إرحموني الجزء 18

تالاسين :اواعدي على تغوت.. باغة تشوهنا.. شو سعد رخيها نمشيو.. خليها لنهار اخور عافاك 

سعد:وا لا... انهضرو دابا

بيسان :ما اترخيشي؟؟؟

سعد :(بتحدي) لا.. 

طاحت على اليد لي شادها بها بعضة.. كتبرك وتزيييييد تبرك... وكتعصصصر حتا رجعات حمراااء... وهو مزير على فمو مقصح وكيحاول يبعدها راسها وهي واااالو يبسات يبسة وحدة.. 

سعد:طلقي المسعورة طلقي.. احححح 

بيسان :اعععععععع.. 

طلقات منو كتنهج وعينيها خارجين فيه.. وكلها كتغزل... وذاتها كترجف بالاعصاب... وهو شاد فيدو.. ومزال ما طلق منها... 

تالاسين :اواعدي.. الدم!!!! سيلتيلو الدم الملعووووقة

بيسان :(كتغوت) وا رخي مني المرض.. رخي رخي رخي... ما بغيتشي نهضر معاك.. ولا نشوفك.. ولا نسمعك.. ولا طوف بساحتي فمرة.. بعععععد مني.. 

سعد :(زفر بغضب وشاف فيها) مالنا ما نخافوش... ياك لباس.. جالسة كتغوتي وترطاي عليا من الصباح شكااااين... غااااااا نتي لي كتعرفي تغوتي... (طلقها من يديها بالزعفة) هانتي... ها حنا طلقناك... سيري ولا جلسي... تبرهيش دوالو

بيسان :ما كاينشي شي برهوش قدك.. نتينا لي شني كتحسب فراسك.. وبشمن حق توقف فطريقي اااصلا ولا تشبر فيا... هااااا.. بشمن حق.. كتعرفني؟؟؟ انا بعدا ما كنعرفكشي

تالاسين :اواعدي سكتو.. فضحتونا.. كلشي كيشوف فينا

ما جاوبوهاش.. وكملو غواتهم.. واقفين مجابهين وكيتغاوتو.. وبزوجهم معصبين.. وتالا وشطهم كتسكت وتويل.. وحد ما جايبلها خبار... 

سعد :(بسخرية) الا كنتي نتي نسيتيني.. انا عاقل عليك ونتي مزالة كتمشاي بتسرويلة

بيسان :مشي عاودااااالوووم.. عقل ولا نسا ولا دبر محااااينك.. مهم اناااا.. خطيني عليك.. تشوفني فشي قنت قلب الطريق

سعد :دابا نتي شنو حاسبة فراسك.. من شحااال وانا صابرلك.. وكنقول راها مقهووورة وما نزيييبدش عليها.. ماشي مشكيل.. كتبقى بنت وكلشي دااار عليها.. ما نزيدش عليها انا... ولكن نتي غاااااا ديال لي يخشيك فشي حيط ويتهنى.. دايراها قدها قد راااااسك.. وزايدها بالجبوه ولغوات... كون كنت فبلاصتك ما نعاودش نهز صوتي

بيسان :ايوا بعد من طريقي ما نهز عليك صوتي ما تهز عليا حلوووقك... كتقلب عليا جبرتيني... السماحة وطلباناها.. بغيتي نركعلك؟؟؟؟

سعد :ركعي للي خلقك... نتي بلاااا عقل.. وانا داير فيك عقلي... قلنا كما كانت.. بحال ختك الصغيرة.. تربينا وكبرنا وما دوزناش قليل بزوج... ما نجيوش ونمسحو كلشي دقة... ساعة نتي... غا ديال لي يدوز فيك ويتهنى

بيسان :(عصبها) غاااااا مسح انا من عندي.. واش ما عندك نفس ولا شني.. كنقولك بعد مني ونتينا عاد ما كتزيد تلصق

سعد: عرفتي.. والله حتا تستاهلي.. تستاهلي اي حاجة وقعاتلك ولا اتوقعلك.. انا بقيتي فيا.. بلحق دابا..

طلعها وهبطها بنظرة بحال الا ما حاملهاش... زااااااد عصبها كثر وكثر.. وقلب وجهو شاف فتالا لي مصدووووومة..وكيهضر وهو معبس.. حيث عصباتو..

سعد :تالاسين.. كنت باغي غا نقولك سمحيلي... غلطت فحقك.. وخرجت فيك العيب.. ولكن كانت ساعة غضب.. وما كنتش عارف راسي شكندير... ولكن فلخر نتي صدقتي ما عليك والو... (قلب وجهو شاف فبيسان بغضب) التخرويض صدق جاي من جهة وحداا خرا... بنادم كيضربك فظهرك.. ويضحك فوجهك.. ويزيد يدفع جبهة من الفوق

بيسان :(هزات صبعها وغوتات) شووووو زدتي فيه والل...

سعد :هبطي داك الصبع... وسدي داك الفم.. حد ما قالك هضري ولا هضرك

شافت فيه كتبخ الدخان... وتغزز فسنانها بغضب.. وهو غااااا ما كيزيد يحرق فيها.. وبقات تالا بيناتهم ما عارفة شمن طرف تشد...

سعد :انا غلطت فحقك.. وظلمتك... الزواج ما كتابلناش... ولكن كنتمنى ما نقطعوش حتا العلاقة لي كانت بيناتنا.. حنا خوت وانبقاو خوت اولا؟؟؟؟

شافو فيه بزوج... تالا تالفة... ما عرفات تهضر ولا تسكت.. هو كيهضر ومعصب... وبيسان كتشوف فيه ما كرهاتش تقجو وكتزفر... وتنهج.. وهي بيناتهم مفافية...

بيسان :(زفرات) تالا.. انا ماشة.. فاش تسالي لحقني

سعد:من الصباح ونتي طلقلي يدي نمشي بحالي فاش طلقناها لصقتي... بغيتي تمشي هااااا طريق.. وخلي عليك البنت كنهضر معاها.. حتا نساليو على خاطرنا

زفرات بغضب... وفنفس الوقت ما رضاتش.. شافت فيه مطولا.. وقلبات الطريق غادة بحالها.. 

تالاسين :بيسان صبر.. تسنا.. (دارت عندو كتهضر بالزربة) سعد انا ما معصباشي منك.. الله يسامح كلنا كنغلطو.. وحسب بحال الا ما وقع والو.. 

سعد :فرحتيني...شكرا بزاف.. حنا صحاب وخوت ياك

تالاسين :اه ضروري.. ودابا سمحلي خاصني نلحقها

سعد :(دار شاف فبيسان) سيري..عندك تمشي يطرطق فيها شي عرق... مريضة

تالاسين :بفففففف بسلامة.. 

لحقات عليها كتجري... وهي كتخلف عشرة دالخلفات فخلفة وحدة.. وكتعيط وتعاود وهي ولا كتجاوبها.. وهازة شي صيكان فيديها ديال داكشي لي شراو.. حتا سخفات عاد لحقاتها... 

تالاسين :الزمر.. وقف شعندك.. سخفتيني

بيسان :عصبني يعطيه مصيبة.. يعطيه دقة.. يعطيه ل... 

تالاسين :ششش... صافي سكتي.. بركة 

بيسان :(شافت فيها)بقى فيك!!!.. كون غا بقيتي علاش لحقتيني..

تالاسين :(خنزرات فيها) بلا هاد الزعتر ديالك دابا 

بيسان :كنهضر من نيتي

تالاسين :صافي قال لي قالو.. وسالينا.. 

بيسان :وا السيد كان باغي يجلس يهضر معاك.. كون جلستي

تالاسين :بييييييييسان.. زدتي فيه

بيسان :علاش؟؟؟

تالاسين :علاش كتمعني؟؟؟ السيد كيهضر عاااادي.. باغي غير يطلب السماحة.. وكيقولي نبقاو خوووت.. ونتينا باغة تفهمها عوجة!!!! وزايدون هو كان باغي يهضر معاك.. ما شفتيهشي كيفاش عمل عليك فلول.. نتينا لي بقيتي كتغوت.. 

بيسان: وشني كنتي باغاني ندرعو؟؟؟ وزايدون ما كذبتشي عليك.. ياك السيد كيبغيك.. ودابا عرف بلي ما تزوجتيشي بخاطرك... بحال والو يبغي يرجع.. عطيه فرصة.. شني فيها

تالاسين :(غوتات معصبة) صااااااافي... زدتي فيه... وزدتي فيه بزاااااااف.. احترامي راسك... سعد... صفحة وتطوات فحياتي... وانا صفحة وتطوااااات فحياتو... حنا نسينا لي فاااات.. لا انا لا هو لا براء... نسييينا وسامحنا وزدنا للقدام... حيث حنا ولاد ليوم... ولكن نتيينا.. مزااااالة عايشة فلباااارح.. مزالة ما باغة تنسى.. وما عوالاشي تنسى.. وااااااخر مرة تعاود تقولي هااااد لهضرة... اخر مرة... وخاصك تعرف.. بلي لا انا كنفكر فيه ولا هو.. صافي... سالينا.. 

بيسان :هضر على رااسك.. باش عرفتيييه سالا.. حكم غير على راسك بوحدك ما تحكم على حد

تالاسين :(ساطت معصبة) على ما قال.. حتا هو سالا.. وعلى ما بالي حتا انا.. بصصصح نسى.. والا شفتي نتينا شي حاجة اااااخرا شغلك هاداك... ومن دابا لفوق فكر فاش ما بغيتي.. وكيف ما بغيتي.. حنا نسينا ونتينا ما بغيتي تخلينا نساو.. وهاد المرة عرف شكتخرج على دقمك حسن ليك.. ما تشوفينشي ساكتة تزيد فيه.. وراني كنظراف حتاااا نعيا.. ونهار كنخياب كنخياب فدقة.. ونهار انقصح قلبي من جهتك.. عمري نسمحلك.. خليني كنحاول نسى لي فات.. وكنحاول نبدا معاك صفحة جديدة.. حيث نهار انكعا بالمعقول... انقطع لكتاب فمرة..

زفرات بغضب.. ودازت غادة كتسوط.. ومخنزرة ولقرووودة لاعبين فوق راسها... وخلاتها هي واقفة معببببسة وغطططرطق.. ساطت.. وتبعاتها حتا هي.. كل وحدة فيهم فين قالبة وجهها.. وحتا وحدة ما هضرات.. ركبو فالاوطو بصمت.. ورجعو بحالهم للدار... وطووووول الطريق ما كتسمع غا الزفير.. كل واحد فين كتسوط فقنت.. حتا وصلو.. ونزلات كل وحدة فيهم.. ونييييشان لبيتهم.. ما حاملين يهضرو مع حد...

