إرحموني الجزء 20

بعد عليها شوية.. شاف فيها.. مغمضة عينيها.. تبسم.. ورجع قرب.. حط شفايفو على شفايفها.. ويدو لي كانت تحت ذقنها سرحات مع خدها وهبطات لعنقها.. خدا شفايفها وسط شفايفو فقبلة حنيييييينة هاد المرة.. مغمض عينيه... وكيستفرد بكل شفاه على حدا وكيبعد شوية يخليلها مساحة فين تنفس.. تعمق كثر فالقبلة.. وطورها لقبلة فرنسية.. خلاها مدهوشة من حركاتو لي كتحاول تسايرها.. ولكن خلاها تعيش احساس زوين هاد المرة.. ترفعات معاه وشلل ذاتها.. وشلل عقلها.. حبس وبعد عليها شوية وجر شفايفها معاه.. حل عينو معسلين وتقابلات مع عينيها لي فاتحة فيهم النص.. شاف فيهم ودوز لسانو على شفايفو.. ورجع قرب مرة أخرى مزال باغي كثر.. شفايفو كيحركو شفايفها ويدو كداعب عنقها الشيء لي رخااااااها... ما حساتش حتا هزات يديها وحطاتها على خدو كتمررها على لحيتو.. هاد الحركة خلات حرارة جسمو طلع كثر.. وذاتو تكرز.. عقد حجبانو وهو بدا كيحس بالصهدة كطلع معاه.. ما بقاش كافيينو شفايفها.. هبط بقبلات متفرقة على جانب دقنها حتا وصل لعنقها وخشااا راسو فيه كيبوس... عوجات عنقها مهرباه وقوصات حجبانها.. حسات بيه طلع فوق منها وهي مزالة مغمضة عينيها.. عرفات بلي القضية اتفوووووت البوسان لهيه وهي مزالة ما وجداش نفسيا على الأقل.. شدها الخوف من صبعها الصغير وهي كتحس بصدرو فوق صدرها ويديه مكالي بيهم حدا جنابها.. ووجهو مزال فعنقها.. ركبها الخوف والخلعة.. وفاقت من داك الشعور الزوين لي كانت عايشاه وسط قبلتهم.. ما قادراش تزيد كثر.. حطات يديها على كتافو كتبعدو بشوية وهو مزال كيقبل فعنقها ببطء.. حس بيديها كيبعدوه وهز راسو شاف فيها كينهج.. 

براء :مالك

تالاسين :ماشي دابا.. 

براء :(طلع حاجبو) 

تالاسين :(حدرات عينيها) ما واجداشي عافاك..

شاف فيها مطولا.. تنهد وهز راسو بالزربة وبعد عليها وتجلس.. ناضت حتا هي جلسات كتشوف فيه بنص عين وهو كيمسح على وجهو وعنقو وشعرو.. فتح السنسلة دالقبية لي كان لابس كيسوط.. ودار شاف فيها كيحك جبهتو.. بعدات عينيها ما قاداش تشوف فيه.. خلاها وناض للحمام كينش على راسو.. دخل كيغسل وجهو ويفزك عنقو وشعرو ويرش الماء عليه.. خدا نفس وساطو.. وهز راسو فلمراية.. َضحك وهو كيحرك راسو يمين شمال.. غمض عينيه ودوز لسانو على شفايفو وهو كيستذكر ديك القبلة.. لي رفعااااااتو.. غير حركة يديها فوق خدو خلاتو يعيش احساس ما عاشوش قبل.. فتح عينيه وهو كيتنهد.. قاد شعرو وقاد حالتو.. سرح صوتو وهز راسو خارج.. 

لقاها مجبدة فبلاصتها.. مخشية فلغطاء غير عينيها لي كيبانو كيدورو.. غير جات عينيها فعينو بعداتهم كتشوف فنقط غير محددة.. ضحك وقرب جيهتها وتلاح حداها على جنبو وهي عاطياه بالظهر.. وقرب لصق على ظهرها ودور يدو معنقها من كرشها وزيرها عندو وحط ذقنو على كتفها وباسها فخدها.. 

براء :كنبغيك

حلات عينيها فالصباح.. من بعد ما غفات بين يديه بقوة لعيا وبلا ما تحس.. اخر حاجة عقلات عليها حضنو وهمسو بكلمة كنبغيك فوذنيها.. دارت شافت موراها ما لقاتوش.. تنهدات ورجعات حطات راسها على لمخدة.. غمضات عينيها وهي كتفكر فهاد النهار.. فهاد الليلة.. وفلي جاي موراها.. كتفكر شنو وقع البارح.. الشيء لي زاااااد خلاها توتر.. كانت كتزطم على راسها.. ولكن دابا قربات لحظة الحقيقة.. خدات نفس طويييييل.. ما كانتش كتفكر فغذا.. هي تعلمات تخلي لي جاي على الله.. هي اتعيش الساعة بساعتها.. وكل وقت بوقتو.. نفضات راسها وناضت وهي كتسمع الهاراج لي كاين فالفيلا.. والكولوارات.. نفضات راسها من كاع الافكار الخايبة.. وناضت باش تبدا نهارها... 

وكأي دار فيها العرس... الناس بزاف.. الهاراج كيكثر.. كلشي غادي جاي.. وكلها وشنو كيقضي.. التيليفونات كل دقيقة يصونيو.. كلشي مفتون وكيجريو باش يلحقو لعشية ويكون كلشي هو هاداك.. وهي فبيتها ممنوعة من لخروج.. ماكلتها كتوصلها.. ومرة مرة كيطل عليها شي حد.. وبيسان لي هادي سيمانة وهي مقابلاها بالماسكات... جابتلها ماسك دهنو لوجهها وخلاتهت متكية كترتاح وخرجات تشوف ما تقضي...

🍃🍃🍃🍃

التوتر تزاد.. الحرارة طلعات.. الذات كترجف.. ما بقى والو.. ها هي جالسة بكسوتها البيضة كثوب اميرات ديزني... لاصقة من الفوق بيدين طايحين على لكتاف من الجنب.. ومنفوووشة من لتحت.. بدانتيل خفيف.. شعرها مرفوع لفوق ومخليين خصلات منو طايحة على وجهها وجناب عنقها.. وتاج صغير مغروز وسط شعرها.. وطرحة طويلة كذيل الحورية موراه.. بوكي ورد ابيض مع ورد احمر صغير فيديها... طقم الماس موديلو خفيف بحال ستيلها هداتولها رؤيا مكون من خاتم كورميط سنسلة وحوالق.. زينات بيهم راسها.. ماكياج متقون مركزين فيه على عينيها باش يبان لونهم.. شفايفها بعكار ماط فاللون الخوخي مغلوق جا معاها.. صدرها كيطلع ويهبط بالزربة.. جالسة كتشوف راسها فلمراية فوسط بيت فالقاعة لي حاجزينها.. كتسمع صوت الاغاني... رجليها كتفيفري ويديها عراقو وكتحكهم مع بعضهم.. لكوافورا ولي كيعاونوها كيدورو حداها ويقاضو شغالهم من بعد ما سالاولها.. حدرات عينيها كتشوف فيديها المنقوشين.. حتا هزات راسها فالباب لي تحل بالزربة.. كانت بيسان.. بقفطان مودرن على شكل كسوة صواغي فالاسود يدين حد المرفق وطايحين على لكتاف بشوية.. لاصق على فورمتها بطاي حوتة.. نازل بخطوط منها لي عادي ومنها لي مرصع بحجار رقيقة عطاتو بريق.. محزم من الخصر ولصق فلحزام طرف ثوب بحال شي جوب.. شعرها مطلوق على شكل تدرجات.. وماكياجها سموكي.. نطقات بالزربة وهي كطل من الباب.. 

بيسان : تالا.. براء كيتسنى

غمضات عينيها.. خدات نفس طويييل كتحاول تزول التوتر.. شافتها بيسان هاكاك ودخلات قربات عندها.. 

بيسان :ما تخلعشي.. كلشي ايدوز مزيان.. 

تالاسين :كيف جيت.. مزيانة؟

بيسان :كتحمقي.. راه قلتهالك قبايلة... فننننة تبارك الله عليك.. خويا داك شوية دلعقل لي كان باقيلو اطيريهلو هاد ليلة

تالاسين :ما نكونشي قدك.. جتي غزالة والله 

بيسان :حنا ما نبانوشي قدامك هاد ليلة هههه

تالاسين :بفففف.. قلبي غيسكت... كاين الناس بزاف

بيسان :شبغيتي شي ناس نتينا.. نساي عليك الناس.. وفرحي غا براسك.. الليلة ليلتك.. 

تالاسين :(زفرات) والو اختي.. الخلعة مشبراني من صبعي صغير

بيسان :قراي المعوذتين واية الكرسي واستغفري الله... (حطا يديها على فمها مبسمة) قراي اختي على راسك قراي... حيث باينة ايعطيوهالك هاد ليلة.. 

تالاسين :فاين هو براء!!! 

بيسان :كيتسناك برا.. خاصكم دخلو الناس كيتسناو.. 

تالاسين :واخة.. (شهيق زقير ورسمات ابتسامة على وجهها ودارت اتخرج وحبساتها بيسان).. 

بيسان :صبر.. هبط الطرحة على وجهك

تالاسين :احححم.. واخة.. عاوطالي

قاداتهالها بيسان وهي معجبة بجمالها وبجمال طلتها وفستانها.. تمشات قدامها وهي سرحاتلها الكسوة من لور وقاداتها.. تقدمات بخطوات بطيئة... فتحولها الباب وخرجات كتمشى فالكولوار وبيسان موراها كتصور بتيليفونها.. كلوار طويل.. ارضو كلها رخام كتبري.. مرمي عليها الورد.. وفجنابها بالونات مشدودين بخيط طايرين فلهواء فاللون الاحمر.. رائحة الشموع المعطرة عاطية.. دارت مع الدورة وهي توقف فمكانها.. بان ليها واقف فاخر الكولوار فين كايينين دروج كيطلعو لباب القاعة الخلفي منين كيدخلو العرسان.. حبسات فمكانها وحبس نفسها معاها.. شافت فيه من تحت الشبكة.. جذاب بطلتو.. كوستيم اسود قااااتم.. سوميج بيضة بدرجة بياض فستانها.. جيلي كيبان من تحت الكوستيم لي سادلو صدايفو بزوج.. وبابيون حمراء صغيرة.. حذاء رسمي لامع.. وشعرو مسرحو وقالبو للجنب.. وفالجناب محسن شعرو مخليه قليل.. لحيتو مطراسية مزيان.. كان كيقاد فالكوستيم بيدو واليد لوخرا فجيبو وحاني راسو.. انتباه لحركة قدامو وهز راسو.. وهنا حبس الوقت عندهم بزوج.. هو كيطلع فيها ويهبط وهي كذلك.. وبزوج بيهم مسحورين ببعضهم.. كأنها اول مرة يشوفو بعضهم..

