسوس فيهم باش يركبهم ليها ) : مالك كبرتي عليهم

نسرين : من نييتتتتتتتتك 😱😱😱. ..

رعد : هادشي للي سيفطاات عليه الطبيبة ماعليا غير نصايبهم ليك ههه .. 

نسرين : مااادايراااهمشش .. 

رعد(حابس ضحكتو بزز) : غير ليوم و من بعد لاقدرتي تنوضي حيديهم 

نسرين : لااا هيياا لااا اويييلي على نديرهم 

رعد : ههه يالاه سربي ديريهم بينما و جدوليك البيبرون ... 

نسرين : هيهي و الله يحفظك امربيتي فاش تكوني خارج قلبي معاك ل كراميش ولا طيور بيبي 😋 اوييييلييييي على غداايدي يااانا😠😠😠 كاااع الصدمااات ديال حيااتي بلعتتتهم تالهاااااديييييي😱 😳😳... فنفسها (ماضرني غير جاية لابسة الطالون و دافعة كبيير و مبندرة مسعودة و الارض ماهازانيييش باغا نربييه زعماا .. هزات راسها فيه لقاتو مبتااسم ليها بمكر ) واابااركا ماتبقى تضحححك راا للي تعجب يتبلى السي ... قرب جلس حداها و حيد ليزاار .. بالزررربة رجعااتو .. 

نسرين : مااتحيدوووش 

رعد : نسريين 

نسرين : قالتلك نعااام 😐 .. 

رعد : خلينااا نغطيو ترمتك قبل ما يدخل شي حد 

نسرين : لا شكرا غير خليها تنفس... حسااات بالبرد صمممكها مع الوقفة ديالو تمشى حتى وصل الماريو و فتحو جبد حوايجها للي جاب البارح.. 

نسرين : عااالم عليها.. باينة كنت مخطط لهاادشي.. هاااه داكشي باش خديتي حوايجي 😠 ..

رعد (هز راسو بفخر ) : هادوك ذنوب رَعْد ْ ا بب (هااااح على سميتو خرجات من فمو بحال ضربة الرعد ... ابتاسماات بإعجااب .. عاشت الاساامي 😌.. شاف فيها هاز فيدو بيجامة بيضة عبارة على كسوة توبها رطب 

رعد : اش گلتي 

نسرين : وااالوو 

رعد (جلس حداها وهز كمايم قميجتو ) يالاه خلينا نبداو .. 

نسريين : اشناااااهو لاااا ااااانا ناايضة... (حطات مراافقها على المخدة ورفعاات كرشهاا باش تنوووض ااااااااااااااايييي فخااااضي) 

رعد( هي غوتااات من الالم وهو كااع خوفو عليها ترجمو لصرااخ غاضب ) : مغاااانبقااااش نتسنننننى فديييلمككك باااركااا ديييري ليييكوووش و هنييينااا رفعها من كرشها و دورها ببطئ باش ماتقصحش قرب ليها المخدة حطها تحت خصرهاا مع رجع الشوفة ليها خرج عينيه بعدم استيعاب 

ولااااااات حمراااا😳😳😳😳😳😳😳😳😳😳😳😳😳😳😳😳😳 

نسرين : كون غاطحناات مي ديك الماكينة ولا الارض تششقات و دخلاتني و مايشقلبني هااد التشقلييبة وانااا مسففففففحة .. لاااا مااحشمتش منوو والله ماحشمت على تسفيحتيي شافو ما مرة ما 300مية 

وااااحشششششمت اعباااد الله حششممت من البييرسييينغ حشمت من الطاطوااج حشمت من زواااقت المعللم للي ضاربة ليه.. 

عضات على شفايفهاا بإحرااااج ولات مزززننننكة شافتو راسم ضحكتو الشريرة دوراات وجهها كاتشوف فالسقف باحرااج

رعد (بابتسامة جانبية) هاي هاي ... 

نسريين (فشلااات كثر من ماهي فاشلة مدورة وجهها مكاتشوفش فيه

رعد : الناس ديال البيرسينغ هههه 

نسرين : صااف اخّاا نبدل كوشتي رّااسي شكرا

رعد : ههههههه لا انا انبدل لل huub .. 

نسرين : للحب !!! مااشي حُّببك انااااا بععععد مني ... 

رعد : اها ولمن نگوولها .. 

نسرين : لييهم 

رعد (تفادى كلمتها ) حتى لامتى تبقاي مخلياني وحدي .. 

نسرين : خليتك لكلارا و خلارا زبيلة .. وزايدوون مابغيتش نهضر فهاد الموضووع وانا فهاد اللحظة .. 

رعد ( كايتحسس بيدو) : شكون صايب ليك Tatou 

نسرين : مراا مراا و غير مؤقت شوية ويطير ... 

رعد : ههههه ومالكي على هاد Stay away .. كون اكتبتي حداها خطر الموت و جبتي شي زوج كلاب ينبحو علياا.. 

نسرين : هي الى بقيتي بعيييييييد ولا نديرها ونفووتها لديك الجييه 

رعد : هانا بعييد حتى تبرااي وديك الساعة بالللررب تاتخلصي كثثر من لحق.. 

نسرين : ديك الساعة بيناتنا المحكمة 

رعد (وهو كايقاد ليها) اما هو را داكشي زاز لوز .. 

نسرين : لا شريحة .. تسمعات تشك تشك ديال الكوشة .. دفعاتو برجليها و ناااض كااتحااول تجلس بزز علييها .. 

رعد: الصدر مازوقتيهش مععععلمة مكايعجبنيش نتعنكش بدوك البولات.. 

نسرين : ررررععععد بااركاا... (كايقرب ليها و كاتكحز برجليها.. بلعاات ريقهاا فاش فيكسا عينيه ف عينيها جمدو شفايفها قبل ما يوصليها قلبهاا كايرتاجف كثر من يديها و صدرها ولا كايطلعع و يهبط غير بوحدو.. حط يدو كايتحسس دقاات قلبها الموجوع للي اشتاق ل لامساتو العذبة تنهدااات بحسرة و بعداات وجههاا كاتحاااول تصد قبلاااتو الحاارّة للي اغتاصبو شفايفهاا بلطف كيفما كاتحاول تبعد عليها ذراعو للي معنقينهاا بقوّة .. توحشااتو .. توحشاات حركاتو همسااتو بصوتو الرجولي للي كايخلق فيها الرعب .. هي تاني بين يدين السبع للي خاشيها وسطوو بحال شي قطيوطة ... رجعو قبلاتو اللطيفة للقبلات همجية ماإن حس بيها استجوباات معااه عنقهاا بحناان ....

رعد : الى ماكنتيش كاتيقي بلي كانبغيك ... مستعد نگولها قداام كلشي و نصرح بيها فاللقاءات ديالي و نديرو عرس يشهد ليه العالم كامل .. خااصك تعرفي بلي معاك نتي بغيت نكمل حيااتي وتاوحدة ماتعمر بلااصتك من غيرك ... 

دورات شعرها على وذنيها وكأنها كااتقوولهم فييييقووو سمعوو شنوو قاال .. صدى صوتو كايتسمع فوذنيها و هي مصدووومة ماتهربش هاد المرة مابعدش عينيه عليياا .. ماحاولش يبدل الموضوع كيف ماكايدير ديما

بقات ساهية كاتشوف فيه بملامح خالية من التعبير .. لسانها فشل عن النطق .. كيفما قلبها كاتحس بيه جاامد.. بللات شفايفها بارتباك جبدات بيجامتها من بين يديه خشات فيها راسها و يديها بهدوء نطقات .. 

نسرين : سمحت ليك المرة الاولى فاش فرشختيني بالعصى على ود الحمل 

رعد : (قاطعها قبل ماتكمل ) تمنيت يتگرضو يدي و مايتحطووش عليك .. 

نسرين : و تحطو .. 

رعد : علاش كاتجبدي للي فات .. 

نسرين : رعد واش كاتسحابني لعبة بين يدك !!؟ .. ولا برهوشة صغيرة تسكتها بكلمة كانبغييك و بلفوس و الشهرة ... وتنسى كااع للي وقع رعععد را كاانضحك باش مانبكييش ... كانهضر بزااف بااش نسى داك الحوار للي كايدور بيني و بين راسي .. 

رعد : عاارفك عارفك مزياان 

نسرين : كون عارفني مزياان مهاتحطش عليا يديك.. مغاديش تنزل ليا ولدي بدوك البونياات مغاديش تخرج شلا حوايج .. 

رعد : مانسييتش شنو درت فيك .. 

نسرين : لا نسيتي.. رعد نتا اكثر وااحد عارف بلي ماعنديش الفرص و مكانعطيهمش للي غلط فحقي .. بّا و ماعطيتوش فرصة و حتى مي الى جابتها الاقدار مهانعطيهاش فرصة .. كانمحي للي آذاني بحالا عمرو كان .. واليديا ماعقلتش عليهم و نتاا مرمدتيني نفسياا و جسديا و مع ذلك رجعت الغلط ليا و قلت انا للي ماوفيتش بالوعد و سامحتك .. ماخليتيش ليا الفرصة فين نشرح ليك شنو وقع .. كنت بغيت غير نقولك الحمل ماكانش بيدي انا غلطت فالحساب و بكيت الدم قبل مانسمع دقات قلبو للي رجعوني للحياة و قلت غايرجعوك حتى نتاا.. نسيت الوعد للي عطيتك نسيت واش بيناتنا اتفاقية ديال ممنوع الاولاد.. كيفما انا تسرعت و جيت نعلمك بالفرحة ديالي نتا تسرعتي و ترجمتي كلشي للضرب .. هجمتي علياا و نتاا عارفني مزياان بلي كنت كانبغيك كثر من اي وااحد فهاد الدنياا 

رعد : كنتي 

نسرين : تصاورك مع كلارا و انا فالسبيطار خلاوك طيح من نظري .. 

رعد : ( ناااض من حداهاا) دييييك كلاااارااا هزاات تصااور من عهد المرابطيين و جاية كاتقلى عليك بيييهم ونتي متيقاااهااا ..

نسرين : براافو زيد غوت .. 

رعد (حااول يتمسك اعصاابو نزل لمستواها و حط ركبتو فوق الناموسية مقابل معاها ) من نهار قستك نتي ما مشيت لشي وحدة .. وسكرت مرة وحدة هو داك النهار الكحححل نهار جيت عندك و مابغيتيش تشوفيني .. فاش كنت سكران جات ديك***** رجعاتني للي سبيطار لحقاش ماكنتش قادر نسوگ.. باقي عااقل على كلشي والله ما وقعات شي حاجة بيناتنا.. من غير داواو ليا ضهري هي و يونس .. وجيت بقيت حداك حتى صبح الحال.. 

نسرين : المهم كنتو معارفين و كانت بيناتكم شي حاجة .. 

رعد : ماكنتش كانعرفها ماكانعقلش على البنات للي كانتلاقى معاهم .. نسرين من نهار عرفتك لدباا تبدلت بزاااف.. وااش انا ديال اول نهار تعارفنا هو ديال دباا.. 

هزات راسها بعنااد وبعداات عينيها عليه... 

رعد : ماابغيتيش تجااوبي !! 

دورات و جهها بلا مبالاة 

رعد : المهم خاصك تعرفي واحد الحاجة هو ربي بلاك بياا و بلاني بيك واخة طيري و تنزلي وتخباي ورا جدي الاول ماشي غير عبد العزيز ... و ديك الهضرة ديال الافلام كوليها .. غادي تخرجي تاني و تبداي تنقزي مع شي حد اخر اتجيبيها فعظاامك و تاهو ذنوبو عليك.. 

(نااض من قبالتهاا جبد كاروه و لاح ليها ديباردور كان هزو مع البيجامة ) .. لبسي هذاا را صدرك كاايبان مطرااسي ... (خنزراات فيه .. ) 

رعد : كووليني 

نسرين( حرم علينا الله لحوم الوحووش ) 

خرج و خلاها كاتغزززز ابووحدهاا نزلات عينيها فريوس بزازلها للي خارجين من تحت البيجامة... 

نسرنين : العذاب ديما مشوهينييي .. 

نسرين (كاتهضر مع راسها ) دباااا هاد خوونا اش بغااا اعباااد الله ... تفوو ماعندو نفس ... سير يارعد المرعدد بغيتلك الساحق واللاحق الرصاص المتلاحق.. بغيت ربي يسلط عليك 7 الكلاب خمسة يهنشروك و جوج يدفنوك .. بغيت ليك تاعت مي باتت ماصبحاات .. بغيت ليك فقدان الذاكرة تشوفني ماتعرفنييش بغيت دور ليام و تكتاشف بلي انا ختك فالرضاعة نتا تهبل وانا نتهنى ... بغيتك تكون ديما الفوق الفوق كيبورت باكاج منك شتى و منك صيف ... بغيتك تكون كي وردة مااارس للي داااز يشتف علييك .. بغيتك منين مادزتي تكرّرم صبعك الصغير مع السداري .. ياارعد يا المرعدد يا مسخووط مراااتك ااااااني ساااااااخطة عليك سخط الدنياا اللاخرة و الى ماوصلاتك تادعوة نعرف راااسي اناا للي مسخوووطة ... 

رجع حل الباااب عليهااا رااافع حجباانو وشاد الگاارو شاعل فيدو ... خرجاااااات عيييينااا بصدمممممة نتااا هناااااااااا !!!! 

(قرب حتى لحداها جبد شي صرف من جيبو و حطو ليها فيدها ) هاك الشريفة الله يسهل .. مرة اخرى سيري لحدا الجااامع و دعي تاتشبعي ... خلاها وبدا غادي خارج استنشق الدخان ديال الكارو جمعو ففمو و خرجووو ولات كاتباان ليهاا الضباااابة .... 

نسرين : اااااااه ياا مراااارتي .. عارفاك امول 7رواااح تاحاجة ماتصيبك تااااتسيفطني اناااا ... 

خرج للكولواار كايضحك ابوحدو على دعاويها ... نازل مع الدروج كايسمع فالضحك ديال فهد شاف من الزااج بان ليه مشبح فوق الفتوي فالجردة حاط رجليه بزوج على الطبلة و خاشي الكيت فوذنو كايتفرج ف تلفونو ميييت بالضحك من السيرفيت للي لابس كايبان وقت طويل باش رجع من الخدمة .. ماحسش برعد وااقف عليه حتى حيد ليه الكيت من وذنو ... 

رعد : اش كاين ...

فهد وااااعععع هههههههههههههه و بنت اللذيينا طيرااتني 😂😂 

رعد : شكون ... 

فهد : هههههههههههههه المووووت اخويا المووووت

رعد : هضر خلاااص .. 

فهد : وا لعبااات بيك اعشيري ههههههه شوف شوف الكرااسى و الطباالي كيطيرااتهم.. فيلم هندي صافههههههه 

رعد : مسح داكشي بااراكا من التبرهييش .. 

فهد : ناااه على تجرتيلة ماتبغيهاش لعدووك ..

سعد : داخل مع صهيب كايشوفو فالفيديوات .. 

صهيب : هااهو المفعوول به ... هههههههه

سعد : داخلت عليك بالله واش نسرين غلباتك ... 

رعد : هاحنااا بديناا 

صهيب : واصاحبي البنت زاوااق اش غايشد فيها .. 

لؤي داخل مع وعد) : هههههههههه لا واااش كاااتهضرووو على نسرين

رعد : لا كانهضرو على ختتك 

السي عماد : تفرقو على السيد را باقين رجليه كايضروه من الكيلومترات للي ضرب باش يلحقها ههههههههه 

رعد : يااك حتى نتى معاهم .. 

يونس (جلس فوق الفتوووي كااايضحك) مسخوووطة هاد نسرين هرباتو ليا هههههههههههههههههههه 

رعد (شاف ففهد) اجي نتاا واش گلنا ليك مسح الفيديوات ولاا طلعها عليا مع هاد القوم .. 

فهد : غير العائلة غير العائلة ههههههههه سعد شد شد شد شد 

السي عماااد : وااااااهرباااااات 

يونس مرملاااااااااق علاااشششش ماشديتوهااش 

وائل : الشاف سمحلناا رازرباات عليناااا .. 

الكل : نسرييييييييييييييييييييين 

وعد ونهال : واااااعللللللق 

تهزووووو كااااملليييييين بالضحك وهو وسطهمم مراااضيييش ... 

رعد (بملل ) : هاهاهاها ضحكتووني 😕

فهد : وااش فايقة!!! 

رعد : سووقك.. 

فهد : بغييت نشوفها كيبقات.. ياكماا تقصحات

سعد: فين جاتها الضربة 

وائل : بغيتو تشوفوها سيرو ماتسولوووش على الدقة فين جاات 😂😂 

رعد : يعع خاصكم حااامضة و تكملو صندوق 

يونس : هههههه لا والله تابزااف 

فهد : بالدمووووووووع اخوياااا 😂😂😂😂😂😂

صهيب : ههههههه انا طالع نشوفها ... 

عماد : بلاتي نمشي معااك 

فهد : تانا غادي.. 

وعد : صبروو حتى تشوفها طبيبتها .. 

رعد : توماا مالكممم هاجميين واحد بواحد اتخلعوها 

صهيب : سبحااان الله هاديك كاتخلع 😂😂

غادين كايهضروو و يضحكو على رعد حتى طلعو لعندها لقاو السي عبد العزيز يالاه بغا يحل الباب .. 

وائل : جدي كيبقيتي ... 

السي عبد العزيز : اهلاا بحفاادي كيدايرين اوليداتي 

سعد : الحمدلله ونتاا اش خباارك فين جدة.. 

السي عبد العزيز : خرجات مع نهى و فاطمة .. ونتوما جايين تشوفو نسرين 

فهد : ااه.. 

السي عبد العزيز : را قالولي فايقة.. دق زوج دقات مع حل الباب تسمع صوت الموسيقى مجججهد ... 

شافو فبعضياتهم باستغرااب.. 

رعد(شاف فيهم بإحرااج) : احم احم واقيلة ماشي بيتي هذاا... 

