قناع الذكريات الجزء الخامس والأخير

مابقا سوى ايام معدودين .. كيفصولنا على رمضان .. عمتي جاو عندنا باش تبات معانا .. وفالصباح بلال غايوصلهم للمطار من اجل رحلتهم .. 

فات العشا فجو عادي .. حاولت نبين ما امكن انني اسعد وحدة فهاد الكون .. 

اما بلال الايام كلها وهو كيتجاهل وجودي تماما .. فحال اذا ماكايناش .. وانا نفس الشيء.. ماكنهدرو الا فالاوقات الضرورين .. البرود كيحيط بنا من كل جنب .. كنت شبه متأكدة اننا هاد المرة خسرنا اي فرصة لينا بزوج .. البعد هو الدوا لهاد الداء .. 

هاد المرة الليل كان مخالف .. غانظطرو نتشاركو نفس الغرفة .. ! نفس المكان .. واخا فسيح بان لقلبي ضيق .. 

شفته دخل للغرفة بلا مايتكلم معايا فحال ديما .. كأنني تمثال رخامي .. وجوده من عدمه .. غصة مريرة طلعات ونزلات فحلقي .. غير حركت رجلي فالغرفة .. حتى كان صوته سبق خطواتي ..

بلال:~ فين غادية ؟ 

رعشة سرات فدمي .. وفظهري بالضبط .. قبل مانجاوبه بنفس النبرة لي خاطبني بها .. 

انا:~غانخرج نشرب .. وغانعطي لعمتي غطاها .. 

الوقت لي خرجت فيه وعاودت دخلت.. حاولت نطوله .. تمنيت نلقاه خرج هو من الغرفة او غير يكون نعس على الاقل .. لكن العكس تماما ملي لقيته باقي كيقرا فواحد الكتاب .. متكي بكل اريحية على الناموسية .. همست بصوت مرتعش .. 

انا:~ انا .. انا غانمشي عندي البنات .. 

شفته عقد بين حاجبيه .. وزفر بضيق .. 

بلال:~ ماباغيييش المشاكل .. (زاد بتهكم) هي غير ليلة وغاتفوت .. 

قلبي انقبض بين ضلوعي .. تراجعت وجلست على طرف الفراش .. حسيت بعيونه من ورائي كيجلدوني فحال السياط .. سمعت غير صوت حفيف الورق والكتاب لي تغلق.. .

بلال:~ علاش باغيا تمشي عند البنات ؟؟ محتاجة شي حاجة من عندهم ؟ 

جفلت من نبرة صوته الجلييدية .. واخا هكاك كانت مغلفة بقليل من الفضول.. مسحت على عنقي بتوتر ..

انا:~ يمكن هكاك احسن ..

زفر بتعب .. وجسده ترخى على الفراش .. غمض عيونه وبقا عاقد بين حاجبيه .. 

بلال:~ خصك تصبري هاد الايام .. كيفما مظطر معك حتى انا .. 

انا:~ واخا .. كيفما بغيتي .. 

حركت راسي بإيماءة صغيرة .. ماكنتش باغيا مازال نشدو الضد .. يكفي هاد وجع الروح لي انا حاسة به .. وهاد الهموم لي هازاهم كلهم فوق كتافي .. يمكن هاد الأيام غايبقاو احسن ذكرى من بعد .. ببرودهم.. بقسوتهم .. بجمودهوم ..

تململت فبلاصتي مرة بعد مرة .. حتى استقريت على جنب واحد .. كنراقب غير ظلمة السماء من النافذة.. والساعة لي كتحرك فالحيط .. بلا مانشعر لقيت عيني كيفرجو على تعبهم بدمع صامت .. كل مابغيت نوقفهم كيتراكمو عليا الافكار ويزيدو يضغطو على نبضات قلبي .. 

بلال:~كتبكي ؟؟

زفر بغضب .. وبالرغم من انه كيفصلونا سنتيميترات استشعرت قرب انفاسه .. وتشجنج عظلاته ..

دفنت راسي بالوسادة .. وطلعت نفس حار من صدري عاد رديت عليه .. 

انا:~ لا .. ماكنبكيش .. يمكن صدعتك .. 

رجعت ضغطت على راسي ما امكن .. باش شهقاتي مايفضحونيش .. فحال اذا كان خصني غير سؤاله .. باش نزيد نأن بصمت .. 

بلال:~ متأكدة ؟ 

يديه تحطو على كتفي من ورائي .. حتى قلبني بكاملي لعنده .. بدون تردد شاف فيا .. ومشطني بعيونه السوداوين .. احمرارهم .. بارد .. جاف .. مغلف بقسوته .. 

بلال:~ كتعرفي غير الدمووع .. غيررر كتبكي .. 

ارتخيت بتعب .. وعضيت على فمي بارتجاف .. استشعرت ملمس يديه الخشنتين على كتفي .. كيضغط فحال اذا باغي يهرسهم من شدة التوتر ..

انا:~ ماكنبكيش .. (سكت شوية ملي شفت مقلتيه مازالين كيحدقو فيا بإصرار كيستناني نكمل ) وماااكانديرش راسي الضحية فكلشي .. 

لقيت فمي بدون شعور مازال باغي يفرج على ماعنده .. 

انا:~ مابغتيش نطلب السماحة .. حيت عارفة هادشي عمره غادي يبرا من جيهتك .. 

زاد ثبتني اكثر .. وصوته كيدخل لي بين المسام .. 

بلال:~ على اشمن غلط غاطلبي السماحة ؟ السعادة لي بنيتها من جيهتك وكسرتيها .. ولا الغلط لي اقترفتي فحق راسك ودابا ندمانة عليه ؟ولا جوري الصغيرة لي كنتي فعيني .. من بعد كنلقاك وحدة اخرى ؟؟ ولا الكذوب لي بديتي بهم من الاول ..(رجع تنهد بضيق ) يستحسن بلا مانهضرو فهادشي .. 

تأكدت ان هاد الجفاء كله لي قابلني به الايام لي فاتو .. ماكان سوى غطاء بارد .. لشنو فجوفه وباقي خصه سنين واعوام باش يخرجه .. 

غمضت عيني ملي حسيته طلق مني بقسوة .. رجعت فتحتهم كنحدق فسواد الغرفة .. 

انا:~ حتى نتا عمرك سولتي راسك .. لو كنت بنت الحرام اسهل الحاجة كنت غانديرها غانقضي ببكارة اصطناعية .. ! ولا نقول لك تعرضت للاغتصاب .. وكل حاجة غاتكون مزيانة ولا لا .. عمري كنت غانجرحك يمكن .. كانت اسهل حاجة نديرها ونعيشك فالخداع حياتك كلها .. 

صمت مطبق هو لي جاني من طرفه .. رجعت تقلبت للجهة الاخرى كنسمع غير ل هدير انفاسه .. فحال شي بركان ثائر .. حطيت يدي على قلبي كنهدي من روعه .. وضرباته العنيفة 

لكن فجأة.. نطقنا بزوج فدقة وحدة اسماء بعض ..

"جوري .. بلال "

حتى هو فحال اذا ماتوقعش ننطقو بأسماء بعض فنفس اللحظة .. كتمت تنفسي فصدري .. وتكلمت قبل منه .. 

انا:~شنو ؟ 

جسده انقلب فالفراش .. بلا مايجاوبني .. حتى شكيت واش غايبقى ساكت .. انا بنفسي نطقت باسمه فلحظة عابرة .. يمكن حتى هو نفس الشيء .. ماكان عندي مانقول .. 

بلال:~ واش خالي كان قاسي معك ؟

فتحت عيني بذعر لسؤاله المفاجئ .. فهاد اللحظة بالضبط .. وهاد المساحة الضيقة .. سؤاله غريب .. وغريب بزاف .. 

انا:~ ماعرفتش .. 

اطبقت على جفني .. كنطلع التنفس من صدري مر وحار .. واكملت ..

انا:~ ماعرفتش واش هو لي كان قاسي .. ولا هاديك طبيعته .. معانا فالدار .. واش اذا كانو عنده ولاده اخرين كان غايعاملهوم بنفس الطريقة .. ولا غير انا لي كنت استثناء .. ماما حتى هي نفس الشيء .. كان كيعاملها هكاك .. 

درت يدي على خدي .. كنسمع غير لهيب انفاسه الحارة .. والهوا لي كيطلع من جوفي .. ويمر عبر قصبتي الهوائية .. مشبع بالتشنج .. 

انا:~ هكاك تربيت معه فالصغر .. يمكن حتى فات الفوت عاد حسيت انني محتاجة لكلامه كثر من قسوته .. انا بنفسي ماعرفتش واش هو هكاك ولا شنو ؟ يقدر يكون ترباو هكاك حتى هما .. ولا غير زواجهم لي خلاهم يكونو هكا .. 

تقلبت للجهة الاخرى لعنده .. حتى هو حس بوجودي لجانبه.. لاحظت انقباضة فكه .. وملامح وجهه لي كيبانو غير من الضو لي داخل من برا متشنجين بكثافة .. 

بلال:~ وماماك ؟ 

انسان عجيب كيجمع مابين الثلج والنار .. مابين الدفئ والقسوة .. مابين الاهتمام واللامبالاة غير فنظرة عيونه .. 

بلا تردد جاوبته .. وعيني مازال اسيريتين لسوداوتيه القاسيتين .. 

انا:~ ماما فشكل .. تصرفتها مختلفين .. هي حنينة ولكن كتغطي داكشي بقشرة البرود .. فحال اذا ماماهتماش .. بعد المرات كتبان خايفة عليا .. وبعد المرات كتبان ماعندها حتى دخل فداكشي لي كيوقع لي .. 

طلع النفس من صدره بعنف .. فحال اذا باغي يزيد يتأكد من كلامي كله حرف بحرف .. ويسمع له .. لعله يبرد من نار قلبه .. 

بلال:~ كان كيضربك ؟

انا:~ لا .. حيت كنت كنفذ كلشي كيقوله .. 

قرب ييديه حتى لوجهي وعاود حيد اصابعه فحال اذا مادار والو .. يمكن ندم على انه كيسأني وهاد الكأبة لي كندخلها لحياته .. انقبضو اصابعه فوق وجهه .. وزمجر بخفوت .. 

بلال:~ عارف هادشي لي فات كله ؟ 

عرفته كيقصد علاقتي مع مراد .. ونتيجتها .. تدفق الدم فأوردتي حتى وصل لوجهي .. لي حسيته احمر والحرارة تحت بشرتي كتحرقني .. 

انا:~ لا .. ماعارف حتى حد من غيرك ..

طلعات المرارة لحلقي .. ووقفات بين حنجرتي .. سكت طويلا .. وبعدها تلاحقو كلماته فأذني .. هاد الليلة كانت ليلة الحقائق .. فين غايقول هو كل تساؤولاته وانا غانجاوب عليها .. 

بلال:~ علاش كنتي رافضة هاد الزواج من الاول بلا ماتعرفي والو ؟

اطبقت على جفني .. رجعت فتحت عيوني .. كنراقب تفاحة ادم لي طالعة نازلة فحلقه .. وصدره لي حتى هو نفس الشيء.. كيبان غير من قميصه الاسود لي كيعكس بشرته السمراء .. همست بتردد.. 

انا:~ عارف واليديا حتى هما تزوجو هكا ؟؟ عمرهم عرفو بعضياتهم ؟ عائلة ماما لي بززو عليها الزواج ب بابا .. 

حملق فيا بلجتيه العميقتين .. كيقرا دواخلي .. والاجوبة لي غانقول ليه قبل مايلفظها لساني .. نوعا ما كيتوقعها 

بلال:~ سمعت بهادشي من قبل .. 

حركت راسي بشوية .. 

انا:~ مابغيتش قصتهم تتعاود معايا .. انا شفتك مرتين ولا ثلاثة .. ماكنتيش حامل وجودي حتى .. ظينت انه هادشي كله غايكون غير من عائلتنا بزوج .. حتى فاش تكلمت معك اول مرة .. ماكنتش قادرة نفهمك .. برود لهجتك وتصرفاتك .. خلاوني نقرا رفضك لهاد الزواج .. ونشوفك نسخة مطابقة ل بابا .. خلاتني نفكر انني اذا هربت من الجحيم الاول غانطيح فالثاني .. مابغيتش داك الوقت مازال تتعاود واحد جوري اخرى .. ونضيعو حياتنا بزوج .. 

تنهدت بتشنج .. وداخل صدري .. جبل كبير كأنه كيعيق عليا نتكلم .. شاف فيا بتفكير .. كيحلل كلامي قطعة بأختها .. ويرتبه فعقله .. بغا يتكلم لكنني قاطعته .. 

انا:~ انا ماكنبررش افعالي .. وماكنقولش ماغلطتش .. يمكن غانندم شي نهار على هادشي كله.. وعلى الفرص كاملين لي تعطاوني فحياتي وضيعتهم .. لكن انا وحدة معقدة .. ماغاتقدرش تفهمها حياتك كلها .. حتى اذا حاولتي غاتمل من هادشي كله .. غاينفذ صبرك فالاخير .. ويمكن غاتلقا راسك ندمان على الوقت لي عطيته باش تحاول تنسى هادشي وتتجاوزه ..

كان كيسمع لأحرفي بصمت .. مخليني نتكلم .. نتناقشو فهادشي كله بهدوء .. 

حركت راسي وحاولت نكمل كلامي قبل ماتغلبني عاطفتي مجددا .. لكنه زفر اسمي مع انفاسه .. الشيء لي خلاني نطبق على فمي .. 

بلال:~جوري ..

ماقال والو بعد ذلك .. فحال اذا غير كيتذوق داك الاحرف الاربع .. غمضت عيني وخليت غير الفراغ .. وقلبي لي كينبض بقسوة بين قفصي الصدري .. 

كلام الليل يمحوه النهار .. هاد المقولة تطبقات علينا فالصباح .. ملي قال اسمي ليلة البارح وهو ساكت .. مازدناش هضرنا او فسرنا شيء .. بقات علاقتنا اثناء ذلك بلا نهاية .. اصلا من الأول كانت بدون بداية .. كسفاش حتى غانكتبو نهايتها .. 

ضرباتني الفيقة على وجهه واقف قدام المراية كيلبس ساعته .. تنهدت بصوت مرتفع .. حتى سمعني يمكن الشيء لي خلاه يدور وجهه عند ويتكلم بلهجة باردة .. وحواجبه باقي معقودين .. 

بلال:~ صباح الخير .. 

رديت عليه بهدوء .. فحال اذا عمرنا تكلمنا البارح .. ولا افصحنا على بزاف د الاشياء .. 

انا:~ صباح النور .. 

ماجاوبنيش او سألني بعد ذلك .. اكتفى يشد صدايف الشوميز لي لابس بعصبية .. فحال اذا كيبرد فيها داك العصبية دياله كاملة .. وداك القسوة الغير مبررة .. 

نضت من مكاني.. ماقادراش حتى نتحرك .. كنت مازال كنجمع الفراش بينما عقلي كياخذ ويجيب وسألته بنبرة عادية .. 

انا:~ واش غاتوصلهم دابا ؟ 

حرك راسه بإيماءة صغيرة .. بلا مايخرج حتى صوت من جوفه .. شفته مازال كيقلب على شي حاجة .. لكن امتنعت نسوله حتى تكلم هو بجفاء.. 

بلال:~ماكاينش شي ابرة والخيط .. 

عرفته غير من عصبيته ان قطع شي صدافة د القميجة لي لابس .. اقتربت حتى لفين واقف .. لكن بقت بعيدة عليه نوعا ما .. 

