رفقا بي يا جلادي الجزء التاسع

من تأليف Khadija El
2018

محتوى القصة

رواية رفقا بي يا جلادي

سمير..."عاقد حجبانو" شكون انت ؟!
جاد ...ندخلو فالموضوع نيشان شكون هو بات زمرد!!؟
سمير..."غمز لخدامة تنصارف" انا هو باها ثم شكون انت!!؟ .....بدا كايدكرو " بينو وبين نفسو اهوووه هذا جاد كبر وجا يسول على ختو ههه "رجع خنزر " قلت ليك شكون انت.
جاد..."شنق عليه" انا لي غاندي روحك اذا ما تكلمتيش خلاص "من تحت سنانو" شكون هو بات زمرد ؟!"دفعو "
سمير ..."كايلتقط انفاسو " كح كح خرج عليا ولا غانجيب ليك البوليس 
جاد...انا لي غانجيب ليك البوليس وبتهمت محاولة الاغتصاب وغانزيد زا*** بوك شي تهامات عمرهم يطيحو فبالك انت مزال ما كاتعرف شكون هو جاد بن يزين 
سمير..."كايتفتف"خرج عليا 
جاد..."كايقرب منو " والله ماني مفاك معاك حتى تهضر...........
نزل من سيارتو كاعي خبط باب سيارة وخزر فيها.......
جلنار...."بعصبية" واش ما كاتشوفيش 
زمرد...."كاتلفت يمين وشمال "سمح لي كنت شاردة
يالا غايطلع فسيارتو وهي تلمح سيارة منتصر "أب امير "جاية فتجاهم ولات كلها كاترجف عند بالها لاحق عليها شافت ف جلنار ونزلو دموعها بعد تفكير دام لثواني فتحات باب سيارة وهزات ولدها وطلعت مع جلنار مع عرف راسو باش تبلا قبل ماينطق شافت فيه بترجي وبعيون دامعة كسيرا وبعد على المكان...

طول طريق كانت كاتلفت وراه وكاتشوف واش لاحق عليهم كان مزال وراهم قلبها تزادت نبضاتو وزاد خوفها ضمات ولدها وزيرات عليه ودموعها نازلين كان كايسوق وعينو عليها كل شوية يشوف فيها ومستغرب 
مراد...."بإصرار" عمرها بغاتك واش ما كاتفهمش زمرد كاتبغيني انا وادا عندك ذرة رجولة طلقها .....قبل مايكمل كلامو نزل عليه بلكمة وخرج من الدار صاعر كان كايتمنى يسمع كلام اخر لكن ضنو خاب طلع ف سيارتو وكسيرا فتجاه القصر.......
سمير...."بعد تهديد جاد قرر يعترف وكلو خوف" ايه زمرد ماشي بنتي بنت صديقي نعمة الله يرحمها كانت على علاقة ب باباك وحملت منو بعد ماعرف تخلى عليها واخا كان كايبغيها ماعرفش علاش قدر يتخلى عليها فداك الوقت كنت كانبغيها واخا كانت حاملة ما هتميتش لما عرضت عليها زواج وافقت بسرعة "شاف فيه" زمرد ختك ......حل فمو على الاخر ووسع عينيه شكو طلع فمحلو كأن زمن توقف مابقى كايسمع والو كلمة وحدة لي كاتردد داخلو ...ختك...ختك....ختك.....بعد تواني فاق من صدمة وخرج من الفيلا بلا مايتكلم طلع فلوطو ديالو وكسيرا ...

فطريقو تاصل بأمير وطلب منو يتوجه لقصر بعد ما قطع الاتصال معاه تاصل بشموخ وطلب منها تاصل بأصيل وتجمع العائلة كاملة قطع معاها وكمل طريقو وفكار كتيرة فدماغو من ديما كان عارف انا باه خان مو ووالد من عشيقتو لكن ان زمرد تطلع ختو هادي عمرها جات فبالو مزال زاد حقدو عليها لما تأكد طلعت رخيصة كيف مها دمرت ختو كيف ما مها دمرات مو وكانت سبب موتها بعد تفكير ليس بالهين وصل لقصر بلاصة سيارة وتوجه للداخل وجهو حمر والعرق مطراسي فجبينو كان أمير مزال ما جا شاف فباه جالس وجنبو عمو دور عينيه كانت شموخ جالسة حيرانة وجنبها عبله وشاردة خدا نفس عميق ورجع شاف فباه بحقد وشمئزاز......
اصيل...علاش طبلتينا نتجمعو خير اولدي
جاد..."بصوت عالي" انا ماولد حد قالك خير "بشتهزاء" هه فين عمر شي خير جا منك
منتصر..."عقد حجبانو" جاااااااد حترم شوية مهما كان اصيل باك
أمير..."دخل "اش واقع ياك لاباس؟!
جاد..."شاف فيه" لي واقع انا هاد القصر فيه زنا المحارم وشكون سبب "اشار الاصيل" السيد المحترم اصيل بن يزين
كلشي حل فمو وما فاهمينش قصدو .....
اصيل..."خرج عينيه" اش كاتخرف
جاد...انت غاتبلع لسانك وضرب طم
عبله..."وقفات" جااااد حدك تما حترم بابا