فهد : لاا اخويا والله تا بيتك 

رعد : احم (حك راسوو بإحراااج ) نسريييين... والله وااخة يجيب ليها عيييساوة ماتسمعوو ... النشيد خداام و هي طالقة حلوقققها معاه 

نسرين : باااااااااااااابا جاب لي بلووووووون🎈🎈 يا عينيييي👀 ياا عينييي 👀

احمر 🎊🎉 اصفر اللون 🎉🎊🎊 

يا عيني ياا عيني 

حبسوو الضحححححك حتتتتى قربو ينفاجرووو وهما يتهزوووووو عليهااا ههههههههههههه 

كون بقات جالسة فوق الناموسية اتشوف شكون حل الباب ... لكن هي نااضت تشبحاات فوق كرسي الدائري كاتمرجح بيه راسها التحت ورجليها الفوق مقلوبة على كرشهااا مع سمعاات ضحكهممم تجمعاااات بخفة كون ماشداتها و عد كانت اتجي على راسهااا 

نسرين : ويلي ويييلي طفي التلفففااازة طفييي

فهد : لاا خوودي رااحتك 

السي عبد العزيز (كايضحك بأدب ) بنتي كيبقيتي شوية... 

نسرين : هااا 

سعد : بلاتي اجدي تقااد فالجلسة .. 

رعد طفى التلفازة و شدها مع وعد نوضوها بزز وااقفة كاتباااان مؤخرتهااا منفوووووووخة بالكوشة للي دايرة ... بلعات ريقها فاش شمشماات البارفان ديالو المخلطة بريحة الگارو هزات راسهاا فعينيه بحرا بغا يهضر تكلمات وعد .. 

وعد : كيفاش قدرتي تنووضيي .. 

نسرين : (همسات فوذنها) الله يخلف عليك ليكوش للي درتي لياا ... مانرد ليك فساعه الخير على اخر ايااامي وليت دايرة ليكوش نسيتي البيبرون ياك 

وعد : هههههههه باراكااا عليك طيوور الجنة... 

رعد( جرهاا بشوية حتى للناموسية ) جلسي جلسيي بشوية ... 

وائل : سمحيلينا عالازعاج ..

صهيب : يالاه خرجو خليوها تكمل الاناشيد دياولها .. 

نسرين : لا لاا را غير ماصبت مايدار بغيت نفرح شوية 

السي عماد : كيف كاتحسي ابنتي 

نسرين (فنفسها) للي طارت ليه قزيبتو باش ايحس ... الللحمدلله ملي بقا العمر هاديك هي الدنيا 

السي عبد العزيز على سلامتك ابنتي.. 

نسرين : مابقيت قادرة نوض اجدي ماقادرة نوقف .. 

صهيب : الله يشوف من حالك ابنتي 

نسرين : دبا واش انا نجحت فالباك .. 

السي عماد : ااه ابنتي 

نسرين : كاعما فرحت بيه كيالنااس 😧 

السي عبد العزيز : كلشي يفوت و يبقى غير تعاويد 

فهد : الباك ديالك انا الالة تكلفت بيه وفاش تبراي قوليلي شنو بغيتي ديري وانا نعااونك 

سعد : ااه اي حاجة بغيتي تستفسري عليها مرحبا.. كانفضل تسجلي فمعهد ادارة الاعمال 

وائل : لا لاا نتي اتنضمي لفريقناا تسجلي فكلية الطب 

صهيب : اشمن طب ... نسرين تليق بالمخابراات بحالي وبحال نهى و عماد و الوليد 

نهال : اااه والله وااااااو نسرييين يجي معاك الزي ديال الامن .. 

نسريييين : وااااش انا مبلوووونطياا بحالا تفركعوو فيا الالغاااام و كاتقولي البوليس ولا العسكر.... 

رعد : كاتهضرو بحالا انا مت و نتوما كاتفرقو فالورث .. صاف نسرين شدات البااك سالات قرايتها .. 

السي عبد العزيز : نتاا بالضبط ماتهضرش على نسرين ... 

شافو فييه بصدمممة ودورو عينيهم فبعضياتهم

رعد : جدي خلييك بعيييد .. 

السي عبد العزيز : مزيااان تباارك الله ولا الكتف قد الكتف.. بعييد حتى نكون بعييد من الاول... 

رعد : جدددي 

السي عبد العزيز : شنو غادي ضربني كما درتي شوية هذا لطوني ولا كيما درتي لنسرين قبل من شهررين هادي .. خليتها ليك شوووف شنو درتي فيهاا ااا تكرفصتي عليهاا وصلتيها للسبيطارات نسرين تعرضات للاجهاض بسببك و ماكفاكش هادشي خنتييها مع كلااارااااا هاادي هي الرجللة ها .. 

رعد : مااااااخنتهاااش 

وعد شافت ف وائل بتسااؤل كيف ما شاف فيها فهد و يونس ونهال .. وااش كلاراا صاااحبتي... 

السي عبد العزيز : اااه كلاااراا صاحبتك... ياا زينت الصحبة .. 

صهيب : بلاتي فهموني شنو واقع !! 

السي عبد العزيز : هاد الشهرين للي فاتت مامشااتش فيها نسرين تبدل الجو باش تبعد على باها.... مشاات تعاااالج من هاد المريض للي طيح ليها الجنين و خانها مع كلارا و هي فعز مرضها .. كااانتععجب باقي عندك الوجه للي يتبعها و تكلم معاهاا ... شاف فنسرين دبا واخة تبغي ترجعي ليه انا مانخليكش ليك.. 

السي عماد : لاا الحااج ماتسرعش 

السي عبد العزيز : ضميري كايأنبني ملي زوجتهاا ليه وتعدى عليها خرجت على حياااة البنت و مرضتها فصحتها دبااا باارااكاا انا نعوضهاا على كاااع للي فاات وللي بغيتو لبناتي غايكون ليها وهي كثر منهم ... نسرين نتي ابنتي على رقبتي حتى نمووت والحق للي عندو هنا عندك وللي ماعجبو حال البااب وسع من كثاافو... جدووو كايهضر وهو جااامع لكمة فيدووو وعااااض على سنااانو مرة مرة كااايدوووز على لحيتو بعصبية و كايشوف فالساعة بحالا كايتسنى شيي حدد يدخخخل 

السي عماد : عمي صبر تقدر تكون هاديك كاتكذب ياك ارعد ... 

مع سمع الدقان حيدد من وسسطهم حل الباااب بالزززربة شاف كلارا واقفة كاتمسكن بعوينااتها 

لابسة كسيوة فوق الركبة و طالقة شعرها الاشقر على طولو ... جرهااا من كتاافها لوسسطهم .. سنااانو من كثرت الاعصاااب ماقادرش يفكهم على بعضهم ..

رعد : هضررررري شرحي ليهم كيفااش كذبتي عليهااا.. 

كلارا (شافت فيهم وااحد بوااحد هما للي مصدوومين فيهاا ) انا كنت كانبغي رعد مدة طويلة .. و دوك تصاور كانو بيناتنا شي 4 سنين هادي بحق ماكنتش كانعرفو خو صاحبتي وعد حتى لنهار جاب مراتو عندنا للسبيطار .. كاتكلم و صوتها كايرتاجف كيف ما قابطة الصاك ديالها بشدة ... كلهم كانو كايعرفوني كانبغي رعد ولكن كان مجهول بالنسبة ليهم و هما شجعوني نعتارف ليييه

فهد (بعصبيييية ) : علااااش ماقلتيييش ليناا راه رععععد 

كلارا : كنت عاارفااكم غادي تنصحوني نبعد عليه وانا سنين كانقلب عليه ... 

وعد : دباااا نتي فررقتييي رعد مع مرااتو باش يبغيك نتيي .. كي كي كيفاااش قدرتي تفكري فرااسك فوسط دوك الاوضااااع للي دزنااا منهم وااش ماشفعاتش ليك فرحتها فاش عرفاات راسها حاملة .. نووو نووو نتي ماشي كلاارا للي كانعرررف .. 

كلارا (دموعها كايتساقطو بندم ) :

سمحوليا ولكن تعمييت مابقيتش كانشوق قدامي اهئ هئ كانبغييه بزاااف ... 

نسرين جالسة فبلااصتها على جنبها كاتشوووف فيهاا بصدمة دااز هادشي بحال البرق قداامها كاتحااول تستوعب شنوو كاتقوول كلارا يعني هاادشي غير كذوووب و رعد ماخاانهاااش ... وهي غارقة فافكااارها قرباات ليها كلالاا بندم ... 

كلارا : نسرين.. رعد كايبغيك نتي و مامعمروو غادي يبغي شي وحدة من غيرك

السي عبد العزيز بقا مصدوووم ولكن ماشي اقل الدراري للي غدرااتهم صديقتهم .. ماقدروش يثيقو بلي هما للي كانو السبب فهادشي كااامل 

لؤي : خررررجي اكلاارااا خرررجي فحالاااتك .... 

كيفما رعد جرها من كثافها حتى دخلها لبيناتهم رجع جرها و خررررج بيييهااا من قدااامهم ... جاارهاا بسرعة فالكوولوااار و ناازل بها فالدرووج 

وعد بالزربة مشاات كاتطل من الشرجم بخوووف كيف ما نااضت نسرين بالزز عليها حطات راسها على الزااج شاافتو ركبها معاه فالفيرااري ديمااراا بالجججهد حتى تسمع صوت الكسييييراااتوووور للي هز الارض ..

وعد(نطقااات بخوووف ) : خداها معاه فالطمووبيل... 

صهيب : شيييي حد فيييكم يتبعهم قبل مايدير فييهاا شي كاارثة .. 

فهد : اناا انتبعوو.. خرررج كااايجريي تاابعوو 

سعد : اووف ماكنتش متوقع هادشي من كلارا 

نهاال : خليوه يبرد فيها جنونو تستاااهل 

السي عبد العزيز : سكتووونا .. 

يونس (كايشوف فنسرين للي كاترتااجف وهي حاطة راسها على الزاج ) نسريين ماالكي نسرين... بالزربة لحقها قبل مااطيح.. شدهاا عندو ... 

نسرين : (بصوت خافت ) كانحس براسي ماشي مزيانة .. 

السي عمااد : جللسي ابنتيي جلسي 

وعد : عفااكم خرجو خليوها ترتاح 

صهيب : مايكون عندك باش ابنتي .. دبا تهدن الاوضاع و ترجع ليك صحتك .. شد يد السي عبد العزيز وقفو من على الكرسي 

السي عبد العزيز : بنتي نسرين ماتفكري فوالو طمني بالك 

نسرين (ابتسمت ليه بألم ) : شكراا 

السي عماد خررج متوتر من الغرفة كيف ماتبعوه الدراري كلهم كايتسااءلو شنووو ايكون وقع لكلارا وفين مشااا بيهاا رعد 

صهيب : تهدنوو فهد تكلف بيه بلاما تكبرو الموضوع .. ياالاه كل واحد يشوف شغلو .. فين مشات فاطمة !! 

السي عبد العزيز : خرجات مع ليلى و خوت نسرين يتمشاو شوية .. 

صهيب : ااه .. ايوا نصوني ليها و نلحق عليهم .. 

فهد عففففط عفطة وووحدة مارتااح باالو حتى باان ليه رععد قداامو غادي مكسييرييي ... كلااكصووناا عليه باااش يوقف هو غير مكايزيد فالسرعة... 

فهد : وققف ارعد فيين غادي بهااا طووووووووط زااد فالكسيراتور فاش خوات الطرييق قداامو حتى ولاو غادين بنفس السرعة فشانطي وااحد ... 

كلارا مدورة وجهها لجيهتو كاتحاول تحلل ملامحو الهادئة و شوفاتو للي مكايبانش عليهم الغضب جالس بثباات كعادتو و كأنه مكايسوقش بسرعة كأ حتى واحد ما تابعو كايكلاكصوني عليه .. الشيء للي خلاها تبقى مستغربة من تناقضاتو وهدوءو المرعب ... اكيد ماغاداش تنسى قبل من شهرين شنو داار فيها فاش جابوها ليه لدارو .. كيفاش رمى التصااور على وجهها و كان غايقبط رووحها بصبااعو كوون ما تدخل الحارس فآخر لحظة عتقها من بين يدو .. أكيد مغاتنسااش تهديدو الغااضب وهو كايقولها نهااااار ترررجع نسريين شرحيي ليهاا شنو واااقع ولا غانقبرك .. غلطة دفعاات ثمنها غاالي فلحظة انانية خسرات صحابها و حب حياتها .. ياااه كيفاش قدرات دير هادشي هي بنفسها مصدومة فراسها ... فالوقت للي كانت كاتفكر بعمق وكاتحلل ملامحو المتناقضة تسمممممع الفرااااااان بالجهد لولا تركيزو مع الطريق كان ايتصطدم بفهد للي وقف الطموبيل عرض قدامو ... 

فهد : (خرج من طموبيلتو بسرعة متجه للباب ديال كلارا .. . )

رعد : ااش كاادير !

فهد : مغانخليهاش لييك ارعد .. نزليي اكلارا نزليي...

رعد : فهد سير فحالك.. 

فهد : نتاا للي غادي تبدل سااعة باخرى (جر كلارا من دراعها ) 

رعد : ففهد 

فهد : رعد بليييز .. خلي هاد النهاار يفووت على خيير .. يااك انا خووك دير بوجه الكرش للي جمعااتنا و بدل ساااعة باخرى الى كنت عزيز علييك مسحهاا فياا اناا 

رعد خببط الباااب ..رجع باللور حتى بعد على طريقهم و كسيرااا بالجههد تبعو بعينيه حتى تخبى على انظارو عاد رجع شاف فيها .. طلعيي 

كلارا : فهد خليني نشرح ليك .. 

فهد(غادي بغا يركب فبلاصتو) : كلاارااا سكتي صاااف.. سمعنااا للي يتسمعع ... 

(ركباات حداه ) ولكن افهد انا نددمت ندمتت بزاااف .. 

فهد : كلارا جيت باش نوصصلك بلاما تفررعي ليااا مخّي ... خبببط الفولوون و كسيرااا بالججهد... 

****

بقات وعد مع يونس ووائل فبييت نسرين .. طالع ليهم الددم كون صاابو كلارا قداامهم يبردو فيها القديم و الجديد .. 

نسرين (كاتألم بوجع) : رجلي اختي وعد هلكوني بالوجع.. و فقخاضي ماقدرتش نزديهم .. 

وعد : خااصك ترتااحي انسرين ترتاحي و ماتنوضيش .. جينا قبيلة لقينااك كاتلعببي فالكرسي .. 

لؤي (كايحااول ينسيها الالم ) ههه خالقة السعادة ابوحدك

يونس (كايشوف فوعد) : واش عطيتيها شي مسكن الالام .. 

وعد : فين تريطمون للي جابو ليك 

نسرين : اااه اختي شوفي لهيه.. 

لؤي : هاهي (مد الصاك لوعد).. جبدات منو ابرة و جلسات حداها هزات ليها الكمامة ديال البيجامة... 

وعد(بابتسامة شافت فنسرين كاتحاول طمنها ) : هانتي بشويه مغانقصحكش .. 

نسرين (هزات راسها فعويناتها الزورق بدات كاتشوف ف خصلات شعرها الذهبي للي خارجين من حجابها بدون وعي ابتاسماات ليها ) 

وعد : و هاحنا ساليناا 

نسرين : اااو امتى دخلتي الشوكة .. 

وعد : ههه غير دبا شفت قلتلك ماتحسيش بها 

نسرين : دبا عاد عرفت علاش اختاريتي مهنة الطب 

وعد (نايضة كاتجمع البرة ف بلاستيكة) علاش 

نسرين : لحقاش المرضى يتشافاو غير بشوفتك ... 

وعد (ابتااسمااات بخجحل شافت فيونس كايضحك على وائل للي حال فمو ف فيهاا ) 

يونس : Olaaa هييه السي الطبيب 

وائل ( فاش استوعب تلاح على وعد جرهاا عندو ) : وشكوون للي يداويني اناا 

وعد (كاتقااد فحجاابها ) ببعد علياا الحمق

يونس : باش مريض !! 

وائل : واحد المرض سميتو الغيرة كايصيبني فينما كانشوف شي مريض كايسول عليها فاش كاناخد نوبتها ... 

نسرين : هههههه

يونس : اش بغااوك نتااا هههه

وعد : ولاات حمرااا بعدات منو و مسحاات وجهها باستحيااء 

وائل (حط يدو كايقرص فخديداتها) : اااه يا ملااكي الخجوول 

وعد : غير للي بغا يجبدك تانتاا ..( نسرين كاتشوف فيهم و كاتضحك .. شافت فيها) ارتاحي دبا ماتنوضيش من بلاصتك شويه و يخفاف عليك الالام 

وائل : وترجعي نسرين الحمقة 

يونس(كايقاد ليها مخدتها ) : و نديرو ليك كاع الاناشيد للي بغيتي .. 

نسرين : را غير مالقيت مايدار قبيلة ومابغيتش نبقى نفكر ....قلبتها لطيور الجنة ... 

لؤي : ههههه نتي مامنكش زووج..

وعد : احسن حااجة درتي لواحد ماخاصوش يبقى يفكر ... 

يونس : يالاه ارتااحي 

وعد : خرجو نتوما انا انبقى معاها شوية ونجي .. 

وائل : ااوك ... 

يونس : الراحة اووك الراحة ماتنوضيش .. 

نسرين : شكون بحالي تلاته الاطبااء جاو يشوفوني 😋 

وائل : الله يبعد عليك البلا الكارثة ... 

نسرين : ههههه اميين.. 

خرجو من عندها و دارت وعد شافت فيها .. 

وعد : بلتي .. 

نسرين : نووو ماقدرتش نديرها فالكوشة 

وعد : ديريها وانا نحيدها ليك 

نسرين : لاااا ... شوفي عاونيني حتى نوض نديرها فالطواليط

وعد : اوووك.. اجي معايا 

جراتها و دخلو للطواليط ...عاوناتها قضات حاجتها و صايباات ليها الضمادات .. محاولاتش تفارقها للحظة حتى شافت تأثير المهدئ كايبان على جسدها المتعب .. و عينيها ولاو كايتغمضو .. عنقاتها بحناان .. 

نسرين : شكراا على وقفتك معايا .. 

وعد : حشومة تقولي هكا انا كانحسبك بحال ختي الصغيرة .. 

نسرين : غادي تكوني ام حنينة و قد المسؤولية .. وائل باينة عليه كايبغييك بزاف ..

وعد : حتى رعد كايبغيك بزااف .. واخة غلط معاك فاش ماتقبلش الحمل ديالك ولكن هو كايبغيك لواحد الدرجة ماتصوريهاش ا نسرين .. (شافت فيها و ابتاسمات باستهزااء او ربما بعدم ثقة .. ماعرفاتش شنو تقول من بعد هادشي للي وقع تبلوكا تفكيرها ... ) 

وعد قالو لي الفراملياا فاش 

وعد : الاطباء و الممرضات للي كانو فاش جابك سخفانة للمستشفى فين خدامة كلارا.. كلهم قالو بلي كان تاايطلب فيهم باش يديرو اي حاجة ومايطيحش لك الجنين ..