انا:~ خليها غانصاوبها .. 

مادارش شي ردة فعل فالمقابل .. من غير زفر بضيق .. غير ثواني معدودة ..حتى كان لقا شنو خصه .. 

زدت اقتربت منه .. اصبحو انفاسه والهوا المحيط بنا متشاركين .. 

انا:~غانصاوبها لك .. 

هزيت من عنده داك الإبرة والخيط .. واقتربت اكثر .. حتى حسيت بدقات قلبي كيتزادو .. و عنف انفاسي .. كيترددو فالغرفة بصوت مرتفع .. حسيت بتشنج بلال ايضا .. وملامح القاسية كيزيد يعقدهم اكثر واكثر ..

ندمت حتى دفعت راسي باش نصاوبها .. ونار انفاسه كتلسعني بشكل مستمر .. فحال شي سياط من لهيب .. كأنها كتحط على خلايا جسمي وتذوبهم وحدة بوحدة .. 

زفر نفس اجش من صدره وخاطبني بهدوء عكس عصبيته لي كانت .. 

بلال:~ تمشي معايا .. 

كنت ساليت تقريبا ..شعرت غير بيديه كتسحب خصلة من شعري الفحمي لي هبطات القدام .. كيرجعها ورا وذني ببطئ ..

بلال:~(اكمل على كلامه ) نوصلو الوليد والواليدة .. 

ابتعدت عنه .. وابتسمت باش نكسر هاد التوتر .. وهاد القرب الموجع ..

انا:~ ماعرفتش .. 

هز راسه بهدوء .. ورجع مسح على وجهه .. 

بلال:~غانستناكم برا .. 

فطرنا فجو عادي مع عمتي وراجلها وحتى جميلة .. خرجات بعد ذلك تقضي شي شغال عندها .. بينما انا اختريت ايضا نرافقه ونوصلوهم للمطار .. 

طول الطريق ملي رجعنا فحالنا .. والصمت كان حليفنا لا هو تكلم ولا انا تكلمت .. حتى لقيته وقف قدام واحد المحل .. عاد سؤالته بفضول .. 

انا:~شنو هذا ؟؟ 

جاوبني بنفس الهدوء .. بلا مايشوف جيهتي .. 

بلال:~ محل د الحوايج .. يمكن تكوني محتاجة شي حاجة ..

شفت فيه بتلعثم .. وحركت راسي بنفي .. 

انا:~ مامحتاجة والو .. كلشي عندي ..

رديت البال غير ليديه لي تحركو .. زير عليهم .. كيضغط على اصابعه .. 

بلال:~ عارف كلشي عندك ..(طلع النفس من صدره ورجع هبطها ) يمكن تحتاجيهم من بعد .. 

مالقيت راسي غير هازة وجهي بإيماءة صغيرة .. ونزلت معه .. 

اليوم داز عادي من بعد مارجعني للدار بلال تعطل مادخل بالليل حتى كنت غرقت فالنوم .. الصباح داز هادئ .. هو بنفسه كان متعمد يخلي الامور تمشي بسلاسة .. 

جا الليل الثاني .. جلسنا انا وجميلة كنتفرجو فإحدى البرامج التلفيزيونية .. حتى نطقات ..

جميلة:~ واش غاتستناي بلال حتى يجي ؟

هزيت راسي بنفي وشفت فيها .. 

انا:~ لا .. يمكن غايتعطل مازال .. 

تململات بتعب وابتسمات فوجهي .. 

جميلة:~ انا غاننعس .. تصبحي على خير .. حتى لغدا ان شاء الله .. 

انا:~ وانتي من اهلو .. 

تقلبت ف الفراش بتعب .. مكانه خالي .. بقا غير عبق انفاسه فالغرفة .. لاصق فجدران المكان .. واخا غايب .. عطر انفاسه كيعلن حضوره الطاغي .. كيزلزل كياني من الداخل .. لأول مرة كنراجع نفسي .. كنحصي عدد اغلاطي .. ربما تكون علاقتنا فرصة عمرها غاتعوض فحياتي .. غانضيعها .. باش تقتنصها شي وحدة اخرى بكل سهولة ..

مجرد التفكير فأنه وحدة اخرى غاتكون مكاني .. اهتمام بلال الاول كله غايمشي لعندها .. كلامه .. دفئه .. بينما انا غانحتفظ بمجرد ذكريات على شكل قناع مؤلم .. عمره غادي يتلاشى .. خلاني نشعر بمظى اهميته اكثر .. بالوجع كيقطع كل جزء من جسدي .. !

دقائق طويلة فاتو .. حسيت بشي نغزات كيضربوني فكرشي.. الحريق قوي .. ولكن حاد .. ومعدتي كتلوا بالوجع .. فحال اذا كليت السم .. 

حاولت نرد شنو فجوفي فالحمام ووالو.. لعل وعسى هادشي لي كنحس به يبرد .. ولكن لا نتيجة .. مسحت على وجهي المصفر بتعب .. وخرجت بصعوبة .. ! 

لقيت بلال عاد داخل مع باب الغرفة .. شاف فيا بلا مايلقي السلام .. لكن عيونه مشطوني من بعيد .. بنظراته الحادة عاد تكلم .. 

بلال:~ ضاراك شي حاجة ؟ 

حاولت نبين الامر عادي .. تنفست بصعوبة .. وهزيت كتفي بنفي .. 

انا:~ لا .. 

حرك وجهه بعدم تصديق .. ومع ذلك باقي ملامحه السمراء بدون تعبير .. ماقادراش نقرا فاش كيفكر .. خطيت بضع خطوات عاد هضرت .. 

انا:~ غانخرج برا .. 

بلال:~ على راحتك .. 

اخر شيء شفته كيحيد قميصه بنوع من العنف .. ويديه كينقبضو مجددا .. مابقاو غير داك العروق لاصقين فخيال عقلي .. ضغطت على قلبي .. وغرقت فأحاسيسي المتلخبطة بشدة .. 

جلست على احدى المقاعد فالصالون .. كنحاول نطرد وجع كرشي وتوتري بوجوده .. غانخليه حتى ينعس عاد غاندخل .. على الاقل مانكونوش مجبروين نشوفو فوجه بعض ونتصنعو داك البرود القاتل .. سمعت صوت جميلة لي خرجات من البيت بدون مانحس بوجودها .. 

جميلة:~جوري مالكي ؟ واش كتوجعي ؟ 

جفلت فالاول .. حيت هدرات بالجهد .. رجعت استرخيت على مقعدي وجاوبتها بشوية ..

انا:~ غير كرشي ضاراني شوية وصافي .. 

شافت فيا بذعر .. والدفئ فعيونها .. فحال الايام لي كان بلال كيخاف عليا .. حطيت يدي على كرشي .. كنزير عليها .. 

جميلة:~ ندير ليك شي حاجة تشربيها ؟

قبل مانحرك راسي بالنفي .. سمعت صوته .. جا متوازي مع صوت الباب لي صفقه ورائه بقسوة ووخاطب جميلة .. 

بلال:~غي سيري تنعسي .. 

رجع ابتسم فوجهها باش ماتحس بوالو .. وهز راسه باستنكار .. 

بلال:~ غانبقى معها .. 

شافت فينا .. بان لي ماحسات بوالو .. لا بنظراته لي كانو كيلتاهموني بدون رحمة .. ولا بعيوني لي كانو مسلطين على طيفه الضخم .. 

جميلة:~ المهم تصبحو على خير .. 

مجددا كيحتل ذرات الهوا من حولي ويخليني محتاجة للأوكسجين اكثر .. اقترب حتى وصل لعندي .. حرك فكه بامتعضاض .. فحال اذا مابغاش علاش بينت له انه مابيا والو .. 

بلال:~ لبسي عليك ناخذك للطبيب .. 

لصقت فداك المقعد .. كنزير على كرشي اكثر .. يمكن عرف شنو ضارني .. انطلاقا من ردة فعلي .. 

حركت راسي بنفي ..

انا:~ ماكاين لاش الطبيب .. 

عرفته غادي يصر عليا .. عاودت حركت كتفي .. وتنفست بزز .. 

انا:~ غير البرودة .. ديما كادير لي هكا .. 

هز راسه .. كيتأكد من كلامي .. حط يديه على جبيني .. حتى لسعني قربه .. وتنفسه الخشن ممتزج برائحته كيضربني فالصميم .. ويدخل ف اعماقي .. 

بلال:~ حرارتك عادية .. غانصاوب لك شي حاجة تهدن لك الحريق .. 

كتمت صرخة وجع بداخلي بصعوبة .. مابغيتش مجددا يهتم بيا .. مابغيتش نغرق فدفئ تصرفاته .. وفالاخير نلقاهم مجرد سراب .. 

انا:~ بلاش .. 

مشا للكوزينة بدون مايهتم .. مدة طويلة عاد رجع كنت دخلت للغرفة فداك الوقت وتمديت على الفراش .. بتعب ..

هز واحد الكاس فيديه فيه شي حاجة .. غير ريحتها لي مجهدة .. 

بلال:~ شربي هاد اللويزة غاتهدن لك الحريق .. 

شديت الكاس من عنده .. كنرشف ببطئ .. وكل نظرة من عيونه كنحسها مسطلة عليا فحال الكهرباء ... كتحاصرني من كل جنب .. كتجري فدمي .. كتخلني مذهولة .. غايبة على شنو كيوقع .. باغيا ننجرف اكثر .. الشعور بكيانه كيزلزل ذاتي .. شعور مؤلم ولكن كان عاجبني .. 

قاطعني من افكاري بكلامه .. 

بلال:~ باقي بزاف الحريق ؟

هزيت راسي بنفي .. اغمضت عيني .. والتنفس بزز باش كينطلعو من اعماقي .. 

انا:~ شوية ..

قربه حسيت به .. جالس قدامي على طرف الفراش .. ماقادرة لا نبعد اكثر ولا نقرب اكثر ..

يديه تحطو على جنب وجهي.. خشينتين لكن كيتحركو عكس ملمسهم البارد .. اصابعه كيحركهم بشوية .. 

انا:~(همست بتوتر) بلال ..

بلال:~ نعسي دابا .. 

شبه مخدرة .. هادشي لي كنت كنحس به فداك اللحظات .. وداك الدفئ مجددا لي فعينيه كيذبحني .. من الوريد الى الوريد .. داك الخوف لي كان واضح فمقلتيه .. خلا عيوني اسيرتين لنظراته النجلاوين .. حتى نفذ صبري من حرب الاعين المهلك لي بيننا ..

عاد همست بصعوبة .. وانفاسي سبقوني قبل حروفي .. بدون شعور .. 

انا:~ بلال .. انا كنبغيك .. 

حدقت فيه بنوع من الدهشة .. فحال اذا ملي قلتها عاد فطنت شنو خرجت من بين فمي .. فلحظة عابرة وضعت كلماتي بين طيات وذنيه .. وروحي بين اضلعه .. 

ماسمعنيش يمكن هادشي لي قلت مع بالي .. ولكن تجمد نظراته .. تصلب يديه على وجهي .. خلاوني نعرف ان الحروف خرجو من جوفي ووصلو لمسمعه بسرعة فائقة .. 

بلال:~ واقيلة بديتي كتهلوسي .. 

قالها بجفاء.. فحال اذا ماباغيش جرح اخر .. نكون انا السبب فيه .. خصوصا كنت كنبان مرخية بالتعب .. يمكن شك ان كوب اللويزة لي شربته لعب بأعصابي .. 

زاد حط يديه على جبهتي كيتأكد من حرارتي .. الشيء لي خلا الحنق يتصاعد بداخلي .. حيدت يديه من على وجهي .. وداك التعب كله لي كنت كنحس به .. قدرت نكتمو بين اضلعي .. 

انا:~ انااا ماشي مريضة .. وماكنهلوسش .. انا كنقوول داكشي لي خصني نقووله .. 

انتفض جسده بقسوة .. ويديه لي رجعو تحطو .. تهزو مجددا من علي وجهي بأكلمه .. كيمسح على وجهه بعنف .. شفت صدره لي كيتهز تحت القميص لي لابس .. 

بلال:~ عاااارفة شنو هاد الكلمة ولي غير جات فبالك .. 

احنى وجهه لعندي .. زاد حاصرني بسواد مقلتيه .. واحرقني بلهيبهم الفحمي .. عاد تكلم بقسوة .. 

بلال:~ (ضغط على صوته ) وباغيا تنطقي بها ..

حملقت فتقاسيم وجهه ..لي كيتميز بوسامته الخشنة .. هزيت راسي بصمت .. 

انا:~ عارفة ماشي من حقي نقول هادشي .. 

ببساطة كنت باغيا نعترف له بكلشي .. واخا مايتقبلش هادشي .. هاد عنف المشاعر القاسية لي كتلخبط فكياني بأكمله .. ماقادراش نتحملها .. 

ارتجف صوتي .. والجمل خرجو ثقال بين صدري ..

انا:~ هااادشي لي كنحس به .. ماحملاهش ولكن عاجبني هاد العذاب لي كنشعر به .. قاسي.. عنيف .. مدمر .. كيجمد ضلوعي .. كيمشي لي مع الدم .. كيحرق ذاتي كلها جزء بجزء .. فحال السم ملي كيتقطر فجسدك .. 

زاد اقترب مني حتى شعرت بأنفاسه كلها على وجهي .. فحال اذا الضو استحوذ على الغرفة بأكملها .. من غير وجهه لي بان لي مظلم .. 

عيونه غلفهم بالامبالاة لكن كينطقو بالشغف التوسل.. نرحم عذابه وعذابي فآن وحدة .. نطلق الكلمات من مسدس روحي لي غايكونو بمثابة رصاصة رحمة .. 

بلال:~شنو لي خلاك تقولي هادشي .. يمكن اثاار شنو شربتي .. 

جمعت فمي بامتعضاض .. كنقرا القسوة بين تقاسيم وجهه .. فكل منحى من جبينه .. طبيعي مايصدقنيش وانا لي استعملت قوتي كلها باش نرد تصرفاته جافة معايا .. 

انا:~ حيييت حتى نتاا كتحس بنفس هادشي كله .. نفس العذااب ونفس الموت البطيئ .. فحال اذا نتا مريض والدوا قدامك وماقادرش تشربه .. 

حاول يركز مع شنو كيخرج من قصبتي الهوائية .. واخا مشاعر كثيرة ظهرو على صفحة وجهه .. ولهيب عيونه احرق كل ذرة صبر بقات لي .. 

بلال:~شنوو اخررر ؟ كتظني غانخليك تهربي من بعد ماقلتي هادشي كله ؟ 

هزيت فيه عيوني .. لي بقاو مسجونين فزنزانة مقلتيه .. روحي فحال اذا ساكنة ف قفص بين ضلوعه هو .. 

انا:~ يمكن فالصباح غانندم على هاد الاعترافات كلهم لي قلتهم فهاد الليلة .. ولكن مستعدة نندم يوم او يومين او حتى شهر .. على انني نندم حياتي كاملة اذا ماقلتش هادشي .. 

فتح عينيه مامصدقش .. شنو كنقول .. وشنو كنبوح به فهاد اللحظات .. شحال من مرة اعترف لي هو .. لكن هاد المرة كان الدور عليا .. واخا من اول حرف حتى لأخير حرف نطقته .. شاكة واش غايتقبله .. ولا غاينبذ اعترافي ويسجله فدفاتر النسيان .. 

انا:~ وداابا ها انا قلت لك كلشي ..

ضغطت على فمي بقسوة باش نزيد نتشجع اكثر ..