أمير..."بصوت خشن" جاد شنو كاتقصد؟!
جاد...كيف كاتعرفو بابا العزيز كان زير نساء وبسبب خيانتو وبسبب عشيقتو لي حملت منو ماما ماتت العشيقة حتى هي ماتت لكن خلات وراها القيطة اوبس اعتذر قصدت ختي بلا شك كلكم عندكم فضول شكون هي البنت الغير شرعية لسي اصيل
أمير...."خرج عينيه وبلع ريقو" ش ش ك شكون !!" شك فزمرد "
جاد...."شاف فيه" شكك فمحلو مدام زمرد بنت سي اصيل "بصوت عالي" ماكفاكش موت ماما بسبب أمير طاح ف زنا المحارم وجمع بين الخوتات رتاحيتي دابا "كايصفق"برااااافو 
شموخ...."حلت فمها على اخرو " شنووووووووووووووو؟!!!
عبله...."خرجات عينيها" ما يمكنش مستحيل ديك الخدامة تكون ختي مستحيل "بصوت عالي " مستحيييييييبل "شداتها نوبة الغضب من جديد لي جات قدامها كاتشير بيها شدها منتصر وحكمها اما اصيل بحال الى تكب عليه سطل دالما طايب شموخ ما هتماتش لنوبة غضب عبله مزال تحت تأتير صدمة اما امير أمير صدمتو بوحدها صدمة العمر كاع تجمعو عليه الخيانة وزنا المحارم اما اذا عرف بهروبها هاديك حاجة اخرى بين ما دنيا مقلوبة وكلشي مصدوم دخل مراد لي صحى ضميرو وقرر يعترف بعد ما فقد الامل تكون زمرد ليه...

مراد....سلام عليكم
الكل..... الصمت
مراد...."بستغراب" شنو واقع ؟!
أمير..."كسر الصمت وتكلم بعصبية" اش جابك هنا خرج عليا
مراد....ماغانخرج حتى تسمعني "كايقلب عليها بعينيه" فين هي زمرد......توجه ليه امير ودخل فيه براس حتى تنشر قدامو ناض منتصر كايجري فكهم وقف مراد ومسح دم لي نزل من فمو.......
أمير..."بصوت عالي" خرج عليااا خرررررررج
مراد.....زمرد مظلومة
عم الصمت وشي كايشوف فشي أمير خرج عينيه ف مراد وكايتسناه يكمل كلامو وصدرو كايطلع وينزل بسرعة وعروق يدو بارزين
شموخ..."كاتفتف".مراد م م ماشي وقت هاد لكلام 
أمير..."نهض فيها" سكتي "شنق على مراد" شنو كاتقصد ؟!
مراد...كيف سمعتي زمرد مظلومة وعمرها خانتك هادي كانت خطة شموخ وعبله لما قتارحوها عليا وافقت بسهولة حب زمرد عمى عيني "بحرقة" خ غلطت غلط كبير وظلمتها بسبب انانيتي ..
أمير..."بنكسار" والصور؟!
مراد...شاف فشموخ" الصور شموخ لي خداتهم ليها بعد ما عطااتني منوم ودرتو ليها ....كلشي كايشوف فشموخ لي تمنات الارض تنشق وتبلعها لونها تخطف ودموعها نزلو ماعرفاتش واش ندم ولا الخوف من خوها...

أمير...."عينيه حمرين جمر " شموووووووخ 
"حاول يتمالك نفسو " تكلمي شنو هاد شي لي كانسمع ؟!
شموخ...."صوتها كايرجف" س س سمح لي ا والله من حبي لعبله وليك هئ....هئ....عارفة غلطي كبير لكن ان ان "قبل ماتكلم كلامها نزل عليها اصيل بصفعة حتى وجها عواج دمو كايغلي كلشي تراكم عليه فدقة وحدة جاد مابقى فاهم والو واش لي قدامو هي شموخ لي خلاها البنت البريئة والقلب الكبير ولي جنبها هي ختو عبله المدللة البريئة لي كانت كاتنشر الحب بينهم جلس فوق الكانابي وشد راسو بيدو جا بين نارين اما امير رجليه مابقاوش حاملينو نزلو دموعو ضرب يدو مع الحيط بقوة من كترت الندم صوت زمرد كايتردد فمسامعو ودموعها بين عينو طلع مع الدروج كايجري متجاهل كاع الناس لي وراه فتح باب الغرفة لقاها فارغة نزل مع الدروج كايدردك توجه لمطبخ كايقلب عليها بدون جدوى ......
أمير...."بصوت عالي " زمررررد ....زمرددد "طاح على ركابيه وشد راسو بيدو " اااااااااااه كيفاش ماصدقتهاش كيفاش كدبتها وصدقتهم ."بصوت مبحوح "زمرد فينك ...

اصيل...مايمكنش بعد ما تخليت عليها بشهر رجعت شفتها وقالت لي بلي طيحات الجنين كيفاش بنتي يعني نعمة كدبات عليا "شد راسو " الله ياربي اش هاد لعقاب "شاف ف جاد " كيفاش عرفتي شكون قالها ليك ثم فين هو دليل؟!
جاد...."خزر فيه"بحت وعرفت "وقف" فكل مرة كاتزيد تخليني نحقد عليك بسبب افعالك "خرج من القصر ساخط على الوضعية وخلاهم شي كايشوف فشي شموخ تكمشات فمكانها وقطعات الحس وعبله طلعت لغرفتها كاتجري أما اصيل رجليه ما بقاوش هازينو بعد ثوان شد قلبو وكايتألم طاح على وقفتو وفقد الوعي ديالو توجه ليه مراد كايجري 
منتصر..."بهلع" خويا أصيل الله ياربي
مراد خدا التيلي وتاصل بالاسعاف يلا بغات تكلم شموخ وهو يصرخ منتصر فوجها...
منتصر ..."بحدة" صوتك مانسمعوش "بحرقة"ياخسارت تربيتي ليك...

وقف قدام البحر ونزل وكايتسناها تنزل بعد ثواني قدات لمحمد رضا راسو لي كان ناعس ونزلت لعندو ربع يديه وكايتسناها تكلم شافت ناحية البحر ورجعت شافت فيه .....
زمرد..."كاتفرك يدها من توتر " احم شكرا بزاف 
جلنار..."عاقد حجبانو" شكون الشخص لي كان لاحق عليك؟!
زمرد...هداك حمايا ما كانش لاحق عليا كان دايز من نفس طريق وانا كان عند بالي لاحق عليا عموما شكرا بزاف ساعدتيني
جلنار....."كايطلع فيها وينزل" شنو لي خلاك خايفة لهاد درجة "شاف ناحية محمد رضا " ...بعد ما تأكد بلي ما كايناش فالقصر تاصل بيها كدا مرة بدون رد وغير مكترت بعمو لي نقلوه لمشفى فحالة خطيرة خرج من القصر وتوجه لدار سوسن ...