نسرين : مامتأكدش من قراراتو ... ضربني باش نطيح البيبي ودغيا ندم و طلب يخليوه .. (ضحكات بحسرة) هه رعد عند بالو كلشي بين يديه و قادر يتحكم فاي حاجة بغا و قت ما بغى.. رعد متناقض و ماعارفش شنو باغي .. 

وعد : هو عارف شنو باغي هو باغيك نتي .. 

اكتفت بالصمت .. 

وعد(ناضت من حداها ) : ماتفكري فوالو .. ارتااحي دباا 

نسرين : نحاول ... وعد الى عرفتي شي حاجه عليه قوليها لي ... 

وعد : اوك.. واش كليتي .. 

نسرين : ااه اه جابو ليا قبيلة الغداا .. 

وعد : اووك فاش يجي مهدي و رانياا نجيو نتعشاو معااك .. 

نسرين : تووحشتهم بزااف .. 

وعد : هما كاعما توحشووك قبطو العطلة ديالهم و عطاوهاا للسفر من مدينة لمدينة .. 

نسرين : ههه هادوك للي طالعة ليهم ... 

نسرين : هههه يالاه موااح باي باي الزين ... 

قالتها بسلامة بيدها وبقات كاتشوف فيها حتى خرجات... رجعات عنقاات مخدتها و حطاات عليها راسها بتعب ... حولااات ماتفكرش بزااف تنهدااات باش تنفس من هاد الاختناق للي ملئ حنجرتها .. ماكرهاتش بتنهيدة وحدة تخرج هاد اللكمة للي فقلبها ... بغات تهرب من هاد التخبطات للي سيطرو على كيانهاا شهقااات بانكساار على اثر شهقتها سقطو دموعها بغزاارة فاش جات صورة باباها بين خياالها.. فاش تذكرات شنو دار فيها و كيف باعها فرمشة عين ... ماكرهااتش تساامحو و تجمع معاه ومع خوتها للي ماعرفاتهم دبا فين زادو .. ماكرهاتش تسامحو و تحط يدها فيديه تقلب معاه على مهاا.. والى لقاتها عالاقل غير تستفسر منها علاش مشات و خلاتهم .. قدما قساات على واليديها كايبقاو هما نقطة ضعفهاا.. الاجهااض رجع قلب مواجع حرمانها من والديها رجع فكرها ف قساوة رعد عليها .. هاد الاخير للي وصل عندو فهد بعدما عرفو فالسويت ديالو ... لقاه جالس فحافة البالكون للي جا فالطاج الاخير ديال السويت .. من كثرة العلو ديالو مكايبانوش السياارات التحت.. نجوم السما بقد ما كايبانو كباار وقراب بعااد عليه ... تماما نفس إحساسو فهاد اللحظة حاط يدو على الحافة و خلي رجلي مدلين للخارج .. قرب منو فهد حط يدو على كثافو وجلس حدااه 

هاد المرة ما هازش الگارو .. وماحاطش الشراب قدامو .. جالس بوحدو بلاما ترافقو شي حاجة.. 

فهد : وصلت كلارا للاوطيل غادي تمشي ليوم .. وهضرت معاهم فالدار طمنتهم عليك... جدي كايسول فيك 

رعد شاف فيه بدون رد فعل .. ناض من حدااه دخل للسويت .. 

فهد (تابعو من للور كايشوف فيه هز الفيستة ديالو ) فين غادي !! 

رعد : راجع لاميركا 

فهد : شنوو !!؟.. ولكن جدي بغاا يشوفك 

(رعد رجع شاف فيه ) 

فهد : اووك اوك جدي لا .. ونسريين !!! 

رعد : نسرين الى بغااتني نمرتي عارفاها ... 

هز تلفونو صونا لكاردكور للي علموه بلي الطائرة واجدة ... 

فهد : هادشي كايعني بلي مغاترجعش القصر بسبب جدي !!.. و غانرجعو تاني نتلاقاو غير فالاوطيل كيما كنا شحال هادي.. 

اكتفى باش يسلم عليه و يخرج فحالو من الاوطيل متجه للمطاار .. راجع لاميركا واضع قرار لمشاكلو مع نسرين ... او ربما خلاها هي هاد المرة تاخد القرار ...

رجع فهد للقصر فوقت متأخر من الليل .. داخل بهدوء عند بالو ايلقى كلشي ناعس حتى كايتفاجئ بيهم جالسين فالصالون ... لمح السيدة ليلى حاطة يدها على خدها بحزن .. قابط السي صهيب راسها عندو كاكايواسيها كيف ما جالس حداها وائل وباقي الشباب .. مع شاافتو نااضت كاتقلب ورااه على رعد ... 

السيدة ليلى : وييينو اخووك .. !! 

فهد(قرب ليها محاول يهدنها ) : ماجاش معايا ولكن راه بخير .. 

السيدة فاطمة( الحزن مسيطر عليها) : علااش اولدي ماجاش 

فهد : بغا يرتاح شوية .. 

السيدة ليلى : هو بالفندق مو هيك خدني لعندو ... 

فهد : لاا .. رجع لاميركا ... 

السيدة فاطمة جلساات بضعف حدا السي عبد العزيز للي بقى كايشوف ف فهد .. 

داارت عندو السيدة ليلى .. : شِفِت شو عملت بالصبي .. لك احنا مصدقنااا رجع و صار بيناتنا اهئ هئ... 

السي عبد العزيز : اناا هضرت معاه لحقااش جدو وعندي حق عليه.. 

السيدة ليلى : انتاا ظلمتو لابني ظلمتو .. 

فهد : لاا رعد مامقلقش ولكن راكي عارفة حضر للخطوبة ديال وعد بزز را ماكايلقاش فين يحك راسو 

سعد : فاش يرتااح غادي يجي ماتكبروش الموضوع .. شاف ف فهد كلارا فيناهي .. 

فهد : را ها بخير وصلتها حتى هي الاوطيل ... 

وعد (نازلة مع خوت نسرين فالدروج ) ففهد اش خبااار 

فهد (قاطعها ) مزياان كلشي مزيان كلارا وصلتها للاوطيل و رعد مشا لاميركا فاش يلقى الوقت ايجي فين نسرين واش ناعسة .. 

وعد : لا مزال فايقة..

فهد : انا طالع لعندها .. 

وعد : اوك ... ولكن بلاتي واش رعد بخير 

فهد : لاباس عليه ... 

طلع و خلاها مع الدراري للي طلبات منهم يمشيو لبيتهم ... باش تبعدهم من الجو المكهرب للي فالصالون ..

السي عبد العزيز : تصبحو علي خير... 

الكل رد عليه الا السيدة ليلى للي كانت كاتمسح فدموعها و هازة التلفون كاتطلب منهم يركبو ليها رقم رعد ولا يجيبو ليها نظاظرهاا تدور رقمه بوحدها .. 

يونس : يكون مزال ماوصل.. غير يوصل أكيد غادي يتكلم معااك 

فهد دق على باب نسرين للي سمعها كاتقولو تفضل .. 

فهد : الرجوولة صافاا .. 

نسرين : التيتيز الحمدلله 😍

فهد(حط يدو فجياب السروال دالسرفيت كايشوف فيها مغطية و جالسة كاتفرج ) : ههه فاش كاتفرجي 

نسرين : يالاه كانقلب .. شافت فيه ووراه دورات عينيهاا بحالا بغات تقول شي حاجة و هي تحبس..

فهد : غير سولي 

نسرين : اش انسول!! رجعات كاتقلب فالقنوات.. 

فهد : المهم كلارا فكيتها من مخالب الاسد ووصلتها للاوطيل .. 

نسرين : را كان حتى هو غادي غير يوصلها مسكينة.. 

فهد : ممكن .. 

نسرين : ولا يزيدو يتعارفو على بعضياتهم اكثر .. حشومة يقمع البنت 

فهد (حيد ليها التلكوموند وجلس فالفتوي كايشوف فالتلفازة ) : كلشي ممكن .. حتى نتي الى ماتعارفو هنا فروسيا يتعارفو فاميركا .. را هو رجع وحتى هي واقيلة غدا غاادة .. ونتي الى بقيتي هنا غادي تخلي ليهم الفرصة فين يتعاارفو ككككثر .. خويا رعد وانا عارفو... 

شااف فيها بنص عين ورجع كايشوف التلفازة بمكر ... 

نسرين (عضات على سنانها ) اصلا الى قدر ينساااني غير يدير 10 من كلارا .. 

فهد : اييواا نتي تعارفي ههه 😌

نسرين : دااااخلت عليك بالله تارجع .. 

فهد : وخلى الكرة بين يديك الى بغيتيه اترجعي ليه سي نن راكي حرة .. 

نسرين : هو قاالك هكاا !! 

فهد : لاا قال غير نمرتو عندك ... بغيتيه صوني ليه .. 

نسرين(باستغرااب ) : ااانااااا 

فهد : هادشي للي كاين .. 

نسرين : علاش انا للي طيحت البيبي .. 

فهد (حط التلكومند و شاف فيها ) لا مانتي ماهو .. العصابة للي اختاطفاتك للي طيحاتو و كون ماطيحاتو كنتي اتكوني نتي وولدكم بين يدهم .. كاينة ولا لا .. 

نسرين : مكانش ايخليهم رعد.. 

فهد : رعد را ماشي كائن فضائي ولا كايعلم الغيب را حتى هو ممكن ينهزم .. حتى هو كايصيب و يخطئ ليوم عتقك غدا ماعرفت شنو ممكن يوقع... را حتى هو بنادم و كايخاف على عائلتو خصوصا الى كان الامر كايتعلق بكبدتو .. دبا لا قدر الله ماعتقكش و حققو داكشي للي بغاو .. شنو كان ايوقع ها فين اتوليو .. نسرين خاصكي تفهمي علاش مابغاكش تحملي وفبلاصة ماتبعدي عليه بهاد الطريقة حاولي تفهميه .. 

بقات ساكته كاتشوف فيه ماعرفاات باش تجاوبو

نسرين : هاهو دغياا مل و مشى .. (بفقصة ) ههه قالك كايبغيني 

فهد : ياك عندك نمرتو بلاما نعطيها ليك !!

نسرين : عندي 

فهد : ايوا ما على الرسول الا البلاغ 

نسرين : بحالك بحال بلاغك .. 

فهد : لا انا وااعر على البلاغ 😌 

نسرين : هاي هاي عالمغرور ..ماااكرهتش نشوف شكون هادي للي غادي تحدهم ليك .. 

فهد : بلا ما تسنااي مكاينااش .. 

نسرين : متأكد 

فهد(هز راسو بفخر ) : انا معذبهم كامليين.. 

نسرين : اممم شكار راسو عاد داز من هناا .. 

فهد : هههه يلاااه تصبحي على خير غداا خاصني نفيق بكري باااش نمشي تاني نعذبهم 

نسرين : ناري على ححمق ههههه بونوييي 

بقاات مبتااسمة حتى خرج من عندهاا و رجعاات سهااات فاش تفكراات رعد للي مشا و خلاها... مادازش بزاف حتى مل منها و من اعتذارو ليها ... ماكرهش يسيفط شي حد يوصل ليها بلي 

ماتعبش من اعتذارو .. كيف ما شعور الحب للي جواتو ليها عمرو ماغينفد .. بالنسبة ليه هي نصفو التاني .. هي الورقة للي ربح من هاد الحياة كاملة .. هي بمثابة رزق اتاه على شكل زوجة .. صلحات الخراب للي كان فقلبو .. هدية من الله علماتو ان السعادة قرار خاصنا ناخدوها بيدينا مانتسناوهاش تجينا .. علماتو الحب الحقيقي الطاهر .. علماتو اشياء مكانش كايفكر انه غايجي نهار و يعيشهم مع شي وحدة .. وهو ساهي من وراء نافدة الطائرة تذكر أياام كان كايصلي بيها .. تذكر فاش كانو كايقراو بزوج القرآن .. فاش كانت كاتوقفو فكل آية كاتقراها من الشرح ديال القرآن و تفهمها ليه بصيغتها .. وكأنه طفل يالاه بدا كايتعلم كيفاش يقرا القرآن ..مازال كايتذكر نظراتها البريئة و ابتسامتها الطفولية ... فلحظاات جلساتهم مع بعضهم تولد حب نقي بعيد كل البعد عن الجسد و الجمال .. بعيد عن الانانية كيف ماوصفو السي عبد العزيز... 

ملي عرفها ولا كايضرب لحياتو الف حسااب .. بيها اصبح عندو هدف و مابقاتش حياتو كيف موتو ... للي تمنى انها تفهمو كيف مافهماتو النهار الاول .. تعطيه شوية الوقت فين يفكر اكثر فحياتهم .. ... ولكن اليوم هو للي كايعطيها وقت فين تفكر مخلي القرار بين يديها عارف انه قد مابغاها مايمكنش له يسجنها فحبس غرامو .. طلق سراحها والى بغاتو هي اترجع ليه وتقبلو كيفما قبلاتو شحال هذا... 

*****

بعد ما علمو الحارس ان اذان العشاء فات دخل للغرفة توضى وفرش السجادة للقبلة .. اقاام الصلاة وكبر جمع يدو بزوج لصدرو و بدأ يرتل ما تيسر من الذكر الحكيم .. عارف ان الله السبيل الوحيد للاطمئنان والراحة النفسية ...

مكانتش الوجهة للولايات المتحدة الأمريكية كيفما قال لخوه و إنما كانت مصر العربية البلد للي من خلالو غادي يقدر يعبر الحدود لغزة كيف عادته فكل موسم من السنة.. أكيد واحد بحالو ماعندوش الوقت فين يربع يدو او يجلس خلف النافذة يبكي على الاطلال ... حياتو المهنية مكاتسمحش ليه يضيع وقتو بل كل ثانية محسوبة ليه او عليه ... 

ماقدرش يغمض عينو طول السفر كان كايستنى فوقاش يوصل ... فوقاش يتلاقى مع جماعتو السرية للي غايقدرو يوصلوه للبلد للي كل عام كايمشي يزورو سرا عن عائلته... 

في سكون ظلمة الليل الاخير للي كايفصل لحظات قصيرة على نور الصبح نزلات الطائرة الصغيرة السرية للي ماعليها حتى علامة من ان مالكها رعد الامبراطور .. فوق اراضي مدينة القاهرة المصرية .. استقبلاتو طموبيل على شكل هوندا بعد ما خلا رجالو يتكلفو بالباقي .. تلتم ب الشال الفلسطيني قاد السلاح فخصرو و ركب معااهم بلاما يسلم على حتى واحد فيهم... شدو الطرييق لشبه جزيرة سينااء المصرية .. بعد كيلموترات طويلة وقفات الطموبيل فالجزيرة كيفما خرجو الرجاال كايستقبلوه بحفاااااااوة فرحااانين بيه كيف كل عااام ..

تقدم راجل كبير فالعمر لابس الزي المصري التقليدي العبارة عن فوقية بينة و طربوش بيض.. لهجتو بدوية مصرية : اهلااا بالغاااالي ابن الغالي اخييرا شرفتناا ...

سلم عليه رعد للي كاان فرحااان فاش شاافو باقي فالحيااة .. 

رعد : عمي محمد كيف حالك .. خبروني الشباب على صحتك .. 

الراجل : الحمدلله انا بالف خير لما شفتك ربناا كرييم 

قربو ليه الرجاال كاايسلمووو علييه و الشباب كايطلقو فالرصااص كترحييب به ... 

سلم عليهم واحد بواحد .. الدراري الصغار كايلعبو مع شافوه جاو كايجريو دارين بيه... هز واحد فكتافو ورجع شاف ف الرجال ... 

رعد : امتى نمشيو .. 

طارق : لما توصل شاحنة البضائع ..

السيد محمد . : تعاال نفطر ... خالتك محضرة كل شي بتحبو 

رعد (غمض عينية بلذة ) : الله ... ولكن قبل بغيت نتوضى .. مزال ماصليت الفجر .. 

شاف فيه السيد محمد باستغراااب كيف ما شافو فيه الرجال ..

رعد (حط الدري من فوق كثافو) ماتستغربوش عفى الله عما سلف ههه... 

الرجاال بفرحة شافو فبعضيااتهم وبداو كايهفتو بصوت غنااائي هازين السلاح ياااا رعد يااا زعييييم فرحتناااا صااارت اثنييين ... و يااا رعد ياازعيييم .. 

بقا كايشوف فيهم مبتااااسم و فرحاااان ولكن هاد المرة بالرغم من كلشي... كايحس بالراااااحة و الطمأنيينة كيفما فرح كاع النااس للي دايرين بيه .. و كأنهم كايفطرو في صبااح يوم العييد فعلاا كان عييد بالنسبة ليهم ملي شافو رعد كايصلي و الفرحة باينه على ملامحو ... وصلات شاحنة البضاعة للي غادي تهرّب البضائع عبر معبر رفح .... استغل ذهابو لان الحدود غادي تبقى مفتوحة لمدة اربع اياام ... 

السيد محمد وهو كايسلم عليه باش يتسيفط معاه .. : خد بالك ارجووك .. 

رعد : ان شاء الله 

السيد محمد : يالا يا رجاال الله يوفقكم ... 

تجمعو كاملين كايتسيفطو مع الرجال للي غايمشيو مع رعد 

واحد منهم فتح الباب ديال الشاحنة من اللور و دار عند رعد باش يوريه بلاصتو ... محطوطين صنادق فوق بعضياتهم شمال و يمين لكن الوسط فارغ.. تكى وسطهم خلاو مساحة قليلة و بناو فوقو الصنادق المعمرة بالسلاح للي كاتبان من برا بضائع المواد الغدائية فاتحين تقبة صغيرة منين يستنشق الهواء ... كيفما تخبى هو تخزنو الرجال للي معاه مخلين الشيفور و شخص اخر يسوق الشاحنة للي بعدات من الجزيرة لكن بقات ملاحقاهم دعوات السي محمد و عائلته... 

نسرين فتحاات عينيها كاتستوعب فين هي و شنو وقع ليها البارح ... دوراات راسها فالغرفة لكن مارتااحتش كاتحس بقلبها مقبووووط مكانتش متوقعة انه يسافر و يخليها بهاد الطريقة الى كان بصح ماملش منها كان ايبقى معاها .. يااك هو للي قاال بلاه ربي بيهاا و مايتفاارقش معاهاا على دبا مشااا.. شافت فجنابها هزات التلفون من حدا المخدة ... فبلاصة ماتقلب على سميتو كتباات نمرتو كااملة .. 