جلسات فبيتها.. كتفكر فلي وقع.. وكيفاش كانت كتغوت... وكيفاش هضرات مع ختها.. خلات راسها حتا تهدنات شوية.. وعرفات راسها غلطات فحقها.. وهزات راسها وخرجات عندها.. 

دقات عليها فالبيت.. ودفعات الباب ودخلات.. لقاتها جالسة كتبقشش فبيسي طالعة هابطة.. غا شافتها وهي تقلب وجهها معبسة.. تنهدات وسدات الباب ودخلات جلسات قبالتها.. 

بيسان :قيستي لحوايج لي شريتي.. كي جاوك ؟

تالاسين :الصمت

بيسان :ايجيوك مزيونين.. خصوصي ديك اللبسة لي اختاريتلك انا هههه

هزات عينيها شافت فيها مخنزرة... ميقات فيها.. زعما من نيتك.. ورجعات هبطات عينيها كتشوف فالبيسي... 

بيسان :بففففف... وا صافي سمحلي.. والله كنت معصبة ما كنعرفشي شني كنقول.. 

تالاسين :الصمت 

بيسان :تالا.. ختي.. عافاك.. عارفة راسي خورتها معاك فالهضرة.. بلحق راك عارفاني.. فاش كنتعصب كنبقى غااااا نركع.. ما تديشي عليا... (بغضب) كلشي بسباب داك لبغل.. هو لي عصبني... حيوان لصقة كيف عامل.. 

تالاسين :الصمت 

بيسان :تالا.. ما اتهضرشي

تالاسين :الصمت 

بيسان :وا حشومة عليك والله.. هضر وما تخلينيشي هايدا.. حرام عليك... عافاك سمحلي.. ما نعاودشي

هزات عينيها فيها.. وسدات لبيسي.. وتقابلات معاها بجدية... 

تالاسين :سمعيني.. انهضر معاك هضرة ما انعوداشي.. وعقل عليها مزياااااان نهار اخور ما نبغيشي نعاودها.. سعد.. صافي.. ما بقى بيناتنا انا ويااااه وووواااالو.. ووواالو فهمتيها.. الا بقاا شي حاجة راها غير معزة وعشرة.. وصااافي.. لا أقل ولا أكثر...لا حب ولا إعجاب ولا زواج ولا هادشي كاااااامل... مستحيل.. فهمتيها مستحيل نرجعو نفكرو فيه لا انا لا هو... اصلا من لول ما كانتشي شي حاجة اسمها حب بيناتنا... حيث لي كيبغي ما كينساشي فيوماين.. سمعتيني.. 

قلبات وجهها كتلعب فالبيسي ديالها.. وسكتات.. شافت فيها بيسان مطولا.. وتنهدات.. وناضت جلسات حداها.. 

بيسان :صافي فهمت.. غا كنت معصبة وما عرفتشي شني كنقول..(حطات يديها على كتفها) شني سمحتيلي؟. 

هزات عينيها فيها.. عاقدة حجبانها.. ورجعات قلبات وجهها.. هزات لبيسي ديالها وناضت من حداها.. 

تالاسين :عافاك خليني بوحدي هاد الساعة.. ما عندي گانة دالهضرة.. ولي عندي قلتو

بيسان :حشومة عليك.. عافاك سمحيلي

تالاسين :(ضحكات بسخرية) نتينا ديما عملها قدها قد راسك.. واجي قول سمحولي.. كتجيك ساهلة ياك.. 

بيسان :الصمت

تالاسين :هاد المرة تعلمي توزني هضرتك.. وتفكري شحاااال عاد تهضري ولا ديري شي حاجة.. ماشي كلشي كيتنسى دغيا

بيسان :نتينا عمرك اتسمحلي على داكشي لي عملت ياك

تالاسين :انا سمحت اه.. ولكن ما نسيتشي.. وخاصك تعرف بلي المشكيل من لول بدا من عندك.. كون هضرتي فلول وخرجتي لي فقلبك... ما طيحشي فهادشي كامل.. ولكن نتينا غلطتي ومزالة كتغلط ومزالة زايدة فيه.. الهضرة لي قلتي هاد نهار.. مشي لبيتك.. وجلس مع راسك.. ووزنها مزيااااااان.. 

بيسان :شو غي.. 

تالاسين :(قاطعاتها) عافاك.. سدي الباب معاك ونتينا. خارجة

حنات عينيها كتشوف فلبيسي ديالها.. وهاد المرة ما رجعاتش شافت فيها.. وحتا هي شافت حتا عيات.. وناضت خرجات بحالها.. وكلامها وكلام تالا داير فعقلها.. وهي عارفة بلي روناتها فالهضرة بصح... جلسات فوق ناموسيتها.. وسرحات فبالها.. وفجأة تنفضات كتسوط بعصبية... 

بيسان :ديييما نتينا السباب.. الله يعطيك غبارة من حياتي.. رونتيها ومزالة كترونها.. 

وجلسات كتاكل فجنابها بالفقصة.. وهي ما حملاش راسها.. وما حملاش الهضرة لي خرجات على فمها.. 

🍃🍃🍃🍃🍃

دازت الايام.. تنسى فيها لي تنسى.. وبقى فيها لي بقى.. ايام كتمشي وكتجي.. تبدل فيها لي تبدل.. وتزاد فيها لي تزاد.. عاشت دوك الأيام عاديين.. رجعات داخلة سوق راسها كثر.. ورجعات حدودية كثر.. حيث واخة سمحات.. صعيب باش تنسى.. ولي فات عمرو ما كيموت.. لي فات كيبقى معانا.. حتا كنموتو حنا..

كانت مرتاحة البال.. ولكن ناقصاها الفرحة.. الفرحة لي ما اتكمل.. غير برجوعو.. وما اترجع فيها الروح.. غير فاش تشوفو.. فين ما مشات.. بالها وتفكيرها ديما غادي ليه.. خدا قلبها وخدا عقلها.. وخلاها هااايمة فأحلامها وكتسنى نهار يرجع.. كل ليلة تجبد تيليفونها تفرج فتصاورو.. وتفكر ذكرياتهم.. فكلام قالولها.. فتبسيمة تبسمها فوجهها.. فلمسة خلات اثرها فقلبها.. فليالي نعساتهم حداه الراس فالراس.. فضحكات شركوها.. وفهموم قسموها.. 

اليوم وكالعادة.. كتنوض.. كتقاد حالتها.. كتلبس عليها.. كتهز قطتها.. تهبط تفطر معاهم.. وتدخل لكوزينتها.. تخدم خدمتها.. توصل لي كوموند.. مرةة تخرج مع بيسان.. مرة تجلس مع العائلة مجموعين.. مرة ها هي كتقشب مع جهاد وجواد.. وهي غادة وكتحسب فالأيام.. وهاد اليوم عاود نفس الشيء..

من بعد ما فطرات.. توجهات لكوزينتها.. غطساااات فالخدمة باش تلاها.. كتمشي وتجي.. وتحط وتهز.. ودندن.. الجو بدا كيبرد.. والخريف دخل..السماء كانت مغيمة.. والهواء بااااارد كيلعب بالشجر.. لابسة سروال دجين كحل.. وكبوط كحل قصير سخون.. وطابلية طبعا.. مينوشة كدور بين رجليها.. حتا لواحد اللحظة ما بقاتش بانتلها..

سمعات صوت نباح جاي من برا.. قوصات حجبانها باستغراب.. حطات داكشي من يديها.. وتقدمات جيهة الباب.. هزات الريدو كطل.. وهي تصدم.. كان امينو لي كيلعب ويجري ومينوشة كتلعب معاه.. بيناتهم كرة وكيدابزو عليها.. وهو كينبح وقالب الجردة بصوتو..

شهقات شهقة وحدة.. وقلبها فلبلاصة بدا كيزدح.. حسات بالدم بدا كيتحرك فيها بسرعة.. المعدة ديالها تقلبات..وشداتها الدوخة.. تلفات فبلاصتها.. اكيد رجع.. ما فيهاش الشك... حطات يديها على فمها كضحك.. وقلبات الدورة داخلة كتجري تقلب عليه.. متلهفة تشوفو.. غير دخلات.. وهي توقف فبلاصتها جامدة.. ذاتها كترجف.. قلبها كيززززززدح.. رجليها كيلعبو بيها وهي واقفة.. ريقها نشف.. ولكن فرحانة... قلبها ايسكت بالفرحة.. طلعاتو من رجليه حتا لراسو.. بروطكان كحل.. سروال دجين.. وكبوط دلقطن كول v فالزيتي.. لحيتو عاود زادت كبرات.. وشعرو حتا هو.. زاد صحاح.. وزاد زيان.. هو كيشوف فيها... وهي كتشوف فيه.. وراسم ابتسامة على وجهو..

من بعد ايام وهي كتسناه.. ها هو رجع.. وها هو قدامها.. بيناتهم اربعة دالخطوات بلحساب.. غرغرو عينيها.. وما قداتش تحرك.. حيث غفلهم.. كانت كتوقع يعلمهم قبل.. ولكن ما دارهاش.. زاد ضحك.. وفتح دراعو ليها.. 

براء :باينة ما توحشتينيش!!!

بقات واقفة.. عينيها كيبكيو.. وفمها كيضحك.. وقلبها كيفرفر.. ورجليها جمدو.. كطرطق فصباع يديها لي عراقو باصبع الابهام.. حاسة بإحساس غريب.. زوين اه.. ولكن غريب.. حسات بحال الا عمرها شافتو.. جاتها رهبة وحشمة منو.. يمكن عمرها حساتها قدامو قبل.. لدرجة ما عرفات ما دير ولا شنو تنطق.. بغات تجري وترمي راسها وتعنقو.. ولكن ما قداتش.. 

تالاسين :ججج.. جي.. (سرطات ريقها) جيتي؟

شاف فيها مقوص حجبانو بنظرة استغراب.. وفنفس الوقت كيضحك.. وهبط دراعو لي كان فاتحهم.. 

براء :يمكن ما كانش خاصني نجي!! 

تالاسين :الصمت 

قرب بخطوات بطيئة جيهتها وهو كيتبسم.. خطوة.. زوج.. ثلاثة.. حتا وقف قرييب ليها.. بيناتهم خلفة.. 

براء :شنو!! نرجع!! 

تالاسين :(حركات راسها بلا) 

حط يدو على راسها وهبطها حتا وصل لأطراف شعرها وطلق منو.. وشاف فعينيها.. ودموعها لي سايلين.. وشفايفها لي كيرجفو.. 

براء :لا بانلي يمكن خاصني نرجع

دار زعما خارج.. وقبل ما يدور.. شداتو من دراعو.. دار شاف فيها كيضحك.. وفتح يدو.. 