انا:~ انااا كنبغيييك .. ومابغيتيش نضيع هاد الفرصة من يدي .. ونتاااا خصك تعرفها .. لقيييت راسي بغيت نقول لك كلشي .. كيفماا غايكون تصرفك .. 

بلال:~ هادشي جااا معطل بزاااف .. 

حاولت نكبح كل دمعة تهبط من عيوني .. من صده القاسي .. 

انا:~ عرفت هادشي قبل مانقول شنو بغيت نقوله .. 

رديت راسي على المخدة بتعب .. وخيبة امل كتعزف على اوتار قلبي .. حتى حسيت بيديه فحال الملقط تخطو على كتفي .. كيزيد يزير عليه .. بينما عيناه حمم بركانية .. عاطفة قاتلة فبؤبؤهم .. خرج الصوت من جوفه مثقل بالمشاعر الثائرة .. 

بلال:~ ماكنقبلش اقل من الملكيية الحصرررية .. 

قبل مانفهم كلامه .. كان احنى وجهه اكثر .. حتى اغمضت عيني .. لكن صوته ضرب شغف روحي ..

بلال:~ غاتمشي ولا غاتبقاااي .. 

حطيت يدي على صدره .. والهوا كيطلع من جوفي مشبع بأنفاسه لي امتزجو مع انفاسي .. 

انا:~ نتاااا بغيتيني نبقى ؟؟ 

هز راسه شوية وعاود رجعه .. كيحقق فيا بعيونه الشرستين .. فحال شي نمر متحفز كيحوم حول طرديته بسلاسة .. ضغط بشرتي غير بأنفاسه الخشنة وتكلم .. 

بلال:~ بغييت جواب واحد ..(تنفس بعنف) جواااب واحد .. غايخلييك حياااتك كلها هناا .. عمرررك تفكري تبعدي من بعد ... ولا تتهوووري بتصرفااتك .. 

دفئ قلبه لي وصلني هاد المرة .. وصدى دقات قلبي العنيفة زلزلو ضلوعي بشكل قاتل .. مدمر .. 

لقيت راسي مرة اخرى سجينة لعواطفي .. بعد كل المحاولات لي اقنعت بها راسي باش نمشي فحال .. هاد المرة قلبي لي حركني .. وخلاني ننطق بلا هوايا .. 

انا:~ انا بغيييت نبقى .. وعمررري نمشي فحالي ..

قرار حاسم ..فصل كل مافات من الماضي والحاضر دقة وحدة .. ! 

اتخذته فهاد اللحظة لي قلت عمري نندم عليها .. 

بعد ماقلت جملتي الاخيرة .. تنهدت براحة .. فحال اذا افرغت محتويات قلبي امامه بلا مانخفي مشاعري ..

لقيت غير يديه ك ردة فعل وجوابا على كلامي .. اعتقل جسدي من خصري .. وزيرني لعنده .. فثورة من مشاعره المجنونة .. تكلم جنب اذني بهمس .. 

بلال:~ماكاينش الوعود الزائفة .. مابغيتش المشاعر الكاذبة .. مابغيتش تتصنعي باش كتحسي .. 

واخا ضلوعي حسيتهم غايتفزرو بين كفيه .. ابتسمت اكثر .. كنحس غير بيديه لي طلعو لشعري كيغوصو فأغلاله .. كنت مأخوذة بعطر انفاسه لي دخل لي بين العروق .. 

انا:~ غاتبقى دائما نقولها .. حتى تصدق مشاعري كلها .. 

حسيت غير بأنفاسه كيتوقفو بين لحظة واخرى .. ويعاود يطلعهم من صدره .. فحال شي هوا ساخن كيتحط على بشرة عنقي .. 

بلال:~ ماقاردش نستوعب هادشي كله لي قلتيه .. 

انا بنفسي .. كنت مامصدقاش شنو كنخرج من فمي .. خرجت تنهيدة عميقة وراها نفس حار .. رجعت دفنت وجهي فتجويف كتفه .. 

انا:~ مابغيتش القدر لي يفرض عليا كلمته .. وانا عندي الحق نختار .. هادشي بغيتيه بنفسك من الاول .. ماشي بوحدي .. 

بلال:~ غاتندمي من بعد .. 

حركت راسي وسط كيانه .. كنستشعر ضخامة جسده .. شظايا روحه .. غير من حروفه .. 

انا:~ لا هاد المرة ماغانندمش .. حيت نتا ماغاتخلينيش نندم .. 

حسيت غير بابتسامته واخا ماشفتهاش .. فحال اذا كان مامتوقعش هادشي كله نقوله فلحظة وحدة .. نعتارف بما يعتمر صدري .. ننفض عني غبار الضعف .. ونتلحف بلحاف الشجاعة .. ولو غير هاد المرة .. 

انا:~ اذا ندمت غاتكون حتى نتا نفس الشيء .. ( ابتسمت مطولا ) حنا فنفس الكفة اما نسقطو بزوج ولا ننجاو بزوج .. 

بركان من المشاعر انفجر مرة وحدة بعد جفاااء وبرود .. خصوصا فالليل المشاعر كيتدفقو من حيث لا ادري .. هكا لقيت راسي فهاد الساعة المتأخرة .. كنتكلم باغيا نقول له اكثر .. على الاشياء لي ماقادراش نفسي تستحملهم .. 

حرك يديه على ظهري .. نار سائلة دخلات لي بين الجلدة واللحم .. 

بلال:~ ريحتك .. عمق عينيك .. مشاعري اتجاهك هي الغفران بعد الخطيئة.. هي التوبة بعد الذنب .. هي بمثابة الحياة بعد الموت .. 

رجع وجهه امامي .. قريب مني .. كنلمس شغف روحه غير من نظرة عيونه .. لي مازال مافهمتها .. مرة دافئة مثل حبات من القهوة .. مرة باردة فحال الثلج .. !

غمضت عيوني باش مانزيدش نتأثر بعاطفته الجياشة .. 

انا:~ بلال .. 

رد عليا بصوته العميق .. مشبع بثورة جنونه .. 

بلال:~ قاسية القلب .. 

ابتسمت بدفئ .. واخا هاد اللقب اكثر قسوة لكنه كان محبب لقلبي .. كنحسه كيخرج بين انفاسه مثقل بالعاطفة .. 

انا:~شنو سر هاد اللقب ؟

بلال:~(رد راسه شوية اللور) حيت قلبك قاسي فحال الثلج .. 

انا:~ ولكن الثلج دغيا كيذوب ..

سكت بعد ذلك .. كيحدق فكل وجهي بعدم التصديق ..

انا:~ وعميقة العينين ؟ ..

باقي نفس العقدة بين حاجبيه .. جاوبني بهدوء .. 

بلال:~ حيت عيونك فحال شي بحر اسود .. زيتوني .. غارق .. غامض .. (تنفس بعمق) كل ماغصتي فيه .. كتلقى راسك كطيح بلا ماينقذك حد .. روحك كتسحب منك مع نظرة .. مع كل بريق دمع طاح منهم .. كيزيد يغرقك .. 

باعترافي له ارضيت كبريائه وغروره كرجلي الوحيد .. غاننساو كلشي .. نقطة سوداء كانت فدفتر الذكرى وغاتتمحى منه .. 

هو بنفسه كان كيرضي مشاعري اتجاهه .. فحال اذا كان خصني غير نطلب حبه حتى يسلمه لي بدون قيود .. يعطيني بلا ماياخذ فالمقابل .. شحال ماهربت منه فالاخير طحت ف براثين مشاعره رغما عني .. 

انا:~ غاانبقى .. وغانبقى حياتي كله هنا .. 

بلال:~ هادشي أكدتي عليه قبل دقائق .. دابا مايمكنش لك تتراجعي .. حتى لو بغيتي .. نتي اختريتي من الاول .. بلا مانجبرك هاد المرة .. 

قلبي عامر من كل جنب .. عضيت على فمي بشعور مايمكنش نوصفو .. شفت عينيه لي مسلطين مع حركات ثغري بتملك ..

قلب وجهه حتى لعندي واقترب مني .. لكن وقفته بتشنج ..

انا:~ بلال .. 

حرك فكه بامتعضاض .. عيونه بمثابة جمر .. فحم محترق .. رماده كيحرق كياني ذرة ب ذرة .. 

بلال:~ شنوو ؟ سمعت اعتراف لي توقيت ليه مدة طويلة من المرا لي كنبغيها .. ماكيستحقش الامر قُبلة ؟ 

هزيت راسي .. ماعرفتش واش نحركه ايجاباً ولا سلباً.. حطيت يدي على بطني ..

انا:~ كرشي .. 

حط يديه على جزء من بطني واقترب حتى لمسات لحييته السوداء ذقني .. 

بلال:~ كرشك غاتكون مابقاتش كتضرك بعد هادشي كله ..

قبل مانجاوبه .. ردة فعله كانت اسرع من حروفي .. كل ماداره هو احنى ثغره وقَبلني .. 

على شعاع الشمس لي داخل من النافذة ضرباتني الفيقة .. لقيت راسي ناعسة ف مكاني .. حتى شكيت واش كنت كنحلم البارح بداكشي كله .. 

بلعت ريقي بصمت .. كل مابقا راسخ فبالي هو قبلته الاخيرة.. لي خلاتني نتهز من بلاصتي .. وكياني يرتجف .. وبعد ذلك نعست على صوت انفاسه بلا مايوقع والو ..

ولكن دابا كيبان لي عاقد بين حاجبيه .. فحال اذا ماكاين حتى حاجة .. تكلم بصوته الرخيم .. 

بلال:~ صباح الخير .. 

زفرت بعدم تصديق .. كنرتب الاحداث د البارح فعقلي .. انا متأكدة من داكشي كله قلته .. داك الحروف باقي اثرهم خرج من حنجرتي .. باقي اثار قبلته كتخليني نترعد .. باقي الكلام لي همسه جنب اذني .. كيصدح فداخلي بصوته الأجش .. باقي نظرة عيونه كتحاصرني .. وتجلدني بسوادها .. 

شفت فيه ونطقت .. 

انا:~ ااه .. صبااحو .. 

حط يديه على كرشي .. وجاوبني بصوت اجش .. 

بلال:~ باقي كرشك ضاراك ؟

حركت عيوني .. سجينتين ل سواده العميق .. 

انا:~ لا .. هو ماعرفتش .. نتا عطيتيني اللويزة البارح .. ومن بعد .. 

سكت مالقيت مانقول .. مليون فالمئة انا تكلمت وهو ايضا .. وداكشي د البارح ماكانش من محض الصدفة ولا عقلي لي رسمه .. ولكن دابا كيتصنع عدم الفهم .. حط يديه على خدي وهمس .. 

بلال:~ شنو وقع من بعد ؟ 

حركت وجهي باستفهام .. وعقدت بين حاجبي بنفاذ صبر ..

انا:~ انا قلت داكشي كله البارح ولا لا ..

عاود ازدريت ريقي .. وحلقي لي جف .. نفس التعبير مرسوم على وجهه .. بدون تعبير اصلا .. من غير عرق نافر جنب جبهته كيضرب بالجهد .. وبارز .. 

قرب حتى لآذني وتكلم بصوت عميق .. زلزاني من الداخل .. وخلاني كنرجف فحال شي ورقة ف مهب الريح .. 

بلال:~ بغيييت نسمع داكشي كله لي قلتيييه البااارح بغيتك تعااوديه دابا ياعميقة العينين .. دابا ملي ماكاين لا اثر اللويزة ولا اثر الليل لي يخلييك تعتارفي بداكشي كله .. 

ازدادو خفقات قلبي .. وفؤادي كينبض بين ضلوعي بقسوة .. فحال اذا باغي يخرج من بلاصته .. حدقت فوجهه المحبب لنفسي .. همست بصعوبة بين انفاسي .. 

انا:~ اذا عاودتها ماغاتبقاش بحلاوتها .. انا قلت لك كلشي البارح .. 

ابتسم مطولا .. وجسده غطى عليا شعاع الضوء كله .. تحنى بوجهه حتى لعندي .. كيمرر انفه بين خصلات شعري .. 

بلال:~ غاتبقى ديما بحلاوتها .. (تنفس بعنف) بغييت نسمعها منك دائما .. البارح واليوك وغدا .. وكل نهار اخر غايجمعنا بزوج .. 

حسيت بجسدي كيلصق على الفراش .. وكلامه كيدخل مع ذاتي ويدير مكانه فكل خلية من جسمي .. حبا .. شغفا وتوسلا .. غمضت عيني وابتسمت بدون شعور .. 

انا:~ انا بغيت نسمعها منك نتا .. بغيت نسمع نفس الاشعار .. مرة اخرى .. 

حطيت يدي على ظهره .. حسيته هو ايضا كيرجف .. ظهره عرقان .. وجسده كينتفض من كمية هاد المشاعر العنيفة لي بيني وبينه .. 

قرب ثغره حتى لخدي .. قرصاتني لحيته السوداء .. وملمس ثغره على بشرتي حرق أعماقي .. 

بلال:~ حبك ياعميقة العينين 

تطرف ٌ، تصوف ٌ، عبادة...

حبك مثل الموت والولادة 

صعبٌ أن يُعاد مرتين ..

***

يا أنت .. يا سلطانتي ، ومليكتي 

يا كوكبي البحري .. يا عشتاري 

إني أحبك .. دون أي تحفظٍ 

وأعيش فيك ولادتي .. ودماري 

إني اقترفتك .. عامداً متعمداً 

إن كنت عاراً .. يا لروعة عاري

هاد المرة حسيت بكلامه بطعم فشكل .. نابع من قلبه اكثر .. حبه كان تضحية قبل كل شيء .. هو تجاوز كلشي بمجرد انني خطيت انا خطوة اتجاهه .. سلمني مشاعره بدون قيود .. 

الحروف هاد المررة تحررو من جوفي بسهولة .. واحا كنت خجولة .. خايفة من الافصاح على مشاعري كلها دفعة واحدة .. 

انا:~ كنبغييك .. كنكرهك كانت كتعني لي كنبغيك .. (تنفست ووجهي وسط تجويف عنقه) نتا لي كنت كنستنااه حياتي كلها .. 

اختنق صوتي .. من هاد المشاعر كلها .. سبقاتني دمعة سعادة .. فرجات على الاشياء لي كيختلج بها صدري بأكمله .. 

يديه تحطو جنب مقلتاي .. كيمسح داك الدموع برقة بكفيه الخشنتين .. قبل مايقرب شفتيه .. ويتشربهم لعنده .. عبير انفاسه امتزج مع حواسي .. 

بلال:~ ممنوع الدموع من دابا .. (هز راسه) بغييت نبداو كلشي من الاول .. فحال اذا عاد تعارفنا لأول مرة .. 

شفت فيه بابتسامة دافئة .. ومشاعر هائلة مكتظة فوق صدري .. 

انا:~غاننساو كلشي .. 

قلتها بنبرة استجداء .. فحال شي غريق كيتعلق بقشة .. هز راسه بلا مايبين حتى تعبير على وجهه .. وعاود جملتي .. بزفير حار .. 

بلال:~ غاننساو كلشي .. وغانبداو من الاول .. (ابتسم فوجهي .. ورد جبينه على جبيني )غانعيشو حياتنا كلها مع بعض ان شاء الله .. اي خلاف بيناتنا توضح دابا ..

لف ذراعيه .. حول ظهري .. ورجع قلب وجهي لعنده .. 

بلال:~ من بعد هادشي كله .. مبقاش الماضي كله كيهمني.. غانطويوي الصفحة بأكمالها .. 