نسرين(بتوتر ) : نصووني ليه .. مانصونيش .. لاا نصوني قبل مايغرو شيطانو ويتلاقا مع ديك الكلبة ... لا لا مايديرهاش و ملي متأكدة مايديرهاش علاش ماتصوني ليه... لاا مشكلنا فالاصل ماشي كلارا .. ايواا نصوني ليه و نشرط عليه ياا نحمل يايطلقني ... يعع شحال حامضة .. اصلا انا مابقيتش بغيت نحمل بغييت غير نبقى معااه 😍😍 😒😒تفوو عليييك يالمدلوولة الشاايطة فين النفس فيين .. للا لاا مانصونيش ليه اويلي اناا نصوني ليه شغانقوليه ... اولا سلامالحب صافا تانيا شكرا على كاع داكشي للي درتي لياا يالاه اجي ديني 😕 ابرررب لاكانت لييه... هاد القيااامة كاااملة منوضاها باش يجي هو و فرمشة عين يقلب عليا القفة .. زممر لاواه .. لاحت تلفونهاا ... و لا عرفتي شنو انطفي جدو هاد التلفون و نغبر موو باش مانطيحش من قيمتي ... لاا بلاتي حتى نصوني لطوني شفت حتى حد ماجبد حسوو ... 

فالوقت للي نسرين مضاربة مع راسها هو متكي على ضهرو فالضلام كايسمع و كايشوف النور كيفما كايتنشق الهوا هادشي كلو من ثقب صغيير... كايردد بفمو الدعاء امنيتو يسلك من الحدوود حتى يوصلو الامانة لنااسها كعادتو ولكن هاد المرة امنيتو يسلك حتى فاش يكون راجع لانه بكل بساطة مزال باغي يعييش حياتو معاها ... وقفو شاحناات عند المعبر كانو كلهم ديال الدولة راسلاهم للمساعدة.. 

رعد (فنفسو) : اللهم لا سهل الا ما جعلته سهلا و انت تجعل الحزن اذ شئت سهلاا ..

وجعلنا من بين ايديهم سدا و من خلفهم سدا فاغشينااهم فهم لا يبصروون بحالو بحال صحابو للي قطعو الحس لكن فنفسهم كايرددو الدعاء ...متوقعين اي حاجة.. فهاد اللحظة ممكن يضييع حلمهم و يضيعو الشباب للي كايتسناوهم الداخل ... ممكن فدقيقة يتشدو وتعلن فالتلفاز تم القبض على جماعة ارهابية حاولت ان تغزو الاراضي الاسرائيلية .. ممكن فلحظة يوليو اسرى طيلة حياتهم .. .. لكن فالحقيقة هاد الجماعة همها الوحيد تنقد ولو القليل من اطفال و شباب الاسر المضلومة .. هاد الرجال للي مخبيين هنا كاملين اقصى امانيهم يتجمعو مع اسرهم بدون ماينقص حتى واحد منهم ... كل أملهم فاش يرجعو مايلقاوش شي حد من عائلتهم مات 

... لحظاااات كانت اطول من المسافة للي ضرب من البارح لليوم ... ... ما إن حسو بالشاحنة دازت بلاماتقلب تنفسو الصعدااء ... ... و اخيرا خطتهم نجحاات لان الشاحنات للي امامهم ديال الدولة وحتى هادي للي فيها سرقوها للدولة باش يكونو آمنين فيها اكثر لهذا ماتقلباتش..

مساافة قليلة حتى كايتعلن انهم وصلو لاراضي غزة .. حيد رعد الصنادق للي فوقو .. بعدما تلتم جلس كايشوف بلهفة اشتياق سريعا ما اصبحت نظرة حزيينة.. على ما يبدو ان الاوضاع هادئة فهاد الفترة لكنه بروود يحيط المدينة حزن شدييد سيطر على ارجائها.. كل شي رمااد... دخاان ...دماار .. اطفال صغار جالسين كايشوفو فالشاحنات داخلين بلامبالاة و بدون اي ردة فعل .. لكن فعيونهم بزااف دالكلام قلبهم كايصرخ بعتاااب .. مامحتاجينش تصدقو علينا بالمساعدات .. مابغيناش بروطولاتكم الخاوية.. بغينا مساندة حقيقية ... بغيناكم توقفو الدمار محتاجين تعتارفو بينا كدولة مستقلة بعيدا عن نظرات الشفقة ...

فوسط ازدحام الصحافة للي خارجة كاتصور فشاحنات المساعدة.... بعدااات الشاحنة للي فيها رعد باش يوصلو البضاعة للمكان المعلووم ... ضلام الحاال و هما باقين فالطريق عطلهم وقوفهم عند كل بلاصة باش يبعدو عن الشبهات ... فاش لمحو رجال هازين فيدهم مصابيح كايلوحو بيدهم باش يوقفو عرفو انهم وصلو للمكاان ... كانت بلاصة عامرة بالكهووف .. موقع سري كايخزنو فيه السلاح اللي كايوصلهم .. نزلو الرجاال هازين صنادق الرصااص كيفما نزل رعد هاز السلاح كايمد ليهم ... و يرجع يهز مع الرجاال حتى فرغو الشااحنة ... للي كانت قليلة مقارنة مع نسبة احتياجاااتهم ... 

سلم على الرجاال لكن قبل مايتساراحو اقاامو صلاة العشاء جماااعة فوق الحصير المفرش فالارض ... 

ابو عمار (الشيفور ) : ياا جمااعة لازم نرووح انا و رعد هلأ.. الشاحناات رح تخرج مع الفجر ... 

الرجال للي جاو معاهم .. ونحنا بدنا نشوف اهاليناا .. شكراا على كلشي الله يوفقكم بالمعبر 

رعد : امين.. 

ابو عمار : سلم عالاولاد و الله يكون معكم .. 

ابو قاسم (للي تعرض ليهم مع رجالو ) و مابنعرف كيف بدنا نشكرك يا زعييم الله يبارك بعمرك لنشوفك كل عاام ... واذا ما لاقيتنا تلاقي ولادناا .. 

رعد : ان شاء الله نتلاقاو مرة اخرى الله ينصركم

تسااالمو مع بعضياااتهم و طلع رعد للور تخبى بنفس الطريقة باش جاا كيفما الشيفور جلس فبلاصتو.... دازت ليلة صعييبة لكن بفضل الله قدرو يسلكو من المعبر و قدر يرجع لحيااتو الطبيعية .... 

غرق فخدمتو و اجتمااعاتو و سفرو للي مكايساليش من دولة لدولة حتى لقى فالاجوندا بلي داازت 15يوم على آخر مرة شاف فيها نسرين للي ماعذبااات راسها حتى باش تصوني و تقطع ... هاد الاخيرة للي كاانت طاااايرة بالفرحة و هي كاتوكل الخييل فالاسطبل مع خوتهاا .. لابسة قميجة بيضة مدخلاها تحت سروال الاستيك كحل جاي حد السرة... طالقة شعرها الطويل و دايرة فوقو قبعة .. مجموعة العائلة حداها كل واحد قايم بمهمة .. السي صهيب شاد بلاصة الشوا و العيالات كايقطعو فالشلايض ... نهاال كايصايب ليها سعد فإكليل الورد ... فهد هااز البندقية خاارج يصيد 

نسرين : ففففهد بغيت نركب فوقق الخيييل .. 

وعد (من وراها.. مخرجة الخيل ديالها ) صاافي برااات 

نسرين : واماسووقيش ماسووقيش 

فهد : زيدي يالاه اشمن واحد عجبك 

نسرين : (شافت واحد طوييييل و كحل) تباارك الله هذاا واااااعر 

فهد ووعد (دقة وحدة ) هدااك ديال رعد 

نسرين : و مالو ديالو بوحدو بغيت نركب فيه... 

فهد حط البندقية و حل الباب حتى خرجوو

فهد : هااهو الالة .. 

نسريين: عاااونووني نركب حموالديكم 😍😍 

فهد : بغييت نمشي نصيد واش انبقى حاضيك .. 

نسرين (فنفسها ) اييه ماصيدتي التيتيز صيد الحجل... دباا اش فيها الى قابلتينا .. 

وعد : طلعي طلعي .. حطي رجليك هنا .. 

فهد : شدي فالحبل و نقزي .. راهاد العاود مولف غير رعد الى بغاا يهززك ... شوفي راه الى حس بيك خايفة مشيتي فيها .. 

نسرين : شناهو نخاااف ههههه .. شوف شوف ... رّراااا ششششا 

مهدي : حمااار فكروييلة هو 😂😂😂 .. 

رنيا : هههههه ياا على شّااا .. 

نسرين : اتبلدتو اخوتشيي .. الواحد هو للي يبقى فصبااغتو 

فهد : هههه سبيييطار متنقل هاد نسرين .. يالاه شوفي انا انركب على لعاود ديالي و بقاي غادة معايا بشوية ... 

وعد : يلاه نخلييكم اناا .. 

وائل (جااي كايتسارا عليها ) فيين غادة !! 

وعد : نمشي ندور مع الخيل ديالي .. 

وائل : مانسيتي تا حد ! 

وعد : بحالاش .. دورات راسها ببلادة .. نوو نسرين مع خوتها .. سعد مع نهاال .. وانا امم(ابتاسمات ليه) نلعبو سباق الخيل ... 

وائل ( حط يدو على جبهتو باش يخبي الشمس للي سانية فيه هز راسو فيها بعيون لامعين و ابتااسم بإعجاب ) 

وعد حشماااتها ابتساامتو .. تنهداات بعمق الله ياربي هذا تابعني فالخدمة و فالدار وايام العطلة ... وليت غير مقابلاه و نضحك .. شدات خدودها تاني كاتمسح فيهم بخجل .. جااوب 

وائل مفيكسي عوينااتو عليهاا بنفس الابتسامة للي زادت وسامة لمنظرو الجذااب ... 

نسرين و فهد متبعيين الحواار من الاول.. 

فهد : يعع شحااال الحب كايكلخ بناادم .. شوفو كمية العبااطة للي مرسومة فملامح وائل .. 

نسرين : نتا اش تعرف راه لاموغ هذااك ... 

فهد : هههه دباا انبقى انا وااقف تحت الشمس باش نهز راسي فيها هي راكبة فوق الخيل تحت الضليلة... ولا نبقى تابعها ونجري فالحقول بحال هاداااك الهبيل(اشار لسعد) قالك هذاك رجل اعماال وهذا طبيب ههه

نسرين : هههههههه ربي سكت افهد خلينا نتبعو الفيلم ... 

وعد : (بصوت خافت كاتكلم مع وائل ) جااوب .. 

وائل : يالااهي واخة اناا للي انسبقك .. 

وعد : نشوفو 

فهد : هاااه خليوكم غير هناا حتى تكتب عليها وسيرو فين بغييتو 

وائل (مخرج الخيل و كايقاد فالكاسك ) : سير دعيناا ...

ركب على العاود و انطلق قبل مايقولهاا ليها ... 

وعد : يااااالغشااااااااش .... جراتت الحبل و عطااتها بجرية وحدة تابعااه... 

نسرين : يالاه تحرك تانتاا غيير بشوية ماديرش بحالهم ... شششش...

فهد : غير زيدي ماتخافييش .. رفعااات رااسها وقادات جلستهااا كاتمنظر من فوق العاود كايباان ليها كلشي تحتها و هي عااالية ... 

نسرين : ياااه بحالا راكبة فوق العمارية واخة عمري جربتهااا ... 

فهد : شدي التوازن ديالك راك كاتباني ليا اتزلقي ... 

نسرين : لا لااا شووف الجلسة ديال المعلميين ..

فهد : براافو علييك..

كاتمشى وهو حاضي معاها ... 

نسرين : اامم فهد اش كاتعاااود 

فهد : لاباس علياا 

نسرين : شي جديد شي قديم 

فهد : بخير اموري غادة مزيان 

نسرين : اجي نقولك دبا نتوما التواام كاتحسو ببعضيااتكم بزااف يعني نفس التفكير!

فهد : كاتقصدي انا و خوتي .. 

نسرين : ااه ... 

فهد : ماشي نفس التفكير ولكن فاش كايكون شي مشكل عند واحد فيناا كانحسو ببعضياتنا 

نسرين : مامقبوووط قلبك ماتهز ملي كاع خوتك حاضرين الا داك التالف ماوالو !

فهد : مالي انا موو ولا مراتو وزايدون را هضرت معاه 

نسرين (تحلو عويناااتهااا و دارت عندو) كيداير!! 

فهد : لاابس عليه.. هاني مهني .. ضاحك.. تلاقينا غير شي 3 ايام دبا فايطاليا كان عندنا واحد الاجتماع .. 

نسرين (بلعات ريقها ) يعني لابااس عليه ياك .. ماقالكش توحشكم .. زعما توحش مالين الدار .. 

فهد : شاافهم .. ديما كايتلاقى مع سعد و وعد و الدراري حتى عمامي .. جدة و فاطمة واقيلة

شافهم .. ايييه سافرو لعندو .. مايقدروش يخليو خاطرو خاسر.. 

نسرين : يعني بغيتي تقول شاف عائلتو كاملة .. 

فهد : لا بغيت نقول شافوه كاملين .. 

نسرين : صااف حبس بغيت نزل هنا... 

فهد (نزل من فوق العاود ) : الله هناا في كاين الصيد نييت... شدها من يدها حتى نزلات ... و قاد بندقيتو هاانتي شووفي 1 2 3 تسمع القرطااس و طاح الطير ... 

نسرين(من فوووق خاطرها ) برافو عليك 

فهد : هاا الثاني جاي فالطريق ... 

ضحكات ليه الضحكة دبزز و سهاات بتفكيرها قلبهااا كايغلي من الدااااخل مااقدرااتش تصوني ليه من بعد ماا شافت طوني فديك الحالة .. ماقدرااتش تحط راسها فالموقف ديال اجي بغييتك .. عارفة اتكره رااسهاا الى صونات ليه كيفما كارهااه دباا ملي بعييد علييهاا ماكرهااتش تشدوو تجندخوو على كاع هادشي للي داار فيهاا و من بعد تعنقووو و تقولو توحششتك .. اييه السيد للي كانتسنى فيه علم الله اش مخليه مبعد عليااا .. باينة هاد 15 يوم ما خلى فين تساراها مع كلارااا .... عضااات على سنانها بغضب المهم الحمدلله انا ماطيحتش بقيمتي يمشي معامن ما بغااا...

نسرين : فهد عطيني بغيت تانا نجرب 

فهد : تقدري !

نسرين : مكانخافش راك شفتي عمي عماد عطاني السلاح و ضربت القراعي ... 

فهد : يالاه هاكي ... شوفي هامنين تعمري و فاش يبان ليك الطير ضربيه.. 

نسرين : اوك ... 

بداا كايصوني ليه التلفون ... هزو لقا الخدمة ... 

فهد : شوفي تسنااي ماااتبداي حتى نجي .. هللو... كايهضر فالتلفوون مببعد عليها هي للي 

بعدااات على العاود حتى ولا اونفاص معاها.. هزات البندقية عمراتها و رفعااتها للسماا كاتشووف فيهاا خااوية... كايبان ليهاا الحجل كايتساارا بين الشجر نزلااتها بلاما ترد البال للعاود للي قداامها .. رعد كان جاي لجيهتهم كايشوف فيها بغات تصيد حتى كاتبان ليه الضربة اتجي فالعااوووود ديااالو ... خرررررج عينيه بصدددمة خاااف يغوت يخلعها تصدق ضارباه ... طللللللق رجلييييه لللرييييح مع بركاااات علزناااد ترفعااات البندقية بركلة جات بببببت فالارض ... ماااعرفاااات باش تبلااات تزعزعاااات بيها الارض ... هزااات راسها بصصصدمة شافت فيه .. رررععد !!! 

رعد(الخوف كايبان على ملامحو فمو ولا بيض ) : بـــــــــــــــَحــــــْر 

الخيل بسرعة هز راااسو مع شاافووو فررررررح جااا كايجري عندوو عنقووووو بفرح كايدور راسو عليه و كاينزل رجليه كتحية لصااحبووو ... لااا إراااديااا ترسمااات الضحكة على وجه رعد ... للي كاان شوية هذاا ايموووت من الخلعة عليييه ... عزييييز علييه و علاش مايكونش عزيييز وهو مربييه ملي كاان صغييير صااحبوو و خووه و كلشي بالنسبة ليه .. مخبئ اسراارو عمقو عمق البحااار ... كيفما النااس كايمشيو للبحر و كاايرتااااحو لان الملوحة ديالو كاتمتص الغضب ديال الانسان هكذاا بحر بالنسبة لرعد كايمتص كل سلبياتو فور مكايتلاقا معاه... نسرين حلااات فمها فالطريقة باش عنق الخيل مولااه... بقاات جالسة كاتشوف بصدمة ... ماشي اقل من فهد للي شد راسو كيف ما قابط التلفون فوذنو مصدوووم فبلاصة مايسمع التبهديل من رعد قلب وجهو و دار راجع مخليهم الراس فالراااس ... 

شاف فيهااا لقاها جاالسة فاااشلة حاالة فمهاا و جامعة يدهاا بخووف ... نزل عندها حط كفو على خصرها من اللور ... اسحبها لعندو بهدووء قربهاا لصدرو الفولاذي ... كاتحس بقلبهاا كايضررررب بالجههد كيفما فمها رجع تاني نشف بحالا عمرها شرباات .. و يدها حشمووها تاني بالبروودة للي ولات فيهم ... 

بلساانها... 

كانقسم بللي خلقني حتى تووحشتو .. توحشت نشم ريحتو .. توحشت راسي بين درااعوو ... توحشت نتودر فعوييناااتو ... ااه اقلبي شنو دار فيا غرااامك ... 

رعد (بصوتو الرجوولي ) واش تقصحني 

نسرين : (قلبها كايضررب بالجهد حادرة راسها ماقادراش تهز عينيها فيه) لا .. ماوقع لي والو .. (بللات شفايفها بهدووء كاتمنى يبقى محاصرها بين ذراعو مزير عليها بيديه... 

رعد(و هو كايشوف فملامحها من تحت القبعة بلع ريقو ) : مزياان ... 

نسرين : هزات عينيها فيه بخجل ... ياك ماوقع والو للعاود ديالك ... 

رعد : لاا را بخير ... 

نسرين : مزياان ... مزياان ملي رجعتي تشوف جدك راه عياان ..