براء :اجي عندي لهنا اجي هههه

جرها عندو خشاها فيه.. دور يدو على خصرها.. وزيرها عندو حتا هزها من الارض.. وخشى راسو فعنقها.. شم ريحتها بنفس طوييييل ما سخاش يقطعو.. وتنهد من موراه.. 

براء :اخخخخخخ.. توحشتك.. توحشتك بزاف

حط يدو على راسها كيمررها على شعرها.. وحس بيديها زيرو على كتافو.. ونفسها كضرب فعنقو.. وهي مزالة كدمع.. كيزيرها بقوة حتا كيسمع صوت أنينها وعاد كيرخف عليها.. وكل مرة كيستنشق ريحتها وهو دافن راسو فعنقها حتا كيتعمر صدرو بالهواء.. حس بيها حتا هي كتزير عليه.. وكتزيد تخشى فيه.. كان عناق حار.. ما سخاتش بيه.. وهو ما سخاش يطلقها.. وخداااا وقت شحال عاد بعدها عليه.. وشد وجهها بين كفوفو.. واصابع الإبهام كتحرك على خدودها وكداعبهم.. وكيمسح دموعها.. 

براء :ضعافيتي.. مالك

تالاسين :(تبسمات) والو.. نتينا مزيان 

براء :(حط شفايفو على جبهتها وقبلها ونطق) دابا مزيان.. علاش كتبكي؟! 

تالاسين :(ضحكات كتمسح دموعها) ما نعرف ههه

براء :(سكت كأنه عارف الجواب وتبسم) توحشتك وما تصوريش شحال.. ونتي!! 

تالاسين :شعندي انا؟! 

براء :ما توحشتينيش ههه

تالاسين :(سكتات كدور فعينيها) فوقاش رجعتي 

براء :(ضحك) ههه فهمت.. يعني ما اتجاوبيش.. ما اتقوليش اه توحشتك وبزاف.. وكنت كنتسنا غا فوقاش نشوفك.. ياك

تالاسين :اححم.. سقسيتك.. فوقاش جيتي

براء :اوك على خاطرك ههه.. (هزلها الشعر على عنقها رجعو على ظهرها) رجعت هادي يوماين.. 

تالاسين :نعااااام!!! يوماين

براء :اممم.. كنت فداري.. جيت عيان قلت نرتاح شوية.. ونيت جات معايا ديك خيتنا.. وما جاتش نسمح فيها

تالاسين :كضحك ياك!!! 

براء :لا علاش انضحك!!! 

تالاسين :(بحدة) قول كضحك

براء :علاش مالك...!!!

تالاسين :(دفعاتو عليها بعصبية) مشي.. رجع.. يله.. رجع عندها.. رجع لدارك.. 

براء :ههه.. مالك.. شنو وقعلك

تالاسين :(زفرات بغضب وضرباتو لصدرو) يوووووماين.. يوماين باش جيتي.. وجالس وما تقولاشي... حشومة عليك اههئ اههئ انا هنايا كنتسنا فيك وكنقول غاااا فوقاش يرجع.. ونتينا جالس مكيف فدارك .. (ضرباتو لصدرو) مشي بحالك مشي اههئ اههئ بدلتيني بيها ياك... انا عرفتك.. غذار.. مشي بحالك.. 

شدلها يديها كيضحك.. وهي كتعفرت معاه.. حتا زيرها من الكوعين ديالها وقابلها معاه.. 

براء :غا كنضحك الغشيمة هههه راه من الطيارة لعندك.. ماشي نيشان لعندك حيث سلمت على مالين الدار.. مي هادي يله 10 دقائق باش وصلت

تالاسين :كتكذب.. غير كتفلا عليا

براء :والله ما كنكذب.. غا قشبنا معاك شوية وصافي ههههههه 

تالاسين :هاد الضحك الباسل.. شي نهار انهجرولك

براء :(ابتسامة جانبية) دابا خلينا من هادشي.. وجاوبيني.. كنتي كتسنايني غا فوقاش نرجع.. ياك.. يعني توحشتيني!!! 

شافت فيه مطولا ساكتة.. وهو مصغر فيها عينيه.. حتا تبسمات ورمات راسها فحضنو معنقاه وزيرات عليه.. 

تالاسين :على سلامتك

بعدها عليه.. ورجع شد وجهها كيبوس فيه.. كيفرق قبلات عليه بلهفة.. وهي كتضحك وتحاول تبعدو.. 

براء :اخخخخ.. يخليلي لي توشحني.. ولي كيبغيني.. ولي كيغير عليا.. ولي كيتسناني.. 

تالاسين :اواعدي.. حشومة.. هدا.. براء هههه 

براء :(بعد عليها) يخليلي لفميم لي كينطق براء.. توحشتها من فمك

تالاسين :هههه.. قولي.. كيف نتينا.. شني عملت.. فاين مشيتي.. عاودلي.. (شدات يدو كتجرو للطبلة) اجي لهنا.. جلس وعاودلي

براء :(وقفها) لا لا.. صبري.. خلي هادشي من بعد.. دابا انطلعو نجلسو معاهم.. ياك.. وفلعشية عندنا شي شغل انقضيوه.. وديك الساعة سوليني لي بغيتي

تالاسين :شمن شغل!!! 

براء :دابا تعرفي.. يله اجي دابا

زيرات على يدو وشافت فيه كضحك وعينيها كيبريو وهي كتشوف فوجهو.. خلف وتبعاتو.. وهما عينيهم ما تفارقوش.. حتا وصل للباب دالكوزينة.. وهو يشدها من خدودها وباسها فخدها بقوووووووة حتا تقصحات.. عاد طلقها..

براء :اناااااكلك.. غير صبري

تالاسين :😳

حشمها.. وخلاها غا كدور فعينيها.. وحتا هو داكشي لي كان باغي.. خرجو عندهم.. حتا قربو يوصلو وهي طلق من يدو.. شاف فيها وضحك.. وخلاها على خاطرها.. جلسو مع العائلة.. فرحانين برجعتو.. الهضرة.. والهاراج.. الضحك.. والفرحة.. كان صباح طويييل.. ختموه بغذاء على حقو.. وهما بيناتهم غير العينين.. والفم لي كيتبسم.. ومرة مرة يرميلها غمزة ولا بوسة تلفها وتخليها غير كترمش وتدور بجنابها..

كانت الفرحة مالية عينين الكل.. خصوصا هما بزوج.. كانت باغة تجلس حداه.. وتعنقو.. وتبقى مخشية فيه.. ولكن ما تقدرش.. وهو ما كرهش يهزها يديها لشي قنت ما فيهش جنس مخلوق.. باغي يستفرد بيها.. وباغي يشبع منها..

وصلات لعشية.. ومن مور العصر.. كانو جالسين.. حتا نطق براء موجه لهضرة لباه..

براء :الواليد.. واحد شوية نهضر معاك

فراس :امم.. ااه واخة

رؤيا :فاين ماشين

فراس :ها حنا راجعين..

تبسم فوجهها.. ودار شاف فبراء.. لقاه حاط عينو على تالاسين ومبسم ابتسامة. جانبية.. دار شاف فيها.. لقاها كتشوف فيه.. غير شافت ففراس وهي تقلب عينيها كتفتف.. دار شاف فولدو.. ووضربو لكتفو..وهمس حدا وذنو..

فراس:فرطتيها اولدي.. خلي شوية لمن بعد

براء :(ضحك ومسح على شعرو) ما تخافش.. هاز معايا الزايد

فراس :زيد قدامي زيد..

حط يديه فجيابو.. وتبع باه.. وخلاهم هما جالسين.. او بالأحرى هي جالسة على نار.. خرجو.. وتعطلو.. زاد بالها تشغل.. وهما لي قالو شوية ويرجعو.. بقات جالسة وعينيها على الباب.. وتلعب بصباعها.. حتا وقف عند الباب وتبعو باه واقف موراه..

رؤيا :تعطلتو

سكتو.. ما جاوبوهاش.. شاف فباه.. وشاف فيه.. ضرب على كتفو.. وحرك عينيه.. تبسم.. ونطق قاصدها.. 

براء :تالا.. واحد شوية.. بغيت نهضر معاك

رقية:اشكاين نتوما زوج.. فهمونا.. 

رؤيا :بصح.. فهمونا.. شني واقع؟؟؟

براء :أنهضر مع البنت زوج دقائق.. فيها شي عيب

جهاد :(كيدور راسو) ايييييييييه زوج دقائق.. عليا انا

جواد :ما بقيتوش تحشمو.. لا دابا طيرتو لبلاكة فمرة

جهاد:اوديييي الخاوة.. مشاااااا زمان لحشمة.. فين الايام لي كنا فيها حنا نحشمو حتااااا نذكرو سمية بنت على فمنا... 

حنحن بصوتو لقوي.. شافو فيه وضربو الطم.. وتالا غير كتشوف مرگانة فبلاصتها.. 

فراس :تالا.. نوضي ابنتي سيري معاه

تالاسين :هاااااا!!! ااا.. وو... واخة.. 

ناضت كتمسح يديها العرقانين فسروالها.. شافت فبراء مخنزرة وقلبات عينيها.. وزادت خارجة بحالها.. وحاسة بلي العينين كلهم عليها.. دار براء لاحقها.. وهو يسمع ضحكة ديال خوتو.. ودار شاف فيهم مخنزر.. وهما يجمعوها.. حابسينها بزز.. قلب وجهو وحبس الضحكة حتا هو.. ورجع تبعها.. 

دار مع الدورة.. لقاها واقفة كتسناه.. غير شافتو وهي تبدا تغوت بصوت خافت.. 

تالاسين :حماقتي...غا قولي واش حماقتي

براء :ههه علاش 

تالاسين :كيفاش زوج دقائق ونهضرو.. وقدامهم!!!!! شني غيقولو دابا.. اواعدي... ايكونو عاقو ياك... ناااري مرگت مرگت..(ضرباتو لكتفو) غا قولي فاش كتفكر

براء :لولة.. اتهداي على هاد لكتف حيث الا هرستيه ما تلقايش علاش تنعسي.. الثانية.. ما سوقكش شنو كيقولو وفاش كيفكرو.. الثالثة.. (تنهد براحة وقرب عندها) اصلا كتعجبيني فاش كتحشمي

تالاسين :(شافت فيه مطولا مصغرة عينيها عاد هضرات) دابا فاش بغيتيني.. هضر دغيا.. باش ما نتعطلوشي

براء :واخة.. انقولك فاش بغيتك.. بلحق ماشي هنا

تالاسين :وفاين!!! 