#بعد #مرووور #اسبوووووع•••••
داخل غرفة كبيرة ومبهجة كاطل على البحر كانت الينا مستلقية على سرير بوجه شاحب وسواد تحت عينيها لي تطفى فيهم النور وعلى يمينها جالسة زمرد شاردة وبالها مع أمير حست بغصة فقلبها والدموع تحجرو فعينها ضغطت على نفسها وحاولت جاهدة تمنعهم لكن شهقتها فضحاتها وخلات الينا تكسر الصمت وتسأل على سبب شهقة وشنو سر لي وراها .....
الينا..."بصوت تعبان" ياترى شنو القصة لي ورا هاد الدموع لي فضحاتهم شهقة جريحة 
زمرد..."نزلو دموعها على خدها" اااااااخ "حطات يدها على قلبها " قلبي كايوجعني بزاف ماظنيتش غانتعدب من فراقو هئ....هئ....
الينا..."ببتسامة ساخرة" ياريت همك هو همي "سكتت وبعد ثواني ستأنفات كلامها" رجل بطبعو خائن وغدار "تنهدت تنهيدة حارة" قد ما انت تكوني كريمة معطاءة فالحب قد ما هو يكون خائن وناكر الجميل ..."يالا غاترد على كلامها وهو يدخل جلنار عاقد غوباشتو كايطلع فيها وينزل بغضب ضيافتها طالت بنسبة ليه حست بلي وجودها مديق عليه وقفت وهي مرتابكة وتمتمت ببضع كلمات...

وقف بلوطو ديالو قدام بتي فيلا فحي راقي وفوقها لافتة كبيرة مكتوب عليها .... École de danse *** بلاصة سيارة وتوجه لباب وقفو سكريتي خشى ليه ورقة نقدية فجيبو ودخل لداخل كايتعنكر وعاقد حجبانو كيف العادة وقف قدام مكتب فالاستقبال و سألتو 
سكرتيرة....(الحوار بالفرنسية) مرحبا بيك اسيدي عندنا احم واش باغي تسجل مدامتك او بنتك ؟! 
جاد..."بصوت خشن" بغيت نشوف المديرة
السكرتيرة...مدام سوسن مزال ماجات ثم واش عندك موعد ؟!
جاد....امتى غاتجي
السكرتيرة...ماعنديش فكرة خلي لي اسمك ورقمك ولما تجي انا غانعلمها بقدوم سيادتكم
جاد..."جلس فوق الكانابي ودار رجل فوق رجل" ماعليش غانتسناها....
السكرتيرة...لكن ...."قاطعاتها سوسن" 
سوسن..."كاطلع فيه وتهبط وي ميسيو اي خدمة؟!
جاد..."طلعها من اخمس قدميها الى خصلة شعرها " نتي هي سوسن!!
سوسن..."رفعات راسها بكبرياء "هي هادي اش حب الخاطر ؟!
جاد..."وقف " فين هي زمرد؟!
سوسن...اولا شكون انت لي كاتسأل ؟؟
جاد..."رمقها بنطرة حادة" اذا عارفة مكانها
سوسن...نو ما عارفاش غالط "صغرات عينها فيه شكون انت بعدا ؟!
جاد..."بنبرة قاصية" ماشغلكش شكون انا لاخر مرة غانسألك فين هي زمرد...
سوسن..."دارت يدها على نصها وطرطقات المسكة" هاهي فجيبي اجي خودها ...

جاد ..."فقد اعصابو " اذا ماقولتيش فين هي غاندمك
سوسن...لا والله خوفتيني شوف كيف كانرجف " كاتحرك يدها " " بستفزاز" عارفة مكانها او ماغانقولش يالا وريني عرض كتافك "اشارت لباب " "رفعات حاجبها" يالا فيت 
"جمع يدو على شكل قبضة كان غاينزل عليها لوجه وتراجع فأخر لحظة الغضب تمكن منو وعرقو برزو زفر بعصبية وخزر فيها....
جاد...ماتختابريش صبري مزال ما كاتعرفنيش
سوسن..."بستعباط" شكون سيادتك "حطات صبعها فمها" اممممم قابض لرواح متلا "ضحكات بغنج " يالا ازوين وريني جمال خطوتك يالاااااا .....
جاد...."كايحاول يمتلك نفسو" بليز فين هي؟!
سوسن...علاش باغي تعرف باش تكمل شي لي دارت ختك وولاد عمك تريكة ناقصة شتي واخا تقلب دنيا سفاها على علاها ماغانقولش كاتسمع ودابا خرج عليا ...
ماشعرش براسو حتى نزل عليها لوجه بصفعة خلات دمع ينزل من فمها حطات يدها على خدها ووسعت عينيها والدموع تحجرو فيهم شافت فيه بكره وبغضب كبير .....
سوسن...حماااااااار خرج عليااااا 
جاد..."جرها من دراعها بقوة وتكلم بدون شعور" فين هي ختي كانقسم ليك اذا ما قلتيش ليا مكانها غانخليك تندمي 
سوسن..."كاتغوت " طلق مني طلق....خرجات السكرتيرة كاتجري جابت السكريتي لي دارو بيه دورة الخاتم وبعدوه عليها ....
جاد..."بحدة ...غانعرف مكانها كانقسم ليك وانت لي غاتوريه ليا "اشار بصبعو" وعد "دفع سكيرتي وخرج من الإيكول كاعي وساخط على الوضعية طلع فلوطو وكسيرا فتجاه القصر فمكان اخر كان أمير جالس فوق الجرف ودمعة حارة نزلت على خدو تخطف الون فوجهو ولا صفر والارهاق ظاهر عليه اسبوع بحالو وهو كايقلب عليها هو وجاد بدون جدوى كأن الارض نشقات وبلعاتها حتى انو كلف حارس شخصي يراقب سوسن من بعيد باش يوصل ليها لكن بدون جدوى عبله كانت طول الاسبوع كاتحاول تلقى لملف لي بغى انيس لي ولا كايضغط عليها ...