ها هي ذي قادمة.. 👑

فتاتي.. 👑

حبيبتي.. 👑

زوجتي.. 👑

وردتي ربيعية الطلة.. 👑

تنظر.. فتقتل..👑

تبتسم فتُحيي..👑

ها هي ذي تخجل.. 👑

ها هي ذي غمازتها تظهر.. 👑

وهي تعلم ماذا فعلت بقلبي الآن... 👑

تعلم أنه يتخبط من مكان لمكان.. 👑

لكن لا تعلم انه لو اقبلها آلاف المرات لا يكفيني في هذا الأوان.. 👑

فرفقا يا وردتي الربيعية.. رفقاً يا زهرة البيلسان..👑

تسحر بيها كثر ما كان مسحور.. فتناتو.. ترفع بقات كتبانلو غير هي قدامو... طلعها من تحت حتااااااا لفوق.. مدقق فكل تفصيلة فيها.. فعلا كانت أميرة فطلتها.. أميرة قلبو.. لاحظ صباع يديها لي كيلعبو وهما شادين البوكي.. وقرا توترها منهم.. وجهها مزال ما واضحش بسبب الشبكة لي مغطياه.. تشوق يشوف عينيها.. يشوف خدودها وهما حومر.. يشوف شفايفها وهما كيرجفو بالدهشة.. طفاو ضواو الكولوار لي هما فيه.. وشعلو أضواء خفيفة عطات جو رومانسي.. والكاميرا مان كان واقف حدا براء كيتسنى لعروسة تبان باش يصور هاد لقطة.. تقدم بخطى رزينة ناحيتها.. مركز شوفتو غير عليها.. ما حاس بحد وما شايف حد.. وما كانتش حسن منو.. كانت مبهورة بطلتو.. جاذبيتو وهيبتو.. وشوفتو ليها وهو جاي جيهتها.. فكل خطوة كيديرها كيتسمع فيها صوت كعب حذائو.. وفكل مرة كيدق صوتو فوذنيها كيخليها تهز فمكانها.. خطوة مور خطوة.. وها هو كيقرب كثر.. دابا كتقد تشوف البريق لي فعينيه بوضوح كثر.. وابتسامتو الخفيفة المذهولة لي مخفية وسط لحيتو بدات كتفرزها.. ما حدو كيقرب وهي كتحدر فعينيها وتسرط فريقها.. حتا هبطات عينيها كتشوف فيديها... وبزوج ثواني بانلها صباطو.. وشمات ريحتو.. وحسات بنفسو وهو قريب ليها..

حط يدو على اطراف طرحتها.. وهزها بشوية حتا رماها موراها.. هزات عينيها وشافت فيه.. وتلاقاو عينيهم.. كلمة حمقاتو فهاد اللحظة قليلة... وقلييييلة بزاف.. جميلة وزادها الابيض جمالا.. فتناتو بمعنى الكلمة.. ما بقاش عارف فين يشوف بالضبط.. ولا شنو يقول.. اكتفى بابتسامة واااضحة ومبينة اعجابو بيها.. ابتسامة ما قداتش ما تبادلوش بختها.. هز يدو حطهم على كتافها.. وقرب لعندها وقبل الجبين ديالها.. حطات يديها على صدرو وغمضات عينيها وتنفسات بنفس طويل خلا ريحتو طلع معاها كثر.. وفتحات عينيها على إثر لمستو لذقنها وهو كيهز راسها باش تشوف فيه.. غير جات عينيها فعينو وهو ينطق.. 

براء : فليشهد العالم.. أنني عن عرش قلبي تنارلت.. وعن تاج حكمي استغنيت.. ولحبيبتي أعطيت.. ما أملك.. وما ملكت.. 

سكت كيشوف فعينيها وهي تبسمات ابتسامة عريضة.. خلاتو يذوب فيها كثر.. وبهمس وصوت يله تقدر تسمغو هي نطق ويدو مزالة كداعب ذقنها... 

براء :كتحمقي... 

نطقها وقرب بخفة خطف بوسة قرييييييييبة من شفايفها واستنشق ريحتها فنفس طويل عاد بعد عليها.. مخليها غارقة فحوايجها بالحشمة وهي كتشوفهوم دايرين بيها.. واخة قلالين بيهم.. ولكن هادشي ما منعش خجلها..

بعد شوية ووقف قدامها.. وحط يدو على الطرحةة جرهالها على كتافها العريانين غطاهوم وقادهالها.. وهضر بصوت فيه نبرة من التذمر..

براء :ولكن هاد الكسوة كون تسترات شوية تكون حسن..

تالاسين :(طلعات حجبانها بدهشة) خايبة!!!

سكت كيشوف فيها.. ما بغاش يزيد يقول شي كلمة تخسرلها هاد ليلة... تنهد وسرطها ونطق...

براء :بلعكس زوينة.. ولكن خلي هاد ثوب (ما عرفش اسمها) نازل على كتافك.. هاكة حسن

بيسان :احححم اححم.. سمحولي انقاطعكم.. ولكن الناس كيتسناو.. هههه

شاف فختو.. وقاد الكوستيم ديالو.. سرح صوتو.. وارسم ابتسامة جانبية خفيفة على وجهو.. قاد كتافو ودار على شمالها عطاها دراعو تشد فيها.. حنات راسها كضحك ويديها كتدخل وسط دراعو.. حسات بيدو لي شدات يديها وقرباها لفمو باسها.. تبسم فوجهها ورجع حط يدها وسط دراعو.. وشافو قدامهم.. كيتمشاو خطوة بخطوة.. وقلوبهم اطير بالفرحة.. ببسان موراهم كتقادلها الكسوة باش ماتعكلهاش.. المصور قدامهم كيفيلمي دخولهم.. سمعو صوت الموسيقى لي تقطعات وهما كيقربو من باب القاعة.. وتبدلات بموسيقى اخرى.. ولثواني وهما واقفين قدام الباب لكبير المزين بالذهبي فالحافات ديالو.. كأنه باب قصر ملكي.. فجأة تفتح على مصراعيه امامهما.. وضرب فيهم ضوء مسلط عليهم من السقف.. شافو قدامهم.. ما كانتش الرؤية واضحة ليهم.. كيشوفو غير الطريق لي مضوية قدامهم ومزينة بالورود وغادة حتا وصلات لمنصة جلوسهم الفخمة... ولكن قبل كاينة منصة الرقص لي نازل من السقف لي فوق منها.. ورود على شكل هدوب طويلة وقصيرة.. تسمع صوت فيروز وسط القاعة واغنية طلي بالابيض كتردد فارجائها... تبهرات بزينة وجمالية المكان.. ومدى فخامتو.. ما كان عندها حتا دراية بشنو كيجهرزو.. وفين وكيفاش.. سلمات زمام الامور لرؤيا وما توقعاتش ادير العرس بهاد الفخامة.. زاد توترها وهي عارفة بلي العينين عليها من كل جهة.. وهي ما قاداش تشوف شكون كاين.. وشكون كيشوف فيها.. وكيفاش كيشوفو.. حسات بيدو زيرات على يديها وهزات عينيها شافت فيه... وغمض عينيه وفتحهم كأنه كيقولها تهدني.. سرطات ريقها.. وتقدمات تابعة خطواتو.. وهما غاديين مع الكولوار تحت كلمات اغنية ماجدة الرومي.. والضوء تابعهم وكيتحرك معاهم.. 

"طلي بالأبيض طلي...🌠

يااااا زهرة نيسان.. 🌠

طلي يا حلوة وهلي... بها الويشي الريااااان.. 🌠

واميرك ماسك إيديك.. 🌠

وعيون الكل حواليك.. 🌠

والحب يشتي عليكي ورد وبيلسان.." 🌠

تسمع صوت تصفيقات الحضور لي ما باينينش.. وصوت تزغيرتهم وصلاتهم على النبي.. خلاهم يدورو يشوف فجنابهم مبسمين.. وفنفس الوقت ما عارفينش لمن.. كان الطريق طويل وخاصة ان خطواتهم بطيئة.. وهما زايدين حتا وقفو حدا منصة جلوسهم.. لي كانت بكرسي فاللون االباج الداكن شوية.. فوطوي واحد حوافو مزينة بالذهبي.. وخلفيتو وسقفو نازل معاهم الورد من كل جهة.. دارو كيشوفو جيهة الناس مبسمين.. ومع دارو مع شعلو الأضواء متابعين حتا ضواو القاعة كلها.. وبداو كيفرزو لوجوه.. رؤيا بلبستها الخضراء الملكية وشالها ذهبي رامياه على كتف واحد..كتشوف فيهم بعينيها لمدمعين وحاطة يديها على فمها.. فراس لي واقف موراها مباشرة بلباسو لكلاص فاللون لبلومارين.. هاز راسو مبسم.. وحاط يديه فجيايو.. جواد وجهاد لي لابسين بحال بحال كالعادة فارقين غير لون لكرافاط.. واقفين كيصفرو بحماس.. هنية رقية زينب حسن.. كلهم جالسين فطبلة وحدة على يمينهم قريبة ليهم.. وبيسان لي عاد نظمات ليهم من بعد ما كانت موراهم.. شد فيديها وتقدمو عند العائلة باش يسلمو عليهم.. قربات رؤيا من تالا وعنقاتها عندها كدمع بالفرحة وكتردد فكلمة تبارك الله.. ما شاء الله.. وهو سلم على باه لي كيطبطب على ظهرو بقوة نوعا ما.. تسالمو معاهم كلهم وهما كيباركو ليهم وفرحانين بيهم.. والفرحة باينة من عينيهم..

رجعو لبلاصتهم..جلسات وجلس هو حداها.. شاف قدامو فالحضور لي كيشوف فيهم غير هما وتنهد وهو كيفتح صدافة ديال الكوستيم ديالو.. ودار كيشوف فيها.. تبسملها وتبسماتلو.. وحط يدو فيديها.. تنهدات وقلبات وجهها كتشوف فالحضور.. سرطات ريقها حيث كانت القاعة عامرة.. وكل مرة طيح عينيها على شي حد كتعرفو ويتمتملها بفمو او يديرولها حركات على اساس كيشكرو فيها.. وهي كتبسملهم.. دارت على القاعة كاملة بعينيها.. على لوجوه كلهم.. ودارت شافت فطبلة لي جالسين فيها العائلة حداهم.. فيهم لي سيفطولها قبلات فالهواء.. وفيهم لي كيصور.. وفيهم لي كتافا بانه يبتاسم.. وفيهم لي كيدعي ليهم.. تنهدات بحرقة.. وبشوية بشوية بداو الدموع كيتجمعو فعينيها بلا هواها... كدور وتشوف فكاع الناس لي حاضرين.. حتا وجه فيهم ما هو وجه مها ولا وجه باها.. حسات بالفرق.. حسات بالنقص... واخة كلشي داير بيها.. وكلشي فرحانلها.. ما منقصين عليها والو.. ولكن كتبقى بلاصتهم.. يا ريت لو كانو حتا هما... ويفرحو بيها.. ويشوفوها عروسة كما تمناوها.. مزالة كتعقل على هضرة باها.. "الا ما كان سيد رجال ما نعطيهاش ليه".. ما كرهاتوش كون كان وتقولو هاني لقيتو.. ها هو حدايا.. كيبغيني... ايصوني وايتهلا فيا.. فينك ابابا تشوفو.. تقهرات وحسات براسها باغة تبكي وفنفس الوقت خاثها تقمع راسها.. هبطات راسها حدراتو كتشوف فصباع يديها.. حتا دار فجأة لجيهتها ولاحظ راسها لي مهبطاه ونطق... 