براء :انطلعو لبيتي

تالاسين :نعاااااااام

براء :ههههه.. لا حول ولا قوة الا بالله.. اجي وسكتي(شدها من يديها) 

تالاسين :اااا.. ببب.. براء 

براء :غير اجي.. وسكتي.. مالك

ما فهمات والو.. شنو باغي.. وشنو ايقولها.. وعلاش فبيتو بالضبط.. وشنو هي هاد الحاجة لي عارفها حتا فراس.. تبعاتو ساكتة.. حتا وصلو لبيتو.. ودخلها وسد الباب.. جرها موراه وخلاها تجلس على حرف الناموسية.. تبسم فوجهها.. ومسح على شعرها.. وتوجه فتح لبلاكار ديالو.. هز منو شي حاجة.. ودار شاف فيها هي لي متبعاه بعينيها باستغراب.. غمزها وضحك.. وقرب جيهتها.. وجلس قرفصاء قدامها..

شافت فيه.. بمعنى شنو.. وهو تبسم.. شافت فيديه.. شاد كتاب.. كتاب غلافو زوين بزاف.. مزخرف.. ولكن بلا عنوان.. وهي مزالة كتستفسر شنو داكشي.. حتا شد يديها وحطو وسطهم... وفتحو.. عاد ردات البال بلي ماشي كتاب.. وإنما علبة على شكل كتاب.. طاحت عينيها نيشان فصورة.. كانت صورة بنت صغيرة جالسة وسط الجردة بجبادورها الاحمر القاتم.. وقطة بيضة صغيرة بين رجليها.. كانت هي.. كانت صورتها فأول عيد ليها معاهم.. هزات عينيها شافت فيه بدهشة.. ورجعات شافت فالصورة.. 

تالاسين :هادي انا!!! فوقاش؟؟

براء :(بابتسامة سارح فوجهها) فأول عيد ليك معانا.. فهاد النهار بالذات.. طبعتي بلاصتك فيدي.. وفقلبي

تالاسين :(شافت فيه) من داك الوقت!!! 

براء :يمكن فداك الوقت ما كنتش بحال دابا.. ولكن تما كانت أول مرة نشوفك بطريقة مبدلة على كلشي.. شفت فيك شي حاجة لي ما شفتها عند حتا واحد.. ديك الحاجة خلاتني نجري نجيب كاميرتي ونصورك.. وهاد التصويرة بالذات.. دوزت ليالي وانا كنتمعن فيها.. كنتي بحال شي لغز بالنسبة ليا.. كنت كنشوف فعينيك كيجيوني بحال شي حكاية.. كاين لي كان كيشوفهم عينين عاديين.. ولكن انا لا.. غير كانو كيطيحو عيني فعينيك كنلقى راسي غااارق فيهم.. كنقلب على شنو باغة تقولي.. شنو مور هاد الشوفة الغااامضة.. ماشي شوفة دبنت فعمرها 12 العام.. شي حاجة كانت فيهم كتسلبني.. ويوم من بعد يوم لقيت راسي كنزيد نغرق ونغرق.. حتا وصلت لنقطة.. مستحيل نرجع منها.. (ضحك) سلبتيني.. وسلبتي عقلي.. وسلبتي قلبي.. وخليتيني الله كريم ههه.. 

حط يدو على خدها ومسح دمعتها لي نزلات.. وهي مبسمة.. 

براء :(حط صبعو على الصورة) فهاد الصورة.. وفهاد النهار.. قلبي ليك دق.. وحكايتي معاك بدات.. ولكن باش تكمل.. خاصنا ندوزو للصفحة الثانية

حط صبعو على الصفحة المقابلة ليها.. صفحة بيضة وسط منها بابيون صغير فالاحمر.. 

براء : دزنا من بزاااااف دلحاجات باش وصلنا لهنا.. وباش جلسنا هاد الجلسة.. وصلات بيا لشي مرات لي قلت فيهم بلي عمر الحلم ما يكمل.. وقصتي معاك كما بدات كما اتسالي.. ولكن لا.. نتي معايا دابا.. ولكن باش تبقاي ديما معايا خاصك ترسمي نهاية لحكايتنا.. نهاية نتي لي اترسميها.. حكايتنا بدات شحاال هادي.. واليوم نتي لي اتقرري واش انكملوها ولا لا..

كانت كتشوف فيه مقوصة حجبانها باستغراب باغة تفهم شنو كيقصد.. وفنفس الوقت فرحانة بكلامو.. وبلمستو لي كتداعب خدها.. قرب يدو لداك لبابيون وهزو.. وتهزات معاه الصفحة البيضاء باش يبان مكعب صغير محفور وسط لكتاب.. ما كانش مكعب عادي.. وانما مكعب وسط منو خاتم.. خاتم زوييين بزاف.. شهقات وحطات يديها على فمها.. وهزات عينيها فيه بدهشة.. شد يديها وحط وسط يدو وباسها بقوة وهو مغمض عينيه... وهز عينو فيها... 

براء :تقبلي تخلي حكايتنا تكمل.. ونكملوها بزوج.. يدي فيديك.. حتا لآخر نهار فحياتنا؟؟ 

سكتات كتشوف فيه.. كضحك وتبكي فنفس الوقت.. يديها على فمها وعينيها مرة عليه مرة على الخاتم ما متيقاش.. وهو جالس قدامها كيتسنى جوابها.. الحاجة الوحيدة اللي قدرات ديرها هي تحرك راسها باه.. حيث لسانها تربط.. تنهد براحة وشاف فيها فرحان.. شد يديها ليسرية سحب منها خاتمها لقديم.. وحط فعاوطو الخاتم الجديد.. وقبل الكف ديالها من لداخل.. وشاف فيها.. 

براء :كنبغيك.. وانعيش كنبغيك.. ونموت كنبغيك.. ومن ليوم انساو لي فات.. ونعيشو لي جاي

زولات لكتاب من فوق ركابيها.. وترمات عليه عنقاتو وزيرات عليه كتبكي بالفرحة.. ركابيهم مثنيين فالأرض.. وهما معنقين بعضهم.. مزيرة عليه وهو كثر... وانفاسهم الحارة كتعبر على مدى شوقهم وفرحتهم بهاد اللحظة.. قلب وجهو باسها فخدها ورجع حط ذقنو على كتفها.. وهي قربات حدا وذنو وهمسات.. 

تالاسين :أرك تيريخ (كنبغيك) 

ضحك.. وبعدها عليه وشد وجهها بين يديه.. وقبل جبهتها.. وشاف فيها وهو كيضحك.. 

براء :حتا انا هههه

تالاسين :(بدهشة) فهمتيني

براء :من دابا لفوق ما اتبقايش تعايريني بلا خباري.. 

تالاسين :باش!! فوقاش!! كي عملتي؟؟؟

براء :شهر ونص ما دازش غير هكاك.. ضروري من شوية دالمطالعة هههه وديك بو عاعا مزال نتفاهمو عليها.. بلحق ماشي دابا 

خرجات عينيها فيه كترمش.. وهو كيشوف فيها ويضحك.. ووقف ووقفها معاه.. 

براء :دابا بما أنك قبلتي تكملي معايا.. خاصني نزرب عليك قبل ما تقلبي عليا ههه

تالاسين :كيفاش!!!! 

براء :اجي معايا واتفهمي

تالاسين :فاين؟؟؟؟

براء :ششش.. نتي غا تبعيني

تالاسين :تسنى.. التصويرة (بغات ترجع تهزها وهو يحبسها) 

براء :نننن.. هاديك ديالي.. ما نفرطش فيها.. خدبتي الخاتم بركة عليك ما تكونيش طماعة هههه (جرها) يله اجي دابا وبلا هضرة بزاف.. 

جرها موراه عاود مخرجها.. وهي عاود ما فاهمة والو.. غادي وكيزرب عليها.. ولكن واخة هاكاك فرحاااااانة.. تابعاه وعينيها على يديها كتشوف فالخاتم.. حتا وقفها فباب الصالة.. 

وقفها فباب الصالة ودار كيشوف فيها.. هزات عينيها فيهم وهي تحل فمها.. كتشوف فيهم وترمش كتحاول تستوعب شنو كتشوف.. كانو كاملين بيهم جالسين.. لعيالات سترو راسهم ولبسو حوايجهم مقادين.. ودايرين على الصالة نساء ورجال.. استغربات لوجود ثلاثة دالرجال ما كتعرفهمش.. واحد فيهم كان كبير نوعا ما فالسن.. لابس جلابة بلدية وطربوش بيض فوق راسو.. وبلغة كحلة فرجليه.. وكتاب كبير منزل قبالتو فطبلة صغيرة.. وفالوسط طبلة عمروها بحلويات ومكسرات واتاي بحال الضيافة.. شافت فيهم كتسنا شي حد يشرحلها.. وهما كيشوفو فيها ويتبسمو.. حتا نطق الراجل لكبير مبسم..

الراجل:هادو هما لعرسان!!!

فراس :الا كتاب ان شاء الله

تالاسين :(بدهشة) عععع.. عرسان.. شكون!!! حنا؟؟؟

براء :(ضحك وقرب حدا وذنيها) الا بغيتي ههه

تالاسين :(دارت مخرجة. عينيها فيه) كضحك!!!

براء :لا نتي كلشي عندك. ضحك

سكتات كتشوف فيه وكتحاول تستوعب.. ولسانها تربط.. وعاد جابها قدامهم وصدمها.. ما فهمهاش حتا قبل.. شافها مبهوضة وهو يشد يديها..

براء :اتسمحولنا واحد دقيقة

جهاد :غا سير.. هاد دقائق دياولك ما بغاو يساليو

ما تسوقلوش.. جرها وخرج.. ووقف بيها فالدورة.. حط يدو على كتافها وقابلها معاه كيشوف فيها.. وهي غير كترمش ومزاااالة ما مثيقة..

براء :مالك!!

تالاسين :الصمت

براء :واش ما بغيتيش!!!!

تالاسين :(هزات عينيها فيه)

براء :انا فاش كنت ماشي وصيت الواليد.. وقلتلو يوجدلنا لوراق دالزواج.. باش غير نجي.. نتزوجو.. حيث ما باغيش نزيد نتسنا نهار.. انا عارفك ماشي هاكة كنتي كتحلمي بزواجك.. وماشي بهاد الطريقة.. ولكن حنا دابا غير انتكاتبو.. ومن بعد ندير لحبيبتي احسن عرس بغاتو.. (قلبهالها ضحك) وزايدون ياك عاد دابا طلبتك لزواج وقبلتي.. اولا كنتي طامعة غير فالخاتم هههه

تالاسين :الصمت

تسناها تجاوبو.. فاش بقات ساكتة.. خلاتو يتنوى.. شد وجهها بين كفوفو وحط عينو وسط عينيها..