رعد : جيت لحقاش انا و فهد و سعد عندنا اجتماع فالعشية هنا ... مكانش يحسابلي كاينين حتى نتوماا ... 

نسرين (رفعات حجباانها بإحراج ) امم مزيااان ... حاولاات تفلللت من بين يدو ... بااش تههرب فحالاتهاا 

رعد(رجع شدهاا بزز قبط يدها للي تنطرات منو ) : مالكي ! 

نسرين : ماالي 

رعد : وليتي حمرااا و تبدلو ملامحك .. 

نسرين : مانعرررف ... نخليك دباا رجعات يدها و را ضهرها كاتبعد فيدو باش يطلقها ... 

رعد (كايشوف فيها بعيونو الناعسين غمزها بهدوء ) مابغيتي تگولي والو.. 

نسرين (بعصبية ولا وجهها حمممر ) : بغيتيني نسووولك فين كنتي هاد ليياام ... علاش مشيتي و خليتيني مرييضة.. ياك قلتي بلاك الله بياا و غاتبقى ورايا ولكن مليتي دغيا .. بان ليك الجديد ... غير قولها عاادي ... اصلا للي كايبغييك غادي يسول وانا خليتك على راحتك ... 

رعد : باقي رااسك قاسح و ماباغاش تناازلي ... 

نسرين (بدوون سااابق اندااار نطحاااتو بقوة لنيفوو شدوو بألم ) هااادي دياال هاااد التسااافيرة ....نطرااات يدهاااا منو و جمعاات لكمة فيدها تسمعااات بببت فخدو ... هااادي دياال هااد العذاااب للي دوزتي عليااا جمعاات ركبتهاا حتى جمعاتهاا و زوااتو لكرشووو ... وهااادي ديالو طوووني مسكييين ... غمممض عينيه بالم وااقف هاز يدييه باستسلاام مابغااش يقااووومها دفعاااااتو بالجهدددد شدهااا من خصرها جااا طاايح معاها الارض .... و هااادي لحقااااش كانبغييييييك و كااانحماااااق عللللييييك و تاوحدة فالدنيااا ماعندها حق عليك من غييييرييي فهههههمتي ... 

رعد : (كايرمش فعينيه سخفان ) هههه فهمت فهمتت 

نزلااات عليييه بالقبلاات كاااتعننننق وتبووووس 

توووحششتتتتك ... الخيل كاااايمشي و يجييي عليييهم مع هز رجليه بغا يضرب نسرين قلبهاا رعد تحتو بالزربة هز يدو للعاود ... نوووو .. نوووو بحر ايتس ماي واايف ... قبلهاا بلهفة ... رجع شاف فيها ... اتس ماي لوڤ ... عينيهاا كاايضحكوو و فمها مجموع كايستقبل القبل للي كايجيو بعد كل كلمة نطقهاا ... عنقاااتو بالجههد ... 

لكن هناااك من يرااقبهم من بعيييد ... متبع حركااتهاا ملي شافها اول مرة خارجة من القهوة كاتجري مع طوني ... هااربيين من رعد ... مكاانش متأكد ان بصح هاد الفتاة المدللة زوجة الامبراطور ... 

ساهي شخص بعيييد كل البعد عليها واقف كايشوف فيها من وراء الشجر متعجب فالعاصفة .. للي قلبات للرعد موازينو خرجاتو على طوعو خلاتو ماعارفش شنو يقدم ولا يوخر ... ابتاسم بزاوية فمو ابتسامة استهزاء للي ف ملامحو كاتبان خيبة امل تحولات لحقد كبير فاش شاف رعد وقف جارها لعندو هي للي طاايرة بالفرحة كاتضحك من قلبهاا... صحيح مدة قصيرة باش متابع تحركااتها ولكن طيلة هاد المدة ماشافش الفرحة للي فعينيها دبا وهي بين يدين رعد ... 

حط يدو فجيابو مخلي الريح يلعب فشعرو الاسود لابس شوميز مفتوحة من صدرو المزين بسنسلة طويلة و سروال توب متني من التحت مع صباط كلاص كايحرك تسبيح صغير فيدو اليمنى للي فيها خاتم الحكاام فالصبع الصغير بعصبية ... انسحب من الغابة فالحس ... قرب لسيارتو بسرعة خرج الشيفور حل له الباب للوراني دخل عاض على سنانو 

منصف (صاحبو جالس اللور كايستناه يجي ) امضراا تلاقيت بفهد .. 

(بدون رد حرك للشيفور باش يزيد) 

منصف : ماالك سااكت .. 

رائد(شاف فيه بتسااؤل ) : دييك للي شفنا مع الدكتور طوني ... 

منصف : نسرين .. 

رائد : اييه .. شنو گلتي كاتجي لرعد !! 

منصف : مرااتو .. 

رائد : مابقااتش طليقتو .. 

منصف : اه قراب يطلقو 

الشيفور (شاف فيهم من المراايا) بحالا سمعتوها بوذنيكم اسياادي .. قالها لي الشيفور ديال السي عبد العزيز سمعو كايتكلم معاها .. وكايقوليها غادي نطلقك منو .. 

رائد : سكتتتتنا من الهضرااا الخااوية.. 

منصف : علااش !! شنو غيرك واش تلاقيتي بفهد ... 

رائد : منصف ماشي وقتك دبااا اسكت ولاا نزل ... 

منصف : صاف هاهو ساكت ... 

******* 

نسرين (مطلعة صباع رجليهاا باش توصل لوجه رعد كايشوف فيها بعيونو الزرقين للي باين عليهم التعب ... معنقة بيدها عنقو و كاتمشي و تجي باليد الاخرى فلحيتو ) : حبيبي ... (رفع حجبانو فيها كايقولها نعاام بلاماينطقها حطات يدهاا على شفايفو المخبين ورا موسطاجو ولحيتو ) توووححشتك ...

رعد (بصوتو الخشن الممزوج بكمية كبيرة من الحنان) : حتى انا

نسرين : علاش خليتيني هاد المدة كاملة .. 

رعد (جرهااا عندوو بالجججهد من مؤخرتهاا قبّلهاا حتى تفلعص فكهااا ) خليناا نساو للي فات .. 

نسرين (خرجات عينيها فيه حالة فمها للي تبلوكا من جهد القبلة رجعات سداتو بشوية) اوك فيين كنتي و معامن !!!! 

رعد : كنت بووحدي مشغووول بالخدمة.. 

نسرين : كااع هاادي خدمة عييقتي ماتوحشتيني ماقلتي كيبقاات قزيبتي .. ما صونيتي .. 

رعد : وعد گالتلي حيدتي الغراز .. وفراسي مشيتي تلاقيتي مع طوني ... و طلبتيه يدعيني وتوانسو بزوج فالمحكمة هو ياخد حقو ونتي تاخدي طلاقك.. وتڤنڤني للمغرب تعيشي الحياة مع صحابك ..(غمزهاا ) كاينة ولا مكايناش... 

نسرين : السلاامة هاد الهضرة والله مافخباار وعد .. منيين جبتيييها 

رعد (قرب وجهو ليهاا) راكي مزوجة برعد انسرين رعد 

نسرين : وفخامة الاسم تكفي 😳 .. 

رعد : المهم كيبقيتي!! .. 

نسرين : شوية باقا مكانقدرش نجلس عليها بزاافف .. 

رعد : ورااكبة فوق العااود و كاتسااابقي باش تصيدي ..

نسرين : صدقت مصيدااك ... 

رعد : صيدتييني من زماان 😌 ..

نسرين : اااح علييك ... غااناااكلككك انااا ماااافيهااش شوف الزيين و الطوولة و التجرييدة و الرقبة و العضلاات وااااش كاااع هادشي صيييدتووو انااا لااا لاا محااال خشاات يدهاا تحت درااعو معنقااااه ... نتااا حبيبييي اناااا و كبيييدتيي و غزاااالي 

رعد (كاايضضحك بفخر دلعهاا ليه ذوبوو ) وشنو تاني 

نسرين : و لعمرر وكلللشي عندي فهااد الدنيااا

رعد(شاف فيها بعيون ناعسين و نطق ) : i love you ... 

نسرين ( بعدم استيعاب ) عاودهاا ... 

رعد : كانبغييك 

نسرين : صااف سطووووب ماابغيييت وااالو من غير تبقى تصبح وتمسي عليا بهاد الكلمة ... 

رعد: خاطرك الالة

نسرين : يالااه نمشيو دباا يكونو بغاو يتغدااو 

رعد : فين داك خونا للي كان معااك !!!

نسرين : شاف ديك الطيرة الهندية للي طرتي عليا و غايبقى ... ولا طالب الشرع مسكين حتى من الخيل ديالو خلاااه 

رعد : اجي اجي نركبك فوق بحر .. 

نسرين : بحر اش بغا يدير بيا اناا جا مولااه ... 

رعد : نتي راك مولات مولاه.. (هزها من تحت بيطانها طلعها فوقو) بزز عليه يولففك .. يااك ابحر ...

نسرين : رجعتي تااني باش تجلطني بهضرتك .. اااح على مولاتو ااه اناا موولاتوو 

جر الحبل للي لاصق فبحر و العاود ديال فهد غادي بيهم بزووج كايتمشى ... 

نسرين : بيبو علاش ماطلعش 

رعد : مكانحملش نمشي بشوووية فوق الخيل ... 

نسرين : ااوك على رااحتك الحب ... 

الطرييق بهضررتهم و اشتيااقهم لبعض ماحسوشش بيهاا لقاو روسهم دغيا وصلو للاسطبل ... نزلهاا من فوق بحر .. للي دخل للاسطبل بلامايدخلوو... 

رعد(شبك يدو فيد نسرين ) : گود باي بحر 

حررك لييه برااسو بحالا كايتسيفط معاه ... خرجو من الاسطبل ... للبلاصة فين مجمووعة العائلة كااملة ... كايباان ليهم رعد جاي شاابك يدو فيد نسريين ... مع شاافو نااضو فرحااانين بيه خصوووصاا جدو السي عبد العزييز للي ماشافوش قبيلة فاش دخل .... 

السي عبد العزيز : ولدي على سلاامتك

رعد (تحنى باس يدو ..) الله يسلمك اجدي .. كيبقيتي .. 

السي عبد العزيز : الحمد لله اولدي.. 

وعد (داخلة مع وائل ) : خووووووياااا حبيييبييي ... امتتى جييتي 

رعد : كوون كنتي هناا تشوفيني امتى جيت .. ونتي وقتك كامل مضيعاه مع هاد راس الطارو را غاتملو من بعضيااتكم قبل ماتزوجو .. 

سعد : على ذكر الزوااج انا و نهال قررناا نتزوجو السيمانة الجاية صاف بارااكا... 

واائل : احسسسسن حاجة اديروو من نهار عرفتكم طلقوونا خلااص ... 

فاطمة : ايوا صبرو غير حتى يقررو الكبار 

السي عبد العزيز : الكباار وافقو .. غير توكلو عالله .... 

وائل (شاف فوعد) جاااء الفرج ... 

يوونس : ايواا الله يكمل بالخيير توحشنااا العراس 

سعد : امييين .. رعد و فهد اجتمااع مور الغدا ماتنسااوش 

رعد : دباا الى كان شي مانقضييو .. وراا الغداا بغييت نععس .. 

ليلى(شدات وجهو بين يدها ) : اييه ابني لاازم يرتااح خلااص بيكفي شغل .. 

سعد : لاا ضروووري هاد الاجتمااع 

السي صهيب : ايواا نوخرو الغدا حتى يساليو الدراري ... فااطمة الاالة فاطمة ... 

فاطمة : نعاام ا سيدي صهيييب .. 

صهيب : قوليلهم مزال مايحطو حتى يكملو الدراري و اجي ترتااحي حدايا باراكاا عليك.. 

محمد : نعععم انه العشق يااساادة 

وعد : باانت ليك غير فاطمة اعمو صهيب ماشفتيش ختك و بنت عمك ..

نهى : نككررني خوياا ولدي مي

صهيب : ايواا ندموونااا.. 

فاطمة : جاية كاضحك لعندو .. باان لياا الشيااط لغيرة اتقتل شي وحديين... 

رعد (همس فوذن نسرين ) ورا لغدا اختاري اي بيييت يكون بعيد على لوخرين الحب 

نسريين( بفررح )ااااووووك احسسن مهمة عندي هي هاااادي خلييي البيوت على حسااابي..ببطئ استوعباات اش قصد هااا !!! علااش ؟ 

رعد(بنبرة تهديد) : ورا الغدا نوريك علاش ... ناض ورا خوتوو و خلاااهااا جاالسة مبهوووووضة فييه ... 

دخلو للداار للدااخل و بالضبط المكتب للي كان بعييد على الضجيج و الضحك للي كاين براا ... 

جلس فهد و حط ضهرو بارتيااح على الفتوي كيف مادار رعد للي جلس اونفااص ليه .. اما سعد فجلس فالكرسي ديال المكتب .. 

سعد : رعد فراسك السي اليازيدي توفى .. 

رعد : اووف مزاال ماعزيتهم.. 

فهد : حنا كفينا ووفيناا .. 

سعد : مات و خلى وراه مراتو و بنتوو... للي اكتشفت من بعد الوصية انها ماشي بنتو الحقيقية... 

فهد : اذن الورث لمن بقى !!! 

رعد : بغيتي تفهمنا ولد خوووه رائد اليازيدي غايدخل شرييك فهد فالمشروووع

فهد : لا لاا انااا ماقابلش هااادشي

سعد : قوولها لراسك نهار فكرتي تأسس مشرووعك بلاما نعاونوك .. 

فهد : بلاتي نتفاهمو .. السي اليازيدي الله يرحمو كان رااجل نااجح فخدمتو ومعقوول .. و انا طلبتو يخدم معايا على حسب تجربتو باش ناخد منو الخبرة ولحقاش عندو الاغراءات بزاااف عطيتو انا يدخل معايا بنسبة 40% ... يعني مشاا نشري حصتو و ياا دار ماداخلك شر 

رعد : على اسااس رائد غادي يقبل بعرضك !! 

سعد(شاف فيهم بجدية) : رائد مااتكتب فحقو ولا فرنك الورث كاامل تكتب فسميت بنت السي اليازيدي 

رعد : كنتت متوقعها من السي الياازييدي ...فين المشكل هناا ..

فهد : اه فين المشكل صافي نشري اسهمها و تنساحب من الشركة ... 

سعد : المشكل ان البنت من بعد 3 ايام من موت المرحوم قررت تفرغ لادارة الشركاات للي خلا باها و تكمل منين وقف بلااما تبدل حتى حاااجة يعني باش تسحب شركتك منهاا ممنووع.. 

رعد (شاف ففهد ) فهاد الحالة الاخ ماعندك مادير 

فهد : ارا البيوغرافي ديالهاا نشووف !!

سعد(مد ليه الورقة ) : هااك... وحمد الله ماشي راائد للي ايكوون شرييك معاك ... 

رعد : كووون كان داك الحيواان نمحي اصلللمّك نتاا ويااه .. 

فهد : على اسااس اناا انجلس نتفرج فيه .. 

سعد : لنفرض كان را القانون معاه واحد اتخرجوه من شركتو بزز مايمكنش ونفس الشي مع ميس اليازيدي 

فهد : الخدمة بحال الحرب كلشي فيها مباح (ابتاسم باستهزااء بزاوية فموو و حدر راسو فالورقة... كايقرا فيها بصوت مرتافع.. خديجة اليازيدي خريجة المعهد العالي لادارة الاعمال بنيويورك حاصلة على الماستر في الاقتصاد و التدبير كاتكلم اربع لغااات الانجليزية الروسية العربية و الفرنسية و دبا كاتدرس الكورية .. مدة التدريب عامين مديرة تنفيدية لتسيير الشؤون المالية ف شركة السي اليازيدي ... هززززز رااااااااسو بسرعة ففف سعد ... مااااسوووقييش اناا فهاد التخرميييز كااامل بغييت الخبرة وااش فهمتي الخبرة ... شااف العمر ديالهاا 29 عاام و عامين ديال التدرييب اتقارنها لياا انا بالسي اليازيدي للي عندو 50 سنه ديال الخبرة... لاا لااا مااامتااافقش اناااا واتخرج بزز منهاا ... هز التلفون ديالوو 

رعد : شنو كادير !!! 

فهد : نصوني للسكرتيرة تصاايب ليا شي موعد معاها 

سعد : للي بان ليك ديرو .. انا حطيتك امام الامر ونتاا تعرف ... 

رعد : هاادشي عول عليه نهار مات السيد .. 

فهد : معول نشري اسهمو حتى خرجاات لياا هادي بهاد الفكرة ... 

رعد(ناض من بلاصتو ) : السيدة مزياانة فايتلي تلاقيت بيهاا فلقاء صحفي مع السي اليازيدي ... نتا عندك الحرفة وهي عندها التسيير .. ماتحگرهاش

سعد : و الخبرة اتكون خداتها من عند باها ...

فهد : ماااسووووقيش .. /جاوباتو السكرتيرة ) آلوو علااش تاواااحد ما قال بلي جاات بنت اليازيدي للشركة 

السكرتيرة : السي فهد راك كنتي خارج كونجي و طافي التلفون ديالك.. ولكن را علمت السي سعد ... 

فهد : صوني لمحامي الشركة غدااا مع ل 10 الصبااح اجتمااع 

السكرتيرة : حااضر اسيدي ... 

قطع معاها و جلس بعصبية كايمسح فوجهو ... 

رعد : وايلي اصاحبي مالك مععصب تهدن .. شوف السي اليازيدي بكامل خبرتو تشارك معاك نتي للي قد حفيدو .. 

فهد : ولكن انا بكل توااضع رجل اعمال من الطفوولة وااعر ماشي عاد غادي نبدا فهاد المجال داكشي من الجيناات ... 

سعد : ماتعرف تكون حتى هي كاتقول هادشي ... اااه ليكن فعلمك المحقق كونان للي هو انا ماكتافاش بهاد المعلومات وصاف .. بقششت فحياتها الخاصة.. لقيتها كاتكره الجنس الخشن بصفة عااامة لدرجة حتى الشيفور ديالها مراا ... ديكتااتورية نوعا ماا .. 

فهد : كملاااااات ... ماتكافيتش مع النااس العاديين فحياتي يدخلوو المعقدييين ... 

رعد : هههههههه هادي للي اتحدهم لديك الزيغة ديالك 

سمعو الدقاان فالمكتب .. 

سعد : تفضل ... 

