كان ما باقي بيناتهم والو.. مغمض عينيه وكيقرب بشوية.. وهي تشللات فبلاصتها.. حتا كيسمع صوت غريب فيقو وهبط راسو كيشوف عند رجليه.. كيبانلهم بطريق واقف عند رجليهم وهاااز راسو وكيشوووف فيهم من نيتو.. طلع حاجبو ورجع خلفة لور.. وهز راسو شاف موراه وهو يبانلو بطريق مور خوه جايين كيعرجو بديك المشية العوجة.. بلق عينيه وشدلها فيديها وزير عليها..
براء :سمعيني.. اترجعي خمسة دالخلفات لور.. وغير نقولك جري جري
تالاسين :شني واقع
براء :(كيشوف فداك البطريق لي حاااضيهم) رجعي.. واحد.. زوج
رجع بيها لور وهي تخلطو عليها لعرارم.. مزال فشلانة بلي كان ايوقع حتا لقاتو كيقولها هربي.. تلفها.. وحدهم فاتو خمسة دالخطوات وداك اابطريق وااااقف كيحنزز فيهم وبطاريق جايين من بعيد شوية يلحقو عليه.. حتا زير عليها وقلب الدورة كيجري.. ومع بداو كيجريو مع تبعوهوم داك السرب دالبطارقة كيجريو ويصفقو موراهم.. وديك التصفيقة كتخلي بطارقة اااااخرين يتجمعو وينوضو.. هما لوالا وداااك العرام موراهم كيجري ويصفق ويصدر اصوات غريبة..
براء :جري ما تشوفيش موراك
تالاسين :اععععع لااااااحقينا!!!
براء :ما تخافيشش غير جري.. جريييييي
ضربوها بكعطة وحدة وهو مزير على يديها وكيسمعو صواتهم تابعينهم كيغوتو ويصفقو...حتا بداو كيسمعو الصوت كيبعد بشوية بشوية وعرفو راسهم سبقوهوم وعاد دار شاف موراه.. لقاهم ما كاينينش ووقف كيرد النفس وهي رخات منو وجلسات فالأرض كتنفس وكتنهج...
تالاسين :اوووف.. عيييت.. بعدنا ياك!
براء :(حرك غير راسو)
تالاسين :اربي قلبي.. اووف.. جرتك غبشة.. فما كانت شي مصيبة رامينا ليها..
براء :(كينهج) ومالك ما تقولي نتي لي منحوسة.. وفما نجيبك معايا توقع شي مصيبة
تالاسين :اهااااااااا.. دابا انا منحوسة.. يااااك!!
براء :هههه هادشي لي بانلي
ناضت كتنفض حوايجها مخنزرة وتميق فيه وهو حاضيها كيضحك..
تالاسين :ايوا اسيدي ما تشركشي معايا الطريق
خلفات غادة بوحدها وهو يشدها رجعها عندو وقابلها معاه..
براء :من نيتك ههه
مع الجرة لي جرها وجات قبالتو شافت موراه.. وهي ضربها اللقوة.. تشللات فبلاصتها وخرجو عينيها.. وبدات غير كتمتم وعينيها مكوانسيين موراه..
براء :مالك
تالاسين :اباببب.. ببب
شاف فيها غير كتزيزين عليه.. ودار يشوف موراه.. وكاااانت الصدمة.. خرجو عينيه ودار زرب عليها جرها تخباو مور واحد الحجرة مغطية بالثلج جات مدرقة شوية وجلسها وجلس حتا هو باش ما يبقاوش يبانو..
تالاسين :(سرطات ريقها كتشوف قدامها مصدومة) داكشي لي شفت هو هاداك.. ياك!!!!
براء :(كيشوف قدامو) اه.. هو هاداك
تالاسين :(زيرها الخوف ودمعو عينيها) مشيييييييييينا فيها اهنهههنن
براء :ششش.. ايسمعوك
تالاسين :ياكلونا يااااااك!!!!
براء :ششش.. قلتلك. سكتي
قصح فيها الشوفة باش تسكت حتا يبسات فبلاصتها بالخلعة وهي كتخايل المنظر لي شافت.. زوووج دببة قطبيين.. بويض ببياض الثلج.. مقنتين فوسط حجر مغطي بالثلج.. ولي باين انها كانت أنثى وذكر.. حيث الوضع لي كانو فيه وضع مثير للشبهات.. واحد لتحت وواحد الفوق.. ومن الشكل باااين شنو كيديرو.. ومع بقاو غيير كيجريو بدون وجهة وغير هربانين حتا وصلو لبلاصة عامرة حجر بحال الغيران واغلبيتو مغطي بالثلج..
براء :(بهمس) خليهم حتا يساليو ونخرجو
تالاسين :اهاه اهاه.. حتااا يساليو على خاطر خاطرهم.. علاش حنا مزرووبين.. ها هما تما حتا وكان يشبعو غير ما يكلوناشي اهنهههنننن
براء :ههه.. هادشي خاصو يتفيلما
هز لا كام ديالو.. وبدا كيطل من مور الحجرة لي مخبعين فيها غييير من الطريف وكيصور فيهم ويضحك حتا جراتو من الكول تقابل معاها..
تالاسين :واش ومن نيتك؟؟؟ ؟
براء :مالك!!!
تالاسين :اواعدي على مااالي اواعدي واش من نيتك.. اهنههنن صورتي كلشي بقالك غير تصور البورنو دالحيوانات ايحصلووووك يجيو يرفسونا هنا!!!!!
ناضت وقفات كطل عليهم وهو ضحك عليها حتا شبع وناض كيشوف واش مزالين..
براء :خليك هنا انشوفهم واش مشاو فخطرة عندك يخرجولنا من شي قنت
تالاسين :فين اتمشي
براء :هاني حداك.. غير انطل ونرجع
تالاسين :وعنداك...رد البال
براء :ههه ما تخافيش.. السيد اتكون راشقالو دابا ما يديرلي والو
غمزها وضحك وتمشى بشوية كي تأكد واش مزالين ولا بعدو.. طل عليهم بانولو غاديين مبعدين وهو ينعتلها تجي عندو.. ضرباتها بجرية وحدة حتا شداتلو فدراعو خايفة.. وهو عاجبو الحال.. هز البوصلة يشوف طريق لي ايرجعو منها حيث فاش جراو هربانين قبايلة تلفو الاتجاه ديالهم.. وداكشي لي كان.. وشد طريق الشرق راجع فحالو.. وشاد فقشابتها هي لي شادة فيه وكتشوف فجنابها خايفة..
براء :كي جاتك لفراجة هههه
تالاسين :(خنزرات فيه) كي وجهك
براء :اذا واعرة هههه
تالاسين :لا ثايق فراسك.. الماسخ
براء :دابا هاد الفيديو واش نعطيه للمجلة ولا نلوحو فالسيت بلو ما عرفتش!!! اكييد كتعرفيه ياك ههههه
تالاسين :الا جاوبتك عكرلي
ضحك وهو عاجبو حالو يطلعها عليها وهي كتفقص.. وحشمانة وخايفة ما قدراش تبعد عليه فنفس الوقت حتا وصلو للقبيلة..
كانت متكية فاش دخل عندها يشوف.. غير شافتو تبسمات.. ودخل هو سد الباب وجر الكرسي وجلس قدامها.. مهموم وبااينة عليه.. شافها تبسماتلو وهز يديها باسها وشدها وسط يديه..
فراس :كيبقيتي
رقية :(بصوت عيان) الحمد لله.. نتين لي كيبئيتي
فراس :(تنهد) ما عرفتش
رقية:(زيرات على يدو) سمع مني.. جمع ولادك عليك.. الدنيا فنيانة.. اليوم هانتين فيها وغذا لا.. ولادك كيبغيوك وكيعزوك وكيحتارموك.. ما تخليهومش ينفرو منك ويكرهوك.. عارفاك باغي مصلحتهم وباغي تربيهم.. ولكن ماشي هاكة اولدي.. هما دارو الغلط ونتين ما تكملش عليه.. كبر عئلك..