دفن وجهه فتجويف عنقي .. انفاسه على عظام الترقوة .. تشنجو ضلوعي .. وعاصفة مشاعيرية ضرباتني فحال شي سكاكين حادة .. وجعها زوين .. المها حار ومر فحال القهوة لكن لذيذ ..

همست بين انفاسي بصعوبة .. 

انا:~ بلال .. لا .. ماشي دابا .. 

هز فيا عينيه فحال الجمر .. فحال كل مرة كنت كنوقفه .. لكن هاد المرة كنت عارفة فرق كبير .. حيت عارف الحقيقة .. وباغيني كيفما انا .. بلا كماليات .. ماشي مجرد جسد .. العاطفة غالبة على كل انش من مقلتيه .. الشيء لي خلاني نبلع ريقي بصمت .. 

بلال:~ بغييتك كلك .. ماشي غير الاعترااااف .. مابغيتش الكلام بوحده .. بغيت روحك جزء بجزء .. بغيت كل ذرة من نفسك .. بغيت نملك انفاسك .. دقات قلبك .. بغيت نوضع يدي على شغف قلبك .. نمتص روحك لعندي .. 

درت يدي لي كيترعدو على وجهه كنجاهد الكلمات يخرجو من جوفي .. حتى انا كنت فنفس الموضوع .. وجوده كيزلزلني من الداخل .. وكلماته خلاص .. كأنها دلو بارد .. كينزل على روحي فليلة صيفية حارة .. 

انا:~ يوم واحد فقط .. عطيني غير نصف النهار ..(زدت ضغطت بيدي على لحيته) حتى نكون لك كاملة .. 

بلال:~ غاتقتليني شي نهااار .. 

حرك راسه بإيجاب .. توقفات مشاعره الهادرة .. والطوفان لي كيجتاح جسدي بقسوة زاد على حده..

اغمض عينيه بقوة .. ورجع فتحهم بصعوبة .. 

بلال:~ كتعذبيني هكااا .. قريبة ونتي بعييدة .. 

حرك يديه بدوائر وهمية على كتفي .. وبعد ذلك شفتيه .. سقطو على كتفي .. 

بلال:~ المرة الجاية ماعندك فين تهربي مني .. غاتخلصي كلشي .. صبررررت بزااف .. وليلة البارح كانت مناسبة (ضغط بيده على كرشي ) بغييتك حتى تبراي .. باش مايبقى عندك حتى عذر .. 

حسيته كيجاهد نفسه .. تهز من الفراش بصعوبة .. بينما بقيت مدة طويلة كنلتقاط انفاسي .. لي تلاشات تقريبا بحضور كيانه .. للمرة الثالثة يمكن مشاعرنا كيتوقفو فالوسط .. 

شفته دخل للحمام وصفق الباب ورائه .. حتى تفزعت من مكاني .. اغلب اوقاته حنين وهادئ .. وبعد المرات كيسكنوه الأعصاب على غفلة .. 

داز باقي اليوم عادي تقريبا .. وصل جميلة ورا الفطور عند خالته حيت بغات تمشي تبات عندهم .. وتعمد يتعطل باش يدخل بالليل .. بينما يقيت انا بوحدي فالمنزل .. كانت فرصتي الاخرى .. حتى نعاود نلتحف بلجاف الشجاعة .. نبين له مرة اخرى صدق مشاعري .. نرضي كبريائه وغروره .. 

وقع اختياري على فستان ابيض .. تحت الركبة بحمالات رفعيتين .. نصف ظهره عاري .. كان عندي من زمان .. مخبئ .. شعري الاسود اسدلته ورائي بطوله وكثافته .. وجهي خليته بلا زينة .. واخا كان شاحب تقريبا .. واصفر بشدة .. لكن جاهدت على نفسي .. هو يستاهل انني نكون له كاملة .. بالروح والجسد .. بذاتي وكياني ..

بغيت نكون له عروس جديدة حتى تبقى هاد الليلة من الذكريات الخالدة .. واخا كنت مسبقا خايفة من ردة فعله مرة اخرى .. ومن اثر داك الليلة على عقلي .. بعدما تخربات ليلة زفافنا .. كان من واجبي التعويض على داك الضرر لكلاينا.. كنت بهذا كنتصالح مع نفسي قبله هو .. كنعوض نفسي على كل وجع تسببت به لراسي .. 

طليت فالمرآة للمرة العشر يمكن .. حتى كنت غانتراجع تقريبا .. سمعت المفاتيح دارو فالباب .. وقلبي توقف مكانه .. حتى الكون ولا ساكن .. ذرات الهوا توقفو من حولي.. غير الوقت لي تسارع .. حدقت غير فطيفه .. ملي دخل مع الباب ونطق باسمي .. 

بلال:~ جوري .. 

ماقدرتش نرفع راسي عنده بجرأة كبيرة .. واخا داكشي كله لي واعدت به نفسي تلاشى فلحظة واحدة .. غير ملي سمعت اسمى انبثق بين شفتيه بصوته الاجش .. ماقدرتش مازال نتحرك .. 

انا:~ انا .. انا .. 

بلال:~ نتي شنوو ؟

قالها بنبرة صلبة .. رجليه قادوه لعندي .. ماكنتش غافلة على لمعة الاعجاب لي كانت فعيونه .. وسياط العاطفة لي فنظراته كتجلدني بعنف .. كتجلد كل ذرة من جسدي .. كل انش مشطو بعيونه كنحسه ملتهب .. كيحرقني بكل برود .. وقف امامي فحال اذا مامصدقش .. شد جهة قلبه .. 

بلال:~ نتي بااغيا تحمقيني .. 

عضيت على فمي بارتجاف .. حتى حسيت بيده توضعو بين شفتاي مرة اخرى .. 

بلال:~ ماتلعبيش بالنااار .. غايحرقك لهيبها .. يا عرووستي الصغيرة .. 

هزيت عيني فيه .. فوسامته الخشنة .. ضخامة جسده .. وبعدد دقات قلبه .. نبض فؤادي .. وهمست بتلعثم ..

انا:~ نتا قلتي بغيتي ننساو كلشي ..

اقترب مني حتى وضع يديه البافئتين على بشرتي الباردة ..رد شعري اللور غير بأصابعه .. وعيونه حاصرو عيوني .. لا مفر .. ولا مهرب .. روحي حسيتها كتخرج من جسدي وتستقر بين ضلوعه .. كيمتصها غير بعيونه .. 

بلال:~ كيف غاننساك وانا كنضخك مع الدم .. كيف غاننساك وجسدي مسموم بك .. نتي فحال الإدماان .. مستحيل نبراا منك واخا نحاااول .. وندير جهدي كله .. غاتبقاي كتمشي ليا فالدم .. ساكنة مع العروووق .. 

ماجيت نجاوبه حتى اقترب بشفتيه حتى ملك انفاسي فدقة وحدة .. بتهور .. بتملك .. بشغف .. وبصبر طاال ليالي طويلة .. يديه كيغوصو فأغلال شعري .. همس بين انفاسه .. 

بلال:~ جوووري .. 

عاود ثغره امتلكني .. مابقيتش كنفكر .. حسيت براسي فوق اجنحة الفرشات .. رجلي كيرفرفو فالسماء .. ويديه على ظهري .. كيحركهم بتناغم مع دقات قلبي .. كأنه كيعزف على اوتار بشرتي بموسيقى انفاسه .. حطيت يدي على صدره بعدما فصل القبلة وهمست بشجاعة .. 

انا:~ كنبغييك .. 

بلال:~ كان قربني لأقرب حيط .. حتى مبقيتش قادرة نتنفس .. بجسده لي احتلني بأكملي .. عطره الرجولي كيتخلط مع انفاسي العنيفة .. ذرات صبره لي تسالات .. ابتسم بصعوبة فخضم هاد الضياع من المشاعر .. 

بلال:~ واناا كنبغييك فوق الحب اضعااف يا طفلتي ..

رجعت غمضت عيوني ... مخلياه يغيبني مرة اخرى بعاطفته المجننونة .. ودقات قلبه لي ماكاتساليش .. بعدد نجوم السماء كنت حاسة بالسعادة .. بعدد دقات قلبي كنت حاسة بوجوده .. بطغيانه .. بتملكه .. عشقه لي كان اكبر من حبي له بسنوات ضوئية .. 

وروحي كتنصاهر مع روحه .. كياني كيمتزج مع كيانه .. وعاطفته الجياشة لي خلاتنا نكملو ليلتنا بشغف ماعندهش حدووود .. 

عطره دغدغ حواسي .. وسيطر على جيوبي الانفية .. بقا منتاشر مدة طويلة فالغرفة .. حتى ملي فتحت عيني رائحة انفاسه تخلطات مع عظامي .. ودارت بلاصتها بين عروقي .. 

كان الفراش الخالي جنبي .. كاين غير مكانه .. 

فحال اذا كان خصني نفكر غير فيه .. حتى يبان من جديد .. ويتوقفو انفاسي لحظات طويلة.. 

شفته طل عليا من الحمام.. بجذعه العاري .. بسروال بيتي فقط .. خصلات شعره الفحمية كيقطر منهم الما .. عيونه مرسوم فيهم الرضى ..كأمه ذئب اكل وجبة كاملة .. 

ضحك بمكر وتكلم .. 

بلال:~ الكاسولة فقتي .. 

رجعت تغطيت بداك ليزار .. جسدي كله وزيرت عليه .. كنت خجلانة .. لكن ماكنتش كنحس بنوع من النفور او الندم .. الدم تدفق فعروقي ووصل حتى لوجهي واستقر على شكل كومة حمرا يمكن .. 

انا:~ صباح الخير .. 

شفته كيزييد يقترب مني بهدوء .. فحال شي صقر كيصطاد طريدته .. ريحة انفاسه وصلات حتى لعنقي.. مخلطة مع عطر الحلاقة وعطر الاستحمام..و مزيجه الرجولي الخاص به .. 

جلس بجنبي .. عض على شفتيه بمكر وهمس بأنفاسه قبل صوته .. 

بلال:~ صبااح النوور .. على اسطورة الياسمين لي اخذت عقلي .. وسرقات قلبي .. 

كان خصني غير نشوف وجهه ويتدففقو احداث البارح على عقلي فحال المطر .. معبقين بريحة شغفه .. مذاق جنونه .. كيفاش حتى خلاني ننسى كلشي .. فحال اذا عمرني غلطت مع مراد .. مافكرنيش فهادشي ... عاملني فحال عروسته الجديدة .. غير هو جنونه بي كان مختلف .. مرة قاسي مرة حنين .. كيوصل لأعماق قلبي .. كيزلزل ذاتي .. كيقدم لي مشاعره بدون حدود .. فكل لحظة كان كيعلن تمسكه بي .. حضوره فذاتي .. طغيانه على روحي .. 

زاد بصوت اجش غالبة عليه العاطفة .. 

بلال:~ توحشتك يا قاسية القلب .. 

البرودة تسلسلات مع عمودي الفقري .. ماعرفت مانقول له.. كيغدقني مجددا بمشاعره.. بحبه لي كان فوق الخيال ..

مرر انفه فطيات عنقي .. حتى وصل لتجويفه استقرو انفاسه وشفتيه .. عاود طلع بغزوه لجانب وجهي بدفئ ورقة .. 

بلال:~ كانت احسن ليلة فحياتي كلها .. (دار يديه على ذراعي كيمررها بشوية حتى وصل لوجهي وحيد الشعر لي متناثر فوق جبهتي بإبهامه) خليتيني نحس انك جزء مني اكثر .. طفلتي .. جزء داخل فذاتي .. كيكمل روحي قطعة بقطعة .. 

قبل جزء من ثغري .. حتى سقط فمه مجددا على فكي .. وقطرات الما باردين من شعره كيطيحو على وجهي .. 

بلال:~صباحية مباركة .. ياعروستي الصغيرة .. 

صدري تضخم من هاد الكم الهائل من المشاعر.. كيعاملني فحال اذا اول مرة .. ماعرفتهش واش بهاد السهولة كان تجاوز كلشي .. ولا كيحاول يتجاوز باش مايجرحنيش اكثر ..

لكن هادشي شكّل لي الكثير .. 

ذابو مشاعري مجددا .. شديت فوجهه بكلتا يدي .. كنستنجد داك العواصف المشاعرية لي فعيونه تتوقف .. باش ماتجرفنيش معها اكثر .. مانغرقش ف غمامة المشاعر لي فعيونه ... مايصعقنيش ببرق روحه .. همست جانب بشرته السمراء ..

انا:~ شكرااا حيت نتا فحياتي .. (غمضت عيني وعاودت فتحتهم) غانعتذر حيت ماكنتش حاسة بقدر مشاعرك فقلبي .. ماكنتش عارفة وراء طبعك الناري شهامتك .. وراء تصرفات كلها اسباب .. وراء جمودط وطغيانك.. قلب متحمل مشاعر.. قد المحيط فعمقها .. قد الجبال فطولها .. قد الصحاري فعرضها .. شكراا حيت نتا فحياتي .. حيت الراجل لي اختارني نكمل معه حياته .. 

اختلج صدري مشاعر عديدة.. فحال شي قطع ثلج باردين نزلو على اطراف قلبي ..

ماقدرتش نميز بين هاد الاحاسيس كلها .. كانت كتدفق بكثرة .. جوفي باغي يفرج عليها .. مرة وحدة .. ولكن العاطفة كتغلب .. ولي جا لبالي قلته .. تحليت برداء الشجاعة .. واحرقت ضعفي فمجلدات النسيان .. 

واخا عيونه كانو مثقلين بالعاطفة .. ورغبة فجة مرسومة بين سوداواتيني الناريتين .. بمثابة جمرة .. كتحرقك غير تشوف فيها .. تغلب على الكلمات لي فصدره وخرجهم .. 

بلال:~ الله يقدرني نعوضك على كلشي .. على عشرين سنة لي عشتيها بوحدك .. على الأيام لي بكيتي فيهم بلا مايكون معك حد .. ولا يسمعك حد .. ولا حتى يفهمك شي حد .. نعوضك على كل ذكرى كانت خايبة فحياتك .. غاتبقى مجرد قناع فالماضي .. غاتكوني توأم روحي قبل مراتي .. كياني قبل عشقي .. الجزء المنفصل من ذاتي وتكمل فيك نتي بوحدك.. يا رائحة الياسمين ..

فتحت فمي بارتجاف .. وهواء انفاسه دخل مع صدري واستقر بين ضلوعي .. 

انا:~ انا .. 

بلال:~ ششت ..

اقترب مني وقال فقط حرفين .. وبعد ذلك رجع يمتلكني بطوفان مشاعره لي ماخمدش ليلة البارح .. وحتى انا كنت مقيدة بسلاسل مشاعره .. ماعنديش القدرة لي نقاوم بها .. 

اليوم بطوله وهو كيغازلني بكلامه .. بمشاعره .. شيء فوق الخيال .. عمري ظنيت غانعيش قصة متكاملة .. رجل شهم .. كيحمل فقلبه بحور العشق .. خصني غير نطلب باش يسلم لي مشاعره .. كنت غانندم حياتي كلها لو ضعيت هاد الفرصة من يدي .. 

ظلام الحال جلست فالصالون .. راسي على صدر بلال .. كنسمعو لواحد الموسيقى رومانسية اختريتها .. منبعثة من هاتفه .. متناغمة مع دقات قلبه وقلبي .. وابتسامة عميقة مرسومة على ثغري .. حتى سمعته زفر طويلا .. وزاد زيرني لعنده .. تكلمت انا اللولة قبل مايبدا .. 