#المستشفى•••••••🏥
كانت واقفة ورا الزاج وكاتشوف عمها فغرفة الانعاش مسطح فوق سرير ابيض وصدرو عريان عامر سلوكا وكايتسمع صوت الجهاز لي متصل بالاسلاك وخاشين ليه تيو فمو وتيو فنيفو والفاصمة فوق صدرو نزلت دمعة على خدها وضميرها كايأنبها لانها هي سبب فهروب ومعانات زمرد لي طلعت بنت عمها قالت لولا المؤامرة لي دارت ماكانش عمها غايوصل لهاد لحالة بين ماهي شاردة وكاتخمم خرجها من تخمامها صوت خشن وقاصي نوعا ما.....
منتصر...مزال ما كاين جديد؟!
شموخ..."مسحت دموعها" مزال احم وبخصوص زمرد مزال ما بانت ؟! 
منتصر...مزال "خنزر فيها" كلو منك تحرمت من حفيدي للمرة الثانية وغانتحرم من حفيدي الثاني لي جاي فالطريق شنو دارت ليك البنت حتى تخربي حياتها وحياتنا رتاحيتي دابا؟!
شموخ..."نزلو دموعها" باب ان "قاطعها"
منتصر...." بحدة" ولا كلمة✋......
زمرد..."كاتفرك يدها من توتر" احم عرفت راسي تقلت عليكم انا اليوم غانخرج نقلب على شي دار لكرا عطيني غير نهار 
جلنار..."كايطلع فيها وينزل " الصمت
الينا...ماعندك فين تمشي هنا غاتبقاي 
جلنار..."بصوت خشن" ماماااا
الينا....لي عندي قولتو هنا غاتبقاي ماتنساش انا فحاجة للمساعدة 
جلنار...احم انا غانشوف ليك احسن ممرضة
زمرد..."نقزات" انا طبيبة
جلنار....الصمت....

جلنار "بحزم " شكرا ما محتاجينش مساعدتك ويستحسن تشوفي مكان اخر عندك 24 ساعة......"خرج من الغرفة وخلاها كاتبحلق مابقاتش كاتصدم اذا كانو اقرب ناس عطاوها بظهر وعدبوها كيفاش غايحن فيها غريب ما حقداتش عليه بالعكس بقات ممتنة ليه فتح ليها باب دارو وستقبلها لمدة اسبوع خدات نفس عميق وتلفتات ناحية الينا لي لتزمات صمت تنهدات تنهيدة حارة طلعات من اعماق اعماقها خرجات من الغرفة بسرعة وتوجها للغرفة لي فيها محمد رضا هزات صاكها صغير لي فداخلو تيلي ديالها وبطاقتها الوطنية ومبلغ بسيط شدات ولدها من يدو وتوجهات لغرفة الينا شكراتها وتمنات ليها شفاء وخرجات من الفيلا مكسورة الجناح وماعارفاش فين غاتعطي راسها خافت تمشي لعند سوسن ويلقاها بعد تفكير وقفات طاكسي وطلبت وطلعت فيه وعقلها حيران لاتحظ سائق انها مهمومة وحيرانة وقرر يسألها....
السائق...مالك ابنتي مهمومة طليقها تسرح
زمرد....الهم تكتب عليا وانا راضية بيه 
السائق..ان مع العسر يسرى 
زمرد...ونعم بالله 
السائق...حكي لي ربما نقدر نساعد؟؟
زمرد..."بعد تفكير وتردد" احم اذا كنتي كاتعرف شي بيت لكرا ويكون على قد ستطاعتي نكون ممنونة
السائق...موجود لكن الحي شعبي وشاد على احياء الصفيح وثمن مناسب اذا بغتيه نديك دابا ليه
زمرد...."بدون تردد" ماعليش المهم نلقى ربعة الحيوط يستروني
السائق...."قلب طريق" على بركة الله...

بعد ساعة رجع لفيلا طلع لغرفة الينا كانت غفات باس جبينها وخرج من الغرفة لاحظ الهدوء مولف محمد رضا كايدير ضجيج توجه لغرفة لي كانت فيها لقاها فارغة يالا غايخرج منها وهو يلمح ورقة فوق الكوافوز خداها فتحها......... < احم شكرا بزاف حتويتيني انا ولدي فهاد الاسبوع وفتحتي ليا باب دارك هذا جميل عمري ننساه ان شاء الله تلاقينا الظروف ونرد ليك الجميل شكرا مرة اخرى ...زمرد......
كمش الورقة حس بندم لانو قصى عليها وطردها من دارو لكن سرعان ما نفض عليه الندم ورجع عقد حجبانو جنان كرهاتو فجنس النسا وخلاتو يقصى عليهم ومايتيقش فيهم مزال لاح الورقة فالارض بعد ما كمشها ونزل لطابق السفلي مسافة طريق وقف الطاكسي فحي شعبي بمتياز جنب دور الصفيح بلاصة سيارة الاجرة ونزل منها نزلت وراه وشادة بيد ولدها واليد الثانية كارزة على صاك خافت يسرقو ليها دخلو مع دريبة طويلة وديقة عامرة بدراري صغار كايجريو والعيالات حاطين لكراسة قدام بيبانهم وحدة كاتنقي جلبانة ومدورة بيها طاشمة دالعيالات كايعاونوها وكاينممو فنفس الوقت والثانية كاتنشر الحوايج فالحبل وعينيها كايدورو يمين وشمال والباقية شي كايطل من سرجم شي من الباب ومجمعين غير دازت من جنبهم ولاو كايتغامزو عليها بمعنى شكون هادي لي مع با حمان.......خصوصا من هندامها ظاهر عليها ملعقة فاتتهم غير مكترتة بنظراتهم وقف با حمان فراس زنقة قدام دار حيوطها راشين وصباغتها كشفات بشمس والغبرة وسراجمها كل سرجم من جيه شي مصبوغ وشي مصدي كاتكون من طابق السفلي صباغتو مقشرة وباب حديدي مصدي ومرقع بصباغة فالاحمر وطابق الثاني فيه ربعة سراجم دفع الباب برجليه ولقا سلام...