فراس: ما بغيتهومش يترباو على لكذوب.. دارتها قدها قد راسها.. وخرجات على خوها وختها وعلى العائلات بزوج.. شفتي حالتنا كي رجعات.. هادشي كامل بسبابهم.. هي وزينب..
رقية :زينب راها فكرات فولادها ما فكرات فلي جاي من مور داكشي.. وبيسان فكرات بئلبها ما فكرات بعئلها.. عز بيها خوها حتا دارت لي دارتو.. ودابا لي وئع وئع.. والا هما غلطو.. نتين خلي ئلبك كبير وسمحلهم.. هاديك مك ولوخرا بنتك.. وعمر الظفر ما يخرج من اللحم
فراس :صعييييب نرجع نثيق فيهم كيف لول.. صعيب بزاف.. راكي عارفاني
رقية :عارفاك وحافضاك.. حتا حد ما ئالك عطيهم ثيئتك من دابا.. مهم تعفي عليهم وترجعهم لحبابهم وترجعهم لينا.. والبائي بشوية بشوية ايتصلح
فراس:سكت كيشوف فيها
رقية:دير بكلامي ما اتندمش.. ما تئصحش راسك.. راك ما نتين فالربح ما هما فالربح.. وجيبلي ولادي نشوفهم عافا ولدي.. راني خايفة نموت وانا ما شايفاهومش.. بغيت نشوفهم توحشتهم..
فراس:براء راه مسافر..كي انديرولو
رقية:جيبولي.. راه هاداك كبدتي.. حتا حاجة ما تصعاب عليك..
فراس:يكون خير
رقية:فوض امرك لله وما ايكون غير الخير.. وانا انتسناك تجيبهوملي.. فرحني بشوفتهم.. راه شوفتهم هي لا نائصاني ونوض ندك وندردك عليكم عاود هههه كحكح كح
فرزس:حاولي على راسك.. والله يطول ليك فلعمر ويخليك لينا
رقية :ايييه اوليدي.. شحال ما طال لعمر.. يوفى يوفى الأجل.. الموت هي لي ما منها هروب
فراس: خلينا من هاد الهضرة دابا
رقية :واخة.. مزال نتين ومراتك مخاصمين
فراس:(خنزر) هي اكثر وحدة مقصح من جهتها.. بيسان نعذرها بلا عقل.. وحتا زينب موالفالها.. ولكن هي.. هي راها عارفاني وخبعات عليا.. وبلاااااا داك لكلام المسموم لي سمعت منها.. مزال لحد الساعة كيتعاود فوذني
رقية:ايوا عذرها اولدي..حط راسك فبلاصتها.. تخرج وترجع ما تلئاش بنتك وتلئاهم غبروها.. شنو دير!!!! راها بنتها هاديك وتحرئات عليها.. وفديك الساع راه كانت غير كتطلئ بلا ما توزن ما عرفاش اش كتئول.. ومراتك راك عارفها.. من يرم يومها فمها ما عندو فرانات.. لي جاتها على فمها كطلئها ولكريم الله
فراس:كون ما عرفتها محروقة على بنتها كان ايكون عندي معاها كلام خووووور.. راه ثاقيت الله فيها..
رقية :نعل الشيطان وخزيه.. ولد الحرام دخل بيناتنا فرتكلنا الشمل.. شوف الحاجة المزيانة فهادشي.. ها ولدك فرحان وشكون فحالو ومزوج بلي حبها ئلبو.. وتالاسين رجعات وحدة من العائلة دبصح ورجعات مرت ولدك.. وبييان وزينب راه حتاااا هما ايكونو ندمو على هادشي لي دارو.. والا طلبو السماحة ما عليك غير تسمحلهم.. ورؤيا معذورة خبعات على ئبل بنتها حيث خافت عليها.. والعائلات دااابا يرجعو كما كانو ون ولخواطر دابا تصفى.. وسعد دابا يجيبلو الله بنت الناس لي تليئ بيه.. راه كيئولك سهلها تسهال.
دازو يوماين اخرى.. خرجو فيها لالة رقية من الطبيب وداوها للدار.. ما بقاتش قادة تزيد كثر فلكلينيك.. داوها للدار ترتاح تما حسن ليها.. وفراس دار اتصالاتو باش يرجع براء وتالاسين من الرحلة.. وهضرة الحاجة كتعاود هاد اليوماين فبالو وكيفكر فيها مزياااان.. اما هو رؤيا.. الطريق لي كيعمرها كتخويها هي.. ولسانها ما بقى كيشرك هضرة مع لسانو.. وحتا الشوفة ما بقاوش كيشبعوها فيه.. كيجي يطل على الحاجة ويغبر عاود..
🍃🍃🍃🍃
جالسين فوسط الدار بثلاثة.. هنية.. حسن.. رؤيا.. ورقية فبيتها كترتاح.. رؤيا غير عاضة فالصبر وساكتة.. اما لي فالقلب ما يعلم بيه غير لي خلقها.. هنية شادة تسبيح فيديها كتسبح وحسن كيقرا القرآن..وكلهم باين عليهم الهم ولعيا وقلة النعاس.. وخصوووووصي هي..
كانو فوسط واحد الصمت غرييييب.. صوت النفس ديالهم كيتسمع.. وهما كل واحد فيهم فين ساافر ببالو.. حتا تسمع الصوني.. دازت قدامهم الخدامة مشات تفتح الباب وهما ما تحركاتش فيهم الشعرة.. شكون ايجي عندهم اصلا!! ايكون واحد من التوأم ولا فراس.. حتا كيسمعو صوت الطالون كيتقرقب.. وتبعوه صوت خطوات أخرى.. والسهاااااات.. حتا وقفو عليهم فباب الصالة.. هزو راسهم.. واقفين بزوج.. زينب وبيسان.. وتبعهم فراس من لور عاد داخل.. تصدمو وجمدو فبلاصتهم.. شافت فعيني بنتها وهي مزيرة بالبكية.. ما متيقاش بلي هي لي قدامها..
رؤيا :بيسان!!
بيسان :(ببحة باكية) ماما!!
رؤيا :بنتييييي
ناضت وقفات من بلاصتها تلاحت عليها بيسان معنقاها.. وبداااو دموعهم كيسيحو وكيبكيو بصوت مسموووع.. كل وحدة فين زيرات على لوخرا وما بغاتش تطلق منها..
حلفات وحدة ما طلق من لوخرا.. كيبكيو ويعيطو على لي يبكي معاهم.. حتا بكاو لي دايرين بيهم.. فرقاتها بزز فاش جراتها هنية تعنقها ودارت حقها حتا هي بلبكى والبوسان وطلقاتها هي شدها حسن..
بيسان:جدووو اههئ توحشتك اههئ اههئ
حسن:(باس راسها كيبكي ) الصغيرة ديالي.. بنتي لحبيبة.. على سلااامتك
طلق منها فاش جراتها رؤيا عندها عاود مزال ما شبعات منها.. وما مسوقااش لا لزينب لي واقفة لا لفراس لي حداها..
هزات نص عينيها فباها لي واقف هاز مناخرو للسماء وكيتفرج فهاد الفيلم.. دموعها معمرين عينيها وهي كترمش فيه.. شافتها رؤيا كتشوف فيه ودوراتلها وجهها عندها..
رؤيا :شوف فيا وقولي!! فاين!!
بيسان:فف.. فف.. فواحد الدار
رؤيا :شمن دار!! فاين جات!!
فراس :(بصوت قاصح) كانت فالمانيا.. فالدار دالجبل
خرجات عينيها فيه.. ودارت شافت فبنتها لي حانية راسها.. ورجعات شافت فيه كتنهج..كانت ديك الدار هي لي خداها ليها فاش كانت حاملة ببراء جاية وسط الغابة ومعزوووولة بوحدها..