براء :واش ما بغيتيش.. ما عجبكش الحال.. الا ما بغيتيش صافي.. حتا حاجة ما بزز منك..

تالاسين :لا ماشي هايداك

براء :وشنو؟

تالاسين :غاا جاتني على غفلة.. ما توقعتاشي.. يعني بهاد الزربة كاملة.. فهمتيني.. 

براء :(مسح على شعرها وتبسم) فهمتك.. ولكن ما باغيش نزيد نضيع الوقت.. ما باغي حتا دقيقة تزيد ضيع مني.. زواجنا قبل هذا الا سميناه زواج.. ماشي بحال هذا.. هذا شكل اخر.. يعني هذا هو الزواج لي كنت كنحلم بيه معاك.. زواج تكوني نتي فيه موافقة وقابلة وباااغاني بخاطرك.. ماشي حيث شي حد بزز عليك.. وحتا دابا.. اذا حسيتي راسك مزال ما مقتانعة.. او ما باغاش.. او عندك ولو تردد بسيط.. نلغيو كلشي..

تالاسين :لا لا لا.. حتا وحدة فيهم.. (حطات يديها على يدو لي على وجهها وتبسمات) انا باغة نكون معاك.. بلا ما نحتاج نفكر.. بلعكس.. راحتي لقيتها معاك وحداك.. وحتا انا بغيت نكون مرتاحة

براء :(ضحك) يعني صافي!!! ندخلو عندهم؟؟؟ 

حركاتلو راسها بالإيجاب.. وهو يجرها عندو عنقها وزير عليها عاد طلقها.. عض على شفاهو وشد يديها وجرها موراه.. دخل عليهم مبسم والفرحة باينة فعينيه.. وهي حشمااااانة موراه.. بغات طرطق وغير حانية الراس.. 

براء :صافي.. حنا واجدين ههه

الراجل:على بركة الله... اجيو جلسو حدايا 

رؤيا :الصراحة انا هادشي ماااا عجبنيشي 

شافو فيها كاملين بدهشة.. وباستغراب.. وهي مطلعة حجبانها فيهم.. 

براء :علاش؟؟؟

رؤيا :انا ماشي هايدا كنت عوالة نزوج بنتي.. ما خطبتيها.. ما جيتي وقلتي انا طالب وراغب.. نقزتي نيشان جبتيلنا لعدول وجايب البنت وكتقولنا حنا واجدين.. بشمن وجه.. وشكون لي قالك حنا باغين نعطيوك

براء :(ضحك) ههه انا طلبت لبنت من باها وهو عطاني.. ياك الواليد

فراس :انا عطيت.. ولكن الا ما بغاتش مها.. بيناتكم ههه

رؤيا :انا ما نعطيشي بنتي بالساهل.. (شافت فتالا) اجي نتينا جلس حدايا.. هو نقز من السرجم ونتينا قلتيلو مرحبا.. ايوا صفاااااات.. اجي اجي

شافت فجنابها.. حشمانة.. وتالفة.. حنات راسها وطلقات من يدو غادة جيهة رؤيا.. وهو يشدها ووقفها.. 

براء :الواليدة.. بلا هاد الضحك دابا.. راه ايسحابها بصح واتقلب عليا.. ما فيها ثقة هاد البنت عندك

تالاسين :(خنزرات فيه) 

رؤيا :وشكون قالك انا كنضحك.. انا كنهضر بصح.. واش جيتي وعملتي هادشي لي قلتلك

براء :ههه لا

رؤيا :ايوا!!! 

براء :ايوا نديروه دابا.. 

طلق من تالا.. خلاها شادة يديها كتلعب بصباعها.. وقرب هو لعند مو.. حنا على ركابو قدامها.. وحط يدو على ركابيها مبسم.. 

براء :مدام رؤيا.. انا جيت طالب راغب فبنتك تالاسين على سنة الله ورسوله.. الا قبلتي بيا طبعا هههه..وكنواعدك بلي ما اخصها خير معايا وانحطها فعيني.. وكما كانت عايشة فدار باها اتعيش معايا وحسن كاع.. المهم غا نتوما توافقو.. ايوا شنو قلتي 

سكتات كتشوف فيهم.. وتشوف فيه وتعوج ففمها عاد نطقات.. 

رؤيا :دابا لي كيمشي يخطب كيجلس هاد الجلسة لي جالس.. ويحط يدو على نسيبتو هايدا.. فشمن بلاد تعلمتيها هادي!!! حاني على ركابيك قدامي.. اطلبني لزواج انا!!! 

براء :الواااااليييييدة!!! صافي حشومة عليك هههه

رؤيا :وكتغوت عليا.. هادشي غاااا مزال ما عملنا فالطاجين ما يتحرق... نوض اوليدي نوض.. ما عاطياشي بنتي انا.. خليها حدايا..

قلبوها ضحك عليه.. وهو قدامها غير كيشوف.. وتالا واقفة جامدة فبلاصتها.. كون لقات الارض تشق وتسرطها..

جواد :لعز الواليدة.. الله ينصرك كما نصرتينا على القوم الظالمين هههه

جهاد :(هز يدو قبالة خوه) ارى خمسة 

جواد:(ضرب كفو) ها هي ههه

براء :انجي نعطيكم خمسة فعينيكم اذا ما سكتوش... (دار شاف فمو) الواليدة.. بلا ما ديريلنا العقدة فالمنشار دابا

رقية :لا تزيدش فيه ههه.. اتهبطلو النئطة.. بركة عليه غااااا ما دوزات عليه هي لا تزيدوش نتين هههههه

براء :سمعي..سمعتي القلب لحنين.. (ناض باس راسها)اري داك الراس نبوسو.. نتي لي كتحسي بيا.. 

رؤيا :(شافت فتالا حابسة الضحكة) نتينا باغة!!! قابلة على هاد خينا زعما؟ ؟

براء :ومالو هاد خينا

رؤيا :(خرجات عينيها فيه) سكت نتينا.. سكككت.. (شافت فتالا) ايوا.. ما جاوبتينيشي.. باغة!!! 

بيسان :حشومة عليك اماما ههه لبنت كتحشم

رؤيا :كتحشم وداخلة مشبرة فيدو وجاية تجلس على الطبلة دلعدول..(كدور فراسها) اييييييه يا ودي على الحشمة 

تالاسين :(تزيرات ووجهها حمااااار) 

رؤيا :هههه نوض نوض.. هادي نتسناوها حتا لعام لماجي وما تنطقشي ههه 

براء :ايوا هاكاك يرضي عليك.. من الصباح ديريها هههه 

رؤيا :غير كنضحك معاك.. ربي يكمل عليكم بالخير اولدي.. نتينا وهي... واخة الصراحة ماشي هايدا كنت ناوية بلحق لي فيها الخير الله يعملها.. مهم تكونو متوالمين ومتفاهمين والله يكمل بالخير 

براء :(تبسم وباس يديها) امييييين.. الله يطول فعمرك

العدول:سيادنا.. الا واجدين نبداو على بركة الله حيث عندي شي شغل

براء :هي لولة

ناض وقف.. وجرها جلسها وجلس حداها.. هي فالوسط بينو وبين فراس.. ولعدول من جهة.. زاد حداهم حسن لي ايشهد هو وفراس على زواجهم.. وهي بيناتهم كطرطق فصباعها وعينيها ما تهزوش فيهم.. بدا لعدول مراسم ضريب الصداق.. كأي زواج وكالعادة.. حتا سولها.. 

العدول:خديتي صداقك ابنتي؟

هزات عينيها شافت فيه.. ورجعات شافت فبراء لي حداها ما عرفات باش تجاوب.. حتا نطق هو.. 

براء :مزال.. بلحق الا بغات انعطيها *** دالمليون!!! 

لعدول:قابلة ابنتي!!! 

تالاسين :اااا.. لي بغيتو.. بحال بحال 

العدول:اذا نكملو.. سنيلي اولدي هنا

عطاهم يسنيو بزوج.. وموراهم فراس وحسن.. وأخيرا ها هما.. زوج وزوجة.. ولكن هاد المرة كانت مختلفة على لي سبقاتها.. مراتو شرعا وقانونا.. برضاها التام..وهما فكاااامل وعيهم.. ناضو كيسلمو على لعدول.. ووقفوهوم كيباركو ليهم.. وهما فرحااااانين.. غا هو مبين وضحكتو فاضحاه.. وهي مخبعاها وسط تبسيمتها لحشمانة.. تكررت كلمات التهنئة والمباركة شحال من مرة.. حتا وقف وشدها من يديها قدامهم.. وحط يدو مدورها على كتافها معنقها.. وهي تزير فبلاصتها.. 

براء :ايوا دابا اتسمحولي ناخد مراتي.. عندنا ما نقضيو ههه

رؤيا :دابا خديتيها ورجعات مراتك.. غا عمل ما عليك

جواد :دابا عاااد اطير لبلاكة دبصح

هنية :مشيو.. غير رجعو تعشاو معانا.. انعملو شي عشاء على حقو.. ما يدوزشي هاد النهار عادي

براء :(جرها خارج) نتوما ديرو عشاكم.. جينا هو هاداك.. ما جيناش بصحتكم

خرجها وخلاهم هما كيضحكو موراه.. وهي ما عارفة باش تبلات... كل مرة كيزرب عليها وكيخليها غااااا كتشوف.. ما فطنات حتا لقات راسها جالسة وسط الطوموبيل.. والسمطة كدوز على كتفها.. وقبلة تطبعات على خدها.. على إثرها هزات عينيها فيه.. غمزها وسد الباب ودار ركب حداها وقلع.. هزات عينيها قدامها كان ظلام لحال.. والشمس غربات.. 

تالاسين :فاين ماشين!!! 

براء :أي بلاصة نكونو فيها غير انا ونتي.. الراس فالراس.. (هز يديها باسها) مبروك علينا.. امراتي هههه 

تالاسين :(ضحكات وهي كترد شعرها مور وذنيها) الله يبارك فيك ههه.. 

براء :اه حقا.. بالنسبة لصداق انا نسيت ما هضرتلك عليه قبل.. انا بغيت نعطيك من لفلوس لي جامعها من خدمتي.. ماشي من فلوس الواليد.. الا جاتك قليلة نزيدك

تالاسين :لا لا... بلعكس.. مزيانة وبزاف.. الله يقوي الخير ههه

شاف فيها وتبسم وسكت.. ودار مكمل سوگان.. حتا وقف بيها فمكان هي كتعرفو مزيان.. نزلات وهو هز زوج جاكيطات من اللور وخرج مدلها وحدة... 