براء :مالك!!! 

تالاسين :(بصوت منغنغ) والو.. 

براء :(عقد حجبانو) هزي عينيك فيا.. 

ما تحركاتش.. زاد قرب منها كيحاول ما بين والو قدام ناس... 

براء :قلتلك شوفي فيا... هزي راسك

هزات عينيها فيه.. وهو يعقد حجبانو كثر.. متفاجأ من الدموع لي معمرين عينيها.. حط صبعو على ذقنها كيدقق فوجهها.. وهي دورات وجهها مخبعاه على الناس وكتمسح دموعها بطراف صباعها...

براء :علاش كتبكي... شنو واقع... 

تالاسين :والو ابراء.. غير خليني

براء :(بحدة) كيفاش خليني... هضري!!!!! 

تالاسين :الناس كيشوفو فينا صافي.. 

براء :وشغلي فالناس.. علاش كتبكي!!! 

تالاسين :(غلباتها البكية) ما كرهتشي يما وبابا يكونو معايا اهنههههئ.. والله ما كرهتوووووم ابراء.. مخليين بلاصتهم عليا بزاااااف اههئ أهنئ.. 

قلبات وجهها مخبعاه.. ما باغة حد يشوفها كتبكي.. وعارفة وجهها ايتجخلط دابا.. عيات حابساها وطلقاتها.. تبهض هو فيها.. بقى غا كيشوف ما لقى ما يقول.. شنو ما قال ما ايواسيهاش... وما ايعوضهاش على غيابهم.. تنهد وجرها عنقها عندو كيمسح على ظهرها والناس كيشوفو.. وبداو كيتمتمو كلها وشنو كيقول.. شاف فمو وعائلتو لي كيسولوه بعينيهم ورؤيا لي وقفات باغة تجي.. وهز يدو بمعنى غير خليك وطمنهم بعينيهم.. وبعد عليها شوية.. وتقابل معاها كيهمسلها.. 

براء :شششش.. صافي مسحي دموعك.. عارف بلاصتهم ما يعوضها حد عندك.. بلحق ما عندنا ما نديرو.. مكتاب الله كيتصرف.. دعيلهم بالرحمة وما تبكيش.. كون كانو ما يبغيوش يشوفوك كتبكي فنهار عرسك..

تالاسين :يا ريتهم كانو ابراء.... يا ريييييت اههههئ اههههئ.. 

براء :كلمة يا ريت عمرها ما نفعات.. وعمرها ما رجعات الميت ولا صلحات لي فات..

تالاسين :(حانية راسها كتبكي ودمعتها قطرات على لبوكي دالورد)

براء : مسحي دموعك صافي.. ها الماكياج ديالك ايتخربق وترجعي خايبة.. 

تالاسين :(هزات عينيها شافت فيه وقلباتهم) 

براء :(باغي يضحكها) هههه عرفتي وخيابيتي نسمح فيك بارزة هنا بوحدك ونمشي.. ما تعرفيني ما نعرفك.. 

تالاسين :(قلبات وجهها ) 

براء :(تنهد مقهور عليها.. وحط يدو على خدها كيمسح دموعها) وا صافي.. بلا بكى الله يرضي عليك.. ديريلي خاطري.. على وجهي ما تبكيش

هزات عينيها فيه مدمعين.. حركات راسها بالإيجاب.. وشافت لفوق كتمسح عينيها بطراف صباعها وتشمر على نيفها.. جر منديل من جيبو كيمسحلها عينيها بلا ما يخلطلها الماكياج لي فعينيها.. وعطاهلها شداتو بيديها مسحات نيفها.. وهو مقابلها..

براء :مزيان دابا!

تالاسين :(تبسماتلو) اه.. مزيان

براء :وهاكاك ضحكي.. هانتي خليتي كلشي يتفرج فينا.. 

دارت كتشوفو فين كيشوف.. شافت فالطبلة ديال رؤيا والباقي.. لقاتهم كيشوفو فيهم مشوشين.. تبسماتلهم ودارت شافت فالناس وهي غرقانة فحوايجها.. 

تالاسين :(بهمس) ما قدو فيل زادو فيلة.. دبا ايبقاو هايدا حاضيينا

براء :(ضحك) ههه نخطفك!!! 

تالاسين :(دارت شافت فيه) اه عافاك.. 

براء :(تبسم وقرب عندها عاض على شفاهو التحتانية وكيشوف فشفايفها) بلحق حتا حاجة ما فابور... 

طلعات حجبانها بزوج بدهشة.. ورجعات راسها لور ودارت بالزربة كتشوف شكون كيشوف فيهم.. وطبعا.. كلشي حاضيهم الا القلة القليلة لي مشغولين.. سرطات ريقها وحنات راسها كتهضر تحت سنانها وتبسمات ابتسامة صفراء .. 

تالاسين : باسل.. والله حتا باسل.. كلشي كيشوف فينا الزمر

براء : ومالكي باغة البيليكي الزمر دبصح هههه

تالاسين :ما تخطفني ما نخطفك.. فوتني غا عليك وبعد مني

براء :تخافي غا نديرهالك قد فمك ونخليك بارزة كي لهبيلة هنا بوحدك.. 

تالاسين :(ميقات فيه) ايوا هي لولة..الما والشطابة.. شكون شادك

شاف فيها مطلع حاجبو ومبسم نص تبسيمة.. وهي كتقلب وتشقلب عينيها فيه.. شاف وسط عينيها مباشرة مطولا.. كأنه كيقولها واش مأكدة.. وهي كتقليه بعينيها.. تنهد وسرح صوتو وناض وقف على غفلة مخليها خرجات عينيها كتشوف فيه.. وهو كيسد صدافة كوستيم ديالو.. شافت فيه مبهوضة وشافت فالناس ورجعات كتشوف فيه وتهضر تحت سنانها.. 

تالاسين :فاين ماشي!!!!!!! 

براء :(دار شاف فيها مطلع حاجبو) ياك قلتي الما والشطابة.. ايوا كرطي مورايا دابا 

تالاسين :من نيتك..!!!!! 

براء :باش هاد المرة تبقاي تعرفي شنو كتخرجي على فمك.. 

تالاسين :(ضحكة صفراء) ههه عملتيها بصح.. غير كنت كنضحك معاك ههه.. شعندك ما كتعرفشي الضحك

براء :(حابس الضحكة) دابا انا لي ما كنعرفش نضحك.. 

تالاسين :وشكون!!! 

براء :شوفي نتي دابا.. مهم هانا مشيت.. 

خلف خطوة وهي توقفو مخرجة عينيها ورجعات كضحك ضحكة صفراء فوجوه الناس وهزات عينيها فيه.. 

تالاسين :(تحت سنانها) برااااااء دوز تجلس الناس كيتفرجو فينا

براء : هادشي كان خاصك تفكري فيه قبل.. 

تالاسين :برااااااء واش من نيتك زعما ولا كتفلا... فاين ماشي!!!!! 

دار شاف فيها وفتعابير وجهها وهي مبهوضة ومفافية.. عيا حابس الضحكة وطلقها فوجهها وهبط لمستواها باس جبينها وهو كيضحك ورجع هز راسو فيها.. 

براء :ههههه لهبيلة ديالي.. انمشي غير هنا ونرجع هههه حماقيت انا نخلي هاد الزين

تالاسين :فاين اتمشي وتخليني جالسة هنا بوحدي

براء :حبيبة.. انمشي للحمام.. تمشي معايا!!! 

تالاسين :(عوجات فمها) مشي مشي.. وما تعطلشي

ضحك كيحرك راسو يمين شمال.. ودار حاط قبضة يدو على فمو كيسرح صوتو.. هز كتافو وتم دايز غادي جهة الحمامات.. مخليها هي جالسة كدور فعينيها حتا ناضت عندها بيسان كضحك عليها.. وتقشب معاها... وونساتها حتا رجع براء وجلس حداها مطلعها عليها ونست لقى باشش يشد فيها.. بداو الناس كيجيو بشوية بشوية يباركولهوم.. والاغاني خدامين والنشاط بادي.. ولي عوال يشطح راه ناض.. ولي محيح محيح.. وجواد وجهاد دايرين خدمتهم كيجمعو فالنوامر ما خاطيين حتا وحدة...

كانو جالسين كيهضرو مع بعضهم ويضحكو مرة مرة.. حتا كتوقف عليهم شامة بقفطانها وشالها وياسين راجلها... هزو عينيهم فيهم.. تبادلو النظرات لوهلة بغرابة.. وتقدمو كيباركولهم وهما كيرحبو بيهم.. جلس براء من بعد ما كان واقف كيسلم عليهم وتنهد وهو متبعهم هابطين فالدرجات وغاديين جهة الطبلة دالعائلة.. دارت عندو تالا ولاحظات نظرتو الغريبة ووجهو لي تبدل ونطقات..

تالاسين :شعندك!

براء :(تبسم ابتسامة صغيرة) والو..

مزال كيهضر حتا شاف قدامو وهو يبانلو سعد لي جاي جيهتهم.. كيقاد فكوستسمو وهاز راسو مبسم.. طلعو وهبطو وقلب وجهو للجنب كيضحك بالفقصة كأنه كان عارفو.. توقعها فاش شاف شامة وياسين.. وظنو ما خابش.. رجع هز راسو لقاه وصل عليهم.. ونطق..

سعد :مبروك للعرسان

دارت شافت فيه من بعد ما كانت كتشوف فبراء.. علات حجبانها بزوج متفاجئة ومستغربة... ودارت شافت فبراء بالزربة. ورجعات شافت فسعد مفافية...

تالاسين :سسس. .. سسعد!!

قرب وقف عليهم وهو مبسم ابتسامة خفيفة.. عينو كانت فبراء وماشي فتالا.. براء لي كيشوف فيه بنظرات ما نقدروش نقولو عليها نظرات ترحيب ابدا... لاقا حجبانو بنظرة حادة فيه.. تبادلو النظرات بيناتهم لثواني... وتالا عينيها كتمشي وتجي بيناتهم.. وكتسرط فريقها خايفة من شي حرب ولا شي روينة تنوض.. طاحت يديها على يد براء لي جامعها على شكل قبضة ومزير عليها.. وبدات كطلب السلامة فخاطرها... حطات يديها على يدو وزيرات عليها... الحركة لي ردلها البال سعد لي واقف.. وتبسم ابتسامة. جانبية بحال الا كاع ما مسوق... وهز راسو فبراء.. 

سعد :مالك مكشر اصاحبي.. طلق البشرة راه عرسك هذا ههه

براء :شنو جاي دير هنا!!! 

سعد :كنت دايز وقلت نجي سلم.. ومنها نيت نتعشا معاكم توحشت طياب لعراسات هههه

براء :(بغضب) علاش كتقلب!!!! توحشتي لعصا.. ما بردش لحمك من اخر مرة

سعد :(حك عنقو) مزيااااان منين جبدتي داك النهار... يدك طلعات حرشششششة اصاحبي ههه

براء :ما صاحبكش انا

تالاسين :(زيرات على يدو) براء... تهدن

سعد :عندك الصح.. حنا خوت.. ماشي صحاب

براء :(شاف فيه التشاش خارج على وذنيه... ومخننننننزر وناوي على خزيت) 

سعد :(تنهد ودار كيشوف فجنابو.. ودار شاف فيه وهو كيقاد كوستيمو ونطق) تكالما اصاحبي.. ما جايش باش ندابز.. وما جايش باش نخسر فرحتكم... جيت غير نبارك ليكم وقولكم الله يدومها محبة بيناتكم... وهنا خلينا نبداو انا وياك صفحة جديدة نساو فيها لي فات... 