بيسان :(جراتها من يديها كتبكي) عاااافاك اماما صافي.. بركة اههئ اههئ ما دابزوشي بسبابي عاافاك.. لي وقع كافي عافاك
شافت فيه مطولا معبسة.. وشافت فزينب لي واقفة حداه مقنتة وغير كتشوف بعينيها وحانية راسها.. حالتها حالة.. فيين هي زينب لي كانت ما تباانش اذا ما كانتش مقادة الحالة.. دابا لابسة جلابة من الطرف وجامعة شعرها بقراصة وحنوكها دخلو فبعضهم وحفرو حفرة..
بيسان:انا مزيااانة اماما.. غير ما دابزوشي.. والله ما كان خاصني والو تما من غيركم
هزات عينيها فيه معبسة وهو مزال كيشوف فيها ويسوط.. وزفر وضرب ضربة فالحسط وتم خارج فحالو وهي قلبات وجهها كتشوف فبنتها وتمسح علىَ شعرها..
خرج هو.. وهي دارت عند بنتها وبقات زينب واقفة حانية الراس وحسن واقف مخنزر فيها.. شافت فيهم هنية حتا عيات وتنهدات..
هنية:اجي اختي زينب تجلس اجي
زينب:(شافت فيها وشافت فحسن وعينيها طااايبين من تحت بقوة لبكى )
هنية :اجي ترتاح(جراتها هنية جلساتها حداها)
بيسان:سمحولي.. انا سبابكم فهادشي اههئ اههئ
رؤيا :صافي ابنتي.. بركة من لبكى
زينب:نتي ما عليك ذنب.. انا لي مني لافوط اههئ اههئ
حسن:ايوا مزيان منين عارفاه
هنية :سي حسن.. نعل الشيطان
حسن:(زفر) الله ينعلو ويخزيه
هنية:وا صافي.. نساو لي فات.. وبلا ما تزيدو تكبرو ألقضية راه لي فينا يكفينا
حسن:(شاف فزينب مطولا) الله يهديك هدا ما نقولك.. ما درتي فيها ما يصلاح
تنهد وجلس قالب وجهو وساكت حتا حس ببيسان لي تخشات فيه معنقاه..
بيسان :ما تغضبشي عليها عافاك.. ماشي غير هي بوحدها لي غلطات.. ما تلوموهاشي بوحدها
حسن:نتينا راك صغيرة وهي مولاة لعقل زعما لي خاصها تفقهك.. ساعة هي غير ما جراتك للهاوية معاها
بيسان: سمحلنا عافاك اجدو.. نبوسلك يدك (جراتلو يدو وهو يحيدهالها)
حسن:استغفر الله..
بيسان :عافاك اجدو.. سمحلها وسمحلي.. عافاك
حسن:لا حول ولا قوة الا بالله.. (جرها عنقها) صافي سكتي
بيسان :(كتبكي) اتسمحلها ياك
حسن:يكون خير
سكتو كل واحد فين مكمش فقنت.. رؤيا عينيها غير على بنتها.. ما بقات مسوقة لحد.. والباقي كلها فين قالب وجهو وزينب كون لقات الأرض تفتح وتسرطها.. ما لقات فين دير وجهها.. وهي حاسة بكلشي كارهها فهاد اللحظة.. حتا ناضت بيسان كتمسح وجهها..
هنية :ايوا ييه.. حتا ما نكونشي عارفاك لا نتينا لا هو.. دورو دورو وترجعو لبعضكم
رؤيا :الا هاد المرة.. حيث زاد فيه وبزااااااف
هنية :(عوجات فمها) امممم... على شوية ونثيقك
رؤيا :دابا تشوفي
هنية :اه دابا نشوف.. ونشوفو كاملين.. زينب.. مشي هضر مع راجلك وراديه.. عافاكم لما فكو هاد لحريرة..
زينب:ايغوت عليا وما عندي وجه لي نهضر بيه ولا نشوف فيه
هنية :حسن قلبو كبير.. واخة يدور فيك راه مرجوعتو يتهدن..
زينب :تنهدات) ان شاء الله.. خليه من بعد ونهضر معاه.. (حنات راسها) اما فراس محال باقي يطوف بساحتي
رؤيا :اصلا داك ولدك مريض.. عندو شي فيزيبل ناقص
هنية :سكت ها هو يرجع يسمعك تنوضوها عاود..
رؤيا :ويسمع انخاف منو!
هنية :راه راججلك هاداك اشمن.. خاصك تحتارمو
رؤيا :حتا يكون هو كيحتارمني بعدا.. حاسب راسو سبع وحد ما فحالو.. بشمن حق يفرقني على بنتي!!! شفت حتاااا شفت فأنانيتو ما شفت.. حادك غير فلغوات وتصعصيع
هنية :ايوا بعدا هو صابرلك لهبالك.. لا نسيتي ما دوزتي عليه.. وواخة هايداك.. كيغوت عليك وما يخلي لي يغوت عليك.. ويا وييييل ويييلو لي يجي جهتك ولا يمسك بشعرة.. نتينا عاارفة راجلك كيتعصب.. وفاش كيتعصب ما كيبقاشي يشعر ولا يفكر.. وهاداك عيبو ماشي دابا عاد اتعرفيه.. وراه حتا زين ما خطاتو لولة.. ونتينا عندك داك لسان مااضي كيخرج غير لعسل.. كتسكت تسكت.. وفلخر كطلقيها بحال القرطاس..
رؤيا :علاش شني عملتلو انا! فاش غلطت معاه
هنية :علاش تخبعي عليه!!! ياك عارفاه وعارفة بلي ما كيبغيييشي لي يخبع عليه شي حاجة ولا يلعب مور ظهرو.. راه ستر الله داك نهار ما عطاكشي شي دقة ونتينا جالسة كتغاوت معاه.. غير ديك الهضرة راك خليتيها كتحفر فيه كيف السم
رؤيا :قلتلو غير الحق.. ما كذبتشي عليه
هنية :من نيتك.. كاينة شي وحدة تقول لراجلها ندوز فيك وفغيرك.. بحال الا ما كيسوى عندك والو.. واش دوزتو لقليل؟؟
رؤيا :اه على ولادي ما نعقل على حد.. وزايدون هو لي عصبني
هنية :ايوا شني انقولك ابنتي.. الله يكملك بعقلك.. شرفتي ومزالة مزنزنة.. غير بقا ترطا هاكة حتا تجبر غير يدك والريح.. راجلك مزااااال زين وعاطي للعين.. الا ضضرباتلو فلخوا يسرسبك ويديها بنت بنوووت.. وبقا نتينا هنا عليا (كتعيبها) هو عصبنييي ما كذبتشي عليه (عطاتها صبع) وديك الساعة طلعي معاك هذا..
رؤيا :الماء والشطابة
قالتها وقلبات وجهها كترمش.. دايرة راسها ما مسوقاااش وهي راه الوسواااس كينخر فيها.. وهنية بلعاااني دخلاتلها هاد الفكرة فراسها.. عارفاها معكسة وراسها قاصح.. واتبقى هازة مناخرها للسماء.. وعارفة الغيرة والخوف هما لي يقدرو يخليوها تحرك وتبدا تفكر ويتنادم معاها الحال.. اما هنية فما جاية لا فصفو لا فصفها هي باغاهم غير يتصالحو ويتجمع شمل كل واحد فديك الدار بحالو ايام زمان
صبح الصباح.. وناضو يتجمعو على الطبلة دلفطور.. عاد رجعات الروح فيهم شوية.. واخة فراس مزال ما كيشرك معاهم الطعام ولكن على الاقل طبلتهم بدات تعمر كيف لول.. شحال ما تجمعو هاد الجمعة واخة شحاااال من واحد ناقص.. وشحال من واحد غير ساكت منهم حسن لي قالب وجهو على زينب لي ما عندها وجه لي تهزو فيهم.. وجهاد وجواد حاميين السوق فرحانين بختهم لي رجعات..فطرو وخرجو يمشيو للخدمة لي كاملة ترمات عليهم فهاد الايام.. وخلاوهم هما تجمعو على رقية فبيتها مونسينها..