براء :لبسيها... البرد عليك

شداتها منو كتلبسها.. وهما كيطلو على لبحر.. نفس المكان.. سدات السنسلة.. وخرجات شعرها من الجاكيط وربعات يديها كتشوف فلبحر والهواء كيضرب فيها.. حتا حسات بيدين ضموها من الخلف.. وخشا راسو فعنقها فصمت.. وهي تبسمات بخجل.. طال سكاتهم حتا نطق هو بهدوء وهو مزال دافن راسو فعنقها..

براء :جينا لهنا ثلاثة دالمرات.. لولة. فاش يله عرفنا راسنا تزوجنا وجيتي سكنتي معايا.. والثانية فاش كنا باغين نطلقو ههه.. وبغيت الثالثة تكون هي هادي

تالاسين :ولكن هاد المرة ماشي بحال كاع المرات 

براء :هاد المرة جيت يدي فيديك.. 

سمع صوت ضحكتها لمهموسة.. وهو يتبسم وسط عنقها زاد خشى راسو حتا قاس لحمها.. وطبع قبلة عليه.. وهي تعوج عنقها وشافت فيه ... 

تالاسين : شكتعمل ؟؟

براء :كنبوس مراتي.. ما نبوسش

تبسمات بتوتر.. مخلط بالحشمة.. وبغات تبدل الموضوع.. 

تالاسين :نهبطو!!! 

براء :هي لي ما تعاودش

هبط يدو فيدها.. قلعات صباطها وهو زول صبرديلتو.. وتمشاو حتا وصلو لبلاصة قريبة من الماء وجلس وشاف فيها.. 

براء :جلسي 

حنات باغة تجلس حداه.. وهو يزرب عليها.. وشدها من خصرها وهي عاطياه بالظهر وجرها جات وسط حضنو وهي تغوت بدهشة.. 

تالاسين :شعندك!!!! 

ضحك وهو كيقاد رجليه ويدورهم عليها وجلسها هي وسطهم.. وضمها لصدرو وخدا نفس طويل... 

براء :هادي هي بلاصتك.. تفاهمنا!!! 

توترات وهي كتحس بنفسو لي كضرب حدا وذنيها من الخلف.. سرطات ريقها وهي كترد شعرها مور وذنيها بزوج.. 

تالاسين :خليني نجلس غا حداك

براء :تزوجتك باش نجلسك حدايا!!!

تالاسين :(طلعات حاجبها) اهاه.. يعني غير على هادشي تزوجتيني

براء :(مبسم) الصراحة لا.. تزوجتك على حوايج خرييين..

تالاسين :(على نيتها) لي هما؟؟؟

براء :ههه هادوك ما كيتقالوش.. هادوك كيدارو هههه

تالاسين :(شافت فيه بالجنب مخنزرة) ما عندكشي لوجه لي كيحشم

براء :اووووووووه.. لا هاكة ما لاعبينش.. دوري شوفي فيا نتفاهمو.. (دارت شافت فيه) من هنا لفوق.. هاد الكلمة اتلغيها من قاموسك.. طيبتيني بيها ومن دابا لفوق ما بقيتش باغي نسمعها.. يعني.. حاء..شين..ميم..وتاء..هاد أربعة دلحروف ما يتشركوش.. ماشي تهنيت من أربعة دلحروف لي فاتو جبتيلي هادو

تالاسين :(ببلاهة) شمن أربعة دلحروف!!! 

براء :خاء.. واو.. ياء.. الف.. خويا.. نسيتي!!! انا ما نسيتش.. ودابا اتنساي عليا لحشومة بحال لي نسيتي خويا واخة

تالاسين :(دارت كتشوف قدامها وربعات يديها) ايوا الزين يحشم على زين... والخايب غييييير الا هداه الله

زاد زيرها عندو ولصقها كثر مع صدرو وهو فاتح رجليه وهي وسطهم.. وخشا راسو موراها كيطل على وجهها.. 

براء :هي دابا انا خايب ياك هههه

تالاسين :(حابسة الضحكة) مزيان الواحد يكون متصالح مع ذاتو 

براء :دابا من لخر الالة الزوينة.. حنا تزوجنا.. يعني وقت.. (رقق صوتو كيعيبها) حشووووومة.. ولا.. شني كتعمل ابراء.. لا رخي مني.. (قلبها لنظرة ونبرة جادة) هاد الدراما لهندية سالينيها.. تفاهمنا.. 

غلبها الضحك على الطريقة لي عيبها بيها.. وما قدراتش تحبسها.. وعوجات راسها بين يديه كضحك عليه وضرب يديها فبعضهم.. وتحطهم على فمها.. وهو كيشوف فيها ويتبسم.. 

براء :علاش كضحكي ههه

تالاسين :هههههههههه اواعدي جيتي كضحك ههه.. صوتك.. ايماااا ههههه صوتك جا حااايل هههه 

براء :(كيضحك حيث كضحك) هههه دابا نتي هادشي ما شديتي.. راه كنهضر معاك بصح

تالاسين :وا والله حتا كتقتل بالضحك هههههه

سكت كيشوف فيها وهي كتموت بالضحك وكيضحك مستغرب من ضحكها.. وهي كتعواج وسط حجرو.. خلاها حتا شبعات ضحك مع راسها وبدات كتسكت شوية بشوية وتشوف فيه.. لقاتو ساااااهي فيها مبسم.. ضحكتها داتو لعالم اخر.. شحال ما شافها كضحك بهاد الطريقة.. ما عارفش بلي الفرحة لي حاسة بيها تقدر تخليها تضحك على اتفه لحوايج هاد الساعة.. شافت فيه متوترة من شوفاتو.. وحبسات من الضحك وهي كتشوف فيه.. حسات بيديه زادو دارو عليها وكيزيد يخشيها فيه ويقربها ليه كثر.. عينيه كيسرحو على وجهها طالعين هابطين ما بين عينيها وشفايفها.. خدات نفس طويييييييل حتا تعمر صدرها.. حيث. كتحس بالنفس تقطعات فيها... نفس الحالة فكل مرة. كيقربلها.. ذاتها كترجف.. وقلبها كيزدح.. وجسمها كيتشلل وما كيبقاش هازها.. صدرها هابط طالع.. وهو غادي وكيقرب منها شوية بشوية.. وريحتو لخفييفة كتزيييييد دوخها.. شاف فعينيها وهو ما كيفصلو بينو وبينها غير بضع سنتيمترات وتبسم بسخرية.. 

براء :ديك المرة سخفتي وقطعتيها عليا.. بلحق ماشي مشكيل.. كل حاجة بوقتها كتجي حسن (غمزها) 

شافت فيه حالة فمها.. كون غااا ضربها بالقرطاس وما يغمزهاش.. داك الشوية لي كانت مزالة شاداه فلت منها وذاااابت.. سهااااات فيه ساااارحة.. وكتحس بالمعدة ديالها كتشقلب.. نفسو بدات كتحس بيها كضرب فوجهها قريبة بزاااااف.. لدرجة كيشركو نفس لهواء.. ميل راسو للجنب شوية كيشوف فشفايفها وهي تزير على قبضة يديها.. وزيرات على عينيها بقوة.. حتا كتسمع صوت خلاها تحل عينيها وتشهق مبعدة عليه... فتح عينيه فيها معبس ومستغرب... وهي مزالة بين يديه وكتشوف فجنابها... 

تالاسين :(بهمس) ما سمعتيشي!!! 

براء :(طلع حاجبو) شنو!!! 

تالاسين :شششش.. سمع 

هز راسو وطلق وذنيه كيسمع.. وهي كتدور بجنابها.. حتا بدا كيفرز الصوت لي كيسمع.. 

.... :غوتي.. غوتي

...... : ...اااااااي... غا بشوية

عقد حجبانو وهو كيسمع صوت لخبيط وصوت بحال التصرفيق.. وتوحويح جاي من جهة لحجر... ودار شاف فيها هي لي حاطة يديها على فمها ومخرجة عينيها... 

تالاسين :كيقتلها!!!!! 

براء :(شاف فيها ساكت ومعبس ما عاجبو حالو) 

تالاسين :(بهمس) اواعدي مزال كتشوف فيا... نوض نعتقوها.. هييييييييه ويلي ايقتلها

براء :من نيتك!!!! 

تالاسين :اويلي.. وشني نخليوه يقتلها

براء :راه انا لي انصفيها لراسي... الناس وصلو لقتيلة وانا مزال حاير فبوسة

تالاسين :نعااااام!!! 

براء :(كيوقف) نوضي نوضي.. يله فحالنا.. 

زاد تسمع لغوات وجهاد الطرح كثر.. ووقفات فبلاصتها مخرجة عينيها وكترجف بالخوف... 

تالاسين :اواعدي.. سمع.. انمشيو ونخليوه يقتلها.. 

براء :واش كطنزي عليا.. لي كتكون كتموت كتقولو غااا بشوية.. زعما قتلني وتكايس ياك

تالاسين :(ببلاهة) وشني كتقولو!!! 

براء :(قلب وجهو كيصبر راسو ودار شاف فيها) شوفي نتي دابا!!! 

سكتات كتشوف فيه ودورها فراسها وعينيها كيدورو َومسرحة وذنيها كتسمع مزيان.. وتفرز لغوات من الآهات.. وهي تشهق مبلقة عينيها فيه... 

تالاسين :ويلي... لااااااا

براء :ويلي... ييييييه.. وا زيدي دابا

شدها جارها موراه عاقد حجبانو.. ما حاملش الموقف بكل ما فيه.. وهي موراه مصدوووومة وحشماااانة.. وصلو للسيارة.. ركب وركبات.. زفر ودار شاف فيها..

براء :عمري عرفت راسي منحوس.. حتا عرفتك

تالاسين :الصمت

سكتات كتشوف فيه ما عارفة باش تجاوبو.. ما فهماتش علاش تعصب اصلا.. حاط دراعو على لفولون ومقابل معاها معبس.. حتا دار شاف قدامو وهو كيديماري الاوطو وكيتمتم بصوت شبه مسموع ويسوط..

براء :انا مكتابلي غااا نتفرج.. تفوو

تحرك راجع بحالو وهي حداه ما فاهمة والو.. غير كتشوف فيه.. ومزالة مبهوضة من داكشي لي سمعات.. وهو ساكت ومعبس وكيسوك.. حتا لواحد اللحظة دار شاف فيها وشافت فيه كترمش بحال الا مخلوعة.. وهو يقلب وجهو وبدا يضحك بالثقالة... ويحرك راسو يمين شمال

براء :ههه لا حول ولا قوة الا بالله.. كثرة الهم كضحك هههه مالك كتشوفي فيا هاكاك

تالاسين :(بدهشة) نتينا لي شعندك.. ما فهمت والو

براء :ما عندك ما تفهمي نتي فهادشي... بركة عليك غا كوزينتك

تالاسين :كيفاش هادي عاود!!! كتخشيلي لهضرة ولا جابلي بالي!!!! 