تفتح البااب و بانت نسرين من وراه بصوت خاافت نطقاات ... اجيو تغداو 

رعد ( تمررح فالفتوي و حل درااعو ) : توحشتيني ... 

نسرين : لا را جدي للي قاللي كلميهم .. 

سعد : شوف وكان 

(عضات على شفايفها و حدراات راسهاا بخجججل )

فهد(ناض خاارج مقررب ليها ) : ههههه عرفو عندنا اجتماع والله واخة يضلام الحال مايسيفطو لينا شي حد 

سعد (حتى هو خارج وراه ) سمحيليناا شدينا امانتك هههه

رعد : بعدووو على مرااتي تبقاو تحشمو ليا فيها يالاه خرجو تغداو .. ونتي اجيي اجي الحب اجي .. (كااتغمززز فيه من وراااهم بااش يسسسكت .. اشار ليها براسو باش تجي عندوو ... ) 

نسرين (قرباات للفتوي فين جالس شبكات يدها فبعضيااتهم بتوتر و حدراات راسها ) : نعااااام جبدها لعندو جلسها فوق ركابيه ) توحشتيني

نسرين : امم وشنو باان ليك ... حط وجهو كايلعب فعنقها بلحيتوو غممض عينيه فاش استنشق عطرهاا الطفولي و تنننهد بارتياااح 

رعد (بصوت مبحوح) شحاال توحشت ريحتك .. وشحال توحشت نقيس شعرك و نتوسدك فنعااسي .... توحشت نفييق نلقااك حدايا فالفرااش ... توحشت ناكل ماكلتك .. توحشت صوتك فالدار .. حراام هادشي للي درتي فياا مشيتي و خليتيني بلاما تسنااي نشرح ليك بلي جامي نبغي شي وحدة من غيرك ولانفكر نخونك واخة يوقع للي وقع ... شحال هذا كنت مع بزااف دالبناات ولكن فاش بغيتك و فاش جربت الحلال ولا كايجيني داكشي بااسل... فاش مشيتي عليا تهرست حسيت براسي ضاايع و مضيع كلشي ... و الخايب فهادشي ضلمتك حط يدو على وجهها ماهانوش علياا دموعك و ماهانش عليا ولدنا للي ضااع .. ماهانوش عليا ليام للي دوزتي فالسبيطار و ليام للي دوزتي فالمصحة كاتعالجي من الاكتئاب للي جاك بسببي ...نتي نورتي حياتي و عالجتيني من للي ماقدروش الاطباء يعالجوه و انا مرضتك و دخلتك فشي حوايج نتي صغيرة عليهم ... ماتخلينييش واخة يوقع للي وقع انسرين حياتي بلاا بييك ماتسواا والو... حطاات راسو على صدرها وحاوطاتو بيدها بزوج معنقاه بالجهد ... 

نسرين : واخة حاولت ماقدرتش ننساك .. و مستحييل نرتااح فشي بلاصة بعيدة عليك 

رعد : واعديني تبقااي معايا 

نسرين : مابقيت بغييت والو غير نبقى معااك كانوااعدك انبقى معااك .. حطات دقنها على رااسو للي مخشي بين صدرها متأكدة من وعدها ليه واخة خانوها دموعهاا للي ماقدراتش تحبسهم كيف لا وهي اختارتو هو ...متأكدة ان اللحمل الى مكانش منو مابغاتوش... 

سمعو صوت نهاال كاتعييط ليهم بااش يجييو يتغدااو مسحاات دموعها بسرعة .. 

نسرين : اوووك نهاال جااييين .. 

رعد : هاا التبرزيييط بداااا ... نااض هااازهاا بين يدييه 

نسرين : هههههه نقولللك واحد الحاجة 

رعد : اييه قولي ... 

نسرين : تووحششت هاد الهزاان ديالك و نتريني اناا وياااك و شي مقااابلة ديال الكيك بوكسينغ واااعررررة 

رعد(نازل بيها فالدروج ) : من هناا للقداام مكااين غير هاادشي وجججدي رااسك ... 

نسرين : بزاااف دالحب اعباااد الله ... 

حطها فاش نزلو التحت لقاو العائلة مجموعة عالطبلة كايتغدااو ... صايب ليها الكرسي و جلس حدااهاا 

رعد : اول مرة من بعد شهرين و نص غاادي نااكل واناا مرتااااح .. شرحوو ليها بلي كانبغييها وهي للي عندي (خشات يدها من تحت الطبلة كاتقرص فيه )

فهد : كاايكذب عليك اختي ماتيقيهش .. 

السي عبد العزيز : الله يدومها محبة بينااتكم 

السيدة ليلى : اميين يااارب .. 

داز الغدا فجو مليء بالحب من طرف رعد مقاابلها و يوكل فيها و متبع حركااتها و كلاامهاا كانت حتى هي طااايرة بالفرحة ماشي كثر من عاائلتهم للي كايشوفو فالانسجاام للي بينااتهم بإعجاااب ... تسللات من وسطهم بلاما يلاحظ هو للي كان كايتناقش مع عمامو و خوتو ... دخلات للداار لقات الخدامة واقفة حدا ڤاليزة درعد مع شافتهاا جات لعندها .. 

الخادمة : ماعرفتش فين نحط الڤاليزة السي رعد قال نخليك نتي تختااري الغرفة.. 

نسرين : (واانااري هاد رعد ضاارب لحساااب من قبل مانتصاالحوو .. ) صافي شكراا انا انااخدهاا ...

الخادمة : لا لا غير وريني لبيت ... 

نسرين : واصاافي هادي حتى هي نطللعك علييهاا... هزاااتها فيدها وطلعااات كاتجري فالدوووج دايرة عند الخدامة للي كاتضحك لحمااقهاا ... مااحدااتها حتى للطاااج الاخير تحل فهاد الباب تسدو و تحل لاخر حتى حلااااااااااااات فمهاا فغرفة كبيرة فصالتها جاية على شكل مثلت كاتوسطها ناموسية مربعة ديال الخشب واقفة بعواد كبار طالعين حتى للسقف للي نازلة منو خامية بيضة شفافة كاتبين داخل السرير للي اونفاص لباب زجاجي كايخرج للبالكون ... مشات كاتطل بإعجاب بانت ليها شجرة ضخمة اوراقها فالموڤ عاطية الظل للبالكون للي فيه جليسة صغيرة ... رفعاات راسها بارتياح كااتشوف فمنظر وااد كبيير دايز من وسط الطبيعة الخضرا ..... استنشقاات الهواء نقي بارتيااح حطات ڤاليزتو على الناموسية باش تستف حوايجو و تنزل تجيب حواايجهاا.. فتحت الفاليزة حتى كاتصدم فالعلب للي محطوطين من شكلهم كايبانو كادوياات ... بلهفة هزات العلبة فتحاتها جبدات بيبي دول ساستو بيدها حتى تحل وخرجات عويناتها كاتشوف فيه باستغرااب عبارة عن ليبا موس جاية حتى للركبة مشدودة بخيوط مع السليب و السوتيانات مزين بحجيرات كايلمعو ... 

نسرين : واللاهيلا طلع عندك الذووق .. هزات العلبة التانية للي كانت مربعة مكتوب فيها BlaCk Diamond 

مع فتحاتها لقات مجموعة بييرسينغ فالالوان ... 

نسرين : هههههه والله حتتتى حمقق هاد السيد .. باقي عااقل وااحيدت داك الزمر دوك ليام نييت ... رجعات هزات علبة اخرى مستطيلة فالكحل من نفس المجموعة ديال العلبة الاولى ... حلاتها وبقات كاتشوف مبهووضة فالطاقم الماسي الاسود .. سنسلة منبتة بالاحجار الكريمة فالاسود للي كاايلمع بنفس الشكل ديال حلاقاتو و براصلي و گورميت ... خلخال و خاتم.. عضاات شفايفها بلهفة ... دايرة كاتقلب تاني فشنو جااب حطات يدها على الصاك للي مخشي فالفاليزة جبدااتو و هزات منو فستان النص الفوقاني اسود و النصف التحت بني... من الفصالة ديالو كايبان بحال الساعة الزمنية .. بان ليها صباط طالون فالاسود مقمقم من القداام.. 

نسرين : هااااحح تهلاا فيا الحوبينوو... فرشات داكشي كامل فالناموسية كاتشوف فيه بإعجااب حاايرة شنو تلبس واش البيبي دول ولا الفستان للي من شكلو باين ليها ممنوع تخرج بيه براا الغرفة ... قبل مايدخل ناضت ضرباتها بتدويشة غسلات شعرها للي كان باقي فيه الربيع ديال الگازون خرجات ملوية فالفوطة.. كاتنشف فلحمهاا و كادور عينيها فشي مرطب تدهنو مالقاات وااالو حتى ڤاليزتها مزاال ماطلعااتهااا .. مشطااات شعرها كاامل جمعاتو على شكل كعكة و هزات الكسيوة للي جات مزييرة عليها حتى لفوق الركبة مفتوحة من جنب واحد .. جاية حد الصدر و من وراها توب كايتشد فالعنق لوالتو على عنقها 

كاتلبس فالصباط وتنگر يخ يخ طالعة نجري بلا اترووس ديال المكيااج هو اللخر دبا غانبقى شااحته هكاا ... ولكن الكسوة غطات عليا كانبان زويينة يااك يااك كادور راسهاا و تشوف فالمراايا و تضحك على شكلهاا فاللخر وقفاات كاتشوف فراااسها بجدية .. اصلا الميك اب كاعما كايعجبوو ... دورات وجهها ف البوانيي ديال الباب كتحل بلا مايدق عرفااات فعايل رعد للي كان داخل جار فيدو ڤاليزتها كايشوف فيها بإعجااب طلع حسن من كيفما تخايلو عليهاا جاي لجيهتها ببطئ كايشوف بإعجاب فجسدها الناعم... حل فمو فوجهها للي بلا مكيااج كاتباان طبيعية كيف بغاها النهار الاول متميزة ببراءة ملامحها الطفولية من ديما مكايحملش يشوف عليها داك الميك اب الكثير لكن ماينكرش بلي كايغييير فاش كاتبرز مفاتنها به ..

فاش كاتطراسي شفايفهاا المنفوخين قرب ليها بإعجااب شد رقبتها برفق مفيكسي عينيه فعينيها بتنهيدة حارة أخد يقبلها شفتيها الناعمتين فتح ليد لوخرى طلق لها الفاليزة للي كان جاار ... غمضاات عينيها باشتياااق كاتستشعر معاه كل لمسة ... بلاما يتكلم على اعجاابو بلباسها و جماالها الطبيعي وقفتها الجذاابه كان كلشي مترجم فاش غمض عينيه كايقبل شفاايفهاا بلهفة ... جارها من خصرها بعنف تجاوبها معااه كايزيد يعلي سعراات حراارتو .. واقفة مسلمة جسدها لقوتو وكأنو كايعااتبها بطريقتو الخاصة على غياابها.. كايقبلو بعضهم بعنف متبادل ممزوج بحب كبييير فسخ الفستان للي جا طايح الارض كبف ما طيرات التشرت ديالو ... للحظة ولات كاترعد لحقاش مزااال مابراتش بشكل نهائي من الجرح للي فمؤخرتهاا غمضاات عينيهاا بالجهد فاش رفعها لعندو مدور رجليها على خصرو قلبها ولاا كايضررب بشدة همسات ليه بصوت مبحووح مزاال مابريت مزياان ... ششش سكتهاا بلطف كان حاس بكل بلاصة ضاراهاا بلاماتنطق ... فمعاشرتو ليها كعادتو بين حبو الكبير ليهاا... فرحتها .. إحسااسها.. شعورها وهي معااه ولا مليون حرف يقدر يترجموو ... عنقااااتو بالجهد مدوورة رجليها عليه و هما متكيين فالناموسية مغطيين بايزار بيض طالقة شعرها السارد على راحتو وحاطة راسها على دراعو للي مادو ليها و ناعس على ضهرو كايمشي يديه على ضهرها.. 

نسرين : حبيبي .. 

رعد (غاالب عليه النعااس ) : هم 

نسرين : مغاديش تنزل ... 

رعد (بزز باش قادر يجاوبهاا عينيه ذابلين و لسانو مشلل ) نوو

هزات راسها فيه وااش فيك النعاس !! 

نسرين : نووض حتى لليل و نعس خاايب النعاس و را العصر 

رعد(مغمض عينيه و كايدوي معاها ) : قبل مايودن المغرب فيقيني و صايبي ليا ديك القهوة للي كاطيبي..

نسرين : توحشتييها .. 

رعد : ااهم 

نسرين : مييمتي عل النعااس .. 

رعد : الى بغيتي تخرجي خرجي معاك بورطابلي باش مايصدعنييش ولا طفييه... 

سحب يدو منها و داار عاطيها بالضهر عنق المخدة و نعس حاالة فمو ... 

نسرين (بصووت مززززعج ) : دباا لوسااادة ولاات حسسسسن مني ياااك مولف توسدني ااااا ولا غييير كااااتعننننب علياااااااااا ... 

قلبهااا بسرعة البرق لببلاصة المخدة قادليها يديها مع ضهرها و حط رااسو على مؤخرتهاا .. تحركي هاااه ولا هاااه نتيريي فييييك.. خلييييني نننععس بيني وبيين هاد الغمضة شهرررين ونص 

نسرين : ااااوه ماي لوڤالمععصب اوك نعس اكبيدتي نعس.. تقلباات حدااه عنكشاات ليه عنقو وبدات كاتقاد فيه باش تحطو على صدرها... كاتمشي بيدها على شعرو حتى حسااات بيه كاايشخر ... بغات تسلل من تحتو ماقدرااتش فاش سمعات نتيري فيك.. تيري فيااا و شوف شكون ينعسك هاد النعيسة... 

وجهك ولات معمرااه غير اللحية ضعاافيييتي مابقيتش كتاكل من اليوم مكاين غير الطواااجن و الخضراا مشرملة و الفطور فالوقت ... 

هزات البورطابل بشوية ريكلاتو قبل المغرب ب ربع ساعة ... و حطات راسها بارتياااااح من كثرة الفرحة مجاهاش النعااس بقات غا متكية كاتقيس فذرااعو وفشعرو مثقل على صدرها ماقادراش تنزل عينيها تشوفو كيفاش ناعس ... بدا كايصوني البورطابل طفاتو دغيا و ناضت دوشااات و جاات كاتفيق فييه... 

الرعده ديالي .. كبيدتي تسونامي لعجااجة وواافيق ابب فييق... 

رعد : اااامههم... 

نسرين : فييق احبيبو قرب يودن فيق انا نمشي نصايب ليك قهوتك ونتاا نجي نلقاك دووشتي ... دارت هزات ڤاليزتها جبدات من دوبياس و سرفيت گري مع سبادري ... جمعات شعرها بالفوكة و بدات كاتلبس فحواايجها حتى سالات وهزات السشواار نشفااتو و جمعاتو كوتشوفال .. نسرين(هزااااتو وحطااتو بصوتهاا ) : رعدوووووووشي فيييق ابب فيق .. 

ناااض جالس مربع رجلييه و مغمض عييينيه ... هااناا هانا 

نسرين (منظرو جاب ليها الضحك) هههههه .. نجيي نلقاك دووشتي ... 

رعد (حط راسو على المخدة دايخ ) اووك ... 

نزلات كاتنقز زوج درجات و تحط رجليها فالدرجة التالة ... كاتلعب فيهم حتى وصلاات للكوزيينة ... لقات الخدم كايطيبو فالعشاا ... 

نسرين : عفااكم شكون يعطيني البريق ديال القهوة .. 

الخادمة : اووك فتحاات البلاكار و جبداتو ليهاا .. 

نسرين : ( بخجل ) والقهوة ال !! 

الخادمة : هااهي.. وااش نوجد ليك قهوة 

نسرين : نوو نوو انا نصاايبهاا ...

هزات البريق خوات فيه الما ... دارت 3 المعالق ديال القهوة و حطاتو يغلي فوق البوطة من بعد خلطات مع شوية سكينحبير و البزاار مع السكر... 

لقاتهم جدو ليها الكيسان فبلاطو ... عمراتهم وهزات البلاطو بشوية شادة التوازن لاتصدق خاوية عليها كلشي .. ماوصلاتو حتى عرقاات و نشفاات لقاتو بااقي نااعس ... 

نسرين : اوييييلي نتاا وااش واكل قريقييبة نوووض 

رعد : فيين تعطلتي .. 

نسرين : فالدرووج (كاتنهد ) سخفوووني جلساات حداه هو للي كايقاد فجلستو بانت ليه السوفيطمة ديالو هزها لبسها و شد من عندها الكاس... مع حط جغمة فموو غمض عينيه بلذة .. 

رعد : مممممم لذيييذة .. 

نسرين : بصحة الحب ..

شربها كايتلذذ فيها و كايشوف فنسرين للي اتحماق على شكلو و حركااتو ... حتى سالا و ناض دووش خرج مع الاذان ديال المغرب لقاها جالسة كاتخندش فتلفونو وتقرا الميساجاتهللي معضهم كانو غير ارقام سرية.. 

نسرين: بفف بورطابلك ممل 

رعد : دباا كون لقيتي ميساجات ديال البناات تستمتعي .. 

نسرين : الحب تااب .. 

رعد: توتبتيني 

نسرين : ههه فخورة بهاد الانجاز ..

كايتاسارا على حوايجو للي كانو مفرقين فالبيت مع الكادويات 

نسرين : حبيبوو عجبووني الكادوياات 

رعد : فالليل تلبسي ليا التاني 

نسرين : يااه ماعييتيش 

رعد : نعععست ارتاحيت 

نسرين : واانا مانععستش .. 

رعد : نعسي دبا تايود العشا 

هزات تشرت ديالو .. 

نسرين: هااك لبس ابب شدو من عندها و جلساات كاتشوف فيه كايلبس وشعرو كايقطر على لحيتو عينيه كايبانو حمريين بالنعااس .. 

لبس بوكسر و شورط و جلس حداها كايلبس فالتشرت.. 

ساهي كايشوف فيها بحالا بغا يقول شي حاجة ولكن ترااجع فاش شاف عينيها كايلمعو بفرح

نسرين : مالك !! 

رعد : والو 

نسرين : شنو بغيتي تقول .. 

رعد : لهاد الدرجة وليتي حافظاني .. 

نسرين (حطات يدها على خدها ) نعاام انا كانسمع

رعد : شنو درتي .. (بارتباك ..) شنو درتي مع بااباك .. 

نسرين (استغربات من سؤالو) بابا !! 