حسن:الحاجة.. كيف صبحتي
رقية:نحمدو الله.. حسن من ئبل
حسن :الحمد لله داكشي لي بغينا.. يله نخليكم
رؤيا :جلس معانا فاين اتمشي
حسن: خليكم نتوما عيالات بيناتكم.. انا انخرج نتمشى
رؤيا :واخة.. على خاطرك.. ما تعطلشي انعملو الرفيسة لغذا
حسن:ان شاء الله
تم خارج فحالو وداز من حدا زينب.. خنزر فيها وخرج.. وهي حنات راسها كتلعب بصباعها.. حتا نطقات رقية..
رقية:نوض لحئ راجلك ونتين تفلي فصباعك
زينب:(تنهدات) خليني جالسة.. ما ناقصني هضرة نسمعها
رقية: الهضرة ما منهاش هروب.. هادي ديرها فبالك.. ولكن شحال ئدكم تبئاو هاكة.. شحال ما ئصح معاك رطب راسك نتين شوية وخليو هاد لعجاجة دوز
زينب :ما عرفتش
هنية:وشكون ايعرف.. نوض نوض.. نوض تبع راجلك
زينب:(بتردد) وو.. واخة.. اووف الله يستر
رقية:غير مشي ما يكون غير الخير ان شاء الله..
لحقات زينب راجلها.. وبقاو هما جالسين كيهضرو وكيحاولو يفوجو على بعضهم وبنساو الهم.. داز شحال دالوقت حتا كيسمعو صوت ماشي غريب عليهم فالباب..
شامة:يما؟؟؟
هزو راسهم فيها.. داخلة كيف الرعدة.. تقدمات بالزربة جلسات حدا رقية كتقلبها بعينيها.. وبيسان غير شافتها تزير قلبها.. حيث تلقائيا كتفكرها بيه..
شامة:كيف نتينا!!! شني وقعلك!! قولي!! باش كتحس!!
رقية :بشوية عليك ابنتي.. الحمد لله على لطف الله..
شامة:(دارت شافت فرؤيا والباقي) حراااام عليكم والله.. علاش ما قلتوهاليشي!!! كون ما سعد تلاقى بلولاد وقالوهالو كاااع ما نعرف!!! شني زعما.. ما بقيتشي محسوبة منكم ولا؟
رؤيا :راه غير تفتنا اختي.. ربي لي كان عالم بينا
شامة:واخة هايداك.. هزو غير تيلي وقولوهالي.. غير ميساج.. مهم ما تخليونيشي فدار غفلون.. اولا حرام؟
رقية :ونتين حرام الا هزيتي تيليفونك وسئسيت فيا!!!.. ياك من نهار وئع داك المونتيف ما بئيتي كتسول ولا تسوئ لشي حد.. ضربتي على كلشي بكروا حمراء.. غير رؤيا هي لي فيها الخير بئات كتمشي عندك.. أما نتين حرام ولا تجي وطل علينا..يموت ويعيش الواحد ونتين لا خبار
شامة:(تحشمات) ماشي هايداك ايما.. غير الوقت وصافي.. والحالة ما كانتشي حتا لتم
رقية :ايوا حالتنا ما كانتش حسن من حالتك.. لي طحتو فيه طحنا فيه..غير نتين هزيتي فئلبك بالزااااايد.. ونسيتي حئ الملحة والطعام لي شركنا
شامة:حشومة عليك ايما.. علاش كتقول هايدا
رقية :ايوا الحئ ما كيعجب حد.. هذا حال بنادم
ََشامة:اودي راه غير الشيطان فاش كيحضر.. اما راه لي مكتابة هي لي اتكون..
رقية :(بنص عين) ايوا الله ينعلو ويخزيه
شامة:شني دابا؟ ؟مقلقة مني!!
رقية :ما مئلئة ما والو.. غير ئلت لي كاين
شامة :لا مقلقة.. بلحق سمحلي.. (باستلها راسها) مل تديشي عليا.. غير ساعة غضب
رقية :الله يسمحلنا جميعا.. ويصفي خواطركم.. راه هادو عائلتك..
شامة:الخاطر صااافي.. الحمد لله.. مهم انا من جهتي نسيت لي وقع فحال الا عمرو ما كان.. ودابا هما تزوجو ولي عطا الله عطاه.. نتمناولهم غير التيسير
رقية :اميييين..
رؤيا :ايوا وما عولاشي تسلم.. غير دخلتي ودرمتي كي البقرة
شامة:هههه حاشاك.. غير الخلعة عملاتالي.. فاش قالالي سعد شنقت عليه قلتلو دااااابا تديني عندها..
رؤيا :واش جا معاك!!!
شامة:اه.. راه فالباب
حسات بمها كتشوف فيها.. دارت شافت فيها.. وكتقرا عينيها لي خيفانين عليها.. وزيراتلها على يديها بابتسامة كأنها كطمنها على حالها..
شامة:مهم.. راكي عارفة.. اخر مرة جا ما كنتشي حتا لتم
هنية :اودييي قولو يدخل.. واش ايبقى برا..
شامة:ما ايبغيشي
رقية :ايبغي.. ئولو يماك بغاتك وهو ايجي
شامةة:ايوا صبرو نسلم عليكم بعدا
ما عجبهاش الحال تشوفو.. كانت باغة تبعد على وجهو فمرة.. فهاد اللحظة تمنات كون بقات فديك الدار وداك لخلا.. مهم بعيد عليه.. ولكن الايام مصرة تفكرها بحريقها..
بيسان :والو.. غير قنطوني هاد لحوايج.. نبدلهم وندوش ونجس
رؤيا :واخة بخاطرك
رقية :ما تعطليش.. كتونسني
رؤيا :وحناااا!! ما كنونسوكشي
رقية :نتوما راكم طلعتولو فراسي.. هي لي شحال ما. شفتها
دخلات عليهم شامة.. وهما عينيهم مزالين على الباب حاضيينو واش ايدخل..
رقية :ما بغاش يدخل!!!
شامة:بزز...
تسمعو خلفات عند الباب وتحنحينة قوية ودخل بشوبة حشمان من راسو وبزز باش كيكمل الشوفة فعينيهم..
سعد :السلام عليكم
الجميع :وعليكم السلام
رقية :وا على سلااااااااااااامتك.. زارتنا البركة
هز عينو فيها بابتسامة خجولة وحك عنقو وهو كيشوف فجنابو.. حنحن وقرب بشوية وهز يديها باسها..
سعد:لباس عليك
رقية :ما تشوف باس اولدي
سعد:(شاف فهنية ورؤيا) عزيزة.. خالتي.. كيبقيتو!
هنية :الحمدلله.. الله يرضي عليك
رؤيا : نقولو الحمد الله..
حس بيها قالتها فوق خاطرها وهي كتميق فيه وتشوف فيه بنص عين.. قلب وجهو ورجع شاف فرقية..
سعد :انا انمشي.. جيت غير نشوفك
رقية :فين اتمشي.. على دخول الحمام فحال خروجو
سعد:الصمت
رقية :علاش ما بغيتيش تدخل؟؟
سعد:اححم.. غير.. مهم.. حيث.. عندي الخدمة عليها
رقية :مالك وائف عليك لباطرون.. ياك المحل محل باك.. تفتحو وتسدو امتا ما حبات خاطرك
سعد:وغير..
رقية :ما كاينش وغير.. سمعني اولدي.. لي وئع ما هو غير المكتاب.. ما كتابيتوش هذا ما كان.. ولكن حنا راه عائلة.. حتا حد فينا ما خاصو يخطى لاخور.. وئع المشكيل.. ولكن خاصنا نساوه ونفوتوه اولا!