براء :دابا من نيتك سحابك كيقتلها.. نهار على نهار كنتأكد بلي نتي غااا غشيمة هههه

تالاسين :(قلبات وجهها لسرجم حشمانة تهضر فداكشي لي سمعو ) غشيمة غير خليني وبدل هاد الموضوع 

ضحك ومد يدو جرها من عنقها على غفلة وخشاها تحت دراعو وهو سايق باليد لوخرا... وكيعنكش فيها... 

براء :هاد لغشامة الزايدة انزولها منك غا بلاتي عليك 

تالاسين :اواعدي عندك الطريق

براء :(زاد زيرها من عنقها) تخشاي وسكتي ههه.. مال حسك هاكة مالك.. 

تالاسين :واااا غااا نتقاد بعدا راك خنقتيني

براء :لا خليك هاكاك.. دابا نتي البرهوشة مدوزة عليا هاد المحنة كاملة.. هَمممم!!!!!! 

تالاسين :اعععع.. المرض عنقي معوج

براء :دابا شنو ندير فيك انا غااا قوليلي.. غا خطية وتبليت بيها.. ما كتصلاحي لوالو

سقرات بين يديه واحد ثلاثة دالثواني كدور هضرتو فعقلها وهي تزفر ما عاجبها حال.. وبدات كتجر راسها من بين يديه ودفعو معصبة وهو حالف ما يطلق دراعو على عنقها... 

تالاسين :طلق من عنقي الزمر.. طلق... ما تشبرشي فيا... تفو عليا انا لي ماجة معاك.. منين ما صالحة لوالو علاش مزوج بيا... تفوووو.. علاش قبلت نتزوج بيك اصلا.. واااا طلق الزمر

براء :تزوجتك غااااا باش نفدي فيك ما دوزتي عليا هههه

تالاسين :تستاهل.. نتوما الرجال غااا ديال العذاب... رخي مني خنقتيني

براء :طرطقي لحسك.. ما انطلقش

تالاسين :اوووووف.. براء تخنقت رخي.. 

براء :لا ههههه

تالاسين :(شداتو بعضة من دراعو) اعععععععع 

براء :اححححح المسموووومة.. طلقي

ما بغاتش تطلق وشداتو بعضة من داكشي وهو كيتعفرت معاها وغالباه الضحكة... وهي. كتعصر مع دراعو.. حتا قلب الفولون بالجهد بلعاني ومشات الطوموبيل وجات بحال الا اتقلب وهي تقفز مخلوعة وطلقات منو وحتا هو رخاها وهو كيضحك.. 

تالاسين :ناري... اتقتلنا

براء :شي قتيلة بحال هادي لي سمعنا ياك

تالاسين :😳... بعد مني

قلبات وجهها لسرجم كتقاد شعرها وحالتها وكتسمع الضحك ديالو وكتسوط.. وبقى هاكاك مطلعها عليها وهي منخلاه.. حتا وصلو لدارو عاد نطقات هي..

تالاسين :علاش جينا لهنا.. ما انمشيوشي للدار

براء :حتا نكون ناقص عقل بحالك

قالها وهو نازل.. عبسات ونزلات حتا هي وزدحات الباب..

تالاسين :باغي تدابز؟؟؟

براء :علاش؟؟

تالاسين :كيفاش هاد ناقصة عقل عاود!!! 

براء :ومالي كذبت.. راه ماشي انا لي قلتها.. النساء ناقصات عقل ودين هههه

تالاسين :(هزات صبعها قدامو) راه من صباح ونتينا تعاير فيا وانا ساكتة.. 

شاف فيها كيضحك وهو حاط يديه فجيابو.. تبسم وهبط شوية وباس صبعها خلاها غير كترمش وطلع راسو شاف فيها... 

براء :ناقصة عقل احبيبة.. ماشي لخاطرك

قلب الدورة داخل بحالو كيتبسم وهي تابعاه كتفقص.. وهو كيضحك عليها.. شاف جيهة السي المختار.. ما كاينش.. وكمل وهي تابعاه.. 

تالاسين :واش عارف بعدا علاش قال الرسول (صلى الله عليه وسلم) علينا ناقصين عقل ولا نتوما الرجال غا حافظين وما فاهمينشي

براء :(رمى يدو معنقها) علاش الالة!!!!

تالاسين :(زولاتلو يدو) حيث اسيدي حنا النسا كنفكرو النص بعقلنا والنص بقلبنا.. اما راه عقلنا ما توصلوهشي نتوما حتا للربع فيه

براء :وما كاينش شي ربع طيحان حتا هو كتفكرو بيه ههه (تفتح السانسور ودخلو) 

تالاسين :(تفقصات) براااااااااء.. كتعصبني بهاد الطنز ديالك!!!! 

براء :ههههه اجي عندي الهبيلة (جا موراها وعنقها وطل على وجهها) .. نعصبك وما نخلي لي يعصبك (باس خدها) دابا هادشي غا ناقصة عقل وشوفي ما درتي فيا... كون كنتي بعقل كامل شنو ديري هههه (حط يدو على كرشها كيهرها ووجهو فعنقها) دوي هااااا دوي هههه.. شنو اديري

تالاسين :لا لا ههههههههه حشومة عليك لا ههههههه ناري لا انموت ههههه

براء :دوي ههههه شنو ديري البرهوشة ههه

فلتات من يدو ولكن ما عندها فين تهرب وهي وسط السانسور وهو كيهر فيها وهي كتغوت وتضحك وعقلها ايخرج.. حتا تفتح الباب وهربات والضحك ديالهم مزال مسموع فالكولوار... 

تالاسين :شو صافي هههههه بعد مني ههه

براء :هههه عندك تموتي.. (كيفتح الباب) 

تالاسين :اووووووف.. ناري كرشي هههه

تمات داخلة وهو يهرها من جنب كرشها بالزربة حتا قفزات.. 

تالاسين :لا بركة ههههه صافي

براء :غا دخلي ما انقيسكش.. تموتيلي هنا وحنا عاد قلنا بسم الله

دخلو للدار.. وزولو صبابط وجواكط عليهم.. وهي وقفات فبلاصتها كتشوف فجنابها وتحك شعرها بتوتر.. طلعها وهبطها بابتسامة جانبية.. عاد نطق.. 

براء :اندخل نبدل عليا.. حتا نتي سيري لبسي علبك شي حاجة.. حوايجك مزالين هنا

تالاسين :(بلا ما تشوف فيه) اه واخة.. 

جات غادة من حداه وهو يشدها من دراعها وجرها عندو.. وهبط راسو باسها بالزربة فخدها.. وطلقها.. 

براء :يله سيري.. وما تعطليش

غمزها وعطاها بالظهر داخل لبيتو وهي مزالة واقفة فبلاصتها حتا رجع دار عندها... 

براء :اااه حقا.. جبتلك واحد السوفونير معايا.. مأكد ايعجبك

تالاسين :سوفونير!!! شني هو!!! 

براء :لبسي.. واجي نوريهلك

تالاسين :وريهلي هو لول

براء :(راجع بلور) نننن.. لبسي واجي ههه وقبل ما نسى.. حوايجك حوليهم لهاد لبيت.. حيث من دابا لفوق اتبقاي تنعسي فيه 

دخل لبيتو وخلاها هي واقفة كتشوف فالباب.. فكرها فشنو تابعها.. وفلي جاي.. شدها الخوف.. ورجعات داخلة لبيتها وهي كتخمم.. دابا هما تزوجو.. شرعا وقانونا.. برضاها وبموافقتها التامة.. وهي دابا فدارو.. معاه الراس فالراس... يعني لا مشى بغى يقيسها هاد الليلة شنو دير... على إثر هاد الفكرة مسحات على وجهها.. كتحس بالصهدة طلعات معاها... ويديها عراقو.. حاولات تتناسى فهاد اللحظة.. وتعيش الزوين فيها.. تفكر غير فالحاجة لي كتفرح ماشي العكس.. تفكر بلي هي مع الراجل لي كتبغي وكيبغيها... ولي اليوم تزوجاتو.. تبسمات فاش تفكرات كيفاش داز نهارها.. وتمشات لبلاكار ديالها وهي كضحك.. 

خدات وقت.. بدلات وتوضات وصلات فيه.. عاد تمات خارجة كتجمع شعرها بعود صغير.. لواتو مخربق وشداتو بيه.. هزات راسها وهي خارجة وطاحت عينيها عليه.. مجبد على الفوطوي.. مبدل حوايجو حتا هو.. خرجات عينيها وشهقات فاش شافتو شاد قط بين يديه وكيلعب معاه... كان قط رمادي قااااتم.. وعينيه خوووضر فاااتحين.. تحلو عينيها بالفرحة ونقزات ججات حداه..

تالاسين :ويييييييينووو.. فنيون اواعدي..

براء :هذا هو السوفونير ديالك

تالاسين :(خداتو منو وعنقاتو كتلعب معاه وتمسح على راسو) غزييييول.. واعر هههه.. كيحمق... شريتيه!!!

براء :نننن.. لقيتو ههه

جلسات فالفوطوي حداه.. وهو تقلب على جنبو موكي على يديه وكيشوف فيها وهي اتحماق معاه.. وداك القط بين يديها كيتجبد ويتكسل عاججبو حالو...

براء :جبت لمينوشتك راجل باش ما تجيهاش الغيرة منك هههه

تالاسين :(عنقاتو عندها وشافت فبراء بحماس) شنو انسميه!!!

براء :لي بغيتي..

تالاسين :امممم.. جبرتها... تشوتشو هههه جات معاه

براء :ههه مزيانة.. دابا خممي كي انديرولو مع امينو.. ما قلنا تفاهم هو ومينوشة انزيدوه هذا

تالاسين :(عنقاتو كاع ما سمعاتو هو لي هضر) ههه ناري غزال غزال.. حمقني هههه

ناض تجلس.. شاف فيها مطولا.. وهي ما كيناش فديك لبلاد.. طلعها وهبطها.. لابسة بيجامة.. سروال وفوقاني نص كم فاللون الشيبي بارد.. بانطوفة خفيفة فرجليها.. طلع عينو فشعرها لي معنكشاه.. وقلب وجهو كيضحك.. ومد يدو حيدلها القط من يديها...

براء :ما تندمينيش لي جبتولك

تالاسين :عافاك.. خليهلي

براء :(طلقو يمشي ودار شدها من يديها ونوضها عندو) دابا اتنسايه عليك.. واتجي عندي

خوالها بلاصة وجرها نعسات حداه..وهو ناعس على جنبو وراسو على يدو كيشوف فيها.. مد يدو الثانية زولها لعود لي جامعة بيه شعرها.. حط يدو على شعرها كيسرحو.. وهي ساقرة فبلاصتها وغي كتشوف فيه.. وقلبها ايخرج من بلاصتو.. حط يدو على خدها كيداعبو.. وعينيه كيفليو فوجهها.. 