رعد : ااه 

نسرين (هرباات عينيها منو و ناصت كاتجمع فبلاصتهاا ) : شنو بغييت نديير .. مادرت واالو ههه رجعت من المصحة لقييتو مشاا المغرب .. احسن حاجة داار .. لحقاش ماابقييتش بغيت نشوفوو .. 

رعد : ولكن كايبقى باباك ... 

نسرين (ولاات حمرااا ) لاا مااشي بزز علياا نتقبلو ... راهم ولادوو بغااوه ماتدخلتش فيهم ولكن اناا مااشي بزز علياا نبغيه ولا نسول عليه 

رعد (حط القهوة و جرها لعندو كايحاول يهدنها) صافي ماگلت والو .. 

نسرين : علاش جبدتيه !! 

رعد : عادي نسول مراتي على باباها 

نسرين : لاا مااشي عااادي نتا اكثر واحد مكاتبغيش تجبدو ليا باش ماتقلقنيش

رعد :ولكن هو راه طلب السماح و نددم بزاف على داكشي للي دار .. 

نسرين : رعد عفااك ظروفي ماعشتيهمش و حياتي ماجربتيهاش وداكشي للي بيني وبينو واخة نبقى نعاود ليك عليه من هنا حتى للصباح مغاديش نكملو ... 

رعد : عارف كلشي ... انا مابغيتش نرجع ليك داكشي الخاايب بغيتك تبدااي صفحة جديدة وبغيتك تساامحيه باش تعيشي مرتااحة .. 

نسرين : انا هاكاا مرتااحة و انكون مرتاحة كثر الى تلاقيت مع ليلى و يوسف و فؤاد .. 

رعد : من بعد .. مابغيتش يوقع ليهم كيما دارو لباباك ..

نسرين : وهادشي للي مصبرني عليهم ... 

رعد : باباك هضر معاياا انسرين داكشي للي دار ماشي لخاطرو را كان تحت التهدييد 

نسرين : ونتا تيقتييه !! 

رعد : اه .. 

نسرين : شي طنوعيرة هادي كايوجد ليها المهم انا برأت ذمتي منوو مكايجيني مكانجيه و باش يبقى غادي جاي خيطي بيطي هناا راكم كاتلعبو بالناار .. 

رعد : هههه اووك .. اووك

نسرين : مزال بااغي تهضر .. 

رعد (فنفسو جبدت ليها غير باباها وشوف اش دارت) لا لاا مابغيت نقول والو ... 

نسرين : هانا و هانتا لاماكنتش فراسك شي حاجة 

رعد : بحالاش !! 

نسرين : اناا عارفااك بقيتي مرااقب الناس للي دايرين بيا فالمغرب.. و كاتعاون ليلى و فؤااد و 

رعد : ااها عندي ل FBI فالدار ومافراسيش 

نسرين : شفت الوراق غير بالصدفة ... 

رعد (قررب ليهاا شد ليها يدها للي كانت كاتحرك فيهم بعصبية ) الناس للي كايخصووك كايخصوني حتى انا .. ليلى و الدراري لااباس عليهم و ديما كايسولو عليك حتى هما ماكرهوش يشوفوك .. و باباك ندم كون ماكنتش متأكد من هضرتي مغانجيش نهضر معاك عليه .. و كون كان كايكذب كنت نحيه بلاما نسولك ... السيد را داكشي للي عاش صعيب عليه اي واحد تهدد بالسلاح غايخااف ...

نسرين (نطرات منوو ) : باقي مااوصلتييش للهضرة للي بغيتي تقول ارعد ...

رعد(بدون سابق انذار ) : لقيت ماماك .. 

هناا حبساات الحركة جاتهاا بحال التصرفيقة 

شافت فيه بصدمة بغات تكلم لكن لسانها تشلل كيفما قلبها خفق بغصة جمداات فبلاصتها ... بلاماتحس نزلات دمعة حاارة على خدها مسحاتها دغيا و بلعات ريقها.. كيفما نطقات بصوت خافت غالبة عليه الصدمة ... 

نسرين : باقة حية 

رعد : اه و محتاجة تشوفك ..

نسرين: ششش سكتت مابغيت نسمع عليها واالو... نااضت تالفة من بلاصتها ماعرفات واش تخرج للبالكون ولا تهرب من البييت المهم تبعد من نظراات الشفقة للي كايشوفها بيهم ... 

رعد(بعطف) : نسرين اناا 

هزاات يدهاا بااش تسكتوو بلاما تشوف فييه كانو ملامحهاا خااليين من التعبيير مصدومة و مبهووضة ماماها باقا حية وعايشة وعمرها فكراات تقلب عليهم حتى جابها رعد للي كايقول محتاجة تشوفها شنو محتاجة تشوف فيا .. تشوف ديك نسرين الطفلة للي خلات وراها شحال هذا .. ولا نسرين للي هزاات الحمل على كثافها .. شكون بغات نسرين القوية و لا الضعيفه ... الضحوكية ولا النكدية شنو بغات تشوف تشوف البنت للي من كثرة المشاكل و لات متنااقضة كاتخبط من هنا لهناا عالله تزيل هاد شي للي خاانقها ... اه يا ماما شنو باغا تشوفي نسرين للي قتلتيها قبل ماتعيش بمشاكلك نتي وداك الاب الاناني مابغااتش تبكي و مابكااتش لكن طلقات رجليها للرييح خرجاات كاتجري من البيت ناازلة فالدرووج بالزربة هااربة هاربة من رااسهااا ماكرهااتش تحيد قلبها تلوووحووو فشي قنت و ماتبقاش تحس هاد الاحسااس للي كايرجع ليها اللومة فالحالات بزووج ... لا هي قااادرة تنسااهم و تكمل حيااتها ولا قادرة تلاقى معااهم مرة اخرى... جممعااات البكية حتى جمعااتها وهي تشهق بانفجااار حطاات يدها على الشجرة للي تخباات تحتها كااتبكي بهييستيرياا ... عمرها ماضناات حلمها يتحقق فثواني و ترجع مها تشوفها ماعرفاتش باش اتصرف ولا كييفاااش ... للي عارفة بلي اتندم بزااااف الى قالتلو مابغييتش نشوفها... كيفما غادي تتأم بزااف الى شافتهاا حساات بضمه رهيييبة جاتها من اللور خرجاااتها من احساااسها .. دورها لعندو بجهد ضم راسها على صدرو مخليها تبكي على رااحتهاا ... 

نسرين(شفايفها كايترعدو بالبكى ) : بغيت ننسااهم مابغيت نشوف حتى واحد فيهم ... 

رعد : لا ماغاتشوفيهمش غير تهدني كانقسم ليك ماتشوفي تاواحد 

نسرين : ماتوريهااش بلاصتي ... مابغيتهاش تجي عندي شي نهار هي للي خلااتني ماشي انااا (انفاجراات بالبكى ) انا مااشي انانية .. انا غير مابغيتش نسمح ليها تآذيني

رعد : كانقسم ليك تاحد مايآذيك ... اناا للي مكانش علياا نجبدها ليك ...

نسرين : بغييت نسااهم ارعد الى كنت عزيزة عليك غير شوية ماتبقاش تجبدهم ليا.. هما حگروني اهئهئهئ ولاحوني بلامايسولو فياا فاش ماتت جدة والله ماجاات .. كنت ديما كانتسناها تجي تسول عالاقل على مها اهئهئئهئ الكلبة ماتلوحش ولادها اللوحة للي لاحتنا هي ... مابغيتش نشوفهاا والى كنتي باغي مراتك يكونو عندها واليدين .. انا نهار الاول عرفتيهم ماعنديش ... 

رعد : اش كاتخربقي .. ششش انا للي بياا نتي مابيا حتى حد من غيرك ... ماقصدتش نجرحك اعمري ماقصدتش ... 

حطات راسها على صدروو كاتنخصص بالبكى بقاو هكاك حتى حساات براسها ارتااحت عاد طلعو للدار ... لقاوهم كايصليوم جماعة دخل رعد وسطهم كايصلي ونسرين طلعات لبيتها لبسات عبايتها و صلات ... دازت ليلة صعييبة على نسرين الليل كامل وهي كاتخلع من الكوابييس .. مزال كاتحلم بديك اللقطة للي تبعاات فيها ماماها فالليل كاتجري وراهاا طيح وتنوض حتى بعداات عليها... طلعاات لها الحراارة بقاات كاتهتر الليل كامل بكلام مامفهوومش مفارقهااش رعد للحظة فاش كاتشوفو كاتخشى فحظنو مخبية من الكابوس للي شافت ... فاقت كاترمش عينيها فالصبااح بكري لقات رعد جالس اونفاص ليها كايشوف من الزاج مع دور وجهو شاف فيها نااض قاافز لعندها ... 

رعد : نسرييين فقتي 

نسرين : صباح الخير

رعد : كيبقييتي شوية... كايقيس فجبهتها و خدودها للي ولاو باردين 

نسرين : سمحليا كرفصتك فالليل ... الحمدلله انا بخير 

رعد (عننقهااا بالجهد) الحمدلله الحمدلله ... 

نسرين : فطرتي ... 

رعد : كانتسنى تفيقي باش تفطري معايا ..

نسرين : شحال الساعة 

رعد : 7 الصباح 

نسرين : باقي الحال ... 

رعد : فهد و الدراري كايفطرو لحقاش ليوم ايمشيو للخدمة ... 

نسرين : نوضو نفطرو معاهم ... 

نااض بالزربة حط ليها بالطوفتها كيفما لاحت عليها القبية ديال السيرفيت ودخلات تغسل وجهها .. اما هو كان لابس حواايجو واقف كايتسناها حتى خرجها من الدوش شبك يدو فيدها و نزلو ... لقاوهم كايفطرو فالجردة .. 

رعد : صباح الخير ... 

الكل: صباااااح الخيير..والورد و الياسمين 

يونس : رعد شوف شوف الانااقة و الشياااكة ديال فهد .. 

نهال : فين الجديد فالموضوع 

رعد (كايقاد لنسرين تجلس للي قاطعة الحس و قالبة وجهها ) 

سعد : ليوم ايتبهدل اخر تبهديل 

فهد : ليوم اتسمع استقااالتها 

سعد : ذااك حلم 

فهد : على شحال بغيتي نتخااطرو ااا 

سعد : تمشي للخدمة بشورط و كرفاطة 

فهد : قول شي حاجة معقولة ابناادم 

سعد : تستقل نتا فبلاصتها 

فهد : مستحييل ... 

سعد (رفع حجباانو بجدية ) نتا تجيبها لعندنا نتعرفو عليها كااملين 

يونس : اش بغيتي داار معاك المزياان 

فهد : (هز الجورنال كايقرا فيه ) هادشي الى بقات .. يخ باقي عمري ماشفتها كانتخاايلها بحال ديك الشحرورة للي كاطير بديك الشطاابة ..

رعد : لاا لا لا زويينة 

نهال : احم احمم كاتسااراو تشقققلب هاد الطبلة.. 

نسرين ساااهية كاعما سامعة شنو كايقولو و فاش كايهضرو واخة كاشي كايشوف فيهاا و كايضحك 

وعد : ( لمحاات عينيها منفوخين ) نسريين مالكي !! نسرين

رعد (حرك لوعد براسو باش تسكت )

كحاات فاش سمعات شي حد كايعيط ليها ...

نسرين : نعاام 

فهد : ااش درناا انسرين علمتك تمشي معايا للشركة شفتك مزاال ماوجدتي رااسك..

نسرين : ماكرهتش ولكن ماعنديش الگانة .. غير سير مرة اخرى 

رعد شاف فيهم بتساؤل 

فهد : كنت قلتلها تمشي معايا للشركة تشوف خدمتنا كيدايرة والى عجبها الحال تبع الشعبة ديالي.. 

رعد : ايااه فكرة مزياانة ... (شاف فنسرين ) سيري .. سيري بدلي الجو شوية ... 

نسرين : ونتاا ! 

رعد : حتى انا عندي الخدمة بزاف اليوم مغانساليش ... 

نسرين : اووك ..

فهد : يالاه سيري لبسي انا كانتسنااك.. 

رعد (عيط للخدامة ترافقها فالدرووج و للاخرى تحط ليها فطورها... حسسات براسها اتبدل الجو الى مشات للشركة .. حاارت فشنو تلبس لكن فاش تفكرات بلي مزال الحداد على شريكو للي مات .. هزات سالوبيت فالكحل جاي نازل من الجناب بسينتة بيضة الفوق ديالو عبارة عن شوميز كمايمها مفخفخين من الكتاف كاتوسطها بابيون فنفس اللون.. قبل ماتلبس صايبات شعرها بالبلاك و جمعات حتى قادات مكيااج خفيف يخبي التعب للي فوجهها .. فاش سالات طلقات شعرها و وجدات صاكها حطات فيه بورطابلها و بزطامها مع وراقها .. عاد بدات كاتلبس فحوايجها عقداات بزيم الصندالة الطالون و جاية خارجة حتى كاتصادف مع رعد للي بدا كايطلع و ينزل فيهاا ... شدها من يدها كايدور فيهاا... 

رعد : وااخة غرت ماعندي ماندير ... 

نسرين : تغير من شكوون وانت مالكها بوحدك هاا ..(دور يدو على خصرها وقرب لحدا وجهها ) نغير من للي جات عينو فيك بالصدفة .. ورجع كمل الشوفة.. (حطات شفايفها على فمو و نطقات ) حتى واحد مغايشوفني بالطريقة باش كاتشوفني نتاا.. قبلااتو بالجهد .. 

دورهاا و هو شادها من خصرها... نازل بيها للدروج.. 

نسرين : فين غادي ياك كنتي طاالع 

رعد : طاالع نجيبك باش نوصلك للشركة ديال فهد.. رااه سبقناا... 

نسرين : اوووه تعططلت .. 

رعد : فالعشية نجي نجيبك اووك .. دوزي النهار مزياان والى خصاتك شي حاجة اتاصلي بياا .. 

نسرين : اوك 

************** 

فجهة أخرى وصلات خديجة اليازيدي قبل من فهد للشركة فتحات ليها السائقة الباب بعد ما ألقت عليها التحية.. نزلات فكااامل اناقتها لابسة بدلة سوداء انييقة عبارة عن شوميز مع سروال اسود لايحة من فوقهم ڤيست بلا مادخل يدها فكمايمها شادة بصبيعات يدها حقيبة ... قابطة الحجاب بفيليل صغير من جهة عنقها و دوراتو على كتافها الشيء للي كمل ليها منظر البدلة الانيقة .. لونو كاكي فلون الصباط الطالون و لون الحقيبة ... وقفاات بشمووخ دااخلة راافعة رااسهاا بلاما تحدرو كتحية للحرااس للي قدام باب الشركة الضخمة ... دخلات من الباب الدوار بسرعة خشات البطاقة باش تدخل المصعد الخاص بالمدراء... ماوقفاتش بزااف حتى تفتح المصعد بركات بصبعها على الطابق 33 للي فيه مكتب بّاها .. مع دخلات وقفو الموظفيين القوا عليها التحية ... 

تقدم المسؤول ديالهم ... بصفتي مسؤول على الموظفين انا و ياهم كانتقدمو لك ولعائلتك باحر التعازي.. 

خديجة : شكراا (رفعات حجبانها فيهم بثقة فالنفس ) انا خديجة اليازيدي بنت السي اليازيدي .. من اليوم كانترأس اعمالو كاملة.. يعني للي كان خدام معاه ايولي خدام معايا اناا نبغي السكرتيرة تجيب لياا جميع المعلومات عليكم .. 

السكرتيرة : حاااضر 

خديجة اليازيدي : كل واحد يشوف خدمتو .. 

تقدمات بخطواات مسرعة ووراها السكرتيرة كااتجري .. مع فتحاات الغرفة كاتصدم بالكم الهائل ديال الورد للي فالمكتب

خديجة (بعصبية ) شنوو هادشي 

السكرتيرة : كاع الناس للي ماقدروش يتوصلو بعنوان المنزل عزاوك فالخدمة 

خديجة : عيطي لشي حد يخرج عليااا هادشي و خليو البطاقات .. 

السكرتيرة : اووك ..

فنفس الوقت وصل فهد للشركة بلاصا طموبيلتو للي من نوع شيڤرولي كامارو فالباركينغ فتح الباب و نزل بكاامل شيااكته لابس كوستيم فالگري فيه نقيطات بلومارين مع شوميز بايضة فاتح ازرارها على صدرو الفولاذي ملصق فيدو ليسرية ساعة جلدية بنية فنفس لون الصباط .. مخبي بالنظارات عيونو الزرقاء .. كليكا على البوطون ديال مفتاح السيارة و تسدات الطموبيل .. دوز على لحيتو الخفيفة بشوية و رفع رقبتوو جاي دااخل للمصعد بالزربة كعادتو سريع فمشيتو و حركااتو .. خفة دمو للي كايعشقها الكل ... تحل الباااب و دخل للطابق للي فيه المكتب ديالو فنفس الطابق للي فيه مكتب السي اليازيدي.. 

عطرو وصل للموظفيين قبل مايدخل مع بان ليهم ف الباب حبسو الحركة كايشوفو فيه بابتسااامة و كأن الشمس شرقات فالشركة ..

فهد ( رفع نظاراتو على شعرو ونطق باللغة العربية) : صباااااااااااحُ الخييييير 

الموظفين : صاباهوو اللايير .. 

فهد (كايصحح لوحدة فيهم ) نووو صبااح حاا حا حا ... 

ريتا : ها ها ها .. 

فهد : هههه كلشي مزيان (دار لقا السكرتيرة ديال السي اليازيدي هازة فيدها قهوة ) good morning ... (جر من عندها الكاس جغم منو وبدا غادي به المكتب ديالو ) 

السكرتيرة(بشوية ) : ولكن ولكن القهوة دياال المدييرة شنو ندير معااهاا 😟😟😔 دورات البلاطو فيدها و رجعااات بالزربة تجيب وحدة اخرى... 

فهد (حط مفتاح سيارتو عند السكرتيرة ديالو) الى دخلتو غادي يتودر بين الورااق .. 

السكريترة (نااضت بإعجااب تابعاه ) : ههه نخززنوو دباا ... 

فهد(داخل للمكتب ديالو) : عطييني لاليست ديال اليوم

فهد ( جلس فالكرسي و حط ضهرو هاز راسو فيها ) 

السكرتيرة : . اليوم كاينين 3 الاجتماعات و موعد فالعشية مع السيد victore vannone .. 