انا:~واش جميلة ماغاديش تجي ؟

حرك انفه فشعري .. ويديه كيلعبو فكتفي بهدوء .. 

بلال:~ لا قالت حتى يبدا رمضان ان شاء الله .. 

حسيت بالإحراج .. يمكن ماكنهدروش بزاف ولكن كانت جميلة نعمة اللوسة .. هدرتها مرزنة .. وكتحتارم اي واحد .. حتى أنها طبعها فحال بلال .. كتشبه له فكل شيء .. 

انا:~ يمكن ماعجبهاش الحال هنا .. 

حرك راسه سلباً .. حسيت غير بحركته فوق رأسي .. 

بلال:~ بالعكس .. ديما كيعجبها تمشي عند خالتي وصافي .. حيت وحدة من بناتها كتقرا معها .. 

حركت فكي بامتعضاض .. والابتسامة كتلاشى من على وجهي .. 

انا:~ااهااه وعارف بنت خالتك فاش كتقرااا .. 

حسيت بيده تحطات على ظهري حتى رفعني لحضنه .. وجلست فحجره .. قبل جبيني بطول .. وثغره مازال على بشرة وجهي .. ثواني طويلة حبس انفاسي بأنفاسه .. حتى حسيت بفمي متورم اثر جنونه لي ماكاينتاهيش .. 

وعاود رسم ابتسامة مكر ترسمات على شفتيه الخشنتين .. 

بلال:~ نتي خليتي ليا شي عقل بعداا .. حتى نفكر ولا نشوف فشي وحدة اخرى من غيرك .. 

حطيت يدي على ذقنه .. كنتحسس لحيته بيدي .. وكفي كتغوص مع تفاصيل وجهه الوسيمة .. كان وسيم بشكل مؤلم لقلبي .. فحال اذا داكشي لي خبيته دقة وحدة فصدري انفجر مرة وحدة .. حطم قفصي الصدري فحال شي بركان ولا انفجار عظيم انبثق من أعماقي .. 

انا:~ ومابغييت تشوف حتى فشي وحدة اخرى ..

همست بين انفاسي .. واخا ماقادراش نهضر .. حاولت نخرج الصوت من جوفي متشنج .. متشبع بالعاطفة المجنونة .. 

انا:~ غير انا بووحدي .. 

حرك فمه بنبرة مليئة بالتملك .. 

بلال:~ بوووحدك .. يا عميقة العينين .. غير انتي ..وحتى وحدة من غيررك .. ماتسكن بين انفاسي .. قلب واحد لي عندي وسرقتيه من زمان .. مايمكن لحتى وحدة اخرى تعوضك .. 

حط ابهامه على ذقني .. حتى آنيت بصمت .. 

انا:~ حتى نتا سرقتي قلبي .. 

هز راسه فيا .. مرة كيعنقني لعنده بقوة ..حتى كتدغدغني لحيته ويحاصروني انفاسه .. مرة يرخف عليا ويرجع يشوف فوجهي ..

بلال:~ بغييت نسرقك كلك دابا .. ماكرهتش نديرك بين ضلوعي .. 

حط كفه على كرشي .. حسيت ببشرة يديه حرقاتني فوق قماش القميص الحريري لي لابساه .. 

بلال:~ بغيييت ولادي منك .. بغييتهم يكبرو حدانا .. تعطيهم داك الحنان كله لي عندك .. ومخبياه فأعماق قلبك .. ماكتبينيه حتى لأخير اللحظات .. 

اقتربت منه حتى حطيت راسي فتجويف كتفه .. وقلبي كيضرب بشدة .. كنكتشف طعم الفكرة .. ولذتها .. فكرة الأمومة لي دغدغات مشاعري الانثوية بوحشية .. واخا عمري فكرت فالولاد الصغار .. من ديما بالنسبة لي مجرد كائنات مزعجين .. ولكن دابا بغيتهم بكل جواريحي .. 

انا:~ ماشي باقي صغاار .. 

بلال:~ الوقت منااسب .. تلاتين سنة عندي .. ونتي اكثر من عشرين عام .. ماحد باقي عندك الجهد .. بغيت ثمارات من هاد الزواج .. 

انا:~ غاتبغييهم بززاااف .. 

عارفة راسي كنت كنطرح أسئلة بليدة وغبية.. ولكن كنت محتاجة انه يزيد يأكد لي عمق مشاعره .. أحاسيسه لي ماكتنضبش ابدااا .. فحال شي بئر كل ماكتاخذ منه الما كيزيد يعطيك اكثر ..

جاوبني بصوت اجش .. 

بلال:~ غانبغيهم المرة الاولى حيت ولادي .. وغانبغيهم المرة الثانية حيت اولادك .. وغانبغيهم المرة الثالثة حيت اولاد بنتي لي هي نتي .. 

زدت عنقته.. كنتلذذ بالفكرة اكثر .. خصوصا بجملته الاخيرة .. بكلامه لي كل مرة كنكتشفه فيه اكثر .. حرارة انفاسه كتمتزج مع ذرات الهواء حولي .. 

انا:~ ولكن بغيت نرجع نقرا .. 

قلت يمكن غايمانع .. غايعيطيني شي عذر حتى مانعاودوش نتفكرو شنو كاين .. حيت دائما داك المكان غايبقى جامع اسوء الذكريات لعقلي .. 

بلال:~ غاندفع لك الشهادة الطبية باش تدوزي الراطرباج .. 

فحال اذا فهم صمتي .. حط سبابته بين حاجباي كيفكهم .. ونبرته الخافتة تسربات مع دمي .. وزادت سكنات مع ضلوعي .. 

بلال:~ ماغانمنعكش على أحلامك وتحققي ذاتك .. هاديك قرايتك ومستقبلك .. غاتبقاي تقراي شحال مابغيتي .. حتى تشوفي راسك نتي لفين باغية توقفي .. 

رعشة خفيفة زحفات على ظهري .. بقدر الأيام السوداء لي عشتهم .. وجوده كان فحال النور لي زلزلني من مكاني وخرجني عنوة من داك الظلام الدامس .. 

حط يديه على وجهي .. حتى زاد قربني منه اكثر .. وهمس قريب لوجهي .. 

بلال:~ كذبت عليك .. 

الكلمة وصلات بطيئا لمسمعي .. التوتر جرا مع شراييني .. فحال شي حاجة نغصات عليا داك الفرحة كلها لي عشتها ف اللحظات لي فاتو .. مابغيتش نسبق الأحكام حتى نسمع منه كلامه .. 

سألته بتوتر .. 

انا:~ فاش كذبتي عليا ؟

بلا مايرمش شاف فيا بقوة .. وعيونه كيلتاهمو تفاصيل وجهي .. 

بلال:~ ماكنتيش محتاجة المصحة النفسية .. 

بغيت نهضر لكن دار يديه على فمي .. كيمنع اي حاجة تخرج من فمي .. كلمة ولا حرف .. 

بلال:~ كنت باغيييك بأي ثمن .. كنت مستعد ندفع حياتي كلها حتى تقبلي تتزوجي بيا .. وداك النهار فاش شربتي الدوا زايد .. مالقيت غير هاد الكذبة لي ممكن تخليك تقبلي الزواج .. بغيت نحاصرك .. باش تشوفي راسك ماعندك حتى حل .. (زاد تنفس بعمق) كان خصك غير بعض الاهتمام ..بسبب الإكتئاب ولكن ماشي لدرجة المصحة النفسية .. تفتحي قلبك اكثرر باش ماتدخليش فاكتئاب حاد .. لي يقدر يخليك تفكري بصح تنهي حياتك ..(حط كفه بين ثغري .. ملي تنفست بالجهد ) وهادشي لي كنشوووفه دابا .. وكنسمعه منك كل دقيقة .. كيعني انك تجاوزتي كلشي مزياان .. 

حدقت فيه بذعر .. وارتجاف بطيئ داز على خلايا دماغي .. زاد دار يديه على وجهي .. كيرد شعري غير بسبابته .. باش مايبقاش مغطي وجهي .. 

بلال:~ لو تعاود الأمر كنت غانعاود نكذب علييك ونبتزك .. باش تقدري تخرجي راسك من داك القوقعة لي كنتي عايشة فيها .. 

هزيت راسي بإيجاب .. وصوتي اختنق فجوفي ...

انا:~ وعررفتي شحااال خفت .. حيت غاندخل لشي مصحة ونتسمى حمقة وبالوراق ..

ابتسم لهدرتي .. وزاد تكلم بهمس .. 

بلال:~ كنتي غاتكوني الحمقة ديالي.. واخا يوقع لي وقع .. عارف غلطت ملي خوووفتك .. ولكن نتي ماقبلتيش اصلا .. كنتي كارهة هاد الزواج لواحد الدرجة غير مبررة .. 

حطيت يدي على كتفه .. واليد الاخرى على ظهره .. مابغيتش مازال المشاكل .. لي فات مشا .. غاندابزو وفالاخير غانصلحو الامور .. 

انا:~ حييت كنتي كتبان ليا فحال شي غول .. ماعندوش المشاعر .. غير كتعصب .. ولا اغلبية الأوقات بارد .. بلا أعصاب .. بعد المرات كنت كنقول واش الثلج لي كيمشي لك فالعروق بلاصة الدم .. كنتي بالنسبة لي كثلة الثلج المتحركة .. 

زاد ضحك .. حتى سمعت خشونة ضحكته .. وحفيفها بين اذني.. وزاد عقد بين حاجبيه .. 

بلال:~ ماباغياش تمشي عند واليديك .. 

هزيت راسي بنفي لا إرادي .. 

انا:~ مابغيتش دابا .. حتى بابا ماكيهدرش معايا .. فحال اذا انا ماكيناش .. كنظن دابا تهنى من وجودي .. 

زفر بضيق .. ولهيب انفاسه الحارة وصلني .. ويديه زادو زيرو على وجنتي بدفئ .. 

بلال:~ حنا ماكنختاروش واليدينا ولكن نقدرو نغيروهوم .. ولا لا ؟

انا:~ ولكن الطابع كيغلب التطبع.. من شبّ على شيئ شاب عليه .. وهما عمرهم حسو بيا .. 

يالاه بغا يتكلم .. قاطعته اكثر بكلامي .. 

انا:~ مشاكلهم كانت اكبر من انهم يفهموني شي نهار .. اذا كانو مانجحوش فالحياة الزوجية ديالهم .. كان أسهل حل غايكون الفراق .. حيت باينة عمرهم بغاو بعضياتهم .. عائلة مثالية كنبانو من برا .. ولكن كل واحد فينا كان مريض من داخله .. ماما مريضة بضعفها .. بابا لي مريض بسلطته وجبروته .. انا لي مريضة بكلشي .. 

حسيت بيديه كيتحركو على وجهي .. وتعبير الآلم مرسوم على تقاسيمه الوسيمة الخشنة .. كيشاركني وجعي .. فحال اذا بكلمة خرجات من ثغري وسقطات على مسمعه .. سيف حاد مسنن .. شنو ماقلت كيبقى جرح غائر فقلبي .. 

تنفست طويلا كنستجمع شنو بقا ف قلبي باقي ماخرجتوش .. لقيت بزاااف .. لدرجة انه خصني نألف كتاب على الاشياء لي حسيت بهم طوال عمري وخبيتهم بين أنفاس صدري .. 

انا:~ ماشي ولد وبعد .. الماكلة والما والهوا .. عمرهم ماكانو هما الأساسيات فحياتي .. ماكتشوفش انني كبرت بلا شخصية.. أي حاجة جات كتأثر عليا .. بلا حنان بلا اهتمام .. فحال اذا انا مجرد مجسم ولا دمية .. خصني دائما نكون ساكتة وبلا شخصية .. غير كننفذ .. حتى حاجة ماختاريتها فحياتي بإرادتي .. ولكن كل مرة كانو كيفرضو عليا شي حاجة .. ماكنلقاش فين نخرج غضبي .. كنضرب راسي باش نشوف داك الدم ونرتاح .. نتا بنفسك غاتكون شمأزيتي من لحمي .. (غمضت عييني وتنفست بعمق عاد كملت) حتى نهار شربت الدوا بالغلط بابا بغا يضربني فوسط السبيطار .. واش فنظرك يقدرو يتغير من بعد ؟؟ فاتت تقريبا واحد عشرين سنة .. كن تغيرو .. كان غايكون الأمر شحال هادي .. نهار مرضت اول مرة .. نهار دخلت للسبيطار .. نهار درت الكسيدة .. نهار كنت كنبكي ليالي طوال .. حيت ندمت.. وحتى حد ماسولني .. ماشي حتى ل دابا .. نهار بغيت نحيد الحجاب اول مرة وتحبست الصيف كله .. ماشي فنظرك كان خصهم يعيطيوني السبب علاش مانحيدوش .. ماشي غير حيت وصلت لواحد السن نديره .. زواجي بك .. كان امر اخر خصني نفذه .. هو الامر لي كنت كنشوفه غايخرب حياتي .. كنظن المرة الوحيدة لي كتن قررارهم صح وقراري الغلط ..

رعشة خفيفة زحفات على عمودي الفقري .. فحال شي سكين مسنن .. وقفات غصة عريضة فحلقي .. لكن كنت مصرة انني نقول له كلشي .. 

انا:~ واش نتا كنتي غاتعامل ولادك هكا كيفما كانو ؟ كيفما حنا واجب علينا طاعة واليدينا ونتعاملو معهم بالإحسان .. حتى الأولاد كيحاسبو الأباء على التربية .. 

حرك راسه بنفي .. فحال اذا صدموه هاد الحقائق كله .. لي ماكانت سوى نقطة فبحر .. جاوبني بصوت متشنج .. ودار راسي على كتفه .. 

بلال:~ قلت لك ماكنختاروش واليدينا .. ولكن هادشي ماغايحس به غير لي عاشه فحالك .. وولادي غايكون فعيني .. كيفما عاملتهم فصغرهم غايعاملوني فكبري .. اذا أحسنت لهم .. عمرهم غاينساو هادشي .. 

غمضت عيني .. وانا باقي فحضنه .. قلبي كيضرب مئات المرات .. بقربه .. رائحة عطره مخلطة مع سائل الاستحمام مع انفاسه .. كانت كتغلغل بين مسامي لداخل .. 

انا:~ انا عمري نتخلى عليهم .. ولا نقول لهم الكلام لي ماشي هو هاداك .. عمري غانهرهم .. كانو وغايبقاو ديما واليديا .. عمري ماننكر فضلهم عليا .. ولكن انا محتاجة وقت طوووويل .. حتى نعاود نرمم راسي من جديد .. ونصلح داكشي كله لي تهرس ..

حطيت يدي على وجهه .. ومسحت على جبينه بشوية فحال لي كايدير هو .. عاد نطقت .. 

انا:~ ولي متأكدة منه نتا غاتكون أب رائع .. كيفما نتا زوج رائع .. 

شفتيه استقرو على كفي .. كيحركهم .. مرة انفاسه كيوصلوني .. مرة قبلاته على بشرة يدي لي كانت كدغدغني .. حتى تكلم بصوت اجش .. 

بلال:~ ونتي غاتكوني أحسن أم يا عميقة العينين .. حيت ولادنا غاتعطيهم شنو عندك من عاطفة .. ماغاتخليهمش يحسو بشنو حسيتي به نتي .. 

تلذذت برائحة انفاسه لي ولات عند عند عنقي .. دغدغات مشاعري بوحشية .. فحال اذا تفكر شي حاجة عاد تكلم .. 