براء :الصمت

سعد :(عقد حجبانو بجدية) لي فات.. لا انا غالط فيه.. ولا نتوما.. مكتاب ربي كيتصرف.. يمكن انا تعصبت وفت لقياس.. ولكن حط راسك بلاصتي.. ما كنضنش كنتي ادير قليل

براء : شنو باغي دابا! لاش جاي!!! 

سعد :وااااه اصاحبي لا تعيقش... راه ما جايش نخطفها غير تهنا

براء :(خنزر فيه) 

سعد :كالم كالم... صافي فهمنا... (تنهد) شرف اخاي.. انا ما جايش نجيد الصداع انقولها ونعاودها... جيت باش نساو الذي مضى وما نبقاوش حابسين عندو.. ما دوزناش قليل... راه سنين دالعشرة والخاوة..وقع مشكيل نوضناها وبدلنا الجو شوية ههه.. الله يخلف ويجعل البركة... ما تشدش فالحاجة بزاااااااف.. 

شاف فيه براء مطولا.. كيدور هضرتو فراسو... مطلع حاجبو ومركز الشوفة فعينيه.. وتالا لي وسطهم غير كتصنت وساكتة وحاضيةة معاهم عندك شي واحد فيهم يزغبو ربي ويبغي يلعب لكومبا... 

براء :شنو المطلوب مني دابا!!!!! 

سعد: وااااالو.. غا تبرد وتهدن وتمد يديك ليدي.. هذا ما كان..(مدلو يدو) شنو قلتي

شاف فيدو مطولا.. ورجع هز راسو شاف فيه مزال ملاقي حجبانوو... بدا كيدور هضرتو فراسو.. وكيدور كاع لي وقع فبالو... صحيح انه مظلوم بحالهم.. ولكن قضية انه كان كيبغيها هي لي مخلياه ما قادرش يتغاضى وينسى... وفجأة نطق سعد لي كان كأنه كيقرا افكارو... 

سعد :خاصك تعرف بلي انا ومراتك خوت.. كنا خوت وانبقاو خوت... شي حاجة كثر من هادي ما تحطهاش فبالك.. نتا عارف شحال كتشبه لجهينة.. وعلى هادشي تعلقت بيها... وداك لمعزة فسرناها غلط هههه... دابا واش ما اتسلمش عليا.. اتخليني ماد يدي... راه الناس كيتفرجو فيا... عندك ديرها وتخليني بلاكة!!!! 

قلب وجهو كيسوط... ودار فاش حس بيها زيرات على يديه.. شاف فيها وتبسماتلو... ورمشات بعينيها.. خنزر وقلب وجهو شاف فيه.. 

براء :(بحدة) ما كنعرف لا ختك لا عمتك.. ما تبقاش دور بيها

سعد :فين كنعرفها انا اصلا هههه

براء :الصمت

سكت شحاااااال كيشوف فيه مركز... وسعد مبسم فوجهو ومزال ماد يدو.. 

سعد :اتزيد شوية.. ما انلقى ما نجمع فكرامتي.. وا صاحبي يدي ساعة وهي ممدودة والناس كتحنزز.. خلينا من الناس.. التيتيز اصاحبي اضيع صورتي قدامهم

تنهد براء وناض وقف كيتسالم معاه ويضاربو على لكتاف.. الضحكة لي كان راسمها ما كانتش خارجة من الاعماق... حيث مزال متردد.. وغلبو وجهو قدام الناس.. وعاد فاش كيبقى يفكر كيلقاه ما ليه ذنب فلي وقع... 

سعد :(طبطب على ظهرو) مبروك اخويا... الله يكمل عليكم بالخير.. 

براء :امين.. العقبة ليك

سعد :هههه ان شاء الله.. حتا نشوفو ولادكم

براء :(تبسم ابتسامة خفيفة) ههه ان شاء الله 

سعد :ختي تالا.. مبروك

دار براء كيشوف فيها... بادلاتو النظرة كترمش.. ورجعات شافت فسعد وحركاتلو راسها مع ابتسامة.. 

تالاسين :شكرا 

سعد :(بعد كيسرح صوتو) احححم.. ايوا نخليكم.. نمشي نقلب على رزقي... كتبانلي الدنيا زاهية هههه

براء :ايوا زرب على راسك

دار سعد وجات عينو على بيسان لي كانت كتشوف فيه غير شاف فيها وهي تقلب وجهها بالزربة قبل ما يحصلها ولكن حصلها... 

سعد :(عينو فيها) هههه لي زربو ماتو اخاي ديالي.. (دار شاف فبراء وغمزو) غير بلمهل كيتكال بودنجال

براء :(ضحكة جانبية) تخاف غا تغفل وطير عينك... 

سعد :ما تخافش على خوك هاد المرة.. لي يبغي يطير عيني نطيرو قبل ما يوصلها هههه.. يله تهلاو

تبسم ودار غادي جهة طبلتهم... وخلاهم هما متبعينلو العين... جلس براء وتنهد وهو كيقاد الجلسة ديالو.. ومطلع حاجبو.. وجهو ما بقاش كما قبايلة... شافت فيه تالا وتبسمات... 

تالاسين :ما كتجيشي معاك الغوباشة

براء :(هز راسو فيها وضحك بالجنب) بالعكس.. كيقولولي كتجي معاك

تالاسين :(حطات يديها على يدو) الله يخليك ديما ضاحك

براء :(هز يدو باس ظهرها) خليك معايا وانبقى ديما ضاحك

تبسمات بخجل عاجبها الحال.. وبادلها الابتسامة... تنهدات براحة ودارت كتشوف قدامها... وقلبات وجهها كتشوف بنص عين جهة طبلتهم.. فين توجه سعد.. وكتشوف رد فعل بيسان...

وقف عليهم فالطبلة كيسلم عليهم واحد واحد... ضاحك ناشط ماشط وباينة عليه من وجهو... سلم على لي سلم... وبارك للي بارك.. حتا وصل عندها.. كانت جالسة ومربعة يديها عندها وقالبة وجهها.. ما عاطياهش فرصة زعما فين يمد يدو ليها او يقرب يسلم عليها.. ضحك بسخرية.. ودار جر كرسي وجابو غير لحداها وجلس.. بينها وبين رقية.. لي جالسة كتصفق وعينيها على الناس لي كيشطحو ولي من بينهم جواد وجهاد... حنحن بصوتو وهي مزال قالبة وجهها دايرة راسها كاع ما مسوقة وكاع ما معبراه.. شاف فجنابو وكيضرب بصباعو على الطبلة.. كلشي ملاهي يا مع ااشطيح يا مع العرس وروينتو وهذا كيعيط.. وهذا كيبارك.. وقرب حدا وذنيها بحال الا باغي يهضر ومد يدو من حداها لقرعة دالماء هزها... ودارت هي شافت فيه مخنزرة وكتسوط.. 

سعد :(طلع حاجبو مبسم) ما نشربوش ولا!!!! 

بيسان :(نعتاتلو لقراعي من الجهة لوخرا وقبالتو) رااااه لقراعي الا بغيتي تشرب..

سعد :اوووووه بصح.. ما شفتهومش.. صافي بحال بحال... مهم ماء وصافي ههههه (كيشرب)

بيسان :(طلعاتو وهبطاتو) على بنادم... ما فهمتشي علاش جاي!!!!!

سعد :جاي نحضر لعرس صاحبي.. ومنها نقلب على رزقي حتا انا.. ما عرفتي

بيسان :(بسخرية) شكوووووون هاد العورة لي اتديها فيك..

سعد :(ضحك وغمزها) نتي مثلا...

شافت فيه وضحكات بالجنب وهي كترمي شعرها مور ظهرها الشيء لي خلا كتافها يبانو وهو مراقب حراكاتها... طلع حاجبو كيطلعها ويهبطها بيديك الكسوة لي لابسة بنص عين...

بيسان :ههه كتحلم ونتينا فايق

سعد :(هبط على كاسو كملو) ما نضنش.. ونتي عارفة بلي ما كنحلمش هههه

بيسان :(خنزرات فيه) الا كنتي كتهضر على لي فات فبصح... كنت عورة وضهصة فمرررررررة... ما عرفت فاين كانو عيني... (ميقات فيه معوجة فمها وهي كطلع فيه وتهبط) والله ما عرفتهم فاين كانو بصح...

تبسم بسخرية.. وقرب عندها شيئا ما وحط يدو رماها على كرسي لي جالسة فيه.. ونطق لنبرة ساخرة...

سعد :كانو معميين حيث كنتي كتشوفي بقلبك الغزيولة..

بيسان :(رجعات راسها لور وشافت فيه بتحدي) انا بغيتلو لعمى هاد القلب كثر ما هو فيه...

سعد :هههه اخر مرة خليتك اطرطقي... ورجعت لقيتك مزالة اطرطقي

بيسان :سبحاااان الله.. ما يكونشي حيتاش كنشوف قمقومك الزين زعما!!!!!!

سعد : (ابتسامة جانبية) كتعتارفي بلي زوين بعدا

بيسان :ما تيقش بزاف فراسك... اوك

بعد عليها كيضحك ورجع تكى على الكرسي ديالو مبسم وكيشوف موراها بثقة.. 

سعد :ما نضنش كما قلتي 

تبسم كثر... بنظرة ثقة واااااضحة وهو عينو موراها.. وهز كأس دالعصير من السرباي لي داز من حداه.. دارت كتشوفو فين كيشوف.. لقاتهم ثلاثة دلبنات.. الحالة والزين واللباسي والشعورات وخيط الريح والحيحة نايضة.. حاضيينو بعينيهم وكيضحكو ولي باين وضوح الشمس انهم كيهضرو عليه.. طلعاتهم وهبطاتهم وزفرات ودارت شافت فيه.. شاف فيها بالخف ورجع شاف جيهتهم وابتسامتو الساخرة مزالة مرسومة على وججهو وهو كيشرب فداك الكاس... 

بيسان :(مكمشة فمها) واحد القضية زيدها فراسك.. وحدة فيهم كتعمل النظاظر ديال الشوف.. ودابا على ما بالي ما جابتومشي... 

سعد :ههه اهاه.. ولي معاها

بيسان :واخدين رونديفو مع طبيب العينين.. 

سعد :واااااايلي هههه (ضحك باستهزاء) 

بيسان :امممم على باسل.. اصلا اي وحدة شافتك زوين راها حولة وخاصها العينين الصراحة 

سعد :قد كلامك!!! 

بيسان :(بغرور) حاجة أكيدة 

نطقات رقية من مور سعد.. وبحال الا اختارت الوقت المناسب فاش تنطق.. 

رقية :اداك العفريت.. دور لهنا.. 