باحمان....واحد السلام عليكم 
مباركة..."خارجة من بيتها" وعليكم سلام احمان ...."كاتشوف ف زمرد لي كانت كادور ف عينيها فدار لي كايتوسطها مرح واسع فيه الغرس الحبق والمخينزة وبعض الاعشاب غارساهم مباركة فسوطلة من حديد اودصباغة وزوج سدادر من الحلفة ملمطين بطلامط طابو بقوة تصبين وزواقات لي فيهم كشفو تلفتات يمين لمحات باب غرفة مصبوغ بالاحمر من الخشب السوسة كلات نصو وجنبو باب اخر فنفس الون وعلى يسارها باب اخر مصبوخ بالاسود ومنقط بنقط فالاحمر والازرق وشاد عليه الدروج وعلى يسار دروج كاينة غرفة اخرى وداخل مطبخ صغير بعد ما تفحصات المكان بعينها شافت ف مباركة لي كاطلع فيها وتنزل وكاتشوف ف حمان بمعنى شكون هي ؟!
حمان...مباركة هاد المرا بغات تكري بيت وقلت نجيبها ليك ماتلقاش حسن منك وحتى نتي ماتلقايش حسن منها 
مباركة....مرحبا كاينين زوج بيوت خاوين واحد فالسطح والثاني هنا "اشارت لباب لغرفة" والثمن كايختلف لي لفوق لكرا ديالو 500 درهم لشهر ولي لتحت 800 درهم وطواليط مشروكة ...
زمرد.. علاش ثمن مختلف ؟!
مباركة...ايوا لي لفوق مسقف بالقزدير هذا علاش ولي هنا كيف كاتشوفي ظالة وفيه سرجم كايشوف فالشارع لي ورانا وضاربة فيه شمس شوفي لي يسلكك...

زمرد...احم واخا بغيت نشوف لبيت لي لتحت "اشارت ليه...
مباركة..."جبدات سوارت من صدرها" هي للولة توجهات مباركة لغرفة كاتجر فرجليها ومسعودة كاتشطح وراها حمان خرج وخلاهم فتحات الباب ودخلت لداخل حلت سرجم كي دخلت زمرد بدات تكح من ريحة لغمال .....
زمرد...كح...كح...
مباركة....فيه ريحة حيت شحال ماتحل غير ضربيها ليه بشي تسيقة وخلي سرجم محلول باش يتشمش وغاتمشي ريحة ...
زمرد...واخا "شافت فيها" واش كاين هنا شي سويقة محتاجة شحال من حاجة
مباركة...ايه كاينا فالدرب لي ورانا غاتسبقي ليا شهر لول ولخر عاد غانعطيك ساروت 
زمرد...واخا واخا "كاتفحص الغرفة لي صباغتها مقشرة لكن كبيرة شوية ومشمسة كيف قالت ليها مباركة......
أمير....واش مزال ما لقتيوها
الشخص .."كايتفتف" م مزال اسيدي حنا مراقبين الانسة سوسن فين ما مشات تابعينها ديك لفعى دكية بزاف كانظن بلي عايقة بينا
أمير..."شنق عليه" عندك 24 ساعة كانقسم ليك اذا ما لقتوهاش غاندمكم واحد واحد...

سليم....صبري قليل ماتختابريهش حسن لك 
عبله...عيت نقلب على الملف الزفت ومالقتوش 
سليم..."نتر نترة من سيجارة" ماكايهمنيش الملف من هنا ل 24 ساعة يكون عندي ولا غاتندمي "شاف فالساعة مع ابتسامة جانبية" العد التنازلي بدا " غمزها "
عبله...حقير......
بعد ما تافقات مع مباركة خرجات من الدار وتوجهات لسويقة شرات زربية وزوج بونجات وبلاكار صغير وخديات وزوج مانطات صيفيات بما ان الصيف هذا وشي ماعن للمطبخ وكل ما تحتاج وفطريقها خدات الصباغة فالابيض ومواد تنظيف حطات شي شرات وسط لمرح ودخلت لبيت ضرباتها ليه بتسيقة حاارة وصبغاتو ومحمد رضا كايلعب جنبها بعد ما صبغاتو خرجو منو خلاتو ينشف بعد ما نشف دخلت شي لي شرات ورتباتو ودارت ستار فصلات بيه مكان النوم وخدات مكان صغير دارتو مطبخ صغير بعد ما كملت وجدات العشا تعشاو وطاحت دودة...

#اصبحنا #واصبح #الملك #لله •••••••
شرقات شمس جديدة وجابت معاها يوم جديد واحدات جديدة تسللت اشعتها لغرفة زمرد دارت لغطا على راسها كاتحاول تهرب من اشعتها وعوجات سيفتها بعد ثواني لاحت الغطا وناضت بتتاقل دارت الشال وخرجات كاتجر فرجليها فتجاه طوليت يالا غاتدخل وهو يخرج منها شاب فالثلاتين من عمرو طويل وكتافو عراض وواشم فدراعو وفيه ضربة فحنكو وفيدو كان لابس شورط ومن الفوق عريان طلع فيها ونزل بنضرات ماكاتفسرش رجعات بزوج خطوات الور ونزلت راسها كاتحاول تهرب من نظراتو...