سعد:(ساكت وعاقد حجبانو مركز معاها) ونعم بالله.. ولن يصيبنا إلا ما كتب الله لنا
رقية :هااااااا.. يرضي عليك دابا عجبتيني.. ولكن ما خاصك تبئى هاز فئلبك وااالو من جيهة اي واحد فهاد الدار
سعد :(تنهد وشد يديها وسط يدو وباسها) سمعيني ايما.. تالاسين كنت باغيها.. وبصح.. ولكن كيف قلتي ما كتابتليش.. ويمكن هادشي فيه خير ليا وليها.. وانا الحمد لله.. تصالحت مع راسي ورضيت بلي مكتابلي.. ومأكد بلي ربي مزال ايعوضني خير.. ولكن.. انا لي خرجت العيب.. والصراحة ما بقالي وجه لي نشوف فيكم.. الشيطان لعبلي على دماغي.. وخلينا نهضر ونتصرف بلا ما نشعر..
سعد :سمحولي وعذروني.. خرجت على طوعي.. ولكن ماشي بخاطري..
هنية :عاااذرينك اولدي.. الله يحسن لعوان.. ماشي ساهلة
رقية :صافي نسى عليك.. ورجع سعد لي كنعرفوه
سعد :(ضحك) الا نتوما نسيتو كاين لي ما اينساش.. اولهم عمي فراس
رؤيا :(كتمتم) دراكولا.. خالق الرعب فبنادم
رقية :عمك غير تهضر معاه وطلب منو السماحة اينسى ما وقع
رؤيا :(بسخرية) على اساس سمح للي قبل منو ههه بنتو ونفاها
رقية :سكت نتين.. يا ئول شي كلمة مسكدة يا سكتنا
رؤيا :ها هي ساكتة
رقية :ما ديش عليها.. سمع مني.. راكم مزالين ما عارفين فراس.. قااصح ااه.. كيتعصب بزاف اااه.. ولكن كيسامح.. خاصو غير شوية دالوقت
سعد:ان شاء الله.. خليه حتا يفوتك الحال نتي.. ونهضر معاه.. ومزال خاصني نهضر مع شحال من حد
رقية :(تبسمات فوجهو) يرضي عليك ويكملك بعئلك..
سعد :امين.. وربي يخليك لينا
دخلات عليهم الخدامة قاطعاتهم وسط هضرتهم.. هازة صينية فيها كاس دالقهوة..
الخدامة:سمحولي!
رؤيا :مريم!! شني بغيتي
الخدامة:بغيت لالة بيسان.. طلبات قهوة!
رؤيا :اااه.. طلعات لبيتها.. طلعيهالها
الخدامه:واخة..و سمحولي(خرجات فحالها)
سعد:اححم.. يله..سمحولي.. خاصني نمشي
رقية :واخة.. بلحئ عنداك ما ترجعش!
سعد :هههه انرجع ان شاء الله
رقية :مرحبا بيك اولدي
باس راسها وناض وقف وتنهد.. قرب جيهة رؤيا وابتسامة راسمها على وجهو.. وهي كتشوف فيه بنص عين.. ما معصباش منو على لي دار.. حيث عاذراه.. ولكن فاش كتفكر حالة بنتها ولي وصلاتلو.. ما كتقدرش تمنع راسها باش تقول بلي هو السباب..
سعد:(جلس قرفصاء عند رجليها) مزالة مقلقة مني!
رؤيا :ما عندي علاش نتقلق منك.. لي فات مات
سعد :مأكدة!!!
رؤيا :اممممم
سعد :ايوا وفاين هي الضحكة ديالك.. منين دخلت ما وريتيهالي!
رؤيا :الصمت
سعد :شفتي قلتلك مقلقة مني.. سمحيلي اخالتي.. راكي فمقام الواليدة.. وعارف راسي فأخر مرة قللت احترامي قدامكم.. ما تديش عليا وعذريني
رؤيا :(شافت فيه مطولا وتنهدات) ما تخافشي ما مقلقاشي منك.. غير الساعة لله.. الله يسامح اولدي..(تبسماتلو) فحالك فحال ولادي.. وكلنا كنغلطو.. ولا عليك عاااذراك
سعد :(باسلها يديها) لهلا يخطيك..
رؤيا :(تبسماتلو)
ناض وقف وداز عند هنية لي شافت فيه كتضحك وتبسم.. وحنا لمستواها باس راسها..
طلع حاجبو وطل عليها.. واقفة قبالة لمراية مقاتلة مع السنسلة ديال واحد السالوبيط باش تسدها.. ما شافتوش.. حيث ما دارتش تشوف شكون داخل.. شعرها مزال ما نشفاتو.. كانت يله خارجة من الدوش.. تبسم هو بخبث.. وقرب بشوية وحط يدو على يديها لي شادة بيها السنسلة من لور وهز عينو فيها من لمراية.. لقاها فاتحة عينيها فيه حتا لخر.. تبهضات بهضة وحدة.. قلبها وقف.. شاف فيها هو هاكاك.. تبسم وعينيه فعينيها من لمراية.. وشد السنسلة بين يديه كيطلعها..ويله وصلها للنص وهي تبدل تعابير وجهها.. من الصدمة للغضب.. وتنترات منو بقوة ودفعاتو بالمرفق ديالها ودارت تقابلات معاه..
بيسان :ههه لا لا اكيد نتينا مريض.. (جمعات الضحكة وخنزرات فيه) خرج من هنا.. خرج فحالك
طلع حاجبو وقرب منها وهي شافت فيه ورجعات لور حتا لصقها مع لمراية لي لاصقة فالحيط.. وبابتسامة جانبية هز يديه وحاصرها بيهم وهو كيشوف فعينيها لي كيمشيو ويجيو..
سعد :ما توحشتينيش!!
شافت فيه ما فاهمة والو.. وتعابير الاستغراب باينين على وجهها..
بيسان :علاش كتقلب!! فاين باغي توصل
سعد:سولتك.. جاوبي
بيسان :شني كتحساب راسك هااا؟؟ شكون نتينا باش نتوحشك.. وعلاش انتوحشك اصلا.. خرج فحالك.. قلتلك بعد مني.. فرقني علييييك.. واش ما كتفهمشي
سعد :(زاد قرب منها) لي كيبغي كيتوحش.. ونتي كتبغيني او لا لا!
بيسان :(سرطات ريقها ودفعاتو من صدرو ولكن ما تزعزعش) بعد.. بعد عليا!
مشااااو عينيه سارحين وسط عينيها لكبار لكوحل لي هازاهم فيه وكترمش بتوتر..وطلعات معاه ريحة باندوش لي غسلات بيه.. وريحج شعرها لي مغسول.. مجموعة روائح خلقو ريحة زويييينة.. وتبسم ابتسامة خفيفة وهو كيشوف فيها..
سعد:ياك كتبغيني!
بيسان :(بحدة) كووووووونت.. زماااان يا رحمان.. ودابا بعد عليا..
سعد:شنو زعما.. ما بقيتيش كتبغيني
بيسان :لا.. ما بقيتشي.. غلطة وما اتعاودشي
سعد:ههه دغيا نسيتيني..
بيسان :ماشي غير نتينا بوحدك لي كتقدر تنسى دغيا
سعد :كاين فرق بين حالتي.. (حط صبعو على صدرو).. وبين حالتك.. (حط صبعو على صدرها)
بيسان :(زولاتلو صبعو بالنترة ودفعاتو عليها) ما عرفتكشي فاين باغي توصل بهادشي ديالك.. مهم بغيتك تعرف بلي انا نسيتك.. صافي.. بااااح.. محيتك من حياتي..
سعد :(بتحدي) ما تقديييش
بيسان: شفتك كتهضر وثااايق فراسك
سعد :وبزااااف
بيسان :ههه اهااااا.. مزيان.. بلحق انا هضرة وحدة وقلتا.. (حطات صبعها على صدرو كاشارة) نتينا صفحة وطويتا.. وسدينا
تبسم وهو كيشوف فصبعها لي على صدرو.. وهز عينيه شاف فيها.. وشد يديها لي حاطاها عليه بين يديه وجرها حتا تزدحات معاه.. وهمس بصوت خافت وهي مبلقة فيه.. متفاجأة من تصرفاتو..