دار سعد عندها كيضحك وحط الكأس دالعصبر من يدو وتقابل معاها كيهضر حدا وذنيها باش تسمعو.. . 

سعد :لميمة.. هههه

رقية :احيااااني عليك المسيخيط.. غاااا غبرتي وزيانيتي..شهادشي 

سعد :حلفي بالله حتا زيانيت 

رقية :مالي انكذب اداك بو راس

سعد :وغاااا حلفي عافاك.. باش نثيق بلي ماشي غير كتصبغيني هههه

رقية :هههه غزال غزااااال.. ولي شافك وما صلى على نبي بغيتلو لعمى.. 

حبس الضحكة بزز ودار كيشوف فيها بنص عين... 

سعد :بلاش من ديك امين الميمة

بيسان :(خنزرات فيه).... 

رقية :شئلتي... راه ما سمعتكش... بزز باش كنسمع وسط هاد الصداع.. هضر فوذني

سعد :قلتلك كااااين لي قالو عليك حولة الميمة

رقية :(طلعات حجبانها باستغراب) شكون هما هادو!!!! 

سعد:ههه شي وحدين

رقية :حولة!!!!! حاشااااهم.. لي ما يوصل لشهدة يئول حامضة... بغيتلهم الزغب فالسنان وال..

سعد :شششش ههههه بلا دعاوي بلااااااش ههه.. خليهم منهم لمولاهم الميمة.. نتي مولاة القلب لكبير

رقية :عندك الصح... خليهم منهم لمولاهوم هو يتوالاهم.. ولهيلا ئالك حولة... الوذنين تبيريماو ااااااه بلحئ حتا لعينين اوووهوي ... 

شافت فيه مطولا مخنزرة.. وهو كيقليها غير بعينيه.. زفرات وناضت كتسوط وكتقاد فجلايلها عنداك تعكل فيهم.. وطالعلها الزعاف..

بيسان :خليتلك انا هاد الموطع... يييييخ

تنفضات من حداه وهو متبعها بعينو مطلع حاجبو.. قلب وجهو كيحك ذقنو ويضحك ضحكة دالفقصة.. ما كيبغيش يتسرطلو هاد التعفار الزايد والنفخة الخاوية لي رجعات فيها.. والمشكيل انه ما غالط معاها فوالو... كمل هضرتو مع رقية عادي.. ورجع سكت كيتفرج فالناس... قلب وجهو لجيهة فين كيشطحو كيتفرج فمو وباه لي واقفين كيصففو بيديهم ويتحركو مرة مرة.. كذلك الامر بالنسبة لرؤيا وفراس... وحسن وزينب والاقارب... ومدورين بجهاد وجواد وباقي الشباب لي كيشطحو فالوسط... ولي شاخدينها مع الستاتية لي كتغني وسطهم وعايشة معاهم حتا هي.. وقف عليه السرباي كيقدملو اتاي وتبسملو بامتناع وكمل السرباي طريقو كيفرق.. حتا لاحظ بيسان لي داخلة وسط منهم حتا هي كتشطح.. قلب راسو لجنب شوية كيطل باش تبانلو مزيان وسط الناس.. مطلعها ومهبطها بعينيه بحال الا كيوزنها... محيحة مع خوتها ومرة مرة كيشوفو فبراء وتالا ويعطيوهم إشارات كتحية او كأنهم كيشطحو معاهم ولي عايشين معاهم الجو من بلاصتهم.. لحيوح نايضة والزغارت... وصوت الستاتية وهي بلبستها الأنيقة وضحكتها المعهودة شاخد فالقاعة... بكلمات اغنيتها "نوضي نوضي نوضي... شوفيلك ما تقضي.. وا راك جيتي روووووطار... وا غير هني gلبك... هاداك لي عجبك.. عندي بيه ما يداااااار"

تبسم ابتسامة جانبية وهو كيراقبها وخوتها كيدورو بيها وهي كضحك والضحكة ديالها واصلة حتا لجذر.. ولبستها كتمشي وتجي معاها وهي هازاها باش ما تعكلش فيها... حتا جر جواد معاذ صاحب براء لي كان واقف كيتفرج ويصفق بيديه ويضحك.. (معاذ عميد الشرطة) جروه حتا هو يشطح بيناتهم وشركوه معاهم.. كيعرفو بعضهم ماشي حد غريب عليهم.. دارو كيشطحو مجموعين... وجهاد وجواد دايرين كي الزواق ما كيرصاوش.. حطو يد فيد ودارو بيناتهم بأربعة كيشطحو.. ومن الزهر جات بيسان حدا معاذ وجات يدو فيديها... وهي كتشطح ولكن شطيح بعقلو عكس خوتها.. دقق فيديها من بعيد... طلع حاجبو تطليعة وحدة.. وحك ذقنو بزوج صبعين.. ما طولوش بزاف وطلقو خوتها منهم ودارو غاديين جيهة براء وتالا يجروهوم حتا هما يشطحو معاهم.. وخلاوهم هما باقين مشادين كيشطحو.. وبقات غير هي وياه فالوسط وشي بنات ودراري.. ورجعات طلقات من يديو وكملات معاه شطيح عادي.. ماشي شطيح ديال عادا عادا حك جر... كتحرك وتميل بالرزانة وهو كيصفقلها ويضحك... ولكن هادشي لي ما عجبش الشخص لي كان حاضيها.. وما ارتاح حتا دارو بزوج كيشوفو عند تالا وبراء لي داروهوم فالوسط ودوروهوم.. 

شد يدو فيديها كيشطح معاها وهي اتغرق فبلاصتها.. وغير كتبسم ووجهها حمااااار وهو كيضحك عليها.. كيحرك غير فيديها اما هي ما كتحركش.. وعاجبو شكلها ومنظرها وهي متوترة.. طلق من يديها كيشطح ويهز فيديه وقرب حتا لعندها ويرجع يبعد.. وخوتو بداو كيصفرو هما والدراري ويضحكو... حطات يديها على فمها كتضحك وعينيها كيتغمضو.. اول مرة تشوفو كيشطح.. طريقتو وتعابيرو وحركاتو.. خلاوها ما قاداش تشد راسها..الستاتية كتغني ودور بيهم.. ومرة تغني عليها مرة عليه ولي قلباتها لأغنية واحد ااااخرا..

" ايييييوا ايييييوا هاد ليلة ضوات بالنجوم..فيها لميمة واحلى عرسان معانا اليوم..نطلبو ربي تزيان ايامنا والفرح يدوم... وياااا لالة ويااا لالة.. لعروسة غزالة ولعريس غزال...خرجو يتباهوووو كيف النجمة ولهلاااااال.. وزينك يا المغربية ماشفتلو مثااال... ونتا يا لمغريبي يا سيد الرجاااال"...

واحد اللحظة قرب حتا لعندها وحط يدو دورها على خصرها وجرها جابها على ليمين ديالو وهو مزال شادها.. وكيشطح بيد وحدة مع خوتو ويحرك فرجليه وراسو وعاض على الشفاه السفلية ديالو وهي حداه اتعواج عليه بالضحك.. طلق منها ودار شد فرقية لي مسكينة واقفة بعكازها... وشدها بزوج يدين.. وهي ما رداتوش بدات كتحرك فكتافها معاه وراسها وفرحاااااانة بييييه.. كان كلشي الوسط دايرين وناشطين وكل مرة يدور يشطح مع حد... الفرحة باينة لا على وجهو لا على وجهها ولا على وجوه العائلة... وزااادت الستاتية شخدات الطرح بريتم سريع... "وااااهيا لوليييييد ولاااهيلا عندك الزهر... واااااهيا لوليييد.. ربي عطاك الزين والصغر... وا بغيتلك العز والنصر...واااهيا لولييييد... ديتي مولاة الزين والسر... وا سعداتك عندك الزهر... وااااهيا لوليييييد وا ديتي موشومة لقدام هي والgمرة تواااااام والله يعز لحكاااااام" 

تسالات الاغنية على هاد الكلمة وتعالات مع التصفيقات والتصفير والزغارت والصلاة على النبي.. ودار كيشوف فيها ويضحك.. غمزها وصردلها بوسة بينو وبينها خلاها غا كتشقلب فعينيها حابسة الضحكة... ومداتلو رؤيا كلينيكس يمسح وجهو من لعرق.. شدو منها كيضحك..ورجع جلس هو وياها فبلاصتهم.. خدا نفس طويل وقاد كوستيمو.. وشد داك كلينيكس كيمسح بيه.. 

براء :اووووف.. عراقيت

تالاسين :هههه.. وا شطحتييييييي

براء :كيجيتك بعدا عههه

تالاسين :معللللم هههه ما عمري ظنيتك تكون. كتعرف تشطح ولا تخايلتك كتشطح اصلا هههه

براء :(ضربلها المعنى وهو كيمسح يديه لي عراقو حتا هما وكيشوف فيهم) دابا تشوفي كثاااااار ويعجبك هههه

شافت فيه مطولا مقوصة حجبانها باستغراب.. ما فاهماش شنو قصد بالضبط.. وهو مزال كيمسح ودار شاف فيها كيضحك.. 

براء :مالك ههه

تالاسين :شني قصدتي زعما!!! شني انشوف!!! 

براء :والو والو هههه نساي عليك.. تفرجي مزالين محيحين

تالاسين :(دارت شافت قدامها) ايوا نوض زيد حيح معاهم هههه

براء :لا انا هذا جهدي.. (حنحن كيقاد كول القميجة ديالو وكيشوف فيها بنص عين بابتسامة جانبية) مزال محتاج السوفل هاد الليلة 

هز راسو فيها.. لقاها ما كانتش كتسمعو وكتشوف فالدراري لي كيشطحو ويسيفطولها بوسات وشي كيموت على شي بالضحك.. وكيتحيرو حتا هما بداك شوية دالشعر لي مطولينو حتا خربقوه كامل.. زولو الكوستيمات ديالهم كينيشو بيهم فالسماء وفلخر رماوهم فالارض.. عاد دارت شافت فيه وهي كضحك.. 

تالاسين :هههههه حومق والله... شني قلتي!!! 

براء :والو.. بلاش عليك حسن ههه

فالجهة الاخرى كان جالس سعد لي غير مطلع حاجبو ومتبعها.. مزالة واقفة حدا معاذ وكتصفق لخوتها وتهضر معاه.. وهو واقف حداها مربع يدو كيتفرج فيهم ويضحك معاها.. ما عجبوش المنظر.. عقد حجبانو كثر فاش شافها جلسات معاه فالطبلة لي جالس فيها.. كتهضر معاه وهو كيوريها شي حاجة فتيلي.. وهي مركزة معاه وحاطة عينيها على داكشي لي كيوريها.. وهو مرة مرة كيقلب وجهو يشوف فيها وكتهز عينيها فيه ويبداو يضحكو.. هز كاس ديال العصير ديالو هبط عليه خطرة وحدة.. وحنحن بصوتو وقاد جلستو حاط يدو تحت ذقنو ومعبببببببس.. حاااضيهم بالمعقول.. هزات يديها ضربات فيدو ورجعات راسها لور كتموت بالضحك.. وهو يطلع حاجبو مزيااااااااان وقلب وجهو كيسوط.. بعد دقائق ناضت هي من حداه وهي مزالة دايرة كتهضر معاه ودارتلو حركة بيديها زعما ها هي راجعة..ورمات شعرها موراها... ناض هو دفع الكرسي ووقف لاحقها... داز من حدا الطبلة فين جالس... جات عينو فعينيه.. وخنزر فيه مزياااااااان وقلب وجهو مكمل طريقو مخليه متبعو بعينيه مطلع حاجيو على ديك الشوفة لي دار فيه... 