طلع فيها ونزل وطول الشوفة من بعد كمل طريقو وللغرفة لي كاري جنبها دخلت لطوليت قدات حاجتها وتوضات ورجعات لغرفتها صلت الصبح وجلست جنب ولدها كاتمرر يدها على خصلات شعرو وعقلها وقلبها مع أمير نزلت دمعة حارة على خدها مسحاتها وتبعاتها تنهيدة خفيفة بدا كايفتح عوينات القط كيف مسمياه وكايتكسل شافت فيه بحب وطبعاات قبلة فجبينو مع ابتسامة عريضة شاف فيها ووسع عينه ورجع شاف فحجرو خبا عويناتو بيدو هربا من نظراتها فهمت شنو وقع تبسمات وجمعات ابتسامتها بسرعة ورفعات حاجبها
زمرد...اش درتي ؟!
محمد رضا..."مخبي عينو بيدو " ماسي انا اماما بيبي لي خايبة 
زمرد...اهاااا شكون لي خلاها تنزل من غيرك اممم اجي لهنا ياخانز ريحة ......
كان جالس فوق السرير داخل غرفتو لي ولات مظلمة بسبب الستائر لي ما ترفعوش من نهار خرجات زمرد من القصر مرر يدو على لحيتو لي بدات تكبر وقف ببطئ وتوجه لحمام بتتاقل كايجر فرجليه والتعب ظاهر عليه بعد ما خدا دوش خفيف خرج من الحمام لاوي الفوطة على نصو وشعل ضو باش يقدر يشوف قبل مايلبس حوايجو خدا بكية سجائر وجبد منها سيجارة وشعلها وكايدخن وبالو مع زمرد وولدو بعد ما كمل سيجارتو لبس سروال جينز كحل مع تيشورط فالكحل وسبادرية فيها البيض والكحل خدا تيلي ديالو ونزل لطابق السفلي دار نظارات شمسية وخرج من القصر بدون ما يتكلم مع شي حد...

مسافة طريق كان داخل الشركة توجه المكتب ديالو اول ماشافتو سكرتيرة خدات الفون وطلبت منهم يجهزو ليه قهوتو كيف العادة كحلة وقاصحة وبدون سكر ثواني وكانت القهوة فوق المكتب رتشف منها وشعل سيجارة وكايدخن ومرة مرة كايرتشف من القهوة حط الفنجان ومرر يدو على لحيتو ودماغو خدام بعد ما كمل سيجارة تاصل برجالو...........
هزات ولدها وتوجهات لطوليت بعد ما سخنات مقراش دالما كباتو فسطل وبرداتو وبدات تغسل لمحمد رضا بين ما هي كاتغسل ليه سمعات الباب كايتطرق وضجيج برا فتحاتو وخرجات راسها.... كانت واقفة قدام باب طوليت شابة ثلاتينية طويلة وعامرة شوية وبشرتها سمرا وملامح قاصية نوعا ما كانت لابسة بيجامة صيفية شورط قصير بزاف مع دبلدور ديالو وصدرها بارز لايحة شعرها الاسود ورا ظهرها من ملامح العابسة ظاهر عليها يالا فايقة من نعاس طلعاتها وهبطاتها وتكملت .....
سهام..."دايرة يدها على خصرها" نعطيوك شهادة سكنة دالطوليت امممم
زمرد....سمحي ليا زوج دقايق ونسالي
سهام..."بصوت فض " ماكاين لازوج ثلاتة غاتخرجي من ديك الحفرة ولانردمك فيها ايوا صافي سيدة من حلت عينيها وهي مخشية فطوليت تقول كاتجبد لبترول "دفعاتها فكتفها"يالااا يالاا خوي ...
زمرد..."بصرامة" مزال ماسليت واذا سمحتي غانسد لباب ولدي غايضربو البرد ....قبل ماترد سهام كانت زمرد سدات الباب وبدات تشلل لمحمد رضا وخلات سهام غاطرقق من كترت لغضب خبطات لباب بيدها وغوتاات......
سهام..."بصوت عالي" حتى تخرجي اصفريطة ولينا كلام...

سمع صراخها لي مزال ماقدر يتأقلم معاه صوتها العالي كايضرو فراسو وكافي يقلب ليه مزاجو نهار كامل خرج لعندها ومزال صدرو عريان ومخنزر .....
بدار ...."بصوت خشن" ايييه صباح هذا اش هاد صداع 
سهام...."تجاهلاتو" اخرجي اديك صفريطة " بعصبية " بربي وماتخرجي حتى نهرس هاد لباب فوق راسك........شللت ليه بزربة وطرفت طواليت ولواتو فالفوطة وهزاتو فتحات لباب شافت فيها وتخطاتها وكملت طريقها لكن سهام ما غاتخليش الموضوع يمر مرور لكرام لابد ماتجعوق وتعلي صوتها بحال كل صباح وتفرض سيطرتها على سكان هاد الدار خصوصا الجداد طبعا هي مولات دار لازم تفرد هيبتها بين السكان......
سهام....اشوفي اديك صفريطة هاد دار فيها ناس ماشي غير سيادتكم لي كاينا وطوليت مشروكة بمعنى ماغاتبقايش منشورة فيها نهار وماطال وتشعبطي ليا فالما ما كانش كايخلصو باك نتي على هاد لحساب خاص يتزاد ليك لكرا على هاد دنيا المياهات لي طالقة على صباح 
زمرد....ياريت تحترمي نفسك أ انسة اذا سكت ليك هذا ماشي معناه خايفة منك معناه كانتفادة المشاكل والطوليت كانظن ملك للجميع "شافت فالباب" لاني ماشفتش اسمك عليها..
هام....."وسعات عينيها" شنووووووو "كاتشير لنفسها" كاتعايريني لا بصح كاتعايريني "يالا غاتلاح عليها وهو يشدها بدر وزير عليها......
بدر..."بنظرة حادة وصوت خشن" صباح هذا باقي ماكامي ما شارب قهوتي ماتفرعيش ليا ك** على صباح "دفعها" فرقي عليا سوق ..."شاف ف زمرد" ونت ذوبي من هنا ...دخلت زمرد لغرفتها نفس شيئ بنسبة لبدر بقات غير سهام صدرها كايطلع وينزل من كترت لغضب يالا غاتنطق مباركة وهي تسكتها
سهام....حتى كلمة وديك لكلبة لي دخلتي حسابي معاها من بعد "دخلت لطوليت وردخات الباب وراها وخلات مباركة كاتبحلق