فهد : بفف كيفاش نسييت هاد الموعد كان دايرو مع السي اليازيدي قبل مايموت .. شفتي موت الفجأة شحال خاايبة 

السكرتيرة : كانتأسف ليه مسكين . را جات بنتو ... 

فهد (هز راسو فيها ) فيناهي !

السكرتيرة : فالمكتب ديالها 

فهد : ديال باها .. 

السكرتيرة : ااه .. كيف دازت عطلتك 

فهد : مزيانة .. نوو زوينة زوينة بزاف ... ارتاااحيت من هاد اللقاءاات 

السكرتيرة : اش خبار السيدة ليلى 

فهد (خاشي راسو فالوراق ) : لاباس عليهاا .. 

(بقات سااهية كاتشوف فضحكتو الجذابة وهو كايقراا الاوراق للي قدامو مشغوول بيهم ومع ذلك مامنعوهش يميك على سؤالها الباايخ و هي كاتحاول تكلم معاه ماكرهااتش تبقى غير تشووف فيه و تضحك مع حركااتو و ابتساامتو ... خدماات حتى عياات لكن عمرها ما قابلات شي مدير متوااضع صغير و زويين بحال فهد.. كايسمع الدقان ) 

فهد(حادر راسو كايقرا فالوراق ) : استرييلاا .. (بقات ساهية ) 

فهد : هييه استريلاا حلي البااب واش اتبقاي واقفة يلااه سيري شوفي شغلك 

استريلا وقفااات مفزوووعة كاتقااد فلوراااق بين يدهاا .. : اوووك ايم صووري ... 

فهد (دور وجهوو بالسلب كايضحك على حركاتها ) هه ماعرفتش اش باقي مصبرني معاك ...اوو استرييلا الى جات شي بنت سميتها نسريين دخلييها للمكتب واخة نكون انا فالاجتماع .. ولا خليها على راحتها تسارا فالشركة اووك 

السكرتيرة : حااضر .. (فنفسها ) ولكن شكوون هاد نسريين .. 

خرجاات من المكتب كاتكلم مع راسها مخلية المحامي داخل لعندو .....

*************

تسمع الفران كغغغغغغغغغغغغط حبس رعد بالجهد قداام الشركة بقاا كايتكلم مع نسرين حتى نسى بلي وصل .. 

رعد : لHubb وصلناا .. 

نسرين : (رفعات راسها ) احح هادشي كامل ديال خوك 

رعد : طلعي وعنداك ديري شي كارثة نتي مكاتهنااي حتى كاتجيبيها فعضامك

نسرين : مالي مالي انا اش ذنبي الى كانت فيا التابعة سميتها الزبايل 

رعد(فتح ليها يديه بزوج) : ههه اجي اجي (ترمات فحضنو و خشات راسها فعنقو ... )

نسرين : غادي نتووحششك 

رعد : فبلاصة ماتمشي عندو يالاهي معاياا .. 

نسرين : نتاا مععصب .. كاتبقى مغوووبش و تكلم بجدية و تآمر فيهم و انا نبقى جالسة شادة قلبي بين يدي لاا... 

رعد(رفع حجبانو فيها) : لهاد الدرجة كانبان معقد 

نسرين : لاا هااح كون كنتي كاتضحك يذووبو ليا فيك كااملين

رعد : عافية انا 

نسرين : نتا الرعدة ديالي .. (قرباات باستوو ) مزيااان بقاا مغوووبش ماضسرهمش علييك والى شي وحدة باانت ليك عجبتيها بين ليها الخاتم .. 

رعد : ونتي اثبتي و جلسي فالمكتب ديالو وجمعي فمك مااتعرفييش على كااع الناس للي فالشركة و تبقااي طاالعة هاابطة و تكركري لبناادم.. 

نسرين : رااا تووصل تووصل هااودني منك 

رعد : هاحنا تفااهمناا 

نسرين : شوف شوف كيولى حمر هههه غرتي 

رعد : كوون غرت انخليك تعتبيها 

نسرين : والله حتى غرتي هههه صاااف الحب والله مانضحك مع شي حد .. نتا راك سييدهم 

رعد : اايه ياك انا غير معقد و كانبقى مغووبش

نسرين : جررب تضحك .. اكبر بونية طيح ليك سناانك .. 

رعد : بهاد الفورمة .. 

نسرين : بهاد الفورمة طيحتك نتاا كاامل بقا غير سنانك 

رعد : لاا هادي كااينة ههه 

نسرين : يلااه جمع .. شووف هاه بقا تسني بليسرية باس يباان ليهم الخاتم 🙈

رعد : ههه هبطي الحمقة هبطي 

نزلات من الطموبيل كاتسيفط ليه البوساات بيدهااا و هو كايستقبلهم بشفايفو.. حرك ليها براسو باش تدخل خلااص ... 

دخلات من الباب الدوار و مع دايرة كاتشوف فيها بقات غادة جاية... كاتخرج و تدخل حتتتى عصباااتو خرررج ليهاا من الطمووبيل جرهااا من يدها حتى دخلهاا 

نسرين : فيااا الدوخة ارعد 😟

رعد : تستاااهلي ديلمك تبقااي افالدار اش جاابك 

نسرين : كوون مشييتي كون وادخلت انا راادة ليك البااال و نتاا راد ليا الباال ... 

رعد : زيدي نطلعك 

نسرين : اطلعني انهبببطك و نبقى مقابلااك حتى تمشي 

رعد : مممشكيللة معاك ... 

نسرين : يالاه سير خليني نشوفك من الزااج يااويلها تبببسل عليك شي وحدة 😠

رعد : هااناا غادي و طلعيي نتي فحاالك مااتبقايش تجلووقي هناا 

نسرين (كاتخنزر فالبنات للي كايشوفو فيها واقفة معاه) صاف كوون هاني 

رعد (شد عنقهاا بالجهد قبلهاا) i love u .. 

نسرين : ميي تو اللووڤ 😍😍😌

خرج من الشركة و خلاها واقفة كاتشوف فيه حتى ركب فطموبيلتو و شير ليها باااش تتدخل .. ديك الساعة هز التلفون صونا ليها 

رعد : ياالاه دخللي 

نسرين : اووك انا داخلة بااي حبيبي ... 

من وراهم رائد جالس كايتفرج فيهم من بعييد هاز سيجارتو فيده مع شاف نسرين دخلات للشركة نزل لاح السيجارة و زطم عليها برجليه ... شاف فرجالو للي بقاو داخل السيارة .. حط صباعو على عينيه بزوج ... و اشار لطموبيلت رعد للي قلعاات ... 

رائد : خليكم ورااه .. قاد لاڤيست ديالو رفع رااسو و دخل للشركة ..

دورات عينيها فالناس للي واقفين فالاستقبال باستغرااب مافهمااتش علاش كايشوفو فيها كاملين بترحااب وهي اول مرة تحط رجليها هناا ... مادازتش لحظاات كثيرة حتى تفكراات بلي دخل معاها رعد ... 😍😍 ... ابتااسمات للشخص للي خرج من ورا المكتب ديال الاستقبال وجا عندهاا 

مرحب بيهاا كيف ابتاسمو ليها البناات .. طلبات منو يوريها مكتب فهد .. 

الشخص: اووكي تفضلي معايا ... .. تمشى معاها حتى المصعد و طلب منها تكليلي على رقم الطابق ... 

نسرين : شكراا .. بركات على 33 ووقفات اونفاص للباب قابطة حقيبتها ب صبيعات يدها واقفة مستقيمة شعرها مطلوق على خصرها المنحوث رافعة رقبتها كاتشوف الباب بغا يتسد حتى دخل بسرعة شخص باين من لبسو شي عضو مهم فالشركة طلعات فيه و نزلات بعينها بلامايرد ليها البال لمحات تسبيح صغير فيدو الشيء للي خلاها تأكد ان ماشي غير ملامحو الشرقية كتوحي بلي عربي بل حتى التسبيح ... وقف كيفما واقفة هي و رجع بخطوات للور خاشي يدو فجياب سروالو القصير مبتااسم بزاوية فمو رافع رقبتو بانتصاار هاهي السيدة الصغيرة ماكايفصلو عليها الا خطوة .. من قريب كاتبان جذابة اكثر.. مثيرة.. جميلة واقفة مثبتة كون مكانش عارفها غايسحاب ليه موظفة فالشركة ليوم بلبااسها ووقفتها كاتبان عكس البنت المجنونة للي شافها هاربة من رعد داك النهار .. عكس البنيوتة للي دخلات المستشفى بعكاكزها لعند طوني باش تشوفو كيبقى من لكمات زوجها المتوحش .. ماشي هي للي شوية هذا بقات كادوور مع الباب الدواار حتى شداتها الدوخة .. قرب بلاماتحس به استنشق رائحتها للي كاتفوح من خصلات شعرها الناعم .. فكل مرة كايزيد يتأكد بلي رعد مايستهلهااش ..

بقى كايشوف فيها بإعجاب واخة عاطياه بالضهر ... 

- لو كنت انا مزوج بيك ماكنتش نقدر نحط عليك يديي والا نوصلك للاجهاض ...ماكنتش نآذيك نهائيا ... 

تزعزع المصعد بالضو للي ولاا كايمشي و كاايجي هزات راسهاا بخوووف دارت عندو ماافهماااتش اش هاادشي واااقع حتى تسمعاات ببّبت وقف المصعد و انقطع الكهربااء مااابقااات كاتشوف قداامهااا وااالو ... هزات حقيبتها بارتبااك كاتساارا بيدها على بورطااابلهااا تنور بيه هاد الظلاااااام للي قداامهاااا.. حتى تحطاات يد عليهاا و نطق صوت خشن من حداها زااد هزها اكثر ...

رائد (حط يدو على كتفها محاول يخفف من ارتباكهاا ) ماتخافيش ... 

لاااااحت بالزرببببة الحقيبة من بين يدهاا مسكااات يدو بسرعة البرق من على كتفها دفعاااتو بالجهد على الحييط شادة معصم يدو بقوة ...

نسرين : شكووون نتااااا !!!!! ... 

رائد : رصاااي اناا بغييت نهدنك لحقاش بنتي ليا متوترة ... 

نسرين : الضوو طااافي كيفااش بنت ليك متوترة هاااا هضر قووول شكون نتااا !!!!!؟.. 

فنفس الشركة و بالضبط فغرفة الاجتماعات جالس فهد فطبلة داائرية كبييرة و فجنبو جالس المحامي .. كل دقيقة كايشوف شحال فالسااعة و فين غاطسة هااد المديرة الجدييدة ... 

المحامي : تهدن مكاملاش دقيقة باش دخلنا و را سبقنا الوقت .. 

فهد : معاااش الاجتماع 

المحامي : مع 10:00 

فهد : دبااا شحاااال ... 

المحامي : 9:59 

فهد : لاا عندي اناا ل 10:00 

المحامي : هاهي عاد دقت لعشرة ... ماجا فين يكملها حتى تسمعو زوج دقات فباب المكتب دخلات منو بنت جديدة فالشركة .. عيونهاا قدما واسعات ناعسين برموشها الكثيفة لونهم بني فاتح .. قرابين للون بشرتها البرونزي .. نيفها مقدود وفمها كأنه منفوخ بالبطوكس .. الحجااب عطى لوجهها الداير جاذبية اكثر و تمييز بين البنات للي خدامين فالشركة ... من لون ثيابها بااين انها عالنة الحداد على روح الفقيد ... ناض المحامي بكامل الاسى ...

المحامي (للي كان شعرو برتقالي و لون عينيه عسليين لدرجة البرتقالي و على خدودو نمش نطق باللغة الروسية) كانتأسف للموت المفاجئ ديال السي اليازيدي (مد ليها يديه باش يصافحها ) 

خديجة : شكراا لك ...(بعدات يديها بابتسامة ) سمحلي مكانسملمش ... 

المحامي (بالزربة كممش يديه) ااووك اوك سمحيليي ... جلس بإحراج 

( فهد رفع حجبانو باستغرااب فيها حركاات ليه براسها كتحية و جلساات مقابلة معاه )

فهد : الله يرحم السي اليازيدي و يصبر اهلو على فراقو.. البركة فراسك 

خديجة : مامشى معاك باس .. 

فهد : يالاه اسياادنا نبداو .. بلا شك عرفتي علاش كاين الاجتماع ليوم .. 

خديجة (ببرود ) : لاا 

فهد : اوك نشرح ليك .. كانت عندي شراكة مع الاب ديالك قبل مايموت كنت محتاجو فالخبرة ديالو لا غير .. 

خديجة : ولحقاش كان رجل محترف و معقول و مشهور عرضتي عليه عرض مغري .. دخل معاك بنسبة 40% 

فهد : كلامك صحيح و حتى لهنا متافقين ... ولكن دبا فاش مات الموضوع اختلف .. الخبرة مشات داكشي للي كنت باغي انا مابقاش ... 

خديجة : يعني !! 

فهد : يعني انا مابقيتش باغي هاد الشراكة ديالناا مستعد نعطيك مقابل اسهمك فالشركة للي طلبتي .. 

خديجة ( عضاات على سنانها بعصبية) اقترااحك مرفوض .. 

فهد (مستغرب ليها ) : كيفااش !!! 

خديجة : مابغيتش نبيع ... 

فهد(ناااض بعصبيية ) : الااااالللة رااا حاولت نشرح ليك بالتي هي احسن .. خرجي من الشركة و المبلغ للي تخيلتييه نحطو ليك ... 

خديجة (حركات ليه بيدها) : اولا نزل يديك ونتاا كاتهضر و خفض صووتك حنا ماشي فالزنقة وبلاما تبقى تزايد معايا فالسعر .. عندي بزااف ديال الشركاات مزال حتى مافكرتش منين نبدا فيهم و جاية لهنا خيير مني كانطبق فوصية الوليد ديالي ..

فهد : ايواا خرجي قابلي شركااتك انا مامستعدش نضحي بشركتي مع وحدة يالاه عندها عامين ديال السطاج .. ماتقوليش ليا قارية للي هامني خبرتك و هادي " مااعندكش " 

المحاامي كاايحاااول يهدددن فيه 

خديجة (وقفااات بعصبيية خبطات الطبلة ) كلامي الاول و اللخر مابااايعااش 

فهد : طبييعي الخدمة معايا بالنسبة ليك كنز حسن من داك الورث للي ورتتي .. 

خديجة ( ولاااتتت حمرااا) : الى الاجتمااع سالا بغييت نخرج فحالاتي لا كانقصد الى اهانتك سالات السي المدير بغييت نخرج ... 

المحامي : فهاد الحالة السي فهد مايمكنش ليك تشري بدون موافقة ... 

فهد (دفففع الكرسي بعصبية جااااي خاارج كاايتبخ ) غاااادي تنننندمي على هادشي دياالك

خديجة : نشووفو (خبط الباااب بالجهد و خرج المحامي تابعو خلاها كاااااتغغلي شافت فيدها للي ولات كاترررعد بالاعصااب عاضة على سناانهااا حاولات ترخف حجاابها باااش تبللع ريقهاا ... ) 

*************فالمصعد**************

رائد (حاط وجهو على الحيط كايتكلم بصعوبة متألم للوية للي لاوية يدو و مرجعاها على ضهروو ..) : اناا عندي رونديفو مع المدير ديال الشركة... طلقي 

نسرين (مزززيرررة علييه كااتقلب بيدها فخصروو ... حتى لقات المسدس ... ) وهذااا شنووو كايدير عندك هااا شنوو كاايديرير !!!!.. 

بالزربة دفعها على الحيط سحب يدو بالجهد من يديها نطر منها السلااح ... هزاات ركبتها حتى هزااتها وهي تخبطو لحجروو ... طللق الفردي وشد تحت سرتو بوجع.. 

رائد : ااااي ايييي اششش درتي نتيي واااش مرييضة... 

نسرين : مرريييضة ونسيفطك للقبر لابقييتي تااابعنييي اااش كادير بالسلااح!!!! ... جلس سخفاان للارض كاتحس بيه حيد من قداامهاا .. 

رائد(سخفان ) : دعييتك لله 

نزلات قفاازية كاتقلب بيدهاا على الفردي حتى حطاات يدها على يديه .. 

رائد ( شدهاا بالزربة ) : راا يدي هاادي ابنااادم 

نسرين : فهمناااا يددك طططلق منيي 

رائد : مااطالقش 

نسرين : طللق مني ولا ندير فيك شي خرييطة يحيرو فعمليتك الاطبا ... 

( رخف على يدها لي نطرات منو ورجعات كاتسارا على الفردي حتى لقاتو ... )

نسرين : شفتي هذا مغاتشدوو حتى يمشي عند البوليس .. 

رائد : مررخص 

نسرين : ماسوقيش حتى يشوفو المدير .. 

رائد : راك قبيحة مع رااسك .. 

ماجاتت فين تهضر حتى شعل الضو لقاتو كايشوف فيهاا بعينين ماعرفاتش تحلل نظرااتهم .. سخفاان و كايضحك بتعب بقى ليه شوية و ينوض يسفق لهاد العمل النبيل للي قامت بيه ... خنزاارت فيه و ناضت كاتسووس فسروالها و تقاد فشعرها بيد و حدة واليد لوخرى شادة بها الفردي 

رائد (ناض واقف كايقاد فلاڤيست و يعقد ازرار قميجتو .. ) مرمدتيني على والو هاهو رجع الضو .. 

نسرين (دورات وجهها لعندو و رافعات راسها حتى تقادات معااه خبطات كرشو بالفردي ) هااك و مرة اخرى ماتحااولش تلعب معاايا .. 

رائد : مكانعرفكش اصلا 

نسرين(قرباااات ليه وجهها بتهدييد عاااضة على سناانها ومخرجة عييينيها فيه) : و دباا عرفتيني !! 

رائد(بلل شفايفو برفق ) : اه .. 

نسرين : مزياان عقل على وجهي وفين ماشفتيه قلب الدورة داير لياا فيها كارد كور .. (غوتاات عليه) اااخر مرة تحط يدييك على كثفييي 

رائد(شد دراعها و قرب ليه) عوض ماتعتاذري مني كاتهددي فياا .. 

نسرين : الى بقا فيك الحال دعيني .. 

رائد : دعيتك لربي الخالق وحدو ... 

غلب عليهاا الضحك نطرات منو و خرجااات من الباااب ... لقات العمال واقفين حدا الاسنسور .. 

كايعتااذرو منهم على العطب التقني .. غمز واحد فيهم ... 

السكرتيرة ديال فهد جات كاتجري : مادموزيل نسرين .. 

نسرين: مدام سيلڤوپلي.. (شاف فيها رائد بالززربة )

يتبع