تبعها وهي خارجة كتقرقب بصباطها وصداع القاعة مزال مسموع.. دارت مع الدورة غادة جيهة الحمامات وتمشات فكولوار طويل.. حتا تجرات من يديها وشهقات مخلوعة..وتحطات يد على فمها سكتاتها ودفعها مع الحيط وقنتها فواحد الدخلة جاية تحت الدروج... 

خرجات عينيها فيه بالمزياااااان.. متفاجئة وفنفس الوقت مخلوعة.. شاف هو موراه وفجنابو ما كاين حد.. ودار شاف فيها عاقدهم ومزير على يديها.. حركات راسها بين يديه باغاه يطلق فمها وكتمتم بشي كلام ما مفهومش... شاف فيها شحاااااال مخليها اتحماق بتخراج العينين ووجهها ايطرطق باينة عليها معصبة.. عاد طلقها.. بمجرد ما طلقها شهقات كتاخد نفس مزيااااااان وهزات عينيها فيه اتاااكلو بعينيها...

بيسان :حمااااااقييييتي... شهاااااااد الزززززمر... 

سعد :(خرج عينيه فيها ونطق تحت سنانو) نقققققصي صوووووتك.. صوووتك نقصيييييه

بيسان :(زادت فغواتها) ما ناقصاااااشي اسيدي.. بشمن حق جاي هااااججم عليااااا.. هااااا.. بشمممن حق..!!!

سعد :نقصييييييييي صوووتك.. ما تغوووووتييييش

بيسان :انغغغوووووت.. ايوا ومن بعد!!!! شني فجهدك ما تعممممل.. هاااا قول شني!!! 

سعد :لي انديرو ما انقووووولوووووش

بيسان :(تنترات منو بعصبية) طلق مني بعداااا وبععععد لهيييييه.. شعندك لااااصق فياااا.. كححححز عليا ابناااااادم ورخي يدي

سعد :اهاااااه انا نكحز.. وداك المكبوت لي من الصباااااح وهو لاصق عليك ونتي كتفرنسيلو كان عااااجبك الحال حداااه وكضحكييييلو... 

بيسان :(شافت فيه مطولا وعاد جاوبات بهدوء) ونتينا شغلك.. عندك شي دخلة.. نضحكلو ولا يضحكلي ونتينا ماااااالك.. شحرق شطااااطتك اسيدي.. 

سعد :(زير على يديها) ما لقيتيهااااش سااااايبة باش ديري لي بغيتي... 

بيسان :(خيبات سيفتها مقصحة وكتحاول تفك منو) وا ديها فرااااااسك.. وطلق يدي قصحتيني

سعد :اترجعي.. واتجلسي حدا مك بعقققلك سمعتيني... ما نشوفكش كدووووري بيه وما نشوووووفكش جالسة كتلوزي... اترجعيييييي وتجلسيييييي بحال عباد الله تفاااااهمنا

بيسان :(تبسمات فوجهو كترمش) اهااااه زيد... شي أمر يااااخور.. شني كيأمر سياااادتكم... (جمعات الضحكة) وااااااا نوووووض.. شكوووون نتينا ااااصلا باش تقولي جلسي ولا نوضي... باااااا!! خااااي!! راجلي!!! خطيبي!!!! فاين. كنعرفك باش تجلس كتأمر عليا... هاد الزابور لمصدي دياااااالك.. مشيييي عملو على شي وحدة مسااالية قبها من غيري... اما انا مااااا نصلاحلكشي..

سعد :شفتي دابا عاااااد حطيتك فرااااسي دبصح... ومن داااااابا لفوووق فين مااا درتي اتلقااايني واقفلك شوووووكة فالحلق... الا كنتي بااااغة تسييييبي انااااا انجمعك

بيسان :واااا مشيييي جمع غااااااا راسك.. وبزاااااف عليك نكون سايبة.. مربية حسن من الف واااااحد فحاااالك.. وكنعرف راااسي شني. كنعمل مزياااااان... وما محتاجاشي لا ليك. لا لغيرك. يوريني شني. نعمل ومعامن نهضر... وهاداك لي جااالس كتعيب فيه... حسن. منك بمليون الف مرة.. بعداااااا حتا واذا هضر كيعرف يهضر.. ماشي بحاااااالك.. مشي عندو يعلمك. شوية دالادب والصواااااب..

سعد :(هز يدو بعصبية قدامها) انهرسلك هاااااد الفم الا ما سكتيييييييييش..

بيسان :طططططططلق مني الزززززمر.. المررررررض.. الويييييييييل... رخي يدي.. شني بغيتي مني... لااااااااش لاحقني... لاااااش باغي توصل اصلا..

سعد: بييييييسااااان.. ما تغوتيييييش..

بيسان : وااااااش مريييييض... وااااش ما كتفهمشيييي.. قلتلك.. بعععععد مممنيييي.. بعد مني.. شني ما فهمتيشي فيها... فرقني عليك اخاي ديالي..

سعد : اااه دابا نفرقك.. وقبل ما كنتيش كتطلبي نفرقك. همممم!!! اولا دابا بااانتلك فواحد جدييييد.. ما بقيتش معمممرلك العين!!!

شافت فيه مطولا مكمشة فمها بعصبية.. وهزات عينيها حطاتهم فعينيه بتحدي.. 

بيسان : الا كنت ندمت على شي حاجة فحياااتي كااااااملة.. هي أنني بغيتك فشي نهااار..(طلعاتو وهبطاتو) ما عرفتشي فاين كان عقلي وفاين كانو عينيا... ما فهمتشي شني كنت كنشوف فيك.. 

سعد:(تبسم بسخرية) بنادم فاش ما كيوصلش لعنب كيقول عليه حامض.. (هز خصلات من شعرها كيلعب بيهم باطراف صباعو) ولكن هادشي ما كيعنيييش بلي ما بقاااش باغي داك لعنب... بالعكس.. كل ما صعابت الحاجة كتحلا (غمزها)

بيسان :(ضرباتلو يدو لي فشعرها) بالعكس.. الحاجة فاش كتطواااااال كتبساااااال.. كترجع قطرااااان.. ما كتحملشي... كطططلع فالرااااس.. وكنبداو نقلبوووو على ما حسن

سعد :(عقد حجبانو) ولي ما حسن هو داك خيناااااا!!!

بيسان :(هزات كتافها ولعبات بشعرها) هو ولا غيرو.. مهم ماشي نتينا.. وزايدون انا ما فهمتشي!!!! شمن دخلة عندك.. علاش موقفني وعلاش انا اصلا عاطياك وقت... (شافت فيدو لي شادة دراعها) طلق من يدي الله يرحم بااااك..

سعد :(زاد قربها عندو وهضر تحت سنانو) اتببببببعدي منو... ما كنضحكش.. انشووووفو كيتلوط عليك ما ايعجبك حال لا نتي لا هو..

بيسان : (ضحكات باستهزاء) ههه لا خلعتيييني.. اوووووه مون ديووووو..

سعد :الا كنتي كتقلبي على الصداع فهاد العرس قربي جيهتو.. وديك الساعة انشوفو واش انخلعك ولا لا

بيسان :(بملل) طلق طلق.. راك زدتي فيه قسما بالله... ما فهمتشي شني باغي مني... يااااك بععدت منك... وا بعععد مني..

سعد : ماشي بخاطرك... فاش كنتي باغاني رونتيلي حيااااتي.. ودابا كتغوتي بعد مني.. دخول الحمام ماشي بحال خروجو الالااااااهم بيسان... وقلتها وانعاودها.. دابا عاااااااد حطيتك فهاد الراااااس مزياااااان.. ودابا عاااااد انفيقلك.. ونتي جريتيني فهاد الطريق من لول... وما انخليكش تجيني حتاااااا لنص وتخوي بيا... 

بيسان :شني كتروووون.. شمن طريييييق وششمن زمر... 

سعد :عارفة مزياااااان شنو كنقصد... ودابا اتمشي وادخلي واتجلسي حدا مك بعقلك... بحالك بحال كااع لبنات لمرزناااات.. وداك ميييخي اتفوتيه عليك... ولا قسما بالله حتا غادي نرون هاد الليلة كااااااملة ونقلب هاد العرس سفاه على علاااااه.. 

بيسان :(شافت فيه كتنهج بعصبية) وااااش نتينا مريييييييييض.. كتزيد غااااا تكرهني فيك وتأكدلي بللي الايام لي دوزتها وانا كنبكي علييييك ضااااعت حرام ظلااااام.. وبلي كنت اكبر حمااااارة وانا حاطاك فعقلي

سعد : كرهيني ولا ضبري لمخك.. ماشي شغلي.. 

سكت وطلع حاجبو وهو كيسمع شي خلفات باين ديال شي مرأة حيث مسموع صوت الطالون.. خرجات عينيها فيه ونطقات كتوشوش...

بيسان :تفوووو ايشوفونا واقفين هاد الوقفة شني ايقووووولو علياااا..(حطات يديها على جبهتها) اووووف الزمر.. شني باغي مني شني

سعد :(حط صبعو على فمو) شششششش.. 

رجع راسو شوية لور كيطل يشوف شكون جاي.. وبالفعل كانت بنت جاية كتقرقب بطالونها وتلعب فشعرها وتوقف تسيلفا... غير قلبات وجهها جيهتهم ورجع تخبع... شاف فجنابو ما عندهم منين يسلكو او فين يتخبعو... وديك الوقفة لي واقفين وهما مخشيين تحت الدروج كانت تقدر تخلي اي واااحد يفهمها غلط... شاف فيها وهي كدور فعينيها وشادة على فمها... 

بيسان :شكوووون.. اواعدي!!! 

سعد :ششش.. غا سكتي.. 

بيسان :كيفاااش انسكت.. غادي نتفضح صااافي انههههههن 

حك لحيتو ورجع طل ودغيا رجع تخبع فاش قربات تدور وتحصلو.. كيسمعو صوت خلفاتها قرباااات ليهم.. وهي قدامو كتويل وتنقر وهو حاير وكيحك فراسو ما عارف ما يدير..