بلال:~ عمري ماغانشمأز منك .. ولا من جسدك كيفما كان .. واخا شرطتيه بيديك .. كتهميني نتي .. ماشي هاد الشكليات الخاويين .. كتباني لي أحسن وأجمل وأرقى امرأة عرفتها .. اول طفلة بغيتها .. واخر امرأة .. ماتضاهيك حتى وحدة .. الجمال كيددذوب مع الوقت .. انا بغيت قلبك وروحك .. 

ابتسامة رضى ظهرات على شفتاي .. كل مرة كيخليني مأسورة ومبهورة بكلامه .. بحكمه بكلشي فيه .. فلحظة طيش كنت غانضيع هادشي كله .. وغانرجع مرة اخرى سجينة للماضي .. غاتكرر مأساتي من جديد.. زاد عنقني بضخامة جسده .. 

همست بين انفاسي .. 

انا:~ نتا براسك قلتي كتشمئز مني ؟ 

طلع نفس عميق من صدره .. وملامحه اصبحو لوحة من المشاعر .. رواق عينيه كيلتهمني ببطئ .. كيدوز فوق وجهي بأكمله .. ومقلتيه كيستقرو عند عيوني .. مدة طويلة عاد جاوبني .. 

بلال:~ ااه يا جوري يا قاسية القلب .. عرفتي فاش الواحد كيوصل لواحد درجة د الغضب.. خصوصا من شي شخص كايكون عنده هو كلشي فحياته .. كيتصرف بطيش اكثر ..( تنفس بعمق وملامحه بداو كيتيغيرو ) بصح الغضب كيخليك تكون اعمى على الأمور .. ماكيعرف الانسان مايقول ولا شنو يدير .. ممكن يجرحك بزاف .. بالتصرفات بالكلام .. شوفي غير الما لي كيغلي واش تقدري تشوف فيه وجهك .. هكاك فوقت الغضب .. مايمكنش تميز تصرفاتك الصحيحة على الخاطئة ..

حللت كلامه طويلا .. لقيت تصرفاته معذورين.. كان كأي رجل مجروح .. حلم طفولته تهشم فليلة واحدة .. فحال شي فنجان عزيز عليك طاح وتناثرو أشلائه فمرة ..

قبل مانتكلم ولا نجاوبه .. باس قمة رأسي بطول .. ودار يديه على وجهي ..

بلال:~ غانخرج للمسجد نصلي ونرجع عندك .. 

حركت راسي بإيجاب .. وابتسمت فوجهه .. 

انا:~ واخا .. غانستناك .. 

كان تمشى ورجع دار وشاف فيا بطول .. حرك فكه .. ومسح على وجهه .. 

بلال:~ نتي ماكتصليش ؟

هزيت وجهي بنفي .. وملامحي تغيرو .. خجلت من نفسي.. حسيت بالدم تدفق فعروقي واستقر على وجنتاي .. عمري مافكرت فالصلاة انها شي حاجة ضرورية .. 

شفته زاد عقد بين حاجبيه .. وتكلم .. 

بلال:~ غانهضرو فهادشي ملي نرجع .. 

من بعد وجبة السحور .. جلست فغرفتنا .. ها هي الأيام كتجري بسرعة .. وانا كنحلق وراء السعادة .. كنحس براسي شاداها فيدي .. وقبضتي محكمة عليها باش ماطيرش مني ابدا .. فحال شي طير طاف على المدينة بأكمالها مدة طويلة .. وفالاخير لقى مرساه فعشه فقط .. 

الليالي لي فاتو كلهم كانو زونين .. ليالي طوال .. كنسهرو فيهم بعد المرات حتى للصباح .. كنعاود له أي حا٠ة جات فبالي.. كنخرجو .. كيغدقني بدفئه .. بنصائحه .. 

كان مهتم بي بدرجة كبيرة .. حتى داك التفاصيل الصغيرة لي دوزتها فدارنا كان باغي يعرفها .. 

وشفته داخل .. بالفوقية دياله .. احتوت ضخامة جسده بأكمله .. ملامحه ناعسين .. الما كيقطر من لحيته .. شاف فيا وخاطبني .. 

بلال:~ ماغاتصليش ؟ 

هزيت فيه راسي وحركته باضطراب .. 

انا:~لا غانصلي .. 

حركت كتفي بتوتر .. بينما اقترب مني هو وحدق فيا بسوداوتيه .. فحال اذا كيقرا شنو فداوخلي .. 

بلال:~ باقي ماقادراش تحافظي عليها .. (عقد بين حاجبيه) شنو شرحت لك طول الخمس ايام لي فاتو .. 

انا:~(جاوبته باعتراض) لاااا .. ضروري نصلي باش يكون صومي مقبول .. 

حرك راسه بالإيجاب .. وجلس جانبي ف الفراش .. وحط يديه على يدي عاد تكلم مجددا .. 

بلال:~ انا مابغيتكش تصلي غير ف رمضان .. ولا غير فالجمعة .. ولا من مناسبة ل مناسبة .. هادشي كيتسمى نفاق مع الله .. (عقد بين حاجبيه) باش تتسماي كتصلي .. الصلاة ضرورية خصك تحافضي عليها ديما .. ماشي باش يشوفوك الناس كتصلي .. ويقولو فلانة محافظة على فروضها .. حتى اذا ماكانوش الناس كيشوفك فالخفاء .. الله كيشوفك .. (سكت شحال وطلق نفس طويل من صدره) تارك الدين ولا تارك الصلاة .. الصلاة يا عميقة العنين كتنهي على الفحشاء والمنكر .. هي راحة للنفس ماشي مشقة كيف كيشوفوها الاغلبية .. 

زميت شفتاي بدون جواب .. لحد الآن نفسي مازال كتآمرني بالعجز .. كلامه كان فحال شيء بارد .. كيثلج صدري مرة بعد مرة .. كيدخل بين انفاسي وينبش شنو عندي فالداخل .. 

دار يديه الدافئة على وجهي .. 

بلال:~ غير تخيلي أن الله كيعيط ليك خمس مرات فاليوم باش تقربي منو .. يغني خمس د الفرص كل مرة .. ونتي باغيا ضيعيهم بهاد السهولة ؟؟ 

هزبت راسي بصمت .. وخجل ..

انا:~ لا .. غير .. 

ابتسم فوجهي .. بينما قلبي زاد كيخفق بقوة بين ضلوعي .. 

بلال:~ كاين لي باغي يرجع باش يصلي صلاة واحدة فقط ولكن فات الفوت .. لي كيصلي عمره رزقه ماكيتقطع .. وابواب الخير ديما مفتوحين فوجهه .. 

زاد حرك يديه على شعري بهدوء .. بأقواله وافعاله .. كيزيد يخليني نشوفه احسن واحد فالكون .. هو لي كياخذ بيدي للطريق الصحيح .. باللين .. بالرفق .. بتصرفاته الناضجة .. 

بلال:~ غانسولك ؟؟ 

شفت فيه بمعنى شنو .. همس بين أنفاسه .. 

بلال:~اليوم شحال فيه من ساعة ؟

تكلمت بدون تفكير : 

انا:~ ربعة وعشرين ..

زاد أكد عليا بكلامه .. 

بلال:~ ربعة وعشرين ؟؟ 

حركت راسي بالإيجاب .. ماعرفتش لفين باغي يوصل بسؤاله .. لي جا ورا هادشي كله .. حرك حاجبيه بتفكير عميق .. ومسح على وجهه .. 

بلال:~ اليوم فيه ربعة وعشرين ساعة .. شحال كنبقاو مع التلفازة اكثر من ساعتين بعد المرات .. ماتش د الكورة فيه ساعة ونص.. وكيجينا عادي نتفرجو فيه متواصل..(عقد حاجبيه وعاود طلقهم) مع الهاتف الواحد كيبقى من ثلاثة حتى ل ربعة د السوايع .. غير بين مواقع التواصل .. وخمس ولا عشر دقائق د الصلاة الواحد ماكيقدرش يصبر عليها ؟ شحال د الوقت قاع .. فريضتك اذا صليتيها .. كتاخذ عليها الاجر وتمحي الذنوب .. 

خرج تنفس اجش من بين صدره.. وضغط برفق على وجنتي .. 

بلال:~ اليوم الشيطان غايخليك تصلي ماشي فوقتها .. وراها غايزيغ لك الطريق ويخليك تجمعها .. وراها غايبان لك عادي فحال صليتي فحال لا .. حتى كتخرج الصلاة من قلبك شوية بشوية .. كتولي ماقادرش تحافظ عليها ابدا .. وكتخرج وراها راحة البال .. ولا لا ؟ 

هزيت فيه عيني وغصة كتستحكم قلبي .. رجعت تنفست بعمق .. كنفكر فصدق كلامه .. وكل جملة قالها كان عنده فيها الحق .. غير انا لي عمياء على هاد الأمور .. 

انا:~ بصح .. ربي يغفر لي .. الله يسمح لي ..

بلال:~ كلنا كنسمعو للأغاني .. كنطيحو فالسيئات ربي يغفر لنا كلنا .. ولكن الصلاة شي نهار غاتخلينا نستقيمو .. كتقوم الذات وتطمأن بها الروح .. غاتخلينا نميحو السيئات والذنوب ونبدلهوم حسنات .. وهي اول سؤال كيتسأل عليه الواحد فالقبر .. 

عرفت شحال كنت غافلة على بزااف د الامور .. عمري شفت الصلاة انها شي حاجة لي تخلي ذاتك تستاكن .. عمري عرفت الفائدة منها .. بالعكس .. مرة نصليها مرة نقطعها .. حيت حتى حد ماشافني .. شفتها مشقة ف حين هي كانت راحة .. شفتها عذاب فحين كانت هي سكينة .. بريق من الدمع تكون ف مقلتاي .. وهمست بين انفاسي .. 

انا:~ غانبقى نصلي ديماا .. اقسم بالله عمري نقطعها .. كنعاهدك امام الله عمري نقطعها .. 

مسح على وجهي برفق .. قبل جبيني بطول ودفئ .. ورسم على ملامحه الخشنة ابتسامة طويلة .. 

بلال:~ هادي هي جوري طفلتي .. داكشي علاش غانصلي هنا اليوم الفجر .. جميلة ماكايناش .. الايام الجاية لي بقاو من رمضان ان شاء الله .. غاتبقاو تمشيو معايا نتي وهي للمسجد .. فالعشاء والفجر .. حتى تحسي بهادشي لي قلت لك اكثر ..

كبحت عيوني باش ميطيحش منهم شي دموع .. واخا جفوني كانو ثقال ..

فخورة به لواحد الدرجة لا تصور .. كيفاش كيحاول يخرجني من الظلام لي انا فيه .. بكل قوة .. كيوريني الطريق لي خصني نمشي فيه ..

هزيت راسي بالإيجاب .. 

انا:~ واخا .. غانلبس الإسدال ديالي ونجي ..

داكشي لي كان .. صليت ورائه ... بصوته العذب .. لي كان كيسقط على اذني كله طمأنينة وسكون .. والراحة كتخترق ضلوعي بدون استئذان .. داك الحمل كله لي فوق كتافي كيسقط جزء بجزء .. ويذوب فحال الملح فالما .. 

من بعد ماصلينا .. قرا ماتيسر من القرآن بخشوع .. استمعت له بتركيز تام .. حتى سالا .. وختم الأمر بالدعاء .. نفس السكينة تزرعات بين ضلوعي .. فحال اذا مابغيتهش يسالي ونبقى نسمع صوته ديما .. 

توسدت صدره .. ويديه كيلعبو ف شعري .. كيطيب نومي .. غمضت عيني بتعب .. سمعت كلامه كينساب مع اذني .. نطق بمزاح .. 

بلال:~ ياكما جاك الجوع من دابا ؟ 

ابتسمت طويلا وتنفست بعمق .. عاد رديت عليه وعيني مازال مغمضين .. 

انا:~ لا .. 

زاد حرك يديه فشعري .. 

بلال:~ مريضة ؟

انا:~ لا بالعكس .. هو ماعرفتش ولكن حسيت بالراحة فشكل وشي حاجة زوينة بزاااف .. 

سمعت غير صوت انفاسه فوق بشرة راسي .. وهمس .. 

بلال:~ تصبحي على خير .. 

قبل مانجاوبه .. كنت حسمت قراري والحروف خرجو من جوفي على شكل جملة اخرى .. 

انا:~ بلال .. خلينا نمشيو غدا نفطرو عند واليديا .. 

حسيت به عقد حاجبيه واخا ماشفتوش ولكن كنعرف حالته .. فاش كيتفاجئ بشي حاجة .. تكلم باستنكار ..

بلال:~ متأكدة ؟

فتحت عيني وحركت راسي بدون تردد .. 

انا:~ ااه .. 

بلال:~ واخا ..

رجع عنقني لعنده وانا ايضا ضميته .. غمضت عيني بسكون على صوت انفاسه ومشيت فالنوم .. 

داز باقي اليوم عادي تقريبا .. حاولت فيه نحافظ على صلواتي .. بلال مرة يخرج مرة يرجع.. 

حتى قرب المغرب عاد مشينا لدارنا .. فطرنا معهم فجو هادئ .. ماما وبابا لي بينو ترحيبهم الشديد ب بلال .. حتى بابا هاد المرة تعامل معايا عادي تقريبا .. ورجع يتكلم معي .. واخا ماشي بالطريقة لي كنت باغياها.. ولكن الأمر كان متحسن بزااف .. على اخر مرة مشيت عندهم .. 

دخلت لغرفتي القديمة وابتسامة مرسومة على وجهي.. شحال دوزت هنا من ليالي .. عشرين سنة بأكمالها وجدران هاد الغرفة .. تحملو بؤسي .. فرحي وأحزاني .. فحال اذا كل انش من هاد الغرفة .. كيشهد على شنو دوزته هنا .. حياتي كانت فهاد الغرفة كانت فحال المرآة .. مرة جانبها ابيض فحال النعيم ومرة اسود بمثابة الجحيم .. 

كنت باغا ناخذ شي حوايج حتى سمعت الباب تسد من ورائي بهدوء .. وصوت ماما لي شحال هادي ماصولني بهاد النبرة .. 

ماما:~ فرحانة ؟ 

قالتها بدون مقدمات .. صوتها جمدني فمكاني .. بقيت بعيدة عليها .. الابتسامة تلاشات من على وجهي.. وحركت راسي بالإيجاب .. 

انا:~ ااه .. 

حسيت براسي فهاد اللحظة .. كنرجع داك الطفلة الصغيرة.. وحجمي كيتضائل امامها .. جوري صاحبة السبع سنوات كتأنبها امها فلحظات الخطأ لي دارتهم .. 

مسحات على وجهها .. وحركات راسها بلا ماتقول والو .. خلال لحظات طويلة .. عاد رجع الصوت خرج من جوفها ..

ماما:~ مزيان .. حتى بلال ولد الناس .. 

فركت يدي بتوتر .. ومسحت على عنقي باضطراب .. 

انا:~ بصح .. غاتكونو فخورين به .. 

غصة صغيرة استحكمت حلقي .. وابتسمتت بزز مني .. قبل مانسمع كلامها وتعاود داك الابتسامة تتلاشى من على وجهي ..

ماما:~ حنا فخورين بك حيت حافظتي على راسك .. ورفعتي راسنا .. وستاهلتي واحد فحال بلال .. واخا كلشي قبلتي بقرار باباك وماطيحتش الكلمة دياله للارض .. 

كلامها أصابني بمقتل .. حسيت بظهري برد .. والدم نشف من عروقي .. حتى من حلقي جف .. 

انا:~ ااه .. 

قربات من حتى وصلات لعندي ودارت يديها على راسي .. كتمسحه بحنان ناذر .. 