براء :(بصوت هادئ) عاوديلي.. شنو درتي فغيابي

تالاسين :(سرطات ريقها عاد نطقات) ووو.. والو

براء :(هبط يدو كيداعب عنقها وهي تعوجو) وفاش دوزتي هاد شهر ونص.. 

تالاسين :(حنات عينيها ما قاداش تشوف فيه) عادي.. الدار وصافي

براء :امممم.. (هبط باس عينيها ورجع نطق) وكيفاش داز بلا بيا... (ابتسامة جانبية) 

تالاسين :(خدات نفس عميق متوترة ومخلوعة ودوزات لسانها على شفايفها).. كيفاش ايدوز.. داز وصافي.. (بغات تنوض) نوض نوجد شي حاجة ناكلوها.. 

براء :(شدها) طلبت شي حاجة من برا غا جلسي.. (حط اصبع الابهام تحت ذقنها ونزل باسها من خدها) انا بعدا دوزتو كلو كنفكر غير فيك.. وفوقاش نرجع عندك

تالاسين :(هزات عينيها شافت فيه وهبطاتهم بالزربة) ما قلتيليشي فاين مشيتي.. شمن موطع 

براء :مشيت لبزاف دلبلايص.. (باس خدها الاخر) 

تالاسين :(غمضات عينيها وهي كتحاول ما تبينش التوتر والحشمة لي فيها) 

براء :مشينا لغابة الأمازون... فلبرازيل... مشينا لتايلاند.. وشحال من جزيرة (باس ذقنها قريب لفمها) 

تالاسين :ننن.. نشرب.. 

براء :(تبسم ) بلاتي.. 

تالاسين :ععع.. عط.. عطشت.. 

براء :(عينو على شفايفها) حتا انا عطشان

حط عينو على شفايفها.. واصبع الابهام كيداعب ذقنها ببطء.. سرح فيها لثواني.. وهو حاس بتوترها ويديها لي كتفركهم وتلعب بصباعها.. صغر عينيه وركز الشوفة على فمها.. وتم هابط براسو بشوية.. قرب حدا وذنيها.. وهمس بصوت بورشها وزعزع قلبها... 

براء :كنبغيك 

طبع قبلة على وذنها.. وهز راسو بشوية قاصد فمها وشفايفو كيدوزو على خدها حتا قرب ليه..مرفووووع وما هواش هنا.. بينو وبين شفايفها القليييييييل ويقيسهم.. فتح عينيه لي مصغرهم شاف فعينيها.. خدات نفس طويييييل طلع صدرها فيه ونزل..وغمضات عينيها مزيرة على القبضة ديديها.. قلبها فعلا كانت كتحس بيه كيضرب بطريقة غير طبيعية.. كرزات على ذاتها كلها كتسنى القبلة ديالو... باغاها.. وفنفس الوقت مخلوق عندها واحد الهاجس من لي جاي.. ولكن فجأة.. فتحات عينيها على صوت الصوني دالباب.. لقاتو حبس فمكانو ما زادش قرب.. غمض عينيه وتنهد تنهييدة طويييييييلة ونطق.. 

براء :اصلا كون كملات كنت انتعجب

ناض من حداها وتوجه نيشان جيهة الباب كيزفر.. خلالها فرصة هي فين تجلس كترد النفس.. ناضت كتجري نيشان للكوزينة.. فتحات الثلاجة وخدات قرعة.. كتكب الماء لي نصو تهرق بقوة ما يديها كيرجفو.. هبطات عليه دقة وحدة.. تمات خارجة وهي تساطح معاه داخل وهاز فيدو كراطن دالماكلة.. حطهم على الطبلة ودار شدها قبل ما تخرج.. دفعها من كرشها ولصقها مع الحيط ولصق عليها... 

براء :مال مك معكسة نتي وبوستك.. هممم!!! 

تالاسين :(مخرجة عينيها فيه) اااا.. ببب... مممنن 

براء : اييييه.. هاكاك.. تمتمي

تالاسين :الصمت

براء :(دوز صبعو على شفايفها) فين كنا!!! 

مزال ما كملها تسمع الصوني للمرة الثانية.. حبس صبعو وشاف فيها مطولا....غمض عينو بقوة.. وزير على فكو بعصبية.. تنفض خارج بالزعفة كيسوط ويتمتم وحجبانو معقودين.. شافتو هاكاك وجرات موراه تابعاه.. فتح الباب بالجهد.. باغي غاااا يشبكها.. ويبرد غدايدو.. وتالا واقفة موراه كطل.. كانت وصال لي جاية كدق.. رامية بينوار ساتان حد الركبة عليها.. ومحلول شوية جهة الصدر.. سمعاتهم فاش دخلو كيضحكو وطلات شافتهم.. وما قداتش تجلس وما تجيش دق وهو كان غايب شحال واليوم. رجع... بلحق غااا شافتو كيفاش كيشوف فيها وكيفاش فتح الباب وهي تقفز مخلوعة وبدات غا كتفتف وترمش...

وصال : مساء الخير 

براء :(الصمت حدو حط يدو فجيبو وزاد عقد حجبانو كيطلع فيها ويهبط) 

وصال : بب.. بغيت نسولك.. اممم.. نلقى عندكم دوليبران..اااا.. راسي ضارني..ووو وليل ما لقيتشي منين نشريها.. 

براء :(بحدة) سيري حزميه بزوج ليمونات ونعسي

زدح الباب طالعلو الخز.. حيث اصلا عارفها علاش كدور.. والحالة لي جاية دق بيها عليه فنص الليل ماشي حالة دوحدة ضارها راسها.. سد الباب ودار شاف فيها لقاها موراه.. مخرجة عينيها على وسعهم وحاطة يديها على صدرها حيث قفزها بديك الزدحة والدورة لي دار... شاف فيها ساكت حاط يدو على الباب... يله هزات عينيها فيه وجات تهضر... وهو يتلاح عليها هاد المرة بدون مقدمات او سابق انذار... حط يد مور عنقها ويد على خصرها... وشفايفو على شفايفها ودفعها مع الحيط بالجهد... وخشى فمو ففمها... وهي هازة يديها مع الحيط ما عارفة باش تبلات... لصقها فيه كثر كيقبل شفايفها بقووووة كينهج... كيبوس فيها كيف العطشان لي شحاااال َما شرب واخيرا لقى واحة يتروى منها... جرها من خصرها لصقات مع كرشو.. واستفرد بالشفاه السفلية كيتلذذ فطعمها...ما كفاتوش وداز للشفاه العليا... فمها رجع عجينة وسط فمو... قبلة عنيفة ترجمات الشوق واللهفة لي كانو عندو ليها.. كيتسمع صوت انفاسو لقوية كينهج.. وكيتسمع صوت انينها.. تقطعات فيها النفس وهو ما بغاش يطلقها وغي ما كيزيد يبرك كثر ويزيرها عندو كثر و كثر... حطات يديها على كتافو كتبعدو وتدفع فيه وهو مرفوع ما كانش معاها..خرجو عينيها وحماااار وجهها وتزيرات بين يديها... وجمعات يديها على شكل قبضة كضربو بيها لكتافو... رجع لوعيو... وحبس.. طلق من شفايفها ما ساخيش.. دوز لسانو على شفايفو لي فزكو بريقهم لي تشاركوه.. وحط جبهتو على جبهتها مغمض عينيه... هبطات يديها من على كتافو بشوية فشلانين وهي كتنفس.. الروح كانت غادي تزهق ليها... غمضات عينيها حتا هي كترد النفس وكتلهت.. كيتسمع غير صوت انفاسهم المتسارعة مع صوت دقات الساعة لي كتكتك فالحيط.. دام الصمت.. ووقفو عن الحركة.. كل واحد فيهم كيسترجع فبالو ما وقع عاد دابا.. حطات يديها على صدرو كيرجفو.. وشادة فتيشورط ديالو بحال الا خايفة طيح.. حسات بالاصبع ديالو كيتحرك على عنقها.. ونطق بصوت مهموس وضحكة خفيفة مسموعة معاه.. 

براء :ههه.. خديتها

تالاسين :الصمت

حل عينيه معسلين فيها.. لقاها حانية راسها كتنهج ومغمضة عينيها.. وصدرها كيطلع وينزل.. شاف فيديها لي شادة بيهم تيشورط ديالو وكيفاش مزيرة عليه.. تبسم.. وطلع بيدو لي كانت على خصرها بحركات بطيئة كداعب جسمها حتا وصل لوجهها.. وشد عنقها بزوج يدين.. هزلها راسها حتا تقابلو عينيها مع عينيه.. حط اصبع الابهام على شفايفها الحووومر لي عصرهم مزياااااان كيمررو ببطء.. 

براء :مالك؟ 

كانت كتشوف فيه بين رموشها.. خدات نفس مقطع كلو كيرجف.. مررات لسانها على شفايفها وسرطات ريقها.. وبصعوبة قدرات تنطق بصوت قريب ما يتسمعش.. 

تالاسين :ما عرفت.. 

براء :(شاف فيها بتشكيك ومسح على شعرها) هضري.. مالك.. عرفتها اول مرة.. ولكن علاش خايفة

تالاسين :(شافت فيه مطولا وفعينيها نظرة ترجي) ماشي الليلة.. ماشي دابا

براء :(ضحك فاش فهمها وزير على خدودها) ما تخافيش.. مزال ما وصلنا لتما.. (مرر صبعو على فمها) دابا بركة عليا غير نذوقهم

تالاسين :(حنات راسها حشمانة) بلحق خنقتيني.. 

براء :هههه بسبابك.. شحفتيني عليها ههه

هزات عينيها شافت فيه ساكتة..وسكت حتا هو.. سهى فعينيها.. قرب وطبع قبلات على عينيها بزوج حتا غمضاتهم.. حسات بنيفو لي على نيفها.. وفتحات عينيها بشوية.. تلاقاو عينيهم.. حبس لثواني وهبط بشوفتو لشفايفها ورجع شاف فعينيها.. حس بيديها لي شادة بيها حوايجو زادت زيرات عليه.. هبط عينيه ركزهم على فمها.. وقرب بشوية حتا وصلو شفايفو لشفايفها وخدا قبلة صغيرة دغيا بعد فيها.. لكن كانت هاديك غير البداية باش يرجع ويحطهم مرة أخرى لقبلة أطول.. هاد المرة ما كانتش بحال لي سبقاتها.. كانت يديه كتلعب مور عنقها بطريقة خلاتها ترخااااااا..

يتبع ...