شاف فيها مفتوووون.. وغير سمع الصوت دالصباط قرب ليهم وقرب بزااااف وهي كتويل قدامو ما بغاااااتش تسكت.. فلحظة حط وجهها بين يديه وزيرها عندو. مزيااااان وخشاها فالقنت مدرقها بجسمو العريض ومقنتها فالقنت وحط شفايفو على شفايفها وزيرها مزيااااان مع الحيط ومعاه حتا تبعزاااات وهي مخرجة عينيها بهضها بالمعقوووول.. دازت البنت من حداهم ولاحظات وجودهم وغير شفت الوقفة والمنظر وهي تخرج عينيها ووقفات.. سمعها وقفات وهو يزييييد يدرقها مزياااان وزااد زير عليها حتا قربات تخنق... ونداااامج فالقبلة كثر باش يخليها تمرك زعما وتقلب فالطريق.. وخدا شفايفها وسط فمو كيستطعمهم وهي حاااطة يديها على صدرو لي ما قااااداش تبعدو بيهم حيث مزيرها بالمزيان.. شافت فيهم البنت مبهووووضة وقلبات الطريق راجعة بحالها ورجعات عاود لطريقها.. تلفوها بقات كتمشي وتجي فبلاصتها وفلخر قلبات الطريق دارت بالناقص فمرة ومشااات بحالها مركاااانة.. من زهرهم طاحو فبنت كتحشم ماشي شي وحدة مقزدرة لي توقف دقق وتحنزز وتفرج فالفيلم حتا طلع لكتابة.. غير سمعها بعدات عليهم وهو يطلق منها وبعد عليها... مخليها كتصفك فبلاصتها وكترد النفس لي قطعها فيها... شاف فيها حتا هو مصدوم من لي وقع... وما عارفش واش لي دارو صحيح ولا لا... فجأة هزات عينيها فيه بغضب.. ومع الهزة دعينيها مع هزات يديها حتااااااا لسماء ونزلات عليه بيها للوجه..

هز عينيه فيها حوووووومر ايطرطق... زير على فكوووو حتا تطرساو العضمااااات دفكو من الجناب.. وحط يدو على حنكو.. وهي قدامو كتنهج وعينيها خااااارجين فيه..

بيسان :(هزات صبعها قدامو) ما تبقاااااشي تقرب مني.. سمعتيني.. ااااخر مرة تجي جيهتي... اااااااخر مرررررة

دفعاتو من صدرو وهزات لبستها وتمشات غادة للحمام... خلاتو واقف فبلاصتو مشووووكي ومعصصصصب.. بغااا يطرطق ما حملش رااااسو.. هز يدو وضرب بيها فالحيط قبالتو... سااااط بقوة وقلب وجهو لقاها غبرااات ما بقاتش كتبانلو.. حرك راسو كأنه كيتحلف وقلب الطريق غادي كيزفر والتشااااش خارج على وذنيه وكيحك فخدو.. ومن بعييييد تقشعيه بلي معصصصصب...

دخلات هي الحمام ووقفات موكية على الحيط وحاطة يديها على لافابو واليد لوخرا على قلبها لي ايخرج.. كتحس بيه كيضرب بطريقة ماشي طبيعية..غمضات عينيها وتنفساااات.. شهيييييق زفييييييير.. ودارت شافت وجهها فلمراية.. كلها حمرة مزنكة.. عكارها تخلط فوجهها حطات يديها على فمها وبقات واقفة فمكانها.. عينيها فلمراية وبالها مع لي وقع مرفوووعة.. مزاااااالة ما متيقة شنو وقع... بحال الا كانت كتحلم.. دازت ديك اللحظة بحال البرق... فاقت من سهوتها وشافت فراسها.. طلقات الماء وبدات كتفزك وجهها بشوية وتمسح فمها من ديك الشوهة لي فيه.. وهي كتمسح وتفكر.. وما حدها كتفكر كلامهم. وغواتهم ولي وقع بيناتهم.. وقلبها كيتزير... حسات بالحكرة... وشهقات وسط دموعها... حنات راسها شادة فلافابو وكتبكي... كتحس بحبها ليه حمل على كتافها ما بغاااش يتزاااح.. واخة تعيااااا تكذب على راسها هي ما نساتوش وعمرها تنساااه.. واليوم لي وقع بيناتهم خلاها دوووووخ.. ما بقات فاهمة واالو.. علاش لاحقها اصلا وشنو باغي منها... هزات راسها بالزربة... شافت فوججها ومسحات دموعها... تنفسات بعمق.. وقادات وجهها وحالتها... سرحات شعرها بيديها... وبقات جالسة حتا ارتاحت وعاد فتحات الباب وخرجات...

رجعات للقاعة.. كتهرب بعينيها من كلشي... خايفة يكون شي خد شافهوم.. ولا ديك البنت تكون قشعاتها وهي ما عارفاش حتا شكون... كدور فعينيها وتسرط فريقها.. دخلات دييييريكت ما شافت لا هاك لا هاك... حتا جلسات فبلاصتها.. هزات راسها وهي تلقاه جاالس اونفاص ليها تمااااما فالطبلة.. مطلع حاجبو ومخنزززر وكيطلع فيها ويهبط... شافت فيه مطولا مبلقة عينيها.. ورجعات كرزات على يديها وكمشات فمها وقلبات وجهها كتشوف فجنابها.. ما باغاش تشوف فيه... لاحظات بلي كلشي جالس فبلاصتو والموسيقى تقطعات.. فجأة... تفتحات باب القاعة وتسمع صوت عيساوة.. داخلين بجلالبهم المخططين بالابيض والأخضر.. وبلاغي خوضر فنفس اللون.. ستة دالغياطة ثلاثة من كل جيهة.. ووسطهم عيالات بلباسي يا إما فالابيض كلها يا إما كلها خضراء.. وغاديين مرتبين على حسب لون لبستهم.. وهازين طيااافر فالاخضر ملكي منقوشين بطرزات ذهبييين..ومعاهم رؤيا فالوسط... داخلين بيهم كل زوج هازين واحد... وكيتمشاو فديك الطريق لي كتدي حتا للجلسة ديالهم وهما كيعشقو ويزغرتو... والدقة العيساوية خدامة.. وقفو الناس فبلايصهم كيحضرو على ديك الدقة ويصفقو بيديهم... وموراهم تم داخل السي براااادة.. رجل معرووف خاصة ففاس.. هو لي كيحضّر بالفرقة العيساوية ديالو.. وعندهم دقة وريتم ولا أروع... صوتو وانسجامهم واحترافهم كيخليك تنوضي تندامجي معاهم بزز.. قربو حتا لعندهم وحطو الطبافر مستفين بجناب الطريق وهزو لغطاوات.. مخلييين لي باغي يبركك يبركك.. دفوع على حقو وطريقو.. فيه كل ما كتمناه اي عروسة وبالزاااااايد كاع.. دارو الغياطة فصف واحد وبجنبهم لعيالات كيعشقو ويزغرتو.. والسي برادة وسطهم بجلابتو بثوب السوسدي اخضر ملكي.. كيغني ويعيط على الناس باش يمشيو معاه... هو كيمدح والناس كيرددو موراه بيااااا رسول الله... 

دارت شافت فبراء وهي فرحاااانة وعاجبها الجو.. تبسمات فوجهو بابتسامة عريضة.. شافت فيه بشوفة كأنها كتشكرو بيها حيث هو معاها... تبسم فرحان لفرحتها.. ومرتاح لراحتها.. وهز يدها لي فيدو باسها.. وبحركة عفوية منها قلبات يدو حتا هي وباستها.. مخلياه غير كيشوف مبهوض... هزات عينيها مبسمة فيه... ما قدش غير أنه يتبسملها ويحط يدو مور عنقها وجرها عندو بايسها من خدها... ونطق فوذنيها...

براء :كنبغييييك.. وهاد الكلمة وما كتكفينيش... ربي يخليك ليا وما يحرمنيش من ضحكتك...

هزات راسها وبعدات عليه شوية.. فرحانة بكلامو.. وحشمانة من الموقف قدام الناس... كلشي تخلط عليها.. واكتافات بابتسامة خجولة وسكتات... وهو كيفهمها من حركات عينيها بعد مخليها على راحتها.. ولكن ابتسامتو لي ما قادرش يخبيها فاااضحة سعادتووو.. دارو الناس بعيساوا كيشطحو يد فيد.. ويمشيو ويجيو... وهما مرة يحميوها مرة يهبطو الريييتم..وبرادة كيحيي مرة مرة العرسان... حتا شخدوها مزيااااااااااان وختموها بالصلاااااة على النبي وتصفيقات الحاضرين.. تهزو الطيافر من بعد ما تسدو مرة أخرى.. وتمو خارجين بيهم.. مخليين الناس كيرتاحو ويردو النفس شوية مع بعض الايقاعات الاندلسية والمقبلات لي مزالين كل شوية كيدورو بيهم... 

تفرقو الحلويات وكاع الضيافة وبقى غير لعشا.. وطبعا كلشي وسط أجواء الشطيح والرديح والشعبي خدام.. بيسان جلسات فبلاصتها مقنتة ما كتشووووفش فكمارتو هو لي حااااضيها ومخنزر.. ترفعات ما بقاتش ناضت.. ما حملاتش راسها وما حملاتش المنظر.. واخة ما تنكرش بلي وااحد الصوت عندها كينطق بلي فرحان... داك. الصوت هي لي ما باغاش تسمعو... باغة تقمعو وتخليه يسكت فمرة.. ولكن ماشي بيديها.. حيث داك الصوت قوا منها.. 

تطفات الموسيقى مرة اخرى.. وطفاو معاها الأضواء.. وسقرات تالا فبلاصتها كدور فعينيها.. ما فاهمة والو.. ودارت جيهة براء كتوشوشلو واخة ما كيبانلهاش... 

تالاسين :علاش طفاو الضو عاود.. شني كاين

سكتات كتسنا جوابو ولكن ما سمعات والو.. وبدات كدور فعينيها مقوصة حجبانها فبلاصتها... 

تالاسين :برااااء... فينك!! 

شعل الضو وضرب فوجهها تماما الشيء لي خلاها تهز يديها ودرق عينيها من قوة. الشعا لي ضرب فيهم... وهزات راسها فالضو كترمش... ورجعات حدرات عينيها وهي تفاجئ.. وهزات يديها حاطاها على فمها وكتبسم... كان جالس على ركبتو قدامها... ويدو ممدودالها... وتبسيمتو مرسومة على خدودو... هزات عينيها كتشوف فالناس ما كانوش كيبانو.. حيث الضو حتا هاد المرة مضروب غير عليهم... سمعات غا صوت تصفيرهم وتصفيقاتهم... مزالة ما استوعبات حتا سمعات صوت اغنية... كتعرفها مزيان... كانت اغنية "وجدت الحب... i found love "... حطات يديها على عينيها مخبعة وجهها وهي كضحك.. ورجعات هزاتو وشافت فيه بنظرة دخجل.. سعادة.. امتنان.. تردد.. نظرة مجموع فيها كلشي.. حرك عينيو كيشوف فرجليه وهو كيتمتم بفمو وفهماتو شنو قصد... ضحكات وحطات البوكي دالورد من يديها ومدات يديها شدات يدو... وقف ووقفات معاه.. تبسمو بزوج وهما ما كيشوفو غير بعضهم.. عينو فعينيها وهو غادي بيها لوسط منصة الرقص والضوء تابعهم... مع دخان خفيف وغادي وكيكثر تطلق فجناب المنصة وعلى طول طريقهم... كأنهم غاديين فوق السحاب... حاسة بالتوتر.. ولكن حاسة بفرحة نساتها كلشي... باغة تعيش معاه هاد اللحظة.. لحظة ما اتعاودش... اول رقصة ليهم ما اتكررش.. وقف وسط المنصة ودار جرها من يديها حتا دارت ودارت معاها كسوتها وجات واقفة قدامو كضحك... وبسرعة جرها بالجهد حتا تضربات مع صدرو وهو كضحك وهي كثر منو.. كضحك على حراكاتو وهي حشمانة فنفس الوقت... غمزها وهز يدو حطها على خصرها... تبعاتو وحطات يديها على كتفو... وشبكو يديهم فيد بعضهم وبدات رقصتهم... على الحان رومانسية وهادئة... عينو فعينيها... وويفو قريب يلامس نيفها حيث لابسة الطالون لي علاها حتا قربات توصلو... الدخان فالجناب والضوء لخفيف... والسكوت... خلاهم يعيشو لحظة استثنائية.. كأنهم فعالم ااااخر... بوحدهم... ما كاين فيه حد معاهم.. عالم فيه غير هي ويااااه... ابتسامتو الخفيفة ما فرقاتش وجهو... وهو مركز الشوفة فعينيها... ومخليها براسها مركزة معاه وما قاداش تحدرهم... كان كأنه كيغنيلها كلمات الأغنية... كيقولها ااااه انا لقيتك... ولقيت لي باغي معاك.. لقيت المرأة لي حلمت بيها فيك... فجأة فيقها من سهوتها بحركة سريعة منو ودورها ثلاثة دالدورات فبلاصتها حتا شهقات وهي كضحك ورجع زدحها معاه... خلاها خشات راسها فصدرو كضحك وما قدرش الا أنه يقبل راسها وهي حاطاه عليه وضحكتو العريضة ظاهرة على وجهو.. هزات راسها فيه محركة راسها وهي كتبسم زعما راك هبيل... وقرب حدا وذنيها فاهم مقصودها وجاوبها بكلمة وحدة...