ماما:~ علاش ماكتجيش لداركم ؟ 

حسيت بصوتها متشنج .. ونبرته مختلفة فحال اذا حاسة بالندم .. يمكن على البرود لي كنا كنعيشوه .. 

ماما:~ كيف بقيتي بعدا ؟

يدي كانو كيترعدو بين يديها .. بلعت ريقي بصمت ..

انا:~ الحمد الله مزيانة دابا .. ماكاين لاش تشطنو راسكم .. 

ابتسمت بمشقة الانفس .. وانفاسي كيطلعو ثقال .. 

انا:~ ان شاء الله غانبقى نجي .. غير حيت بلال كان باقي كيمشي للجامعة .. عنده شي شغل .. داكشي علاش ماكنتش كنلقا شكون يوصلني .. 

حركات راسها بإيجاب .. ومسحات دمعة هابطة من عينيها .. 

ماما:~ اذا عيطتي غير على باباك غايجي لعندك .. 

رفعت راسي فيها وابتسمت .. 

انا:~ ونتوما علاش ماكتجيوش لعندي بزااف .. ولا غير زوجتوني وصافي .. وطمأنيتو عليا ورا الكسيدة صافي .. هاديك داركم حتى نتوما ..

حركات كتفيها .. والدفئ اطل من عيونها ..

ماما:~ ان شاء الله غانجييو لعندكم .. (زمت فمها) حتى باباك خسرات سيارته عاد صاوبها .. 

حركت راسي بالإيجاب .. ماكرهتش فهاد اللحظة نلومها .. نقول شنو عندي وفالاخير نعنقها .. كتبقى امي وشنو ماوقع .. ولا شنو ماكان فالماضي .. كان مجرد ذكرى وتلاشات .. 

ماما:~ تهلاي فيه .. وسمعي كلام راجلك .. حيت ولد الناس ..(عضت على شفتيها) يمكن ماقدرتش نوقف معك نهار مابغيتش تتزوجي .. ولكن كان القرار الصحيح وباباك ماغلطش .. وحتى نتي غاتكوني ماندماناش دابا .. 

هزيت كتفي بارتجاف .. ورعشة خفيفة زحفات على عمودي الفقري .. 

انا:~ ماندمتش ..(بست يديها) وعمري غانندم .. 

ماما:~ الله يرضي عليك .. حنا راضيين عليك .. لا انا لا باك .. واخا نكونو غلطنا شي نهار .. حنا راضيين علييك ..

من بعد صلاة التراويح .. كنت جالسة فالسيارة وبلال كيسوق بصمت .. كنت كنتفكر غير فجملة ماما وكلامها الاخير لي لصق فدماغي ..

يمكن هما غلطو فمعاملتي .. وتصرفي كان بسبب الجو الأسري لي عشته ولكن الذنب كله على عاتقي .. وانا كنشوف داك الثقة كلها فعيونها .. وعيونه بابا ملي ودعته واخا ماقال والو .. كان كيبان فحال اذا حط داك الحمل الثقيل لي على كتفيه .. غصة مريرة طلعات ونزلات فجوفي .. مذاقها مر فحال السم .. وطعمها بطعم الصدأ .. 

حسيت ب البرد كيدخل مع النافذة .. وضلوعي باردين .. وواحد الشعور بالخنقة كيطلع مع انفاسي ويضيق عليهم .. 

سمعت غير صوته بجانبي لي خرجني من شرودي .. 

بلال:~ شنو واقع لك ؟؟ ملي خرجتي من داركم ونتي ماشي مزيانة ؟

حركت راسي بنفي .. ورجعت زيرت على يدي بأصابعي .. 

انا:~ ماعندي والو .. 

شاف فيا بشك .. ورجع زفر بين انفاسه ..

بلال:~ جوري .. 

بلا مانقاوم مازال .. حدقت فيديه .. وسرسبت شنو كان كيشغل بالي بدون تفكير .. 

انا:~ واش يقدرو عائلتي يعرفو هادشي لي وقع شي نهار .. واذا عرفو عائلتك شنو غايكون تصرفهم اذا عرفو حقيقتي كلها ؟ 

وقف السيارة .. شفته زير على المقود بيديه بقسوة .. وساعديه القوين ظهرو فيهم غيير العروق البارزين.. ورجع دار عندي بجذعه بأكمله .. 

بلال:~ شنو ذكرك فهادشي كله دابا ؟ 

رجعت شفت فيه بتصميم .. بحره المظلم .. امواجه هادئة .. فحال شي ليلة عاصفة لكن ساااكنة .. رجعت غمضت عيني بتوسل .. 

انا:~ قولي الحقيقة .. انا بغيت نعرف .. 

مسح على وجهه .. وزفر مطولا .. 

بلال:~ عائلتك ولا عائلتي ماعندهم دخل بهادشي .. (عض على فمه ) نتي عرضي وشرفي .. وانا غانصونه .. ومستحيل يعرف شي حد بشنو وقع .. شكون ماكان .. 

ركزت مع وجهه باضطراب .. وشي حاجة كتنهش فيا من الداخل .. فحال شي وحش كامن بداخلي كيهرس ذاتي ويفصلها أطراف .. 

انا:~ بصح .. عاهدني انك غاتنسى كلشي .. (حركت راسي بنفي) انا ماقادراش نصدق ان هاد السعادة غاتكون ابدية .. 

زفر بضيق .. وحدق فيا طويلا .. 

بلال:~كنعاهدك امام نفسي وامام الله .. ان كل ماوقع غايبقى فطي النسيان حتى حد ماغايعرفه من غيرنا انا ونتي .. واخا يفوتو السنين بغيت يبقى هادشي فحال اذا عمره ماوقع .. عمره يخرج من فمك ولا من فمي .. 

انا:~ ولكن .. 

هز راسه وقاطعني .. 

بلال:~ ماكاين ما ولكن هدرنا .. وهادشي لي غايكون .. حتى حد ماغايعرف شي حاجة وقعات فالماضي .. ( زاد تنفس بعنف) وحتى داك الشماتة ماباقيش يدور بساحتنا .. ولا يقدر يقول كلمة وحدة اخرى عليك ..( مسح على لحيته) وماتسولينش علاش .. حيت دابا باغي ننسى كلشي .. 

حدقت فيه بذعر .. كنحلل المغزى من جملته .. ولكن ماقدرتش نسوله مازال .. ولا نستفسر .. الشيء لي جا فبالي .. انه مراد علاش غايعاود يدور من ساحتي .. خذا شنو مابغا .. مابقى عنده حتى سبب لي يرجع موراه .. وحتى باش يفضحني شي نهار ماشي فصالحه .. السم لي عطيته نجى منه ... وفالمقابل انا تحملت نتيجة غلطنا بزوج .. متعادلين .. هو اخذ شنو بغى بدم بارد .. وشق طريقه نحو المجهول .. 

فالوقت لي رجع ديمارا فيه السيارة .. غمضت عيني وهزيت راسي بصمت .. صوته الهادئ .. مضطرب نوعا ما بين انفاسه.. هو لي وصل لمسمعي مجددا .. 

بلال:~غانوصلك للدار ونمشي نجيب جميلة .. عطيات عليا .. 

انا:~ واخا ..

طول الطريق وانا ملتزمة الصمت .. غير صوت انفاسي لي كانو كيتسمعو فهدوء السيارة ..

دخلت للشقة .. جدرانها اطبقو عليا .. جملة ماما حركات فيا شي حاجة لداخل .. انني ماغلطتش غير مع نفسي .. ماغلطتش غير فحق بلال.. فرطت فشي حاجة كانت خصها تكون رمز عفتي

.. الضيق اعتمر صدري .. والاختناق بين انفاسي .. لقيت راسي كنبكي بلا سبب .. واخا تجاوزت داكشي كله .. باقي شي حاجة ماشي هي هاديك .. داك الثقة كلها .. داك الفخر لي كان فعيونهم .. ماعارفينش انه داكشي كله مزيف.. ذبحني بدون رحمة .. حقيقتي كانت مزيفة امامهم .. 

مالقيت من غير السجادة والقبلة .. احسن حضن كان ممكن يواسيني فداك الساعة الساعة من الليل .. احسن حضن كنت ممكن نلتجأ له .. نفرغ فيه ضيقي .. 

قشعريرة سرات فجسمي .. بكيت على نفسي حتى شبعت .. بخشوع تام .. بعدد دقات قلبي كانو داك الدموع كيقطرو من عيوني .. وخليت دعائي مفتوح امام الله عساه يغفر ذنبي ويقبل توبتي .. !

كأخير حاجة كنت بغيت نصلحها فحياتي .. هي صداقتي مع نرجس .. اخير فصل من فصول.. قصة حياتي .. هو نعاود نرتب كل شيء ف بلاصته .. فحال قطع شي لعبة .. تكملو أجزائها كلهم .. ماعادا القطعة لي خاصة بنرجس .. 

وقفت قدام باب منزلهم .. فالاول كنت مترددة .. جمعت يدي عندي اكثر من ثلاث مرات.. كيطلع الهوا من صدري ويعاود ينزل باضطراب .. 

وعاودت تنفس بعمق عاد دقيت .. ومن خير الصدفة .. هي لي فتحات لي الباب فحال ديما .. 

قبل ماتهدر هي.. نطقت انا بتردد .. 

انا:~ نرجس .. 

شافت فيا بصدمة .. يمكن تكون ماتوقعاتش وجودي بعد كل ما صدر مني .. حركات راسها بعدم تصديق .. وتكلمات بعد مدة ذهول طويلة .. 

نرجس:~ دخلي .. مرحبا بك .. (ابتسمت وضربات على راسها بتوتر ) سمحي ليا .. ماتديش علياا .. 

حركت راسي بنفي .. ومسحت على عنقي بحركة عفوية .. 

انا:~ لا لا بلاش .. مزروبة .. لقيتيني غير جيت عند ماما ودزت نبارك ليك العيد .. 

نرجس:~(عنقاتني عفويا) علينا وعليك .. مبروك عييدك والله يجعل السعادة ديما مرافقاك طول حياتك .. 

بادلتها عناقها بحرارة حتى بعدات .. ك ردة فعل شديت ف يديها بدفئ .. الشيء لي خلاها تتوتر .. عرفتها انها ماظناتش غاننساو كلشي فحال اذا عمرها ماوقعات شي حاجة .. وتجي البادرة مني هاد المرة .. 

انا:~ اميين حتى نتي ان شاء الله .. ربي يعطيك كل ماتمنيته فحياتك .. 

دعيت معها من قلبي .. كيغما شفت الصدق فعيونها ودعواتها ..

عضات على شفتيها .. وغصة طلعات مع حلقها .. 

نرجس:~ اخر مرة ماكانش كلشي بيناتنا هو هداك .. 

انا:~ نتمنى ننساو هادشي كله دابا ..

رعشة قوية زحفات على جلدي .. وانا كنتفكر داك النهار لي تقلب غيه كلشي سفاه على علاه .. اليوم لي رجع فيه مراد وقلب موازين حياتي .. فحال اذا كان خصني غير نتذكره حتى تتكلم عليه نرجس فآن واحد .. 

زيرات على يدي .. 

نرجس:~ بلا ماتوتري .. وتفكري .. مراد تعدى على شي بنت قاصر .. وقدامات به شكاية .. وهربو بااه خارج البلاد .. مانضنش شي نهار غايرجع باش يرون حياتك .. 

اسمه ماحرك فيا والو .. ماكانش عندي داك الرغبة فأنني نسمع شنو وقع له .. ولا نهتم مجددا بأخباره .. يكفي ان طول الايام الماضي كنت كنحاول نتجاوز ذنبي.. ليالي طوال ضليت فيهم سهرانة .. طوال شهر رمضان كنصلي الله وندعيه .. ليلاً ونهاراً باش يغفر لي ذنبي .. ونتجاوز خطيئتي .. يسترني الله فالدنيا قبل الآخرة .. 

هزيت راسي بنفي .. 

انا:~ مابغيتش نسمع عليه مازال شي حاجة .. حيت ماكتربطني به حتى علاقة .. كان غير صديق وصافي .. وكلشي سالا داك الوقت .. 

هزات راسها بتفهم .. ونبرة صوتها كانت عادية .. 

نرجس:~ لا كان خصك تسمعي هادشي .. حيت فهمت ان داكشي لي شربتيه كان عنده السبب.. (مسحات على وجهي) غايكون بغا يتعدى عليك كيف ما تعدى على هاد البنت ..

هزيت راسي بثقة .. 

انا:~ كل واحد كيخلص داكشي لي داره .. 

اطبقت على فمي .. هادشي كيفما عاهدني بلال امام نفسه ونفسي .. ماغايعرف به حتى حد من غيرنا انا وهو .. حتى نرجس كانت فاهمة الامور غلط خليتها على نفس الخلفية .. اذا الله سترني وبلال ايضا .. حتى انا غانستر نفسي .. 

انا:~ المهم غانمشي .. نتلقاو فالأيام لي جايين ان شاء الله ..

الصمت عم علينا بزوج .. حتى بغيت نمشي فحالي .. رجعت عيطت باسمها وحتى هي نفس الشي ..

" نرجس .. جوري " 

اسمائنا خرجو فلحظة وحدة .. من ثغرين مختلفين .. وفنفس اللحظة ضحكناا بالجهد فحال اذا تذكرنا ايام الطفولة .. وهاد الحركات الطفولية .. 

نرجس:~ (توقفات على الضحك بعد مدة طويلة ) ماعرفتش شكون غلطات فحق الاخرى ولكن كنسبق اعتذاري انا الأولى .. 

غمضت عيني وعاودت فتحتهم .. وشوية د الدموع تكونو فعينيي اثر الضحك .. وعاطفة الصداقة لي كانت بينانا فهاد الاثناء.. اثلجت صدري .. هادشي كنت محتاجاه من زمان .. وبقصوحية راسي كنت كنضيع كلشي من يدي وفالاخير كنجلس نلطم حظي ..

خرجو الكلمات من اعماق قلبي قبل جوفي .. 

انا:~حتى انا كنعتااذر على كلشي .. سمحي لياا على كلشي .. 

حطيت اصبعي على اصبعها .. فحال اذا تصالحنا .. نفس الحركة لي كنا كانديروها وحنا صغار ملي كنتصالحو ديما .. وننساو خصماتنا .. ابتسمت بعمق .. 

انا:~ ودابا تصالحنا .. 

مسحات عينيها .. وجاوبتني بعاطفة شجية .. 

نرجس:~ ماعرفتش شنو نقول .. (حطات يديها على كتفي) ماتخليش داك المشاعر التافهة ولا داكشي لي قلتك اخر مرة يأثر فحياتك .. حيت كل ماكنتفكر هادشي كتغلبني الضحكة .. كل عام كان خصه يعجبني شي بروف .. وغير كيجي الصيف كاننسى كلشي هه .. 

حاولت نبين الامر عادي كيفما حاسباه هي .. واخا الغيرة كانت كتفتك بأجزاء قلبي .. وتشطره لنصفين .. فنفس الوقت تفكرت انه هادشي غايوسوسني فقط وغايخليني نخسرها حتى هي اذا درته فبالي .. وغانخسر الثقة لي بديت كنحاول نرمم بها ذاتي هاد الشهر فلحظة شك واحدة فقط .. 

جاوبتها بصوت اجش.. 

انا:~ حتى انا مابغيتش نخسرو هاد الصداقة لي بيناتنا من شحال هادي .. (رجعت عنقتها ) خصني نمشي دغيا.. تعطلت .. غانتلقاو عن قريب .. 