سعد:ما اتنساينيش..(حنا لمستواها وقرب لوذنيها) ما انخليكش.. حنا عاد انبداو
بعد شوية على وذنيها وطبع قبلة على حنكها خلاها جاااااامدة فبلاصتها وكتشوف فجيهة وحدة مصدوووومة وحالة فمها وعينيها.. بعد وشاف فيها.. ضحك وشاف فيديها لي شاد مزال صبع السبابة مهزوز.. تبسم بسخرية.. وطوالها داك الصبع وبعد عليها وفعينيه نظرة تحدي وابتسامة وااثقة..
سعد:انتشاوفو.. وقريب.. ومن هنا لتما.. ردي البال لراسك.. (غمزها)
شاف فيها لآخر مرة وهي مزالة جامدة فبلاصتها.. وتبسم وقلب الدورة خارج فحالو.. مخليها هي فبلاصتها مرفوووووعة.. كما كانت بقات.. واقفة وكتشوف فالباب حيث كانت متبعاه وهو خارج.. بقات هاكاك كتستوعب شنو وقع عاد دابا.. خلا قلبها ايخرج من بلاصتو.. حسات بشي حاجة هابطة مع حنكها.. وغمضات عينيها خلاتهم يهودو بخاطرهم وطاحت فاشلة فالارض حيث الرجلين لي يوقفو باح..و جلسات فالأرض كتبكي فصمت.. حتا هزات راسها للفوق وبصوت مقهووووور مخلط مع البحة دلبكى نطقات..
صوت يقول.. الصبر.. الصبر..فقط تعلقي بحبال الأمل.. 🌱
ومن شدة تعلقي تمزقت الحبال.. وسقط قلبي مستنجدا..🌱
إنها خيبة أمل..🌱
حاولت جاهدة القيام ونفض الغبار عنه وترميم إصاباته.. 🌱
لكن من شدة قسوتك.. عدت لترفعني بحبال الأمل من جديد..🌱
وها أنا هنا. انتظر سقوطي ثانية .. 🌱
بعد مرور يومين:
كانت ناااااعسة احلى نعسة.. مكمشة ففراشها وغير وجهها لي كيبان.. ووسط احلامها سمعات صوت حنين كيفيقها.. وحلات عينيها بشوية وهي كتستوعب وكتشوف فجنابها وعينيها مزالين ملاصقين ما ساخياش.. شافت فيه من بين رموشها مقوصة حجبانها.. كان فوق راسها جااس قرفصاء وراسم على وجهو تعابير غريبة..
براء :صباح الخير
تالاسين :(بصوت خافت) صباح النور.. شعندك!! علاش فيقتيني
قالها وناض كيجمع لي صاكادو ويحطهم على ظهرو والا كانت شي حاجة ناسيها يهزها وهي ناضت واقفة بالزربة حتا حسات بالدنيا دارت بيها حيث وقفات على غفلة.. شدات فراسها وغمضات عينيها حتا فاتها الحال وقربات منو دوراتو عندها..
تالاسين :شني واقع ؟؟ شي واحد وقعاتلو شي حاجة ياك؟؟ قولي!!!
براء : بلا ما تسوليني بزاف.. حيث براسي ما عارفش.. مهم دابا لبسي حوايجك راهم كيتسناونا (ناض وقف خارج)
تالاسين :(شداتو جراتو) صبر.. زربتي عليا.. ما يمكنشي ما عارفشي شني كاين.. عارف ومخبع عليا.. قولي!
قلب وجهو وتنهد.. ورجع شاف فيها ورسم ابتسامة على وجهو وشد وجهها بين يديها وحط عينو فعينيها وخلاها ترجع تسرح فالاحلام وهي واقفة..
براء :ما كنكذبش عليك.. انا براسي ما عارفش.. مهم لي عارفو الواليد هضر معاهم وحنا راجعين دابا للدار.. ولكن علاش ما عارفش.. (مسح على شعرها لي مرون بالنعاس) يله دابا لبسي حوايجك وان شاء الله ايكون عير الخير.. صافي؟
تالاسين :(حركات راسها باه وهي سااااهية فيه)
براء :يله طلقي راسك..
باس جبهتها وبعد شاف فيها وابتسامتو مرسومة على وجهو غاااارقة وسط لحيتو الكثييييفة لي كبرات بزاف هاد الفترة.. طلق منها وتم خارج فحالو ومخليها هي واقفة متبعالو العين حتا خرج وحطات يديها على صدرها شادة فقلبها لي كيشطح..
تالاسين : شحال زوييين؟
قالتها وخي مرفووووووووعة وسارحة فكوكب زمردة.. حتا حسات بالتبوريشة دالبرد لي ضرباتها وتحركات من بلاصتها كترمش..
خرجات من البيت هازة الصكادو ديالها فوق ظهرها.. شافت موراها فداك البيت.. وتبسمات وهي كتنهد.. خلات فيه ذكريات زوينة وقبيحة.. قلبات وجهها كتقلب عليه.. بانلها وسط ناس لقبيلة كيودعهم.. وتقدمات حتا هي عندهم وقابلوها بالاحضان ما ساخيينش بيهم.. والهيليكوبتر واقفة بعيدة شوية على حساب ريحها لمجهد..
وقفات كتسلم على الحكيمة.. وما محاولينش يهضرو حيث عارفين بلي ما ايفهموش بعضهم.. بعدات عليها كتبسم.. وشداتها الحكيمة من يديها وتمشات بيها وهي تابعاها باستغراب.. حتا وقفاتها حداه بجنبو وهو شاف فيهم بتعجب.. شداتلو يدو هزاتها.. وحطاتلو يديها فيدو وزيرات عليهم بزوج وتمتمات بكلمات وهي مغمضة عينيها.. فهموها بلي كتدعي معاهم.. شافت فيه.. وشاف فيها.. وتبسمو لبعضهم ورجعو شافو فيها وشكروها..
ودعوهم بحرارة وخاصة تيكا لي ما دوزش معاهم قليل.. وبعدو فحالهم غاديين قاصدين الطيارة وكيدورو ويشيرولهم.. حتا وصلو.. شدلها فيديها حتا طلعات ولحقها.. جلسات وحطات الكاسك على وذنيها ودارت سمطتها وخدات نفس طويييييل وهو جلس بجنبها.. طلات من لمراية.. كانت الارض كتبعد عليهم.. وبيوت السكيمو كيبانولها غاديين وكيصغارو وناس لقبيلة مزالين واقفين مجموعين فمكان واحد كيشيرولهم.. حتا حسات بيد تحطات على يديها ودارت شافت جيهتو وتقابل وجهو مع وجهها ورجعات براسها شوية باش ما تلصقش فيه..
براء :شكرا
تالاسين :علاش!
براء :حيث شاركتيني هاد الرحلة.. دازت حسن وانا معاك
تالاسين :بلعكس.. شكرا ليك لي خليتيني نعيش حاجات عمري عشتها.. واخة كنت انموت هههه
براء :(ضحك) هاداك غير قوة الطيران لي فيك
تالاسين :مزالة انرجع ونقولك.. سبابي هو ديك الكاميرا المنحوسة
تالاسين:(حولات تستدرك شنو قالت) زعما نتينا وياها ما كتفارقوشي.. احححم.. المنظر من هنا زوين.. طلل طلل.. شوف
قلبات وجهها كطل من السرجم وجرات يديها من تحت يدو بشوية وحطاتها وسط ختها كتحكهم ببعضهم.. وهو شاف فيها مطولا ورجع قلب وجهو كيتبسم.. شاف فالراجل لي جالس قبالتهم وعينيه عليهم.. وهو يحط قبضتو على فمو كيحنحن وجمع الضحكة وشاف فالسرجم..