براء :بسبابك

بعد وشاف فيها وبانت ابتسامتها العريضة.. هز يدو لي كانت متشابكة مع يديها وحطها عل كتفو حتا هي... ودور يدو بزوج على خصرها وزيرها عندو وعض على شفاهو... خلاها تبعد عينيها هربانة من شوفاتو لي كيخليوها تغرق... حط جبهتو على جبهتها وهو كيتمايل معاها وكيحركها بين يدو... وباس نيفها وضحك... كيحسها بحال شي حليوة بين يديه... شكلها... شوفاتها.. خجلها... فورمتها الرشيقة... كلشي فيها كيحسسو بلي فيدو بنت صغيرة.. على عكسها هي لي كتشوفو فعينيها سند... راجل بكاااامل صفاتو... هو الكتف لي اتحط عليه الراس.. وهو الحيط لي ايحميها.. كتشوفو فعينيها عظيم... جبل ما يزعزعوش الريح... كتشوف فيه القوة والهيبة... وهادشي لي كيخليها تزيييد تحشم منو كل مرة رمقها بشوفة او لمحلها بحركة...

من بعد رقصتهم... رجعو مرة ثانية لبلاصتهم... فرحانين وما قاداهم فرحة... كان العرس شارف على الانتهاء واغلبية بدا كيجيه النعاس... تقدمات لعروسة هي ولعريس جلسو فالطبلة لي كانت مميزة على باقي الطبالي... طبلة ملكية فتصميمها... دارت بيها العائلة لكبيرة... وبداو كيسربيو الاطباق المتغق عليها... اكلات مغربية مع وجبات جانبية متنوعة... تنوعات الاطباق والشهيوات... وموراهم الحلويات...على ايقاعات موسيقية هااااادئة...

وقبل ما يبداو الناس ينساحبو قرر يهز مراتو ويهرب بيها... وناض من الطبلة وهو كيودعهم وهما كيضحكو عليه.. حتا وقفاتو رؤيا...

رؤيا :صبر ما تديها فين.. تلبس سلهامها بعدا

بيسان :اه وترمي البوكي دالورد... ضروووري

سعد:(نطق باستفزار) مزروبة على راسك...

شافت فيه وقلبات وجهها من يعد ما رمقاتو بنظرة قبيحة هو فاهمها... ورجعات شافت فخوها لي بانو عليه ملامح التضايق كأنه طفل صغير...

براء :واخة واخة.. وا طلقو راسكم

جهاد:هههن سربيو السيد راه مزروووووووب

برك على ديك مزروووب قاصد يوصلو ميساج اغلبية فهموه وحبسو ضحكتهم عليه... يعقد حجبانو فخوه وقلب وجهو شاف فمو...

براء :يله لا اديرو شي حاجة ديروها.. انا عيييت

رؤيا :واخة

ناضو وخداوها لبيتها.. لبسوها سلهامها وخرجوها بالصلاة والسلام... والدقة المراكشية واقفين فالباب كيتسناو لعروسة لي اتخرج... قبل ما تعتب برا القاعة شدوها لبنات حتا رمات البوكي.. ولي ما تنافساتش عليه بيسان واخة. كانت متحمسة ليه.. ولكن هضرتو عصباتها وما خلاتلها نفس... وطاح فيد وحدة من لبنات.. 

خرجات لعروسة شادة فيد راجلها... هو لي مزروب باغي غير فوقاش يستفرد بيها على عكسها هي لي رجليها كيرجعوها لووور..باغة طريقها من القاعة لطوموبيل تطواااال وتجبد.. شداتها الرجفة والخلعة ولبكية.. وتجمعو عليها.. يمكن فراقهم ما ججاهاش صعيب حيث ماشي نهارها لول... راها فرقاتهم هذا زمان وكانت عايشة معاه... وبعد عناق ودعاوي وبكاء ما قدروش يمنعهم راسو منو وهادشي كلو تحت انغام الدقة المراكشية ونكير براء عليهم باش يسربيو... واخيييييرا ها هي دي.. جالسة حداه.. هو سايق وهي مخرجة راسها كطل من السرجم عليهم ودموعها مغرغرين عينيها وقب السلهام لي كيضربو الريح طاح على راسها... وصوت كلاكصون السيارات كيتسمع موراهم لي تابعينيهم... للحظة تجرات من يديها حتا حسات بسخونية ديال الطوموبيل والفرق ديال لبرودة لي كاين برا... ونطق سابق اي ردة فعل منها... 

براء :ايضربك البرد... 

شافت فيه وهي كتمسح نيفها بكلينيكس.. ورجعات دارت شافت قدامها ساكتة.. 

براء :(كيفتح لكرافاط يزولها) عيييييت هاد النهار.. (بمزاح) معدورتك ما كنتيش باغة العرس ههه

تالاسين :(هزات عينيها فيه وهي كتشمر نيفها) هانتينا ماشي للدار ونعس ورتاح... 

براء :(تبسم بسخرية) ماشي الليلة دالنعاس هادي...

دار غمزها ورجع قلب وجهو كيسوك راسم ابتسامة على وجهو مخليها هي غرقاااات فدوامة التفكير ديالها... غطساااات وما لقاتش اليد لي تجرها... عارفة شنو تابعها.. وعارفة بلي ما اتكونش ساهلة... مزالة كتفكر شحال دعات فصلاواتها فهاد السيمانة.. وشحال طلبات ربي يوقف معاها... خدات نفس كتقوي راسها فيه... وسكتات كتلعب بصباع يديها وتشوف فالطريق ساهية.. حتا فيقها من سهوتها بيدو الباردة لي شدات يديها... 

براء :مالك... علاش ساكتة

تالاسين :(رسمات ابتسامة. كطمنو بيها) والو.. غير كما قلتي داز نهار طويل... عيينا فيه

براء :مأكدة!!!! ما كاين والو؟؟

تالاسين :(كتحاول تخبع توترها) ههه والو شني ايكون

شاف فعينيها بحال الا كيقراهم... وتبسم ورجع شاف فالطريق قدامو... تنهدات وشافت فيه بنص عين مطولا.. عاد قلبات وجهها... شاف فلمراية ولاحظ السيارات لي مزالين تابعينو... والسيارات لي قدامو.. تبسم بسخرية وخرج يدو من السرجم وعملهم باي باي بيديه.. وضوبلهم على غفلة وكسيرا بالجهد حتا خلعها ومشات وجات فبلاصتها وسبقهم ما عرفوه منين داز وخلاهم هما موراه كيزيطو ويغيطو بوحدهم... 

تالاسين :(كتشوف موراها) هربتي عليهم

براء :(شاف فيها ودار بالزربة شاف فالطريق) صافي العرس سالا.. ايوا كلها يشد طريقو علاش مزالين لاحقيني

سمع صوت ضحكتها لخفيفة..ودار شاف فيها مبسم منين سمعها كضحك.. ورجعو لسكاتهم لي فرضاتو هي حيث بداو عينيها كيتغمضو بالنعاس شوية بشوية.. 

وقف بالاوطو حدا باب الدار.. شاف فيها لقاها ناعسة وراسها معوج موكياه على السرجم... تبسم وهو كيفتح السمطة.. وقرب كيطل على وجهها كيعجبوه هاد اللحظات لي كيعتابرها خاااصة يزااف.. هاد اللحظات فاش كتكون ناعسة وهو كيستمتع برؤيتها... ما سخاش بيها يفيقها ولكن كان ضرووري ينوضها... مد يدو كيهزلها الشعرات لي طاحو على وجهها وكيهمس بصوت حنين.. 

براء :تالا.. حبيبة.. نوضي وصلنا.. 

تالاسين كانت من النوع لي نعاسها خفيف وبعيطة وحدة تقدر تنوضلك... حركات راسها مع صوت أنين وتكمشات على راسها... 

تالاسين :(بصوت نعسان) خليني نعس... 

تبسم وهو كيستمتع بصوتها النائم كأنها طفلة صغيرة كتفيقها ماماها للمدرسة وما باغاش تنوض.. 

براء :نوضي نطلعو للدار ونعسي براحتك.. 

نوضها من نعاسها بعد إلحاح منو وهي مدوخة ما قاداش تهز الراس.. غطالها راسها بقب السلهام لي مخدوم بالموبرة سخونة من البرد لي كاين.. دار فتحلها الباب كيعاونها تخرج حيث كسوتها معذباها واصلا هي بزز باش حالة عينيها خايفها طيح ولا تعكل...

براء :نهزك!!

هزات راسها فيه بالزربة واكتفات انها تحرك راسها بلا... عاقدة حجبانها حيث تخسر فيها النعاس وباغة غير فوقاش توصل وطيح تنعس.. خرجات راسها من الاوطو من بعد ما شد يديها.. وضربها لهواء البارد فوجهها لي خلاها تواكض نوعا ما وتفتح عينيها مزيان... شافت فجنابها السهااااات.. الشارع كيصفر وغير صوت لكلاب لي كيستمع مرة مرة.. جر بقايا ثوب فستانها لي بقى داخل السيارة وسدها.. وتقدم شادها من خصرها وهي رامية. راسها على كتفو... ما كان حد فالباب طبعا.. دخلو بالسكات وغير صوت خطوات وتقرقيب احذيتهم لي كيتسمع.. ركبو فالسانسور ساكتين.. حتا لقاو راسهم حدا بايب دارهم.. ما بغاش يطلق من خصرها حيث شايف شحال دايخة بالنعاس... وفتح الباب بيد وحدة.. مع الدخلة فتحو عينيهم بزوج. باستغراب.. منظر فيقها من نعاسها وخلاها تحل عينيها مزيااااان..

يتبع ...