بدر...بلا شك كلكم كاتسألو شكون انا "ببتسامة صاخرة" انا بدر او بيدرو ...بيدرو هذا لقب خديتو من طفولة وكبر معايا وسط القهرة والظلم تيتمت فسن سبع سنين اول ماتوفات الوليدة الله يرحمها تزوج الوليد وراها مباشرة قبل ماتوصل ربعين ديالها جاب واحد خيتي سميتها سعاد "نتر نترة من سيجار " جات لدار بصفة مرات با وجابت معاها بنتها كانت صغر مني بعامين اول مادخلت لدار ماحملتش وجودي تا انا ماكنتش مسوق ليها كنت صغير مشطون غير بالعب فالزنقة الله يسمح ليها ولا لهلا يسمح لزا** بوها بنت الكلب دوزات عليا دكاكة كانت كاتهتم ببنتها وانا اخر همها الحوايج هما لخرين ما كانش كاتصبنهم ليا خرجت من بيت للول حيت مالقيتش لي يزيرني نقرا اول ماخرجت قالت لوليد دي لحرام يتعلم الصنعة داك شي لي دار داني لواحد لكراج ديال المكانيك بديت كانتصخر ليهم ونشطب وكان داك خينا كايعطي لوليد 100درهم لسمانة وانا ما كانشوفش سانتيم ماتسوقتش عقل صغر بعد عام بديت نتلاح ونتسنطح حتى انا بغيت نتعلم بديت كانخشي راسي حتى بديت نتعلم الراس كان خاوي والعقل خفيف دغية تعلمت جلست عند داك خينا ست سنين وزادني ولا كايعطي لوليد 150 درهم وانا كايعطيني 50 درهم بيني وبينو شرطتها عليه قفلت 13 سنة عندو كنت نظل نخدم ومن نجي لدار ناكل شبحة ديال لعصا من عند سعاد قالت ليك كاندخل لفراش برجلي مسخين كنت كل ليلة ناكل ما كلا طبل بتيو ديال البوطة وكانعس بلا عشا فواحد ليلة ماتنساش كانت ليلة كحلة ديك خيتي دسعاد كانت معروضة لشي عرس عند جيران وماداتش معاها البعلوكة ديال بنتها لي قفلت 11 سنة ...

جيت من الخدمة مسخسخ دخلت ديريكت لدوش دوشت ولبست شورط ديالي وتيشورط ومشيت ديريكت لكوزينة كانقلب ماناكل لقيت لكحط حليت ثلاجة لقيتها كاتصفر خرجت لحانوت خديت طون ورجعت لدار درتو وسط الخبز وعمرت اتاي وجلست نخشي فوجهي شوية دخلت البرهوشة كاتبكي وكاتعوج فالمشية مشيت لعندها وسولتها شكون ضربك باش نربي هذا لي ضربها واخا مها مافيها خير ماعلينا مابغاتش تهضر جلست دمع وحاطة يدها على حجرها يالا حطيت يدي على يدها نشوف مالها وهي دخل لالهم سعاد غير شافتني حماتها لغوات عند بالها كانشوف العورة ديال بنتها بعدت عليها وقلت ليها ماتفهميش غلط قبل مانكمل كلامي نزلت عليا بصندالة لوجه ومشات كاتقلب فبنتها ولقاتها متقوبة ودم نازل ليها صافي تما كبرات تلاحت عليها كاتعض وتقرص ماكفاوهاش يدها جابت تيو ديال البوطة وبدات عليا دخل الوليد كايفك ماطلقت مني حتى لحمي زراق قالت لوليد بلي خسرت ليها بنتها زاد كمل عليا بلا مايسمع مني والبعلوكة اكدات كلام مها جراو عليا من دار وواصا مول المحل مايدخلنيش جلست سيمانة كانبات قدام باب المحل وحتى حد ما حن فيا شفت راسي غير كانضيع الوقت هزيت راسي ومشيت لكازا...

فكازا تبليت وتمرمدت فكازا عرفت معنى اليتم والجوع والحقرة والاحتقار كليت من طوارو دالزبل وسرقت باش نقدر نعمي جوع بعد عام من تمرميد تعرفت على عبيقة اكبر بزناس فيك يا كازا كان كايستغلني كايسخرني نجيب لحشيش ونفرقو كنت خفيف ودكي خدمتي عجباتو ولكن ولد لحرام عمرو عطاني شي ريال كان كايقولي خلاصك هو ماكلتك وشرابك قلت معليش المهم لقيت ماناكل وفين ننعس قفلت عشرين سنة وليت بزناس كبير ومعروف بإسم بيدرو لي كايسمع اسم بيدرو كايجمد فارض وجودي وماكاينش لي ينفنف فوجودي بعد ما ماات عبيقة مقتول خديت بلاصتو كنت ديما روشيرش ديما هارب لبوليس كانتحول من دار لدار رونتها حشيش ومطايفاات شحال من واحد كزرتو بربعطاش عمري ظلمت لكن لي جبدني جبد خلاه الفلوس لي كانربح من ورا الحشيش كانتبرع بيهم للميتم وكانخلي ليا شوية باش نتحرك هادي عامين دابزت مع واحد البزناس كبير فرشختو بالمعقول دازت يومين وقفو عليا رجالو جاوني على غفلة وماكنتش هاز معايا المضة (السلاح الابيض) ضربوني بالموس كان غاتجي ضربة فوجهي لولا لطف الله طاكيت بيدي وتجرهت جرحة كبيرة اترها مزال فدراعي وجاتني ضربة اخرى فكرشي تقاتلت معاهم وطاكيت على راسي واخا كانو كتار لكن واحد منهم غفلني وضربني بالموس فجنب دالحاجب جاب الله ماحكمش الموس مزيان وكانت جرحة صغير نجيت بأعجوبة ...