🍃🍃🍃🍃🍃
كان كل واحد فيهم شاد بلاصتو وناعس.. وهي كتقلب فبلاصتها بوحدها.. من داك النهار ما شركو لفراش اصلا.. هزات راسها وناضت تجلسات.. ووقفات لبسات بينوارها وخرجات هابطة طل على رقية حيث مزالة كتخاف ينزاد عليها الحال فالليل.. وهي غادة فالكولوار حتا وقفها الضوء لخفيف لي كاين فجلسة صغيرة بالفوطوي جات فبلاصة بحال طيراسا كطل على الدروج.. وقفات فبلاصتها وبانلها جالس.. حاط راسو بين يديه وكيحرك صباعو بحركات دائرية.. هز راسو مغمض عينيه ورجعو لور موكيه على لفوطوي وتنهد بصوت مسمووووع.. شافت فيه مطولا مكمشة فمها ومطلعة حاجبها.. اما هو فما شافهاش.. كان مغمض عينيه.. وراسو ايطرطق عليه بقوة التخمام.. وكيفكر ويعاود يفكر ويزيد يفكر.. حتا فيقو صوتها من سهوتو..
رؤيا :شرب هذا
حل عينو فيها.. واقفة عند راسو ومادالو كاس فيديها.. ببينوار قصير حد الركبة دالساتان فاللون الرمادي فاتح معقود نص عقدة.. شاف فيديها وهز عينو شاف فعينيها.. ودغيا قلبات هي وجهها وحطاتلو الكاس على الطبلة وقلبات الطريق.. حتا حسات بيديها تشدات ووقفات فبلاصتها وهي عاطياه بالظهر..
زير على يديها كثر وجرها عندو كثر.. ورمى راسو فحضنها.. عنقها مزييييير عليها وحط راسو على كتفها.. خلاها مبهووضة فبلاصتها.. ولكن دغيا جمعات راسها ورجعات كتنتر من بين يديه ودفعو من كتافو..
رؤيا :طططلق مني.. ما تحاديشي فيا.. رخييييي
سكتات وهي كتسمع صوت غريب عليها.. عمرها سمعاتو منو.. كان صوت بكاء خااافت.. وحسات بعنقها فزك.. خرجات عينيها كتشوف قدامها.. دابا عاااد زاد صدمها.. وهي كتسمعو كيزير على فمو باش ما يتسمعش صوتو.. تزير عليها قلبها.. حسات بالقهرة.. كما كان كيبقى شريك حياتها.. وحبيبها وراجلها..
رؤيا :(باستفسار) فراس!!!! كتبكي!!!
زاد خشا راسو فعنقها ودفن راسو فيه وزير عليها لصدرو كثر وكثر..
واخة دفعاتو باش غير تشوف فوجهو ما بغاش يبعد.. حتا هز راسو وقلب وجهو كيمسح وجهو ما بغاش يشوف فيها.. شافت فيه وهو عاطيها بالظهر والدموع فعينيها.. دارت وجات قدامو وشافت فعينيه لي كيتفادا انها طيح فعينيها.. ما هضراتش.. فقط شدات وجهو بين يديها وتعالات على صباع رجليها وباستو وسط جبهتو وبعدات عليه وهو غير ساكت وكيشوف فيها.. هبطات يديها وشدات يدو وتمات غادة وهو موراها حتا وصلو لبيتهم.. وجراتو حتا وصل للناموسية وجلساتو.. وبصوت خافت وهي حاطة يديها على حنكو نطقات..
رؤيا :نعس وارتاح.. صافي
فراس :(بصوت مبحوح) ونتي؟
رؤيا :(بابتسامة) انا حداك
تنهد بقهرة وجرها جلسها فالطرف الفوقاني من الناموسية.. وتمد هو وحط راسو فحضنها ومعنق كرشها بيديه وغمض عينو.. وهي بدورها ما عطلاتوش وحطات يديها على راسو كتلعب بشعرو وساااااكتة.. حتا سمعات صوتو لغليظ لمبحوح..
فراس :سمحيلي
شافت قدامها كترمش وعينيها كيلعبو فبلاصتهم كتستوعب واش لي سمعاتو هو هاداك.. وحنات راسها شوية جيهتو..
رؤيا :شني؟.. شني قلتي!!!
سمعات تنهيدتو الطويييلة لي سخونيتها حسات بيها فكرشها.. وزير على كرشها كثر..
فراس :سمحيلي
رؤيا :(هزات راسها تنهدات ونطقات بعد صمت) حتا نتينا سمحلي.. ما كانشي خاصني نخبع عليك
سكتات.. وسكت هو.. وعم الصمت المكان حتا كسرو هو بصوتو..
فراس :عارفاني كنبغيك ياك
رؤيا :(تبسمات) ونتينا عارفني ما نقدرشي نعيش بلا بيك
ما زادش تسمع صوتو.. حدو تنهد وخشا راسو فكرشها وسكت.. وبقات هي كتشوف فيه وتلعب فشعرو حتا غفات وداتها عينيها..
🍃🍃🍃🍃
ناض كيحل عينيه بزز.. حاس برااااحة.. شحال ما نعس هادي اياااااام.. هز راسو فاش سمع صوت باب الحمام تحل.. لقاها خارجة منو.. شاف فيها هاز راسو.. وتنهد ورجع رخا راسو فوق لمخدة كيشوف فيها.. حتا قشعاتو فايق.. وتبسمات فوجهو..
رؤيا :صباح الخير
فراس :(بصوت مبحوح) صباح النور
مشات لبلاكار كتجبد حوايجها وكتهضر وهو متبعها بعينيه..
رؤيا :يله نوض دوش باش تصحصح.. انا انتسناك نهبطو نفطرو..
حسات بيديه حاوطوها من كرشها وخشا وجهو فعنقها كيشم ريحتها.. وتبسمات حاطة يديها على يديه..
فراس :توحشتك
رؤيا :(ضحكات) ههه مشي دوش.. ايكون كيتسناونا
فراس:واخة
باسها من عنقها وبعد عليها خلاها دارت كتشوف فيه.. مسح على خدها وتم غادي جيهة لحمام حتا شدات فيديه وقفاتو.. ودار شاف فيها..
شافت فيه كترمش.. واش لي سمعاتو صحيح.. واش قال بنتي؟؟؟... سكتات وعينيها عليه تالفة فبلاصتها.. وكلشي متفاجئ منو ماشي غير هي.. شافت فماماها بحال الا كتسولها واش بصح لي سمعات.. وتبسماتلها رؤيا وغمضات عينيها بمعنى بصح.. وهي تبسم ورجعات حنات راسها وجلسات مزيرة على فمها لي كيرجف وعينيها تغرغرو..هز راسو فيها لقاها كتبكي وهو يتنهد..
فراس:ما باغاش تفطري!
بيسان:(بصوت كيرجف) لا لا.. باغة.. هانا اناكل
هزات كاس دالعصير كتشربو ويديها كيرجفو وهما شادينو ودموعها هابطين وهي كتشرب والشهقة حابساها بزز.. حتا حسات بيه جلس حداها فالكرسي وشد كاس العصير من يديها وحطو فالطبلة..
فراس :سكتي من لبكى صافي؟؟
شافت فيه ورجعات هبطات راسها ما قاداش تشوف فيه وطلقات الشهقة وبدات تبكي بصوت مسموع..
فراس:(بحدة) ياك قلت بلا بكى؟ مسحي دموعك يله
هزات عينيها فيه وترمات فصدرو معنقاه كتبكي وتشهق وهو حط يدو على راسها معنقها..
بيسان :سمحلي ابابا.. عافاك سمحلي اههئ اههئ
فراس :شششش.. صافي بلا بكى..سكتي
بيسان :سمحلي اههئ اههئ
فراس :وا سكتي
هو ما كيزيد يقولها سكتي وهي غير ما كتزيييد تخشا فيه وتبكي.. وكيدوز يدو على راسها.. والعينين كلها عليهم.. هز راسو فمو.. لقاها ماشي حسن منها.. رجعات حمراااء بقوة ما مزيرة على فمها باش ما يتسمعش صوتها.. غير جات عينيها فعينو وهي تقلب وجهها ما قاداش تشوف فيه.. خدا نفس طويل.. وتبعاتو تنهيدة طول منو.. ونطق وهو. كيشوف فيها..