نرجس:~ (حركات يديها ب الى اللقاء وباقي نفس الابتسامة الدافئة على ثغرها ) ضروري غانتلقاو ان شاء الله .. 

الشيء لي تأكدت منه فهاد الزيارة .. انه واخا يوقع لي وقع انا ونرجس مثل شجرتين جذروهم كيتعانقو من الصغر .. صعيب يتفرقو .. واخا تدوز اي عاصفة .. تشققنا لكن غانرجعو فنهاية المطاف .. 

اما مراد مابغيتش نفكر فيه.. ولا نعاود نعطيه مساحة ولو فمخيلتي.. لحد الآن ماعرفتش واش عاطفته كانت مزيفة ولا حقيقة .. يمكن اكبر ذئب مخبي تحت قناع الضرافة .. وهادشي لي ندمته عليه انني ماكنتش قادرة نعرف حقيقته من الاول .. حتى جرفني معه للهاوية .. عاد فقت على راسي .. 

ودعت نرجس وابتسامة عريضة مرسومة على ثغري .. مسحت بضع قطرات من الدموع بقاو عالقين بين رموشي .. ورميت كل الماضي ورائي .. كل خطوة كنت كنتحركها كل شيء من الماضي كيتلاشى ببطئ ويذوب مرة وحدة .. فحال اذا جمعت مشاكلي كلهم وحطيتهم فشي كيس .. احكمت عليه ورميته فشي بئر عميق .. 

زفرت طويلا عاد ركبت فسيارة بلال لي كان كيستناني .. جسده الضخم احتل مقعد السيارة بأكمله .. خطف انفاسي .. بوسامته الخشنة .. لي باقي كتعزف على اوتار قلبي بقسوة .. كتدغدغ مشاعري بوحشية قاسية ..

حتى من المكان معبق بعطر انفاسه ورائحته الرجولية .. يديه دارهم على المقود .. باقي العروق فيهم بارزين .. كيأسروني نشوف فيهم بطول .. ف ساعديه القويين .. حركه معصمه بانتظار .. كيشوف فالساعة .. 

شفته عاقد بين حاجبيه .. وقبل مايتكلم كنت جلست و سبقت انا فالكلام.. 

انا:~ عارفة رااسي تعطلت .. ( شفت فيه ببرائة ) ولكن غير شوية يااك .. 

حيد نظاراته الشمسية .. وعيونه الصقرية رصدوني بقسوة مزيفة .. سوداوتيه .. بحر غامق.. مظلم .. غامض .. غرقت فيه بدون رحمة .. وبلا مانستنى فرصة النجاة .. كنزيد نبحر فداط الشغف الفج لي فيهم ..

بلال:~ قلتي خمس دقائق وطالعة ف عشرين دقيقة .. 

قبل مايديماري عنقت كتغه بتملك .. وحطيت راسي على يديه .. 

انا:~ ياكما كتغير عليا لهاد الدرجة زعما .. 

حط كفه على راسي .. وانفاسه ضربو فوجهي .. بعنف .. واخا من فوق راسي .. 

بلال:~ اناا متملك فما يخص كل حاجة متعلقة بك نتي بالضبط .. 

زدت ابتمست وغمضت عيوني .. كنستنشق ريحة انفاسه .. ودرت يدي بين يديه الكبيرتين .. كنحطها ونعاود نحيدها .. 

انا:~ علاش كتبغيني ؟ وانا كلي عقد .. (زميت شفتاي ) مافيا حتى حاجة لي تقدر تخليك تبغيني لهاد الدرجة .. وانا بالضبط ماشي شي وحدة اخرى .. 

بلال:~(حط يديه على ذقنه السمراء بتأمل وحك لحيته بهدوء ) هاد السؤال ماعنديش له الجواب .. كنبغيك حيت نتي هي نتي .. جوري طفلتي .. حبيبة الروح .. وتوأم النفس .. 

عضيت على فمي .. من كثرة هاد المشاعر المختلطة .. ماعرفتش واش هي فرحة .. ولا سعادة .. ولا شنو .. داكشب كان كيضرب فأعماقي ويزلزل ذاتي بأكمالها .. شفت فعيونه وهمست .. 

انا:~ اخر سؤال .. وفوقاش بغيتيني اول مرة ؟؟ 

حتى قلت ماغايجاوبش على اسئلتي البليدة .. لي طوال هاد الشهر واناوكنعاودها على مسمعه .. لكنه خالف توقعاتي ايضا .. 

بلال:~فأول مرة هزيتك بين ييدي وتأكدت غاتكوني قطعة مني .. غاتشاركيني فروحي طول السنوات لي جاييين .. غاتعذبني وغايكون هاد العذاب حلو فحال عمق عيونك .. غاتخليني نبغي نقتلك وفنفس اللحظة نخنقك بين حضني .. بمشاعري (مسح على وجهي برفق ) ودابا مابغيتكش مازال تبكي .. 

مسحت وجهي بتأثر .. وحركت فمي بارتجاف .. 

انا:~ فخباارك كنبغييك .. 

نطق بمزااح .. ويديه زيرو على كفي .. ملي حررو بقا كيحرك يديه بدوائر وهمية بين أصابعي .. 

بلال:~ لا اول مرة تقوليها .. وكنظن اذا بقيتي معنقاني هكا طول الطريق .. وبهاد الإعتراف ممكن نديرو شي حادثة .. حيت مانظمنش لك تصرفاتي من بعد .. 

قالها بنبرة لعوبة .. والمكر اكتسى جملته .. 

حسيت بالدم تدفق فعروقي حتى استقر بين خدودي .. والحرارة كتفور بين خلاياي .. من جملته الوقحة .. تمتمت بصعوبة بين انفاسي ..

انا:~ دابا فين غاتاخذني ؟ 

بلال:~ فين مابغيتي نتي .. 

انا:~(جاوبته فنفس اللحظة) فين مابغيتي نتا .. 

ظهر التفكير على وجهه .. حتى احنى جبهتته لجبهتي .. قبل ارنبة انفي .. واستقرو شفتيه جانب فمي .. 

بلال:~ كنظن غانخطفك هاد المرة ياقاسية القلب لمدة طويلة عاد نردك .. 

تكلمت باحتجاج .. 

انا:~ لا انا ماشي قاسية القلب .. 

بلال:~ (خلا وجهه قريب لوجهي) علاش لي كتبقى فدار واليديها اربع ايام ومخليا راجلها بوحده .. غير حيت بغات تتفكر ذكرياتها .. عاد بقيتي مع البنات فدارنا .. ماشي قاسية القلب .. وفؤادها اشد قسوة .. وهو موحشها كثر من الدنيا .. 

تخطفو انفاسي بين صدري ..كفي تحطات على لحيته .. كنحرك اصابعي بشوية .. بينما هو ابتسم بعمق .. 

انا:~ حتى قاسية القلب تووحشتاك بزااف .. 

الدفئ مخلط مع الشغف اطل من نجلاويته .. وقبل جبيني بطول .. 

بلال:~ شنو نظرك نمشيو لدار الجبل ؟ (غمزني) كنظن محتاجين شي ايام بوحدنا دابا بعااد على الناس كلهم .. 

ديمارا سيارته بلا مانجاوبه .. وكأخير ردة فعل درتها انا .. حركت راسي بإيجاب .. ويدي شبكتها بين يديه بقوة.. خطيت اول خطواتي نحو السعادة .. بقلب صافي وذهن اصفى ..

فاتت الدقائق طويلة .. كأنها دهر بأكمله.. وانا كنتفكر كل ما مضى خلال هاد السنوات كلها .. بين الحزن والفرحة كانو كيتغيرو ملامحي .. مشاعري .. احاسيسي .. نفسي فكل مرة انفصلت على ذاتي ورجعت عاشت الماضي بحذافيره ..

سحابة راحة دازت بين عيوني .. ودخلات بين انفاسي .. رعشة خفيقة زحفات على جلدي خلال هاد الذكريات كلها .. دموع التوبة تكونو فعيوني .. فحال كل مرة كنتفكر هادشي كله .. 

ها هي خمس سنوات دازت فحال الضو .. غمضت عيني وفتحتهم لقيتها فاتت بسرعة .. وانا كنتفكر غير شنو وقع فيها .. مجرد سحابات ذكريات فقط .. 

ها انا عدت مجددا لواقعي.. للفترة لي بديت بها قصتي .. كل ماحكيته كان مجرد شبح من الماضي .. صفحة وغانطويها الآن للأبد .. ذكرى مرة او حلوة دازت فحياتي .. غايبقى فقط طيفهم مستوطن ذاكرتي بقوة .. 

بقدر الظلام لي عشته .. بقدر الضوء لي تسلط على حياتي من بعد .. اختريت هاد الشق من حياتي باش نتكلم عليه .. حيت فيه تغيرات حياتي كلها .. كان هو اهم جزء من قصتي .. نفسي تشكلات من جديد .. فيه بانت جوري الأنانية .. جوري لي عمرها فهمات راسها .. الشخصية لي تخذلات مرة من الناس والف مرة من نفسها .. جوري المراهقة لي عاشت حياتها كلها متخبطة بين ايادي القدر .. وفالاخير لقات مرساها .. 

كل يوم كيفوت كنعتابره بداية جديدة.. كل يوم هو بدايتي نحو صلاح الذات .. وتغير نفسي .. اكثر من اربع سنوات .. فكل مرة صباح كنت كنخلاق لهاد الدنيا .. جوري اخرى احسن من لي فاتت .. كنرسم ذاتي ونعاود نشكلها .. كنبني ثقتي مجددا .. هاد المرة نقية .. نفيت كل شيء .. رجعت تولدت من جديد .. تجاوزت ذنبي وبقيت مع توبتي كل ليلة .. 

ها انا عدت .. انثى ناضجة ذو الخامس والعشرين من عمري.. عاشت بزاف فالدنيا .. كنستنى مولودتي الثانية .. لي حاسة غاتكون انثى هاد المرة .. واسمها غايكون "غفران" هي غفراني من خطيئتي .. هي غفران ذاتي من سموم الماضي .. 

كنستنى بلال وصلاح ابني الاول ذو الثلاث سنوات .. الاول كان سندي .. ذاتي والروح لي تعاودت فيا من جديد .. هو الثاني صلاحي من ذنبي .. هو ثمرة عشق اولى .. بذرة تزرعات بين كرشي .. باش تعطيني سبب اخر باش نعيش من اجله .. باش نقدم له كل الحنان لي عندي .. كل العطف لي عطاه الله لكل ام .. تعامل به ولادها .. اذا كان فالطريق الصحيح ندعمه .. واذا غلط نصحح له .. 

السنوات مرت بسرعة .. فرمشة عين .. السنوات صقلاتني بطريقة ما .. رممات شنو تكسر فداخلي .. علاقتي بنرجس بقات جيدة .. واخا ماكنتلقاوش بزاف بحكم زواجها بعدات على المدينة .. ولكن الهاتف دايما بيناتنا .. 

اما واليديا .. انا بنفسي ماعرفتش واش تصلحات علاقتنا ولا بقات مفتوحة بدون نهاية .. كنزورهم دائما .. واخا مشاعرنا مع بعض ماكنصرحوش عليها.. فحال اذا باقي كنحشمو من هادشي .. ولكن رضاهم والفخر لي فعيونهم كان كافيني كيروي عطش روحي ..

الواليدين كيبقاو واليدين .. عمره الدم ماكيولي ما .. واذا حصلتي على رضاهم شديتي الدنيا فيديك ..

هي ~امي~ هي لي جربات ثاني الم فالعالم بعد الحرق حيا .. هي لي جربات آلم كيعادل تكسير اثنين واربعين عظمة فجسدك مرة وحدة .. هي لي ارضعتني هي لي لبسات وكبرات .. هي لي سهرات فطفولتي .. فمرضي .. فصحتي .. الله يسمحني من حقها .. ماحسيت بهادشي حتى جربت انا ايضا .. 

هو ~ابي~ .. هو لي خدم عليا عشرين سنة .. هو لي عطاني اسمه .. واخا بلا دفئ .. كان ظهر حامي .. واخا بلا مابيين ذلك.. كان جدار حديدي سندت عليه ضعفي بلا مانحس .. الله يسامحني من حقه .. 

بلال.. هو ~زوجي~ .. لحد الآن .. مالقيتش شي اسم مناسب لعلاقتنا .. هي ماشي مجرد زواج .. ماشي مجرد اسم ولا اجساد تربطو ببعضهم .. هي ماشي مجرد مودة ورحمة .. 

هي روح تربطات بأخرى .. وكيان بأكمله تشابك مع الاخر بقوة .. عمرها الأيام ماتقدر تزعزع استقرارهم .. 

هو الشخص لي انتشلني من وحدتي .. بدل ذاتي .. بغاني بعيوبي بأخطائي لي لا تعد ولا تصحى .. ماشي زوينة ولكن كنت اجمل وحدة فعيونه .. ماشي بريئة ولكن كنت اكثر وحدة بريئة فعيونه .. ماشي طفلة ولكن كنت طفلته .. مدللته .. عروسة قلبه .. وياسمينته .. 

ذاتي ماكان فيها مايتصلح .. لكن غييرها .. عمره مافكرني ف ما مضى .. دائما كيبين لي شغفه .. حبه .. تملكه وغيرته .. القابه المحببة لقلبي .. اغدقني بها طول هاد المدة .. سواء ف الفرح او الغضب .. اخذ بكفي نحو الصلاح .. 

دائما كينهني للطريق الصحيح .. عمره مافكرني فغلطتي .. جدار روحي لي تكسر رممه بعنف .. هو توأم روحي .. هو بلال قلبي .. روح اخرى تفرقات وكانت فجسده .. هو عشق تكون بين ضلوعي منذ طفولتي .. وكرهي له ماكام سوى وجه من وجوه هاد العشق .. لي اكتشفته متأخرة .. 

ها انا ماشي مجرد انثى ناضجة .. ام .. زوجة .. ابنة .. الله عطاني ثلاث نعم كلهم كيحسسوني بالفخر .. 

تمكنت نحصل على اجازة فالحقوق.. واخا بصعوبة .. كل مرة كنت كنفشل .. كنرجع نوض بقوة .. والضربة لي ما طيحاتني قواتني .. اما مراد مابغيتش نذكره حيت خرج من حياتي بمرة .. والأيام كفيلة باش تحاسب كل واحد على قد نيته .. انا ماحاقداش عليه حيت نصف الذنب كان ذنبي ونصف الغلطة كانت ديالي .... !

هادشي لي فات مجرد قناع للذكريات .. قناع تلاشى فور روجوع الروح لذاتي .. كل ذكرى جات على شكل صورة خيال .. كانت مجرد قناع لما مضى .. 

وانا بقيت هنا على هاد المقعد .. كنمسح الدمعة ونبدلها بابتسامة .. كنشوف فصورة بلال هاز صلاح من بعيد بكل حب .. كيقربو مني .. بابتسامة .. ونظرة الشغف لي فعيونه .. بقات طول هاد السنين مرسومة على سوداوتيه القاسيتين .. 

قطرات المطر دخلو مع ذاتي .. وزحفو على جلدي .. فحال صوت بلال لي انساب لي مسمعي بشعره المحبب لقلبي .. 

حبك ياعميقة العينين 

تطرف ٌ، تصوف ٌ، عبادة...

حبك مثل الموت والولادة 

صعبٌ أن يُعاد مرتين ..

" تمت والحمد الله "

وهنا تحط قلمي .. وتبعثرو اوراقي .. 

بقلمي انا فاطمة اليوسفي ..

قصة قناع الذكريات 💜