فلت منها لكن حلفت ماندوزها ليهم جمعت رباعتي وهجمنا عليهم شي كايضرب شي واحد من عشراني قتل واحد فيهم ندمت حتى جبت الحمية هربنا كل واحد فينا شد قنت بدا البوليس كايقلب علينا وخصوصا انا لان داك زا**قال ليهم انا لي قتلت هربت لشمال بعد سيمانة وقفو عليا البوليس تشديت وجابوني لولاية الامن فكازا لقيت صحابي مشدودين قبل مني عشيري لي قتل ما بغاش يعترف دوزنا عام دالحبس كاملين بعد عام قرر يعترف بلي هو لي قتل اول ماعترف خرجنا حنا وبقى هو حكمو عليه ب 12 بقى فيا بزاف ومزال ما قادرش نسمح لراسي بسبب طيش ديالي واحد مات وواحد مرمي فالحبس "تبسم بحرقة" بعد ما خرجت براءة رجعت لتبزنيس عاود رجع الرعب فولاد الدرب كنت قاطع فيهم نفس فالحومة جاو شي ناس كراو فالدار لي كنت كاري فيها ناس ملتزمين رجل بالحية ومراتو منقبة وعندهم بنت وولد اسلام عندو ديك 10سنين وملاك عندها 20 وفعلا هي ملاك بنت غير البنات اول ما جات عيني فعينها خفق قلبي وكانت اول مرة يخفق لشي وحدة دوزت الغرق دالبنات لكن كانو كلهم علاقات عابرة اول ما كاناكل الحلوى كانقلب 6/9 تزعطت ف ملاك كانت بنت مربوعة القد وبشرتها بيضة وصافية وعويناتها عسلين ومشفرين وخدودها ديما موردين اما شفاها ااااااااخ من دوك شفاه لي كان حلمي نذوق رحيقهم لكن "غمض غينيه وعصرهم"...

عمري قدر نطول الشفاه لي تنميتهم كانت كاتخرج من دارهم لابسة الخمار وعينيها فالارض حسيت نهار على نهار قلبي كان كايتعلق فيها وكانزيد نبغيه بكترت الحياء،لي كانت كاتمتاز بيه بالاضافة لجمالها بعد شهرين زعمت وقررت نتكلم معاها فقت صباح مبكر على غير العادة دوشت وحسنت ولبست مزيان ودوشت بريحة "تبسم" هه خرج من دار ووقفت فراس درب كانت كاتخرج من دارهم مع ديك سبعة كانت خدامة فشي شركة خرج معاها باها بحال كل صباح ووقف فالمحطة حتى جا الطوبيس طلعت فنفس الطوبيس لي طلعت فيه بلا مايشوفني بحاها كنت كانحس بيه ما كايحملنيش معلوم كيفاش غايحمل واحد بزناس وحبايسي ماعليناش جلست جنبها شافت فيا بنص عين وقلبت وجها تشجعت وتكلمت معاها....هه ماكنتش متوقع ردها صداتني وقالت بلي مخطوبة وحتى لو ماتكونش مخطوبة عمرها تفكر ترتبط بواحد بحالي بعيد من الله كرهتها وكرهت الساعة لي شفتها فيها وكرهت القلب لي نبض ليها عمري توقعت تكون بداك الغباء والعنصرية كيفاش تنزه نفسها وتحتقر غيرها كيفاش كايقيو ويحكمو على الانسان من الخارج بدون مايشوفو الجوهر قالت بلي انا بعيد من الله هه لو عاشت الحياة لي عشت كان كلامها غير هزيت راسي وخويت السيكتور والمنطقة ماشي مارديتش نن كرهتها نظرتها ضيقة وتفكيرها محدود قبل شهرين جيت لدار مباركة وكريت هاد لبيت من نهار سكنت هنا كانفيق على صداع بنتها سهام ديك سوفاجية كاتصبح تجعوق على صباح صوتها كايضرني فراسي ماكانستحملهاش واخا كانحس بيها حتى هي غاتكون عانات كانميز نظرة الانسان داك تشرعين لي فيها كاتبغي تطمس بيه معاناتها خخ وليت محلل ماعرفتش،مي هذا مجرد احساس كيف ما كانحس بيها ماكاتحملنيش قاطع فيها نفس كادير ليا ضجيج فراسي اليوم صباح فقت مبكر حيت غادي نتقدا سلعة دخلت لطوليت قديت حاجتي يالا خرجت وانا نشوف قدامي واحد البنت طويلة وطاي مانكا وعويناتنا زورق زوينة بزاف ومتحجبة ماعرفتش من شفتها دكرت براءة ملاك لمصطنعة كرهتها خنزرت فيها وكملت طريقي لكن نظراتها فشكل ورا دوك نظرات حزن عميق وعمر احساسي ما خاب يالا غانلبس حوايجي وانا نسمع ديك لالهم سهام كاتجعوق حقرات عليها وبغات ديرها تحت صباط وانا كانكره الحقرة حيت عانيت منها حتى ديك خيتي ما ساهلاش عطاتها علاش تقلب يالا غايشبكوها وانا نفرق سوق ...

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.