فراس :الواليدة!! حتا نتي كتبكي؟
بعدات عليه بيسان وهزات راسها فزينب.. لي شافت فيه وحنات راسها كتبكي..
زينب: انا سبابكم اههئ اههئ كون غير خليتيني فداك لخلا اههئ اههئ
مسح على وجهو وجات عينو فعين رؤيا لي قبالتو.. ولي عينيها دمعو معاهم.. وتبسماتلو وحركاتلو راسها.. تنهد وناض من بلاصتو وتمشى جيهتها وهي ما حدها كتحسو قرب وهي كتزيد تبكي وتشوف فالأرض.. حتا جرلها راسها وعنقها وهو واقف وجا راسها فكرشو..
فراس :صافي.. نساو لي فات.. صفحة وانطويوها..
زينب:(عنقاتو وزيرات) ما نويتش فيه الخايب اولدي اههئ اههئ والله ما نويت اههئ
فراس :صافي ولا عليك.. وقع لي وقع.. عسى أن تكرهو شيئا وهو خير لكم.. ما تبكيش صافي..
جواد :زيد الخاوة زيد.. ما كاينش معامن.. ما باغيش نمشي ونخلي مراتي هجالة وهي مسكينة مزال ما شبعات مني حتا شوفان
خرجو بحالهم مكملين طنيزهم.. كيضحكو ويخلقو السعادة.. مهم ضاحكين على الوقت.. ومفوجين على راسهم.. ولاقيين راحتهم فهبالهم..
طاح الليل.. وهما مزالين طايرين فالسماء.. ومزال قدامهم طريق طويلة تنهدات بتعب وهي كطل من السرجم وتجبد فرجليها لي ضروها بلجلاس.. وقلبات وجهها شافت جيهتو لقاتو ناعس وقالب وجهو جيهتها.. وراسو معوج ومعذب فالنعسة..تبسمات وهي كتشوف فيه.. من ديك الليلة وهي كتحماق تشوفو ناعس.. ما كرهاتش تحط يديها على لحيتو وتلعب بيها.. شافت فالراجل لي جالس قدامهم كانو عينيه كيحوالو بالنعاس حتا هو.. شافت فيه كدور فعينيها وقلبات وجهها جيهة براء وغي كتشوف فيه وتبسم فحال لهبيلة.. شافتو معذب وهي تقرب كتفها لعندو وهزاتلو راسو بشوية وكتحاوا ما تفيقوش.. حتا حطاتلو راسو على كتفها وحطات يديها تحت ذقنو قاداتلو راسو مزيان.. حتا عوطاتو وبغات تزول يديها وهي توقف فبلاصتها وكتشوف فالراجل لي قدامهم.. لقاتو بدا كيغيب.. شافت فبراء بنص عين.. وعضات على فمها مترددة.. وفلخر ما قوماتش وحطات يديها على خدو وخلات صباعها يسرحو وسط لحيتو بلطف.. تبسمات براحة.. عاجبها الحال.. ولحيتو كتحمقها.. واخة كبرات كتعجبها حيث عندو رطبة ومقادها.. كطلع يديها حتا كتقرب لاخر نقطة فخدو وترجع تهبطها حتا كتوصل لذقنو.. هزات يديها الشمال وشافت فالخاتم ديالها وشافت خاتمو فيدو.. وتبسمات ببلاهة.. ورجعات كتلعب بلحيتو.. وهكاك بقات مستمتعة باللحظة حتا نعسات حتا هي ورخات يديها طاحت على كتفو فحال الا معنقاه..
🍃🍃🍃🍃🍃
ضرباتو الفيقة.. شاف فجنابو كيصحصح.. بغى يهز راسو لقى شي حاجة متقلة عليه وشاف فين حاط راسو لقاه على كتفها.. ويديها مرمية عليه.. حك عينو باش يتأكد واش فايق دبصح.. غير حلهم وهو يتبسم.. وشد يديها بين يده وقربها لفمو وباسها من وسط كفها.. وهز راسو بشوووووية باش ما يفيقهاش وهي مع تزعزع مع هزات راسها وقلباتو للجهة لوخرا.. شاف فيها كيضحك وعض على شفاهو.. خلا يديها وسط يدو.. وجرلها راسها حطولها على كتفو.. ودور يدو موراها معنقها.. يد شاد بيها يدها ويد كتلعب بخصلات شعرها.. وهي حيث كانت معذبة وفاش عاوطها ارتاحت.. حركات راسها فوق كتفو جا على صدرو وكملات نعاسها.. مخلياه هو هاد المرة لي فرحان ومستحلي نعستها..
🍃🍃🍃🍃🍃
حطاتهم الطائرة فالجردة الخلفية ديال لفيلا.. فمكان مخصص لنزول الطائرات الصغيرة.. هبط هو لول واستنشق لهواء الرطب والمعتدل لي توحشوه فديك لبلاد.. ودار شاف موراه كانت نزلات حتا هي ووقفات بجنبو.. كانو مزولين الجواكط حيث يله بداو كيدخلو للمناطق الافريقية بدا كيجيهم الصهد.. وكانت رحلة طويلة.. وصلو مع الظهر دالنهار الثاني..
تالاسين :(خدات نفس طويل) توحشت المغرب..
براء : (شاف فيها بالجنب) على سلامتنا
تالاسين :الله يسلمك ههه..
قلب وجهو وشاف فالفيلا قدامو لي بعيدة بمسافة وتنهد..
تالاسين :فنظرك شني وقع حتا عمي صرد مورانا
براء :ما عرفتش؟ بلحق اكيد شي حاجة مهمة بزاااف.. (بسخرية) حيث اكيد ماشي توحشنا ههه
تالاسين :(شافت فيه) خايفة..
براء :(قلب وجهو عندها) مناش؟
تالاسين :اخر مرة خرجنا من هاد الدار.. اووف راك عارف.. ودابا انرجعو.. بشمن وجه انشوفو فيهم.. خصوصي عمي
براء :(حط يدو على كتافها وتقابل معاها) شوفي فيا.. نتي عارفة وانا عارف بلي حنا ما درنا حتا عيب.. قلنا لي عندنا ولي مزال ما باغي يثيق شغلو هداك.. صافي؟
تالاسين :اه بلحق..
براء :ما كاينش شي حاجة سميتها بلحق.. كثيقي فيا؟
تالاسين :(شافت فيه شحال وهي ساكتة عاد نطقات) اه..
براء :(تبسم) اذا صافي.. ثيقي بلي ما انخلي حتا حد يغلط فيكي بكلمة.. واخة؟
تالاسين :(حركات راسها)
براء :وزايدون راهم هما لي عيطولنا.. ماشي جينا بخاطرنا
تالاسين :(تنهدات) بصح.. الله يستر وصافي
براء :امين.. يله مشينا؟
شافت فيديه لي ممدودالها.. وهزات عينيها فيه بابتسامة وشداتها وزيرات عليها وتقدمو داخلين للفيلا..
🍃🍃🍃🍃
كانو جالسين كيتسناو لغذا.. اغلبيتهم فالدار.. حيث صادف الجمعة هاد النهار.. وكيتجمعو يتغداو مجموعين ضروري.. وكل واحد فيهم فين مخشي.. والرجال فالجامع كيصليو.. حتا نطقات رؤيا باستغراب كتهضر مع هنية وبيسان لي حداها..
رؤيا :واش سمعتو صوت الطيارة ولا غير جابلي بالي؟
هنية:(كتفرج فالخطبة وجالسة حدا التلفازة ما هياش هنا)
بيسان: ما عرفت.. يمكن غير دوك لحلاقم كيلعبو بلبلي ومجهدين الصوت..
إرحموني الجزء 15
محتوى القصة
التنقل بين الأجزاء